رواية العشق الحلال الحلقة التانية بقلم الكاتبه ندي احمد حصريه وجديده

رواية العشق الحلال الحلقة التانية بقلم الكاتبه ندي احمد حصريه وجديده 

عيسى  ماتنزل شي انت وياه 

وتلفت لنادر وركه کف ( طراااخ ) یا قرد .. وين تربية اهلك فيك .. ياللي ما تتحشم مروحتلك هي بش تبي تحطها عندك ..

ومحمد يحز ..

نادر ولا حركة : الدين ما يمنعش ان نروح بها .. بنتك مرتي و قاري عليها الفاتحة ..

حتى ما روحتش بعرس ودوشة في شرع ربي حلالي ..

جو التموا الجيران .. خير شن فيه .. شن صاير ..]

واحد من الجيران : یا حاج كلامه مزبوط .. ارخي شوي يا حاج ..

تمشي الامور

عیسی رفع ايده يأشر بالبنان : الله العظيم ماهي خاشتها للحوش ..

محمد نخص نادر و شوشله : خلاص ارخي نادر فكك منه خليهم يرفعوها لحوشهم ..

وشد واحد من هني وواحد من هني

وجو خوت نادر وحزوا الوضع ...

عمار : شن تقول يا نادر وین تحساب روحك في بلاد برا ...

عماد : حاج عيسى خلاص تمام اللي تبيه يصير ان شاء الله .. ( واشر عماد لمحمد بمعنى ولع السيارة واطلعوا بها لحوش بوها )

فات 10 ايام بالضبط وام نادر  (فوزية ) تجي كل يوم ولا يومين اطل عليها.. 

. 

. 

مقعمزة ام نادر (فوزية) هي و

(مديحة) ام اسماء

فوزية : والله حاسبتها بنتي وانتي تعرفي ماعنديش بنات وجعتني في وسط كبدي .. ما توقعتاش يصير هذا كله ..

مديحة متاترة وعيونها لوطا : الله غالب كل واحد ونصيبه في الدنيا يا وخيتي

.. هي الدنيا كلها معوضتني غياب

بنتي الكبيرة

عشرة سنين ماريتها من تزوجت وسافرت هي وراجلها .. كان بتلفون وخلاص

عيسى وهو في داره متكي ويتفرج على التلفزيون ويسمع فيهم .. كيف يحكوا على اسماء وقلبهم محروق ..

فوزية : ولدي خش في عالم تاني لا وكال زيه زي الناس لا رقاده رقاد وهو 24 ساعة يخمم فيها ...

على خشة كنتهم مرت جهاد (نورة) خو اسماء ) بالشاهي ... وقعمزت ..

مديحة : توجعني كبدي عليهم كل ما نتذكر كيف لم نطلع معاهم يشروا في دبش العرس .. وفرحانين فرحانين لين خلاص هو كيف .. يفرفش عليها .. وجعني اكثر من وجعتني روحي على بنتي..

فوزية تسمع لأم اسماء تبكي نورة تسمع في كلامهم وعيونها مليانين دموع

كلهم تأثروا على اسماء وكلهم يحبوها لانها انسانة طيبة وعمرها ما وجعت حد هي دلوعة بوها وحبيبة امها وحنينة خوتها وصديقة مرت خوها اللي كل مرة جهاد ونورة يتعاركوا وتخش اسماء في النص تصلح بينهم .. كاسبة الدنيا كلها واللي ما يحبهاش يحسدها على طيبتها )

نورة قريبة من شبانيها عيسى ويعتبر فيها وحدة من بناته )

نادی عیسى : يا نورة .. نورة ..

ناضت نورة بسرعة ومسحت دموعها : هي عمي انا جاية ..

خشت نورا : نعم عمي ...

عيسى : تعالي بنتي قعمزي نبيك ..

نورة جت وقعمزت مقابلة شبانيها ...

عيسى : بنتي نبي نسألك ... وانا

الشي هذا حاير فيه

نورة : شن يا عمي ...

عيسى : توا هل اللي درته انا صح ؟

راجل قاري على مرته الفاتحة بيروحبيها اعترضت على مايبي ..

نورة سكتت تفكر وحارت شن بتجاوب ..

عيسى : هل انا صح ولا غلط .. قدام ربي ..

نورة : والله يا عمي مش عارفة شن بنقولك .. هو نادر لم طلب انه مرته تروح الحوش مش غلط من ناحية

الشرع .. لكن عيب قدام الناس ..

عيسى : باهي انا هالولد العنايدي نادر يدير في حاجات ترقيلي ف الضغط لكن والله ماهاين عليا عللي يصير فيه ..

نورة : والله الزوز يقطعوا القلب ..

عيسى : بالضبط .. شن الحل باهي

برايك ..

نورة : انت شن في بالك تبي ادير وانا نقولك شنو صح ولا نقترح

عليك ..

عيسى : انا فكرت فيها البنت احتمال تقعد عمر كامل بالجهاز ) ويقول

فيها ومتاثر ( الراجل قاري على بنتي الفاتحة ويبي يروح بيها ..

یعنى يا بنتى الولد هذا بش خطبها مني.. دار المستحيل بش نوافقوا عليه وشاري بنتي الشي هذا مطمني .. فكرت ان نكلمه ويروحبيها عنده ..

..... ورة

عيسى : فهمتى بنتي .. انا ما كايد في بنتي وفي الصرف عليها .. لكن نتحاسب عليه حتى انا قدام ربي.. راجل قاري في مرا فاتحة ونوقف ف النص بينهم .. وتو نجوا للواقع .

بنتي قداش ممكن تعيش بالجهاز ...

نورة : باهي عمي اهو نقولك راي كويسس ..

لم عمامه وخوته وخوتك وولادك انت وتقولهم بمعنى ولدكم قاري الفاتحة على بنتي .. كان راغب ولدكم يروح بيها ماعنديش

مشكلة .. قدام الخالق والخلق حلاله  وهذا شرع الله ما يمنعش...

عيسى : اي اي .. تم يا بنتي .. وانا والله ما حكيتلك وخديت رايك الا وعارفك عقلك يوزن بلاد ..

( اتصل عيسى بنادر )

عيسى : اسمع يا ولد كلم عمامك وخوتك يجوا عندي غدوة بعد صلاة الجمعة يتغذوا عندي وتعالا حتى انت

نادر : تمام عمي ..

(صكر الخط ونادر مستغرب علاش )

اتصل عيسى بخوته وكلم ولاده ..

وتاني يوم مديحة دارت الغذي بازين زي كل جمعة متعود الحاج عيسى يتغذاه ..

والتموا عنده وقبل ما يحطوا الغذي ..

عيسى : انا لميت وكلاء نادر في الفضائية والشهود في الفاتحة ..

ولدكم قاري على بنتنا الفاتحة .. وانا بوها راضي بالشي هذا يوم جي بيتم فيها قالوله ولادي راهو بوي لو بطول فترة الخطوبة وبتكلمها اقرا فاتحة وتلفت عيسى لنادر : صار يا نادر ولا .. ما صارش ..

نادر : اي صار..

عيسى : ولدكم دار لقطة مش كويسة .. بيروح بالبنت طول عنده من المطار في سرير لحوشه بدون ما ياخد شيرتي.. صح ولا مش صح يا نادر ..

نادر مواطي راسه وهز براسه بمعنى ( مزبوط )

عيسى : تو هذا لدرته حد عنده .. عقل ويعرف الاصول واحترام الكبير يديره ؟

تكلم واحد من عمامه : صح كلامك ( وتلفت لنادر ) حق كلامهو حق لدرته ؟..

نادر ساكت ولا كلمة ......

عیسی : ماننكرش ان ولدكم شاري بنتي .. عارفه معاها شنو.. ينحي من فمه ويعطيها ..

وما نلقاش راجل زيه لبنتي ..

كان واحد تاني ره تزوج .. تو بنتكلموا بالحق والواقع ...

واحد من اللي مقعمزين : مزبوط كلامك ..

عیسی : یا نادر اهو قدام عمامك

وخوتك.. وخوتها وعمامها اهم

قدامك .. انت جيت من الباب ماكش جاي من الروشن .. وهذا ولد الاصل هكي يدير .. وشهادة لله انك ولد اصل ..

بنتي الله اعلم قداش تعيش تحت الجهاز يوم اثنين.. عشرة.. سنة... عشرة سنين .. الله اعلم .. انا مش كايد فيها وانتم فاهمين

هاذي حلالك وبشرع الله ورسوله كان في يوم تبي تروح بيها عندك.. روح بيها ... ..

ولميت ناسك وناسي بش يبدا عندهم علم ان انا موافق على الشي هذا .. ودام البنت على ذمتك مافيش اي اشكالية ...

مش اول بنت ولا اخر بنت مرواح ع الساكت ..

نادر فرح قريب طار وجي وباس

راس عمه عيسى

..

نادر : سامحني يا عمي ..

عيسى : مسامح مسامح..

وحطوا القصاع

عيسى : هي تفضلوا ..

تغذوا وشربوا شاهي وروحوا .

عم نادر طالع يوشوش هو وخوه : تبي الحق وله .. 

كان مكانه مانقدر نقوله الكلام هذا ..

رد الثاني : كلامك حق هو صعبة...

لكن حتى هو كلامه صح ...

الاول : شكله ما عنداش ما يصرف عليها قاله روح بيها

الثاني : تي لالا قاله بنتي مش كايد فيها ولا مال منها .. هو يبي يبري نفسه قدام ربي وهذا الصح...

نفرض فاقت البنت .. والراجل

تزوج ..!

الاول : ياودي ان شاء الله ربي يشفيله بنته ويهنيهم ويهنينا بولادنا

الثاني : هذا هو .. ركبوا السيارة )

هي نتوكلوا بسم بالله ..

وصار وروح نادر باسماء لحوشه بعد .. يومين 

جت عزوزتها ام نادر ) ونادر طلعوا بيها في السيارة .. ومعاها خوها سامي

ام اسماء وكنتها نورة في الجنان واقفين ..

نورة حاطة ايدها على كتف عزوزتها وضامتها ..

مديحة ( ام اسماء ) : بنتي ما صارش من مرواحها في الفيلو روحتله في سرير  وتبكي ) اه يا بنتي ..

نورة تبكي وجعتها حماتها : قولي الحمد لله يا عمتي .. قولي الحمد الله ..

جتهم كنتهم الثانية (لبنى) مرت  ولدها عبد الرحمان نازلة من الدروج تشلك بالشبشب (مستفزة ) وتاكل في سندوتش .. ( لبنى ) تتكلم وفمها مليان : معليشي عمتي هذا نصيبها ( بشماته ) ..

مديحة ام اسماء شبحت شبحة على جنب لكنتها لبنى ) وقالت لنورة : خلي بنخش داخل بنتكا راسي بينفجر ...

وخشت نورة ومديحة للحوش وسيبوا لبنى ..

لبنى اتمتم : ماعجبهاش كلامي شورا .. ديما وهي ماعاجبها شي نقوله .. تصطفلي حظ معاك ما عنديش .. ( ومشت ركبت لحوشها )

حطوا اسماء في حوشها ..

نادر كل يوم الصبح قبل ليطلع لدوام يطل عليها ويشوفها ..

خدي ممرضة فلبينية تبات رسمي عندهم مقيمة وتقيسلها واتمملها وكل ساعة ادير عليها دورا ...

كل ليلة نادر يصلي ويدعي ويصلي قيام ليل ..

وهو في وضع الجلوس بعد تم صلاة ورافع ايديه ..

( اللهم إشفي اسماء شفاء لا يغادر سقما وجبرا يليق بكرمك يتعجب منه أهل سمائك قبل أهل أرضك يا أرحم الراحمين. اللهم اشفيها من كل داء فهي صديقتي ورفيقتي وحبيبتي الحمد لله على شيء)

بعد ثمانية اشهر ..

نادر وهو ياخد فيه النوم وهو مقعمز على الكرسي مقابل اسماء سمع صوت انين فاق فجأة مخلوع ناض وقف فجأة وقرب مش مصدق

..

اسماء تحرك في راسها شوي شوي وتفتح في عيونها شوي وتصكر ..

نادر شد ایدها فرحان : الحمد لله ..

الحمد لله يارب ...

وناض وسجد سجدة شكر ...

وقعد يستنى الضوء امتى يطلع بش بيمشي يجيب صديقه دكتور اعصاب خريج في جامعة المانية ...

نادر وهو واقف على الدكتور بعد ما كشف على اسماء

نادر : شنو دكتور طمني ..

الدكتور : الصوت اللي صدر منها

البارح وحركة راسها هاذي اشارة كويسة وهذا معناها بدت تفيق من غيبوبتها ..

لكن مزال تبي وقت ..

نادر : كيف ..

الدكتور : انا منقدرش نعطيك امل

وكلام اكيد.. انها تفيق خلال فترة قصيرة

لكن مفيش مستحيل.. توقع تفيق

خلال اسبوع او اسبوعين ..

او مرات شهر خمسة سنة ..

انتم خليكم مستمرين ديروا

بالكم .. تبي فحص يومي وكشف ..

نادر : بارك الله فيك دكتور...

و طلعوا بالسيارة ووصله لعيادته  وطلع نادر للمستشفى 0.

نادر وهو خاش لقسم الاسعاف :

السلام عليكم .. محمد شن جو

( وسلم)

محمد : الحمد لله كيف حال اسماء اليوم ..

نادر : البارح في اشارة كويسة ..

حرکت راسها وتكلمت ..

محمد : والله .. والله الحمد لله يا

نادر .. ادعيلها ونقولك حاجة .. دير

صدقة كل يوم على خاطرها ..

نادر وكله امل في الله : ان شاء الله ان شاء الله ..

رويدا وهي جاية من اول الممر

بسرعة: نادر محمد فيه حالة طارئة

على الاسعاف بسرعة ...

وهما يمشوا بسرعة

نادر : خيرها الحالة شن ..

رويدا : رصاصة في الكتف والحوض ..

محمد : جهزي الاوراق واكتبي بيانات المريض وفصيلة دمه المصاب على السرير وفاشل ..

..

نادر : محمد الرصاص قاعد لازم عملية .. جهزوا غرفة العمليات ..

ودخلوا المصاب بسرعة لغرفة العمليات ..

ملاك وهي قالقة على خوها مقعمزة في الانتظار ...

ملاك ودموعها على خدها : يارب استر .. يارب

ام ملاك مقعمزة : اخخ يا حليلي على محمود .. انا قلتله ياولد لوح عليك المشاكل ميسمعش في الكلام مصطفی خو محمود المصاب جاي بسرعة : شن صار ..

ملاك : خششوه للعمليات .. وانت شن صار معاك ؟

مصطفى : مشيت فتحت فيه محظر وعطيتهم رقم الطارقة ..

ملاك : من هو اصلا اول مرة نسمع بيه انا مش عارفة علاش شن اللي خلاه يرمي الرصاص على محمود خوك 0.

مصطفى : محمود ما يعرفاش ناشله سيارته طقه ..

ام ملاك : كافيين خيرنا شرنا يا

ربي .. المصايب تتلاقى عليا وعلى صغاري.. 

وبعد ساعات ..

طلع نادر من العمليات

نادر وقف على عائلة محمود  

المصاب : عفوا ؟ انتم اهل محمود ..

مصطفى : اي دكتور شني طمنا على محمود ..

نادر : يبي اثنين شكاير دم فصيلة

.. كلمنا بنك الدم مش متوفرة

الفصيلة ..

مصطفى : تو ندير تليفوناتي .. وخش نادر لغرفة العمليات تاني

معاد جي للممر خش : السلام عليكم وسلم على مصطفى

معاد صديق مصطفى ومعجب

ويحب ملاك من طرف واحد )

تلفتت ملاك شافت معاد.. لفتت

وجهها لجهة التانية واتمتم ( شن

جابه الشكل هذا اهني اففف مثقل دمه)

معاد سلم على ام ملاك ومصطفى ووصل لملاك  

. 

. 

. معاد : كيف الحال ) ومد ايده

لملاك )

ملاك ( ساكتة وضامة ايدها في بعض ماتبيش تسلم .. وايد معاد في الهواء وبدي يرخي في ابتسامته ووجهه تغير )

مصطفى نط في اخته : تي سلمي ملاك مدت ايدها بالسيف وبضحكة ..

صفراء : اهلين ( ورجع وجهها للجدية )

رجع وقف معاد بعد السلام الجاف وكمدها وخدي نفس وكأن ما صار شيء ..

معاد : شن صاير معاكم كيف حاله محمود توا ...

ام ملاك : قالوا ناقصهم دم شكارتين ..

مصطفى كمل مكالمته وانتبه لمعاد ...معاد تلفت لمصطفى : شن فصيلة

اللي يبوها

مصطفى : ما حصلناش لتوا ...

معاد : فصيلتي هاذي ...

وسحب معاد دم لمحمود ...

معاد ينزل في كمه وهو واقف مع مصطفى وام ملاك وملاك مقعمزين ...

ام ملاك : بارك الله فيك وربي يعطيك صحيحتك ويوفقك يا

وليدي ..

معاد : واجبي هذا ...

معاد حط ايده على كتف مصطفى : هي ماتبي شي.. 

مصطفى : مشکور صحيت بارك الله فيك ..

معاد : انا عندي شغل ضروري كان فضيت نجي تاني .. تمام وحدف نظرة لملاك ) (ملاك شبحتله شبحة صامتة وتلفتت كأنه مش موجود )

مصطفى : الله يبارك فيك صحيت يا معاد

وطلع معاد ..

ملاك اتعلق : تشكرولي فيه تقول

تبرع بكلية .. هالحاجة الكبيرة اللي داره شوي دم

ام ملاك : استحي يا بنت بدل ما تقولي بارك الله فيه .. نازلة فيه ..هاذي جزاته

مصطفى : هاذي بنتك من عاجبها اصلا .. عاجبتها غر روحها ..

ملاك : انا البنادم هذا نكرهه موت

نكرهه.. دمه ثقييييييل وووك

مشناه .. نتمناله مرتكة على راسه

المربع ..

طلع نادر من العمليات يطمن في اهل محمود

ملاك : شن يا دكتور طمنا ...

مصطفى : طمنا دكتور . ..

نادر : قدرنا نسعفوه الحمد لله لكن ..

مصطفى : لكن شنو

نادر : نحينا 3 رصاصات وحدة في الكتف وزوز في عظم الحوض.. 

ملاك ناضت خايفة على محمود

خوها : كيف في عظم الحوض ..

يعني مكسور . ..

نادر : مع الاسف .. واحتمال... 

( وتلفت نادر لام ملاك .. وشافها مرا. كبيرة مايبيش يصدمها )

نادر لمصطفى : تعالا معاي لحجرتي ..

وناضت ام محمود معاهم

لاحقتهم .. اشرلها مصطفى بایده

( خليكم )

وخشوا للحجرة

نادر : اللي بنقوله .. امبكري غر خفت نرعش العزيز. ..

مصطفى مسموط متوقعها صدمة

قوية : ...

نادر : الحوض تأذى ونتمنى انه يقدر يمشي طبيعي ..

مصطفى : كيف ؟

نادر : الاصابة احتمال تسببله شلل ... ما يقدرش يمشي..  مصطفى قعمز على الكرسي من الصدمة وحط ايديه على راسه ياكل في روحه على خوه ..

نادر : ...

مصطفی : به دكتور هل ممکن يتعالج ؟

نادر : يتعالج .. لكن هني صعب .. لو صارله زي ماقتلك فهذا يحتاج للعلاج برا ..

وناض مصطفى مصدوم .. كيف بيطلع ..

نادر : مانبوش نسبقوا الاحداث نقولوا ان شاء الله خير .. بعدين لو احتاج علاج برا و لو احتجتوا مساعدة خليلي ملفه .. ..

مصطفى : بارك الله فيك (وطلع وسكر الباب )

نادر تنهد وقام نقاله واتصل بأمه .. نادر : ها يام .. كيف حال اسماء ما صار شي ..

ام نادر : على نفس الحال يا وليدي ..

نادر تلفت لروشن وراه : باهي باهي خلي عينك على على الممرضة بالك تلهى .. شوي ومروح انا ...

وقعد مركز لموقف السيارات برا ) نادر سكر من المكالمة وقعد مركز ..

. 

. 

شاف معاد وهو يفتح في باب السيارة وبيركب )

نادر وهو يحكي في نفسه ووالع : هذا الكلب شن يدير هني ..

»(((((  في الماضي))))) )))<

نادر وهو واقف على اسماء في الجامعة يوم حفل تخرجها ..

نادر : شن هذا لدايرتيه في وجهك ...

اسماء وهي لابسة بدلة التخرج :

حاجة خفيفة مش واضح

نادر بنبرة حادة وبصوت واطي : اخر مرة اهااا ..

اسماء ولعت : امي ولا بوي .. ولا كلمتك يومين تبي تحكم .. (مشت وسيباته مسكها من ايدها بعصبية )

معاد يراقب من بعيد ويغلي .. اسماء نفضت ايدها من ايد نادر : حول .. ومشت )

معاد جي وجبد نادر من سوريته : معش تحط ايدك عليها

نادر نفض ايد معاد فكها من سورية :

حووول .. من انت وشن ليك علاقة

..

معاد : انت مني جاي اضايق في بنت شارعي ...

) وقعد يضفر في نادر من صدره ويدف فيه تالي يتصنع في رجولية )

نادر تكنطى وقدم وضربه بوكس على وجهه

وبدوا يضاربوا ويتمرمدوا على الوطا

وحدة من صحبات اسماء اشرت لاسماء على صاير( حي شوفي نادر)

تلفتت اسماء ونصدمت بالمنظر . ..

وجت تجري

اسماء عيطت : يا ااسر خلاص ... بلا

عار انتم الزوز تقول في روضة ..

وناضو نفضوا حوايجهم وقعدوا كل واحد متحلف في الثاني ...

معاد وقتها يحب اسماء في الوقت نفسه اللي كان في بداية علاقة حب اسماء ونادر )

..

حاول معاد بشتى الطرق انه يشوه سمعة نادر قدام عيون اسماء ما قدرش ..

وفي يوم ..

معاد شاد طرف ممنوعات في ايده .. وحدفه من الروشن داخل سيارة نادر .. ..

وحفر له اتصل بدورية التفتيش داخل الجامعة ..

وشدوا نادر دخلوه لتحقيق

نادر : والله حتى الدخان الساهل ما ناخد فيه .. صدقوني في حد حطه بالقصد ..

تابعووووووني 

لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم 

الحلقه الاولى من هنا

الحلقه الثانيه من هنا

الحلقه الثالثه من هنا

أدخلوا واعملوا متابعة لصفحتي عليها كل الروايات بمنتهي السهوله بدون لينكات من هنا 👇 ❤️ 👇 

صفحة روايات ومعلومات ووصفات

❤️🌺💙🌹❤️🌺💙🌹❤️🌺💙🌹❤️🌺💙🌹❤️🌺