expr:class='data:blog.languageDirection' expr:data-id='data:blog.blogId'>

رواية أبكم سحرني البارت الاول بقلم أوتار حزينه حصريه وجديده وكامله على مدونة النجم المتوهج للروايات والمعلومات


رواية أبكم سحرني البارت الاول بقلم أوتار حزينه حصريه وجديده وكامله على مدونة النجم المتوهج للروايات والمعلومات 

رواية أبكم سحرني البارت الاول بقلم أوتار حزينه حصريه وجديده وكامله على مدونة النجم المتوهج للروايات والمعلومات

ڪولولي ..

يـا صـوره الأرشهـا بـ مـاي وتعيشون ؟

،،


بغداد الساعه 5 ليلا

نايم بفراشي وحسيت بحراره اشتعلت بيه

اختنكت اريد النفس ماكوو

جسمي تشنج رفست رجلي وكمت اصيح بصوت مكتوم ضربت بأيدي بقوه على الفراش

اكثر من مره من شفت منظر الانفجار وصوته دوه براسي

تكرر هذا الشي مثل كل ليله

فكيت عيوني بقوه من شفت النار شلون

حركت ياسر وحركتني ويا

ايده وهو يريد يلزمني خلتني اصيح بصوت مكتوم وافز من فراشي

اول ماكمت رجليه ماشالتني ووكعت. بالكاع

عيوني افترت بالغرفه بخوف من شفته بكل ركن وزاويه

رجعت غمضتها بقوه وسندت راسي على الفراش وكمت اضرب بي بقوه وصرخه بداخلي ادكول

رااااح اخويه مااات يااسر وبعد مايرجع

رفعت راسي وره لحظات واني اتنفس بقوه وعيوني

مغوركه النفس صعب اخذه واحس هوه ماكو

كمت كوه واني ساند روحي على الجربايه

وكفت وشفت نفسي طامس بالعرك

وراسي يوجعني

لزمت كصتي وفركتها تمشيت بخطوات

ثگيله طلعت من الغرفه

وكفت وصفنت على باب غرفه اخويه

حلم مر كدام عيني من زفينا ووكفت اهوس اله يم باب وهو يضحك وفرحان وحجه

                *يوما الك عمار وازفك بايدي 

ابتسمت اله عبالك واكف كدامي

الضحكه راحت من خياله تبخر واختفى مثل كل مره

لميت ايدي بقوه وضربت راسي اكثر من مره

ورددت وي نفسي

اخ ياسر ليش مامتت وياك ليش انت رحت واني ظليت

اماني احلام انريدها بس مو كلشي يريد الواحد يصير

غسلت وجهي وصفنت على شكلي بالمرايه

جان محروك والحرك واصل لنص جسمي ايدي رجلي

كلهن محروكات من وره الحادث

رفعت ايدي بتعب ومسحت وجهي بيها

ذبيت حسره وطلعت من الحمام

وكفت بنص الصاله الفوك وباوعت للاجهزه الرياضيه

اني وياسر جنا مدمنين رياضه وسفر

جسمين بس روح وحده

جنت احب الي يحبه واكره الي يكره

لحد هسه اسأل نفسي ليش

اخويه من مات مالحكته

ذبيت حسره نار طلعت من صدري وتمشيت

للجهاز جري وكفت وصفنت للحظه وبعدين شغلته وبديت اركض علي

الوكت اخذني مثل كل مره ونسيت نفسي وي الذكريات هنا كعدنا وهنا ضحكنا لحظات جمعتنا سووو ظلت وياي تفتر براسي وماصحيت الا سمعت صوت رجعني للحاضر

عماررر يمه ماااكعدت

وكفت وجسمي ينكط عرك مسحت كصتي

ونزلت من الجهاز تمشيت للدرج وشفت امي

واكفه بدايته

ابتسمت الي مثل كل مره وحجت

ها يمه عرفتك كاعد سمعتك تتحرك من الفجر

هزيت راسي وابتسمت كوه واشرت الها

صباح الخير بعد امك اسبح وانزل تريك ويانا

اشرت الها باي وهي صفنت عليه للحظات

وبعدين حجت

راح اسويلك مخلمه لحم وابوك شلون سوه كهوه

تفك الراس

اشرتلها باوكي

راحت واني رجعت للغرفتي طبيت للحمام

نزعت ملابسي ووكفت جوه الدوش

فتحت المي البارد ووكفت جواه رفعت راسي

لفوك اريد احس ببروده لان احس جسمي نار

طلعت مشوار بدلت ونزلت جوه

رحت للمطبخ وشفت ابويه كاعد يقره بجريده

نزل منظاره من شافني وابتسم وكال


صباح النشاط والرياضه

ابتسمت اله واشرت براسي

باوعت لامي الجانت تتحرك ببطء

ولابويه الرجع يقره بالجريده

شعره متروس شيب وامي عافيتها راحت

اثنينهم كبروا قبل اوانهم من راح اخويه ياسر


هاك يمه تريك وتوكل على الله

عبالك اليوم تاخرت


هزيت راسي باي وابويه حجه


اخذني وياك من تطلع لان مااكدر اسوق

عيوني صايره ماتساعد


اني هم ابو ياسر اخذوني وياكم المعامله مال التقاعد خلصت واريد اروح استلمها من يم صديقتي

اي تعالي ويانا بس لاتنسين جيبلي الدوه الي والج

خلي نشربه قبل لانروح


اي والله شلون نسيته ماادري


جنت ساكت واسمع حوار امي وابويه رفعت راسي من سمعته حجه وياي


عمار ابو محمد سوو عمليه عبالي ناخذ هديه مرتبه ونروح اني وياك لبيته


هزيت راسي بلااا واشرت بايدي مااروح


ليش ابني


ماجاوبته وظليت ادك بالسويج على الميز وهو هم سكت من شاف وجهي تغير امي ظلت تباوع علي كمت وره لحظه تمشيت للباب المطبخ وسمعتها حجت


انت مو تعرفه مايحب يطلع زيارات لاحد

ليش تلح علي


اي ادري يظل هيييج


كلام ابويه راح من


طلعت للحديقه وكفت واخذت نفس طويل وذبيته

باوعت للاشجار شلون الهوه يحركهن بهدواه

جانت بارده والجوه مغيم


عيوني افترت على الزرع والورد ودرت راسي

لباب المطبخ وشفت امي واكفه تباوع عليه

ابتسمت الها كوه وهي هم ابتسمت بحنيه


درت وجهي ومشيت لباب الكراج فتحته ورجعت للسياره مالتي شغلتها وكعدت انتظرهم

وره لحظات طلعوا ركبت امي ليوره

وابويه طلع بره


رجعت بسيارتي للشارع وامي حجت


اليوم عبالك ابرد من البارحه


هزيت راسي باي وابويه قفل باب الكراج واجه ركب بصفي وكال


يله ياابه خلي نتوكل على الله


،،،

اني عمار فاروق حسن

عمري 30 سنه خريجه كليه هندسه علوم حاسبات

تخرجت وتعينت بشركه اهليه

حالتنا والحمد لله زينه ابويه مدرس وامي مدرسه

تقاعدت هاي السنه بطلب منها لان بعد ماتكدر ادوام

الوالد من الغربيه والوالده من بغداد

تعرف عليها من جانو يدرسون بالكليه وصارت القسمه ابويه فضل يعيش بغداد لان مجان يحب عادات وتقاليد اهله


حياتنا جانت حلوه ومستقره رغم الاوضاع الجانت دصير بالعراق انفجارت وطائفيه وحروب حركت الاخضر واليابس وموت طب للبيوت وخلاها تلبس ثوب الحزن


والموت اجانا بيوم وغير كلشي بحياتنا اخذ اغلي شي عندي وخلاني وحيد بهل العالم

صدك لو كالو من يروح واحد من بيت عمره مايرجع مثل الاول ولا احنا نكدر نرجع مثل زمان

الضحكه بغصه والكعده راح تظل ناقصها فلان او فلانه


كل يوم كلما اكعد وي امي وابويه اباوع

المكان اخويه الفارغ

ذاك اليوم الاسود الي عمري ماراح اكدر انساه ولا اكدر اتجاوزه لان ترك

ندوب بجسمي وروحي وخلاني مكسور الظهر


ذاك اليوم عبالك البارحه

طلعنا اني واخويه العصر هو يدفع بيه واني ادفع بي وكف من سمع مرته صاحته


هههه هاك اقبض مثل كل يوم ياااسر

تعال نسيت شغله حجيت بنعوصه واني اقلد مرته


جلاق اجاني منه وجاوبني وهو يضحك


ولك اتزوج وفضني عاااد لاتظل خال عينك عليه

بالرايحه والجايه راح تحسدني ويطيح حظي


حجه وراح لمرته واني جاوبته


محفظتك وكعت


اندار ليوره واني خربت ضحك وغميته وحجيت


تظل زوووج


اني اعلمك خلي اطلع واشوفك الزوج شراح يسوي بيك


جاوبني وطب للكليدور

تمشيت للسياره ركبت وشغلت اغنيه لقائد حلمي

اخويه طول يم الحبيبه دكيت هورن وتعمدت اظل ادك

طلع يركض وهو يعض بشفته الي

ابتسمت بخبث

كعد يمي وهو يحجي


خرب بيك وباصلك الخره شبيك ماتخلي الواحد يتهنى بشغله


انتبهت لخده بي حمره ومديت ايدي ومسحتها

بقوه


دمسح الخلقه الزفره يله تطلع شبيك مو شايف

ماشبعت بوس طول االليل


ضحك بفشله وكام يمسح بخده وحجه

ههههه مو اكلك صاير ابو دوده خال عينك علي

راح تموت من الغيره


شغلت السياره وجاوبته بثقه


وعلى شنو اغار تره راح ازوج بعد كم يوم

وها تره مرتي احلى من مرتك


ايااابخ منو كال عيني


اااني اكول


جاوبته ولفت على الشارع العام


خطوات طويله واحنا نحجي ونضحك

وشفت الدنيا صارت ازدحام


يااربي هاي شوكت نوصل

ياسر حجه بضوجه واني جاوبته

اكلك مرتك الا من الخاصكي يله تاكل حلويات

مو يمنا اكو وشلون طعم والله يخبل


عروس ياابه وتدلل عليه


فريت ايدي وهو كمل

شبيك ولك ليش تفر بايدك اليشوفك يكول

مامدلل سهى خاتون


سكتت واني مبتسم وهو كمل

طايح الحظ ماجاوب ليش صميت حلكك


هههه شجاوبك يعني هو احنا اثنينه طايحين حظ

ووكعن بالحب وصرنا طليان روح منا تعال منا


سكت وهو يضحك وجاوبني


بس عمي انت تحبها كلش لسهى

و اشوفك ذاب روحك عليها زااايد


يااسر مو بايدي والله احبها كلش واموت عليها


حبتك العافيه عيني وباستك اربع بوسات

ضحكت وجاوبته


ولك هي العافيه


اي يااب ادري

جاوبني وسكت واني هم،،


ظلينا واكفين ومانعرف شوكت يفض الازدحام


ضجت ونزلت اريد اشوف ليش هيج واكف السير

مشيت خطوات ليكدام شفت السيارات بدت تتحرك

ورجعت فتحت الباب ويااسر حجه بشقه


هااا عبالك فض الموكب مال الوزير

بلحظه صااار صوووت قوي واذني وشت

شفت كتله نار اجاتنا من جهه اخويه

لفته بشعله واني وياااا يااااسر صاااح ومد ايده عليه والنار بلحظه اشتعلت بي وبيه


انشمرت على الرصيف بقوه والنار تاكل بيه

كمت واني اصيح واطفي بروحي واشمر نفسي بالكاع واريد بس تطفى

لحظه وفقدت الوعي وبعد مااااعرف شصار


الذكريات من تجيك توجع كلشي بيك

وتخليك تختنك رغم انت دتاخذ النفس بس صعب

ينزل بصدرك


روحي فرفحت ووكفت السياره يم الجسر ونزلت تمشيت بخطوات سريعه

للحاجز ووكفت اخذت نفس طويل وذبيته


صفنت على المي وغمضت عيوني من رجعت الذكريات ادك بقوه براسي


كعدت اون والالم فتت روحي قبل جسمي ايد لزمتني وصوت حجه برجفه


عمار كعدت


عرفته صوت خالي عقلي بده يجمع الاحداث

بالي مو يم نفسي لااا يم اخويه


ردت احجي ماكو صوت ردت اكوم ماكدرت

الالم فتتني اريد اكول ياااسر وينه

اخويه خوما صار بي شي


ماكوو كلام بس صوت مو مفهوم


خالي كام يبجي بصوت مخنوك وقلبي علمني

اخويه ماااات مادام امي ابويه ماكو يمي


كمت ومن الالم صحت ووكعت ليوره

كمت اهز براسي لاااا واني ابجي


خالي لزمني صاح الدكتور وصارت هوسه يمي

من شافوني كمت ارفس برجلي واريد اكوم

حتى اشوف اخويه

ابره ومهدأ


لحظات وغفيت


صوت طير النورس وقطرات المطر رجعني للواقع

شفت السما صارت سوده وبدت تمطر

وكفت للحظه واني رافع راسي لفوك

وبروده المي بردت وجهي


بس قلبي ياهو اليبرده منو اليكدر الينسيني

الصار بينا ذبيت حسره وفركت صدري بأيدي


تمشيت للسياره وطلعت بيها لشغلي بعد ماصار بيه

الحادث وفقدت النطق عفت شغلي بالشركه الاهليه

وفتحت مكتب حاسبات اصلح وابيع


شغلي خير من الله وكدرت اسويلي سمعه طيبه

بين الناس


خطيبتي والي جنت احبها اكثر من روحي

عافتني بعد ما شافتني فقدت النطق وصرت اخرس

وتشوهت وزوجه اخويه وره اسبوع راحت لاهلها

عالمنا تدمر بلحظه وكلشي تغير

اني بعد ماجنت اجتماعي واحب الضحك

والسهر والطلعات صرت شخص انطوائي وعصبي كلش وكاره الدنيا ومابيها الي مخليني عايش

هو اني وابويه لان ماعدهم غيري


وصلت للمكتبي ولكيت الولد اليشتغل وياي

فاتحه وديتعمال وي الناس


اشرت بايدي بالسلام عليكم

كعدت واجه سامر وحجه


عمار هاي الحاسبه مضروبه ودخت واريد ارجعها تشتغل مثل الاول وماكوو


اشرت اله عوفها يمي وروح كمل شغلك

فركت ركبتي لان بالبرد دائما يوجعني جرح العمليه


جريت جكاره وبديت ادخن فتحت الحاسبه

وبديت اشتغل بيها


ماطولت بيها ورجعتها مثل ماجانت

اشرت لسامي واجه وهو يسال


هااا صلحتها


اشرت اي وهو حجه وي صاحبها


مووكتلك بس مهندس عمار يكدر يرجعها مثل الاول


الرجال اجه ليمي وسالني


رحمه لاهلك الملفات كلهن رجعن ابني طالب سادس وديدرس عليهن


اشرت براسي باي وهو باوع لسامر الي جاوب مكاني


حجي وداعتك رجعن مادام خله ايده بيها اخذها وروح وابنك ان شاء الله يلكي كل الملفات بيها


الرجال اخذ الحاسبه وانطه الحساب لسامر وطلع

ظليت كاعد واشتغل بالمكتب للظهر


مااردت ارجع للبيت دزيت غده من المطعم وتغديت اني ويا كملنا وره دقائق

اجتي بنات اثنين وكفن يم باب المكتب وبين عليهن التردد


ركزت بعيوني عليهن وهن بعد تردد طبن حجن وي

سامر وانطن جهاز هو فحصه وبعدين


اجه وحجه وياي


عمار هذني البنات جايبت جهاز وحده منهن ادكول تهكر وباكو كل الصور من عنده وواحد كاعد يبتز بيهن


عكدت حواجبي وواخذته منه

بعد مافحصته كتبت لسامر وسالت اسالها هي وين ساكنه وشوفته المنطقه الي الجهاز مهكره


اختي انتي وين ساكنه


ليش تسأل


البنيه القصيره جاوبته بخوف وهو رد عليها


هذا الي مهكر جهازج كاعد بالحريه


شفتها فكت عيونها وباوعت لاختها وحجت بسرعه


هااا صدك تحجي


اي قابل اجذب عليج


وج هوو والله هو ساكن بالحريه

اختها الاصغر منها حجت وهي تشهك والخ حجت بسرعه


عفيه الله يخليك ماتكدر تمسحها من يمه وتامن حسابنا


هزيت راسي بلااا

وسامر سالها


هو شلون عرف حسابج ورمز السري


سكتن واحنا هم وبعدين حجت


عفيه راح احجيلك الصار واريدك تخلصنا من هذا الحقير الي لعب على اختي وضحك عليها


دنكت راسي وجريت جكاره وبديت ادخن واسمعها شلون تحجي


بعد ماكملت كتبت لسامر يتصل على واحد صديقي يشتغل بالشرطه المجتمعيه وهو يعرف يصرف وي هيج نماذج


البنات بعد ماعرفن خافن وكامن يبجن اثنيهن

وحده منهن حجت وهي تشهك


والله اذا عرف بابا واخوتي الا يذبحونا


الخ شهكت بصوت وخلت ايدها على وجهها

باوعت عليهن بحده وسامر ظل يحجي وياهن ويقنعهن يبلغن علي لان باي لحظه راح

ينشر صورهن وينفضحن


شنو الفايده احنا انأمن حسابهن ووهو ينشر

صورهن الي يمه

لازم كمين ينصب اله وياخذوا الشرطه وهم يعرفون شلون يربون هيج اشكال حتى بعد ماتلعب بأعراض العالم


سامر حجه وياهن وكال


راح اخابر المقدم رائد وهو يعرف يصرف وي

هذا الي ديهدد بيجن بس الجهاز مالتج ومال اختج لازم يظل يمنا وانتظري اتصال من عدنا


هي باوعت بخوف علي واختها هم وبعدين

علي درت وجهي منهن وبعد تردد عافن اجهزتهن وطلعن


فريت راسي بضوجه واخذت نفس طويل من جكارتي وذبيته وحجيت وي روحي


حب هلوكت صاير ماادري شلونه والبنات صايرت بسرعه ينضحكن عليهن بس شافن واحد حلو

وكلامه مثل شكله

ادري شنو اليجبرج ادزين صورج

لواحد عرفتي صدفه او بالتليفون

الي امنج علي ابوج وهو عرضه وعرضج ليش ترخصي بلحظه الف مره افكر يله اسلم قلبي لرجال

مو ذكر


شفت عمار هاي يمكن ثالث وحده تجي علينا

وهم نفس المصيبه


هزيت براسي باي وهو كمل


اني ادري شبيها البنات تخبلتن خوما تخبلتن

الي يحبج ويريدج يجي من الباب مو من الشباج


عيوني راحت للباب وشفت ابويه طب وجهه مايتفسر كمت بفزه واشرتله


شكووو


تعال وياي لبيت عمتك بشرى


صفنت علي وسالته بايدي


صاير شي


بالطريق افهمك بالطريق خلي نلحك عمتك وبنتها


اخذت السويج وجهازي وطلعت بسرعه وره ابويه الطلع قبلي وهو يضرب ايد بايد


بالسياره اشرتله يحجي شكو شصاير


ولك شحجي شكول والله سالفه تقهر وتخلي الدم يفور


عكدت حواجبي واشرتله يعني هسه يريدنا نطلع

لبيجي


اي عجل شوكت الما تروح البنيه من ايدينا

وتموت عمتك وراها


صفنت على ابويه شلون صاير عصبي ويسب بابن عمتي وولد عمه وكمل بصوت عالي


خابرتني وكتلج لاتنطيها لذوله الهمج كتلج يابشرى مايفيدون بس اااخ العتب مو عليج العتب على راس الثور ابنج الي انطاها وهو يعرفهم شنو


اشرتله شكوو وهو كمل بعصبيه


بيت عمتك انطو ريمه لواحد دايح ومهتلف

وصيته نعرفه ابا عن جد ونعرفهم شنو همه وفوك اصله الخره الساقط بليله عرسهم فضحها وكال عليها مووو،،


سكت وكمل باعصاب


اااستغفر الله ياربي شحجي شكول البنيه مابيها شي ويريدون يكتلوها


عكدت حواجبي وافتهمت شصاير


دك جهاز ابويه وفتحه وحجه وي امي


اي رايح عليها عجل شتريديني اسوي اعوف اختي الوحيده بشدتها هاي

خلي اروح وافتهم

سكت للحظه وصاح


والله اريد رجال يمد ايده عليها

الا اذبهم كلهم بالسجن هم وبيت محسن الساقطين

احنا يطعن بشرفنا ولكم الزلم العدنا لو هم صدك رجال جان من عرفوا البنيه مابيها شي يرحون ياخذون حگها وحكهم من عيون بيت محسن

بس شحجي. شكول هم بس مكدارهم على النسوان


ماعلينا شي لايظل بالج


حجه وسد الخط


طلعت من بغداد واني الف فكره وفكره ادور براسي

وكل ساع اباوع لابويه جان مبين علي مقهور وضايج كلش


اعرف ابويه يحب عمتي كلش لان ماعنده غيرها

بس هي وهو وانقهر عليها كلش من مات رجلها

جان الله يرحمه صعب ومايخليها تجينا

جان هو يروحلها ومحمل كلشي


اني مو شايف ولدها من زمان مره اجتي لبغداد

ووياها علاء ابنها وريم جانت صغيره

وهم زياره لطبيب وماظلوا رجعوا بنفس اليوم

يتبع


🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹

ادخلوا بسرعه حملوه وخلوه علي موبيلاتكم من هنا 👇👇👇

من غير ماتدورو ولاتحتارو جبتلكم أحدث الروايات حملوا تطبيق النجم المتوهج للروايات الكامله والحصريه مجاناً من هنا


وكمان اروع الروايات هنا 👇

روايات كامله وحصريه من هنا


انضموا معنا على تليجرام ليصلكم اشعار بالروايات فور نزولها من هنااااااااا


🌹🌹🌹🌹🌹🌹🌹🌹🌹🌹🌹🌹🌹🌹🌹🌺🌺🌺🌺🌺🌺🌺🌺🌺🌺🌺🌺



تعليقات



CLOSE ADS
CLOSE ADS
close