رواية العشق الحلال الحلقة الثالثة بقلم الكاتبه ندي احمد حصريه وجديده

رواية العشق الحلال الحلقة الثالثة بقلم الكاتبه ندي احمد حصريه وجديده 

معاد شاد طرف ممنوعات في

ايده .. وحدفه من روشن داخل سيارة نادر ...

وحفر له اتصل بدورية التفتيش داخل الجامعة ..

وشدوا نادر دخلوه لتحقيق نادر : والله حتى الدخان الساهل ما ناخدش فيه .. صدقوني في حد حطه بالقصد .. ارجعوا لكاميرات اللي في الرفودجو وشوفوا ولم رجعوا الكاميرات .. لقوه معاد هو اللي حطه في سيارة نادر ..

وطلع منها نادر قبل ما يتحول على النيابة العامة ...

وشدوا معاد بتهمة تشويه وفساد ...

ومنها نادر زاد كره معاد وكل ما يشوفه

((((عودة

للحاضر)))) 

نادر بعد مافاق من التفكير في مصايب معاد اعود بالله من الشطان ...

وطلع نادر من حجرته ..

وفات من الممر ..

ملاك وعيونها في نادر عجبها

وعجبتها شخصيته ..

ملاك ناضت ولحقت نادر ...

ملاك : دكتور من فضلك ممكن شوي ؟

نادر تلفت وقف : تفضلي ...

ملاك : ممكن رقمك دكتور نادر نيي نكلمك على موضوع خوي ..

نادر : ضروري ؟

ملاك : اي دكتور اكيد ..

نادر مله عليها من باب المساعدة :

سجلي صفر تسعة ...

ملاك : شكرا ..

بارك الله فيك ..

وروح نادر للحوش ..

وخش على اسماء في دارها ..

وقعمز جنبها بكرسيه شد ایدها :

يارب ترجعي بصحتك وعافيتك ..

حتى وانتي جنبي بوجهك المنور

راقدة ..

مشتاقلك

ونتقطع الف مرة كل ما نتذكر

مشتاقلك ..

ان انا ليا ايد في اللي صارلك ...

ساامحيني )

وجت ام اسماء خشت ولقت نادر شاد ايد اسماء وسرحان فيها ...

ام اسماء : السلااام عليكم ..

(ومبتسمة)

ناض نادر وسلم : خالتي مديحة ..

كيف حالك وبوس راسها )

ام اسماء : الحمد لله من ربي بخير ..

كيف حال نوارتي

..

نادر : على نفس الحال البارح تحركت شوي ..

ام اسماء حطت شنطتها جنب الباب وخشت اي قالتلي امك امبكري هذا باش جيت ..

نادر : نطلع انا امالا نخليك ع راحتك ..

ام اسماء طلعت المصحف وحطت ايدها على راس بنتها وبدت تقرا عليها وتدعيلها بالشفاء العاجل ...

وقعد نادر يطل كل يوم على أسماء ويسهر جنبها يستنى حركة او صوت منها تعطيه إشارة انها بدت تتحسن او انها عن قريب رح تفيق وترجعله ..

وفي يوم جمعة .. مع العشيات رن نقال نادر

رد : الو ..

ملاك : ايوة السلام عليكم دكتور نادر ..

نادر : تفضلي من معاي ..

ملاك : انا اخت الحالة محمود درتله العملية الأسبوع اللي فان منصاب برصاصات ..

نادر : أي عرفتك .. تفضلي اختي ..

ملاك : نبوا منك خدمة لو مافي ازعاج ..

احني قدمنا ملف خوي للعلاج برا  

وما حصلناش فتوى ليه ..

نادر : تمام ... شوي وندير مكالماتي ونرد عليك .. اوكي ؟

ملاك : تمام

وخشت ملاك على امها في المطبخ : ماما شن اديري ؟

ام ملاك : ندير في شاهي خالتك جاية هي وحماتها على خاطر خوك ..

ملاك : به هاتي عليك بري ارتاحي تو نوتي انا كل شي ..

ام ملاك : شن زاهيتلك شن صاير ..

ملاك : ادعي قولي ان شاء الله ..

ام ملاك : ان شاء الله شن فيه ؟؟

ملاك : احتمال يصير من علاج محمود برا ..

ام ملاك : يارب يا سيدي تسخرله الحال . ويتعالج طق الباب مشت ملاك بتفتح الباب ..

ملاك : اهلين كيف الحال ( ومستغربة لناس اللي جو اول مرة تشوفهم )

ام معاد : كيف حالكم باهي .. ان شاء الله هذا حد السو ربي يشفيه هند اخت معاد : لاباس ان شاء الله ( وخشوا لدار الاستقبال )

اشرت ام ملاك ( بمعنى من جي ) ملاك اشرت ( هزت كتافها بمعنى ما نعرفهمش )

رن نقال ملاك : ايوه مصطفى .. مصطفى : ام معاد واخته جايين ملاك : اهااا اي وصلوا توا ...

وخشت ام ملاك وملاك قعمزت شوي .. وام معاد تشبح لملاك مبتسمة وعاجبتها .. ..

ناضت ملاك للمطبخ بتجيب الضيافة .. رن نقالها ( الدكتور نادر يتصل )

ملاك : ايوه ..

نادر : تميت الامور وتيلي جيبي رقم حساب في مصرف ال .. وصورة من كل ورقة ...

ملاك : اها .. اها به تمام امتی نجيبهملك

خشت ام ملاك للمطبخ تاشرلها بيديها وتتكلم بصوت منخفض وين الشاهي العفو 

ملاك اشرت لامها : لحظة

نادر : الاحد في المستشفى

ملاك : تمام شكرااا وصكرت الخط

...

حطت ملاك النقال على الطاولة ومشت شادة السفرة

ام ملاك : نستنى فيك من بكري عاد

ملاك : به غر بري تو نقولك بعدين ..

عند معاد

معاد واقف على الشاب (مسعود) اللي ضرب محمود بالرصاص معاد : برا لتونس برا لتركيا برا لاي معاد : برا لتونس برا لتركيا برا لاي مكان ما تقعدش هني .. قاعدين يدوروا فيك ومصطفى داير شكوة للمركز

ونزل من السيارة شنطة ومدها للمجرم مسعود

معاد : هاذي امانتك ..

(مسعود فتح الشنطة مليانة فلوس)

معاد : غدوة انجي للاستراحة نلقاك فيها نطقك

مسعود : لا تم غدوة الفجر طالع ..

معاد : دبر امورك

وجي يوم الاحد

مشت ملاك لدكتور نادر في المستشفى ...

ملاك خشت للحجرة : السلام عليكم .. كيف حالك

نادر : وعليكم السلام تفضلي .. ملاك وهي تحكي مع نادر وعيونها ما حولتهمش بكل نادر يتكلم معاها طبيعي جدا وفي باله يساعد لله ملاك مدتله الاوراق

نادر : تمام تو نسلمهم لصديقي يشوف الموضوع وان شاء باذن الله ماشية الامور . ..

ملاك : ان شاء الله

رن نقال نادر ( امي تتصل )

نادر لملاك : لحظة شوي

نادر : اها يما .. كيف .. والله ؟ تمام اهو جای ..

الحمد لله يارب ..

نادر لملاك : تمام .. ماتاكلي هم

شي .. واول ما يصير موضوع نكلمك ..

وطلع نادر مستعجل فرحان ..

وسيب ملاك مقعمزة ..

ملاك تشبح ومستغربة ...

نادر وهو يسوق في السيارة بسرعة :

الحمد لله يارب .. اللهم لك الحمد

وصل نادر للحوش وركب لحوشه بسرعة..

وخش لقي ام اسماء واسماء

مقعمزين ..

شاف لاسماء ..

لقاها فاتحة عيونها وتشبحله مبتسمة ..

خش نادر داغر مش شايف شي قدامه

نادر : اسوم فيقتي ..

وطلعوا على طول ام نادر ونسيبته وخلوهم ..

نادر قرب و بوس راس اسماء وشاد ایدها.. 

اسماء : ميا ..

نادر : تو نعطيك ميا حبيبتي خلي يجي الدكتور قبل ..

وكلم الدكتور وجي للحوش و نادر فرحان ومش سايعاته الدنيا

من الفرحة

جي الدكتور وكشف ..

الدكتور : معجزة انها تفيق وبالنشاط هذا .. بالعادة بعض الحالات صعب يتكلموا طول .. وهي ليها شهور ..

نادر به دکتور شن وضعها مع الماكلة والسوائل ..

الدكتور : حاجات طبيعية فيها فايدة تقيم صحتها .. زي عصير تفاح طبيعي ف الحوش والبرتقال... 

والاكل شربة دجاج وخضرة شربة عدس ..

لان ليها فترة ماكلتش ..

بالشوي بالشوي دخلولها الاكل العادي ..

وبدت اسماء بالشوي بالشوي تقعمز ..

وشوي تتحرك في السرير ..

بعد اسبوعين..

رفع نادر الاوراق متع محمود لصديقه

نادر : شن تخدمنا فيه الموضوع يا جلال

جلال : تم شن يقربلك هو ..

نادر : اصدقاء العيلة ..

جلال : تم تو نشوفله الموضوع الاسبوع هذا ..

وبعد ايام قليله

جلال يتصل بنادر وهو في الدوام

جلال : ايوة نادر كلمهم يوتوا الورق والجوزات بش يقدموا في تاشيرة تمينا الاجراءات كلها ..

نادر : تم مشكور يا خال ما تقصرش ...

وصكر نادر من جلال واتصل بملاك ...

ملاك : ايوة اهلين ..

نادر : تم الاجراء وتوا ارفعوا وراقيه ووراق اللي بيرافقه تموا التأشيرة ..

ملاك : صحيت بارك الله فيك ..

نادر : وفيك بارك الله ..

ملاك : عادي لو مرة مرة اتصلت بيك لو مافي ازعاج..

نادر : اي حاجة تفضلي ليبيين لبعضنا ..

ملاك فرحت : شكرا ...

وصكروا المكالمة ..

عند ملاك

اتصلت بمصطفى انه يمشي يقدم  في تاشيرة ليه ولمحمود ع خاطر العلاج

روح وخش مصطفى بسرعة لدار المعيشة ..

ووقف يشبح لملاك شبحات جديات...

مصطفى : شن دوة تاشيرة ما تأشيرة

ملاك : اي ارفع الوراق بس .. كل شي تمام ..

مصطفى بنظرة شك : من كلمتي ؟

ملاك : الدكتور لدار العملية لمحمود ..

مصطفى : مش قتلك معاد بيخدمنا في الموضوع ؟

ملاك : ايااه معاد هذا ودانه اطول من ودان الحمار .. (حشا القاريين) مصطفى قدم ورفع ايده كيف بيضرب ملاك

مصطفى : وانا شن .. راس بصل

تتصرفي من وراي .. شن مافيش تريس ..

ملاك وهي اداري في وجهها بايديها خايفة

...

مصطفى : اخر لك مرة معش اديريها الحركة هاذي ..

ونزل ايده وطلع ..

بعد عشرة ايام بالضبط

.. (عند اسماء)

اسماء وهي تحاول تنوض من السرير

نزلت رجليها على الارض ..

وحاولت توقف وفجأة !!

قعدت تعيط ..

ام نادر جت تجري ركبتلها فوق ..

الممرضة تتكلم بالنقال ف الدرج

ام نادر : یا منجوها المرا تعيط

وانتي تلكلكي على النقال ..

وخشت هي والممرضة .. لقتها طايحة

اتصلت بنادر ولدها ...

ام نادر : ايوه نادر وينك انت ؟

نادر : قريب نوصل للحوش شن فيه خيره صوتك هكي ؟

ام نادر : اسماء لقيتها طايحة على الوطا وتبكي ..

صكر نادر الخط وزاد سرعته بش

يوصل للحوش بسرعة ..

ام نادر : خيرك يا بنتي طحتي شن صارلك دختي ؟

اسماء : ما قدرتش نمشي يا عميمة ما قدرتش نوقف على رجليا ..

ام نادر : يا بنتي ليك فترة ف السرير لازم تمرين ل رجليك مش طول تمشي ..

اسماء : يا عميمة رجليا ما نحسش بيهم وتبكي )

حاولت ام نادر انها تسندها عليها لكن ما قدرتهاش هي والممرضة ..

خش نادر : اسماء خيرك شن صار ... اسماء : مانقدرش نمشي طحت يا نادر ( وتبكي ) رجليا رزان... حملها نادر بايديه الزوز وحطها على السرير

وقعمز جنبها شدلها ايديها يهدرز عليها ويحاول يغيرلها جوها ...

نادر : ماتخافيش يا قلبي تو اديري علاج طبيعي وترجعي تمشي على رجليك ..

اسماء : شن فايدتي غير نرهن فيك ..

نادر : اششش معش تقولي هالكلام حبيبي .. تو ترجعي احسن من قبل ..

واتكت اسماء تحاول ترقد ...

طلع نادر للبلكونة يبكي على اسماء وحاس بالذنب انه وراء هذا كله اللي صار الأسماء ...

رن نقاله طلعه من جيبه نادر : ايوه ..

ملاك : السلام عليكم...

نادر : وعليكم السلام من معاي ..

ملاك : انا ملاك ..

نادر : اي عرفتك .. شن الاخبار ..كيف حال خوك .. مشي ولا مزال

ملاك : غدوة طالعين بيه برا البلاد ..

نادر : باهي باه ..

ملاك وهي متاثرة من وقفة نادر معاهم :

والله وقفتك ماننساها ربي يبارك فيك ..

نادر : ماتاكلي هم شي وان شاء الله يتحسن ويمشي على رجليه

..

ملاك وهي واكلة هم على خوها واجعها في نص كبدها وشادة روحها بالسيف بتبكي

ملاك : والله واجعني في نص كبدي وصوتها يرعش )

نادر حس بيها تبكي ومخنوقة :

وكلي الامر لربي الله غالب هذا حال الدنيا ..

ملاك : والله الا طيب خوي وما يستاهل يصير فيه اللي صار ...

نادر : الوجع وجع واحد ...

ملاك : ما فهمتش ..

نادر : خطيبتي نفس الشي دارت حادث وغيبوبة قريب سنة ..

وفاقت ما تقدرش تمشي ..

ملاك انصدمت لم سمعت كلمة خطيبتي .. سكتت شوي وكملت ...... لا حول ولا قوة الا بالله ربي يشفيها

..

نادر بحرقة قلب : ان شاء الله ياارب

ملاك : ربي يخليكم لبعض .. احتجت اي شي حتى انت ولا يهمك انا موجودة ..

نادر : مشكورة ربي يحفظك ..

عند معاد وهو يسوق في السيارة ..

وهو يحكي بينه وبين نفسه لم اتذكر حركات ملاك ليه ف المستشفى كيف تستكرد فيه ..

معاد : ماشي يا ملاك انتي هكي اديريلي..

 تو نشوفوا بعدين ..

درس معاد قدام حوش اهل ملاك ... وكلكس .. 

طلعله مصطفى.... 

مصطفى : اه معاد زود انزل نقعمزوا في الجنان ..

معاد طفى السيارة وخش قعمز في الجنان ..

ملاك تسمع في دوشة في الجنان تحت ..

جبدت الستار جاها الفضول تبي

تعرف من جي ..

مصطفى : خلي نمشي نكلمهم يوتوا الشاهي ..

ومشي مصطفى ..

معاد قام عينه لروشن دار ملاك شاف ملاك تشبحله ..

ابتسم ليها ..

هي تغيرت منه وجبدت في وجهه الستار .. 

ملاك : شينك لصقة اعوذو بالله ..

وعلى جية مصطفى لجنان بالشاهي..

وملاك تسمع من الروشن

مصطفى : شاهي كيس ..

معاد : اي حاجة عادي ..

مصطفى وهو يمد في طاسة الشاهي المعاد

معاد : من خدمكم في موضوع العلاج برا ؟

مصطفى : الدكتور اللي دار العملية لمحمود ..

معاد : تعرفوه ؟

مصطفى : لا والله لكن قالي كان تبوا خدمة تو نساعدكم ..

معاد وهو بلقطة شايف روحه فيها : كان خليتني انا بس ره طالع قداش ليه ..

..

مصطفى : يلا فيها خيرة مانبوش نثقلوا عليك ..

ملاك وهي تسمع فيهم : تفشفيش على الفاضي .. داير روحه فالح..

وطلعت من الدار ...

الاحداث عند نادر واسماء ..

نادر بعد ما روح من الدوام ..خش على اسماء ..

نادر : السلام عليكم ..

ولقاها مقعمزة تمشط في شعرها ...

اسماء : وعليكم السلام... 

( وابتسمت )

نادر خش وجوه حلو وفي ايده  

كيسة كبيرة شوي

نادر : شن اديري ..؟

اسماء : نمشط في شعري قداش ليه ما مشطاش ..

نادر : شوفي شن جبتلك . ..

وطلعها من الكيس وشدها في ايده وفتحها ..

اسماء نشهقت : حييي مخلط المشاهير .. تعرف بنهبل عليه معش لقيته قداش ليا ...

نادر : عارف هذا علاش جبتهولك ...

وخدت الشيشة وجربتها على ایدها ..

ودهنت بها ..

نادر : الله على الريحة اذكر فيا بالايام الاولى .. ويوم البيان ..

اسماء وهي تشوف لعيون نادر : اي صح يوم البيان درت منها ..

اسماء : ياروحي الله لا يحرمني منك ( وتغمراته )

نادر : کلمت امي تسقيلنا .. انا

وانتي .. نتغدوا مع بعض ..

وهما يتغدوا ..

نادر : شفتلك ممرضة علاج طبيعي بتباشر معاك من غدوة ..

اسماء ساكتة : ..

نادر : نبيك تتشجعى وتخليك واثقة في ربي والعلاج .. وباذن الله ترجع صحتك احسن ..

اسماء : تبي الحق ( وحطت الكاشيك في السفرة)

نادر : شن ..

اسماء : انا فاقدة الامل ..

تابعووووووني 

لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم 

الحلقه الاولى من هنا

الحلقه الثانيه من هنا

الحلقه الثالثه من هنا

أدخلوا واعملوا متابعة لصفحتي عليها كل الروايات بمنتهي السهوله بدون لينكات من هنا 👇 ❤️ 👇 

صفحة روايات ومعلومات ووصفات

❤️🌺💙🌹❤️🌺💙🌹❤️🌺💙🌹❤️🌺💙🌹❤️🌺