الحمو الموت بقلم امل احمد سلوم كامله وحصريه من سلسلة حديث قلب
ماكنت صغيره ولا مراهقه لاحكي انه خوفني او هددني .. بالعكس كنت واعيه وناضجه بما يكفي لاقدر ميز بين الصح والغلط
لو جينا للواقع هوي ما اذاني انا آذيت نفسي وقت تركتها تجري مع تيار الخوف والجب
رح خبركم شوي عني انا اسمي بسنت بنت ببشره حنطيه وشعر خروبي قصير ناعم وملامحي طفوليه يلي بيشوفني مابيحكي عمري 30 سنه متزوجه وعندي 3 اولاد كانو هنه كل حياتي
عشت بداية حياتي بغرفه ببيت حماي وبقيت بهالغرفه تمن سنوات جبت فيها ولادي التلات وكانت حياتي هاديه ومستقره بحب ودفا رغم اني ماكنت اخده راحتي من ناحية اللبس ولازم طول الوقت كون محتشمه ولابسه عراسي لاني ب اختصار ساكنه ببيت العيله وبيت العيله متل مابتعرفوا مابيفضى
ماكنت مدايقه من هالوضع بالعكس كنت اعشقها لحماتي وحب كل العيله وهنه كانو يعاملوني بكل حنيه وحب بس مو دايما بتكمل معنا لازم يطلعلنا شي حدا يكون السبب بتغيير بوصلة حياتنا للابد
حماتي : شو بسنت لساتها نايمه لهلأ صرنا الضهر
بسنت : هههه انا هون عمتي يسعد صباحك اي ضهر هاد لسه الساعه ما صارت تسعه
حماتي : اه مهو لو انك مره معدله بتصحي معنا من صلاة الفجر مو بتقضيها مرنخه بتختك
بسنت : الله يسامحك عمتي هلأ انا بقضيها مرنخه بتختي يلي بيسمعك بيحكي خمخومة نوم… . طيب انا بصحى بصلي الفجر وبرجع نام شوي مابكفيني الاولاد طول الليل معجبين عليي
حماتي : بس بس بلا حكي فاضي ولادك من الساعه تمنيه بينامو بس انتي اللي غاويه سهر
بسنت : حاضر عمتي متل مابدك…
طبعا هاد موشح كل يوم وانا ابدا ماكنت ازعل ولا ادايق لاني كنت حبها لحماتي كأنها امي ووقت تبهدلني اعرف انها بتبهدلني كرمال مصلحتي ولحتى كون ست كاملة مكمله
وبيوم من الايام كانت الدنيا مسويه والكل قاعد عند حماتي بغرفتها الصغيره حوالين الصوبه عم نشوي كستنا ومبسوطين رغم انها غرفه صغيره والكل قاعد فوق بعضه بس كانت الضحكه ما تغيب عن وجوهنا مافي حمايه قويه ولا سلفه مكيوده كنا عباره عن اهل اخوه وخوات وحماتي عامود البيت وشمعته اللي بتمده بالنور والدفا
كنت قاعده بحد سلفي ونسيت انه الحمو الموت اجت اجرو ع اجري من ديق القعده وانا اخدت الموضوع ببساطه عادي هاد سلفي متل اخي ما توقعت انه بهاللحظه كان عم يفكر فيي تفكير بشع رغم انه كان بالنسبه الي متل اخوي الكبير وبحترمه وياما بهدل جوزي لما كان يزعلني وروح ابكيلو واشكيلو
مرت الايام وحركات سلفي عم تزيد وصرت لاحظ عليه انه بيطلع فيي نظرات غريبه واوقات تجي عيني بعينه الاقيه بيبعتلي بوسه عالهوا ورغم هيك ماتسلل الشك او الخوف لقلبي وبقيت متل ما انا عامله ببساطه واخويه
وبيوم كنت لوحدي بالبيت واقفه بالمطبخ عم اجلي الجليات وفجأه حسيت حدا حضني من ورى بالبدايه فكرتو زوجي والتفتت وانا مبتسمه ووقت شفت سلفي عصام يلي كان وراي جمد الدم بعروقي وماعدت حسنت اخد نفسي خفت منه كتير ورجعت لوري لحتى لزقت بالمجلى وهو لساتو عم يقرب مني بطريقه مقرفه وعيونو فيها لمعه بعمري ماشفتها من قبل
 |
هجم علي وحاول يبوسني وبهاللحظه مابعرف من وين اجتني القوه وضربته كف متل فراق الوالدين ودفشته عني وكانت ردة فعله انه ردلي الكف بكفين ومسكني من شعري وحاس فيي المطبخ وانا صرخ وابكي من الخوف وبعد ماضربني ورد اعتباره طلع من البيت
الموقف يلي صار ما تجاوز دقيقتين… دقيقتين حسيتهم سنتين بقيت قاعده ع الارض عم حاول استوعب شو صار حطيت ايدي ع تمي لاكتم عبراتي وشهقاتي وبعدا جريت حالي وفتت لغرفتي ونمت بين ولادي وتركت العنان لدموعي تنزل براحتها لتغسل الحسره والكسره يلي نزرعت بقلبي
غلطتي اني خفت خبر زوجي او حدا من العيله واكتفيت اني اتجنبه والمكان يلي هو فيه ما اتواجد فيه والكل صار يلاحظ اني انا وسلفي ما عدنا متل الاول وحسو انه في شي صاير لانه ماكنا نحاكي بعض ابدا
معلش خلوني احكيلكم شوي عن سلفي وبعدا بكمل قصتي
سلفي هاد اكبر واحد من بين اخوانه الخمسه مات ابوهم وهو عمرو 12 سنه ومن يومها شال حمل امه واخوانه وخواته وصار بالنسبه الهم مكان عمي الله يرحمه كلمته مابتصير تنتين وشو ماحكا كلامه مصدق عند الكل ويمكن هالشي يلي خلاني خاف احكي لزوجي او حماتي لاني كنت متأكده ماحدا رح يصدقني وصير انا بنضرهم البطه السوده يلي بدها تفرق الاخوه عن بعض
مع الايام سلفتي يلي هي مرته ما عادت تحكي معي وبقيت وراها لاعرف شو قصتها وبشو انا غلطت معها لحتى تعمل هيك وتقاطني
☆ ╚══════ღღ══════╝
بسنت : شبك هديل حاسيتك متغيره معي
هديل : وليش لاتغير… لا ماني متغيره ولاشي بس زي ماتحكي عم عامل كل شخص متل مابيستحق
بسنت : مافهمت عليكي كيف يعني متل مابيستحق
هديل بعصبيه : هه لتكوني مفكره جوزي بيخبي عليي اشي بسنت خانوم
بسنت :………
هديل : بشوف سكتي. طبعا ماعندك شي تحكيه لك ياعيب الشوم عليكي اخر شي توقعته تكوني بهالاخلاق لك يا محترمه هاد سلفك متل اخوكي كيف بتعرضي حالك عليه ياوسخه
بسنت : شوووووو لا والله ماحصل كزب وربي كزب ومستعده واجهو
هديل : تواجهيه… فعلا ان لم تستح ف اصنع ماشئت لك بشو بدك تواجهيه ليش جوزي كزاب يعني ولابدو يتبلى عليكي
بسنت: والله عم يتبلى والله هالشي ماصار هاتي المصحف احلفلك عليه
هديل : لك عينك متل عين بياعة اللبن والله واللي اسمو الله لولا جوزي نبه عليي ماجيب سيره لحدا ولا كنت فضحتك وشرشحتك وخليت طلاقك ع ايدي
حكت هالكلمتين وتركتني وراحت لبيتها تركتني بين دموعي وحسرتي وكسرتي سرت ابكي واضرب ع وجهي لك انا بستاهل ليش ماخبرت جوزي من يومها ليش سكتت ليش ماحكيت ليش تركت الخوف يسيطر عليي وانا الحق معي وهلأ صار عليي
☆ ╚══════ღღ══════╝
من بعد الموقف يلي صار بيني وبين سلفتي انقطعت علاقتي فيهم نهائيا حتى ولادهم وبناتهم ماكانو يحكوا معي ويعاملوني بنشافه وقلة احترام واوقات يسمعوني كلام من تحت لتحت وانا عليي ابلع الاهانه واسكت
تسلل الشك لقلب جوزي وحماتي وكتير سألوني شو سبب هالقطيعه بيني وبين بيت سلفي بس كنت اجبن من اني واجه واحكي ولاني متأكده ماحدا حيصدقني اكتفيت بالسكوت
وعلى هالحال مشيت حياتي كنسلت ع بيت سلفي ورجعت لحياتي السابقه عم حاول رمم حالي من جديد وانسى يلي صار
قصتي ما خلصت هون ومأسآتي الحقيقيه بعدها مابلشت والظلم لسه ما شفته
بعد سنتين من الموقف يلي صار بيني وبين سلفي كنت نازله عالسوق جيب كم غرض للبيت ووصتني حماتي ماطول بالرجعه لان الاولاد حيبقوا عندها
وفعلا لبست جلبابي ومنديلي ونزلت عالسوق تناولت الاغراض يلي طلبتهم حماتي وطلعت بوجهي عالبيت
وانا بطريقي عالبيت تعرضلي شب وبلش يلقح كلام ويامكترهم التافهيين يلي بيوقفوا للبنات بالطريق
ما اكتثرت ولا عطيت الموضوع اهمية ولا اطلعت جهته وكملت طريقي عالبيت ولا كأنه صار شي لانه موقف عادي اي بنت مكمن تتعرضله وهي ماشية بالشارع فكان بالنسبه الي نقطة انتهى… .. بس بالنسبه للشب كانت البدايه والضاهر عجبته وقرر يحكي معي ب اي طريقه
تاني يوم كان نهار جمعه عملنا غدا وتغدينا وانبسطنا وكالعاده التم سلافي عند حماتي وبلشت الضحكات تعلا وانا ممنوع شارك او اتواجد بالمكان يلي سلفي فيه
ضليت ملهيه حالي بين المطبخ والاولاد لحتى طلع ع بيته وبعدا دخلت عندهم وشاركتهم قعدتهم
فجأه بيندق الباب وبتطلع وحده من بنات سلافي تفتح ورجعت تنادي عليي
لميس : خاله بسنت في بنت صغيره بدها ياكي برا
بسنت : مين هالبنت
لميس : مابعرفها اول مره بشوفها
بسنت : هلأ بشوف مين
طلعت ع الحوش وشفت بنت صغيره بعمر سبع سنوات واقفه بخجل رحت لعندها وسألتها مين انتي ؟
البنت : خدي هي الورقة من مازن. وبيقلك رني عليه
بسنت : مين مازن
اشرت من شق الباب ع الشب ياللي كان ناطرها برا… قربت وطليت مكان ماعم تأشر وانصعقت بس شفت نفس الشب يلي كان عم يلاحقني امبيرحه واقف عالباب بكل وقاحه
اطلعت بالورقه لقيت مكتوب فيها رقم تليفون واسمه مازن كزيت ع اسناني وعزمت النيه اني هالمره ماخاف وروح خبر زوجي باللي صار فورا لاني ابدا مو غلطانه وهالشب قليل ادب وبدو تربيه
تركت البنت وفتت لجوا وحكيت لزوجي يلي صار وعطيته الورقه
صهيب : ومن وين بتعرفيه
بسنت : مابعررفه والله امبيرحه كان لاحقني وانا مروحه من السوق
صهيب : بالله جد بدك صدق هالحكي
بسنت : شوووو عم تشكك فيي صهيب
صهيب : وينها البنت
بسنت : واقفه برا
طلع جوزي يركض ليشوف البنت بس ماكانت موجوده ورجع لعندي وبلش يصرخ ويكسر وانا احلفله اني مابعرف هالشب ولابعمري حكيت معه
بسنت : وين راحت هلأ كانت هون والله
بلش صهيب يطلع فيي نظرات كلا شك وبعيونو احتقار الي،
بسنت : ليش عم تطلع فيي هيك
مارد عليي لانه ببساطه تركني وفات لغرفتنا وانا لحقته بخطوات سريعة والغضب اتمكن مني،
علي صوتنا ودخل الشيطان بيناتنا كانت اول مره ارفع صوتي بصهيب وهو اول مره يرفع ايدو عليي
ادخلت حماتي وفلتتني منه وانا اصرخ وابكي من قلب محروق
بسنت : والله ياعمتي مظلومه والله مابعرفه
حماتي : اهدي يابنتي لا حول ولا قوه إلا بالله من وين اجتنا هالمصيبه
بسنت : مصيبة شووووووو عم قلك مابعرفه وحياة اولادي مابعرفه
زدت بالبكي وسرت اضرب ع وجهي حضنت اولادي لحضني لحتى اهدى ومايطلع مني شي تصرف اندم عليه بعدين
عالصوت نزل سلفي بكل برود وهو حاطط ايديه بجيابه وراسم ع وجهه عدم الاهتمام اطلع فيي وهو رافع حاجبه وسألني مين هاد بسنت ..
كانت هي اول مره بيحكي معي فيها من يوم ماضربته هداك الكف ومن غبائي مادارتلي انه كيف عرف وهو يادوب نازل من فوق وماكان موجودمسحت دمعتي بكم بلوزتي : ما بعرف
عصام : جد مابتعرفي
بسنت بعصبيه : ايييييه مابعرف واعلا مابخيلكم اركبوه انا رايحه لبيت اهلي ماعاد اقعد بهالبيت ولا لحظة
حماتي : استهدي بالله بنتي مابدنا فضايح
بسنت : فضايح ؟؟؟ يلي بيسمعك بيفكر لقيتوه نايم بغرفتي
عصام : والله يلي جاي بكل ثقه عباب بيتك يعطيكي ارقام كأنه نايم بفرشتك يامحترمه… . ياعيب الشوم عليكي مابتستحي عشرفك لك عالقليله احترمي جوزك والبيت يلي انتي فيه احترمي شيبة ابوكي يلي تعب عليكي ورباكي
كلامه نزل عقلبي متل السم لك مين يلي يستحي انا ولا انت ياعديم الشرف والاخلاق كنت بدي اصرخ فيه واحكي للكل شو عمل بس للمره التانيه خفت وجبنت… . كان اله هيبه وكلامه مابيسير تنين ومتأكده لو حكيت رح سير بنظر الكل المره الشباكه يلي بترمي بلاها ع غيرها لتتفد حالها… .. فضلت اسكت واخدت ولادي وحردت لبيت اهلي
خبرت ابي وامي واخي كلشي صار معي ومع هيك سيرة سلفي ماجبتها كنت بموقف قوي ورغم هيك جبنت وخفت وخسرت فرصة اني افضحه وقلت بعقلي اكيد هوي ندمان والشي يلي عمله مارح يتكرر والدليل انه طول هديك الفتره ماعاد حاكاني ولا انتكش فيي فلشو افتح عحالي باب ويمكن الاخوه يفترقوا بسببي… .
مرق اسبوع وانا ببيت اهلي وما حدا سأل فيي ولاحتى صهيب
تركني وترك ولادو وكأنه صدق الشي اللي صار
ابي : شو بنتي مو ناويه ترجعلي لبيتك
بسنت : ارجع لبيتي بعد الاهانه يلي نهنتا ؟؟ لا بابا مستحيل
ابي : يا بابا ياروحي السبب يلي تركي البيت كرماله تافه يعني جوزك وقت عصب ماعصب لانه بيشك فيكي لاسمح الله بس هو بيغار عليكي وهالشي حقه… يعني انا لو اجا حدا يحكي كلمه ع امك بقيم الدنيا ومابقعدها… هاد حب ابي
بسنت : لو كان حب بابا كان سأل فيي او ب اولادو عالقليله بس هو تركنا وراح وكأنه طابله البعاد
كان بابا بدو يحكي بس اندق الباب وراح اخي صفوان ليفتح
صفوان : اهلا وسهلا صهر تفضل زارتنا البركه تفضل عصام تفضلي خاله ام عصام نورتو
ابي : شفتي انك ظالمه وعجوله .. قومي لتستقبلي بيت حماكي ومابدي مناحره وجكر اي ابي
بسنت : حاضر بابا
في شي جواتي كان يضحك اي كنت كتير فرحانه انه صهيب جاي لحتى يرجعني لاني بحبه ومابتخيل حياتي بلاه وبنفس الوقت كنت حس بغصه وقت اتزكر الموقف يلي تركت البيت بسببه وكيف ماوقف معي ولا صدقني… .. وكأنه مابيعرف شو عندو 😔
عملت شاي ودخلت ضيفتهم وصهيب عيونو بالارض ماعم يطلع فيي
حماتي : كيفك بنتي
بسنت بحزن : من الله بخير عمتي 😔
حماتي : نحنا جايين لنحل سوء التفاهم يلي صار ولحتى زفلك بشاره
بسنت : بشارة شو
اطلعت حماتي بسلفي بفخر ونفخت حالها وهي بتحكي : سلفك عصام ماترك الموضوع وظل ورى الشب لحتى جابه وجاب اهله واعترف قدام الكل انه مابيعرفك وانه كان بنيته يجي يخطبك ومابيعرف انك متزوجه
كلامها زاد غصتي غصه… ليش سلفي يلي يجيب الشب ويثبت برائتي ليش مو جوزي مو انا عرضه وام ولاده طلعت بصهيب ودمعتي بطرف عيني وماحكيت شي ومن بعدها رجعت لبيتي ورجعت علاقتي ببيت سلفي تحسنت وصار سلفي يعاملني كتير منيح هو ومرته وولاده وهالشي فرحني لاني مابحب القطيعة واقنعت حالي انه يلي صار مارح يتكرر وانها ساعة شيطان وراحت بحالها
مع الوقت فترت علاقتي بصهيب وصار مايفوت عالغرفه الا وقت النوم لا بيحكي معي متل الاول ولا بيمازحني ولابيقرب عليي وصار ينام برا البيت بالايام وكترت بينا المشاكل
وبيوم كان راجع صهيب اخر الليل فات عالغرفه اخد منشفه وفات عالحمام ليتحمم هون انا استغليت الفرصه وسرت فتش بجيابه ومحفظته .. بصراحه ماكنت بعرف على شو عم دور بس فضولي لاعرف سبب تغيير زوجي عليي خلاني اعمل هيك
بسنت : افففف شو عم ساوي انا يعني بدو يكون مخبي شي وحده بجيابه… استغفر الله العظيم … اللهم اخزيك يا شيطان….
حملت اواعيه ورجعتهم مكانهم وبسرعه قعدت قدام المرايه زبطت حالي بمكياج خفيف وحطيت عطر ولبست قميص نوم عرايسي وقعدت عالتخت استناه متل اول يوم زواج النا
وبعد عشر دقائق طلع الزين من الحمام مبسوط ونشيط والضحكه ع طرف ثغره… . اطلع فيي بطرف عينو وانا بادلته ابتسامة حب وشوق
صهيب : شو عامله بحالك ؟؟
بسنت : شو ماعجبك ؟؟
صهيب : روحي غيري هالمنظر وامسحي خلقتك ونامي
اغير هالمنظر وامسح خلقتي ؟؟ معقول هاد صهيب يلي حبيته واخترته يكون شريك حياتي ورفيق دربي وابو ولادي ؟؟؟
ماحكيت حرف ولازدت غصتي غصه… . دخلت عالحمام ونزلت تحت المي السخنه لتغسل كل الاهات يلي علقت بقلبي واكتفيت بالبكا
ورغم هيك ما سمحت للشيطان يفوت بيناتنا والتمستله عذر يمكن يكون صاير معه شي بشغله عم يخليه دايما متوتر ومعصب او يمكن التقصير مني وماعم حس قررت اني غير من حالي وخصص لزوجي وقت اكبر لحتى ما اخسرو وحافظ على بيتي
ورغم كل شي عملته بس صهيب مارجعلي متل الاول وكل يوم والتاني عم يبات برا البيت والشك بلش يتسلل لقلبي وقررت واجهو
بسنت : حمدلله عالسلامه
صهيب : اهلين
بسنت : وين كنت
صهيب : شي مابيخصك
بسنت : كيف يعني مابيخصني انا مرتك مو صاحبتك
صهيب : اها بما انك مرتي من حقك تعرفي لكان لاني ماعم اعمل شي غلط او حرام
بلعت ريقي وكأني فهمت شو رح يحكي بس كنت ناطره اسمعها منه لاتأكد
بسنت : ا اعرف شو صهيب ؟؟
قرب مني وركز عيونو بعيوني وقلبي عم يطلع وينزل لحتى حسيته رح يطلع من بين ضلوعي
صهيب : شبك انخطف لونك
بسنت : كرمال الله احكي شو في صهيب
صهيب : انا اتزوجت
بسنت وهي عم تضحك بقهر : هههههههه توقعت
صهيب : بشوف انبسطتي
بسنت : لا انبسطت ولا زعلت كل ما هنالك اني مو لاقيه شي قلك ياه انا ماقصرت فيك ولا بولادنا ولا ب امك ولا بالبيت وشو كانت جزاتي جبتلي ضره لا ومسكنها ببيت لحالها… . وانا تاركني اخدم ببيت العيله
صهيب : فيكي تروحي لبيت اهلك
بسنت : ماحزرت من بيتي مارح اطلع ورح ابقى بس كرمال عمتي يلي بعتبرها متل امي وكرمال مايربوا ولادنا بعيد عن ابوهم
ضحك ضحكه عاليه لحتى اتسكرت عيونو مابنكر وقتها كان نفسي اخنقه من كتر ماكنت مقهوره وضحكته عم تستفزني اكتر
بس يلي فاجأني وقت حضني بقوة ونزلت منه دمعه
صهيب : عم امزح معك يامجنونه انا عم اشتغل شغله تانيه لحتى حسن وضعي واقدر افتحلك بيت وتعيشي فيه اميره
تعلقت برقبته ووقفت ع اطراف اصابعي لاقدر كون ع مستواه وتركت العنان لدموعي تنزل… لك انا بحبك بحبك تضرب انت و ومزحك السقيل 😭
صهيب : بعدي عنك كان من خجلي منك من لما جيت رجعك وانتي ببيت اهلك اطلعتي فيي بنظره خلتني حس حالي مو رجال لهيك قررت اشتغل شغله تانيه واخدك انتي والاولاد ونعيش برا
بسنت : وعمتي ؟؟
صهيب : نسيانه انه اخي عامر رح يتزوج قريبا ومتل ما اخدنا حصه وعشنا ببيت العيله هلأ دور اخي
الفرحه يلي حسيت فيها مابعطيها لحدا اخيرا حيكون الي بيتي الخاص وعيش مع زوجي وولادي واقدر اهتم فيهم اكتر ويكون كل وقتي الهم وبس بس هالفرحه ما كملت وتحولت لكابوس
من لما سكنت ببيت لحالي وصارت اجر سلفي تروح وتجي عنا عالبيت وكأنه خليله الجو ورجع يتحاقر معي وانا اتجنبه كل مره بطريقه شكل
صرت لاحظ عليه بيطلع فيي نظرات غريبه ويتغزل فيي وبمفاتني وبدون حرج اوقات تجي عيني عليه صدفه لاقيه مبحلق فيي ووصلت فيه يحاول يتقرب مني ويلمسني وانا بعد عنه والخوف معبي قلبي
وبيوم كنت منيمه الاولاد بكير متل العاده وعم جهز حالي لاستقبل جوزي لانه هاليوم بيصادف عيد زواجنا
جهزت كم اكله طيبه وكم صنف حلويات وزينت غرفة النوم زينه لطيفه وضويت الشموع لتعطي المكان جو رومانسي اكتر ولبست احلا شي عندي وعملت تسريحه ناعمه زينتها بمشبك ومانسيت حط العطر يلي بيحبه وبيحب يشمه عليي وقعدت استناه
صارت الساعه تسعه وقرب موعد وصلة صهيب قربت من الباب وسمعتو وهو طالع عالدرج ابتسمت بفرح وخفق قلبي بقوه وقمت شقيت الباب وطفيت الضو وتخبيت لحتى فاجئه
انفتح الباب بهدوء وكأنه في حدا عم يتسلل متل التعلب وانا من لهفتي لفاجئ جوزي قمت هجمت عليه وحضنته من ورى وهو عمل ردة فعل سريعه وفتل حاله عليي وحضني وشد عليي وباسني من تمي بقوه وبلش يحضن فيي ويمرر ايدو ع جسمي بسرعه وانا مصدومه مو هيك بيتصرف صهيب لك مييييييييين انت ؟؟؟؟
دفشته عني وضويت الضو لاتفاجئ بسلفي واقف قدامي وعيونو متل الجمر ومنظرو كأنو ابليس خفت ورحت اركض لغرفتي وهو يركض وراي حاولت سكر الباب بس هو كان اقوى مني ودفشه بقوه ووقعت عطولي وانا ابكي واترجى فيه مايقرب مني
كل توسلاتي ودموعي ضربها بعرض الحيط وهجم عليي وكأنه وحش وفلت وبلش يمزع اواعيي ويبوس فيي بطريقه مقززه
بهاللحظه مر طيف صهيب بخيالي وسرت صرخ وانده ب اسمه ومابعرف من وين اجتني القوه ودفشته عني بقوه وركضت عالمطبخ سحبت سكين ورفعتها بوجهو وانا عم ارجف من الخوف
عصام : اتركي هاللعبة من ايدك وتعي لاتغلبيني مالك مهرب مني
بسنت : ابوس ايدك اتركني بحالي انت شو بدك مني لك انا مرت اخوك حرام
عصام وهو عم يقرب بخطوات بطيئه : لك مو قادر شيلك من بالي وخيالي خليني انبسط معك هالمره وبوعدك ماعاد قرب منك
بسنت : اتفووووو عليك ياوسخ ابعد هيك اياك تقرب يااااصهيييييب الحقني ياناس ياعالم ياجيران
عصام : الله لا يوفقك اخرسي
بسنت بصوت عالي : ماااارح اخرس ورح خبر الكل عن وساختك يانجس
عصام : انا يلي وسخ ياوسخه بكل وقاحه جايبه شب ع بيتك وبدك توسخي شرف اخي لك اخي هاد من دمي ولحمي بدك توسخي شرفه و ع فراشه لك اللي متلك حرام تنقنى ببيوت
استغربت من لهجته شو عم يحكي وليش هيك تحول وبس شفت صهيب واقف وراه وبيطلع فيي بصدمه رجف قلبي وارتخت مفاصلي وزتيت السكين من ايدي وركضت لعندو
بسنت : اياك تصدق صهيب والله هو يلي عم يحاول يدنس شرفك هو يلي من سنين عم يتحرش فيي وانا ساكته مو قادره احكي خفت ماتصدقني
صهيب :……
عصام : لك ياوسخه ياحقيره وصلت فيكي تتهميني هيك اتهام لتغطي ع وساختك
بسنت : انت الوووووسخ والحقير الله ينتقم منك الله لايسامحك😭 صهيب صدقني حبيبي انا عم احكي الصدق
صهيب : لو بتحكي الصدق ليش،سكتي لهلأ ولا كان عاجبك الوضع
بسنت : معك حق انا غلطانه اني ماحكيت بس خفت والله خفت
صهيب : خلي خوفك ينفعك
بسنت : ششو قصدك
صهيب : انتي طالق بسنت طالق بالتلات
☆ ╚══════ღღ══════╝
اي أطلقت .. أطلقت بسبب جبني وخوفي أطلقت لأني بايدي حطيت حالي بموضع شك وشبهات ونسيت وصيت الرسول صل الله عليه وسلم (اجتنبوا الشبهات)
يمكن عصام كان ندل وكسرني من برا بس صهيب كسرني من جوا وشوه جواتي كل شي حلو وكل لحظه حلوه عشتها معه
كانت كلمة انتي طالق سهله جدا وحكاها بدون مايسمعني بدون مايعطيني فرصه اشرحله ودافع عن حالي بلحظه نها كلشي بكلمه خلاني برات حياته بعد ماكنت كل حياته بكلمه نزع كل الحب يلي كان بقلبي وزرع مكانه الكره والخوف منه .. ازا زوجي يلي قضيت معه احلا سنوات عمري صدق اني عاهره وهو اكتر شخص بيعرفني وبيعرف اخلاقي ليش لحتى لوم الغريب ع حقارته
زوجي يلي المفروض هو الأمن والأمان والاستقرار بلحظه تحول لشخص غريب مابعرفه
ومن هداك اليوم عشت ببيت اهلي منبوذه ماحدا صدقني والسبب كان سكوتي عالغلط اول مره
ياريت لو يرجع الزمن لورى وصلح هالغلطه واحكي وواجه وماخاف لان صاحب الحق سلطان بس كلمة ياريت مابتنفع هلأ ولا الندم رح يرجعلي كرامتي ك انثى وزوجه انظلمت وظلمت نفسها 😔
اشتقت ل صهيب كتير اشتقت لبيتي الدافي يلي مالحقت اتهنى فيه اشتقتتتت لولادي 😭 يلي نحرمت منهم
♬♫♪◖(● o ●)◗♪♫♬
هي قصتي يلي عشتها… والحكي موو متل الواقع واللي صار كان كبير كتير
شو ماكانت ردة فعلكم رح اتقبلها بصدر رحب انا بدي نصيحتكم ورح تابع كل التعليقات
انا لسه بحب زوجي وبدي ياه انصحوني شو اعمل 😔
♬♫♪◖(● o ●)◗♪♫♬
ومني انا #امل_احمد
مابدي اقسى عليكي يمكن الغصه يلي بقلبك بتكفي وبتوفي لتموتك الف مره باليوم .... لكن اسمحيلي قلك كلمتين واعتبريني اختك
الغلط من البدايه كان غلطك انتي مو بس لسكوتك عن سلفك ولكن انتي نسيتي أنه الحمو الموت وبدينا وصانا الرسول صل الله عليه وسلم وحذرنا من خطورة الاختلاط بالحما يلي هو السلف وشبهه بالموت .. الموت يلي انتي عم تعيشيه هلأ مو سببه سكوتك وخوفك وبس وانما لأنك من البدايه عاملتي سلفك بتحرر نوعا ما تحت مسمى سلفي متل اخوي
وهي هيه مشكلتنا بمجتمعنا وبالخصوص ياللي بتكون عايشه ببيت العيله وبتتصرف بعفويه وتلقائية مع اسلافها
ياريت ماخفتي وكنتي شجاعه حتى لو حكوا عنك شباكه وبتفرقي بين الاخوه وحتى لو كان طلاقك الثمن بوقتها ... بتبقى الغصه اهون واخف
والزوج يلي مابيكون لزوجته الأمن والأمان مابعتقد هو زوج مثالي ليتعاشر
الزوج يلي مابيقدر يحتوي زوجته ويسمعها لو كانت ع باطل مابيستاهل دمعه من عيونها
انا مو معك ولا مع صهيب لانكو انتو التنين غلطتوا ... انتي غلطتي وقت خفتي وهو غلط وقت اتسرع بالطلاق
ونسيتوا أنه الضحيه لا انتي ولا هوه الضحيه ولادكم يلي مالهم ذنب يعيشوا مشتتين بين امهم وابوهم بسبب اعذار واهنه وأخطاء شائعة ممكن تحصل ب اي بيت ...
الله يهديكي ويصلح حالك وبالنسبه لصهيب انا متأكده رح يرجعلك بس يهدى ويروق ويفكر بهدوء وبوقتها اياكي تخافي اياكي تحسبي حساب لحدا طول ما انتي صح لاتخافي
واتزكري منيح أنه الشي يلي بالعتمه وبتخافي حدا يعرفه هاد بيكون حرام أما الشي يلي بالنور وبتحكيه بعين قويه فهاد حلال
معادله سهله وبسيطه الحلال بين والحرام بين ""
☆ ╚══════ღღ══════╝
🚫انتبهوا🚫
👌الحمو الموت👌
شرح حديث الحمو الموت
يقول النبي صلى الله عليه وسلم في الحديث الصحيح الذي يرويه عقبة بن عامر رضي الله عنه : «إِيَّاكُمْ وَالدُّخُولَ عَلَى النِّسَاءِ» فَقَالَ رَجُلٌ مِنَ الأَنْصَارِ: يَا رَسُولَ اللَّهِ، أَفَرَأَيْتَ الحَمْوَ؟ قَالَ: «الحَمْوُ المَوْتُ» [رواه البخاري (5232)، ومسلم (2172)].
فقوله صلى الله عليه وسلم: (إياكم والدخول على النساء) معناه: احذروا من الدخول على النساء غير المحارم، ومنع الدخول يستلزم منع الخلوة من باب أولى.
والحمو هو: أخو الزوج وما أشبهه من أقارب الزوج: عمه وأخيه وابن أخيه وابن عمه ونحوهم.
وإنما سأل السائل عن الحمو ظناً منه أن النهي عن الدخول على النساء والخلوة بهن لا تشمل الحمو، فجاء جوابه صلى الله عليه وسلم بالتأكيد على أنه مثل غيره من الأجانب لا يجوز له الدخول ولا الخلوة بزوجة أخيه، وقد أكد هذا النهي ووصفه بوصف يوجب الحذر وعدم التساهل، فقال: «الحمو الموت»، أي يجب الحذر من التساهل في هذه الأمور، كما يحذر الإنسان من الوقوع في مسببات الموت.
قال النووي رحمه الله تعالى: "وأما قوله صلى الله عليه وسلم: «الحمو الموت» فمعناه: أن الخوف منه أكثر من غيره والشر يتوقع منه، والفتنة أكثر؛ لتمكنه من الوصول إلى المرأة والخلوة من غير أن يُنكَر عليه بخلاف الأجنبي، والمراد بالحمو هنا أقارب الزوج غير آبائه وأبنائه، فأما الآباء والأبناء فمحارم لزوجته تجوز لهم الخلوة بها، ولا يوصفون بالموت، وإنما المراد الأخ وابن الأخ والعم وابنه ونحوهم ممن ليس بمحرم؛ فهذا هو الموت، وهو أولى بالمنع من الأجنبي" اهـ.
لماذا شبه الحمو بالموت
يقول الشيخ ابن عثيمين رحمه الله تعالى في شرح حديث الحمو الموت :
"إخوان زوجها كغيرهم من الأجانب، لا يحل لهم أن ينظروا إلى زوجة أخيهم، ولا يحل لها أن تكشف عن وجهها وكفيها أمامهم كما لا يحل ذلك في غيرهم أيضاً، بل إن إخوان الزوج وأقاربه أشد خطراً من الأجانب؛ ولهذا لما حذر النبي صلى الله عليه وسلم من الدخول على النساء قالوا: يا رسول الله، أريت الحمو؟ قال: الحمو الموت. يعني أنه يجب الفرار منه كما يفر من الموت".
وفق الله الجميع لما فيه الستر والصلاح.
وجزاكم الله خيراً.
🔴فانتبهوا بارك الله فيكم🔴
☆ ╚══════ღღ══════╝
تــــمـــت
بقلمي_امل_احمد
أدخلوا واعملوا متابعة لصفحتي عليها كل الروايات بمنتهي السهوله من هنا 👇 ❤️ 👇
تعليقات
إرسال تعليق