سوبر ماما بقلم الكاتبه رحاب القاضي حصريه وجديده على مدونة النجم المتوهج
 |
طلعت ايمان من المطبخ وهي ماسكه الشبشب وزعقت في ابنها كنان اللي عمره عشر سنين وقالت..
ايمان
انت هتيجي هنا يا ولد ولا احدفك بالشبشب
كنان
وربنا ما انا جااي انتي وليه مفتريه وانا مش قدك
احمد جوزها وهو قاعد قدام التلفزيون
بالراحه يا ايمان مش كده..
ايمان بصوت عالي
انت مش شايف ابنك بيعمل ما صدقت روقت الاوضه قلبها ليا تاني
احمد اتعصب وقال
يا ايمان صوتك مش عارف اسمع الماتش كويس
حدفت ايمان عليه الشبشب وقالت
ماتش ايه هتجنني انت وعيالك منكم لله
طلع اياد اخو كنان التوأم وقال
في ايه يا ماما متعصبه كده ليه ما انا قولتك كبري دماغك
ايمان
يا برودك عاملي فيها ملاك وانت مكركب المطبخ وعامل فيها الشيف حسن
_طلع مروان اخوهم التوأم التالت وقال وهو ماسك الكتاب في ايده..
مروان
ماما صوتك العالي دليل علي ضعف موقفك، وانتي امرأه يجيب ان يكون صوتك هامس ورقيق
احمد
ايمان عايز كوباية شاي يا حبيبتي
ايمان صوتت وقالت
باااااااااس حراااااااااام علييييييكم
كنان وهو بيقعد جنب باباه
الوليه دي باينلها اتجننت، طلقها وهاتلنا واحده وتكه تدلعنا..
اتصدم احمد وقاله؟..
ــــــــــــــــــــــــــــــــــــــــــــــ
_وقبل ما نبدأ حكايتنا اعرفكم علي بطلتنا النهارده واللي اسمها ايمان وعمرها تلاتين سنه وعندها تلات اولاد توأم بس مطلعين عينها، وجوزها اللي متجوزين عن حب بس بعد ما الولاد كبرو وبقي عندهم عشر سنين حصل..
_الساعه تلاته الفجر كانت ايمان وجوزها نايمين وفجأه الباب افتفتح ودخل اياد ومروان وكنان جوه ومسكو كبريت وحطو ورق في رجلين بابهم ومامتهم وولعو الكبريت في الورق وطلعو بسرعه، وبعد ثواني سمعو صوت صويت باباهم ومامتهم، طلع احمد الاب من الاوضه لقي ولاده رايحين يجرو زعق فيهم وقال
احمد
خد يا ولد انت وهو هنا
وقفو التلاته وقال كنان
وربنا انا ما ليا دعوه دي فكرتهم
اياد
كدااب يا بابا والله هو اللي قال الفكره انا يا دوب جيبت القراطيس
مروان.
اعتذر يا ابي لقد جعلوني اجلب لهم الكبريت من المطبخ وانا ما كنتش موافق بس هددوني يكسرولي النضاره..
قعد احمد علي الارض وقال بصوت واطي
بصو انا هعمل نفسي بزعقلكم عشان ماما لو طلعت هتعلقكم في البلكونه للصبح
كنان
الله عليك يا ابو حميد يا جامد
احمد
ما تلم نفسك يا واد انت انا باباك برضو
اياد
انجز طيب وقول اللي عندك عايز اروح انام ايمان هتصحينا من النجمه
احمد بصوت عالي
امشي يا ولد منك ليه علي اوضكم يلاا، انا هعرف اربيكم كويس يا جزم
كنان
تصدق بالله كنت هصدقك
احمد بغيظ
يارب انت شايف لوحدك الخلفه اللي منيله بنيله دي..
دخل لجوه وقال
ايمان اهدي انا زعقتلهم
ايمان بعصبيه قالت
هما عيالك بيتلمو بالزعيق سيبني اقطع عليهم الشبشب هما كل يوم مقلب انا خلاص قطعت الخلف
احمد
لا والله علي اساس اني هسيبك تخلفي تاني ما كفايه العهات اللي جبتيهم..
ايمان
روح يا حبيبي عند اللي تجببلك عيال حلوه مدام انا وعيالي مش عاجبينك
احمد
امم النكد هيبتدي
ايمان
بتبرطم بتقول ايه
احمد
بقول اني هتخمد وانام وعيالك اهم هندك روحي زعقي واتخانقي معاهم احنا اصلا جينا سكنا هنا في العماره عشان نخلي الناس تتفرج علينا كل ليله يا شوية غجر تصبحي علي خير
ايمان بغيظ
اهو ده اللي انت فالح فيه وانا والله ما هسيب الكلاب اللي جوه دول غير لما يتربوو
_طلعت ايمان واول ما دخلت اوضة اولادها لقيتهم هما التلاته نايمين كل واحد علي سريره، ابتسمت ليهم ايمان وقالت
ايمان
يا حبايبي مش هعملكم حاجه دلوقتي، بس الصبح استنو عليا..
_رجعت اوضتها ونامت، وتاني يوم الصبح صحيت علي صوت كنان ابنها لما قال ليها..
كنان
ماما ماما انتي يا ست انتي..
ايمان
عايز ايه يا كنان الساعه خمسه الصبح
كنان
عايز اروح الحمام
ايمان
ما تروح وتسيبني انام، مش كبرنا علي الحركات دي
كنان
لا ما انا خايف لا ابو رجل مشويه يطلعلي
ايمان
لا يا حبيبي ما تخافش ولو طلعلك انت مش هتغلب وهتاكله، ابني وعارفاك مسعور
كنان زعق فيها
يا وليه ما تبطلي كسل بقي وتتنيلي تقومي تودي اعمل زي الناس.
احمد بحده
الصوت منك ليها هو مش هعرف ارتاح شويه في ام البيت ده
قامت ايمان ومسكت كنان من قفاه وقالت
عجبك كده اتنيل قدامي..
دخلته الحمام وقالت
اخللص قدامك خمس قايق..
كنان
لا خلاص مشيت
ايمان ببكاء
يا ابني انت مين مسلطك عليا
كنان وهو رايح اوضته
هشش ايه الصدااع بطلي رغيييي، انا داخل انام ما اسمعش صوتك
قلعت ايمان الشبشب وقالت
انتي ازاي تكلمني كده يا شبر ونص انت
جري كنان علي اوضته وهو بيقول
الحقوووني الجموسه اتفكت..
_دخلت ايمان اوضتها ورزعت الباب وراها، احمد قام مخضوض وقال
احمد
في ايه يا وليه انتي اتجننتي مش متنيل نايم قدامك
ايمان
انت تشوفلك حل في كنان ابنك ده انا خلاص قرفت منه
ضحك احمد وقال
ههههه معلش بيدلعو عليكي
ايمان
بيدلعو عليا قصدك بيطلعو عيني بيقرفو فيا، انت عمرك شوفت ام يتقال ليها خدي يا وليه والبيه ايااد يقولي يا مزه والمثقف اللي فيهم الاستاذ مروان يقولي يا ولدتي..
احمد
ههههه طيب والله دمهم زي العسل وبيحبوكي جدا، مناكفتهم معاكي دي محبه.
جالهم صوت اياد بيقول وهو بيصرخ
الحقووووو يااا باباااااا الغاااز مفتووح وهنتفحم كلناا.
_طلعت ايمان ومعاها احمد بسرعه وهما خايفين واتصدمو لما لقيو اياد بيضحك وقال
اياد
صباح الفل يلاا يا ماما يا بطل جهزي الفطار وانت يا شبح اطلع بالمصروف..
احمد بغيظ
انا داخل اخد شاور وانتي اتصرفي مع سوااق التوكتوك اللي مخلفااه ده..
ايمان مسكته من قفااه وقلعت الشبشب
وحياة امك لتتربي حرام عليكم انتو عايزين تجلطوني يا خلفة الهم انتو
طلع كنان وقال
ايه ده تيته انتي جيتي امتي
سابت ايمان اياد بسرعه وبصت للباب وقالت
حمااتي انتي جيتي امتي اهلا وسهلا و..
ايمان بعصبيه
بتضحكو عليا منكم لله انت شايف لوحدك يارب، جاتهم الهم في يومكم المنيل بنيله ده..
طلع مروان وقال ليها وهو بيعدل نضارته النظر
والدتي سب الدهر حرام
ايمان بعصبيه
ده انا هسب لسلسفيل ابوك دلوقتي لو ما غورتش من وشي..
مروان راح لاوضته وقال
انا غلطان اني عايز اخليكم ناس راقيه تتكلم لغه عربيه فصحي يا بتوع عصام صاصا انتو
ايمان
اكتم يااد وما تبرطمش بدل ما اجيلك
_دخلت المطبخ وجهزت الفطار وراحت طلعت هدوم لاحمد عشان يروح شغله، وبعدين طلعت لقيت ولادها التلاته قاعدين علي السفره
ايمان
يالهوي علي الادب، عاملين ايه قولو انا مش هتصدم بس بلاش الهدوء ده
مروان
الامر وما به ان اا..
اياد
اكتم يااه انت لسه هتبدأ النشره، الحكايه يا ست الكل ان الواد كنان كسر الحنافيه جوه
مسكت ايمان قلبها وقالت
قولو انكم بتهزرو والنبي..
كنان
ما حصلش حاجه يا ماما هما شوية مايه طرطشو في المطبخ الحقو انتو بس كلمو السباك قبل ما نغرق كلنا..
ايمان بعصبيه
اعمل فيكم اييييه قولولي اعمل ايييييييه، ده انا قطعت عليكم سبع شباشب وانتو مش بتتربو..
اياد
مروان ناولني طبق الجبنه من قدامك، فين الزتون يا ماما..
ايمان
قوم يالا منك ليه والله ورحمة ابويا ما حد منكم هيدوق لقمه قومووووو
طلع احمد وقال
في ايه يا ايمان ما تسيبي العيال يفطرو هو كل يوم نكد
ايمان ببكاء
ابنك كنان بيه الصايع ابن الصايع..
احمد.
ابن الصايع
ايمان
كسر حنفية المطبخ والمايه هتغرقنا.
كنان بقلق
اياد هو اللي طلب الزتون مش اناا
_بعد شويه نزل احمد ومعاه ولاده وقبل ما يطلعو الباص قال ليهم
احمد
اول ما ترجعو من المدرسه تعتذرو لماما وكنان بيه يتلممم هاا
كنان
بقول ليك ايه يا ابو حميد خف لوكلوك ويلا عشان متتاخرش علي الجو اللي عندك في المكتب
اياد
انت تصالحها وما تخليهاش تخاصمنا عشان ما نقولش علي البنت الوتكه اللي ماشي معاها
مروان بضيق
انا فقد ساصمت من اجل ان لا اجعل والدتي تحزن
اياد
يادي ام الدرس العربي بتاعك ده، الواد ده يقصد يابا انه مش هيتكلم في الحوار بتاع الوتكه عشان المزه امي ما تزعلش
احمد بغيظ. قال ليهم
يلا يا ابن الكل*ب منك ليه من هناا، انا اتهدد منكم..
كنان
طيب اللي ما يزعلش يا ابو حميد.
احمد بقلق
هصالحها وهخليها تكلمكم بس اللي هيفتح بوقه بكلمه هنفخه..
اياد
اصلي يا حج احمد يلا هنكت احنا علي المدرسه..
احمد
وربنا سواق توكتوك..
_طلع مع ايمان لحد ما السباك صلح المايه وجه يمشي عشان يروح الشغل قالت ليه
ايمان
انت رايح فين يا احمد. طيب خليك ساعدني شويه..
احمد
مع نفسك عندي شغل واتاخرت، واديكي شايفه الموبيل مش مبطل زن
ايمان بدموع
طيب والنبي خلي عم حسن البواب يبعت ليا مراته، الشقه ملحوسه خالص وكلها مايه..
احمد
لا الست دي لتاته ومش هتدخل بيتي، المهم عايز اجي اتغدي فراخ وملوخيه ورز
ايمان
هو ايه ما فيش احساس خالص
احمد
قولي لنفسك
_نزل احمد راح الشغل بتاعه، واول ما وصل قربت منه بنت جميله اووي وقالت
ندي
كل ده تاخير يا ميدو
_تفتكرو مين ندي دي وهيحصل ايه؟
#سوبر_ماما
الحلقه الثانيه
ــــــــــــــــــــــــــــــــــــــــ
ندي
كل ده تأخير يا ميدوو
احمد
العيال والدوشه معلش ما عرفتش ارد عليكي وقتها، كنت في البيت..
ندي
عادي يا حبيبي انا بس قلقت عليك.، هاا فكرت في موضوعنا؟
احمد
اخر الشهر هكون اخدت شقه ايجار وهنتجوز يا حبيبتي..
ندي
ده هيبقي احلي يوم في حياتي
احمد
وانا كمان والله علي الاقل ارتاح من النكد والدوشه اللي في البيت شويه..
_راح احمد مكتبه وطلعت ندي موبيلها وكتبت رساله لايمان وقالت ليها فيها..
ندي
انتي لسه مش مصدقه انه بيحيني وهيسيبك، براحتك خليكي كده علي ذمته لحد ما هو يرميكي زي الكلاب، اصل انتي كرامتك لاقيها في الشارع اهو هيتجوزني عليكي وبعد كده بلاش تنكدي عليه وتأخريه عن الشغل..
_في بيت ايمان كانت بتسمح في الارض ومعاها نبيله اختها..
نبيله
ههههه والله ولادك زي العسل وبيضحكوني حبايب خالتهم بس اسمعي الواد مروان ده المتربي اللي فيهم حجززاااه لبنتي تيا..
ايمان
ياشيخه اتنيلي هو انتي اتجوزتي عشان تخلفي..
نبيله
لما اتجوز يعني واجيب بنت واسميها تيا..
_ضحكت ايمان وبعدين فتحت موبيلها وشافت الرساله اللي جات ليها عليه ودموعها ملت عيونها..
نبيله
مالك يا بنت انتي وشك صفر واتخطف كده ليه
ابتسمت ندي وقالت
لا لا ما فيش حاجه تعالي نجهز الغدا، انتي هتتغدي معايا صح...
نبيله
لا عندي كورس مهم انا جيت انضف معتكي البيت وامشي، بابا قالي ابعت ليكي الشغاله بس انتي قولتي احمد بيزعل.
ايمان
لا خلاص انا هخلص الغدا وبعدين اروق اوضة العيال، روحي انتي الكورس وخلي بالك من نفسك..
ــــــــــــــــــــــــــــــــــــــــــــــ
_رجعو كلهم وبالليل كان احمد قاعد بيتفرج علي الماتش، وايمان قعدت جنب منه وقالت
ايمان
الا قولي يا احمد هو انت مبسوط معايا يا حبيبي
احمد بحده
لا لا لا
ايمان بدموع
والله لا مش مبسوط
احمد
يا بت انتي انا اقصد الماتش الكوره كانت هتدخل في الجون
ايمان
طيب رد عليا انت مبسوط معايا..
احمد
ايمان ادخلي ستفي الغسيل اللي في ايدك ده جوه
ايمان بدموع
انا لو جيبت اخري انت وعيالك مش هتشوفو وشي تاني..
اياد من اوضته قاال ليها
يا ماما يا مزه اعمليلي سندوتش جبنه وما تنسيش الزتون
ايمان
انت يالا مش بتشبع ايه بلاعه
كنان
وانا واحد يا ماما..
احمد
قومي شوفي العيال يا ايمان ربنا يهديكي..
ـ دخلت ايمان المطبخ عملت لولادها السندوتشات وطلعت راحت ليهم اوضتهم واول ما دخلت اتصدمت من الكركبه اللي ماليه الاوضه..
ايمان
ايه اللي عمل في الاوضه كده، ده انا حيلي اتهد فيها وانا بروق..
كنان
ما كنتش لاقي سوسن
ايمان
يالهوي وكمان جيبتو بنات البيت هتبقو انتو وابوكم..
اياد
ياريت ده قصده علي القطه..
قلعت ايمان الشبشب وقالت
وحياة امك لتتربي يا كنان..
_طلعت ايمان من الاوضه وهي ماسكه الشبشب وزعقت في ابنها كنان وقالت..
ايمان
انت هتيجي هنا يا ولد ولا احدفك بالشبشب
كنان
وربنا ما انا جااي انتي وليه مفتريه وانا مش قدك
احمد جوزها وهو قاعد قدام التلفزيون
بالراحه يا ايمان مش كده..
ايمان بصوت عالي
انت مش شايف ابنك بيعمل ما صدقت روقت الاوضه قلبها ليا تاني
احمد اتعصب وقال
يا ايمان صوتك مش عارف اسمع الماتش كويس
حدفت ايمان عليه الشبشب وقالت
هتجنني انت وعيالك
طلع اياد اخو كنان التوأم وقال
في ايه يا ماما متعصبه كده ليه ما انا قولتلك كبري دماغك
ايمان
يا برودك عاملي فيها ملاك وانت مكركبلي المطبخ وعامل فيها الشيف حسن
_طلع مروان اخوهم التوأم التالت وقال وهو ماسك الكتاب في ايده..
مروان
ماما صوتك العالي دليل علي ضعف موقفك
احمد
ايمان عايز كوباية شاي يا حبيبتي
ايمان صوتت وقالت
باااااااااس حراااااااااام علييييييكم
كنان وهو بيقعد جنب باباه
الوليه دي باينلها اتجننت، طلقها وهاتلنا واحده وتكه تدلعنا..
اتصدم احمد وقال ليه_
وطي صوتك لا تسمعك..
ايمان
بقولك ايه يا احمد طلقني اسمع كلامه وطلقني..
احمد
لا ده انتي اتجننتي رسمي بقي بس سكر مش ناقصين هبل
ايمان
ايوه انا اتجننت، طلقني وروح يا حبيبي هات لولادك ست تكون عاقله تريحكم
احمد
انتي واخده بالك من كلامك، وبعدين في ايه ما كل يوم مشاكل مع العيال ايه اللي بقي جديد
ايمان اتعصبت وقالت
انا زهقت طول اليوم حيلي مهدود وبالليل مقالب من عيال الجزمه دول وطبعا لازم اكون حلوه وزي القمر وبالي رايق عشان اشوف طلبات البيه وما يبصش بره واخرتها اتخان وعيالي يبقو عارفين انك عارف وحده عليا وما حدش يقولي..
احمد بصدمه
انتي ايه اللي بتقوليه ده..
مروان بحزن
انا قولت لماما يا بابا، انا سمعتك بتتفق علي الجواز مع وحده و..
احمد
انت تخرس خالص وتبطل كدب
ايمان
هو برضو اللي يبطل كدب، بقي انت اب انت تعلم ولادك يكذبو علي مامتهم وكده انت فاكر نفسك اب كويس..
اياد بقلق
ما حصلش حاجه يا ماما..
ايمان
انا سيباها ليكم وماشيه ربيهم بقي لوحدك او هاتلهم وحده تربيهم او تبهدلهم انا مش هبص غير لنفسي بعد كده..
احمد
اتمسي يا ايمان واعقلي وبطلي الحركات دي انا مش عايز اقل منك قدام العيال..
_بصت ايمان لولادها اللي بان عليهم الخوف ودخلت اوضتها ورزعت الباب..
احمد
انت يا مروان كده تعمل مشكله بيني انا وماما..
كنان
لا علي فكره انت اللي عملت المشكله، لما عرفت وحده تانيه علي ماما..
اياد
ده راجل وبراحته علي فكره ما تكبروش الموضوع..
احمد
بااس انت وهو مش عايز اسمع نفس حد منكم فاهمين، واول واخر مره تدخلو في مشكله بيني وبين ماما..
مروان
فاهمين يا بابا
احمد
يلا من قدامي علي اوضتكم
اياد
الاوضه مش نضيفه هننام ازاي..
_دخل احمد الاوضه وحاول يروقها ليهم علي قد ما يعرف وخلاهم ينامو، وبعدين دخل اوضته ولقاها نامت، نام جنبيها وهو مدايق علي زعلها دي كانت حب طفولته وحياته، وفضل يفكر هو ليه خانها وهي فعلا ما قصرتش معاه ولا مع ولاده في حاجه..
ـــــــ
_تاني يوم الصبح صحي احمد علي صوت كنان ابنه بيقوله..
كنان
بابا بابا انت يا عم قوم بقي ايه النوم ده كله..
احمد
في ايه يا اياد روح قول لماما وسيبني انام..
كنان
يا دي النيله يا عم فوق وكلمني.
احمد
امشي يا كنان من وشي بدل ما اقوملك
كنان
يا عم قوووم بقي، مراتك سابت البيت ولمت هدومها وغفلتنا وطفشت..
قام احمد بسرعه وقال
امك فين يااد انت
كنان
وانا مالي جيت اصحيها عشان اعمل فيها مقلب زي كل يوم ما لقيتهاش ولقيت الورقه دي كاتبه فيها ما تدوش عليا عند. بابا انا... في كلمه مش عارف اقراها بس شكلها بتشتمك
احمد
هات الورفه دي يا فاشل
احمد
ما تدورش عليا عند بابا انا بالفعل سيبتك وسيبت كل حاجه وهخلعك يا احمد لو مطلقتنيش..
احمد
اااه يا بت ال،،، وبعدين
كنان
وانا مالي هو انا اللي كنت عرفت عليها بنات المهم قوم يلا اعملنا فطار
احمد
نعمم فطار ايه انا ما اعرفش اعمل فطاار
دخل اياد وقال ليه
بابا تعالي دورلي علي شراب انا مش لاقي ولا واحد فيهم شبه التانيه
مروان
بابا تعالي اعملي الفطار عشان معاد حقنة السكر بتاعتي
_بصله احمد وافتكر ان ابنه مروان عنده السكر ولازم يفطر بسرعه وياخد الحقنه قبل ما يتعب، قام وراح المطبخ وقال
احمد
هي ماما بتفطرك ايه في العادي يا ميرو
اياد
واحد عنده السكر هيفطر ايه يعني
كنان
اخيه علي الرجاله
احمد
بقولك ايه يا ولد انت وهو اكتمو انا علي اخري، وانت قول هتطفح ايه
مروان
ممكن زبادي وبس وانا ابقي اجيب حاجات ليا من المدرسه
اياد
انا عايز النهارده في اللانش بوكس كوارع
كنان
وانا رينجه
_تفتكرو بقي هيعمل ايه احمد مع ولاده وايمان راحت فين؟؟؟
#سوبر_ماما
_الحلقه الثالثه
ــــــــــــــــــــــــــــــــــــــ
اياد
انا عايز النهارده في اللانش بوكس كوارع
كنان
وانا رينجه
احمد
وربنا ارميكو في الشارع واخلص انتو اصلا رباية شوارع يا نتن منك ليه اسكتو.
اياد
يعني مش هتعملنا اللانش بوكس؟
احمد
لا ماما تبقي لما تيجي تعمله هي ليكم، انا عندي شغل هديكم مصروف كبير وهاتو اللي عايزينه لوحدكم، روحو يلا البسو لحد ما اخوكم يفطر
_راح اياد وكنان يلبسو ومروان قعد السفره يفطر واحمد كلم سعيد حماه ابو ايمان وقاله...
احمد
ايوه يا عمي هي ايمان عندك؟
سعيد
لا ياابني مش عندي هو حصل حاجه ولا ايه؟..
احمد.
ابدا والله يا عمي احنا بس شدينا في الكلام مع بعض شويه وصحيت الصبح مش لاقيها في البيت..
سعيد بحده
عملت ايه في بنتي يا احمد هي بقلها فتره متغيره، انطق بنتي فين؟
احمد
والله انا بسالك ولو عرفت توصل ليها يبقي تقولها تتلم وترجع بيت جوزها عشان عيالها..
خلص كلامه وقفل الموبيل، وقال لمروان
كمل فطارك وادخل البس..
اياد
يا ابو حميد تعالي اقفلي السوسته..
احمد راح عنده الاوضه وقال
سستة ايه يا زفت عرفت فين الكلام ده..
اياد
انت اللي فهمت ايه، بقول ليك ايه تعالي لقغل ليا سوستة البنطلون
كنان
وانا مش بعرف اربط الربااط بتاع الكوتشي ماما كانت بتعمله لياا..
احمد
لا فعلا ليها الحق تطفش ده انتو بلاوي سودا..
_مروان وقف بره وافتكر اللي حصل في الفجر اما قام من نومه عشان يشرب وشاف مامته ماشيه..
مروان
ماما استني انا مش هسيبك. انا هاجي معاكي
.
ايمان
لا يا مروان انت لازم تقعد مع اخواتك وبابا، وانا اوعدك فتره كده وهاخدكم تقعدو معايا
مروان
طيب انا عملت حاجه تزعلك؟
ايمان بدموع
بالعكس انت الوحيد اللي بحس اني عرفت اربيه وناجحه اني اكون ام فيك انت، بس اخواتك لازم يتربو عشان يتعلمو يسمعو كلامي..
مروان
انا موافق بس كل يوم تكلميني اطمن عليكي..
حضنته ايمان ومشيت، وراحت عند؟؟..
_رجوع..
ــــــــــــــ
احمد
انت واقف عندك ليه تعالي اديلك حقنة السكر عشان البسك هدومك
مروان
بعرف اخدها لوحدي ماما معلمااني، وبعرف البس لوحدي. شكرا لحضرتك يا والدي....
احمد
انا ما خلفتش غيرك والله، انما المتشردين دول جم غلطه معانا.
مروان
بابا سيب الست اللي تعرفها ورجع ماما..
اياد
او هات الست اللي انت تعرفها وخلينا ننبسط كلنا..
كنان
ايوه هاتها وما تبقاش اناني..
احمد
ماما هترجع ما تقلقش يا مروان، انما انتو يا جزم لو فتحتو الموضوع ده تاني لا هيبقي في مصروف ولا نادي ولا بلايستيشن ولا موبيلات...
كنان
لا الا الموبيل يرضيك سماح كوبايه تفتكر اني خوزقتها..
احمد
يخرب بيتك ده انا كنت بتكسف اقول لبابا ان معايا بنات في المدرسه
اياد بسخريه
اكمنك لما كبرت انحرفت علي كبر
احمد
اتلم يا ولد، وكملو لبسكم عشان ما اتاخرش علي الشغل..
_دخل احمد اوضته وغسل وشه بسرعه وطلع ما كانش عارف يطلع لبس، ايمان هي اللي كانت بترتب ليه كل حاجه حتي البريفوم بتاعه والشوذ كانت هي اللي بتختارهم..
طلع موبيله وبعت ليها رساله صوتيه وقال
ارجعي يا ايمان خلينا نتكلم واوعدك والله هعملك كل اللي انتي عايزااه..
ــــــــــــــــــــــــــــــــــــــــــــــ
_في بيت اهل ايمان كانت بتسمع رسالته ودموعها علي وشها، دخل باباها وقال..
سعيد
لسه برضو مش عايزه تقوليلي ايه اللي حصل بينك وبينه عشان تسيبي البيت وتيجي..
ايمان
ولا حاجه بس اكتشفت اني فشلت في كله حاجه، زوجه فاشله وام فاشله وقبل كل ده اما عمري ما نجحت في حاجه بيتي بيتخرب وانا واقفه اتفرج..
سعيد
والهروب مش حل يا بنتي وخصوصا عشان ولادك
ايمان
اهو دول بالذات لازم يتربو وخصوصا اياد وكنان دول طلعو عيني انا ما كنتش بنام ساعه علي بعضها بسببهم...
سعيد
سيبك من العيال جوزك ماله بيكي، انتي ليكي اهل ولو غلط اكسرلك دماغه وبراحتك ترجعي او لا
ايمان بدموع
احمد بيخوني بيعرف عليا واحده وعايز يتجوزها، وانا حامل في شهرين يا بابا وولادي لو فضلت معاهم بالحال ده مش هكمل للشهر التالت في الحمل من المجهود اللي بعمله..
خدها سعيد في حضنه وقال
انتي هتقعدي في بيت ابوكي معززه مكرمه وهو ما يعرفش مكانك ولما بتربي هو وعياله يبقي اقوله انك هنا..
ــــــــــــــــــــــــــــــــــــــــــــــ
_وصل احمد الشركه اللي شغال فيها ولقي ندي في وشه زي كل يوم..
ندي
احمد اتاخرت ليه؟..
احمد
ايمان سابت ليا البيت والعيال وطفشت..
ندي
ولي ما اخدتش الولاد معاها..
احمد.
مش عارف وده اللي قالقني وخوصوصا انها عرفت بموضوعنا...
ندي
طيب كويس ودي الولاد لبيت اهلها ونتجوز قدام الناس كلها..
احمد
حمايا راجل كبير ونبيله اختها صغيره وولادي عايزين اهتمام، انا نفسي مش هقدر اعيش من غير ايمان..
ندي
يعني ايه ده بقي ان شاء الله
احمد
يعني لما فكرت فيها كويس لا انا كنت معجب بيكي مش اكتر انما قلبي ملك مراتي وبيتي، وانا عمري ما هتخلي عن مراتي وولادي معلش بقي يا ندي حظ. اوفر المره الجايه...
ندي بصدمه
بس اا
احمد
بعد اذنك يا مدام ندي هروح اخد اذن عشان الحق اروح اجيبهم من المدرسه...
_قال كلامه وطلع مكتبه وهي قعدت متعصبه ومدايقه انه سابها وخطتها فشلت..
ــــــــــــــــــــــــــــــــــــــــــــــ
_عدي اسبوع في التاني واحمد كان واخد اجازه ومهتم هو بالولاد، وطبعا ما عرفش يعمل اللي كانت بتعمله ايمان..
احمد
انا خلصت تنضيف المطبخ الاقي كلب منكم جوه مبوظ حاجه هبلعه حي فاهمين
اياد بحزن
ممكن بقي تجيب لينا ماما..
احمد
انا سالت عليها كل معارفنا وما حدش يعرف عنها حاجه..
كنان
يعني ايه الكلام ده احنا مش هنشوف ماما تاني بسببك
احمد ادايق من كلام ولاده، وقاال مروان ببكاء
ماما تعبت منكم اووي كلنا كنا بنتعبها، طول اليوم بتقولنا حاضر ونعم بتكلنا وتغيرلنا مع ان اللي في سننا بيعملو كل حاجه لوحدهم عادي، احنا كلنا حتي انت يا بابا كنا بنعاملها زي الشغاله وما كناش بنشوف تعبها ووقت ما كانت بترتاح كنا بنعمل فيها مقالب...
كنان ببكاء
انا عايز ماما وهسمع كلامها..
اياد بحزن
مش هدايقها تاني يا بابا بس خليها ترجع..
احمد بدموع
انا زيكم نفسي ترجع وهساعدها في كل حاجه ومش هبقي اناني..
مروان
ماما عند جدو سعيد..
احمد
يا حيوان وانت عارف كل ده وساكت..
اياد
انا قولت ما فيش حد لابس نضاره سالك
احمد
تعالو يلا هنروحلها كلنا..
ــــــــــــــــــــــــــــــــــــــــــــــ
_وبعد شويه الباب خبط وطلعت ايمان من اوضتها عشان تفتح واتفاجئت بكنان واقف وماسك ورده وقال..
كنان
انا اسف بحبك يا ماما وعمري ما هزعلك تاني وهقضل علي طول اسمع كلامك..
طلع جنبه مروان وقال
هبطل اتكلم ببرود وقت ما انتي متعصبه وهاخد الحقنه في معادها ومش هجيب شوكلاته من وراكي بس ارجعيلنا..
طلع اياد وقال
ايه يا مكنه كده تبعدي عني، ده احنا جوعنا واتبهدلنا من غيرك يا اصيله، ارجعي وانا اول واحد هقف للعيال دي واريحك ومش هنخبي عليكي حاجه تاني..
طلع احمد وقال هو كمان
بحبك وعمري ما هبص لحد غيرك ارجعيلي يا احسن زوجه في الدنيا...
مسحت دموعها وقالت
كده كده كنت هرجع عشان بحبكم، وكمان عشان اختكم اللي في بطني تتربي معاكم..
_فرحو كلهم واحمد حضنها جاامد، ورجعو البيت كلهم..
وتاني يوم صحيت ايمان من نومها وكانت البيت هادي علي عكس العاده، طلعت لقيت ولادها مرتبين البيت والسفره مترتبه وهما لابسين لبس المدرسه..
كنان
صباح الخير يا ماما احنا خلصنا كل حاجه في شغل البيت قبل انتي ما تصحي..
احمد طلع من المطبخ وقال
وانا جهزت الفطار اهو والولاد لبسو وانتي عليكي الغدا بس.
ايمان
ده من امتي ده كله بقيى..
احمد
من النهارده كلنا هساعدك بس خلي انتي بالك من نفسك يا حبيبتي ومن ملك بنتنا..
ايمان
ربنا يخليكم ليا يا حبايبي..
_وبكدا تكون خلصت حكايتنا النهارده..
🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹
ادخلوا بسرعه حملوه وخلوه علي موبيلاتكم من هنا 👇👇👇
وكمان اروع الروايات هنا 👇
انضموا معنا على تليجرام ليصلكم اشعار بالروايات فور نزولها من هنااااااااا
🌹🌹🌹🌹🌹🌹🌹🌹🌹🌹🌹🌹🌹🌹🌹🌺🌺🌺🌺🌺🌺🌺🌺🌺🌺🌺🌺
تعليقات
إرسال تعليق