جميع الروايات كامله

اعلان اعلى المواضيع

 رواية عهر الرجال الفصل الاول بقلم وسام الفراجي حصريه وجديده

رواية عهر الرجال الفصل الاول بقلم وسام الفراجي حصريه وجديده

عندج شام بجسمج ؟

 ووين ؟ 

هذا السؤال هو بداية غلطتي! 

الساعة وحدة بالليل زادت جرأة الاسئلة شوي شوي ومن شفته سألني عن شاماتي سديت النت وقفلت الجهاز وحطيت التلفون جوة مخدتي ..

وكلبي يدك بسرعة وخفت شجاي اسوي اني و شجاي اغلط وليش سمحتله يحجي بهيج جرأة ليش ظليت مستحية وخايفة ..

نمت والقلق تارسني ترس ..

امي تحلف براسي ودائما تكول لأخوي #سامر اختك #شمس ترباتي ..

و سامر يكلها ليش وبنتج #شروق؟ 

تردله ترباية ابوك هاي ويضحكون 

وتكول امي لسامر ..

مو مثلك كل اسبوع اسبوعين  تديح نهار ويا جماعتك #وتباتون برا البيت ..

ودائما من اشوفها اكول بكلبي يمة بنتج بدت تتعلق بولد وبعد متسيطر ع كلبها ..

خايفة انحرف .. 

خايفة اتعلق بالشخص الخطأ 

كلبي عزيز عليه 

فتحت ولكيته زعلان ليش رحتي وكتله فصل النت ..

ماجان يدري جنت خايفة لا يتمادى بالحجي ماريد اكون رخيصة بعينه ..

اني الي جنت ما اقبل اسولف ويا احد و مملة ردودي قليلة كلامي قليل ..

هسة ويا هالولد ساعات وساعات وما احس بيها ..

كل ليلة يطلع شغلة جديدة ولعبة جديدة ويبدي يدخل بموضوعات حساسة واني اتهرب .. 

ماريد ارخص نفسي بعينه لان اذا وافقت ع كلشي يريده راح يمل وما ياخذني ولا يتزوجني لان اكيد ما يتزوج وحدة شبع منها ..

راح يكمل شغلته وبالنهاية يدور ع زوجة شريفة لذلك من البداية مقررة ما انطي مجال ..

ليلة ثانية كالي نلعب لعبة الصراحة .. 

وشوي شوي اسئلته صارت تصير جريئة واني خفت حدما اجاه الدور جان يكلي عندج شامات بصدرج ؟ 

بسرعة طفيت النت وظليت صافنة ع سؤاله 

معقولة وصل بيه الحد يسأل هيج سؤال ؟ 

مستحيل الغلط مني مفروض اكله واوكفه عند حده 

ثاني يوم كلت اله اريد احجيلك شي وياريت تفهمني ..

حجيتله هواي حجي ومختصر الي حجيته ..

اني ماريد نوصل لهيج مرحلة بالكلام اني هم بنت عالم وناس واخاف ع نفسي اذا تحبني صحيح حبني لنفسي اما اذا تحبني لجسمي ولشهوة كلي من هسة .. 

هو زعل من كلامي .. 

وصاير يتمشكل ويكلي انتِ تقصدين اني مو خوش وعندي سوالف ساقطة 

وكلت اله يا ابن الناس الي اقصده لازم نحافظ ع نفسنا من الشيطان ..

زعل وراح يومين اشوفه نشط وما يراسلني واني اشتاقيت اله وبصراحة خايفة يتركني لان اصلا تعلقت بي و انتظر الوقت لحظة لحظة حتى نسولف سوة ..

جان يلح عليه اكله احبك  واني ارفض اكله مو وكتها هسة وبس هو يكلي احبج ..

ماردت احجي كلمة احبك  تصير كلمة عابرة وتروح مايحس بيها لذلك انتظرت فترة طويلة حتى اجت ليلة من الليالي 

نحجي ومندمجين ونتفق ع امور وهو يكلي اني باردة ومجاي يحس احبه لان مجاي اغازله 

بلحظة ماسيطرت ع نفسي كلت اله 

#احبك_وعد

وسديت نت وحطيت الموبايل كدامي .. 

وصرت ارجف والوم بنفسي ليش جفصتها عمت عيني شكد ثولة شراح يفكر بية هسة اكيد هسة كال خفيفة وما استحي ..

يارب مايفكر اني رخيصة ما اريد اخسره اني احبه ورايدته زوج اليه وسند ..

ساعتين واني افكر شنو ممكن يرد ..

نمت واني ع قلق ..

كعدت الصبح عين مغمضة وعين مفتحة 

فتحت التلفون والنت ..

خايفة ولكيت رسائل هواية خفت هواي بصراحة...

لكيته كاتب ..

واخييرا نطقتيها

صار هواي انتظر هالكلمة 

و اني احبج واموت عليج 

بس كون نلاكي عذر زين واتقدملج ماريد يعرفون علاقة عالنت .. 

وصرنا ندور ع حلول ونحذف حلول ونريد فد شي يقنع اهلي بي من يتقدم ..

واني بصراحة ما اعرف كلشي عن اهله الي اعرفه هو وبس ومحافظته ..

كلت دام زين هو ف عادي اتحمل اهله شلون ماكانوا 

و بالنهاية اتفقنا يدز اخته نلتقي سوة بمنطقتنا ع اساس احنه اصدقاء سابقًا وتلاكينه ونقنع اهلي بهالقصة ..

نطاني حسابها ورقمها وخابرتني وسولفنا واتفقنا وهاللسان الحلو والمدح وحياتي وعمري هاي اخته ..

وبالفعل بعد اسبوعين تقريبا ع اساس اطلع للسوك اني وامي ونلتقي صدفة بالسوك وطبعا هو اتفاق مسبق ..

وتلاكينه وسلمت ع امي وما مرتبكة واعتيادي بحيث مثلت الدور بشكل مو طبيعي ..

يعني اخته لسان ماشاء الله ..

واخذت رقمي كدام امي وعزمتها عالغدة وماقبلت ..

وسلمنا ع بعض ورحنا كملنا طريقنا اني وامي ..

وامي سألتني عليها شو ما اعرفها هاي كلت الها رحلوا لغير محافظة وانتقلت ..

ومن بعدها خابرت وحاجتني تريدني لاخوها وعد 

ع اساس اني وياه مو ع علاقة ورفضوا اهلنا ..

تقدموا انوب ورفض اخوية ..

وتقدموا مرة ثالثة ورفض ابوية ويكول ماننطي خارج المحافظة ..

 وهو ويا الرفض ظلينه نسولف ونتواصل حدما كلي اريد نتصل صوت كافي بس كتابة كلبي بعد ميتحمل .. 

رفضت نتصل لان جنت خايفة ..

وزعل هم وظليت بقلق يتركني لاني ماجاي انطي مجال بشي ..

وظل يلح بالاسبوع حدما وافقت نتصل دقيقتين بس ..

ورحت صعدت عالسطح والدنيا تسمط سمط وحارة شمس تحرك حرك بس مجبورة ماريد احد يسمع ..

واتصلنا كم دقيقة بس شنو اني ارجف رجيف وهو يحجي عشرين كلمة واني كلمة ..

وظل يلح عليه كوليلي احبك حتى اسد ماتكولين ما اسد الاتصال .. 

واني خايفة ومترددة وبنفس الوكت خايفة يزعل وهذا من يزعل يومين ما يحجي وياي واظل مراقبته الا اني اتنازل واحجي وياه ..

كلت احبك وسديته بس شنو ظليت ضايجة احس نفسي مو مرتاحة لان يوم عن يوم جاي تزيد علاقتنا حرام بحرام ومعصية بمعصية ..

واكول لنفسي يلا لازم اصبر حتى نتزوج و استغفر عن كلشي بس اني اهلي كلش متشددين وماخذين عليه نظرة كلش زينة وماريد يجي يوم وينصدمون بية ..

حدما اجه يوم كالي الج خيارين ..

اما نتصل كامرة ونحجي

او نلتقي 

قابل نظل هيج بعيدين عن بعض حدما يوافقون اهلج

وحصرني بحيث لطش الا اختار وحدة منهن ..

نلتقي ؟ يبو غير يشكوني اهلي نصين ..

احسن شي اوافق نتصل كامرة واطلع نص وجهي واحاول اكون بمكان شوي اظلم لان مدري ليش صرت احسه جاي يستغل حبه الي يوم عن يوم بس الي صابرة واحس تفكيري وخيالي غلط بي هو انو تقدملي اكثر من مرة يعني لو يريد يلعب جان ماتقدملي اصلا ..

لذلك مرات احسه حقه يسوي هيج .. 

وافقت نتصل كامرة وكالي مانسوي شي نسولف بس وطبعا ماعندي غرفة وحدي حتى اخذ راحتي .. 

لذلك بلغته من يصيرلي مجال اكلك ..

يوم يومين ابوي واخوي مو هنا 

وامي كاعدة ويا كرايبنا ام #كيان يسولفون واني استغليت الوضع .. 

كملت الجاي وصبيتلهم ..

جان اخذ دشداشة حلوة وطبيت للغرفة بحجة اريد ابدل ..

وكلت اله يلا نتصل عالسريع قبل ما يحسون .. 

كبل اتصل كامرة .. 

بدون وعي فتحت وجنت خاتلة عن الكامرة وطلعت نص وجهي ..

وظل يغازل بية واني ايدي ماسيطر عليها وين جنة ووين صرنا وهسة فاتحة كامرة وياه دون علم اهلي .. 

ويحجي هواي هو واني كلمة كلمتين مرتبكة كلش بحيث متفاجئة اني هيج سويت 

وعصب عليه يريدني اطلع كل وجهي ومن شفته عصب طلعت وجهي كلت اني اتصلت اتصلت ..

ـ انطيني بوسة بالكامرة 

ـ وعد عيب 

ـ يلا فضيها قابل صحيح هي

ـ لا وعد ما اكدر 

ـ شو كومي ع طولج خلي اشوف طولج 

ـ كمت تفضل 

ـ فري بالله

ـ وععععد كافي ..

ـ شبيج لخاطر الله شكايلج 

ـ كافي وعد امي راح تحس لان قافلة الغرفة وهي مانعتني اقفل الغرفة واني وحدي بيها .. 

ـ بس افتحي الشال بس رقبتج طلعيها

ـ لا وعد مستحيل اسوي هيج من نتزوج شوف الي يعجبك

ـ طلعي رقبتج ترا اقسم بالله ماحاجيج بعد 

ـ وووووعد كافي راح اسد الاتصال 

ـ والله اذا ما طلعتيها فلا احاجيج بعد ..

ـ وعد شبيك

ـ حلفت اني ..

فتحت الشال وشاف رقبتي وكلي افتري وافتريت و اليدة مالت الباب سمعتها جاي تنفتح والباب مقفول ..

جان امي تصيح 

ششممسس وينج ليش قافلة الباب 

يممممة قفلت تلفون حرت بي وين اظمه جيوب ماكو هنا تشوفه .. 

حطيته جوة المخدة وعالسريع رتبت الدشداشة وفتحته جان تكلي ..

ـ ليش قافلة الباب 

ـ جنت ابدل 

ـ وليش مو بالحمام 

ـ ليش هالسؤال يمة عادي بدلت بالغرفة 

ـ بس بدلتي

ـ شريد اسوي بعد

ـ امشي لمي الاستكانات ووديهن للمطبخ ..

طلعت بس اني حيلي منهد يا يمة لو جان الباب مفتوح دقيقة وحدة ما اعيش .. 

رحت اخذت الاستكانات واني افكر شجاي اسوي معقولة وصلت لمرحلة اتصل كامرة وانوب افتح الشال 

مستحيل الي اسوي معقولة الحب هيج يسوي .. 

صار لازم اسيطر ع نفسي الدنيا مو امان ..

غسلت استكانات والصينية واجيت لكيت امي لازمة التلفون بيدها مالتي اني هبططت 

كلت بس لا تكلي افتحي الموبايل ..

واني بعدني مو حاذفة المحادثة مالت وعد .. 

رحت اخذت الهدوم الوسخة وشغلت الغسالة واني افكر ليش فتحت كامرة و اذا لا سامح الله طلع مو خوش ادمي والله اهلي اذا يدرون يقومون القيامة ع راسي .. 

اجه ابوي بالليل من شغله وصاحني وباسني من راسي وجايبلي نمبر ون وجبس ليز وياه لان يعرف اموت عليه ..

وكعدني يمه وكلي انتِ امريني الي تريدي يجيج ..

وموقفه هذا كلش اذاني لان هو مدللني واني من ورا ظهره جاي اخون ثقته بية ..

وهو من نوع حنون بس مايحب الغلط ابد .. 

اجه اخوي #سامر ..

ورحت اسوي عشا والتمينه خوش لمة .. 

وشربنا جاي وكل واحد لزم تلفونه وملتهي بي 

واني خايفة افتح تلفون كدامهم لا يكولون الي جيبي تلفون ويفتشونه ..

رغم امسح كلشي بس اظل خايفة ..

وصلتني رسالة ساعة تقريبا 11 بالليل 

التلفون هزاز ..

باوعت لكيتهم ملتهين 

كلت اكيد وعد دزلي .. 

انتظرت شوي حدما كل واحد صافن بموبايله ..

فتحت لكيت وعد دازلي ..

مقطع فيديو ..

خليت الصوت صفر ..

وفتحته لكيته #تسجيل_كامرة للاتصال مالنا الفيديو كله 4 دقايق ونص من بدايته لنهايته 

وكاتبلي شنو رأيج هسة بهالدقيقة ادزه لأبوج ؟ 

واخلي يشوف بنته الحلوة شلون تفتح كامرة 

مصيبة ووكعت ع راسج يا شمس اقسم بالله العظيم احساس ما اتمناه لعدوي ..

قشعريرة و خوف وقلق انفضح كدام ابوية من شخص امنت بي وخنت ثقة اهلي بي 

ابوي من نوع الي اشعاراته تظل عام .. 

ايدي بعد مكدر اردله والله 

مصيبة ووكعت ع راسي ..

روحي تشيط كلما يصير صوت اشعار عند ابوية 

احس روحي تخربطت 

طن صوت رسالة وصلته ..

باوع زين ..

نظارته بجيب الدشداشة لزمها وحطها ع عيونه حتى يشوف الرسالة

كمت ركضت اني بدون وعي 

الفصل الثاني من هنا

🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹

ادخلوا بسرعه حملوه وخلوه علي موبيلاتكم من هنا 👇👇👇

من غير ماتدورو ولاتحتارو جبتلكم أحدث الروايات حملوا تطبيق النجم المتوهج للروايات الكامله والحصريه مجاناً من هنا

وكمان اروع الروايات هنا 👇

روايات كامله وحصريه من هنا

انضموا معنا على تليجرام ليصلكم اشعار بالروايات فور نزولها من هنااااااااا

🌹🌹🌹🌹🌹🌹🌹🌹🌹🌹🌹🌹🌹🌹🌹🌺🌺🌺🌺🌺🌺🌺🌺🌺🌺🌺🌺

ادسنس وسط المقال