القائمة الرئيسية

الصفحات

الأخبار[LastPost]

رواية احتواء قلب الحلقه العاشره بقلم الكاتبه عبير سليم حصريه وجديده


رواية احتواء قلب الحلقه العاشره بقلم الكاتبه عبير سليم حصريه وجديده

رواية احتواء قلب الحلقه العاشره بقلم الكاتبه عبير سليم حصريه وجديده

بعد مرور عدة أيام

تجلس أمامه لا تستطيع أن ترفع وجهها إليه تود أن تتحدث و لكن الكلمات لا تخرج من بين شفتيها فيبدا هو بالحديث أولا : ينفع كده بردو تغيبي عن الشركه كل ده

همسه : أبيه هادي أنا 

هادي : انتي إيه يا همسه اتكلمي

لا ترد فقط تفتح حقيبتها و تخرج منها ورقه و تضعها أمامه : اتفضل حضرتك أنا جايه أدى لحضرتك دي و ماشيه على طول و انا بعتذر عن كل الأذى اللي حضرتك اتعرضت ليه بسببنا انا عارفه ان اعتذاري لوحده مش كفايه عشان كده أنا بعفي حضرتك من الإحراج و مش عاوزة اعطل حضرتك أكتر من كده

هادي : استقاله يا همسه 

همسه : خلاص يا أبيه هادي آسفه قصدي يااستاذ هادي كل حاجه خلصت و أنا متشكرة أوي عالفتره اللي قضيتها هنا في الشركه

هادي : همسه أنا أبيه هادي و حفضل أبيه هادي على طول انتي فاهمه و أي حاجه حصلت انتي ملكيش دعوة بيها انتي بعيد كل البعد عن اللي حصل همسه انتي لو بتتشرفي بية فأنتي اختي الصغيره اللي عارف و متأكد هيا مين و أخلاقها إيه

همسه : حضرتك شرف لية و شرف لأي حد في الدنيا كلها أنا بتباهى بحضرتك بين صحابي و حفضل اتباهى بيك العمر كله

هادي : يبقى ليه عاوزة تمشي و تسيبي اخوكي الكبير لوحده

همسه : مش حينفع خلاص وجودي مبقاش ليه مبرر

هادي : على أساس إنك كنتي بتيجي تضيعي وقت في الشركه و اللا مشغلك مجامله ده انتي ماشاء الله عليكي اتعلمتي في كام شهر اللي غيرك بيتعلمه في سنين همسه قومي شوفي شغلك و الورقه أهيه و يقطعها ادامها و يرميها في السله : و لا ليها أي لازمه بالنسبه لي

همسه : أبيه هادي انا مش حينفع افضل موجوده هنا صدقني وجودي أدام حضرتك حيفكرك بحاجه أكيد حضرتك محتاج تنساها

هادي : تفتكري يا همسه إن اللي حصل ده أنا ممكن أنساه أو يتمحى 

من جوايا بمشيك من هنا ده شئ حيفضل محفور جوايا العمر كله مش عشان مش قادر اتخطاه من حزني على ضياعه مني لا ده عشان اتعلم منه و مكررش الغلطه دي تاني  

همسه : أبيه هادي الله يخليك ريحني و سيبني أمشي بس انا لية طلب عند حضرتك تكلملي اي حد اشتغل عنده عشان انا معرفش حد و خايفه أوي و انا محتاجه للشغل لأني سيبت البيت خلاص

هادي : سيبتي البيت رحتي فين 

همسه : رحت عند جدتي حضرتك عارف إنها بتحبني أوي و انا متعوده اقضي عندها الإجازات بس أنا خلاص أخدت حاجتي كلها و حقعد معاها على طول

هادي : ليه كده يا همسه

همسه : أبيه هادي انا جوايا حاجات كتير تعباني و خلاص مش قادره و عاوزة ارتاح و ياريت حضرتك كمان تريحني

هادي : و انتي مش حتمشي من هنا و مش حتشتغلي مع حد غيري و لا عند حد انا مش واثق حيتعامل معاكي ازاي همسه انتي غلاوتك عندي ملهاش حدود و انتي حتفضلي هنا مهما حصل و خدي بالك عندك شغل متأخر تخلصيه كله و أشوفه آخر النهار و ده آخر كلام عندي امسحي دموعك يا همسه دموعك غاليه عندي أوي ياللا يا همسه قومي حبيبتي عشان تلحقي تخلصي قبل معاد جامعتك

همسه : أبيه هادي انا مش عارفه اقول لحضرتك إيه

هادي : تقوليلي انك معايا و مش حتسيبي اخوكي الكبير مهما حصل انا محتاجك معايا يا همسه محتاج قلوب بتحبني بتشتغل معايا بحب و يبقى قلوبهم علية و مش حلاقي غيرك يكون الشخص ده

همسه : ده شرف كبير أوي لية ياابيه

هادي : انتي اللي شرف لية يا همسه ياللا حبيبتي قومي على مكتبك و تعدي علية قبل ما تمشي

همسه : حاضر

يخبط و يدخل عليهم و يتفاجئ بوجودها : صباح الخير

يردوا عليه : صباح النور

تخرج همسه من غير ما تتكلم معاه و هو يوجه كلامه لهادي : هيا همسه لسه هنا يا هادي

هادي : و إيه اللي حيخليها مش هنا يا فهد

فهد همسه ملهاش علاقه بأي حاجه و حزعل منك أوي لو مشاعرك اتغيرت من ناحيتها بسببي او معامتلك ليها اختلفت همسه نضيفه نقيه مش شبههم و هيا كمان دلوقتي عايشه مع جدتها و انفصلت عنهم

فهد : خلاص يا هادي خلاص معادش ينفع همسه كانت حلم جميل بس للأسف انتهى قبل ما يفتح عينه للدنيا

هادي : فهد الله يخليك متحسسنيش بالذنب انت بتحبها و هيا ملهاش ذنب

فهد : بس أنا بحبك انت أكتر يا هادي همسه تتعوض لكن انت مش ممكن تتعوض أنا لا يمكن أسمح لنفسي إني ادخلك في متاهه من أول و جديد و لا اخليك تشوف حد انت خلاص خرجته من حياتك و لو بالصدفه

هادي : فهد ممكن تهدى و تسمعني

فهد : خلاص يا هادي خلص الكلام و مش عاوز أفتح سيرة في الموضوع ده تاني و اطمن معاملتي معاها مش حتتغير لأنها ملهاش ذنب فحاجه أنا عارف لكن اللي جوايا ده جوايا و حيفضل جوايا و أنا متأكد ان ربنا حيعوضني خير و حيبعتلي اللي تريح قلبي

هادي : ربنا يريح قلبك يا حبيبي يا رب

فهد : حتعمل إيه مع العق.. ربه اللي برة دي كمان

هادي : ههههههه قصدك ميار مش كده

فهد : أيوة طبعا هو في غيرها اظني وجودها هنا في الشركه مبقاش ليه مبرر

هادي : بس هيا مصدرش منها تخليني امشيها يا فهد

فهد : هادي متشيلينيش و انت لسه عاوز تستنى لما يصدر منها حاجه

هادي : ليه دي حتى بتتغير للأحسن

فهد : لا و الله انت حيخيل عليك اللي بتعمله ده انت مش عارف هيا عاوزة توصل لايه

هادي : لا عارف يا فهد و عارف هيا ليه طلبت منها انها تخليني اشغلها هنا و فاهم كل حركاتها كويس و انا بعرف اوقفها عند حدها

فهد :هادي انت في حاجه مش عاوز تقوللي عليها

هادي : و أنا عمري خبيت عليك حاجه يا صاحبي بس أنا من رأيي خليها دلوقتي لحد ما نشوف اللي حيحصل و تجيب آخرها معانا و انا متأكد ان في حاجات كتير حتستفيد بيها من وجودها معانا  

المهم سيبك منها فهد انا ماشي كمان شويه خليك انت هنا معلش

هادي : آه إحنا أول الشهر صحيح نسيت و الله ابقى سلملي عليهم يا هادي متنساش و أنا إن شاء الله أفضى بس و ليهم زياره عندي

هادي : فهد متتعبش نفسك و الله انا عارف اللي عندك 

فهد : هادي أنا عارف إنك مش مخليهم عاوزين حاجه بس الناس دول غاليين عندي أوي دول من ريحة الغالي

يحتضنه هادي بكل حب و يخرج فهد من مكتبه و يعدي عليها و يبص على مكتبها كان نفسه أوي يفتح الباب و يتكلم معاها و يهزر معاها زي ما كان متعود لكن خلاص هو اخد قرار و مش عاوز يضعف تاني


بعد مرور بعض الوقت

في إحدى الأحياء المتوسطه الحال و لكنها ليست عشوائيات بل حي يعيش به الموظفون و أصحاب الحرف في إحدى الشقق تتحرك سيده تخطت الخمسين من عمرها بعدة سنوات نحو الباب لتفتحه : تحتضنه بكل حب و هو يرمي نفسه بين احضانها لينسى فيه كل ما مر عليه من أحزان يقبل رأسها و يدها : ياحبيبي وحشتني أوي يا هادي

هادي : انتوا اللي وحشتوني أوي يا أمي فين الحاج

مرزوقه : جوة يا حبيبي بيصللي العصر تعالى جمبي طمني عليك عامل إيه انت خاسس كده ليه انت فيك حاجه وشك مخطوف مالك يا ضنايا 

يخرج من الأوضة : حملك عليه يا مرزوقه سيبيه ياخد نفسه الأول يقوم هادي يسلم عليه و يحضنه : وحشتني أوي با حاج

مسعد : انت اللي وحشتنا أوي و الله يا هادي إحنا بنستنى أول الشهر زي ما بنستنى هلال العيد عشان مجيتك الحلوه اللي بتفرحنا دي

هادي : حقكم علية و الله لولا الشركه و اللي ورايا كنت جيتلكم كل يوم

مرزوقه : ربنا يقويك يا حبيبي و يعللي مراتبك كمان و كمان مسعد بيقولك كده من حبنا فيك و لهفتنا عليك

هادي : عارف و الله يا أمي و أنا مبلاقيش راحتي غير هنا بينكم و فوسطكم

مرزوقه : قللي يا حبيبي فيك ايه مالك يا ضنايا 

تشوف الدموع بتجري فعنيه ياخده مسعد في حضنه : لا حول ولا قوة الا بالله في ايه يا حبيبي ايه اللي حصل

يحكيلهم اللي حصل كله طيبوا خاطره و اتكلموا معاه كلام كتير

مسعد : ياااه سبحان الله دي مرزوقه لحد دلوقتي زعلانه اننا محضرناش الخطوبه و الفرح بتوعك

مرزوقه : اه ماحنا وقتها كنا في البلد ساعة ابوك ما كان ميت لسه و مكنش ينفع ننزل خالص تقوم هيا تعمل معاك كده


مسعد : كل واحد منه لله قومي يا مرزوقه حطي الأكل و قامت مرزوقه تحط الأكل : بقولك إيه انا عاملالك كل الأكل اللي بتحبه يقعد معاهم و ياكلوا و تقعد تأكله فبؤه و مهما يقللها شبعت تأكله بردو

هادي : أخبار محمد إيه

مرزوقه : الحمد لله و الله بخير يا حبيبي هو و ولاده بيسلموا عليك

هادي : و رقيه و فاطمه و خديجه عاملين ايه

مسعد : زي الفل الحمد لله و الله يا هادي ربنا رزقهم بناس ولاد حلال متقيين ربنا فيهم

هادي : ربك كريم يا حاج و اللي عملتوه معايا ربنا كافئكم عليه

مرزوقه : متقلش كده يا حبيبي ده انت ابننا يا هادي و بعدين هو انت عملت معانا شويه ده انت نقلتنا من التربه اللي كنا عايشين فيها و عيشتنا بين الناس المحترمين و انت اللي مجوز البنات و مشورهم و شرفتنا أدام أهل اجوازهم و محمد مين اللي سفره يشتغل برة الشغله اللي نفسه فيها مش انت ربنا يخليك يا رب و يديك و يزيدك من نعيمه و كمان طلعتني انا و مسعد الحج ربنا يجبر بخاطرك زي بتجبر بخاطرنا يارب ده احنا ربنا رزقنا و سعدنا من ساعة ما دخلت حياتنا و بقى اسمي مرزوقه و اسم مسعد على حق 

هادي : متقوليش كده يا أمي ده كله من خيركم علية هو انا لولاكم كان حيبقى لية وجود من أساسه ده انتوا اللي وهبتولي الحياه انا مهما أعمل مش حوفيكم حقكم انا عايش بدعواتكم لية

مسعد : ربنا يرضى عنك و يراضيك يا هادي يارب

هادي : فهد باعتلكم السلام و بيقولك يا أمي ان المحشي بتاعك وحشه اوي و حييجي قريب عشان ياكله

مرزوقه : يا حبيبي هو ييجي بس و انا اعملله الحلو كله ده الغالي ربنا يخليكم لبعض و يجمعكم ما يفرقكم 

ابدا و يزيدكم من نعيمه يا قادر يا كريم يا رب

...............................................

تدخل إحدى الغرف لتقوم بتبديل ثيابها و ارتداء ما يعجبه و يرضيه أملا في الوفاء بوعده معها و التزوج بها خاصة بعد أن أرسل إليها هادي ورقة طلاقها و أصبحت من وجهة نظرها حرة طليقه تفعل ما تشاء تخرج إليه بعد أن قامت بتبديل ثيابها إلى ملابس اقل ما يقال عنها أنها فاضحه بمعنى الكلمه لا ترتديها المرأة سوى لزوجها في غرفة نومهما الخاصه بهما

يطلق صفيرا عند رؤيتها بتلك الهيئه اعلانا لها عن مدى إعجابه الشديد بها : بطل

ذكرى : عجبتك

شهاب : أوي تعالي

تقعد جمبه فيسحبها و ياخدها فحضنه و يديها كأس تشربه

ذكرى : إيه ده منكر هههههههه

شهاب : إيه متعرفيهوش و اللا ايه

ذكرى : لاء أصل الصراحه هادي مكنش بيشرب أي حاجه حتى السيجارة مبيشربهاش

شهاب : أمال عايش بيعمل ايه و بعدين و انتي مع شهاب مفيش اسم راجل ييجي على لسانك انتي فاهمه

ذكرى : إيه بتغير علية

شهاب :مش مسألة غيره لكن مبحبش اسم راجل غيري يتنطق ادامي انتي فاهمه 

ذكرى : حاضر أنا مستعده أعمل أي حاجه المهم تكون راضي عني

شهاب : كل ما حتبقي مطيعه أكتر حرضى عنك طبعا 

ذكرى : و أنا من إيدك دي لايدك دي قللي بقى مبسوط إني معاك

شهاب : فوق ما تتصوري و انتي مبسوطه 

ذكرى : أوي يا شهاب بس انا خايفه أوي

شهاب : خايفه من إيه 

ذكرى : خايفه بعد ما يحصل بيننا حاجه تسيبني

شهاب : على أساس اني حبقى اخدت غرضي منك و كلام الأفلام ده لا متقلقيش بالعكس انا لو دقتك عمري ما حقدر استغنى عنك

ذكرى : يعني توعدني انك حتتجوزني بعد شهور العده ما تنتهي

شهاب : تاني يوم حكون متجوزك

ذكرى : يا حبيبي يا شهاب انا بحبك أوي 

شهاب : حاف كده مينفعش

تبوسه من خده

شهاب : لا مش كده

ذكرى : أمال ازاي

شهاب : دلوقتي حتعرفي

يسحبها من ايدها على أوضه من الأوض و يغلق الباب

ذكرى : بس عاوزة اقولك على حاجه 

شهاب : أنا اللي بقولك اياكي تقوليلي أمشي بدري أنا مفضي اليوم كله ليكي يعني مفيش مشي إلا بقى اذا ما عجبتينيش يبقى وقتها فيها كلام تاني

و ياللا بقى وريني امكانياتك و شطارتك و اشوف بقى و احكم بنفسي و اللا انتي عاوزة تضيعي اليوم من ايدنا 

ذكرى و هي بتلف ايدها حوالين رقبته : ده انت حتشوف اللي عمرك ما شفته

...........................................

في المساء يقرر يمشي هادي من عندهم بعد ما قضى معاهم اليوم كله و نام كمان عندهم شويه و لما فاق من نومه و خرج من الأوضة لقى خديجه بنتهم موجوده و معاها ابنها سلم عليها و قعد يلعب مع الولد و نسى معاه كل همومه و اتعشوا كلهم سوا

متخليك بايت معانا يا هادي الوقت أتأخر 

هادي : معلش يا أمي و الله مش حينفع في أوراق مهمه في الشقه لازم اراجع عليها و اخدها معايا بكرة ان شاء الله

مسعد : و انت لسه حتشتغل يا هادي ده انت يادوب تروح تنام يا بني

هادي : لا مانا الشويه اللي نمتهم هنا فوقوني

مرزوقه : طب خللي بالك من نفسك يا هادي

هادي : حاضر يا أمي ادعيلي يا أمي أنا محتاج دعواتك اوي 

مرزوقه: بدعيلك في كل وقت و كل صلاه و انا عندي مين أغلى منك عشان ادعيله ربنا يكرمك و يسعد قلبك و يجبر بخاطرك و يبعد عنك ولاد الحرام و يسلمك و يسترها معاك دنيا و آخره يارب يا هادي يارب

يسلم عليها و على مسعد و على خديجه و يشيل ابنها و ياخده في حضنه و يطلع مبلغ يديهوله خد بقى يا بطل هات حاجات حلوة و انت مروح لاخواتك

خديجه : ايه ده كله يا هادي لاء ده كتير و ربنا ما يحصل و تحاول ترجع له الفلوس

هادي : عيب عليكي يا خديجه هما مش ولاد اختي و اللا إيه

خديجه : أيوة بس مش كل شويه يا هادي كده بقى حتخليني لما اعرف إنك هنا مجيش أسلم عليك مادمت كل مرة تعمل كده

هادي :بقولك ايه دي حاجه بيني و بين هادي الصغير انتي مالك صح يا هادي قللها ملكيش دعوه 

هادي الصغير : ملكيث دحوة

يضحكوا عليه و هو يحضنه و يبوسه و يديهولها 

خديجه : ربنا يخليك لينا و مننحرموش منك و لا من حنيتك علينا يارب

هادي : و لا يحرمني منكم و لا من وجودكم فحياتي يارب

يمشي من عندهم و تقعد مرزوقه تبكي من قلبها

مسعد : لزمته إيه بس العياط ده يا مرزوقه

مرزوقه :الواد صعبان علية أوي يا مسعد شفته يا حبة عيني مقهور ازاي ربنا يقهرها و يكسر بخاطرها زي ما كسرت بخاطره يارب

خديجه: صراحه يا اما هيا مكنتش، تليق عليه خالص هادي ده عايز واحده هانم بت اصول تخاف عليه و تراعيه لكن اللي كان متجوزها دي كانت ياباي اعوذ بالله رافعه مناخيرها في السما و متكبره على خلق الله فاكرة لما هادي جابها معاه غصب عشان يعرفها علينا و خلانا كلنا نيجي اليوم ده فاكرة كانت بتتعامل معانا ازاي  و سمعتها و الله بوداني بس حطتها فقلبي و سكتت عشان خاطره هو سمعتها و هيا بتقولله مكنش ناقص غير الزبالين دول كمان اللي تجيبني عندهم

هادي زغرلها بعنيه و قاللها اسكتي خالص دلوقتي و لينا حساب لما نمشي الناس دول أهلي و اللي يهنيهم يبقى هانني راحت مدحلبه و جايبه معاه ناعم ساعتها رده عليها فرحني و بعدها مشوفناش وشها تاني

و الله ده هادي عمل خير انه سابها منها لله

مسعد : كل واحد منه لله يا بتي إحنا أهم حاجه عندنا هو ربنا يعوضه خير و يرزفه باللي تريح باله


 يرجع لشقته الجديده اللي اشتراها بعد ما باع الشقه اللي كان عايش فيها معاها باعها باللي فيها مش عاوز يشوف حاجه تفكره بيها عاوز ينسى أي ذكرى ممكن تخليه يفتكرها حتى الهدوم اللي كان مشتريها على ذوقها سابها  مش عاوزها و اشترى شقه جديده في أرقى الأحياء و فهد ساعده في فرشها و انتقل فيها

 رجع و غير هدومه و بيحاول يطرد اي ذكريات تيجي فباله بيحاول يركز في الشغل و بس و فجأة يعلن تليفونه عن اتصال فيرد : خير يا ميار في حاجه

ميار : انا اسفه لو كنت اتصلت عليك في وقت مش مناسب

هادي : خير في ايه اتكلمي

ميار : لا اطمن مفيش حاجه و الله ده انا بس حبيت اطمن عليك و قلت لو فاضي نتكلم مع بعض شويه 

هادي : نتكلم مع بعض و دلوقتي و بخصوص إيه الكلام ده 

ميار : بخصوصك انت طبعا

هادي : و لما هيا حاجه تخصني عاوزة تتكلمي معايا فيها ليه

ميار : عشان انت غالي عندي أوي و مش من دلوقتي لا ده من زمان أوي بس انت اللي طول عمرك مش واخد بالك لكن دلوقتي و بعد اللي حصل لازم اكون جمبك و نفسي تديني الفرصه أقرب منك و اساعدك تتخطى اللي حصل

و صدقني مش حتندم

هادي : غريبه أوي مش المفروض انك دلوقتى تكوني جمبها هيا مش دي صاحبتك بردو

ميار : جمبها ذكرى عمرها ما كانت محتاجه حد جمبها ذكرى طول عمرها بتدور على مصلحتها و بس و لما تخلص تسيبها زمان صاحبتني و اتقربت لية عشان ارفعها لفوق عشان اديها هدومي تلبسها عشان اخرجها معايا و اعرفها على ناس عمرها ما كانت حتتعرف عليهم و لما قربت منك و خليتك حبتها فده مش عشان حبتك لا ده عشان شافت فيك اللي حيحققلها كل أحلامها

هادي : ميار اولا انا مش عاوز اسمع حاجه في الموضوع ده و ثانيا معلش انا تعبان و محتاج انام

ميار : طب ممكن بس تديني فرصه اني اكون جمبك انا مش عاوزة اي حاجه غير انك تثق فية

هادي : تصبحي على خير يا ميار 

يقفل معاها السكه و يرمي التليفون من ايده و هيا تحاول تقتع نفسها انها حتقدر توصل لقلبه و تخليه يحبها : و ربنا لخليه ينساكي يا ذكرى و يمسحك استيكه


و انتي في حد يقدر ينساكي و اللا يبعد عنك بردو يا مزة

ذكرى : يعني عجبتك

شهاب : عجبتيني بس ده انتي هوستيني بجد طلعتي بطل جامده اوي يخرببيت فقرك

ذكرى : ههههههه عشان تعرف بس كنت بتقولي حتطلعي بوء

شهاب : لا الصراحه غلبتيني ما تجيبي بوسه

ذكرى : هو انت مشبعتش

شهاب : و انتي اللي زيك يتشبع منه اعملي حسابك انا خلاص مش حقدر استغنى عنك أنا لازم اشوفك على طول

ذكرى : حاضر بس خد بالك من الطريق انا مش عارفه حروح اقوللهم كل ده كنت فين احنا اتاخرنا أوي يا شهاب 

شهاب : محدش ليه حاجه عندك انتي خلاص بقيتي حرة و اللي يكلمك قوليله كنت مع شهاب

ذكرى : بجد

شهاب : امال هزار و اللي انتي عاوزاه تطلبيه و اللي بتحلمي بيه حتلاقيه تحت رجلك

ذكرى : يااه كل ده عشان عجبتك

شهاب : مش بس كده و كمان عشان مطيعه و بتسمعي الكلام

ذكرى : و انا من ايدك دي لايدك دي


يرجع و يلاقيها قاعده مستنياه : حمد الله على السلامة يا شهاب 

شهاب : الله يسلمك

جنه : تحب احضرلك العشا

شهاب : اتعشيت برة و بعدين انتي ايه اللي مصحيكي لحد دلوقتي

جنه : قلت استناك يمكن تحتاج حاجه

شهاب : لا مش عاوز حاجه

جنه : في ايه يا شهاب انت بتكلمني كده ليه

شهاب : بقولك إيه بصي أنا راجع مزاجي مبسوط و مش عاوز اعكره

جنه :مزاجك مبسوط ازاي انت كنت فين يا شهاب

شهاب : كنت مطرح ما كنت ملكيش، فيه

جنه انا حاولت معاكي كتير و عمال أراضي و اسايس و اطبطب و انتي مصدرالي الوش الجبس خلاص بقى سيبيني اروق على نفسي و ابسطها اصلي بحبها أوي 

جنه : شهاب انت بتتكلم كده ليه شهاب انت بتخونني

شهاب : ييه ابعدي عني بقى يسيبها و يطلع و هو بيغني و هيا تقعد تعيط كان نفسها أوي انها ترمي نفسها فحضنه و تحس معاه بالأمان كان نفسها تقولله على مقابلة بكرة و يقولها لاء متروحيش و انا اللي حروح له كان نفسها تحس انها مش لوحدها لكن هو سابها و طلع قعدت تدعي ربنا يعدي بكرة على خير 

يمر الليل عليهم كلهم مابين ذكرى اللي بتحلم بالنعيم اللي حتشوفه مع شهاب و ما بين ميار اللي بتحلم باللحظه اللي حتكسب فيها قلب هادي و ما بين هادي اللي النوم مخاصم عينه  و الذكريات محوطاه من كل ناحيه و دموعه اللي لسه مجفتش و ما بين فهد اللي بيقاوم احساسه بواحده قربه منها حيتسبب في حزن أغلى الناس و ما بين همسه اللي من ناحيه قلبها واجعها على هادي و من ناحيه تانيه بتفكر في واحد هو مش شايفها و من ناحيه تانيه جنه و مصيرها المجهول اللي مستنيها بكرة


في اليوم التالي 

حبيبة قلبي وحشتيني أوي يا نجلا

نجلاء : مش اكتر مني يا نودي

ناديه : يعني كان لازم يبقى ليكي قضيه هنا عشان تيجي

نجلاء : على فكرة بقى اونكل حسان كان عاوز يبعت حد تاني غيري هو اللي ييجي لكن انا قلت كلا و حاشا دي فرصتي و لن اتنحنح و لن اتزحزح و لن اتخللى عنها و سادافع عنها بكل ما أوتيت من قوه

ناديه : هههههه مجنونه و ربنا هو

انتي واقفه ادام القاضي

نجلاء : لا ياروحي انا قاعده مع حبيبة قلبي و مزتي القمر فين جنه صحيح ده انا قلت حاجي الاقيها معاكي

ناديه : قالتلي عندها مشوار حتعمله و تيجي

نجلاء : ماشي و انتي يا لولو عامله ايه

آلاء : الحمد لله و الله يا ابله نجلاء

نجلاء : و النبي بموت في ابله نجلاء بتاعتك دي سكر يا ناس اظني طبعا انتي قاعده هنا مع نودي و مبسوطه

آلاء : صراحه اه انا ارتحت لما مبقتش بشوف البشمهندس مش عارفه هو مكنش، بيطيقني ليه

ناديه : ربنا يصلح حاله يارب

نجلاء: في ايه يا طنط هو في حاجه حصلت بينهم 

ناديه : و هو لو في حاجه حتخفى عنك يا نجلاء هيا مش صاحبتك بتبلغك بالتقرير يوميا 

نجلاء: ايوة فعلا بس جنه بقالها كام يوم مكلمتنيش دي حتى متعرفش حاجه عن وجودي دلوقتي حبيت اعملهالها مفاجأة

ناديه : مش عارفه بس حساها مش مبسوطه و اليومين اللي فاتو كانت بتسرح كتير زي ما يكون في حاجه شغلاها

نجلاء : اطمني دلوقتي لما تيجي حقعدها على كرسي الاعتراف و اخليها تعترف بكل شئ

ناديه : هههههه ماشي يا ست المحاميه


يعني لازم أدخل له لوحدي مينفعش تدخل معايا يا عزت انا خايفه أوي 

عزت : للأسف هو شارط إنك تدخلي لوحدك و بعدين أنا مش عاوزك تخافي هو مش ناوي على غ.. در انتي حتعتذريله و هو حيقبل اعتذارك و تخرجي من عنده و انتي قلبك مطمن

جنه : حتستناني مش كده

عزت : للأسف مش حينفع و الله ابني تعبان في المستشفى و لازم اروحله حالا

جنه : سلامته يا عزت بس

عزت : متخافيش قلتلك و بعدين وجودي هنا مش حيفيدك بحاجه انا برة و انتي جوة

انزلي يا مدام جنه و تأكدي ان ده القرار الصح عشان تبقي مطمنه على اخوكي و ولاده 

تفتح باب العربيه و هي قلبها بيتنفض من الخوف الأمن يفتحولها البوابه و يسمحولها بالدخول تدخل في ممر طويل لحد ما توصل لباب الفيلا من جوة فتلاقي الباب بيتفتح ادامها تلقائيا تدخل و تقف مش عارفه تعمل إيه هيا مش شايفه أي حد مفيش حد موجود واقفه حسه انها تايهه مش عارفه تتصرف و سامعه صوت دقات قلبها من كتر القلق 

و فجأة تلاقيه نازل من على السلم : اهلا بمدام جنه

الفيلا نورت يا مدام 

جنه و هي بتبلع ريقها : شكرا لحضرتك بشمهندس كارم حضرتك انا جايه عشان اقولك أنا أسفه عاللي حصل مني أنا فهمت حضرتك غلط و ياريت حضرتك تقبل اعتذاري 

كارم : و انا مسألتكيش انتي جايه ليه و جودك هنا فحد ذاته شئ أكيد يسعدني

جنه : شكرا لحضرتك بس أصلي عاوزة امشي

كارم : كده على طول من غير ما ناخد حاجه مع بعض مينفعش طبعا و اللا حد قال لك علية اني بخيل 

جنه : ناخد حاجه ايه مش فاهمه

كارم : هههههههه مش عارفه ناخد إيه ياااه ده انتي بريئه أوي أنا مش عارف إزاي العصفورة اللي ادامي دي مع واحد زي شهاب صراحه اختيارك ليه مكنش محله

جنه : من فضلك يا باشمهندس لاحظ إن حضرتك بتتكلم عن جوزي ياريت يكون الكلام ليه حدود

أنا جايه اعتذر لحضرتك و ابلغك أسفي و ان حضرتك تبعد ايدك عن عيلتي


كارم : الله هو انتي زعلتي و اللا ايه و بعدين إيه دخل عيلتك انا مبهمنيش غيرك انتي و بس

جنه : يعني حضرتك مش حتأذي اخويا وولاده

كارم و هو بيتفحصها بعنيه : بقولك ايه الكلام مينفعش و احنا واقفين اتفضلي اقعدي

جنه : مش عاوزة

كارم : و انا قلت اقعدي قلتلك اقعدي يبقى تقعدي 

تخاف جنه منه و تقعد و هيا بتترعش و هو يبصلها بصه كلها دناءه بيحلم باللي حينوله منها بعد دقايق

و جنه بتفرك ايدها فبعضها و عينها زايغه مش عارفه إيه اللي مستنيها و فجأة تقف : اتمنى ان حضرتك تكون قبلت اعتذاري

كارم : مش بالسهوله دي يا جنه 

جنه : مش فاهمه

كارم : ما هو مش معقوله بعد الاهانه اللي اتعرضت ليها فبيتكم و أدام كل الناس تيجي تقوليلي آسفه و أنا ببساطه أقبل اعتذارك و تمشي كده علطول

جنه : طب حضرتك عاوز إيه و إيه اللي يريحك أنا جيت لحضرتك هنا زي ما بلغني و اعتذرت يبقى أعمل ايه أكتر من كده

كارم : طب بس انتي حتعيطي و اللا إيه ميهنش علية أشوف القمر ده و هو بيعيط

احنا ناخد درينك مع بعض ناكل عشان يبقى بيننا عيش و ملح زي ما بتقولوا كده 

جنه : لا ناكل إيه انا لازم اروح حالا

و بعدين انا مبشربش الحاجات دي 

كارم : و هو في حد مبيشربش بردو ثم إن جوزك بيشرب ايه مبتشربيش معاه 

جنه : لا و الله عمري انا بصلي حضرتك 

كارم : ماشي ميضرش بردو ساعه لربك و ساعه لقلبك

اشربي و يمد لها ايده بالكأس 

جنه : لاء مش حقدر اعفيني

كارم : و انا لما اقولك تشربي يبقى تشربي و اللا انتي مش عاوزاني اقبل اعتذارك

جنه : الله يخليك أنا عمري ما عملت حاجه تغضب ربنا من فضلك مش عاوزة

كارم : انتي مش عاوزة بس انا عاوز يا جنه 

🙏🙏🙏🙏🙏🙏🙏🙏🙏🙏

يتبع 


بداية الرواية من هنا


🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹

ادخلوا بسرعه حملوه وخلوه علي موبيلاتكم من هنا 👇👇👇

من غير ماتدورو ولاتحتارو جبتلكم أحدث الروايات حملوا تطبيق النجم المتوهج للروايات الكامله والحصريه مجاناً من هنا


وكمان اروع الروايات هنا 👇

روايات كامله وحصريه من هنا


انضموا معنا على تليجرام ليصلكم اشعار بالروايات فور نزولها من هنااااااااا


🌹🌹🌹🌹🌹🌹🌹🌹🌹🌹🌹🌹🌹🌹🌹🌺🌺🌺🌺🌺🌺🌺🌺🌺🌺🌺🌺🌺🌺🌺


تعليقات

CLOSE ADS
CLOSE ADS
close