 |
روبوت_مراتي
البارت_الثالث
انتي متأكده من القرار ده ياريم ؟!
ريم وهي بتتنهد : برغم خ*وفي إلا أني بجد حابه اعمل كده
مي بقلق : ريم انتي عارفه انتي هتعملي ايه ؟؟ انتي هتعملي عمليه تجميل تغيري شكلك نهائياً ،شكلك اللي بتحبيه ،لوون عينك اللي بتحبيها،شعرك اللي هتقصي منه كتير ،انتي متخيله !!
ريم بحزن : شكلي اللي كنت بحبه يامي ،نفسي اتغير في كل حاجه ،نفسي ارمي الماضي ورا ضهري واعيش ريم جديده ،بشكل مختلف وطباع مختلفه بناس مختلفه في حياتي ماعدا انتي طبعا ،نفسي اعمل انجاز عظيم الناس تتكلم عنه ،انا عارفه أن القرار مش سهل أبداً لكني هعمله ...
مي وهي بتطبطب علي كتفها بحب : وانا معاكي ياريمو في أي قرار
ريم وهي بتحضنها بقوه ودموع : ربنا يخليكي ليا يامي،انا مش عارفه لولا وجودك في حياتي كنت هعيش ازاي !
مي بمزاح : كنتي هتصاحبي غيري مانتي اجتماعيه اوفر دوز يعني ،الا صحيح ياريم لما تغيري شكلك هتفضلي اجتماعيه كده وهتصاحبي البني ادمين كلهم ،ده حتي حي*وا*نات الشارع بقت تعرفك ياشيخه ...
ريم بضحك : هههههه وهو اللي في طبع بيغيره ياعووومري!!
مي : تصدقي بالله انتي لو عملتي شخصيه فدوه هتنجحي فيها اوي فيكوا ش*رشحه من بعض ..
ريم : يخليكي ليا ياعووومري..
مي بخوف : ربنا يعينك علي المهلبيه اللي في دماغك ...
ريم بغيظ وهي بتقفل عينيها نص قفله : بتقول حاجه ياسطا ؟!
مي: اهي قلبت الألماني اهي ..
ريم : يابنتي التنوع في الشخصيات ده جزء من شخصيتي ...
مي : اومااااال
فضلوا يتكلموا شويه وريم مقرره انها هتخضع لعمليه تجميل وتبدء بدايه جديده في حياتها ،ولسه مُصره علي قرارها انها تكون تريند علي حساب عز اللي هتتشقلب حياته ميه وتمنين درجه في الساعات اللي جايه ياتري ريم هتعمل ايه ،لاول مره تكون البطله هي الش*رير*ه في القصه مش البطل لاول مره هنشفق علي حال البطل !
..................................................
في فيله عز الحديدي ،دخل بيته الساعه ١٢ بالتحديد كالعاده ،قعد علي الانتريه ،غمض عينيه بتعب و سند رأسه علي الانتريه ،النهارده بالذات حاسس اوي بالاشتياق لهاجر،النهارده عيد ميلاده ،اول سنه تيجي عليه وهي مش موجوده في حياته ،كانت كل سنه تعمله عيد ميلاد ،كان احلي عيد ميلاد بيعدي عليه بوجودها ،بالرغم من أنه شخص انطوائي ،جامد مع الكل ،مش بيحب الاحتفالات بأعياد الميلاد ،إلا أنه كان معاها شخص مختلف تماماً ،كان بيخرج الطفل اللي جواه....
اشتياقه في اللحظه ديه خلاه يضغط علي الزرار عشان تظهر الروبوت ...
نزلت كالعاده بفستانها الابيض اللي مش بتغيره ورسميتها اللي مش بتغيرها أبداً
قربت منه وهو قام قالها بحزن : وحشتيني
هاجر : وانت كمان وحشتني
عز وهو بيتنهد : نفسي اصدقك
هاجر باستغراب : مش فاهمه ؟!
عز : لا متاخديش في بالك ،تعالي اقعدي
هاجر وهي بتدور بعينيها في الفيله : هي راحت فين !!
عز باستغراب : هي مين ؟!
هاجر : ريم
عز وهو بيتنهد : مشت
هاجر : مش هترجع تاني؟
عز : توء
هاجر : ليه!!
عز بضيق : اشمعني يعني ؟!
هاجر : عشان القهوه بتاعتها حلوه اوي
عز برفعه حاجب : وانتي عايزاها ترجع عشان القهوه !
هاجر : اه
عز وهو بيضغط علي سنانه بضي*ق : مينفعش كانت تفضل هنا
هاجر : ليه
عز بعصبيه : خلاص بقي احنا هنقضي قعدتنا كلام علي الخدامه !!
هاجر بحزن: انت بتزعق ليه ياعز
عز بعصبيه: عشان زهقت ،انا عاملك ليه ،مش عشان احس بوجود هاجر معايا !!
الروبوت " هاجر " باستغراب : مين هاجر ؟!
عز : اللي كانت مراتي اللي انا مصنعك شبهها
هاجر بضيق: انا مش شبه حد ،حتي لو شبهها فأنا غيرها في كل حاجه ...
عز : ي يعني انتي مش بتحبيني ؟!
هاجر بتوتر : هه ا انا
عز : انتي ايه ياهاجر ؟!
هاجر : ا انا بحبك
عز بفرحه : بجد
هاجر وهي بتح*ضنه : والله بحبك
عز غمض عينيه ببطئ ،كان بيحاول يحس بوجود هاجر ،لكن كالعاده حتي الروبوت مش قادره تعوضه عنها ،هاجر واحده ومش هتتكرر،الروبوت مجرد آله شبيهه لهاجر ،انما لا هي بطباع هاجر ولا هي هتحبه زيها !
..................................................
ياختااااي ياختااااي الدكتور زمانه بدء المحاضره هيعمل مني بطاطس سوري ..
كانت مي صاحبه ريم بتقول الكلام ده لنفسها وهي طالعه علي سلم الكليه ..
لا الدكتور مبدئش لسه ...
مي وهي بتلف لمصدر الصوت وبتقول باستغراب وتلقائيه: وانت مالك ؟
الشخص بضيق : طب يالا اطلعي قدامي ..
مي باستغراب وضيق : هو ايه ده انت اه*بل يالا !
الشخص بغموض: اه*بل ويالا !
مي : لا بص يباشا انا خلقي ضيق ماشي خلقي ايه ؟ضيق فلو سمحت اختفي من وشي عشان انا مش طايقه نفسي ومش طايقه حد ،كفايه اني اول مره احضر للدكتور بتاع النهارده وانا داخله سامعه عنه كلام زي الفل ،ومش بعيد يشيلني الماده عشان هو اهب*ل ...
الشخص : اهب*ل !
مي : هو في ايه حضرتك ،انت ليه مستغرب ،هو انت اول مره تسمع الكلام ده ؟
الشخص بغموض وهو بيضغط علي أيده وبيبتسم ابتسامه صفراء : لا مش اول مره اسمعه اتفضلي يا انسه الدكتور لسه مجاش ،بس ابقي خدي بالك بقي عشان هيشيلك الماده فعلا ..
مي بتريقه : وانت عرفت منين ياشيخ ،الا تكون ابن الست خديجه المغربيه لجلب الحبيب ورد المطلقه وعلم الغيب !!!
مردش عليها وبصلها من فوق لتحت وطلع وهي واقفه تبصله بقر*ف ...
مي بتريقه: قال ابقي خدي بالك عشان هو هيشيلك ...
اتنهدت وطلعت تجري علي فوق ودخلت المدرج ولسه هتكمل مشي عشان تقعد سمعت صوت من وراها خلاها تتنفض ...
اقفي عندك ...
مي وهي بتلف بعصبيه : هو انت ورايا ورايا يابتاعه انت ،ده ايه الاشكال اللي بتتحدف علينا علي الصبح ديه ...
واحده بخفوت : نهار ملوش الوان انتي بتعملي ايه ...
مي بضيق : ماهو اللي مستفز ياانسه
البنت بخفوت : مستفز ايه يخرب*يت*ك ده الدكتور ...
مي بتلقائية: بس هو دمه خفيف وزي العسل والله ...
الدكتور ببرود : اسمك ايه ؟!
مي بتوتر : هه ا اسمي
الدكتور بزعيق: اسمك ايه
مي بخوف : م مي احمد خليفه
الدكتور : اتفضلي برا ،واعتبري نفسك شيلتي الماده
مي بتوتر : ا اسمعني بس
الدكتور بزعيق اكبر : قولت اطلعي بررررا
مي بعصبيه: خلاص طالعه ،هطلع من الجنه يعني ده ايه الهم ده ...
الدكتور بعصبيه: طب اعتبري نفسك بقي شايله السنه كلها
مي بابتسامه بارده : كنت عايزه اقول لحضرتك حاجه يادكتور
الدكتور بغرور : قولي !
مي : ط*ز فيك يادكتور
قالت جملتها وجرت من قدامه اااه احنا بنتنا استرونج اوي ومش بتخاف من حد .....
الدكتور بغموض : أما وريتك مبقاش انا نوح الحديدي ...
..................................................
بليل وفي الكافيه اللي بيتقابل فيه ريم ومي ...
ريم بذهول: يخربيت فقرك قولتي للدكتور ط*ز فيك ؟
مي وهي بتشرب من العصير بتاعها ببرود : ومش بس كده
ريم : هببتي ايه تاني يابلوه
مي بابتسامه صفراء وش*ري*ره : كسرتله ازاز عربيته
ريم بصدمه وهي مبرقه: بتهزري
مي بضحك : والله ما بهزر ،يستاهل
ريم بفخر: اللي قادره علي التحدي
مي وهي بتشرب العصير وبتقفل عينيها نص قفله : ولسه،ده انا هوريه النجوم في عز النهار ..
ريم وهي بتتنهد : انا هعمل بكره العمليه..
مي : ايه ده بالسرعه ديه ؟!
ريم : ايوه خلاص اتفقت مع ابن عمي هو اللي هيعملهالي ...
مي : قررتي هتعملي شكل مين ؟!
ريم بغموض: هاجر
مي بصدمه: بتهزري !!
ريم : والله مش بهزر ...
مي بنبره صوت باكيه : د ده لو لحقتي
ريم باستغراب : مش فاهمه ؟!
مي وهي بتبلع ريقها : ل لفي كده
ريم لفت وبرقت عينيها لما شافت عز واقف وحاطط أيده في جيبه وبيبتسم ببرود :
عايزه تعملي عمليه تجميل علي شكل مراتي عشان احبك واتجوزك وتصوري روبوت مراتي عشان تطلعي تريند مش كده !!
ريم بتلقائية: سلم علي الش*هداء اللي معاااك
إيمان_شلبي
بداية الروايه من هنا 👇👇👇
تعليقات
إرسال تعليق