رواية كذبه واحده بس الفصل الاول بقلم حياة محمد الجدوي حصريه وجديده على مدونة النجم المتوهج للروايات والمعلومات
رواية كذبه واحده بس الفصل الاول بقلم حياة محمد الجدوي حصريه وجديده على مدونة النجم المتوهج للروايات والمعلومات
هبت ضحى وقالت هو ده اللي هامك علاقتك بأخوك ومش فارق معاك ان بنتك اللى قعدت تتعالج عند دكتور نفسي بسببهم بعد ما كسروا بخاطرها وفركشوا الجوازه وجوزوا ابنهم من واحده تانيه ومن ساعتها بنتنا مابتمش لها جوازه
على: مش ده إللى كنتى عايزاه كنتى عايزه بنتك تقعد جنبك
ضحى: ده كان زمان لما كانت عيله بس دلوقتي خلاص بقت ٢٦ سنه كفايه عليا كده خلاص انا عايزه بنتى تتجوز انا عايزاها تتجوز انا زهقت من كونى أم عايزه اجرب احساس تانى انا عايزه ابقى حما واطلع عين جوز بنتى
على: طيب واللى عايزه بنتها تتجوز وتبقى حما تقولى أوزع العريس ليه
ضحى: أنا قلت توزع العريس إياك تعملها توزع مين ده انا قتيلة العريس ده
ضحك على وقال: طب انتى عايزا إيه
ضحى: مش عارفه انا خايفه وقلقانه من بنتك
قربت منهم سلمى وقالت: ليه يا ماما كنت عملت ايه
على: ياحبيبتي انتى مابتعمليش حاجه الموضوع...
ضحى: الموضوع انى خلاص تعبت خراب البيت ده وطلاقى من أبوكى ده هايكون بسببك
سلمى: أنا يا ماما ليه
ضحى: عشان جانبك طروبش وهاتطفشى العريس اللى جاى زى ماطفشتى إللى جهم قبله
سلمى بحزن: انا طروبش يا بابا عشان انا صريحه ولا لازم اكون منافقه عشان أعجب الناس
ضحى: أيوه أنا عايزاكى تنافقى و تكدبى عشان تتجوزى
على: لأ يا سلمى ماما ماتقصدش هى بس عايزاكى يعنى تجاملى شويه تفوتى و تسايسى أمورك شويه تعرفى تبلفى إللى قدامك بكلمتين شويه
سلمى: ولما نجمع كل إللى قلته ده يبقى اسمه إيه
على: اسمه نفاق مالك انتى وامك بتزنقونى في الكلام
قربت منها ضحى وقالت: يابنتى الدنيا عايزه إللى ياخد ويدى يعنى مفيش مانع من شويه مسايسه شويه مجامله على حبة نفاق عادى يعنى كدبتين ثلاثه مش هايضروا والله
بصت سلمى لوالدها بذهول وقالت: بابا ماما عايزانى أكدب
ضحى: أه يا حبيبتي اكدبى عشان خاطري إكدبى من فضلك إن شاالله كدبه واحده بس كل سنه
سلمى بإنبهار: بجد يا ماما هو ينفع اكدب كدبه واحده
بصت ضحى لعلى وقالت: إنت ربيت إفخر بنفسك بنتك بتستأذن عشان تكدب والجواب أه يا حبيبتي ينفع كدبه إتنين خمسه زى ما تحبى بس تتم الجوازه دى
على: انتى إتهبلتى يا ضحى بتشجعى بنتك على الكدب
ضحى: مالكش دعوه انت يا على أيوه انا بشجعها انا عايزه بنتى تتجوز وتعيش وعشان تعرف تعيش لازم تفهم الزمن إللى إحنا فيه زمن الصادق بيتعب وبياخد على دماغه وأديك شفت بنتك. الصادقه خسرت شغلها في الشركه الكبيره وبتشتغل في حتة مركز شباب معفن يبقى نعمل إيه يبقى نسايير الدنيا عشان نعرف نعييش فيها ولا إيه يا سلمى ممكن يا حبيبتي نكدب كدبه صغيره عشان خاطر ماما
سلمى : خلاص عشان خاطرك وانا موافقة بس كدبه واحده
ضحى : حبيبتى والله بصى بقى أنا عايزة أستغل الكدبه دى مع العريس وأمه هو إنتى تعرفيه منين
سلمى: الشركه إللى بيشتغل فيها جنب مركز الشباب إللى بشتغل فيه
ضحى حلو: يعنى يعرفك فخلاص نخلى الكذبة لأمه شوفى يا حبيبتي انا عايزاكى لما تشوفيها تغرقيها مجاملات وتغرقيها كلام مش تخطى راسها في البانيو ماانا عارفاكى عرق الذكاوه عندك طاقق
سلمى: أغرقها إيه هى كدبه واحده
ضحى: لا بحبحى إيدك شويه أنا عايزاكى تقولى لها انتى قمر انتى خاسيتى كتير عن الاول تقولى لها انتى شيك وبنتعلم منك الشياكه تقولى لها وشك منور اكيد عشان قلبك أبيض فهمتينى يعنى تخليها كده طائره فوق فوق وتطيريها مش ترميها من البلكونه فاهمه يا اخرة صبرى
الجزء الاول
في شقه راقيه كانت ضحى راحه جايه وهى متوتره وبتفرك في إيديها في حين كان على قاعد على الكرسي بيتابعها بعيونه لحد قال بزهق: ياستى اقعدى خيلتينى
قالت ضحى: مانت مش حاسس بالمصيبه إللى احنا فيها
على: هى بنتى لما يجى لها عريس تبقى مصيبه
ضحى: مصيبه وكارثه كمان
على: ليه بس كده بدل ما تفرحى لها انها هاتتجوز تقولى مصيبه اهدى شويه أصل إللى يسمع يفتكرك مرات أبوها وكارهه لها الخير
ضحى: فين الخير قولى فين الخير وأنت عارف إللى هيحصل فالأحسن انك توزع العريس من بره بره
على بغضب: أوزعه ليه هى بنتى معيوبه وأنا خايف أتفضح مثلا أنا بنتى ست البنات
ضحى:قطع لسان إللى يقول كلمه عليها بس إحنا لازم نعترف بعيبها عشان نرتاح بنتك طروبش
على: لا لا مش للدرجه دى
مسكت كتفه وقالت الإعتراف بالمشكله هو أول خطوه للعلاج فإعترف بنتك طروبش
على: لا هى بس صادقه مابتكدبش وصريحه شويه ومابتعرفش تجامل شويتين تلاته
ضحى: قول خمسه سته
على: وبتنطح في كلامها بس
ضحى: ياسلام وانت لو دمجت كل الصفات دى فى كلمه هتبقى إيه
على : طروبش
ضحى: أديك قلتها وبعدين دى غلطتك اساسا ودى تربيتك
على : أنا ربيت بنتى أحسن تربيه
ضحى: تربيه ايه حد يربى بنته على الصدق والصراحة وأحنا في زمن الكدب والنفاق
على: بقولك ايه أنا ربيت بنتى على الصح ماليش دعوه ان حال الناس بقى معوج
ضحى: ماحنا جزء من الناس وأدي نتيجة تعليمك لها ولا ناسي عملت ايه مع مرات أخوك لما جهم يخطبوها لإبنهم
على: ماتفكرنيش بالله عليكي
ضحى: لازم تفتكر لأنى مش ناسيه تحب أقولك حصل إيه
سرح على بتفكيره للى حصل
&&&&&&&&&&&&&&&
وقتها كانت سلمى بنته شابه عندها١٨ عام وجه أخوه مراته عشان يطلبوها
كانت ضحى في المطبخ قلقانه ومتوتره فدخل عليها
على: إيه ده كله إيه إللى انتى عملاه ديك رومي وطواجن ومحاشى دى مجرد قعدت إتفاق مش خطوبه
ضحى: على أساس أن مروه مرات اخوك هتقول زيك انا عارفاها كويس حقوده وبتحب تنتقد وتطلع القطط الفاطسه في كل حاجه
ضحك على وقال: انا مش عارف إيه إللى بينك وبنها وبعدين ده احنا لسه في الأول أمال لما العيال يتجوزوا هاتعملى إيه
ضحى: والله الجوازه دى كلها مش على مزاجى بس أعمل ايه
على: حرام عليكى ماجد اخويا كويس وابنه أحمد طيب وبن حلال
ضحى بسخرية: طيب وبن حلال دلدول أمه أنا عارفاها عايزه تاخد البت عشان تذلها وتتحكم فيها
على: لا إله إلا الله طب مادمتى مش عايزه الجوازه دى وافقتى يجوا ليه كنتى رفضتى من بره بره
ضحى: وأنولها لها تمشي وتقول مش عايزانا نبقى أهل فى بعض وانا ابنى أولى من الغريب بس أمها الوحشه وبعدين الواد أحمد بيحب البت وعايزها والبت معجبه به فليه أضيع على بنتى نصيبها
على: لا إله إلا الله والله العظيم إنتوا يا حريم تفكيركوا غريب ( ومد إيده وأحذ موزه فهبت فيه) إنت هاتعمل إيه
على: خضتينى وبعدين جعان هاكل موزه تصبيره
ضحى: إنت إتجننت عايز تاخد موزه من إللى هانقدمهم للضيوف انت عايز تحرجنا لما يبق الطبق فاضى انت عايزها تنتقدنى وتقول أكلنا الفاكهه وجايبين الطبق فاضى
على: يا ضحى حرام عليكى وترتينى على الفاضي وبعدين هى مرات أخويا عدت كام موزه في الاتنين كيلو موز إللى جايبينه اكيد لأ وافرضى عدت ده موزنا بفلوسنا محدش له عندنا حاجه . هى البت سلمى فين مش سامع لها حس
ضحى : في البيوتى سنتر
على: بيوتى سنتر إيه في قعدت اتفاق وبعدين ده عمها وبن عمها يعنى حافظين بنتك صم
ضحى: وليكن بس برضو لازم تبقى زى القمر عشان ما
كمل على بملل: ماينتقدوش علينا ليه بنتنا ماراحتش البيوتى سنتر
بعد شويه دخلت سلمى وهى لابسه فستان خطوبه منفوش وعامله مكياج كامل وفورمه كبيرة في شعرها
بص لها على وقال: إيه ده يا سلمى يا حبيبتي دى قعدت اتفاق مش خطوبه
سلمى ببراءه: ماما قالت لى اعمل كده
على: كده كتير كتير اوى
سلمى بزعل: إيه يا بابا هو انا وحشه
باس على جبينها وقال: لا يا حبيبتي زى القمر
قربت منها ضحى وقالت: كده حلو أوى
سلمى: طب يا ماما أنا جعانه أوى
ضحى بخضه: أكل إيه لا لا لا لا ماينفعش تاكلى وتبهدلى نفسك وبعدين إنتى النهارده عروسه يعنى لازم تبقى قلقانه ومتوتره ونفسك مسدوده
سلمى: بس أنا مش قلقانه ولا متوتره
ضحى: يبقى تخشى أوضتك تفكرى في حاجه تقلقكك وتوترك
بصت سلمى لوالدها إللى قال: خشى يا حبيبتي إقلقى واتوترى على ما اقول لماما كلمتين
دخلت سلمى فبص لضحى وقال: واضح انك إللى قلقانه ومتوترة مالك
انفجرت ضحى في البكا وقالت: البت لسه صغيره مالحقتش أشبع منها أنا مش عايزاها تبعد عن حضنى
ضحك على وقال: والله العظيم إنتى مجنونه وهاتجننينا كلنا معاكى عشان دى لسه قاعده اتفاق يعنى البنت لسه حتى ما اتخطبتش وانتى بتدورى على الجواز
(رن جرس الباب ) فقال على: روحى افتحى للضيوف
في الانتريه كان الكل قاعد لحد ما سلمى دخلت وهى لابسه فستانها المنفوش وشايله صينيه عليها العصير
بصت لها زوجة عمها بتقييم وقالت: وعامله في نفسك كده ليه على أساس احنا مانعرفكيش ولا نعرف شكلك ده أنا اعرفك من ايام ماكنت بتجرى في بيتنا حافيه وشعرك منكوش
بصت لها ضحى بغيظ وقالت ::ده كان زمان لما كانت عيله بس دلوقتي بقت بسم الله ماشاء الله عروسه زى القمر أهى
ردت مروه: زمان إيه الكلام ده كان من سنتين
نفخت ضحى في غيظ في حين قال على: منورنا يا خالد والله
خالد بإحراج من زوجته: منوره بك والله شفت العيال كبرونا
ردت مروه: انت إللى كبرت ده أنا طول عمرى شباب ده كل إللى يشوفنى مع أحمد يحسبنى اخته الصغيرة
قالت سلمى ببراءة: اخته الصغيره إزاى وحضرتك عندك ٥٥ سنه
هبت مروه وقالت: مين دى إللى عندها ٥٥ لعلمك انا لسه ٣٧ سنه
سلمى بنفس البراءه: مستحيل طبعا يعنى احمد عنده ٢٣ وإبنك يوسف اكبر منه ب٥سنين يعنى عنده ٢٨ يبقى حضرتك اتجوزتى وانتى عندك ٨سنين يعنى وانتى فى تانيه ابتدائي
احمر وش مروه من الاحراج في حين كان الكل ببدارى ضحكته .
فقالت ضحى وهى بتغير الموضوع
ده انتوا نورتونا وشرفتونا ده انا من فرحتى مابقتش عارفه اعمل ايه حتى اسألى سلمى كده تقولك انا كنت فرحانه أد ايه!؟
سلمى: فعلا ماما من امبارح في المطبخ بتجهز أكل وبتقول على الله يطمر
مروه بعصبية: نعم شفت البنت بتقول ايه
ضحى: بتهزر والله بتهزر بس غشيمه مش عارفه الكلام ماهى لسه عيله صغيره
مروه: دى كلها عيله دى تخلفنى ياستار يارب على جيل الايام دى
ضحى: مالهم جيل الايام دي ان شاءالله هو فيه زى بنتى في جمالها ولا في اخلاقها ولا في شطارتها
على: إيه يا جماعه صلوا على النبي
خالد: اهدى يا مروه ماتشعلليش الدنيا خلى الجوازه تتم
مروه في صوت واطى: مش طايقاها ولا طايقه بنتها بقى دى احسن من بنت اخويا يفضل سلمى الهبله دى على بنت اخويا أنا
(( ومانتبهتش لسلمى إللى سمعتها))
خالد بإحراج: إيه يا جماعه هو احنا اغراب عن بعض فين الجاتوه ناكله مع العصير
على: جاتوه إيه دلوقتى ده احنا هانتعشى سوا وبعدين نبقى نحلى
مروه : وماله ناكل دلوقتي ونبقى ناكل تانى ده احنا جايبين كتير
ضحى بغيظ: وليه التكلفه دى كلها ده احنا اهل ده حتى اسالى سلمى هاتقولك انى كنت بقول عنك إيه
سلمى: بتقولى إنها ست بخيله وجلده وتموت على القرش
مروه: نعم انا بخيله انا جلده مانتوا ماشفتوش خير في حياتكوا انتى عارفه الجاتوه ده جايباه منين من اكبر محل حلوانى في القاهره
سلمى: اكبر محل إيه يا طنط ده من محل معفن بيبع الحته ب١٠ جنيه واسم المحل مكتوب على الكيس
على: عيب يا سلمى وبعدين معاكى يا ضحى وبعدين احنا بنشترى راجل وانا بحب احمد اوى حتى انا بقول عنه إنه
سلمى: ابن امه وضعيف الشخصية
هبت مروه وقالت: لا كده كتير احنا اتهزقنا على الاخر انا لازم امشى من هنا
سلمى: عشان تاخديه تجوزين لبنت اختك إللى احسن منى ١٠٠ مره صح
بص خالد لسلمى بإحراج بعد ما عرف إنها سمعتهم
بص على لخالد حكايه بنت اخوها
قالت ضحى لمروه: ومادمتى بترسمى على واحده تانيه جايين هنا ليه
قالت سلمى لأحمد: وانت معندكش شخصية ماشى ورا انك يابن امك
رد خالد على على: يعنى جايين لكم ومش عاجبين
ردت مروه على ضحى: ايش جاب بنتك لبنت اخويا وبعدين انا اساسا مش عجبانى الجوازه دى من الأول
رد احمد على سلمى وقال: انا ابن امى يا منكوشه
وإرتفعت الاصوات والحناقات مابينهم وأكيد طبعا الجوازه باظت
-&&&&&&&&&&&&&&
بصراحه عندهم حق دى طروبش وبتنطح
طيب وهى صريحه وبوظت الجوازه تتوقعوا لما تكدب هتعمل ايه
إنتظروا البارت الجاي شوفوا هتعمل ايه مع العريس وياترى كدبتها هاتصلح الدنيا ولا هاتخربها
يتبع
تعليقات
إرسال تعليق