رواية قبل فوات الاوان البارت الاول بقلم آيه طه حصريه وجديده على مدونة النجم المتوهج
في شقه متوسطه رن جرس الباب.سارة كانت واقفة في المطبخ بتحضر الغدا، ومسحت إيديها في الفوطة وهي بتنادي:
كريم... افتح الباب يا حبيبي، إيدي كلها عجين.
كريم رد من الصالة: هو انتى لسه مخلصتيش يا ساره يلا بقى انجزى انا والعيال جعنا اووى... واهو يا ستي حاضر هفتح الباب بس ننجز بالغدا.
فتح الباب، واتفاجئ...
كريم: أمي!
الحاجة أمينة ابتسمت وهي شايلة شنطة سفر كبيرة، وفي إيدها كيسين.
امينه: ايه ياولا مش هتدخلني ولا هتفضل تبصلي كدا؟
كريم حضنها: يا نهار أبيض... مش ادخلك ازاى بس البيت بيتك يا امي تعالى اتفضاي اكيد.... بس كنتي قولتي إنك جاية.
امينه: هو انا لازم أستأذن علشان أزور ابني ولا ايه؟ هو مش مرحب بيا ولا ايه يا كريم هو مش بينك بيتى ولا هتعامل زي الضيوف؟
خرجت سارة بسرعة.
ساره: يا ألف نهار أبيض... نورتينا يا ماما ولا طبعا البيت بيتك واحنا اللى ضيوف كمان هو كريم اكيد ميقصدتش كدا.... هو قصده علشان كان يروح هو يجيبك بدل ما تتبهدلي فى السكة لوحدك يا ست الكل دا انتي وحشتينا والله..
حضنتها وباست إيديها.
أمينة بصتلها من فوق لتحت وقالت بابتسامة خفيفة: وانتي كمان... بس شكلك خسيتي.... وايه اللى على هدومك دا متهيالي كدا هدومك مش نظيفه وكمان البيت فيه حاجات كدا صح؟
سارة ضحكت: يمكن خسيت بس دا من الجري ورا العيال... اه معلش يا ماما كنت بعجن والظاهر كدا العجين جه على هدومي اتفضلي ارتاحي وانا هدخل اغير هدومي ونتغدا سوا...
دخلت أمينة وهي بتبص حواليها.
وقبل حتى ما تقعد قالت: ايه دا يا ساره الجزامة مكانها مش هنا ازاى تحطيها فى المكان دا بالشكل كدا..
كريم ضحك: فى ايه يا ماما احنا لسه داخلين من على الباب طب ارتاحي شويه الاول واقعدى خدي نفسك من الطريق وكله هيكون تمام
امينه: يعني إيه؟ ما انا أول ما دخلت اتكعبلت فيها... واكيد انتو كمان دا اهمال وشكلها مش لطيف بالمرة بعد اذنك يا كريم انقلها من مكانها وحطها هنا افضل يلا دلوقتي يا حبيبي...
سارة ابتسمت وهي بتحاول تعدي الكلام:
حاضر يا ماما هنغير مكانها انتى معاكي حق مكانها هناك افضل بكتير..
دخلت أمينة المطبخ ووقفت دقيقة تبص: إيه دا؟ ايه المنظر دا.... لا يا ساره انتى خلاص بقيتى ام ولحد دلوقتي مطبخك بالمنظر دا مش معقوله يعني..
سارة استغربت: هو في ايه؟ خير؟
امينه: خير وهيجي منين الخير...... التوابل دي كلها اللى حطتها جنب البوتاجاز؟ متعرفيش انها كدا هتبوظ من الحرارة.
ومدت إيديها تشيل البرطمانات.
سارة حاولت تضحك: لا مش القصد يا ماما بس أنا متعودة عليها كده علشان تكون قريبه من ايدي وانا محافظه عليها والله وتقدري تتاكدي انها كلها سليمه..
امينه: لأ يا بنتي مفيش،حاجه اسمها كدا... الصح كده والصح دايما يتعمل...
وفي أقل من خمس دقايق كانت غيرت مكان التوابل، والصواني، والحلل.
سارة بصت لكريم.
كريم عمل وش معناه: "استحملي."
~~~~~~~~~~~~~
وقت الغدا على السفرة.أمينة داقت الأكل.
سكتت.و سارة مستنية رأيها.
أمينة قالت بهدوء: هممم حلو.
سارة ابتسمت: الحمد لله الف هنا وشفا يا ماما..
بعد ثانيتين...
امينه: بس...
سارة من جواها قالت: يا ساتر.
امينه: بس الرز محتاج يتغسل أكتر من كده... والملوخية لو كانت متشوحة بشوية توم زيادة كانت هتبقى أحلى.
كريم بسرعة: يا أمي والله الأكل جميل. وساره نفسها حلو اووى بالاكل..
امينه: هو أنا قولت وحش؟ انا بس بنبها لحاجه للمره الجايه متكررهاش علشان الاكل يطلع احلى... انا عارفه انت بتحب الاكل ازاى يا كريم وكمان العيال دي لازم تاكل اكل حلو وكويس...
كريم: لأ يا امي مقولتيش وحش بس سارة بتهتم بالعيال وبيا وبجد بتحاول كتير تخلي بالها منى ومن العيال وبعدين انا خلاص كبرت يا ست الكل....
امينه: طالما لا يبقى زعلتوا ليه؟ الظاهر كدا كلامي بيقف فى الزور يا كريم...
سارة ابتسمت بالعافية: لا يا ماما احنا ولا زعلنا ولا حاجة وطبعا انتى كلامك فوق راس ويحترم...
~~~~~~~~~~~
بعد الغدا.
سارة دخلت المطبخ تغسل المواعين.بس أول ما دخلت...لقيت المواعين كلها مغسولة.
سارة: ليه كدا يا ماما! أنا كنت هعملهم تعبتي نفسك تسلم ايدك يارب...
امينه: لا خلاص عملتهم. وبعدين هو دا تعب؟ وبعدين انتي غسلك للمواعين مش بيعجبني. فكان لازم اتاكد من نضافتهم بنفسي...
سارة اتصدمت: نعم؟ مش بيعجبك ازاى يعنى يا ماما.... ما المواعين نضيفه اهي وزي الفل..
امينه: لا بتسيبي عليها نقط مية. المفروض تتنشف وكمان رستهم مش مظبوطه حطاهم جمب البوتجاز بيبقى عليهم دهون بصراحه كدا المطبخ دا كله عايزه اعادة ترتيب لان كل حاجه فيه مش فى مكانها خالص...
كريم كتم ضحكته.و سارة بصتله بغيظ. بس سكتت وحاولت تمشي اليوم
~~~~~~~~~~~~~~
بالليل.ملك وآدم عيال كريم وساره قاعدين بيتفرجوا على الكرتون.أمينة دخلت عليهم...
امينه: الساعة عشرة! ايه اللى مقعدكم لحد دلوقتي يلا على النوم انتى وهو...
ملك قالت: بس يا تيتا ماما قالت نقعد نص ساعة كمان علشان احنا فى الاجازة.
امينه: لأ مفيش نص ساعه يلا على النوم دلوقتي...
وقفلت التلفزيون.و سارة خرجت من الأوضة على الصوت وعياط العيال...
امينه: يا ماما هما لسه في الإجازة فبسيبهم كمان نص ساعه بس مفهاش حاجه يعنى وهما عارفين كدا ومن نفسهم هيقومو ينامو...
امينه: يا سلام واذا في الإجازة يعني نسهر للفجر؟ النظام نظام الساعه 10 العيال ينامو من غير نقاش علشان يعرفوا يرتاحو ويصحو بدري ويبقى كلهم نشاط وعقلهم يتفتح...
آدم قال بزعل: بس يا تيتا...
امينه: مفيش بس قولت مفيش تلفزيون يبقى مفيش تلفزيون يلا على النوم...
بعد ما العيال ناموا.سارة دخلت أوضتها.
قفلت الباب.بصت لكريم.
سارة: مامتك هتقعد كام يوم؟ لان الوضع بقى صعب اوى بصراحه يا كريم وانت شايف...
كريم: رف يا حبيبتى بس معلش انتى عارفه ماما هى بتحبك وبتحبك العيال اد ايه بس هو طبعها كدا بتحب النظام والترتيب وهي بالكتير اوى هتقعد أسبوع
إن شاء الله.
~~~~~~~~~~~~~
تاني يوم...سارة صحيت على صوت خبط. فتحت الباب.لقيت أمينة شايلة ملاية.
امينه: صباح الخير انتى لسه نايمه لحد دلوقتي..
ساره: صباح النور يا ماما... خير يا ماما في ايه؟
امينه: قومي نموسيتك كحلي يا ختي...
سارة: ليه؟ الساعة لسه سبعة. هو في ايه؟
النهارده الجمعة!
امينه: اذا الجمعه يعني؟
ساره: يعني مفيش مدارس. وكريم معندوش شغل فبيصحو براحتهم وكريم بيبقى محتاج ينام شويه ومش عايز دوشه وكدا...
امينه: ليه محدش قالك ان البيت بيتنضف يوم الجمعة. والست الشاطرة تقوم تنضف وتشوف شغلها من غير ما تصحي راجلها ولا تزعجه..... دا انا كنت اهد البيت وابنيه من غير كريم ما يصحى ولا يحس بحاجه وبعدين كريم متعود يفطر بدري والعيال المفروض...
سارة بصت لكريم.كان نايم. وأمينة راحت شدته من البطانية.
امينه: كريم... اصحى يا حبيبي.
كريم فتح عينه: في إيه يا ماما؟ انتي كويسه؟!
امينه: كويسه يا عين امك بس قوم يلا علشان تفطر.
كريم: فطار ايه بس يا امي دلوقتي... يا أمي أنا عندي إجازة وعايزه ارتاح وانام شويه
امينه: هو علشان عندك الإجازة تمنع الفطار؟ ولا انت المدام عودتك على كدا بقى...
سارة ضحكت غصب عنها. وكريم اضطر يقوم وهو وشه شبه صاحي علشان الفطار...
قبل_فوات_الآوان
آيه_طه
