دواء الروح البارت العاشر والحادى عشر والثاني عشر بقلم الكاتبه أماني سيد حصريه وجديده
خير يا زينب مش عيب تدخلى شقه مش بتاعتك
انتى قلبك قوى بقى ، هو انتى ناسيه انك مضيتى بيع وشرا
ـ ايه ده أخص عليا هو انا مقولتلكيش ، معلش نسيت اقولك
اصلكم بغبائكم سبتوا مستشفيات البلد كلها وجيتوا المستشفى اللى بشتغل فيها عشان تتابعوا الحمل وسبحان الله يشاء القدر إن ابنك يعمل حادثة ويجيى برضوا المستشفى اللى انا بشتغل فيها وسبحان الله يمضى فى وسط ورق دخول المستشفى على ورق بيع الشقه زى ما أنا مامضيت بالظبطت فى وسط ورق القايمه سبحان الله
ما أخذ بالقوة لا يسترد إلا بالقوه وانا بقولك ما أخذ بالخديعه لا يسترد إلا بالخديعه
قلب وش زينب وهرب من الد*م بقت واقفه مش عارفه تروح فين وتيجى فين وتل*عن داخلها ابنها ورنا هى كتير حذرتهم لكن هما السبب فى اللى وصلولوا اديهم دلوقتي خسروا كل حاجه الشقه والعربيه والفلزس اتصرف حتى الشقه الايجار سابتها وكانت قاعده مع ابنها فى شقه نداء
ـ طيب يا نداء انا ست كبيره أد امك اروح فين دلوقتي وفين هدومى
 |
ـ ماليش دعوه تروحى فين تيجى منين مش مشكلتى وهدومك تحت عارفه اكياس الزبالة اللى فى مدخل العماره دى هدومكم ياريت تاخديها وتمشى عشان مدخل العماره ينضف ودخلت وقفلت الباب فى وشها
وقفت زينب محتاره مش عارفه تعمل ايه ومش معاها أى دليل على بيع الشقه لأن اكيد نداء اخدت الورق اللى عايزاه قبل ما ترمى هدومهم واكيد شافت الورق واخدته وضيعت أى دليل يثبت ملكيتنا ،اه يا نداء ماطلعتيش سهله
اتصلت زينب بصاحب العماره
ـ مساء الخير يا حاج محمد
ـ وعليكم السلام يا ست زينب خير
ـ بقولك ايه يا حاج انا كنت عايزه ارجع شقتى تانى
ـ شقتك انى دى
ـ اللى كنت مأجراها منك
ـ اه اسمها شقتى اللى اجرتها امال شقه الدكتورة نداء اللى اشترتيها منها زى ماقولتى فين
ـ مارتحتش فيها فرجعتها تانى انت عارف يا حاج محدش بيرتاح مع مرات ابنه عشان كده قولت ارجع الشقه تانى زهما ياخدوا فلوسهم يجبولهم شقه اصغر وكل واحد يعيش لواحده
ـ كان على عينى يا ست زينب بس انا أجرت الشقه خلاص
ـ ازاى الكلام ده يا حاج
ـ يعنى ايه ازاى شقتى وانا حر فيها أكيد مش هركنها يعنى
ـ طيب يا حاج ماعندكش شقه تانيه ايجار
ـ لا معنديش يا ست زينب ربنا يوفقك وتلاقى فى مكان تانى وقفل التليفون معاها
نزلت زينب مش عارفه تروح فين ولا تيجى منين بصت فى الشنط لقت نداء لمت الهدوم بعشوائية ورمتها فى الشنط فضلت تظور لحد مالقت عبايه وطقم غيار ليها خدتهم وراحت المستشفى عند رنا لقت رنا قاعده ومعاها أمها وابوها دخلت رمت السلام وقاعدت جنبهم ومثلت الحزن على رنا
ـ حمد الله على السلامه يا حبيبتي انا من ساعه ما سمعت الخبر والدمعه مافرقتش عينى حفيدى حبيبي راح فى لحظه كده ، يلا نصيب وأهم حاجه إنك تقومينا بالسلامة
بصولها الجميع ومحدش علق ، راحت سابتهم ودخلت المرحاض عشان تغير هدومها وتاخد شاور وخرجت لقتنم بصولها باستغراب
ـ وياترى بقى ابنك فين ست زينب
ـ لسه فى القسم حق رنا هو مش هيسيبه
ـ وياترا بقى هيعمل إيه والدكتورة اللى عملت العمليه وزملتها كل واحدة طلعت على النت وحكت اللى حصل في العمليه وظهروا الورق والتقرير الطبى وانا بنفسى اخدت الورق ووديته لاكتر من دكتور وأكد إن الرحم كان لازم يتشال
سكتت زينب ومش عارفه ترد تقول ايه ولا تدافع عن ابنها إزاى بس من جواها عايزه اهلها يطلبوا الطلاق ويتنازلوا عن حقوقهم لانها شايفه انها مبقتش تنفع ابنها لانها مابتخلفش
فاقت من سرحانها على صوت ام رنا
ـ إلا صحيح يا ست زينب انتى جايه تغيرى هنا
ـ منا كنت مستعجله وعايزه اطمن عليها وجيت على ملا وشى يادوبك شديت اللى جه قدامى عشان الحق اطمن عليها
ـ طيب بقولك ايه الدكتورة كتبتلها خروج دلوقتي فهى وامها هيجوا يقعدوا فى الشقه معاكم كام يوم
قعدت زينب مكانها فده اللى كانت خايفه منه وقررت انها تقولهم الحقيقة
ـ بصراحه يا حج نداء استغلت الوضع اللى كانت فيه رنا وحزن طه ومضته على ورق بيع الشقه من غير مياخد باله ورمت حاجتنا كلها فى الشارع
ـ يعمى ايه
ـ يعندى كل هدومنا فى مدخل العماره دلوقتي فى كياس وانا مستنيه طه يخرج وندور على شقه نقعد فيها ونفكر بعد كده هنعمل ايه
بصولها كلهم بصدمه وخصوصاً رنا
ـ يعنى ايه اللى بتقوليه ده يعنى كل حاجه راحت ابنى والعربيه والشقه والعفش وكل حاجه لا لا مستحيل
ـ اهدى يا بنتى أهدى
ـ محدش يقولى اهدى انا خلاص عايزه اطلق مش عايزه اقعد معاهم ده انا مستحملاكى بالعافيه وبقول بكره تم*وت وتغور فى داهية وكل حاجه تبقى بتاعتى ودلوقتي انتى بتقولى كل حاجه راحت
اتكلمت تمها بتهديها
ـ اهدى يا رنا تكلقى تروحى فين وانتى خلاص كده وهما السبب فى اللى انتى فيه
بصى يا ام طه انتى وابنك السبب فى وضع بنتى واحنا معندناش طلاق مين هيتجوزها وهى شايله الرحم انا هاخد بنتى تقعد عندنا يومين لحد مابنك يخرج من القسم ويجيى ياخدها ولو ده محصلش هنرفه عليكم قواضى ونبهدل الدنيا واعتقد أن اللى فيكم مكفيكم
ـ طيب وانا هروح فين
ـ مالناش دعوه اسالى ابنك احنا شقتنا صغيره وعندنا عيال غيرها صغيرين والشقه يادوب على ادنا احنا أصلا كنا ما صدقنا جوزناها عشان المكان يفضى فمش هنستحملك معاها انتى كمان .
قامت رنا ومشيت مع امها وزينب خرجت راحت القسم لابنها
*******&*******&*******
عن سليمان كان بيكلم نداء يطمن عليها وحكتله نداء اللى حصل من زينب وشكلها
ـ تصدقى نفسى اشوف شكلها كان عامل إزاى
ـ وشها جاب ميت لون
ـ نداء انا خايف عليكى اوى ابه رايك تسيبى الشقه وترجعى الشقه اللى كنتى مأجراها لحد ماتخلصى الموضوع ده
ـ لا مش هيعملوا حاجه عشان هيخافوا من المحضر .
ـ طيب وانا هفضل فى قلق كتير كده
ـ وانت تقلق ليه ؟
ـ يعنى مش عارفه
ـ لا مش عارفه
ـ صحيح يفيد بإيه البوح والبعيده لوح
ـ نعم طيب اقفل بقى
ـ لا مش هقفل انتى فاهمه وعارفه وأكيد حاسه بمشاعرى ناحيتك يا نداء
ـ عارفه بس
ـ انا فاهم انتى خايفه من ايه واللى مريتى بيه مكنش سهل بس دلوقتي انتى بقيتى حاجه تانيه وانا موافق امضيلك على كل الضمانات اللى إنتى عايزاها وعلى فكره مش هزعل منك لا خالص ، انا بعمل كده عشان مقدر موقفك واللى مريتى بيه وعشان عارف انى بحبك وهحافظ عليكى
ـ طيب سيبنى أفكر
ـ حاضر فكرى وصلى وانا واثق إن اكيد ربنا هيهديكى للصواب
ـ منا فكرت قبل كده وصليت وبرضه خسرت كل حاجه
ـ لا يا نداء انتى مخسرتيش وربنا كان ليه حكمه فى كده انك تفوقى لنفسك وتكسبى نفسك وانك تكسبى نفسك ده اهم مكسب انتى اللى حصلك ده كان خير عشان تفوقى وتقدرى قيمه نفسك
ـ كان قلم قوى بس الحمد لله
ـ انتى ناويه على ايه مع طه وفتحى
ـ هرفع قضية تعويض عشان سمعتى اللى كانوا بيشوهوها
ـ وطه هيقدر يدفع
ـ يتصرف
ـ عموما أنا معاكى فى كل اللى هتعمليه
ـ شكرا يا سليمان
ـ على ايه
ـ حاجات كتير انك صدقتنى ووقفت جمبى رغم إن معرفتك بيه مش قويه اوى وانك جبتلى محامى وبتحاول تقوى ثقتى فى نفسى
ـ عشان انا شايفك قويه وتستاهلى الحب وواثق إن عمرك ما هتعملى حاجه غلط عن قصد
فاكره لما عملتى العمليه لاخويا وكنت بتخانق معاكى
ـ اه
ـ وقتها ماما وقعت انا قلت إنك هتسيبيها عشان تعا*قبينى لكن العكس رغم انك كنتى لسه خارجه من عمليه إلا انك ساعدتيها ووقفتى جمبها
ـ ده شغلى
ـ كان ممكن دكتور غيرك يعمله بس انتى اللى ساعدتيها وكلامى وزعيقى مأثرش فيكى
ابتسمت نداء من كلام سليمان وقررت تدى نفسها فرصه وترمى الماضى ومش هتحط مقارنات بس برضو لازم تفضل حريصه فى تعاملتها الحرص واجب
*******&**********
خرج سليمان من الاوضه بتاعته عشان يتغدى مع مامته وسليم وكانت الابتسامه على وشه
ـ خير ايه سر الابتسامه اللى على وشك دى من الودن للودن
ـ أصلى بصراحه كنت كنت بفكر اتجوز
ـ يا سيدى يا سيدى وطبعاً اللى عايز تتجوزها اول حرف من إسمها نداء صح
ضحك سليم وسليمان على كلام امهم اللى دايما قفشاهم
ـ أه هى بس مستنى انها توافق
ـ هتوافق .
ـ ده ايه الثقه دى
ـ انا ماما يلا ، هى بس مستنيه تخلص كل مشاكلها عشان تعرف تفكر اديها وقتها بجمله التأخير اصبر عليها وهى هتوافق
ثم بصت لسليم
ـ وانت يا عين امك
ـ انا ايه
ـ مش ناوى تفرحنى بقى
ـ واسيبك لواحدك ماتجيش يا ست الكل
ـ أنا عايزه اعيش لواحدى لما اشتكيلك ابقى اتكلم
ـ حاضر يا ماما همشى ادور على عروسه وادلل على النت يمكن الاقى
ـ لا سيبلى انا الموضوع ده انا هدورلك انا عارفه ذوقك
بصلها سليم باندهاش من اصرارها المفاجئ انها تجوزه
ـ يا ماما مش هفكر فى ارتباط انا قبل سنه لما اطمن إن الورم مش هيترد حرام اظلم بنات الناس معايا افرضى بعد ما علقت واحده بيا الروم اترد تانى
ـ وافرض كنت سليم وبعد ما اتجوزت وخلفت جالك ، الحياه مش بتتقاس كده يا سليم
ـ ماما عندها حق يا سليم لازم تعيش حياتك وطول مانت متابع بإذن الله هيكون خير وانا كمان هتابع كل فتره معاك المفروض أصلا الناس السليمه كل فتره تعمل على نفسها شيك اب عشان تتأكد انها سليمه
بصلهم سليم واقتنع بكلامهم هو كان بيلجم نفسه انه يحب او يقرب من حد بسبب خوفه من ان المرض يرجع لكن لازم اللى هيرتبط بيها تعرف وهى تقرر
ـ خلاص يا ماما خير ووعد اول مالاقى بنت الحلال هبلغك
*******&*********
فى المستشفى كانت نداء فى الكافتيريا مع نيفين بيتكلموا وبيضحكوا
ـ تصدقى يا نداء انا هخاف منك بعد كده
ـ ليه بس
ـ انتى مش عارفه عملتى ايه ده انا صدقت انك عملتى العمليه وانك فعلاً وديتى نفسك في داهيه وعائشه هى كمان ساكته وماتكلمتش وسيبىنى اتخانق معاها واقولها مكنتيش تسمحيلها
ـ بصراحه طلعت جدعه جداً هى ودكتور رفيق وانتى كنتى اكتر من أخت ليه
ـ احنا بس
ـ قصدك ايه
ـ يا نداء
ابتسمت نداء على تلميح نيفين لكن الابتسامه اتشالت اول ما ظهر قدامها فتحى بوشه اللى عليه كل امارات الغض*ب
ـ لو سمحت يا نظاء عايز اكلمك فى موضوع مهم
ـ أسمى دكتوره نداء احنا مش صحاب زلا بينا أى حاجة ، ثانيا بقى المحاميين بتوعنا يتكلموا مع بعض
ـ لا انا عايز اكلمك واحل الموضوع بشكل ودى زسيبك من موضوع التعويضات ده
ـ أنا اسفه وهفضل ماشيه فى القضيه وهاخد التعويض عشان أنت وامثالك تفكروا ألف مره قبل ماتفكرا تجيبوا فى سمعه حد وتشوهوها عشان مصالحكم الشخصيه
ـ ياترى نداء فعلاً هتاخد التعويضات ؟؟
ـ هل فتحى وطه هيدفعوا ؟؟
البارت الحادى عشر ♥️ دواء الروح ♥️
استكمل فتحى كلامه
ـ وانتى هتستفادى ايه من القضيه اللى انتى رفعاها دى
ـ هستفاد تعويض كبير وانت هتقعدلك حبه فى البيت من غير الشغل عشان تتأدب وتبطل تدخل الشغل في مشاكل شخصية وتنشر إشاعات من غير دليل تانى
ـ طيب ايه رأيك بدل ما المحاكم تطول والمحاكم سكتها طويله نخلص الموضوع ودى واللى إنتى عايزاه هنفذه
ـ ماضمنكش
ـ هيكون فى وجود محامى ونمضى على عقد
بصت نداء لنيفين اللى قاعده قدامها وهزت نادين راسها بنعم
ـ وافرض انت مقبلتش شروطى
ـ هقبلها بس خلينا نخلص الموضوع ده
ـ أولا تطلع لايف وتعتذر عن تشويه سمعتى ثانياً هتدفع تعويض ٢ مليون جنيه
ـ انتى بتستهبلى صح
ـ انا غلطانه انى بتكلم مع واحد زيك ، وجت تقوم تمشى
ـ كتير اوى يا التعويض يا إما الاعتذار
ـ لا الاتنين وهتمضى قدام المحامى وهتحيب الفلوس معاك
ـ يعنى ده فيلم انتى عاملاه من الاول بقى عشان تقلبينى فى قرشين
ـ ليه هو انا اللى قولتلك خلى حد ينقلك اخبارى ولا انا اللى دخلت نفسى فى اللى ماليش فيه وطلعت اشوه صوره غيرى شوف بقى انت عملت كام من ورايا ، وبعدين مانتولما تطلع لايف تانى تعتذر هتعملك قرشين حلوين برضوا
حس فتحى انها حطاه بين فكى الأسد هو فى كلا الأحوال هيدفع لكن لو قعد من الشغل والقضيه كمان ممكن ده يأثر بعد كده على شغله فى القناه
ـ خلاص موافق يا دكتوره بكره نروح للمحامى ونخلص الحوار ده
ـ تمام هبعتلك العنوان على الواتس أب
*****&********&******
عند زينب ملاقتش مكان تروحه راحت لابنها الحجز وبالصدفة ابنها كان خارج من القسم
ـ خير يا ماما روحتى لرنا اطمنتى عليها
ـ اه يابنى شوفت اللى حصلى واللى نداء عملته واللى أهل مراتك عاملوه فيه انا اتبهدلت خلاص على اخر عمرى بتبهدل يا طه وفضلت تعيط
ـ اهدى بس وقوليلى عملوا فيكى إيه
ـ نداء مضتك على بيع الشقه فى وسط ورق العمليه وراحت الشقه خدتها وركبت باب حديد ولمت حاجتنا كلها فى شنط زباله ورمتها فى مدخل العماره
ـ بنت ال*** والله لاروح اقت*لها وارتاح منها
ـ اوعى تعمل كده وتودى نفسك في داهيه متنساش انك ماضي محضر عدم تعرض ومش بس كده لا دى رافعه عليك قضيه تعويض كمان
ـ مش دى افكارك
ـ مكنتش اعرف إن كل ده هيحصل وانت لو مكنتش سمعت كلام مراتك وروحتلها المستشفى مكنش كل ده حصل
ـ بسببك انتى انا ارتبط بيها ودلوقتي هى عايزه كل حاجه وانا خلاص مبقاش معايا حاجه وهنقعد فى الشارع أهو
ـ الفلوس اللى اخدتها منها خلصت كلها
ـ معايا ١٠٠.٠٠٠ الف اللى انبقت من ٣٠٠.٠٠٠ الف
ـ طيب بص انا هروح ابيع حتتين الصيغه دول ونشوف شقه ايجار مفروش فى اى مكان نقعد فيها بدل قاعدتنا فى الشارع دى
ـ طيب رنا قاعده فين دلوقتي وليه ماروحتيش معاها
ـ ده أبوها وأمها بهدلونى يا بنى فضلوا يغسلوا فيه وقالولى اننا مش هنطلقها ولو فكرت تطلقها بعد ما شالت الرحم هيودوك فى داه*يه ومش بس كده قالولى هناخدها معانا يومين تكونوا جبتوا شقه ومارضيوش ياخدونى معاهم سايبنى ابات فى الشارع شفت اختيارك
ـ معلش تلايقهم زعلانين عشان اللى حصل لبنتهم يلا بينا ندور على شقه الاول عشان عايز استحمه مش قادر افضل كده وبعدين امل وبعدين اروح للى اسمها نداء دى اوصل لحل معاها عشان القضايا اللى رفعاها عليا عايز اخلص عشان ماترفدش من الشغل
قضوا اليوم كله طه وامه يدوروا على شقه لحد ما لقوا شقه غرفتين وصاله صغيره جداً وغاليه جداً بالنسبة لوضعها لكن قبلوا غصب عنهم لانها المتاحه حالياً وبعدها نزل طه جاب اكل واكل واخد شاور ونام
فى اليوم التالى راح طه شغله وقدم اعذار لغيابه وبعد الشغل راح لنداء المستشفى عشان يوصل معاها لحل ولقاها فى العمليات فضل قاعد أمام غرفه العمليات منتظرها ٣ ساعات وقتها كان سليمان جه عشان يقابلها ويتكلم معاها لأن موعد شغلها انتهى
شاف طه سليمان راح يتكلم معاهة
ـ مش أنت خطيب نداء ولا ده فيلم
ـ الافلام دى بتاعتك انت وبعدين أنت جاى هنا ليه يلا
ـ جاى عشان نحل الموضوع بدل القضايا وبهدله المحاكم
ـ ومين قالك أننا هنتبهدل فى محاكم احنا فى محاميين شاطرين عارفين شغلهم هما اللى هيعملوا الواجب
ـ طيب بدل ماندفع فلوس للمحاميين دول ويشتغلوا من ورانا نمشيها ودى
ـ لا
حاول طه يتمالك غض*به ويحاول انه ياخد سليمان فى صفه
ـ بص يا استاذ سليمان المفروض انكم تقدروا وضعى انا واحد ابنه م*ات ومراته شالت الرحم يعنى مش هينفع تحمل وتخلف تانى فمعذور فاللى عملته
خرجت نداء من غرفه العمليات وسمعت اخر جمله قالها
ـ ولما مضتنى على بيع البيت ومثلت عليا اننا نجيب شقه وندفع مقدم ونكمل تمنها قسط ونصبت عليا واخدت منى الفلوس كان غصب عنك كنت معذور برضوا
ـ مانتى رجعتى حقك
ـ لا لسه ال ٣٠٠.٠٠٠
ـ بس انا مش معايا المبلغ ده
ـ ومين قال انى عايزه المبلغ ده بس ، كده كده المحامين شغالين وحرام نقطع عيشهم انت بقى اتصرف وقوم محامى يقف قصاد المحامى بتاعى
ـ طيب بصى العربيه اتد*مرت ولو اتباعت مش هتجيب غير ملاليم وانا اتبقى معايا ١٠٠.٠٠٠ كنت جايب دهب لرنا ب ٥٠.٠٠٠ كل دول هجمع فلوسهم يعملوا ١٦٠.٠٠٠ خديهم
ـ والباقي انا عايزه ٥٠٠.٠٠٠
ـ كتير اوى اوى وقتها الحبس ارحم
ـ طيب لو اتنازلت عن حقى وطلبت ال ٣٠٠.٠٠٠ هتجيب الباقى إزاى
ـ كتير برضو
ـ خلاص يبقى الكلام مالوش لازمه
ـ يا نداء ارجوكى يترجاكى ترحمينى انا تقريبا عايش فى الشارع عايز ارتاح وتعبت من الأقسام ولو مدفعتش واتحبسن وقتها مش هتاخدى حاجه خالص لأنى مش معايا وحابسى مش هيفيدك ، خدى دلوقتي ال ١٦٠.٠٠٠ والباقي بعدين
ـ طيب بص يا طه هاخد ال ١٦٠.٠٠٠ والباقى هتمضى بيهم على نفسك وصلات أمانه وشيكات عند المحامى عشان ماتفكرش تهرب
ـ انا كده هعيش عمرى كله مديون
ـ ده اخر كلام ولو معملتش كده يبقى اتحبس بقى ووقتها حبسك هيريحنى
ـ خلاص موافق
ـ بكره تجيب الفلوس وتيجى عند المحامى
ـ خليها بعد بكره اكون عرفت ابيع العربيه والدهب
ـ بعد بكره ماشى لو اجلت يوم تانى نتقابل في المحكمه وماتجليش هنا تانى مره تانيه انت فاهم
ـ حاضر سابها ومشى وراح لرنا وقابلوا أهلها ويظهر على وشوشهم علامات الامتعاض
ـ مساء الخير رنا موجوده
ـ أه موجوده جبت شقه
ـ اه أجرت شقه وكل حاجه تمام وانا جاى اخدها ترجع بيتها
دخلت امها نادت عليها عشان تقابله
ـ ازيك يا رنا صحتك عامله ايه دلوقت
ـ زى مانت ما شايف كنت همو*وت لكن ربنا أراد انى اعيش وابنى يمو*ت ومش بس كده مش هينفع اخلف تانى
ـ ماتقلقيش يا رنا انا مش ناوى اسيبك وخلاص شيلت موضوع الخلفه ده من راسى وعايزك تيجى معايا
ـ وانت جبت شقه وفرشتها امته
ـ جبت شقه مفروشه لحد ما اظبط امورى وبإذن الله هجيب شقه يلا بينا نتكلم فى بيتنا
غمزتها امها انها تروح معاه وهى سمعت كلام أمها
ـ وصل طه ومعاه رنا وكانت زينب قاعده على كنبه قديمه متهالكه فى وسط الصاله دخلت رنا واتصدمت من شكل الشقه
ـ ايه ده هو انا هعيش هنا
ـ معلش يا رنا فتره مؤقته
بصت رنا للشقه بإحتقار ورافضه الوضع
ـ لا مش هقدر اتصرف مش هقدر اعيش هنا
اتكلمت زينب بتريقه على أسلوب رنا
ـ ايه ياختى مش عجباكى الشقه وشقه امك وابوكى اللى حلوه اوى
ـ بس انا عروسه وكنت عايشه فى شقه حلوه مره واحده اقعد فى شقه زى دى
ـ ظروف يا رنا وبكره تتعدل وزى ما عشتى معايا الحلوه اصبرى معايا لحد ماتتعدل
سكتت رنا مافيش بإديها حل تانى واهلها مش هينقبلوها لو راحتلهم تانى
ـ بقولك صحيح هاتى الدهب اللى كنت جايبهولك
ـ ليه
ـ هبيعه
ـ نعم مستحيل انت فاهم مستحيل
ـ لا هتجيبى يا رنا عشان هبيعه لأن نداء رافعه قضيه عليا وانا عايز اخلص الموضوع عشان افضى لشغلى ولما ربنا يفرجها هجبلك غيره
ـ انا مالى بكل ده مش هديك حاجه دهبى ده انت مالكش فيه حاجه أنت سامع
ـ لا ليا انا اللى جايبه ودلوقتي محتاجه وهاخده
ـ وانا بقى ابقى كسبت ايه من ورا ده كله يعنى كم ل حاجه هتروح لا استحالة على جثتى
ـ هاتيه بالذوق بدل ماخده بشكل يزعلك
ـ لا يعنى لا
هجم عليها طه وظل يض*ربها واخذ منها الدهب عنوه وجرحلها ايديها ووشها وبعدين نزل عشان يبيعه واخد العربية القديمه وداها لميكانيكى قرر يشتريها ويبعها كقطع غيار ودفعله ١٥ الف جنيه
تانى يوم كان باع الدهب والعربيه وسحب الفلوس وجمع ١٧٠,٠٠٠ الف اتصل بنداء واكد معاها معاد مع المحامى وساب ١٠,٠٠٠ فى البيت
******&*******&******
تانى يوم راحت نداء عشان تقابل فتحى عند المحامى لقت سليمان منتظرها بصتله بضحكه
ـ انا بقيت اشوفك اكتر مابشوف نفسى فى المرايه
ـ وأنتى فاكره أنى هسيبك لواحدك لازم يعرفوا إن معاكى راجل
ـ انت بتعمل كده ليه
ـ خطيبك بقى ولازم اقف جمبك
تنحت نداء من كلامه
ـ خطيب مين انا موافقتش لسه
ـ وانا مش هسيبك غير لما توافقى ويلا بقى عشان منتأخرش
راحوا الاتنين مكتب المحامى وكان فتحى فى انتظارهم ومعاه الفلوس ومعاه محامى خاص بيه
حاول فتحى إنه يفاوضها عن الاعتذار رفض سليمان ونداء وصمموا على موقفهم فضل فتحى يبصلهم بغل
ـ طيب لما انتى مرتبطة ماقولتيش ليه من الأول كان عاجبك اللى بعمله عشان اقربلك كان على هواكى صح
ـ مالكش دعوه بيها تانى اديك شوفت حصلك ايه انت هتنزل من هنا وتنسى إنك فى يوم عرفتها أنت فاهم
ـ وانت تطلع مين بقى
ـ خطيبها وبنجهز لفرحنا
انتهى المحاميين من الورق وقطعوا خناقهم
ـ الورق خلص والفلوس جاهزه اتفضلى يا دكتوره امضى انتى و استاذ فتحى عشان نخلص الموضوع وانا بكره هروح النيابه وانهى كل حاجه وهقولك تيجى امته تتنازلى عن القضية
ـ تمام
كلهم مضوا على الاوراق واخدت نداء الفلوس وخرجت من عند المحامى جت تحاسب المحامى رفض ياخد منها فلوس وبلغها إن سليمان دافع كل المصاريف بصتله وخرجوا سوا يتكموا فى مكان هادى
ـ ياترا نداء هتعمل ايه بالفلوس دى كلها ؟؟
ـ وطه هل هيتقبل الامر ولا هيحاول يلعب على نداء تانى ؟
ـ زينب هتسكت وتسيب رنا ولا هتطفشها ؟
البارت الثاني عشر
خرجت نداء مع سليمان وقاعدوا فى مكان هادى يتكلموا
ـ بقيتى من أصحاب الملايين يا نداء
ـ الفلوس دى مش ليه
ـ آمال هتعملى بيهم إيه
ـ الفلوس دى هتتقسم تلات اقسام اول قسم على دار الايتام والقسم التانى على دار المسنين والتالت بقى هحطه فى المستشفى عشان الحالات اللى محتاجة عمليات طارئه ومش معاها فلوس المستشفى تتكفل بيهم
ابتسم سليمان على طيبتها اللى معما حاولت تداريها بالبرود مش هتقدر تتخلى عنها
ـ طيب حلو اوى وانا معاكى وهاخدك بالعربيه اوصلك على كل الاماكن دى
طيب وفلوسك اللى هتاخديها من طه
ـ دى حقى هجبلى بيها عربيه بقى
ـ لا خليها معاكى والعربيه دى هديه خطوبتنا
بصتله نظاء بضحكه
ـ لا طبعا وبعدين انت بتتعامل ليه على إنك خطيبى انا لسه موافقتش على فكره
ـ هتوافقى على فكره
ـ أنت جايب الثقه دى منين
ـ قلبى من قلبى وبعدين انا لما بحب حاجه بحافظ عليها ومستحيل اسبها او أتخلى عنها
ضحكت نداء بخجل وافتكرت طه وافتكرت الفرق اللى بينه وبين طه سواء فى كلامهم وتمسكه بيها اهتمامه بيها وقتها عرفت الفرق بين الاهتمام اللى بجد وإنه يمثل الاهتمام
ـ سليمان لو انا وافقت وارتبط بيك أنت عارف ظروف شغلى والمواعيد هتقبل بيها
ـ أنا عارف إنك دكتوره شاطره ولو قولتلك سيبى شغلك يبقى بظلمك وبظلم ناس ممكن تنقذى حياتهم وعارف إن شغلك ده ممكن يخليكى تأثرى فى واجباتك المنزليه بس انا راضي واللى هتأثرى فيه انا هسد مكانك فيه وبعدين انا كمان مش ملاك انا اكيد هيكون عندى شغل وسفر وممكن ااثر فى البيت
سكتت نظاء فكلامه منطقى وهى مش أول ولا اخر دكتوره تتجوز
ـ طيب يلا بينا عشان منتأخرش
ـ يلا بينا ، انتى هتيجى بكره تانى عشان تقابلى طه
ـ اه
ـ هاجى معاكى
ـ ماتخفش عليا انت خاف عليه منى
ـ افرضى ضايقك
ـ مايقدرش هو عرف أنى معدش هسكتله
ـ تمام ولو حصل حاجه رنيلى هكون عندك فورا ولا اقولك هعدى عليكى عند المحامى اخدك اوصلك ماشى ووقتها هسمع موافقتك على جوازنا .
ـ مابتستسلمش أبدا
ـ أبدا أبدا
*********&*********
فى اليوم التالى راح طه عند المحامى وكان لابس كعادته ومهتم بنفسه وحالق وفضل مستنى نداء توصل
وصلت نداء مهتمش بيه ووجهت كلامها للمحامى اللى اكدلها إنه جهز كل الاوراق وبدأ طه يمضى على الورق واداها الفلوس اللى طلبتها انتهوا من الإجراءات وقامت نداء عشان تمشى وقفها طه
ـ نداء استنى عايزك فى موضوع
ـ اسمى دكتوره نداء وماتتخطاش حدودك مره تانيه
ـ طيب ينفع نتكلم مع بعض
ـ لا
ـ يا نداء انا ندمت لما طلقتك وحسيت بالفرق بس كانت عينى معميه بحب ربنا لانى فضلت سنين معاها لكن لما عاشرتها حسيتها اد ايه تافهه ومش بتبص للمستقبل زيك ، ايه رأيك نرجع ووعد منى اعوضك عن كل اللى فات صدقينى انا اتغيرت وبقيت واحد جديد وانتى كمان اكيد اتغيرتى وبقيتى أحلى ولو عايزانى اطلق رنا قدامك واردلك اعتبارك قدامها كمان انا موافق
بصتله نداء بزهول وفضلت تضحك على كلامه لدرجه إن عنيها دمعت من الضحك
ـ انت عب*يط صح ولا أهب*ل بص هو الأكيد إنك مش طبيعى ، هو انت ناسى انى مخطوبه لواحد ضفره برقبه ميه زيك ولو حتى مكنتش مرتبطه ممكن تفتكر للحظه واحده أنى ممكن اكرر الغلط مرتين وارتبط بواحد زيك عايز يعيش على قفايا ، بص الفرق اللى بينى وبينك واتكلم انا دكتوره كبيره مشهوره وانت ايه ها ، أنت ولا حاجه فاهم ولا حاجه ولو شوفتك قدامى مره تانيه يا طه هد*مرلك مستقبلك نهائى والفلوس تسلمها للمحامى مش ليه ولو فى مره اتأخرت صدقنى تانى يوم هتكون فى النيابه وسابته وجت تمشى لقت سليمان قدامها بيبصلها وهو بيضحك وفرحان بيها وبقوتها اول ما شافته نداء بصتله بفرحه وجريت عليه
ـ انا قولت إنك مش جاى
ـ وأنا اقدر يلا بينا واخدها سليمان وراحوا لمحل مجوهرات
ـ إيه ده
ـ هنختار شبكتك
ـ لا طبعا متفقناش على كده.
ـ مش لازم نتفق انا قررت اجيبك هسيبلك انتى قرار تشترى اللى عاجبك شوفتى انا ديمقراطي إزاى
ـ لا اقنعتنى ديمقراطي ديمقراطي يعنى
ـ شوفتى بقى يلا ندخل بدل مايفتكرونا حراميه
ـ استنى طيب فى حاجات ماتكلمناش فيها ومامتك واهلك
ـ كل حاجه هتكون حلوه طول مانتى معايا عيشى الحلو اللى فى الحياة واعملى اللى انتى عايزاه
دخلوا المحل واختارت نداء خاتم ودبله واسوره واكتفت بيهم لكن سليمان قرر يجبلها عقد بالاسوره بالخاتم بالحلق بتاعه هديه
سرحت نداء وغصب عنها عملت مقارنه بينه وبين طه اللى كان بينقلها ارخص دبله وأخف خاتم بحجه إنه عايز يوضب الشقه اللى تقريبا دفعت فيها ٣ اضعاف اللى دفعه وزينب اللى كانت منبهره برقه الخاتم والدبله عشان تقنعنى بيهم 😏
فاقت من شرودها على صوت سليمان
ـ مش عاجبينك تخبى اغيرهملك بحاجة تانيه
ـ لا بالعكس عحبونى اوى تعيش وتجيب
انتهوا من شرا الدهب وهما مروحين اتصلت هناء على سليمان وعرفت إن نظاء معاه واصرت انها تكلمها واداها سليمان التليفون
ـ ازيك يا دكتوره عامله ايه
ـ انا بخير حضرتك عامله ايه
ـ حضرتى تعبانه ومش بخير ومش هبقى كويسه غير لما اشوفك
ـ طيب خاسه بإيه قوليلى
ـ لا مش هبقى كويسه غير لما اشوفك واقولك بنفسى انا عامله غظا حلو أوى أوى انهارده هستنامى تيجى مع الواد اللى جمبك ده ونتغدى سوا
ـ طيب ينفع يوم تانى
ـ عايزه تسبينى تعبانه كده ليوم تانى
ـ ألف سلامة عليكى خلاص هاجى معاه مع السلامه
*******&******&*******
فى الجهه الاخرى وصل طه البيت لقى والدته قاعده فى الصاله ورنا بتجهز الغدا فى المطبخ
ـ سلام عليكم
ـ وعليكم السلام تعالى اقعد عايزاك فى موضوع مهم قبل رنا ماتخرج من المطبخ ، قولى الاول عملت ايه مع نداء
ـ أبدا حاولت ارجعها واصالحها لكن للأسف فقستنى
ـ طيب بص انهارده كنت فى السوق وقبلت الست صاحبه البيت وعرفت إن عندها بنت ارمله ومعاها عيل صغير يبقى ابنها وفى وسط الكلام عرفت انها نفسها تجوزها وتطمن عليها والبت كده نايملها على قرشين من ابوها وجوزها
ـ تانى يا ماما
ـ بص يا طه انا مش بقولك تعمل معاها زى نداء لا دى انت هتتجوزها بجد وتعيش معاها وتخلف منها عيل مانت مش هتعيش عمرك من غير خلفه ومافيش أمل حتى إن رنا تخلف لأنها شالت الرحم خلاص
ـ فانت بقى تضرب عصفورين بحجر واحد تتجوز بنت الست دى وتعيش معاها وتخلف منها وكل فتره تيجى هنا تزور رنا وتقعد معاها منها مطلقتهاش ومش ملزم بقايمه ولا مؤخر ومنها متجوز وتخلف وتعيش حياتك فى مكان احسن وانا بعد فتره كده اجى اعيش معاك فى شقتك مع مراتك الجديدة
ـ ورنا هتسكت
ـ ولو ماسكتتش مش هتقدر تعمل حاجه واهلها قالوها صراحه كده هما مش عايزينها لانهم ماصدقوا خلصوا منها
ـ طيب سبينى أفكر وبعدين انا ماشوفتهاش
ـ وافق انت بس وأنا هكلم أمها وتروح تشوفها ولو عجبتك توكل على الله واتجوز وهى هترضى بظروفك ماتقلقش
ـ ماهى لازم ترضى انا خلاص فلست جوازتين فى سنه واحده خدوا كل اللى معايا انا مش حيلتى غير ال ١٠.٠٠٠ اللى خدتهم من فلوس نداء
ـ حلوين نجبلها بيهم دبله وخاتم وتتجوز بيهم وتقعد فى شقتها
ـ خلاص كلمى امها وشوفى هنروحلها أمته انا مبقتش مستحمل العيشه هنا
دخل طه غير هدومه وخرج عشان ياكل واتعامل مع رنا بشكل طبيعي من غير مايقولها أى حاجة وكان الحزن واضح على وش رنا لكنه تجاهلها نهائى هو حاليا مشغول بصيد ضحية جديدة
********&******&*****
راحت نداء مع سليمان عشان تقابل مامته وأول ما هناء شافتها اخدتها بلحضن وسلمت عليها وكانت بتعاملها بود وظاهر فى عنيها فعلاً انها فرحانه بيها لانها بتتعامل بتلقائية
قعدت نداء وسألتها عن سبب تعبها
ـ تعبى إنك وحشانى ونفسى أشوفك لازم يعنى ابقى تعبانه عشان تيجى تزورينى
ـ لا طبعا الف سلامة عليكى
ـ سليمان عامل معاكى ايه دماغه ناشفه انا عارفاه
ـ جداً جداً وبيحطنى دايما قصاد الأمر الواقع
ـ هههههههههههه ابنى دى وراثه ابوه كان كده برضة وهو طالع لابوه مابيدنيش فرصه أفكر
، المهم بقى ناويين تفرحونى بيكم أمته
حست نداء بحرج من كلام هناء فابتسمت وسكتت فكملت هناء كلامها
ـ مهو انتى لو فضلتى ساكته كده ومحروجه هتلاقى نفسك متجوزه بكره من غير ماتعملى حاجه اجمدى شويه واثبتى على رأيك
ـ حاضر
ـ على فكره إحنا جبتا الشبكه انهارده ، شوفتى جبتلها ايه
اخدت هناء الشبكه شافتها وبصتلهم برفعه حاجب
ـ انا قولت ده اللى هيحصل
ـ ايه اللى حصل ؟
تفتكروا هناء تقصد ايه ؟
وهل طه هيتجوز على رنا وهل رنا هتقبل ؟؟
يتبع
اللي بيحب الروايات الكامله والحصريه من هنا 👇 ❤️ 👇
لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم
البارت العاشر والحادى عشر والثاني عشر من هنا
الفصل الثالث عشر والرابع عشر من هنا
❤️🌺🌹❤️🌺❤️🌹❤️🌺🌹❤️🌺🌹❤️🌺🌹❤️🌺🌹🛺🛺🛺🛺🛺
الصفحه الرئيسيه للروايات الجديده من هنا
جميع الروايات الحصريه والكامله من هنا
انضموا معنا علي قناتنا بها جميع الروايات على تليجرام من هنا
❤️🌺🌹❤️🌺❤️🌹❤️🌺🌹❤️🌺🌹❤️🌺🌹❤️🌺🌹🛺🛺🛺🛺🛺
تعليقات
إرسال تعليق