رواية عشك_الجبل_كورم_كينان البارت الاول بقلم أوتار حزينه حصريه وجديده على مدونة النجم المتوهج
 |
هناك في اعالي الجبال بين صخورها
وقسوه طبيعتها بين الغموض
الذي يحيط بها وقصصا
عرفت واخرى لم
تعرف
جمعني القدر مع انسان
يشبه الجبل بقسوته يحيط به الغموض من
كل جانب عرفت في ما بعد انه كورم
كينان وانه زعيم
الجبل
بدأت قصتنا في حي من احياء بغداد الجميله
تحديدا في حي زيونه الساعه
الثانيه عشرا ظهرا
جوري،،
افتر بالبيت واباوع لماما كاعده
يم واصف اخويه يريد بس يعرف
النتيجه مالتي والرابط ماجاي
يفتح اخويه محمود كال
بخبث وهو يباوع
عليه
لاتعب روحك اكيد ماطلعت معدل زين شوفها
من خلقتها تكدر تعرفها هي مصخمه
الشرايع
ضربت رجلي بالكاع وجاوبته بعصبيه
ماما سمعتي شحجه
اسكت محمود تره هي مو ناقصتك
ردت علي وكملت بضوجه
ااي ادري هذا شجاه ماجاي يفتح
حمل علي ماما والكل كاعد يستعمله
هسه
واصف رد عاكد الحواجب ومركز بالجهاز كال
وره لحظه
هيانه فتح بسرعه ردولي الرقم
ريكي يبس وحسيت دكات گلبي صارت بزردومي
امي فوك راسه وكفت هي ومحمود
اني رجلي لزكت بالكاع
هياانها جوري توفيق محمد
واصف ابتسم وباوع عليه
سالت بسرعه
هااا شطلعت
محمود اخذ الجهاز منه ماما
تسأل بيهم بلهفه
هاا ولكم احجو شطلعت جوري
ووج ااانتي شنووو انشتاين وج معدلج
تسع وتسعين بوينت واحد وسبعين
انتي طالعه الاولى على مدرستج
فكيت عيوني ماما فزت تهلهل محمود كام
يركص ويغني
جبنها للطبيه من شواربها
ماما اجت عليه حظتني تبوس بيه واني بعدني
مو مصدكه جبت معدل عالي
اردد بدموع
صدك ماما طلعت معدل عالي
ااي وج معدلج عالي وراح تنقبلين طب
محمود اجه وشالني لفوك ويصيح
جبنها واجت ويانا كلوووش
التشنج راح وكمت اصيح بفرح واني اباوع
لدرجاتي
وولكم نجحت وجبت معدل عااالي كلوووش
جبنها واجت ويانا
اخويه ظل يصيح وياي وهو شايلني واصف يباوع علينا ومبتسم ماما تضحك وتبجي
بنفس الوقت وره دقائق محمود
نزلني وضرب گصتي وكال
اانزلي من خرب بيج كسرتي ظهري صايره بكبر الثور هلكد ماتعلف بيج
امي
بابا وووين ماما خاابري بسرعه
ووج ااي شلون نسيت ابشره
راحت اخذت جهازها هو بايدها دك
كالت
اابوج اتصل
هزيت راسي بفرح فتحت الخط خلته على
السماعه وكالت تضحك
اابشرك توفيق جوري طلعت معدل عالي والاولى
على مدرستها
اااعرف شفت النتيجه ووينها لفرحه گلبي
اانطنيها
رحت اخذت ااجهاز من ايد ماما كلت
بفرح
بابا حققت حلمي وحلمك راح اااصير دكتوره
رد عليه بصوت فرحان كلش
مبروك بابا تعبج ماراح بلاش ورفعتي راسي
كدام الكل
محمود مد راسه يمي ورد
واحنا عيني مارفعنا راسك لو بس جوري خاتون
بابا ضحك بصوت عالي ورد علي
هههههه وانت هم بس لاتزعل وتزعل جوري بهل
اليوم
يغار مني بابا ماتعرف شسوه بيه حرك دمي
وهو يصنف عليه
اجي واوصل واشلع اذانه الج
ابتسمت بخبث وباوعت لمحمود اشر اليه وكال
بصوت ناصي
مو اجي اكص لسانج
شفته بابا يكول اكص لسانج
ههه منين اشوفه فاتح كامره بالبيت اني
بابا سويلك حل لمحمود تره صاير اوفر وبس
يتحارش بيه موو ماما
وج دعوفي المشاكل ام لسان وخلينا فرحانين
بيج وبهل الخبر الحلو
سكتت اباوع لمحمود يهز جتف ويعيب اليه
واصف كال مبتسم
اكبر ولك واعقل اليشوفك ولا يكول عمرك
25 سنه عبالك زعطوط عمره تسع
سنوات
محمود ضحك وكعد يم امي الجانت تباوع عليه
وفرحانه كالت
الحمد لله والشكر يااارب جنت شايله همها
ومتوتره كلش
جهازي دك جانت بنت خالتي
اشرت وكلت
ماما هاااي اسيا خلي اجاوبها واشوف
شكد طلعت معدل
حجيت هالكلام وفتحت الخط كلت
الووو هااا ولج بشري عااا تسع وتسعين ووج
طبيه مثلي بس بالبوينت اني اعلى
جاوبت وكمت اكمز مثل الجهال واصيح
ختمناها بنجاااح تعبنا ماراح حلمنا راح يتحقق
ويصير كلوووش
رحت للغرفتي اغني وهي وياي اسمع ضحكات
امي واخوتي
اني جوري توفيق محمد عمري 18 سنه
بابا محامي وماما ربه
بيت عندي خال واحد وخالات اثنين خاله يسرى
مزوجه وعدها ولد عمره 22
طالب هندسه معماريه اسمه مشتاق
وبنيه بكدي اسمها اسيا
نفس المدرسه ندوام خاله تهاني مو مزوجه
كاعده وي خالو خالد الي عنده ولدين
عبد الله وذو الفقار
بابا عنده اخوه اثنين طلعو
وره احتلال العراق لان جانو كلهم رتب اكبر
منه بالعمر وماعندي عمه ولدهم تزوجو هناك واستقرو كل واحد بولايه
اني الوحيده لاهلي عندي اخوه اثنين واصف
عمره 27 سنه صيدلاني متعين بمستشفى حكومي
طويل يشبه بابا اسمر وملامحه جاد كلش
تزوج بعد قصه حب اخذ بنيه تشتغل ويا
وطلعت مو مثل ماجان يتصور وصار الطلاك بينهم بعد خيانتها اله
محمود عمره 25 خريج اداره واقتصاد
متعين بشركه اهليه ملعب وابو بنات اسمر
والعيون جوزي معضل ومعتني بروحه عكس واصف رزين وثكيل كلش وجدي بشكل
اني بزر الكعده اخر العنقود ماما وره ماجابت
محمود كالت بعد ماتريد اطفال بس
القدر جان اله راي ثاني ''''''''وصرت اني واجيت
للدنيا هي وبابا فرحو بيه كلش واخوتي هم
جنت مدلله البيت وشاريد يجيني
واكفه احجي وي اسيا
واسمع امي تحجي وي خاله تهاني
وخالو خالد الفرحانين
بنجاحي بتفوق اني وياها سالت
ووج جوري راح نطلع نحتفل تجون ويانا
نووو اني اريد حفله خاصه بيه مااريدج وياي
جاوبتني بزعل
عاابت ليش مو اني وياج توم روح
هههه هااي شبيج صدگتي تره داشاقه وياج
يعني تجووون ويانا حتى اكول لماما
ماادري خلي اشوف بابا شوكت يجي
يجوز يتاخر مثل كل يوم
اهووو عمو توفيق دائما مشغول ومااظن
راح يجي من وكت
ماادري خلي اكول لماما وهي تشوفه هاا صدك
كلتو لخاله تهاني وخالو خالد
اي كالت الهم ماما
ردت بضوجه سالت
شبيج ولج ليش ضايجه
اممم ماكو شي
عليه ولج احجي
سكتت للحظه بعدين كلت
هااا خايفه لايجي ذو الفقار
ووج اموت منه بسه يشاقه وعباله
دمه خفيف
تره فقار ينحب وسوالفه حلو
مو محبوب ولا عنده سوالف حلوه اصلا
سخيف ودمه ثكيل ياريته
مثل عبد الله اخوه
ثكيل ورزن
جنت اعرف ابن خالي يحب بنت خالتي
وهي قلبها يم اخوه مبين عليها هالشي من نظراتها
لعبد الله الي جان مو داير بال الها
ولا شايفها اصلا
الووو جوري
هااا
وين رحتي
يمج وين اروح يعني
كعدت تربعت غيرت الموضوع وكلت
ااي هسه وين نروح نحتفل
ماادري خلي اشوف مشتاق واردلج خبر
يله لعد انتظر منج خبر وهم راح اخابر بابا واشوفه
شوكت يجي
تمام اروح اشوف شراح البس
روحي اني هم اروح اخابره لاستاذ توفيق
سلااامي لخاله
يوصل حب وهم سلامي للكل
باي
سدينا الخط خابرت بابا طلع مشغول عفت
جهازي وكمت للمرايه اباوع لروحي ضعفت كلش
من وره الامتحانات والدبه راحت
ضحكت وكلت
احسن الرشاقه حلوه وورايه كليه ولازم البس
ملابس حلوه تلوك بخصري
جهازي دك كمزت للجربايه اخذته فتحت
الخط وتمددت على بطني حجيت
بضحك
اهلا استاذ توفيق
هلا بفرحه بيتي
عيني ابو فرحه اليوم اريد احتفل
ادللي بابا اجي ووين ماتردين اخذج
شوكت تجي انت
ساعه تسعه راح اعوف كلشي لباجر
لخاطر عيونج
لعد اذا هيج راح نطلع وي بيت خاله يسرى
لان خم يريدون يحتفلون باسيا وعزمونا وياهم
وي بيت خالو خالد
اي هاهيه نروح وياهم
بابا اكيد ماتتاخر
وعيونج راح اعوف كلشي اليوم حتى احتفل
بدكتورتي الصغيره
ابتسمت وضحكت
هههه وشنو هديه دكتورتك الصغيره
اطلبي وتجيج
اممم ماادري على ذوقك جيبلي بس هااا
اريد شي غالي مو اي شي
ادللي بعد بابا الي بالج راح يجيج
انتظرك مو تتاخر
لا بس باعي روحو قبلي وخلي محمود يدزلي
الموقع واني اجيكم
كعدت ضايجه وجاوبت
استاذ توفيق خاف تخلف الوعد
ابد وعيونج الحلوه اجيج ونحتفل بيج انتي
واسيا
وعد بابا
وعد جوري
ابتسمت وبست جهازي وكلت
مح مح حب گلبي
هههه وصلت فرحه بيتي يله اروح بابا
ورايه شغل
فاااايتنك توفيق روح و انصر المظلومين
ضحك وجاوبني
اروح جوري
باي بابا
سد الخط كمت بسرعه ورحت لصاله ماما كاعده
تحجي وي خاله تهاني كلت
ماما بابا يكول رحو قبلي وي بيت خاله
يسرى هو يجي ورانا
ها يعني خابرتي
ههه اي تصرفت من يمي
هاهيه زين سويتي تعالي احجي وي خالتج
فرحانه بيج كلش
اخذت جهازها كعدت يمها كلت
الو خالتو
هلا جوري مبروك حبيبتي فرحت الج ولاسيا
كلش
تسلمين خالتو الحلوه
سمعت صوت ذو الفقار كال بضحك
وج شنو بعقلج انتي وذيج كمبيوتر
هههه اي مال بيل غيتس
هههه
ضحك بصوت وكمل
شتريدين هديه ولج
بكيفك شتريد جيب جيب
ماما عضت شفتها كلت
ست نور ماعليج بيه اني وابن خالي لاتخلين
روحج بنصنا
شوفيها لام لسان
ردت عليه ذو الفقار كال
خاله مثل ماكالت جوري ماعليج بينا كومي شوفي
الغده اكيد هسه احترك وعطب
وولك ظل غده الدنيا مغرب
ماما ردت بضحك رد
ياا صدك الدنيا ليل واني عبالي وكت ظهر
والله طلعت واحد مطفي
هههه هو انت من يومك مطفي مو جديده
عليك
ههه اعلمج ولج بس اجي الا اجرج من عطوبج
الشبر ونص
مخبله اجت براسها وكصت شعرها وهو شلون
حلو وسرح
ماما ردت علي مديت بوزي وكلت
بكيفي شعري لو شعركم
كرعه مو اجيج لاتحجين هيج وي عمتي
ماعليك بينا اني ماما وروح حضرلي هديتي
هههه عابت رايح بس اسالج
ها كول
احم ذيج شتحب
ابتسمت بخبث وسالت
منو هي
انجبي جوري تعرفين على منو اسال
باوعت لماما صافنه عليه سمعت خاله تهاني
تحجي وادكول
كمل وخلي الجهاز على الثلاجه
تمام
كمت من يم ماما تتبعتني بنظراتها رحت
للغرفه كلت
بكيفك فقار شتريد جيب جيب
سمعت ذب حسره كال
راح اجيبلها كلاده ذهب شدكولين
اي عادي جيبلها
سمعت صوت عبد الله كال
اروح ونلتقي بليل
اوكي
سديت الخط ماما طبت سالت
شبي كرار
سكتت كعدت يمي وكملت
يريدها وهي ولا يمها موو
اي ماما
ذبت حسره وهزت راسها ردت
راح ينكسر گلبه بس يتقدم عليها ويخطبها
فكيت عيوني سالت
شنو يريد يتقدم الها
ااي خالتج تهاني كالت اليه من تنجح يتقدمون
عليها
سكتت وصفنت خلت ايدها على رجلي
سالت
شبيج جوري
درت وجهي عليها ترددت بعدين حجيت
ماما اني احس اسيا تحب عبد الله
شنوو
صاحت متفاجاه وصفنت عليه كملت بتردد
احس ماما يعني مااعرف شلون اكولها الج
تعرفين شي احجي
تنهدت وكملت
هي ماتحب فقار ادكول علي خفيف وماعنده
شخصيه ومن تجيب سيره عبود تحجي
باعجاب وبنفس الوقت بحزن
ماما سكتت دارت وجهها مني كملت
احساس ماما مااعرف بعد
اذا طلع هالكلام صدك معناها اكيد راح ترفضه
لذو الفقار
مارديت هي كملت
تخسره والله اذا رفضته لان ولد ماصار خلقه
واخلاق ويحبها وميت عليها
مارديت كامت من يمي وكملت
لاتحجين وياها بهل الموضوع السمعتي مني
وخلي بيني وبينج
هزيت راسي باي كملت
حضري روحج لان خالتج كالت با8 لازم احنا
يمهم
تمام ماما
« كينان
كاعد وصافن من الشباج الفوك وعالي
ضوه الكمر يطب للغرفه المحجوز بيها ورثت جكاره
اخذت نفس وذبيته افكر بالصار بيه
بهل كم شهر والكلام الدار بيني
وبين واحد ترك اثر بنفسي كلش
ايد لزمت جتفي
صوت حجه
كورم الخانم تريد تحجي وياك
اخذت جهاز من مرافق وياي بالسجن
حجيت
هلا دايه
اجاني صوت قوي ويحجي بثقه
هلا كينان شلونك ابني
زين دايه لايظل بالج عليه وتخافين
مو خايفه كورم لان اعرف انت جبل مايهدك
شي
ابتسمت واخذت نفس طويل من جكارتي
رديت
شلون اهل القريه عمي شلونه هو ونسرين
بخير كلهم وينتضرون جيتك
باجر بأذن الله جايكم بس اكمل كم شغله
نتتضرك ابني
سمعت صوت نسرين حجت
كينان باجر تطلع موو
ابتسمت ورديت
اي وردتي
مشتاگه الك
واني هم
المرافق اشر اليه كلت
اروح نسرين
ردت بسرعه
تجي الصبح موو
لاتسألين
رديت مختصر سكتت كملت
اروح ديربالج على دايه
تمام
ردت بخنگه ذبيت حسره كملت
لاتبجين نسرين هانت وجايج باجر
اي
مع السلامه
الله وياك
سديت الخط شمرت الجهاز لازاد تمددت وغمضت عيوني سمعت خطوات الحراس جايين مثل كل يوم يفتشون عن اي شي
ممنوع يدخل للسجناء
هناك بعقلي رجعت ذاك المشهد الي يتكرر كل ليله
ويخليني اعيش نفس الاحساس
الي شفته وحسيته
بذاك اليوم
اركض ايدي بايد ابويه الدنيا تمطر صوت الرعد
مثل صوت القصف يجر بيه ويصيح
اركض كينان راح يقتلونا
اسمع صوته وصوت صياح ورانا يحجون
بالعربي
ااكفو سلمو روحكم
وكعت من عثرت بصخره ورجلي التوت ايدي
فلتت من ايد ابويه رجع عليه كومني
من مكاني صحت من الالم
عيونه عليه وعلى صوت صياح الجنود كلت
باوك رووح
شالني على جتفه مشى كم خطوه سمعت
رمي وصاح وكعنا سوه رحت مسافه عنه لان وكعت من منحدر مسافه بعيده عنه
جريت روحي صحت
باااوك
بنفس اللحظه برقت الدنيا ابويه جان
بالكاع بالكاع والجنود حوالي وموجهين علي
السلاح
دورت سلاحي ماكو وكع مني صحت
بااااوك
سمعوني اليمه بعيوني شفته لزم رجلهم مايريدهم
ينزلون ليمي واحد دفره برجلي صحت
بخبال وكمت اغلط عليهم
ابويه صاح
ااانهزم كينان
عوفو عنده ولد
صوت حجه گلبي فك كلت راح يعوفو لابويه
واحد دفع الحجه وكال
اارجع توفيق ماعليك اانت
رد
سيدي عوفوهم خطيه مامسوين شي
ناس تريد تعيش
وولك انت تريد تعصي اوامر الدوله
صار هوسه يمهم سحبت روحي لفوك اريد اروح
لابويه سمعت صياح
اانت ارمي توفيق نفذ ووولك لاتعرف عقابك
شنووو
سيدي الله يخليك عوووفه لخاطر ابنه
ووخر جبااان ااخذو لهذااا
شفتهم جرو من يم ابويه الي كام باوع عليه
بنفس اللحظه طلقه ثارت خلتني افك عيوني واصيح بجنون
لااااا
رمي صار عليه وكعت من فوك المنحدر وراسي
انضرب بصخره وفقدت الوعي
فتحت مخنوك والنفس ضيك بصدري مديت
ايدي للجكاير ورثت وحده ازاد كعد
باوع عليه سال
خير كورم
نام ازاد
صفن عليه هز راسه ورجع نام
اني كينان خليل اسد الله كورم الجبل الاسود
وزعيمه عمري 33 سنه
الوحيد لاهلي ماعندي لا اخ ولا اخت
جنت متعلق بابويه كلش من كبرت كمت اروح
ويا واتعلم شغله بيوم من جان عمري 16
سنه برجعتنا من التهريب تعرضنا لكمين
من الجيش وهناك بين الصخور
شفت ابويه شلون انقتل
كدام عيوني حقد صار بگلبي على العرب
لان هم سبب موت ابويه وكرهتهم كره موت
لان سبب موت ابويه على ايدهم ذاك
اليوم انحفر براسي وماكدرت
انسى ابد
اخذت نفس طويل ذبيته واتذكر شلون لكوني
ورجعوني لقريتنا
ابويه ميت واني بين الحياه والموت جسمي مكسر كله ومصاب باكثر من جزء بجسمي فتحت
وره ايام دمعتي ناشفه بعيوني واردد اريد اخذ
ثار ابويه بس من منووو مااعرف
الكتله ولا شفت وجههم بس عرفت اكو
واحد دافع عنا اسمه توفيق
كبرت وصار اليه صيت بالتهريب وكمت اشتغل
بتهريب السلاح والبشر كل هالسنين
ادور عن الي اسمه توفيق هو الي
راح يوصلني للكتل ابويه
بس جانت صعبه لان مااعرف بس اسمه الاول
ذبيت هوايه فلوس حتى بس الزم خيط يوديني اله
وماكوو ولا عرفته هو منو ولا اندليت
مكانه
تزوجت بنت عمي سلمان بعد قصه حب جمعتنا
من الصغر وماصار عدنا طفل عرفت هي مابيها
شي لان راجعت اكثر من مره رحت مره وحده بعد
الحاح منها هناك انصدمت صدمه العمر
طلعت من يم الدكتوره وكالت
اليه السبب من وره اصابتي القديمه
من وكعت من فوك المنحدر كرهت الدنيا وزاد
كرهي للكتلو ابويه لان هم السبب بحرماني منه
ومن ان اصير اب دايه حجت وياي
وكالت روح طبيب ثاني وشوف
شيكول ماقبلت ورفضت
امر بنفس التجربه
لان جنت متاكد اني عقيم من وره اصابتي
وهم جان عندي ثقه بكلام نسرين
الي كتلها اطلكج وروحي
شوفي حياتج وي واحد ثاني ماقبلت ورفضت
هالشي وتوسلت بيه مااعوفها وهي قابله تنحرم
من الاطفال بس تظل وياي طول العمر
موقفها خلاها تكبر بعيوني كلش
وحبيتها بعد اكثر لان ثبتت
هي انسانه اصيله وسند اليه
جوري
سمعت صوت سياره بابا قبل لانطلع كلت
لماما
«بابا اجه
طرت بسرعه مشيت بالكراج ركفت يم الباب من سمعت. صوته عالي
«اامشو منا ولاتخلوني اخابر الشرطه
«هههه ااسمعه شيكول بابا احنا الدوله والامر
كله بأيدنا وانت تعرف هذا كلش
زين فاااحسنلك سلم
العندك لا تشوف شي مايعجبك
گلبي هبط وكلت منو هذا الي يهدده
طلعت بسرعه جانو اثنين شكولهم تخوف عبالك مجرمين عيونهم صارت عليه بابا صاح
بيه
«جوري طبي جوه
«بابا منو ذوله وليش هيج يحجون وياك
واحد تقدم عليه وقرب بابا اجه وكف يمي
عيوني علي ابتسم وشكله كله
شر سأل وهو يباوع
عليه من فوك لجوه
«بنتك حلوه استاذ وصغيره كلش
خزرته بعصبيه وملامحي تنطق بالكره
بابا تقدم علي وجاوبه بعصبيه
«ولي منا ولاتخلوني احرك ورقكم
باوع لبابا بخزره وبعدين عليه اشر للويا
ومشوا من يمنا بابا اندار عليه
وكال بهدؤ عكس
وجهه الصار دم
«طبي جوه بابا
طبيت وهو وياي سالت
« بابا
السمعتي والشفتي مااريد اي احد يعرف بي
وكفت وباوعت علي رديت
هددوك
ماعليج بيهم بشغلي اشوف هيج ناس يوميا
رد عليه وابتسم اخذني لحظنه وكال
مبروك فرحتي
ابتسمت بوجهه باسني من راسي وكمل
يله تاخرنا كلش على بيت خالج وخالاتج
ااي
محمود راح
قبلنا واني وي ماما وبابا وصلنا طبينا جانو حاجزين مكان خاص مال عوائل الكل فرحان
بينا من كعدت انتبهت ذو الفقار ماشال عيونه من اسيا وهي ولا يمها كل ساع تباوع بخجل
لعبد الله الي جان ملتهي
بجهازه بابا كال
ماتردين هديتج جوري خانم
ااي اريدها
جاوبته وكمت ليمه
انطاني علاكه ابتسمت وكلت
الي بالي مووو
اي ست جوري
رحت كعدت بسرعه فتحت العلاكه طلعت ايفون
اخر اصدار وويا ايباد يخبل كمت اكمز
من فرحتي
وج ااعقلي مخبله مو كاعدين بمطعم
دوده محموود شوف بابا شجابلي
بله هاااي شتحجي وياها زعطوطه ومااعرف
شوكت تكبرين
جاوبني مبتسم ماما سالت بابا من شافته
سند ظهره ليوره
تعبان
اي والله بس راح من شفت هاللمه الحلوه
سمعت صوت عبد الله كال
اترخص اني لان والله هسه لازم اروح الزم
مكان ولد صاحبي صارله ظرف
عيوني راحت لاسيا تغير وجهها ونزلت
راسها
روح يابه
خالي جاوبه مشى من يمنا واصف مااجه هم لان
جان دوامه بليل ذو الفقار كال
عم توفيق شخبار القاضي امجد
والله نفس وضعه
ادري شجاه خطيه والله بعده شباب منين اجته
الجلطه
ماما سالت
بابا عكد حواجبه وجاوب
ضغوط ام واصف
بابا بطبعه يحجي مختصر مايوضح شي بشغله
او اليصير بالمحكمه او بمكتبه وماما تعرف
طبعه مااتدخل بشي
تعشينا واحتفلنا بنجاحنا اني واسيا ماما هدت
الها سوار ذهب وخالو جان جايب اليه
محبس ذهب من رجعنا تفاجات
وره يومين بهديه من واصف سوار ذهب
ذهب قدمه اليه وره العشه
كدام ماما وبابا ومحمود
هاي وصيت الصايغ يسويها الج شوفي
بهاي القطعه شمكتوب قره
(وانا ياشقيقة الروح اسندك برمش عيني ان استطعت)
عيوني غورگت سالت اشر لروحي
هااي اليه
اي الج عيوني الج وافديج بروحي اذا
طخ خدج الهوه
لزم خدي بحنيه رحت اله حضنته وكمت ابجي
يااا هاي ليش هالدموع
ماما حجت محمود رد بضحك
بومه ماتصيرلها جاره جايبلها ذهب وكاعده تبجي
مااعليك اانت
صحت بي بشهكه رد
سمعتها يابه شفتها شلون صاحت بيه
اكبر ولك واعقل
رد علي مبتسم رحت كعدت يمه اباوع
للسوار مبتسمه ودمعتي بعيوني
محمود كام وكال
احم
باوعت اله كال
ولو انتي ماتستاهلين هالهديه بس يله تظلين
اختي ولازم اهديج شي
لميت شفتي من شفته طلع علبه اخذتها منه
فتحتها جانت كلاده ناعمه تخبل بيها مداليه نجمه
كال بضحك
انتي نجمه بيتنا وامي كمرها
هههه شلون كلام حلو
ماما ردت كمت حظنته وبسته من خده حظني
بقوه وعصرني
اااخ بابا الحكني جااي ينتقم مني
ههه ولك عوفها
ماما صاحت بي عافني يضحك واني هم كلت
ست نور وين هديتج
بااجر اخذج واشتريلج الي تريدي
اريد اشتري هوايه ملابس ورايه كليه لازم
اطلع اخبل وكشخه مووو بابا
اي جوري وهم سوي فحص لعيونج
اي والله احس كمت ماشوف زين
مو كتلج بومه
محمود رد وعو يضحك عوجت راسي وقلدت
البومه الكل ضحك
«كورم كينان
الفجر طلع عيوني راح للاشعه من دخلت علينا
اجه بالي بيتنا بالجبل والخضار والاشجار
وامي ونسرين
ابتسمت وكلت
ماظل شي اليوم اطلع وارجع لاهلي
جنت محبوس من وره واحد خاين دله علينا
وانلزمت اني وازاد بس لان عندي ناس
واصله واشتغل وياهم ماكدرو
يلزمون علينا شي بس لان
قاومت الشرطه واذيت كم واحد انحبست
كم شهر
الصبح ساعه عشره طلعت اني وازاد
من شفت دلشاد وشيركو وجماعتنا
اجوي عليه اخذوني بالحظن
الحمد على السلامه كورم
الله يسلمكم شباب
ابو الياس يريدك بغداد
عكدت حواجبي ورديت
شوكت
اليوم لازم نطلع اله
هزيت راسي باي
درت وجهي للسجن باوعت للشبابيج
كلام الرجال يدور براسي عكدت حواجبي
رفضت صوت العقل والمنطق
كلت
امشووو
صعدنا سيارتنا وطلعنا لبغداد طول الطريق
عاكد حاجبي وافكر بالي غدرني وخلاني انسجن
اتذكر كلام ابويه من جان يكلي
الغدر يجيك من اقرب الناس الك خلي هاي
بالك ولاتامن لاحد ابدا
كلام خليته بين عيوني وماجان عندي ثقه باي
احد وياي ازاد دلشاد وشيركو كبرو
وياي وجانو ايدي اليمنى بكلشي
بس ابدا ماخليت سري
يمهم ولا خليتهم
يتجاوزون حدودهم وياي خليت حد
الهم وعرفو وي الوكت هم لازم مايتجاوزوا
كورم شراح تسوي لبرهوم اذا وكع
بايدينا
باوعت لدلشاد لحظه درت وجهي على الجامه
رديت
يوكع وتعرف شراح اسوي بي
رديت علي التزم الصمت واني هم وصلنا لبغداد
رحنا لبيت ابو الياس اخذني لحظنه
من شافني وكال
الحمد لله على السلامه كورم
الله يسلمك زعيم
ابتسم كعد واشرلي كعدت اكباله كال
اشوفك بخير والسجن مو ماثر عليك
ابتسمت ورديت
غير انت وصيت عليه جماعتك
ابتسم ورث جكاره وقدمها اليه اخذتها منه كمل
اي لان انت تستاهل
مارديت اخذت نفس وذبيته كمل
لكيتو برهوم
لااا
شنو هذا فص ملح وذاب ولدنا يدورون
وولدكم هم وهو ماكوو باي مكان
يوكع بايدينا وي يروح
اي انت راح تلكي لان انت مو اي احد
رد عليه وكمل
ماتغير شي كورم
باوعت عليه بتركيز وكلام الرجال يدور براسي
رديت
لا زعيم اني مثل مااني ماتغير بيه شي
ابتسم طك اصبع لرجال وراه جاب جنطه
خلاها كدامي فتحها ابو الياس
جانت متروسه
فلوس كال
هاي هديتي الك حق سلامتك
هزيت راسي وجاوبته
شكر زعيم
كمت وكام وياي كمل
حضر روحك هلايام راح تدخل شحنه سلاح
امريكي واريدك انت تطلع وي الولد
لان ماامن عليها الا يمك
منو الراح يجيبها
جسار
عكدت حواجبي كمل بسرعه
جان لازم اتعامل ويا تعرف انت انسجنت وماظل
عندي احد اكدر اتعامل ويا وهو يعرف
الطرق كلها ويعرف شلون
يدخل البضاعه بدون
محد يحس بي
مارديت كمل
كورم تعامل ويا بس هالمره
جسار نذل ومااكدر اثق بي
بس هالمره واذا شفت من غلط اكتله بمكانه
سكتت مارديت حجيت وره لحظه
شوكت الموعد
بعد اسبوع او عشره ايام انتظر مني اتصال
تمام
طفيت الجكاره سحبت الجنطه وكلت
اترخص اني
باقي بغداد
مااعرف
ابتسم ورد
اليعجبني بيك غموضك
مارديت ترخصت وطلعت من يمه صعدت بسيارتي
طلعنا من يمه ازاد كال
جوعان واريد اكل شي
دومك جوعان ومفجوع
شيركو جاوبه ورد
ولكم طالع من السجن واريد زقنبوت
اخذونا لمول اشتري هدايا للاهل
كلت هالكلام وسكتت
«جوري
طلعنا اني وماما العصر حتى اشتري ملابس
ماخليت مكان مارحت اله جنت تعرف
تسوق واخذت سياره محمود
وصارت الشغله
سهله علينا جان عيد ميلاد واصف وردت
اسويله جو اطلعه من جو الكابه
والعزله الي خله روحه
بيها
طبينا لمول اخذت كم شغله امشي واضحك
وي ماما شايله علاليك
انداريت وكلت
«خلي اخذ هديه لواصف وافاجئه بيها وهاا ماما
هم ناخذ كيكه بالشكولاته هو يحبها كلش
بدون ماا انتبه طخيت واحد كلت
بخجل
«ااسفه مااشفتك
رفعت راسي اله باوع عليه بطرف عيونه
انتبهت لونهن خضر وعجيب اول مره
اشوف هيج لون دار وجهه ماحجه شي عيوني
ظلت علي يمشي بسرعه واختفى
بين الناس جانو اثنين
يمشون وراه نفس خطواته السريعه
جوري
انتبهت لماما من صاحتني
يله امشي
ها اي اجيت
كملنا شغلاتنا ورجعنا للبيت طلبت عشه بيتزا
ومقبلات ورتبت الميز بابا طب شاف
الجو سال مبتسم
ها شكو هم حفله الج
هههه لا بابا شنو يوميا اسوي حفله اليه
هاي لواصف اليوم عيد ميلاده
ياا والله صدك
رد عليه ذب الجنطه على الكرسي وظل يباوع
للتراتيب سويت
كلشي اوكي بابا
ورد بنتي فنانه بكلشي
ههه شعبالك لعد استاذ توفيق تره اني
ام بيت ومرتبه
وانا اشهد
رد عليه ماما اجت كالت
ها اجيت توفيق
ههه لا بعده بره ماجاي تشوفي كدامج
ياست نور
انزول عليج ام لسان
ردت عليه جهازي دك كلت
اكيد هاي اسيا سيل
خربو ضحك مشيت للغرفه اخذت جهازي من الشحن جانت هي فتحت الخط
كلت
هلا اسيا سيل
انجبي بله ولادكولين هالاسم
ليش بله
سكتت كعدت ورجعت سالت
ماتردين ولج
مااريد تحجين مثل ذو الفقار
شبيج ويالولد تره هو يحب يشاقه حاله من
حالي اني ومحمود
مااطيقه جوري ولا احب اي كلام منه
اسيا تره مبين هو يحبج
واني مااحبه ولا اريد اسمع هيج حجي لا منج
ولا من غيرج
هاهيه اسيا بعد مااحجي بهل السالفه
سكتنا اثنينه سالت وره لحظه
اشتريتي ملابس
اي اشتريت كم قطعه وبعد هم راح اشتري
باعي
هههه باوعت
ضحكت وكملت
خلي اجي يمكم من ينفتح التقديم حتى
نقدم سوه
ااي عادي تعالي
باعي
ههه هم اباوع
خرب شبيه لزكت بهل السالفه المهم راح
تروحون للشمال
اي لعد شلون بابا وعدني نروح بس انجح
بس بارده جوري شلون راح تروحون يعني
الشتا اجه وبرد الجو وهناك تره ابرد من
عدنا
عادي اصلا اني احب البروده واموت بالثلج
لو الله خالقج فقمه هوايه احسن
الفقمه انتي شوفي روحج شلون صايره
دبه من العلف والنوم
يعني الاااا تقهريني بالوزن عاااابت
روحي زعلت منج
ابوس واراضيج
مااريد الا وزني مااريد احد يحجي بي
اوي شبيج صايره نحسه فد مره وبس تزعلين
مااعرف جوري احس نفسيتي تعبانه كلش
سكتت اعرف شنو بيها تحب من طرف
واحد كملت
اروح ماما تصيحني
روحي اني هم ورايه كم شغله
كورم كينان
وصلنا الجبل ورحنا لقريتنا جان نص ليل
والمل بيوتهم محد عرف بيه وصلت نزلت باوعت
للشباج دايه واكفه تباوع عليه ابتسمت
الها مشيت طبيت بروين
الي تخدمها وشايله
البيت حظنتني وباستني كالت
الحمد لله على سلامه كورم
الله يسلمج دايه
جنت اصيحها مثل امي لان هي ربتني وياها
اني ودلشاد ابنها
رحت عليها من فتحت ايدها لمتني بي
باستني من عيوني وكالت
الحمد لله على سلامتك
الله يسلمج دايه
كينان اااجيت
سمعت صوت نسرين انداريت اجت بسرعه
ذبت روحها بحظني باستني من
خدي امي وخرت من عدنا كعدت تباوع
للشباج وخرت مرتي من عندي
رحت كعدت يم الخانم
لزمت ايدها وبستها
سالت
شلونج دايه وشلون صحتج
دارت وجهها عليه نسرين كعدت يمي وردت
بسرعه
عمه زينه مابيها شي
انتبهت لامي باوعت عليها بنظرات اعرفها بس
ماحجت شي كالت وره لحظه
تعشه وارتاح ابني
نسرين كامت لزمت ايدي وكالت
كوم اسبح كينان وتعشه
هزيت راسي وكلت بعدين اسال امي بيني وبينها
صعدت وي نسرين لفوك طبينا للغرفه
سدت الباب واجت لحظني
كالت
مشتاقه الك كلش
ابتسمت وكلت
نفس الشي نسرين
«جوري
كعدت عطشانه وكمت رحت للمطبخ
شربت بطل مي وكلت
كله من الجبس اكلت هوايه وهم ماقصرت
بالكيك
امشي واحجي وي روحي شفت ضوه مكتب ابويه
مشتعل اني بيه طبع مو حلو وشكد ردت
اعوفه ماكدرت جنت احب اتصنط
على الحجي واعرف شكاعد
يصير فضوليه بشكل
رحت للباب
سمعته كال
«لااتسأل كمال اني بوكتها اطلع العندي واحرك
الدنيا عليهم
سكت للحظه بعدين رد بعصبيه
«لييش كاعد تلح عليه كتلك هاي امانه ومن
مسؤوليتي اني مو غيري سد الموضوع
ومع السلامه
سد الخط اسمعه يردد
«مااعندي ثقه بيك كمال
خايف لا انت هم اشتروك وبعت ضميرك
بكم فلس
سمعت صوت الكرسي انسحب شفت بابا راح
لميز انتيكه انكليزي وكف يمه يباوع لظرف جبير بايده وعلبه سوده فوكاه
ردد وره لحظه
«بس يجي القاضي سلام من سفره اسلمها اله
واخلي هو يتصرف وي ذوله العصابه
الي باكت الدوله والناس
حجه هيج ومد ايده للميز فكيت عيوني من
شفته سحب جراره مخفيه بالميز
ولا ندري بيها ولا نعرف
هي موجوده خله ظرف الورق بي والعلبه
وكف يمها وكال
بهاي الجراره الدليل الي راح
ياخذ حق الناس الي انكتلت بدم بارد
🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹
ادخلوا بسرعه حملوه وخلوه علي موبيلاتكم من هنا 👇👇👇
وكمان اروع الروايات هنا 👇
انضموا معنا على تليجرام ليصلكم اشعار بالروايات فور نزولها من هنااااااااا
🌹🌹🌹🌹🌹🌹🌹🌹🌹🌹🌹🌹🌹🌹🌹🌺🌺🌺🌺🌺🌺🌺🌺🌺🌺🌺🌺
تعليقات
إرسال تعليق