رواية بقايا عائله الفصل الثالث بقلم الكاتبه فاطمه هشام

 رواية بقايا عائله الفصل الثالث بقلم الكاتبه فاطمه هشام 

& امى وجايبانا احنا التلاتة كبرنا واتفرقنا خالك اتجوز وانا اتجوزت وخالك التانى سافر وماعرفش عنه حاجة &

محاسن*بفرحة من جواها*:خلاص لموا هدومكم وتعالوا معايا دلوقتى

شفق*بصدمة*:دلوقتى!!

محاسن:اة هتستنوا ايه يعنى ,وكمان كويس ان جنى فى اجازة الصيف يعنى مفيش دراسة عُقبال ما نظبط موضوع المدرسة ده وننقلها ونخليها فى مدرسة أقرب شوية من البيت عندنا

جنى*بحزن*:بس انا بحب مدرستى واصحابى

محاسن*قربت منها*:معلش ياحبيبتى ,مش هينفع تكملى فيها, المسافة بعيدة اوى عن البيت مش هينفع نجيبك ونوديكى كل يوم هيكون صعب ,هقدملك فى مدرسة تانية وهتكون احسن من دى وهتعرفى اصحاب تانيين كويسين برده زى اصحابك

جنى*بضيق*:لا ماليش دعوه

شفق*بصتلها*:ماتزعليش هنبقى نشوف الموضوع ده

محاسن*ابتسمت ابتسامة صغيرة*:بالظبط زى ما اختك قالت نتكلم بعدين فى الموضوع ده ,يلا بقى ياولاد حضره نفسكم انا هقعد استناكم هنا و لوعايزين مساعدتى انا معاكم

*التلاتة بصوا لبعض وبدأ كل واحد يتحرك ويشوف الحاجة اللى هياخدها ويبصوا على الشقة وف كل مكان فيها

,ويفتكروا لما كانوا بيقعدوا هما الخمسة حوالين التربيزة ويتغدوا ويتكلموا مع بعض ,ولما كانت

 شفق بتقف مع مامتها فى البلكونة وهى بتنشر الغسيل وتساعدها وتحكيلها عن يومها كان عامل ازاى ,ولما كانت تحكى لباباها عن اى حد مضايقها بتشوفوا ازاى كان بيجيب حقها واحساسها بالآمان فى وجوده وان محدش يقدر ييجى ناحيتها 

وجنى تفتكر لما كانت مامتها بتقعد معاها وهى بتذاكر وتفضل تسمعلها وكانت لما بتجاوب صح تديها فلوس تنزل تجيب بيهم حاجة حلوه ,وباباها اللى كان بيفضل يلعب ويهزر معاها 

أنس يفتكر لما باباه قعد معاه اخر مرة وكان بيواسيه انه ساب الشغل وقالوا مش مشكلة حاول تانى ودور تانى وانه معاه وهيساعده ومامته اللى دعمته وقتها وفضلت تقولوا هما اللى خسره ابنها مش هو اللى خسرهم!

وطبعا رغم دفا وحنية الاسرة بس كانت حتى لما بتحصل مشاكل ولو بسيطة بتتحل فى ليلتها وكان كفاية عليهم انهم نايمين ومطمنين بوجود الشخص اللى بيحتويهم اللى هما مامتهم والامان اللى هو باباهم 

,ويلاقوا ان لما كانوا بيباتوا بعد وفاتهم بيقفلوا الباب بالترباس عليهم كأنهم لسه عيال صغيرة وخايفين من العالم اللى برة ده...

وجهزه نفسهم ومعرفوش يسلموا على حنان وعصام لآن هى كانت بتستعجلهم جامد وانها جابت عربية عشان يعرفوا يمشوا بالشُنط لكن حنان وقتها كانت واقفة فى البلكونة وشافتهم وهما راكبين العربية وماشيين والدموع نزلت على خدها*

حنان*دخلت لعصام وقالت بحزن*:خدتهم ومشيت!!

عصام*فهم وخد مراته فى حضنه وطبطب عليها وكان حاسس بيها لآنه هو كمان كان متعلق بيهم كأنهم عياله*

*ويفضلوا فى الطريق ساكتين خالص وبعد شوية يوصلوا عند باب العمارة و وقتها يكون حسن فى المحل بتاعه اللى تحت البيت واول ما شافهم قرب منهم*

حسن*بأبتسامة*:يا اهلاً وسهلاً ,نورتوا ياولاد *وسلم عليهم*

محاسن*بصتلهم بفرحة*:خلاص وافقوا يعيشوا معانا

حسن:هتنورونا والله *وشاور على البيت*:اتفضلوا ,اتفضلوا ,سيبه الشُنط انا هخلى حد من العيال هنا يطلعهم

أنس:لا مفيش داعى انا هطلعهم

حسن:لا انت جاى من طريق طويل ,اطلع انت استريح ,يلا

أنس*بصله وحس انه اسلوبه كويس وانه راجل طيب*

*وطلعوا واول ما الباب اتفتح فضلوا يبصوا على الشقة بعنيهم هى كانت كبيرة عن شقتهم شوية وفى منطقة كويسة الا حد ما برده ,بس رغم كدا كان جواهم احساس انهم عايزين بيتهم وعيلتهم وحياتهم اللى فاتت*

محاسن:ايه هتفضلوا واقفين يلا ادخلوا ,خلاص ده بقى بيتكم من النهاردة *ودخل قعد كل واحد منهم على كرسى فى الصالة وبدأت تشاورلهم على اوضهم*:بصوا بقى من حُسن الحظ ان الشقة برده 3 اوض ,اوضة ليا انا وعمكم حسن ,واوضة بتاعت ابننا اللى مسافر ودى هيقعد فيها البنات واوضة تانية *وبصيت لأنس*:معلش بقى انا كنت عملاها للكركيب لآن كدا كدا ماكنش حد بيقعد فيها بس من بكرة هظبطها انا بس حطيتلك مرتبة من المراتب القديمة مؤقتاً لحد ما اجيب الجديدة

شفق:مش مشكلة ممكن ينام معانا

محاسن:لا طبعا ازااى يعنى ,ده انا حتى والله لو عليا اقعدوا هو فى اوضة ياسر وانتوا تقعدوا فى الاوضة التانية ,بس طبعاً هو ولد يستحمل شوية لكن انتوا بنات ماينفعش *واول ما قالت كدا الباب خبط وراحت تفتح وكان واحد مطلع الشُنط*:يلا شُنطكم وصلت كل واحد يروح أوضته وغيره هدومكم

*وكل واحد خد شنطته ودخله الاوض , ورغم حنية خالتهم لكن كانوا برده حاسين بالغُربة وانهم لسه مش مرتاحين فيه*

*وفى الوقت ده فى بيت فوزية تكون قاعدة قدام التيلفزيون بتتفرج على فيلم عربى قديم "اليتيمتين" ومندمجة فيه اوى*

مرام*فتحت باب الشقة ورمت شنطتها ومفتحها على الكرسى وقربت قعدت جمب مامتها*

فوزية:جيتى يامرام

مرام:اومال هيكون خيالى

فوزية:بطلى استظراف 

مرام:ماما انا جعانة خلصتى الاكل

فوزية:على النــــار

مرام*بضيق*:ياماما انا جعانة كل ده لسه ماخلصش

فوزية*بصتلها ورفعت حاجبها*:معلش هبقى اقول لنار تنجز عشان بنتى جاية جعانة!!

مرام*قلعت جزمتها بأيديها*

فوزية:انتى داخلة بالجزمة لحد هنا ميت مرة اقولك اقلعيها عند الباب انا لسه منضفة الشقة حرام عليكى

مرام*بعدم اهتمام*:طيب طيب

فوزية:طيب طيب ,ولا بتعملى حاجة

مرام*بصتلها بتأفف وبعديها لقيتها مركزة على اللى بتتفرجه وبصيت على الفيلم*:هو ايه اللى بتتفرجى عليه ده

فوزية:فيلم حلو اوى

مرام:حلو ايه ده منتهى من قرن ,ايه ياماما ده فى افلام احسن من كدا بكتير

فوزية:انتى عارفة ما بيعجبنيش افلامكم دى هو فى احسن من افلام زمان وحلاوتها ,امشى امشى انتوا اصلا افلامكم دى افلام

مرام*رفعت حاجبها بضيق*:طب وياترى بقى اطمنتى على اليتامى التانيين ولا بتتفرجى على الافلام بس

فوزية*بصتلها بصدمة اول ما قالت كدا وسكتت شوية*:انتى بتضايقينى يابت صح

مرام*ضحكت اوى وقامت تقف عشان تدخل على اوضتها*:بصراحة اة عشان تعملى الاكل اسرع من كدا

فوزية:قومى من قدامى قومى *ومسكت مخدة صغيرة وجاية تحدفها بيها جت عند ويكون ساعتها حد بيفتح الباب ويكون*

علاء*والمخدة جت فى وشه اول ما فتح*:ايه ده فى ايه!!! ده انا ماكنتش رجعت من السفر بقى

فوزية*قامت وقربت منه بسرعة وحضنته*:علاء عامل ايه ياحبيبى

علاء:قبل حدفك للمخدة ولا بعديها

فوزية:ما انت عارف اختك وعمايلها

مرام*بصتله برخامة*:يا ساتر ايه اللى جابك

علاء:هو ده ترحيبك لآخوكى بعد غياب 10 ايام ياختى

مرام:ماخلتهومش 20 ليه

فوزية:بس يابت ,وادخلى انتى شوفى الاكل خلص ولا لا

مرام:انا جاية تعبانة خلصيه واندهيلى انا داخلة اوضتى

فوزية:سيبك منها تعالا *ودخلته قعد على الكنبة وهى قصاده*:ها أحكيلى عملت ايه بقى فى الرحلة

علاء:رحلة ايه ياماما ده كان شُغل برده وانا اللى قولت مسفرنة نتفسح وعملت حسابى وخدت مايوه *وابتسم*:بس الساحل حلو

فوزية:يعنى ما نزلتش البحر خالص اومال جاى غامق كدا ليه

علاء:لا ما انا نزلت ، كانوا بيرفقوا بحالنا وادونا يومين اجازة ,المهم انا جعان جدا

فوزية:ادخل غير هدومك وثوانى والاكل يكون جاهز

علاء*ابتسم*:ماشى *ودخل اوضته وهو بيصفر*

*وقامت تشوف الغدا خلص ولا لا.. وفى الوقت ده ف بيت محاسن كانت بتخبط على باب اوضة البنات وفتحت ودخلت*

محاسن:ها عجبتكم الاوضة

شفق:حلوه

جنى:مش عجبانى مفيهاش حاجة نلعب بيها

محاسن*ابتسمت*:بس كدا هجيبلك بكرة لعب تلعبى بيها

جنى*بصتلها وسكتت*

شفق*بنبرة احراج*:هو احنا وجودنا مش هيتقل عليكم

محاسن*بصتلها*:هو ايه الكلام اللى يزعل ده بقى ,وكمان انا اللى قايلالكم تعالوا ,طب تعرفى بقى ان دى فكرة عمك حسن وهو اللى قالى ازاى هتسبيهم لوحدهم كدا حتى لو معاهم اخ ولد لازم برده حد كبير يكون معاهم وفى وسطيهم *وقالت بتنهيدة*:واهوه تعوضونا عن غياب ابننا 

جنى*وهى بتشاور على صورة محطوطة على الكومدينو*:هو ده

محاسن*مسكت البرواز الصغير*:اة هو ياسر ,هيفرح اوى لما يعرف انكم هنا لما اكلموا فيديو كول هخليكم تكلموه *وحطيت الصورة تانى على الكومدينوا*

شفق:ان شاء الله 

*وفضلوا يتكلموا مع بعض وفى الوقت ده كانت فوزية حضرت الاكل وكلهم قاعديين ياكلوا مع بعض*

فوزية:ايه اكلى ما وحشكش ولا ايه

مرام:فى ايه ياماما ده هما 10 تيام مش 100 يوم

فوزية:اخوكى اول مرة يغيب عن البيت على فكرة ده يعلم ربنا كنت قلقانة ازاى

طلعت*بجدية*:هو صغير ولا ايه ده بقى راجل وبيشتغل دلوقتى

علاء*بصلهم وابتسم*:حاسس الوحيد اللى فارق معاها هى ماما

طلعت*وهو بياخد معلقة سلطة*:ما عشان انت ابن امك!! هى جديدة يعنى

مرام*ضحكت اوى*:ايوه فعلا 

فوزية:سيبك منهم وكُل

علاء*بصلها وسكت شوية*:هو صحيح خالو مات

فوزية*بصيتله وكأنها كانت ناسية وافتكرت*:اة 

علاء:بس انتى مش لما كلمتينى قولتيلى ان مراته هى اللى ماتت

فوزية*بهدوء*:ما هما الاتنين اتوفوا ربنا يرحمهم

علاء:يــارب ,طيب واللى مفروض يكونوا ولاد خالى دول فين!

فوزية*بعدم اهتمام*:فى بيتهم ,هيفرق فى ايه يعنى

علاء:اصل يعنى عُمرنا ماشوفناهم وكمان كنتى بتتكلمى عنهم قليل هما وخالنا اللى مسافر برة ده

فوزية*بتنهيدة*:مفيش كلام يتقال ,امى وجايبانا احنا التلاتة كبرنا واتفرقنا خالك اتجوز وانا اتجوزت وخالك التانى سافر وماعرفش عنه حاجة!!

مرام:خالص!!

فوزية:اة بعد وفاه ابويا وامى سافر ومانعرفش عنه اى حاجة 

علاء:طب..

فوزية*بنفاذ صبر*:وبعدين انت راجع من السفر عشان تكلمنى عن حاجات عدت وفاتت ولا ايه ,بقولكم ايه انا شبعت *وقامت وسابتهم ودخلت الحمام تغسل ايديها*

مرام*بصتله بغيظ*:ضايقتها ياحلو ,قابل بقى

طلعت*ببرود وهو بياكل*:مش هتعملوا حاجة , بقولك ابن امه!!

علاء*بعدم اهتمام*:ضايقتها ايه!! انا بتكلم عن ناس مفروض قرايبنا يعنى ,انا اصلاً مالى *ومسك الشوكة وكمل اكله وقرر ما يتكلمش فى الموضوع ده تانى*

*وبعد ما يخلصوا كل واحد يدخل على اوضته ويقفل الباب عليه وفى الوقت ده كانت محاسن خارجة من اوضة البنات*

حسن*كان واقف واول ما فتحت الباب عينه كانت باصة على جوه*

شفق*اول ما شافته حطيت الطرحة بسرعة على شعرها*

محاسن*بصتله بخضة وقفلت الباب*:ايه ياحسن خضيتنى انت جيت امتى؟

حسن:لسه جى دلوقى *وشاور على الأكياس اللى ف ايديه*:وجبت فاكهة عشان العيال تاكل ,ما تندهلهم ياكلوا

محاسن:لا هما تعبانين وعايزين يناموا ,بكرة ان شاء الله

حسن*بضيق*:اومال مين هياكل الفاكهة دى

محاسن*بتشيل الاكياس منه*:ما قولتلك هما , بس بكرة بكرة

حسن*بصلها وبص على باب الاوضة بضيق وفتح باب اوضته وبدأ يغير هدومه*

محاسن*دخلت حطتهم فى التلاجة وبعديها راحت على اوضتها وقفلت الباب*:ابقى اقفل الباب وراك وانت داخل فى بنات وماينفعش يشوفوك وانت بتغير

حسن:طيب!!

محاسن*بتقعد على السرير وتبصله بتردد*:بقولك ايه! كنت عايزاك فى موضوع

حسن:خير!!

محاسن:ماتشغل انس معاك فى الورشة

حسن*بنبرة صوت عالية شوية*:نعم يا اختى!! هو شوية نجيبهم وشوية شغلهم!!

محاسن:وطى صوتك!! وكمان فين شغلهم دى! انا بقولك شغل الواد ماهو مش طبيعى يفضل قاعد فى البيت كدا ,لازم ينزل يشتغل ويشوف السوق برة عامل ازاى وعلى الاقل يكفى احتياجاته لو هو عايز حاجة

حسن:ما هو هياخد الفلوس دى منى

محاسن:اومال عايزه يشتغل ببلاش وكمان هو فنى كهربى وانت ورشتك ليها علاقة بحاجات الكهربة يعنى كأن ده مكانه وبدل ما تفضل طول اليوم اهوه تطلع تستريح شوية وصحيح انت مش كنت بدور مع حد يشيل معاك الشغل ومش لاقى جالك اهوه واد خام وانت تعلمه اصول الشغلانة وعنده خبرة كمان من دراسته يعنى اكيد هيفيدك

حسن*باصصلها بأعجاب*:ده انتى طلعتى مش سهلة ,وانا اللى فاكرك ولية غلبانة وعلى نياتك ,ده انا اللى طلعت ع نياتى

محاسن:هو لما اكون عايزة ولاد اختى يكونوا معايا وكمان نراعى يتامة يعنى حتى ناخد ثواب وبفكر فيهم وفى مستقبلهم ابقى واحدة وحشة

حسن:انا ماقولتش كدا *وفرد جسمه على سريره*:ماشى بكرة نتكلم فى الموضوع ده

محاسن:خليه ينزل معاك من بكرة مش عايزاه يفضل يفكر كتير ويسحل دماغه ويتعب ,انت شوفت اللى حصل لآبوه

حسن:ماشى يامحاسن ماشى ,اقفلى النور خلينا ننام بقى

محاسن*ابتسمت بفرحة*:ماشى

*وقفلت النور وكانت مبسوطة اوى ان جوزها وافق وفرحت اكتر انها بدل ما كانت طول اليوم قاعدة لوحدها ربنا رزقها ببنتين يقعدوا معاها ويقللوا من الوحدة اللى هى حاسة بيها..

ويعرف أنس موضوع الشغل ده ويوافق ويحس حتى انه بكدا يقدر يعتمد على نفسه وكمان كان شايف ان حسن كويس معاهم وبيعاملهم بطريقة كويسة

 وتعدى فتــــــــرة ويكون أنس نايم فى نفس الاوضة بنفس المرتبة القديمة وشوية والباب خبط*

شفق*ابتسمت ابتسامة صغيرة*:ممكن ادخل

أنس:اكيد طبعا *وقام قعد على المرتبة*

شفق*نزلت قعدت قصاده*:معلش خالته بتقول ان السيولة الفترة دى مع عمو مش قد كدا بس اول ما تظبط هتظبط الاوضة دى

أنس:مفيش مشكلة! وكمان انا اصلا بدخل هنا وانا مهدود وعايز انام

شفق:بتتعب ف الشغل!!

أنس:بصى هو اللى مساعدنى انه تبع دراستى ففاهم فيه شوية لكن بصراحة عم حسن ساعات بيفضل يطلب طلبات كتير ويخلينى اروح مشاوير بعيدة واجيب شغل ومعظم الوقت انا اللى موجود ف المحل ويمكن ده اللى بيتعبنى بس عارفة احسن بيشغلنى عن التفكير

شفق*بتنهيدة*:فعلا ده احسن!! بس عارف انا مستغربة هو بيكون فين مادام ما بيطلعش هنا

أنس:مش عارف! حتى لما بيرجع ما بيكونش معاه شغل *وبصلها بعدم اهتمام*:احنا مالنا مش هنفكر فى الناس كمان

شفق:عندك حق

أنس:طيب وانتى

شفق:بصراحة زهقت ,هو طبعا خالتنا طلعت ست طيبة و بتعملنا حلو اوى وحاسة ان جنى بدأت تقرب منها من كتر اهتمامها وتحبها *وقالت وهى بتفكر*:انا مش عارفة هى ليه كانت بعيدة عننا كل الوقت ده وايه السبب اللى يخلى ماما تطلب من اختها الوحيدة تبقى بعيدة عنها!!

أنس:مش عارف وكمان هى مش عايزة تقولنا

شفق*تفوء من تفكرها وتبصله*:بس انا زهقت وعايزة اشتغل برده

أنس*بصدمة*:تشتغلى!

شفق:اة يا انس,,انا بجد زهقانة من قاعدة البيت ملل اوى *وقالت والدموع فعنيها*:وبيخلينى ديماً بفكر فى اللى فات وقلبى يوجعنى اكتر ,انا عارفة انى حتى لو اشتغلت مش هنساهم ,بس عايزة احس انى بعمل حاجة

أنس*بجدية*:لا ياشفق مش هسيبك تنزلى وتتمرمطى فى الشغل وواحد يرزل عليكى وناس تأذيكى ,اكيد لا

شفق:يا أنس ما هو مش طبيعى برده افضل قاعدة كدا

أنس:ايه المشكلة خليكى زى ما انتى ,لحد ما يجيلك عريسك وانا اللى هسلمك لى بنفسى!

شفق*الدموع فى عنيها وقالت بتأثر*:حتى لما بفكر ف الموضوع ده بحس انه هيبقى ناقص من غير بابا وماما

أنس*طبطب على ايديها*:هما اكيد هيكونوا حاسين باليوم ده ان شاء الله ومتقلقيش انا هبقى معاكى 

شفق*بصتله وابتسمت ابتسامة صغيرة*:ربنا يخليك لينا وانا وانت نوصل جنى لعريسها ان شاء الله

أنس:ان شاء الله

شفق:طيب مش هسهرك هسيبك تنام عشان تصحى بدرى لشغلك ,تصبح على خير

أنس:وانتى من اهله

*وتقوم شفق وتقفل الباب وهى باصة لآخوها وبتدعى من قلبها ان عيلتهم يفضلوا دايماً بخير وفى الوقت ده يكون حسن بيتسحب من جمب محاسن على السرير وبيتأكد انها نايمة ويخرج بخطوات بطيئة وحذر من الاوضة ويفضل يبص حواليه فى الضلمة ويقرب من اوضة شفق ويحط ايديه على الاوكرة وبيفتحها براحة*

شفق*تكون واقفة وراه وباصة بصدمة*:انت بتعمل ايــه؟؟

انتهــــــــــــت الحلقة الثــــــــــالــــثة

ميــن منتظر الحلقة الجاية..!!

اتمنى اللى عاجبته يعمل لايك ويقول رأيه ف كومنت 

تأليــــف:فاطمـــة هشـــــــــــــام