سكريبت أحببت خائنة للكاتبة خديجه السيد حصريه وجديده وكامله جميع الفصول
يوسف شال مصليه الصلاه وحطها على جنب بعد ما ادى فريضه الصلاه، ومسك تليفونه شويه قبل ما ينام لكن اتفاجئ برساله من واحده بتقوله فيها: ازيك يا شيخ يوسف انا واحده شابه صغيره ونفسي اتغير واتوب عن ذنوب بعملها كتير في حياتي كل يوم بس نفسي حد يساعدني فيها ويشجعني..
يوسف استغرب شويه ويص على الاكونت لقي واحده اسمها غرام لكن كانت حاطه صوره لممثله فرد عليها برساله وقال: السلام عليكم اولا.. ثانيا باب التوبه مفتوح لاي حد وتقدري تقربي من ربنا وهو ان شاء الله يتقبل منك التوبه.. بس اهم حاجه هتوقفي الذنوب اللي انتي بتعمليها كل يوم دي.
غرام ردت عليه برساله تانيه وقالت: ما تفهمنيش غلط انا ذنوبي مش كبيره ولا صعبه للدرجه دي.. هو يمكن مش عارفه التزم على الحجاب ولا على الصلاه ولا قادره ابطل احط مكياج وانا خارجه ولا حتى لما البس الطرحه شويه لازم ابين شعري من قدام.. وحاجات يعني زي كده بس انا عارفه انها غلط لكن برده لسه بعملها.
يوسف: طالما عندك النيه انك تتوبي صدقيني هتقدري.. وبعدين ايه اللي يمنع يعني طالما انتي مقتنعه وعارفه انه غلط حاولي ما تخليش شيطانك يسيطر عليكي ويخليكي انتي اشجع واقوى منه.
 |
غرام بحزن: للاسف مش قادره فعلا اتغلب عليه.. يعني كل ما احاول التزم شويه برجع تاني لنقطه الصفر.. وده بسبب ان انا بشوفهم حواليه في الجامعه بيعملوا الاكثر من كده وبيشجعوني..
يوسف: طبيعي لان الصاحب بيجر صاحبه حاولي تقربي من الناس إللي شبهك وكويسه وبعدين فين اهلك من كل ده ازاي من وانتي صغيره ماشجعكيش على ده.
غرام: في منهم بينتقدوني جامد فبتقفل منهم،
بصراحه وانا نفسي حد يشجعني بالراحه واذا كان على اهلي فبصراحه هما سايبيني بحريتي بس ده لانهم واثقين فيا.. وانا يعني غلطتي مش كبيره للدرجه دي.. عشان كده بالصدفه وانا بقلب شفتك منزل حاجات كتير قوي على صفحتك بتشجع فيها البنات والرجاله على التوبه والاعمال الصالحه فقلت انا وحظي اجرب ابعتلك يمكن تساعدني.
يوسف: تمام هبعتلك شويه كتب مبسطه وهيفدوكي في المواضيع دي.. وحاولي تقوليلي انتي بمحافظه ايه ولا مكانك فين عشان افيدك كمان بدروس دينيه تحضريها ولا ممكن اسهل عليكي الامر.. انا بفتح لايف وبستقبل كل اسئله الناس وبتكلم فيها في مواضيع مهمه.. كل يوم الساعه 5:00 حاولي تحضري وتنتظمي عليه.
غرام: متشكره جدا لحضرتك مش عارفه اقولك ايه ربنا يجعله في ميزان حسناتك يا رب.
يوسف أبتسم بهدوء وهو بيبعتلها الرساله الاخيره: ربنا يتقبل مننا جميعا يلا تصبحي على خير.. وما تنسيش قبل ما تنامي تصلي ركعتين لله بنيه التوبه عن الاعمال السيئه دي هيساعدوكي كتير
**
غرام قفلت التليفون وهي مبتسم قوي ابتسامه عريضه وبعد كده بصت على صورته وقالت بحب: معقول أقع في غرام واحد من صورته اللي وقعت قدامي بالصدفه.. كنت فاكراه مش هيرد عليا لكن شكله متواضع ده صفحته كبيره قوي هيرد على مين ولا مين.. يا سلام لو وقع حظي في واحد زي ده، اهو منها يكون زوج صالح يعيني ويخليني ابطل الاعمال الوحشه وندخل الجنه مع بعض
= هو مين ده اللي عاوزه تدخلوا الجنه مع بعض.. هو انتي بتحبي يا بنت انتي من ورايا وما قلتليش.
غرام انتفضت بذعر اول ما شافت بنت عمها قدامها وبسرعه خبت التليفون وقالت بتوتر:
مين ده اللي احبه انتي فهمتي الموضوع غلط ده ولا حاجه.. دي كانت صوره بطل مسلسل تركي بتابعه جديد عجبني بس.
هاجر بخبث: كذابه انا لمحت صوره واحد كنتب عماله تسبليله.. ومش اول مره اشوفك لكن للاسف كل مره مش بلحق اشوف الصوره كويس.. هو انا يعني هروح اعترف لامك ولا لعمك اللي هو ابويا ما تقوليلي احنا ستر وغطاء عن بعض يا بت برده.
غرام بتردد: طب يا هاجر فعلا ما تقوليش لعمي ولا لماما.. عشان ما يفهموش الموضوع غلط انا والله العظيم بحبه من بعيد لبعيد وبتابع بس كل الصور والحاجات اللي بينزلها واثرت فيا ولقيت نفسي غصب عني عاوزه اتوب واعمل اعمال صالحه واغير من نفسي عشان ربنا يباركلي في حياتي ويكون من نصيبي .
هاجر: يخرب بيتك ده انتي شكلك واقعه لشوشتك طب ما توريني شكله عشان اعرف يستاهل كل الحب ده واللي انتي عاملاه في نفسك عشانه ولا لا.
غرام: لا طبعا افرضي وريتلك صورته وبعد كده وقعتي في حبه زيي.. بصي يا هاجر بعد ما ابويا مات صحيح امي اتجوزت عمي إللي هو ابوكي عشان يربونا مع بعض وبقيناه زي الاخوات.. لكن في حاجات لازم نحط فيها حدود
هاجر ضحكت عليها وقالت: والله ده انتي مخك ضارب على الاخر للدرجه دي بتحبيه طب يا اختي مش عاوزه اشوفه.. بس نصيحه مني ما تعمليش حاجه غلط انتي طيبه وجواكي كويسه ومش غلط انك تاخدي حاجه دافع عشان تتغيري للاحسن.. بس الغلط لو فعلا كلمتي الشاب ده واتجاوبتي معاه لاني ده اللي ما يرضيش ربنا يا غرام
غرام: هاه! لا طبعا ما كلمتش حد انا هكلم شباب انتي دماغك راحت لفين.. دي كانت امي وعمي يموتوني.
هاجر: الاهم من كده يا حبيبتي ده بيغضب ربنا.. وانا فرحانه انك بداتي تلتزمي بالحجاب حتى لو لسه مش الحجاب الشرح وان شاء الله واحده واحده هتبقى احسن.. ادعي بس
غرام: يا رب يا هاجر ادعيلي ان يكون من نصيبي فعلا..
هاجر: ادعي احسن يا حبيبتي لو في خير ليكي يكون من نصيبك ولو ما فيهوش خير ربنا يبعده عنك.
غرام: لا ان شاء الله هيكون في خير ليا ده الشيخ يوسف هو فيه خير اكتر من كده.
**
غرام بدات كل فتره والثانيه تتكلم مع يوسف عن امور دينيه، و واحده واحده الاثنين فجاه الامور اتطورت ما بينهم وبدا كل واحد والثاني يسال عن حياته .
غرام كتبت رساله وقالتله فيها: يعني حضرتك بعد وفاه والدك انتي اللي اتحملت مسؤوليه و والدتك واخواتك البنات جوزتهم كلهم.. باين عليكي شاب محترم قوي وكويس..
يوسف: متشكر يا غرام.. بس انا ما عملتش حاجه ده الواجب.. وانتي كمان عمك شكله حنين وطيب عشان كان ممكن يقول ما ليش دعوه لكن هو اتجوز والدتك عشان يربيكي إنتي و بنت عمك وتكون سند ليهم.
غرام: انا بعتبر عمي فاروق فعلا ابويا هو بني ادم كويس ومحترم.. وبيعامل ماما كويس وبيعاملني انا كمان زي بنته بالظبط.. وهاجر بنت حلال وطيبه قوي هي فيها شبه منك كده متدينه وبتشجعني على الالتزام
يوسف: طب كويس في حد من عيلتك اهو مركز معاكي حاولي تقربي منها بقى وتعملي زيها.. وتساليها بدل ما انت كل يوم مصدعاني.
غرام بحزن وحرج: هو انا بضايق حضرتك اوي كده طب مش تقولي من بدري تمام انا خلاص هقفل ومش هبعت رسائل تانيه وشكرا لحد كده.
يوسف اتصدم لما لاقيها فعلا قفلت الانكونت بتاعها: هي زعلت ولا ايه انا كنت بهزر.. الله دي مش بترد على الرسائل بتاعتي اعمل ايه دلوقتي.
يوسف سكت شويه وبعد كده لقى نفسه بيدوس على الاتصال في الفيسبوك وبالفعل ردت فابتسم بتلقائيه وقال: غرام انا كنت بهزر انتي فهمتي غلط بالعكس انا مش بتضايق من كلامك وبقيت كل يوم استناكي تقريبا عشان اشوف رسالتك واتكلم وانا بصراحه دي حاجه كانت ضد مبادئ واول مره اعملها واتشد كده.
غرام ابتسمت قوي بسعاده وقالت: وانا كمان يا يوسف اول مره اتشد لحد كده.. انا كنت كل يوم بشوف صورتك واقعد اسبلها زي المجنونه واكلمها واقول امتى تكون من نصيبي.. عشان ندخل الجنه مع بعض وهي دي امنيتي الثانيه.
يوسف بتردد: وهي ايه امنيتك الاولى.
غرام ردت بتهور وما قدرتش تمسك نفسها اكتر من كده وقالت: انك تتجوزني انا بحبك يا شيخ يوسف.
**
أمير: يا راجل اخيرا هتتجوز ويا ترى مين بقى حد نعرفه.. بنت حد من الشيوخ كانوا بيدرسوا لنا ولا حد من اهلك.
يوسف بتردد: لا هي بنت اتعرفت عليها من النت.
أمير: انت بتهزر اصل تبقى مصيبه لو بتتكلم بجد ايه يا شيخ يوسف هو احنا بنقعد نخطب للشباب والبنات يبعدوا عن السكه دي واحنا نعمل زيهم.. الله ده انت ساكت يبقى فعلا الكلام صح! كده اسمه نفاق يا شيخ يوسف واحنا مش بوشين وما تعلمناش نبقى كده
يوسف: طب اهدى وانا احكيلك الحكايه لان فعلا عاوز حد اخد رأيه.. هي اللي دخلت تكلمتني في الاول كانت عاوزه فتوى ومره وراء مره على النظام لقيت نفسي بنجذب ليها لما بدات تسالني على احوالي.. واتشديت ليها رغم ان انا ما شفتهاش لكن لما لقيتها بتبعد عني لقيت نفسي بتصل بيها ومش عاوزها تبعد.. وكمان اعترفتلي بحبها وقلت لروحي طالما انا كمان مشدودلها ليه ما اروحش اطلبها من أهلها .
أمير بغضب: استغفر الله العظيم يا رب دي اكيد شيطانه وجريتك معاها استغفر الله العظيم يا رب انت يا شيخ يوسف تقع الوقعه دي.. وست زي دي تعمل فيك كده منظرك ايه دلوقتي قدامنا و قدام الشيوخ لو عرفوا المصيبه اللي عملتها.
يوسف بتوتر: انت مكبر الموضوع ليه يا امير ما انا بقولك هتجوزها ربنا بقى يسامحني على اللي فات.
أمير بسخريه واستهزاء: ما هي دي المصيبه قدرت تلعب بعقلك وتوقعك.. هو انت ما سالتش نفسك انت الراجل الكام تكلمه وتحاول تجرجره في الموضوع ده ما هي اللي تعمل كده تعمل اكتر من كده.. وهي دي بقى الزوجه الصالحه اللي عاوزها تصون شرفك وتحافظ عليه ولا تفضحك قدام نفسك وقدام اهلك.. دي هتدمر مستقبلك لو الفضيحه بقت كبيره وبعد الجواز اكتشفت مصايب عليها هتقدر ازاي تقف تدرس للناس وانت عاوز النصيحه اصلا.
يوسف: معقول تكون ضحكت عليا ومش اول واحد في حياتها انا زي ما فكرتش في كده.. بس انا سالتها على عنوان اهلها وهي اكيد فهمت من نفسها ان انا جايه اطلبها للجواز
اميره بسخرية: هو انت مش قلت بنفسك ان اهلها نفسهم مش مركزين معاها وسايبينها براحتها.. يبقى هي هتطلع ايه غير بنت قليله الربايه وبتكلم شباب على النت !
يوسف: ايوه فعلا قالتلي كده..المشكله الاكبر طمنت والدتي خلاص ان انا هتجوز قريب وهاخدها ونروح نطلبها من اهلها وهي فرحت مش عارفه هكسر فرحتها بعد كده إزاي.. اعمل ايه دلوقتي؟!.
**
غرام كانت طايره من السعاده وكل يوم بتستنى تسمع من اهلها ان يوسف اتقدملها لأنها رفضت تقولهم حاجه عشان ما تحصلش مشكله ويتضايقوا منها.. و فضلت مستنيه كل يوم على الامل ده..
لحد ما في يوم رجعت من بره لقيت هاجر بتشدها لجوه وقلت بابتسامه عريضه: باركيلي يا غرام جالي العريس اللي بتمناه وبدعي كل يوم من ربنا ان يجوزني شيخ يساعدني على الالتزام اكتر.
غرام ردت عليها بطيبه وحب من قلبها وقالت:
بجد يا هاجر هتتجوزي اخيرا والفرحه هتدخل بيتنا الف مبروك يا حبيبتي ربنا يتمملك على خير.. وعلى كده تعرفيه منين.
هاجر: اعرف مين هو انا برده ليا في السكه دي هو جب هو واهله وسالوا عليا و اتقدموا لي وانا طلعت بره اتكلمت معاه وحسيت بالقبول.. تعالي بقى ساعديني اطلعي بره احسن انا متوتره ومكسوفه قوي اوقع القهوه اللي طلبها مني عليه.
غرام ابتسمت ليها بفرحه وبركه ليها تاني وبعد كده طلعت معاها فعلا لبره عشان تهديها، شويه من توترها..
لكن فجاه وقفت مكانها متسمره اول ما عيونها وقعت على العريس واللي كان هو نفسه يوسف اللي بتكلمه على النت ..و كانت مستنيه على امل يطلبها هي فازاي يطلب هاجر بنت عمها مكانها دلوقتي.
فاروق عمها قال: تعالي يا غرام ما تتكسفيش ده يوسف و والدته كانوا جايين يطلبوا هاجر يعني خلاص بقوا مننا.. ودي بقى غرام بنت اخويا وزي بنتي بالظبط انا اللي مربيها امها تبقى مراتي حاليا بعد وفاه ام هاجر و أبوه غرام اخترنا ان احنا نتجوز عشان نربي العيال دول.
أم يوسف: بسم الله ما شاء الله عليها والله لو عندي ابن ثاني ما يتعزى عليها دي زي القمر ربنا يباركلك فيها وفي اخلاقها.. ويا بخت اللي هتكون من نصيبه.
يوسف كان عنده فضول يعرف الشخصيه اللي اعجب بيها وكان بيكلمها عن طريق النت شكلها ايه بالذات لما والدته شكرت في جمالها ولما رفع عينه ناحيتها اتصدم فعلا انها قد ايه جميله وجذابه وكانت عكس هاجر اللي جه يطلبها وهو مش عارفها خالص اصلا،
لكن افتكر انها قبل كده كانت بتشكر في هاجر انها شبهه، عشان كده افكر انه يختار بنت عمها احسن..
نزل عيونه بالعافيه عنها وحاول يمسك اعصابه لانه كان حاسس بتوتر ورعشه غريبه في جسمه اول ما بص في عيونها الحزينه.
**
عدت فتره وهاجر ويوسف اتخطبوا وكتبوا الكتاب كمان في نفس الليله وغرام مش عارفه تتكلم مع مين عشان تحكيله على اللي جواها.. لكن قلبها كان بيوجعها قوي لما كانت بتسمعهم بيتكلموا ولا تشوف هاجر ويوسف مع بعض .. وكان قد ايه الكل فرحان بيهم وشايف انهم لايقين على بعض.
وفي يوم كانت غرام واقفه مستنيه الاسانسير ولمحت يوسف كان جايه هو كمان جي من بره فقال بتوتر: انتي مستنيه اسانسير انتي كمان دوستي على الزرار عشان ينزل.. انا كنت جايه عشان اشوف هاجر واطمن عليها.
غرام بجمود: ما سالتكش بس بما انك محتاج تبرر كده من نفسك.. يا ترى كمان مش شايف نفسك انك محتاج تبررلي يعني ايه تكون بتكلمني سنه بحالها على النت من غير ما تشوفني واخر مره طلبت نمره اهلي وبعد كده الاقيك طلبت بنت عمي بدالي ما هي اكيد مش غلطه لانك عارف كويس اسمي.
يوسف: رغم ان انا مش مضطره بره لكن انتي السبب يا غرام ايوه مشيتيني في سكه عمري ما كنت اتوقع ان انا امشيها وخليتيني لاول مره استسلم للشيطان وده بسببك زنك كل شويه وتغيري الحوار بعد ما كنت فاكرك عاوزه فتوى ونيته اساعدك.. ومعلش بقى اللي تعمل كده تعمل اكتر من كده واحتمال ما يكونش انا اول راجل في حياتك تكلميه.. فلازم تفهمي ساعه الجواز الراجل مش بيختار الا واحده تكون شريفه وتصونه وبس.
غرام وقفت مصدومه من كلامه اللي حسسها بالاهانه واتهام بشع، لكن هي فعلا اللي رخصت نفسها لواحد ما يستاهلش ووثقت فيه،
فردت وقالت بغضب ودموع: يا ريتني ما سالتك عملت كده ليه عشان وضحتلي قد ايه انك شخص زباله وواطي.. وعامل فيها الشيخ متدين وانت ما تعرفش اي حاجه عن دينك.. مش انا اللي شديتك للطريق ده انت اللي رحت بمزاجك والدليل كان ممكن لما اسالك عن اي حاجه تخصك تقفل في وشي وتقولي مش فاضي او تفهمني ان ده حرام وغلط عشان انت الشيخ وانا اللي جاي اتعلم منك.. لكنك كنت بتجاريني..
عارف ليه لانك كنت محتاج ده ولما صدقت تطلع الكبت اللي جواك وتستسلم لشيطانك.. وزي ما انا غلطت انت كمان غلطت ويا ريتني عندي الجراءه اروح اقول لاختي وبنت عمي انك ما تستاهلهاش وان اللي يكلم برده واحده الله اعلم تاريخه القديم في ايه تاني يا شيخ يوسف يا بتاع ربنا.
يوسف وقف ساكت قدامها وما كانش قادر ينطق بي ولا كلمه لان كلامها فعلا حسسه قد ايه باخطائه قدام نفسه
اللي ما كانش قادر يعترف بيها ان الغلط فعلا جاي منه ومنها لكن هو حملها هي بس وعلى طول حكم عليها انها شخصيه وحشه..
لكن برده رجع يفكر في كلام صاحبه انه لسه ما يعرفهاش كويس ومش واثق فيها وما كانش ينفع يرتبط بواحده كان بيكلمها على النت .
**
غرام بدات تتعامل مع يوسف برسميه شديده وحتى لما كان يجي عندهم البيت.. تشغل نفسها في اي حاجه عشان ما تشوفهوش، ولما كانت عينهم بتيجي في عيون بعض كانت بتبصله بكل قرف وهو يتوتر ويبعد عيونه عنها..
حتى لما كانت هاجر تقولها: عشان خاطري يا غرام انتي ما زهقتيش من القعده هنا تعالي اخرجي معايا انا ويوسف تتبسطي شويه..
غرام: معلش يا هاجر عندي مذاكره كتير ومش عاوزه اكون ضيفه تقيله عليكم.. روحوا انتم اتبسطوا براحتكم دي ايامكم.
هاجر: طب ما احنا برده هنتبسط وانتي معانا ما تقولها حاجه يا يوسف.. ما انت كمان هتجيب اخواتك فليه ما تجيش معانا. طالما الخروجه كلها هتكون عائليه.
يوسف: آه طبعا تشرفينا يا انسه غرام لو جيتي معانا.
غرام تجاهلت كلامه وفضلت مصممه على قرارها، ومع الوقت بدات تحاول تقوي نفسها ومشاعرها بانها تقرب من ربنا وتدعي في صلاتها: يا رب خروجه من قلبي طالما طلع الشخص اللي ما يستاهلنيش وانا مش عايزه ابقى خاينه لصاحبتي.. ولا ابقى خاينه ليك و عارفه ان انا غلطت لما كلمته من الأول.. وانت اكتر واحد عارف انه كان اول شاب اتجرا و اعمل كده معاه، لكن انا ندمت وعاوزه اتوب واتعلمت الدرس.. يا رب سامحني واختار الصالح ليا.
**
يوسف بتعجب: هي مين البنت المنتقبه اللي عدت من شويه قدامنا دي يا هاجر هو انتي مش قلتي ما لكيش اخوات ولا عندكم ضيوف وانا ما اعرفش.
هاجر ضحكت وقالت: دي غرام اصلها ربنا هدها ولبست النقاب انا مبسوطه قوي انها اتغيرت للدرجه دي وقربت من ربنا قوي.. مع انها زمان كانت حاجه غير لكن الحمد لله قدرت تسيطر على شيطانها.. وربنا بقى يكرمها بالزوج الصالحه زي ما هي بتتمنى اللي يعينها عشان يدخلوا الجنه سوا
يوسف بان عليه الضيق الشديد وما كانش فاهم ليه بيحس الاحساس ده كل ما يشوفها.. وكان برده غصب عنه بيحس بشويه ندم انه سابها عشان كان شاكك في اخلاقها بدون دليل
لكن اهي قدام عينيا بتتغير.. وفجاه سرح لو كانت هي دلوقتي خطيبته وشايف التغير ده مش كان هيفرح بيه قوي لكن رجع على ارض الواقع اول ما سمع صوت هاجر جنبه.
**
مرت شهور وكان خلاص اتحدت فرح هاجر ويوسف وابتدت غرام غصب عنها تحاول تساعدها وهي بتضغط على قلبها بكل قسوه وجبروت لانها بقيت متاكده انه ما يستاهلش تفكر فيه اصلا..
وبدات تساعد بنت عمها في ترتيبات جوازها اللي كانت متخيله انها هتكون مكانها من البدايه.
هاجر مسكت فستان وقالت باعجاب: استنى ده شكله حلو قوي يا غرام متهيالي احلى من اللي انا اخترته شوفي كده.. ما تدخلي تلبسي وتقيسي عليكي عشان اشوف احنا كده كده مقاسنا واحد.
غرام: ما تقيسيه انتي يا هاجر مش انتي العروسه.. و فعلا شكله حلو روحي وانا هستناكي.
هاجر: ما انا بصراحه زهقت من كتر ما عماله اقلع واقيس يجي 10 فساتين ومحتاره عشان كلهم حلوين.. قيسي ده وانا هشوفه عليكي عشان خاطري بقى ممكن يطلع فال حلو وعدلك يجيلك بعد ما تلبسيه.
غرام استسلمت لاصرارها بعد ما كانت رافضه عشان تمشي بسرعه وراحت تقيسه جوه وبعد شويه ناديت هاجر وبدات تفك شعرها وتقولها: فكي شعرك كده عشان اشوفه اصل انا هعمل فرح بالطريقه الاسلاميه وهنكون ستات بس عشان كده عادي لو جبته مفتوح شويه.. وكمان بفكر اعمل شعري هيبقى حلو عليا زي ما هو هياكل حته عليكي مش كده..
غرام أبتسمت وقالت بحب: ما تقوليش كده يا حبيبتي انتي اللي بتحلي الحاجه اكتر مش هي اللي بتحليكي.. وهتبقي عروسه زي القمر انا متاكده من ده.
هاجر ابتسمت على كلامها وحضنتها وفجاه سمعه صوت وراهم واتفاجئوا بيوسف ومعاه واحد صاحبه والاثنين وقفوا متنحين من جمال غرام اللي فجاه من صدمتها جريت على جوه تستخبي.
يعقوب شد يوسف على بره اللي كان وقف متنح فراح شد الستاره صاحبه وهو بيقول باعتذار: احنا اسفين والله اصل ما لقيناش حد بره وماكناش عارفين انتم فين فدخلنا واعتقدنا قاعدين هنا عادي.. وانا يعقوب صديق يوسف كنت جاي معاه عشان معايا عربيه نقل عشان بعد كده نروح نجيب عفشك يا عروسه بسرعه بالمره.. ويا ريت تعتذري لقريبتك علي سوء التفاهم ده.
غرام طلعت بعد ما لبست النقاب وقالت وهي محرجه جدا: حصل خير يلا بينا عشان ما نتاخرش.
**
غرام بصدمة: يعقوب مين اللي عاوز يتجوزني وهو شافني فين اصلا.. آه مش ده اللي شافني وانا بقيس الفستان اللي انتي بلتيني بيه الله يسامحك يا هاجر انا ما كنتش عاوزه من البدايه .. اصلا الموقف محرج اروح اتجوزه.
هاجر: ما هو شكله كده من ساعه ما شافك وانتي مطيره عقله، بس شكله شاب كويس ومحترم بابا سال عليه كتير وكله بيشكر فيه.. عشان خاطري واقفه عشان نتجوز احنا الاتنين بقى مع بعض زي ما كنا بنتمنى.
غرام سكتت وهي محتاره وفكرت بينها وبين نفسها انها اكيد هيجيلها وقت وتتجوز فعلا، ويمكن ده يساعدها على نسيان يوسف عشان كده ردت بتردد: خلاص قولي لوالدك ان انا هصلي صلاه استخاره الاول واللي في الخير يقدمه ربنا
**
يوسف بغضب شديد: هو انتي ليه ما قلتليش ان غرام بنت عمك هتتجوز صاحب عمري يعقوب حتى الندل التاني مش يقولي يعني اعرف كده بالصدفه ويقولي حبيت اعملها لك مفاجاه.. للدرجه دي مليش لازمه في حياتكم.
هاجر اتصدمت من رده فعله المبالغه وقالت بدهشة: هو انت مكبر الموضوع ليه يا يوسف اكيد صاحبك ما جتش الفرصه المناسبه عشان يقولك ولا حب يعملها لك مفاجاه فعلا مش فاهمه الموضوع مضايقك في ايه.
يوسف: لازم يضايقني يا هانم عشان هو من ساعه ما شاف غرام بنت عمك وهي لابسه فستان الفرح ومن غير نقاب ولا حجاب وعمال يسالني عليها بس انا ما كنتش فاهم انه عينه منها.. عشان كنت قلعتها له من مكانها وبنت عمك دي ازاي توافق على واحد بصلها نظره مش كويسه ما هو اكيد عاوز يتجوزها بعد ما حليت في عينه وشافها قد ايه جميله وحلوه
هاجر فضلت ساكته وبعد كده قالتله: ده واضح مش صاحبك بس اللي خد باله من بنت عمي اللي كانت من غير نقاب وحجاب بفستان الفرح..
يوسف اتوتر بشده وكانه نسي نفسه وحاول يفهمها ان ما كانش قصده كده لكن هاجر ما اديتهوش فرصه ومشيت وسابته.
بعد فتره غرام اتفاجئت ان هاجر قالتلها هتاجل شويه الفرح بعد ما حددت فرحها هي ويعقوب وبالفعل هم اللي اتجوزوا الاول..
**
يعقوب شال النقاب من على وشها وقال بابتسامه عريضه بعد ما دخلوا البيت: اخيرا نورتي بيتي زي ما كنت بتمنى اول مره عينيا طلت في عيونك وانتي بفستان الفرح .
غرام وشها احمر من الكسوف والحرج وقالت:
يعني انا اللي خمنته صح وانت عيونك كانت مركزه معايا في اليوم ده.
يعقوب: غصب عني والله يا غرام ما كانتش مترتبه لكن والله العظيم لحقيت نفسي بسرعه لكن ما اعرفش ان النظره دي هتفضل محوطاني في اي مكان بروحه حتى وانا نايم في احلامي.. وبعدها عرفت ان انا وقعت اسيل لغرامك وبدون تفكير دورت على عنوانك ورحت طلبتك من اهلك.. وكنت خايفه ترفضيني ساعتها وما كنتش هعرف اعمل ايه وانتي محوطاني حتى في منامي.
غرام ابتسمت قوي بسعاده على كلامه وقالت بحرج: للدرجه دي يعني بتحبني من اول نظره.
يعقوب قرب منها فجاه وشالها وقال بخبث: ومن اول طله وحياتك تعالي بقى عشان اعرفك وقعت في غرامك في ايه تاني يا غرام قلبي.
غرام عاشت احلى لحظات في حياتها في اليوم ده قد ايه يعقوب كان شخص حنين وصبور معاها، وهنا عرفت ان يوسف فعلا خرج من قلبها من زمان وشكله كده قريب يعقوب هيحل مكانه وهي كانت راضيه رضا تمام عن كده.
تاني يوم صحيت واتفاجئت انه مش جنبها لكن كان سايبلها صينيه الفطار جنبها على السرير وكمان ورقه كاتب فيها: احلى صباح على احلى غرام قلبي معلش كان لازم انزل عشان اصلي في الجامع زي ما متعود وانتي اصحي براحتك والفطر جاهز جنبك.. انا عارفه ان انا تعبتك معايا امبارح لكن بعد كده هنصلي جماعه مع بعض ذي ما قلتيلي اول يوم جوازنا امبارح.
غرام فرحه قوي بكلامه وكانت لسه هتقوم اتفاجئه برساله على تليفونها من هاجر بتسالها: رد عليا بسرعه جوزك فوق.
غرام ردت عليها بتعجب: لا هو في حاجه.
غرام اتفاجئت بعد دقيقتين بالظبط الباب بيخبطوا عليها، ولما رحت تبص من العين السحريه فتحت الباب بسرعه وقالت بقلق: هاجر هو في ايه مالك؟ انتي كويسه ماما حصلها حاجه بعد الشر ولا عمي .
هاجر بصيتلها جامد وبعد كده قالتلها بدموع:
قلبك عليا قوي طب ليه ما قلتليش ان يوسف كان معجب بيكي وكان بينكم حاجه قبل ما يجي يتقدملي عشان بس شك في سلوكك. فاختارني كوبري لي عشان ينساكي وما يتحطش في حرج قدام والدته ولا قدام نفسه.
غرام بصدمه: عرفتي منين.
هاجر: منه! من ساعه ما اتخطبتي لي يعقوب وهو حاله متغير معايا وراكبه ميت عفريت كل ما جوازكم يتقدم ،قعدت اضغط عليه لحد ما اعترفلي، وقالها بكل صراحه انا ندمت ان انا اتجوزتك ولو الزمن رجع بيا كنت خطبت غرام اللي وقعت في غرامها مرتين مره وهي بتكلمني من غير ما اشوفها ومره ثانيه لما شفتها.. لكن للاسف هي اتجوزت غيري وضاعت مني.. عارفه بعد كل ده لما طلبت منه الطلاق طلقني بمنتهى السهوله.. شكله بيحبك قوي.
غرام بلعت ريقها وقالت بدموع: انا والله العظيم كنت هقولك وهقول كمان ليعقوب بس فكرت بيني وبين نفسي ان ما فيش موضوع اصلا عشان احكيه دي كلها كان كلام بس وما فيش حاجه حصلت.. وبعدين شفتك فرحانه ما رضيتش اكسر فرحتك والله العظيم ما كانت نيتي اي حاجه وحشه.
هاجر: يا ريتك كنتي قلتلي بدل ما سبتيني اتعلق بيه اكتر، كنت هتوجع ساعتها لكن على الاقل ما كنتش هحس بالوجع ده وانه سيبني بالطريقه دي.
بالوقت ده الاتنين سمعوا صوت وراهم واتفاجئوا بيعقوب اللي كان بيبص ناحيه غرام جامد، اللي اتوترت وحسيت انه سمع كلام هاجر اللي انسحبت بهدوء وسابتهم.
**
يعقوب بصلها بصدمه بعد ما حكيتله كل حاجه وقال بغضب: يعني كان في حاجه بينك وبين صاحبي ومستنيه ايه عشان تقوليلي؟ انا مش قادره اصدقك معقول كنت مخدوع فيكي كده انتي ما خنتيش ثقه بنت عمك وبس خنتيني انا كمان.
غرام: لا ماخنتكش وما تقولش الكلمه القاسيه دي تاني، كلكم محملين الغلط ليه وانا ما كنتش عارفه اعمل ايه ولا اتصرف ازاي وانا لوحدي.. في موقف صعب وعارفه ان انا غلطانه عشان كده بعدت ودست على قلبي عشان ما اكسرش فرحه بنت عمي.
يعقوب: يعني لسه بتحبيه. بعد كل اللي عمله معاكي
غرام: والله العظيم ابدا واتاكدت من ده لما قربت مني انت واديتلك فرصه، انا مش وحشه قوي كده.. لكني قلت ربنا ساترني ليه افضح روحي واعمل موضوع من ما فيش.. و توقعت انه بيكرهني وخلاص عمره ما يقول حاجه زي كده لهاجر وهو بيحبها بجد.. لان المره الوحيده اللي شفته اصلا كان جاي عشان يخطبها هي.. بس انا بقيت متاكده 100% انه ما يستاهلهاش ولا يستاهلني والجو اللي هو رسمه على نفسه ده ولا شيخ ولا حاجه.. لان ما فيش واحد يعرف ربنا ويعمل كده.
يعقوب بصلها وهو ساكت وهي قربت منه مسكت ايده وقالت برجاء: يعقوب انت المفروض تحسبني وانا على ذمتك وده حصل قبل ما تشوفني.. وانا والله العظيم قفلي على نفسي وعمري ما هفكر اخونك ولو كنت كده ما كنت حاولت اقرب منه وهو خاطب بنت عمي.. يعقوب خلاص لو عاوز تنفصل عني براحتك بس ما كنتش اعرف انك انت كمان ولا بتحبني ولا حاجه.
يعقوب بحده: اوعي ثاني مره تقارنيني بس انا دلوقتي فهمت هو قلب عليا ليه من غير ما اعمله حاجه.. اعملي حسابك ما فيش اي
صدفه هتجمعكم حتى لو حصل تبعدي عنه نهاء وما لكيش اي كلام معاه والحمد لله بنت عمك كمان اتطلقت منه.. عشان لو لمحته في اي حته مش هقدر اسيطر على اعصابي.. من كتر غيرتي عليكي.
غرام اترسمت على وشها ابتسامه سعيده لما فهمت من كلامه أنه خلاص هيكمل معاها وهينسى الموضوع: يعقوب انا بحبك قوي وفهمت حكمه ربنا متاخر لما وعدني بواحد زيك.
يعقوب ابتسم اخيرا وقال: انا كمان بحبك يا غرام..
**
بعد فتره غرام حاولت تشرح موقفها لهاجر وسامحتها مع الوقت لما فكرت بينها وبين نفسها ولقيت ان غرام كل اللي عملته انها بعدت وسابته لها ولا حاولت توقعه لصالحها ولا تاخده منها والغلط كان من ناحيه يوسف وبس في علاقتها دي..
عشان كده نسيت اللي حصل وفتحت صفحه جديده معاها.
و يوسف كان لسه عايش في ندمه علي غرام، بالذات لما يعقوب جي يزعقله يبعد عن حياتهم ودي كانت اختياراته ومحدش غصبه عليها.. فوقتها فعلا حس بالحزن وقرري ينسحب من حياتهم ويسافر بعيد.
أما يعقوب وغرام كملوا حياتهم مع بعض في سعاده وهم في انتظار مولودهم الاول.
النهايه.
اللي بيحب الروايات الكامله والحصريه من هنا 👇 ❤️ 👇
لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم
❤️💙🌹🌺❤️💙🌹🌹💙❤️🌺🌹💙❤️🌺🌹💙❤️
تعليقات
إرسال تعليق