حكاية كل بيت بقلم نشوه عادل حصريه وجديده وكامله جميع الفصول على مدونة النجم المتوهج
 |
انا هفضل كده لحد امتى ي كريم؟
كريم باستغراب: اللى هو ايه كده دى مش فاهم ي تالا!
تالا: هفضل لحد امتى مسجلة اسمك ع فونى باسم بنت ولما ترن عليا وانا مع حد من اهلى اكنسل واكذب واقول دى واحدة صاحبتى ومقدرش اكلمك ف الوقت اللى اكون محتاجة ليك فيه؟!
كريم بتنهيدة: تانى ي تالا طيب نعيد الكلام تانى انا ف اول العلاقة مكدبتش عليكى وقولتلك انا مش جاهز لا دلوقتى ولا حتى لبعد ٥ سنين ادام وقولتلك خلى علاقتنا سطحية عشان منتعلقش ببعض عشان انا لما بتعلق بتعب وغصب عنى حبيتك وداريت وانتى اللى جيتى وقولتيلى انا مش قادرة اشيل حبك من قلبى قوليلى اعمل ايه بايدى ايه اعمله ومعملتوش طيب!
تالا بدموع: تعال حتى اخطبنى بدبلة وخاتم وانا هساعدك فيهم من غير ما حد يعرف عشان مبقاش مضطرة اكذب عشان لما حد يسألنى بتكلمى مين ارد بكل ثقة واقول خطيبى هو انا مستحقش ده؟
كريم: تستحقى والله وتستحقى الاحسن كمان بس والله انا مفيش بايدى حاجة ده انا كل اللى احتكم عليه لنفسى ٥٠٠٠ جنيه هاجى اخطبك ازاى وهل اهلك اصلا هيوافقوا ع الدبلة والخاتم اللى انتى بتقولى عليهم هيوافقوا ان فترة الخطوبة تبقى ٤ او ٥ سنين لحد ما اكون نفسى
تالا: لولا عارفة انها ظروفك بجد كنت قولت انك بتتحجج عشان متتقدمش ليا
كريم: اتحجج بايه ي بنتى ما كله ع ايدك الصبح ف الشركة وبعد العصر ع التاكسى وانا المسؤل عن امى واخواتى اللى ف رقبتى انتى عارفة عشان اتقدملك دلوقتى ادامى حل من تلاتة عارفة ايه هما؟
تالا: ايه؟
كريم: الاول انى استلف مبلغ كبير عشان اجيب تأشيرة وتذكرة اسافر برة اشتغل ويطلع عينى واحرم نفسى من الاكل والشرب عشان اقدر اوفر جزء للديون والجزء التانى للجهاز ده باعتبار انى هأجر مش عندى شقتى ملك والتانى بقى انى اسافر بشكل غير شرعى ويا اما اغرق والسمك ياكل لحمى ي اما اعيش مطارد ف الغربة واترحل متهان اما التالت بقى امشى ف السكة الش*مال مخد*رات بقا او تز*وير او اثار او ن*صب اى حاجة تخلينى مليونير ف خبطة
تالا: وانا مستحيل اقبل بكل ده وانك تعرض نفسك وحياتك للخطر
كريم: يبقى تصبرى عليا وانا والله يشهد عليا ربنا انى فعلا بحاول عشان نيتى انك تكونى حلالى غير كده لو انتى مش قادرة تقفى قصاد اهلك اكتر من كده وافقى
تالا: اوافق ع ايه؟
كريم: ع العريس اللى متقدم ليكى
تالا بصدمة: وانت عرفت منين انى متقدم ليا عريس؟!
كريم: لان كل مرة بتسألى السؤال ده بيكون فيه عريس وان مبقاش عندك حجج لاهلك واسباب منطقية لرفضك وخصوصا ان سنك مش صغير
تالا بدموع: والله غصب عنى انا خايفة اكون لغيرك وقدرى يكون عكس امنيتى ده انت الحاجة الوحيدة اللى بدعى ربنا بيها ليل نهار ي كريم
كريم: سيبيها لله ي تالا محدش عارف الخير فين
تالا: ماشى ي كريم انا لازم اروح دلوقتى
كريم: تمام انزلى اركبى ورا وانا هوصلك
بالفعل ركبت تالا وفضلوا ساكتين طول الطريق ونزلت جرى طلعت ع فوق اتنهد كريم بحزن ومشى
فى مكان اخر ف شقة من بيت تالا بالتحديد شقة اخوها محمود لاحظ ان زينة مراته زعلانة
محمود: مالك ي زينتى زعلانة كده ليه؟
زينة بزعل: ملكش دعوة بيا
محمود: الله الله ده انا اللى مزعلك بقا ف ايه بس ي حبيبى؟
زينة: عشان اللى بتعمله ده بجد حرام يعنى حنة اخوك بكرة والفرح بعده يومين احط فيهم ميك اب والبس دريس شيك زى اى حد ليه مصمم تخلينى اقل واحدة ف الموجودين ده انت امك دى بتلبس بناطيل واخواتك البنات بيحطوا ميك اب وانت مش بتتكلم اشمعنا انا؟
محمود: خلصتى كلامك! اولا انا مليش حكم ع امى واخواتى والكلام ده كان من بوق ابويا لما جيت ازعق لتالا اما حطت روج وهى رايحة الكلية ف اول سنة ليها وقتها ابويا قالى جملة من يومها مكررتهاش قالى طول ما انا عايش ملكش كلمة لا ع امك ولا ع اخواتك انا بس اللى اقول ده يحصل وده لا اما انتى بقا ملكيتى الخاصة وجوهرتى الغالية اللى بخاف عليها من العين واللى هتسأل عنها ادام ربنا قبل الناس قومى كده معايا
زينة : ع فين؟
محمود: قومى بس. ..... وقفها محمود قصاد المراية: بصى انتى جميلة ازاى تقولى للقمر اختفى وانا انور مكانك فاكرة لما اتعاكستى بعد اول شهرين من جوازنا وعملت مشكلة ويومها كانت خدودك حمرا وشفا*يفك زى الكريز الاحمر وقتها زعقتلك وفكرتك حاطة ميك اب
زينة بضحك: ووقتها قعدت اعيط ومسكت المنديل وقعدت امسح وشى واحلف انه طبيعى وانت كنت مصدوم
محمود بغمزة: اه وفاكر بعدها ع طول بقيتى حامل ف زين
زينة بكسوف: عيب كده
محمود: ياااانى ي بنتى بقالنا ٨ سنين متجوزين ولسه بتتكسفى يا طماطم
زينة بعصبية: محمود قولنا بلاش طماطم دى بكرهها انا
محمود: حقك عليا ي زينتى وبعدين انا زعلان منك اوى
زينة بسرعة: ليه طيب عملت ايه؟!
محمود: بتقوليلى ليه مصمم تخلينى اقلل الناس هو انا عمرى حرمتك من حاجة او منعتك من حاجة كويسه
زينة بدموع: اسفه والله ما انت عارف انى وقت ما اكون مضايقة بحدف كلام دبش
محمود: احلى دبشاية ف حياتى والله جهزى نفسك بليل هنروح نشترى دريسين واحد للحنة وواحد للفرح
زينة بفرحة: بجد
محمود: طبعا بجد اشيك دريسين بس واسعين ومحتشمين ومفيش ميك اب انتى كده كده هتلفتى أنظار بعيون القطط دى
زينة باقتناع: وانا ميهمنيش اكون حلوة ف نظر حد تانى غيرك انت ي سيد الرجالة
عند كريم اللى عمل كام مشوار ورجع التاكسى لصاحبه ورجع البيت كانت والدته ف انتظاره
كريمان: حمدالله ع سلامتك ي حبيبى راجع بدرى ليه النهاردة؟!
كريم: ولا حاجة ي امى انا بس تعبان شويه
كريمان: مالك ي قلب امك ف ايه تعال نكشف
كريم: لا مش مستاهلة ده شوية صداع حباية مسكن وهيروح لحاله
كريمان: انت مخبى عليا ايه ومن امتى وانت بتخبى يولا؟
كريم: صدقينى مفيش
كريمان: يعنى مش زعلان مع تالا مثلا ووووو......
- يعنى مش زعلان مع تالا مثلاً أو بتفكر ازاى هتتقدم ليها بسرعة عشان متبقاش لحد تانى غيرك
كريم باندهاش: تالا! وهو حضرتك تعرفى تالا منين؟
كريمان بضحك: بقالى ٦ شهور وانا وهى أصحاب اوى وهى عنيا عليك برة وانا عيونها جوة
كريم بصدمة: ٦ شهور لا انا مش فاهم اى حاجة بجد ازاى عرفتيها وانا عمرى ما اتكلمت عنها هنا؟
كريمان: شوفت رقمها عندك وانت سايب الفون ولاحظت كلامك معاها بالساعات فحبيت اتعرف عليها وطلبت منها متقولكش ان احنا بنتكلم
كريم: طب ليه؟
كريمان: عشان حبيبت انا اللى اعرفك ف الوقت المناسب المهم دلوقتى تعال معايا
كريم: ع فين؟!
كريمان: هتعرف لما نوصل يلا
نزل كريم مع والدته وهو مش فاهم اى حاجة لحد ما وصلوا عند ارض زراعية كبيرة
كريم: انا مش فاهم حاجة احنا جايين هنا ليه ؟
كريمان: عشان دى ارضنا
كريم بصدمة: ارضنا! هو فى ايه انتى ناوية تجننينى النهاردة ي امى تعرفى تالا وبتكلميها بقالك فترة طويلة ودلوقتى جايبانى عند حتة ارض وتقوليلى ارضنا؟!
كريمان: الارض دى بتاعتى وباسمى
كريم: بتاعتك طب ..طب ازاى؟!
كريمان: انت عارف ان جدك الله يرحمه كان عمدة كبير وعنده اطيان واراضى ي اما جوة بلدنا وبراها لما ابوك طلب يتجوزنى هو مكنش موافق عشان ابوك كان ظروفه ع اده وقالك ده داخل ع طمع كان تفكيره زى تفكير اى حد غنى ف زمانه لكن انا اصريت لانى كنت بحب ابوك اوى وراهنت جدك ان اختيارى صح وقتها قالى انه موافق يجوزنى لابوك بس بشرط مورثش منه مليم وافقت وابوك وافق واتجوزنا وجينا ع القاهرة لما جدك لقانى مبسوطة وابوك متقى الله فيا ومبعدنيش عنهم وقتها جدك عرف انى كنت صح ف اختيارى فكتبلى الارض دى ورثى الشرعى بعيد عن اخواتى
كريم: وبعدين
كريمان: واحد من اخوالك ربنا يسامحه بعد ما جدك مات رفض يعطينى الارض خصوصاً ان الورق اللى يثبت انها باسمى مكنش معايا فاستعوضت ربنا فيها بس مكنتش مسمحاه تعدى السنين والاقى خالك جايلى النهاردة جايبلى الورق وندمان وبيبكى بقهر لان ابنه الوحيد جاله المرض الخبيث وبيطلب منى اسامحه قالى ان الارض دى دخلت كاردون مبانى وقيمتها تعدى ال ٧٠ مليون وان فيه مشترى هيموت عليها واحنا جايين النهاردة نبيعها ونقسم الفلوس بينك وبين اخواتك قسمة الحق
كريم عيونه كانت مدمعة جسمه قشعر وسرح لما دخل الجامع يصلى وهو بيبكى: يارب انت عارف ان نيتى منها الحلال اكتبهالى ويسرلى الصعب يارب انت عالم بحالى مليش غيرك الجأله سخر لى ما يعيننى يارب
كريم بصوت عالى: يارب
تمت بيعة الارض واخد كريم ووالدته الفلوس وفعلا اتقسمت بينه وبين اخواته
كريمان: ها هتتقدم امتى؟
كريم: اخوها حنته وفرحه اليومين دول خلال اليومين دول اشترى انا شقة لا شقة ايه اشترى برج شيك كده اخد شقة فيه واكلم ابوها واعملها مفاجأة
كريمان: وماله ي قلب امك ربنا يسعدك ويهنى خاطرك
فى عدى يومين وكان فرح محمد اخو تالا اللى كانت هى واختها تمارا وزينة مرات اخوهم مع العروسة بالكوافير
تالا: زيزى انتى مش هتعملى ميك اب
زينة: لا ي حب
تالا : ليه محمود موافقش؟
زينة: لا وكمان انا نفسيا مرتاحة وبعدين هو انا شكلى مش حلو ولا ايه؟
تالا: فشر ده انتى زى القمر ي ست الستات
زينة: حبيبى السؤال بقا حضرتك ليه محطتيش ي اخت العريس؟!
تالا بتوتر: ها ...ابدا اصل انا كمان شايفة انى مش محتاجة احط ميك اب هكتفى بالكحل والجلوس وخلاص
زينة: برضه هتكونى اجمل بنوتة
عدى اليوم بكل تفاصيله ولما روحت تالا ع البيت لقت ابوها بينده عليها
اشرف: تالا عاوزك
تالا: نعم ي بابا
اشرف: جايلك عريس
تالا بحزن: عارفة وقولت لماما انى مش موافقه
اشرف: بس ده حد تانى ي بنتى
تالا: بس انا مش عاوزة اتجوز ي بابا انا مش حاسة انى مستعدة ولا جاهزة نفسيا للموضوع ده
اشرف: بصى ي حبيبتى انا عمرى ما اغصبتك ع حاجة او أجبرتك ع شئ بس انا شايف ان الولد ده محترم اوى وكويس جدا وكمان سالت عنه وراجل بجد يعتمد عليه وكمان مادياً مرتاح انا مش بقولك كده عشان توافقى انا بس عاوزك تقابليه ولو مرتاحتيش ارفضى عادى
تالا: ايوة ي بابا بس .........
اشرف مقاطعاً: ي بنتى عشان خاطرى انا عطيتك للراجل كلمة يرضيكى اطلع صغير ادامه
تالا: ما عاش ولا كان ي حبيبى خلاص حاضر ي بابا
قبل اشرف رأسها ودخلت تالا قعدت تعيط وكلمت كريمان تحكى ليها ف نفس الوقت كان كريم جنب والدته كانت كريمان عاوزة تقولها ان العريس كريم لكنه منعها وبعد ما قفلت معاها
كريمان بلوم : اخص عليك ي كريم كده متخلنيش اقولها البت مفطورة من العياط
كريم:معليش ي امى بكرة هترتاح وتطمن بس انا بجد عاوزها مفاجأة
عدى اليوم وجه الميعاد وراح كريم بصحبة امه وعمه واخواته لمنزل تالا وبعد الترحاب والحديث
كريمان: امال فين ست الحسن؟
اشرف: هنده عليها حالا
دخل اشرف واخد تالا وخرج كانت تالا حاطة وشها بالارض ومدمعة .اشرف: ده استاذ كريم ووالدته وعمه واخواته
كريمان: بسم الله ما شاء الله جميلة وصغيرة ف نفسها
حست تالا انها تعرف الصوت رفعت وشها واتفاجئت بوجودهم كانت هتتكلم لكن كريمان غمزت ليها
كريم: ممكن ي عمى اتكلم مع الانسة تالا
اشرف: اتفضل ي ابنى
تالا لكريم بالبلكونة: ازاى ها ازاى قولى ازاى بسرعة
كريم بضحك: اهدى هقولك
حكى ليها كريم كل حاجة ... كريم: ربنا مخذلنيش قصادك ولا كسر بخاطرك وخاطرى ي قلبى ودلوقتى هتبقى خطيبتى ومراتى وتحطى عينك ف عين التخين ولما ارن عليكى تقولى بصوت عالى ده كريم خطيبى
( ضاقت ولما استحكمت حلقاتها ظننتها لن تفرج حتى اخجلنى الله بكرمه🤍)
تمت
🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹
ادخلوا بسرعه حملوه وخلوه علي موبيلاتكم من هنا 👇👇👇
وكمان اروع الروايات هنا 👇
انضموا معنا على تليجرام ليصلكم اشعار بالروايات فور نزولها من هنااااااااا
🌹🌹🌹🌹🌹🌹🌹🌹🌹🌹🌹🌹🌹🌹🌹🌺🌺🌺🌺🌺🌺🌺🌺🌺🌺🌺🌺
تعليقات
إرسال تعليق