رواية عشك_الجبل_كورم_كينان البارت الثاني بقلم أوتار حزينه حصريه وجديده على مدونة النجم المتوهج
 |
جوري ظليت اباوع لبابا شلون رجع الجراره واختفت عن العيون دار وجهه بسرعه شافني
فزيت من صاح
جووري شعندج هنا
ارتبكت وخفت منه كلش لان الغضب ترس ملامحه
من شافني اجه فتح الباب وجرني لجوه
كلت بسرعه
اسفه بابا والله مو قصدي اتصنط عليك
الف مره كنالج جوزي من هالسالفه المو حلوه
سكتت من صاح بيه بعصبيه ونزلت راسي
استغفر الله ياربي
ردد اكثر من مره هدأ وره لحظه باوع عليه
بتركيز سال
شفتي شي
ماااااشفت شي بابا وااالله
لاااتجذبين جوري
بلعت لساني وسكتت اجه ليمي كال
باوعي عليه
رفعت راسي اشر للميز عيوني راحت اله
كمل
شفتي شنو ضميت موو
ماكدرت ارد من خوفي تنهد وكمل
الشفتي انسي
انساه بابا بس لاتزعل مني وتعصب
بس
رفع حواجبه وبلعت الكلمه
شنوو بس
بابا انت اكو خطر على حياتك
لاااا
رد مختصر اعرف بابا مايحب يحجي بشغله
ولا يحب احد يدخل باي شي
يخصه باوعت علي عاكد
حواجبه ويباوع للميز
كمل بجديه
اني عندي ثقه بيج واعرف انتي ماراح تحجين
لاي احد عن الشفتي او السمعتي
حتى ماما
ركز بنظره عليه كملت بسرعه
مااحجي وعد بابا هذا سر بيني وبينك
وجهه فك ابتسم لزم خدي رد
وعد جوري
وعد بابا ماراح احجي لاحد بس بابا اكيد
انت ماعليك شي يعني اني سمعت ذوله الرجال
بذاك اليوم هددوك واليوم هم سمعت
قاطعني
جوري كتلج انسي الشفتي والسمعتي واطمني
ماعليه شي ابوج سبع ومايخاف من احد
سكت وكمل وره لحظه
يله تاخر الوقت روحي نامي واياج احد يعرف
بهل المكان السري
اشر اله هزيت راسي باي كمل من لزم اذني
واياج بعد تسويها لهل السالفه املص
اذنج واخليها بايدج
ابدا بابا بعد مااسويها
نشوف ست جوري
رجعت للغرفتي صافنه وافكر بالي شفته
وسمعته سديت الباب ورايه رحت كعدت كلامه يدور براسي هو واسم ابو الياس اجوي بالي ذوله الاثنين الي هددو بابا يم بيتنا كلت
معقوله ذوله هم نفسهم تبع ابو الياس لو غيرهم
زين بابا شنو ضم بهل الجراره السريه وليش
مانعرف اكو هيج شي
بالميز
گلبي نغزني وحسيت اكو خطر على حياته احساس
صيطر عليه وخلاني اردد اسم
ابو الياس وكمال
اعرفه محامي وي بابا وصديقه بس ليش ماعنده
ثقه بي وهو زميله ليش كال هالكلام علي مااعرف
كلت اكول لماما هزيت راسي بلاااا
لان وعدت بابا مااحجي
لاحد
كينان :::
اني متعلم اكعد من الصبح اطلع بره اتمشى بالغابه القريبه من بيتنا هناك اكعد اصفي
ذهني واخطط لشغلي تمشيت
الها اسمع صوت المي يجري
وويا صوت العصافير
كعدت على صخره اباوع لاشجار الورق بده يوكع
وصار لونه برتقالي الشتا اجه من وكت هالسنه
ولازم احضر مؤنه لاهل قريتنا هاي اول شي
لازم اسوي كلت اروح بهل المهمه
ومن ارجع ابدي اجهز كلشي
الهم
بالي راح يم دايه ونظراتها لنسرين مبين صاير
شي ورايه وشي جبير كلت ارجع اسالها لان
جانت بعدها نايمه وره نص ساعه
كمت من مكاني ورجعت للبيت طبيت من المطبخ
دايه كاعده وبروين يمها تشتغل ووياها
بنيه من اهل القريه اسمها ميلاف
كلت
به ياني باش. صباح الخير
هلا كورم صباح النور
بروين ردت هي وميلاف كعدت يم دايه
اباوع الها مبتسم سالت
شنو المضوج الخانم
باوعت عليه كامت وكالت
جيبي الريوك للغرفه الشتويه بروين
تأمرين خناف خانم
كمت وياها ورحنا للغرفه منتبه الها
مو على بعضها كعدنا سالت
دايه صاير شي ورايه
هزت راسها وهي تباوع اليه بتركيز كالت
اي ابني والشي الصار ماعجبني
عكدت حواجبي وسالت
خير شصاير ومن منوو
من ولد عمك سلمان
رجعت ليوره سندت ظهري ليوره
سالت
شبيهم ذوله
دارت وجهها للجامه ردت وره لحظه
سلمان من انسجنت ظهر وجهه الحقيقي
بس
كالت هالكلام ودارت وجهها عليه كملت
بتركيز وعيونها بعيوني
بس اني جنت اعرفه من زمان هو شنو وشنو بگلبه
اعرف شنو يريد هو وولده كامران واحمد
اعرف دايه ماتحب عمي ولا تحب شوفته ومن
ردت نسرين ماقبلت رفضتها بس
اني صممت عليها وماقبلت
اخذ غيرها وهي وافقت من شافتني قفلت
عليها جان ادكول عمك ثعلب يبين
شي كدامك ووراك شي ثاني
بس اني جنت مااسمع كلامها لان جانت عندي
ثقه بي واحبه لان بي ريحه ابويه
سالت
خير دايه شصاير احجي كولي شسوو الج
محد يكدر يسوي اليه اي شي اني خناف خانم
الي يخلي راسه براسي اهد الجبل
علي
بهل اللحظه طبت نسرين وحجت بصوت
عالي
كينان دلشاد يجذب هو وولد فاضل
نسرررين
صحتها وكمت اخزر بيها كملت
صوتج لايعلى على دايه
سكتت كملت
ومره ثانيه مااريدج اطبين علينا بدون ماتاخذين
الاذن
نسرين::::
باوعت لكينان بقهر وزعلت علي لان صيح
عليه كلت
الكلام يخص ابويه واخوتي
نسرين بره
رد عليه مختصر وهو يخزر بيه طلعت مقهوره
واحرك بدمي ظليت يم الباب اريد
اسمع شتحجي العجوز ام النار
الي اعرفها تكرهني وتكره
اهلي ظليت اروح واجي بالممر وخايفه من
الراح يصير سمعت صوت باوعت بروين اجت
شايله صينيه تباوع عليه خزرتها اشرت
بايدي للغرفه وكلت بضوجه
طبي
رحت للمطبخ افتر وخايفه من رده فعل كينان
اعرفه يحب باوك كلش ويعزه بس علاقته
وي كامران جانت مو شي واحمد لان اشتغلو ويا
واخذو اكثر من مره كم شحنه الهم وهو خسرها
بس بعدين عرف من اخذو شحنه سلاح بمبلغ
جبير كلش وذبوها براس دلشاد ومن عرف هم الماخذيها تخبل وصارت مشكله جبيره كامران اخويه من سمعه يصيح عليهم
رده بغلط وكينان بس سمعه شوفه
وجهه الثاني لزمه كتله
هو واحمد كوه وخرو منهم الا باوك وكف
بوجهه وتوسل بي يعوفهم لخاطره
وره فتره كوه تراضو بس اعرف اخوتي شال
گلبهم علي وهو هم
شي وكع وخلاني افز عطت
بميلاف من شفتها
كسرت كلاص
عمى ثوووول ماتشوفين
ااسفه خانم مااعرف شلون وكع من ايدي
وولي من وجهي لااجي اطلع قهر گلبي بيج
بروين طبت سمعت الحجي كالت بهدؤ
ميلاف لمي الكزاز وروحي يم نسوان القريه
وساعديهن بالشغل
اي هسه
ردت عليها كعدت تلم بالكزاز سالت
خانم تتريكين
لااا
رديت بعدين سالت
كينان عرف بالصار
باوعت عليه بعدين ردت بروده
اسالي انتي اني مالي دخل بهاي الامور
باوعت عليها بضوجه شلون مشت من يمي
وراحت تشتغل هالمره مااحبها ولا اطيقها لا هي
ولا العجوز الي اكيد هسه كاعده تحش
براس كينان على اهلي
مشيت افرك بايدي وخايفه منه لا هم
يتعارك وي اخوتي رحت ليم الباب ماكو صوت
ولا اكدر اسمع شي
كينان::::
من طلعت نسرين امي كالت
الصار يابني بعد ماانسجنت ولد عمك بدو يهربون
الشي الي احنا مانتعامل بي ولا ابوك اشتغل
بي
فكيت عيوني وكلت
هربو مخدرات
اااي ووي سردار التعرفه انت كلش زين
لميت قبضه ايدي بقوه كملت
من سمعت من دلشاد دزيت على عمك حجيت ويا
كذب هالشي وكال ماكو هيج كلام ودلشاد
يجذب واجه بولد فاضل الجانو
وياهم وهم جذبهم وتعارك
وي دلشاد
اي وبعدين
اني ادخلت وكتله هالشي مايرضي كينان
واذا طلع وعرف ماراح يسكت لولدك وانت تعرفه
وتعرف شيكدر يسوي الهم
درت وجهي والغضب ترس صدري سالت
ومام سلمان شكال
ظل يدافع عنهم ويكول هذوله يريدون يوكعون
بينهم وبين ابن عمهم المشكله مو هاي
ابني
درت وجهي عليها كملت
المشكله هم كاعدين ياخذون اسمك ويستغلو
من يدخلون من المنافذ الي انت تعرفها
وناسها تعرفك يعني راح
تجيك سالفه انت تعرف كلش زين
شراح يجيك
من وراها
الباب اندك
تفضلي بروين
طبت علينا خلت الريوك وطلعت
كمت لحيلي رحت للشباج وكفت يمه اباوع للجبل
بدت القمه يصير بيها ثلج سمعتها
سالت
شراح تسوي كينان
درت وجهي عليها رديت بهدؤ عكس الغضب
الترس صدري
الصار لازم الكل يتحاسب علي
هزت راسها باي كملت
عمك راح يدخل ويجذب الكل
ابتسمت ورديت بثقه
دايه عمي مايكدر يجذبني بتليفون واحد اخلي
يسمع من اي درب ولده اجوي ومنين طبو
ابتسمت اليه وكالت
انت كدها كورم الجبل هسه تعال تريك
وياي لان ماشبعت من شوفتك البارحه
رحت بست ايدها وكعدت يمها اكلت واني افكر
بولد عمي شلون كدرو يسون هيج
وهم يعرفون قوانيني الي مخليها للكل كملت كمت
طلعت للحمام نسرين لحكتني وكالت
بسرعه وخوف
كينان اخوتي ماسوه شي دلشاد يجذب
مارديت غسلت وجهي وايدي رفعت راسي
تباوع عليه بالمرايه اشرت لصدرها
بايدها
لخاطري عوفهم
هالشي مايخصج نسرين
جاوبت مختصر طلعت تمشي ورايه وكفت
بطريقي كملت بتوسل
مووو لخاطري لخاطر عمك انت مو تحبه
لزمتها من زندها بقوه وجاوبت اجز على
سنوني
مخدارت نسرين وويستخدمون ااسمي حتى
يدخلوها ليييش وباي حق اخوتج
يسون هيج
سكتت كملت بغضب
الف غلط سوه واسكت واكول ولد عمي ولخاطرج
اعوفهم ولخاطر مام بس تعرفين اخر
شي شسووه تعرفين شلون بيتي
غلط عليه وسب ابويه ولوما
انتي وعمي توكفون
بوجهي جان اني
من زمان ذابحه لاخوج العار
دفعتها من كدامي وصعدت لفوك لحكتني
طبيت غرفتنا سدت الباب اجت
تتوسل وتبجي
غلطو كينان وابويه مارضى الهم والله حجه
عليهم وتحلف بيهم وكالو بعد مانسويها
ابتسمت ورديت
ها يعني عمي عرف شسوه ومن واجهته
دايه نكر وطلع دلشاد جذاب
سكتت ردت وره لحظه
هي من حجت ويا راح واجههم وعرف شمسوين
مووو عليه نسرين
صحت بيها دارت وجهها مني تشهك سكتت
باوعت عليه حجت بشهكه
كينان لخاطري عوفهم
دخيلك يارب الكون
صحت بقله صبر اجت ليمي كملت
والله بعد مايسوها وعيونك انت باوك حلف
عليهم مايشتغلون هالشغله
اشرت باصبعي بغضب وكلت
اخوتج عبرو كل الخطوط الي خليتها ولعبو
من وره ظهري لعبه قذره ووي منو
وي واحد اني اعرفه كلش
زين هو شنو
ماردت رحت اخذت جكايري وجهاز نستعمله
بالجبل لان ماكو شبكه طلعت اغلي من الغضب
نزلت لجوه سمعت صوت مام اخذت
نفس وذبيته رحت للغرفه
طبيت جان كاعد من
شافني ابتسم وكال
هلا كينان الحمد لله على السلامه
فتح ايده اليه رحت لحظنه جنت اشوف بي
باوك الله يرحمه يشبهه بكلشي وريحته
مثله وخرت كلت
شلونك مام
بخير من شفتك
لمحت دايه باوعت علي بضوجه ودارت وجهها
كعدت يمها وهو اگبالي نسرين طبت
سلمت علي كعدت يمه
تباوع عليه وعلي
والخوف تارس
ملامحها سألت
وين كامران واحمد
تذب الابره ماتنسمع نسرين باوعت لابوها
الي رد
عدهم شغل وماكدرو يجون وياي
ياشغل هذا مام قصدك المخدرات وسردار
باوع لدايه رد
دلشاد جذذ
نسرين لزمت رجلي وكالت
باوك يعرف كلشي وكتله انت ماقبلت الهم
ماكدر يباوع عليه رد وره لحظه
ضحكو عليهم بالفلوس انت تعرف كلش
زين وتعرف هو شلون ثعلب ويوكع
الواحد بالغلط
اي اعرفه ثعلب وغدار وماله امان وهم يعرفو
كلش زين ومااعرف شلون تجرؤ يسون
السوه ولاا زادوها من استخدمو
اسمي يم الي تعرفهم
مام سكت دايه حجت
الكل تعرف كينان مايشتغل هالشغله لان انت
واني والكل يعرف عقوبتها شنو لو
فرضا وكعو بايد الحرس
شراح يصير الهم ولابني
ابنج جان بالسجن وماعلي شي اذا وكعو
ولدي هم ال راح يتاذون مو غيرهم
هاا كلت ابني
دايه ردت باوعت الها عيونها صارت بعيوني
قريت كلام بيهن كملت
ابني ابنك وولدك ولدي اليصير عليهم يصير
على الكل لان احنا كلنا بسفينه
وحده بس تغرك نغرك
كلنا
مام سكت درت وجهي علي نسرين تباوع علي
وملامحها كلها خوف كلت
الفلوس الي اخذوها من هالشحنه وينها
ها يمي
رجعت ليوره سندت ظهري رديت بروده
مام تجي ليمي هالفلوس
كلهن كينان
اي
شتريد تسوي بيهن
جيبهن وانت تعرف وهااا خلي كامران واحمد
يجون وياك
اليوم تريدهن
ااي اليوم وبالغده من يجون اهل القريه
يمنا
كينان شترر
نسرين سالت عكدت حواجبي بلعت السالفه
وسكتت مام كام وكال
هاهيه ابني اجيبهن الك ووياهم الولد بس
كمت وكلت
ماراح يصير الخايف منه
رديت بروده وسكتت
جوري :::;
اني بالمطبخ اساعد ماما بالعشه جهازها دك
راحت اخذته من الكاونتر كالت
هاي خالتج تهاني
فتحت الخط كعدت تحجي وياها
ياا صدك تحجين عرفت والله
درت وجهي عليها من سمعت الكلام كملت
وهي تباوع عليه
عرفت والله راح ترفضه
گلبي وجعني على فقار لان جنت اعرفه
راح يتقدم لاسيا
وهو شلونه
رحت بسرعه يمها اشرت على المايك فتحته
سمعت خاله ردت
سوده عليه لا اكل ولا شرب يفتر يمي ويكول
ليش رفضتني شبيه اني والله احبها
واريدها وراح اخليها تكمل
واوكف وياها الما
تتخرج
غبيه غير شبي الولد خلقه واخلاق
اوف نور مقهوره كلش علي وج صار دم مخنوك
وحتى البيت طلع منه
وين راح تهاني خابرتو شفتو وين
مايجاوب خالد كال عوفو خلي يهدا وهو يرجع
ذبيت حسره وكمت رحت للغرفه اخذت جهازي
خابرته مارد كعدت اتصلت علي مره
اللخ رد بصوت مخنوك
شتريدين جوري
وين انت
بالكبور السود عوفني وخلوني بحالي
فقار لاتقهر روحك تره الحب مو غصب
مارد كملت
تسمعني
جنتي تعرفين هي ماتريدني موو
ماكدرت ارد كمل
كلها جانت تعرف الا اني الغبي جنت عايش
بحلم حلو كعدتني منه وصار كابوس
من رفضتني
مااعرف شااحجي
سمعته ذب حسره طويله وكال بغصه
جوري مقهور كلش ووج احبها لااا اعشكها
من الصغر حبيتها وكلت هي
اليه وجان عندي ثقه
هي راح تقبل بيه
فقار عوفها هسه يجوز تسرعت بالرفض
يعني انطيها فرصه ثانيه
مارد اسمع صوت نفسه ثكيل رد
اخذتلها كلاده هديه حفرت تاريخ اول يوم
من عرفت بروحي احبها كلت اخلي ذكرى حلوه
تذكرني وتذكرها بحبي الها بس
سكت وكال
اااخ جوري جان المفروض اعرف من رفضتها
وماقبلت تاخذها بس اااني غبي
ااثول ماعرفت الا من سمعت بيها هي
ماتريدني
صاح بعصبيه عيوني غوركت وانقهرت علي
كلش كمل
روحي جوري وعوفوني بحالي
سد الخط باوعت لاسمه وبداخلي مقهوره علي
فقار اشكر والعيون ملونه لحيته شكره
هي وشواربه طالع لعمه
امل بالشكل طوله زين ومعضل لان
يلعب حديد وي محمود يضحك ويحب
يشاقه طبعه مثل اخويه عكس عبد الله حقنه واوفر كلش كلامه قليل وتحسه متكبر
فقار جان عنده محل مال موبايلات وطلع
تعينه بوزاره الاسكان لان تخرج مهندس عبد الله
مثله وتعين من زمان بنفس المكان
جوري وينج
ااجيت ماما
رحت الها جانت مبين عليها مقهوره كلش
وكفت اكمل الزلاطه سالت
خابرتي اسيا
لا ماما خابرت فقار
جاوبج
اي ومقهور كلش ماما مخنوك من وراها
وحسيته بصعوبه يحجي
ماما كعدت ذبت حسره وردت
شنسوي الها ماتريده ياماما قابل يغصبوها علي
هزيت راسي باي كملت
بس والله حرامات تخلي يروح للغير شبي
ولد ماصار عنده محل موبايلات يجي خير من
الله وتعين وي عبد الله
اوف ماما المشكله هي تحب عبود وهو
ولا يمه ولا اصلا شايفها
اي وراح تنصدم بس تعرف بعد كم يوم
هو راح يخطب ويا وحده بالدوام ويطلع من بيت
خالج
شنووو
صحت بذهول
اي مثل ماسمعتي هسه خالتج كالت اليه
لان حاجي وي خالج قبل كم يوم
عفت كلشي وكعدت يمها سالت بذهول
ماما انتي صدك تحجين
اي وخالج مقهور كلش لان كله ابقى يمنا
لاتطلع والافندي رافض يكله ماتقبل البنيه الي
اريدها وشارطه علي الا بيت وحد
سكتت امي كملت بقهر
سوده عليه خالد خالتج ادكول انقهر كلش لان
ماقبل يظل يمهم وهم فقار قهره من
رفضته اسيل
عبود فاجنا
اي جان ضامها للسالفه ومحد يدري بي الكل تفاجأ
من سمعو بي صارله سنتين وياها
اممم ياما تحت الدواهي سواهي طلع مو شويه
هالعبود
مو هيج المثل ماما ياما تحت السواهي دواهي
ههه قلبته للمثل موو
ابتسمت وردت
اي انتي الامثال كلها عندج بالمقلوب
سمعت باب الكراج انفتح فزيت وصحت
ااجه بابا
اليوم من وكت شعجب
وكفت وانداريت عليها كلت
ست نور احجي ويا خلي نروح للشمال قبل لايهجم
الشتا
ادللي هسه اكله على العشه
باب المطبخ انفتح طب بابا شايل جنطته
ابتسم من شافني وكال
ها ملاكي اليوم مااجيتني مثل كل يوم
اخذت جنطته وبسته من خده رديت من
اشرت لماما
اخرتني ست نور
ماما فكت عيونها وكالت
ااني ولج
هههه لا جذب جنت يعني بحوار وياها
بابا كعد يم ماما رحت جبت مي اله انطيته
سال مبتسم
وشنو الحوار الدار بينكم
تريد تروح للشمال
ماما ردت وكال
اي تدلل هالاسبوع نروح بس اكمل كم
شغله
بابا واصف ومحمود راح يرحون عكب باجر وي
اصدقائهم كتلهم ابقو ويانا نروح سوه
ماقبلو
اي خليهم يرحون اني اخذج انتي وماما وراهم
بس اكمل كم شغله
خلي اروح وياهم
حجيت بتوسل ماما كالت
عيب جوري شلون تروحين وي ولد ماتعرفيهم
ها هم صدك
اصبري بابا اخذج عكب باجر انتي وماما بس اكمل
شغلي
براحتك بابا
شخبار ذو الفقار
بابا سال ماما وجهها تغير وردت
ماصارت ابو واصف
رفع حواجبه ورد
ليش الولد خوش ولد وتره اختج ماراح تلكي
مثله لاسيا
اختي قابله بس اسيا ماتريده واخ توفيق النوب
هذا عبد الله طلع يحب وحده صارله سنتين
ومتفق يخطبها ويطلع من يم اهله
ياا هاي شنو
اي والله وخالد مقهور كلش يكول اني شعندي هم
بس اثنين اريدهم يشيلوني اني وامهم
وعمتهم بكبرتنا
حقه بس تره هيج صارت الدنيا كلشي اختلف
نور وصار الولد الي يشيل امه وابوه
بكبرتهم عمله قليله
بالنسبه اليه اني ماراح ازوج ابقى يمكم
ادايركم واعوضكم عن تعبكم وياي
رديت مبتسمه ماما عضت شفتها بابا باوع عليه
مبتسم وكال
هاي سنه الحياه بنتي محد يظل يم اهله
كلها تزوج وتلتهي بحياتها
نوو استاذ توفيق اني مااكدر اعوفك انت وماما
روحي معلقه بيكم
وووينكم
سمعت صيحه محمود طب شايله علاليك
كال
بومه تعالي شوفي شجبت هااا هاي انت
هنا يابه
حجه بفشله بابا كام وكال
الكل تعقل الا انت
هههه طاكه فيوزاته بابا ودي للشماعيه
محمود خزرني وكال
اعلمج من يروح ابويه
سمعت بابا
عوفها ولك
ماحجيت شي يابه
جذاااب كاعد يهدد بيه
بدينا بفلم الفاره والبزون
ميووو
محمود طلع صوت البزون بابا ضحك فر ايده
ومشى من يمنا ماما لحكته محمود انطاني
علاكه وكال
خلي الموطه بالمجمده
شجبت يانكهه
كلهن ام بطن
خليتهن بالمجمده اجه ليمي سال
اكلج صدك السمعته
شغله فقار
اي
خطيه رفضته اسيا
راح تندم وتاكل خره
الفاضك محمود
انجبي بله وخليني احجي هاي بنت خالتج مو وجهه نعمه شبي فقار اكو بي شي
يخليها ترفضه
ادكول مااحبه
حبتها حيه كولي امين
مشيت للغراض الجابهن ارتب بيهن اجه ليمي
كال
احجي وياها قنعيها بي وج خطيه حاله حال
ماتريده محمود حجيت وكلت وهي ماكو
على لسانها مااحبه ولاحد يحجي بعد وياي بهل
الموضوع
مو صوجها صوج ذاك البومه الي كاتل روحه
عليها ولا هي شنو بيها ويخلي هيج
يذبح روحه عليها
فكيت عيوني ورديت
محمود اسيا حلوه وتخبل
اي ودعبله جنها برميل عمبه
لايك الها السمن دبودبه وحلوه بعيون الكل
كام يعيب عليه كملت بضوجه
شبيها بيضه بحمار والشعر اسود وطويل وملامحها نازكه وتره هي احلى مني
القرد بعين بنت خالته غزال
اهو روح محمود
وج بومه منو الاحلى منج انتي تخبلين نازكه
واببض منها وملامحج ناعمه بس يعني
شعرج مال ولد طاح حظج شكو
گصيتي
جرني منه علي صحت
اهوو عوفه محمود
صجيجه توني اكول ناعمه ونازكه منين طلع
صوت جبار
باااابا
وجع لاتصيحين رامبو تره يلعب بيه طوبه
ابتسمت ورديت
هو اليكدرلك وها واصف هم
على طاريه اخوج المعقد وينه
فوك
خنك روحه وكمل
وج خنگني وذبحني وراح اطك مرارتي منه
خير شبي وياك
وج ساعه يكول اروح وياك وساعه يبطل
تعرف البي
جاوبته سكت اخويه ذب حسره ورد وره لحظه
دمرته الماتخاف من الله
حجه هالكلام وراح من يمي
كينان
كعدت بره وي اهل قريتنا الي اجوي عليه من سمعو بي طلعت من السجن اباوع لدائره
من النار مشتعل بيها الحطب اسمع الكبار يحجون
بسالفه الشتا وشلون لازم نحضر مؤونه
قبل لايهجم علينا الثلج من
بعيد شفت سياره كامران اجت ابتسمت ابتسامه
انتقام لان الراح اسوي بعد شويه
رساله للكل مو بس ولد عمي
عمي نزل اشر الهم نزلو وراه اجوي باتجاهي
قالبين خلقتهم كمت بثكل كامران
وكف كدامي وكال
الحمد على سلامتك كينان
مد ايده اليه ابتسمت لزمتها بقوه وكلت
الله يسلمك كامران
جنت اشوف عمي متوتر ويباوع علينا احمد سلم
عليه نفس اسلوب اخوه عمي كعد
وهم ويا ظليت واكف
كلت
الفلوس وينها مام
ها بالسياره
اااحمد جيبها
حجيت بامر
باوك
رد على عمي الي كال
روح ونفذ الي يريده ابن عمك
فات من يمي يباوع علي بطرف عيونه راح
جاب جنطه واجه عليه ذبها كدامي
وكال
هاي الفلوس
هزيت راسي عمي اجه ليمي وكال
كينان الشي بعد صار وهاي الفلوس يعني
هي تعبهم وتعب الولد الطلعو وياهم
للجبل
مديت ايدي للجنطه شلتها ورحت للنار وكفت
يمها تسعر شمرتها
بنصها
هااااي شسوويت
كامران صاح بغضب انداريت علي وصحت
بي
ااحجي مره اللخ وشوف شلون مااذبك وراها
بااوك ااحجي شي
صاح بعمي الي جان يباوع عليه بذهول
احمد صاح
هذااا تعبنا الي ذبيته بالنار شلون تسوي هيج
الولد وكف يمي اشرت الهم روحو حجيت
واني اباوع الكل
منوو زعيم الجبل
انت كورم
الكل صاح رديت
احد يكدر يطلع الجبل ويتصرف من ورايه
لااا محد يكدر ولا نكدر نسويها
الكبار حجو وهم يباعون عليهم كامران كال
بصياح
احنااا مو اي احد
جاوبته بروده
انت واخوك عندي مثل ذوله الناس
اشرت على اهل قريتي وكملت بغضب
كلامي يمشي عليكم قبلهم والي اكوله يصير
بدون نقاااش
موو على كيفك كينان
كامران رد تقدم عليه جاوبته بروده
كورم كينان زعيمك وزعيم الكل لاتنسى هذا
الشي ابدا وخلي بالك اني ساكت الك لخاطر عمي
بس
عمي لزمه من ايده وكال
الي تريده سوي وولدي مايطلعون من شورك بعد
باوك شكاعد تحجي انت
ااش ولك ولا كلمه
صاح بي باوعو عليه بخزره ابتسمت بوجههم
مشو من يمنا بخطوات سريعه كلت من فاتو من يمي
كول لسردار عندي حساب ويا وثكيل
كلش
اااصعد
كامران صاح باخوه سمعت السياره اشتغلت
انداريت باوعت عليهم طلعو من يمنا
بسرعه حجيت وعيوني
عليهم
بعد اي واحد يتصرف من يمه ويستغل اسمي
بشغله احركه بهل النار واخلي عبره للكل
انداريت لعمي وكملت
هالمره فاتت سلامات على ولدك مره اللخ
ماتمر مام
صح اني احب عمي واعزه كلش بس ولده اثبتو
هم غداره ومالهم امان وجان لازم اكسر
شوكتهم كدام الكل واسوي
السويته حتى يصيرون
عبره للكل
جوري:::
كاعدين بليل نتعلل اكرز حب واباوع دراما كوريه
بجهازي
يعني كتلو هو وابنه
سمعت صوت محمود باوعت اله بابا رد
اي شكد توسلت بي للضابط ماقبل قتله كدام
ابنه وبعدين قتلوه للولد
منو بابا
سالت رد عليه
رجال يشتغل هو وابنه قجق لزمناهم بالجبل الاسود
وهذا وين الجبل
قريب من حدود تركيا
اي شصار بيهم
كاعد يكلج ماتو كتلوهم الحرس
فكيت عيوني وگلبي وجعني سالت
حتى ابنه
اي
بابا رد بخنكه وكمل
توسلت بالضابط ردته بس يعوفه لخاطر ابنه
بس النذل كتله كدامه وبعدين كتله
اله
يااربي شنو هالقسوه
رديت ماما كالت بقهر
غير هالموضوع توفيق كلما تحجي بي تنقهر
وروحك تنمرد
اي والله ماقهرني غير الولد صغير ولحد هسه
اذكر اسمه
شنو اسمه بابا
كينان
صفنت من سمعت اسمه وكلت بهمس
اسمه حلو
واصف باجر روح وي اخوك وانتظرونا هناك
تمام يابه
رد مختصر وكام من يمنا ماما ظلت تباوع علي
بقهر كالت
الولد انكسر توفيق
عوفي هالسوالف هسه
سكتت بس جنت اشوف بملامحها القهر وبابا
هم كمت وره مشوار اثاوب وتعبانه
كلش كالت
روحي نامي
خلي الم الهوسه
عوفيها هي صينيه اني اشيلها
دلال دللوكي بالمي دعبلوكي
محمود غنى هالاغنيه وهو يضحك سويت
باصبعي وكلت
دوده تغاااار مني لان اجيت وكسرت
خشمك
سمعتي يمه
حيل بيك شكو تتحارش بيها
صيري وياي فد يوم راح تخليها حسره بگلبي
ترزليها بيوم وادكيها بالعصا
اسم الله عليها والله اموت اذا صار بيها
شي من احد مو عاد اني اذيها
اباوع علي مبتسمه مسبعه بابا يسمع وهو
مبتسم كال
منو يطخ ملاكي غير امسحه من الارض
ومااخلي اله وجود
يابه صار تهديد شدي اللهجه خلي اكوم لا تصير
صدك
واصف اجه وكال
محمود نطلع بسيارتي لان احسن من سيارتك
اي اني هم كلت هيج
واصف حباب طكلي صور للجبال احب اشوفها
موو راح تجين وتشوفيها ااابد ماعندج صبر
محمود ضربني على راسي صحت
ااخ
محموود لاتضربها
بابا صاح بي بضوجه وكمل
ابدا لاتمد ايدك عليها
شقى توفيق
ماما ردت
حتى لو شقى جوري مااريد احد يطخها
جاوب ماما وكمل
وصيتي هي خلوها بعيونكم ومااريدكم تقهروها
بيوم
گلبي انقبض من هالكلام ماكدرت احجي شي
واصف كال وهو يباوع لمحمود
لاتوصي يابه عمرك طويل ان شاء الله
وتظل خيمه فوك راسنا
محمود لزم راسي وكام يبوس بي ويكول
اسف بومه ااقصد جوري خانم بعد مااطخ
الليدي ديانا ولا امد ايدي عليج
ماحجيت شي ظليت صافنه لبابا ومااعرف ليش
اختنكت
كورم كينان:::::
ابو الياس خابرني وانطاني موعد العمليه طلعنا
بليل مثل كل مره ست سيارات لان
ماامن بجسار فتنا بدروب نعرفها
كلش زين وحافظها مثل
ماحافظ اسمي
وصلنا لنقطه اللقاء نزلنا الجو بارد ثلج واكو
ريح عاليه
كورم راح يجون منا
اي اخذو حذركم وخلي سيارتين وره ذيج
الصخور وخليهم يستعدون خاف
بصير شي
تم كورم
جاوبني وراح يرتب الشغل
وكفت يم سيارتي ورثت جكاره اباوع للسما
النجم يلمع بيها جهازي دك
جان الطرف الثاني
فتحت الخط اجاني صوت اكره
واموت منه
شلونك كورم
هلا جسار
انت بموقعك
لا بعدني ماوصلت
تمام احنا ربع ساعه ونوصل
تمام
سد الخط ماردت اكله اني وصلت اني هيج
دائما اريد اسبق الغير بخطوه
مشيت لسفح الجبل باوعت من بعيد
ظلام والريح طلع صوت من تضرب
الشجر
ازاد اجه هو وشيركو كالو
كورم الشتا اجه من وكت
اي
هذا شوكت يجي
بعد شويه
ذبيت جكارتي عدلت ياخه القمصله وكلت
شيركو روح يم الولد وخلي عيونك علينا
تم كورم
تحرك من يمي وراح ازاد كال
گلبي مو مطمن لجسار
ولا اني
كورم خبر ابو الياس هاي اخر مره تتعامل
ويا
هزيت راسي باي سمعت واحد صوفر عرفت
وصلو درت روحي ومشيت ليم سيارتنا
الولد شغلو الاضويه سحبت
سلاحي وتاكدت منه
انتبهو لاي حركه منهم وفتحو عيونكم
تمام كورم
جوري:::
بعد يوم طلعنا وي بابا للشمال جنت فرحانه
واريد بس اوصل ظليت اطك صور
وادز لاسيا
شفت الجبال والغيوم مااعرف ليش اجه بالي
الولد الي اسمه كينان بگلبي انقهرت
علي كلش لان انقتل وهو
صغير وره ساعه الدنيا
صارت ليل ماما كالت
لو طالعين من وكت توفيق هوايه احسن
ماكو شي لاتخافين نور هسه نوصل
بابا تاخر علينا لان كمل كم شغله يله اجانا الشارع
جان فارغ مابي احد وهالشي خوف
ماما الي كالت
اي الحمد لله اكو سيارتين ورانا
انداريت شفت الضوه عدلت روحي
محمود اتصل سال علينا بابا كال
كولي اله ساعه ونوصل
سمعه وكال
يله لعد ننتضركم
سديت الخط وخليت جهازي بالجنطه لان ماظل
بي شحن جهاز بابا دك داس
الشاشه وجاوب
الو
شلونك استاذ توفيق
منو وياي
سمعت ضحكه استهزاء ورد
الموت
بنفس اللحظه ضربه قويه اجت من وره
صحت وماما هم بابا اندار وكال
ااايا نذل
سمعته يضحك وبعدين سد الخط
تووفيق منو هذاا وشكاعد يصير
ماما صاحت تباوع ليوره وهم انضربت السياره
بابا زاد السرعه وكال
مااكو شي لاتخافن
شفت شي شايفته بالافلام
سيارتنا مطارده من سيارتين اشوف االشي
يخطف من كدامي وصراخ امي وهي
تصرخ بخوف ورعب
«راااح نموت توفيق
«بابا راح نوووكع بالوادي
صرخت بجنون من شفت صرنا يم الحافه وبلحظه اجت ضربه قويه بسيارتنا وطلعنا من
الشارع صراخنا مله
الوادي
السياره نزلت على منحدر غميج مشينا
على الصخور اصيح وماما
هم اريد الزم شي مااكدر جسمي انضرب
اكثر من مره وراسي هم بلحظه
انگلبت بينا شفت
بابا اندار عليه
وصاح
جوووري
مااعرف شلون انشمرت من السياره ووكعت منها
راسي انضرب بشي صلب
وفقدت الوعي
🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹
ادخلوا بسرعه حملوه وخلوه علي موبيلاتكم من هنا 👇👇👇
وكمان اروع الروايات هنا 👇
انضموا معنا على تليجرام ليصلكم اشعار بالروايات فور نزولها من هنااااااااا
🌹🌹🌹🌹🌹🌹🌹🌹🌹🌹🌹🌹🌹🌹🌹🌺🌺🌺🌺🌺🌺🌺🌺🌺🌺🌺🌺
تعليقات
إرسال تعليق