رواية رقم سبعه الفصل الخامس والسادس بقلم جمانه السعيدي حصريه وجديده على مدونة النجم المتوهج
![]() |
بليل ماكدرت انام حايره اخليها بحضني لو اخليها بفراش وحدها وكلما تبجي يفز عمار من نومته
عمار....شبيها ليش تبجي
الهام...طبيعي تبجي
عمار خاف جوعانه
الهام...هسه اسويلها ممه وارجع
جبت الممه ورجعت لكيت عمار خاله بحضنه وهي غافيه مثل الملاك
الهام....هاااا نامت
عمار...بس خليتها بحضني نامت
الهام...حست بحبك الها ونامت
عمار...صدك اخوج مدري شلونه شلون كلبه ينطي يعوفها
الهام....لا مصمم يشمرها بلشارع ميريدها
عمار...هاي هديه رب العالمين دزها النا
الهام...اخيرا بيتنا راح يصير بي حس
عمار...متاكده مايجون يطالبون بيها
الهام...لا محد يطالب بيها ابد
عمار...من ترحين الاهلج لاتخاذيها وياج عوفيها هنا خاف تحله بعينهم وياخذوها
الهام...ولله محد ياخذها ابد ومن باجر اروح للمستوصف اطلعلها بيانات وتصير باسمي واسمك
عمار...ميخالف لاتخاذيها وياج من ترحين الاهلج
الهام...شني تحبها
عمار...ما اعرف ليش تعلقت بيها باجر الصبح اروح اشتريلها سرير وهزاز وفراش وملابس
الهام...على كيفك شويه شويه علينا
الهام...تعبت بليل وللصبح يله نامت واني كدرت انام
كعدت الصبح بلعشره على صوت عمار وهو يكول دخلو الغراض هنا خلوهن
فتحت عيوني شفت فرح نايمه
كمت طلعت من الغرفه واشوف كومت غراض
الهام...هاي شنو
عمار...هذا جهاز فرح
الهام...اباوع جايب سرير وهزاز ومندر طفل ومميات اثنيين
وملهي اطفال اثنيين ومخدة طفل وملابس واوفرات
ودسته حفاضات حديثي الولاده وبوطره وعطر اطفال
الهام...هاي هواي شلون عرفت اجيبهن
عمار...الي يسئل يعرف يله ساعديني اندخلهن ونرتبهن جوا
بقيت اربع اشهر واني بس على المخابره ويه اهلي
ما اكدر اخذها واروح عمار ميقبل واني اخاف عليها بعدها زغيره
وكل يوم تحله اكثر واكثر مدنفشه وبيضه وعيونها صفر تخبل
عمار تعود عليها اول مايدخل للبيت يصيح وين بزونتي وين بنيتي وين حبيبت بابا
من يدخل لمن يطلع شايلها ويبوس بيها
وبعمر ست اشهر اول كلمه نطقتها بابا وهو مامصدك ابد
رحت مره وحدا الاهلي وعمار ماقبل اخذها وياي
بقا بلبيت وبقاها عندا كال شوفي اهلج ورجعي بسرعه
اني هم مومثل قبل بس وصلت سلمت عليهم واخذتلهم مسواك وياي وملابس للبنات ساعه ورجعت لان ماتحملت افاركها
جمانه السعيدي
احساس جميل ما اكدر اوصفه واني اشوفها تكبر كدامي
وكلشي تسوي اول مره حلوه
اول مره صفكت بقيت منتضره عمار واريدا يشوفها شلون تصفك واول مره ركصت
وما انسا اول مره لزمت الحايط ووكفت
صار عمرها سنه واهلها مشايفينها ابد
وهمه هم مايسئلون عليها بس شلونها شكبرها صارت
واني قللت الروحات الهم لان ما اكدر اخذها وياي
سوينالها عيد ميلاد يخبل بلمطعم بس اني وعمار وما عزمنا اي احد
علاقتنا بيت خالد شبه مقطوعه لانحب نروح الهم ولانحب يجونا
مرات خالد يجينا بلصدف
سمعت خالد فلوسا كلهن مخلصن على علاقاته ويه البنات
وزوجته كل فلس تحصله للصالون لو ملابس
على العموم اني كطعت علاقتي بيها ما احب التقي وياها
لان كلامها مثل السم
مرت الايام وبتنا تكبر كدام عيونا صار عمرها ثلاث سنوات والخير كله اجا على كصتها عمار وسع شركته وصارت اكبر شركة سفر وسياحه بلسعدون وزباينها جاي يزيد عددهم
حبلت سعاد زوجت اخوي للمره الثامنه وهل مره شغله مصيريه
اذا بنيه وين تروح بيها
كل الي صار بيها ومصارت الها عبره بعدها تنج على الولد
اريد ولد وكان الولد راح يسكنها الجنه
وفعلا تم الحمل وهلمره جابت ولد ما اسولفلكم فرحت اخوي شكبرها
ذبح ذبيحه لوجه الله وسما الولد حسين
رحنا هلمره اني وعمار نبارك الهم وعمار بقا فرح يم جوارينا مايريد ابوها يشوفها
لان هي ماشاء الله جمال موطبيعي
والسانها يخبل كلشي تحجي
بس يضوجها عمار ويضل يبوس بيها تاخذ الريمون وتخابر
الوووو الغول تعال اخذ بابا وكيح
لوووو تخابر الشرطه بلريمون
وعمار متخبل عليها ويخاف عليها من الهوا الي يمر
لكن فرحت اخوي ماكملت طلع الولد مفتوحه لهاته والحليب يعبر على خشمه ويختنك
وبدا يراجع بي للدكاتره وكل فلس يحصله يركض بي للطبيب
بعدين قررو يسوله عمليه رقع للثه
جمانه السعيدي
مرات الانسان عندا نعمه وابد ما حاس بيها يكون متعافي على الخير الي عندا
كبر حسين ابن اخوي بس طلع كلامه مو واضح
نطقه ضعيف
وكلما يشوفه اخوي يموت من القهر ويكول رب العالمين
يعاقبني لان تعافيت على النعمه الي عندي
واني فروحتي كبرت وسجلتها مدرسه وابوها اجرلها سايق ياخذها للمدرسه ويرجعها لان يخاف عليها
كل سنه تنجح الاولى شاطره وذكيه ماشاء الله صارت بلثالث ابتدائي وهي يوم عن يوم يزيد جمالها
عبالك معجونه بعسل
فد يوم اجانا اخوي جاي البغداد بشغل ومر علينا
هي جانت بلمدرسه واني خابرت عمار ورجع للبيت لان اخوي عدنا
شويه ورجعت فرح جان تدخل وتشبك عمار وتبوسه بابا مشتاقتلك
اخوي ضل صافن عليها مامتوقعها هلكد كبرانه وحليانه
عمار...روحي بدلي حبيبتي
فرح...هاي شنو وين بوستي
عمار...باسها وكال يله روحي بدلي
فرح...بابا منو هذا الرجال
عمار...هذا خالو
فرح...بس اني ماشايفته هاي اول مره
عمار...روحي بدلي حبيبتي
فرح...اتقربت على الخطار وكالة هلووو خالو شلونك
اخوي...الحمد لله
فرح...راح تبقى يمنا
اخوي...لا
فرح...عندك بنات
اخوي...اي
فرح...جيبهن وياك حتى نلعب اني وياهن
اخوي...ميخالف حبيبتي مرت الاخ اجيبهم
عمار...دوختي خالو بلاسئله روحي بدلي
فرح...اقتربت من عمار ولزمت خدا شبي عموري حبيبي اليوم ضايج
عمار...ضحك وكال لان بنتي الحلوه اليوم هواي تسئل وماتسمع الكلام
فرح...زين راح اسمع الكلام بس خالو يجيب بناته اللعب وياهم تمام
عمار واخوي صوت واحد تمام
للحكايه بقيه احبكمممممم
#البارت السادس
#رقم سبعه
جمانه السعيدي
اتغده اخوي يمنا ورجع للصويره وحسيت عمار ضاج لان اخوي شاف فرح
الهام...دخل للغرفه ودخلت ورا شبيك ليش ضايج
عمار...انتي ماشفتي شلون عينه على فرح
الهام...لان ماشايفه قبل اتفاجى بيها
عمار...خاف اتندم ويرجع يطالب بيها
الهام...لاتخاف مايطالب بيها عدا سته غيرها
عمار...انشاء الله ماتحلى بعينه ويطالب بيها
جمانه السعيدي
رجع اخوي للبيت وتلكته سعاد هله الله يساعدك
...الله يسلمج
...شبيك شصاير
...اسكتي اليوم شفت شي عجيب
...خير شنو شفت
...شفت فرح ماتتخيلين شلون صايره جمال موطبيعي ولسانه شطوله وسوالفها تخبل
...غير انت ماردتها
....احلى من كل بناتنا والذكاء والشطاره ولوشايفه عمار شلون يخاف عليها
....الله يحفضه الهم ويسعدهم لان نقذوها وما قبلو تنشمر بلشارع
....ولله ما ادري شكول
...ندمان
...ما اخفي عليج عندي نوع من الندم بس بعد شيفيد الندم
صارت عدها حياة غير حياتنا الله يسعدها ويهنيه
جمانه السعيدي
مرت الايام ووصلت فرح صف خامس ابتدائي وبيوم وصله السايق للمدرسه
وما لكه مكان قريب باب المدرسه ينزلها بي
نزله على الجه الثانيه للشارع
نزلت تمشي تريد تعبر الشارع جان تجي سياره وتسحكها
صرخت ووكعت نزل السايق والناس التمت كانت فاقده الوعي والدم تارس ملابسها
اخذها السايق للمستشفى وخابر على ابوها وامها
عمار من الهبطه شويه وينجلط
عاف كلشي وركض هو والهام للمستشفى
وصل ولكه الدكتور جاي يفحص بيها
عمار...هاااا دكتور بشر بنتي عايشه
الدكتور...اي عايشه بس اكو خبر موزين راح تسمعه
عمارررر....كوا دكتور بنتي شبيها
الدكتور كف رجلها ممرود دايس على التاير وما كو حل غير
نبتر كف رجلها لان اذا بقه يمكن يشكل التهاب ويتحول كنكري لاسامح الله
اذ ا تريد تشتري عمر بنتك لازم نبتر كف رجلها بلكامل
عمار...فدوه دكتور ماكو حل ثاني اطلعها للخارج
الدكتور....لو تلف العالم كله ماكو غير هذا الحل عمي احمد ربك واشكره بنتك طلعت سالمه من هذا الحادث
تخيل لو السياره دايسه راسها لو القفص الصدري جان مالحكت عليها ابد
عمار..زين دكتور شوف شنو اللازم وسوي
الدكتور...محتاجين توقيعك على العمليه تعال وياي
وفعلا عمار راح وقع على العمليه
رجع لكه الهام تبجي ومنهاره حضنها وكعدو بلكاع اثنيينهم يبجون
الهام...اهي اهي ليش ياربي هلبنيه طلعت بيها من الدنيه
ليش هيج يصير بيها بنيه مثل الورد تنكص رجلها
معقوله فروحه تعيش بدون رجل
عمار....يابويه تعال وشوفني شصاير بيه بتي هيج يصير بيها
جمانه السعيدي
مرن ساعتين وثلث يله طلعت من غرفت العمليات
بس شافوها امها وابوها كامو يبجون بلزايد
الدكتور...ميصير تبجون احمدو ربكم وشكرو ان بتكم طلعت سالمه
زين ماسببلها الحادث شلل وضلون حايرين بيها طول العمر
هسه اجا دوركم اثنينكم لازم ترفعون معنوياته
اذا شافتكم تبجووون راح اتحس نفسها انتهت انتم لازم ماتحسسونها بلنقص
لان تدمر نفسيتها
بقت بلمستشفى اسبوع واجو كل اهلنا واقاربنا حتى اخوي وزوجته اجو
خالد...عهود ترحين تسلمين على الهام وتاخذين من خاطرها
عهود...هسه لو ميته وخلصانيين منها على الاقل كلشي يرجع النا بلمستقبل راحت جابت بت اخوها حتى يكوشن اثنيينهن على هذا الخير كله
خالد..منو يكول عمرج اطول منهن يجوز انتي تموتين وكلشي يرجع الهن
عهود...اسم الله ولدي موجودين وكلشي يرجع الهم بلمستقبل
خالد...هسه ترحين
عهود...اي اريد اروح اتشفى بيها واغثه شويه
خالد...ماعايزين مشاكل لو ترحين محضر خير لو لاترحين ابد
عهود...هاي شبيك اني شكلت قابل
خالد..وصلنا للمستشفى واني بست فرح وتقدمت عهود
الحمد لله على السلامه
الهام...الله يسلمج ليش تعبتي نفسج
عهود...ما كو اي تعب خطيه راح تبقى معوقه طول العمر
الهام...ما اسمحلج بنتي مابيها شي
لو سمحتي لو كلمه طيبه لو روحي منا
عهود..هاي شبيج انتي ماتستاهلين واحد يجيح
الهام...جيتج بيها اذيه ما اريدها ابد
عهود...اوي قابل اني شكلت كلت معوقه وهاي حقيقه
خالد...دفعها وطلعها من الغرفه انتي شبيج تخبلتي على الاقل احترمي وجودي احترمي اخوي انتي شنو من بشر
جمانه السعيدي
طلعنا من المستشفى للبيت وعمار ميقبل يروح للشركه كاعد يمها يسولف عليها ويلاعبها ويشتريلها
ودز للخارج يشتريلها طرف صناعي يوالم عمرها وقياس رجلها
شهر تحسنت ووصل الطرف الصناعي وبدا عمار يعلمها المشي بلطرف الصناعي الي وصل
ورجعت فرح للمدرسه هلمره صمم هو يوصلها يوميه ويرجعها
لان مايريد الي صار يرجع يتكرر مره ثانيه
بس عمار بسبب هذا الحادث صار حزين ودائما يكول حرامات ماكدرت احافظ على بنتي واحميها
رجعت فرح نفس شطارتها ونفس ذكائها وكل سنه الاولى على صفها
وكلما تكبر تحلى اكثر
كل سنه بلعطله نسافر من خلال شركتنا الدوله ما خلينا دوله ما رحنا الها احنا التلاثه
رحنا مصر والامارات وتركيا والهند واندنوسيا ايران وسوريا وللسعوديه للعمره اربع مرات
الهام...كان همي الوحيد اعزز ثقة فرح بنفسها وما اخليها تحس بلنقص بسبب الي صار
رغم بعض البنات الي وياها يحاولن يتنمرن عليها
لان هي شاطره وذكيه وحلوه
كانن يحاولن يلكن نقص بيها ولمن يعجزن يقلدن على رجلها
وكلما تكبر نوصيلها على طرف يوالم عمرها ومقاس رجلها
خلصت سادس بس شني صارت تكتل جمالها غير
وقررت تدخل معهد سياحه وفندقه حتى تكدر ادير شركة ابوها وتساعدا
وعمار حيل فرحان باصرارها وعزيمته على دخول هذا المعهد
ويحسها كد المسوليه
وماضيعت تعبه عليها ابد
للحكايه بقيه احبكممممممم
🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺
اتفضلوا حضراتكم كملوا معنا هنا 👇 ❤️ 👇
وكمان اروع الروايات هنا 👇
انضموا معنا على تليجرام ليصلكم اشعار بالروايات فور نزولها من هنااااااااا
🌹🌹🌹🌹🌹🌹🌹🌹🌹🌹🌹🌹🌹🌹🌹🌺🌺🌺🌺🌺🌺🌺🌺🌺🌺🌺🌺
تعليقات
إرسال تعليق