ذكريات بنوتات بقلم نور سوريا حصريه وجديده وكامله جميع الفصول
يمكن كتير منكم درس بجامعة او بمعهد.. في منكم كان إلو أيام وذكريات حلوة أو حتى لساتو عم يعيشها..ويمكن البعض أيامو وذكرياتو الجامعية صعبة ومؤلمة.
بالنسبة إلي..أنا كنت آخدة الحياة والدراسة الجامعية على محمل الجد..يعني ماني مستهترة بشي ومن الاوائل بالجامعة.. وقلبي طيب كتير وبسامح الكل ومابيعجبني الغلط ..كان بحياتنا سوا جنون ومغامرات وأكشنات وكوميديات 😂😂😂😂😂 طبعا هدول رفقاتي المجانين المسخرجية 😅.. انا يسموني المعقدة بالشلة.. بس مع هيك كتير بحبهم ومابزعل منهم..
أنا آمال عمري هلأ 29 سنة..وحيدة اهلي وإمي توفت بالسرطان وأبي كبير بالعمر متقاعد..
لما كنت بالجامعة كان عندي رفقات بيشلو..كنا 5 بنات..حتى طريقة تعارفنا بالسنة الأولى كانت غريبة 😅😂😆
كنت قاعدة بالمدرج بحضر محاضرة عملي.. وبنص الوقت بتقرب عليي البنت اللي قاعدة جنبي وبتهمس: حلو كتير هالدكتور مو هيك؟
تطلعت فيها مستغربة منها وابتسمتلها عالخفيف.. رجعت بعد شوي همستلي: شوفي شكلو شو إنو كتير شيك..
انا هون نزلت راسي شوي وتضحكت ضحكة خفيفة..
سمعتها بعد شوي تقول : صوتو حلو كمان..
ماعرفت كيف مرقت هالمحاضرة وانا كل شوي إضحك عكلامها 😁😁.
ولما انتهت المحاضرة قربت لعندي:😉كيف لقيتيها للمحاضرة؟
آمال: ليش انتي خليتينا نسمع شي او نفهم شي منها.. لك حتى انتي يمكن ما كنتي بتعرفي حتى شو بيحكي الدكتور.
البنت: ههههههههههههه اي شو أعمل ازا هو حلو.. مابقدر قاوم الجمال الرباني ههههههه.. وحتى إنو صغير باين عمرو شي 26 ..بالمناسبة اسمي لبنى..وانتي؟
 |
آمال: اسمي آمال.
وبهالطريقة صرنا رفقات كل يوم نحضر المحاضرات سوا ونقعد سوا.. كانت تطلب انو نقعد بمقصف الجامعة بس أنا كنت أرفض..ما كان يعجبني جو المقصف أبدا.. فخليها تقعد معي بالحديقة او بشي مدرج.
لبنى بنوتة كتير مهضومة وروحها كتير مرحة وبتظل تضحك..ويلفت نظرها الشب الحلو وتتخيلو عريسها هههههههه حابة كتير تنخطب بس ماعم تزبط معها 😅😂
مرة كنا قاعدين بالمدرج بوقت استراحتنا وكانت بنت قاعدة على نفس مقعدنا بس بعيدة شوي.. ولما وقفت بدها تروح..بتعلق تنورتها بطرف المقعد وبتنشلح من جنب.. انا ولبنى صرنا بين انو بدنا نضحك وبين انو زعلنا عليها.. هي ياحرام خجلت بحالها وماعد عرفت وين تخبي وجهها.. قمنا لعندها لنساعدها.. بس قالتلنا لا تهكلو هم... فتحت شنتايتها ومسكت مقص وقصت التنورة..قصرتها.. صار شكلها مو متناسق أبدا ..وما شفناها غير شلحت حجابها وزبطت شعراتها وتيابها.. ونحن مستغربين شو بتعمل هي😮.. ولما شافتنا عم نبحلق فيها قالتلنا: لك عادي ولو ..ليش مستغربين.. تحرر وين المشكلة..كل واحد إلو حريتو..وأهلي ما بيحكو شي..
وصرنا ناخد ونعطي معها بالحكي وتعرفنا على بعض وانضمت إلنا..
اسمها بيسان مرة بنشوفها بلبس ستايل وآخر موديل و طرز ومرة محتشمة وصاحبة دين عأساس تحرر 😂😂😂..أمها وأبوها مطلقين وكل شهر بتقضيه عند واحد منهم وأمها عاملة شراكة مع واحد بصالون تجميل.. بيسان كل فترة تروح مع أمها عالصالون وتقعد مع (تيم و ورد) ولاد شريك أمها وأحيانا تطلع معهم عمطعم او عالسوق..
بيوم كنا قاعدين عمقعد بحديقة الجامعة.. بس هالمرة كتييير زحمة موو طبيعي ..العالم بتتفشكل وبتتدافش ببعضها.. بنت كانت ماشية تفشكلت بحجرة عالأرض ودفشها واحد كان ماشي مستعجل..ووقعت بحضن لبنى اللي ضمتها دغري.
لبنى: يا أهلاً ياأهلاً.. شو حبيبتي مبسوطة بحضني.. دخيل قلبك.. هاتيلك بوسة
البنت:(ضربت لبنى على كتفها): ههههههه لا ياعمري بيشوفونا الناس.. بالحمامات أحسن
وهون كلنا فرطنا من الضحك هههههههههه😂😂..
قعدت البنت بجنبنا لحتى تزبط كندرتها وهون تعرفنا عليها.. اسمها تقى.. كانت غريبة شوي بتصرفاتها.. تشدد كبير ببيتهم وعيلتهم.. فقبل ما تروح عالبيت تفوت على حمامات الجامعة تلبس مانطو قصير وحجاب.. ولما تجي عالجامعة تشلحهم وتظل بالسبور.. (فعلا كتر الشد بيرخي)..
أما منى تعرفنا عليها لما كنا قاعدين نفطر بكافتريا جنب الجامعة.. كانت مارقة جنب طاولتنا ومتلبكة بالكتب ووجبات الأكل والعصير اللي كانت حاملتن واللي وقعتهم على طاولتنا وخبصت الأكل كلو ببعضو والكتب اللي تشتشت من العصير والكاتشب وغير اللي تطرشنا فيه..خلتنا نستنفر ..شي ينط و شي وقعت فيه الكرسي لورا و اللي وقفت منا وعملت حركة الشبح المفزوع 😂😂😂 أما منظر غييييير شكل..
ياحرام منى خجلت بحالها كتير وبلشت تعتذر وتتأسف وتساعدنا نزبط وضعنا ونلم وننظف كلشي وحتى طلبتلنا أكل وعصير على حسابها الشخصي.. بس طلبت إلها وجبتين أكل تعويض عن الوجبة اللي انكبت ههههههههه روح قلبها تظل عم تاكل.. عطول معها أكلات وبسكويت وتظل تحش وكل يوم لما تطلع من الجامعة تمر تشتري نقرشات ومأكولات للقعدة بالبيت..
بس الغريب انو ما كانت سمينة.. وين بيروح كل هالأكل مابعرف ههههه
وهيك بتكون شلتنا 5 بنات آمال لبنى بيسان تقى منى.. كنا أحلى شلة..
كنا نقعد أغلب الوقت بالحديقة او بمدرج ..بس كانو أحيانا يقعدونا بالمقصف..وانا كنت أقعد غصب عني.. كانو يحاولو يعودوني ويقنعوني عطول.. بس
انا نفسيا مابرتاح لجو المقاصف.. بس مع هيك أقعد مشان ما يزعلو أو يحسو إني بؤسرهم
بيسان: يلا ولوو ..اقعدو خلينا نرتاح
آمال: شو بيعجبكم بالمقاصف بس بدي أعرف
بيسان: بدك يانا نكون معقدين متلك وكل وقتنا محاضرات و جد
لبنى: لك أموول بيكفي إنو هون في كتير شباب.. شوفولي بالله هداك الشب يؤبر قلبي شو حلو وكيوت
تقى: ههههه يحرق حريشك..لبنى السريعة
لبنى: شو هي لبنى السريعة..برامج أطفال
تقى: ههههه سريعة الإعجاب والانتباه للشباب.. عيونك بيسبقو عقلك
لبنى: الجمال لا يقاوم يا عزيزتي.. بس كيف بدي إلفت نظرو
آمال: ههههههه الله يعينك على عقلك
منى: مين
بيسان: انتي خليكي ملتهية ببطنك حبيبتي
منى: اح اح اح شردقتوني..خلوني أعرف إبلع لقمتي..
😂😂😂😂
لبنى: لك وينو.. وهي مابعرف وين راح الشب..كلو من بطنك يا فجعانة
منى: بطني عشقي.. يؤبر قلبي
آمال: قومو يلا صار وقت المحاضرة
تقى: اي عالمحاضرة تؤبر قلبك هههههههه
بيسان: شرفي أموولة
لبنى: كم أمل عندك؟
آمال: كيف يعني
لبنى: آماااال.. أكييد امل بالنجاح وأمل بالسعادة وأمل بالتخرج والوظيفة والفلووس
امال: اي احسن من إني خلي هدفي يكون شب
تقى: يلا قومي معنا يا فجعانة
منى: لك ليش هيك بتظل تلعو وتحكوو.. لك الله لايعلق حدا بلساناتكم
تقى: شو زعلتي تؤبريني
منى: لا حدا يحكي عن بطني وأكلي بشي..خلوني إتهنى
بيسان: اي يا عيوني..كلي لتشبعي..أجليها شوي لنطلع من المحاضرة..
وطبعا طول فترة قعدتنا بالمحاضرة يظلو يلكشو بعض ويتغامزو ويحكو واحيانا يزتو ورق لبعض.. ويحطوها بظهري
الدكتورة: لك هاد الصوت من مين
تقى: من آمال دكتورة
آمال: 😮😮😐😒
الدكتورة: انتبهي عمحاضرتك أحسن ما تنقص علامتك..
آمال: لك تعي لهون وين بدك تهربي
تقى: هههههههه اي اقدري أول شي امسكيني
آمال: اه اه اه منك..تعبتيني مابقى فيني أركض وإلحقك.. يحرق حريشك شو سريعة
تقى: لك ليش وقفتي ..تعبتي ههههههه
آمال: لك انتو كلكم بتتآمرو عليي بالمحاضرات
لبنى: اي ليش ما بتشاركينا وبتظلي آخدتيها جد بالمحاضرة.. يعني دخلك شو استفدتي اليوم.. كل كلام الدكتورة الشمطاء عالفاضي..مو متل الدكتور الوسيم اااه دخيل قلبو (حطت إيديها عقلبها وذبلت عيونها)
انا وتقى وبيسان ومنى: (بمسخرة وبصوت واحد): ولييي على قامتي ريتو يؤبر قلبي ههههههه😂
لبنى: هههههه طيب شوفو شو ممكن أعمل لبعدين.. بس خلوني هلأ شوف هداك الشب الوسيم وليي عطولي شو هاد..يلا سلام
بيسان: لك وين راحت هي المجنونة
تقى: ييييي شوفو شوفو كيف عملت حالها وقعت قدامو
آمال: ههههههه والله وعم يساعدها تقوم
بيسان: ييي غنج ونعومة وعم تذبلو بعيونها كمان ههههههه
تقى: شبك ليش راجعة. شو بتجري ذيول الهزيمة وراكي؟
لبنى: صح ساعدني بس شنكل حبيبتو هي اللي جنبو وراحو..اااخ والله ما استفدنا شي من هالوقعة
امال: ههههههه يحرق حريشك..
أول سنتين إلنا بالجامعة كانو حلوين كتير .. والحمد لله بكل أيامنا كنا مبسوطين سوا..ونجحنا فيهن بدون ما نحمل ولا مادة..
وحتى السنة التالتة كانت كتير حلوة وفيها أكشن وضحك ..بس كان فيها شوية منغصات ومشاكل..
منى:شووو مبين قاصصتيه لشعرك..
تقى: حلو؟
بيسان: اي حلو كتير..انا عم فكر غير موديل شعري وأعمل قصة جديدة
لبنى: اي طبعا بدها تزبط حالها إجا عريس من يومين
منى: لك بيجيكي عريس وما بتحكيلنا
آمال: احكي احكي وافقتي؟
تقى: لك طولو بالكم شبكم انفتحتو عليي..هاد ابن جيراننا الغليظ زياد تقدملي وأنا رفضتو
آمال: وأبوكي وأمك
تقى: قالو ممكن يجيني أحسن
بيسان: ليش شو بيشتغل
تقى: عندو محل كهربائيات وتمديدات
آمال: الله يقدملك الخير
تقى: ولييي.. لك يابنات خبوني مشان الله(تخبت ورانا وصرنا واقفين قدامها متل السور المنيع ههههههه)
منى: شبك شوفي
تقى: ذكرنا القط إجا ينط.. شو جابو لهون هاد
آمال:لك مين
تقى:ابن جيراننا زياد.. ياالله ليش اجا..مابدي يشوفني..
عملنا حلقة وحطيناها بالنص ومشينا كلنا لوصلنا للحمامات ..اما منظر بيضحك هههههه😂
بيسان: فوتي فوتي عملتينا مضحكة
تقى: رح إلبس وروح عالبيت.. ان شاء الله ما يكون شافني..
ظل زياد كل يوم يجي عالجامعة ونحن نخبي تقى عنو.. والله ظلينا فترة 5 ايام مرعوبين من هالقصة ومتوترين..تقولو اللي بيصير فيلم رعب لحتى اجا هداك اليوم😥😧
زياد: تقى؟ ليش هيك عاملة بحالك..وشو هاللبس وهالمنظر
تقى: انت ما دخلك فهمت..وروح من هون أحسن ما لِمْ عليك كل الناس..
زياد: بسيطة يا تقى
راح زياد هو ومعصب وتقى ظلت طول الوقت متوترة.
تقى: أكيد هلأ رح يقول لأبي
آمال: يااربي..وشو رح تعملي
تقى: مابعرف (وصارت تبكي)
بيسان: يعني ليش هيك أهلك بيحملو المواضيع اكتر من حجمها.
آمال: بيسااان
بيسان: اي شو حكينا يعني
آمال: ما بتخافي تتزوجي واحد يحرمك من هالتحرر يلي عايشتيه
تقى: انا رح قوم روح
آمال: طمنينا شو بيصير معك
بقينا بعدها 4 أيام نتصل بتقى يطلع جوالها مغلق..وما تجي عالجامعة أبدا.. انشغل بالنا عليها كتير.
آمال: ياترى شو صار معها
منى: ياحرام..بس ما يكونو حرموها من الأكل
بيسان: هاد اللي شاغل بالك انتي؟
لبنى: اتركولي ياها.. رح روح لعندهم عالبيت وشوف شو القصة واللي بدو يصير يصير.
أم سمير: مين عالباب؟
لبنى: انا لبنى خالتو
أم سمير(فتحت الباب): خير يابنتي
لبنى: هون عالباب؟
أم سمير: تفضلي لجوا
لبنى: خالتو انا رفيقة تقى بالجامعة وانا وكل رفقاتنا انشغل بالنا عليها لأن صرلها 4 أيام مابتجي عالجامعة وجوالها مغلق
أم سمير(بتبكي): حبسها أبوها بالغرفة وقفل عليها ومنعها تروح عالجامعة
لبنى: طيب ليش..حرام عليه
أم سمير: زياد اجا معصب وخبر أبوها بأنها بتشلح المانطو والحجاب بالجامعة وهون أبوها جن جنونو ولما رجعت تقى عالبيت ضربها وحبسها ومنعها تروح عالجامعة وأخد منها الجوال وبعد أسبوع كتب كتابها وعرسها على زياد
لبنى: طيب خالتو احكي معو امنعيه
أم سمير: أنا مو بإيدي شي.. بس هية الله يصلحها.. هي عملة بتعملها؟؟ هيك نحن ربيناها؟
لبنى: هيك التشدد الفوق حدو والخنق عمل فيها
ام سمير: وهي ماعندها عقل تفكر فيه؟ ولا ما عندها خوف من ربها؟.. وطت راسنا كلنا.. الله يهديها..
لبنى: بقدر حاكيها ولو من ورا الباب.. تقى؟
تقى: أهلين لبنى.. شايفة شو صار فيني
لبنى: طولي بالك حبيبتي ..نحن كلنا معك
تقى: (بتبكي بحرقة)انا بدي ارجع لجامعتي بدي ارجع شوفكم..مابدي اتزوج الزفت زياد.. أمانة سلميلي عليهم وقليلهم إني شتقتلهم
لبنى: ونحن اشتقنالك كتير.. خالتو نحن رح نجي بكرة ونحكي مع عمو أبو سمير
أم سمير: صدقيني مارح تستفيدي
لبنى: اي بس ما منخسر شي..
تاني يوم رحنا كلنا على بيت تقى لنحكي مع أبوها.. وكان عندهن المضروب عقامتو زياد..
حكينا مع أبوها كتير.. بس هو كان معند عرأيو وزياد يكبر براسو وما استفدنا شي.. بس أبدا ما يئسنا. وبطبيعتنا الجأر وكبر الراس.. وعملنا هالموضوع تحدي بيننا وبين أبوها لتقى.. ورجعنا رحنا لعندهم بعد يومين وبقينا نحكي ونقنع ابوها يعدل عن رأيو ويرّجع تقى عالجامعة.. بقينا ساعة كاملة نحكي ونلعي ونلت ونعجن ..مللناه طققنا قلبو فقعنا مرارتو.. وبالآخر وبعد جهد جهيد قدرنا نقنعه..يا أما وافق مشان يخلص من النئ الفوق راسو ههههه😂😂..
فتحلها الباب لتقى وخلاها تقعد معنا ..وافق إنها ترجع للجامعة بشرط تلتزم بحجابها ودينها.. وتقى استسمحت أبوها ووعدتو تنفذ شرطو عن قناعة ورضا منها.. وأبوها طبعا اعتذر من زياد عن الكتاب وانو تقى رح تكمل جامعتها..
آمال: اي والله ونورت الجامعة يا تقى
منى: صار لازمها عزيمة حلوان الرجعة
بيسان: حكا بَدْري
تقى: ههههه اي مو تكرمي منووش..تسلمولي ياصبايا يخليلي ياكن..
لبنى: لا ولو شو بتحكي انتي.. نحنا أخوات
تقى: بحبكم كتير وهلأ عازمتكم على بيتزا تعالو نروح
منى: اي ها.. هاد الكلام الراكز
زياد: وعزيمة بيتزا كمان؟؟
تقى: لك انت شو جابك ولا شو حشرك بالموضوع.. اطلع من حياتي
زياد: وحياة الخالقك ماني مفارقك
لبنى: لك ما سمعت شو قالتلك
بيسان: يلا روح من هون
زياد: يااي يا ماامي خوفتوني
آمال: عليه صبايا
هجمنا عزياد وبلشنا ترفيس فيه وخبط بالشناتي والكتب هههههه😂😂 هي أول مرة بنتهجم على شب.. بس قدر بعدين يفلت من بين إيدينا ويبعد عننا.. بس تَوَّعَد لتقى قبل مايروح إنو مارح يتركها ورح يظل وراها.
أخدنا نَفَس هههه😂 و رحنا بعدين عالكافتريا وأكلنا بيتزا وشربنا كولا..كان يوم كتييير حلو..حسينا فيه إنو عملنا إنجازات ههههه😆..
مر 10 ايام على رجعة تقى للجامعة وزياد كل يوم والتاني يجي يشوفها من بعيد بس ما نعملو أهمية بس ازا حاول يقرب نتحول كلنا لوحوش كاسرة ههههه😂
آمال: هي إلنا نص ساعة قاعدين بالمدرج وما إجت الدكتورة..
بيسان: يمكن غايبة
لبنى: ارتحنا اليوم من العجوز الشمطاء
آمال: لك انتي ما حدا بيسلم من لسانك.. لك منى.. بيكفي..لك حاجتك طقطقة ومص بهالمصاصة.. متل ولاد صغار.
منى: تاخديلك وحدة
آمال: لا خليلك ياهن بس لا تطالعي صوت بتمك.. تنكرزت
طالبة: بنات اسمعتو بهالخبرية
آمال: شوفي
طالبة: الدكتورة انتقلت على غير محافظة و رح يعطينا بدالها الدكتور هاني اللي كان عنا بالسنة الأولى عالعملي
لبنى: ياااااي عنجد.. يا سلام 👏👏 وأحلى دكتور.
كلنا: ريتو يقبر قلبها هههههههه
منى: حاج تقولي دكتور.. هو معيييد
لبنى: المهم بيعطينا بالجامعة هههههه
محاضرة الدكتور هاني كانت المحاضرة الوحيدة اللي بتنتبه فيها لبنى وما بتلتهي أبدا .. بس ما بظن انها بتسمع كلامو وشرحه..يمكن أغلب الوقت بتصفُن فيه او بتسرح بخيالاتها ههههههه
كانت تحاول عطول تشارك او تطرح أسئلة عالدكتور وأحيانا تطلب منو يشرحلها فقرة بمكتبو او بمكتبة الجامعة..كانت عطول تتدَحْوَشْ فيه
كل ما تشوفو تركض لعندو وتسلم عليه او تضيفه شي.. وطبعا هو اشتلأ عليها.. قدرت بالآخر تتقرب منو وبالظاهر إنو هو انجذبلها وصارو يحكو مع بعض.
منى: ياالله جوعاانة
امال: طيب اشتري سندويشة وكلي مانك عطبيعتك اليوم..خير فيكي شي
منى: عندي موعد بعد شوي
بيسان: موعد شو وليه..آاااه؟
منى: هههههه عريس بدو نقعد ويتعرف عليي وبصراحة عجبني لما شفتو بالصورة اللي بعتتلي ياها أختو
لبنى: حلوووو
منى: ماحبيت آكل شي اليوم..بلكي بتصغر معدتي شوي.. لأن أكيد رح يعزمني عالغدا..فمشان ما بيّن فجعانة قدامو هههه
لبنى: أوعك تخجلينا قدامو ها
تقى: أكيد رح تعجبيه.. بس لا تنسي حالك وانتي بتاكلي ههههه
منى: آااااه يا عصافير بطني..
لبنى: ههههههه بيعينهم الله على هاليوم
منى: طيب بشوفكم بكرة بنات..إدعولي..يلاسلاام..
فتنا عالمحاضرة.. بس هالمرة من بعد شهرين كانت لينى مو عطبيعتا مع الدكتور هاني وكلنا لاحظنا هالشي..
امال: لك لبنى شبك
بيسان: يؤبر قلبك الدكتور مزعلك شي؟
لبنى: اوففففف
تقى: لك شو صاير بيناتكن
لبنى: هو ....
بيسان: هي منى بتدقلي.. اي منى..لك شبك..إهدي حبيبتي ..روقي..طيب نحنا لساتنا بالجامعة ازا انتي قريبة تعي احكيلنا
لبنى: شبها منى
بيسان: معصبة من العريس..
امال: يمكن ما طلبلها غدا وماتت عصافير بطنها ههههه
بيسان: قطعتك عن كلامك لبونة.. كملي شبو الدكتور
لبنى: خلص انسي..خلينا نشوف منى شو صاير معها..
وبعد ربع ساعة..
منى: بعدولي هيك قعدوني رح موووت.. اطلبولي أكل عالسريع وإلا بتدفنوني بأرضي
امال: لك طولي بالك هلأ بنجبلك اكل بس احكيلنا
منى:لك يضرب بين العرسان..ازا هلأ هو هيك فكيف ازا تزوجنا وصار نصيب والله من اول يوم بموت
بيسان: ما طلبلك غدا؟
منى: أخدني على مطعم صغير ومهرهر وعَفشيكا ما حكينا شي..طلب وجبة بطاطا صغيرة و سندويشة شاورما وقسمها بالنص قلنا ماشي.. بس يطلب كاسة عصير وحدة وقطعة كاتو وحدة وشلمونتين وشوكتين وكمان ناكلهم بالنص مشان التوفير هي أبدا مو زابطة.. لا وشو كمان.. بيفاصل الكرسون مشان مية ليرة ماعرف سببها بالفاتورة.. يا ربي لك شو هاد ..العمى بقلبو شو مْعِثْ و مأنشح وبخيل.. ااااه والله رح موت..
بيسان: هههههه العما شو هاد
امال: ههههههه والله وعريس لقطة
منى: مستحيل عيش عندو ساعة مستحيييل..
مابقى بدي ولا رجال.
بيسان: لكان خليكي هيك عشقك بطنك..طيب بطليها لعادة الأكل الكتير.. مابيهنالك عيش ازا ما ظلو أسنانك عم يتحركو مو؟
منى: اسكتي ست تحرر..ولاعد حدا يجيب سيرة أكلي.
بيسان: اي ما غلطنا ست أم بطن.. عكل حال مارح هز بدني مشان ستايلي.
منى: ههههههه كلو إلا ستايلك
تقى: أكيد عندك مشوار
بيسان: اي بدي اطلع المسا مع تيم و ورد ناكل بوظة
تقى: ههههه تتهني
بيسان: عفكرة منوشة تيم عندو مطعم.
منى: أماااانة.. مشان الله عرفيني عليه
بيسان: هههههعع شايفتك صرتي أليفة
منى: شو شايفتيني نوع من الحيوانات
بيسان: لاا مو هيك بس قبل شوي كنتي متوحشة وبتعيطي
منى: لك آماااال معقدة خانم.. بإيديكي أساور ومعك طوق ومدري شو بالبيت غيرهم ذهب اعمليلك شي دق شهامة ونخوة واعزمينا على شي خروف مكتف او فروج مشوي
آمال:(نزلت راسي وزعلت)
منى: لك ليش زعلتي
بيسان: ام بطن.. شو نسيتي انو هدول من إمها الله يرحمها
منى: يبعتلي حمى خلص أموول لا تزعلي آسفة
آمال: خلص ولا يهمك
منى: دخيلو قلبك الطيوب
تقى: لبونة وين سارحة
لبنى: عم إسمعكم
تقى: مانك عطبيعتك.. شو صاير معك
لبنى: خلص مافي شي..قومو نروح عالبيت..
بعد يومين..
بيسان: لك تقى هاد مو زياد؟
تقى: لك يقصف عمرو
منى: انا حاسة بالجوع..فشلك خلقي فيه؟..
تقى: لأ..اتركيه... لك انت ما بتمل؟
زياد: وراك وراك والزمن طويل
تقى:انا مابدي ياك.. افهمها بقى وحل عني. الله ياخدك..
زياد وتقى تخانقو وصارو يعيطو..ومشى زياد وهو معصب وسمعنا صوتو بعد شوي عم يصيح ولما التفتنا لعندو لقيناه حامل عصاية شرطي المرور وعم يركض باتجاهنا والشرطي وكم شب لاحقينو وبيصيحو فيه.. هجم على تقى ومسكها من رقبتها..
هي ماقدرت تتحرك بس نحنا خفنا وصرنا نعيط عليه ونحاول نبعدو بس ماقدرنا.. و قدرو كم شب والشرطي إنهم يمسكوه وياخدو العصاية منو وبعدوه عن تقى
تقى وقعت بالأرض ومسكت رقبتها وصارت تبكي وتعيط: لك كنت رح تخنقني يا مجنون
نحنا التمينا حوليها وسندناها ووقفناها وحاولنا نهديها
زياد: اليوم بدك تكوني إلي وبالغصب
تقى: مافي شي بالغصب.. مارح حبك بهي الطريقة مارح كون متل مابدك
شرطي المرور: (بلحظة اتصل بالمخفر ليجو بسرعة) امشي معي عالمخفر وهونيك بيشوفو شغلهن معك.
زياد: ماشي يا تقى..انا بفرجيكم..
حبسوه 3 ايام بالمخفر وخَلوه يكتب تعهد إنو ما يتعرض لتقى أبدا وكانت تقى وابوها شاهدين على هاد التعهد واخدو نسخة منو..
وفعلا مر شهر وماسمعنا عن زياد شي ولا حتى شفناه..
بهالفترة كانت بيسان مشاويرها كترانة مع تيم وورد..
ولبنى مو على طبيعتها مع الدكتور بس ماترضى تحكي شي بس كتير تطلب تشوف عميد الكلية..وكل ما نسألها تقلنا بالوقت المناسب بتعرفو..
وانا تقدملي شب بيشتغل بشركة بس أبي رفضو لحتى خلص دراسة.
بعد أسبوع..
بيسان: شوفو بنات..الشرطة هون
آمال: خير شو صاير
لبنى: الحقوني بنات
منى: لك لوين
لبنى: لك اتركي الأكل هلأ بعدين بتاكلي.. رح يصير متل مابدي ..قومو احضرو الأكشن
قمنا لحقنا الشرطة ونحنا مستغربين وكانو أغلب الطلاب كمان متجمعين وعم يلحقوهم..
فاتو عمكتب العميد ودخلت وراهم لبنى.. طلعو واتجهو عمكتب الدكتور هاني..
فتحو باب المكتب وهون كانت المفاجأة والصدمة للكل.. كان قاعد عمكتبو و3 بنات قاعدين عندو عالمكتب قعدات مخلة بالأدب ووحدة منهن عم تعطيه مصاري..
حطولو الكلبشات بإيديه وأخدوه قدام كل الطلاب هو والبنات اللي معو وراحو العميد ولبنى معهم عالمخفر..
نحنا واقفين مو فهمانين شي.. أشرتلنا لبنى بإيدها انو بس ترجع بتحكيلنا..
بعد ساعتين..
لبنى: هاي بنات..انا هلأ ارتحت
آمال: تعي لشوف احكيلنا شو صاير
لبنى: طلع دكتور حقير.. انا حبيتو وعم حاكيه على هالأساس وهو عم يحاكيني مشان يستغلني وكون وسيلة لأعمالو الدنيئة
منى: كيف يعني
لبنى: بيكونو كم بنت عاجبينو ..فبيتحطط عليهم وبيرسبهم وبيطلب مني روح حاكيهم بطريقة غير مباشرة مشان يعطوه مصاري او يعملو معو شغلة مو منيحة
بيسان: وانتي كنتي تقبلي؟
لبنى: طبعا لأ.. بس سايرو بالحكي وسجلو مكالمات ومحادثات ليكونو دليل ضدو .. وصرت قابل العميد وإحكيلو كلشي
تقى: والشرطة؟
لبنى: العميد حط مراقبة عالدكتور.. فلما شافو 3 بنات فاتو عمكتبو.. اتصل فيني العميد وبالشرطة وصار اللي شفتوه.. انفضح وانحبس بشر أعمالو
تقى: كانت دلقتك عليه إلها نتيجة هههههه
لبنى: شايفة بالله هههههه
آمال: مشان تتعلمي تندلقي عالواحد ههههههه
لبنى: يضربو بشكلهم ازا دكتور وهيك فكيف غيرو
تقى: مو كل أصابعك متل بعض..
لبنى: المهم قدرت إكشفو قدام الكل مشان ما يظل يتابع بعملتو الوسخة ويكون عبرة لغيرو
منى: برافو عليكي..
وبآخر شهر بهالسنة صار حفلة بالجامعة وحضرناها كلنا سوا.. ضحكنا وانبسطنا كتير.. بيسان كانت عازمة تيم وورد عالحفلة وطبعا منى ما فارقت طاولة الأكل غير لما اجت بيسان لعندها مشان تعرفها على تيم
بيسان: منوش حبيبتي بحب عرفك على تيم و ورد..
وهي منى حبيبة قلبي آخر بنت بالشلة
(نحنا كنا واقفين بعيد شوي نضحك على منى)
تقى: هلأ بدها تفضحنا
لبنى: لازم تدير بالها بلكي تزبط معها هالمرة ههههههه. تيم شب كتير حلو وعندو مطعم.
آمال: هههههههه والله لتكيف ازا زبط
تيم: كيفك آنسة منى انا تيم
منى: أهلا وسهلا
بيسان صارت تحط إيدها على أنفها وتطلع بمنى.. ومنى ما تفهم عليها شي
ورد: ههههههههههههه كأنك جوعانة كتير
منى: مين ليش
قرّب منها تيم و أخد بطرف أصبعتو كريمة من على أنف منى و ذاقها وقرب تمو من إذن منى وبإيدو محرمة حطها عأنفها ومسح الكريمة
تيم: والله طيبة هالكريمة تبع الكاتو.
منى احمرت كتير وماعد شالت عيونها من الأرض..
بيسان غطت وجهها بإيدها ونزلت راسها. وتيم وورد صارو يضحكو .. ونحن صرنا نتطلع ببعض ومو عارفين شو نحكي..
باقي الوقت من الحفلة يظل تيم جنب منى ويحكو ويسألو بعض عن كلشي وبالظاهر صار في انجذاب بيناتهم.. و ورد يظل مع بيسان وما يفارقها وكلنا انتبهنا على نظراتو إلها و كيف يتقرب منها ويحاكيها.
زياد: مرحبا تقى
تقى: لك انت شو جابك عالحفلة
زياد: كل هالفترة ما غبتي عن عيني وبالي
تقى: كنت بتراقبني
زياد: هيك شي.. انا حبيت هلأ إعتذر منك عالشي اللي عملتو آخر شي بتمنى تسامحيني لأني جد بحبك
تقى: برأيك اللي بيحب هيك بيعمل؟ ولا بيحاول يكون اللي بيحبو مرتاح ومبسوط؟؟ عكل حال انا نسيت اللي صار أصلا.
زياد: عنجد بعتذر.. وانا بدي ياكي وبالطريقة اللي انتي بتحبيها
تقى: بيتنا وبتعرفو.. وبعدين انا بدي وقت لفكر..بلكي كنت عم تمثل عليي
زياد: وحياتك صادق معك وانا تغيرت والأيام رح تثبتلك هالشي..
صار كل يوم يروح لعندهم عالبيت وياخد هدية بإيدو و طلب إيد تقى اكتر من مرتين وأبوها يأجلو لتخلص الجامعة بس اتفقو انو يخطبو بس.
لما خلصت امتحانات السنة التالتة حضرنا خطبة تقى على زياد وبعدهم بشهر خطبو منى و تيم..
مرقت السنة الرابعة بسرعة كبيرة بين الدراسة والضحك والمشاوير بس طبعا خفت قعداتنا سوا باعتبار منى وتقى صار عندهم خطيب والتزامات..
بقينا بعد التخرج كل أسبوع نجتمع سوا..بس بعد زواجهم وظروفهم خفت اللقاءات بس ظلينا نتواصل عالفيس.
بعد 6شهور..
تزوجت منى من تيم وكان كتير حنون ومنيح معها وبيحبها وأهم شي متوفر الأكل عندها عطول ههههههه بس ما اشتغلت باختصاص الدراسة لأن عقولتها انو تيم غني وموفرلها كلشي فليش لتتعب حالها بيكفي تمها بيشتغل عطول هههههههه..
تقى تزوجت بزياد طبعا تبعا لشروط سجلوها بعقد الزواج إنو مايضربها ويخليها تشتغل. بس زياد كان بأول 6شهور إلهن كتير يدقق عليها ويعصب ويغار كتير يعني طريقتو بالحكي والتعبير غلط.. بس بعدين حس بإنو عم يظلمها لأنها كانت كتير منيحة معو وتوفرو كل الراحة وكلشي بيريدو.. فصار يحن عليها ويعبر عن حبو بطريقة أزبط وسمحلها تشتغل.
لبنى سافرت على كندا لعند أخوها و قدمت اوراقها مشان تكمل دراسات..
وبعدهم بشهر تزوجت بيسان من ورد بس كان ممارس عليها حصار وما يخليها تطلع من البيت إلا معو وخلاها تلتزم بلباسها الشرعي..وحتى جوالها تفتحو بوجودو بس..
حتى أبي تزوج بعد ست شهور من تخرجي..يمكن كان بيستناني لحتى خلص دراسة ههههههه بس الحمد لله مرتو طلعت منيحة شوي واتفقنا ..
وبعد بفترة توظفت بشهادتي و رجع تقدملي الشب الموظف بشركة اسمو تامر وأبي وافق ..وكانت خطبتنا شي شهرين و تمت بعدين حفلة زواجنا البسيطة.. و سكنا بغرفة ببيت أهلو..
حماتي كانت قوية وشو بتقول لزوجي بينفذ..
انا كنت كتير متدايقة من وضعي باعتبار ما إلي غير غرفة والحمام مشترك مع حماتي وحمايي..
حماتي كانت تاخد راتبي مني كل شهر بحجة بدها تجيب اغراض للبيت.. وكانت كل يومين والتاني تسمعني حكي مشان الولاد.. وانا كنت أسكت وإتحمل .. بس بالآخر طلع الضعف من ابنها ههههه..
بعد 3سنين من زواجي بعت ذهباتي وعمّرت غرفتين ومنافعهم ضمن بيت حمايي مشان حس بالاستقلالية شوي.. بس زوجي اخد غرفة منهن وفتحها عالشارع وعملها سوبر ماركت والغرفة التانية حطت فيها حماتي نص اغراضها.. صرت أطلب منهم يعطوني المصاري اللي صرفتهم على هالغرفتين لأني مو مستفيدة وهنن أخدوهم.. بس حماتي كانت تقلي ما إلك عنا شي.. وما رضيو يكتبو شي بإسمي..
((باتت حياتنا كقصيدةٍ تعزفها الظروف على أوتار الزمن..
تارةً تُتْعِب وتُرهق أرواحنا..
وتارةً تستنزف كل أحلامنا..
تُبعِدُنا عن وتر الفرح والسعادة..
تُقَيّدنا بوتر القهر وعدم الراحة..
لكننا سنبقى نتطلعُ لغدٍ أفضل..
لن يموت فينا الأمل..
أملٌ بأنه سيأتي يوم نُبدِّل فيه قصيدتنا..
نختار لحنها..ونحن من نعزفها))
كنت كل يوم إشكيها لله وإدعي يرجعلي حقي..
بس الله كبير.. بعد سنة كانت طالعة المسا من غرفتي اللي أخدتها أم زحطت رجلها ووقعت على راسها.. الكل سمع صوتها وأسعفوها وبعد أسبوع بالمشفى توفت بسبب ارتجاج الدماغ القوي ونزيف الضربة عالبصلة السيسائية..
وبعد كم شهر زوجي عمل حادث وانكسرت إجرو ..
اهتميت فيه كتير وساعدتو ف حَس على غلطو وظُلمو إلي.. واستسمحني ولما تعافى كتب الغرفتين بإسمي و بلش علاج الضعف ..
وهلأ صرلي 8 سنين متزوجة وصار عندي توأم بنت وصبي بيجننو وزوجي كتير بيحبني وبيدللني وعرف قيمتي مزبوط وعايشين مرتاحين ومبسوطين..
طبعا كل هالفترة ماقطعت علاقتي برفقاتي.. كل يوم نحكي ونفش خلقنا لبعض.. تقى ومنى مبسوطين وكل وحدة عندها بنت وصبي وبيسان انفك الحصار عنها شوي وصار في ثقة بينها وبين زوجها و ولدين..
ولبنى خلصت دراسات بأمريكا وتوظفت بشركة كبيرة وتزوجت زميلها فترة سنتين وتطلقت.. طلعت عينو بيضا متل ما كانت هي هون بس على أفضع هههههههه..
صح كل وحدة إلها عيلتها ومسؤولياتها بس ما بنسى بعض أبدا وما بيمر يوم إلا ومنحكي فيه عغروب الواتس.. وكالعادة ضحك ومسخرة هههههههه
وصرنا كل أسبوع نجتمع عند وحدة فينا ونعمل تبولة وبيتزا.. و لبنى تحضر معنا من ورا شاشة الجوال نفتح فيديو عالماسنجر ونقعدها معنا ههههه..
((ظروف الحياة قاسية.. مجبورون على عيشها بحلوها ومرها.. لكن بالإرادة والصبر والدعاء و الإحسان والأمل .. نستطيع ان ننال مرادنا ونصل لهدفنا ونجمّل حياتنا..))
والأكل هو اللي بيخلي الحياة حلوة عقولة منى هههه وإنو ما بينفعك غير بطنك والطعام هو سر السعادة ههههههه😂😂
انتهت
بقلم_نور_سوريا رأيكم ❤❤🌷🌷
أدخلوا واعملوا متابعة لصفحتي عليها كل الروايات بمنتهي السهوله بدون لينكات من هنا 👇 ❤️ 👇
تعليقات
إرسال تعليق