رواية بنات نادر والقدر البارت الثالث والرابع بقلم زهرة الرمان حصريه وجديده على مدونة النجم المتوهج للروايات والمعلومات
حتى احلامي متعوبات
اجن بس راحن بسرعة
صح شافن بعيني احلام
بس صدمتهن الدمعة
مساء الورد 🌹🌹🌹
احلى ايام خلصت وي انفال مهذبه راقيه باخلاقها وتعاملها
هادئه.. وأكثر صفه حلوه بيها...متواضعه الفرحه
ببدايه العام... ترفعت حزبيا لعضو فرقه
زادت مسئوليتي وصار المطعم بمسؤولية اخوي عادل
. واني العرفت بعدين
مروان عنده شركه قطاع مختلط بغرفه التجاره وطريقها تجاره مواد غذائية
كان بوادر ع دخول العراق للكويت
 |
وكانت هاي الخطوه الي خسرت العراق الكثير ولحقتها. كوارث للعراق من بعد ما بدا العراق بعد 88..بالانتعاش الاقتصادي والصناعة وخاصه. تصنيع الاسلحه
لكن دخول العراق للكويت بخطه ظم الكويت ك محافضه. ..
جعلت الدول تنقلب ضد العراق ابتدأئآ بالدول العربيه وانتهائا
بدول العضمئ
أمريكا والمملكه المتحده
بدأت التجهيزات واني اول الصفوف الي اشرف ع الجنود
بدخول الكويت.. دخلنا للكويت واسفرت خسائر بالارواح والممتلكات للطرفين استمر الوضع سبعه أشهر
وراها بدأت قوات الدول بالتحالف ضد العراق وبدو بالقصف ع الجيش العراقي صارت البصره مكان حرب
وبعض الدول العربية خلت
قواعد عسكريه بارضها لضرب العراق
البنئ التحتيه للعراق انقصفت
والضرب شمل حتى مساكن امنين
كانت هجمه مدمره
بهاي الفتره كولها اني ما رجعت للبيت تركتهم لكن كنت مطمان من وجود مروان
ومن رجع الجيش العراقي وانسحبنا
.
مشت ايام رغم بدت العقوبات ضد العراق. وفرضت الدول 32دوله حصار اقتصادي ع العراق
لكن كنت بالسلطة مسنود من مروان الي يثبتلي يوم بعد يوم اني ابن اله
لكن انفال كملنا سنه ومصار حمل
بقت تفتر من طبيبه طبيبه رغم امها
منتظمه وي دكتوره وتراجعها لكن تأخر الحمل خلاها تراجع اكثرمن طبيبه وكل الطبيبات نفس الكلام وهي ما تقتنع
واجت 1991
صارت الانتفاضة الشعبانيه كما سماها من شنها
سمتها انذاك الدوله العراقيه
صفحه الغدر والخيانه او الغوغاء
كانت باربعه عشر محافظه وبدايه الأسبوعين الأولى ناجحه من المعارضين
وصل الأمر دخلو جماعات مسلحه ع بيت الحزبيين المعروفين وبدوا يطاردونهم او يقتلونهم
ومروان ومسولين كبار اخفو نفسهم لكن بعدها اجت الأوامر
من القياده العليا
ولكن بعدها ساعه 2 بالليل اجه مروان وكال جهز الجيش الشعبي كله الي جنت مسؤل عن قوائم الجيش الشعبي
وتحشدوا والحرس الجمهوري وقطاعات الدفاع الجوي
وصار قصف من الجهتين واكيد المتضرر
المدنيين
لكن رجع الجيش العراقي استعاد قوته وسيطرته
لكن بهاي الفتره بدأت التدقيق والتحقيق ع كل طرف يشكون بيه بسبب الانتفاضة
واكيد احنا كنا من نتابع ونراقب
لكن كنت حريص ما اسحب اي انسان بريئ او اكتب تقرير ع اي بشر ابتعد قدر المستطاع
واذا صحت بأيدي حت اترك الاعرفهم
ما اريد اكسر رگبه بشر ماعرف ضرفه
رغم مروان وعائلته
ولائه للنخاع وعنده الرئيس خط أحمر
وما يتفاوض بيهن
اني متحاشي هالشي
عمامي كانو معارضيني بفكره زواجي ومن اتجاهي الحزبي الي دا يعلى
لكن من يحتاجون اي شي بقبول او معامله
يصيرون يحبوني
اما اخوي عادل بعد ما كمل
سادس صناعه
قدم ع القوه الجويه رغم رافض الفكره خوفا عليه لكن انبهاره بالزي العسكري والطيران وهيبه السلطه اغرته
واكيد مروان سهله امور دخوله
وهو كان جسمه مؤهل لهلشي ضخم ومليان وطوله حلو
بنهايه عام 1993.....رجعت للبيت بعد ما اجاني تلفون واني بالدوام من انفال فرحانه وتبجي... حامل وصح طرت من الفرحه واني احلم اصير اب
وهم انفال تهدأ لان تغيرت بذيج الفتره اهتمامها بيه قل صار هوسه الحمل وخاف ما تصير حامل. الحمد لله قبل نهايه السنه انرزقت ببنيه
وإشراف طبيبه امها
وأيضاً حت الاسم اختارته ام انفال
والي عبروا عن ولائهم للقائد. سموها حلا
وما اعترضت رغم انفال جانت تتمنى ولد وتقرر تسميه عدي
....عمر حلا شهرين وعرفت انفال حامل وهنا بدت مشاكلنا رغم احنا ما كان الاحتياج مادي لكن بنتنه صغيره ومحتاجه رعايه رغم حلا اكثر الأوقات يم أهلها او عند امي
وانفال من النوع الاتكاليه وتحب احد يخدمها وما تحب المسؤليه رغم تحب الولاده واستقتلت لان عدها تخوف فضيع
تردده دائما
_اني مثل امي خلفتي بس بنات
_وهالشي خلاني اتعصب لان اخاف ع صحتها
وعدم اهتمامها...
1994.. انولدت بنتي الثانيه
..
وبيها من طلعت من الولاده والطبيبه
دخلت ع انفال وأخذت الطفله مثل أختها أأذن وأقيم باذنهم
واسمي عليهم وابوسهم واحمد الله ع النعمه صح بداخلي تمنيت ولد لاخته
مثل ما اني اشوف نفسي لاخواتي
لكن هذا رزق الله
لكن رأي انفال كان مغاير
. لكيتها تبجي
_هذا رزق الله شنو نكدر نخلق مثلها وهيج الحمد لله تمام الخلقه وصحتج
_أخذها نادر واتركني بحالي
اني ما اخلف ولد مثل امي اني سويتهم ثنين
_استغفر الله لعلمج يا متعلمه ومثقفه تره المره گاع والبذر من الرجال يعني اني الاخلف بنات مو انتي
انتي أرض بس حاضن للزرع وهذا زرع الله
اتقي الله حتى الله يباركلنا بالصحه والعافيه والستر...
شوفي العالم ع هالحصار
مالاكين الخبزه يوكلون اولادهم
واكو اليتمنه اضفر طفل
وانتي الحمد لله بصحتج
كمشت ايدها مشيت باتجاها
بربج فنون
ابوي الله يرحمه جان يكول الله يحبه الينطيه بنات حنينات
_نادررر ردت ولد ولد اخ ل حلا
_حبيبتي يجي بسلامتج وشاورتها
تره الشاجور مليان وضحكت ضربتني ع كتفي
بخجل
واذا اجت بنيه.
لج يمعوده شبيج اليوم جبتي منو يخليج تحملين اجذب عليج
ارتاحي وبعدنا شباب شبيج
واجت رغد الي ام انفال تسميهم
وما اعترضت....
لكن أيضا بعد ولاده رغد... بشهرين عرفت حامل....
وهوس انفال يزيد بأن تجيب ولد..
وهذا هوسه ما خلتها تهتم ببناتها اكثر الاوقات توديهم لأمها او امي وخاصه بالشتاء تخاف عليهم امي تخليهم يمها حتى نومهن يمها لان ماترضع اول ما ترضع ع الأربعين ويصير حمل
والبنت الثالثه صارت ايظا لكن هنا انفال منهاره وتعيط اخذوها ما أريدها ا
وامي وامها يهدأون بيها لكن فقدت
وآخرها كالت انتم سموها امي هي سمتها..
عذراء.. لان الطفله امي تكول طلعت مثل المسيحيات
بيضا وشگره وبالفعل شگار اجنبي
وصارت عذراء..
مشى الحال وبناتي يكبرون كدامي وايامها اخواتي دوم اشوفهم يجون لبيتنه
قررت أوسع البيت ابيعه واشتري اكبر خاصه بعد ولاده انفال معجبها تبقى فوك
وعادل أريده يتزوج...
بالفعل بعت البيت
واشتريت بمنطقه افضل وقريبه ع بيت اهل انفال
كان بيت جبير وخصصت لامي غرفه لكن جبيره لان من يجون اخواتي اريدهن يرتاحن وعدهم أطفال
فتحت غرفتين وسويتهم وحده لأمي
وهاي الأشياء اسويها وحتى حمام متكامل بالغرفه لأمي....
الحلو انفال تأيد وتفرح المهم ما تتحمل مسؤليه لذلك مرتاحه لأمي لان ما تخليها بأي مسؤليه بالبيت كل شغل تسويه بمزاجها تريد تشتغل تريد لا. بمزاجها
وحتى البنات ع ايد امي متكفله بيهن
وخاصه من قررت انفال تتعين بالبنك بشهادتها
رفضت بالبدايه لكن اصرارها خليتها وامي هي الكارت الرابح ل انفال لان امي ما ترفضلها طلب ويصيرن ثنينهم عليه
لكن ببدايه الاشهر الأولى لدوام انفال واكتشفت حامل
وحملها كان صدمه الها لان تشرب حبوب
ورادت تسقط الطفل وخلصتها عراك وياها
بالقوه اخر شي متواعده وي امها ورايحه للطبيبه
تنزل الطفل
لكن كانت بالشهر الثالث مقارب لنهايته
واكيد امها مأيده قرارها وتكوللها
_كبرنج ع حورهن وهم بنات شلعان گلب
وارتاحي حتى ماتونستي ولا سافرتي لو حامل لو نفسه
وهاي الشي ماعرف الا اتصل عادل
تعال
رحت للمستشفى لكيت طبيبتها
دكتوره دعاء الراوي طبيبه مميزه وفاهمه واصلتلها انفال اخر نفس رايده تموت من رايحات لطبيبه اتنزل الطفل
من نازفه وبالعياده مالتها والجشع عماها
خلاها تقبل تنزل الطفل لكن مكدرت لان نازفه وخايفه الطبيبه
ومن خافت ام انفال اخذتها لطبيبتها دكتوره دعاء
وبقت ترزل بيها لان ممزقه عنق الرحم لكن اراده الله أن الطفل يبقى وبقت شهرين تحت عنايه الطبيبه وغضبي منها خلاني اقاطعها رغم احبها لكن
من وراي تروح لطبيبه بايعه ذمتها لأجل الفلوس وهي انفال تريد تقتل نفس
وامها مطاوعتها حتى مروان تعارك وي امها ومنعها من بنتها لان تهمها
. انتي تردين تهجمين بيت بنتج او تموتينها
واني قاطعتها شهر وشهرين وثلاث مروا وهي حاولت بالبدايه تصالح لكن
السوته صعب رادت تموت الطفل من وراي. وعرضت نفسها لخطر
لازم اخليها تندم حتى ما تعيدها
اقترب عام1995... وانفال صحتها تعبت من الحمل بسبب الإجهاض الفشل
وكانت عذراء ما مكمله سنه
ولدت ببدايه شهرها التاسع بعمليه لان خوفا ع الرحم بأمر من الطبيبه لكن بالبنج وانفال تعيط اذا بنيه انطوها لدكتوره دعاء هيه خلتها ببطني
وهنا دكتوره دعاء واحنا نضحك عليها
مروان من سمع انفال
كال استحقت تصير اسمها دعاء
لكن تفاجأت دكتوره دعاء خبرتنا ابد بعد ما يصير الها حمل لان رحمها ينفجر بسبب الصار
وخفنا نكوللها وقررت تعقدلها سوت عقد
الها......
صار رزقي اربع بنات
حلا ورغد.. وعذراء ودعاء...
اربع بنات وصغار وانفال بعد الولاده الاخيره نفسيا تمرضت اكثر من الجسدي تمرضت بسبب الحمل الأخير
والبنات اتعودوا ع امي وتعلقن بيها
وهاي الفتره اصرت ترجع اداوم ومشاكلنا صارت بسبب الدوام اشوف ما مهتمه لا بالبيت ولا ببناتها
لكن هي دخلت ابوها بالموضوع ومن سمع ما قبل عليها
رغم أخواتها تزوجت اسوار وريام ا وصار عدهم كل وحده بنت او ولد وبنت
لكن تعلقههم بانفال لان الجبيره وبيتنه قريب ع بيتهم تدخلهم بالصغيره والجبيره. واني اتعب من تصرفاتها وخاصه نفسيتها تغيرت حتى نصحتها نطلع نسافر ونروح لطبيب نفسي لأي دوله
لكن هي تثور
و_شبيه اني وتريد تاخذني لطبيب نفسي تخبلت
_انفال تعبتي مو الا المريض يزور الطبيب النفسي لكن مثله مثل الطبيب الرياضه والتغذية
يساعدنا فقط للسلوك
رفضت وانه تعبت
واكيد ملجأ همومي لصديقي فراس الي أيضآ كبرت تجارتهم ونفوذهم الحزبي
وكان نصيحته
_يابه انته مازال مكابل أهلها وقريبه عليهم متخبله عليك
. ابتعد شويه اشتري بغير مكان
وهم ظب نفسك وهدد تره مروان يعزك وما يثنيلك كلمه ويعرف مرته ومرتك ويعرف امها براسها
فكرت اغير بيتي..
لكن انجن جنونها
لغيت الفكره.. وبعد ايام
نزل اخوي عادل وامي وادته يخطب ويتزوج لكن رفض..
من سألته. والحيت عليه عرفت منتظر بنيه تركته وخليته يختار بكيفه لان يحب
وبدأ يححيلي عنها
بنت من اهل الشمال وعرفت أهلها زينين وتدرس منتظر تخلص يلا
بناتي صاروا كل حياتي وأريد أأمن مستقبلهن وفهمت وقدرت موقف مروان من خوفه ع بناته وشلون يختار الأزواج لبناته
حقه
امي اشوف شلون تخاف ع البنات واداريهم
وأكثر الأوقات مايقبلون ينامون بغرفتهم
الا يمها لكن من يجن اخواتي تصير المشاكل من جهال اخواتي يردون بيبيتهم
وبناتي يغارن ع ببيتهم
تصير ملاخ واحنا نتمتع رغم امي تتعب
لكن اخواتي اسمعهن يحجون ع امي
_شنو يمه اشو لا الها بناتها لا احنا نجي و لا تگابلنا وانتي عندج بنات نادر وبس ماتحبين جهالنا بس بنات نادر تحبيهم
اخواتي رغم كبرنا وصارت عدنا اولاد لكن احس تعبانات واخصص كل شهر فلوس بانتظام الهن الله متفضل عليه وما اقصر وياهم
لكن الغريب بيت عمي زاد خيرهم وفلوس واعرف عدهم بدل البيت ثنين وبدل المحل خمسه. لكن كولهم ببيت واحد بعدهم رغم صار عدهم هواي أطفال وزوحو البقيه من اولاد عمي
لكن يتحاشن اخواتي يكولن
لكن شيحتاجن انطيهن بلا نقاش اريدهن
ما يحتاجن واني موجود والحمد لله رزقي زايد
. لكن ازيد انطي ل نهله لماخذه ابن خالي
رغم عينته وانطتيته وكاله مال مواد غذائية
من صار الحصار الغذاء ع البطاقه التموينيه ردت يستفاد
صح تحسن وضعهم
واختي هم انطيها مثل اخواتي الباقيات
ومع ذلك لمى ومنى دومهن
يحجن ع امي
_"دومه يفضل نهله علينه عبالك احنه مو اخواته
لازم نهله ازيد بكولشي
_ولجن يمه بشنو زاد
ولجن نهله حصره عليهم اللكمه وهذا حصار وانتم تشترون طحين استرالي احمر
وبيت خالجن ياكلون طحين مال فصم تمر
لو طحين ذره
شكو بيها اذا سوه لرجلها شغل
وينطيها مثل ما ينطيجن
_وفلوس الانطاهن الها ذيج المره
_يمه ولج طلعتلها غده وعمليه
وساعد بفلوس عمليتها غير اخته وبشده مرض شنو طلعت سفره بيهن
. _تعايرينا. يمه ع روحه الشمال
_ولجن يمه اللواه افرح تطلعن وتسافرن. اعايرجن شنو
بس لو اسم الله عليجن صار عليجن شي هم ينطيجن
_يمه ع كيفج انتي ما تشوفين مرته ما تشوفين بناته ولبسهن
وانتي تنطينه فظايل بنات واليعتك
_يااا ولج انفال من أهلها ودلالها
والبنات شنو من فضاله انطيتجن
يكبرن البنات وملابسهن جدد لان هواي وما يلبسن
وانتن تخلفن وكله مستورد وجديد واضمه الجن
والله خير ما فد يوم انفال كالت وين هدوم والمن انطيتي
مو زين ولجن وهنه بنات اخوجن الي شيجيب الا يسهمجن
ولجن الزوالي لو البطاطين نسيتنهن
_اووو يا يمه راح تبقين تذكرينهن عشر سنين ليكدام
مرت الايام بعام 1999
بدأت مرحله اتجاه الشباب لصلاه الجمعه بصوره مكثفه ونوعا ما تحريض ع السلطات وخاصه استقطبت هذه الصلاه فئه الشباب وتنحني لاتجاه سياسي بنظر الحكومه
بدأت بفتح المدارس للمترقنه القيود
فتح المدارس الميرعه كثرت المدارس المسائيه مقابل مبلغ مادي بسيط
ارادت الدوله تغير اتجاه قبظه اتجاه سير افكار الشباب للدراسه وخاصه بالتوعد بالتعيين. الي وان كان الراتب قليل لكن مضمون
وبالفعل زاد عدد الطلاب وكثرت مدارس محو الاميه والمسرع وكانت مهمتي ان
ادمج الشباب بالدراسه ان كان الهم عمل كسب يومي بالنهار لهم فرصه مساء للدراسه وكلا الجنسين
بهذا العام اخوي عادل قرر يخطب بنيه
من القوميه الكرديه
وما اعترضت بعد السؤال عن أهلها ووضعها ويحبها
وأهلها ما عارضو
خطبنه لعادل
ميس
وفرحان بالي وصله اله عادل من مركز ويطمح بالدراسات واحسه نضج رغم
انانيته الواضحه لكن مو مهم يبقى امانه ابوي وافرحله
وأكد انانيته من راد يشتري بكركوك ي
ويترك امي الي روحها بيه لكن هو ما اهتم لان خطيبته ما تريد تنقل دوامها
وامي احس عيونها خلصن دموع عليه لان من صار بالقوه الجويه وهو قل تواجده يمها وهي متعلقه بيه حيل رغم هو الزغير والمدلل والي تذبل امي بغيابه لكن من يسولف وياها وتعاتبه
يرد عليها
_يمه انتي عندج نادر وبناته لا يعلى عليهم
اني بيش كيلو بس خلف نادر انه زحلگتيني...
_ولك يمه شلون هيج تكول وانه من تتأخر حت النوم يروح من عيوني
_نومي حلا ورغوده منا
وعذور ودعاوي منا وتنسيني
_اوف يايمه ماتشوف امهن مايردنها
_غير منج ع گلبج اربع وعشرين ساعه
حت من تاكلين وحده بحضنج وين تشوفين عدول لو غيره
تزوج عادل وامي وراه تمرضت رغم راحت وره زواجه ب شهر من اجه وزارنه
راحت وياه بقت اسبوعين
وخلال هاي الأسبوعين تبهدلت انفال دخلت لگيت
بنيه تطلع عمرها 20 سنه
_منو هاي انفال
_هاي امي تعرف أهلها ناس فقره
اخليها يم البنات اداريهم وانطيها اسبوعيه بناتك خبلني
_انتي انفال گابليهن
انتي داريهن امي صار عشر ايام من راحت ل بيت عادل تبهذلن البنات انتي امهن
_نادر امك خبلت البنات بالدلال
واني وين هسه هياتني يمهن لكن البنيه تساعد تغسل تشيل تحط شكو بيها
وهم اساعدها وانطيها اللله قاسمه لان ما عدهم حالتهم تعبانه فيد واستفيد
_انفال تره طلعت من ماعونها شكو عندج وجايبه بنيه وتذلينها ما عدها
طلعي البنيه وخليها تروح لأهلها
_"تروح لما امك تجي شوفهن تخبلن يردن امك
وهاي البنيه اداريهم
وره كم يوم هي امي اجت لان بالها يم البنات
لكن يوم ع يوم امي تعبت صحتها
عيونها ضعفت
لكن اني اترقى وتصير مسولياتي اكثر
ودوم اخدم بيها السلطه ناس مستحفه وأهلي وعشيرتي
وحت عماتي وعمامي
قل اختلافي وياهم لان احب اخدمهم لان اخواتي عدهم وخال جهالهم
استمر وضعي وي انفال بلا مبالاتها
واني دوم اختلافي ع البنات الي امي دا تتعب وهنه يكبرن
... صار2002
هذا العام... كانت الدوله ع كف عفريت ومروان وأكثر الحزبيين عدهم تخوف من تهديدات أميركا وكانت اشاعات من مقربين ان الرئيس رح ينحي. عن مكانه ويخلي احد أولاده
لكن السياسه نفسها. وكل العراقيين مأمنين ان الحكم مستحيل يتغير بسبب قوه الشخصيه اليملكها الرئيس والي اثبت هالشي بكل معارضه يخمدها واي انتفاظه يقمعها ويوكف اقوه
والخوف سيد الموقف
لكن أمريكا لا تحب أن يشاركها القوه
. وخاصه الرئيس رغم سياسي حاله حال كل الدول
لكن كان امشي الشعب بالخوف والوعيد لكل من يعارض
في سبيل حكمه..
ومع ذلك كان مخلي حدود لكل الدول بهيبه العراق الي ابدا ما يتجرأ التجاوز ع العراق بسبب قوه الرئيس
2003
العام الي صارت بيه أحداث الكل تشارك بيها
الا اني وخسارتي... والي خلت سيل الدموع دم ع الصار
قبل الاحتلال ب اربع ايام او اكثر اجاني.. فراس
_نادر طلع جوازاتكم واخذ امك وبناتك وزوجتك وتعال وياي نطلع لدوله قريبه الوضع مو زين التهديد مو سهل ولا عبالك نكدر
_شلون فراس ولك غير إعدام شبيك
_ولك رح يسووونها تراب
_اذا بالحالتين نموت ع الاقل مو جبان شعندي اني ما مسوي شي
_لك قنع مروان
_اي تريد مروان يعدمني بخديقته هاي اذا مو مرته تنفذ. بيه
وره يومين اجه خطيه وجايب علاگه زغيره اخذني بمكان بعيد عن البيت
_هاك ولك
_شنو هاي فراس
_هاي جناسي
باسم بناتك حلا سميتها حوراء
ورغد سميتها اسراء. واسم الام والجد مال الام مستعار يعني تزوير لان زوجتك ومروان معروفين واخاف عليك
وانته هم خليتك جنسيه مزوره فهمت
_وهذا كله ع شنو
_كولشي يصير ولك. اخذ واصلا جاي اودعك انه رايح المفروض ما اكول لكن گلبي ما اطاني احنا اول المستهدفين تهدأ الأوضاع وارجع
_راح فراس بمراره مني لان اعز صديق اليه وخوفا من مجهول مانعرف شنو الراح يصير...
لكن سرعان ما استولت أمريكا ع العراق وبغداد صار الدبابات تتجول
بيوم الدخول ركضت لبيت مروان لان بنتهم الصغيره متزوجه انسان هم واصل بالحزب واني رحت خوفاً ع مروان الي احسه اب او اخ جبير مو ابو زوجتي رجل وگفلي
لكن رفض يترك مكانه الا ما احاهم الأمر وكاللهم كل واحد يحمي نفسه لحد ما نجتمع بيكم
رجع مروان واريده يترك بيته ما قبل
اجه زوج اخته راد يحميه لكن رفض وحتى زوجته رفضت
. بقيت مسلح واحمي البيت لأن صار الفرهود واستهداف الحزبيين
تالي مروان رفض ابقى.. ببيته
رجعت وصح خفت ع امي وبناتي..
رغم اني ابد ما كاسر رگبه احد
لكن دخلت وي الدبابات هواي ناس تختلف من ناسنه
يومين وبثالث يوم
انفال كالت اروح لاهلي
حاولت ارجعها لكن أصرت الا تروح والبنات مقبلت حتى تاخذهم رغم دعاء كمشت بيها هي وعذراء
بقو يبجون لكن هيه سحبت أطراف ثوبها من اصابعهم الصغيره
وكالت وصلني لأهلي اشوف اختي رح تسافر مقرر اختها وزوجها يطلعون
وصلتها ورجعت واني بالي يم اخوي عادل
والغريب اخواتي وعمامي محد سأل عني تفقد حالي ويعرفون الحزبيين استهدفوهم
فقط اختي زوجه ابن خالي
اجه خالي وابنه وكال تعالو لبيتنه لحد ما تهدأ الأوضاع لان صاير القتل بدون تورع وعرف
طلعت وامي تحضر بالبنات واغراضنا
كلت اروح اجيب انفال واقنع مروان وزوجته هم يجون وياي
لكن.. الصدمه الهزت گلبي
امشي وتضگل رجلي همه بعد شارعين عن بيتنه وصلت لركن بيتهم
واحس اثلجت رجليه من هول الصدمه الشفتها
ملثمين طالعين من البيت وحت الجار اليشوفه ما يطلع اصلا واحد بيده ابطاله مال نفط ومشتعل وواحد يكتب ع الحايط
ببخاخ
لما وصلت وهمه ميلحين حسيت واحد سحبني التفتت لگيت ابن خالي وراي
_نادر يمعود اوگف وين طلعو من نسابتك اصبر يوخرون
_اتركني يمعود ولك زوجتي مروان وأم انفال جوا اعت بنفسي بلا وعي واخاف افكر بالاشوفه واصدك
_اي لكن متشوف كل واحد بيده بندقيه يعني ما يكلفهم الا رصاصه وحده ومحد يسأله ليش
راحو بعد ما اخذو سياره مروان واني اهد وكامشني ابن خالي
ركضت من تركني... دخلت باديه الحديقه تحترك والاستقبال
فتت
وياريت ما شفت الشفته
مروان بلبس البيت طلقه بين عيونه
وزوج اخت انفال قريب عليه
وبالممر الفابت ع البيت اوووف
ام بناتي يا ذي العيون العسليه يا ذي الظفائر البنيه
وياليت من وجهه ع قلبك الذي فيه اربع ياقوتات
ان تصيب قلبي قبلكِ
... متحاضنه وي امها والدم خالطهن
ووجه ع وجه نايمه ك العروس الجديده
وحت اختها واطفالها كاتليهم
المنظر من فصاعته ما تحملت وگعت رجليه ما قبلت تشيل جسمي
ليش ليش انفال ليش مروان ليش
ما طلعت انفال ما قبلتي تاخذين بناتج تعرفين رايحه للموت
وفلتي ايد دعاء وايد عذراء
ركضتي مستعحله للموت
ريام انتي رايده تسافرين اجيتي تودعينهم لو تروحين وياهم
اويلي ثنين أطفال مثل الطيور الذهب شنو ذنبهم.......
فاجعه زوجتي ومروان وعائلته.. اغرقت قلبي دموع.... قبل العيون
دمتم بخير...
صديقاتي وكيكاتي القصه ليست ذي طابع سياسي ولكن ردت أوضح حياه نادر
وأهم شي تعرفون الحقبه الزمنيه هاي من تنقلات حقيقيه غير محرفه من التاريخ الصار بذيج السنين
وانقلت بكل امانه
بتسلسل وأيضا احب انوه ان الكاتبه بصدق اني محايده فقط انقل وما اميل لجهه معينه بين معارض او مؤيد
لكل السياسات لان التوجه شخصي والتاريخ عام.....
اشكركم ومن البارت الجاي رح تبدي حياه بنات نادر واقدارهم
بعد الدمعه الرابعه الي بالبارت الجاي
قراءه ممتعه
أتمنى اسمع ارائكم... 😘😘😘❤️😁
_
انهز الغصن بعصف هجرك يا بان
وكل. الوجوه الجانت تبسم هسه انيابها لي بان
عتتني دنياي ببير يوسف والدافعني اخوتي من التفت بان
لا ناصر ولا الينشد بيه العضد بقى من مالت الدنيا عليه:::G::::✏️✏️
مساء الورد 🌹🌹
#بنات نادر والقدر بقلمي زهره الرمان 😊
#بارت 4
الله يمكن دز خالي وابن خالي. بهذا اليوم لأن مصيبتي چبيره اشيل منو ومنو اودي عليه وانه اشوفهم كبالي مثل ضحايا العيد
الدم منثور
. نهر
صار يحشم ابن خالي بشباب طفوا النار من البيت وقره الحايط مكتوب عليه مطلوب عشائريا البيت لا يباع ولا يسكن
منو المطلوب وهو كتلتوه
. ابن خالي يحشم بالناس لكن الوضع يخوف ومحد يقبل يقترب
لكن فطنته خلته يركض اجه خالي
خالي صار اجرأ مني وبقي يدور بالبيت ع مستمكسات ويجمع بيهم
وانه كاعد ع الدرج مبندات رجليه ما كدرت اوكف طلعوني من الجثث
وخالي تجرأ وفتح جنط زوج اخت انفال
اخذ أرقام ودز ابنه يتصل واكو دفتر أرقام الهواتف يم التلفون ماكو حراره لكن اجه سأل عن عمام او اخوان ل مروان لكن مروان عنده بس اخت وحده وأخ شهيد
نطيته رقم زوج اخته الي سابقا راد يحميه وهو كرايبه مو بس زوج اخته من مقربين عمامه
راحو واتصلوا
ساعتين غطو الجثث واخذوني للبيت وبقو بالبيت لحد ما يجون عمام مروان وهم كرايب زوج ريام اجو اهله و
ساعه البيت انملابمساعده اهل زوج ريام
متلثمين ودشاديش اجو لابسين الكل والفلوس وخوفا من الامريكان لان
الوضع مو طبيعي
اخذو الجثث يدفنونهم
وامي واختي نهله اجن ودعن انفال
وودعت انفال من رحت وياهم ولأن الوضع مو زين
دفناهم بمقبره ببغداد قريب ع كرايب مروان وزوج ريام هم ببغداد مقبرتهم
رجعنا من الدفن وارتأو ماكو فواتح
فقط بالبيوت لان هو حزبي ويردون ياخذون حقه يهادد زوج اخت مروان الا يطلع كتالهم
وأهل زوج ريام هم أصحاب ثروه طائله
والفلوس تصير النفوذ واي شي يمشونه بالفلوس...
أما اني رجعت لخط تحت الصفر
باربع بنات شنو. اكوللهم من يسألون ع امهم او جدادهم
فتت ورا يومين ركضه واخذنه كل أغراض بيت مروان خليناهم ببيت اخت مروان
..... البيت صار أظلم..
مثل ما حياتي الي طفا كل نور بيها
الا بنات برگبتي واني فاقد زوجتي وعمل ماعندي والوضع تحس ان رياح الموت تشمها بكل الطرق والوجوه
تخاف من الصديق والعدو لان متعرف منو وياك ومنو عليك
.. خالي وابنه قرروا نروح وباهم
من فتت للبيت جان الدنيا مغرب
حوراء عمرها 11سنه تفتهم وذكيه باوعت بوجهي ولحيتي العاليه ودشداشتي
وبهذلتي الي ما متعودين يشوفوني بيها
وخاصه لحد هاليوم صار يومين من ماتو اني ما مخلي راسي ع مخده اخاف اغمض لان رعب منظرهم يخليني ابجي بحرگه واصرخ......
سألتني حوراء . وهلا يام كولتلها اسمج منا وجاي حوراء
ورغد اسمج اسراء من سألو فهمتهم ان الحكم اختلف واخاف عليكم
=شكو بابا وين سافرو بيت جدو ولويش اخذو امي وياهم
_باباتي حوراء
انتي جبيره. ولازم تفهمين الحقيقه
اخذتها من ايدها وكعدتها بالأرض وقربت ايدها صارت جوا ايدي
بنتي امج واجدادج راحوا لرحمه الله
مالهم بعد رجعه
رحمه الله أفضل من هاي الدنيا
صح عدم استيعابها وبجت وبقت تعيط واسكتها
_لازم تصيرين سبعه لان انتي الحبيره بابا اسكت بيها ودموعي تصب وياها
اعرف صدمتها واعرف خطيه تتحمل هيج خبر لكن ماكو شي مضمون لان الوضع محد مامن نفسه احس دوري جاي وره مروان اني هم حزبي وهم زوج بنته اكيد يعرفوني
ف كلت حوراء الجبيره وامي مهما كان كبرت وتعبت
وهذا حضها مثل حظ ابوها تتحمل الدنيا ومصاعبها لازم أكبرها ولو زغيره
اعلم بيها وافهمها
وخاصه اخواتي ولا عمامي اجو ولا سألو وما اتفاجا
مات ابوي محد وكفلي
شانتضر وهمه اخوهم ما وكفوله
عتبي ع اخواتي الي وكفتلهن وما لچمهن گلبهن عليه والكل عرف كاعد يصفون بالحزبيين
الا نهله بقت مكابلتنه هيه وخالي وزوج اختي نهله لحد ما كملنا من بيت ابو انفال
خالي كال مالك بقاء هنا كل يوم يمر. يزيد الخطر
وبالفعل ابو طيبه الي هو زوج نهله اختي
مسلح والليل كله يناطر يخاف احذ يفوت علينا وانه اصلا ما اغفى خوفا ع عائلتي وهم مصيبتي والشفته
هد حيلي...
اربع ايام. خلصت وانه ما اكدر اطلع من كل عقلي اخاف ع اخوي عادل ومقرر اروح ل كركوك اذا ما بين منه خبر
خفت عليه
خابرت عليه وماكو تلفونهم يدك لحد ما يفصل بلا رد
. آخرها خالي كال....
_بويه نروح لبيتنه واكيد من يسأل لابد يسأل يم اخواته ونهله من ضمن اخواته اكيد يجي
_خالي انه خايف عليه. عادل عسكري وبالطيران
_مو تكول هناك اهل مرته بالأرضي الزراعيه
_اي
_بويه الأراضي الزراعيه هناك كل عشيره تلزم أهلها وتحميها واخوك يجوز. حجزته هم الضروف ماتشوف بيته ما يرد تلفونه اكيد يم اهل مرته
تخمين خالي نوعا ما هداني لكن كلت أأمن امي وبناتي وهم خطوره ع خالي وابن خالي واختي لا يصير عليهم شي
طلعنا واخذنا بس المهم من البيت واغراض انفال وذهبها
وعندي كم فلس خليتهم جوا ادينه منعرف الجاي شنو
طلعنا... لبيت خالي
مرت ايام وامي بس الدموع تسولف من نكعد سوا ع انفال لو ع أهلها لو
حال بناتها التركتهم
وامي گلبها ماكلها ع عادل.
واني ازيد يوميه الخوف يزيد صار اسبوع يم بيت خالي
وحتى ببيتهم مو مكان مؤمن لان اليعرفني واليريد يصفي يطلع كل الگرايب ويدور عليه يمههم خفت ع خوالي لا يروحون بسببي لا نوم بليل ولا
راحه بالنهار لان همه هم عائله وعدهم چنه ثانيه غريبه تعتبر عليه
وما ماخذين راحتهم
الا زوجه خالي من تسمع
تتخبل
وترد
_يمه نادر. هو الخير والبيت الاحنه بيه منين سنين واحنه ناكل من خيرك ولوما انته سويت الوكاله النه شلون نعيش لو نهله الي دوم مصرفنه ومصرفها شايلنه شنسئ
حت مصروفها ما تبخله ع البيت وانته ادز بيد اليجي والراح يمه بس ابن الحرام الينكر الإحسان السويته
چنه كاعدين بگن مال دجاج
والحمد لله اخوتك اشتغلوا بوضايف انته عينتهم
شوف هذا البيت تبقى انته واحنه النطلع ولا اسمعك تكول ثگل اذا ثگل احنه النطلع
_خجلتني لان ذاكره كل شي بسيط مسويه الهم
رغم ما فرقتهم ع عمامي واخواتي الباقيات ليش مو دمهم ولحمهم
انه وچنت اركضلهم بتعيين لو واسطات بدوائر
وهسه ولا منهم احد سأل حمدت ربي سويت شي ينذكر
وما سويت شي استعار منه او أخجل منه حتى الغرب ما كسرت رگبه احد وجنت مستعد امشي بطولي كدام الناس لان الناس تعرفني ما اذيتهم
لكن خوالي ردهم
_بويه اليكتلك مو من ناسنه واليعرفك
اليجي من ضهرك ويضرب لان بالنسبه اله انته عدد يقبض منك فلوس مقابل حزبي مو سيرتك او شنو سويت او ما سويت لذلك يصير نظام والله كريم والأمريكي انته بنظره بحزب البعث عليه باوراقك
وهالشي صح ميه بالميه...
قررت اروح لكركوك لأخوي وأمنت امي وبناتي يم خوالي طلعت وما قبلت اخذ ابن خالي ابو طيبه لح لكن ما اريد اورطه
_ابو طيبه انه لوحدي أدبر حالي لكن
انته المهمه الأصعب والهاده حيلي امي وبناتي امانتك لحد ما ارجع واذا ما رجعت لو صار شي عليه
امانتك وأمانه خالي بناتي....
_ترجع نادر ترجع وتربيهن بيدك لا تكول هيج خويه
_هاي دنيا يا خويه وانه ما اعرف مصيري
طلعت وأخذت جنسيه الجابها فراس اليه
تعتبر اصليه مو مزوره لان بنفوذه مصدرها
تندمت لان ما طلعت انفال ومروان وما حاولت اخ فراس شوف صاحبك شجرا عليه
اصعد من سياره لسياره وامشي اريد اوصل للكراج الياخذني للمحافضات
كاعد بسياره ومنتظر تقبط لابس شماغ وغتره ودشداشه زي عربي ولحيتي
طولانه وتعجبت من عكست المرايا بوجهي الماشايفه صار من يوم فاجعه مروان وأهله
معقول يطلع شيب بكم يوم... مخالطه الشيب لحيتي السودا واسولف وي نفسي وخوفي ع عادل
نبهني صوت
_شكد الكروه ابن عمي
_رفعت راسي شاب عمره تقريبا 2 3 سنه
ماعرف والله اسأل الكدامي
_هي هاي سيارات كركوك مو
_اي لكركوك
_زين ممكن اكعد يمك
_اشرت اكعد
خله وجهه مقارب الوجهي يباوع عليه بتركيز
واني روحي بغير دنيا ما اهتميت ولا الي خلگ اسأله شبيه
وبدون مقدمات سحب ايدي ووكفني حيل
نكتت ايدي شبيييك وانكت. بيدي
. التفت عليه وقرب راسه لاذني
_اسكت استاذ نادر اسكت تعال وياي يمعود
عرفته عرفني لكن ولا اتذكره او الصدمات نستني الناس ماعرف
يعتعت بيه بقوه واني اريد أفلت منه
بداخلي كلت همه ذول الكال خالي عليهم
نادر مجرد رقم تسلسل بالحزب يتصفا وينقبض حسابه
وما شايل سلاح لان الامريكان يفترون ويفتشون
ضربته ع قوه ايدي بوكس ع وجهه اجه عدل ع خشمه وعينه بس هو شاب وقوي ولا أثرت بيه الضربه مستمر يسحب ويمسح بوجهه ولا رد الضربه ولا حجه استفزني
شتريد شعندك وياي احجي واذا الك حگ تأخذه مربع
وصلنا لحمامات بالكراج وجان قليل ناس
رد _انته الك حگ ولازم اوفيه
_عجيب لك ابني وين ماخذني
وكف
=ابو حلا انته استاذ نادر اول مره معرفتك لان شكلك حيل متغير
وقرب حلگه اليه ويحچي همس ويتلفت
انه عرفت بالصار
بمروان الله يصبرك بمصابك بأم بناتك
رحت هناك ورحت ع بيتك ردت اخذك واحميك جنت خايف لا هم داخلين عليكم ومكتولين والله والله صار يومين ادور عليكم ورحت لعمامك وولد عمك كالو سافر ماموجود وشوي هدأت لان اهم عايش كلت
وهسه تفاجأت لكيتك
الله يحبني وعثرني بيك
_ومنو انته وشنو الخلاك ادور عليه شتريد
_تعال وياي ورح تسمع كل شي
_تركت ايده القابض بيها ايدي
اريد اروح عندي روحه لكركوك لاتعطلني
و انسى شفتني او اي اسم اليه انساه.
اذا عندك شي تطلبني شي كول
غيرها مالك لازم بيه
_استاذ نادر انته الك دين برگبتي واليوم
وقت رد الدين انته خلصتني من الموت ولا تصدك بسهوله اتركك
_"الكاتبه الله يصير واني أدبر نفسي
وع الله وإذا اموت معناها خلصت خبزتي من الدنيا اذا يجي الموت ما يرده لاحمايتك ولا حمايه الدنيا
_ انه اعرف الكاعد يصير وولا تيتم بناتك وانته نفسك حرامات تموت ياريت موت بأمر الله لكن بأمر بشر ما تخاف من الله وماتعرفك شنو انته
انه واحد من هواي اعرفهم. انته صاحب فضل عليهم اترجاك اسمعني وانته تكول الموت يجي لو ماتعرف وين
سايسني وخلي ضميري يرتاح
والله ما نايم براحه. وادعي والله جابك اليه هاي اشاره من رب العالمين بقبول دعائي لهذا لو كاتل لو مكتول أليوم ما اتركك
_لك ابني صدكتك لكن انه رايح بسالفه مهمه لازم اروح
_مو امان وروح ابوي مو امان اخاف عليك يمعود تعال و
يسحب بيه اريد بس اخلص نفسي ابد
طلعني من الكراج أجر تكسي ويسكت بيه
صعدني وطلعنا التفت
ابو يعگوب عمي اليوم انته ضيفي
منو ابو يعگوب
أشر انته
سماني بكيفه
تمشي السياره طلع ع منطقه اعرفها لكن ماعندي گرايب بيها
. وانه الف سالفه بمخي وين طلعت يا نادر ووين رايح منين طلعلي هذا
وكفت السياره ونزلنا
. بيت جبير لكن قديم
فتح الباب ورحب
_فوت ابو يعگوب
دخلت استقبال بيها بسط
ومخدات واثاث بسيط
شويه وفاتو ثنين اكبر من الشاب الجابني
وترحابهم عجبني
شنو القضيه يعني انه فقدت الذاكره وما اعرف هاي الناس وهمه يعرفوني
_متريك استاذ هسه يسوون ريوگ واكل ونسولف
_مشكور متريك وشبعان
_چاي روح جيب چاي قاسم
عرفت اسم الولد الجابني قاسم واني بعده نضري وراه وأريد اتذكر منو هذا قاسم قطع تفكيري
الرجال الأكبر منه همه يتشابهون الضاهر اخوه او ابوه ماعرف
_استاذ حتى لاتبقئ حاير والف سؤال بدماغك واسفين لان جابك قاسم بهاي الطريقه لكن من تسمع رح تعذرنه
وهم الله
يمكنه ونرد دينه
.
استاذ انته جنت مسؤول ع الجيش الشعبي ومهمتك تجمع الشباب الجانو يصلون جمعه ووقتها وره الانتفاضة الشعبانيه
الحكومه جانت تاخذ كل واحد يشكون بيه عنده
ارتباط ب حزب الدعوه او إيران او اي حزب خارجي وانته تعرف الحكومه ما تشاقا بهاي الأمور اليروح ما يرجع
ف انته دخلت تفتيش على بيتنه بأمر
بيومها مخليت احد يفوت الا ما كلت لأبوي فوت نسوانكم جوا
ابوي بيومها كال هذا ابن حموله
لكن عرفناك مو بس ابن حموله. لا
الوياك يفتشون وانته المفروض مسؤل بس تتابع لكن انته تفتر ع جماعتك وتشوف شنو بيدهم
وآخرها شفت كتب جان بوكتها انه واخوي نقراهم هنه رسائل فتاوي ومعاملات لكن غيرك جانو يغلفون الي يلكون عنده هاي الكتب
. احنا نراقبك اخذت الكتب وضميتهم بقمصلتك خاف يشوفونهن الحرس الوياك
استغربنا
وما خلصت لهنا القدر وصلنا لايدك مره ثانيه راجع اخوي ووياه وميض جان هارب ولأن بوقتها جان مريض
ونخاف عليه علساس ننطي بدل ونسرحه لكن الحكومه جمدت شاحناتنه مال مواد غذائية احنا أصحاب علوه بجميله ونمول لكل المحافظات ومعاملتنا بيدك
من ابن عمي كلك وعرفت وميض مريض
انطيتنه مهله لحد ما ندبر حالنه ونطلعه ويتعالج بالأردن وكلت من يصير العفو يلا ادز عليكم ترجوه مو هسه
وبعدها ادفعو بدل اله
. وتم هالشي سنه ونص وهو كاعد بالبيت وانته حامي اسمه ما رافعه
عرفت دينك بيها رگاب
لذلك قاسم اصغرنا وهو جان بالشركه يشوفك ويعرفك
من صارت الأحداث دزيناه يلكاك ونريد نحميك
احنا خيرنا واجد هذا دينا لاتحرمنا من رده
_يعني الكلته كله اني اسويه وي الكل صدك واجبي مو خاص لاحد
ومشكورين وما محتاج شي
_استاذ عرفنا بالصار ب مروان ولا تزعل مني تره مروان فتحو ملفات موقع بايده وبذمته ع ناس انعدموا
والناس ماتعرف انو هو عبد مأمور او هاي سياسه الدوله وسلطه مروان هيج والا ما يصعد حزبيا
لهذا لا تزعل بس أسألك انته موقع ع تقرير لأي شخص
_ولو مو من حق أحد يسمع الي راح اكوله لكن مستحيل وقعت ورقه ع اي بشر ولا كسرت رگبه احد
_هاي هيه واني صدگتك وهذا ضني بيك
ومع ذلك انته بحمايتنه
_ما اكدر انه عندي التزامات لازم اروح لكركوك
_خطر والله خطر طريق كركوك احنا نطلعك بس يومين ونطلعك
_يومين هواي انه اليوم رايد اوصل لان هناك شخص لازم اشوف حاله
_انطينه بس اليوم وباجر وعگبه الفجر اطلعك بيدي
قبلت وما عندي حل الا اسمع منهم
وكلت ارجع لكن رأيهم حتى المكان اذا يم كرايب ابتعد واحنا نامنلك بيت لكن ايتبعدت هالشي انه أدبر حالي صح ما ابقى يم خوالي لان يجوز يتاذون بسببي بس اخلص من سالفه اخوي عادل. گلت رجعت للبيت رجعوني بسباراتهم الي ردت بس أفلت منهم ما قبلوا لان رادو يعرفون مكاني ويتواصلون وياي
وصلوني فتت للبيت لكيت امي مناطره. خبر بوجهي
ما سولفتلها قصه الولد لكن كلتلها جماعه عرف يومين واروح مالكيت طريق
قبل ليله من اتفاق ع طلعتي لكركوك اندك الباب وخالي الي ما يقبل احد يفتحه خوفا علينا
ركضت اباوع حالي حال ولد خالي من الشباك شفت رجال ضخم ولبس غريب ونظارات شمسيه لابس. صاح خالي نادر
منو الاجه....
دمتم بخير
