زواج طفله البارت الثالث والأخير بقلم زهرة الشام حصريه وجديده على مدونة النجم المتوهج للروايات والمعلومات
زواج طفله البارت الثالث والأخير بقلم زهرة الشام حصريه وجديده على مدونة النجم المتوهج للروايات والمعلومات
ام هيا : قومي قومي نروح يا بنتي
رحنا على دكتورة وفحصتني وطمنتني على ولد ورجعنا على بيت وضلت اخر فترة من حملي حردانه وعلي ما كان يسأل عني ابدا لوقت حسيت بوجع المخاض كنت بالمطبخ عم اطبخ وقت اجاني مغص قوي وتشنجت وصرت صرخ من وجعي ..
هيا : يا امي لحقيني مشان الله
ركضت امي لعندي وشافتني ماسكة بطني وعم اتوجع : لك شوفي يا بنتي
هيا : ما بعرف بس كثير عم اتوجع
ام هيا : لك يمكن عم تولدي انا رح نادي لابوكي يجي يأخذك على مشفى
ركضت امي واتصلت بأبي وأخذنا على مشفى وربي قومني بالسلامة وجبت صبي مثل القمر عيون عسلي شعر بني وابيض مثل ضوء القمر 🌘
قعدت يومين بالمشفى ووقت شافوني انو صرت منيحة طلعوني
ام هيا: ماما اجا علي بدو يشوفك ويشوف ابنو ..
هيا : فوتي ماما فوتيه
فات علي على غرفة يلي انا فيها وحامل بأيدي باقة ورد وبالأيد الثانية صندوق شوكلاته قرب مني سلم عليي وباسني من خدي واخذ ابنو لحضنو وصار يتاملو ويبوسو
علي : كيفك هيا ؟؟
هيا : الحمد لله
علي : هيا انا بعتذر عن يلي صار بينا اخر فترة بس والله الدنيا تسكرت بوجهي وكنت كثير مخنوق
هيا : مو مشكلة
قرب مني وحط ايدو على ايدي وقال : بدي ياكي ترجعيلي انتي وابنك ...هيا انا بدي ياكي
ما كان طالع بأيدي غير اني وافق لانو ما بدي خلي ابني عيش بلا اب وحطيت احتمال انو يكون تغير وحكيت مع اهلي مع انو اهلي كانو ضد اني ارجع بس انا كنت عم فكر بابني وبس واقنعتهم وقبلو ارجع معو على بيت ...
رجعت معو على بيت وبدل ما تخف المشاكل صارت تزيد وكل يوم يضرب الأولاد ومرت بعد ما طلع علي على شغلو قعدت مع بنتو وقالت بهدوء
اسماء : خاله انا بدي قلك سر ... بس امانه لا تحكي لبابا لانو بيذبحني
انا خفت من طريقة حكيها كانت عم ترجف وتحكي ... قربت منها وحاولت اهديها ووعدتها ما افتح تمي بكلمة لابوها بالحكي يلي رح تحكيه : اي حبيبتي احكي . بوعدك ما جيب سيرة لحدا ...
اسماء : بصراحة بابا رجعك مشان ياخذ منك الولد وبعدين يطلقك
هيا : شووووو ((انا خفت كثير من كلام اسماء ..)) انتي مين خبرك حبيبتي ؟؟كيف عرفني؟؟
اسماء : انا سمعتو عم يحكي مع عمتي ويحكيلها هيك ...
هيا : ايواه ...
(( انا صرت حاول اخذ احتياطي واكثر الاوقات ما خليه يشوف الولد قبل ما يجي كون منيمتو وحاول بعدو عنو لانو بصراحة كنت خاف على ابني كثير من ابوه ))
مر اسبوع واصوتنا كل يوم يسمعوها الجيران وصار هاد الشي عادي لوقت زادت الشغلة كثير عن حدها وجن علي فوت بنتو على الغرفة وشلحها مثل ما بيعمل كل يوم وصار يضربها ويضرب ولادو وفقد عقلو وسيطرتو على حالو ومسك سكين وركض عليهم بدو يذبحهم ويذبح حالو
علي : والله لاموتكم واشرب من دمكم ... لك ما بدكم تحكو مين كان يفوت بغيابي على بيت يا قذرين
انا ركضت عليه وصرت امسك ايدو وابكي وعيط بصوت عالي والاولاد يعيطو وبعد ما رجع لوعيو شوي ترك السكين من ايدو وفات على غرفتو انا قعدت بارضي مثل المشلولة وصرت ابكي واشهق والاولاد فرط قلبهم من كثر البكاء
ثاني يوم راح علي على شغلو ووقتها صدفة واجو اهلي لعندي وقت شفت امي ركضت عليها وصرت ابكي واشهق بحضنها ووجهي كان اصفر مثل ليمونه
ام هيا :شوفي يا امي ليش هيك وجهك
هيا : مشان الله يا امي ماعد بدي ياه خلوني روح معكم
ام هيا : هل الوسخ انا حكيتلك انو ذنب الكلب بضل أعوج وجوزك كلب وما بغير طبعو
هيا : انا ماعد بدي ياه ... بدي أطلق
(( أخذتني امي ورجعتني على بيت معها واسماء اتصلت على امها وحكتلها انو ابوها بدو ياذيها وحكتلها كلشي عم يعملو معها رحت مع اهلي وثاني يوم رحت على محكمة ورفعت قضية طلاق وبنتو اشتكت عليه وجابوه ل علي على محكمة وسألوه اذا هاد الحكي صحيح
علي : اي هيي بنتي وانا حر فيها ...
علي حكا هيك ومسكوه العساكر وبلشو فيه ضرب ... وبعدها أخذوه على السجن وقعد علي بالسجن 3 أشهر وانا بهل 3 أشهر كل فترة روح على محكمة لحتى راجع معاملة الطلاق
وبعد ما طلع علي من السجن انا وبابا صرنا كل شهر نروح نراجع معاملة الطلاق كرمال نطلق وعلي ما يقبل يطلق وكل ما روح اخذ معي ابني لانو علي يطلب يشوفه وبيوم رحت على محكمة ولمحت اسماء واقفة بعيد عني بشوي مشيت صوبها بسرعه لحتى سلم عليها
هيا : أسماء انتي هون حبيبتي (لفيتها بين ايدي وبوستها لانو كنت مشتاقتلها كثير )
اسماء : اهلين خاله كيفك وكيف اخي
هيا : حبيبتي الحمد لله ....شو عم تعملي هون ليش جاي على محكمة
اسماء : القاضي طلبني
هيا : أسماء صح ليش ابوكي ما طول بالسجن بس قعد 3 أشهر مع انو سمعت انو كان السجن اكثر من هيك
اسماء : لانو اهل ابي طلبو مني اغير اقوالي واحكي انو انتي يلي قلتيلي احكي هيك ..
هيا : عنجدددد . . ووقت طلع ابوكي حكا معك شي ؟؟
اسماء : لا بس كسرلي رجلي
هيا : الله لا يوفقو شو ظالم
(وفجأة سمعت صوت من وراي عم يقول : انتي شو عم تعملي هوون
اتطلعت لوراي وكان علي
هيا : يعني شو بدي اعمل ... مين خلاني رايحة جاي على محاكم غير انت
علي : خرسي وروحي من وجهي
(( بعدت عنو ومشيت لانو بعرف انو واحد مجنون وما بهمو شي وسمعتو عم يحكي لبنتو لاعد تحكي معها ...بس انا ما بهمني كل هاد الشي يلي كان بهمني انو أطلق واخلص منو ))
كمان هيي الروحة ما استفدنا منها شي وما رضي يطلقني علي وصار ابني عمرو 7 اشهر وانا رايحة وجاي على محاكم وعلي ما يرضا يطلقني لوقت رحت على محكمة ووقفت قدام القاضي وصرت اترجاه
هيا : مشان الله يا سيادة القاضي .. بدي اخلص منو كل شهر من 7 أشهر بجي لهون وماعم يطلقني ... انا ما بدي منو شي بس بدي أطلق واخلص منو
القاضي : طيب يا بنتي اهدي .. يا ابني روحو جيبولي علي محمد قصرا
(( ستنينا شي ساعتين ووقت رجعو العساكر قالو انو علي مسافر ))
هيا : يا الله وانا شو رح اعمل هلق
القاضي : انا رح أطلقك غيابي يا بنتي ..
((انا اتطلقت من علي غيابي وعملت العدت وبعد ما خلصتها بلش عنا القصف والمشاكل وطلعنا وهربنا من منطقتنا وقعدنا عند بيت خالتي بحلب وبيوم اجى ابن حماها لخالتي من اسطنبول زيارة على حلب ))
خالة هيا : اليوم جاي ابن حماي من اسطنبول
ام هيا: عنجد اي منيح لكن خلينا نقوم نعمل الغدا قبل ما يصل
(( قمنا نحنا عم نعمل الغدا وقت سمعت صوت جوز خالتي وصوت الشب يلي جاي معو ))
جوز خالة هيا: اهلين وسهلين يزن تفضل تفضل ..
صابني الفضول وصرت اسأل عنو خالتي ..
هيا : خالتي مرتو ليش ما اجت معو
خالة هيا: جاي بشغل لهون ما فيه يجيب معو حدا
هيا : كيف بيتركها لحالها
خالة هيا: بتركها عند اهلها ... حرام يزن صرلو مجوز 10 سنين والله ما طعمو الولد
ام هيا: ييي الله يبعتلو
( خلصنا تجهيز الغدا وفوتناه على غرفة اول ما فتت شفت يزن عم يلعب ابني وبس شافني صفن فيني انا ما عطيت الموضوع اهميتو ..صرت صب الاكل بدون ما اعطيه ايا اهتمام ..يزن جمالو عادي عيون بني شعر اسود وبشرتو بيضة بس كان جدا انيق ومحترم وشخصيتو حلوة وعمرو شي 28 ))
بعد ما خلصنا اكل قمت انا واختي مشان نجلي جلي الغداء وامي وخالتي وجوز خالتي كانو قاعدين مع يزن انا صرت اسمع أطراف الحديث وقت كنت عم اجلي لانو الصوت ما كان واضح كثير
يزن : اخي لمين هاد الولد
جوز خالة هيا: هاد ابن هيا
يزن : وين جوز هيا
(( أدخلت امي وصارت تحكيلو قصتي مع طليقي الاول والثاني وانا عم اسمع من جوا المطبخ ))
يزن : بصراحة انا جاي من اسطنبول لحلب مشان اتجوز لانو مرتي صرلي معها 10 سنين وما جابتلي ولد وانا ناطف قلبي على ولد واذا هيا بتقبل انا طالب ايدها على سنة الله ورسوله
نصدم جوز خالتي لانو بيعرف انو يزن بحب مرتو كثير بس رد عليه وقال : حقك
انا وقت سمعت هيك حكيت بيني وبين حالي انو معقول هاد يلي شايف حالو بدو ياني وخلصنا جلي وجهزنا الاراكيل والفواكه وفاتت اختي وانا ستحيت فوت
ام هيا : لك يا هيا يلا تعي ليش لسعتك بالمطبخ
هيا : مشغولة ماما مشغولة
اجت لعند خالتي لقتني قاعدة على بالمطبخ
خالة هيا ضربت ايد على ايد وقالت : لك انتي ليش قاعدة هون ما تجي تسهري معنا
هيا : بصراحة مستحية.... ماعم احسن فوت
ضحكت خالتي عليي : مستحية لكن لك تعي تعي
هيا : امانه خالتي ما بحسن
تركتني خالتي وفاتت خبرت الكل انو مستحية مشان هيك ماعم افوت ....بهل وقت جوز خالتي طلع عندو شغلت ضرورية وراح وضلت خالتي وامي واختي قاعدين مع يزن
ام هيا: تعي يا بنتي ...مافي شي تستحي منو
فجأة سمعت صوت يزن عم يناديلي : هيا تعي تعي انا ماني وحش ومارح اكلك ...تعي بحيتي صوت الموجودين
اخذت نفس عميق وحاولت ما اتوتر وفتت على غرفة لقيت ابني غفلان بأيد يزن اخذتو ونيمتو بالغرفة الثانية ورجعت قعدت معهم وهون يزن صار يحكي عن حالو لامي ولالي بس انا ما كنت عم فكر بالزواج وبعدها طلب الزواج مني بوجهي
يزن : هيا شو رايك تتزوجيني
هيا : بصراحة انا ماعم فكر بالزواج
يزن : ليش ...اذا مشان ابنك انا بوعدك كون اب مثالي لابنك
هيا : طيب بفكر بالموضوع
خلصت سهرتنا ونام يزن بالصالون ونحنا فتنا نمنا وثاني يوم الصبح فقت لقيت يزن عم يستناني لفيق عند باب الصالون
يزن : صباح الخير
هيا : صباح النور
يزن : تفضلي جبتلك هدية
هيا : اسفة انا ما فيني اقبل هدية هلق
يزن : شو يعني كبها .... خلص خذيها جبتها ومشي الحال
اخذت الهدية من ايدو وفتحتها كان بقلبها تلفون Samsung مسكتو بين ايدي وسألت يزن : وهاد انا شو بدي اعمل فيه
يزن : هاد مشان ترديلي جواب عليه اذا اي او لا .. واذا قبلتي مشان نتواصل عليه
بعد إلحاح منو اخذت التلفون وامي اتصلت بأبي وخبرتو وثاني يوم اجا بابا وشاف يزن وتعرف عليه وحبو لانو واعي ومثقف وحكو بالموضوع وقلو انو بس بدو يسألني اذا انا موافقة او لا
يزن : قوم هلق اسألها عمي اذا ما فيها ازعاج
ابو هيا : طيب يا ابني
اجا ابي لعندي وفاتحني بالموضوع وانا بصراحة كان بدي لانو يزن قال انو رح يصير اب لابني وحسيتو انو حبو كثير اما اهلي ما كانو يحبوه لابني
واقفة على يزن ونقرأت فاتحتنا وثاني يوم جبنا المحابس ولبسناهم
بس يلي كسرني انو يزن قال انو رح يكون زواجنا اول فترة بالسر مشان مرتو ما تعرف وينكسر خاطرها وتتركو لانو كان يحبها كثير
قعد عندي يزن اسبوع وبعدين راح على اسطنبول واتفق مع اخي انو اسكن عندهم صار كل يوم يزن يحكيني على التلفون وانا تعلقت فيه كثير وحبيتو لخلصو تزبيط البيت وبعدين نزل على حلب واتزوجنا وطلعنا سوا على تركيا وقت فتت على البيت نصدمة فيه كان بيت كوخ وقديم مع انو مزبطينو وداهنينو بس كان شكلو كثير مقرف
يزن اشترى ماكينات خياطة بس ما حسن يجيبهم على اسطنبول وتركهم بغازي عنتاب
صار كل يوم باليل يجي يزن يشوفني بعد شغلو ومرت اخي كانت لسا عاروس جديدة مثلي بس ما كان الها امان ابدا كانت كل ما يجي يزن تتمكيج وتتعطر وتطلع تقعد معنا ...مرة ...ومرتين ....وثلاثة ...وبلاخر انا ماعد حسنت اسكت رحت لعندها وقلت
هيا : يا فاتن وقت يجي يزن لا تقعدي معنا بدنا ناخذ راحتنا هوي بيجي هل ساعتين وبروح
حطت ايديها على خصرها وقالت بصوت حاد : اي انا بدي اتفرج على تلفزيون ولا هاد الشي ممنوع
هيا : لك مانو ممنوع بس معك طول النهار احظري تلفزيون بس وقت يجي يزن تركينا مع بعض شوي انا بدي شوف جوزي
فاتن : اي شوفيه وكأنو حدا مانعك
سكرت النقاش معها لانو ما بتتناقش ابدا...كان لسانها اطول منها وحكيت لأخي كنا قاعدين على صفرة الغدا وقت ناديت لأخي كرمال احكيلو
هيا : اخي ممكن احكي معك كلمتين
اخو هيا : اي اختي احكي شوفي
هيا : اخي بس بدي منك تحكي لمرتك وقت يجي يزن تتركنا نقعد لحالنا شوي ...لانو من وقت يجي لوقت ما يروح وهيي قاعدة معنا
اخو هيا : طيب اختي ولا يهمك انا بحكي معها
وبعد ما حكا معها كمان ما استفدت شي وزادت عن حدها ..وانا بعد شهر من زواجي مع يزن حملت ويزن طار عقلو من الفرح وقت عرف وكل يوم ياخذ ابني معو على البيت وفرجاه لمرتو بس جمالها انو ابن رفيقو وياخذو ويجيبو معو وكثير يدللو ومرت كنت قاعدة مع يزن وصار يشكيلي عن مرت اخي
يزن : هيا !!!
هيا : اي حبيبي
يزن : بدي احكيلك شغلة بس خايفة تزعلي
هيا : احكي ما بزعل
يزن : مرت اخوكي عم حس حركاتها غريبة معي واوقات بتعمل حركات إغراء
هيا: شووو لا يزن مو معقولة
سكر يزن عن الموضوع بس انا كنت حس نفس احساسو صار يجي يزن وانا روح على مطبخ واعملو الاكل يلي بحبو وكانت فاتن بس تشوفني قمت تقعد مع يزن وتدردش معو بس يزن ما كان يحبها ابدا وبس قوم على مطبخ يقوم معي
هيا : ليش اجيت لهون
يزن : لاني عم اشتقلك ((لفني من خصري وقربني لعندو ولا فاتت علينا فاتن
فاتن : اجيت ساعدك بالأكل هيا
((ولا اعتذرت ولا شي كانت عينها وقحة كثير واجت لتضل معنا كنت حسها وسخة كثير ))
تغدا معنا يزن وراح وانا قلت لفاتن اني رح فوت اتحمم ووقت فتت على حمام ما لقيت الصابونه ورحت اسأل فاتن عن الصابونه
فتحت الباب بسرعة: فاتن وين الصابونه ؟؟؟
وقت فتت لقيت فاتن عم تحكي مع شب صوت وصورة انا نصدمة منها وهيي تلبكت وسكرت التلفون بسرعه
هيا : مع مين عم تحكي
فاتن : اااه مع اخي .. عم احكي مع اخي
هيا : كذابة لو عم تحكي مع اخوكي ما كنتي تلبكتي هيك
فاتن : بحكيلك بس امانه ما تحكي لحدا
هيا : احكي
قربت منها وقعدت على طرف التخت
فاتن : بصراحة رفيقتي قالتلي انو حبيبي السابق بدو يحكيني بشغلة ضرورية وانا حكيتو لاعرف شو بدو
فتحت عيوني على وسعهم وحكيت بصوت حاد : عم تخوني اخي ..
فاتن : لا لا ماعم خونو
هيا : لكن يلي عم تعمليه مو اسمو خيانه
فاتن : مشان الله لا تحكي لحدا ...يترجاكي
حاولت أهدي اعصابي : طيب بوعدك ما احكي لأخي بس انتي ما ترجعي تحكي معو
فاتن : والله مارح ارجع احكيه وخذي هاد كرت الذاكرة فيه صوري وصورو كسريه
اخذت منها كرت الذاكرة وطلعت من الغرفة وحطيتو فوق خزانتي وفتت اتحمم وانا بالحمام اجا يزن
يزن : هيا .. يا هيا
رديت عليه من الحمام : يلا انا بالحمام ستناني بالغرفة طالعه
فات يزن على غرفتي وشاف كرت الذاكرة اخذو وخباه ووقت طلعت قال : استنيني رايح وجاي بسرعه
هيا : طيب حبيبي لا تتاخر
طلع يزن على شارع وحط كرت الذاكرة بتلفونو ليشوف شو فيه وشاف صور الشباب وجن جنانو وفكرو الي ستنا اخي ليجي من شغلو وحكالو عن كرت الذاكرة انا لبست ولبست ابني وقعدت بغرفتي عم استنا يزن ليرجع وفجأة دق الباب بقوة رحت لافتح مسكني يزن من شعري وشحطني على غرفة
هيا : شبك يزن مشان الله تركني .. شبك ((لحقو اخي وقفل باب الغرفة ))
يزن : وليه مين هدول الشباب
هيا : لك انو شباب ... مشان الله عن شو عم تحكي
صار يضربني ويحكي : احكي وليه مين
انا صرت حس بوجع ببطني لاني حامل : مشان الله مو فهمانه عن شو عم تحكي
فتح الموبايل وفرجاني الصور : هاد الكرت كان بغرفتك ولقيتو كلو صور شباب
انا صرت صرخ وابكي : هذا الكرت مو الي والله مو الي
يزن : لكن لمين اذا مو الك
هيا : هذا الكرت لفاتن ...
((اخي انصدم وفتح الباب وركض ينادي لمرتو وسألها عن الكرت وبدون خجل قالت انو الكرت ألها ))
قرب مني يزن وصار يعتذر : اسف يا عمري بس وقت فتحت الكرت ما تحملني عقلي
انا عم ابكي واتوجع : امانه يزن بطني حاسة حالي عم انزف
جن جنانو يزن : شوو عم تنزفي
((طلب تكسي بسرعه ورحنا على الدكتور وعطاني ابر مثبت حمل ... قعدت نهار كامل بالمشفى ورجعنا على بيت ثاني يوم الصبح ولقيت اخي لسعتو عم يحقق مع مرتو وهيي حكتلو كلشي وبدون خجل ..وجوزي اتصل بامي وحكالها كلشي وامي اتصلت باخي وقالتلو طلقها قبل ما تحمل بس اخي ما رضي لانو بحبها ))
مره كنت قاعدة عم اعمل الغدا فاتت فاتن لعندي وركت حالها على الباب وقالت بكل عين وقحة : سمعي انا ماعد بدي يزن يجي على هاد البيت
هيا : بلا شو وليش بقا
فاتن : عم خاف على حالي منو وخايفة
هيا : عنجد ... لك انا يلي عم خاف على جوزي منك
(( تركت من ايدي وطلعت من المطبخ بس كان فيي نار جواتي ... وزادت المشاكل بيني وبين مرت اخي ويزن يضل يشكيلي عن تصرفاتها .. وكل ما بكون اخي مو موجود اسمعها عم تحكي مع حدا بالغرفة وبدون خجل كانت تحكيلي انو لسا عم تحكي حبيبها القديم )
وضاقت أحوال يزن ونزل على سوريا مشان يجيب سيارة يشتغل عليها لانو ماعد قدر يصرف عليي وعلى مرتو وكان نزل شهرين وانا صرت 6 شهور اجى يزن من سوريا وشاف بطني كبران والولد عم يتحرك طار عقلو وفرح كثير واخي قرر يطلق مرتو وبدو يوديها لعند اهلها انا اتصلت بيزن وحكيتلو انو بدي انزل مع اخي مشان شوف اهلي ويديرو بالهم عليي لان كان حملي صعب اول شي ما كان موافق بس انا اقنعتو ونزلنا على حلب واخي اخذ مرتو على غازي عنتاب
بعد فترة قصيرة يزن اتصل باخي وسألو عن ماكينات الخياطة يلي كان مأمنهم عند بيت حماه واخي طلع بايعهم وصارف حقهم ... وهدول الماكينات سعرهم غالي وكان يزن بدو يبيعهم ويفتح بالمصاري مشروع ..انا كنت قاعدة وعم اسمع مكالمة اخي مع جوزي
اخو هيا: سماع انت ماعندك شي عندي .... أعلى ما بخيلك ركبو .... وحتى أنسا انو عندك مرت عنا ... الله معك ..
ترك السماعة من ايدو وصار يعيط فيني ويقول : والله اذا بسمع انك حكيتي مع هاد الحيوان لاطلع بروحك
انا لجأة لامي وابي بس كمان امي وابي وقفو مع اخي وصارو بدهم يطلقوني من يزن وانا كثير تعبت اخر فترة بحملي وصار وقت ولادتي ورحت اولد ...وولدت وجبت صبي بيشبه ابوه ...كلشي فيه بيشبه ابوه
خالة هيا: هيا حبيبتي فيي مكالمة لالك بس ما بتحكي لحدا انو انا عطيتك تحكي مشان الله
كنت قاعدة على سرير المشفى وتعبانه كثير اخذت التلفون من خالتي وواول ما حطيتو على اذني سمعت صوت يزن
يزن : الحمد لله على سلامتك يا عمري ...كيفك
انا صرت ابكي واشهق
يزن : حاج تبكي يا عمري... يا ام ولادي ... لا تخافي انا رح جيبك لعندي انتي مرتي وام ولادي
وانا عم احكي مع يزن فاتت امي وشافتني عم احكي معو وعصبت كثير واخذت التلفون مني
هيا : مشان الله ليش هيك عم تعملو فيني انا شو ذنبي انا ويزن ينحب بعض وبدنا بعض
ام هيا: خرسي وليه وانتي اختي احكي لابن حماكي انو ما عندو شي عنا ...فهمانه
طلعت امي من الغرفة وانا صرت ابكي وخالتي تهديني ووقت امي خيرت اخي ...اخي اتصل بمرت يزن وحكالها انو يزن متزوجني وهلق صار عندو صبي مني ووقت خبرت مرتو وواجهت يزن ... ويزن حكالها الحقيقة تركتو وراحت وهون يزن مرض لانو بحبها لمرتو كثير وزادت المشاكل بينو وبين اخي وصار اخي يحكي ليزن حكي على لساني انو ما بدي ياه وبدي أطلق بس انا كنت ادعي ليل ونهار انو يزن ما يتركني
(ضلو اهلي ورا يزن لحتى طلقني بعد ما ولدت باسبوعين واهلي نبسطو كثير بس انا ما قطعت الامل من الرجعة وصار يزن يحاول يحاكيني بالسر من عند خالتي وانا اوقات احكيه
ومر 6 شهور وانا ويزن نحكي مع بعض بالسر لوقت كنا سهرانين وقال اخي لابي
اخ هيا : والله يا ابي كنت قاعد مع رفقاتي وواحد منهم ملان مصاري وعم يدور على عاروس وبس عرف انو اختي أطلقت طلب ايدها
انا هون جنيت وصرت صرخ: انا ماعد بدي اتزوج انتو خربتو بيتي ...
قام ابي وصار يصرخ بصوت عالي : شلون ما بدك تتزوجي والقردين يلي عندك مين بدو يصرف عليهم سمعي وليه بكرا بتجهزيلي ثياب عبد (( عبد اسم ابني الكبير )) بدي وديه لابوه انا ما فيني اصرف عليكم
هيا : لا مشان الله يا ابي انا ما فيني عيش بدونو
ابو هيا : سمعي الكلام يا بنت بتضبي غراضو بكرا بدي وديه لابوه
(( انا قعدت وصرت ابكي واشهق وما حدا حاسس فيني.. ابي بدو ياخذ مني ابني .. بعد كلشي عملوه فيني كمان بدهم يحرموني من ابني ))
مر اسبوع على هل الحديث وابي ما رجع فتح هل موضوع معي وانا انبسطت فكرتو غير عقلو بس طلع غير هيك
بيوم بعتت ابني مو اخواتي يشترو من محل قريب من بيتنا رجعو اخواتي عم يركضو وعم يحكو : هيا ...يا هيا بابا اخذ عبد يشتريلو العاب
انا جن جناني وقلبي حسني انو الحكاية مو هيك لانو ابي ما بحبو لابني وركضت لعند امي واترجاها تحكي مع بابا
ام هيا: يلا رح احكيه
مسكت التلفون ودقت لابي: اي وينك ابو سامي ... وين عبد ... لك حرام عليك جيب الولد لامو ... شلون يعني مشي الحال
انا قلبي صار يبكي من جوا وماعد اكلت مثل العالم ونشف حليبي من الزعل وصار كل حياتي إهانات واشتغل مثل الخدامة
وخبر يزن انو اخذو ابني لعند ابوه زعل عليي وحكا مع اخوه وصار يعيط وضل سنة كاملة عم يحاول يرجعني بس مافي امل ... وخبرت بعد فترة انو اتزوج بنت بنوت وبعتولو ياها من سوريا لتركيا بس طلع معها مرض اسمو إم إس يعني مثل انفصام شخصيه واخذ العروس الجديدة وطلع فيها على المانيا ... ونحنا طلعنا على تركيا تهريب مع بيت خالتي وسمعو اهلي انو التراك بيدفعو مصاري كثير للسوريات وقررو يجوزوني لواحد تركي
وانا اعاندهم وما كان بدي اتزوج ابدا بس اخي يحبسني بالغرفة ويضربني
ومرت تقدملي واحد تركي عمرو 80 سنة وانا عمري 24 سنة وانا عاندت ما بدي ياه واخي كل يوم يصبحني بقتلة ويمسيني بقتلة ويحبسني وعيشني بجحيم لحتى وافقت عليه ومن عادات الأتراك بيدفعو حق الحليب للعاروس واخي اخذ المصاري وراح اتزوج فيهم وانا هلق صرلي سنة ونص عايشة مع هل ختيار المخرف بعذاب وابني ما بعرف عنو شي ولهل وقت ويزن بتصل بامي مشان أطلق من التركي ويرجعني على عصمتو بس انا لسا عندي ايمان انو الله رح يفرجها عليي وبتمنا من كل يلي سمعو قصتي يدعولي . ..يدعولي الله يفرجها عليي وبجمعني بابني واخلص من هل ختيار والله كرهانة حياتي معو
انتهت دائما نقول الحمد لله ❤ نحنا يلي عم نشكي من حياتنا لو تقارن حياتنا بحيات غيرنا لنطلع نحنا عايشين بجنة بس مو حاسين بالنعمة يلي نحنا فيها
تابعووووووو صفحتي لكل جديد
