رواية المفقودة الفصل الاول والثاني والثالث بقلم الكاتبه زينب ماجد حصريه وجديده على مدونة النجم المتوهج للروايات والمعلومات
 |
( الخروج من الميتم )
بمشهد للمدينة من فوك تشوف منظر من الخضار الواسع اليرد الروح .. تتقرب اكثر اشجار بكل مكان ونهر الفرات يمتد على طول المدينة .. بيوت مختلفة بين البيوت البسيطة وبين البيوت الواسعة والمرتفعة .. كأنها قصور
تتقرب اكثر وانت تشبع ريتك من هو شط الفرات والاشجار اللي تحيطه .. منظر لشاب ثلاثيني ... .. يركض بقوة وهو حاط السماعات بأذنه ، لابس شورت وفانيلة تعلاكة رياضية وشوز ويهرول بحركات رياضية .
لحنطي .. اصلع الراس ملتحي
اول نظرة تشوفه تعرفه رياضي من تقاسيم جسمه وعضلاته المفتولة
يوكف فجأة يم حايط واكع نصه .. يرفع رجله ويخليها ع الحايط ويأدي حركاته الرياضية .. بدون أهتمام للمحيط الداير ما دايره .
نقطة عرك تنزل من جتفه على زنده، صدره يرتفع وينزل وصوت انفاسى تتعالى وهو يرفع ايده لاذنه حتى ينزل الايربود تا يعرف صاحب السيارة الوراه شيريد..
طلع السماعة من اذنه واندار ..
وطبان واكف عند سيارته لابس دشداشة ولاف الجراوية على راسه منتجي ويسمع حجي : الا صدك الأستحو ماتو
عيفان : الحچي وياي ؟
وطبان : أحچي عن فرد ناس يحجون بالدين وولدهم يتعاكبون بيوت الوادم تا يدحگون بنات الناس بلا حيا ولا مستحى .
جر الايربود الثاني من اذنه وتوجهله تا يوكف عندا : دام حجيت خلي الحجي ع المكشوف وكول شنهي غاية كلامك .
- الحليم تكفيه الأشارة
- وان جنت مو حليم وشراي كوان .. شتكول بهاي ؟
وطبان ركب سيارته وتجفاه ..
وعيفان ضل خازره ويمشيلا وناطر منه الكلمة اليزل بيها خاطر يهد عليه ويفرغ طاقته بكتلته .. بس وطبان سحب نفسه وداس بسيارته .
ضل عيفان مدحك وراه بخزره .. سحب التليفون من جيبه طفاه .. وضم الاير بود بمكانهم .. وكمل ركض للبيت وهو يفكر بكلام وطبان .
يوصل بيت والده الحاج جحيل
يفتح الباب لبيت جبير مساحته ١٠٠٠ متر
اول ما تدخل الباب تلكى حديقة جبيرة تطلع مساحتها ٤٠٠ متر كاعها ثيل اخضر ومزروعة باشكال الاشجار والنخل، لما توكف وتتأمل الحديقة تحس بهوى نقي يدخل ريتك اول ما تتنفسها ...
وكف وهو يخلي اصبعه ويصفر
جلب ضخم نايم بالحديقة بمجرد ما سمع صفير عيفان فز الجلب وكام ينبح ويركض اتجاه صاحبه ويكمز عليه بمحبة .. وعيفان يضحك ويلاعبه .
يطلع اكل ويحطه للجلب مالو .. ويمسح على راسه وهو يباوع بيت ابوه .. بيت تصميم عراقي قديم معاد ترميمه ومصبوغ ومرتب بعد احداث الحصار والقصف اللي جرا على مدينة حديثة .
على يسار الحديقة باب خشب عريض ، فتح الباب لديوان جبير تطلع مساحته ٢٠٠ متر مأثث بتخم داير ما داير المجلس وعلى راس المجلس صورة جبيرة للحاج جحيل صاحب البيت ، توقع والده بالديوان بس ما لكاه
سد باب الديوان ومشى لباب ثاني يصير بوسط البيت .. الباب خشب جبير طلاقتين فتحه .. وصار البيت كله كدامه الصالة الغرف الدرج .. ما شاف أحد بس سمع اصواتهم كلهم بالمطبخ .
سد الباب وتوجه على يمين البيت ممر كلش طويل ياخذك لمساحة ما ورا البيت .. المساحة معزولة عن البيت بغرفة وحمام محد ساكنهم .. وكف يم باب الحمام .. نزع الشوز من رجله وخلا ع الرف وغسل رجليه ولبس نعال وهو ينشف بالخاولي
مشى من نهاية البيت باب فات منها ع المطبخ
مطبخ جبير .. كاونتر لون خشبي وميز طويل يتوسط المطبخ .. يدخل باب المطبخ الحجي جحيل عمره ٧٢ سنة وهو يتچى على عكازته : اصبحنا وأصبح الملك لله تعالى .. عيفان اجيت يابه
- صباح الخير حجي ..
- ول ابني هالرياضة تنفع بشوارع الفجيرة غاد.. ما تنفع بشوارعنا ونحن ولاية عرب .. يحسبونها عليك يا ابني بغير حساب .
- قررت استقر هينا مالي رجعة للأمارات يابه راح اكضي ايامي على كلبك تحملني .
- ان جان على كلبي ول يابه فحملك عليه ولا حمل العسل لجن انا لمصلحتك وليدي .
- الله يديم عزك حاج
ندسه وهو يكلو : سمعت امس مرتك تگرگ وانت طلعت من حجرتك ثكلان.. شبلاكم يبوي !؟
- حاج ثلث سنوات وانا عازم على طلاكها وهساع رجعتها ومتحملها لجلك كونها بت عمي لجنها تموع الاذان بكركتها وانا فاض كلبي من نجرتها ما جنها تسمع ولا راضية ترد ول يابه احترت بيها .
- اسمعلها ول ابني المرة مسكينة
- اسمع القوانه نفسها مالت ١٢ سنة ؟ شنهو البيدي اذا الله ما كاتبلنا جاهل كتلها يا بت الناس هديني وامشي احسبي العيب بيه وعيفيني .. لا راضية تهدني ولا راضية تسكت .. اذني لو صب هم تموع من نجرتها .
حجت امه نضال : عجل شتسوي يا ابني تصبر وادعي ربك هم مسكينة تتمنالها جاهل حالها حال هالنساوين ..
- وانا شنهو البيدي يما ؟ الله الوهاب ماهو انا .. حالي من حالها اتنطر الجاهل من ١٢ سنة بس الله ما كاتب .. نحمده ونشكره .. غير هالحجي ما عندي احجيلهياه .
حجت جدته الحجية نوعة ام الحاج جحيل يطلع عمرها ٩٥ سنة : تزوج الثانية جده .. عليش صابر .. ان ما نطاك بالاولى يرزكك بالثانية.
شهكت امه وهي تكله : دخيل بختج حجية ياخذ على بت اختي دخيلك ربي شكل لاختي اطلع وياها بسواد الوجه عكب كل هالسنين ؟
تبسم عيفان وهو يكلها : جده واسطتها قوية .. المرة بت عمي من جهة وبت خالتي من جهة منين ما ادير مضيوم ، اكول جده خليني على وضعي وحدة وما متحملها الثانية مو بس اهج للامارات .. لا حتى من كاع الله اهج ..
حجت جدته : يا فلك وتهج من كاع الله وين تمش يجده ؟
- لكوكب اخر جدة .. لكوكب ما بيه نسوان ولا نكد ولا گركة وهاي كالت وذيج حجت.
- يمن فلشكم كون الصبح تصيحون اهج لديرة ما بيها مرة ولو جا الليل هلبت وحيدكم يشوفلا مرة تا يرجف تكول سعفه نخل ويرول اعليها .
ضحكوا بصوت عالي
وهو يكللها : تمنجدنا ول يابه .
- موش نحجي الحگ ؟
كاعد يحجي دخل عمران الاخ الجبير وضرب على جتف عيفان وهو يكول : صباح الخير ، خير يا طير اليوم عيفان مكابلنا من الصبح .. شصاير بالدنيا .
ردوا الصباح وعيفان يبتسم ويكلو : جنت طالع اركض توني رديت .
كاعد يحجي دخلت مرته ..
سكت وعكد حاجبه .. دخلت بلا صباح تسوي ريوك متكاون وياه ، حجه : اترخص اروح اسبح
حجه ابوه : اسبح وانزل خاطر تتريك ويانا
- تأمر يابه
صعد لغرفته اخذ منشفة وتراك ودخل سبح وطلع لكى مرته موجودة ، ما حجه ، بادرت هي وكالتله :
بيان : جنت تحجي علي كدام اهلك .
ما جاوبها ..
حجت : فوك ما متحملتك انت الما راضي امس للصبح ما بينت وساعة التبين تخليني علج بحلوكهم .
- ول انا مو خوش ادمي شجابرچ بين ؟
- الجابرني عليك حجي الوادم .. واصبح مطلكة خاطر انت ترتاح !؟
- لا حول ولا قوة الا بالله ، توا صبح مو مالت كوان يا مرة.
- رايده تسوي تحليل
- وانا كلت ما اسوي
- عجل العيب منك هالما تريد شنهو ذنبي انا ١٢ سنة بلا جاهل وانت متكبر علي بتحليل
- يول العيب مني هديني اشرد من نجرتج بالليل تكملينها علي الصبح ما صايرة .
هدها ونزل .. وهي نزلت وراه
دخلوا المطبخ اثنينهم عاكدين حواجبهم
لاحظ الحجي وجه عيفان ومرته..
كعد عيفان .. والنسوان كاعدات يطلعن الجهال للمدرسة ، ونسوان ابو اثنيهم وحدة مجاابله الاخرى على يمينه وشماله ، والحجي يكول : ينعل هالدنيا هاي الخلتنا محنگلين على هالكراسي وين ايام النمد السفرة ونلتم .. هساه الحيل ماهو وتحط اعلى الكاع
حجت زوجته الاولى جليلة : الف الحمدلله والشكر حجي كلشي يهون ماطولك سكف فوك روسنا وتكحل عيونا بكل صباح
تضايقت زوجته الثانية نضال وهي تردها : بالله ما تشوفيلنا بتج شو ما كعدت شنهو هم نومتها ظهاري اليوم..
ردتها : يا نومتها داده كاعدة وهساها تحدر وتحب راس ابوها وتكعد ..
وهي تحجي تدخل سهاد اخر العنقود ابيت الحجي عمرها ٢١ سنة ما متزوجة .. وبقية بناته كلهم متزوجين باست راس ابوها وهو يرضى عليهم
باوع اولاده ..
عمران وعيفان والنسوان موجوده
حجه : عجل سلوان ما هو ؟
حجت مرته : ندهته بس سهران ما يكعد
-اصعدي انهديلو كليلا ابوك يكول انزل .
صعدت كعدته غسل ونزل حب راس ابوه وكعدوا كلهم ياكلون بس عيفان كاف اديه ما ياكل وعاكد حواجبه .. رجع دحك على مرته عاكده حواجبها هي اللخ وما تناظرله .. وواحد يحاول يتحاذى الثاني حجه الحجي : بيان دحجي زلمتج عليش ما ياكل وحطيلو مشتهاتو بنتي الله يرضى عليج .
حجت من غير خاطر وهي تباوع لعيفان : شتريد ؟
ما جاوبها
حجت امه نضال : حطيلو بيض سلك هو ما ياكل اكلنا هاذ ما تعرفين زلمتج .. سلكت ثلث بيضات قاد نسيتن تحطوهن .. كومي جيبيهن اله .
كامت كشرت البيض حطتهن كباله ، حجه عيفان : واني جاي عرضلي وطبان
عمران : وشرايد منك ؟
ما راد شي لچنه يبسمر بسوالف شينة
الحاج : وشنهو السوالف ؟
- تا يكول ناس ما بكصصها حيا تداور عيونها على بنوات الوادم .. ويتباهون بدين وحجي ماصخ .
الحجي : وياهو المقصود بكلامو ؟
باوع عيفان لسلوان .. وحجه : ما عرف حجي بس الاعرفو الصبر فاض بخلكي من وطبان وسوالفه وكلامه اطخ بمخي تا اشيل هالبرنو واهد افرغو براسا، وطبان لازم ينحطلا حد .
عمران : عيفنا من المشاكل يول ما عولنا على الله كضت الحرب واخذنا نفس تا نرجع للطك والكوان .. هدا وخلا يولي .
حجه الحجي : عمران شوف شنهي اسباب حچي وطبان .. وهدوا الكيض عنو .. ما رايدين ندخل بمشاكل وكوان هم زلم شر وما بيهم حچاي حگ ..
- حجي اذا تسمع ما طولني رجعت لهين اكول لو تخليني على معامل بغداد ..
- تا تشرد من البيت ول ابني يمتى تحط بكاعك وتجابل اهلك .
حجت مرته : لا عمي هو ما رايد يجابلني ما عده طلابة ويا غيري .
تنهد وهو يغير السالفة ويحاجي اخته : سهاد اذا كملتي بس صبيبي جاي وكصصيلي طماطة وبصل ويا البيض .. وخبز .
حجه الحجي : اكعدي سهاد .. بيان كومي شوفي طلبات زلمتج
- خلها تتريك .. انا ما مشتهي شكرا .. دايمة .
كام من مكانه وطلع حجه الحجي : يمتى ينتهى هالكوان والمناجر بينكم ول بنتي ؟
- عمي كل الردته منو تحليل .. ما يرضى
- يعني ابالج العيب منو !؟
- ما نعرف كبل لا نحلل
- ولو ما طلع الخلل منو شراح تعملين !؟
سكتت ، حجت نوعه : ياخذلو مرا .. عجل ما بينو عيب وتريد تعيبو ويطلا بلا عيب شينة لو سكت وضل بلا مرا
حجت نضال : خلج محضر خير يحاجة بدل ما نهديهم تهججين النار بينهم .
- لو ما جانت بت اختج جان ساعتها لگينا خبر زواجته بكل جريدة ول يمعذربة .
عمران : مع هذا اني أيد بيان .. لازم عيفان يسوي تحليل خاطر لو بيه خلل يعالجو تا يخلص من هالعلة صالولو ١٢ سنة بلا جاهل حكا وحكها .. مرة هم تريد جاهل بحضنها .
حجه الحجي : سالفة التحليل خلاها علي .. ممنوع تفتحين وياه هالموضوع دامه يجلب النجرة والكوان بينكم .. اتركي هالموضوع علي وانت شوفي زلمتج واتراضي وياه .. المزاعل والمناحر ما يجلب غير الحظ الردي الج ولرجلج .. ياله بنتي .
كامت من مكانها من غير طيب خاطر وصعدت
لكته يبدل ملابسه .. بنطرون اسود وقميص ابيض .. وعليه يلك اسود وكاعد يكف بياخاته وعدل بيهن ويفتل بعضلات ايده ويدحج بالمرايا .. وهي واكفة تدحكلا شلون يتبختر بجسمه .. ومقهوره من هالمنظر الما جايبلها بس عيون البنات التداور حواليه ... حجت : وين رايح ؟
- لبغداد عندي شغل
- ما خلصنا من الامرات تا تطلعلنا بغداد
- اكدر اعرف شنهو الرايدته ؟
- رايدة تباوعني اشوفني شبية ما بيه بكد ما اباوع روحك بالمرايه وتتبختر بيها
- احسبيني كعدت ، شنو الرايدته غير افهم
- لو يهمك امري جان فهمت بلا حجي
- وانا نبي لو ساحر خاطر افهم بلا حجي ؟
- المهتم يفهم بس حجيك حجي الما اباله هم
ترك تعديل الملابس من ايده واندار الها : اسمع !؟
- انا يوم الكالولي تردين لرجلج كتلهم عزال .. واتحطلي بيت ما احمل كوم هالناس اللي بهالبيت .. كل وحدة عدها كوم جهال والله جيف انا ما عدي يحسبني مسعده وتعاي اشتغلي شغلهن .. انا ما احمل جزعت .
- كولي اريد بيت وحدي يجرالج ليش هاللوك لوك لوك اني ياهو مالتي بتفاصيل النسوان .
- تفاصيل النسوان هاي لو اهمك جان ما كلت عنها تفاصيل .. وجان حسبتها هموم على كلبي تعل بيه كل وهلة .. بس هاي مشكلتك ما حاطني بحساباتك
- راح احجي ويا الوالد على بيت ان شاءالله ويصير خير .
- وابوك راح يرضى تطلع وتهد بيته !؟
- مو كتلج راح احجي وياه ونشوف
- راح يكلك طلعها بس اتزوج اللي تحطها بهالبيت طبعا اهم شي عندو لمة ولده وهالكوم جهال الحاطها على كلبو
- هسه انت تريدين عزال لو شنهو
- ولو كالك اتزوج !؟
- ول انا حاملج خاطر احمل اللخ انت هم ما ادري شلونج .
- طبعا ما حاملني كوة عليك رجعتي لو ما عيب من عمامنا وخوالنا جان طلكت وافتكيت مني .
- يولي نجره من الصبح كليلي تيسر وخلي الله يوفقني بدربي .
- موفق الله يفتحها بوجهك انا شرايدة منك قابل .
- الله يحفظج
حبها براسها وكاللها : محتاجة شي من بغداد اجيبو الج برجعتي ؟
- تبات لو ترد الليلة ؟
- اذا لحكت ارد واذا ما لحكت ابات غاد
- ووين تبات
- وين ما عدا الله كاع
- وياهو بيها هاي الكاع
هز راسه وهو يسحب تليفوناته والايربود وسويج السيارة يعلكهن ببنطرونه ويمسح على لحيته اخذ العطر يرش وهو يعرض نفسه كدام المرايا ويدحج
حجت : لا تخاف ينعجبن بيك ينعجبن لا تفتل بهالعضلات .
ضحك وكاللها : اودعناج يا اميرة النكد .
ضحكت وهي تودعه .
———
(في الميتم )
العراق_ كركوك
هوسة وليل .. وصوت رجلين تركض
ابجي اصرخ ما دا اشوف الملامح بس ابجي ابجي .. خايفة ومرعوبة ومدا اعرف شديصير انفتحت الباب وشفت وجه باجي سيتا .. مدت اديها عليه واني صرخت حيل ..
فزيت من فراشي مرعوبة
وبان كاعد تنده بيه فزتني من فزيت بقوة : هاي شبيج
- انت شبيج ليش هيج فززتيني
- شفززتج بس كتلج چچك
- جنت دا اتحلم حلم كلش مو زين
- وشنو هو
- ما اعرف كأنما ناس ديذبوني كبال الميتم ما شفت اشكالهم بس اصواتهم
- خاف مو حلم ذكريات صايرتلج كابوس
- اني دائما اكوبس بهالحلم نفسه .. بيش الساعة ؟
-ب٨ الصبح عدنا شغل هواي تكول الست نهار باجي سيتا رايدتنا عدها بالغرفة
-ليش ؟
-ما اعرف نروح ونعرف
- نتريك ونروحلها بالاول لو ننظف الغرف بعدها نروح ؟
-لا خلي نروحلها اول كبل الريوك والتنظيف
-تمام
كمت من مكاني كل البنات كاعدات دخلت للحمام غسلت ولميت شعري .. كمت اباوع لوجهي لو احط حمرة شوية هنا جان صرت اخبل .. بس يلا هم حلوة .
ظفرت شعري وحطيت كتر
ظفيرتي توصل نهاية ظهري شعري ثخين حيل حيل .. ولونه جوزي الست سيتا تكلي ( بيج خيط شكار ) .. نزلت خصلتين من كذلتي طوال يصيرن اطول من شعري وطلعت من الحمام
مشيت لبان ورحنا لغرفة مديرة الميتم نسميها باجي اسمها ( سيتا ) دكينا الباب ، صاحت : تفضل
فتنا كالت : يا اهلا وسهلا ببناتي شونهم الحبابات والجبيرات مال المعهد
ابتسمنا وفرحنا حيل لإن دا تضحك ويانا وترحب بينا مو كل ايامها هيج بس من اكو مناسبة او مسوين شي زين ، فحجين بكل فرح ونشاط وكلنالها : زينين
- احب اباركلكم هاي نتائجكم مال السادس اعدادي .. ناجحات اثنينكم ، عفية بيكم بناتي
فزينا واخذنا النتائج مالتنا واحنا نكلها : صدددددك
- اني كلش فخورة بيكم انتو بناتي وحبيباتي ومؤدبات وحبابات .. اليوم مو بس نتائجكم اليوم هو يوم عيد ميلادكم
- عيد ميلادنا !
- اي اليوم انتو صرتوا ١٨ سنة .. وصرتوا بالغات وجبيرات وراح تكدرون تعتمدون على نفسكم
فرحنا حيل بكلامها بس ما افتهمنا شنو يعني راح نكدر نعتمد على نفسنا ! كل فرحتنا بنتيجة السادس مالتنا ، حجت : وبهالمناسبة اليوم راح نسوي حفل جبير راح نحتفل بيه كلنا .
- يهيييييي
- راح تساعدونا بتحضير الاحتفال ولتحافون راح انطيكم وقت حتى تجهزون نفسكم وتصيرون امورات قمرات دا نحتفل بيكم الليلة هم بنجاحكم وهم عيد ميلادكم .
- شكراً باجي .
- ادللوا وهسه يلا تفضلوا روحوا كملوا شغلكم .
بوسناها وطلعنا واحنا نركض بالممر ونصيح : الناجح يرفع ايدوووو هييييي الناجح يرفع ايدوووو هييييي
رحنا على قسم الاطفال بالميتم .. بدلنا حفاظات البنات الصفار وبدلنالهم .. وانطيناهم للمطبخ ورتبنا اسرة الصغار مال البنات كاروك بصف كاروك .. نظفناهن كلهن ومسحنا الميزوة والكاع وطلعنا ..
رحنا على صالة الطعام .. هنا نجتمع كلياتنا حتى ناكل وجباتنا اليومية .. جانت باجي سيتا تلقي اوامرها علينا واحنا ناكل الريوك اللي هو عبارة عن صمون حجري وحدة وجبنايتين مثلث وبيضة سلك ..
وجباتنا بالاكل متواضعة ..
نادرا ما ناكل لحم بالشهر مرة او ماكو او مرات المشاهير او فد غني يسوي ثواب لاهله او لفد مقدس يسوولنا وجبات اكل تمن ولحم ويتوزع علينا وياه بيبسي وفواكه نطير من الفرح .. لإن البيبسي منضوكه ابد ممنوع بس من يدزوا تطوع .
بس اغلب ايامنا غدانا تمن فاصوليا حمص عدس بتيته او تبسي .. وقطعة فاكهة ، السمج تمر السنة والسنتين ومنضوكة .. بس الدجاج مرات يحطولنا قطع بالاكل.. من نلكى دجاج بالاكل عبالك شوف شماكلين نفرح حيل .
بس هو هذا الموجود من وعينا بالدنيا لحد هذا يومنا
ما عدنا دين معين .. لإن مديرة المعهد تركمانية وتشتغل بمنظمات نسوية ضد مبدأ الاديان .. نؤمن بالله وبس .. وهذا مدى معرفتنا انو اكو رب اسمه الله عايش بالسماء يسمعنا ويشوفنا بكل مكان وندعي وهو يستجيب النا اني دعيته كم مرة بس ما استجابلي بس مرة .. كلت يمكن مرات مشغول .. لان البشر هواي .
طلعات نادرا ما نطلع من الميتم حدنا حديقة الميتم ونرجع
مرات يسوولنا سفرة .. او منظمة تتبرع وتطلعنا .. فكله مخلصي داخل هذا المعهد احنا نسمي ما نسمي ميتم .
ما عدنا رجال غير الحارس مال الميتم
نشوف الشباب بس بالافلام .. اللي تختارها باجي سيتا نباوعها يوم الخميس بس .. نشوف ممثلين كلش حلوين وبنات حلوات وملابسهن حلوة .. بس احنا لا نلبس هيج لبس حلو .. ولا نشوف شباب حتى من نطلع سفرات .. تبقى باجي والعاملات محاوطاتنا ممنوع نختلط بأحد .
نظامنا بالمعهد نكعد ب٧ او كلش ب٨ الصبح
وننام الساعة ٩ بالليل .. بس مرات انعس وانام باقل من هالوقت .. لان نخلص النهار مدرسة وقراية و شغل وفر ولعب اني والبنات .
المدرسة تصير بصف البيت اهلية بس بنات ..
نصطف يوميا الساعة ٨ الصبح ووحدة ورة الثانية نمشي سرا لحد ما ندخل المدرسة .
مرات يسوولنا ندوات مثل ما تكول ( باجي سيتا )
ويعلمونا شلون المرأة العصرية لازم تكون .. وشلون تنشى وشلون لازم ما تخلي الرجل يتحكم بيها وما يتأمر عليها وهي افضل من الرجل وهي اقوى من الرجل ولازم ما نخلي الرجل يسيطر علينا ولا نخضع لرجل .
هو احنا شايفين رجال حتى يسيطر علينا
خلي نشوفه بالاول وعود نتفاهم منو اليسيطر
بس هي بعد باجي سيتا كل فترة تجيبنا وتلمنا وتكوم تحجي براسنا هالحجي لحد ما ننسطر وكلي ما نفتهم .
بس بيني وبين نفسي اتمنى احب رجال ويحبني مثل سندريلا .. وينقذني من هالمعهد المحبوسين بيه واصير اميرة والبس بدلة مال عروسات .
كملنا شغل وجابولنا كيكة مكتوب عليها چچك و بان .. وعليها لعابة باربي ووياها قطع كيك وببسيات هواي حيل فرحنا صغار وكبار كمنا نكمز وفرحانين اليوم راح ناكل كيكة ونشرب بيبسي .. فرحااااانين .
صارت بـ ٦ صاحتنا ست اميرة وطلعتالنا الفساتين اللي راح نلبسها اليوم ستن وردي وبيه ابيض . كأنما مال اميرات .. وصففت شعرنا .. وسرحته وسوتلنا فيكة لولوت الكذلة .. لاول مرة تحطلنا كحل قليل وحمرة خد وشفايف .. طلعنا كلش حلوات حيل حيل فرحانين اليوم .
مجنا نعرف الخبر اللي ينتظرنا .
صفكنا وشغلولنا اغاني ..
طبعا عدنا بالمعهد مواهب هواية تشتغل عليهم باجي سيتا ..
اني صوتي حيل حلو .. و بان تعزف كمان وبيانو وعود همينا تعرف .. فمسويتنا فرقة اني وبان .. بس احنا نحب نركص .. خاصة اني كلش احب الركص ..
مرات من ماكو شي ست اميرة انطلعنا ردح ونركص ركص شرقي .. يخبل ركصنا .. بس باجي تكولي لا انت اريدج تصيرين مطربة صوتج حلو راح تنجحين والكل يعرفج وتصيرين غنية .
واني افرح دام الشغلة بيها فلوس ..
خلال الاحتفال خلت بان .. تعزف ع الكمان واني اغني اغنية ( صغيرة جنت وانت صغيرون ) لما كملنا طلبنا منها نشغل اغنية ردح
ست اميرة طلعت النا ساجدة عبيد خالة ويا خالة
واحنا شدينا الوصل وكمنا نركص فد تونسنا ونسة
لحد ما ردنا نكطع الكيك ..
كالت النا باجي اتمنوا امنية ..
اتمنيت بكلبي احب رجال حلو .. احبه ويحبني ويصير عدنا طفل واصير ام وهيج .. من كالتلي فتحي .. فتحت
حجت : شتمنيتي
- سر
ضحكوا ، كالتلي : انت شتتمنين بالحياة شتصيرين
- ها شتمنى اصير .. اني اتمنى اصير ركاصة
ضحكوا الكل وبان كالت : حتى اني .. حتى اني
تشابكنا وضحكنا .. همست الها : شتمنيتي
- اتمنيت اتزوج
- اني هم ههههه
حجت باجي : ها شدا تبسبسوووون
ضحكنا .. حجت : بان سمتها منتهى الله يذكرها بالخير جانت معاونة ويانا بس چچك اني سميتج تعرفين معنى اسمج شنو ؟
- لا
- لا اسمج بالجنسية رسل اني اللي ما حبيته وغيرته وسميتج چچك .. ومعناها زهرة بالتركي لأن وانت صغيرة هلكد مجنتي حلوة جنتي تشبهين الوردة المفتحة .
ابتسمت .. اني وردة بيضا شكلي جميل
وكاموا الصغار يغنن وياي ويكملن .. ما احلى جمالي حيو الامين
للصحة للقوة اشربوا الحليب .. اشرب على صحتك واشكر الاله لازم تشكر ربك ابدا ما تنساه .. هييييي
كلها كامت تصيح حييي وطفنا الشموع وكصصنا الكيك وناكل ونشرب بشراهة وكلش مستمتعين بالطعم خاصة الببسي بيه غاز شي غريب ااااله نموت عليه طعمه كلش طيب .
واحنا دناكل حجت باجي : وبهاي المناسبة احب ابلغ چچك وبان ان هذا اليوم هو اخر يوم الهم بهذا المعهد
هي حجت وكفت اللكمة ببلعومي وكتلها : يعني شلون باجي
- صار عمركم ١٨ وصار لازم تغادرونا وتعتمدون على نفسكم بهذه الحياة
- ووين نروح ؟
- راح تروحون ويا الاستاذ منير ياخذكم لفندق هناك راح تشتغلون وتحصلون فلوس وتعيشون .
- ومراح نكدر نشوفكم بعد
- لا تكدرون تجون باي وقت تشوفونا لا ويمكن تشترون تليفونات .. وتخابرونا وتفتحون ويانا كاميرا وتحجون ويانا
- بس ست شلون راح نشتغل احنا ما نعرف شي
- راح تشتغلون مثل شغلكم هنا تنظفون غرف الفنادق وتساعدون بالمطبخ وهم راح يعلموكم على كلشي
- بس واذ تخوف نكدر نرجع هنا ؟
- لا هذا المكان بعد ميناسبكم لازم تصيرون قويات وتعتمدون على نفسكم وتشتغلون .
- زين منو راح يجي ويانا ست اميرة لو ست عرفان
- راح تروحون وحدكم احنا كلنا لازم تصيرون قويات ولازم تصير عدكم ارادة تشتغلون وتكملون جامعات .. وتشتغلون على نفسكم
- واذا احد اذانا
- تكدرون تخابروني اذا احتاجيتو مساعدة واني امكم بكل وقت تحتاجوني
- زين باجي وين راح نروح بكركوك لو بعيدة
- لا مو بعيد راح تروحون لاربيل هناك الفندق راح ينطوكم غرفة الكم اثنينكم وراح تشتغلون بيه وتحصلون اجر وتعتمدون على نفسكم وبعد انتم وشطارتكم .
بس نصيحة لازم تتذكروها
لا تثقون بكل رجال كل الرجال وحوش ومو زينين .. راح يحجون وياكم حلو ويمكن راح يكلج احبج ونتزوج بس جذابين كلهم جذابين .. لا تقبلون تحبون احد او ترتبطون وياه الا يتزوجكم واذا ما قبل يتزوجج يعني هذا جذاب واذا كالج خلي نحب بعض اول وبعدين نتزوج يعني هم جذاب راح يلعب عليج ويعوفج وتبقين بس تبجين .. فلا تثقون باي واحد الا اذا اتزوجكم ماشي ؟
سندريلا لما اجا الامير واخذها .. حبها كام يحجي وياها حب لو بسرعة كاللها تتزوجين واخذها للقصر
- لا اتزوجها
- عفية فاليحبج راح يتزوجج بالاول يلا يحبج .. ماكو حب قبل الزواج كله جذب لا تنسون هاي النصيحة مفهوم !؟
- ماشي باجي
اكلنا بس جانت موج من الافكار تتراطم بروسنا
شلون راح نعيش يمكن صعب شلون راح نشوف شباب وناس ونطلع ونفتر براحتنا ويمكن تصير عدنا فلوس ونشتري كلشي وكلاشي .. احس الشغلة كلش حلوة بس بنفس الوكت خايفة حيل .
ما نمت ذاك اليوم صارت ب١ واني سهرانة من كثرة الافكار ..
لحد ما صار الصبح .. جان هذا اليوم معفيين من الشغل .. ست اميرة تباوعنا وتدمع .. حتى باجي سيتا ..
فرحانة بس احس بغصة لانو راح اترك كل خواتي بهالمكان واطلع .. وراح اترك غرفتنا ومعهدنا العشنا بيه كل هالسنين .. احس راح اشتاقلهم هواية .. للحظة اريد اكلها لباجي ما نريد نروح بس فضولي للعالم الخارجي مصبرني اسكت واتحمل .
اجا رجال سمعت ست باجي .. تكلا ( وطبان ) هو الراح ياخذنا من المعهد للفندق بأربيل .. دخلنا الادارة وشفنا واكف ..
جان رجال يطلع بالاربعين من عمره ..
عندا كرش اليكول حامل ويشد شماغ فوك راسه .
سلمنا عليه بس ما حبيت شكله وخفت
اريد اكولها لباجي تعوفنا ما تروح بس خفت حيل
اباوع لبان بعينها دمعة لزمت ايدي وهمست : اني خايفة
- حتى اني
كالت باجي : يلا
طلعت ويانا واخذتنا سلمنا على كل اللي بالمعهد وخواتنا الصغار كمت ابوس بيهم واشمهم حيل احس بعد ما اشوفهم .. لحد ما طلعنا من المعهد وكفنا بالكراج حضنتنا باجي وكامت تبجي وكالتله : دير بالك عليهم ذوله مثل بناتي
وطبان : احطهم بعيوني صدك جذب ست
- تسلم عيونك
كامت تمسح على روسنا واحنا نبجي ووحدتنا شالية جنطتها الصغيرة مال المدرسة بس حاطين بيها هدوم .. نباوع باجي ما بودنا نطلع ونعوف المعهد خايفين حيل
صعدتنا بالسيارة ورا وكالت : يلا صيروا سباعيات
- بس عفية باجي تعاليلنا هناك لا تعرفينا احنا نخاف
- راح اجيكم لا تخافون يلا
سدت الباب واحنا كمنا نبجي بقوة ونباوع البنات والست كلهم يلحولنا ويبجون .. مشت السيارة واحنا كمنا نلوح الهم بقوة ونبجي عليهم لحد ما السيارة طلعت من الشارع مال المعهد
حجه الرجال : شلونكم يا بنات
اندارينا وكعدنا ما جاوبنا ..
وطبان : شنو هالجمال شنو هالبراءة يا بختنا بهالبنات الحلوات منا وجاي انتم راح تشتغلون وياي تمام ؟ ….
المفقودة
((( بقلم زينب ماجد )))
الحلقة_ ٢
( الفندق الجديد )
سلوان يمشي على كيف ويراقب ويدحك الشارع وهو لاف اليشمغ على وجهه .... دار يمنى يسرى .. شاف بنية لابسه جبة ولافة وجها .. جاية من بعيد
ابتسم وفرك اديه وهو يرجع يباوع الشارع منا ومنا خاف احد موجود .. الدنيا ليل والناس كلها نايمة بس صوت الجلاب بالشارع .
عدل نفسه وصار يمشي كدامها وهي لحكته
لحد ما وصل مكان منزوي بعيد عن عيون الناس .. صاحت له : سلوان
- بعد سلوان واهله .. يولي مشتاكلج ابالله مشتاكلج .. مشتاك لهالعيون والادين الترفة
- وانا شنو البيدي ما عتشوف اهلي ما منطيني مجال ادحج دربي .. تنوب طالعيلي بسالفة جديدة ويردوني لمحمد
- محمد منهو ؟
- يصير اخو وطبان رجل اختي ... نحنا اخوي ماخذ بت عمي ومنطي اختي لوطبان ابن عمي .. محمد اخو وطبان رايدني ووطبان حجه بالسالفة لاهلي واني عارضت جدامه .
- اول يابا ... وانا اكول اول البارحة عد ما جيت افتر هينا بالليل كلت بلكت الكفج .. بس ما طلعتي جان واكف وعرضلي وتحاجينا .. حتى الصبح مسمع عيفان حجي .. ثاري يريدج لاخو
- غثة غثة ما ادري شلون اخلص روحي منهم كتلو ما اريد يكلي حلاتها يصير الحجي للنسوان ويوكفن بوجه الزلم ورايح والله شاد ويا اختي شنو اختج ما ترضا باخوي .. شنو زور لو كوا !؟
- عجل لازم نتهير واحجي ويا ابوي بسالفة زواجتنا
- كبل لا تحجي ويا ابوك .. من هسه اكلك اني لا اكعد ويا اهلك ولا اجابل مرتك اذا رايدني بيتي وحدي .
- يجرالج يم عيون حلوة يجرالج اذا الج ما احط البيت المن عجل تا احطو
-
ضحكت وكعدوا يتغازلون شوية وردت هي لبيتها .. وهو رجع لبيت لكى مرته منتظرته .. وواكفتلو متخصرة : وين جنت
- نعلل انا والربع
هالة : يا ربع ذول ؟
- ربعي شنو ول تحاسبيني ؟
- ان جان انا الما لي حك بحاسبك عجل منهو الاله حك ؟
- محد يحاسبني انا زلمة وبكيفي افتهمتي لو لااااا
- وانا ما كلت باطل كل الردتا .. اعرف انت وين جنت
- وانا كتلج جنت ويا صاحبنا غاد نتعلل
- وانا جان كلبي لاجمني منك وما مرتاحة لطلعاتك هاي تالي الليل بس شسوي نسكت ونشوف وين تصل .
- ومنين كلبج لاجمج بالله
- تعرف ما حاج اكلك
- لا بالله اشو كليلي
- يعني تريد تقنعني ما عندك وحدة منا منا ملاحكها
- لا ليش ما عندي اني زلمة ومن حكي وشرع الله محلل اربع مو اثنين
- وشنهو العندك ؟ رايد تاخذ علي مرا !؟
- اذا ما نفعتج ما تضرج ..
- ما تضرني شنهو وانا شنو هينا خراعة خضرة ول يمصيبتي
- اخوج ما ماخذ اثنين عمران اخوي ما ماخذ اثنين شنهو انت بيش احسن منهن هالتشوفيهن ساكتات وراضيات رجولتهن وقانعات
- وانا بيش مقصرة وياك خاطر تاخذ عليّ ؟
- وياهو الكال انت مقصرة بس الروح تريد وانا بعدني شبابا يحلالي العشك ورايد اتزوج بشرع الله ما كافر
- وشرع ربك ما عرفت اطبقو غير براسي .. والله يا سلوان يوم واحد ما اضلك هين .. مو انا التاخذ علي مرة
ارتفعت اصواتهم بنص البيت ، سهاد كاعدة وتستمع لمشاكلهم .. طلع سلوان من الغرفة متنك .. ضرب الباب وراه .. ومرته تبجي وتصيح بالغرفة وجهالها يتباجون ..
مشى سلوان شاف سهاد واكفة كاللها : سويلي استكانة جاي بسرعة
نزلت جوا وهي تتوجه للمطبخ .. وكفتها امها كالتلها : شبلاهم سلوان ومرته ؟
- دا يتكاونون على عرس سلوان يكلها اريد اعرس و هي ما ترضى
- اسم الله ربي الساتر شبلاه هالولد بهالليل يا عرس هاذ ؟
- ما ادري سلوان بعد ..
راحت سهاد دا تسوي الجاي وسلوان كاعد بالصالة واديه فوك راسه راحتلا امه جليلة ، كالتله : خير وليدي ابوك نايم شنهو هالصياح البالبيت ؟
- يمه اتزوج واخذ كان من تكون هي مالها غرض بيه
- مالها غرض بيك شلون عجل تحبك يا ابني ..
- هيج حب اني ما رايده مشكورة جزيل الشكر بس خل تفك ياخذة مني
- ما يصير هيج وليدي هالة ام جهالك ما يصير هيج تتركها تبجي وتصيح بالغرفة وابوك نايم
-والله يمه العندي كلتو وما عندي غيره .. انا اتزوج يعني اتزوج ترضى ما ترضى مو جاهل انا خاطر اخذ اذن من احد
كاعد يحجون وهالة نزلت لابسه الجبة وشايلة جنطتها
وكفت جليلة عمتها وهي تمنعها وهالة تبجي وما ترضى تبقى وتكله : هسه تاخذني لاهلي
كاعد يحجون دخل عيفان
دحك كوان والدنيا مكلوبة عكد حاجبو ودحك للساعة ٢ الا ثلث
حجه : خير يولو اش هالكونا بهالليل شصاير ؟
- اخوك طكن فيوزاته بهالليل يكلها اريد اتزوج وهي تصيح اريد اروح لاهلي
- يا زواج يا اهل كولو يا الله رورحو نامو هسه الواحد يرتاح لو يروح يحل مشاكل .. الوالد وين ؟
- نايم خايفة لا يكعد ويسمع هالطلابة ويتكاون ويا هالمصكوع
- سلون شنهو سالفتك خوية حلها
- تريد اتروح خلي تروح انا ما كاضبها
- تروح شنهو جهالك يول انت شبلاك ؟
نزلت بيان .. كالتلا : انت اجيت
دحك بيها الدنيا كابة وناس تجادل ناس وهي تسأل : لا بعدلي ساعة واجي ..
اتبسم وهي ضحكت وهز ايدا ..
نزل عمران كاللهم : خير يمعودين صدك تحجون ..
كعد عيفان تعبان نعسان يريد يصعد ينام .. ويلوان معند ماله غرض بيها .. وهالة معندا الا تروح اهلها
حجه عمران : عيفان كوم اخذها لاهلها فضها
- حاااا وانا شكو يول فاطس هاي طبتي من بغداد لهين صدك تحجي هذا رجلها خل ياخذها
سلوان : لا انا ما اخذها يروحون يألفون بيت عمي ويسووها انا الذاب بتهم اذا تريد تطلع هي تطلع اني لا طاردها ولا ماكونها انا بس رايد اتزوج وخلي يكون بعلمها من عين باجر انا رايح اخطب
عيفان : ول انت تحلها لو تخبطها برايك هاذ تظن ابوي و عمامي يرضولك تروح تخطب وانت مهجج ام جهالك من بيتك
عمران : عوفه عوفه خله هذا غبي ورايد يخبطها على روحه يكعد الوالد الصبح ويعرف شلون يرده .. عيفان كوم وصل هالة ما طولك مبدل يلا
عيفان : هم رد على صخمان يول اكله تعبان ومحمد
- اي بس وصلها خوما تضل المرة هيج يصير الصبح والحجي يحلها ويجيبها
- خوية رحمة لوالديج اكعدي الليلة واحجي مشكلتج الصبح للحجي يحلها
- لا والله ليلة ما اكعد تا اعلموا منهي هاي اليكول غصبا ما عليها ما اكعد ولا ابقى
عمران : عيفان دكوم يا خوية
- هسه انا ياهو مالتي وابتلي رجلية مبطبطة بالحذاء من الصبح لهساه وانت تصيح عيفاااان .. كومي بيان البسي جبتج خاطر نوصلها امري لالله
ركضت بيان لبست جبتها وشالها ذبتو .. وطلعت واخذت هالة .. وعيفان وصلهم لباب بيتهم انتظر بيت عمه يفتحون الباب سلم عليهم ودخلت هالة وهو كاللهم : مشكلة صغيرة بس هي اصرة الا تطلع اتحملوها الليلة يكعد الحاج باجر ويحلها .
اخذ بيان ورجع .. ذب روحه مثل الميت ع الجرباية حجت بيان : الله ما قصر .. حوبتي
عكد حاجبو : حوبتيش يولي ؟
- الصبح تكلي حكا عيفان لو دور مرا الزلمة يريدلا جاهل .. والله المن حلل الزواج غير الهالحالات كتلها ترضين رجلج ياخذ كالت لا زعم انا حاطتلو الولد وحاطتلا البنية
- لا حول ولا قوة الا بالله وانتم هيج عايشين لا شغلة لا عملة تكضون وكتكم واحد يغث بالاخر وواحد يتشفى بالثاني !؟
- عجل ليش تكلي حكه ياخذ شنو هي مرا واني نص ..
- بابا مالج علاقة بيها ختولي
- هي ختولي ونسوان اخوتي خيولن وعماتي وعماتك والكل يولي .. شيصير كلبي وشيحمل .. هذا كلو بس لان انت ما ترضى نسوي تحليل
تنهد وكام من مكانه دخل الحمام .. طلع لكاها عاكدة حواجبها اول ما شافته دا تريد تنطق : شيصير لو ...
كملها هو : شيصير لو اعيفلج الغرفة وانام جوا وارتاح ..
حجاها وترك الغرفة ونزل .. راد ينام بالصالة .. ما كدر حارة
راح فتح الديوان وشغل السبالت ونام بلا غطا ..
الحجي كعد للصلاة الصبح ..
الكل نايم توجه للديوان خاطر يصلي .. شاف عيفان كاش ونايم ع التخم .. راح جابله بطانية .. وغطاه وهو يحجي : ول ابويه عش نايم هينا .. ما عندك غرفة .. عيفان
اخذ عيفان منا الغطا وغطا راسه صلا الحجي ورجع نام
للـ ٨ الصبح .. الحجي تريك وعرف بمرت سلوان زعلانة بالليل .. غندب ودخل الديوان وكاللهم : اندهولي سلوان تا اغسله غسل هالجايف طايح الحظ .. يضل طول عمره اعوج ما ينعدل .. يول صار عندك مرا وجهيل تهججهم بليلة سودة رايد يتزوج انت وحدة وما مدبرها تا تاخذ الثانية من انعل ابوكم لابو بطن البزركم ولد الجلاب .
شال راسو عيفان على صوت فيروز الصباح مال بيت الحجي وسمع المعزوفة الجميلة من الصبح ، اول ما كالو : ها يابه اصباح الخير
اجاله المقسوم وكالو : الله لا شافكم ولا عرفكم يا جلاب ويا ولد الجلاب ذاك مهجج مرتا وانت هاج من غرفتك دافتهم انتو شنهو من بشر يول ما تنعدلون ما يصير براسكم خير احط راسي بالليل اكعد الصبح ما ضال حجر على حجر بهالبيت عجل لو غمضت عيني ونمت بكبري شتسووون وشتعملوووووو
- اعصابك يابه اعصابك
- انجعم انت وابعد عني غاد يااااله
- اها ول يابه انا ياهو ماتي
- عجل شعندك نايم هين غرفتك عليش هاجرها يولو
- حجي اجيت من بغداد تعبان سبحت ونمت هينا
- رايد تكلي ما متكاون وياها
- حجي والله ما متكاون بس انا تعبان وهي متضايكة كلت اذا اضل بالغرفة كلمة منها كلمة مني راح تكب بيناتنا .. حتى ما تصير مشكلة عفت الغرفة ونزلت .
- وعليش متضايكة
- نسوان معايراتها بالخلفة وتعال انا لازم اتحمل معايرهن وسوالف نسوان شردت منها .
-ويمتى ناوي تسوي هالتحليل وتفضها
سكت ما جاوب سوا نفسه يحي براسه ويريد يروح يغسل كالو : غلس دشوف غلس
كام تا يغسل راسه .. نزل سلوان كالو : الحجي عصبي
عيفان : لا مو عصبي كلشي ما بيه روحلا ..
- صدك !
- اي حتى راضي بزواجتك يكول ابني ومن حقا .. شنهو المرة تمنعه يتزوج
- شد هاذ الحجي الزين
مشى وهو يغم ورا : من وراك كعدني برزايل دروح استمع للمعزوفة واكلها
ضحكت سهاد وهي تكلو : سلوان والله ما ادري شبي هسه هي مالت زواج .. مو عندك مرة وجهال بعد شتريد
- كله من ابوج بعد واحدنا ما شد عوده عمره ١٧ سنة كربسنا بزواجة وغصب الا بنت العم .. وهاي نتيجة بنت العم لابن العم جهال وهوسة وهو ما راضي بقسمته ورايد البالو .. شجنينا
بيان واكفة : على كلامك كول هم ما راضي بيه ورايدلك وحدة مثلو ؟
- وهاي شنو صباح الخير ؟
ول النسوان تكول صباح الورد صباح الرمان انت تمسين بنكد وتصبحين بنكد
- لا عليش نكد غير حجيك هذا
- وانا كلت رايد اتزوج يولي !
- عجل شنهو معنى كلامك هذا
غسل ومسح وجه بالخارلي وشمر الخاولي بوجهه يشافيها ويسكتها ويصعد بس عكدت حاجبها ما راضية بكلامه .. صعد ديبدل لحكته .. كالتله : سالفة البيت ما راح تحجي ويا ابوك بيها اني ما احمل معاير نسوان بعد اريد اعيش براحتي ما اسمع كلمة من احد ولا نظرة من احد
- تشوفين هسه وكتها ؟
- عجل يمتى ؟
- الحجي هسه اعصاب لو حاجيتو الا يرمينا
- مو نزل سلون يحجي وياه انت هم احجي
- هسه خليها .. بعدين نحجي ويصير خير .
سكتت بس ما راضية كاللها : سويلي ريوك بين ما ابدل
- عليش هم راح تطلع
- لا اليوم لتخافين ما اطلع
- يعني باجر تطلع
- عندي شغل باربيل
- وشنهو الشغل
- اذا اشرح راح تفتهمين !؟
عافته ونزلت سوتله ريوك نزل كعد كدام الطاولة يتريك فات سلوان كاله : يول ابالله مال اكضبك امص دمك
ضحك عيفان وهو ياكل وسلوان يكلو : تنصب علي ول تكلي مرتاح واروح يطكني بعصاتو
- لااا بس لا توجعت يول
نطاه دفره هو والكرسي مالو فز عيفان من الكرسي بسع والكرسي وكع .. وهو يكلو : اعصابك يول اكو احلى من معزوفة ابوي الصباحية يولو فيروووز
عافه وهو يغلط عليه .. تلكاه الحجي سكت سلوان والحجي يحجي .. فات شاف مرت عيفان واكفة ليغاد تباوعله وعاكدة حاجبها وهو يتريك كالو : وانتم شبلاكم هاي كاعدلكم اريد اعرف شبيكم
- ما بينا شي حجي
- عجل شبلاها المرة البوز طالع ليجدام ومناجبتك ع اللكمة شنو الرايدتو بنتي كولي
كامت تباوع لعيفان حجه عيفان : حجي تريد عزال تكول النسوان يعايرني ومرة تريد بيت وحدها
- اي حك .. مرة وحكها انا لا امنع مرة تعزل ولا امنع زلمة يتزوج بس مو كبل ما يرضي الكل
باوعله عيفان حجه : سلوان رايد يتزوج شانه انا مالي علاقة بيه بس مو بعد ما يرضي مرته ويمش يخطب برضاها .. اما مرتك تريد تطلع شانكم وحكم بس مو بعد ما تتزوج وتجيبلك مرة ابيت ابوك .. ما ربيت انا وتعبت وسويتكم زلم خاطر اخليكم بخت النسوان .. وتمرون علي للديوان مرت الخطار .. التريد تطلع الله وياها وتجي غيرها بغرفتها خاطر تكسم ايامك بين هالبيت والبيت الثاني سمممممعت ؟ غير هالحجي ما عندي وفلس احمر ما انطي اذا ما تحطلي المرة هين وتتزوج
حجاها وهو يتجى على عكازته وكام طلع هو وعمران من البيت بيان اختنكت حيل ، كالتو : وما تعرف تكل لابوك اني ما رايد اتزوج !؟
- عجل ما سمعتي وهو يكول ما ارضى ولا انطي فلس اذا ما تجيب مرة بمكانها !
- اني مالي علاقة كعدة بهالبيت ما اتحملها .. وزواج لو فكرت مو الدنيا احركها انت بذاتك احركك
رادت تمشي كاللها : شو تعاي بالله هين منو هذا التحركي يولي ؟
رادت تمشي جرها كامت تبجي .. دفعها وكاللها : امشي من كدامي اعلمج منو اللي تتجاوزين عليه .. كتلو مرتاح خليني غاد لا كال ولا كلت ولا نكد مرتك اعلك عمامك وهاي تالي جيتي هييين بس كوان بس حجي كال كلت اوامر فروض طااااعة مووو بييييت
اطك براسي والله اطلك مو بس مرتي اطلك حتى اهلي واهج ولا اريد اشوف احد منكم لولو عوفوني بحالي ما اخلف على روحي لا اعالج ولا اروح دكتور ولا امشي سمعتووو دكتور ما اروووووح اللي عابجو حيا الله الما عاجبو سبع حجرات بكفاه .. وعساه لا جبل ولا شفنا ملكاااااه .
عاف البيت واخذ سيارته وداسلها.
جان مقرر اليوم ما يطلع ويبقى يعيش جو العائلة بالبيت بس البيت كله مكهرب محد منهم يتكابل فطلع بوجهه لاربيل .. بنص الطريق .. انقهر عليها لا عدها طفل ولا ابو يسمحله يطلعها بيت وتخلص من الحجي .. بنص الطريق خابرلها وكاللها : حضري جنطة صغيرة نكضيلنا كم يوم باربيل ونرتاح وعود نرجع .
هي ما كالت باطل .. سوت جنطة وكعدت تنتظره .. شوية ودخل بس بعده عاكد حواجبه وطاكة روحه من هالبيت وجوه الما ينحمل
اول ما فات لكا اهل هالة .. ابوها وامها واختها جايبيها لبيت رجلها وما راضين بطلعتهم .. فات سلم عليهم وكعد .. كالتله ام هالة : ما صارلك جاهل يولو راح تشيب وولد ما عندك
- كلشي بيد الله وحكمته
- والنعم بالله بس غير تعرف الخلل منين خاطر لو منها تاخذ ثانية وتخلف
ما جاوبها وهو يمسح على لحيته وكفت بيان كاللها ساعتي ونظارتي جيبيهن .. حجه ابوه : وين رايح
- راح اخذ بيان كم يوم لاربيل من رجعت من الامرات ولليوم ما طالعين كلت اغير جوها بدل ما كاعدة وتطلع ضوجتها براسي
حجت مرت عمه : عمي هنيال هالبيان هاي التفكر بيها المثلك حاط اربع نسوان يدللن بيك شعايزك شو يا حلاتك ويا حلاة طولك وانت حاير بضوجتها
- عفت الزواج لرجل بنتج عمه هو راح يتزوج بدالي انا مالي خلك نك نسوان .
- يا وسلون وين يلكى احسن من بتي شو ما خلت الولد والبت حطتهم بحضنه وما راضي
كام الحجي يرد ويحجي وياها نزلت بيان كاله : من رخصتك حجي اودعناج يمه
- ترد بالسلامة يمه
- لا تسوق سريع عيفان وحط بالك بدربك عوف الغنى والصوت العالي
ضحك عيفان وهو ياخذ مرته .. ويطلع من البيت ويتوجه لأربيل .
_____
چچك: دنكت والسايق ابو كرش يمدح بجمالنا وانتم حلوات وانتم حبابات ..
كمنا نباوع من الجام اني وبان هي من الجام اليمنى واني من الجامه اليسرى .. دا افكر شلون راح نقضي حياتنا شلون اذا اهل الفندق مو زينين وين راح نروح .
واذا واحد اذانا .. يمكن الحياة صعبة .. يمكن ما اكدرلها
احس خايفة كلش .. من بعد ساعتين وكف السيارة كدام مكتب .. كال النا : نزلن
نزلنا اني وبان واحنا شايلات جنطنا على جتفنا
جنت لابسة بنطرون جينز وتيشيرت وردي وباتة بيضة ومسوية شعري كصيبة ، وبان نفس ستايلي .. دخلنا جان واحد رجال جبير بالعمر موجود كال : جبتهن
- اي مبينات حلوات مرغوبات
باوعلي : شسمج ؟
- چچك
- شنو هالاسم الغريب هذا شيلفظه ؟
- تركي
- انت تركية ؟
- لا باجي سيتا
وطبان : سيتا مديرة الميتم اللي جانو بيه
- اعرفها اتفقت وياها عليهم ، اني منير
اندار لبان : وانت شسمج ؟
- بان
- هم زين حسبالي چرچوبة
ضجت منه من كام يقلد على اسمي ..
اني كلش احبه واحسه منفرد محد يشبه اسمي لويش ديقلد
حجيت : وين راح نعيش
- بالفندق
- وشنشتغل ؟
- شنو حابة تشتغلين
- بكيفك
- راح تشتغلين وراح تلعبين بالفلوس لعب اذا طاوعتيني وصرتي حبابة .
- تمام
وطبان : منير خليهم ع الفندق الجديد
- ليش ذني مبتدئات .. وصغار
- عندي شغلة براسي .. بالاول خليهن ياخذن ع الشغل .. ويتعودن ع الجو بعدين نفوتلهن بالثكيل .. هناك بالجديد احسن الهن من الفندق القديم تواصل ويا مدير الفندق واتفق وياه ..
- تمام
اشرلنا نكعد .. كعدنا واحنا بعدنا ممفتهمين شي يا قديم يا جديد .. خابر الاسمه منير كال : يلا اتفقت الكم على المكان توجهو .. حتى تبلشون شغل من اليوم
ضلينا وحدة تباوع بوجه اللاخ
كال لا تباوعن بوجهي .. اطلعن
- بس ما نندل وين نروح
- كاكا حما واكف بالباب اصعدو وياه وامشو يلا .. كبل لا يجون ناس ويشوفوكم
باوعنا لبعض وطلعنا لكينا حجي جبير لابس زي كردي اشرلنا اول ما طلعنا ركبتا وياه وصلنا لفندق حيل جبير .. حراس بالباب لازمين سلاح .. الفندق كلش جبير .. اول ما وصلنا عند الباب الباب انفتح من وحده .. بقينا اني وياها شاهكات عيونا نباوع ..
اخذنا لغرفة المدير مال الفندق ما جان موجود كال امعدوا
كعدنا ننتظر لهناك يلا اجا بقى يباوع علينا دخلت مرة يطلع عمرها ٥٠ سنة
كاللها : خوش بنات مرتبات
كالتله : اي ، تعرفن تطبخن ؟
بان : شوية نعرف نسوي ريوك بيض وهاي السوالف تمن ابيض هم نعرف مركة فاصولية وعدس وحمص ..
كالت : ممتاز ، اني اسمي منال المسؤلة عليكم هنا يلا كومو وياي
كمنا وياهم .. اخذتنا لغرفة صغيرة كلش بيها سرير واحد وكنتو قديم بيه بابين ..والشباج مالتو يطل على ترك مهمل ورا الفندق بيه سخان ومفرغ هوى مال سبالت .. واشياء مكسرة ..
كلت الها : هذه الغرفة اثنينا ؟
- اي دبروا حالكم بيها والمطبخ قريب منكم اذا احتاجيتو حمام انطلعون اله
- بس شلون ننام بسرير واحد يمكن ما يكفينا
- وشرايج احجزلج سويت كامل لحضرتج ست الخانم ؟
شنو اسمج
- چچك
- هم اسمج ما بيه حظ وهم السانج طويل .. اذا رايدة تعيشين هنا .. السانج تكصري وشينكالج تكولين نعم حاضر ادلل .. وبس
مفهوووووم ؟
هزينا راسنا ، صاحت بصوت عالي : مفهووووم ؟
اثنينا گلنا :- مفهوم
عافتنا وطلعت .. حجيت : الغرفة كلها تراب السرير وصخ .. حمام ماكو شلون نغسل شلون ننظف ؟
بان - مو كالت النا المطبخ قريب خلي نروح للمطبخ نشوف شي ننظف بيه
تركنا جنطنا ومشينا للمطبخ .. جان فارغ محد بيه
فتحنا الحمام .. لكينا سطل وماسحة .. اخذناهم بس نريد وصلة كمنا ندور دخل ولد شاب حجه بلغة ما افتهمناها .. من شافنا بناوعله ما نرد حجه : عرب ؟
- لا
بان : شنو لا احنا غير عرب
- قصده اهل الريف يمعودة احنا وين عرب
- قصده عرب لو اكراد يالذكية .. اي اي احنا عرب
كال : هلو انا اريان كوردي
مدتله بان ايدها .. وسلمت عليه كالتله : اني بان
سلمت عليه وعرفته كال : انتم يشتغلون هنا
-هسه اجينا ومدا نعرف شي
-اني يساعدكم بأي شي تحتاجونا
-شكرا نريد وصلة
-شينو يعني وصلة ؟
چچك -هسه هذا شلون راح نفهمه وهو يحجي عربي مكسر ؟
بان كامت تأشرله بالكاع وع الماسحة وتمسح كال : قماش تمسحون بيه
كناله : اي هو
راح جابلنا واجا ترسنا السطل ومسى ويانا يساعدنا ننظف الغرفة الشاب ابيض وطويل ما عندو لحية وحيل توالم ويا بان وكاموا يسولفون .. اني مالي نفس احجي شي الوضع هين ممرتاحة بيه احس حياتنا اختلفت .. ما عاد النا مكان بهالدنيا طلعونا من المعهد دا يجيبونا لهنا اثنينا بسرير ويغلطون علينا .
كاعد دنظف .. دخلت المرة نفسها كالت : امشن
مشينا انطتنا شغل الطابق الرابع والخامس ننظف كل طابق على وحله .. وانطتنا كارتات الغرف اللي ننظفها وكالت : اذا ضاع الكارت لو انتلف .. اسبوع معاقبات ما الكم عشا وريوك ومالكم فلوس
اخذنا الكارتات وسطل وماسحة ومنظفات ووصلة
وكالت اصعدن بالمصعد ..
اخذنا غراضنا ومشينا اني وبان .. وكفنا دنريد نصعد للطابق الرابع .. وكف رجال وزوجته .. انفتح المصعد فاتت المرة وهو اشرلنا نفوت .. فتنا وكف كدامنا وانطانا ظهره .
.. اباوع عليه بتعجب .. الرجال طويل ولابس تيشيرت اسود .. وعضلة ايده تطلع بكد شبر .. اني واكفة على يمين .. عطره حيل طيب
باوعت المرة اللي وياه .. ضايجة كانما متعاركين لان دايرة وجهه
لابسة جبة وربطة .. المصعد عبر الطابق الخامس والسادس حجت بان : اكلج احنا وين ننزل
- انت رابع واني خامس كالت
-شندوس يعني
داس الرجال على رقم اربعة و خمسة .. انفتح ردنا مطلع وياهم كال
عيفان : راح ينزل بيكم للطوابق اللي تردوها بس باوعو على هاي اللافتة
واشرلنا على لافتة تصير كدام المصعد مكتوب عليها الطابق السابع، كتلو : شكرا
رجعنا وانسد الباب حجيت : شفتي شكد حلو ؟
-وشفتي مرته شلون كاليه وجها جنها ست اميرة من تطنكر
ضحكنا كتلها : ومنو كال مرته ؟
- لعد اشون حيروحون للغرفة سويا
- هم سويا ؟
- اي مبينين .. بس اني ميعجبني اسمر احب اتزوج واحد ابيض
- هه هه .. اليشوفج يكول هو ركع كدامنا وكاللنا منو تتزوجني ..
ضحكت ودك جرس طنننن .. انفتح الطابق الخامس .
طلعت ورحت للغرفة اللي وصتني عليها .. رتبت الفراش وغسلت الحمام ومسحت الغرفة .. الغرف نظيفة تقريبا وكلش راقيات وفخمات مو مثل غرفتنا تخرع اليشوف غرفتنا ميكول موجودة بهالفندق لان الغرف كلش فخمة .
لما كملت كان الليل نازل بس هلكت من التعب من كملت عبالي راح تمدحني وتكولي عفية مثل مديرة المعهد .. شو بس شافتني صاحت : هنيااااالي كل هالوقت هذا على كم غررررررفة ؟
ما حجيت كالت : هذا البرود اللي باديج تبطلي مفهووووم الغرفة اللي اتدخليها كدامج عشر دقايق تخلصيها
- بس ما اكدر ب١٠ دقايق
من تشتغلين سريع وتبطلين صفنات وتفتش وتفقد راح تخلصين بسرعة مفهووووم
-مفهوم
انطتنا ملابس خفيفة وكالت يلا روحن سبحن واخذن وقتجن بعد
مشينا .. سبحنا طلعنا لكيتا ماعون بيه معكرونة حمرة كعدنا ناكل بيها اني وبان بس ما جانت طيبة عبارة عن معجون .. وماصخة من الجوع اكلناها .
رحنا نمنا .. ثاني يوم من ٦ الصبح كعدنا اريان ..
ركضنا للمطبخ غسلنا واكو وحدة جبيرة وسمينة كاعد تطبخ كامت تسخرنا ترسوا مي صفطوا بيه البيض ثرموا طماطة عبو زيتون .. واحنا نشتغل جوا ايدها، اللي عرفنا .. اسمها ام علي
كمنا ننقل الاكل برا اكو ميز وننطي لاريان وهو يصفط كال : انت ضلك هنا اي حدا يحتاج شي كولينا
-ماشي
وكفت واساعد اللي يوكف يريد خاشوكة او كلاص او هيج شي .. شفت الرجال البارحة صعد ويانا المصعد دخل ووياه نفس المرة الضاهر زوجته .
كعدوا ويا بعض واني واكفة يم الاكل ، اشرلي رحتله .. كال : حطيلي ماعونين واحد ٥ بيضات سلك والثاني جبن وزيتون ومربى وكلاصين جاي
- بس الناس ديكومون ياخذون انتم كوموا جيبو
شو هذا عقد حاجبه ما عجبه .. كال : صيحي اللي يشتغل هنا
كامت اللي وياه راحت للاكل واني رحت صحت ام علي اعتذرت منه وكالتله : جديدة اليوم اشتغلت .
جرتني ورجعت كالت : هو انت بكيفج يكومون اكو ناس ميحبون يفترون يجبون اكل شغلتج تجيبين اللي يطلبوه منج هذا فندق وذوله زبائن شنو تريدين اتهججيهم انت .
رجعت وكفت بمكان .. وهو عاكد حواجبه وينتر والمرة تحجي وضايجة .. ل٩ ونص تقريبا ما بقى احد .. كلهم راحو .. توجهنا نشتغل .. بالغرف بس بسرعة نركض ركض لحد ما صارت ب٣ خلصنا لكينا فلينة بيها تمن وفوكاها مركة عدس
واحنا كلنا راح نخلص من المعهد وراح ناكل كلشي اجينا هنا هم عدس .. يربي شنو هاي ..
خلصنا غدا كمنا نشتغل خدمة غرف
واحد كاعد بالرسبشن واي اتصال من الغرف طلب ينطينا الاوامر احنا نجيبله .. اللي يريد مي اللي يريد بطانية اللي موصي اكل ويريد نستلمه ونوصله . رجليه راحت هلكد ما كرهت العدة والنزلة بالمصعد .
والجو هدوء لا احد يكعد ويانا لا جو حلو مثل المعهد لا ضحك لا كلشي ماكو بس شغل شغل شغل .. بان اندمجت ويا اريان وصفت وياه يسولفون .. بس اني كارهة الوضع هنا كله وما اعرف شلون راح اعيش باقي عمري هنا .
لحد ما صار الليل وانكطعت الرجل ..
اكو شاشة كلش جبيرة بصالة الفندق ودايرها على مسلسل اندمجت ويا احداث المسلسل واني كلش احب المسلسلات وما اعرلف اشوف فلم لو مسلسل لان محرومة منهم بالمعهد فكعدت اباوع بالصالة .. ومندمجة ويا المسلسل .
شفت الرجال اللي الصبح هو ومرته وحده نزل وكعد كدام طاوله لوحده واندمج بالتليفون وضايج .. اني بقيت مرة اباوع ع المسلسل
ومرة عليه .
اخر شي .. صفنت وحسبة صارت براسي ..
كمت اباوع ع البنطرون مالته لون اسود بس بيه زنجار شكد احب اشتري هيج لون .. شوكت يصير عندي فلوس واشتري بكيفي .. دار وجهه عليه باوعلي .. بسرعة انداريت .. منه
وكف ابو الرسبشن كال : تريدين مي ؟
- لا هذا موجود
كعد كال : اسمي نور اشتغل هنا
- هلو بيك
-مشتهية شي اجيبلج
- لا ما اكل بهيج وقت ممنوع
- تعاي اكعدي يمي نسولف هناك اكو مكان هدوء
- دا اباوع مسلسل
- انت جديدة هنا
- اي
- اي اول مرة اشوفج .. من وين
- كركوك
- ها اتشرف بيج كاعد تشتغلين هنا
- اي البارحة اجينا
- انت كلش حلوة اني من اول ما شفتج تعجبت اليكول ملاك تخبلين
- شكرا
- اممم حابة نطلب همبركر وبيبسي
- عندك فلوس تطلب
- طبعا عندي تريدين همبركر
- اني ما اكل بالليل بس احب الببسي
- لعد راح اجيب منا مفتح بصف الفندق قريب حتى نكعد هناك ناكل .. اجيب واجي لا تروحين خوش ، انتظريني .
- ماشي
راح واني انداريت للولد الكاعد شو هذا خازرني ..
اندك اتصال بالرسبشن كمت .. الولد كام وراي .. ردت افتح الاتصال حط ايده وخزرني حيل وكال : انت متستحين نازلة بهيج وكت وتتمشين عبالك ابيت الخلفج .. امشي منا .
فزيت بسرعة كمت اركض للغرفة ..
بس متت من الخوف من خزرني
اصلع وعيونه سود ولابس اسود وضخم حيل يخوف اليكول حرامي من ذوله الحرامية اليطلعون بالافلام دخلت الغرفة وسديت الباب واتمددت ويا بان بالفراش
شوية واندكت الباب .. فزيت خفت بس لا هذا هم رجع اسم الله ربي اني ما شايفة رياجيل يوم اللي اشوف يطلع كدامي هالفلم الرعب .. هسه شرايد مني وشعليه بيا
اتقربت للباب كلت منو ؟
- اني نور شبيج مو جبت ببسي مو تحبي
- اي بس بعد ما اريد
- دفتحي بس انطيجياه
كمت فتحته فات بس ما بيده ببسي
- وين الببسي ؟
- هناك تعاي نروح سوا
- لا ما اريد بعد
- ليش تعاي
- لا اريد انام
- شتنامين هو الشايل هيج جمال ينام
- عفية روح خلي اسد الباب
- بداعتي بس شوية
- شنو ؟
- شوية تكعدين يمي ما اسويلج شي
- لا اريد انام
شو دا احجيها وما احس الا يتقرب مني .. كتلها : هاي شبيك دوخر
- بس بوسة
- ايييع دوخر شنو بوسه
- اكلج بس وحده يمعودة متت عليج
- اييي دوخر .. دفعني للحايط حيل وقيدني وحط وجه بوجهي لعبت نفسي منه دفعته رجع دارني وجر ادية اثنين بايد وحده وحط ايده الثاني على حلكي ودفعني ع الحايط ايرد اوخر روحي .. اريد ابتعد قوي مدا اكدر كمت ارافس واصيح وما يطلع صوتي خانكني
المفقودة
((( بقلم زينب ماجد )))
الحلقة_ ٣
ادفع بيه واحاول اجر نفسي ما اكدر حسرني ويا الحايط وكن ما يسمع وصام على حلكي واني ارافس ، وهو يكلي : اني حبيتج متت بيج من اول ما شفتج طار عقلي بيج بس طاوعيني ومتخسرين لا اعيشج ملكة زمانج
كاعد ديحجي واني ابعد بيه
ما نحس الا بان بالماسحة وضربته على راسه حيل ، فز وتركني كمت اصيح واعيط لميت الدنيا كلها وهي تصيح وهو كام يتعارك وياها وهي لازمتله العودة .. كمنا عليه ونطرد بيه برا ..
اجت منال المسؤلة مالتنا بسرعة ابتعدنا وهو طلع صاحت : شديصير هنا بنص شنو هالاصوات هاي متستحووون
حجه وياها النذل كاللها : ست طلبت مني اشتري همبركر وكالت تعال بغرفتنا ناكلها لما اجيت انطيها الهمبركر طردتني من الغرفة والله تكولي نريد انام كتلها اي زين انطيني فلوس الاكل كامت تصيح واني ما كايلتلك جيب وانت تفتري علينا وكامن يصيحن كانما اني معتدي عليهم
چچك: يا جذاب ليش دا تجذب هشكل والله مو هيج هو طلب يجيب وكتله ما اكل بالليل واجا للغرفة يكلي بس فتحي من فتحت سد حلكي وحشرني ويا الحايط
بان : ست والله هذا ديجذب هو اجا دك الباب علينا ويتوسل بيها تفتحو .. اني جنت غافية واسمعلا ..
صرخت بينا : هسسسسس ما اسمع ولا نفس ادبسزيات وانوب تفترن على عمال الفندق حتى تجدن اكل
- ست والله احنا ما طلبنا منه هو طلب من عدنا
- ولا كلمة ، اطلع نور الزم مكانك .. وانتن حسابجن يمي
طلع الجذاب من الغرفة راح للرسبشن ..
واني وبان تبعناها .. كالت: اليوم ماكو نوم .. وراح تنظفت الممرات كلها والفندق تمسحنه .. واذ
قاطعتها واني اكولها : بس هذا ظلم احنا ما سوينا شي هو فاسد
ضربتني راشدي حيل وجرتني من اذني : من احجي متقاطعيني افتهمتي انتو الظاهر منربايات ويحتاجلكم تربية
جرتنا من شعرنا اثنينا .. دفعتها كتلها : ميحقلج تجرين هشكل احنا مو حيوانات عندج تضربين وتجرين افتهمتي
فتحت عيونها حيل : تتجاسرين ويايا ولجججج
- اني كتلج الحقيقة وانت صدكتي الجذاب وضربتيني
- امشي كداااامي بسررررعة
- ما راح نمشي لمكان رجعونا منين ما حبتونا احنا منريد نبقى هنانا او عوفينا احنا نطلع ما بحاجتج
- لا انت من صدك يحتاجلج تربية
- اني مرباية اكثر منج
هدت عليه وجرتني من راسي وتكفخ بيه دفعتها وكلت الها : ما اريد ابقى هنا اني اريد اطلع .
وبان وكفت وراي .. كالت بسيطة
اتصلت واجو حراس الفندق .. كاموا يسحبو بينا واني اجر بروحي كمت اتلاوى ويا الحارس لزم عصاته وضربني .. الضربة اجت على عكسي .. اتهامشت وياه .. ولزمت بيه من ياخته وهو يضرب واني اخرمش واصيح ..
لزمني لزمة قوية وركعني بالحايط وتولاني دفرات كمت اصيح وابجي .. وبان تبجي وتصيح .. شالني وشمرني بمكان مهجور ورا الفندق .. اللي يصير بظهر غرفتنا .. وسد الباب
رجلي دا تأذيني .. وكمت ادك بالباب واكولهم : احنا مو عبيد عدكم افتحوا الباااااااب .. افتحووووو
بان : يمعودة كافي ليروحون يكتلونا
- ونرضى نعيش بهيج مكان هم شعليهم بينا وين نريد نعيش وشلون نعيش منو هم دا يضربونا شفتيهم صدكوا الجذاب وجذبونا ما لازم نعيش هنا .
- اني خايفة هنا حيل
- ما راح نبقى هنا .. ايييي رجلي دا توجعنيييي
- واني اجتي ضربة على اصبعي يمكن ورم .. اخخخخ
هسه احنا لو ماشين باحترامنا وجايين كاعدين هنا بدون حجي مو احسن من هالكتلة
- لا تصيرين مطية ، اذا ما نشبع طن كتل راح نبقى طول عمرنا تحت اديهم احنا منريد نعيش هيج خدامهم
- ووين نعيش
- مو مشكلة نعيش بالشارع بس منعيش بأمرة احد
- ولو كتلونا
- اذا بقينا عدهم راح ننكتل يومية بدون ذنب وننحبس هشكل
- هو هذا شراد منج
- حقير اتوسل حتى يجيب همبركر وبيبسي دناكل وكتله ما اريد كام يكولي بس فتحي اخذيهن من فتحت هجم يبوس انت حلوة وانت حلوة اييييع لعبت نفسي منهم
- هههههههه لو مخليتو يبوسج ولا مكتولين هالكتلة
- انت جبانة
- لا مو جبانة بس لازم نعيش
- واعيش انطي بوسة وحلكه يلعب النفس
- لا لج ترا حلو اني شفته صح ضربته بالماسحة على راسه بس والله حلو
- ايييع
-فكري اشون راح نطلع منانه ؟
-ما ادري ريحة هنا تلعب النفس واني نعسانة ورجلي دا توجعني شكد حقير جنت متونسة ودا اباوع مسلسل اجا ولطش فوكاها ذاكه ابو صلعة يخزر ويهدد
- يا ابو صلعة
-هذا الصعدنا وياه بالصعد هو ومرته اللابسة حجاب
-الاصلع ابو عضلات
- اي
- شسوالج
- ما سوالي شي بس جان كاعد وردت ارد على اتصال بالرسبشن شو هذا اجا حط ايدا ع التليفون ويخزر بيه يكلي انت ما تستحين تمشين وحدج بهيج وكت
- ايوا ايوا معناها مركز وياج
- وهو شعليه بيه ؟
- خاف شاف نور وغار عليج
- لا ما اعتقد بس هو شكله ووضعه يخوف ما مرتاحتله .. يمكنه حرامي
- وحرامي وجايب مرته انت غبية ؟
- اوو ما ادري ياهو الكام وصار على راسنا مدير ويخزر ويصيح علينا شنو هالوضع هذا
حجيتها وكعدت بصفها ، حجت : يمتى نعيش يمتى نتزوج
- جنا نتمنى نشوف رجال لو ولد من شفتهم لعبت نفسي منهم
- لا اريان حلو خوش ولد
- ايع جنه مرية
- لااا حلو والله
- حلويش مسلوع وابيض حتى لحية ما عنده
- ايوا ايوا .. كولي تريدي يشبه ابو صلعة
- لا اسم الله يخوف
حطيت راسي على جتفها : بس الصدك ؟ عضلاته حلوة
حطت راسها على راسي وكالت : احنه يمكن ضاربنا خيط . شوفي حالنا وين بيا مزبلة كاعدين ودنحلم ببو عضلات وبالزواج .. مو نطلع روحنا منا الاول
كمت اضحك واهتز واني على جتفها حسيت شي فات من رجلي فزيت بكل قوتي : ءءءءءءءء
- شكووو
- يمه بس لا فارة
كمزنا اثنينا وكفنا بسرعة وهي تصرخ : لا عليج الله ؟
- والله حسيت شي مشى من رجلي بسرعة ايييي ربي شلون هسسسسسسسه
- لا عفية خلي حرامي خلي جني ولا صرصرة وبريعصي وفارة عفية لااااا
ضلينا واكفين ونفتر على طولنا ندور .. ادحك ببان .. واشوف بريعصي جنه تمساح صاير وراها .. صرخت : هذاااااا البريعصييييييي ورااااااااج
فزت هي : ويييييينه
ذاكه شافته لو تخبلت كامت تصيح واني اصيح ..
وخبصنا الدنيا بس محد باوعلنا ولا احد فتح النا الباب .. كمنا نبجي وجارين حديدة و نش بالبريعصي حتى يوخر
- يا الله هسه اشون نكعد وهذا مكابلنا باعي عيونه شلون تداور ويباوع تكول زلمة يبصبص مو بعيرصي
- هو بريعصي لو بعيرصي ؟
- چچك هسه وكتج ؟
- نحارب قوماً لا نعلم اسمائهم يا له من عار
رفعت الحديدة :- راح اكتلج بمكانه والله
- بيج خير دكتلي لهالبريعصي مدري بعيرصي
- لا ولج يمكن اسمه ابو بريص
- لا ذاك جدهم مدري شيخ العشيرة مالتهم
- هسه جدهم شيخهم شلون حنكتله ؟ هنوب نكله نش ميخاف .. ما محترمنا شلون بلّه ؟
بقينا بالساعة لا احنا كاعدين لا احنا مرتاحين
نشينا ومدري وين لبد وخفنا بعد اكثر .. كعدن وحدة انتجت ع اللخ ومندري شلون نمنا وشلون النعاس خيم على عيونا .. لحد ما انفتح الباب .. فزينا اثنينا ..
منال كدامنا كالت : كدامي يلا للمطبخ وريوك ما الجن اليوم عقاب ..
مشينا كدامها غسلنا ووكفنا ويا ام علي بس كلش منعسين .. منايمين الليل كله .. وحيل متضايقة من هالوضع مدا افتهم يعني احنا طلعنا من الميتم حتى نصير خدامات ؟ وليش نصير خو نطلع نعيش حتى لو بالشارع ونشتغل اي شي وما نبقى خدم عند احد يعاملنا بهالطريقة وعقاب وماكو اكل وبس نخدم وننظف .
للعشرة كملنا الاوبن بوفيه .. بعد محد اجا فشلناه كله ونقلناه للمطبخ بس حيل نعسانة مدا اكدر اشي شي .. وكفت كالت : الطابق السابع على بان والثامن على چچك .. يلا تحركوا اشتغلوا
كتلها : نعسانة وجوعانة يا تنطيني اكل يا انام ساعة
- انت بالذات اليوم كله ما الج اكل وتكومين غصبا ما عليج تكملين شغلج يلاااا .
- ما راح اكوم ارجعي حبسيني خلي انام .
- عجييييب شنو من بنية هاية ، لج مو اخليهم يربوج ويعلكوج .
- وليش تربونا ، رجعونا للمعهد منريد نشتغل هنا .. يلا
- الضاهر انت ميفيد بيج الكلام من وراج صديقتج تعاقبت ومماكلة بس بسيطة امشي بان كملي شغلج وهاي شغلي وياها .
سحبتني من اذني دفعتها : لا تسحبيني هيج
- امشي لج
جرتني من شعري
- ما راح امشي
دفعتها : مو خدامتج اني افتهمتييييي يلا عوفيني وما اريد ابقى بهذا الفندق اني رايحة اشتغل بالشارع
- تعاي هنا على كيفج انت اطلعين
- اي على كيفي منو انت وتحسبيني ؟
ضربتني جف .. هجمت عليها ولزمت براسها .. ملختها وهي تضرب بيه بقيت مجلبه بشعرها يمكن شلعت وصلة من راسها ..
تراكضوا الحرس وهي تصرخ وتصيح : اخذوا هالمتوحشة من كدامي بسرعة وذبوها جوا .
اخذوني وجروني نزلوني جوا .. كمت ادفع بيه : وخر مني يلا وخرررر
بأيد وحده لزمني من ركبتي ورفعني وحط ايده على حلكي وكال : هشششششششش ما اسمع ولا نفس
وهو رافعني شمرني للكاع بقوة .. انضربت حيل اتاذيت كمت اصيح .. من راسي وسحبني لغرفة .. : تعاي دا اربيج يا قطة تعاي
- عوفني عليك الله الله يخليييك عوووفني
نومني على وجهي كمت اصيح وارافس .. قيد اديه ليورا كمت اصيح وابجي اتأذيت احس اديه راح تتكسر بين اديه وهو يجرهم حيل ويقيد بيهم ربطني ونايم ع الكاع بطولي وهو كاعد فوكاي مقيدني ويشد بادية
قرب وجهه من وجهي وهو يكول : تتأدبين لو لا ؟ تمشين عدل لو لا ؟
- وخر مني اااااااي وخر
- وكحة انت وكحة واني احب اربي البنات الوكحات مثلج.
وسحب اديه وهن مشدودات وربطها بشباج ووكفني .. ولزم التيشيرت مالتي وشكاه بالنص انكشف جسمي كباله كمت اصيح واوخر بروحي منه واصيح :لا عليك الله لا عووووفني لاااا ، اتأدب والله اتأدب .
كشف جسمه كدامي .. درت وجهي وغمضت خفت حيل من الموقف وكمت اصيح ، كام يضرب بوجهي راشديات ويدخل ايده بحلكي ويصرخ : تتأدبين موووو .. تتأدبيييين
كامت تلعب روحي منه ..
كام يتحرش بيه ، اول مرة بحياتي اشوف هيج امور واتعرض لهيج موقف .. كمت ابجي واحاول ابعد بروحي واني ادير وجهي منا ومنا .. وهو يتحرش ويعض بجسمي .. واني اصرخ واجر بنفسي .. لحد ما اتحملت كمت ازوع ..
وخر هو لعبت نفسه من زوعت ..
عدل نفسه وكام يغلط عليا وطلع وتركني بهالحال جسمي مكشوف والقيء بالكاع .. ومقيدة .. كمت ابجي واصيح ..
رجعت راسي للشباك ابجي بقوة ..
اني وين جنت ووين صرت ليش طلعوني من الميتم ليش جابوني لهنا اني ما اريد ابقى هنا .. احد يخلصني منا مدا اكدر اتحمل اللي يسوووه فاسدين قذريييين اريد كمت اصرخ : فكوووووووني
بقيت ساعتين على هالوضع محد اجاني تجيت ع الشباك واني مقيدة .. وابجي بهدوء .. انفتح الباب .. فاتت منال حطت ايدها على خشمها : شنو هالقذارة انت شنو من بنية دا اريد افتهم .
- طلعني منااااااا
- منا لما تتأدبين وتمشين عدل ما الج طلعة منا .
- والله اتأدب بس طلعيني تعببببت
باوعتلي : لا ابقي فد خمس ساعات زيادة لخ حتى مرة ثانية تعرفين على منو تتهجمين .
عافتني ومشت .. كمت ابجي
رجليه كامت تأذيني من الوكفة وجوعانة حيل بطني تعصرني من الجوع والنعاس والتعب كله بجسمي ... ياربي احد يساعدني والله تعبت .
.....
عيفان : تنهدت وانا اكلها ( ول تعبت بالله شلون راح نكضيها هيج )
- اذا ما تسوي التحليل اي ولا تعتقد اخليك ترتاح اذا ما تسوي التحليل اني تعبت اكثر منك شنو ذنبي اسمع كل هالكلام بس لان ما عاجبك تسوي تحليل وتعرف اذا بيك خلل او لا
صفنت بيها
صارلنا ثلث تيام باربيل وما رضت ولا اقتنعت .. والظاهر ما راح يمشي الموضوع وياها الا اسوي اللي تريده ... كتلها : تمام راح امشي واطاوعج بس من هسه خلي نتفق
- عليش
- اذا طلع خلل بيا نتطلك
- اذا الخلل بيك نتطلك .. ليش ؟
- اي .. عليش دا تتورطين بيا وتسمعين حجي ذاك وغيره يعايروج بالخلفة واذا عايروج شراح تكليلهم مو بيه السبب هو العايب !؟ بالحالتين ما راح نتفق اذا طلع بيه الخلل لهذا اذا سويت وطلع ما يصير عندي .. نتطلك وروحي شوفي حياتج ما اكف بطيقج انت مرة ومن حقج تصيرين ام وتجربين هالشعور .
- يعني انت متأكد الخلل بيك
- ول يابه اكلها نتفق تكلي متأكد خو اذا متاكد اطلكج هسه واكلج ترا ادري مني .. انت عقلج كل وكته يخوط بصف السالفة اكلج اسود تكليلي ليش بنفسجي .
- اي تمام سوي خلي نشوف .
كمت طلعت اني وياها ورحنا لمركز مختص باربيل .. سوينا التحليل وكال : بعد ساعتين تعالو ع النتيجة .
كلت الها : امشي نتغدا بفد مكان ما دام كدامنا ساعتين
- ما مشتهية غدا بالي مشغول
- عجل خلي ندخل كافية ونطلب سويت
- سويت شنهو النوب
- ول يعني حلويات
- وما تكول حلويات انت زلمة شلك بهالكلمات المو مالت اعلنا
- اكلج انت عليش ما تستحين على روحج شنو انت زلمة عدلي حجيج مو جاهل كبالج ترا جزعت
- وعليش تحجي انكليزي
- يولي اخذ الساني من عيشتي بالامارات وكلتها كبالي شدراني الكدامي واحد مثلج يكفلي ع الكلمة .
- وبالامارات كم وحدة صاحبتها ووكلتها سووويت
- يولي ما بلازم انعل ابوه اكعدي ننطر النتيجة
- لا عليش خلي نروح ناكل سويت شنو اني وحد عن التاخذهن وتشتريلهن سويت .
تنهدت وكلت الها امشي .. دخلنا كافية جبير ، هي بقت تباوع اتبسمتلي .. ابتسمت الها انطوني المنيو خليته كدامها كامت تكلب بالصور .. وكف الكابتن سجل طلباتنا وطلبت نركيله اليه .. كالت : شوكت تعوف النركيلة والله مو زين عليك تأذيك
- بعد تعويد شسوي ، حلو المكان
- اي يفتح النفس زين لو عدنا بحديثة هيج مكان بس ماكو
- اذا الكالي شيف اختصاص سويت افتح هيج مشروع بحديثة
- صدك ؟
- اي والله اهلنا وان جانوا يقلدون على هالامور بس يحبون الاشياء الجديدة خاصة الشباب .. وكلش يصير اقبال عليها في حال صار كدامهم .
- اي زعم شوفوني اكل سويت على كولتك تصير كلها تتشيم
ضحكت : يولي خلهم يتشيمون شبعوا ضيم .
حطولنا الطلبات اني اخذت النركيلة وهي خطية كامت تاكل عجبها رغم قلدت وحجت حتى على ماعوني استحوذت واتذوقت وطيرت نصه واني التهيت ادخن واكلب بالتليفون ، وكفت موظفة خدمة حتى تعمرلي النركيلة اني ما منتبه الها .. البينة جانت قريبة مني ندست ايدي بيان رفعت راسي اشرتلي ع المرة ، ابتسمت وابتعدت كالتلي : تكوم تكعد هينا بمكاني ؟
- لا خليج
عمرت وسألتني : هلاء منيح ؟
- تمام عاشت ايدج
- ليش تجاوبها
- يولي هذا شغلها تعمر نركيلة
- زين ما تستحي تشتغل بهيج مكان وتعمر للزلم
- ول يابه احنا شلنا بالناس استحت لو لا ..خل نستحي لارواحنا
- من عشت بالامارات حيل اتغيرت .. جن صرت واحد اخر مربيلك عضلات ومزين اكرع ولحية وفد واحد ثاني صاير .
- تغيير
- شنهو سببه
- هيج
- خاطر تجذب عيون النسوان
اتبسمت الها وضحكت ، حجت : يعني صدك حتى تجذب نسوان !؟
- يولي لا تشرين ضيجة الخاطر مو كاعدين .
- ابو درب من تنصاد تلوفها
- الوفها عليش شعندي
- يعني بالله بالامارات من عفتني زعلانة عد اهلي ما دورت نسوان غاد ؟
- اسألج بالله منهو اللي عاف البيت وزعل !؟
- غير تعاركنا وعفت الببيت وانت بدل ما تودي علي وتصالحني عفتني معلكة ثلث سنين ورحت تشوف روحك بالامارات .
- والله اذا كل وحدة تتعارك تهد بيتها وتزعل ما ضلت بيوت .. واللي تهد بيتها لا تصيح ليش ما رجعني .. التطلع معناها ما تريد الرجال لو تريدني جان زعلتي بغرفتج لحد ما اجي اصالحج .
- خو تلوفها وتكلب الحق الك
ضحكت : كملي تا نروح بقالنا نص ساعة
كملنا ورجعنا ع التحليل اخذنا ودخلنا على دكتور مختص .. كال : نسبة طبيعية ولا يوجد اي عارض
- دكتور انا وزوجتي صارلنا ١٢ سنة وما صار عدنا اطفال هيج راجعت كثير اطباء ونفس الكلام يكلولنا ما بيها شي !؟
- اكو دكتور من المانيا جاي كلش ممتاز اذا تحب احولك عليه .. هو باقي بس هالثلاث ايام بس سعره غالي ولو تحصله لو ما تكدر تحصله .
- اكتبلنا دكتور الله يحفظك بلكي يكع على علتنا ويحل هالعكدة اللي بينا .. والله تعذبنا .
كتب النا وحولنا على هذا الدكتور وانطانا عنوان المستشفى الديتواجد بيها باربيل ، طلعت وكلتلها ، كالت : يعني نروحله عليك لو عليه
- اني هاي تحاليلي كاملة نروح يسوولج تحاليل ونقدم تحاليلنا اثنينا عسى ولعل يعرف الخلل وين ويشخصه ؟
- بس اني حللت ورحت كومة دكاترة وكلولي ما بيج عيب
- وهاي كدامج الدكتور ديكولي نفس الكلام .. بس هذا دكتور الماني بلكي يكدر يشخص الخلل .
سكتت وركبنا ورحنا .. جر وعر .. كدرنا نحصل دخول لهالدكتور .. دخلنا طلب من عدنا تحاليل وفحوصات معينة وكتب بالتقرير شنو الرايدة من الفحوصات
رحنا سويناها .. ورجعنا لكينا الدكتور ما موجود ..
كالوا باجر ورا الساعة ٣ الظهر راح يتواجد .. عفنا المكان ورجعنا بس هي مضايقة كالت : يعني هم تحاليل جديدة وهم ابر وعلاجات
- شنسوي انا عليا ما اريد طفل وراضي بقدر الله بس انت التريدين .. ما رايدة نلغي كلشي ولا نروح ولا نمشي بس من بعدها لو فتحتي حلكج ولو كلتي النسوان عايرني ليش ما يصير عندي جاهل قسما بذات الله ينتهي كلشي بيناتنا .. افتهمتي ؟
- انت عليش مثل الرايد حجة تا يطلك ما رايدني ما جابرتك علي طلك وعوفني ورد للامارات وارجع لنسوانك و صيعتك غاد
- صيعتي شنهو يولي ليش تخليني اتطاول عليج انت ما تعرفين تحترمين .. مو انت التريدين جاهل مو انت الصارعة راسي تريدين تحبلين مو دا نروح للدكتور شسووووي بعد
- ولو طلع الخلل بيه !؟ هم تصيح اطلكج واعيفج وما اريدج واني حكي جاهل
- انا يمتى كايل اريد جاهل يعمي لو جان الخلل بيج لا ااطلكج ولا اطالبج بعد ؟
- اي ما تطلكني بس تتزوج مو .
- اني اكوم انزل منج لان مكابلتج ما وراها بس النكد واللعبان نفس .
.....
چچك: من بعد ثلث ساعات فقدت السيطرة على رجليه بهالوكفة
وكعت وبقت ادية معلكة بالشباك وكمت شوي شوي افقد .. حسيت عليهم دخلوا .. كمت اصيح : راح اموووت عوفوني .. الله يخليكم عوفووووني.
فتحو اديه وسحبوني من المكان .. كوة امشي بين اديهم تايخة
حيل ما بيه وكلش متأذية .. شمروني بالغرفة جانت بان موجودة صرخت من شافتني وفزت اليه : شصاير بيج شسووولج
جرت خاولي وخلته على جسمي وكومتني للحمام .. غسلتلي وسبحتني واني ابجي .. وهي مستمرة تسألني شصاير وياي .. اخذتني للغرفة وغطتني واني ارجف .. سولفت الها كامت ترجف وكالت : وشلون راح نبقى هنا .. شلون راح نعيش
: جوعانة كلش
- ابقي هنا اني بكت صمونتين وجبن مثلثات من الريوك .. راح اجيبه واجي .
ركضت جابته واجت وقفلت الباب وسوتلي الي والها لفة ، اكلت لكمتين بس روحي لعبانة من انذكر ايده بحلكي ومنظره تكش روحي تركت الاكل وكمت ابجي
- اللي عرفته جناسينا عدهم منكدر كلشي نسوي باجي نطت لللي جابنا كل مستمكاتنا
- وشنسوي بجناسي نشرد ونروح لاي مكان ما يعملو بينا هيج .. بان لو شكد ما اشرحلج السوا صعب ما اكدر قذررر قذررر مراح نكدر نعيش هنا
- لازم نتبع اوامرهم منخالفهم
- وشلون نتبع اوامرهم وهم يعاقبونا ويكتلونا مراح نكدر نعيش هنا .
- ولو شردنا وما لكينا مكان ساعتها وين راح نروح ونحنا ما نندل طريق الميتم
- اعرف اسم الميتم بكركوك
- بس اسم بدون مدينة وعنوان منو راح يعرف ويدلينا !؟
- انت متقبلة نعيش هنا ؟
- ما متقبلة بس لازم نسمع كلامهم ما لازم نخالفهم .
دا نحجي اندكت الباب فزينا ضمينا الصمون والجبن والورق مالو جوا الفراش مال الجرباية .. ونمت فوكو .. وراحت بان فتحت الباب دخلت منال كالت : امشن كبالي لغرفة المدير
اجتلي تساعدني نكوم وكمت امشي واعرج من رجلي ..
دخلنا لكينا الرجال الجابنا اول مرة من الميتم وكعنا عليه نبجي ونتوسله يرجعنا للميتم .. كمت ابوس بأيده وكتلو : الله يخليك عمو والله اسويلك كلشي بس رجعنا للميتم
- له له له منو وياكم منو مأذيكم ليش هيج دا تبجون
كمنا نبجي بالزايد واني اشرحله شلون منال طلبت من الحارس يأدبني والحارس شك هدومي وكام ييسوي امور صعبة
التفت على منال كاللها : لا يكون اعتدى عليها
- لا الحارس راد يأدبها بس
-يأدبها لو اتقرب منها دا تكول سوا امور صعبة
- لا ادبها بس
اندارلي وحجه كلام بفشار وهو يسالني شلون اتقربلي بيا طريقة
استحيت اجاوبه وسكتت بقيت بس ابجي رد يسألني منين وهم بفشار .. لعبت نفسي من الطريقة اللي يحجون بيها بشفار وكأنها سوالف عادية
كاللها : سعر ليلة مثل هيج بنية باكر ب٣ الاف دولار .. اذا حاولتو تخسروني بيهن هالفندق هذا اهدو فوك روسكم .
- استاذ محد متقرب منهن والحارس مجرد اديها ما اتقرب منها ابدا .
- تمام تمام .. جهزوهم باجر اكو كعدة اريدهم يحضرون بيها بس بغير فندق .
- تمام
- انطوهم الاكل وخليهم يرتاحون باجر ما اريد اشوفهم بهالمنظر بجي وشكوا ووجوهن لطامة نريدهم بسهرة خاصة ، لا تفشلوني ويا زبايني ولا تخلوني اتندم اختاريت هذا الفندق .
- تأمر استاذ .
اشرت النا نكوم ..
مفتهمت المن يردونا وشنو هي الحفلة ، بان طلعت فرحانة تكولي : شفتي شلون رزلهم
- بس ما حاسبهم وعاقبهم على اللي سووه بينا وديكول يريدنا بحفلة .. شنو الحفلة اللي يريدها وشنو سعر البنية الباكر يعني شنو باكر راح يبيعنا لو شنو .
- اهوو انت كله تفكرين بشي مو زين يمكن حفلة نفرح ونركص ويمكن اكل طيب واشكال الوان افرحي شبيج .
- اني ما اريد ابقى هنا .. اريد اطلع من هالمكان بأسرع وقت .
- خلي نشوف حفلتهم بالاول .. وبعدين عود نحكم .
رجعنا لغرفتنا .. هالمرة ما خلونا نشتغل تركونا نرتاح .. فشمرت روحي ع النوم .. لهناك صار صوت قوي فزيت وفتحت عيني .. تحركت جسمي كلش مأذيني وثكيل الدفرات الاكلتها كلها ثكلت بجسمي .. شلت راسي بان نايمة وياي بنفس المخدة حاصرتني .. ضوا اصفر واحد مشتغل .. صوت مطر قوي والرعد صوته مخيف رغم احنا مو شتا .. الشهر الرابع .
شلت نفسي من الفراش الساعة كدامي تطلع ١٢ ونص
دنيا ليل والجو برد حيل .. فتحت الباب اني لابسة بجامة اوف وايت وتيشيرت ربع ردت قصير وشعري مفلول .. اخذت نعال بان ابو الاصبع وطلعت راسي كلش ديأذيني .. مشيت وطلعت لصالة الفندق هدوء محد اكو بس الجو برا كلش مرعب برق ومطر قوي ...
كمت اجر خطواتي وصلت الباب نفتح وحده .. صار بوجهي الرجال ابو صلعة منتجي وواكف يباوع ع المطر جوا السكيفة اللي اباب الفندق .. اتعديتا ونزلت للمطر كام المي ينزل عليه رفعت راسي للسما .. صارت قطرات المطر تنزل على وجهي بقوة ..
كمت ابجي واختلطت دموعي ويا المطر .. لميت نفسي من البرد ونزلت للشارع .. كمت اباوع منا .. ادور منا الشارع فارغ تماما .. ولا سيارة .. كمت ابجي بنحيب اريد اخلص من هالمكان القذر اريد ارجع للميتم اشتاقيت للمربيات مالتنا اشتاقيت لخواتي الصغار الجنت اداريهم ..
ليش طردتنا باجي جانت كلش تحبنا ليش انطتنا لذوله
ليش ما طردتنا بالشارع وكالتنا روحو دبروا نفسكم ليش نطتنا لذوله القذرين .. شلون راح اخلص منهم ووين اروح ..
كمت اباوع بالشارع هسه .. مال اشرد هسه ..
واترك كلشي وراي .. كمت امشي واخذ خطواتي بالشارع وابتعد من الفندق والمطر فوكاي .. ووين اريد اروح بهالليل ومنو راح يستقبلني ؟ اروح للشرطة ؟ ووين راح الكى الشرطة ووين اندلهم واذا لحكوني ولزموني .. اصلا بان هناك يمكن اذا ما لزموني ياذوها .. لا هي اتعاقبت بسببي مرة خطية لازم ارجع
جريت خطواتي حتى ارجع بس ما اريد ارجع اللي شفته اليوم صعب صعب التحرش مؤذي وقذر يمكن يعيدوها يمكن يأذوني اكثر ..
ابجي وافكر والكى الفندق بعده كبالي
كمت ابجي بقوة كعدت بالكاع وكمت اصرخ وابجي بصوت عالي كلش من كل كلبي : اريد اموووووت اريد موتني ياربي مووووووتني .
كمت اشهك وابجي بقوة جوا المطر .. ما احس الا ايد لزمتني فزيت بسرعة وانداريت ، لكيته ابو عضلات وراي : يبنة
كمت بسرعة : لا تتقرب مني
مد ايده يريد يسحبني .. ضربته ودفعته وركضت من عنده
كلهم قذرين كلهم قذرين ركضت بالفرع اللي ورا الفندق .. كعدت ع الرصيف كامت الدنيا تمطر جسمي مثل البوري يصب مي .. بقيت ساكنة لحوالي ساعة سكت المطر بس هوى وريح تشنجت رجلية واديةرمن البرد لفيت نفسي وكمت اهذي وما ادري .. يمكن راح اموت هوا من البرد اموت احسن .. ما ارجع ما اريد ارجع ويتحرشون بيه .
كمت افقد شوية شوية وما ادري يمكن نمت ما ادري شنو صار ويايا احساس اللا شعور ما نايمة بس ما احس ..
وكع راسي ع الرصيف وبقيت بمكاني البرد مثل السجاجين بجسمي ..حسيت باحد ديندهني بس ما دا اكدر افتح عيني .. انجريت حتى يكعدني ما عندي سيطرة على جسمي ديوكع .. انشاليت من الكاع جسمي كله يصب مي .
حسيت جسمي يتحرك احد ديمشي بيه ..
حاولت افتح عيني شفت وجهه .. لابس كبرس القمصلة فرك راسه عاقد حواجبه .. وملامحه مخيفة .. راح يأذيني .. راح يتقرب مني مثل ذاك .. غمضت عيوني ..
فتحت واني ع القنفة مشمورة وهوسة فوك راسي .. منال تحجي وعمال الفندق .. اجت بان وتحاول تكعدني ..كوموني ما اكدر اكوم شالني الحارس اللي تحارش بيا الصبح كمت اصيح : اااااااااااي عوفوني اريد اموووت عوفوني
شمروني بغرفتنا .. وبان تجر بيه وتنزعني وتغيرلي ملابسي ..
ومنال تصيح وتحجي .. رجعت جرت الجرجف اللي اتبلل من جواي ونومتني على الفراش وغطتني .
——
بيان : هاي وين جنت
عيفان : برا
- وعليش هيج مبلل
- تمشيت جوا المطر شوية ..
نزعت القمصلة وعلكتها .. وكلت الها : اكو بنية جانت جوا بجت بطريقة تشك الكلب
- انشك كلبك ؟
- بنية بهالعمر ليش دا تبجي بهالقوة
- تلكاها ساقطة حبيبها خاينها لو من هالمزعطة
- ما ادري
- لا ليش ما تدري جان بادرت وسالتها واتفقدت حالها
- ما ردت اسألها بس ردت اسحبها من جوا المطر بس خافت وشردت
- يا مسكين يعني بادرت بس هي الما رضت ، حرامات
- هاي شبيج يولي ؟ دا احجيلج
- لا ليش تحجيلي جان حجيت وياها شفت منو مأذيها يمكن صاحبها مو كفو وانت تسد مكانه
- انت مخبلة يولي ؟
- اني مخبلة لو انت داير ع النسوان
- يا نسوان ذني الداير عليهن دا اكلج بنية بجت بقوة واجيت احجيلج لا حجيت وياها ولا كعدت .
- حرامات والله فاتتك
انداريت عنها .. واني احجي ويا روحي : هسه هاي اذا اكلها تبعت البنية وشلتها غير تعملي عرس هينا
ضليت على تليفوني .. اكلب لحد ما نمت ثاني يوم الظهر اخذت المرة وطلعنا للدكتور .. انتظرنا للمغرب .. يلا دخلنا سمعته يحجي انكليزي ويا الدكتور العراقي ..
يكلو : يوجد تشوه خلقي ببطانة الرحم ما تستقبل اي بويضة ملقحة .. يجب ان نتأكد من خلال ناضور داخلي للرحم .. حجيت وياه بالانكليزي : وهل يوجد حل لذلك دكتور
باوعلي كال : لنتأكد اولا ومن ثم نقول ما يجب قوله
حولنا ناظور داخلي وهو موجود .. عاين الحالة واجا كال : لقد كنت محقاً هنالك تشوه خلقي في بطانة الرحم .. وفي مثل هذه الحالة لا يمكنها الحمل ابداً ، انت شريكها
- نعم دكتور انا زوجها
- اعمل على تأجير رحم اخر لعل ذلك ينفعكما فتحصلان على طفلا بايولوجيا منكما
- لم افهم ما معنى تأجير رحم
- الدكتور خاصتك سوف يطلعك على ذلك .
طلع الدكتور .. وكعدنا ننتظر الدكتور العراقي ..
حجت : شنو شديكولون ؟
باوعتلها شلون راح افهمها الخلل بيها وهي اللي متأملة الخلل بيه .. كتلها : خلي يجي الدكتور حتى افهم اكثر
بقيت انتظر وهي على نار ..
لحد ما اجا الدكتور العراقي وهي واكفة ، حجه : كاللكم الدكتور اكو تشوه ببطانة الرحم ما تكدر المرأة تحمل طفل
- بس كال
قاطعت : يعني الخلل بيه
ضكيت على ايدها :- لحظة ، بس الدكتور كال انصحكم بعملية تأجير رحم هي حل لمشكلتكم
- غير مسموح او ما معمول بيه بالعراق
- اي نروح بالخارج
- شوف عزيزي تأجير الرحم يعني ام بديلة تتفق مع امرأة ثانية .. وتجيبها حتى ناخذ بويضة من زوجتك ومادة ملقحة من حضرتك نلقحهم بالمختبر وبعملية جراحية تتخلى برحم الام البديلة .
- يعني ينولد الطفل من مرأة ثانية
- نعم بس يحمل جينات الام والاب الاصليين اللي هم انتم .. رحم الام البديلة راح يكون مثل الوعاء او الكبسولة اللي ينحط بيها الطفل اللي بالخدج وننطي العلاج والغذاء .. ما راح يحمل اي جينات من الام البديلة .. بس هالموضوع بيه اشكال شرعي وما معمول بيه بالعراق .
- يعني حرام
- يا عزيزي هالشي انكشف بالعصر الجديد لا موجود بالقران ولا بالسنة النبوية ولا بأي كتاب ديني .. حكم مستجد لازم مرجع شرعي او عالم فقهي يفتي والعلماء اختلفوا فيما بينهم اللي يكول لا حلال واللي يكول لا حرام .. بعد هذا الموضوع مو يمي تروح شيخ دين هو يفتيلك بهذا الموضوع اذا حاب تستفسر عن الامر بس بكل الاحوال بدون هالموضوع زوجتك ما راح يكون عدها طفل ابدا ولا راح تكدر تحمل .
كامت تبجي هي ، حطيت ايدي بيد الدكتور : اني اشكرك دكتور ، مع السلامة .
طلعنا وهي نطت من البجي تكلي : يعني راح تتزوج عليه .. يعني اني بيه الخلل ياربي حياتي ادمرت
- ول يابه اذكري الله ليش دا تكولين هيج
- هسه تكلي اذكري الله وبعد سنة تكلي حقي يصير عندي ولد
- لا حول ولا قوة الا بالله .
- مو كالك ناجر رحم خلي ناجر
- بيت هو يولي واجره الج .. هاي ارحام .. يعني مرة ثانية لازم ترضى تحبل عنج وينحط ابطنها طفل مو منها يا زلمة يرضى بته لو اخته تحبل بلا زواج حتى لو مرة منهي التحبل بلايا زواج وشتكول للوادم ماجرة رحمي حتى يدكولها طبل ويحطون عليها اشكال والوان .. ما تسمعي كالج هالشي ما موجود بالعراق احنا مو لا باوربا ولا بامريكا .
- يعني ما راح يصير عندي طفل كل عمري ما اصير ام ..
- يولي البعيد ع العبد مو بعيد على ربج .. ادعي وهو رب المستحيل .
ما ردت بس تبجي .. عاد بهالمناحة رجعت للفندق فضيت وياهم ودفعت حساب وطلعت ورحت لحديثة بنص الليل ، دخلنا البيت هي صعدت لغرفتها كبل .. واني مشيت اعمر نركيلة .. حطيت الفحم وصعدت بدلت و نزلت .. اخذت النركيلة ورحت بالصالة .. سلوان جاي : ها الله يساعدك
- يساعد بختك شلونها سفرتكم
- فانطاستك
- مبين من وجهك ووجه مرتك ، شكو ؟
حجاها ومد ايده سحب القمجي من ايدي وكال : اعمرها
تنهدت : ولا شي مشاكل كال وكلت
- ما تفتك وربك كلهن مشاكل يموعن الاذن هلكثر ما يحجن ويزنن .
- بعد، الله كريم
- جنك مهموم صاير شي
- لا احجلي عنك
كاعد نحجي .. نزل عمران كال : ها سكط كاعدين هينا ..
جر القمجي من ايد سلوان كام يدخن هو وكعد
حجه سلوان : يولي اذا واحدنا يضل على بنت عمو نعيش ناكصين عمر .. انا رايد اتزوج ما بيها مجال
- وابوي وافق شرط رضاة مرتك
- مرتي اهلها موافقين وردوها علي بس هي من يومك ما تحجي وياي ولا تكابلني
عمران : مصيرها تتقبل الموضوع وترضى ما طولك نويت ، وانت عيفان .. شنهي سالفتك
- شسالفتي راسي دايخ وما عرف راسي من جدمي
- يول المثل حالك المفروض متختخ مرتاح لا طفل لا مسؤلية بطرك هالمرة
- محد مرتاح بهالدنيا يخوي لا الخالي ولا المليان ..
- على ثمك نور يول انا انصرعت بين هالنسوان .. اروح يم ذيج تحجي على فلانة وتغار منها اروح يم الثانية تغار من الاولى وما بيهن وحدة راضية وشما تنطي تصيح تنطي لذيج اكثر مني افكر احط الثالثة واخلي راس يطك براس
باوعتله : انتم ليش حلولكم كلها عبثية ؟
- عبثية اجانا المثقف يول درينا مهندس معماري وعايش بالخارج بس مو تشوف روحك علينا
- هسه اني شايف روحي بس مو حل هذا يا اخي انت مصروع راسك من اثنين نسوان برايك اذا اجت الثالثة يبطلن غيرة لو يزيد همك هم ثالث
- بالحرام اطلكهن ثلاثتهن وانعل ابوهن
- من الاول حل امرك ويا وحدة وفضت هي الوحدة ما تنحمل يا اخي انوب اثنين .. اخ لو بعقلي هذا يوم اللي اتزوجت بالقران جان لهالساعة ما متزوج
- ايباخ ووين تروح
- اطلع بشهادتي ادرس بيريطانية بامريكا اشوف الدنيا اعيش يا مرة يا جهال يا نك وزوجات وارضي هاي وقنع هاي .. شبيكم انتم شوفوا العالم شلون عايشين واحنا جيب وعدد ناقصنا بس بعران ونحط النسوان ع البعران وندج وين ما عند الله كاع .
-انهجم بيتك يا الامريكي ولك عشت بالامارات هم زين ما عايش بامستردام جان كلبت علماني يولو
- من صدك اطخ براسي اخذ بيان واطلع استقر بالخارج
- تفضل احچي هالحچي للحجي خاطر يكصلك تكت ع المكبرة ويدفنك بيها يولو .
جريت القمجي مسحته .. وضليت ادخن وحاير بدنياي ومنين ما اجيهبها ما جاي تصح .
…
چچك : اندكت الباب الساعة ٦ الصبح كومونا للشغل مال البوفيه .. كمنا بس اني جانت حرارتي نار .. كوة اشتغل واجر ايدي ..
دخلت منال كالت : اشتغلي دشوف اشتغلي دايحة بنص الليل جوا المطر حاسبة روحها بمسلسل تركي .
سكتت ما جاوبتها .. بان راحت وكفت يم الاوبن بوفيه ..
واني بقيت جوا ايد ام علي .. للـ ٩ كالت منال : عوفن الشغل وكومن بدلن وامشن وياي دنروح للسوك
رحنا لبسنا جينز وتيشيرت وباتة وطلعنا وياها ..
اخذتنا على سوك البالة اخذتلنا ملابس بس ملابس حلوة كامت تقيس وتاخذ النا فساتين وملابس سهرة وملابس داخلية واحذية كعب .. هو يتسمى سوك البالة بس الملابس الموجودة كلها عبالك جديدة .. لما بان سالته اذا ملبوس او لا كاللها : لا ما ملبوس بس البضاعة اللي ما تنام ما تمشي بمواسمها ويروح موديلها ننزلها بسوك البالة بسعر رخيص
اخذنا كومة غراض بان جانت فرحانة واني جنت مصخنة من مطرت البارحة وصوتي مبحوح .. كامت هي تشتري الي والها تراجي كلايد اكسسوارات احذية كلشي اخذت
من بعدها اخذتنا لمطعم وكالت النا : اطلبوا اي شي تحبوه اليوم مسموح الكم اي شي ببالكم
فرحت بان حيل وطلبت بيتزا .. واني جان حلكي مر بس بنفسي ادخل مطاعم وهيج واكل طلبت همبركر …
من وصلت .. ما اشتهيت اكلها بقيت مخليه راسي ع الميز واغفي ..
لليل بان جانت منطلقة ويا منال .. سرحت الها شعرها ورتبتها ولبستها الفستان ويضحكن ويسولفن .. شفت بان دا تحاول تكسب بان وتتلوكلها حتى متأذيها بالشغل.
رجعت اندرتلي : يلا كومي بدلي
بدلت جينز وتيشيرت كال : هذه حفلة راح تروحين ببنطرون
- ما احب الفساتين
- اي لا تحبيها بس اليوم يختلف
جبرتني الا البس فستان .. جان لونه ابيض وبيه طوبات صغار سود .. ربع ردن ويصير ويا ركب رجلية .. وبيه حزام شدته اليه ليورا .. وسرحت شعري اباوع صرت حلوة .. بس كلش دايخة وتعبانة وانلفاونزا عندي بالعظم .
ركبنا ورحنا بسيارة .. ولهسه مدا نعرف شنو هي الحفلة ..
وصلنا هناك جانن اكو بنات ويانا اثنين يركصن بس بطريقة تلعب النفس بجسمهن حتى يجذبن الرياجيل الكاعدين
الكاعدين ما بيهم شاب اقل واحد يطلع عمره بالخمسين سنة ..
اني لزمتني الانفلاونزا كمت بس اعاطس .. وبان خافت وكعدت .. كالت : يعني شراح نسوي ويا ذولة
- ما اعرف
وعطست
اتجاهلوني لان مريضة واعاطس ولازم الكلينكس .. متقربولي
بس بان اجا واحد اخذ ايدها وهي خايفة كاموا يحاولون يركصوها ..
كاموا ينطوها عصير بزته اول ما شربته كثر ثلج وكاللها هسه راح يصير طيب .. كامت تشرب شوية شوية واندمجت وهي تجاوب على اسألته وما اعرف شلون كامت تتصرف وتضحك
كام اخذها .. للغرفة ضليت عيني شاخصة وراها شراح يسويلها
جان شوية من الباب مفتوح العرفته يحاول يتقربلها وهي تبعد بيه وتبجي
كمت دخلت الحمام اللي مقابيل الغرفة وبقيت بيها حتى ما اطلع .. شوية وكمت اسمع صياح الرجال الجان ويا بان ..
كمت ارجف واخاف افتح باب الحمام .. وهو يصيح : غشوني اخذوا مني سعر بنية وطلعت مو بنية .. اليوم اكلب الدنيا عليهم .
كام يخابر ويغلط ويصيح وكاموا طردوا البنات الموجودات كلهن ..
كمت طلعت من الحمام كال : وهاي وياهن
كمت عطست بوجهه ، كال : غاشينا ببنات كلهن امراض ويكول عليهن عذراوات طلعوا جذاااابين
طلعت من المكان ونزلت وراهم شفت واحد جر بان .. رحتلها اركض بس حيلي مهدود وكوة اتنفس من المرض والانفلاونزا …
لما وصلنا مكان دخل علينا منير كال : شنو يعني مو عذراوات انتو منو متقرب الكم .. ويا منو نايمات بنات *****
كام يفشر علينا ولزمنا بعاصاته يضرب بينا بكل قوته وهو يصرخ .. كمنا نتصارخ ونبجي جوا ايده .. عافنا وخابر على مرا .. اجت جرت رجلين بان تريد تفحصها كامت تبجي .. ضربتها وجرتها من راسها وغصبتها وفحصتها كالتله : مو بنية
ورجعت عليه كمت ابجي واحاول ابعدها فحصتني كالتله : هذه باكر محد لازمها .
سحبوا بان لزموها كطعوها من الكتل واني لفيت روحي وكمت احط اديه على اذني علمود ما اسمح صوت الصوندة وهي تنضرب على جلدها وصرخت بان من كل كلبها .
دخل منير كالي : كومي انت
- والله ممسوية شي الله يخليك عوفني
- تعاي وياي لججج
وسحبني …. يتبع
_________
يعين اللي ما الها اهل .. مرات حتى لو اهل ما بيهم خير .. بس يمكن اسمهم اهل يحموها من هيج تجار بشر ما عدهم ذمة وضمير .
متابعة شيقة
🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺
متخرجوش واتفضلوا حضراتكم كملوا معنا هنا 👇 ❤️ 👇
وكمان اروع الروايات هنا 👇
انضموا معنا على تليجرام ليصلكم اشعار بالروايات فور نزولها من هنااااااااا
🌹🌹🌹🌹🌹🌹🌹🌹🌹🌹🌹🌹🌹🌹🌹🌺🌺🌺🌺🌺🌺🌺🌺🌺🌺🌺🌺
تعليقات
إرسال تعليق