القائمة الرئيسية

الصفحات

الحلقة_ال10 رواية_رشيد_وكارمن بقلم الكاتبة_ملك_إبراهيم

 الحلقة_ال10 رواية_رشيد_وكارمن بقلم الكاتبة_ملك_إبراهيم  



"مش كل اللي بيبعد بيكون نسي.. ومش كل اللي بيقسّى بيكون كره.. في ناس بتبعد عشان موجوعة..وفي ناس بتقسّى عشان لسه بتحب.. بس مش عارفة تحب ازاي بعد اللي حصل.

رشيد وكارمن مش حكاية حب انتهت..

دي حكاية حب اتكسر.. ولسه كل حتة فيه بتوجع صاحبها"

رهف أخت رشيد قالت: "الحل الوحيد ان رشيد يتجوز."

بصت ليها والدتها باهتمام بتفكر في اقتراحها، اتنهد الجد بقلة حيلة لانه عارف بعدم موافقة حفيده على الجواز بعد فشل جوازه الأول. قالت والدة رشيد بعد تفكير: "عندك حق يا رهف.. مفيش حد هيقدر ينسيه البنت دي غير بنت تانيه.. بس المهم تكون بنت كويسه ومن عيله تشرف عيلتنا."


بص ليهم الجد وزفر بغضب، وبعدين قال لمرات ابنه: "لما وجيه يرجع من شغله خليه يجيلي اوضتي.. لازم اتكلم معاه ونفكر في حل."


بهتت ملامحها وهمست جواها: "هو وجيه فاضي لحد!"


بصت رهف لوالدتها وقالت بتأكيد: "فعلا يا ماما، بابا لازم يساعدنا ويشوف حل مع رشيد."


هزت والدتها راسها بالموافقة وهي بتفكر في إهمال جوزها ليها ولعيلته.

رواية رشيد وكارمن بقلمي ملك إبراهيم. 

جوه شقة رشيد.

خلصت كارمن من ترتيب الشقة واستقبلت زمايلها في المطعم اللي جم بالأكل ومستلزمات الحفل اللي طلبها رشيد من مديرهم.. وسابوها زمايلها عشان تقوم بشغلها في التخديم في الحفل الصغير ده.


جهزت كل حاجة بعد ترتيب البيت ومقدرتش تفضل في البيت لاستقباله هو ومراته وابنه، مش ممكن تعمل كده، بتحس بنيران بتحرق قلبها كل ما تفتكر انه قدر يتجوز واحدة تانية.


مشيت من البيت قبل رجوعه، جريت وكأنها بتهرب من مواجهته ومش عايزة تشوفه مع عيلته الصغيرة اللي كونها بعد انفصاله عنها.


رجع رشيد للبيت ومعاه مروان ابن أخته، كان البيت هادي ولمستها الرائعة في ترتيبه كانت واضحة. اتقدم لجوه ودوّر عليها في كل مكان وملقهاش. قرب منه ابن أخته وقال ليه بصوته الطفولي: "خالو.. احنا هنعمل ايه؟"


بص ليه بتفكير، وبعدين اتحولت نظراته للغموض وجاوب بمكر: "هنلعب شوية."


ابتسم الطفل بسعادة وجري يلهو ويلعب قدامه، ابتسم بمكر وهو بيبص لتليفونه، دوّر على اسم خالد صاحبه واتصل عليه واستنى رده وهو بيرتب خطته بتفكير عميق. لحظات قليلة وجاوب عليه خالد بسعادة: "رشيد عامل ايه طمني عليك؟"


جاوبه رشيد بهدوء: "خالد انا محتاج منك خدمه ضروري."


قال خالد بثقة: "وانا تحت امرك يا رشيد."


ابتسم رشيد بقسوة وقال ليه هو عايز ايه بالظبط.

رواية رشيد وكارمن بقلمي ملك إبراهيم. 

بعد تلات ساعات جوه الأوضة اللي بتقعد فيها كارمن مع والدتها.


كانت كارمن قاعدة متكومة فوق السرير بنفس الهدوم اللي جت بيها ومبدلتش هدومها، كانت شاردة فيه؛ بتفكر هو بيعمل ايه دلوقتي مع مراته وابنه! ازاي بيحتفلوا؟


تابعت والدتها شرودها وحزنها الواضح باستغراب، مسألتهاش مالها! تجاهلتها وقعدت تقرأ واحدة من المجلات وتتابع الموضة وهي بتتحسر على حالها واللي وصلت ليه بعد الثراء اللي كانت عايشة فيه.


بعد دقايق قليلة سمعوا صوت طرق قوي على باب الأوضة، لحد ما كاد الطارق انه يحطم الباب. وقفت كارمن بسرعة وفتحت الباب بقلق. صدمها وجود رجال الشرطة قدام الأوضة، حدقت بيهم بصدمة واترعش جسمها بشدة، همست بصوت مبحوح وهي بتسألهم هما عايزين ايه: "نعم.. حضراتكم عايزين مين؟!"


جاوبها الظابط بقوة: "انتي كارمن الهوارى؟"


جف حلقها بخوف، شحب وشها وهي بتبص ليه بصدمة، بلت ريقها وجاوبته بخوف: "ااه.. انا."


لف يبص لرجالته وقال ليهم بأمر: "هاتوها."


قرب منها رجال الشرطة وخدوها ، صرخت بين ايديهم بخوف وهي بتردد بهلع: "في ايه؟ انا عملت ايه؟"


محدش جاوب عليها، أخدوها لعربيات الشرطة تحت. وقفت والدتها بتتابع اللي بيحصل باستغراب، متحركتش من مكانها وهما بياخدوا بنتها قدام عينيها، ومفكرتش في اللحاق بيها، همست لنفسها بثقة "اكيد في حاجة غلط وهيرجعوها تاني! كارمن مش ذكية عشان تعمل حاجة خارجة عن القانون!!"


ركبت كارمن جوه عربية الشرطة، كانت بتبكي بخوف وأهل الحي واقفين على الصفين بيشاهدوا اللي بيحصل معاها وبيتساءلوا عملت ايه البنت دي!

رواية رشيد وكارمن بقلمي ملك إبراهيم. 

في وقت بدري جدا من صباح اليوم التالي ومع أول ظهور لخيوط الشمس.


جوه قسم الشرطة.

قعد رشيد قدام الرائد خالد صاحبه وزميله سابقًا قبل ما يخسر رشيد شغله في الشرطة من أربع سنين.


اتكلم خالد بثقة وهو بيقوله عمل ايه مع كارمن بعد مكالمته: "بعت ظابط ثقة من رجالتي للمطعم اللي هي بتشتغل فيه وخدوا العنوان من هناك وراحو خدوها من البيت."


هز راسه وهو بيسمع نجاح خطته، وبعدين بص لخالد وقال ليه بفضول: "وهي فين دلوقتي؟"


اتووتر خالد شوية وجاوب عليه بهدوء: "انا خليتها تبات في أوضة مكتبي وقعدت انا هنا في المكتب ده."


رمقه رشيد بغضب وكمل بعصبية: "ليه عملت كده يا خالد! انا كنت عايزاها تبات في التخشيبه على الارض.. كنت عايزها تدوق اللي انا دوقته بسببها."


وقف خالد من مكانه وقعد قدام رشيد وقال: "مكنش ينفع اعمل غير كده يا رشيد.. متنساش ان كارمن لسه مراتك."


بص ليه رشيد بصدمة. هز خالد راسه بالايجاب وكمل: "محدش يعرف انك مطلقتهاش غيري.. ولو انت نسيت ده،، فـ انا مستحيل انسى."


بص ليه رشيد وكمل بغضب: "انا مطلقتهاش لحد دلوقتي عشان من حقي اعرف هي ليه عملت فيا كده..؟"


طبطب خالد على ايديه بدعم: "وانا معاك يا رشيد لحد ما تتأكد وتعرف الحقيقة، للاسف احنا مقدرناش نعرف الحقيقة من أربع سنين بسبب اختفائها المفاجئ، بس هي دلوقتي ظهرت وتقدر تعرف منها هي ليه عملت فيك كده!"


بص ليه رشيد وهو عارف ان كل حاجة حصلت بتأكد خيانة كارمن ليه، لكن في شعور جواه بيرفض تصديق خيانتها. حط ايديه فوق راسه بتعب، أرهقه التفكير كتير. افتكر اللي عملته بعد تلات شهور من جوازهم.


{من 4 سنين.. بعد تلات شهور من جواز رشيد وكارمن}


كانوا أجمل تلات شهور في حياته.. رشيد كان أسعد إنسان في الكون وهو معاها، زاد عشقه ليها وتعلقه بيها، كانت بتلجأ ليه وبتعتمد عليه في كل حاجة، كانت بنته المدللة، كان بيروح لشغله في الصبح وهي بتروح للجامعة، وبيرجعوا في المساء . كانوا بيتعشوا مع بعض وسط أجواء رومانسية رائعة وبيتبادلوا الكلام والمزاح لحد الصبح. بقى قلبه بينبض بعشقها كل يوم. 


لكن الحياة بينهم اتغيرت فجأة!

هي اللي اتغيرت! بقت طول الوقت ساكتة، شاردة، التوتر مسيطر عليها طول الوقت، كلامها غامض وردودها حادة،  لما كان بيسألها ايه اللي حصل معاها، كانت دايمًا تقوله انها بخير، رغم ملاحظته القوية لتغيرها وعصبيتها الغير طبيعية.


لحد ما جه اليوم اللي دمرت فيه كل حاجة.

رشيد كان في شغله.. و واحد من زمايله قاله ان في شخص مجهول قدم بلاغ ضده، بيتهمه باستخدام سلطته وشغله في الاتجار بالمواد المخد.. رة. كان الخبر زي الصاعقة عليه، وعرف ان في قوة من الشرطة في طريقهم لتفتيش بيته. جري لبيته بسرعة عشان يكون جنبها عند حضور رجال الشرطة لبيته، عشان ميفزعهاش حضورهم وتفتيشهم للبيت.


وصل للبيت قبل وصول رجال الشرطة، استغربت كارمن حضوره بدري، اتكلم معاها وقال ليها ان في تفتيش من الإدارة وعليه تنفيذ الأمر، مفهمتش حاجة، وقفت بتوتر وهي بتسمع صوت جرس الباب، راح رشيد وفتح الباب ورحب برجال الشرطة، اعتذر منه واحد منهم وقال ليه ان عليه تنفيذ الأمر بالتفتيش. رحب بيهم رشيد وهو على يقين ان البلاغ كاذب. 


بدأ رجال الشرطة في التفتيش، كانت كارمن بتتابع اللي بيحصل بخوف وتوتر، قرب منها رشيد ومسك بايديها عشان يهديها شوية وفضل يطمنها ان كل حاجة هتكون بخير.


خرج واحد من رجال الشرطة من أوضة النوم وهو ماسك بايديه شنطة بلاستيك صغيرة فيها أكياس من مادة الهير... وين المخد... رة. قرب من الظابط واداله الشنطة باحترام.


وقف رشيد بصدمة بيتابع اللي بيحصل بذهول، مش مصدق اللي حصل، ازاي خرج من أوضته بالشنطة دي! من فين جابها؟ ازاي جت الشنطة دي لأوضته؟!


قرب منه الظابط وقال ليه: "للاسف يا رشيد انا مضطر اقبض عليك."


شهقت كارمن بصدمة. وقف رشيد وهو في حالة صدمة مش مستوعب اي حاجة، مش عارف ايه اللي حصل ومن فين جت الشنطة دي!


بكت كارمن وهي شايفاهم بيحطوا ايديه جوه أصفاد حديدية، بص ليها وقال ليها بقوة: "متخافيش يا كارمن اكيد في حاجة غلط.. خليكي في البيت واقفلي على نفسك كويس وانا هرجعلك تاني متقلقيش."


بكت بانهيار وهي بتتابع ذهابهم من البيت وهو معاهم، قعدت على الأرض بتبكي بانهيار.


كان بيسمع صوت بكائها وهو ماشي مع رجال الشرطة لعربياتهم، متحملش يسيبها بالحالة دي، اتمنى لو يجري ويرجع ليها ويقولها ان اللي حصل معاه ده كان مزحة من صحابه معاه. ميعرفش ان اللي حصل ده ما كانش مزحة، كان أمر مترتب ليه باحترافية.


التحقيقات استمرت معاه لمدة 15 يوم وهو محبوس، كل الأدلة كانت ضده. قعد معاه المحامي الخاص بيه وقاله ان كل حاجة ضده، وخصوصا شهادة مراته، بص للمحامي بصدمة، قال ليه المحامي ان مراته أكدت بشدة عدم دخول حد غريب للبيت وأكدت انه بيملك الشنطة البلاستيك دي اللي كانت مليانة بالمواد المخد... رة، وده معناه انه هو اللي حط الشنطة دي جوه أوضة نومه. كان عارف كويس ان مراته مازالت صغيرة ساذجة ومش عارفة خطورة شهادتها عليه، لكنه كان في حيرة من عدم زيارتها ليه طول الخمستاشر يوم! كان بيستناها كل يوم وبيتمنى رؤيتها عشان يأكد ليها انه معملش اللي اتهم بيه، كان خايف انها تصدق انه خاين لشغله وبيشتغل في اتجار المخد... رات، كان مش بيفكر في حاجة غير اثبات براءته قدامها.


بعد كام يوم..

جه ضيف جديد لأوضة الحبس اللي بيقيم فيها رشيد لحد ما تخلص التحقيقات، قرب من رشيد وقعد جنبه وعلى وشه ابتسامة باردة، بص ليه رشيد وافتكره على طول، الابتسامة الباردة دي مش هينساها ابدًا.


هو "سعد بشار!" الراجل اللي قبض عليه رشيد، لما اختـ.طف رجالته باص الرحلات اللي كان في طريقه للعين السخنة وكان فيه مجموعة كبيرة من البنات.


ابتسم سعد ساخرًا من وضع رشيد وقال ليه بمكر: "منور يا باشا.. السجن للجدعان."


رمقه رشيد بغضب وقال: "السجن للمجر.. مين والخارجين عن القانون."


ضحك سعد بطريقة مستفزة وقال: "يعني بتعترف يا باشا انك مجرم وخارج عن القانون!"


رمقه رشيد بغضب وصدح صوته الغاضب وقال ليه بعصبية: "متنساش نفسك يا سعد واعرف انت بتكلم مين."


جاوبه سعد ساخرًا: "عارف طبعاً يا باشا.. دا انت نورت هنا على ايدي."


جذبه رشيد من هدومه بغضب وقال ليه بانفعال: "انت ليك يد في اللي حصلي ده؟!"


جاوبه سعد بهزة بسيطة من راسه وقال باستفزاز: "اومال يعني يا باشا كنت عايز تعلم عليا وانا اقف اتفرج عليك، دا انت خليت اسمي في الارض يوم ما قبضت عليا انا ورجالتي.. كان لازم اخليك عبره قدام الناس كلها عشان ارجع هيبتي في السوق تاني."


لكمه رشيد بقوة وقال ليه بغضب: "دا انا اللي هعمل منك عبرة قدام الدنيا كلها."


جذبه من هدومه وقرب من الباب وهو بيتكلم بقوة: "لازم تعترف ان انت اللي عملت كده."


ضحك سعد بسخرية وهو بيحاول يخلص هدومه من ايديه وقال بثقة: "بس انا لو اعترفت يا باشا مش هشيلها لوحدي."


بص له رشيد باستغراب، هز سعد راسه بثقة وكمل: "المدام بتاع سيادتك هتشيلها معايا."


حدق بيه رشيد بصدمة، ابتسم سعد ساخرًا وكمل: "هو انت مسألتش نفسك يا باشا مين اللي دخل المخد... رات دي بيتك وحطها في دولابك؟"


ساب رشيد هدومه وهو بيبص ليه بصدمة، اتعدل سعد في وقفته وكمل بثقة: "بس انت طلعت رخيص عند المدام اوي يا باشا.. اه لو تعرف المبلغ التافه اللي هي خدته قصاد خدامتها لينا."


رمقه رشيد بغضب ورفض تصديق كلامه، قال بصوت غاضب قوي: "انت كداب.. انا مراتي مستحيل تعمل كده!"


ابتسم سعد بثقة وقال: "انا لو مكانك برضه مش هصدق يا باشا.. بس ايه رأيك لو تسألها بنفسك؟"


ثقته وهو بيتكلم كانت بتأكد صحة اللي بيقوله، لكن قلب رشيد وعقله مش مصدقين. قرب سعد من الباب وخبط عليه، فتح ليه واحد من رجال الشرطة، ابتسم سعد بسخرية قبل ما يمشي وبص لرشيد بانتصار، وبعدين راح لأوضة الحبس التانية.


قعد رشيد وهو في حالة من الصدمة، فضل يردد جواه؛ ازاي عملت فيه كده! من المؤكد ان المجرم ده كداب وعايز يفسد حياته بس، لكن ازاي كان بيتكلم بثقة وطلب منه مواجهة مراته. هل عليه مواجهتها بجد! لكنه بيثق فيها ثقة عمياء ومش ممكن مجرد التفكير بخيانتها ليه. حس وكأنه هيفقد صوابه دلوقتي، كان قلبه بيؤلمه خوفًا من انه يتأكد ان اللي قاله ليه سعد حقيقي.


وقف وقال لواحد من رجال الشرطة الواقفين قدام الباب، طلب منه انه يقول للنقيب خالد انه عايز يشوفه في صباح الغد للضرورة.


رجع لمكانه وقعد وهو بيفكر فيها، بيفكر في تبدل حالها في آخر فترة بينهم! بيفكر في عدم حضورها لرؤيته من يوم اعتقاله! بيفكر في شهادتها ضده! في حاجات كتيرة بتجبره على التفكير في كلام سعد لكن قلبه بيقوله انها لن ولم تعملها ابدا .


صباح اليوم التالي..

راح خالد لرؤيته زي ما طلب منه رشيد، لكنه وقف فجأة عن السير لما اصطدمت بيه كارمن وهي خارجة من المبنى المسجون فيه رشيد، كانت بتخفي عينيها تحت نضارة سودا وماشية بخطوات سريعة، اتربكت كتير لما شافها خالد، سابته وجريت من قدامه قبل ما يتكلم معاها. وقف خالد بيتابع اللي عملته باستغراب، اعتقد انها جت لرؤية رشيد وحصلت بينهم مشاجرة.


تابع سيره لوجهته وراح لمقابلة رشيد، استناه شوية وجه ليه رشيد وهو ماشي بإرهاق، كان وشه شاحب من قلة النوم وكترة التفكير، بص ليه خالد بقلق وقال: "رشيد انت كويس؟ شكلك تعبان اوي!"


قعد رشيد قدامه وقال بإرهاق: "انا كويس يا خالد اقعد متقلقش.. انا عايزك تسمعني كويس في اللي هقوله."


حدق بيه خالد باستغراب وقال: "في ايه يا رشيد.. انت قلقتني؟!"


بص ليه رشيد وبدأ يقوله بحديث سعد معاه.. كان خالد بيسمعه بصدمة وعقله رافض تصديق اللي بيقوله ليه. قال خالد بفضول بعد ما خلص رشيد من الكلام وقال ليه بكل حاجة قالها سعد: "وانت لما سألت كارمن قالتلك ايه؟!"


زفر رشيد بتعب وقال: "مسألتهاش عشان مشوفتهاش من اليوم اللي اتقبض عليا فيه."


حدق بيه خالد باستغراب، ليضيف رشيد بحيرة: "وده اللي مجنني! مش متخيل ان كارمن متفكرش تيجي تشوفني ولو مرة واحدة!"


وقفه خالد عن الكلام بإشارة من ايديه وقال بصدمة: "لحظة واحدة.. انت عايز تقول ان انت مشوفتش كارمن من يوم ما اتقبض عليك؟ يعني كارمن مكانتش هنا النهارده بتزورك؟!"


بص ليه رشيد باستغراب وجاوب: "لا.. انا مشوفتش كارمن من آخر مرة كنا في الشقه مع بعض لما اتقبض عليا."


بص ليه خالد بصدمة وهو بيفكر؛ اذا لم تأتي كارمن لرؤيته! لمن جت؟


حدق بيه رشيد بترقب وسأله بقلق: "في ايه يا خالد؟!"


بص ليه خالد بصدمة وجاوب: "في ان انا قابلت كارمن وهي خارجة من هنا، وفكرت انها كانت بتزورك، والغريب انها اتوترت جدا لما شافتني!"


حدق بيه رشيد بصدمة وسأله بقوة: "انت متأكد انها كارمن يا خالد؟"


جاوبه خالد بثقة: "طبعا يا رشيد متأكد."


وقف رشيد من مكانه وهو بيحاول يستوعب اللي بيسمعه، فكر جواه بصوت مسموع: "معقول كارمن كانت هنا ومجتش تشوفني! هتكون كانت هنا بتعمل ايه؟"


بص ليه خالد بحيرة هو كمان وجاوب: "يمكن كانت بتزور حد هنا!"


استرسل ليه عقله وجود سعد بشار بنفس المبنى، لف يبص لخالد وقال ليه بقوة: "انا لازم اعرف هي كانت هنا بتزور مين؟"


وقف خالد وبص ليه باهتمام، قال ليه رشيد مرة تانية: "انت هتقدر تعرف بسهولة هي كانت بتزور مين."


هز خالد راسه بالموافقة وقال: "تمام.. هروح اراجع اسماء الزوار واشوف كانت بتزور مين وارجعلك."


هز رشيد راسه وهو بيبص ليه بصدمة، راح خالد وقعد رشيد مرة تانية، عقله رافض استيعاب خيانتها ليه! هل من الممكن انها تعاونت بجد مع سعد بشار؟ كترة الأسئلة بأفكاره لحد ما حس انه على وشك الجنون. كانت لحظات انتظاره لـ خالد كالدهر، بتتخبط بيه الأفكار زي السهام المشتعلة، بيدعي جواه انه ميتأكدش من خيانتها، هو بيثق فيها وعارف ان اللي قاله سعد بشار ده ما هو الا خدعة منه.


رجع خالد ليه وهو بيوطي وشه بصدمة، ملامحه ووقفته بيأكدوا ان في حاجة مش عايز يقولها ليه، بص له رشيد وسأله بترقب وقلبه بيخفق بقوة شديدة: "ايه يا خالد طمني؟"


بص ليه خالد بحزن وجاوب: "انا مش عارف اقولك ايه يا رشيد.. بس الواضح ان كلام سعد بشار صح.".... بقلمي ملك إبراهيم.

.... يتبع

انتوا مصدقين ان كارمن تعمل كدا🤔🫣

في سر في الموضوع ده🏃🏃

حبايبي متنسوش التفاعل بعد القراءة ♥️

أنت الان في اول موضوع

تعليقات