رواية عُهر_الرجال الفصل الثالث بقلم وسام الفراجي حصريه وجديده على مدونة النجم المتوهج
 |
جان يصيح ياس تعال شوفلي هالسيارة مالتي الجديدة شلون تخبل واخر موديل
واسمع صوت الي اسمه ياس وهو يمشي وجاي للغرفة ويكله ..
ـ ادري انتبهت عليها بالزفة بس ماتنطي مجال بس لسايقها
..
جان كلنكس كدامي اخذت اربعة عالسريع ومسحت بالحمرة وبالكحل والترتيبات الي بوجهي ..
ما تحملت اني وكلت الهم ..
ـ شو لا مستحى ولا خجل ولا نكطة غيرة براسكم
ياس كال اووو متفاجئ يعني وباوع ل وعد ..
جان وعد يحط ايده ع جتف ياس ويكله
وعد ـ ميخالف عنودية شوية وهاي احلى من الي تستسلم
ياس ـ بس احسها مو فاهمة الشغلة كلها
وعد ـ يخوي طبها مرض تفهم او لا، انتَ اشتغل شغلك وكلي وين المدام هسة
ياس ـ بنفس المكان مالنا تنتظرك
صحت بوجوهم هاي وين عايشين انتم
شنو دينكم انتم شنو عقيدتكم
انتم مسلمين متأكدين شنو اخذ زوجتي واخذ زوجتك انتم شنو من ملة ؟
جان يصيح وعد ..
كافي وطي صوتج بنت الـ *** تتشرفين براسي هسة واحنه خلصناها مراسلات وبوس واحضان بدون علم اهلج وين جان دينج وقتها ؟
فاجئني بحيث جنت متوقعة كلشي يحجي الا يعايرني بسبب جانت مراسلات بيناتنا حب وغرام قبل الزواج ..
ياس شفته ضاج كلش جان يكول لوعد
مو كتلك اذا ماتريد هي من نفسها ما راح نتهنى بيها اني ماريد شي غصب وتعال رضيها ومدري شنو اني اريدها تعرف شغلتها شنو
وعد ـ
اني رجلها ونطيتها الك حتى لو رافضة انتَ زلمة سوي الي يعجبك غصب عنها هي ليلة ورجعها
ياس ـ
لا لا ما اتفقنا هيج اني المدام تنتظرك ع نار وجاهزة وانت تريد مني اكعدلها ارضي بيها واقنعها
بصراحة اني ردتها تشد اكثر بيناتهم ان شاء الله نارهم تاكل حطبهم وكلت لازم ازيد عناد حتى اخبل ياس بلكي يتعاركون شهالنفسيات هاي شهالعقليات وين عايشين ذولي ..
من هنا تيقنت اني ببيت دعارة عايشة ..
او ممكن فقط زنا محارم
اعوذ بالله والله ما ادري اني عقلي كله وكف ..
تلاغوا شوي ياس و وعد لان ياس شفته زعل كلش وطلع و رد الباب وراه بقوة وباوعلي عاد وعد و اجه ليمي ..
لزمني من حنجي بيده وكلي اذا اكلج تشمرين نفسج بالنار تشمرين بدون حرف واحد يطلع من حلكج مفهوم ؟
ـ ليش يابه قحط زلم لو قحط عيشة حتى اشمر نفسي اني ما ظل ولا دقيقة يمك بعد
.. ضحك ضحكة يستهزأ بية ع كلامي جان يباوع فوك ويرجع يباوعلي
ـ اذا كدرتي تنهزمي لا تقصرين عود!
ـ يعني شنو قصدك ..
ظل يباوع فوك وينزل براسه رفعت راسي ردت افهم شنو قصده مافهمت جان يكلي
ـ يعني طلعة ماكو و اذا فكرتي تطلعين فهذا القرار راح يكون اسوأ قرار بحياتج يصير
اني خفت الصراحة لان يحجي بثقة و الي مايخاف من الله لازم واحد يخاف منه ..
ـ وضحلي اكثر ليش تحجي ألغاز فهمني شتقصد
ـ حطي عقلج براسج وظلي واستسلمي للي اكوله خصوصا هذا ياس اذا نطيتي مجال واشتغلنا سوة ماراح تخسرين ابد بالعكس كومة فلوس تعيشين ملكة مجرد ليلة اذا بالجثير ليلتين
ـ راح اخسر شرفي وهذا اغلى شي عندي
ـ مرحبا شرف! .. منو ظل يسولف بهالسوالف انتِ نايمة ورجليج بالشمس وين ظلت شريفة بالعراق
ـ مو كل الناس مثل خواتك
قراصة حاطتها ع راسي من ورة ضربني بحيث انكسرت بيده وضربت راسي تأذيت والله وكتله وخر عني ليش ضجت مو انت تفتخر بشغل خواتك
يضرب بية ويكلي افتخر اي افتخر واني احاجز بي بيدي ورجلي واروح هيج وهيج حدما لطشني بالكاع وصعد عليه لزمني من رقبتي وكلي ..
ـ لازم عليج مستمسك اي حركة زايدة ناقصة اخلي اليسوة والما يسوة يشوف سوايتج ..
دفعني و كام عني ..
كتله
ـ تخسه اذا لازم عليه شي اني بنت ابوية ما انزل راسه
ـ ليش من جنة نتمعشك بالرسايل وبوسني واحضني ابوج وين جان خاتل ؟
ـ هاي زلة وغلطة بس بالمواقع اما الواقع مالمستني الا بالحلال
ـ المهم نطيتي نفسج
ـ شتريد فهمني شتريد مني ؟
ـ اخضعي للي اكوله بلا نقاش
ـ شتريد احجيلي بالمشرمحي
ـ نشتغل سوة ونحصل فلوس خير من الله
ـ شنو شغلك هذا
ـ سهرات ركص نومة وهيج شي والدولارات هيج تلعب بيدج لعب
ـ يعني عندك عادي ينام وياي زلمة ؟
ـ هذا شغل مثل اي شغل شنو بيها
ـ راح تخبلني والله ليش هيج تغيرت عليه ليش ضحكت عليه مو جنت تحجيلي عكس هذا الشي مو تدري بية عفت اهلي علمودك حتى اعيش وياك ليش هيج غدرت بية وتدري بأهلي ما يطيقوني بعد لان فضلتك ع اهلي ليش ليش والله جاي تموتني الف موتة من اشوفك ماعندك غيرة عليه
ـ كملتي ؟
ـ اي
ـ تحملي نصيبج من زمان مخططلج تشتغلين يمي من اول مكالمة فيديو بيناتنا كلت هاي تفيد بالشغل رشاقة وحليوة ودلوعة
ـ بس اني ما راح اصير مثلما تريد لو تكطعني
ـ ضحكتيني نشوف منو الي ما يصير او يصير
ـ ليش واثق من نفسك هيج
ـ لان لازم من ايدج التوجعج
ـ قصدك مقطع المكالمة ؟
ـ لا هذا اصلا كلش زين
ـ لعد ماعندي شي ثاني واعلى ما بخيلك اركبه
ـ شمممس لتتحديني
شايل الموبايل بيده ويهز بي ويكلي كلشي هنا ..
وانفتح الباب ..
اخته عذراء وصديقها ايد بإيد وطبوا للبيت وصوت ضحكهم واصل لسابع جار ..
شافوني وشافوا وعد جان صديقها يكول لوعد ..
ها بـ 25 ؟
ضحكت عذراء جان تضربه ع جتفه وتكلي
هاي مرته يا عار
وضحكوا كلهم ..
مجاي استوعب كمية الدياثة الي شفتها بعيني
مستحيل مستحيل اذا احجيها لأي واحد يكلي مخبلة ..
عفتهم وصعدت ماتحملت منظر واحد صديق اخته يطب لبيتهم واخوها كلش عادي عنده
مستحيل اكو هيج بالعراق ..
ومحد هجم العراق غير ذولي الي نادرا تلاكيهم بس عبارة عن جحيم للشباب يغرونهم ويلعبون عليهم
ومكان زنا وفاحشة ..
بيت عيالي عبارة عن 4 بيوت
بيت بصف بيت
وكلهن مسوينهن لهاي الشغلة ..
بحيث بالليل تبدي تشوف الشارع عبارة عن سيارة فايتة وسيارة طالعة وشباب تطب للبيت الاول الثاني الثالث الرابع ..
شوي وتصعد عذراء عليه وتكعد يمي وتكلي ..
عذراء ـ ليش لهسة احسج ماتحبين اجواء بيتنا
شمس ـ ما احب هيج انفتاح وهيج طبيعة فري
عذراء ـ مو احسن ما تصيرين ببيت ما يطلعونج منه بس طبخ ونفخ
شمس ـ بس الي قيمتي الي كياني الي احترامي
عذراء ـ ليش احنه هسة بلا قيمة
شمس ـ جربي ماتنطيهم الي يردوه منج وشوفي
عذراء ـ ما فهمت
شمس ـ غلسي
عذراء ـ لا احجي عادي اني اتقبل كل الحجي
شمس ـ اصدقائج و ناسج الي يمج مو لسواد عيونج هم وياج
عذراء ـ لعد شنو
شمس ـ حبيبتي عذورة الي وياج كلها لان طمعانين بيج وبجسمج ويملون رغباتهم بيج وتلامس و احضان جربي شي يوم امنعي هالامر عنهم راح تشوفين شكد ناس تتغير عليج
عذراء ـ بس اصدقائي كلهم يكولولي احنه نحبج لان انتِ غير
شمس ـ كل الزلم هيج هاي مصيدة و فخ
سمعت صوت وعد يصيح عذراء ..
جان تكلي
عذراء ـ تدرين سوالف وياج حلوة خلي اشوف وعد واكمل شغلي ونكمل سوالف
شمس ـ هلا بيج بكل وقت يروحي ..
نزلت عذراء ..
وكلت بكلبي بلكي الله يهديها وتوعى ع نفسها
و تساعدني اطلع من المشكلة نفسها ..
على الاقل تكون وحدة مثلي بهالبيت ..
اسمع صوت عمتي ام وعد تصيحني ..
نزلت من الدرج لكيت ولد اثنين وهي وعذراء و وعد كاعدين ..
صاحتني كالتلي اكو بارد بالثلاجة بالمطبخ جيبي حطي هنا بس معصبة ..
واسمعها تكول للولد ..
" اني من يخابروني اعوف البيدي واحير بطلباتكم و احسن وانظف البنات اجيب الكم من غير البيت احجزه بالكامل الكم بالتالي هيج يتصرفون وياي ..
والله اذا مانطوني فلوسي اسحلهم من شواربهم وتعرفون ام وعد منو بظهرها"
صوتها عالي ومتخاف والفاظ عدها يارب دخيلك اذا واحد يحجيها بينه وبين نفسه يستحي مو عود كدام ابنها وبنتها وولد اثنين ..
فتحت الثلاجة لكيت الفريز بي كم بطل ردت اعرفه شنو ماعرفته لا هو ببسي لا هو فينو لا هو عصير دوخني ..
طبعا لابسة ملابس حجاب الصلاة من نزلت ..
وحطيتهن بصينية ووكفت ع باب المطبخ انتظر تلمحني عذراء حتى تكوم هي تقدمهن شيطببني بين ذولي مبينين مو راحة ..
ام وعد شافتني اني رجعت خطوة ليورة جان تكول للي يمها ..
باعوا بس باعولي هذا الحيد تقصد وعد جايبلي وحدة شريفة ببيت كله نغولة ومن كتله ماتعيش هنا يكلي هي تتعود وتجي للطريق تفضلوا بالله لابسة حجاب صلاة عبالك رايحة للحج ..
كاموا يضحكون وكامت عذراء عليه واخذت الصينية وكالتلي اصعدي فوك ميخالف شوي واصعدلج
اني صعدت بس دموعي حارة ع خدودي شنو من نصيب هذا وشنو من امتحان معقولة كل هذا لان ابوي وامي ماجانوا موافقين ع زواجي
لازم اتصل عليهم واحاول اتودد الهم اذا شفتهم بعدهم يريدوني انهزم منا بليل اظلم وشيريد يصير خلي يصير ..
كعدت واباوع للموبايل ..
اتصل ما اتصل ..
اتصل ما اتصل ..
كلت خل اتصل لان بالاصل من تزوجت ما سمعت خبر عنهم اما هاي العزيمة وكذا هاي ممسوحة لان كالولي من تطلعين باب البيت لترجعين بعد اله ..
واني الثولة اختاريت واحد ديوث وفضلته ع اهلي جنت احسب براسه خير ..
لزمت تلفوني واتصلت ع امي ..
طن طن طن
ماتقبل ترد ..
ترددت اتصل انوب لو احفظ ماي وجهي ..
كلت ممكن مو عند التلفون الي اعرفه امي مو حقوده هالكد ..
لزمت واتصلت انوب ..
طن طننن طننن
انفتح الخط .. 1ـ00 .. 2ـ00 .. 3ـ00 .. 4ـ00 .....10ـ00..
اول عشر ثواني ساكتين اثنينه ..
شمس ـ الو يمة
ـ اني ابنها
شمس ـ هلا سامر اني شمس
سامر ـ هلا بيج تفضلي
شمس ـ شنو تفضلي شهالرسميات اريد امي
سامر ـ وعد هو امج وابوج خلي يفيدج
شمس ـ سامر انطيني امي
سامر ـ اصلا رقمج ما حافظته نطتني التلفون كالتلي رقم غريب يدك
شمس ـ اها هيج واصلة مرحلة
سامر ـ واكثر
شمس ـ انطيني احجي وياها
سامر ـ يمة هاي شمس تريد تحجي وياج ..... اشرتلي بيدها تكلي ماريد
شمس ـ هاا يلا سلملي عليها بيباي ..
سديت التلفون وانكسر خاطري ياريت ما اتصلت وشفت شكد امي زعلانة عليه ..
ضجت كلش وتوترت من الازمة النفسية الي عايشتها يمكن استاهلها بس اني هم بشر و ممكن اغلط بس مشكلتي ما خليط اي خط رجعة لأهلي ..
اندك باب غرفتي ..
شمس ـ منو ؟
ـ عذراء افوت لو لا
شمس ـ فوتي حبيبتي
عذراء ـ اني اسفة
شمس ـ ع شنو يروحي
عذراء ـ ع سوالف امي
شمس ـ عادي كلبي مو ببالي
عذراء ـ سولفيلي
شمس ـ شسولفلج ؟
عذراء ـ بيتكم اخوانج قوانينكم
شمس ـ ينرادلها كعدة وتعليلة وحدنا واسولفلج كلشي
عذراء ـ تمام متحمسة اشوف واسمع اجواء بيتكم..
شمس ـ هههه تدللين حبيبتي
لمحت خيال ع باب غرفتي ..
باوعت لكيتها #شيماء الي هي اخت عذراء بس ماتتواجد هنا ما ادري ليش ..
جان كبل تكول لعذراء شعدجن كاعدات هنا عدنا شغل هواي يلا انتِ كافي ايام عسل تعالي وياي للبيت الثاني عدنا اليوم ضيوف نوع خاص ويحتاجون دلال علمود نحصل الأكرع هواي تقصد 100 دولار ..
اني ما اعرف شنو الشغل وشنو الضيوف ويا بيت ..
كلت الها تمام ايمت كالت هسة ..
كمت ابدل وهي نزلت وظلت بس عذراء كلت الها باوعي هناك عالجهة الثانية بس ابدل دشداشتي ..
ضحكت وكالتلي اني بنية عادي ترا لعد ايمت تلبسين دلع عند الزلم يمكن حتى عند وعد تلبسي حجاب ..
كلت اها عاد مو لهالدرجة بس اني استحي ..
بدلت لبست حجابي وهي تباوع شلون البسه كالتلي الله اتمنى اعرف الف الحجاب مثلج ..
كلت الها حتلفينه احسن مني بس تقتنعي تتحجبي ان شاء الله ..
ماريد كلشي فد مرة عليها اريدها تحب هالامور من داخلها وبعدين تطبقها ..
صعدت شافتني لابسة حجاب جان تهز بيدها والله ي الله كالتلي ..
امشي امشي صوج وعد المنعمي ..
اجت عذراء حطت ايدها ع جتفي جان تكلي امشي وياج ..
نزلنا ثلاثتنا وبالهول جان كاعد وعد ..
باوعلنا جان يكول ..
والله مدري شلون تشتغلين و انتِ خانكة نفسج بهذا جنج سبايدرمان طالعة ..
شيماء ـ صوجك
عذراء ـ اعتقد حاطته ع رقبتها مو رقبتكم كافي تقلدون كلمن حر برأيه
شيماء ـ ايباه المحامية عذراء ماعرفتج
عذراء ـ خليج بنفسج وخلينه نشتغل شغلنا بسلامات ..
طلعنا من البيت ع البيت الي يجاور بيتنا ..
سيارتين تعدت من عدنا ..
وحدة طوطت بصورة مبالغة وراحت ..
والثانية شاب طلع راسه من الجامة ويشمر سوالف ..
من هنا تيقنت صيتهن طالع ..
والشباب يعرفونهن ..
طبينه للبيت الاول وفتنا للبيت لكيته كل الغرف عبارة عن جربايات وسرير وملابس وصياني بيها قواطي و ابطاله فارغة وحب وليمون وصايرة هوسة ..
جان تكلي عذراء شغلنا هسة انظف البيت من هالامور ..
كلت الها شنو هاي ليش هيج خيسة كالتلي عود اسولفلج ..
وبدينه ننظف ونرتب ونمسح الكاع ونعطر كل غرفة وبدلنا جراجف الغرف واخذنا القديمة للبيت حتى نغسلهن ..
وكملناه عالأخير ..
جان تكلي شيماء ..
انتِ ظلي بالغرفة هاي لتطلعين حدما اجيج اني ..
كلت الها بس موبايلي بالبيت الثاني اجيبه ..
طبعا اني مو فاهمة شي ..
وماجنت اعرف تريد تخليني طعم للي يجون ..
جنت ثولة وما فهمت ليش تخليني اني بهالبيت الفارغ حاليا ليش مو ببيتنا ..
عذراء كالتلي هسة اجيبلج تلفونج اني ..
كعدت انتظرها فد ربع ساعة واجت نطتني تلفونها ..
جان اكلها ليش خليتوني بهالغرفة هاي ..
كالتلي ممم اني بالغرفة المقابيلج وكم بنية راح تجي مختارتهن امي كذلك للغرف الباقية ..
القلق جاي يزيد ..
كل شوي تطب بنت وتدليها شيماء ع غرفتها ..
ويطبن يضحكن ويسولفن ويعلجن ..
وصوتهن عالي يخزي ..
كل شوي عذراء تجي تمد راسها من الباب تطمن عليه ..
مشه الوقت مشه الوقت صارت ساعة 1 بالليل ..
طب وعد للبيت واخذله فرة واسمعه يسأل شمس وين ؟ وكالتله شيماء ذيج گرة عينك ..
اجه وكف عالباب
ـ شلونج شموسة
ـ زينة
ـ خوما خايفة
ـ من شنو ؟ شنو ناوي ؟
ـ ماكو شي ظلي هادئة واريدج مهرة اصيلة
ـ وعددد سولفلي شجاي يصير
ـ ما يصير شي ظلي هنا ..
راح وعد وصرت اتخيل اني صرت ضحية واعتقد جاي يخططون ع شي جبير ..
يارب انقذني اني وين فايتة ..
صارت زلم تطب ويمشي يمهم وعد ويرحب بيهم وام وعد تضحك وياهم وهلا بيكم وهلا بيكم واليوم دلال من نوع خاص تدللون ..
واخذته للغرفة المقابيلي ..
اسمعه صوت زلمة ورى شوي وهم ترحب بي وتفوته للغرفة الثانية ..
ربع ساعة تقريبا سمعت صوت مو غريب عليه ..
كمت وكفت عند الباب فتحت الباب شوية ما شفته زين ..
اسمعها ام وعد تكله هلا بيك الزبون الجديد ..
حياك الله هنا هنا ..
سمعته قربت لغرفتي ركضت رجعت للسرير كعدت ..
انفتح الباب ..
خايفة وكلت بس تطببه هنا اعيط واكلب البيت عليهم ..
باوعت ع وجهه
وصدمة عمري الي ما انساها ..
اخوي سامر !
🐢🌻
يتبع
🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹
ادخلوا بسرعه حملوه وخلوه علي موبيلاتكم من هنا 👇👇👇
وكمان اروع الروايات هنا 👇
انضموا معنا على تليجرام ليصلكم اشعار بالروايات فور نزولها من هنااااااااا
🌹🌹🌹🌹🌹🌹🌹🌹🌹🌹🌹🌹🌹🌹🌹🌺🌺🌺🌺🌺🌺🌺🌺🌺🌺🌺🌺
تعليقات
إرسال تعليق