رواية بنات نادر والقدر البارت الخامس والسادس بقلم الكاتبه زهرة الرمان حصريه وجديده على مدونة النجم المتوهج للروايات
لا عاد الصبر يلجم مصب العين
ولا مثل الخلك بدموعنه انمثل
طالت والعمر شيخلصه من اتطول
من غم العمر من ينكضي اتعلعل
مساء الورد 🌹🌹
من كال خالي نادر مشيت واسأل نفسي
منو ياترى هذا والوضع مو زين
تقربت وحسيت بديت اتعرف عليه أي هذا الشكل واللون والطول ياما ربتت ع هذا الكتف وياما نمنه سوا ع فراش واحد
وآخرها الصوت وقبلها اكيد الگلوب هي التعرف ناسها
من كال هلا ابو النوادر
حضن مليان خوف وأمان وطمئنيه
وكأن رجعتلي الحياه حسيت صار الي ضهر اي يابن امي وابوي
. عادل بجي ع عيطه يمه يمه
وكأن اكله تعال ياخوي شوف الزمن شلون اخذ مني ام بناتي وعائلتها
وشلون دار الزمان بيه
ياما كنت انه بر الأمان لاخواتي وهاي ازمتي اريد اخو ارتمي بحضنه انكسر ظهري
 |
يطبطب ع ضهري وامي حاضنها من جهه ثانيه ونهله واكفه بيدها ابنها صغير
بعدنه بحراره الشوق التفت حجه روحو انتضروني برا منو وراه
شفت حمايه ثنين بزي ما اعرفه جديد
سحبناه للبيت وانه الف سؤال تبادر لذهني
كعد بصاله بيت خالي كانت الصاله جبيره نوعا ما وكلنا تجمعنا عليه وامي ودها تخليه بحضنها
بديت اني اسأل
_هااا عادل خويه شخبارك ع هاي الأوضاع
عائلتك وين ميس أهلها شنو وضع كركوك
_نادر بعد اذن خالي ولا يهون لكن رايدك بسالفه وحدنا مرخصتك خالي
_كوم خالي بعد خالكم هاي الاستقبال فارغه تفضلو البيت بيتكم
_من وكف خالي وفتح الاستقبال استغربت رد عادل
شصاير عادل تره تعلمت ع الصدمات يابن امي
_"دتعال وبعدين أن شاء الله ماكو شي
فتت. كدامه واجه فات ودخل وسد الباب واني وكف ادور جواب لكل الاسئله
_لا تستغرب نادر ردت احجي وباك وحدنا لان الموضوع يخصنا انه وانته وبس وهاي الدنيا تغيرت
_شكو قلقتني اكثر مما اني صاير اخاف من كل مفاجأه
_اكعد نادر.... اني من صار دخول الامريكان اهل ميس
عدهم عمهم مفقودين
ومكانو يعرفون. طريقهم من انفتحت السجون والدوائر راحوا اهل ميس كل واحد بجهه واني اجو عليه بسياراتهم وبقيت باراضيهم
لحدما صرت نوفل دلشاد باران
_شنو دلشاد شنو باران
_شوف اسمي اذا يبقى نفسه رح الف بالميه يطلعون أصله واخسر وضيفتي
وعملي وكل البنيته بذيج السنين
ف اخوان ميس
اول ما انفتحت الدوائر بختم اصلي سويت اسمي من عائلتهم لكن برتبتي العسكريه لان همه رح يصير الهم شان وي السلطه بكردستان ولازم نحتمي بيهم
ولهذا ذيج الفتره ثبتت وضعي واسمي وتقدمت أوراقي واندمج اسمي ضمن الرتب الجديده يعني الگدامك عقيد نوفل وما حبيت يتغير اسم والدي
صار اسمي نوفل
ومنصبي هناك وبحمايه الأكراد وقريباً نعلئ
وهسه اجيت عليكم اخذكم وهاك شوف
مسويلكم اسماء وهناك محد يعرفك الا انته من بيت باران
وبناتك هم شكلهم يساعد كأنو كرديات
يلا تجهز لان رتبتك بانتظارك رح تصير.
ضابط حاليا وتبقى وره شطارتك
_اگف يابن ابوي اگف جاي برتبه وفلوس وحمايه وتريد نموت ذكرنا واعيش هناك مااكدر وهم مال الاسم شلون كدرت تغير اسمك ولك عويدل
_نادر شبيك الوضع خطر لا تستهين بيه
_اي لكن مو أخطر من الجاي بيه انته اغير اسمي ومكاني وهويتي وهم اصير
بحزب تريدني
لا يابن ابوي ما حزرت انته حالك حال الاجو وي الدبابات
اعذرني ما اكدر اطاوعك بالعكس اكلك اترك هالرتبه الجذب لان مو استحقاقك وراتبك منها كله سحت
وشنو اصير من بيت باران تريد اعيش طول العمر
انه ما مسوي شي حت اغير اسمي اولا وثانيا شلون اكدر اصير ضابط وانه حت جندي مصرت
حرام
_شيخ نادر تره هواي بالغت وهواي كبرت الموضوع الوضع ما يتحمل تبيع مثاليات
. شنو انته مو صرت وي نسيبك وصرت بالحزب وتبعته
.
مستكثر اصير وي نسابتي
_يا عقيد نوفل انه من صرت وي نسيبي الله يرحمه لان جنت مجبور اركض ع لگمه ام وأخوه برگبتي من قبلت بالحزب لان شفت بيها لگمه وسلطه خلتك تصير بالقوه الجويه
. لكن ما فرض نسيبي اغير اسمي وعائلتي لهسه وانه نادر وما اخاف
_نادر الوكت غير الوكت وانته ما تعرف هاي البشر تره العراق صار غابه
الكبير ياكل الصغير
القوي يفترس الضعيف انته صاحب بنات تروح بالرجلين
وهسه اكدر اسويلك شي وأريد أحميك باجر اذا تشكلت حكومه وما عندك ضهر او حزب ع كولتك تروح بالرجلين وانه اليوم كدرت اجيك باجر الله اعلم شنو وضعي لذلك انه اليوم ناوي اخذكم ولعلمك تره بيت خالي مو امين مكانهم
وهااا ازيدك من الشعر بيت عمامك رحتلهم لان توقعت ماخذينك وامينك لكن ما شاء الله لكيتهم ملتهين
_شنو ملتهين وبشنو
_اوف ياگلبك الرهيف يا نادر عمامك ما ملتهين بشي مو زين لا تخاف ع احد خوفك ع نفسك لان وكت كلمن يكول ياروحي
عمامك نص المصارف صارت ببيوتهم فرهدوهن
_شلللون ولمئ ومنى
_شنو لمى ومنئ
لو ما قابلات جان دورن ع الاقل وهمه يكولون مانعرف عنهم اي شي
بنات ما انلچم گلبهم ع امهن ع الاقل اذا مو ع اخوتهن
لكن ملتهيات بالدفاتر
حقهن
يكولن اكيد سافر لان علاء ابن عمك سامع ب صديقك فراس مسافر هو وعائلته فهنه العينتين مخمنات انتم هم سافرتوا ولا يعرفون اصلا زوجتك وأهلها الله يرحمهم لان الفلوس نادر تسكت حلوگ
وتفتح حلوگ
لذلك اكلك امشي وياي خليني أحميك واحمي بناتك وامي هم مو حمل بهذله
_عادل ولك اخواتك ياكلن حرررام حرررام هاي ممتلكات ناس والدوله
_اكلك نادر لو تذبحهم بعد من لزموهن مستحيل يقتنقون بهذا كلامك شنو ما يعرفون الحلال والحرام
هيأو نفسكم نادر يلا
_مااكدر عادل ماكدر.... لا اكدر اصير مثل الحرامي واختل يم الناس الغريبه
ولا اكدر اصير ضابط او حتى جندي شلون اتعايش وي رتبه اني ما عشتها او اخذتها بزودي او حت افهمها
شلون باجر واحد تلاكا وياي وشاف النجمه بكتفي
محد يسأل من أين لك هذا
_نااااادر لخاطر الله لخاطر الله
ترجع قرن ع هذا تفكيرك لان شكال فلان وشحجه علان بابا زمن سبع اليحمب نفسه وعائلته
وانته برگبتك اربع بنات
يعني ع هذا كلامك حتى أنه راتبي حرام مو شي
وها يجوز ساعه ويجن اخواتك الشاطرات وجرب كوللهن حرام الحوسموا رجالجن وولد عمامجن
وشوف شنو ردهن وشوف انته وين عايش
_طلعت من الاستقبال بعد ما صار عصبي عادل ويصيح لخاطر الله لخاطر الله
. واني صدك لخاطر الله اريد ابقى نضيف كدام الله...
شفت امي اول المناظرين وع احر من الجمر
خالي وابن خالي ماعرف يمكن رادوا نبقى وحدنا ملكيتهم
سألت
_وينهم يمه
_خالك طلع وكال الولد البيت بيتهم فد شوي يجون
شبيكم يمه شبيه عادل
_لا يمه هذا مو عادل
عادل سافر وسفرته يمكن أطول
واعرف هو يمشي وراي وحجه
لا حول الله يمممه حاجي ابنج
تره صدمته بأم بناته خلته ما يعرف الدنيا شصار بيها
_عادل اعرف كلش زين وهاي امك احجيلها واذا تروح وياك ما اعارض براحتها لكن العليه انورها واخليها ع بينه بالصار
_وع شنو بايگ سايگ انه اسولفلها
بدا يسولف وياها الكلام الكاله ويحاول يدخل كل كلمه بأن اذايبقي نادر يكتلوه. حتى يأثر. عليها واني حاضن بناتي وأولاد نهله نهله بس عيونها تدمع والضاهر موصيه أمير ما تتدخل وهو اصلا هذا طبعها هادئه وما تحب تتدخل
التفتت امي
_يمه لا تأخذ لا مركز ولا رتبه ولا تعيين بس تروح هناك بس حتى تحمي نفسك
هذا الوكت ما ينعرف الصديق من العدو وانته بنياتك منو الهن وانه ماكدر افاركهن اذا قبل متعلقات بيه
هسه يتيمات ام
_يمه صدك تحجين صدك تقبلين اصير من غير عشيره
_يمه مؤقت مؤقت لحد ما نعرف راسنا من رجلينا
_يمه وربج ما مسوي شي
_ابني انه اعرفك وابخس الناس بيك لكن الناس ماتعرفك مثلي....
نسولف واندك الباب جايات لمى ومنى
فاتن والدموع ويضهرن خوفهن وشوقهن ويحلفن واني سلامي وكلامي وياهن فاتر
ووياهن زوج لمى
البقيه بحياتك خويه والله ماندري
_... حياتك الباقيه.... منى وانتي لمى
اللوم عليچن انتن وبس ازواجچن ما احقهم بشي
_شتقصد ابو حلا.. حجه زوج لمى
_اقصد يا ابن عمي البنات خواتي المفروض المفروض گلوبهن تجيبهن ويحسن بالصار بيه
اما انتم بينا جد مشترك وراح وابوي هم راح هسه انته زوج اختي والمحنه ما مطلوبه منك مطلوبه من اخوات جنت مستعد انطيهن روحي ويبقن عايشات
_ع كيفك نادر دومك حساس تره النعرفه انته صديقك فراس وهو دوم يمشي
وكلنا اكيد وياه رحنا وسالنه من لكينه بيتك مقفول كالو فراس مسافر كلنا اكيد اخذكم تم وانته ماعايز...
شغلك والا فلوس عمي وين راحن عمره كله خلصها يشتغل اشتريت بيت حيا الله وما متعت نفسك لحد ما كبرت شغلك وتجاره مواد غذائية وي نسيبك وصديقك حت ما وگفتنه ع حلالك بالعافيه عليك ولا سالناك ولا حاسبنه ع كعدتك بمكان يلعب النفس وانته اتاجر
من صرت نسيب ال.استاااذ
خجلت يمكن او مرتك الله يرحمها
الها تأثير واشتريت بمكان بيه حظ
انته من يومك باعدنا عنك لان عبالك نريد منك
لكن الحمد لله بينه حسن نيتنه
واجينه ردنا ما تنگطع أوصال الرحم وتزوجنا اخواتكم
وبعدك تلوم
_ضحكت ضحكه قهر وكلت صدك شر البليه مايضحك
همزين صيت الغنا ولا صيت الفكر تدري ليش كلكم تضنون ابوي عنده فلوس
لان ولا مره ردكم من تجون اطلبون من ابوي وولا مره اخذ الترجعونهن كلتوا هذا كاعد ع بنك
وهم لان ولا مره اشتكيت ولهذا يابن عمي
عندي خير من الله...
ولهذا السبب العتب ع اخواتي مو عليكم
.
_خويه نادر المهم هسه انته سالم وهذا الكلام راح وكته
_قاطعت كلام لمى امي ووجهت كلامها لزوج لمى
_يمه أسألك وجاوبني صدك ماخذين فلوس غراض من الدوله
_عمه هذا حگنه السلبهه هدام وعيشنا هو وازلامه بظلم وقمع وقتل وحرمان
_وهي المستشفى أو المصرف او الأسواق المركزيه مالات صدام
او الفلوس المودعه بالبنوك مالات صدام لو مال ناس وميزانيه دوله
_نادر انته لا تفتي بشي انتم غاطين بيها
_منو احنا وشنو الغطينا بيه
_كافي
انته بحزب البعث وباقين بالعين عار انتمائك لهل الملا ال....
_اااسسسعد.... اشو من جنتو تردون واسطه مجان عار ولا من فصلوك من المعهد بسبب.. لو اسكت افضل
مجان عار.... او اواواو
هسه صار عار... ع الاقل ما مديت ايدي ع حرام
_شبيك مصدك روحك انته هو راتب الحزبية كله حرام
شنو ما عايش بالعراق ما شفت المقابر الجماعيه او الشهداء تاخذون رواتب ع حساب تره دم الناس...
_وهسه انته البگتهن حلال؟؟؟؟
حلال اسعد
_الله اكبر شنو راح تتكاتلون يمه اذا نادر صار بالحزب ف الدنيا لطمت بيه ووكفله فراس وخلا بطريقه الله يرحمه مروان والا عمك حزبي لو جدك
_عمه ومن لطمت الدنيا بيه ع فرضاً ما تركهم من صار عنده واشتغل... اشو كملها وتزوج بنته حتى يختم عمله ع اصوله ما يدري ما يدوم حكم
__شوف ما اناقشك لان انه لا ضد ولا وياهم تعرف ليش لان ما استخدمت سلطتي باذيه احد واتحداك اذا تلكا عليه نفذ ابره ماذي احد
. وكف اسعد وعاط تروحن لو باقيات يم اخوجن
_روحن وره ابن عمجن
لكن الفلوس رح تحرگجن خويه فكرن
ما يدومن وع كولته ما دام احد
انتن عدجن جهال لا تخلن ينبني لحم ع عضمهم من مال حرام
مهما صار بيه لكن حللت كل فلس اخذته ولا اكلت حرام وخاف اموت امانه الله تكولن لبناتي. لا يستحن من اسمي او يستعرن مني..
طلعن اخواتي واعرف مراح ياخذن بوصيتي
واصلا هنه ماشيات وره ازواجهن بلا تفكير
. التفت عادل..
نادر انه تأخرت يلا بعد اخوك شفت ابن عمنا تره لا عبالك ما ادري ليش هيج يحجي
ابن عمك هم خله ايده بأيد ذولا الاجو جدد وراح يدافع او بستميت عليهم
يعني بنظره انته حزبي ومطلوب
_عااادل انته ماتفرق عنه هم خليت ايدك وي الاجو وهلدافع هنهم روح انه ما أأمن لا ع روحي يمك ولا ع بناتي توكل ودير بالك من نفسك وع نفسك
روح يابن ابوي
_عمرك خلصته عناد قافل
وانتي يمه
_يمه روح هسه عادل وسحبته
واني ع گعدتي مخلي ايدي ع راسي واحس اريد اموت لو ميت وياكن مروان ألمن بقيت... اوف يابناتي... امي شفتها سحبت عادل ومشوا
وصل للكليدور ورجع..
مع السلامة نادر والأرقام انطيتهم لأمي اول ما ادك عليه تلكاني هنا
وأنصحك لا تبقي لان مكانك انعرف
طلع عادل وانه مثل القابض ع جمر.....
معقول انه الغلط وكل اخوتي همه الصح
راحو وبليل بقيت الوب افكر ما اريد ابقى يم بيت خالي واذيهم
صح الكل مدبر حاله الا انه
. من صار الفجر وانه كاعد توضيت وصليت وبقيت ابجي لحد ما حسيت ابجي بشهكه وصوت مسموع
ربي منك الفرج
لو بس روحي ما اهتم امي وبناتي شلون
اقبل بعرض اخوي واعيد غلطتي السابقه مثل ما يكولون انه غلطت من انظميت للحزب علمود عيشه اخوتي وامي
وهسه نفس الحمل رد عليه واصير بحزب وماعرف شنو هالمره واخوي بصفحه وولد عمي بصفحه
ربي صفي حالي بناتي وامي برگبتي...
طلع اول خيط من خيوط الشمس الصبح
وزوجه خالي الصبح تخبز. طلعت وانه اباوع اندك الباب لكن بعدها من وكت
اجت مرت خالي
_يما ابو حوراء هذا رجال يسأل عنك وبالاسم كال استاد نادر
_طلعت لكيته نفسه قاسم وأخوه الأكبر منه
_شلونك استاذ يلا السياره حاضره
وهسه يطلع وياك قاسم لكركوك وهذا السايق ثقه
تفضلوا اول مره وثانيا مصار لازم للسالفه فوتوا خابزبن خبز حار
وممنون منكم وتعبتكم سحبهم
وهمه يحلفون
_خاف عبالك تكلفنا تره وداعتك بيك وبلياك احنا عدنا شغل وتجاره يعني مو علمودك
_لا والله لكن الشخص الرايد اروحله اجه البارحه واطمأنيت عليه فوتوا
فاتو وخالي رحب بيهم
خالي يحب السوالف ع العشاير واخو قاسم الجبير متكلم ومبين مثقف بسوالف العشاير وتريكوا يمي بقو بسوالف والعرفته همه من اهل الغربيه اصلا من الرمادي
... اخو قاسم اسمه ابو مقدام
والعرفناه بسوالفهم وي خالي يسولفون
عن تجارتهم بالطحين
لكن ببالي البيت الرحت بيه مو مبين همه أصحاب ثروه
راح خالي جوا ووكف ابو مقدام واجه كعد يمي
_استاذ نادر... احنا بيوتنا تقريبا 3 بيوت
كلهن اخوان احنا بيهن
شوكت ما تحس او يصير شي
بس ادك تلفون هذا الرقم نجيك بضرف ساعه ولو انه اكول لو تمشي ويانا معزز مكرم نخليك ع راسنا
_دايم ابو مقدام ماقصرتوا
راحوا
بقيت ايام وانه الوب تالي كلت لخالي اريد اشتغل لان حتى الفلوس الجوا ادينه بدت تخلص وبيت خالي ما ماخذ راحتي لان ما يخلوني اصرف كلت اشتغل وهم العائله تاخذ راحتها
بديت اطلع وبدون ما اكول لخالي او أولاده
. افتر ادور شغل مثل يوم ما راح ابوي وبقيت بمسوليه وحدي
انكتب عليه هاي الحاله
مر اسبوع واسبوع ثاني والوضع ابد مو زين ولا اكو شغل...
واليوم قررت اطلع للمسطر عسى ولعل
كعدت حالي حال العمال لاف غتره ع راسي وانتظر.... اجت سياره اخذت الموجودين وبقوا خمسه وياي تقريبا
. ننتظر
مدنك وافكر وما ا حس الا عيطه اليمي انتبه انتبه دفعني وصوت الطلقه الي احسها بجسمي وفقدت......
دمتم بخير
زهره الرمان _
_
.
اختفت كل ذيج الضحكات وصار بمكانهن هجر وشويه لجمات
ليش الگلبه صفا
تتلاكاه من كل كتر عليه الصدمات 💚G
مساؤكم ورد ❤️💓
#بنات نادر والقدر.
#بقلمي زهره الرمان
#بارت ٦
فتحت عيوني وانه الاشوفهم ماعرفهم ولا اتذكر بأول لحضه شنو الصار وأني وين
اسمع.. هااا خويه شلونك
منو انته وشصار
_الحمد لله على السلامة انظربت طلقه ب ايدك ان شاء الله تصير احسن لكن لا نعرفلك اهل ولا ندري انته منين
وعيت عيوني ثكيله وراسي اثگل والريحه
والمكان مستشفى
رجعت لآخر لحضه شفت بعيوني الرجال بسياره ملثم وصوبني لكن بأيدي
وواحد ثاني بلا لثام شفت شكله صاير وره السايق السايق هو الضربني بس ملثم ماشفت شكله
صارت بالرسغ والثانيه بكتفي
لكن الضاهر نزفت هواي حد ما. لگو احد يوصلني للمستشفى والناس تخاف من المسئوليه لكن إذا خليت قلبت سخر واحد وصلني
الرجال بالاربعين انطيته رقم بيت خالي اتصل عليهم ونبهت لا يكولون للحجيه اطلب ابو أمير او أمير وخليهم يجون
ساعتين واجه خالي وأمير ووجهوهم مخطوفه من الخوف لان هم تأخرت وخايفين عليه
وجانو اصلا يدورون عليه
اجه الطبيب
وصدمني بصدمه ان اصابعي من الخنصر للوسط تضررن وبدون حركه متهشم الأوتار والعظام الرابطه
وخاصه ايدي اليمنى يعني عابت ايدي وليش ومنو ذوله وخاصه الشافهم الولد يكول اصلا جانو يفترون شايفهم عامل بالانشائيه مقابل المسطر دوم نسلم عليه أو نكعد يمه من نتأخر هو محشم الرجال العنده سياره وجايبيني للمستشفى أكد ان نيشن عليه بينما اكو اربع وياي
وهو يباوع من محله....
كتب الطبيب ع خروج ونصحني بعمليه ثانيه لكن امكانيه المستشفيات الحكوميه مامتوفره بيها هيج عمليه
طلعت واني شايل الهم اكثر من قبل
وصلت للبيت ولگيت امي ونهله وحدتهن صاير وجهه دم من اللطم خايفات
وبقن يبجن وامي تكول الحمد لله الحمد رجعت مي خالف المهم تشم الهوا
چانت حيل خايفه وبناتي ع بجيه امي يبجن رغم نهله تسكت بيهن وتهدأهن لكن الخوف مسيطر. عليهن
بقى خالي وأمير يسألون ماتعرفت ع احد منهم او شاك بأحد
بمنو أشك واني ماعندي اي اعداء
مر ع حالي تقريبا شهر حيل تأذيت وانقهر احس صرت عاله ع خالي وانه بس اباوع بعيوني لحد ما بيوم جنت بالطارمه بره الي اكثر وقت ابقى بالنهار بيها
لان شمس وهم ما اريد اضايق البنات وأكثر الأوقات بناتي حوالي ينطني مي او يبدللي ملابسي او حت يحلقن لحيتي حوراء دوم تلقط تريد تغير نفسيتي رغم زغار لكن احسهن شالن الهم وهنه زغار امي كولشي تعلمهن
تفاجأت بدخول امي وخالي من بره امي وين جانت...
اجوا كعدو يمي خالي سبق سؤالي
نادر وروح ابوي حلفتني امك ومخلتني اكلك
_شكو خالي
_انه اكلك يمه... شوف يمه انه اجرت بيت نروح نكعد بيه مو بعيد ع بيت خالك لكن بفروع بعيده شويه
_يمه وبيمن اجرتيه
_عدنه خير من الله شنو لعد والفلوس المنطيهم اليه
_يمه صار اربع أشهر شنو خضرن
زرعتيهن
_يمه تكول يا الله يمه البيت صح زغير بس يكفينه ورح تشوف شلون ترتاح بيه
رد خالي. والله ثم والله ما اريدكم تطلعون واختي لزمت وحلفت وما ردت اكسر بخاطرها لكن ما يعجبك المكان خطوه ما تخطي منا
مكدرت احجي خجلا من خالي وزادت حيره منين اجيب الإيجار واباوع بعيون امي واعرف تفهم هاي اسئلتي
بقينا يومين راحت امي ومرت خالي ونهله نضفن البيت ووياهن بناتي
واني فكرت اروح لبيتي اجيب ع الاقل غراضي شلون نكعد بالبيت فارغ
بدلت ردت اطلع وصلت للشارع واشوف ابو مقدام جاي عليه
نزل من سيارته متفاجاه قاسم يسوق
_هااا استاذ شبيها ايدك مربوطه
_ماكو شي ماكو شي حادث
_تعال تعال حادث شنو فهمني
انه اليوم جاي عليك كلت أمركم للمحلات ولا بينت استبطيناك واجينه
صعدت وياهم
وكلتله مدامكم اجيتو اريد اروح لبيتي اشوف غراضي واجيبهن وبالطريق اسولفلكم...
سولفتلهم وهو يضرب ع رجله وحيل تأثر وضاج وقاسم من يمه يسوق ويعيط يمعود تره الناس تعافت شطلعك
وصلت للبيت لذكرياتي
ل انفال.... لأيام الجنت فرحان بيها اديت واجبي اتجاه امي واخواني البيت انهجر
وبگلبي هم صار الجفا والهجر باخواني الي كلمن اختار طريق
اكتم الحسره والدمع ماريدهن يضعفني
مهما كان ناس غربه
وصلت للباب الخارجي وياريت ما اگبلت
باب. البره مفتوح والاستقبال بابه مخلوع اصلا
وباب للمطبخ مكسر الجام مالته عباره عن خرابه
امشي ع صور بناتي وصورنا وغراضنا
البيت باقي بيه بس أشياء ما تسوه
الأثاث الي ما كادرين ياخذونه مكسرينه بطبر مثل كناتير البنات سويتهم تصميم إيطالي فندقي يلزكون بالحايط
مكادرين ياخذونهن. مكسرين ابوابهم
دمار الصاير ببيتي اهون من الدمار الي صار بگلبي وكل قطعه الف ذكرئ وصدى
اسمع اي أصوات بناتي وانفال
مروان اخوات انفال اطفالهن
هنا وهنا.. وكل شوي اكمش قطعه تذكرني بشي ماعرف شنو الخلاهم يسحبوني
ابو مقدام وقاسم وانعكست مرايا المدخل بوجهي وهي مكسره بالحايط
دموعي يجرن واني ما حاس
ابجي واني بداخلي اكول اقوه نادر اقوه الناس غربه عيب
ثاري انه مبلل وجهي دموعي وصوتهم بعدين سمعته لان جنت فاصل وي أصوات الرحلو
_استاذ يتعوض يتعوض المهم سلامتك
_وحق الله ابو مقدام ما اذيت حت الحيوان ما اذيت بشر والله والله
_نعرف نعرف اطلع
اني اباوع بوجه ابو مقدام ليش ليش
طلعنا وامشي واباوع
لما شفت قاسم يحاول يغطي ع نضري الي صار التفت لبيتي وهو يحاول يسحب نضري
وكفت رجليه جمله
مكتوب ع حايط بيتي مطلوب
انه مطلوب.. بشنو والمن صارت هستيريا
ابو مقدام وهمه يسحبون بيه لحد ما صعدوني
وابو مقدام يحجي
_افا عليك استاذ كلشي يطرأ عليها الرجال وانته رجال ثبت
واني اسأل ليش مطلوب بشنو
اسو احساس انك تحسن وتلاقي الخناجر تقطع بك بلا رحمه انك ناصع البياض فيهدوا لك ألم بدماء الغدر
والطعن..
رجعت ولكيت امي وخالي داخلين إنذار شبيكم يمعودين تحسسوني طفل اني لو عاجز الصدمه خلتني اعيط وامي تصفن بوجهي ودموعها تجري
ابو مقدام وره اربع ايام متفق وي أمير ابن خالي لان وصلوني وبقوا كاعدين يمنه
الضاهر مسولفلهم ابو مقدام ع وضع بيتي
ودخلت امي عليه..
=شوف ايدك ولا روحك بيتك وغراضك ولا بناتك
شحصل مروان الله يرحمه
احمد ربك انك يجوز الك عمل وگفلك وهاي تتعوض وهاي اول علامات رضا الله عليك
وكفلك هالرجال الخير ابو مقدام
البيت صار بيه كم قطعه اثاث اساسيه
_منين يمه منو اثثلي هلمره
=والله يمه أمير راح للبيت لان اشتريت طباخ
ولكيت اخو ابو مقدام بسياره ومنزل غراض للبيت
_صرت نار
شنو يمه يتصدقون عليه وهم بلا علمي انه عاجز ووووينه أمير
اجه أمير..
شلون تقبل وشلون مكلتي
_اهدا نادر ابو مقدام كال دين كل سلعه فاتت للبيت بس تستقر رجعهم ولعلمك تره اشياء بسيطه
_أمير المفروض تكولي
_واني اليوم جاي اكلك وابو مقدام كال
اجي وانه أبلغه بنفسي العصر يجي وافهم منه
_اجه ابو مقدام
_استاذ نادر انته بلا شغل واني ما اطيك الأغراض لوجه الله ولا صدقه
تطلع باجر تستلم شغلك
والاغراض راتب اول شهر مالك ولا فلس
رضيت عمي لو بعدك
_وشنو اشتغل وانه ايدي عايبه وتلفانه
_يمعود معوقين ومكصوصه رجليهم. واديهم ويشتغلون شنو متعجب بضربه
تشتغل بحسابات المعمل مال الطحن مالتنه تشرف ع العمال كل فايته وطالعه تسجلها لعلمك رح ادفنك بالمطحنه يعني من تشوف الشغل تكول لا شي الراتب والاغراض بالنسبه لشغلك غير اطلع دبسك.. شغل ما تحك راسك
باجر تنقل لبيتك لكت الك يومين بيوم الثالث اكص من راتبك
رغم أفهمه يريد يساعدني لكن ما باليد حيلة
وانتقلت للبيت وصح الجايبهم الأغراض اشياء اساسيه وبسيطه حت ما يحسيوني بالعجز او النقص
مرت اليومين ورحت لمحلاتهم
واخذني قاسم ع المطحنه مالتهم جبيره كولش وبالفعل مثل ما كال تحتاج وكفه وشغل
ولا ينحك الراس من الشغل
وهمه معروفين وخير من الله شغلهم
لكن تواجدي بالمطحنه خلاني ما اشوف الشارع الا من اجي الصبح يجي عليه قاسم ما يقبل الا هو ياخذني ويرجعني
واحس خايفين عليه وصار دين برگبتي وكفه ابو مقدام واخوته
اشتغل ولا أريد اتذكر وحتى لو ردت اختلي واتذكر ف بفتره الاكل يجي أبوبكر رجال يشتغل ع ايدي
واكيد موصيه ابو مقدام يبقى ينكت ويسولف ويضحكني يخلي اي موضوع يطير من راسي....
مر شهرين وانه بس بالليل لشوف بناتي وامي
اليوم بالشغل وعدنه وجبه للجنوب لازم نجهز. لوري طحين واركض مستعجل
اسجل واحسب
واجو ثنين لابو بكر يجهزون ببضاعتهم
وركزت ع واحد وين شايفه وووبن ووين نادر....
. تذكرته اي هو هو. الجان وي الضربني هو واكف يم ابو بكر واني ركضت كمشته
بلا تفكير
تعال تعال جفل لكن اني مثبت ايدي عليه كامش بقميصه
انته تذكرتك بقى مركز بوجهي تالي حس ع وجهي وركض بره المطحنه واني وراه اركض اريد بس الزمه
صعد بسياره بيكب واني اريد بس الزمه وسيارات بوجهي لوريات وسيارت حمل واني بس اريد اكمشه
طلعت سيارته وانه فحطت
اجاني همام اخو ابو مقدام هو شغله ع المطحنه
شكو ابو حوراء شبيك
_همام همام بداعتي هذا ابو البيكب تعرفه
_وينه وينه يمعود أهدأ
هسه اطلعه الك لو جوا الگاع
رجعت وابو بكر واكف متحير بالوجبه الناس تأخرت
. مشيت الشغل اني بالي يم هذا الضربوني
بقيت ردت بس اكمل والمغرب يخلص التحميل والقطع ابقى اصفي قوائم وارتب البيع والشراء
وكذا واجه قاسم وابو مقدام الضاهر همام متصل عليهم
كعدوا يسألون شنو صار
سولفتلهم
وبدينا نراجع قوائم وويانه ابو بكر لان يعرفه
ع اي قطع جاي
بدينا نفرز بيهن
وطلعنا اسمه
حجه ابو مقدام..
=اعتبره باجر مثل هيج وكت يمك
ابو مقدام صاحب علاقات. ومن اشتغلت يمهم عرفت شنو علاقاته
بالمعارضين والمويدين وي كل أحزاب وفصائل يعني جامع كولشي لذلك
صح ثاني يوم ثالث يوم من الصبح قاسم وصلني للمطحنه فتت والكه الرجال وابو مقدام وهمام والمطحنه سادينها
وبقوا يحققون وياه والهم. طريقه خلوه يحجي الأول والتالي
ردت اعرف همه نفسهم سووا هيج ببيتي
لكن ابو مقدام للعصر جرجر الجان وياه والضربني
وبقينا يومين لحد ما اعترفوا ع الإنسان الحرضهم
والبيت مالهم علاقه بيه
لكن أسهل من السمعته
عمااار شخص اسمه عمار ونطوني اسمه الثلاثي
المصيبه اسمه جدنا واحد
ابن عمي ابن عمي عمار هو الي محرض ع قتلي ومو بعيد بيتي هوه السوا بيه هيج
بقيت باهت شكول للغربه لابو مقدام ابن عمي هو المأجر ناس مقابل مبلغ حت يموتوني
يحاجوني تعرف واحد بهلاسم واني دنكت اضرب ع راسي
عمار
من عرفوا ابو مقدام واخوته كال ابو مقدام لو ابن امي وابوي الا اتوبه ابن عمك ويضربك نجيبه
حاولت امنعهم
لكن اصروا
_شبيك ابو حوراء شنو الحق حق المره الفاتت طلعت منها بأصابع ورسغ انعوج
المره الجايه من يشوفون تسكت وهذوله اكيد رح يوصلولهم خبر
يكتلونك ومحد يدري عنك
_بس لا تاذونه ابو مقدام بس اريد اساله بشنو ضريتهم
ردت اني اروح لبيت عمامي واكوللهم
لكن ماقبلو
_الي يحاول يقتلك برأيك يتأثر بالكلام هاي ناس تخاف ماتستحي
يومين من انطيتهم عنوانهم
لكيته بالمطحنه ووياهم الضربوني
هم بقوا لحد ما فتت وشفت عمار
. الضاهر تفاجاه
بقيت أحقق وياه وابو مقدام يهدد
وهو ينكر من واجهناه بالنفذوا تالي طلب يكعد وياي وحده
ما قبل ابو مقدام لكن اني استأذنت منه
. خليني اشوف شنو عذره
فوتونه لغرفه وحدنه ورابطين اديه. كعدوه
وصل للباب قاسم
كال
ابو حوراء اني هنا بس كول قاسم اادي الواجب
_مشكور قاسم
اي عمار شنو الشي الخلاك تسوي بيه هيج
ليش بشنو ضريتكم
شوف ايدي عابت رايدين تقتلوني ليش
نادر الكلام الي راح احجيه
صدك اني مجرد وسيط
_وسيط بشنو ولك
_نادر.. عادل عادل راد بس ضربه خفيفه
حتى يخوفك بس وتلجأ اله
وذوله أغبياء ضربوك ضربه واذتك
_وبيتي
_ماعرف عنه شي والله والله مو انه
_اخوي وابن عمي يسوون هيج ع شنو اخوي
. اصيح بصوت عالي الله اكبر عااادل وانتم شلون
شسويت الك لو لعادل
الطعنه مؤلمه. لكن ان تكن من أخيك لن تكن مؤلمه بل تكن مميته
تميت الروح والحياه والثقه والصدق بكل ما حولك...
طلعت من المطحنه واني بحاله هستيريا ماعرف شلون لاحكني قاسم واني اكله وصلني للبيت
. فتت بملابس الشغل كلهن طحين
لكيت امي بالمطبخ وصياني كبار بيهن كبه تمن وهوسه
ويمنه بنيه ما ميزت منو
فتت ليجوا بدون اي كلام لحكتني امي
اديها مليانات اكل
_ها يمه خيرك شرجعك من الشغل
_انطيني رقم عادل بسرعه
_شبيك وعادل شبيه
_ماكو شي بعدين افهمج انطيني الرقم يمممه
اخذت الرقم طلعت رحت اتصل جان اكو تلفون ثريا
دك وانه افكر شنو اكله
_ألوو
_شتريد اسميك عادل لو نوفل
نوفل الي فضلك ع الدنيا كلها حقك تحبه وحقك تسمى اسمه باسمك
بشنو قصرت ولك وياك وشنو اذيتي عليك حت تأجر ابن عمك وناس حتى يكتلوني يكتلون اخوك ولك الغربه ملفيني ويخافون عليه وانته ابن امي وابوي تخلي ايدك بيد عصابجيه يكتلوني
_اسمع نادر
_ششششسسسمع الله اكبر منك الله اكبر منك اربي يتيمات مافكرت من تعوقت
ليش ليش
وتفرهد بيتي وتكسره وتكتب مطلوب عاااادل
بعيطه وما ردت اسمع ردوده سديت التلفون وانطيته لصاحب المحل وطلعت
اسبوع وحت للمطحنه ابو مقدام كال نقدم بلاغ لكن هيه الشرطه بفلوس اطلع اكبر مجرم يعني ماكو فايده مشبعينهم ضرب وتركوهم
وعمار كولتلهم اتركوه لكن قاسم وهمام هم ماخذين منه كم بوكس ع دفره
يلا تاركيه ومحذرينه يحجي
وره هذا الأسبوع اشوف بنيه تجي من اطلع من الغرفه اشوفها يم امي لكن مالي خلك اسأل
وبعدني اشوف امي ع طول بالمطبخ وريحه الاكل ولا تنگطع من البيت
شبه غافي اسمع صوت
اي هو صوته
يشبه صوت ابوي
حاولت أبين الهدوء لكن جسمي احسه نمل وارجف من العصبيه
دخل وكعد
_حقك بالتكوله والتسويه
لكن لازم تعرف ردتك تعرف بغداد تخوف اذا مو اني غيري رح يتصيدك
وردتك تجي يمي أحميك والله ردت أحميك
_ضحكت ضحكه طويله
اي تحميني من تضيق السبل عليه وتخلي الرعب يدخل بگلبي وگلب امك وبناتي
من انضرب وابقى انزف لحد ما افقد والناس تخاف تشيل بشر
لو من تنعاب ايدي وابقى عاجز
هاااااك خليت ايدك بيد العصابجيه
وعوقوني
لو بيتي المنتهكه وكاتبيلي مطلوب
وتحجي بالحمايه
_مو انه وروح ابوي مو انه. بيتك ماعرف عنه شي
_اااطلع عاااااادل اطلع ولا تخليني اشوفك للموت لا توكف ع جنازتي او تدفني بالك وإياك تكول عندي اخ بعد. ولو إجدي الخبزه يا عادل ما التجا الك فهمت اطلع
وكف وصل للباب
هسه انته عصبي ولا رح اخذ بكلامك لكن بمرور الايام رح تصدك كلامي وتشوف انه هيج سويت لمصلحتك....
ام نادر.. من كانو ولدي وبناتي صغار مثل كل ام اعرف منو الحنين ومنو الاناني ومنو العجوزي
الام هيج الله منطيها هالغريزه
وع الرغم. تعرف كل عيب باولادها
لكن تحبهم كلهم ما تفرق بينهم
لكن اكيد التعامل كلمن ع طبعه
نادر قليل حظ بينهم ابتدأن وي ابوه
ووي إخوانه شكد يحاول يسوي زين الهم لكن ما يجازونه
اما ابوه جانت نضرته هو الجبير لازم اصلب معاملتي وياه حتى يكدر يواجه الدنيا لان الدنيا تعصر الفقير
وحتى عمام. نادر اعرف بيهم ماعندهم محنه
لكن هم اعرف بناتي يردن ولد عمهن
وشكدحذرهن لكن ماقبلن
وصح وره لسبوع عرسهن
وصارن من الخدامات
وكلمه مرت عمهن الهن
الچنه تخدم وتخلف
وهنه ميگدرلها لان مسيطره
ع عم البنات اما أزواجهن انطيهمم فخفخه وعزايم وكشخه وسفر والنسوان مالهن لا كلمه ولا رأي
وهمه فوك كل هذا
نسوان وشرب وعربده
ومكدرن يشتكن لان عرفن رأي نادر وكل عقلهن نادر رح يشمت بيهن وكم مره اكوللهن اكول لاخوجن ما يقبلن
من صارت مصايب نادر وفقد زوجته وهو هسه ارتاح خطيه وتغير الحال
صار اليأس مسيطر عليه
وأكثر من كعدنا يم بيت اخوي
رغم ولا لحضه حسسونه لكن هو رجال واستصعبها
وخاصه من صار وياه اعتداء خفت عليه
وهو برگبته اربع بنات وانه ما دايمتله
وعاند يروح وي اخوه
صارت مهمه حمايته صعبه الدنيا ما بيها امان
وره الحادث طفا وصار حتى كلامه كوه خفت عليه ما يموت من احد يموت حسره وتفكير
اخذت الذهب العندي وبعته
واجرت بيت حتى يحس هو صاحب البيت وكلت اشتغل بمكانه بالفلوس البقت اي مشروع ومرت اخوي ونهله يفكرن وياي
عرفت كم مره بمنطقتهم موضفات وما يلحن يطبخن
وبعلاقات ام أمير زوجه اخوي بديت اسوي عينات طبخ ك هديه حت انعرف والسهل الموضوع قريب ع بيتهم مدرسه والمعلمات صديقات لام أمير وهيه خلتهن يشوفن طبخي
من انتقلت لبيتنا اول يومين واندك الباب
بنيه وبيدها صينيه وبيها گداري
فاتت بعد السلام عرفت جيرانه وجايبه غدا ضيافه نزولنا للبيت
شابه لكن مو زغيره عمرها يطلع 29
بمرور الايام عرفت انه اطبخ ويجوني نسوان وخاصه بديت لما نادر بدا يشتغل لان اعرف ما يقبل لكن شغله ما يسد وما أريده يهم
البنيه طلعت يتيمه لا ام ولا اب عايشه وي اخوانها وإخوانها يطلعون من الصبح للعصر
فصارت تجي تساعدني وهواي شالت مني وحتى البنات تساعدني بيهم لكن ولا الها صوت هادئه لدرجه ومن اسولفلها ع نادر واليصير وياه تكتفي بس تهز راسها او تكول. الله يعوضه او الله يصبره
_اجه العام الدراسي الجديد لكن خفت ع بناتي وخاصه بعد ما أأمن بأحد اذا صارت بيه الحادث عندي اهون يهددوني بيناتي صارت روحي بيهن
اطلع اوصي امي عليهن ممنوع يوصلون للشارع خاصه قبل كم يوم شفت دعاء رايحه لخوالي
فخفت ومنعتها
وهم الكتبوا ع بيتي مطلوب خفت لا يوصلون اليه وهلمره ما اجازف ببناتي
رغم البنات اعرف انقهرن بدون مدرسه
لكن من اجي الكا دفاتر وكتب ويقرون من سألت امي
_يمه هاي بنيه جيرانه جابتهن وتدرسهن
تكول حتى لو ما يداومن لازم يبقون يقزون حتى ما ينسون
فاتت سنويه مروان وانفال ورحت للمقبره اخذت بناتي لامهم
وهناك شفت مره كاعده وتقرأ قرآن ع قبر مروان منو.. تقربت
أسوار اخت انفال
. خاله بناتي. صدقت ووكفت اخذت البنات بحضنها وتبجي
بحركه
حتى سلامنا تغير
لان تشوف انه متغير الدنيا لطمت بيه
وهي صح اشوفها متأثره بشوفتنه لكن هيه هيه ما متغير شكلها
كعدت يمها من بعد ما خلصنا زياره الأموات وبين الدموع اجت سياره بيها شاب
اشرتله يقرب السياره الضاهر سايق صعدنه ومشت بينا السياره وهي لأمه البنات بديها وتسأل بيهم
أشرت للسايق كالتله للفندق
وصلنا لفندق بمنطقه راقيه صعدنا فوك للسويت
وضيفتنا
وخلت البنات بصفحه واشرتلي ببالكون
كعدنا اني وياها
_شلونك ابو حلا شصاير بيك وين صرت
_عايش مثل ما تشوفين
وانتي وين
_اني سافرت وي زوجتي وعائلته واستقريت هناك صفيت أملاك ابوي وامي لان تعرف يحجزونهن لان اجه قرار اجتثاث البعث فانطيت فلوس وحولت كل أملاكنا باسمي
كلت ادور عليكم حتى انطيك حصه البنات من ورث اجدادهم وامهم
ولو. المعاملات اخذت ثلثين الفلوس لكن كم فلس ينفعونهن للبنات وشكد سألت عنك والله ودورت عليك ملكيتك
وقبل اربع ايام اجيت للعراق كلت احضر دوره السنه بلكي اصادفك
تدري صار يومين اجي للمقبره كلت ما يجون خاف. واجيت اليوم الحمدلله
راحت وجابت جنطه زغيره
فتحته بينهم فلوس وكل رزمه بيهن اسم للبنات كالت هاي حصصهن وانته بكيفك تشغلعن الهن لحد ما يكبرون او تضمهن بكيفك لكن كولشي بالعراق مو امان لا تخلي اي فلوس ببنك بقت وي البنات للعصر وانطتني ارقامهم بكندا
كالت اي وقت يحتاجن البنات اي شي اتصل ثاني يوم اجيكم
رجعنا البنات نوعا ما احسهن فرحن بشوفه خالتهن الي تنطي شبه قليل جدا لامهم لكن الخاله مقام الأم
لكيت امي نفس البنيه يمها والصياني بالمطبخ قررت اسألها
فتت لصاله والبنيه بالمطبخ مكدرت أعلي صوتي دزيت حوراء روحي صيحي بيبي
_ها يمه نادر
_يمه ممكن افهم هذا الاكل ألمن وشنو كلما افوت الكا هيج صياني
وهاي البنيه هواي اشوفها بيتنه عمرج ما خالطتي جار قبل فهميني شنو القصه
_ماكو شي يمه بس
_بس شنو فهميني ولا تطلعين عذر اترجاج صيري صريحه يمه
_وما تتعصب
_احجي يمه
_شوف وليدي معلمات وموظفات ما يلحكن يطبخن وانه اكدر واكلي طيب اسوي الاكدر عليه واخذ القاسمه الله
والبنيه الله سخرها تجي تدرس بناتك وتساعدني وتخلص وقت يمي هم كل واحد همه شكل يابني
_لييش يمه ليش ما يكفي فلوس شغلي وتتعبين نفسج البعمرج ترتاح وانتي خلصتي عمرج تربين بيناتي وهسه اطبخين وتخدمين الموضفات للليش يمه
. من باجر ما الكا گدر لاتعمين ع البيت كله اخذكم بمنطقه ابعد بعد
_لا يا يمه فدوه اروحلك والله اتسلي من الضوجه خليني براحتي
_تعالي يمه اليوم لكيت خاله البنات وهاج شوفي فلوس ورثهن من مروان وزوجته
_يمه ايي همزين من ريحتهم لكن البنات بس يمه هاي أموال أيتام ابد ما يقتربلهن احد
_ومنو كلج اقترب الهن رح اشغلهن واشوفلي مشروع بيهن حتى اكثرهن الهن..
بس شغل الج ماكو بعد يمه انتي مريضه
_يمه اذا الي معزه يمك وخاطر خليني ع راحتي اتسلى
صحيت اليوم ع عياط بناتي ويكولن بيبي شبيج شبيج اليوم جمعه وانام لل10الصبح...
امي شبيها.. فزبت مرعوب ركضت لغرفتها....
دمتم بخير
تابعوووووووني
