القائمة الرئيسية

الصفحات

الأخبار[LastPost]

أصعب طلاق الجزء الثاني والتالت بقلم /تامر صقر كامله علي مدونة النجم المتوهج للروايات

 


أصعب طلاق

الجزء الثاني والتالت

بقلم /تامر صقر


حمدالله على السلامة يا حبيبي عملت اية انهاردة


الحمد لله... المهم انتي اخبارك ايه واخبار البيبي


تعبانة اوي يا أحمد ومش عارفة أقف مدة طويلة على بعضها....


إنها دة انشاء الله نروح للدكتور يطمنا......


لا يا حبيبي لسة ميعاد الدكتور مجاش دة لسة اسبوع


مش مهم يا حبيبتي المهم نطمن عليكي وعلى البيبي.... 


طمنا يا دكتور.... رانيا بقالها كام يوم تعبانة جدا


انتي بتنامي كويس؟


لا بقالي مدة النوم عندي مش مظبط


طب بتاكلي كويس؟


بصراحة بردو لا نفسيتي اليومين دول مش كويسة عشان


كدة لا بعرف اكل ولا اشرب ولا انام كويس....


لا الفترة الجاية بقى لازم تشدي حيلك عشان انتي مسؤلة


عن ثلاثة مش اثنين


وانا يا دكتور مليش غيرهم في الدنيا جوزي والبيبي اللي جاي


لا جوزك مقدور علية انا بتكلم عليكي وعلى الاثنين اللي في بطنك....


اتنين انا حامل في تؤام؟؟


مبروك يا مدام رانيا طلبتي من ربنا ولد وهو طلب بنت ربنا رزقكم بولد وبنت في بطن واحدة


في اللحظة دي الفرحة اللي فرحوها كانت كبيرة اوي


وعلى اد فرحة أحمد بحمل رانيا بولد وبنت توأم بردو زاد خوفة من اللي جاي.....


والدنيا مش مظبطة في شغلة... بس لازم يدور على شغل إضافي عشان يقدر يوفرلهم حياة كريمة


دور على شغل كتير وهان نفسة كتير عشان يقدر يوفي مصاريف رانيا وأولادة


أشتغل في إحدى مصانع الاستسمار صباحا 


وإشتغل على تاكسي فترة مسائية


وطول فترة الحمل مكنش في وقت يقعد مع رانيا ومعظم وقتها كان في بيت باباها لنص الليل ولما أحمد يخلص شغلة كان يروح ياخدها ويروحوا


عدت شهور الحمل وجاء اليوم الموعود في المستشفي


طمنا يادكتور رانيا عاملة اية؟؟


تمام الحمد لله مدام رانيا كويسة بس الأطفال نازلين ضعاف جدا فدخلناهم الحضانة


خيم الحزن على الجميع بس كلهم حمدوا ربنا على سلامة رانيا


حمدالله على السلامة يا حبيبتي مبروك


ولادي فين يا أحمد؟؟


أولادنا الحمد لله بخير هما بس عشان يطمنوا عليهم موجودين جمبك في الحضانة


بكت رانيا بشدة وجلس ابوها بجوارها وامسك يدها وقبلها


أولادك كويسين يا حبيبتي وانتي كمان كويسة وانا اطمنت عليهم وماشاء الله ولد وبنت زي القمر شبهك بالظبط


الممرضة دخلت....... لو سمحتوا حد ينزل الحسابات


نزل أحمد وجد مصاريف المستشفى ذادت بسبب وضع الأطفال في الحضانة


نزل يكلم صاحب التاكس وطلب منة فلوس ولكن قوبل طلبة بالرفض


اتصال على تليفون أحمد


ايو يا أحمد انت فين انا نزلت وراك تحت ملقيتكش


انا روحت اجيب حاجة يا عمي ومش هتأخر


طب تعالي يابني انا دفعت فلوس المستشفى


لية يا عمي انا كنت هتصرف


يابني دول احفادي ودي بنتي وانت جوز بنتي الوحيدة يعني زيك زي ابني اللي مخلفتوش 


حاضر يا عمي................


خرجت رانيا من المستشفى وخرج ومعها أطفالها مروان ونانسي.... بعد أن اطمئن عليهم الأطباء


يوم السبوع.........


بدأت معاناة رانيا وأحمد


نجلاء صديقة رانيا... يا بختك يا رانيا جوزك باين علية بيحبك اوي وكل شوية يبصلك وكأنة هياكلك بعنية


رانيا... أحمد طيب وحنين وكفاية انة بيشتغل ليل ونهار عشان يقدر يكفي المصاريف


نجلاء.... أة والله عندة دم مش زي ناس راميين بنات الناس عند أهلهم عشان مش عارفين يصرفوا عليهم


رانيا.... لا أحمد مش كدة.... أحمد مكافح وراجل يعرف يعني اية تحمل المسؤلية......

وأنا انشاء الله اول ما أشد حيلي هقوم ؤارجع الشغل عشان اساعدة في المسؤلية دي


نجلاء.... تساعدية دا إية انت اتجننتي....


رانيا..... لية اتجننت؟.. هو انا عشان اشتغل وأساعد جوزي ابقى مجنونة


نجلاء..... انتي تشتغلي أة.... تساعدي بفلوس في البيت أكبر غلط........

الراجل يا حبيبتي لما بيتعود ان مراتة بتشتغل وبتصرف معاة في البيت بيتعود على كدة


وهو ميعرفش انها المفروض تشتغل عشان يكون ليها قيمة وكمان يكون معاها قرشين للزمن


في اللحظة دي مهتمتش رانيا بالحوار وعدي اليوم


أحمد في المصنع في حوار مع زميلة سامح


مبروك يا أبو حميد سمعت انك خلفت ولد وبنت وكمان عملت سبوع عالمي ومعزمتناش يا عم


أحمد.... سبوع؟؟ لا والله يا سامح دا حمايل ربنا يكرمة ويديلة الصحة هو اللي عمل السبوع وانا من كسوفي معرفتش اعزم اي حد غير أهلي


سامح... حماك هو اللي دفع فلوس السبوع؟؟


يا بختك يا عم أحمد شكلك واقع واقف حماك شكلة مروق عليك على الآخر


أحمد... حمايا راجل طيب ومحترم وبيحب بنتة وهو شايف الظروف فقالي مش هنعمل حاجة ولما روحت بالليل اتفاجئت بأنة عامل سبوع


سامح.... وعلى كدة انت ساكن في مفروش لسة


أحمد.... اة لسة في مفروش لحد ما الإيجار قطم وسطي


سامح... طب ما طالما حماك كدة وراجل جدع وطيب ماتروح انت ومراتك وعيالك اسكتوا معاة....... 


على الاقل توفر فلوس الإيجار لولادك وأهو تسليهم


أحمد.... انا مش عايز ابقى تقيل على حد متعودتش على كدة....... وانتهى الحوار


عدي وقت ممكن ان رانيا تسيب أطفالها مع مامتها وتنزل تشتغل عشان تساعد أحمد


حمدالله على السلامة يا رانيا أجازتك طولت وكمان شكلك اتغير وبقيتي أم


رانيا.... كلكوا وحشتوني والله والشغل كمان وحشني اوي


زميل في الشغل.... طب لية نزلتي دلوقتي.... كان ممكن تقعدي كمان شوية عشان تخلي بالك من ولادك اللي لسة صغيرين


رانيا..... مقدرش اقعد اكتر من كدة لازم انزل عشان الحمل بقى تقيل على أحمد ولازم اشيل معاة شوية


زميل أخر.... ياااااااا لسة في ستات بتحس بجوزها لسة في ستات عندها دم...... تيجي تسمعك الهانم اللي معايا قاعدة في البيت هانم وكل يوم طلبات وبس إنما تساعد ابدا


رانيا..... يلا ربنا يهدي الحال


عدا اليوم وخلصت رانيا شغلها وعدت على ما متها اخدت الولاد وروحت تعمل الغدا قبل ما أحمد يرجع من المصنع عشان يتغدا وينزل وردية التاكسي بالليل


أحمد طول الطريق مهموم بالمسؤولية الكبيرة اللي على كتافة وطول ماهو ماشي في طريقة للبيت بيفكر بكلام سامح انة يسكن مع حماة


في نفس اللحظة كانت رانيا بتفكر في كلام زملائها انها لازم تحوش فلوس شغلها او على الاقل جزء في البيت وجزء ليها

وإن في غيرها أقل منها قاعدة ومرتاحة وجوزها مكفيها


دخل أحمد البيت وهو متغير وكمان رانيا متغيرة


مساء الخير..... الولاد عاملين اية


مساء النور..... مالك اول مرة تدخل البيت متبوسنيش كالعادة وتطمن عليا الاول


أحمد......مفيش شوية قرف في الشغل...


رانيا...... طب القرف اللي في الشغل دة انهاردة بس ولا كل يوم


أحمد..... لا كل يوم بس انا خلاص تعبت ومعدتش قادر استحمل


رانيا..... انا كمان يا أحمد تعبانة ومش بتكلم عشان حاسة بالظروف.... أنا اللي أقل مني عايشين ومرتاحين ومفيش حد منهم بيهتم انة ينزل الشغل عشان يساعد زي منا عملت.... ومع ذلك مشتكتش


أحمد... تشتكي؟؟ تشتكي من إية يا رانيا انا راجل بصحي من الصبح برجع بالليل وبشتغل شغلانتين عشان اكفي مصاريفك ومصاريف البيت ودلوقتي بتقولي مابتشتكيش


رانيا.... أحمد انا مرتبي هجيب بية الطلبات اللي تخصني وهحوش الباقي للولاد

أحمد..... أمممممم... وأية كمان يا رانيا؟؟


كلامك اتغير لية يا رانيا مكونتيش كدة وعل الحلوة والمرة معايا.......... مجرد اول يوم ليكي في الشغل ترجعي كدة


رانيا...... لا انا متغيرتش بس احنا الفترة اللي فاتت محوشناش حاجة للظروف وانت اكتر واحد عارف يعني اية ظروف زي ما حصل في المستشفى وسبوع الولاد


أحمد..... هو ابوكي قالك هو ابوكي بيزلني


رانيا..... بابا لا فضحك ولا بيزلك انا اللي كنت قايلة لماما على الظروف وهو قالي متقلقيش انا معايا فلوس


أحمد.... فلوس ابوكي دي دين عليا ومن انهاردة تعيشي على الاد عشان اقدر أسدد فلوس ابوكي


رانيا.... بابا مش مستني مقابل ولا بيعتبرها سلفة


أحمد..... ابوكي لو حاسس بيكي أصلا مايسبكيش تقعدي في مفروش وهو وأمك قاعدين في شقة طويلة عريضة زي دي لوحدهم.........


رانيا...... لعلمك بابا عرض عليا كتير وماما بتحايل عليا كل يوم خصوصا بعد ما خلفنا....... بس أنا بقولهم انك مش هتوافق ولا انت عندك استعداد انك تكون تقيل على حد


أحمد.... تقيل؟ انا تقيل يا رانيا تمام انا نازل وكلي لوحدك انا مش أكل


ونزل أحمد وكل احساسة غضب وشعور بالالم ومسألش نفسة مين حط السم في حياتهم

بس طبعا حضراتكم عارفين مين حط السم في حياته


أصعب طلاق


الجزء الثالث


بقلم تامر صقر


خرج أحمد من البيت وهو بيتألم مرة من الدنيا اللي عطيالة ضهرها وبتمرمط فية وكل اللي بيجيبة يادوب مكفي المصاريف بالعافية......


ومرة لما رانيا أتغيرت نظرتها لية من اول يوم شغل.....


رانيا... الو ايوة يا ماما أنا اتخانقت مع أحمد وساب البيت ونزل ودي أول مرة يعملها من يوم ما أتجوزنا


مامتها... أتخانقتوا لية وإية السبب


رانيا.... حاجة تافهة يا ماما بس هو كبرها ومعدش طايق


العيشة في الشقة دي وعايزني أحط كل مرتبي في مصاريف


البيت أو اننا نيجي نسكن معاكوا في البيت


مامتها.... لااااا دا أتجنن هو الرجل اللي المفروض يصرف


على البيت ولا الست وبعدين المفروض اننا إحنا اللي


تتحايل علية عشان يجي يسكن معانا مش هو اللي يتشرط


باباها سمع الحوار


خير في أية مالك يا رانيا يا حبيبتي اية اللى انا سامعة دة


رانيا حكيتلو اللي حصل وكمان رأي مامتها في الموضوع


انفعل باباها عليها وقالها يابنتي الراجل في الزمن دة الله


يكون في عونة واللي انا شايفة ان الراجل بيعمل كل اللي


علية والعيشة هي اللي صعبة


متسمعيش كلام أمك وكلمي جوزك اعتزريلة ومتقوليلوش


انك اتكلمتي معانا في حاجة


وخلي يا بنتي مشاكلك مع جوزك جوة البيت ومتتعوديش


انك تسمعي لحد.......


حاوطي على بيتك وأولادك عشان جوزك مايضعش من ايدك......


حاضر يا بابا..........


رجع أحمد البيت... دخل أوضتة وقفل على نفسة


رانيا... أحمد ممكن ادخل؟؟ أحمد أحمد رد عليا


فتحت الباب ودخلت... انا اسفة يا أحمد مكنتش اقصد ازعلك بس انت كمان اتكلمت معايا بعصبية وانا مش أخدة منك على كدة


أحمد.... على العموم انتي لازم تعيشي على أد دخلي وانا مش عايزك تجيبي حاجة للبيت من فلوسك


رانيا... لية كدة يا أحمد منا قولتلك انا اسفة


أحمد... عشان مكونش تقيل عليكي ولا على أهلك زي ما قلتي

رانيا... خلاص يا أحمد اللي تشوفة


عدت فترة طويلة على الحكاية لحد ما الولاد بدأو يكبروا ولازم يدخلوا حضانة


رانيا.... أحمد احنا لازم نقدم للولاد في حضانة السنادي


أحمد.... لية دة لسة السنة الجاية الولاد لسة صغيرين.


رانيا.... يا أحمد دة ميعاد البيبي كلاس ولازم يروحوا زي


الولاد اللي في عمرهم


أحمد.... ممكن انتي تذاكري ليهم السنادي في البيت والسنة


الجاية نقدملهم في ميعاد الحضانة


رانيا بغضب.... لا يا أحمد كدة كتير كدة أوفر احنا هنبتديها كدة في تعليم الولاد


مش كفاية اني بشتغل وبساعد وماما شايلة الولاد طول منا


في الشغل من كل شئ أكلهم ولبسهم وغيارتهم ماما قايمة


بكل شئ


إلا التعليم يا أحمد إلا التعليم


 أحمد.... أولا يا هانم أنا مطلبتش منك انك تجيبي حاجة في


البيت انتي اللي بتجيبي ثانيا امك هي اللي المفروض


تشيل الولاد طول مانتي بتشتغلي


ثالثا انا بعمل كل اللي عليا عشان نعيش مستورين


خلاص يا أحمد انا هتكفل بمصاريف مدرسة الولاد


أحمد.... براحتك اعملي اللي تعملية......   ماهو اللي زيك


لما يمسك قرش بيفتري


رانيا...... إية اللي أنت بتقول دة؟؟؟؟؟؟؟


أنا طول عمري عايشة في بيت أهلي ملكة عمر بابا ما بخل


عليا بحاجة ولا ماما شافتني نفسي في حاجة غير ما جبتهالي


مين دي يا أحمد اللي لما تمسك فلوس بتفتري


يأ أخي اتكسف على دمك دا أنا اللي شايلة البيت


أنت يادوب فلوس شغلك بتجيب بيها سجاير وبتدفع


الإيجار ولو جبت الغدا يبقى من الله


أحمد بعصبية وصوت عالي.... انتي بتزليني انتي عشان


مرتبك زاد بتتكلمي كدة؟؟


لازم تعرفي يا هانم إنك من ساعة ما نزلتي الشغل وانتي


مش مدياني أي حق....


من ساعة ما أشتغلتي وانتي بتهتمي بلبسك بس وانتي


نازلة الشغل


بتحطي مكياج وانتي نازلة الشغل أكتر ما بتحطية في البيت


لجوزك


بتهتمي بالبرفانات الغالية وانتي نازلة الشغل وفي البيت


برفانك الوحيد بصل وثوم


أنا ساكت بقالي مدة وبقول مش مهم طالما مهتمة بالولاد


تبقى بتتعب


إنما أنا فين في حياتك يا هانم انا فين؟؟؟


رانيا بصوت عالي وعصبية..... أنت عايزني أصحي الصبح اغير


والبس وأعمل فطار واجهز شنطة الولاد واوديهم لماما


 وأروح الشغل وأرجع اخد الولاد من عند ماما وارجع البيت


اطبخ واغسل وأحمي وأغير وانضف وحضرتك شايف ان انا


كدة بتدلع


صحيح إنكم الرجالة عمركوا ما حسيتوا بينا ولا باللي بنعملة


جرب انت تقعد يوم في البيت تعمل اللي أنا بعملة من غير


شغل خارجي وشوف هتستحمل أد إية


دا إنت بترجع من الشغل صامت حياتك كلها يا إما ماسك


الموبايل وبتضحك أكتر ما بتضحك في وشي


يا إما ماسك ريموت التليفزيون وتتفرج على الكورة ولا


الاخبار


ولما أقولك عايزة اخرج معاك تقولي مش قادر طب كلمني


تقولي تعبان انت إية يا أخي


أنا مستحملة وساكتة انت بني أدم غير اللي أنا حبيت


واتجوزتة


ودخلت رانيا لمت هدومها وراحت عند مامتها هي والولاد


دخلت البيت منهارة وبتعيط


 مامة رانيا........ مالك يا رانيا مالك يا حبيبتي


رانيا...... مفيش يا ماما بابا فين؟؟


خرج ابوها اخدها في حضنة مالك ياحبيبتي بتعيطي لية


مامتها...... أكيد عكنن عليها تاني


أنا خلاص يا بابا تعبت طول اليوم شغل والبيت شغل


ومفيش حاجة بستخسرها في البيت وبردو مش عاجبة


أنا خلاص يا بابا حاسة إن أحمد اتغير ومعدش بيحبني


باباها.... خلاص يابنتي أهدى وادخلي أرتاحي دلوقتي وأنا


هتكلم معاة....


رانيا كلمت صاحبتها وحكتلها اللي حصل وطبعا الكلام


مكنش عاجب صاحبتها وطبعا سخنتها على جوزها وقالتلها


هددية بأنك عايزة تطلقي.....


رانيا ازاي بتقولي كدة طب إفرضي انة طلقني فعلا هستفيد


إية غير كسرة أبويا وأمي عليا وعيالي دول هعمل فيهم إية


ردت صاحبتها.... يا بنتي دة تهديد بس.................            


مش هو كاتب قايمة ومؤخر يبقى هيخاف ويتعدل


ولو مش مصدقاني نزلي مشكلتك في جروب نسائي مشهور


زي..********* بس من غير إسمك وشوفي الناس


هاتقولك إية......


وفعلا رانيا نزلت مشكلتها مع جوزها في الجروب النسائي دة


والستات فية ما بتتوصاش


طبعا إتأثرت برأيهم وانها مش مطلوب منها تدفع كل مرتبها


في البيت وانها ليها كيان وإن الراجل اللي ينتظر من مراتة


المرتب دة مش راجل وكذا وكذا وكذا


وانتشر بوق السموم في أذن رانيا إلى حد الكراهية لعيشتها


مع أحمد


وبالتالي أحمد راح شغلة بعدها وجد زميلتة في الشغل اللي


كانت معجبة بية من زمان بتحاول تعرف اية اللى مغيرة


وإية المشكلة اللي بسببها بيقعد حزين في الشغل


أتكلمت معاة مالك يا أحمد؟؟ 


أحمد...... مفيش حاجة يا إيناس انا كويس


إيناس لا بجد في أية شكلك متغير ومش أنت أحمد اللي


أعرفة


أحمد... بصلها بأبتسامة وقالها عارفة يا إيناس لو مراتي


مهتمة أنها تعرف اية اللى مضايقني زيك مكنش بقى دة


حالي


إيناس.... مراتك مزعلاك والله يا أحمد مراتك دي ما عندها


دم ولا بتحس لما تكون مع راجل زيك وتعكنن علية


بصلها أحمد وقالها راجل زيي؟؟. لية انا مالي؟؟؟ 


ردت إيناس انت راجل محترم ومكافح من بيتك لشغلك


ومن شغلك لبيتك وكمان شايفاك وانت بتتكلم مع مراتك


بأسلوب محترم وكويس يعني راجل بمعنى الكلمة


ملهاش حق تزعلك ولا تخليك أعد كدة حزين


أحمد..... ممكن نتقابل بعد الشغل نقعد مع بعض نتكلم؟ 


محتاج أتكلم مع حد


إيناس بس كدة من عنيا الاتنين حاضر


بعد كام يوم أتصل والد رانيا بأحمد وقالة عايزين يا أحمد يا


أبني نقعد وننهي المشكلة اللي بينك وبين رانيا دي


مش عايزين يابني الشيطان ينتصر عليكوا


أستهدوا بالله وارجعوا بيتكوا  وربوا عيالكوا بينكوا


أحمد..... لا يا عمي انا أسف انا مش هاجي أرجعها لاني


مقولتلهاش أمشي


هي لو عايزة ترجع براحتها مش عايزة بردو براحتها وقفل


الحوار


عدت أيام كتير والتوتر والبعد زاد والجفاف زاد أكتر وأحمد


مش بيصرف على أولادة ولا بيطلب يشوفهم طبعا لان


إيناس منسياه الدنيا واللي فيها


أهل العيلتين اتفقوا انهم ينهوا الموضوع ويصلحوا ما بين


أحمد ورانيا


أجتمعوا في مكان ورانيا واحمد كانوا موجودين بس مش


أحمد ورانيا اللي كنا نعرفهم


أول كلام من بابا راينا إن أحمد ورانيا يقعدوا على ترابيزة


لوحدهم يعاتبوا بعض ويمكن يهدوا من غير تدخل الاهل


اليوم دة كانت رانيا في أجمل صورة وكانت جميلة جدا لدرجة


إن احمد اتغاظ أنها مهتمة بنفسها رغم بعد أحمد عنها

.

أول كلام من أحمد لرانيا


مسك زجاجة المياة اللي أمامة وقالها........


شايفة إزازة المية دي يا رانيا مليانة على أخرها ازاي


المية اللي جواها دي هي عشرتنا وحبنا وكل حاجة حلوة


حصلت ما بينا


لو الازازة دي اتخرمت من تحت زي علاقتنا ما حصل فيها


شرخ كبير أية اللي هيحصل بعد مدة طويلة


ردت رانيا وقالت أكيد هتفضي


رد أحمد وقالها انتي بالنسبالي يا رانيا زي الازازة الفاضية


معدش جوايا حاجة ليكي كلة خلاص............


بصت رانيا لأحمد بعيون تملئها الدموع والحصرة وسابتة


وراحت عند باباها وقالتلة خلاص يا بابا الموضوع خلص


إحنا هنطلق 😢😢😢😢😢😢


قام باباها من على الكرسي وهو يترنح ومش مصدق اللي


بنتة قالتة وراح لأحمد وقالة لو بنتي هانت عليك ولادك


ولادك هانوا عليك؟؟ 


ووقع بابا رانيا على الأرض والكل يصرخ إسعاف إسعاف


جائت الإسعاف وذهبوا كلهم ورائة بما فيهم أحمدإلي


المستشفي


بعد فترة في غرفة الكشف


خرج الدكتور...


طمنا يادكتور الحالة إية دلوقتي


. البقاء لله


يتبع


تامر صقر

ملحوظة بعض الأحداث في الرواية حدثت بالفعل ومراعاة لاصحاب القصة الحقيقية تم تغيير بعض الأحداث والكلمات

بداية الروايه من هنا 👇👇👇


من هنا


تعليقات

CLOSE ADS
CLOSE ADS
close