رواية خارج عن المألوف الجزء الرابع بقلم نشوه عادل حصريه وجديده وكامله جميع الفصول علي مدونة النجم المتوهج
 |
كنت ماشى ف طريق ضلمة ف بلد جدى اللى كنت بكتشفها وانا ماسك الكاميرا وبصور كل جزء فيها وفجأة ظهرت قصادى افعى كوبرا ف لسانها جوهرة زرقاء
ياسين: اعوذ بالله من الشيطان الرجيم ي عبد الله او ي امة الله بسم الله اسألك بالله بحق سليمان ومحمد ان تبعد عنى فلا اؤذيك ولا تؤذينى
عيدت كلامى تلات مرات ع امل انى هأمن شرها لو جان بس طلعت افعى عادية طب الحل ايه اقتلها ازاى طلعت اجرى بكل قوتى لكنها كانت سريعة وجاية ناحيتى فجأة اتكعبلت ووقعت قربت منى الافعى عشان تقرصنى لكن اللى حصل لا يصدقه بشر ولا جنس مخلوق الافعى لدغتنى لكن هى اللى ماتت مش انا! ايه ازاى هو ايه اللى بيحصل ده؟! بصيت مكان اللدغة نزل منه نقط دم بس فجأة اختفى بصيت ع الافعى لقيتها ميتة فقدت الوعى من اللى شوفته ولما فوقت
جمال جد ياسين: فوق ي ابنى فوق ي حبيبى انت كويس؟!
ياسين: الحمدلله ي جدى هو انا جيت هنا ازاى؟!
جمال باستغراب: يعنى ايه جيت ازاى اومال انت كنت فين؟!
ياسين: انا خرجت بليل اتمشى ف البلد وكنت بصور بالكاميرا بس فجأة ظهرت قصادى افعى و.......
فكرت شويه احكى لجدى ولا مش هيصدقنى قاطعنى صوته: و ايه كمل؟!
ياسين: مفيش اغمى عليا ومحسيتش بنفسى الا دلوقتى
جمال بابتسامة: ده اكيد كان كابوس ي ابنى انا صحيت ع صوت صريخك وحرارتك كانت عالية
ياسين: كابوس! كابوس ايه بس ي جدو هو انا يعنى للدرجة دى مش هقدر افرق بين الحلم والحقيقة؟!
جمال: ي ابنى انت مخرجتش من البيت اصلا انت بعد ما قضيت السهرة استأذنت وطلعت نمت
ياسين: ايه اللى بتقوله ده بس ي جدو مستحيل طبعا انا متأكد انى خرجت وانتم نايمين
شك جمال خصوصاً ان ياسين كان بيتكلم بثقة كبيرة....جمال: طيب احنا نراجع الكاميرات ولو اللى بتقوله حقيقى هنشوف مين ده اللى قدر يدخل الفيلا وكمان يطلعك اوضتك
نزل ياسين مع جدو وراجعوا الكاميرات مع بعض وكانت صدمة ياسين انه فعلا مخرجش من البيت نهائى
ياسين بتوتر: مش ممكن لا اكيد ..اكيد فيه حاجة غلط او ان حد لعب ف الكاميرات انا متأكد
جمال: اهدى ي حبيبى يمكن انت اعصابك تعبانة بسبب اللى حصل ليك الفترة الاخيرة
لم يتكلم ياسين من صدمته ...جمال: تعال معايا ارجع اوضتك وارتاح شويه
مشى ياسين مع جده واول ما قفل الباب ظهرت الافعى ذو الخرزة الزرقاء ع الشاشة ...ساعده جمال واطمن انه نام ونزل قعد تحت
فى مكان تانى داخل معمل بكلية الصيدلة بالقاهرة ....: انتى مجنونة ي ندى انتى عاوزة تعملى الترياق من سم الافعى
ندى بتهكم: ي شيخة يخربيت اللى دخلك صيدلة هو شعار كليتنا ايه ي عسل
.........: الكاس والثعبان
ندى: وده مش بيلفت انتباهك لحاجة ي ست هبة
هبة وهى بتهرش ف رأسها: مش فاهمة
ندى: يارب صبرنى ي اذكى اخواتك هما بيستخدموا سم التعبان ف كتير من التركيبات الدوائية من العلاج فهمتى
هبة: ايوة بس مش لدرجة انهم يعملوا ترياق مضاد للسم من السم يعنى
ندى: انا بقى هعمله تخيلى كده اختراعى ده هيعمل قلبان ف عالم الكيمياء
هبة: دى احلام العصر صح بت ابقى اتغطى كويس وانتى نايمة
ندى: تصدقى ان انا غلطانة انى بضيع وقتى مع واحدة زيك يلا غورى من هنا
هبة بضحك: ي سيتى خلاص بهزر معاكى المهم بجد هتجيبى سم التعبان منين ان شاء الله !
ندى: ده بقى اللى هيجننى انا خلاص نظرياً كل حاجة تمام ناقص العملى فكرى معايا
هبة: انتى ليه محسسانى انك بتسألى عن سم فار هتروحى تجبيه من عند العطار اقولك روحى لواحد بيراوض التعابين وخليه يجيبلك
ندى باعجاب وهى بتسقف ليها: ي بنت الذين كانت غايبة عنى فين الفكرة دى برافو عليكى
هبة بتمثيل عياط: لا يارب ده كتير عليا بجد انا ماشية
ندى: رايحة فين ي بنتى لسه سيكشن دكتور مينا!
هبة: مش هحضره انا لو فضلت قاعدة معاكى اكتر من كده اكيد هتجنن
ندى: بكرة لما اوصل للترياق هتندمى وتجيلى زى البوبى تطلبى منى اتصور معاكى لما ابقى مشهورة زى دكتور زويل ومجدى يعقوب
هبة: ان شاء الله ده لو مدخلتيش العباسية او السجن ايهما اقرب سلام عليكم
عند جمال اللى كان قاعد تحت حاطط ايده ع خده وباين عليه الحزن دخل عليه حفيده التانى حازم: مساء الخير ي جدى ...مالك ف ايه؟!
جمال: ياسين ابن عمك ي حازم حاله مش عاجبنى وخايف عليه
حازم باهتمام: ليه خير ايه اللى حصل؟!
حكى ليه جمال كل اللى حصل ....حازم: معليش ي جدى يمكن نفسيته لسه تعبانة بعد حادثة عمى ومراته الله يكون ف عونه
جمال: عشان كده انا خايف عليه خصوصاً انه دايما قافل ع نفسه ومبيتكلمش
حازم: من الناحية دى متقلقش سيبها ع الله وعليا
جمال: ونعم بالله بس هتعمل ايه ؟!
حازم: انا رايح رحلة تبع الجامعة مع ناس زمايلى دهب هاخده معايا يغير جو ويتعرف ع ناس جديدة
جمال: والله فكرة كويسة خلاص ابقى كلمه وربنا يهديه ويوافق
حازم: هيوافق ان شاء الله عن اذنك هقوم اجهز نفسى وانزل ع القاهرة كده اخلص حاجة ف الكلية وارجع بكرة المغرب هو صاحى؟!
جمال: لا خليته ينام
حازم: احسن يرتاح شويه انا هقوم انا ولما ارجع بكرة ان شاء الله يكون اتحسن واقدر اقنعه عن اذنك ي جدى
قام حازم راح ع اوضته وف طريقه فتح الباب ع ياسين ولقاه لسه نايم ابتسم وخرج جهز نفسه ومشى ...بعد فترة صحى ياسين بتعب وكانت راسه بتلف قام اتعدل ع السرير
ياسين: معقول يكون حلم فعلا طب ازاى وانا متأكد انى خرجت طب لو خرجت ليه ده مظهرش بالكاميرات معقول تهيؤات؟!
حط راسه بين ايده بحزن وتعب وهو بيلف وشه لقى الكاميرا محطوطة ع الكومودينو قام فتحها وقال: لو كان حلم اكيد مش هيكون فيه حاجة من اللى صورتها ع الكاميرا
فتح الكاميرا وبدأ يراجع الشريط وفجأة ظهرت قصاده الافعى وهى فاتحة بوقها وووو....
الثاني
- فتح الكاميرا وبدأ يراجع الشريط وفجأة ظهرت قصاده الافعى وهى فاتحة بوقها فبسرعة رمى الكاميرا من ايده وانكسرت
جمال بقلق: مالك ي ابنى ف ايه؟!
ياسين: ابدا ي جدى مفيش ده انا بس... الكاميرا وقعت من ايدى اتكسرت
جمال: ولا يهمك ي حبيبى فداك نجيب غيرها واحسن منها
ياسين: لا مفيش داعى انا هصلح دى اصلها غالية عندى اوى كانت هدية بابا ليا يوم التخرج مش هفرط فيها
جمال بحزن: ربنا يرحمه هو ووالدتك ويجمعنا بيهم ع خير ان شاء الله
ياسين عشان حس ان جده زعلان: انا جعان اوى ايه رأيك نتعشى عشوة تقيلة وع حسابى
جمال : انا عن نفسى موافق
ياسين: طب مين موجود عشان نعمل حسابه معانا
جمال: عمك عبدالله ومراته وأسر ابن عمك وأية اخته واحمد ابن عمك عز
ياسين: اوبا شكلى ادبست طب حازم ملوش ف الحظ نايب ولا ايه؟!
جمال: حازم سافر القاهرة وهيرجع بكرة المغرب ان شاء الله
ياسين: الندل يسافر كده من غير ما يعرفنى ويسلم عليا
جمال: اعذره هو لما جه كنت انت نايم ومحبش يزعجك
ياسين: انت عارف هو اقرب واحد ليا ف السن عشان كده بحب اتكلم معاه
جمال: ربنا يديمكم لبعض كلكم ي حبيبى
تانى يوم المغرب وصل حازم ودخل ع ياسين اوضته: أخيرا لقيتك صاحى انت ايه معتكف ف اوضتك ع طول
ياسين: اعمل ايه يعنى ما انا معرفش حاجة هنا وحضرتك سافرت امبارح وسيبتنى
حازم: حلو اوى احنا فيها جهز شنطتك ي معلم ويلا بينا عشان منتأخرش
ياسين: اجهز شنطتى ايه ويلا بينا ع فين؟!
حازم: هنطلع ع دهب رحلة مظبطها مع زمايلى ف الكلية باعتبار انها اخر سنة ومش هنشوف بعض
ياسين: طب انت طالع رحلة مع زمايلك انا بقى هطلع معاك ليه؟!
حازم: هو انت ليه محسسنى انها رحلة تبع مدرسة وممنوع اصطحاب حد من الاهالى او الاصدقاء اولا الرحلة دى مش تبع الكلية دى رحلة احنا اللى عاملينها لنفسنا وعادى نجيب اللى احنا عاوزينه وانا عاوزك معايا نغير جو
ياسين: موافق بس بشرط
حازم: امممم من اولها ماشى ي عم اؤمر
ياسين: الكاميرا بتاعتى اتكسرت وعاوز اشوف طريقة اصلحها بيها
حازم: بس كده عنيا ليك وع حسابى كمان اشطا
ياسين: اشطا
حازم: طب يلا عشان منتاخرش جهز شنطتك بسرعة ي كبير
جهز ياسين شنطته وراح مع حازم واتفاجئ انهم مش كتير كانوا تلات شباب وخمس بنات
حازم: اعرفكم ياسين ابن عمى واخويا ودول فارس ومازن وادم ودى ندى وهبة وروان وماسة ومارينا
ياسين: اتشرفت بمعرفتكم ي شباب
ادم: احنا اكتر ي عم ياسين يلا بقى عشان السواق ع اخره وعاوز يتحرك من ساعة
ابتدت الرحلة وكان ياسين بيبص من الشباك ومش مركز مع حد اصلا وبعد فترة طويلة لما كانت العربية وسط الجبال فجأة عدت العربية ع حاجة كأنه مطب مفاجئ ووقفت
فارس: ايه يسطا فتحى مش تخلى بالك
فتحى باستغراب: انا بسوق من ساعتها ودايس الطريق ده رايح جاى ومكنش فيه مطبات هنا انا متأكد
حازم: ما يمكن يكون مثلا اتعمل جديد ولا حاجة؟!
مازن: طب ما ننزل نبص وخلاص احنا لسه هنتخانق ده ايه؟!
فتحى: تنزل فين انت ف صحراء ووسط الجبال والدنيا ضلمة وهنا فيه تعابين وعقارب كتير
مازن: ي عم فتحى قول ي باسط انزل ي راجل بلاش كلام فارغ
حازم: خليكم انتم ي بنات محدش ينزل
نزل الشباب مع فتحى وكانت صدمتهم لما لقوا ان اللى داست عليه العربية كانت افعى
مازن بصدمة: ي نهار اسود دى افعى بجد
حازم: اومال جرافيك انا طول عمرى بشوفهم ف التليفزيون والفيديوهات اول مرة اشوفهم ع الحقيقة
ادم: ايوة بس دى رفيعة يعنى معقول تكون هى اللى رجت العربية بالشكل ده؟!
حازم: فعلا حجمها مش كبير للدرجة دى
ياسين: يلا ي جماعة خلونا نمشى بسرعة المكان هنا مش امان الله اعلم ايه ممكن يحصل تانى
جريوا بسرعة ع العربية وركبوا ومشيوا ف نفس الوقت جات افعى دكر وشافت الميتة وقربت منها شدتها لجحرها وهى بتحفظ اشكال البشر اللى شافتهم
ندى: جرى ايه ي جماعة انتم لقيتوا ايه؟!
ادم: مش هتصدقى
ندى: ليه يعنى؟!
ادم: كانت افعى عارفاها اللى بنشوفها ف الفيديوهات وافلام الرعب دى
ندى: بجد مندهتوش علينا نتفرج ليه؟!
مارينا: انتى هبلة هو بيقولك قطة دى افعى ده انا لو كنت شوفتها كنت مت فيها
ندى: عشان انت قلبك ضعيف وتافهة بس
مازن: ايوة ي ابو قلب جامد تعجبنى
بعد ساعات ومع اول النهار كانوا وصلوا ع دهب وحاسبوا فتحى
آدم: ادينا وصلنا اهو ي فارس فين الشاليه اللى حجزتوا ده
فارس: هنركب ونروح ع مكتب السمسار اللى اجرته منه وهو هيودينا ع هناك
بالفعل ركبوا وراحوا واخدهم السمسار ع الماكن وكان شبه مقطوع حواليه شاليهات كتير لكن من الواضح انها فاضية
ماسة: ايه المكان الغريب ده ...ده قديم جدا وشكل مفيش ناس
فارس: اتنيلى ده مفيش اجمل من الهدوء والانسجام
هبة: هدوء ايه وزفت ايه انا لايمكن اقعد هنا دقيقة واحدة
فارس: ليه بس ي بيبو
هبة: عشان انا قولت لاهلى انى رايحة مكان عام ومليان بالناس والمكان ده مهجور يعنى انا كده بضحك عليهم
آدم: انتى مكبرة الموضوع اوى ع فكرة وبعدين كا احنا مع بعض اهو
فارس: صح كده وبعدين احنا قريبين من البحر والسوق وكل حاجة حوالينا
السمسار: يعنى هتقعدوا هنا ولا اوديكم مكان تانى بس هيبقى اغلى
مازن: لا تمام ي معلم هنقعد هنا
روان: حيث كده بقى افتح شاليه تانى
السمسار: ده ليه احنا اتفقنا ع واحد بس
ماسة: لا طبعا مينفعش نقعد مع بعض المفروض الشباب لوحدهم والبنات لوحدهم
السمسار: خلاص يبقى هتدفعوا حق الشاليه التانى
حازم: ي عم ماشى بس افتح الشاليه اللى جنبنا ع طول ده
السمسار: ماشى
حاسبه حازم ومشى وكل واحد دخل ع الشاليه واختار اوضة لنفسه ودخل فيها يفضى حاجته وينام شويه ف نفس الوقت كانت الافعى الذكر واقفة ع بعد وبتبص ع الشاليهين بتركيز ووو.....
الثالث
- وقفت الافعى الذكر تراقب الشاليهات بتركيز وفجأة اختفت ...تانى يوم الصبح صحى حازم وقال: ايه ي جدعان مشبعتوش نوم مش كفاية ضيعنا يوم كامل ف النوم
فارس: ي عم بقى الواحد كان هلكان من الطريق ارحمنا
آدم: الواحد الطبيعى ع الصبح بيقول صباح الخير ي عم الحازم
حازم: الطبيعى بقى انا هروح اصحى البنات ع اما تفوقوا خلونا نروح ناكل
خرج حازم من الشاليه وكان المنظر يجنن بشكل المياه والجبال عن بعد لكن بالرغم من جماله الا ان هدؤه مخيف راح حازم ع الشاليه وخبط لحد ما صحيوا
روان بنوم: صباح الخير
حازم: صباح النور يلا فوقوا بقى عشان نروح نفطر ونحضر البروجرام اللى هنعمله النهاردة
روان: اوك
بالفعل صحى الكل وراحوا فطروا وقضوا يوم لطيف جدا برة واندمج ياسين معاهم بشكل كبير ورجعوا ع الشاليهات ياخدوا شاور ويرتاحوا
مازن: طب يلا ي حلوين جهزوا نفسكم واخرجوا هعملكم سفارى نايت محصلتش
هبة: ايوة بقى دلعنى
بالفعل جهز مازن النار وكل حاجة لزوم القعدة ...فارس: ايه الملل ده ي جدعان ما تيجوا نلعب ولا نعمل اى حاجة
ماسة: حلو بس هنلعب ايه؟!
فارس: اى حاجة
مارينا: ما تيجوا ندور ف ام الشاليهات دى ع كوتشينة ولا دومنة ولا اى حاجة تسلينا
مازن: والله فكرة انا شوفت مخزن سرى جوة ف الشاليه اكيد هيكون فيه حاجة
حازم: فين ده؟!
مازن: تعالوا ورايا
قام الكل وراح وراه لمكان المخزن ....حازم: الله يخربيت عقلك عرفت مكان المخزن ده منين؟!
مازن: ما انت عارف مبيهداش ليا بال غير لما اكتشف المكان اللى عايش فيه
فتح مازن المخزن ولقوا حفرة بسلم لمكان تحت الارض ...ياسين: ايه ده بصوا ده سرداب ولا نفق؟!
آدم ؛ عندى فضول اعرف ف ايه
حازم: ي جماعة بلاش يمكن تكون حاجة خاصة بالناس اصحاب الشاليه ولا حاجة
آدم: ي عم حازم متعقدهاش وبعدين لو مهمة زى ما بتقول كان السمسار قال لينا ملكوش دعوة بيه
فارس: والله الراجل ده بيقول كلام زى الفل
شغل الكل الكاشفات ونزلوا واحد ورا التانى مشيوا ف نفق طويل وفجأة وصلوا لترابيزة عليها صندوق غريب وقديم
مازن: ايه الصندوق ده؟!
مسكته ندى وقالت: شكله قديم بس ايه الرسومات اللى عليه دى؟
هبة: حاسها شبه الكتابة الفرعونية القديمة
مارينا: ايوة صح جدا استنوا اعمل سيرش كده
فتحت مارينا الجوجل لكن ملقتش شبكة وفجأة جه صوت من وراهم: بتعملوا ايه هنا؟!
صرخت البنات والشباب وقفوهم وراهم ...ياسين: انت اللى مين وازاى تدخل كده من غير استئذان
الشخص: انا نائل المرسى سمسار هنا وكنت فاكر ان الشاليه فاضى ايه اللى جابكم هنا
آدم: ولا حاجة مجرد فضول بس ي حاج نائل
خبطه حازم ف رجله ....نائل: طيب الاحسن نخرج من هنا النفق مفيهوش اكسجين كتير
حازم: احسن حاجة يلا ي شباب
مازن: ممكن ناخد الصندوق ده معانا ولا فيها مشكلة؟!
نائل: لا عادى هاتوه
بالفعل خرج الجميع ومعاهم نائل ....حازم: هو ايه جاب حضرتك هنا؟!
نائل شاور ع واحد من الشاليهات: انا ساكن هنا الشاليه ده بتاعى
آدم: غريبة بس احنا مش شوفنا حضرتك امبارح
نائل: رجعت بليل متأخر ومكنش فيه صوت عشان اعرف ان فيه حد هنا
فارس: معليش انا اسف ع سؤالى السخيف انت ازاى عايش ف المكان ده لوحدك وهو مقطوع؟!
نائل: بحب الهدوء والانسجام والمكان ده افضل مكان للتأمل
ندى: كفاية كلام بقى ويلا نفتح الصندوق ده نشوف جواه ايه
فتحوا الصندوق ولقوا جواه ورق غريب وقديم جدا ....مازن: ايه الورق ده كوتشينة دى ولا ايه؟!
حازم: كوتشينة ايه ي اهبل انت؟!
آدم: اومال ايه الورق ده شكله قديم ومرسوم بالايد ع فكرة
مسكه ياسين وقال: ده ورق تاروت
فارس: يعنى ايه تاروت؟!
ياسين: ورق كده بيستخدموه المنجمين والفلكيين ف قراءة الابراج والتنبؤ بالمستقبل بس كل ده هبل وحرام طبعا لانه لا يعلم الغيب الا الله
ماسة: واااو وانت عرفت الموضوع ده منين؟!
ياسين: بحب القراءة وكان جه عليا فترة وانغمست شويه ف العلم ده بس بعد كده سيبته لانه كان حرام
مارينا: بليز اقرء ليا برجى عشان خاطرى
ياسين: انا وقفت الموضوع ده من زمان وزى ما قولتلك حرام
مارينا: بليز ارجوك دى لعبة يعنى مش حاجة هنصدقها بس اهو تغيير بدل الملل
حازم: خلاص ي ياسين معليش خدها ع اد عقلها عيلة وشبطت
مارينا وهى بتطلع لسانها: ده انت رخم
مسك ياسين الورق وبدل يفنطه ع شكل وردة وف النص الورقة الاخيرة وقال: انتى برج العقرب
مارينا بتفاجئ: مظبوط ايه باين ادامك بقى
ياسين: الفترة الجاية وقريب اوى هتكسبى فلوس من لعبة او رهان حاجة شبه القمار بس هيجيلك دولارات بعدد فردى انتى طموحة جدا بس عنيدة عارفة طريقك بس مجرد عندك ممكن يخليكى تمشى ف الطريق الغلط
مارينا: وااااو انا فعلا كنت مراهنة ع سباق حصان بس لسه لحد الان مجاش ليا حاجة طب ايه الورقة الغريبة اللى ف النص دى؟!
ياسين: ده ساحر ف السيرك خلى بالك تحبسى نفسك جوة صندوق لان دى نهايتك
استغربت مارينا بس ضحكت عادى ...روان: طب شوفلى انا كمان
ياسين: كده مش هنخلص
آدم: لا ما انت هتشوف لينا كلنا ومش هتخلص مننا يلا
ياسين فنط الورق وقال: انتى برج الجوزاء
روان: ايوة حصل قولى بقى هيجيلى فلوس زى مارينا؟!
ياسين: لا بس تفوق دراسى وع الاغلب هيختاروكى ف منحة دراسية لدولة اسيوية
روان: انا فعلا مقدمة ع منحة كوريا يارب يوافقوا
ياسين: بلاش فضولك ياخدك ف مكان انتى متعرفهوش وتطلعى السلم
روان: سلم ايه ي عمنا ما علينا اهم حاجة المنحة
طلبت ماسة يقرأ ليها ...ياسين: برج العذراء انتى متخيرة مابين شخصين والاثنين متعرفيش تعيشى من غيرهم بس انتى هتختارى اللى بيفهمك مش اللى بيحبك خلى بالك اوعى تمشى ف الطريق الغلط عشان المهرج مش هيسيبك
بعد كده جات هبة ...ياسين: برج الحوت بتحبى المغامرة واكتشاف الجديد بس من النوع الجبان اللى بيهرب من خوفه بدل ما يواجهه بس خلى بالك الحبل اللى هتفكرى انه طوق النجاة هو سبب موتك ووووو.....
الرابع
-طب وانا ايه ظروف برجى؟!
ياسين: انتى برج الثور دايما مغامرة وبتحبى تكتشفى الحاجات اللى تعرفيها واللى متعرفيهاش بتحاولى تثبتى ان مصدر الداء هو الدواء
ندى بصدمة وهى بتبص لهبة: دى حقيقة انا شغالة ع بحث بس لسه نظرى
ياسين: البحث هينجح بس خلى بالك تكونى من الناس اللى بيقولوا عليهم طباخ السم بيدوقه
ندى: حلو ده المهم انه ينجح واوصل لحلمى والله لو حصل هجيبلك الحلاوة
آدم: خلصنا بقى انتم مش خلاص قرأتوا نجى للرجالة بقى شوف برجى ي معلم
ياسين: برج الحمل انت دايما بتاخد قرارتك من دماغك حتى لو ضد مصلحتك لمجرد ان حد اقترحها عليك بس دايما قرارتك صح بس اهم حاجة متمشيش ف الطريق الغلط بتاع نفق المترو
فارس: طب وانا؟!
ياسين: برج الجدى هتختار الطريق السهل والمضمون بس هتخسر حاجة كبيرة ف المقابل الاحسن تغامر وخلى بالك من العربية اللى جاية ف الطريق الضلمة
مازن: حلو اوى الكلام ده ماذا عنى اتحفنى
ياسين:برج القوس بتضحك بس جواك جرح كبير بسبب حب مطولتوش لانه مستحيل بس هتقابل حب تانى يعوضك ويمحى القديم بس خلى بالك من الخناجر اللى بتحب تلعب بيها ٦ منها ممكن تخترق راسك
مازن بضحك: ايه جو الاكشن ده هو انا هسدد ع نفسى ولا ايه
حازم: طب قولى انا ايه ظروفى؟!
ياسين: برج الميزان عندك حكمة كبيرة وبتوزن الامور صح اسمك هيكبر بس ف مجال ملوش علاقة بدراستك بس خلى بالك من الجمجمة نهايتك ع ايدها
حازم: ده فيلم رعب ده ولا ايه ...طب اقرء لنفسك
ياسين: لا ي عم انا مبحبش الحاجات دى
حازم: ي ابنى قولنا لعبة عادى هيحصل ايه يعنى يلا بجد
ياسين: انا برج الاسد انا شجاع بس هتعرض لموقف صعب هخاف منه بس هتغلب عليه
آدم: اشطا كمل
ياسين: بس كده
مازن: طب اقرء لعم نائل يعنى هو ملوش من الحب جانب ولا ايه
نائل: لا انا مبحبش الكلام ده انا بس قاعد معاكم تسلية بدل ما كنت ادخل واقعد لوحدى من دلوقتى انا مبسوط بوجودكم
حازم: احنا اكتر والله ....هو حضرتك عايش هنا؟!
نائل: ايوة بحكم شغلى
آدم: طب انا اسف يعنى ليه المكان ده بعيد عن الناس ولوحدك ويعتبر ف جبل
نائل: بحب الهدوء والتأمل وانا عايش هنا عادى مفيش اى مشاكل يلا عن اذنكم
آدم: الله ع فين لسه بدرى
نائل: بدرى من عمرك عندى شغل الصبح اسيبكم انا تصبحوا ع خير
الجميع: وانت من أهله
قضوا الليل كله يلعبوا ويهزروا والصبح ناموا
تانى يوم الصبح فاقت مارينا ع صوت ماسدجات كتير ورا بعض قامت تبص واتصدمت وصرخت وبسبب صرختها كل البنات صحيت
ماسة: ايه ي بنتى ف ايه انتى كويسة؟!
مارينا بصدمة: انتم مش هتصدقوا ايه اللى حصل؟!
ماسة: ما تنطقى ي بنتى وقعتى قلوبنا ف ايه؟!
ك
مارينا: كسبت الرهان بتاع السباق وبعتوا ليا شيك بقيمة المبلغ
روان: بجد بتهزرى
مارينا: والله بجد بصوا
هبة: ي بنت المحظوظة ٧٠٠ دولار بقيت غنية بت متنسيش اختك
مارينا وهى بترجع شعرها بتناكة: ولا اعرفك انتى مين اصلا؟!
ضحك الكل وكانت ندى سرحانة ...مارينا: ايه ي ندوش مالك سرحانة ف ايه؟!
ندى: انتم مش ملاحظين حاجة غريبة!
مارينا: حاجة ايه؟!
ندى: امبارح ياسين قال لمارينا انها هتكسب رهان ع حاجة هى مراهنة عليها وقال كمان ان المبلغ عدد فردى والمبلغ اللى واصل من الجايزة ٧٠٠ دولار يعنى رقم فردى
هبة: ايوة صح بس ايه المشكلة عادى ممكن تكون مجرد صدفة مش اكتر
ندى: ممكن
مارينا: بقولكم ايه انا رايقة ومبسوطة اوى هسحب الفلوس وهعزمكم كلكم ع حسابى
روان: ايوة بقى صاحبتى الغنية اللى هتدلعنا
خرجت مارينا وعرفت الشباب اللى اتفاجئوا وراحت سحبت الفلوس وعزمتهم ع حسابها واثناء رجوعهم اتفاجئ ياسين برقم عمه بيرن عليه
عز: ياسين عاملين ايه؟!
ياسين: الحمدلله بخير مال صوتك ي عمى فيه حاجة ولا ايه؟!
عز: عايزك تجيب بعضك انت وحازم وتيجوا حالا جدك تعبان اوى وعاوزكم
ياسين: ايه احنا هنركب ونيجى حالا
حازم: ف ايه ي ابنى من مين المكالمة دى ومالك وشك اتخطف كده ليه؟!
ياسين: جدك تعبان اوى وعاوز يشوفنا
حازم بخوف: ايه طب يلا بسرعة نجهز شنطنا
آدم: طيب هننزل معاكم
حازم: مفيش داعى خليكم انتم براحتكم قضوا الاسبوع يعنى لما ترجعوا احنا ف بلد وانتم من بلد
آدم: ايوة بس احنا كلنا جايين مع بعض ونرجع مع بعض
حازم: صدقنى ي آدم ملهاش لزوم خليكم انتم عشان البنات
فارس: طيب خلى بالك من فونك عشان نطمن ولما توصلوا ابقوا طمنونا عليكم
حازم: ان شاء الله
ياسين: يلا ي حازم انا لميت ليك حاجتك
ودع حازم وياسين اصحابهم ومشيوا ف نفس الوقت كانت الافعى الذكر ع بعد كبير بتراقب اللى بيحصل
ف الليل كان الكل نايم من تعب اليوم فاقت ماسة وفتحت التلاجة ملقتش اكل راحت لروات عشان تقولها تروح معاها يجيبوا اكل لكن روان مرضيتش تقوم فراحت لمارينا وبرضه مقامتش قررت تغير هدومها وتخرج بنفسها
فضلت ماسة ماشية ع حسب الجى بى اس ما وجهها واثناء ما كانت باصة قصادها اتغير السهم لمكان تانى بدون ما تاخد بالها مشيت كتير وغوطت ف الصحرا وسط الجبال
ماسة بتعب: ايه المكان ده بس ي ربى انا مظنش أننا كنا بنمشى المسافة دى كلها
وقفت بتعب تاخد نفسها كان المكان ضلمة والجبال محاوطاها من كل مكان فجأة حست بحاجة بتلف حواليها وجهت الكشاف وكانت افعى
ماسة بخوف وصرااااخ: عاااااااااااا الحقونى حد يلحقنى
لفت وشها وطلعت تجرى لفترة كبيرة ولقت الافعى مش وراها وقفت عشان تاخد نفسها وهى بترفع وشها لقت الافعى قصادها لكن بحجم اكبر واتحول ديلها لرجل بشرية وبالتدريج جسمها اتحول لجسم بشرى ف هيئة مهرج
ماسة بخوف: ان...انت مين هو ايه اللى بيحصل؟!
ابتدى المهرج يعمل حركات للضحك حاولت ماسة تبان قوية وقالت: انت عاوز منى ايه؟!
بدأ المهرج يعمل حركات بايده وكانت ماسة غصب عنها كأن حاجة بتجبرها تقلده وتعمل نفس الحركات
ماسة بدموع: انت بتعمل ايه سيبنى
فجأة اضايق المهرج واتحولت الابتسامة لغضب وقرب من ماسة اللى كانت واقفة ثابتة وكأن جسمها متربط ومشلول قرب منها وطلع لسانه اتلف حوالين رقبتها شالها لفوق ونزل دم من فمها وبعدها مسك رقبتها بايده وكسرها بحركة الموت وسابها وسط الجبال واختفى ووووو.....
الخامس
فى الصباح فاقت ندى ودخلت صحت البنات ولاحظت ان ماسة مش موجودة دورت غليها ف الشاليه لكنها مش موجودة خرجت برة وراحت خبطت ع الشباب قالوا انهم كانوا نايمين ومش شافوها من امبارح
مارينا: استنوا انا هرن عليها
ندى: ايوة صح ايه الغباء ده
رنت مارينا كذا مرة لكن الفون بيعطى جرس ومش بترد
مارينا: مش بترد هتكون راحت فين بس؟!
هبة: يمكن تكون رجعت مثلا بس هتعمل حده ليه من غير ما تعرفنا!
ندى: ي هبة والنبى مش وقت ذكائك هترجع ازاى وهدومها وحاجتها كلها هنا زى ما هى
حاولت مارينا ترن كذا مرة لكن مش بترد ....مارينا بعصبية: ي حيوانة أما ترجعى بس والله لاوريكى ع وجع الاعصاب اللى احنا فيه ده
روان بتذكر: انا افتكرت حاجة
الجميع بسرعة: ايه؟!
روان: هى كانت دخلت عليا وانا نايمة طلبت منى اخرج معاها نجيب اكل بس انا مقدرتش وطنشتها بس تقريبا كنا الفجر او قبل الفجر
مارينا: ايوة صح هى فعلا كانت جاتلى وقالتلى كده برضه بس انا مركزتش
آدم: يعنى معقول تكون خرجت من وقتها ومرجعتش تاهت مثلا؟!
مازن: حتى لو تاهت زى ما بتقول كانت ع القليل ردت ع فونها وطمنتنا
روان بدموع: انا قلبى مقبوض حاسة انها جرى ليها حاجة
فارس: والنبى ي بومة نقطينا بسكاتك وتفائلى خير ان شاء الله هتكون كويسة ما انتم عارفين ماسة بتحب تعمل مقالب رخمة زيها
مارينا: طب هنعمل ايه هنفضل حطينا ايدنا ع خدنا كده!
فارس: قوموا معايا ي رجالة نطلع ندور عليها
آدم: هندور عليها فين بس انت كمان هو احنا ف قرية شارعين ده احنا وسط الجبال
آدم: هتقوموا معايا ولا اخرج لوحدى
مازن: ي عم قوم ده مجنون ويعملها خلينا ندور مش هنخسر حاجة
مارينا: واحنا جايين معاكم
آدم: جايين معانا ع فين حد قالكم ان احنا طالعين رحلة انتم هتفضلوا هنا لحد ما نرجع
روان: لا مليش فيه انا هاجى معاكم عاوزة اطمن ع ماسة
آدم بحدة: انا مبحبش اعيد كلامى مرتين انا مش بكلم اطفال عشان تشبط فينا قولنا هنخرج ندور لو لقينها هنرن نعرفكم خلصنا
فارس: اهدى عليها شويه ي عم آدم هى قلقانة ع صاحبتها مش اكتر
مازن: يلا بينا بلاش نضيع وقت
خرج الشباب وفضلوا البنات يرنوا عليها ع امل انها ترد واول ما خرجوا الشباب
مازن: استنوا كده دقيقة
آدم: رايح فين ي عم انت كمان
مازن: اهدى ي آدم هروح اسأل استاذ نائل يمكن يكون شافها ولا حاجة
راح مازن وقعد يخبط ومحدش بيرد .... آدم: يلا ي مازن شكله مش موجود زمانه راح ع شغله
عند ياسين وحازم اللى وصلوا ع بلدهم واول ما دخلوا كان عمهم واقف مع الدكتور اللى لسه خارج من غرفة جمال
ياسين بخضة: خير ي عمى طمنى
عز: استنى ي ابنى لسه الدكتور خارج اهو هنفهم منه
الدكتور: شوف ي استاذ عز الحالة المرة دى مش مطمنى نهائى عضلة القلب اضعف من اى مرة عدت ولازم يتنقل ع المستشفى حالا وع الاغلب هيحتاج لتدخل جراحي ف اقرب وقت
حازم: تدخل جراحى ازاى يعنى قلب مفتوح؟!
الدكتور: للاسف الموضوع اكبر من كده هو هيحتاج عملية زرع قلب والمشكلة مش ف التجهيزات لكن هنجيب متبرع منين ياريت بس تقنعوه يجى ع المستشفى وبعد كده ربنا يحلها من عنده
مشى الدكتور ...عز: ياسين ادخل انت اتكلم مع جدك هو بيسمع كلامك حاول تقنعه
ياسين بضعف: مش هقدر اشوفه بالحالة دى مش هينفع اخسره زى ابويا وامى
عز: مينفعش تكون كده ي ابنى لازم تكون قوى عشان تقدر تقنعه ده لو فعلا بتحبه وخايف عليه
دخل ياسين وهو بيقدم رجل ةبيأخر التانية لحد ما قظر يتمالك ويبتسم وقرب من جده وقال: ايه ي بطلى ينفع كده توقع قلوبنا عليك
جمال بتعب: انت هو بطلى كويس انك جيت قبل ما اقابل وجه ربى كريم
ياسين: بالله عليك ي جدى متقولش كده انت هتبقى كويس بس اسمع الكلام وتعال نروح ع المستشفى الاسعاف ف الطريق لو بتحبنى بجد لازم تروح
جمال: اسمعنى ي ياسين ارجوك خلاص كلنا ودائع وربنا هيسترد امانته دلوقتى
ياسين: لا ي جدى ارجوك عشان خاطرى انا مليش حد من بعدك
جمال: ايه اللى بتقوله ده اومال اعمامك وولادهم راحوا فين
ياسين: انت اللى باقى ليا من ريحة ابويا وامى
جمال: اسمعنى ي ياسين فيه جاجة مهمة انت لازم تعرفها خبيتها عنك لكن هى طاردتك ابوك وامك مش ماتوا ف حادثة عادية هى ...هى كانت السبب
ياسين بصدمة: هى ..هى مين ي جدى؟!
جمال: الافعى ..افعى الجوهرة الزرقاء
ياسين بصدمة اكبر: افعى...ايه الكلام الغريب اللى بتقوله ده ي جدى
جمال: قبل ما والدك يموت بسنة كان ف رحلة مع والدتك ف رحلة للهند وهناك حصلت خاجة غريبة البيت اللى كانوا قعدين فيه دخلت عليه افعى بخرزة زرقاء وقتها ابوك قتلها ف حين لنه كان لازم يسأل الاول ثعبان عادى ولا جن لكن ابوك معملش كده وقتل الافعى اللى كانت جن وقتها الجن اللى فيها حفظ شكل اللى كانوا بالبيت وبدأ يظهر لابوك وامك ف اشكال مختلفة مرة مهرج مرة ساحر مرة شبح مرة مومياء ومرة ف افعى عملاقة عشان يثير جواهم الخوف ولما قرروا يرجعوا حصلت الحادثة ابوك قالى وانا كنت بنصحه دايما بقراءة القرآن عشان يحصن نفسه انتقام الافعى موقفش هنا بل انها عاوزة نسله كل اللى انت بتشوفه هى الافعى عاوزة تعمل فيك زى ما عملت مع ابوك وامك قوم افتح الدولاب هتلاقى كتاب خده يمكن تلاقى فيه الحل
قام ياسين فتح الدولاب وجاب الكتاب وراح لجده: قصدم ع ده ي جدى؟؟
لكن مفيش رد من جمال وكان السر الالهى انقضى صرخ ياسين ودخل الجميع وكان يوم صعب عليهم وخصوصاً ياسين
نرجع للشباب اللى رجعوا ف الليل وهما مفرهدين
روان: ها طمنونى
آدم: لفينا دهب حتة حتة وملهاش اى اثر وروحنا للسمسار يمكن تكون راحت عنده وقال مشافهاش
ندى بخوف: يعنى ايه هتكون راحت فين
فارس: هنعرف منين علمنا علمكم ع العموم احنا بلغنا الشرطة وسيبت رقمى
وصل نائل وشافهم قاعدين: مساء الخير ي شباب اومال فين باقى الشلة
مازن: عم نائل مشوفتش ماسة زميلتنا اللى كانت معانا هنا
نائل: لا ابدا انا لما باجى بنام ع طول وبصحى بدرى اروح شغلى خير ف حاجة؟!
جه اتصال ع فون فارس برقم غريب ولما رد كان ظابط اللى قاله: هات بعضك وتعال احنا لقينا جثة وسط الصحراء وعاوزينكم تتعرفوا عليها
جرى الكل ع القسم واخد الظابط فارس لانه الشجاع اللى فيهم وقاله: بص كده هى دى؟!
اتصدم فارس لانها كانت فعلا ماسة ومقت*ولة بطريقة بشعة ووووو....
السادس
-بعد ما خلصت التحقيقات ...الظابط:احنا اتصلنا بأهل المجنى عليها عشان يجوا يستلموا الجثة من المشرحة بس كنت عاوز اسأل حاجة
فارس: اتفضل
الظابط: هى مكنش ليها اعداء مثلا او حد تكونوا شاكين فيه؟!
فارس: لا ابدا ي فندم ماسة كانت بنت مسالمة جدا وبتحب كل الناس ومستحيل يكون ليها اى اعداء وحتى لو فيه من الجاحد اللى بلا قلب ورحمة اللى يق*تل بالشكل البشع ده
الظابط: تمام اتفضلوا انتم بس ياريت تفضلوا هنا كام يوم لحد ما تخلص التحقيقات
آدم: احنا هنفضل لحد اخر الاسبوع وبعدها لازم نرجع عشان امتحاناتنا
الظابط: اخر الاسبوع ده اللى هو الجمعة صح النهاردة لسه التلات يعنى لسه معانا يومين
آدم: ان شاء الله عن اذنك
اخد الشباب البنات ورجعوا ع الشاليه ...هبة بدموع: انا مش قادرة اصدق اللى حصل ده معقول حد يكون بالوحش*ية دى ويقت*لها كده طب ليه؟!
ندى: يمكن حرامى وطلع عليها عشان يسر*قها لما لقاها لوحدها
مازن: حرامى ازاى والفلوس والفون والحلق والخاتم الدهب زى ما هما فيه سبب تانى
ندى: قصدك ايه انه كان فيه حد قاصد يقت*لها طب مين وليه؟!
آدم: نتمنى الشرطة تلقاه بسرعة هما اللى عندهم حل للسؤال ده
مارينا: انا مش هستنى هنا دقيقة واحدة بعد اللى حصل انا همشى
فارس: تمشى فين انتى اتجننتى مش الظابط قال ادامك محدش يمشى
مارينا بعصبية: وانا مش هقعد ف المكان ده دقيقة واحدة بعد اللى حصل لماسة انتم عاوزين تفضلوا انتم حريين
روان: مارينا انا مقدرة زعلك وانك كنتى اقرب واحدة لماسة بس مينفعش تمشى لوحدك اديكى شوفتى اللى حصل لماسة مش ناقصين نخسر حد تانى
مارينا: انا اتصلت بأوبر وهو وصل هتيجوا معايا ولا اسافر لوحدى
مازن: قولنا مش هينفع انتى غبية معنى انك تمشى هتخلى البوليس يشك فيكى
مارينا: يشكوا براحتهم خليكم انتم هنا سلام
مازن: طب طمنينا عليكى لما توصلى
مارينا: اما اوصل بقى سلام
مشيت مارينا وركبت الاوبر اللى طلبته وبعد ساعتين رنت عليها روان
روان: ايه ي مارى انتى كويسة
مارينا: الحمدلله مش كنتى جيتى معايا وسبتيهم احسن
روان: مينفعش ي مارينا قرار مشيك وف وقت زى ده اصلا غلط
فجأة وسط الكلام وقفت العربية فجأة ....مارينا: خير ي اسطى فيه حاجة ولا ايه؟!
السائق: مش عارف العربية وقفت فجأة ليه ثوانى انزل اشوف ايه المشكلة بعد اذنك بس تنزلى معايا تنورلى بفلاش الفون
مارينا: اوك ....رورو خليكى معايا ثوانى لو سمحتى
نزلت روان تساعد السواق وبعد ما ظبط الكهربا بتاعت العربية ركب وكانت هى لسه هتركب فجأة العربية مشيت فضلت مارينا تصرخ : استنى انت رايح ي بنى ادم انت متسبنيش ف المكان ده لوحدى
روان: ف ايه مالك ايه اللى حصل؟؟
مارينا بخوف: روان الحقينى الاوبر مشى وسابنى لوحدى ف الصحرا
روان: ايه طب انتى فين بالظبط ابعتى اللوكيشن بسرعة
آدم: ف ايه ي بنتى
حكت ليهم روان ...فارس: اهدى ي مارى وحاولى تشوفى اى مكان او اى حد عندك خليكى معاه لحد ما نوصل
مارينا بخوف: انا وسط الجبال انا مرعوبة
فارس: خليكى معانا ع الخط متقفليش
جرى فارس وادم ومازن ع السمسار واخدوا منه العربية وكانت مارينا لوحدها ف الصحراء مفيش غير ضوء القمر فجأة شافت واحد قصادها فصرخت ....الشخص: متخافيش
مارينا بخوف: انت مين؟!
الشخص: انا ساحر جاى من السيرك والعربية بتاعت الكوتش بتاعها نام ومفيش استبن وملا حاجة انفخها بيها انتى هنا ليه؟!
مارينا: الاوبر هرب وسابنى لوحدى
فارس: الووووو مارى ردى عليا انتى بتكلمى مين؟!
مارينا: واحد عربيته الكوتش بتاعه نام
فارس: طب كويس الحمدلله خليكى معاه لحد ما نوصل بس متقفليش الخط
بدأ الساحر يعمل ليها خدع بحجة التسلية وهى نسيت خوفها وبدأت تندمج وتسقف
مازن: هى بتسقف ع ايه وبعدين انا عاوز افهم انا مش سامع صوت حد تانى معاها ليه ؟!
آدم: فعلا احنا مش سامعين صوت حد معاها
الساحر: ايه رأيك نجرب خدعة الصندوق
مارينا بحماس: اه موافقة جدا
آدم: موافقة ع ايه ي بنتى فهمينا؟!
مارينا: اصل الشخص اللى انا ركبت معاه طلع ساحر ف السيرك وانا هدخل الصندوق
آدم بقلق: لا متدخليش حاجة اسمعى الكلام متدخليش
مارينا باستغراب: ليه يعنى؟!
آدم: هو انتى تعرفى الراجل ده هتأمنى ليه ع اى اساس ي بنتى اسمعى الكلام
مارينا: ي ابنى ده شخص لطيف جدا وجنتل مان
فارس: اسمعى الكلام طب بصى تعرفى تصوريه وتبعتى لينا الصورة
مارينا: مفيش ضوء
مازن: ي ام الذكاء شغلى الفلاش
بالفعل شغلت الفلاش وصورته من ضهره وبعتت الصورة والساحر نده عليها وطلب منها تدخل الصندوق ودخلت وقفل عليها ولما الصورة وصلت للشباب اتصدموا لان اللى كان ف الصورة افعى عملاقة
فارس بصريخ: مارينا اجرى من عندك بسرعة
لكن مارينا كانت دخلت الصندوق والشبكة اتشوشت .....مارينا: افتحلى بليز الأكسجين هنا قليل اوى
لكن مفيش صوت كررت كلامها لكن مفتحش ليها حاولت تفتح الباب لكن متفتحش فضلت تصوت وتستنجد بسرعة طلع مازن فونه ورن ع الشرطة وبعت ليهم اللوكيشن
مارينا بصويت: ارجوك افتح الباب هموت من الخنقة ارجوك
فجأة دخل سيف من فتحة ف اخر الصندوق فصرخت بالصوت العالى ...مارينا: مش عاوزة اكمل اللعبة السخيفة دى من فضلك افتحلى
لكنه كمل وفجأة دخلها ع رجلها وعورها جامد فصرخت وكان فارس بيسجل المكالمة
مارينا: الحقونى ده شكله هيقتلنى ابوس ايدكم
سرع فارس اكتر ... مارينا: الحقونى
لكن هو كان بيدخل السيف بالتدريج من تحت لفوق ويقطع جزء من جسمها وهى تصرخ وتستنجد لحد ما ق*طع رقبتها واختفى الصوت
فارس : ماري مارى ردى علينا مارى
وصلت الشرطة قبلهم ولقوا الصندوق ولما فتحوه لقوها جواه مجروحة واجزاء كتير منها مقط*وعة ووووو....
السابع
- وصل الشباب ع الموقع وكانت الشرطة وصلت قبلهم وشافوا الجثة واتصدموا
الظابط: اتفضلوا معايا ع القسم لازم ناخد اقوالكم فى اللى حصل
بالفعل راحوا وحكوا للظابط كل حاجة وقال: ممكن اشوف الصورة اللى بعتتها واسمع التسجيل بتاع المكالمة؟!
فارس: طبعا اتفضل حضرتك
مسك الظابط الفون وسمع المكالمة وفعلا مكنش فيه اى صوت غير صوت مارينا وبس ولما فتح الصورة كانت الصدمة لانها مكنش فيها اى حاجة بص ليهم وقال: انتم متأكدين ان هى دى الصورة اللى بعتتها
فارس: ايوة
الظابط: انت قولت ان اللى كان فى الصورة كانت افعى مش راجل فى حين ان الصورة فاضية مفيش فيها اى حاجة غير جبال
شد فارس الفون واتصدم وعمل الظابط التحقيق مع كل واحد لوحده والاقاويل واحدة ولما جمعهم قال: انت بتشرب ياض انت وهو
مازن: ابدا والله العظيم ولا حتى السجاير العادية احنا ولاد ناس وطلبة فى كلية الصيدلة هو ده اللى حصل وشوفناه
الظابط: يعنى ايه اومال الصورة مفيش فيها اللى قولته عليه ليه ولو فعلا زى ما بتقولوا انكم شوفتوا افعى هل الافعى هتمسك سكينة وتق*تل ايه التخاريف دى
آدم: يا فندم اقسم بالله العظيم ده اللى شوفناه احنا التلاتة معقول كلنا اتوهمنا
الظابط: انتم تعرفوا ناس شغالة ف السيرك؟!
آدم: لا أبدا
الظابط: طب البنتين المجنى عليهم؟!
آدم: لا برضه هما مقربين لينا جدا وعمرهم ما دخلوا السيرك اصلا
الظابط: لما روحنا لمسرح الجريمة الاول بتاع ماسة لقينا هناك وش مهرج وحسب اقاويل صاحبتكم مارينا فى المكالمة ان اللى كان معاها ساحر تفتكروا دى مجرد صدفة
فارس: احنا والله منعرفش كل اللى نعرفه حكيناه لحضرتك
الظابط: طيب اتفضلوا انتم روحوا ولما نحتاجكم هنجيبكم تانى
آدم: ي فندم من فضلك احنا اعصابنا باظت وعاوزين نرجع على بيوتنا ممكن
الظابط: تمام مفيش مشكلة وهبعت معاكم بوكس كمان يوصلكم للقاهرة
آدم: شكرا لحضرتك كتر خيرك
وصل الشباب للشاليه وحكوا للبنات اللى حصل وسط صدمتهم ورعبهم من اللى بيحصل ركبوا البوكس اللى وصلهم وكان الوقت متأخر ..... فارس: حد عنده تفسير للى بيحصل ده؟!
آدم: لا مفيش ولو فيه هيتصنف خيال علمى ملوش اى علاقة بالواقع اصلا
مازن: انت هتروح ازاى؟!
آدم: بالمترو هو اسرع حاجة دلوقتى بالنسبة ليا
مازن: اشطا يلا ي فارس نوصل البنات وبعدين نروح وانت ابقى طمنى عليك
آدم: اشطا سلام
راح آدم على محطة المترو وكانت فاضية على عكس العادة يمكن عشان الوقت متأخر لاحظ آدم ان الانوار بتطفى وتنور وف الجهة التانية شاف خيال كل شويه بيقرب لكن لما النور ثبت اختفى مشى ومحطش اهتمام كبير لكن اتكرر الموقف وحس بحاجة عدت جنبه بسرعة طلع يجرى وهو مرعوب وهو بيفتح عيونه شاف الافعى... آدم: لااااااااا
طلع آدم يجرى والافعى وراه وعشان يتفداها نزل ع الشريط ع امل انه يعدى للبر التانى لكن المترو جه بسرعة وقط*عه الى اشلاء بعدها اختفت الافعى
تانى يوم الصبح بتفتح ندى الفيس بالصدفة وبتشوف حازم منزل نعى بوفاة جده واتصلت ع الكل وقالت ليهم وقرروا يروحوا يعزوه اتجمع الكل فى المكان اللى اتفقوا يتلموا فيه
ندى: محدش شاف آدم انا رنيت عليه كتير فونه مغلق
فارس: انا كمان كلمته كتير ومقفول يمكن لسه نايم ولا حاجة
هبة: نايم ايه لحد دلوقتى احنا العصر
فارس: الايام اللى فاتت كانت صعبة علينا كلنا ومكناش بنام كويس وانتم عارفين ان آدم عنده كهربا زيادة ع المخ
ندى: فعلا ربنا يشفيه خلاص نروح نعزى ولما نرجع نبقى نروح نزوره ونطمن عليه
ركب الجميع وراح على بلد حازم وياسين واستقبلوهم بترحاب
فارس: والله يا حازم مكناش نعرف لولا ندى اللى عرفت صدفة من الفيس
حازم: عارف يا شباب انكم لو عرفتوا مكنتوش اتأخرتوا اومال فين الباقى؟!
بصوا لبعضهم وسكتوا ...ياسين: فى ايه مالكم حصل حاجة؟!
روان بدموع: ماسة ومارينا تعيشوا انتم
حازم وياسين بصدمة: ايه ازاى وامتى؟!
حكى ليهم فارس اللى حصل وكمل: انا لحد الآن مش قادر اصدق اللى بيحصل مين وليه وايه السبب؟!
ياسين: الافعى ...الافعى اللى بالخرزة الزرقاء هى السبب ورا كل اللى بيحصل
مازن: يا عم ايه التخاريف دى بس على رأى الظابط هى الافعى هتمسك سكينة وتقتل
ياسين: لانها مش افعى عادية دى افعى متحولة يعنى من الاخر جن
مازن: انت مصدق اللى بتقوله عقلك مصدقه يعنى الكلام ده بنشوفه ف الافلام الهندى الاوفر اللى من وحى خيال مؤلف معت*وه
ياسين: لكن هى دى الحقيقة اللى لازم تصدقها لان انا شخصياً متهدد بيها ومعرض للموت فى اى لحظة
الجميع بصدمة: ايه؟! ...حازم: ازاى ومحكيتش ليا ليه انا مش فاهم حاجة؟!
قالهم ياسين على كلام جده وعن الكتاب ... هبة: طب فين الكتاب ده؟!
طلع ياسين وجاب الكتاب وقرأوه كلهم لكن مفهموش منه حاجة لحد ما لفت انتباه ندى صورة لواحدة عالمة فلك وليها ف السحر
ندى: انا حاسة انى اعرف الست دى شوفتها قبل كده انا متأكدة
قرأت اسمها وعرفتها وعملت عنها سيرش على جوجل ...ندى: ايوة هى
فارس: مين دى علاقتها ايه باللى احنا فيه؟!
ندى: الست دى عالمة فلك كبيرة وكل كلمة كانت بتقولها بتحصل واهل القرية بتاعتها اتهموها بالسحر والاعمال الشريرة وطردوها وبقت منبوذة من الكل
مازن: ايوة مفهمتش برضه ده ايه علاقتها باللى احنا فيه؟!
ندى: الست دى ممكن يكون عندها حل وتفسير للى بيحصل فينا البوليس مش هيعمل لينا حاجة لازم نوصلها بأى شكل
فارس: وهنوصل ليها ازاى ان شاء الله؟!
ندى: عن طريق حد من اهلها اكيد يعرفوا عنها حاجة
مازن: اللى بتقوليه ده هبل وانا مش موافق عليه
ندى: صدقنى يا مازن حتى لو العقل رافض يصدق لكن ده اللى احنا عايشين فيه
وقبل ما يرد عليها رن فون فارس ولما رد الفون وقع من ايده وقعد ع اقرب كرسى من صدمته
ياسين: مالك ي ابنى ف ايه؟!
فارس برعشة: آدم...... آدم لقوه اشلاء ف المترو بعد ما خبطه ووووو...
الثامن
- وكالعادة طلبتهم الشرطة عشان التحقيقات وبعد كده سمحوا ليهم يروحوا اخدوا بعضهم وطلعوا ع كافيه
مازن: لا انا واثق ان فيه حد مستقصدنا وعاوز يخلص علينا واحد ورا التانى
فارس: طب هو مين ومصلحته ايه؟!
ياسين: يا جماعة انا قولت ليكم اللى فيها الافعى هى السبب ورا كل اللى بيحصل لينا
فارس: طيب خلينى معاك للاخر وان الافعى السبب طب هى عاوزاك انت لانك ابن الراجل اللى موتها ده ع حسب كلام جدك ولو فرضاً هتأذى حد لازم يكون قريب منك وهو حازم لكن احنا بقى ذنبنا ايه ؟!
ياسين: صدقنى معنديش اجابة ولا اى تفسير للى بيحصل ده
روان: يعنى ايه هنفضل كده ع طول هنفضل نم*وت واحد ورا التاني
هبة: لا فيه ادامنا امل لسه وهى الست اللى قالت عليها ندى يمكن تقدر تفيدنا
حازم: مالك يا ندى انتى ساكتة كده ليه من ساعة ما خرجنا من القسم؟!
ندى: انتم مش ملاحظين اى حاجة غريبة!
حازم: حاجة ايه؟!
ندى: كل الكلام اللى قاله ياسين يوم ما قرأ لينا الابراج بالتاروت بيحصل فعلا
مازن: اتفضل يا عم اهى ابتدت تخرف وتأمن بالهبل ده
ياسين: مازن عنده حق كل اللى اتقال يومها مجرد كلام لعبة والحقيقة انه لا يعلم الغيب الا الله
ندى: ونعم بالله بس خلينا نتكلم شويه بهدوء انت قولت لماسة ابعدى عن المهرج نهايتك ع ايده والشرطة لقت وش مهرج جنبها قولت لادم خلى بالك من المترو وفعلا آدم مات لما خبطه المترو وقولت مارينا هتكسبى رهان بعدد فردى وفعلا تانى يوم كسبت رهان الحصان بمبلغ ٧٠٠ دولار رقم فردى وقولتلها تخلى بالها من الساحر وانها تحبس نفسها جوة الصندوق وف كلام مارينا ع الفون اللى كان معاها ساحر بيشتغل ف السيرك ولقوا جثتها جوة صندوق فعلاً اكيد كل ده مش مجرد صدفة
الكل سكت ....روان: ندى عندها حق احنا لازم نحاول نوصل للست دى وبسرعة
فارس: طب هنوصلها ازاى وانتى قولتى انها اطردت من بلدها
ندى: هنحاول نوصلها عن طريق حد من اهلها اكيد حد عارف طريقها ولو ربنا بيحبنا الست دى هتكون عايشة
ركبوا الباص وطلعوا ع بلدها اللى كانت من حسن حظهم قريبة منهم وسألوا عن اهلها وسألوهم عن طريقها لكن كلهم زعقوا وقفلوا الابواب بوشهم
ندى لشخص فيهم: ابوس ايدك احنا لازم نعرف هى فين احنا فى ورطة ومحدش هيساعدنا غيرها ارجوك
الراجل: قولتلك منعرفش عنها حاجة وحد الله بينا وبينها وغوروا بقى من هنا
يأسوا ان حد يساعدهم وقرروا يرجعوا لكن لقوا بنت جاية وراهم وبتنهج: شباب انتم عاوزين خالتو نرجس ف ايه؟!
ندى: خالتك؟! طيب انتى تعرفى طريقها؟!
سكتت البنت...ياسين: ارجوكى لو تعرفى طريقها وصلينا بيها احنا عاوزينها ف خير مش شر
روح: ماشى بكرة تعدوا عليا الساعة ٨ الصبح هى عايشة ف كوخ ع حدود البلد لوحدها ومحدش بيزورها غيرى لان امى الله يرحمها وصتنى عليها قبل ما تموت بس ارجوكم محدش يعرف انى بزورها لان لو حد عرف من هنا هيطردونى انا كمان
ندى: اطمنى احنا منعرفش حد هنا اصلا عشان نقوله كتر خيرك يا انسة روح
تانى يوم راحوا ليها واخدتهم لمكان نرجس كان كوخ قديم اوى وكأنه من بداية ما قبل التاريخ دخلت روح وقالت: ازيك يا خالتو فيه معايا ضيوف عاوزينك
نرجس: ضيوف مين عاوزين منى ايه؟!
ياسين: احنا ف مصيبة وكنا طمعانين انك تساعدينا ارجوكى احنا بنموت واحد ورا التانى ومنعرفش ايه السبب
نرجس: للاسف اجابتكم مش عندى اتفضلوا من غير مطرود
وقفلت الباب ف وشهم ندى وهى بتخبط بصريخ وبتحكى ليها اللى حصل من الاول لحد موت آدم لكن هى مفتحتش
حازم: خلاص يا ندى يظهر انه مفيش فايدة يلا نروح
لكن قبل ما يمشوا فتحت الباب ودخلتهم وطلبت يحكوا ليها الموضوع تانى من اوله وحكى ليها ياسين كل حاجة لعنة الافعى اللى حكاها ليه جمال والرحلة والافعى اللى العربية داست عليها وورق التاروت وتحقيق اللى بيحصل
نرجس: حكايتكم دى حصلت لمجموعة من الصحاب من حوالى ٣٥ سنة ف منطقة دهب برضه وكانوا ٤ بنات وتلات شباب وكلهم ماتوا ومتبقاش منهم غير واحد بس وكان برضه بعد ما قرأوا ورق تاروت محفور ومرسوم بالايد تقدروا تبحثوا عنها ع النت
مسك الكل فونه وبحث عنها واتصدموا لان اغلب المكتوب فعلا بيحصل ليهم
حازم: طب احنا لازم نعرف الشخص اللى عاش ده فين وازاى قدر يرجع ما هو معنى انه فضل عايش اكيد عرف الحل وطريق النجاة
نرجس: لا ولحد الان ميعرفش السبب
هبة: معليش هو انتى عرفتى منين انتى تعرفيه؟!
مازن: ي جدعان بقى بطلوا هبل خلونا نمشى بلاش كلام فاضى
روان بزعيق: اسكت بقى انت ايه مش حاسس بالمصيبة اللى احنا فيها؟!
مازن: وهو يعنى الكلام ده منطقى وحتى لو اللى بتقوله ده حقيقى الراجل اللى عاش ده فين هل لسه عايش اصلا وعرفت منين وبتكلم بثقة اوى كده ان هو ميعرفش السبب؟!
نرجس: لان الشخص اللى نجى من الحادثة ورجع عايش ده يبقى انا
الكل اتصدم وبصوا لبعض باندهاش ....ياسين: انتى طب ازاى؟!
الكل رجع بص للفون وفعلا كانت الوحيدة اللى عاشت وقابلت الشرطة هى نرجس عويس وقامت جابت كذا صورة ليها مع اصحابها اللى كان منشور ليهم صورة واحدة ع النت
هبة: صدقت يا سى مازن ع الله تكون اقتنعت
ياسين: طب ممكن اعرف اشمعنا انتى الوحيدة اللى محصلش ليكى حاجة؟!
نرجس: لان انا قرأت للكل برجه لكن مقرأتش لنفسى ولما رجعت وحكيت اللى حصل اهل القرية بتاعتى اتهمونى انى ساحرة وطردونى واهلى اتبروا منى وقتها رجعت لنفس المكان عشان اقرء لنفسى برجى واموت وارتاح لكن للاسف الشرطة منعت انى ادخل جيت عيشت هنا ومحدش كان بيسأل عليا غير ريحانة اختى ولما اتوفت وصت روح عليا
ياسين: ايوة بس انا برضه معرفتش الاجابة اللى بيحصل فينا ده ليه؟!
نرجس: لان ورق التاروت ده ورق مربوط بروح شريرة وهى اللى بتعمل فيكم كده وووو....
التاسع
-لان ورق التاروت ده ورق مربوط بروح شريرة وهى اللى بتعمل فيكم كده ومش فيكم انتم بس انتم واى حد بيق*تل افعى حتى لو بالغلط
الكل مصدوم....ياسين: لا معليش انا عاوز افهم يعنى ايه؟!
نرجس: فى زمن العصر العباسى كان فيه منهم خليفة عنده ساحر بيتنبأ بالمستقبل وكان الخليفة مش بيستغنى عنه وبيسأله ع كل حاجة والخليفة ده مكنش بيخلف وف يوم طلب من الساحر ده يتنبأ وفعلا تنبأ ان فيه طفل هيتولد بس هيموت هو والملكة يوم الميلاد طبعا الخليفة فرح ومهتمش بكلام الساحر اوى وقال انه اكيد الطفل هيعيش تعدى الشهور والملكة اليوم اللى تولد فيه تموت هى والطفل عشان كده الملك امر بنفى الساحر من البلد ومش بس كده ده انتقم منه بطريقة بشعة جدا راح عنده فى الصحراء وقت*ل ابنه قصاد عيونه وفصل راسه عن جسمه وعلق الراس والجسد ع شجرة ومشى طبعا الساحر قرر الانتقام ورسم اوراق التاروت دى بايده وكلها اعمال سفلية وعشان الموضوع ده يتم كان لازم يقدم تضحية فقدم نفسه لكن قبل ما يم*وت نفسه احضر افعى كوبرا بخرزة زرقاء عشان روحه تسكنها وقرأ البرج بتاع الخليفة وعيلته وانتقم منه اشد انتقام ومن يومها اللى بيقرأ الورق واللى بيموت افعى حتى لو بالغلط هو بينتقم منها
ياسين: طب والحل نخلص منها ازاى؟!
نرجس: لازم تقرأوا برج الساحر عشان الروح تختفى من العالم بتاعنا وبعدها تخلصوا من الورق عشان ميأذيش حد تانى
ياسين: طيب نقرأ برجه ازاى واحنا اصلا منعرفش اسمه ولا شكله
قامت نرجس جابت كتاب فيه صورة مرسومة للساحر واسمه نائل
اول ما شافوا الصورة وقرأوا الاسم اتصدموا ايوة كان هو نائل السمسار
مازن بصدمة: ده ..ده نائل السمسار طب ازاى؟!
نرجس: هو ظهر ليكم؟!
ياسين: ايوة وكان قاعد معانا واحنا بنلعب ورفض اننا نقرأله
نرجس: زى ما عمل معايا انا وأصحابى هو بيظهر ف شكله البشرى وبيقعد عشان يسمعكم ويعرف طريقة المو*ت اللى بيها هيستخدمها عشان يخ*لص عليكم وطبعا مكنتوش بتشوفوه الا بليل وبس مش كده!
حازم: ايوة لانه كان دايما بيقول انه عنده شغل
نرجس: ارجعوا ع المكان واتخلصوا من الورق او اقرأوا البرج بتاع نائل وقتها هتتكسر لعنتكم
خرج الجميع من كوخ نرجس وركبوا العربية ...روان: يا جماعة انتم مصدقين الكلام ده فعلا معقول نائل مش انسان انا حاسة انى فى كابوس
فارس: يا جدعان اقسم بالله احنا لو حكينا الكلام ده لمؤلف وحوله فيلم هياخد اوسكار افضل فيلم عربى مصرى تصنيف رعب ده ولا الافلام الاجنبى والهندى
حازم: بقولكم ايه الهرى ده كله مش هيفيد احنا لا ف كابوس ولا فيلم رعب احنا ف الحقيقة اللى بتقول ان فيه تلاتة من اصحابنا ماتوا والله اعلم الدور الجاى ع مين فينا
ياسين: احنا لازم نرجع الشاليه ونحرق الورق ده ونخلص منه
فارس: نروح ازاى لوحدنا انت مفكر انه هيسيبنا نعمل كده ولو جن فعلا اكيد عرف ان احنا عرفنا الحقيقة وهيحاول يقضى علينا بدرى بدرى
ياسين: هو فعلا بيقدر بس لو كل واحد لوحده لكن طول ما احنا مع بعض مش هيقدر علينا
مازن: انتم حريين انا عن نفسى مش رايح فى مكان
روان بصدمة: ايه الكلام ده يا مازن احنا بدأنا الموضوع سوى ولازم نكمله للاخر
مازن: انا مش هروح ع المكان اللى جات منه المصيبة انتم عاوزين تروحوا مع السلامة لكن انتى هتيجى معايا
شدت روان ايدها منه وقالت: لا يا مازن انا مش هاجى معاك انا هروح معاهم
مازن: روان انتى مش واثقة فيا؟!
روان بحزن: الموضوع اللى احنا فيه ملوش علاقة بالحب اللى بينا يا مازن انا خايفة عليك عشان خاطرى تعال معانا
مازن: انا مش رايح ع الزفت المكان ده والواد اللى انتم ماشيين وراه ده هو اللى هيموتكم كلكم واحد واحد هو النحس اللى من يوم ما دخل ع حياتنا وكل القرف ده بقينا فيه بسببه ...قال كلامه وهو بيشاور ع ياسين
حازم بغضب: احترم نفسك ف الكلام يا مازن ولولا اللى احنا فيه كنت هتشوف مين حاجة مش هترضيك
ندى: بس بقى كفاية انتم الاثنين حرام عليكم
حازم: انتى مش شايفة بيقول ايه انتى كمان
هبة: خلاص يا حازم هو متوتر من اللى بيحصل اكيد مش قصده
مازن: ولا قصد ولا غيره اركن ع جنب ونزلنى هنا انا مش هاجى معاكم
روان بدموع: عشان خاطرى يا مازن
مازن: انتى اختارتى تكونى معاهم طريقنا مش واحد يا روان سلام
روان وهى بتحاول تمنعه: لا يا مازن عشان خاطرى
ياسين: سبيه يا روان ربنا قادر ينجيه بس ع فكرة ي مازن اللى قولته مش صح انا ضحية زيى زيك ومعرفش القدر ايه ومخبى ايه ومش انا اللى موت الاقعى ولا انا اللى اقترحت اقرأ بالتاروت
مشى مازن من غير ما يبص وراه وهما قرروا يسافروا ع دهب ... حل الليل وكان مازن وصل البلد بتاعته لكن الوقت متأخر واضطر يمشى ف الطريق الزراعى الضلمة لحد ما يلاقى مواصلة توصله الطريق الرئيسى وبعدها شغل اغانى وعلى الصوت وبدأ يدندن وهو ماشى حس بحاجة ماشية وراه لف وشه بسرعة لكن ملقاش حد رجع بص ادامه واتكرر الموقف سرع خطوته والضل اللى وراه زاد لف وشه وملقاش حاجة برضه ولما رجع بص قصاده لقى الافعى اتصدم وكأنه جسمه اتشل ...مازن: انت عاوز منى ايه
ابتدى يطلع من الافعى ٦ ايادى كل ايد فيها خنجر وافتكر مازن كلام ياسين ليه وكلام نرجس عن الافعى طلع يجرى مسافة كبيرة لكن الافعى مسكته بديلها ولفت عليه لحد ما كتفته مازن برعب: لا لا يارب لا
مسكت الافعى الخناجر ووجهتها ع راس مازن وفجأة صوت صريخ مازن ملى المكان : لااااااااااااا
اما الباقى بعد مدة وصلوا اخيرا ع المكان لكن اتصدموا لان شكله متغير اوى وكأنه مكان قديم جدا
فارس: حازم انت متأكد ان هو ده المكان اللى كنا فيه
حازم: ايوة متأكد يا ابنى والشاليه اهو
ياسين: طب يلا بسرعة مش عاوزين نضيع وقت خليكم انتم هنا مع البنات وانا هدخل ووو...
العاشر
- طب يلا بسرعة مفيش وقت انا هدخل وانتم خليكم هنا مع البنات
حازم: تدخل فين لوحدك انا مش هسيبك انا جاى معاك ويا نخرج سوى يا نموت سوى
ياسين: حازم مش وقت الكلام ده خليك انت مع فارس مينفعش يكون لوحده متقلقش ان شاء الله خير
دخل ياسين بسرعة وبمجرد ما دخل الباب اتقفل بقوة جريوا كلهم ع الباب بيحاولوا يفتحوه ويكسروه لكن كأنه من حديد ومتفتحش ابدا دخل ياسين وهو بيقرأ قرآن وحاسس بحاجة غريبة لكن جمد قلبه وكمل للنفق اللى جابه منه الصندوق اللى كان فيه التاروت لكن ملقهوش لف وشه وخرج وفتح الباب بسهولة
هبة : انت كويس؟
ياسين: الحمدلله بس انا ملقتش الورق
فارس: نعم يعنى ايه احنا لازم نلاقيه معقول يكون نائل خباه مننا!
ياسين: ممكن ليه لا بس الاكيد ان هو هنا مش بعيد ...بص ياسين ع الشاليه اللى نائل كان بيدخله وقال: انا متأكد ان الورق هناك
حازم: اسمع احنا كلنا هندخل معاك مش هنفضل نتفرج عليك
ندى: حازم عنده حق يا ياسين قوتنا اننا نكون مع بعض مش ده كلامك
دخل الجميع ع الشاليه اللى كان مهجور وكأن محدش دخله من سنين ولاحظه وجود جلد تعبان مشوا جوة اكتر وحسوا ان فيه دخان بيلف حواليهم وعمل عليهم دايرة وحبسهم فيها صرخت البنات لكن الشباب حاولوا الثبات وبسرعة الدخان اختفى وهما جروا لحدوا ما لقوا الصندوق
ياسين: بسرعة يا فارس هات البنزين والخشب وانت يا حازم ولعه
بالفعل ولعوا وبدأ ياسين يرمى الورق ف النار وكانت الصدمة ...روان بخوف: ده..ده مش بيتحرق يا ياسين
الكل مصدوم ...ياسين: احنا لازم نخرج من هنا بسرعة
وفعلا راحوا ع الباب لكن اتقفل بقوة فضلوا يجروا والحاجات بتتشال لوحدها وتترمى عليهم لكن بيتفادوها
ياسين: خليكم جنب بعض امسكوا ف بعض اوعوا تبعدوا هو مش هيقدر علينا ان شاء الله
لكن هبة الخوف اتمكن منها وقالت: لا انا عاوزة ارجع بيتنا
وطلعت تجرى وسابتهم وهما وراها بيحاولوا يوقفوها لكن هى كانت بتجرى والمشكلة كل ما تجرى كل ما المسافة عن الباب تبعد ولما قربت الدنيا ضلمت فجأة فصرخت: ياسين ...حازم ...يا ندى...يا جماعة انتم فين؟!
وكانت سامعة اصواتهم كأنه جاى من ورا ازاز مكنتش سمعاه كويس طلعت فونها وقادت الكشاف وكانت زى ما تكون ف اوضة كبيرة مفيش فيها لا ابواب ولا شبابيك وفجأة احبال كتيرة نزلت عليها وشدتها لفوق قدر الشباب يكسروا باب الاوضة اللى كانت فيها
فارس بصدمة: هى راحت فين انا متأكد انها دخلت هنا
حازم: الله يخربيت تهيؤاتك اكيد اتلخبطت هو الزفت ده قدر يخدعنا ويدخلنا ع الغرفة الغلط
فارس: يا جماعة اقسم بالله العظيم انا شايفها بعينى دخلت ع هنا
ياسين: خلاص خلاص تعالوا ندور عليها برة
وفعلا لفوا وشهم لكن فجأة النور جه وحسوا بصوت جاى من السقف رفعوا وشهم وشافوا فتحه بتخرج ع برة وفجأة نزلت منها هبة مشن*وقة صرخت البنات بخوف والشباب مصدومين
ياسين: لحد هنا وكفاية بقى مش هسمحلك تاخد حد تانى مننا مش ممكن
خرج ياسين والكل وراه وبقى ياخد الورق من النار بايده .... حازم: ياسين انت بتعمل ايه ايدك يااااسين
لكن ياسين مسمعلوش وفنط الورق وفرده وفجأة حس بضل واقف جنبه
ياسين: نائل انا عارف انك هنا وسامعنى انا عرفت الحقيقة وعرفت انت اد ايه اتظلمت وازاى اتأذيت لما شوفت ابنك بيم*وت قصادك بس انت خلاص انتقمت من الناس اللى اذوك لكن الناس التانية واللى احنا منها ذنبنا ايه
صرخة قوية جعلت كل الموجودين يحط ايده ع ودنه من قوته ياسين: انت مكانك مش هنا خلاص جسدك فنا وروحك مكانها مش ف عالمنا لازم تمشى
زاد الصوت وفجأة ظهر نائل بجزء بشرى وجزء افعى ..نائل: انت فاكر انك تقدر تتحدانى انت اضعف منى بكتير
ياسين: بالعكس انا اقوى منك بايمانى بربنا وبنفسى انت اللى خايف منى ومن وجودى بعد ما كشفتك
نائل: قصدك ع نرجس لا اخدت جزائها المرة اللى فاتت نجت منى المرة دى حرقت الكوخ بتاعها
ياسين: مش قولتلك انك كائن ضعيف وكافر الاول بعت نفسك للشيطان وم*وت نفسك غير اعمالك بالسحر انت ملعون زى المخلوق اللى بقيت منه زيك زى الشيطان اللى بيعت ليه نفسك وبقيت منهم
نائل: عاجبنى ثقتك الغريب ان انتم كبشر بتخافوا تترعبوا مننا
ياسين: احنا مش بنخاف من مخلوقات زينا زيهم كلنا من صنع الله فكيف نخاف المخلوق والخالق معنا انتم مخلوق ضعيف جدا ولولا دعوة ابوكم سوميا اللى دعاها بحسن نية مكنتش قولت كده ( معلومة بسرعة سوميا هو ابو الجن والله سبحانه وتعالى قال له يا سوميا ادعونى بما تشاء فقال سوميا: ادعوك يا ربى ان تجعل من ذريتى الكهل فينا شاب وان نرى ولا نُرى يعنى نشوف ومنتشافش وان نعيش عمر اطول من كل الكائنات الاخرى فاستجاب الله عز وجل لدعائه) نرجع لباقى قصتنا
نائل: تأكد ان كل اللى بتقوله ده ف الفاضى ونهايتكم زى اصحابكم
ياسين: بالعكس مش هتلحق يا نائل
دب ف قلب نائل الخوف ورفع ياسين بعد ما كتفه لفوق بديل الافعى اللى كان فيه وقبل ما الشباب يوصلوا ليه عمل دوامة بالورق وهوا قوى خلاهم كلهم لزقوا بالحيط
ياسين: انت برج العقرب ...فتح نائل بوقه وخرج لسانه ولف حول رقبة ياسين ...كمل ياسين بخنقة: دوقت من نتائج افعالك لكن ابنك اللى دفع الثمن لكن انت مصيرك جهنم اللى خلقت بعدها من نار لما بيعت نفسك للشيطان لكن تأكد ان مصيرك جهنم ومنها واليها ستعود اللهم انى اسألك بعهد سليمان الذى اتيته من الملك ما لم ينبغى لاحد من بعده ان تنصرنى عليه بحق قولك الا تنصروه فقد نصره الله اللهم انى اسألك باسمك الاعظم ان تنهيه بالنار التى خلقته منها يا الله يا الله يا الله
وفجأة احس نائل بنار عظيمة مسكته من ديله اللى اتفك عن ياسين وفضلت النار تجرى ف جسمه وهو يصرخ لحد ما اتحول لشرار صغير واختفى وقع ياسين مغمى عليه وجرى الشباب عليه فوقوه وبعدها حرقوا الورق
فارس: اللهم لك الحمد يارب الحمدلله يا شباب ربنا نجانا
روان: يلا بينا نمشى من المكان ده
خرجوا وكانت الدنيا ضلمة وطلبوا اوبر وفجأة ظهرت عربية من وسط الضلمة دى ..فارس بخوف: يا ياسين انت ..انت مش قولت انه مات العربية دى ظهرت ليه انت كنت قايل ان نهايتى ع عربية جاية من الضلمة لكن فجأة لقوا مازن نازل وبيجرى عليهم
فارس بفرحة: صاحبى انت لسه عايش الحمدلله
مازن: انا نجيت من الموت بأعجوبة ومش هتصدقوا ازاى
حكى ليهم مازن لحد ما الافعى وجهت عليه الخناجر كمل وقال: خلاص كان بينى وبين الموت ثانية وفجأة الفون يتحول من اغنية لقرأن ولقيت ليك التعبان ده بيصوت اتفك من عليا واتفحت حفرة من الارض واختفى فيها
فارس: يعنى ربنا اللى نجاك من عنده
مازن: حقك عليا يا ياسين انت وحازم متزعلوش منى بس اللى كنا فيه مستحيل بنى ادم يصدقه
ياسين: الحمدلله انك بخير والموضوع انتهى للابد خلاص احنا كسرنا اللعنة
تعدى السنين وروان ومازن يتجوزوا وفارس يقرب من ربنا اكتر ويتجوز واحدة متدينة وحازم اعترف بحبه لندى اللى نجحت ف البحث بتاعها وعملت من الداء دواء أما ياسين فقرر يروح يعيش ف بيت ابوه وامه واتجوز من واحدة اتعرف عليها بالشغل وتوتة توتة خلصت الحدوتة
🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹
ادخلوا بسرعه حملوه وخلوه علي موبيلاتكم من هنا 👇👇👇
وكمان اروع الروايات هنا 👇
انضموا معنا على تليجرام ليصلكم اشعار بالروايات فور نزولها من هنااااااااا
🌹🌹🌹🌹🌹🌹🌹🌹🌹🌹🌹🌹🌹🌹🌹🌺🌺🌺🌺🌺🌺🌺🌺🌺🌺🌺🌺
تعليقات
إرسال تعليق