جميع الروايات كامله

اعلان اعلى المواضيع

 رواية انتقام أرملة الفصل الاول بقلم الكاتبه رحاب القاضي حصريه وجديده على مدونة النجم المتوهج 

رواية انتقام أرملة الفصل الاول بقلم الكاتبه رحاب القاضي حصريه وجديده على مدونة النجم المتوهج 

سيد _

انتي السبب انتي اللي جبتيها ليا هنا وانا راجل وهي بنت حلوه وصغير وطبيعي عيني تحبها... 

ثريا ببكاء _

جيبتها وقولت اخليها بنتنا زي ملك انا وانت فتتجوزها من ورايا دي اخرة المعروف.. 

ــــــــــــــــــــــــــــــــــــــــ 

قبل ما نبدأ حكايتنا، تعالو نتعرف علي بطلتنا النهارده واللي اسمها ثريا وعمرها سبعه واربعين سنه، وعندها اخ اصغر منها بعشرين سنه ويعتبر هي اللي ربته بعد ما مامتها وباباها راحو في حادثه... 

_وفي يوم كانت ثريا واقفه في المطبخ بتاع بيتها ويوسف اخوها واقف جنبها وبيقولها.. 

يوسف _

مالها بس بسمه يا ثريا دي طيبه وبنت حلال وانا عايزها.. 

ثريا بضيق ردت عليه _

ليها اللي زيها يا حبيبي دي وحده كانت مامتها دلاله وسمعتها علي كل لسان... 

يوسف بحزن قالها _

محدش بيختار اهله يا ثريا، وبعدين انا لا يهمني ابوها ولا امها انا اللي يهمني بسمه وبس... 

ثريا بعصبيه _

وانا قولتها كلمه ومش هكررها جواز من البنت دي مش هيحصل... 

رد عليها يوسف وهو مدايق وقال _

انتي حره بس انا هتجوزها، ولو عايزه تقفي جنبي وانا بفرح تبقي كملتي فرحتي يا ثريا مش عايزه انا مش هزعل منك انتي امي مش اختي.. 

ثريا بدموع _

انت لو بتعتبرني امك مش اختك بجد تسمع كلامي وتعرف اني خايفه علي مصلحتك.. 

يوسف بضيق قالها _

انا مش صغير وعارف مصلحتي كويس، وبكره هتشوفي ان بسمه دي احسن بنت في الدنيا... 

زعقت ثريا فيه وقالت _

اتجوزها يا يوسف بس والنبي ما انا حضرالك فرح ولا دخلالك بيت... 

يوسف بحزن _

براحتك مجاتش عليكي انا كده كده يتيم من زمان... 

_مشي يوسف وقعدت هي في الصاله تبكي وطلع سيد جوزها اللي عنده 50 سنه وقعد جمبها وطبطب عليها وقال... 

سيد بهدوء _

متزعليش يا ثريا... 

ردت عليه من وسط بكاها وقالت _

مزعلش ازاي بس وهو هيتجوز البنت اللي ما تتسمي دي... 

سيد _

الله واعلم يمكن ده الخير ليه، وبعدين اخوكي راجل ومش هيتضحك عليه يعني... 

مسحت ثريا دموعها وقالت_

حسبي الله ونعم الوكيل فيكي يا فتحيه انتي وبنتك في يوم واحد... 

_دخلت بنت ثريا اللي عمرها عشرين سنه اللي كانت جايه من بره وقالت وهي متعصبه.. 

ملك _

شوفتي يا ماما اللي حصل؟.. 

ثريا بضيق _

حصل ايه مهي ناقصه اخبار تغم علي الواحد كمان... 

سيد بقلق _

قولي يا ملك في ايه؟.. 

ردت ملك عليهم وقالت _

الست فتحيه مامت بسمه راحت... 

سيد بحزن _

لا حول ولاقوة الا بالله، حصل امتي ده؟.. 

ملك _

انا سمعت الناس بتقول في الشارع وانا جايه من الدرس، بس مش دي المشكله... 

ثريا بقلق ـ

اومال ايه المشكله ياا بت اتكلمي.. 

ملك بعصبيه قالت _

خالو يوسف واقف هناك وكانه صاحب بيت وصحابي سالوني هو واقف عند بيت فتحيه الدلاله ليه، وانا معرفتش ارد اقولهم ايه؟.. 

وقفت ثريا وقالت بغيظ _

يادي الفضايح اقول عليك ايه بس يا يوسف، الناس تقول علينا ايه دلوقتي بقينا نسايب فتحيه الدلاله اللي نص رجالة المنطقه زمان كانو داخلين طالعين عندها... 

سيد بعصبيه _

استغفر الله العظيم ياارب، بلاش الكلام اللي بيشيل ذنوب ده يا ثريا.. 

_الباب خبط وراحت ملك فتحت وكان يوسف اللي كان مدايق وزعلان جدا، واول ما شافته ثريا قالتله بعصبيه... 

ثريا _

انت ليك عين تيجي، جرستنا يا يوسف بقي دي اخرة ربايتي ليك... 

يوسف بحزن رد عليها _

مش وقته كلامك ده يا ثريا، وتعالي انزلي اقفي مع بسمه في العزا دي ملهاش حد ولوحدها هناك... 

زعقت ثريا فيه وقالت _

نعممم عايزني انا الحجه ثريا انزل اخد العزا بتاع الوليه اللي متتسمي دي... 

سيد بعصبيه _

وبعدهالك بقي يا ثريا الست دلوقتي في دار الحق واذكرو محاسن موتاكم.. 

ثريا بضيق _

وهي دي عندها محاسن، انا مش هنزل هي ناقصه الحكايه فضايح، انزل انت يا يوسف وكمل جميلك مع عروسة الهنا اللي تشرف... 

اتنهد سيد بضيق وقال _

سيبك منها يا يوسف دي باينلها كبرت وخرفت تعالي انا هنزل معاك، وانتي با بت يا ملك البسي حاجه سودا وتعالي اقفي مع خطيبة خالك تحت... 

ملك بضيق ردت علي باباها وقالت _

ايه اللي بتقوله ده بس يا بابا، انت عايزني انا اروح هناك.. 

ثريا بحده _

انت اتجننت يا راجل عايز بنتك تروح تاخد العزا مع بنت فتحيه الدلاله... 

زعق يوسف فيها وقال بعصبيه _

يوووه بقي يا ثريا هو انتي لا بترحمي ولا هتخلي رحمة ربنا تنزل.. 

اتنهدت ثريا وقالت بخبث _

لا ازاي انا هنزل وهقف مع البنت.. 

يوسف _

بجد. يا ثريا هتعملي كده.. 

مردتش عليه ثريا وقالت لملك _

بت يا ملك غيري هدومك وكملي الاكل في المطبخ، وانا هنزل اقف مع عروسة الهنا في جنازة امها... 

ــــــــــــــــــــــــــــــــــــــــ 

_بعد. شويه  كانت ثريا واقفه جنب بسمه في العزا وبعد ما طلعت الجنازه وقفت ثريا في وسط الستات كلهم وقالت بعصبيه.. 

ثريا _

كده انا عملت واجبي معاكي، وكمان اخويا عمل واجبه معاكي بزياده انتي وامك يا بسمه... 

مسحت بسمه دموعها وقالت _

كتر الف خيركم يا طنط ثريا و... 

قاطعتها ثريا وقالت _

وبس لحد هنا وكفايه تبعدي عن اخويا، ليه عشان يوسف اخويا المتعلم ابن الاصول مش هياخد وحده زيك، وقدام الحريم كلها اهو بقولك خليكي احسن من امك وبلاش تلعبي علي اخويا وابعدي عننا.. 

_قالت ثريا كلامها ده ومشيت، وبعدها الحريم كلهم بصو لبسمه بقرف ومشيوو.. 

بسمه لنفسها ببكاء وحزن _

وانا ذنبي ايه طيب، بس ماشي يا ثريا والله لردهالك قريب... 

ــــــــــــــــــــــــــــــــــــــــ 

_في بيت ثريا كانت قاعده مبسوطه وجوزها سيد واخوها يوسف متعصبين منها جداً.. 

ثريا بهدوء _

انتو المفروض تشكروني علي اللي عملته ده مش تزعلو مني... 

يوسف بحده _

طيب كنتي استني بعد الناس ما تمشي... 

سيد _

حرام عليكي يا ثريا البنت امها راحت بدل ما تطبطبي عليها تعملي فيها كده قدام الناس... 

ثريا بحده _

واعمل اكتر من كده كمان لو ما بعدتش عن اخويا... 

يوسف بعصبيه رد عليها _

حتي لو هي بعدت عني انا مش هسيبها يا ثريا واعتبري من اللحظه دي ان ملكيش اخ... 

زعقت فيه ثريا وقالت _

بقي تقولي انا كده عشان خاطر البنت دي يا يوسف قدرت تقولها كمان... 

يوسف بحزن _

كنتي انتي الاول عاملتيلي خاطر ومقولتيش كده لخطيبتي قدام الناس، بس انا مش هسيبها واياكي يا ثريا تدايقي بسمه في حاجه تاني... 

ثريا بقلق _

طيب انت رايح فين دلوقتي؟.. 

يوسف بعند وعصبيه _

رايح اتجوزها يا ثريا، ايه مش هتقوليلي مبروك.. 

صوتت ثريا بصوتها كله وقالت _

ياااالهوي يا شماتة الاعادي فينا، ليه كده بس يا يوسف ليه ياا ابني يا اخويا يا حبيبي كده؟... 

_سابها يوسف ونزل وراح لبيت بسمه وخبط علي الباب، فردت هي من ورا الباب وقالت.. 

بسمه _

مين بيخبط؟.. 

يوسف _

انا يا بسمه افتحي... 

بسمه بحزن _

امشي يا يوسف من هنا كفايه اللي عملته اختك.. 

يوسف _

انا ماليش دعوه باللي عملته اختي، افتحي يا بسمه لازم نتكلم... 

بسمه ببكاء _

امي راحت يا يوسف وانا مينفعش ادخلك وانا قاعده لوحدي... 

رد عليها يوسف وقال _

طيب غيري هدومك وتعالي احنا هنتجوز دلوقتي عشان اقدر ادخل عندك واقعد معاكي في اي وقت براحتي.. 

فتحت الباب وقالتله وهي فرحانه _

انت بتتكلم بجد يا يوسف.. 

رد عليها وقال _

ايوه طبعا هو في هزار في الكلام ده... 

بسمه بحزن _

طيب واختك دي مش موافقه وكمان ممكن تعملي مشاكل و... 

يوسف _

انا مش صغير وهتجوزك وهي مش هتقدر تعملك حاجه وانتي معايا.. 

بسمه _

طيب هغير هدومي وجايه.. 

ــــــــــــــــــــــــــــــــــــــــ 

_تاني يوم في بيت ثريا، كانت عماله تعيط وتبكي وبنتها وجوزها بيحاولو يسكتوها... 

ثريا ببكاء _

تعالي يا ماما شوفي يوسف عمل ايه، تعالي يا بابا شوف الخيبه اللي ابنك فيهاااا... 

سيد بضيق _

يا وليه مش كده ارحمينا وارحمي نفسك بقي... 

ردت عليه ثريا بحده وقالت _

طبعا ما  اللي ايده في المايه مش زي اللي ايده في النار، انا اخويا يتجوز بالشكل ده ويتجوز مين بنت زي دي... 

ملك بحزن _

بس بقي يا ماما كفايه الجرسه اللي حصلت مش ناقصين ندب.. 

ثريا بحقد _

والله والله تاني ما ههنيها عليه بنت فتحيه الدلاله... 

قامت ثريا وقفت فقام جوزها كمان وسألها بقلق وقال.. 

سيد _

علي فين بس يا ثريا؟... 

ثريا بحده _

رايحه لاخويا لحسن تفتكر انها اخدته خلاص بنت فتحيه... 

سيد بضيق _

يا حجه ثريا مش كده ده لسه الساعه سبعه الصبح ودول عرسان... 

زعقت فيه ثريا وقالت _

وسع كده من طريقي، انا هروح يعني هروح... 

_دخلت ثريا وغيرت هدومها ولبست عبايه سودا وطرحه سودا ونزلت راحت شقة اخوها اللي كانت في نفس الشارع، خبطت علي الباب جامد ففتحتلها بسمه واول ما شافتها خافت وقالت... 

بسمه _

طنط ثريا... 

زقتها ثريا ودخلت وقالت _

طنط اما تنططك، اخويا حبيبي فينه.. 

بسمه بهدوء ردت عليها وقالت _

هو نايم جوه... 

ثريا بحده _

طيب روحي جهزيله فطار لحد ما اصحيه... 

بسمه بحزن _

حاضر يا طنط.. 

ثريا لنفسها وهي داخله الاوضه _

طنط طنط عملالي فيها بنت ناس يا بنت الدلاله.. 

_دخلت ثريا الاوضه لقيت احمد صاحي وقاعد علي السرير وبيبصلها بضيق، فاتوترت وقالتله.. 

ثريا _

مانا مش بيهون عليا زعلك ولا اقدر اقاطعك.. 

ضحك وقام باس علي راسها وقال _

عارف يا ثريا، بس بالله عليكي بالراحه علي بسمه.. 

ثريا بحده _

وانا عملتلها حاجه ولا هو تلقيح جتت وخلاص.. 

يوسف _

يا ثريا ده انا صحيت علي صوتك. وانتي بتزعقي فيها بره... 

دخلت بسمه وقالت بهدوء _

الفطار جاهز بره يا طنط ثريا... 

بصت ثريا ليوسف وقالت بغيظ _

طيب شايف بتستفزني ازاي؟.. 

يوسف _

هي قالت ايه غلط، دي بتقولك الفطار جاهز... 

ثريا بعصبيه _

متقوليش يا طنط انا مش طنط حد.... 

بسمه بحزن _

طيب اقول لحضرتك ايه طيب،تحبي اقولك يا ماما.... 

ثريا بحده _

لا يا حبيبتي انا مش دلاله عشان تقوليلي يا ماما... 

_اتملت عيون بسمه دموع وزعق يوسف في ثريا وقالها.. 

يوسف _

وبعدين معاكي بقي يا ثريا... 

اتنهدت ثريا وردت عليه وقالت _

تقولي يا حجه ثريا زي ما الناس بتقولي... 

مسحت بسمه دموعها وقالت بحزن _

حاضر يا حجه ثريا... 

قربت منها ثريا وقالت بضيق _

متزعليش مكنش قصدي... 

ردت عليها بسمه بحزن _

عادي ولا يهمك.، اتفضلو افطرو لحد ما اعملكم الشاي... 

_طلعت بسمه وراحت المطبخ، وبص يوسف لثريا بغيظ، فقالتله بتوتر... 

ثريا _

ما انا قولتلها متزعليش متبصليش كده بقي... 

يوسف بضيق _

يا ثريا انتي طيبه وكويسه بلاش الحركات اللي بتقلل منك دي.... 

ثريا بحده _

بقي كده يا يوسف انا برضو بتاعت حركات، علي العموم افطر مع عروستك براحتك وابقي هاتها وتعالي زورني، انا ماشيه مدام اطمنت عليك.. 

باس يوسف علي ايدها وقال بهدوء _

انتي امي يا ثريا متزعليش مني وبلاش ندخل بينا الشيطان.. 

ثريا بغيظ _

الشيطان في المطبخ بيعمل شاي.. 

يوسف بضيق _

والله عمرك ما هتتغيري تعالي هوصلك للباب.. 

ــــــــــــــــــــــــــــــــــــــــ 

_بعد. كام يوم كانت ثريا قاعده قدام التلفزيون وبتخيط في شوية هدوم، وموبيلها رن وكان يوسف اخوها.. 

ردت وقالت _

الو يا نور عيني... 

جالها صوت بسمه وهي بتبكي وبتقول _

الحقيني ياا حجه ثريا، يوسف بيروح مني.. 

وقفت ثريا وقالت وهي خايفه جدا _

انتي بتقولي ايه ماله اخويا وفينه.. 

بسمه ببكاء _

تعب فجأه واحنا في المطعم ونقلناه المستشفي... 

ثريا ببكاء وخوف _

جايه حالا جايه اهو.. 

_بعد شويه كانت ثريا قاعده قدام الباب في المستشفي وبتعيط جامد وبسمه جنبها وسيد جوز ثريا عمال يروح ويجي وقلقان.. 

ثريا بعصبيه _

وانتي تخليه ليه ياكل في المطاعم هاا، مش قادره تطبخيله في البيت.. 

خافت بسمه منها ومقدرتش ترد، فقال سيد بحده _

مش وقته ده يا ثريا وبعدين ما هي اكلت معاه من نفس الاكل... 

_طلع الدكتور وقالهم ان يوسف حالته خطر وانه عايز يشوف ثريا ضروري ودخلت عنده ثريا وقعدت جنبه وهي بتبكي... 

يوسف بصوت تعبان _

الدكتور قالكم ايه يا ثريا؟.. 

ردت عليه ثريا وقالت _

ده ميكروب في المعده بس هتخف وهتقوم بالسلامه... 

يوسف بدموع _

مش باين يا ثريا، بس وصيتك علي بسمه تخليها معاكي متسيبهاش لوحدها الناس والدنيا وحشه خليكم انتو اهلها... 

ثريا ببكاء _

قوم انت بالسلامه وانا اوعدك مش هزعلها تاني واعملك كل اللي عايزه.. 

ابتسم يوسف وقال _

انا شايف امي وابويا قدامي اهوو... 

ثريا ببكاء وخوف _

لا متروحلهمش خليك معايا يا اخويا، سيبوه متاخدوهش مني... 

_وفجأه جهاز نبض القلب وقف وراح يوسف...

الفصل الثاني من هنا

🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹

ادخلوا بسرعه حملوه وخلوه علي موبيلاتكم من هنا 👇👇👇

من غير ماتدورو ولاتحتارو جبتلكم أحدث الروايات حملوا تطبيق النجم المتوهج للروايات الكامله والحصريه مجاناً من هنا

وكمان اروع الروايات هنا 👇

روايات كامله وحصريه من هنا

انضموا معنا على تليجرام ليصلكم اشعار بالروايات فور نزولها من هنااااااااا

🌹🌹🌹🌹🌹🌹🌹🌹🌹🌹🌹🌹🌹🌹🌹🌺🌺🌺🌺🌺🌺🌺🌺🌺🌺🌺🌺

ادسنس وسط المقال

ادسنس اسفل المقال