رواية 30 يوم حياه البارت السابع والثامن بقلم الكاتبه اميره أسامه حصريه وجديده في مدونة النجم المتوهج للروايات والمعلومات
 |
رواية 30 يوم حياه البارت السابع والثامن بقلم الكاتبه اميره أسامه حصريه وجديده في مدونة النجم المتوهج للروايات والمعلومات
رصت البنات الاكل عالتربيزات كلها ونوروا انوار السطح واتحول السطح لمائده رحمن تجمع كل الاحباب. في يوم عظيم بيستنوه كل سنه.
طلع الشباب كلهم ورا حاج سعيد ورجاله الحته
حاج سعيد...الله عليكم جميعا متجمعين عند النبي ان شاء الله وكل سنه وانتم طيبين
الجميع...وانت طيب يا حاج سعيد وانت طيب
احمد العربي ...كل سنه وانتو طيبين يا جماعه
رد الجميع عليه
يوسف...كل سنه وانتوا طيبين يا بنات
روحيه...هايص انت فالبنات ياروح امك
يوسف...مش بسلم يااما
روحيه....مش تسلم عليا انا الاول ياولا
يوسف....باس ايدها ازيك ياروحيه وحشتيني وربنا
ادهم....كل سنه وانتو طيبين جميعا
عيسي....يارب ما يقطعها عاده ونتجمع ديما فالخير
حسني....تسلم ايديكم جميعا تعبناكم
مديحه...تعبكم راحه يا استاذ حسني
سهير...يا اخويا ولا تعب ولا حاجه احنا بنستني اليوم ده حسني....خد يا كيمو الشنط دي من ايدي يا ابني
عامر...امسك يالا مني انا كمان ايدي وجعتني
كيمو...ايه ياعم حسني ده كله كل ده بيبسي احنا هنفتح محل ولا ايه
فاطمه...ليه كل ده يا استاذ حسني بس ده الشباب بعتوا قبل الفطار حجات اد كده وحاج احمد العربي بعت حلويات واستاذ عيسي جايب فاكهه وحاج فاروق فاكهه كتير والله كده اوي
حسني...يا ستي ولا كتير ولا حاجه واحنا بسم الله ماشاء الله عددنا كبير وبما ان الشباب كلهم قافلين محلاتهم انهرده فا لزوم الاعده بقي
فاطمه...تسلم ايدك يارب
حاج سعيد...يلا بقي العشاء قربت تأذن واحنا مكلناش بسم الله
اعد الجميع كلهم ابتدوا ياكلو مع بعض في جو حلو مليان حب ودفئ وترابط
اعد زين جمب وعد كان بيسرق نظراته ليها و باصصلها بحب ادهم وتوته كانوا بيكلمو بعض من بعيد بلغه العيون منه كانت بتحاول تخبي ابتسامتها من نظرات هيما ليها وفرحتها ان اليوم ده جه عشان ياعدوا مع بعض شويه
شهد وصلاح ونظرات فرحتهم ببعض خصوصا ان خطوبتهم قربت
وكان نفس الحال عند بوسي وصالح وبالرغم من ان بوسي ديما بتحلم تخرج بره الحاره وتشوف حياتها في حته بتتمناها إلا ان كان حب صالح في قلبها موجود وفرحتها لما بس بتلمحه ماتتوصفش....يمكن مش عيب اننا نحلم لاكن لازم لما نحلم احلامنا يكون لها سقف او بمعني اصح حلمنا يكون علي قد قدرتنا.
كان نفس الحال عند رحاب وايهاب....اللي اتفقوا علي تلبيس الدبل فالعيد الكبير قبل فرح توته وادهم..
اما عند شمس وعادل كان حالهم ميختلفش عن الباقي نظرات حب بيحاولوا يداروها لاكن قلوبهم كلها فرحه.
يوسف.مكانش عارف يتلايم علي مريم بسبب روحيه اللي مش مديه فرصه لحد يتكلم
من خفه دمها...
ولاكن...مش ديما كل القلوب حبها ظاهر ولا ديما كل القلوب قلبها مرتاح
في قلوب بتخبي الحب وقلوب متعرفش طعم الراحه
زي منار اللي بتحب وتعشق عامر وهو ميعرفش ومش بيشوفها غير اخته وبس
كانت بتبصله وهو بيتكلم ويضحك بحب ودقات قلبها لو بتنطق كانت قالت بصوت عالي انها بتحب عامر
خلصوا الاكل وشالوا البنات ونضفوا وظبطوا الشباب الترابيزات والكراسي عملوا اعده شكلها حلو وكبيره
أذنت العشا....صلي بيهم حاج سعيد جماعه في السطح فوق وخلي حد بداله يأذن..
عملت فاطمه ومديحه الشاي
خلصوا صلاه واعدو كلهم مع بعض..
مريم...اتفضلب ياخالتي الشاي
روحيه...انتي مين يا حلوه انتي
مريم....انا مريم يا خالتي نستيني انا حتي بحبك
روحيه...مريم مين يقطعني يابنتي بقي ينفع انسي الحلاوه دي كلها
مريم...بعد الشر عنك متقوليش كده. وعموما يا ستي انا مريم خطيبه چو
روحيه...خطيبه مين يا اختي😏 ايه چو ده كيس كراتيه
يوسف...كيس كراتيه ايه ياما چو يعني انا يا اما
روحيه...😒وانت ازاي ياولا سامحلها تقولك كده چو من غير يا سي يوسف ايه مفيش خشي فين اهلها دول ولا تلاقيك جايبها من الشارع😒
يوسف...بااااس ابوس ايدك بس هتبوظي الجوازه ابوها وامها اعدين عم عيسي وهالتي ناريمان يا اما
عيسي....بضحك سيبها براحتها يا يوسف
يوسف....بضحك حقك عليا ياعم عيسي متزعلش والنبي
عيسي...ازعل من ايه بس يا ابني دي ست روحيه حبيبتنا كلنا
ناريمان...سيبها علي راحتها يايوسف احنا كلنا متعودين علي كلامها طب دي روحيه دي حبيبتي
روحيه...بابتسامه ياختي انشالله يخليكي انتي تسمعي عني
يوسف...احييييييه في ايه يا اما دي خالتي ناريمان ام مريم خطيبتي وبعدين مالك بتقوليها بفشخره كده ليه انتي تعرفيني حسيت للحظه انك مشهوره
روحيه...اتربي يا واد بدل ما اقوملك راحت زين اعد جمبها قوميلو ياروحيه الواد ده مترباش وعايز يتربي من جديد
روحيه....يالهوي علي الحلاوه انت مين ياحلو
يوسف...ايه يا اما انا اعد بردو انتي بتعاكسي صاحبي ادامي
الكل ضحك.
روحيه...ومن امته ياواد ولنت بتصاحب ناس عدله كل اللي بتصاحبهم مقاطيع
انما ده زي القمر
الشباب في نفس واحد الله يخليكي يا خالتي
روحيه...بصوت واطي لزين مين دول ياحلو انت
زين...بضحك دول صحابه المقاطيع..
احمد العربي...ازيك يا وعد يابنتي عامله ايه في الجامعه بتاعتك
وعد...الحمد لله يا عم احمد بخير
احمد...شدي حيلك عايزين نشوف احلي مهندسه فالدنيا
وعد...بأبتسامه ان شاء الله
حاج سعيد....عامل ايه ياعمر تاعب عمك زين ولا بتسمع الكلام
زين....لا عمر راجل ياحاج سعيد وبيسمع الكلام
سعيد...طيب عال بتذاكر اللي فاتك ولا لا
عمر...ايوه الحمد لله بذاكر
زين....عمر شاطر كان عايز بس حد يوجهه ويفضل وراه شويه هو الوقت عارف هو عايز ايه صح ياعمر
عمر...صح ياعم زين
ادهم...خليه بس يغلط هعلقه علي باب الشارع
هيما...وتعلقه انت ليه وانا روحت فين🤨
عمر...بأبتسامه لا والله ابدا مفيش غلط تاني
كيمو...مالهم ياض ياعمر اعدنلك عالوحده كده ليه سيبكم منهم تعالي يلا معايا نودي الحلو والفاكه جسمك مش عاجبني لازم تبقي رشيق كده زي عمك كيمو
ضحكوا كلهم علي كريم
هيما...اهو عمك كيمو ده قريب اوي هقفشه ومش هرحمه.
ميمو...بعينك بقي يا ابني حد يسيب الاكل وحلاوته دي كلها ويعمل دايت ورچيم ويعمل فورمه مالها الفورمه بتاعتي مش فاهم ماهي زي الفل اهي
مديحه...انت زي العسل في كل احوالك يا كيمو والله
عامر....هو حد يقدر يقول غير كده يا خالتي ده كيمو ده الحته الشمال
عادل...سبحان الهادي ايه رضيتوا علي بعض تاني ما كنتوا قالبين علي بعض اول رمضان
كريم...انت هتفكره تاني الله يحرقك ما كنت مصدقت رضي عني اطلع انت منها احنا نقلب ونرجع تاني بسرعه
احمد العربي...عملك ايه تاني ياعامر
عامر..😒😒خلاص بقي ياعم احمد المسامح كريم
مريم...شوف الواد بيبصلي ازاي اقول عليكم ايه شكله افتكر😂😂
صالح...والنبي لا تحكيلهم يا عامر
مديحه...حصل ايه ده كيمو طيب
عامر...طيب اوي وابن حلال مصفي والمصيبه انه ما بيوقعش غير معايا انا
اول يوم رمضان المفروض اننا متفقين نريح شويه بعد ما نرجع من شغل البنك وبعد الفطار ننزل معاه الباشا طلع يفطر وبعد الفطار نزلنا عادي وابتدينا شغل وشويه شويه الدنيا ابتدت تبقي موت وموقفني بقي اما فين عالكنافه وانا من الاول قولتله مش هعرف قاللي يابني دي سهله ومفيهاش حاجه وهعلمك المهم هو اصلا مكنش عارف يعمل اي حاجه اتعلمها وبعدين حاول يعلمهالي لحد ما ظبطت جينا بقي اول يوم وبعد ما الشغل شد شويه ايهاب ملخوم ياعيني جوه اعد ياخد الفلوس وشويه ويساعد كيمو والاقيلك ده يقولي ولا ياعامر انا بانتباه نعم ياكيمو
انا طالع بسرعه الحمام ونازل
قولتله ماشي متتأخرش يا كيمو الشغل كتير
قاللي دقايق واجي المهم طلع وانا اتلخمت فالشغل ولقيت الناس عليا زحمه عالكنافه بقيت اتلسع واتحرق وابص علي ايهاب الاقيه بينقط مايه جوه المحل وكيمو مبينزلش حسيت اني بنهار خلاص مش لاحق المهم جيت علي نفسي الزباين كتير ومستخسرهم حرام والجاحد ابو قلب اعد أتصل أشوفه فين كل ده يكنسل وميردش عليا لقيت عادل نازل بقوله عادل كيمو فين كل ده فالحمام
حسيت وقتها قلبي وقف من رده عليا اللي صدمني...قالي حمام ايه ده اعد هو ومنار بيتفرجوا عالمسلسلات الجديده وقتها حسيت برعشه خفيفه في ايدي وحست شفايفي مش طبيعيه قولت بس دي بوادر شلل قولت ما بدهاش شيلت الكنافه وقفلت المكنه وطلعتله خبطت لاقيت منار فتحتلي واللي اشوفه زي مانا عايز اعد عالارض حاطط مخده وساند عليها وادامه صنيه كنافه وبسبوسه وطبق قطايف.
الكل كان بيضحك من قلبه وعيونهم بتنزل دموع من كتر الضحك
عامر....انا اول ما شوفت المنظر ده حسيت اعرااطض الشلل بتزيد وفي وجع في صدري جامد وقتها قولت بس دي ذبحه صدريه ما اكيد المنظر ده مش هيعدي من غير اي خساير وابتديت افتكر كل موقف عمله فيا وانا للاسف ما بتعلمش
فابقوله...انت بتعمل ايه ياكيمو.شاورلي بأيده وهو مش باصصلي تعالي ياعامر المسلسل ده هيعجبك اوي قولتله بقي انت سايبني مدعوك يا كيمو انا وبوب بقالنا اكتر من ساعه وانت اعد هنا تتفرج علي مسلسلات وعينكم ما تشوف الا النور لبسته طبق البسبوسه ونزلت..
سعيد...والله يا ابني بتصعب عليا وكل مره تقلب عليه اقول هيتعلم
عامر...ماناوبنسي ياعم سعيد وبيصعب عليا وبحس انه جد كده وهيجي علي طول وكل مره بتخدع فالدخله بتاعته
احمد....مصيبه انتوا الاتنين
زين...اهم الاتنين دول علي اد المواقف اللي بينهم بس ما يستغنوش عن بعض ابدا
ايهاب....انت هتقولي انا ساعات بحس ان عامر بيحبه اكتر مني
عامر...ايه ده انت لسه مش متأكد😂😂
ايهاب...اه يا واطي
عيسي...ان شاء الله الفرح تالت يوم العيد يا ولاد
صالح...ان شاء الله ياعم عيسي
سعيد...الف مبروك ياولاد ربنا يتتملكم بخير
سهير...يارب ياحاج سعيد ويومهم يبقي حلو كده
عامر...متقلقيش يا ست سهير هيبقي يوم الكل يحلف بيه احنا عندنا اعز من صالح ولاحه وشهد حبيبتي وبوسي
هيما...ربنا يسعدكم يارب عقبالي كده
احمد...ومين ماسكك يا اخويا
بص هيما لزين وهو رافع حواجبه 🤨🤨واحد ربنا يسامحه ماشي يفتري عالخلق
ضحك زين...ريح نفسك قولتلك تخلص السنه دي. اعمل الانت عايزه لاكن قبل ما تخلص لا
احمد....انا شايف ان زين معاه حق علي فكره
هيما...والنبي ايه انت معايا ولا معاه
احمد...انا مع الحق الجواز بيلخم ومسؤوليه ومنه لسه مخلصتش دراسه مستقبلها برده مهم مجاتش علي اخر السنه دي وخلاص
سعيد...صح يا هيما عشان متتلخمش وتقصر في مذاكرتها
زين...ماقولتش حاجه انا
هيما...ايه يا خالتي الواد ده جيباه منين دماغه ناشفه اوي
مديحه....ياابني هي هتطير منك ماتقلقش تخلص بس هي وان شاء الله ربنا يجعل كل ايامكم فرح
زين...يارب نهدي بقي
هيما ...بصله وهو بيعض علي شفايفه من الغيظ ومنه هتموت من الضحك والاحراج.
ادهم...ولا ياعامر ما تسمعونا حاجه انت وبوب
ايهاب...عشان بس عم سعيد ميضايقش
سعيد...لا ليه بس يا ابني انا صحيح مابسبش فرض بس انا مش رااجل شديد اوي كده غني يا ابني ربنا يسعد قلبكم
ايهاب...طيب انا هقول كده الاول انشاد ديني يارب يعجبكم.
سعيد...حلو يلا سمعنا
لاحه...سكووووت يا اخونا بقي
ايهاب....احمممم
حلفت بسرك الاسمي يمينا
بأني قد وقفت لك اليمينا
احبك حب عبد في حياء
لوجهك زاد بالتقوي حنينا
وحق الله لا انسي وقلبي يشاهد قوه الرحمن فينا
صلوا حبلي بكم لا تقطعوه فنحن بحبلكم مستمسكونا وقد دارت علي الكاسات روحي فلم أر غيركم يسقي اليقينا...
الجميع...الله الله
زين...يلا ياعامر
عامر...انا مش حافظ انشاد والله كله اغاني
زين...يلا قول اي حاجه
عامر...طب اغني ايه
حسني...ولا ياعامر غني انت وايهاب حلو الحلو
عامر...تاني ده احنا اتشهرنا بيها
ادهم...اه غنيها دي حلوه
هيما...غنيها انا كمان بحبها
عامر...طيب انا جاي بالطبله بتاعتي وجاهز بصو بقي انا هغني وتردوا ورايا
ماشي...
الكل ماشي
منار كانت بصاله بفرحه وحب ونفسها يحس بيها
وعد كانت عارفه انها بتحبه هي ومنه فا كانوا ملاحظينها
عامر...يلا...احممم مسك الطبله وابتدا يغني
حلو الحلو بكل خصاله الا دلاله ميعجبنيش
الجميع...ميعجبنيييييش.
إيهاب...قالوا بيهجر قولت وماله يهجر يهجر بس يعيش
الجميع وهما بيصقفوا...حلو حلو حلو الحلو
عامر...حلو الحلو مافهش وحاشه غيره بيوعد ولا يوفييييش
الجميع...ولا يوفيييش.
عامر...دا اللى فتح قلبى بطفاشه ثم قابلنى مكلمنيش الجميع...مكلمنيششش
عامر...قولتلوا رد ياباشا ياباشاقالي لابوها متفلأنيش
قولتلوا رد ياباشا ياباشا
قالي لابوها متفلأنيش
وبيعجبنى اكمن جماله
وقه سكر سنترافيش
الجميع....حلو حلو حلو الحلو
إيهاب...وهو بيبص لرحاب كل ماافوت من قدام داره ويشوف وشي يسد الشيش
ابتسمت...رحاب ونزلت عينها لتحت
الجميع....يسد الشيييش
إيهاب...قلبي وعيني عليه احتاروا وبيتخانقوا الحق ياشويش
الجميع..الحق ياشوووويش
إيهاب...يحيا الحب وتسقط ناره اللي تولع ولا تطفيش
عامر....يحيا الحب وتسقط ناره اللي تولع ولا تطفيش
الجميع....حلو حلو حلو الحلو
فضلوا يصقفولهم ويصفروا
عيسي...ماشاء الله عليكم ربنا يحميكم يارب
زين...طيب حاجه كمان
عامر...لايهاب ايه تيجي اما براوه
ايهاب يلا حلو
مديحه...اه دي حلوه
عامر ابتدا يطبل
ايهاب...امابراوة براوة اما براوة
دوار حبيبي طراوة آخر طراوة
قلة حبيبي ملانة عطشانة يانا
اروح له ولا اروح اشرب حدانا
أروح له ولا أروح وبلاش شقاوة
أما براوة براوة على الشقاوة
عامر....حبيبي لما لقاني مريت قـباله
شال طرف شالي وسقاني وطرف شاله
طرف لي عيني يا عيني بس بهداوة
الجميع وهما بيصقفوا
أما براوة براوة على الهداوة
ايهاب....ياناس لوموني لوموني ما ترحموني
احب لوم العوازل لما يلوموني
وانا وحبيبي يا عيني حلوين حلاوة
الجميييع
اما براوة براوة على الحلاوة
عامر....باحلم واغني لحبيبي وفين حبيبي
ماليش حبايب يا عيني وانا ونصيبي
بصتله منار وكأنها بتقوله انا موجوده😭😭😭
يمكن زماني يصلحني بعد العداوة
وأقول ياليلي يا عيني اما براوة
الجميع...اما براوه براوه اما براوه دوار حبيبي تراوه اخر تراوه
...اما براوه براوه اما براوه دوار حبيبي تراوه اخر تراوه......
وخلص اليوم علي صوت اغانيهم وضحكهم وفرحتهم اللي وصلت لابعد من السما
ولسه الحب والسعاده والضحك والفرح مستمرين
ولكن اوقات كتير بتحصل حجات تعكر صفو الفرحه واللمه استنوني الروايه لسه مبدأتش اللي جاي ملوش علاقه باللي راح اللي جاي احلي واجمل😉😉😉
حقكم عليا والله العظيم غصب عني
البارت الثامن..
في صباح يوم جديد عدت ساعات البوم من غير اي احداث الجو كان حر والصيام كان شاق لاكن كانت الساعات بتجري بسرعه عند البنات وستات الحاره الطيبين وهما متجمعين وبيعجنوا وبيجهزوا كحك العيد
بعد تجمعهم عالفطار طلع الشباب الافران ووصلوها بالغاز وكانوا مجهزين لهم كل حاجه
واخيرا أذن المغرب ومل واحد فيهم فطر في بيته وبعد الفطار اتجمعوا علي سطح حاج سعيد كلهم وابتدوا يساعدوا بعض ويعملو كحك العيد اعدوا البنات فالارض وابتدوا ينقشوا مع بعض فالصاجات
منه...ايه رأيك في دي يا ماما
مديحه...جميله يامنه تسلم ايدك
فاطمه...منار قومي هاتي صاج عشان اللي في ايدي ده خلص
منار...حاضر يا ماما
ناريمان...هاتي واحد ليا انا ومريم كمان يا منار
منار...من عنيا يا ابله ناريمان
نعمه....بقول ايه انا هقوم اولع الافران تسخن شويه
مديحه...استني شويه نسيبهم يخمروا ويرتاحو
نعمه..انا هولع بس عشان يسخنوا
شهد...اعملكم حاجه تشربوها
فاطمه...والنبي انتي بنت حلال ياشهد اعمليلنا شاي والنبي فطرنا ومشربناش
شهد...ياسلام عيني
ناريمان...ياسلام لو بنعناع
شهد...عندك نعناع يا ابله فاطمه
فاطمه...طبعا عندي انا جايبه كام حزمه انهرده الصبح ونضفتهم وقطفتهم انزلي هاتي من الشقه تحت
شهد...طيب فين المفتاح
منار...تعالي خديه من جيبي عشان هدومي ما تتبهدلش
فاطمه...بقولك يا شهد بالمره هاتي كام ازازه بيبسي لبكي انتي والبنات من بتوع اميارح انا عارفه ان انتي والبنات ملكوش فالشاي وهتلاقي باقي الحاجه الحلوه اللي جابهم عمك احمد هاتيهم اتسلوا فيهم
شهد...ماشي راحت شهد خدت المفتاح ونزلت جابت النعناع والبيبسي والحلويات وطلعت
وعملتلهم الشاي وحطت الحاجه واعدت كملت هي والبنات
روحيه....وطت راسها علي ايد مديحه وعي بتنقش
مديحه...في ايه ياروحيه بتبصي علي ايه كده
روحيه...ايه نكش الفراخ اللي انتي عملاه دي يا مديحه
مديحه....ده نكش فراخ يا وليه
روحيه ..طبعا انا عارفه انتوا اتجوزتوا وخلفتوا ازاي
مديحه...طب وريني كده اللي انتي عملاه
روحيه...انتي ياوليه عايزه تعدلي عليا
ناريمان....بضحك انا نفسي اقهم انتي نقرك من نقر مديحه ليه علي طول😂😂
مديحه...والله ما اعرف يا ناريمان انا حتي بحبها😂
روحيه...لا بس بعلمها حاجه تنفعها في مستقبلها
مديحه...مستقبل ايه يا روحيه يعني بعد ما شاب ودوه الكتاب
روحيه....ليه يااختي مانتي لسه صغيره وزي الفل عارفه يابت يا مديحه
زمان كنت لسه عيله صغيره اتجوزت ابو يوسف كان عندي 15 سنه كنت زي القمر والعرسان كانوا كل يوم يخبطوا علي باب ابويا وهو يرفض ويتشرط لدرجه ان ابن العمده وقتها طلبني وقتها ابويا كان موافق بس انا رفض واعدت اتحايل علي ابويا ساعتها بقي انا كنت بحب ابو يوسف كان طول بعرض وقمر وكل بنات البلد كانوا بيتمنوا يتجوزوه كان راجل وجدع صحيح مكنش غني كان عندهم ارض صغيره امه كانت ورثاها من ابوها كان هو اللي بيرعاها كان وحيد امه وابوه زي يوسف بالظبط كان يشوفني راحه جايه وعينه متنزلش من عليا كان شعري طويل لحد ضهري وناعم وعيني كانت لون الشمس هي الوقت لونها اتغير والنظر ضعف بس زمان كانت حلوه كان يفضل باصصلي فالرايحه والجايه بس الشهاده لله كان محترم عمره ماعاكسني ولا ضايقني
لما كنت بشوفه كنت بحس اني طايره من الفرحه وقلبي كام يفضل يدق لدرجه كنت بحس ان هيجرالي حاجه
قال لامه انه عايز يتجوزني امه كانت عايزه تجوزه لبنت خالته رفضت كانت وليه جامده وكلمتها مسموعه وهو كان بيحبها اوي وبيخاف علي زعلها فضل كتير يحاول معاها لحد ما في مره كنت بملي مايه جمب الارض بتاعتهم لقيته وقفني ودي كانت اول مره اشوفه من قريب واسمع صوته كان صوته خشن زي الولا زين كده وعينه كانت لون الزرع نفس لون عين زين
مديحه...قولتيلي عشان كده بتحبي زين😉
روحيه....اه في منه كتير المهم لقيته بيقولي انا بحبك ياروحيه وعايز بس اعرف رأيك وقتها اتلخمت ومشيت من ادامه بسرعه والميه غرقتني لقيته جري ورايا قالي متزعليش اني وقفتك انا اول مره اعمل كده بس انا بحبك وعارف انك بيتقدملك عرسان ومتابع كل حاجه عنك وخايف تروحي مني عايز بس اعرف رأيك عشان لو موافقه عليا اعرف اتصرف لو مش موافقه هبعد واسيبك تعيشي حياتك
اتلخمت ومعرفتش ارد بس ابتسمت قالي ان ردي وصله وقالي انا هبقي صريح معاكي انا امي رافضه الجواز منك مش عشانك انتي لا عشان عيزاني اتجوز بنت خالتي اديني بس وقت لحد ما اقنعها قاللي انه حب يكون صريح معايا عشان ابقي مدياه عذر لتأخيره قولتله من غير ما احس وانا هستناك يا إبراهيم يومها ضحك ضحكه عمرها ما راحت عن عيني
ومرت الايام والشهور كنت اشوفه من بعيد اضحكله وهو يضحكلي بعدها اختفي اكتر من شهرين كنت هتجنن عشان اعرف هو فين راح فين مكنتش عارفه اعمل ايه ولا أسأل عليه فين وعشان عادات بلدنا مكنش ينفع اروح وأسأل عنه ومكنش ليا صحاب احكيلهم بقيت اعيط ومكنتش باكل وخسيت خالص لحد ما في يوم الباب خبط وبعد نص ساعه لقيت ابويا فتح عليا الاوضه وقاللي جالك عريس واتفقت معاه علي كل حاجه والفرح بعد اسبوعين وقتها الدنيا اسودت في وشي ومقدرتش وقتها ارفض عشان امي وابويا ابتدوا يشكوا فيا عشان برفض اي عريس وده كان صعب في بلدنا اضطريت اوافق وطبعا مشوفتهوش لحد يوم الفرح لبست الفستان واعدت وسط النسوان وهما بيغنوا ويرقصوا وانا من جوايا هموت وقلبي حزين علي إبراهيم اللي اختفي ومقالش راح فين خلص الفرح واتزفيت وطلعتني امي وحماتي علي شقتي وقتها قلبي كان مقبوض وخايفه وكنت مرعوبه اكتر من حماتي ونظراتها ليا مكانتش طيقاني كنت خايفه من اللي الايام مخبياه..حطولي الطرحه علي وشي وخرجوا وسابوني لوحدي فالاوضه اعدت علي حرف السرير ادعك ايدي في بعض وقلبي هيخرج من مكانه ودموعي علي خدي وفجأه لقيت الباب بيتفتح وقتها حسيت ان قلبي وقف وجسمي تلج واترعش حسيت بخطوات بتقرب مشحت دموعي بسرعه ونزلت عيني فالارض وانا مغمضه مش طايقه اشوفه ولا ابصله لقيت حد وقف ادامي حط ايده علي كتفي شدني ووقفني نزلت دموعي تاني غصب عني رفع الطرحه كنت مش قادره ارفع وشي واشوفه ولا كنت اعرف اسمه مكنتش مهتمه اعرف من ابويا اصل ادام مش هتجوز ابراهيم هيفرق ايه اسم اللي هيتجوزني
لقيته حط ايده علي دقني ورفع وشي بايده وانا لسه مغمضه وقتها سمعت صوته وهو بيقولي وحشتيني ياروحيه مكنتش قادره اصدق وداني فتحت عيني واول ما لمحت ابراهيم ادامي حسيت كأن حد خدني ركبلي جناحات وطيرني فالسما مكنتش مصدقه نفسي وفضلت دموعي تنزل ومن غير ما احس باللي بعمله اترميت في حضنه وفضلت اعيط فضل يطبطب عليا ويقولي حقك عليا وحكالي بقي عن سبب اختفائه لما امه فضلت رافضه زعل وساب البيت شهرين بحالهم لحد ما امه وافقت عشنا مع بعض سنين كتير فالبلد واعدت 7 سنين من غير خلفه وطبعا طول السنين دي امه مكانتش سيباني في حالي ورتني العذاب اللي محدش يقدر يستحمله ولا يعيشه كانت بتزن علي إبراهيم كل يوم يتجوز عليا وهو يرفض كانت يوميا بتسمم بدنه بالكلام وتسمم بدني طول مانا راحه وجايه طول اليوم كنت بعيط منها كنت بستني الليل يجي عشان اترمي في حضنه وانسي اللي حصل منها طول اليوم هو كان عارف ان امه شديده وقويه كان طول الوقت يطيب خاطري ويقولي حقك عليا ياروحيه دي مهما كان امي مقدرش اعمل معاها اي حاجه وانا اقوله عارفه عدينا كده كتير لحد ما ربنا كرمني بيوسف ونور حياتنا وبردو مكانتش سيباني في حالي طول اليوم شقي وشغل فالبيت وتنضيف زريبه واحلب فالجاموس واعمل الاكل وامسح واكنس واغسل واروح املي مايه وانا بطني اد كده بس من جوايا كنت اتعودت وبردو يوسف كان مالي حياتي ووقتي من قبل ما يجي كنت بفضل اتكلم معاه كأنه جه الدنيا لحد ما يجي إبراهيم بليل وبعدها ولدت يوسف وقتها حماتي تعبت جالها المرض الوحش في العضم هدها خالص مبقتش ليها حس ولا صوت بس مقدرتش افرح فيها ولا اشمت واقول ربنا جابلي حقي كانت بتصعب عليا بس بردو الحمل كان كبير عليا وزاد علي الحمل مرضها كنت شيلاها في عيني كأنها امي وقتها امي كانت ماتت فضلت راقده سنتين وطول السنتين دول كانت كل ماتشوفني تعيط وتقولي سامحيني يابنت الاصول مكنتش اعرف انك طيبه اوي كده انا عذبتك كتير ومرحماكيش سامحيني يابنتي قولتلها مسامحكي من قبلي يا اما انتي امي التانيه وكفايه انك امك الغالي يومها عملت حاجه عمري ماهنساها مسكت ايدي وباستها لقيت نفسي بعيط وخدتها في حضني وفضلت اطبطب عليها سكتت مره واحده ببص عليها لقيت روحها طلعت فضلت اصحي فيها واصوت وببص ورايا لقيت إبراهيم واقف عالباب وكان سامع كل كلمه قالتهالي
و حزن الدنيا في عينه وقالي سامحتيها من قلبك يا روحيه ولا صعبت عليكي
قولتله والله سمحتها من قلبي ادفنت وإبراهيم فضل فتره حزين بعدها بفتره لقيته جاي بيقولي حضري شنطتك انتي ويوسف عشان مسافرين مصر بكره استغربت قولتله هنروح ليه احنا منعرفش فيها حد قاللي انا مش طايق اعد فالبلد وقاللي انه باع الارض بسعر كويس وأننا هنبدا حياتنا في مصر وهنعلم يوسف ونكبره وندخله جامعه القاهره خصوصا ان انا امي وابويا ماتوا واخويا الكبير هو كمان ماتووهو زي امه وابوه ماتوا وملوش اخوات واهالينا كل واحد ملهي في حاله ودنيته يعني من الاخر ملناش غير بعض وافقت وفرحت وسافرنا جينا هنا عالسيده زينب وبقيتوا انتوا اهلنا وعشرتنا ومات ابراهيم لما يوسف اتخرج من جامعته كان عنده 21 سنه حسيت وقتها ان الدنيا حلاوتها راحت خلاص اللي كان معوضني هو يوسف واديني عايشه اهو مستنيه اليوم اللي ارجع واشوفه فيه
كان المل اعد بيسمع روحيه ومندمج ومتأثرين في حكايتها
مديحه....ياااااه ياروحيه فاكره كل ده
روحيه....الايام الحلوه مبتتنسيش يا مديحه الناس الحلوه مبتتنسيش يمكن بيقعومن دماغك حجات كتير ويمكن بقيت انسي حجات اكتر بس عمري ما نسيته إبراهيم كان ملاك من السما بيدخل القلب والعقل و يعلم لا القلب بيخرجه منه ولا العقل بيقدر ينساه
منه....انتي طلعتي حبيبه كبيره ياروحيه
رحاب...انتي حكايتك تتكتب روايه يا روحيه
فاطمه....صحيح الناس الطيبه بتعلم فالعقول وبتختم جوه القلب يمكن اكون انا من اول الناس اللي فاكره روحيه لما جت هنا كانت قمر فعلا وجوزها كان امير وفي حاله ومحترم وكان بيحب الضحك الله يرحمه
ناريمان...مسحت دموعها خلتيني اعيط ياروحيه
مريم...عارفه ياروحيه انتي خلتيني حبيته انا فاكره شكله لما كان عايش كان وقتها عندي 15 سنه ان شاء الله لما انجوز انا ويوسف لو جبت ولد هسبيه إبراهيم
روحيه...انتي يابت ويوسف مين اللي تتجوزيه كده من غير أستأذان بنات ناقصه ربايه صحيح وقامت راحت نامت علي كنبه فالسطح وغمضت عينها وراحت فالنوم زي الاطفال.
مديحه....سبحانك يارب بتبقي واعيه معانا وفي ثانيه بتروح في مكان تاني وتنسي الكل
نعمه...غلبانه واميره
مديحه...روحيه دي يمكن هي اكبر مني فالسن بس بحس اني مسؤوله عنها بحسها زي عيل من عيالي بحبها وبخاف عليها
ناريمان...وانا والله يامديحه بخاف عليها ولما بتخرج ونفضل ندرو عليها قلبي بيتخلع من مكانه وافضل ادعي نلاقيها.
مديحه...ربنا يديها الصحه يارب ويفرحها بيوسف ومريم
الجميع...يارب
كملوا نقش الكحك وبعد مده خلصوا ونضفوا الدنيا
وخلص يومهم
في صباح يوم جديد.
في اوضت منه ووعد
وعد...منه بقولك ايه
منه...ايه ياوعد
وعد...البت ياسمين لسه قافله معايا التليفون
منه...عايزه ايه
وعد...بتقولي ان اخوها عامل رحله يوم اول بوم العيد للعين السخنه وهتقول لصحابنا فالجامعه واي حد عايز ييجي يروح يعني لو عايزه انتي كمان تروحي وتقولي لصحابك يعني نغير جو
منه...ايه ده الله بجد طب تفتكري زين هيوافق
وعد...اهو انا عايزه مساعدتك في الحوار ده نتحايل عليه
منه....طب ماتقولي لزين انتي اكيد هيوافق
وعد...وايه اللي اكدلك لوي كده ميتهيأليش بس بو قولناله احنا الاتين ممكن نقنعه
منه...انا با اختي اخاف يهب فينا وبعدين لو زين وافق هفضل اتحايل علي هيما واكيد مش هيوافق
وعد...ياستي بس نقنع زين وبعد كده اقنعي سي هيما بتاعك ده والنبي يامنه انا بجد زهقانه اوي
منه...طب خلاص لما نفطر نقوله بدل ما نعكنن عليه او يعكنن هو علينا قبل مانفطر
وعد...طيب تمام
منه...بس قوليلي بقي يا اختي مالك اول مره اشوفك هتتجنني علي خروجه كده ايه سي هشام اخو ياسمين طالع
وعد..بارتباك هو اصلا اللي عاملها
منه...قولتيلي 😉
وعد...اتلمي يابت 😡
منه...بس انا مبقتش عرفالك حاجه يا وعد ومش فاهمه انتي عايزه ايه انتي معجبه بهشام ولا بتحبيه
وعد....ولا ده ولا ده انتي عرفاني كويس يامنه وعارفه اني مليش في الجو ده
منه...مانا عشان عرفاكي مستغربه
وعد...عادي تغيير
منه...بس انتي عارفه ان زين اصلا لو عرف ان اخو ياسمين اللي عامل الرحله هيرفض انتي عارفه انه لا بييطيقه ولا بيطيق اخته ياسمين
وعد...عارفه
منه...ياسلامممم لما انتي عارفه عايزه تطلعي وتحاولي تقنعي زين ليه مش فهماكي
وعد....هو كده وخلاص يامنه
منه....ماتقوليله وتخلصي ياوعد😉😉
وعد...بصتلها بارتباك اقول ايه ولمين تقصدي ايه مش فاهمه
منه...لا فاهمه يا وعد يا بت احنا مش ولاد خاله ياوعد انا وعيت عالدنيا وانا وانتي بنكبر سوا صحيح انا اكبر منك بسنتين بس احنا الاتنين زي التوأم عايشين مع بعض بناكل ونشرب ونضحك ونتكلم مع بعض اسرارنا مع بعض كل حاجه بنعملها مع بعض انتي اختي قبل ماتكوني بنت خالتي والاهم من كل ده صحبتي وفهماكي وعارفه انتي بتفكري في ايه زي مانتي بتعرفي وبتحسي باللي بفكر فيه من قبل ما اقوله.فا مش عشان انا سيباكي براحتك تخبي عليا
وعد...وانا بقي مخبيه عنك ايه يامنه انتي لسه قايله احنا اسرارنا مع بعض يعني مفيش سر مخبياه عليكي
منه...فعلا اعرف عنك كل حاجه إلا سر واحد بس ياوعد
منه...وايه هو يا فيلسوفه عصرك🤔
منه...حبك لزين ياوعد
وعد... اتصدمت وتنحت😳
منه...سكتي ليه عشان عندي حق
وعد...فضلت ساكته
منه...ردي عليا يا وعد قوليلي اني بحس بيكي وبفهمك
وعد...بأرتباك لا مش كده انتي فاهمه غلط
منه...لا ياوعد انا صح وانتي عارفه اني صح ومش هقولك قوليلي ان كلامي صح بس هقولك كلمه واحده يمكن اللي مخليكي بتداري فرق السن اللي بينكم يمكن عشان طول عمرك بتقوليله ابيه زين فا حاسه انه مينفعش يمكن عشان خايفه تلاقي رد متتوقعهوش
طول الوقت ياوعد بتحولي تقولي ابيه مش عشان فرق السن عشان انتي خايفه يبان عليكي حبك ادامنا بس لو ماما وزين ملاحظوش وقدرتي تنجحي في انك تخبي عليهم مش هتقدري تخبي علي اكتر حد بيحس بيكي من غير ماتتكلمي
نزلت دموع وعد غصب عنها
منه...مسحت دموعها وخدتها في حضنها....طول الوقت كنت بحاول افتح معاكي الموضوع ده وارجع اقول لا اسيبها براحتها لحد ماهي تيجي تتكلم وتحكي كل اللي جواها شايفه حب اخويا بيكبر كل يوم في قلبك وانتي ساكته مابتحاوليش تطلعي اللي جواكي فا كان لازم افتحه ياوعد عشان انا عيزاكي ترتاحي...بس اللي مزعلني بجد انك خبيتي عليا ليه ياوعد محكتيش ليا عشان عالاقل ترتاحي انا مش بسيب اي تفصيله بيني وبين هيما غير لما بحكيهالك عشان ماليش غيرك احكيله
وعد...قامت من حضنها مسحت دموعها ...مكنش ينفع يامنه هقولك ايه بس اني بحب زين وعمري ماشوفت راجل غيره في حياتي طب انا فتحت عيني عالدنيا لقيته هو اللي معايا خطوه بخطوه حبيته غصب عني خفت خالتو تضايق وتكون في بالها عروسه غيري
منه...يابت انتي عبيطه هي هتلاقي احسن منك لزين وبعدين ماما اللي ربتنا كلنا سوا يعني تربيتك دي اربيتها ازاي ترفض با ام عقل تخين انتي
وعد ..معرفش بقي ويمكن علي اد حبي لزين علي اد ما كنت بخاف منه وبعمله الف حساب وطريقته في انه شايف طول الوقت ان انا وانتي اخواته الصغيرين خلت مفيش امل عندي وبعدين انا معرفش حاجه عن زين يمكن عايڜين في نفس البيت بنتكلم نضحك لاكن معرفش حاجه عن حياته الشخصيه معرفش اذا كان بيحب مرتبط واخاف اعرف عشان متصدمش
منه..بس زين لا بيحب ولا مرتبط ماما اتكلمت معاه كتير وكل مره كان بيقول مبيفكرش فالموضوع ده
وعد...علي فكره انا ولا عايزه اروح الرحله ولا نيله انا بس عشان عارفه انه مش بيحب هشام حبيت اضايقه يمكن يحس او يضايق او يغير بحاول اصبر نفسي بأي احساس عشان اضحك علي نفسي بيه
منه...وتضحكي علي نفسك ليه حتي لو هو مبيحبكيش نخليه يحبك
بصتلها وعد ازاي
منه...هقولك احنا هنقوله عالرحله ولو رفض سيبي الباقي عليا
وعد...هتعملي ايه
منه...هقوله ان هشام بيحبك وعامل الرحله دي عشانك
وعد...يخربيتك ده كان فرجني وفجرك قبلي
منه...طب بلاش دي اهو هنقول اي حاجه وقتها المهم اننا نوصله انك عايزه تطلعي مع هشام وياسمين مخصوص وهقوله وعد كبرت بقت عروسه اقولك لو رفض هقولك ادامه احسن بردو يا وعد انا حاسه ان هشام عامل الرحله دي مخصوص عشانك
وعد...انت ناويه تودينا في داهيه
منه ..ياختي ولا داهيه ولا حاجه اجمدي يابت متبقيش خوافه كده هو ياكلك
وعد...ربنا يستر🙈
منه...هيستر ان شاء الله وابو الهول هيتحرك ولو متحركش اهو تبقي عرفتي راسك من رجلك هو اه اخويا وبحبه بس انتي اختي وصحبتي وبنت خالتي ومليش غيرك
وعد...بحبك يا منه
منه. حضنتها وانا بموت فيك❣️
عدت الساعات بسرعه والاذان أذن وفطروا
زين...يلا انا نازل عايزه حاجه يا امي
مديحه...استني اشرب الشاي
زين....لا هفول للواد لاحه يبعتهولي عالورشه عايز اخلص الشغل اللي عندي الوقفه بكره وهنعيد
مديحه ماشي ياحبيبي دخلت مديحه تدخل الاطباق
منه...اخلصي قوليلو
وعد....بارتباك. زيييين
زين...ايوه ياوعد 🙄🙄🙄🙆♀️🙆♀️🙆♀️🙆♀️🙆♀️🙆♀️
إللي خلص القراءه يدخل هيلاقي كل الروايات اللي بيدور عليها من هنا 👇 ❤️ 👇
❤️🌺🌹❤️🌺❤️🌹❤️🌺🌹❤️🌺🌹❤️🌺🌹❤️🌺🌹🛺🛺🛺🛺🛺
جميع الروايات الحصريه والكامله من هنا
انضموا معنا علي قناتنا بها جميع الروايات على تليجرام من هنا
❤️🌺🌹❤️🌺❤️🌹❤️🌺🌹❤️🌺🌹❤️🌺🌹❤️🌺🌹🛺🛺🛺🛺🛺
