رواية قدري الفصل الاول والثاني والثالث والرابع والخامس والسادس والسابع بقلم الكاتبه صبرين حصريه وجديده على مدونة النجم المتوهج
 |
بدايات🥀🍒:
لكل حياة بداية ونهاية انا كنت حاسة هذي هيا بداية لي سعادتي ولكن كان للقدر رأي اخر بصح ياك مكتوب ما منو مهروب والحياة العايشين فيها كل ما تسمع حكايات ناس تنصدم الأنو كل قصة مختلفة على قصة وكل وجع مختلف على وجع وقدرنا تكتبت قبل منجو لهذي دنيا
♡الحلقة الاولى ♡:
اليوم عرسي نضت الصباح دوشت وتوضيت وصليت صلاتي دعيت ربي يسهللي حياتي و أموري ويباركلي في زواجي لي جاني على غفلة ويكون الرجل الي تزوجتو وليد أصل ويخاف ربي فيا... لميت صلايتي وقاعدة نفرز في حوايجي الي راح نديهم معيا لاغوب بلونش والاكسسوارات... دخلت ليا اختي سندس سلمت عليا وقاتلي هيا نهبطو نفطرو باه نروحو للحفافة ياك قاتلنا 6:30 تكونو عندي... هبطنا لقيت خاوتي للزوج مع نساهم ويما وخالاتي وجدة في الكوزينة صبحت عليهم... فطرت معاهم قالي خويا فريد وجدي روحك راني نستنا فيك في طنوبيل لبست وخرجت وراحت معيا اختي و هازة لاغوب تاعي ركبنا و ديمارينا للحفافة لقيتها تستنا فيا مشطتلي وماكياتلي ولبست لاغوب تاعي باش شفت روحي واااااو هاذي انا سيبافري.... سندس واااو ختيتو جيتي بومبا يا محاينك اليوم يهبل سي خالد عليك الله يبارك تهدر وعينيها معمرين دموع كملتلي على 10:00 روحت للدار قابلوني بالزغاريت وهم فرحانين... شفت دموع ماما تمسح فيهم ماشي حاب تبين بلي تبكي باش منتأثرش عجبتهم بزاااف ومانكذبش عليكم مام انا فرحت.. صح زواج تقليدي بصح اي وحدة تفرح نهار زواجها... وياريت فرحتي تمت وياريت قعدت في الدار و مجاش الكورتاج و ياريت ماركبتش و مارحتش معاه ااااااه يادنيا ااااااه ياربي نهار زواجي يصرا هك..
❀ما تمنيت البكاء يوما لكن هم الزمان ابكاني تمنيت ان اعيش كما تريد نفسي لكن عاشت نفسي كما يريد زمان❀
.يتبع ديري جام وعشرة ملصقات نكملو....#قدرررري
#الحلقة2و3و4
بقلم صبرين Mh
نضت صباح صليت الفجر ورجعت رقدت كنا في أواخر أكتوبر وكان الجو بدأ يبرد دخل علينا الخريف .. صبحت راقدة لحقت 06:30 جات سندس تجري سماح سماح نوضي قاتلك ماما نوضي تفطري راح الحال عليك طولتي على قرايتك ويعاودو يحاوزوك كيما المرة الي فاتت وهذي مرة شوفي شكون يدخلك قتلها امشي سندس خليني نزيد غير شوية قوليلها مزال الحال ودرت للجهة الأخرى راقدة على كرشي رجل وحدة طالعة ووحدة هابطة يديا تحت المخدة وشعري واقف في السما حالتي حالة شوي هكذا جات يما جابت معها الڨلاص ودرتهولي داخل بيجامتي ونطير لسابع سما ونعاود نهبط ونشطح قبايلي غير باش يهبط هذاك لڨلاص من تحت تريكو ...آاااي يما حرام عليك ..نوضي يا الفنيانة هزي روحك خمرتي راح الحال وقتاش تغسلي ووكتاش توجدي روحك ... يما والله دقيقة برك ونكمل ياك نلبس حجاب والخمار ونهز محفظتي ونخرج مزية مانيش ندير في المكياج نغسل بصابون ديرموسوفر عشقي الوحيد وجهي صافي ماخربتش فيه نهائيا وأصلا ممنوع عليا الماكياج والتليفون يقتلونا.... خرجت من الدار الليسي ماشي بعيد بزاف نمشي ربع ساعة نلحق في طريقي تلاقيت صاحبتي وحبيبتي مريم مع خوها ..أن شاء الله برك مايوصلناش هو ونتقيا على صباح ربي الخنونة تاعو ديما لاصقة في نيفو شحال معفون هذا الطفل وكي يكون يهدر معاك لازملك جدار برلين بيناتكم يهدر ويبزق ...صباح الخير سموحة كيفاه صبحتي صباح النور والسرور الحبيبة..روح خويا ضرك نكمل وحدي..اففف الحمد لله كي راح
وصلنا لليسي نمشو ونكحلو هذاك مليح هذاك ماشي مليح هذاك ليا هذاك ليك حتى لحقنا قرينا زوج سوايع فرونسي بسيف فاتو ومنبعد كان عندنا سبور قالي هاني بس سماح ...قتلو وي واش كاين.. قالي جابولنا استاذ جديد تاع سبور يلوكان تشوفيه يهبل ويضحك... قتلو وانا واش دخلني فيه اعطيني تليفونك نسمع شوية غنا ياك علبالك انا مانيش نلعب...قالي بشرط...قتلو والي هو؟؟ قالي نمدلك تكتبيلي شوية دروس تاع الادب ..قتلو اوكي لحقت وقت سبور بدلنا لبسنا ليسيرفات تاوعنا ودخلنا وانا كي ولايت معمرة شوية نحشم نلبس حاجة مستورة فوقها المهم تهبط على مسلاني شديت تليفون هاني ودرت الكيتمان تحت الخمار نسمع في الغنا دخلنا للماتيكو لقينا الاستاذ الجديد واش نحكيلكم كور وديكور قد مانككيلكم على زينو مانعطيهش حقو طويل وكتافو عراض صدرو باين متحوف ومرسوم تحت هذاك التريكو لابس سيرفات كحلة مع الابيض باسكات بيضا معلق صفارة عندو لحية خفيفة عينيه كبااار وشوافرو تقول مداير ريسيل كي يضحك معاك تطيحي ديركت ضربنا فيه عشقة.. بدأ يسقسي على الاسامي حصة تعارف وسقسانا على الأستاذ الي قبلو واش كنا نلعبو هذا أوكل وانا مش سامعة بوالو غير نخزر فيه بصح مانسمعش كي لحق سقساني على اسمي جيت باش نحبس الغنا وليت زدتلو... راني نهدر معاك مدموزال كي يسموك ؟ وانا مزالني نتعافر مع الكيتمان نحوس على القفلة تاعو باش نحبس الغنا والتليفون مانقدرش ننحيه كان في صدري ماتصلحش كيفاش نجبدو كي طولت مارديتلوش قاتلو صاحبتي استاذ اسمها سماح ..وهي علاش ماتهدرش طرشة ماتسمعش؟ لحت يدي غير بلاعقل تحت الفاست باش نجبد التليفون ننقصو طار الكيتمان وبدأ العرس بنت البارود بنت البارود تضرب ماتخافش...يا الارض انشقي وبلعيني ويااا ديك تبهديلة الغنا مزالو يغني من الخلعة تصمرت في بلاصتي قريب نبول على روحي... التلاميذ كامل يضحكو مريم خلعت والاستاذ وجهو ولا ميتفسرش حواجبو عاقدين زير على سنيه فقت من سرحتي كي عيط عليا اسمعيي حبسي علينا الخماج تاعك لانجي نكسرهولك يهدر ويمشي قاصدني تخطفت في بلاصتي وجهي راح الوان دمعتي بين عينيا شواربي يرجفو من الخلعة جبدت تليفون الي كان في وسط صدري وطفيتو وصل عندي قالي هاااتي قسامو هنا وهاني غير يخزر فيا وخاف المسكين نشوف فيه كيفاش مشوكي غاضني يشوف فيا نظرات شغل ينبه فيا باه مانمدهلوش.. بسيف مديتهولو خطفهولي من يدي طفاه ودارو في جيبو قالي لحقيني تشوفي للمدرج حطيت راسي في الارض من الحشمة..حشمت من الاستاذ وحشمت من هاني... الاستاذ مشا وانا جيت راح انلحقو قالي هاني سماح علاش هكذا علاش وضرك كيفاش دبري راسك التليفون لاازم ترجعيه لازم يعطيهولك اذا دخل لليفوطو وليفيديو خلات عليا ديري المستحيل باش ترجعيه قتلو ماتخافش ضرك نشوف كيفاش ندير ويا لوكان يولي رايي المقود لور والله ما نشدو عليه ولا يجي في يدي تبهديلة كبيرة والمشكل وين الاستاذ طلع مدين... مشيت لجهة المدرج لقيتو يستنا فيا مربع يديه هذا باين مغشش لوكان يلقا الموت يشريهالي بقيت بعيدة عليه شورلي بيديه تاع تقدمي لهنا مشيت وكل خطوة نحسها عام حتى وصلت لعندو ميترا بيناتنا قالي اهدري وسمك هبطت راسي:س س سماح اهيه امدموزال سماح علاش جيتي هنا باش تقراي ولا تعرسي اهدريييي تعيش استاذ غلطة والله مدهولي زميلي باش نحكمهولو بيسك انا مريضة ماقدرتش نلعب السبور وقصتو جهة الغنا وصار الي صار اااا والكيتمان شكون الي كان يسمع ؟؟تكذبي قوليلي ضرك كيفاش ندرلك اممم؟ نكتبلك تقرير من نهار الاول بعد وانا مزال ما عرفتكمش♡الحلقة 03♡:
بقلم صبرين Mh
آخر مرة استاذ والله مانعاود وعلاه معولة تعاودي أكيد آخر مرة بيسك تليفون انسايه حتى يجي ولي أمرك هو قالي هك وانا طلعت راسي و نخزر فيه خزرات تاع وحدة محطمة مكسورة الخاطر خايفة كل هذا الوقت وانا مهبطة راسي ونحكي مجرد قالي ولي أمرك طلعت راسي وبقيت نشوف فيه مشوكية حتى الدموع حبسو وحدهم بقاو غير عينيا يلمعو بيهم حتى هو ومانحش عينيه وكان قريب ليا بزاااف انا نخزر فيه وحالة فمي من الخلعة ويدي حطيتها جهة قلبي الي كان يضرب بالقوة حسيتو راح يخرج من صدري .... جبنا مدة وحنا هكذاك حتى طرطق صباعتيه بين عينيا باش رمشت وتعقنت في نفس الوقت هييييه انت اخرجي عليا وآخر مرة وتليفونك حتى يجي ولي أمرك باش تديه خلاص تعقنت تع صح وعلبالي بلي كي يسمعو خاوتي يقتلوني ويبطلوني حتى يما ماترحمنيش خلاصت عليك يا سماح نمشي بخطوات ثقيلة وبالي راح بعيد نخمم غير في خاوتي وفي يما وفي زميلي هاني المسكين باصيتو وصلت للباب عيط عليا قالي بعدي تحركي خرجت جاتني مريم تجري مع هاني قريب هبل كي قتلو مارجعليش تليفون وقالي حتى تجيبي ولي أمرك نهدر معاهم ونبكي راحت عليك أهاني باصيت سمحلي والله ماقصدت نضرك ونباصيك وماتخافش ضرك نحاولو يرجعهولي دبري راسك سماح لازم ترجعيهولي نصبر فيه وانا مالقيتش شكون يصبرني هزيت راسي لقيت الاستاذ عاقد حواجبو مغشش ويخزر فيا ويخزر في هاني عيط علينا ياالله كل واحد يشد فريق تاعو لانجي نكسرلكم ريسانكم يخزر فيا ويعيط رحت لصف البنات وهاني للاولاد لعبنا كرة السلة وانا كنت تايهة مورالي زيرو كل مانهز راسي نلقاه يخزر فيا بغش حسيتو يكرهني بزاااف...كي خلاصو سوايع السبور كنا نبدلو في لبستنا غسلت وجهي ولبست حجابي الفضفاض ودرت الإسدال تاعي هزيت محفظتي خليتهم حتى خرجو كامل ولحقتهم نشوف في هاني من البعيد يخزر باين يستنا فيا نمدلو تليفون كنت نمشي ونخمم كيفاش ندير يديا ورجليا مربوطين نمشي غايسة كنت وحدي في الصالة الي نبدلو فيها كي لحقت للباب خبطت في الاستاذ ايهاب قلت العما أشك يعما ثدرغلت غي هزيت راسي لقيتو هو ايييييه الاستاذ ايهاب بشحمو ولحمو من الشوك وليت نخلط في الهدرة اا استاذ سمحلي والله ما شفتك ...انت باينة وحدة ماتحشمش وناقصة تربية أكيد .....كي قالي هكذا خلاص ولاو دموعي ينزلو وحدهم ماحملتش كي قالي هكذا متربية واحسن تربية أستاااذ معلبليش كيفاش جاتني القوة والكوراج ورديت عليه ..... راسك خشين وانا راس مالي تاغنانت ديڨاج ياالله وآخر مرة نفوتهالك والتليفون انسايه حتى تجيبي ولي أمرك.. خلاص راحت عليك اسماح وباصيتي انساي القراية علبالي يبطلوني خاوتي ونعرفهم ياربي هذا الغول الله لا يتربحو نمشي ونبكي شفت في هاني حركتلو براسي بي لالا ماعطاهوليش ولا حرك شعرو للور وناض يسب هز كرطابلو وراح لقيت مريم تستنا فيا كي شافتني نبكي تحضنتني وقاعدة تونس فيا طلعت بقلم صبرينMh رأسها لقات الاستاذ ايهاب توال مكتب المدير واقف يشوف فينا.... شوفي سماح الاستاذ راهو يخزر فينا راح يثقبنا حتى هو فاقلنا بلي نحكو عليه وليت هزيت راسي ليه ومسحت دموعي كي شفت فيه دور راسو للجهة الأخرى زعما قلت يحن قلبو بصح الله غالب شيطان أغيووول... نوصفلكم روحي انا سماح عمري 17سنة طولي 1,70 جاية معمرة شوية بشرتي خمرية عينيا عسليين مجبودين تقولو شينوية قريب ماكانش وسورتو كي نضحك ولا نبكي يتسكرو كامل عندي خانة تحت شواربي تقولي حبة سينوج شعري شتان يوصل لظهري رطب نقرا لغات اجنبية السنة نفوت الباك مدايرة حجاب شرعي و خيمار طوايشية وراسي خشين عندي ختي سندس قل مني تقرأ في المتوسطة مام هي تفوت البيام وعندي زوج خاوتي فريد وفوزي بنساهم وولادهم ساكنين فوقنا كل واحد بإيطاجو بابا مات ربي يرحمو ملي كانت سندس عمرها شهرين مات اكسيدو يما نصيرة مزالها على ديدانها سوفرات في تربيتنا وتعبت بزاف على جال باش تكبرنا خويا فريد معلم وفوزي مقاجي عايشين حياة متواضعة كيفنا كيف الناس الكل يما بنت الشهيد تهز شهريتها وخاوتي كل واحد لاتي بعايلتو الحمد لله يارب على كل حال...♡الحلقة 04♡:
بقلم صبرين Mh
مريم خلات عليا اكيد فريد راح يبطلني علاش يبطلك أن شاء الله مايكون غير الخير وضرك يرجعهولك لالا مايرجعليش وانا السبة وحكيتلها واش صرا حاكمة فمها بيديها غدوة عاودي هدري معاه بالاك يلين قلبو غدوة نبعث كاش واحد يهدر معاه. كرهتو من نهار الاول أفوناس أغيول العورث نيريازن....
خرجنا وصلت للدار لقيت يما مكانش والغدا واجد دارت عدس ومطلوع والسلاطة والڨازوز غسلت نحيت حجابي وتغديت واش من غدا ومنين تفوت الاستاذ ماخلاش فيا عقل قاعدة نخمم اومبعد معلبليش كيفاش حتى تبسمت في وسط حزني وقاعدة نتفكر في كل تبهديلة صراتلي سورتو كي ناض الغنا يغني هههه ثم ثم تبدلت خليقتي وكرهتو وتفكرت كي قالي ماشي متربية ربي يرحمك بابا العزيز توضيت صليت الظهر وعاودت لبست وهزيت صاكي بدلت برنامجي ومشيت لليسي مجرد دخلت للساحة نشوف فيه كيفاش حال فمو ويضحك ضارب الدنيا بكوتبي نشوف فيه ونسب كنت وحدي برك مريم مزال ماجاتش وانا قاعدة نخزر فيه جاني عندي هاني قالي سلام سماح كاش جديد ؟؟قتلو والله والو يا خويا هاني مابغاش قالي حتى تجيبي ولي أمرك كيفاش نديرو ضرك ..منيش عارفة بغيت نبعثلو كاش واحد يهدر معاه ...شوفي سماح انت اهدري معاه وقوليلو يسكرو باش مايعيطوليش ..أن شاء الله .. هزيت راسي لقيتو واقف ويخزر فيا عينيه راح يطرطقو مغشش على الأخر.. هاني راح قعدت وحدي أواااه مالازمش نقعد هكذا لازم نعاود نهدر معاه ونطلب منو السماح بلاك يحن عليا هزيت صاكي ومشيت ليه كي تولهلي بلي قاصداتو دخل للماتيكو وقعد فوق الكرسي رجل فوق رجل ويديه مربعين وصلت لعندو استاذ ممكن نهدر معاك؟ هز راسو تفضلي واش كاين جبتي ولي أمرك؟ لالا بصح جيت نطلب منك السماح واكيد راح تكون المرة الأخيرة والله مانعاود.. على واه راكي تهدري على التليفون ولا على الجاست تاع الصباح؟ عليهم كامل والتليفون والله ماهو تاعي انا معنديش أصلا تليفون .. وتاعمن ؟ تاع هاني زميلي في الكلاصة من الصباح وهو يقولي دبري راسك رجعيهولي . اممم باينة كذبة عمبالك نرضع في صباعي هزيت راسي ليه ودققت معاه يايما شحااال شباب يهبل يهبل دالي عقلي وقلبي معاه...يتبع ديري جام وعشرة ملصقات نكملو...#قدرررري
#الحلقه5و6و7
♡الحلقة 05♡:
بقلم صبرين Mh
قالي وبكل وقاحة انتي جيتي تقراي ولا جاي تتنسخري ضلي لاسقة في الأولاد على الأقل ديري قيمة لوالديك وهذاك الحجاب الي راكي دايراتو.. خزرت فيه وانا الروض مايدروش وما عرف كيفاش طلعلي الزبل للرأس قتلو استاذ أنا راني مدايرة قيمة لوالديا الحمد لله والحجاب الي راني لابساتو وإذا راك تمعني على الطفل الي تشوفني معاه لوكان ماشي تليفونو عندك مايظلش لاصق فيا حتى انا وكرهت من هاذ السوجي انا غلطت وطلبت السماح بصح مانقبلش كرامتي يعفسو عليها يكون واش يكون انت استاذي ومن واجبي نحترمك مي ماشي الي جاتك في الفم تقولهالي وولي أمري باش نجيبهولك أكيد ماتزيدش تشوفني في الكلاصة على خاطر يحبسوني من قرايتي نهدر ونبكي وهو قاعد غير يسمع ويشوف اومبعد قالي اذا كملتي السنيما تاعك تقدري تروحي شفت فيه اومبعد مشيت ماشفتش مورايا نهائيا دخلت قريت وكي صونات الساعة الثانية نشوف فالمراقب عيط لهاني خرج وعاود دخل وهاز التليفون اكيد رجعهولو... زدنا كملنا الحصة الثانية وخرجنا الحمد لله ماشفتوش شحال كرهتو... جبت سمانة ما شفتش خيالو حتى لحق نهار الخميس الي ولا أكره يوم عندي نقراو سبور من 10/12 ملي بدينا في السبور ماشافش فيا ولا هدر معيا نحس شغل متقلق مني بصح كي نكون نقصر مع البنات ونضحك يشوف عندي بالتخبية تولهو البنات بصح كي قتلهم بلي تهاوشت معاه صدقوني والمشكل وين صراحة والله يهبل يهبل يهبل يعجبني كي يكون يلعب مع الاولاد ويدرب فيهم هكذا فاتو ياماتي مع الاستاذ هو يشوف وانا نشوف مي بالتخبية وكي يلقاني نهدر مع واحد يعيط عليه مايخلينيش نهائيا نخالط الاولاد واحد النهار مرضت بليغاڨل وماقدرتش نلعب كي دخلنا نبدلو كامل لبسو غير انا ماعييت فيا المراقبة تخرجني نروح مابغاتش خرجنا كامل من غرفة تبديل الملابس تولهلي بلي مالبستش عيطلي قالي ..علاش ماكيش لابسة قش السبور تاعك حشمت منو قتلو استاذ اليوم مانقدرش نلعب مريضة شكيت فاق بيا على خاطر نمشي ونتلوى وجهي صفر حبة قارس كان يدرب فيهم بصح كي شافني قاعدة فوق الكرسي وحاطة راسي على يدي وراقدة فوق الطاولة راح لفوايي جابلي كاس تيزانة وجا اعطاهولي وراح انا تشوكيت سورتو كي ضحك معيا وقالي بالشفاء عليك شديتو عليه وقتلو شكرا استاذ قالي العفو اشربي مدام سخون مليح ليك يا الارض انشقي وبلعيني يايما تبهديلة تبهديلة والله مستحيل ننساها واكيد فاق بيا بلي مريضة بليغاڨل♡الحلقة 06♡:
بقلم صبرين Mh
لحقو وقت الامتحانات فوتناهم وكي جينا نفوتو السبور مابغاش يخليني ندير السباق باش مانجريش قدام الاولاد ودارلي السبة بقرعة ما نعمرهالو عمرتلو وجيت لقيتهم كملو كي سقسيتو قالي صيبون كملنا ضرك نحطلك النقطة تاعك لبنات بداو يشكو فيا أنا نكذب عليكم اذا قتلكم ماعجبنيش صح كرهتو مع الاول بصح خلاص بديت ننجذب ليه بصح خسارة مكتوب كان مخبيلي حاجة خلاف و وكان للقدر رأي آخر....
نهار قاتلي يما بلي دارنا للبيع حزنت بزاااف بيسك كانت دار الوراث كامل يسالو فيها بعناها وشرينا في بلاصة خلاف واضطرينا نرحلو و للأسف لازم نبدل الليسي علبالك بعيد على دارنا الجديدة استنيت حتى خرجو المعدلات ديت 12,05 وودعت صحاباتي كامل دمعة وخنونة حزنت هذاك النهار بزاف سورتو كي فارقت صحبتي مريم مديتلها النميرو تاع ماما باش تعيطلي عندها وديت نوامر صحاباتي كامل نشفا كي اليوم رحلنا بالسبت... فوتت أيامات جحيم قرايتي وكرهتها لا صحابات لا أساتذة ملاح ليسي معمر بدعاوي الشر كل زوج وين يرندفو المهم ماجيت نكمل عامي حتى كرهت بسييييف والفت شوية توحشت الاستاذ.. مريم دائما تعيطلي نسقسيها عليه وحد النهار عيطتلها قاتلي جا اليوم سقساني وراهي صاحبتك بطلت ولا كشما بيها وهي بالعاني قاتلو شكون هي قالها سماح قاتلو سماح رحلت وبدلت الليسي قالها علاش غير الخير... قاتلو بدلو الدار على خاطر باباها الله يرحمو مزال ماخرجش عايلتو من دار تع الوراث وضرك باعوها... قالها اااااااو علاش باباها وكتاش مات قاتلو عندو بزاف قاتلي خليقتو تبدلت و حس بالندامة كي عايرك ودائما يسقسيها على قرايتي..
زادت المسؤولية على ماما بعدما قسمو عليها خاوتي هم في الصح يوقفو معانا ومايحبوش لي يظلمنا والي يقيسنا يسلكها غالية... بصح حاجة المصروف ولا الدراهم كل واحد لاتي بروحو بدارو و بعايلتو.. بعدما رحلنا وقسمتلهم يما من دراهم الورث كل واحد دا قسمتو الدار كبيرة وجابت تقريبا اربع ملاير خويا الكبير شرا F3 والصغير دا دراهمو ومرتو وراحو لولاية خلاف وحنا دراهمنا شرينا سكنة وحق البنات خباتو يما فلا بوسط وهي قاعدة تصرف علينا وتقري فينا بدراهم جدي لحق...قبل مانفوت عيطتلي مريم وقاتلي بلي الاستاذ ايهاب يسقسي عليك وين تسكني وانا قتلو على البلاصة ايكزاكت... الحق عجبني الحال بصح مانيش باغية نتعطل ولازمني راحة البال الباك بقالو يومين والستراس حكمني تقلقت نهار كامل وانا نبكي ونصلي وندعي باش نجيب موايان مليح ونقرا التخصص الي بغيتو لحق فوتو الحمد لله يارب حسيت بالراحة النفسية بغير النهار الاول شدتني الخلعة أما باقي الايام نورمال كملناه تهنينا منو بصح الخلعة الكبيرة كي تقرب نتيجة والي مجرب اكيد يحس بواش حسيت قريب هبلت وصحتي طاحت وخفت مانجيبوش على خاطر مستحيل يخلوني نولي نقرا...♡الحلقة 07♡:
بقلم صبرين Mh
عييت في يما تدينا للبحر مابغاتش قاتلي خاوتك مايبغوش.. قتلها وعلاه نساهم وولادهم يروحو قاتلي هني روحك يابنتي وسايسيهم على الأقل حتى تكملي قرايتك روتين يومي يقتل ملي تنوضي صباح حتى العشية تكرهي جد حياتك لا تحواس لا خرجات لا دخلات بسيف جانا عرس وليد خالي... شحال فرحت كي عرضونا المهم نروحو نحوسو ونحيو ضيقة الخاطر ...يما وكتاه العرس واليد خالي ..بقالو عشريام يابنتي....ياعمري ياك حانروحو قبل العرس ..لازم نروحو باش نعاونوهم وغدوة نخرجو كشما نشرو حوايج ...بستها وزادت باستها سندس ختي الي كانت حتى هي فوتت البيام المهم كملنا شغل الدار ودرنا العشا تعشينا صلينا قصرنا شوية ورقدنا الغدوة الصباح نضنا بكري كيف كيف خدمنا الشغل سندس في تسيق دار وانا في الكوزينة طيبت الشخشوخة تاع الكسرة حارة بنينة بالفرماس واللحم والحرور والخضرة وجدت المرق وخبزت الكسرة تاعو بالسميد شوية ملح لميت بالماء وعجنتو وڨرصتو وخبزتو كي طاب هرستو في المهراس وخليتو قلت كي نروحو من الفيلاج ونسقيو وناكلو زدت قصيت البصلة وحطيت الفلفل والزيتون المرقد فوق البوطاجي لبسنا سكرنا كل شيء وخرجنا من التسعة تاع الصباح وحنا لبرا حتى للربعة تاع العشية باه روحنا..
قد مافرحت للعرس قد ما ندمت كي رحت
روحنا للدار شرينا ليروب سواري تاعي فالأحمر وتاع ختي في لكحل تاعي جاي طويل مشقوقة من قدام والفوق مستور وختي ميني والفوق بروتال شريت صباط طالون في الكحل وختي تاعها صندالة كملنها بالماكياج ماخلينا حتى حاجة ماجبناهاش و مكانش من قبل عندنا مانستعملوهش نهائيا مكياج...يتبع ديري جام وعشرة ملصقات نكملو...
🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹
ادخلوا بسرعه حملوه وخلوه علي موبيلاتكم من هنا 👇👇👇
وكمان اروع الروايات هنا 👇
انضموا معنا على تليجرام ليصلكم اشعار بالروايات فور نزولها من هنااااااااا
🌹🌹🌹🌹🌹🌹🌹🌹🌹🌹🌹🌹🌹🌹🌹🌺🌺🌺🌺🌺🌺🌺🌺🌺🌺🌺🌺
