رواية إبن حفيدوا الفصل الثاني بقلم محمد منصور حصريه وجديده على مدونة النجم المتوهج
 |
عبده احنا مش هنسرق احنا هنحل مشكلة اصحابنا وانا اعرف شقة مقفوله في مدينة بدر حلال عليهم
محمد
بتاعت مين دي
عبده
سعاد اللي ماتت جوة منها محروقة ومن خمس سنين مقفوله وما حدش دخلها ولا حد بيسال فيها
محمد
وانت عرفت المعلومة دي منين
عبده
من بواب العمارة احنا بقي هنفتحها من تاني ل صحابنا وانا مجهز الخطة
ويحل السكوت علي الاوضة وكلهم بصوا ل بعض وبداو يفكروا في المصيبة اللي داخلين عليها
أبن حفيدو
★الحلقة الثانية★
كتابة واقتباس
محمد منصور **منص**
وقبل ما نبدأ نوحد الله ونصلي علي خير خلق الله سيدنا محمد.
اللهم صل وسلم علي محمد صلاة تحل بيها العقد وتفك بيها الكرب
قبل ما اقول احنا قررنا اية تعالو كدة احكي لكم حكاية سعيد وشيماء هما اتعرفو علي بعض في الكافتريا ووقتها كان سعيد قاعد علي تربيزة وشيماء قاعدة علي التربيزة اللي جنب منه وشيماء طلبت اكل كتير لانها مفجوعة وماعملتش حساب الدفع وعملت مشكلة كبيرة مع الشاب اللي واقف في الكافتريا وقالت
لية ادفع 50 ج في 10 سندوتشات انت بتستغلني علشان انا يتيمة الام
الشاب
هستغلك لية ان شاء الله انا كل اللي بطلبه منك حق اللي انتي كلتي واللي انتي عارفة سعرة قبل ما ينزل يعني انا ما ضحكتش عليكي السندوتش ب 5وانتي طلبتي 10 سندوتشات يبقي حسابك 50ج
شيماء
محتاجة اشوف الرقم دة علي اله حاسبة لاني حاسة انك بتستغلني
الشاب
برضو بستغلك وعموما لو الاله الحاسبة هي اللي ترضيكي انا هحسبهالك علي اله حاسبة
شيماء
بسرعة لو سمحت
الشاب وهو ماشي قال
انا مش عارف ازاي دي طالبه في تجارة ومش عارفة 10 ف 5 بكام
شيماء
من غير بطرمة انا سمعاك
وراح الشاب جاب الاله الحاسبة ولسة هيضرب 10 ف 5 خدت شيماء منه الاله وقالت
انا اللي هحسبها ب نفسي انا مش جاهلة وعندي اله بينج في اوضي
الشاب بزهق
اتفضلي
ومسكت الاله قصاد منها وكتبت الرقم وطلع فعلا كلام الشاب صح اتصدمت شيماء وقالت
الاله دي مش كاسيو انا عايزا اله كاسيو
الشاب اتعصب وقال
لا بقي كدة انتي بتهرجي
هنا بقي تيجي دخلة سعيد اللي وقف قصاد الشاب دة وقال زي الاسد
صوتك ميعلاش انت فاهم ولا لا
بصت له شيماء باعجاب شديد وكمل سعيد وقال
لانك صاحتني من احلالها نومه
وقع اعجاب شيماء علي الارض خبط في الباركية ورفعت حاجبها لان الكلام مش عاجبها والشاب بيقول ل سعيد
ما انت مش شايف الهم اللي انا في
سعيد وهو بيتأوب قال
اية في اية
الشاب
طلبت اكل ب 50 ج ومش عايزا تدفع
سعيد بص لها وقال
كنتي عازمة مين
شيماء باحراج
كنت جعانه الله وبعدين دة الرغيف بتاعهم بيخلص علي قطمتين
سعيد
كتير برضو
شيماء
عارفة
سعيد للشاب
طيب خلاص ما فيش مشكلة
الشاب
يعني اية هتدفع انت
سعيد
انا كنت طالب اربع سندوتشات ما تجبهمش ونزل حسابهم من حساب العشرة اللي عليها
الشاب كان هيتشل وقال
انت بتقول اية
سعيد
اللي انت سمعته مالك في اية
الشاب
هي كلية تجارة اتشمت ولا اية وبقت تقبل من 30 %
سعيد
انت بني ادم غريب هي كلت 10 سندوتشات وانا طلبت اربعه ما تجبهمش ونزل ال 4 من ال 10 وحاسبها بس علي 6 اية الغريب في كدة
الشاب
هو انت كنت دفعت حق ال 4 سندوتشات
سعيد
لا ما دفعتش
الشاب
طيب اخصم اية من لية
سعيد
اخصم حق الاربعة من العشرة
الشاب وهو هايتجنن
لا اشوفها علي الاله الحاسبة علشان اصدق اصلي حاسس انك بتستغلني اكمني يتيم الاخ
ووقتها اتجلط الشاب ووقع من طوله وسعيد قرب من شيماء وبدات علاقتهم المخيفة بموت شاب غلبان ،،،،،،،،،
وسعيد اتجوز من شيماء بعد ما خلصو كلية علي طول وعاشو في شقة عقد مؤقت ويخلص العقد يروحو شقة تانية سنين كتير علي الحال دة متمرطين وفضلو ياجلو الخلفة علي امل انهم يعرفو يسكنوا في شقة عقد مفتوح لكنهم ما عرفوش واخر ما زهقوا خلفو عيل زنان زن واول كلمة قالها اروح اروح يبقوا قاعدين في البيت اروح اروح ما قالش ببا مما لا قال اروح اروح يروح فين ما حدش يعرف واخر شقة كانو فيها طردتهم منها صاحب الشقة علشان ما بيدفعوش الايجار بقالهم 6 شهور وراح قعد عند حماه واتبهدل صاحبي ومن هنا انا قررت اساعده وافتح لهم شقة عمتي اللي ماتت محروقة وربنا يستر ،،،،،،،،
ونرجع ل اوضة عبده والعصابة كلها كانت قاعدة وما حدش بيكلم حد شخط فيهم عبده وقال
اية قاعد مع اصنام ما تردوا عليه قولتو اية معايا ولا لا
محمد رفع ايدة وقال
انا مش معاك
عبده
احسن
وبص عبده ل وسيم وقال وسيم
وانا كمان مش معاك دة انا بية ابن بية ابقي حرامي علي اخر الزمن واسيب عربيتي الفستقي لمين
عبده
غور في داهية انت والفستقي بتاعتك
وبص عبده ل حجاج اللي قال
اني معاك ولو اتمسكنا اني هشيل القضية كلها علي الاقل هلاقي حتي انام فيها بدل ما اني بنام في سكن الجامعة ل غاية دلوقتي بكارينه ابن عمي سلامه العيفش
عبده
انا ما صاحبتش غيرك
وهنا سعيد رفع ايدة وقال
وانا مش معاك
عبده
غبي
سعيد
ما انا اخاف نتبهدل بسبب اللي هنعمله دة
عبده
دة علي اساس انك دلوقتي سلطان الطرب
شيماء
لكن انا موافقة يا سعيد وقال سخطوك يا قرد هتبقي اية بعدها ما انت قرد
سعيد
شيماء مش كدة دة انا برضو جوزك
شيماء
بغض النظر عن انك جوزي انت قرد ولا مش قرد
سعيد
قرد بس مش قايل ل حد
حجاج ميل علي عبده وقال
هي عرفت ازاي انه قرد
عبده
اكيد طيارته حمراء
حجاج
هيو عنده طيارة
عبده قرف
بس يا حجاج طالما ما فهمتش الافية اسكت مش لازم تشلني
ورجع عبده بص ل سعيد اللي قال
انا موافق
عبده
طيب تمام
وبص ل فيحاء وقال
وانتي اية
فيحاء
اللي تقول عليه شيماء انا زيها
عبده
انا عايز واحد زيك في حياتي يكون نسخه مني ما بيفكرش لاغي دماغه
ابتسمت فيحاء وقال عبده
ودلوقتي هعرفكم الخطة
وهنا كلهم قربو من عبده بص عبده ل محمد و وسيم و قال
ايوة خير
وسيم
اية مش نعرف انت ناوي علي اية
عبده
وانت مالك انت معانا في العصابة
وسيم
لا بس من باب العلم بالشئ
عبده
هو الباب الوحيد اللي ينفعك دلوقتي هو الباب اللي انا هطردك منه انت والمخرج العرة دة
وبص عبده ل محمد سامي فقال
انت اتجننت عايز تطردتني انا زي ما بييرس عمل في قطز في بداية ما وراء التتار
عبده
انت مثقف كدة لما تقول جمله ملخبطة نتخض احنا ونعمل لك حساب انت تافه يلا
محمد
ما بقاش الا انت كمان يا ابن حفيدو
عبده
اطلع برة ياة بدل ما اديك بالشبشب علي دماغك واعمل لك معاملة البرص
محمد
لا بقي انا كدة اتهزقت اوي وانا ما حدش يهزقني الا استاذي محمود حميدة
عبده ادي له ظهرة وكمل وقال
الخطة هتمشي كدة
هنا وسيم قال
انا شايف انكم هتحتاجو عربية في خطتكم وبما اني انا الوحيد اللي معايا فيات فسدقي ف هحب اكون معاكم
عبده بص له وقال
اصيل يلا تعالي معانا يا ابو الفيات الفستقي
انضم لهم وسيم فقال عبده
ما جربتش تخليها فيات بندقي
وسيم
فكرت فيها لكني لقيت نفسي هدفع كتير انت عارف كيلو البندق بكام دلوقتي
عبده
انا بقول نخلينا في الخطة احسن
شيماء
واية هي الخطة
عبده بص لها وبص ل سعيد
زفه كبيرة وعروسة وعريس
الكل استغرب وقال سعيد
ومين العروسة والعريس
عبده
انتم
سعيد
تاني
عبده
زعلان
سعيد اللي كان هيعيط من الفرحة
خالص لكن ابننا هيكون فين وقتها
بص عبده ل وسيم وابتسم صرخ وسيم وقال
لا انا ما قعدش مع عيل عايز يروح
عبده
دة مش هيقعد معاك وبس دة كمان هيبات عندك اول ليلة دي
وسيم
حرام دي عيل زنان زن ،،،،،،،،
وبعدها بكام يوم وبالتحديد ليلة الخميس ومن قدام العمارة اللي فيها الشقة كانت في زفة كبيرة العريس سعيد والعروسة شيماء وكانت فيحاء لابسة نفس فستان شيماء وماشية جنبها بصت لها شيماء وقالت
انا مش قولت لك غيري الفستان دة
فيحاء
ما اقدرش البس حاجة غير اللي انتي لابساها
شيماء
يا بنتي الناس في المنطقة يقولو اية العريس بيتجوز اتنين في نفس الوقت
فيحاء
وهو انا في حلاوتك ولا في جمالك علشان اتجوز جوزك
وفي وقت الزفة والفرحة والزغاريط يظهر عبده راكب علي موتوسيكل بتاع دليفري اجره من صاحبه وكان واقف مع بواب العمارة وبيقول له
فرح دة ولا اية
البواب اللي كان مركز زيي زي بقيت اهل المنطقة اللي واقفين في الشبابيك
ايوة فرح
وبعدها بص البواب ل عبده من فوق ل تحت وقال
هي القطة كلت بيضها ولا اية ازاي تتكلم معايا وانت قريب مني اوي كدة
عبده وهو بيفتح صندوق الدليفري وطلع علبه بيتزا
هو انا يعني بتكلم مع سفير النويا الخشنة دة انت بواب
البواب
اني حارس عقار وبحكم شغلي احب اعرف انت رايح فين بالخريب دة
عبده
خريب
البواب
ايوة خريب اللي بيتحشي جبن وساعات لحوم
عبده
يخرب بيتك انت كل دة بتتكلم عن الكريب
البواب
ايوة هو الخريب دة رايح بي فين
عبده
دي بيتزا و داخل بيها ل سلاحف النينجا
ولسة عبده هيدخل العمارة مسكة البواب من ذراعه وقال
انت هتهزر معايا سلاحف النينجا عايشين في البلاعة
عبده بص ل ايد البواب وقال
نزل ايدك انت ما تعرفش انا مين
البواب اتهز ونزل ايدة وهو بيقول
هتكون مين يعني
عبده
انا العراف واحب اعرفك ان دلوقتي في خناقة جامدة اوي هتحصل بين العروسة والعريس
البواب
انت بتقول اية
يدوبك خلص البواب الجملة سمع صوت العريس بيقول
انا كلب يا بنت ستين كلب
وراح ضارب فيحاء بالقلم فقالت فيحاء
انت بتضربني انا لية
سعيد
ما انتي لابسة نفس الفستان ونفس قصة الشعر اتلغبط ما بينكم
شيماء
فيحاء اعتبري نفسك الدوبليره بتاعتي عادي يعني،،،،،،،
ونرجع ل عبده وهو بيقولهم علي الخطة ولما عرفوا بالخناقة دي قال سعيد
ولية طيب هنتخانق
عبده
علشان كل اللي في الشارع يتلهو معاكم واكسب انا وقت واشغل الماكيته واغير كالون الشقة
شيماء بصت ل سعيد
عايزاك لو هتضرب تضرب بالراحة
عبده
اوعي تضرب بالراحة انا عايز علقة تحلف بيها المنطقة كلها
وميل عبده علي ودان سعيد وقال
افتكر كل جنية صرفته علي الجبنه الرومي اللي الهانم بتاكلها حاف ولو فكرت تقرب منها بتهزقك
اتعصب سعيد اوي والدم غلي في عروقة وعبده قال
ولا ابوها اللي غاوي يقعدك علي الارض قاصد منه وهو بيتفرج علي المسلسل ويتف قشر اللب في قفاك ،،،،،،،
ونرجع للزفة وسعيد بيصرخ صرخة بتوع الكارتيه وبينزل بالكف علي قفاة شيماء جاب لها صداع وشيماء بتجري قصاد منه وهو قالع الجذمة وبيجري ورها في الشارع ،،،،،،،،
وفي نفس الوقت عبده يوصل للشقة ويقف قصاد منها و يفتح علبه البيتزا ويطلع ماكيتة خاصة بالنجارين وبص حوالين منه قبل ما يشغل الماكيته وراح بيها ناحية اول مسمار وفكه وراح ناحية تاني مسمار وفكه وقدر يفك الكالون القديم بعد ما ضرب الباب ضربه صنيعي ما عبده اشتغل ل فترة نجار وخلع الكالون القديم ولسة هيركب الجديد لقي حد بيحط ايدة علي كتفه اتصدم وبص يشوف مين دة ،،،،،،
اية عبده اتمسك ولا الحكاية فيها اية هقولكم باذن الله
🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹
ادخلوا بسرعه حملوه وخلوه علي موبيلاتكم من هنا 👇👇👇
وكمان اروع الروايات هنا 👇
انضموا معنا على تليجرام ليصلكم اشعار بالروايات فور نزولها من هنااااااااا
🌹🌹🌹🌹🌹🌹🌹🌹🌹🌹🌹🌹🌹🌹🌹🌺🌺🌺🌺🌺🌺🌺🌺🌺🌺🌺🌺
تعليقات
إرسال تعليق