سكريبت الجمال الداخلي للكاتبة خديجه السيد حصريه وجديده وكامله جميع الفصول
رضوي خرجت من العماره وهي على وشها ابتسامه عريضه وقربت من خطيبها اللي كان واقف بعربيته مستنياها وقالت: يلا انا جهزت اهو هتوصلني فين المره دي؟ تعرف في مطعم حلو فاتح جديد بيعمل اكل تحفه
أحمد بصلها جامد وقال بشك: وانتي عرفتي منين ان اكله حلو قوي كده؟ اوعي تكوني رحتي من ورايا
رضوي اتوترت جامد وقالت: لا والله دي فريده بنت خالتي هي اللي راحته مره هي واصحابها وقالتلي عليه، وقعدت توصفلي في الاكل
أحمد: هيبان دلوقتي الكلام ده لما اوزنك واشوف وزنك زايد عن اخر مره ولا اقل .. واعملي حسابك لو وزنك زاد يبقى هتطلعي ومافيش خروج
رضوي: يا احمد هو انت مش كنت بطلت الطريقه دي، المفروض تصدقني وانا بقولك ان انا مارحتش ولا اكلت منه .
أحمد: طب طالما انتي واثقه من نفسك قوي كده خايفه تطلعي على الميزان ليه وتوريني وزنك شكلك كده لخبطي في الاكل وبوظتي النظام اللي انا ممشيكي عليه؟ هو ده الثقه اللي ما بينا وانتي بتبوظي كل ترتيباتنا
رضوي: انا ماقلتش ان انا بوظت حاجه بس انت عارف ان انا مش بخس بسهوله ومن اقل لقمه بتخن.. فمش كل ماتشوفني هتوزني خليها حتى اخر الشهر.
 |
أحمد تجاهل كلامها وراح جاب الميزان من عربيه وحطه بالارض وقال بإصرار: مش هنتحرك قبل ماتوزني نفسك.. يلا اطلعي على الميزان ووريني.. ايه يا رضوى هفضل مستنيكي كتير ولا ايه؟
رضوي بلعت ريقها وطلعت على الميزان ووقتها احمد كشر وقال بغضب: هو انتي مافيش فايده فيكي ماعندكيش اراده ابدا، حتى كل ما ربنا يكرمك وتنقصي بالعافيه 2 كيلو ولا ثلاثه هترجعي تزوديهم ثاني.. لا وتقوليلي المفروض يكون في ثقه ما بينا وانتي كدابه اصلا.
رضوي: احمد من فضلك حاسب على كلامك انا مش كدابه، بس انا لما بزعل ولا اكتئب بطلع غضبي في الاكل مش باكله حبا يعني، وانت عارف الفتره دي نفسيتي تعبانه
أحمد: بلاش حجج ملهاش لازمه عندك 50 حاجه ممكن تضيعي بيهم الاكتئاب اللي عندك، لكن انتي بتختاري الاكل بالذات عشان مش قادره تسيطري على نفسك وهتفضلي طول عمرك كده غبيه وخايبه وحته حاجه صغيره مش قادره عليها.
رضوي: يا احمد خلاص بقى انت هتقعد تزعقلي كده في الشارع يلا بينا نطلع قبل ما خالتي تشوفنا ويقعدوا يسالوني
أحمد: هو انا بعمل كل ده وتاعب نفسي ليه مش عشان صحتك ووزنك اللي عمال يزيد ده و واحده واحده هيجيلك كل امراض الدنيا ومش هتقدري تروحي وتيجي ولا حتى تقومي من مكانك.. انا بسهوله جدا كان ممكن ارتبط باي واحده ارفع منك واحلي على فكره لكن انا اخترتك بالذات عشان بحبك وعشان بحبك برده عاوزك تتغيري للاحسن.
رضوي: ما انا اتغيرت اهو بذمتك من اول ما خطبتني انا كان وزني كده.. بس مش لازم امشي طول الوقت على النظام اللي انت كتبتهلي.
أحمد: مافيش الكلام ده، وأنا هكتبلك على نظام تاني وكميات اقل كمان تاكليها.. واتفضلي يلا على فوق عقابا ليكي مافيش خروج لحد ما يكون عندك اراده بجد وعزيمه انك تخسي.
**
فريده كانت ماسكه تليفونها واتفاجئت برضوى بتفتح عليها الاوضه وكان باين عليها انها معيطه ومتضايقه فقالتلها باستغراب: ايه ده هو انتي مش كنتي عماله تجهزي نفسك بقيلك ساعه قدام المرايه عشان تنزلي مع خطيبك تتفسحوا.. إيه اللي رجعك تاني؟
رضوي مسحت دموعها وقالت بحزن: اتخانقنا من قبل حتى ما نطلع كله بسببي ياريتني ماكنت قلتلك خدت حته من المكرونه البشاميل اللي عملتوها، اكيد هي اللي زودت وزني، هو انا ماعنديش اراده خالص كده ليه علي رأيه.
فريده: هو الواد ده لسه بيمارس عليكي سيطرته وتحكماته ده معقد ماهو مافيش حد عاقل بيعمل كده.. هو ماله خسيتي ولا تخنتي وطالما مش عاجبه سيادته قوي كده مايروح يتجوز واحده رفيعه.
رضوي: يا فريده هو بيحبني عشان كده عاوزني اتغير.. وهو معاه حقي برده التخن بيسبب امراض وحشه حاجات كتير.. وانا المفروض يكون عندي أراده عشان اكون في نظره احسن واحده.
فريده: هو عملك غسيل مخ ولا اية، انا اللي اعرفه البني ادم العاقل عاوز يتجوز واحده محجبه يروح للمحجبه عاوز واحده ماتشتغلش يبقى يروح يطلب واحده مش بتشتغل عاوز واحده بمواصفات عينه بيضاء ولا سوداء ولا تخينه ولا رفيعه برده يروح للي فيها المواصفات دي مش يروح لوحده عكس ما هو عاوز ويشكلها على مزاجه انتي بني ادمه مش عروسه في ايده بيحركها.. والله مش بعيد يكون خارج من مستشفى المجانين بس ارجع واقول انتي اللي ساكته له ومخليه يتمادى.
رضوي: هو مش وحش زي ما انتي فاكره، بس هو عشان بيحبني خايف على صحتي بيعمل كده.. وانتي قلتي بنفسك هو كان ممكن يروح لوحده رفيعه ويتجوزها لكن هو اخترني انا عشان بيحبني.
فريده: هو فين الحب ده؟؟ اللي بيحب حد بياخده زي ما هو، مش واحد بيحاسبك اكلتي وشربتي ايه..
**
في الشركه.
رضوي دخلت واتفاجئت باصحابها كلهم متجمعين فسالتهم باستغراب: في ايه مالكم كلكم متجمعين كده ليه.
أحمد بالوقت ده ظهر وهو ماسك التورته وابتدى الكل يغني ويبارك ليها: كل سنه وانتي طيبه ياحبيبتي عقبال 100 سنه.
رضوي ابتسمت قوي بفرحه وقالت: انا كنتي نسيت النهارده عيد ميلادي متشكره قوي يا جماعه.. على كل الحاجات الحلوه دي .
: احمد هو اللي ظبط كل حاجه على فكره، كل سنه وانتي طيبه يا رضوى وعقبال السنه الجايه لما نحتفل بيه في بيتك.
رضوي ابتسمت بسعاده اكتر وهي بتتمنى ان فعلاً اليوم ده يجي لان هي واحمد شغالين في نفس الشركه ورغم أن بقيلهم اكثر من ثلاث سنين مخطوبين لكن دايما احمد بياجل ميعاد الجواز.
أحمد قرب منها وقال بابتسامه: كل سنه وانتي طيبه مع اني كنت ناوي اكبر دماغي من حكايه عيد الميلاد عشان مابتسمعيش كلامي لكن قلت زي بعضه واهو تشجيع برده عشان تكملي النظام اللي كتبتهلك.
رضوي ابتسمت اوي وبالوقت جيت صاحبتها واديتها طبق وقالت: اتفضلي يا رضوى الحته بتاعتك من التورته لحقتهالك بالعافيه.. من المفاجيع اللي هناك دوله يلا كليها هتعجبك قوي انا عارفه من زمان انك بتحبي الشيكولاته البيضاء.
رضوي اتوترت وبصيت ناحيه احمد اللي قال بجمود: معلش يا نيره كوليها انتي أو اوديها لاي حد اصل رضوى عندها السكر وممنوع عليها الحاجات دي.. عشان بتتعبها.
: مين دي اللي عندها السكر من امتى الكلام ده يا رضوى؟ الف سلامه عليكي ياحبيبتي طب ماقلتليش ليه ما انتي زمان كنتي بتاكلي كل اللي نفسك فيه ومش بيفرق معاكي ماقلتليش الموضوع ده قبل كده.
رضوي: هاه! اصل ماجتش مناسبه وانا كويسه دلوقتي تسلمي ياحبيبتي.
أحمد بص على صاحبتها اللي مشيت وبعد كده قالها بضيق: طبعا لو مش موجود كنتي زمانك دلوقتي اكلتي منها وبوظتي النظام تاني.. مش كده
رضوي: ما انا مااكلتش حاجه قدامك اهو وساكته، بس دي التورته بتاعتي برده يا احمد يعني حته صغيره مش هتخسر حاجه
أحمد: انتي مافيش فايده فيكي ولا حته صغيره ولا كبيره، انتي ممنوعه من الحاجات دي واي حد يسالك بعد كده تقولي انك عندك السكر وكل الامراض كمان عشان يبطلوا يعزموا عليكي.. طول ما انتي بتفكري كده يبقى عمر ماهيكون عندك اراده
رضوي: بس انا ماعنديش السكر هو انت هتفول عليا دي حجه انت كل شويه تقولها لحد لما يعزم عليا بحاجه حلوه ولا اكل عادي حتي..
أحمد: ماهو فعلا هيجيلك طول ما انتي مش راضيه تمشي على النظام اللي كتبتهلك.. انا من رايي تروحي تشوفي شغلك احسن وتشغلي نفسك بيه هو اللي هينسيك الاكل.. واعملي حسابك هبقي اعدي عليكي واجيبلك السلطه بتاعتك وقت الاستراحه .
رضوي نفخت بضيق شديد وما ردتش ولفت وفعلا راحت مكتبها عشان تخلص شغلها.
**
في نفس الشركه، معتز بص ناحيه عمه وقال بغضب: معناه ايه الكلام ده يا عمي انت مش هتديني ورث ابويا؟ انت قلتلي تهديني كل حاجه بعد التخرج واديني اتخرجت اهو وكملت اصلا السن القانوني كمان من بدري وانا عندي دلوقتي 28 سنه يبقى ايه اللي يمنع اني امسك الشركه.
عدلي رد على ابن أخوه وقال: ماتكمل الجامعه اللي قعدت فيها اكتر من خمس سنين عشان تتخرج.. ودلوقتي ماعندكش خبره كبيره يبقى عاوزني اديك الشركه عشان تجيب ضروفها، اسمعني كويس ابوك كتبهالي بيع وشراء عشان عارف أنك هتضيع كل شقي عمره .
معتز: افهم من كده بقى ايه هتنصب عليا وتاخدها عشان مكتوبه باسمك؟
عدلي: احترم نفسك يا فاشل انا لو ماكنتش بتقي الله فيك كنت زماني بعتها من زمان وقلت انا مالي وكفايه عليا شغلي لكن لسه بكبرهالك اهو، وقبل ماتاخدها على الجاهز لازم تعرف الشغل هنا ماشي ازاي
معتز اتوتر وحاول يتكلم بلين ورجاء: انا اسف ياعمي مش قصدي بس هاخد الشركه دي امتى لما اكمل ال 30 ولا 40 سنه.. اديهالي وصدقني همشي على النظام زي ماهو مش هعمل حاجه غلط.
عدلي: مش بالكلام، بالفعل اشوفك بعنيا ماسك الشغل كويس وبتعرف كمان تدير كل حاجه زي ما هي وتعمل التصميمات بيدك زي ما ابوك بيعمل وانا ساعتها هطمن واديهالك.. واكتبهالك باسمك بيع وشراء
معتز: يا عمي بلاش كده واديني الشركه بتاعه ابويا وانا حر فيها الله.
عدلي: ايه عاوز ترفع عليا قضيه اعمل ما بادئتك بس مش هتعرف تاخد حقي ولا باطل معايا.. وده اخر كلام عندي اشوفك بعيني بتمشي الشغل كويس هعملك تنازل مش هتعرف يبقى الوضع هيفضل كما هو عليه.
**
رضوي بصيت حواليها على المحل وقالت بابتسامه عريضه: ايوه هو ده المحل اللي فريده قالتلي عليه متشكره قوي يا احمد انك جبتني، بجد انت احلى حاجه حصلتلي في حياتي انا بحبك قوي ومتاكده ان كل اللي بتعمله ده عشان خايف على مصلحتي بس هم مش عارفين.
أحمد ابتسم بهدوء وقال: هو انا برده اقدر اعرف ان حبيبتي نفسها في حاجه وما اعملهاش، علي العموم انا طلبت الاكل وشويه وهيجي
رضوي استغربت في البدايه انه طلب الاكل من غير ما يسالها لكن تجاهلت الموضوع لانها كل حاجه بتمشي على مزاجه لكن اول ما الاكل اتحط قدامه ابتسمت لما شافت اللحمه لكن بعد كده اتفاجئت ان الجرسان حط قدامه طبق خضار.
رضوي: احمد هم لخبطوا الطلبات ولا ايه، هم ليه حاطينلك لحمه ورز وانا حطلي طبق خضار.. ولا لسه شويه وهيجي طبقي.
أحمد بدأ ياكل بكل هدوء وبرود وقال: لا يا حبيبتي ده طبقك، انتي ناسيه النظام الغذائي اللي انا كتبتهلك ولا إيه.. انا قلت منها اجيبلك المطعم اللي نفسك فيه ومنها برده ما نخربش النظام.
رضوي كشرت وقالت بضيق: احمد قول انك بتهزر يعني انت تطلب اللي انت عاوزه وتاكله قدامي وانا اكل برده سلطه.. ده حرام وظلم على فكره.. طب اعتبرني حتى في يوم الفري.
أحمد: هو انا مش سابق وقلتلك انك بتبوظي يبقى مافيش يوم فري.. وطول الاسبوع كله هتمشي على النظام كلي بقى وانتي ساكته.. وبعدين انا قاصد اكل قدامك عشان ازرع فيكي الاراده وبعد كده لما تشوفي الأكل قدامك مهما كان حلو وتشتهيه ماتقربيش منه نهائيا.
رضوي: قصدك بتعذبني بالطريقه دي، طب عشان خاطري اطلبلي حتى نص الوجبه يعني افضل محرومه من اكل الفراخ واللحمه طول السنه.. ده حتى الدكاتره بتاعوا الرجيم نفسهم بيسمحوا لهم ياكلوه انما انت ممشيني على نظام مش عارفه على اي اساس وانت مش دكتور غذائي.
أحمد: افضلي ارغي من هنا للصبح برده مش هتاكلي ولا حته منها.. وبالمناسبه بنت خالتك استفدنا منها بحاجه الاكل فعلا يجنن.. شدي بقى حيلك وخسي نفسك بسرعه عشان بعد كده ترجعي تاكلي كل اللي نفسك فيه بس طبعا برده بكميات قليله ونظام تاني.
رضوي: يا رب يعني حتى لما اخس ان شاء الله هفضل على نظام، طب اشمعنى انت يا احمد بتاكل اللي نفسك فيه وانا لا.
أحمد: انتي هتجيبي نفسك ليا ولا ايه انا عندي فورمه ومحافظ على جسمي وعندي حاجه للاسف مش عندك وهي الاراده، وقت ما احب اوقف بعرف اوقف غير الجيم اللي بروحه بانتظام.. مش زيك خلاص بقيتي شبه الفيل
رضوي اتنهدت بحسره وحسيت انه بيهينها لكنها مااتكلمتش وفضلت عماله تبص للاكل بتاعه شويه ولاكلها وحاولت غصب عنها تاكل السلطه.
**
فريده فتحت باب الاوضه وهي بتبتسم وقالت: رضوي قومي البسي حالا جبتلك تذكرتين لفيلم في السيما يجنن بمناسبه عيد ميلادك يلا.
رضوي: هاه! لا ماليش مزاج احسن غصب عني مااقدرش امسك نفسي لما اشوف الكل حواليا بياكل وانا لما صدقت بقيت انتظم تاني واحمد مش هيسكت واحتمال اصلا
مايرضاش انزل.
فريده: انتي عبيطه يابنت هو انتي هتستاذني ليه اصلا ده خطيبك لسه مش جوزك.. يعني هو لما يخرج بيستاذنك مثلا وبعدين هيشوفك منين انتي مش قلتي قبل كده انه بينام بدري ومش بيخرج بالليل.
رضوي: ماانا مش متعوده اخبي عليه حاجه بيزعل قوي حتى لو خبيت عنه حاجه صغيره.
فريده: هو انتي لازم تقوليله كل تحركاتك.. ما تبطلي خيابه هو نفسه اكيد بيخبي عنك حاجات.. يلا بقى يا رضوى انا بالعافيه اقتنعت ماما وبعدين انا عاوزه اخرج عشان نحتفل بيكي ماتبقيش غلسه بقى دي ضحى ومني كمان جايين معانا وهتبقى كلها خروجه بنات. ايه ماوحشكيش الخروجات دي؟
رضوي سكتت شويه وهي بتفتكر أنها زمان فعلا كانت بتخرج براحتها لكن من ساعه ما خطبت احمد وكل خطوه بقت بحساب، ودايما حجته عشان ماتضعفش قدام الاكل يبقى ماتنزلش كتير احسن من البيت، لكنها بعد تردد قالت: خلاص ماشي بس هي ساعه بالكتير ونرجع على طول.
**
رضوي بصه في الساعه وقالت بقلق: يا بنات هو احنا مش قلنا هنشوف الفيلم وهنرجع كفايه الفيلم طلع طويل وساعتين ايه اللي جابنا المطعم هنا كمان.
ضحي: ايه يا رضوى في ايه؟ من ساعه ما خرجتي معانا وانتي كل اللي عليكي يلا نروح.. جعنا هناكل وبعد كده نروح على طول.
فريده: وبعدين براحتك لو مش عاوزه تطلبي حاجه وتجربي الاكل الجديد هنا ماحدش هيغصبك واطلبي سلطه زي ما احمد بتاعك عودك.
رضوي: فريده بطلي تريقه، وبعدين بدل ماتساعدوني عشان اخس انتوا اصحاب انتم.
فريده: هو هيقلبك علينا ولا ايه، مره من نفسك كلي وبعدين هو مش الدكاتره برده بيعملوا يوم واحد ليكوا تاكلوا اللي انتم عاوزينه ماهو برده الحرمان وحش.
رضوي فضلت ساكته وبعد كده طلبت سلطه لكن غصب عنها اشتهت الاكل اللي طلبوه واللي ماقدرتش تمسك نفسها المره دي وضعفت وطلبت زيهم، وابتدت تاكل بدل الطبق طبقين كمان.
ضحي ضحكت عليها وقالتلها: ايه يا رضوى مش يلا ياحبيبتي عشان نروح ولا هتطلبي الوجبه الثالثه.. يلا عشان اتاخرنا فعلا
رضوي حطت ايديها على بطنها بتعب وقالت: لا كفايه فعلا يلا بينا نروح يا بنات اوعوا حد منكم يقول لاحمد ولا يجيبله سيره اني خرجت اصلا،بس اللحمه والفراخ والرز كان وحشاني قوي فعلا.. بس ان شاء الله مش هيعرف وانا مش هقوله.
= لا ماهو مش محتاج يسالك لانه عرف خلاص، هو ده يارضوى اللي هتنامي بدري ومش هتنزلي ولا هتاكلي حاجه من ورايا خارج النظام اللي كتبتهلك.
رضوي وقفت مصدومه لما شافت قدامها خطيبها وماتعرفش جي منين وفضلت تبص حواليها بتوتر وقالت: احمد انا والله العظيم حاولت كتير امنعهم لكن غصب عني ضعفت ماهم بقيلهم ساعه عمال ياكلوا قدامي اكيد يعني مش هقدر استحمل كل ده صدقني والله مااعملها تاني.
أحمد اتعصب عليها اكتر وابتدى يزعق: هو انتي مافيش فايده فيكي انا تعبت منك وزهقت، مع اني كل اللي بعمله عشان مصلحتك وبرده غاويه تفضلي مقرفه بتخنق ده اللي خليتيني اقرف واتكسف امشي معاكي جنبي وانتي كده.. لكن للاسف مش مساعدني
اتقبلك بالشكل ده.
رضوي اتصدمت من كلامه لانه اهانها قدام صاحبتها وبنت خالتها وكمان بدات الناس اللي بالمطعم تبص عليها، وده خلاها من الاحراج ماتعرفش تنطق.
فريده: هو انت اتجننت ولا ايه ما تروح تتعالج احسن ولما مش طايقها قوي كده كنت خطبتها ليه؟ وبعدين ما انت شكلك اهو بتخرج امال حابس الغلبانه ليه ومخلي كل خطوه تخطيها لازم براي منك.
أحمد: رغم اني مالكيش فيه لكن اديني هقولك قدامها انا فعلا بخرج مع اصحابي بالليل، لكن مستحيل اروح معاها عشان بتكسفني بمنظرها ده انا مره وريت واحد صاحبي صورتها فكراها في الاول امي ولا اختي الكبيره.. ده غير اهلي اللي لحد دلوقتي بيقولوا لي هي ماسكه عليك ذله عشان واحد زيك يتجوزها.. ولا في الشغل بيقولوا اكيد سحرلك ومع ذلك كل بستحمله ومش تامر فيكي.. وياريت عاجب الهانم ولا حمدي ربنا ان واحد زيي بصلها.
رضوي عيونها اتملت بالدموع وابتدت تعيط بحرقه، وفريده ردت عليه بغضب: ده انت اللي تحمد ربنا انها كانت مستحمله عقدك يا مريض احترمي نفسك وماتتكلمش عنها كده انت ماتستاهلهاش اصلا.. يلا بينا يارضوى ايه هتفضلي واقفه ولا يكون عجبك كلامه وهو عمال يهين فيكي.
ضحي: ده انت بني ادم مش ومحترم صحيح هو انت عمال تبيع وتشتري فيها كده ليه؟ ما تبص لنفسك في المرايه الاول ده انت كلك عيوب من بره ومن جوه.
أحمد: لو مشيتي وراء صحابك اللي خربوا علينا دول وسبتيني اعملي حسابك هتدفعي الثمن غالي، انما لو لسه عاوزه فرصه اخيره يبقى تترزي مكانك لحد مااشوف صرفه للي انتي عملتيه واعرف اسامحك ازاي.
ضحي وفريده بصوا لبعض وهو مش مصدقين كلامه واللي استغربوه اكتر هي ازاي سامحله يهينها بالشكل ده..
لكن رضوي انسحبت بهدوء وكانها مش قادره اكثر من كده تخبي انهيارها والبنات اتسحبوا وراها.. واحمد وقف متعصب وهو بيضغط على ايده جامد.
**
رضوي ثاني يوم راحت الشغل وكانت متردده كثير لان بنفس المكان بيشتغل فيه احمد ومتاكده انها هتقابله، وبالفعل شافته واقف بعيد وبصلها بطرف عينه وتجاهلها، نزلت وشها بالارض بحزن وهي مش عارفه تقول ايه وتحل الموقف ده ازاي .
نيره: رضوى انتي جيتي ياحبيبتي انا مش عارفه بجد اقولك ايه، بس ربنا يعوضك باللي احسن منه.. بس انتي ليه ماقلتليش قبل كده انكم سبتوا بعض من بدري.
رضوي: بتتكلمي على ايه انا مش فاهمه حاجه.
نيره: هو مش انتي واحمد سبتوا بعض اصل هو من شويه كان بيعزمني على خطوبته.. ولما سالناه عليكي قال إنكم سبتوا بعض اصلا من بدري بس ماقلتوش.. هي مش الدبله اللي في ايديك دبله الخطوبه برده ولا هو كان بيقول اي كلام وماسبتوش بعض ولا ايه الحكايه.
رضوي بصيت على الدبله اللي بايديها وهي مش مصدقه الكلام لكن لحظت احمد بيبصلها بتحدي وانتصار وكانه بيقولها هو ده عقابها..
وباللحظه دي بدات تفتكر كل اللي كان بيعمله فيها وهي كانت صابره ومستحمله لانها كانت فكره فعلا خايفه عليها وبيحبها، غير اهانته ليها المستمره.
وكل ده خلاها ماتحسش بنفسها الا وهي بتقرب وقالت بتحدي ذيه: مبروك يا احمد، مش تعزمني عشان انا كمان ابقى اعزمك عليي جوزي اللي قريب.. ما هي الدبله اللي ايدي تخص حد تاني واحنا فعلا سيبنا بعض يا جماعه .
**
في كافتيريا الشركه.
معتز كان قاعد متعصب وهو مش عارف يظبط الشغل اللي معاه وبنفس الوقت مش عاوز يطلب مساعده من اي حد يعرف عمه عشان مايحسش انه انتصر عليه وانه مش قد يمسك الشركه.. وباللحظه دي كان لسه هيقوم لكن اقعد مكانه لما سامع اثنين في الترابيزه اللي جنبه بيقولوا.
فريده: يعني انتي متصله بيا وجايباني على مالي وشي عشان تقوليلي ان البيه بتاعك خطب بالاخر بعد كل العذاب اللي كان بيعملوا فيكي.. هو انتي مستنيه ايه منه ماهو اكيد هيعمل كده في الاخر، اوعي تقولي انك لسه باقيه عليه بعد كل ده
رضوي مسحت دموعها وقالت بحزن: يا فريده انتي مش فاهمه حاجه انا اتسحبت من لساني عشان اغيظه أنا كمان عشان اتحرجت لما زمايلي سالوني على الدبله اللي بايدي وازاي هو بيقول فسخنا الخطوبه، وانا لابساها واضطريت اقولهم ان انا كمان اتخطبت لواحد تاني.
فريده: بجد طب مش تقوليلي عشان ازغرط اخيرا فوقتي وعرفته ان حيوانه وما يستاهلشكيش..
رضوي: انا مش عارفه انا غلطت في ايه عشان يعمل معايا كده يا فريده، انا في حاجات كتير كنت بخبيها عنكم عارفه قبل ما كنا نخرج كان بيجيب ميزان معاه ولو لاقيني زايده يقولي عقابك مش هتخرجي معايا، ده كان مفهم زمايلي في الشغل ان عندي السكر عشان مايخليهمش يعزموا عليا بحلويات ولا اي اكل، غير عرفت انه كان بيخرج من ورايا عشان مستعر مني.. وحاجات كتير قوي تانيه.
فريده: عشان من الاول كنتي ساكته، واديكي خلصتي منه زعلانه ليه بقى دلوقتي.
رضوي: انا زعلانه على نفسي عشان في الاخر يبيعني بالطريقه دي، المشكله ان انا دبست نفسي برده لما قلت ان انا مخطوبه لواحد غيره ضحك باستهزاء لانه فاهم اللي فيها وقالي طب خلاص هستنى خطيبك اللي انتي بتقولي عليه ده واداني دعوتين..
فريده: الحيوان، وطبعا لو جيتي من غيره ولا اتحججتي باي حاجه وانتي ماجيتيش نفسك
لما يصدق وهيقعد يستلمك في الراحه وفي الجايه.. وبعدين هو لحق يخطب بسرعه ويلاقي واحده غيرك لا شكله اصلا كان جايب واحده احتياطي .
رضوي حسيت بالضيق من نفسها وقالت بحسرة: خلاص بقى بلاش الكلام ده دلوقتي، بس بيني وبينك فرحت ان انا اخذت حقي شويه منه لما قلتله اني مخطوبه لغيره بس اجيبه منين ده وانا مش مخطوبه اصلا.. والمشكله كمان اننا شغالين بمكان واحد ومش هعرف اشوف مكان تاني ده انا شغاله هنا بقيلي خمس سنين وكل حياتي في الشركه دي.
فريده: يا ريت كان عندنا حد من قريبنا ينفع ماشافهوش كنت قلتلك خديه علي انه خطيبك طب تصدقي فكره احنا ليه ما نشوفش واحد فعلا، ونديله فلوس ونخليه خطيبك ناجره يعني.
رضوي: انتي هبله يا فريده هو في حد بياجر بني ادمين هو احنا قاعدين في سوق العبيد هجيبه منين ده ان شاء الله وهيرضى على حاجه زي كده ليه.
=هيرضى بشرط واحد لو قدمتله خدمه قصاد خدمه.. احم انا اسف والله سمعت الكلام غصب عني لما كنت قاعد وراء بس انا عندي حل لمشكلتكم .
رضوي حست بالحرج لما لقيت شاب واقف قدامها، وبيقول انه سمع كلامهم عكس فريده اللي قالت بحماس: طب قولنا ايه هو الحل اللي عندك.. واحنا مستعدين نديك فلوس بس ماتطلبش كثير و تستغل الموقف.
معتز قرب قعد معاهم وقال: لا انا مش عاوز فلوس، انا كل اللي عاوزه منك بما انك بتشتغلي هنا من فتره تساعديني وتعرفيني الشغل ماشي ازاي وكمان يكون كثر خيرك لو علمتيني التصميمات.. وانا عليا هعمل خطيبك
فريده ورضوي بصوا لبعض بصدمه.. وهو بدا يوضحلهم ان الشركه دي اصلا بتاعه ابوه والمفروض هو يمسكها في الوقت الحالي لكن عمو عاوز يثق فيه الأول .
رضوي حسيت بالخجل اكتر لما عرفت انه صاحب الشركه وقالت: يا خبر ابيض هو انت كمان صاحب الشركه لا خلاص انا هعتذر على الموضوع مش هينفع..
فريده: وايه خلاها مش هتنفع انتي بقيلك فتره كتيره شغاله هنا بالشركه فعلا يعني اكيد هتفيديه وكمان انتي بترسمي حلو قوي.. دي رضوى عليها رسم إنما...
رضوي: بس يا فرده اكتمي خالص الموضوع ده كان زمان دلوقتي مش هعرف.. معلش انا اسفه بس حقيقي مش هقدر.
معتز: هو انتي ليه اترددتي لما عرفت اني هيكون صاحب الشركه، انا مش عاوزك تتحرجي ولا حاجه احنا بعد مانخلص موضوعنا كل واحد هيروح ولا أكن حاجه حصلت.. وبعدين انا عندي عرض تاني احلى عشان تبعدي عن خطيبك هنقلك بعيد عنه خالص وكمان هرقيكي.. بس عشان خاطري وافقي انا بجد محتاج حد يساعدني الفتره دي اوي
رضوي سكتت وهي بتفكر بحيره وفريده فضلت تهز راسها انها توافق وماتضيعش الفرصه.
**
بعد فترة رضوي كانت واقفه قدام المرايه وعماله تنفخ بضيق وفريده عماله تجهز فيها: ما خلاص يا فريده هو انا رايحه فرحي.
فريده: لا وانتي الصادقه رايحه خطوبه اللي كان خطيبك فلازم تبهري وتخليه يندم عليكي
على الله بس التاني يعرف يسبق الدور ويلبس لبس عليه القيمه.
رضوي ردت باحباط وعدم ثقه وقالت: انا حاسه كده هتقفش من البدايه انا مابعرفش اخبي حاجه بالذات عن احمد، وبعدين مين ده اللي يندم عليا ده كلهم بيقولوا ان خطيبته دي جميله واحلى مني بكتير واكيد يعني مش هيسيبني عشان يروح لوحده تخينه زيي
فريده: ما انتي لو رحتي بالطريقه دي فعلا هتتكشفي بطلي عدم الثقه اللي خلقها فيكي دي، وخليكي متاكده ان العيب فيه مش فيكي يلا بقى علشان ماتتاخريش وانا هحاول اشغل خالتك.
**
رضوي نزلت تحت بعد ما لبست الفستان واتصدمت لما شافت قدامها معتز اللي كان لابس البدله وشكله فعلا يخطف الانظار، معتز قرب منها وقال باستغراب: ايه مش يلا عشان مانتاخرش .. مالك بتبصلي كده ليه هو انا في اي حاجه غلط ماهي بنت خالتك قالتلي اعتبر نفسك كانك رايح فرح وظبط نفسك على الاخر.
رضوي: هاه! لا كويس تمام يلا بينا.
رضوي اول ما دخلت القاعه مع معتز وابتدت الانظار ناحيتها، وبدات تشوف نظرات الصدمه والذهول على أحمد وبدات في اللحظه دي فعلا تحس بالثقه شويه وابتسمت أوي وبدات تسلم على الكل وبعد كده اترددت تروح ناحيه احمد ومعتز لما شاف كده قال: اهم لقطه الموضوع ده كله اللي هتحصل دلوقتي تعالي نسلم عليهم.
رضوي ماكانتش حاسه بالثقه ناحيته قوي لكنها راحت فعلا ناحيه احمد وخطيبته عشان يسلموا عليهم.
معتز: مبروك يا عريس الف مبروك.. على الله بس العروسه الجديده تعرف تغيرك
أحمد كشر وقال بضيق: مش فاهم تغيرني ليه ما تاخدني زي ما انا هو انا فيا اي حاجه محتاجه تتغير اصلا.
معتز بص ناحيه رضوى وقال بابتسامه هاديه: عشان اللي يسيب واحده ذي رضوي يبقى فعلا محتاج يتغير ويراجع نفسه 1000 مره بس احسن حاجه عملتها عشان بعد كده خطبتها بعضك على طول.. مبروك يا عريس تاني مره .
احمد اتعصب في اللحظه دي وظهر عليه الغضب لانه ماتوقعش اصلا انها ممكن تكون اتخطبت بجد، وفضل طول القعده عمال يبص عليها وهم قاعدين من بعيد وحس بالغيره والغضب لما شافهم بيضحكوا.
**
رضوي ضحكت جامد وقالت: يخرب بيت عقلك ده انا قلت هتفضحنا ومش هتعرف تسلك معاه، انا حسيت شويه والدخان هيطلع من ودنه تلاقيه ماتوقعش اصلا ان انا فعلا ممكن اجيب حد معايا .
معتز: اللي زي ده اصلا بس سهل جدا تستفزيه اول ماتقلبي عليه لان بيكون فاكر نفسه محور الكون عشان كده الموضوع مش صعب زي ما انتي فاكره حتى لو خدتي بالك هتلاقيه دلوقتي عيوني ماراحتش من علينا.. وهيتجنن ونفسه يعرف بنتكلم عليه ولا لا.
رضوي: مش عاوزه اتكلم عليه كفايه اديله اهميه لحد كده اصلا.. لاني بتضايق ان انا كنت مسلمه لواحد زي ده مايستاهلنيش فعلا.. انا غيرت حاجات كتير قوي من نفسي عشانه.
معتز: لو غيرتيها عشان نفسك باقتناع فده كويس.. بس الاهم من كل ده ايه الحاجات اللي كنتي بتغيريها تستحق ولا حاجات عاديه بس بالنسبه له شايفها كبيره.
رضوي ردت بحزن وقالت: المفروض انها حاجات تخصني لوحدي وانا لو شايفاها مشكله ليا يبقى المفروض انا اللي اغيرها عن اقتناع.. لكني كنتي فاكره أنه فعلا بيحبني وبيحاول يغيرني لمصلحتي زي ما كان بيفهمني كل مره.. قد ايه انا كنت غبيه وكل يوم بلوم نفسي على اني كنت مستسلمه لواحد زي ده
معتز: رضوى انا اسف لو بتدخل في حاجه ما تخصنيش بس خلاص اللوم والكلام مش هيفيد بحاجه وانتي دلوقتي في مرحله كويسه، بس الاهم ماترجعيش تاني ولا تسمحي لواحد زي ده او غيره يتحكم فيكي بالطريقه دي. واعتبري نفسك اتعلمتي الدرس..
رضوي هزت راسها بهدوء وبالوقت ده كانوا بداوا يرصوا الجاتوه ومعتز سمع واحده زميلتها بتقولها خلي بالك السكر زياده فقال: انا اسف هو انتي عندك السكر.
رضوي: هاه! لا بس دي سمعه طلعها عليا أحمد عشان يخليني ما اكلش.. انما انا
ماعنديش الحمد لله اي امراض مزمنه.
معتز: هو احمد ده للدرجه دي كان غريب، طب ايه هتفضلي حارمه نفسك ولا تحبي تدوقي الشيكولاته برده شكلها حلو قوي.
رضوي لقيت نفسها بتبتسم قوي على كلامه وقربت فعلا الطبق وبدات تاكل، ومعتز ابتسملها هو كمان وبداوا يتكلموا كثير لكن في حاجات تخصهم هم الاتنين عن حياتهم.
**
عدت فتره ورضوى ارتاحت شويه لما فعلا معتز نقلها لمكان بعيد عن احمد وبقيت تقابله صدفه فين وفين، ومن الناحيه الثانيه بقت تعلم معتز الرسومات وكل حاجه عن الشركه.. وده كان بيخليهم يقعدوا وقت كتير قوي مع بعض سواء في كافتيريا الشركه او في مطعم بره.
معتز: المطعم هنا هيعجبك قوي ده اول يوم افتتاح ليهم، والاكل هيكون رخيص وكمان هيدوني اكل ببلاش.. يعني عرض مايتفوتش
رضوي: انت عاوزني اتخن ولا ايه بقى؟ احنا تقريبا خروجنا جوه الشركه وبره الشركه عن الاكل وبس..
معتز كان بياكل ورد عليها بعدم اهتمام: طب وماله ماتتخني هي حاجه عيب ولا حرام، وبعدين انتي لو مرتاحه ومقتنعه بشكلك كده يبقى ماتهتميش برايي غيرك
رضوي ردت بحرج وقالت: بس شكلي بعد كده هيبقى وحش وهتخن قوي، واحتمال بعد كده ما اعرفش امشي ولا اقوم إلا بمساعده حد.. غير الامراض
معتز: مش كل الناس اللي بتتخن يعني بيحصلها كده، وبعدين ما انتي ممكن ماتحرميش نفسك من حاجه وفي نفس الوقت تخسي شويه وتوصلي للوزن اللي انتي عاوزاه حتى يا ستي لو 100 كيلو المهم انتي تكوني راضيه عن نفسك..
رضوي: يا ريت كل الناس بتفكر زيك، بدل ما هم ساعات بياخده التخن ماده للسخريه والتنمر على غيرهم.. وتحت بند احنا خايفين عليكي وعاوزين مصلحتك.. انا ياما نمت معيطه قوي بسبب كلمتين زي دول .. لدرجه ان انا كرهت جسمي وبقيت شايفه نفسي وحشه
معتز: انتي وحشه، طب ازاي؟ بالعكس انتي جميله قوي يا رضوي وبعدين لما انتي وحشه وكده امال سبت ايه للوحشين بس.
رضوي بصيتله جامد واتوترت من الكلام وهو لما خد باله قال: اقصد من غير زعل العيب فيكي انتي اللي بتديهم فرصه او بتسمعيلهم وتهتمي بكلامهم.. اصل العيوب كلها مش في التخن هم كمان ليهم عيوب بس بيحاولوا يداروها.. وبعدين انتي عندك نعم كثير كفايه ان صحتك كويسه وجسمك اللي انتي بتكرهيه ده المفروض تحبيه وتحمدي ربنا عليه.. في ناس كتير بتتمنى اي تفاصيل جسمها المهم تكون بتمشي وتسمع وتتكلم.. فما ينفعش تبصي على نص الكوبايه.. باختصار حبي نفسك يا رضوى.
رضوي لقيت نفسها بتبتسم قوي وقالت: تعرف ان انا ساعات بحس ان انا بستمد الدعم منك رغم ان بعرفك بمده قصيره.. اصل انا بصراحه خدت عنك فكره غلط بالذات لما قلتلي انك قعدت في الجامعه كذا سنه تسقط.
معتز: آه تلاقيكي قلتي شاب صايع وبيلف حوالين البنات ياخد فلوسهم لكن المشكله مش كده.. انا دخلت حاجه مش حبيبها وبالعافيه عقبال ما تقبلتها وبصراحه كنت بعند مع اهلي لاني كنت فاكر نفسي لما اسقط هيرضوا يخلوني اشوف الجامعه اللي كان نفسي فيها لكن برده قالوا لي لازم تمشي زي العيله وتتعلم البيزنس عشان انتي اللي هتمسك الشركه في الاخر.
رضوي: طب وانت كان نفسك تدخل إيه وهم رافضين قوي كده.
معتز: وماتتريقيش زيهم كان نفسي قوي أعزف بيانو، أو اي اله حتى انا بحب الموسيقى أوي اصلي.. لكن هم شافوا الموضوع كانها حاجه عيب وما تصحش والعيله هتضيع والكلام الكبير ده
رضوي: وعلى كده جربت قبل كده الموضوع.
معتز: هاه! بصراحه لا، ماحدش شجعني اصلا حتى اصحابي اللي كانوا حواليا كانوا بيتريقوا هم كمان.. فماجربتش وحتى مش عارفه لو جربت فعلا ممكن احب الموضوع ولا لا انا من بعيد بس معجب بالموسيقى والالات.
رضوي: طب نيجي نعمل اتفاق لو بقيت شاطر وخلصت مراجعه الملفات دي معايا عشان تعرف كل اسهم الشركه ماشيه ازاي ممكن اروح معاك اي مكان للموسيقى تجرب يمكن بعد كده تلاقي نفسك مش حابب الموضوع وتبطل تفكر فيه.. وحتى لو لا تكون جربته وخلاص.
معتز: بتتكلمي بجد يا رضوى هتروحي معايا فعلا.. طب تمام خلينا نبدا من دلوقتي يلا بسرعه وانا اوعدك في نص ساعه هحفظ كل ده.
**
عدت فتره طويله ومعتز خلاص بدا يعرف كل حاجه عن الشغل بمساعده رضوي، وبدا فعلا عمو يلاحظ كده ولما عمل اجتماعي ولقاه عمال يجاوب على كل الاسئله وبقى عنده افكار اكثر وكويسه للشركه.. وعدوا فعلا انه هيسلمله الشركه خلاص.
معتز فرح جدا بالاخبار ولقى نفسه اول واحده بيدور عليها رضوي وقالها بسعاده: عمي وافق يديني الشركه خلاص هتكون ليا، انا مش عارف اقولك ايه شكرا على مساعدتك ليا بجد يا رضوى..
رضوي: بجد دي اخبار كويسه والله فرحت عشانك وبعدين انا ماعملتش حاجه.. انت برده كنت شاطر وبتتعلم بسرعه.
معتز: لا بس برده يا رضوى لولا بالك الطويل معايا ومساعدتك ليا حتى للحاجات اللي مش عارفها وكنت بتسهليلي الموضوع.. رضوى انتي حقيقي جميله من بره ومن جوه.
رضوي حسيت بالجرح وقالت: ناوي بقى تعمل ايه بعد ما خلاص الشركه بقت ليك..
معتز سكت شويه وقال: بصراحه انا حسيت معاكي بكتشف نفسي من جديد ولقيت فعلا جو الموسيقى ده بعد ما جربته معاكي مش حبه وهو ده اللي عاوز اشتغل فيه، وحبيت شغلي لاني خلاص وصلت لمرحله مش قادر ابدا من جديد حاجه، وكمان حابب اكمل اللي اهلي بداوا.. وفي حاجه كمان ما توقعتش ان ممكن اخدها بالسرعه دي انا نويت اتجوز وحاسس ان انا فعلا عاوزه حد يساندني المرحله اللي جايه وما بقاش لوحدي تاني.
رضوي اتصدمت من كلامه الاخير وما تعرفش ليه في اللحظه دي قلبها وجعها، لكن قبل ما يكمل معتز كلامه اتفاجئ بأحمد اللي قرب وقال بضيق : رضوى من فضلك كنت عاوزك في كلمتين على جنب ممكن.
رضوي اتفاجئت بيه وقالت بهدوء: اتفضل قولي اللي انتي عاوزه معتز مش غريب انت ناسي انه خطيبي.
أحمد: تمام انا عرفت انها لعبه منكم، والبيه اصلا يكون هو اللي هيمسك الشركه قريب ومش معقول يعني صاحب الشركه هيسيب كل البنات العالم ويتقدملك.. واكيد في حاجه لسه انا ما اعرفهاش... لكن كل ده مش فارق معايا وكنت جايه اقولك ان انا خطبت البنت دي بس عشان اعاقبك لكن بعد كده كنت هرجعلك.. فخلاص احنا الاتنين غلطنا نفس الغلطه وتعالي نبدا من جديد.
معتز كان بيسمعه وهو بيضغط على ايده ولقي نفسه اتعصب وقال بغضب: انت مين سامحلك يا حيوان تقول الكلام، ليها قدامي انا ورضوى اصلا مخطوبين وقريب هنتجوز كمان.
أحمد: ما خلاص بقى يا باشمهندس قلنا لعبه وبتلعبوها انتم الاثنين يبقى سيب خطيبتي بقى ترجعلي وروح انت شوفلك سكه ثانيه.
رضوي في الوقت ده اتكلمت قبل ما يتعصب تاني معاذ وقالت بجديه: احمد انا وانت خلاص صفحتنا انتهت وانا عمري ما هرجعلك حتى لو اتغيرت زي ما بتقول مع اني اشك لان انت في اول الكلام لسه شايفني قليله وبتقلل مني، وشايف ان مستحيل صاحب الشركه يتقدملي.. وانا عاوزه اقولك بقى بطل تدي لنفسك اهميه لان انا اللي مش عاوزاك ونصيحه مني شوفلك دكتور نفساني يعالجلك العقد اللي جواك.
رضوي بعدت خطوتين وكانت سايبه وراها احمد اللي بيغلي بعد ماحس فعلا انه خسرها ومابقاش قادر يسيطر عليها زي زمان، ومعتز قرب منها وقال بإعجاب: بصراحه احسن حاجه عملتيها كده اقدر اقول اني اتغيرتي.
رضوي: هو انت عاوز مني انت كمان يا معتز ما تروح للبني ادمه اللي انت كنت هتتجوزها وقلتلي عليها من شويه.. انا مش لعبه في ايديكم ده شويه وده شويه سيبوني في حالي لان انا مش هسمح لحد مهما كان مين يسيطر عليا من تاني.
معتز قرب منها وقال بابتسامه: تتجوزيني، مالك مبلمه كده ليه ما هي البنت اللي انا كنت اقصدها من شويه كانت انتي قبل ما الحيوان ده يقاطعنا.. انا عمري ما هلاقي احسن منك بالذات لما قربت منك ولقيت انتي اللي تستحقي اللقب ده.
رضوي كانت مصدومه من اللي بتسمعه لكنها بعد كده لما استوعبت ابتسمت وقالت: موافقه.
النهايه.
اللي بيحب الروايات الكامله والحصريه من هنا 👇 ❤️ 👇
لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم
❤️💙🌹🌺❤️💙🌹🌹💙❤️🌺🌹💙❤️🌺🌹💙❤️
تعليقات
إرسال تعليق