القائمة الرئيسية

الصفحات

الأخبار[LastPost]

رواية نوح الفصل الأول والثاني والثالث والرابع والخامس بقلم أماني سيد حصريه وجديده

 رواية نوح الفصل الأول والثاني والثالث والرابع والخامس بقلم أماني سيد حصريه وجديده 

رواية نوح الفصل الأول والثاني والثالث والرابع والخامس بقلم أماني سيد حصريه وجديده 

الأشخاص 

نوح : صاحب اكبر مصانع سيارات داخل مصر والشرق الأوسط وصاحب شركه لاستيراد قطع الغيار 


شمس : بنت جميله ورقيقه متزوجة من شريف ذات شخصية مهزوزه  وهنعرف اسبابها فى الأحداث تعمل فى شركة نوح فى الحسابات 


شريف : زوج شمس شخص انانى عايش على الاطلال يعمل علمل لحام فى مصانع نوح 


شاديه : امرأة مغروره تشعر بأنها اعلى من الجميع ودائما تنظر لما فى يد غيرها حتى لو كان رجل


البارت الاول 

نوح

شمس :شريف قولى انك بتحبنى بقى

شريف : شمس اسكتى سبينى اتفرج على التليفزيون 

شمس :شريف انت مش بتحبنى 

شريف بعصبيه : شمس اقعدى بقى انتى كبيره على الكلام ده

شمس : شريف انا بحبك ليه بتعاملنى كده ليه محسسنى انك مغصوب عليا 

طيب بص فى حد تانى فى حياتك 

شريف : دى مبقتش عيشه الله انا سايبلك البيت وخارج 

خرج شريف من المنزل وجلست شمس تبكى على معامله زوجها لها وجفاء مشاعره 

دخلت غرفتها وصلت فرضها ونامت لكى تستيقظ باكراً لليوم التالى للعمل 

أما شريف ذهب للجلوس على القهوه مع صاحب عمره سليم 

سليم : مالك يا شريف فى ايه 

شريف: مش طايق نفسى ولا طايق اللى ف البيت دى 

سليم : مالها مراتك يا سليم بنت ولا كل البنات 

شريف : مش عارف احبها قلبى مع شاديه 

سليم : انت لسه بتفكر فيها 

شريف: أه 

سليم : طيب وليه اتجوزت لما لسه قلبك مع شاديه 

شريف : قلت يمكن تعرف تخلينى انساها بس هى مقدرتش 

سليم : وهى هتقدر لوحدها اتحداك لو انت اصلا بتشوف هى بتعمل عشانك ايه اسمع منى و اديها وادى نفسك فرصه 

شريف: هو انا جايلك عشان تقطمنى انا ماشى 


ترك شريف سليم وذهب للمنزل دخل غرفته وجد شمس نائمه أبدل ملابسه واستلقى بجانبها على الفراش ثم فتح هاتفه على صفحه حبيبته السابقة وفتح المحادثات التى بينهم وظل يقراءها الى ان غلبه النوم 

فى صباح اليوم التالى استيقظت شمس مع شروق الشمس واعدت فطار لها ولزوجها وذهبت لتيقظه بعد أن ارتدت ملابسها 

شمس : شريف اصحى يا حبيبي يلا عشان متتأخرش على الشغل انا جهزتلك الفطار 

شريف : طيب طيب روحى وانا جاى وراكى

استيقظ شريف وابدل ملابسه وذهب للفطار 

شمس : تحب حاجه معينه اعملهالك على العدا 

شريف : أى حاجة 

شمس : طيب قولى لو نفسك فى حاجة بعينها اعملهالك انا نفسي اعملك اى حاجه عشان تبقى مبسوط 

نظر شريف لشمس بعمق وتذكر تلك الكلمه كان دائما يقولها لشاديه 

Flash back 

شريف: ايه رايك يا شاديه فى السلسلة دى 

شاديه : حلوه بس 

شريف: بس ايه يا حبيبتي قوليلى لو مش عجباكى هغيرها فورا 

شاديه : انا كنت عايزه الطقم بتاعها كل الخاتم والحلق 

شريف: بس كده هقبض الجمعية واجبهملك على طول انا مش عايز حاجه من الدنيا غير انى ابسطك يا شاديه 

End flash back 

فاق من سرحانه على صوت شمس 

شمس : ايه روحت فين بكلمك مش بترد 

شريف : ابدا افتكرت حاجه كده بقولك ايه اعملى اى حاجه معنديش مشكله 

شمس : حاضر زى ماتحب 

خرجت شمس وشريف وذهبوا للعمل سويا 

ذهب شريف للمصنع وذهبت شمس للقسم الاداري في الشركه وقامت بمراجعة جميع الحسابات ووجدت اخطاء فى الحسابات التابعه للمعارض بمبالغ ضخمه وصعب كشفها الا بمراجعة الحسابات الرئيسيه 

قامت شمس بالتحدث مع زميلتها صفا

شمس : صفا بقولك دى حسابات فرع المعرض اللى موجود فى .... بصى فى اخطاء فى الحسابات ب ١٠ مليون جنيه 

صفا : إزاى ده 

شمس : انا حسيت بحاجة غلط لحد ما جبت ملف التسليم بتاع المعرض وعدد السيارت وعملت مقارنة لقيت فى لعب فعلا 

صفا : معنى كده إن مدير الحسابات اللى هنا مشترك هو كمان 

شمس : ده أساسى يا صفا ولو رحت قولتله ممكن يلبسنى تهمه ايه العمل 

صفا : استنى لما نوح بيه يجيى وكلميه 

شمس : يا نهار اسود نوح بيه لا يا ستى انا بخاف منه ده اليوم اللى بيجيى هنا فى الشركه بتلاقى الشركه كلها وقفت على رجل الدبوس لو وقع رنته بتسمع في الشركه 

صفا: اسمعى منى هو الوحيد اللى هيقدر يحميكى يا شمس ومش هيسمح بحاجة تخصل غير كده المال ده ماله هو وهيخاف عليه 

شمس : عندك حق طيب اوصله ازاى ده اكيد مش بيقابل أى حد 

صفا : اكيد طبعا يا بنتى وعشان تقابليه لازم تاخدى معاد وساعتها هتلاقى المدير المالى جاى يسألك عايزه تقابليه ليه وهيشك فيكى 

شمس : طيب اعمل ايه انتى بتسديها فى وشى ليه كده 

صفا : لا بصى شغلى مخك كده واعملى اللى هقولك عليه 

شمس : ايه بقى 

صفا : بكره الصبح استنيه قدام العربيه بتاعته اول ما يجيى اوقفى قدام العربيه بتاعته وكلميه على طول 

شمس : طيب والحرس اللى محاوطينه نعمل فيهم ايه 

صفا : مش انتى اللى هتعملى هو اللى هيعمل بس أهم حاجة دلوقتي لازم الورق ده يبقى معاكى اوعى تسبيه هنا

شمس : حاضر انا كده كده هاخده معايا البيت واشتغل عليه تانى 

صفا : شمس كنت عايزه اقولك حاجه وماتفهمنيش غلط

شمس : قولى يا صفا عمرى ما افهمك غلط

صفا : ممكن ماتقوليش لجوزك حاجه 

ضيقت شمس بين حواجبها 

شمس : ليه يا صفا بتقولى كده انتى شوفتى منه حاجه وحشه 

صفا : لأ بس خدينى على اد عقلى خلى الموضوع ده بينا دلوقتي 

شمس : جوزك قالك حاجه 

( صفا مرات سليم صاحب شريف ) 

صفا: لا طبعا وماتنسيش انهم صحاب بس الشغل حاجه وعلاقتكم في البيت حاجه تانيه 

شمس : ماتقلقيش يا صفا إحنا اصلا مابنتكلمش في حاجه عايشين زى الاغراب يمكن الاغراب بيحاولوا يقربوا من بعض إنما إحنا لأ هو مش بيحاول ولما انا بحاول هو مش راضى 

صفا: طيب وانتى ايه اللى مصبرك على كده يا شمس انتى حلوه والف واحد يتمناكى ليه راضيه بكده 

شمس : نصيبى وانا بحبه يا صفا بس جايز انا فيه حاجه ناقصه عشان كده مقدرتش اخليه يحبنى 

صفا : ايه اللى بتقوليه ده يا شمس انا واثقه ان العيب فى هو 

شمس : طيب ممكن تتكلمى مع سليم تعرفى هو بيحب ايه او الحاجات اللى بتشده وكده وانا هعملها والله 

صفا بصت لشمس بشفقه لانها علمت من شريف انه كان يحب امرأة اخرى وكان يعاملها كالاميره ويفعل لها ما تريده وهى لا تقوى لقول هذا الكلام لشمس حتى لا تتعب من نفسيتها اكتر 

صفا : حاضر يا شمس هقوله 

فى جهه اخرى في قصر من قصور الاحلام قصر نوح الرفاعي يسكن به مع أخته الصغيره وابيه وزوجه ابيه وابنتها وابنها 


وقت الغداء يجلس الأب وبجانبه زوجته وبجانبها ابنتها وفى الجهه الاخرى اميره ابنته الصغرى واخت نوح وبجوارها كرسى فارغ ويقابلها الجهه الاخرى هيثم اخو شذى وبجانبه شذى بجانب امها 

الرفاعي: فين نوح مجاش ليه 

اميره وهى أميره حقا : زمانه نازل يا بابا 

واثناء حديثهم دخل عليهم نوح جلس بالجانب الاخر من الطاوله واشار بأصابعه كى يضعوا الطعام 

الرفاعي: طيب قول السلام حتى 

نوح : انا محدش يقولى اقول ايه ومقولش وبعدين مش شايف حد يستاهل ارمى السلام عليه 

نظر له الجميع بحقد معادا اخته التى نظرت اليه بحب فهى تعلم كم العناء الذى قابله نوح حتى تحول لتلك الشخصية الحاده وما واجهه من خذلان من الناس حوله حتى ابيه 

نظر له الرفاعى بحيرة هو أخطأ كثيراً بحقه وبحق أمه لا ينكر هذا ولكنه فاق مؤخرا ورفض نوح مسامحته لما فعله معه ومع أمه  التى لا يعلم مكانها إلى الان ولا يعلم هل نوح على علم بمكانها أم هى فعلا اختفت 

تناول نوح طعامه وقام للذهاب إلى الخارج 

الرفاعي: انت رايح فين 

نظر اليه نوح نظره اسكتته قامت أميره بحضن اخيها وهمست له فى اذنه ابتسم لها نوح وخرج مره اخرى 

إلهام زوجته الثانية 

انا نفسى افهم انت إزاى سامحله يكلمك بالطريقة دى انت فى الاول والاخر ابوه 

أميره : انتى بتدخلى بينهم ليه مش انتى السبب في اللى حصل بينهم 

إلهام: انا السبب ازاى يعنى كل ده عشان انا وابوكى حبينا بعض واتجوزنا لاحنا اول ولا آخر ناس تتجوز ولا ابوكى اول ولا اخر راجل يتجوز على مراته 

أميره : بس مش كل الابهات عملت اللى جوزك عمله ولا كل الابهات قدمت مصلحت اولاد جوزها على اولادها زى ماهو عمل

الرفاعي: اميره اتكلمى كويس 

أميره: انا بتكلم كويس وعارفه انا بقول ايه وانا ونوح عمرنا أبدا ابدا ماهنسامحك على بعد ماما عننا وعن اللى عملته معاها 

وسابتهم وقامت ونظر هيثم لها بخبث وشذى وإلهام بحقد

إلهام: عجبك كده 

قام رفاعى من مكانه وسابهم ومشى وخرج الجنينه 


نرجع مره اخرى لشمس 

ذهب شمس للمنزل واعدت الطعام وذهبت لشريف لتخبره 

شمس : شريف شريف اصحى عشان تاكل 

شريف نظر فى الهاتف وتركه مفتوح وقام للدخول للمرحاض لغسل وجه 

امسكت شمس الهاتف ووجدته مفتوح على صفحه لامراءه ما على موقع للتواصل الاجتماعي 

امسكت الهاتف وبيد مرتعشه فتحت المحادثه بين زوجها وبين تلك المرأة 

وجدت محادثات رومانسيه بين تلك المرأة وبين زوجها وكم من مشاعر حرمت هى منها وتمنتها منه ولم تجدها 

وجدته يقول لها انها عالمه الذى دائماً وأبدا تمنى ان يعيشه معها دائما ما يقول لها طلباتك اوامر على تغولت اكثر فى المحادثات وجدت بعض مقاطع الفديو وهو يقبل يدها واثناء ماكان يعطيها هدايا وجدت منه لها ماتمنت ان تعيشه هى معها 

خرج شريف من المرحاض تفاجئ بشمس تضع يدها على فمها وتنظر الى هاتفه وتبكى علم انها رأت ما كان يشاهده هو 

اقترب منها و ....


البارت الثاني 

اخذ شريف من يدها الهاتف بعنف 

انتى من امته بتتجسسى عليه 

شمس: لا والله مش بتجسس بس ليه ليه ماحبتنيش كده رد عليا اشمعنى هي 

هى ازيد منى فى ايه

شريف : عشان انتى زوجه فاشله كنت فاكر بارتباطى منك هقدر انساها واحبك لكن انتى فاشله مقدرتيش تخلينى احبك 

شمس : طيب هى عملتلك ايه عشان تحبها الحب ده كله قولى وانا اعملك زيها بس حبنى 


شريف: اديكى عرفتيها ابقى اساليها بقى ومن هنا ورايح بطلى تسألينى كل شويه بتحبنى ولا زفت  اديكى عرفتى لواحدك 

انتهى شريف كلام معها وتركها وخرج ليأكل دون الاهتمام بها او بمشاعرها 

ذهبت شمس للمرآه ونظرت لنفسها وتتامل ملامحها وجسدها فهى ذات جسد ممشوق وجميله الملامح إذا لماذا لم يستطيع زوجى أن يحبنى 

اصبحت شمس تحدث نفسها 

هو انا وحشه مايمكن انا وحشه بس انا اللى شايفه نفسى حلوه ماهو اكيد محدش بيشوف نفسه وحش طيب اعمل ايه تانى بهتم بيه وبنفسى بعمله الحاجه قبل ما يطلبها طيب اعمل ايه تانى اخليه يحبنى وينساها إزاى 

يمكن انا محتاجه اهتم بنفسي اكتر اه اكيد طبعا انا من بكره هنزل اشترى ملابس بيت حلوه كده زى العرسان يمكن اللى عندى زوقهم وحش وهو محبهمش وهروح الكوافير واغير لون شعرى اعمله زيها كده 

دخلت شمس على الصفحه الخاصه بحبيبه زوجها ونظرت إلى صورها وطريقة ملابسها استغربت كثيرا من هذه الفتاة هل زوجها يفضل الملابس الفاضحه والشعر الاحمر 

إذا ستفعل ذلك 

قامت شمس بحفظ صوره تلك الفتاة على هاتفها لتقوم بتقليدها يمكن هذا الشئ يجعل زوجها يحبها 


عند بطلنا 

دخل فيلا صغيره وجد فيها سيده راقيه تجلس بشكل راقي ترتشف من فنجان القهوه وتنظر امامها بسرحان 

نوح : ست الكل احلى واجمل واحده 

مرفت : يا بكاش مش هتبطل بكش بقى 

نوح : والله اللى يشوفك استحاله يديكى سنك 

مرفت: على فكره بقى انا ببقى عايزه سنى يبان عليا بفرح بيه وبكل تجعيده في وشى وكل شعره بيضا لانهم شاهدين على سنين عمرى اللى عشتها بحلوها ومرها

نوح : مش ناويه ترجعى بقى 

مرفت : بالعكس انا مرتاحه كده بعيد عن الكاميرات والصحافة والقيل والقال بخرج واروح واجى براحتى بدون ازعاج عايشه فى راحه بال ارجع ليه 

نوح: ترجعى تعيشى فى بيت ابنك وتتمتعى بالعز اللى هما عايشين فيه 

مرفت: وانا كده مش عايشه في عز عندى اللى يخدمني وياخد باله منى وانت واختك حواليا دايما هعوز ايه تانى 

نوح : لو مش عايزه ترجعى عشانهم عرفينى وأنا هتصرف 

مرفت: نفسى يا نوح تفهم انا اللى اخترت اعيش كده محدش جبرنى 

ابوك ومراته ربنا مسلط عليهم نفسهم وفاكرين انهم مستمتعين بحياتهم انما فى الحقيقة هما عايشين حياه مذيفه هل ابوك يقدر ينزل يشترى حاجه بنفسه هو ولا مراته من غير الناس ماتتلم حواليهم ده غير الناس المنافقين اللى حواليهم اقولك على حاجه 

أكبر عقاب ربنا ممكن يعاقب بيه إنسان إنه يعمى بصيرته ويسلط عليه نفسه يكدب الكدبه ويصدقها ويفضل حاسس إنه مظلوم ويسلط عليه ناس حواليه تسمعُه اللى هو عاوز يسمعه.. فاللهُم لا تجعلنا ممن تُعمى بصائرهم.

اوعى يا نوح تبقى زى أبوك اوعى بره اه لكن ماتقلدوش أبدا 

نوح : بطلتى تحبيه كرهت*يه

مرفت : مافيش مشاعر عندى خالص ليه ولا حلوه ولا وحشه اصل الكر*ه زى الحب وفى ناس مبتعرفش تفرق بينهم انت ممكن تشوف واحد قلبك يدق من الحب ويطير جواك كده وتشوف واحد تانى قلبك برضو يدق بنفس القوة بس كر*ه انا بقى قلبى بقى خالى من ده وده لما بشوف اخبارهم مابحسش بحاجة خالص

نوح : سامحتيه على ظلمه ليكى 

مرفت: لأ ومش هنسى عشان ماسمحهوش عليه 

استحاله انسى يوم مادخل عليه بالهام وقالى دى مراتى وست البيت ده وتقبلى الأمر عشان ولادك استحاله انسى انه كان بيسمع كلامها ويخاف يبات عندى فى الاوضه او يغير هدومه لحسن تزعل منه وتتقمص 

استحاله انسى انه كان بيجيى عليكم عشان خاطر ولادها وكان بيسفرهم ويفسحهم معاها وانتوا لأ استحاله انسى لما كتب لابنها الشركه الام قبل مانت ترجعها تانى

استحاله انسى السبب الأساسي اللى خلانى ابعد لما وقعت العصير عليها وسط الضيوف واتهمتنى انى انا اللى وقعته عليها عشان غيرانه منها ولما رديت عليها ابوك مرعاش سنة ولا مكانتى وضربنى بالقلم قدام الناس دى استحاله تتنسى 

ضم نوح ايده بغضب  من الغيظ على كل الذكريات اللى مامته قالتها لانه يوم مدافع عنها ابوه حبسه هو واخته اللى مكنش ليها أى ذنب وطرد مامته قدام الحضور حاول يهرب عشان يلحقها بس الحرس لحقوه 

نوح : بس انتى طلعتى اذكى منه يا مرمر اشتريتى الفيلا دى وبعدنى عنه وكلمتى الشغاله وبقينا نجيلك ونقعد معاكى من غير مايحس انتى اخدتى كل الحب منى انا واختى ليكى لواحدك 

اثناء حديثهم دخلت أميره 

اميره: بتجيبوا برضو فى سيرتى مش هتبطلوا بقى نميمه عليا 

اميره بصت لنوح : ابوك هيموت ويعرف انت بتختفى فين وازاى وشاكك انك تعرف مكان ماما 

نوح : يشك ولا مايشكش هو مالوش عندنا حاجه حتى لو عرف مكانها مايفرقش معايا 

مرفت: انا اللى مش عايزاه يعرف انا فين ولا عايزه اشوفه 

اميره: عارفه يا ماما اوقات كتير بحس بالندم في عين بابا وانه كره إلهام دى بعيالها بس بيكابر عشان يقنع نفسه انه صح 

مرفت: ولا يفرق معايا ومش هنقضى اليوم كلام عليه غيروا سيرته بقى 

وعشان اريحك ومنتكلمش في الموضوع ده تانى انا مش هظهر غير يوم فرح حد فيكم غير كده لأ 

ماشى المهم هناكل ايه 

مرفت : ايوه كده تعالوا بقى ناكل ونبدأ اليوم 

دخلت مرفت مع الاولاد واتغدوا سوا وحلوا وفضلوا يضحكوا ويهزروا ويلعبوا طاوله ودومينو و بلايستيشن 

أميره : مش هنسافر نصيف بقى زى كل سنه 

نوح : عايزه تروحى فين يا قرده 

اميره : الساحل طبعا 

نوح : طيب نسافر الاسبوع الجاى عشان الفترة اللى جاية داخل على شغل جامد جدا وهاخد توكيل قطع غيار جديد ومش هفضى قبل شهر ونص كده 

أميره : قشطه انا شنطتى جاهزه لو بكره تمام

مرفت: لا خلينا الاسبوع الجاي عشان كمان خالك يجيى بولاده ونبقى ومس 

نوح : اللى تؤمرى بيه يا عسل 

انتهى اليوم وعاد نوح وأميرة للمنزل 


فى اليوم التالى صباحا نهضت شمس وفعلت روتينها اليومى واستيقظ شريف لتناول الفطور 

شمس: شريف انا هتاخر انهارده شويه عندى مشوار محتاجه اشترى كام حاجه كده للبيت وليه

شريف : اعملى اللى انتى عايزاه 

( شريف وشمس كل واحد مسئول عن نفسه ومصروف البيت اغلب الوقت شمس اللى بتجيب الطلبات من مرتبها ) 

ذهبت شمس للشركه وانتظرت عند الباب الخلفي وانتظرت قدوم نوح وعندما رأته وقفت امام السياره 

نزل الحرس من السيارة ليتعرفوا على هويتها ولكن شمس اسرعت بالركود نحو نوح 

شمس : لو سمحت انا موظفه هنا فى الشركه فى قسم الحسابات اسمى شمس عبد الله وعايزاك فى موضوع مهم جداً ارجوك 

نوح : تعالى نتكلم جوه 

شمس : مش هينفع 

ضيق نوح مابين حاجبيه : ليه 

شمس : ممكن نتكلم فى العربيه 

صعدت شمس ونوح للسياره كى يتحدثوا 

شمس : ده ورق الحسابات اللى جاى من معرض ..... فى لعب كبير جداً في الحسابات هناك وللأسف فى حد هنا متورط معاهم 

نوح : وانتى عرفتى منين 

شمس : عشان انا اللى عامله الميزانية بتاعت ال٦ شهور اللى فاتوا ومسجله موردين ليهم كام عربيه بالظبطت ومسجله كل بيانات المعارض وهتلاقى كل حاجه علل الفلاشه دى 

فى عربيات وقطع غيار محذوفه نهائى من الملف كانها مطلعنش من هنا اصلا بس فى ملف بتاع التسليم لا طلعت العربيات دى فيه 

نوح : طيب ليه خايفه تاخدى معاد وتكلعى تقبلينى في المكتب 

شمس : مش عايزه حد يضايقنى ولا حد يعرف انى أنا اللى بلغت عشان مايجليش اذى بعد كده 

نوح : حد غيرك يعرف الكلام ده 

شمس : اه صفا صحبتى وزملتى في المكتب ودى انا ضمناها 

كتب نوح اسم شمس فى ملاحظه جانبيه داخل الملف 

نوح : شكرا يا انسه شمس وانا هتصرف بمعرفتى 

شمس : لا شكر على واجب عن أذنك 


خرجت شمس من السياره وذهبت للباب الامامى ودخلت الشركه بشكل طبيعي وصعدت للمكتب وجدت صفا تجلس 

صفا : ها عملتى ايه 

شمس: طيب الاول صباح الخير 

صفا: صباح الخير يا ستى ها عملتى ايه 

شمس : عملت زى ما قولتيلى بالظبطت ومن كتر خوفى منه كنت بتكلم بسرعه عشان اخلص الحوار معاه بسرعه وكمان اديته الملف و الفلاشه اللى عليها المستندات القديمة الأساسيه 

صفا: جدعه يا شمس 

شمس : بقولك ايه ماتسيبى ابنك عند امك انهارده وتيجى معايا 

صفا : فين 

شمس : هروح الكوافير اغير لون شعرى وعايزه اجيب لبس حلو كده يليق عليا 

صفا: بس لون شعرك حلو اوى يا شمس اوعى تغيريه لكن لو حابه ننزل نجيب لبس ماشى انما بلاش تقصى شعرك ولا تغيرى لونه 

شمس : اصل شريف بيحب كده

صفا : هو طلب منك كده 

شمس: لأ 

صفا : آمال ايه

شمس : اصلى أكتشف انه بيحب واحده فكنت عايزة ابقى زيها يمكن يحبنى 

صفا : 😳😳

قولى انك بتهزرى يا شمس وانى سمعت غلط

شمس حكتلها كل اللى حصل 

صفا : شمس اوعى تيجى على نفسك اكتر من كده انتى عزيزه النفس واعلى منه سواء ماديا او اجتماعيا انتى ناسيه باباكى الله يرحمه كان ايه واخوكى لو عرف كده رد هيتبسط بيكى 

شمس: بحافظ على بيتى عايزه جوزى يحبنى 

صفا: انتى حره

انتهى يوم العمل وخرجت صفا وشمس وقامت شمس بجميع المشتريات التى تلزمها وقامت بتغيير لون شعرها بلون اورانج فاصبحت اكثر جمالاً ورقى 

ذهبت للمنزل لم تجد شريف فقامت بتجهيز الطعام التدذى اشترته وقامت بتخضير نفسها من أجل زوجها كى تبدوا جميله فى عينيه ويحبها 

دخل زوجها المنزل ووجدها بهذه الحالة نظر لها شريف بصدمه وقال : 

ياترا شريف ناوى على ايه هل هيتقبل شمس ولا فى مفاجأة جديدة 

البارت الثالث 


دخل شريف من باب الشقه واتفاجئ بشمس 

اللى مزينه البيت بشكل لطيف ومزينه شكلها بشكل مغرى جدا 

شريف بضحك : ايه ده 

شمس: عجبك صح وقربت منه 

شريف بعد خطوه مش عارف اقولك ايه يا شمس بصراحه بس مش لايق عليكى 

حد سمع صوت قلب بيتكسر ايوه هو ده صوت قلب شمس 

شمس: أنا عملت كده عشانك انت يا شريف 

شريف: مش عارف يا شمس بس لون شعرك غريب انا قولتلك اعملى زيها بتفتكسى ليه من عندك 

شمس: كل الناس قالتلى انى حلوه 

شريف: طبيعي يجملوكى

شمس بدموع : انت شايفنى وحشه يا شريف 

شريف: أنا شايفك عادية بس الأول كان احلى انا اتعودت على شكلك القديم 

بس فى العموم الجو لطيف ومشجع لينا وغمزلها 

حاولت شمس تتمالك دموعها امامه كى لا تزعجه قضى اليوم بينهم عبارة عن مشاعر جافة لم يهتم بمشاعرها او يسمعها ما يدغدغ مشاعرها بل اغمض عينيه وناداها بإسم شاديه 

Flash back 

شاديه تلك التى خطفت لبه وأهلها اجبروها بالزواج من زوج اخر لأنه حينها لم يكن يعمل كان فى بدايته عبارة عن عامل فى ورشة وأهلها حينها عاملوه بتكبر وهى لم تستطع مخالفة رأى أهلها فتركته وتزوجت ابن عمها والان هى منفصلة وقام هو بالتواصل معها ومنتظر ردها عليه بينما زوجته شمس هى زوجه جميله قابلها فى بدايه عمله في تلك الشركه حيث ان صاحبه سليم هو من رشحها له وقامت صفا بعزومتهم وساعدتهم في التقرب من بعض كانت نيه صفا فى ذلك الوقت ان تصبح رفيقتها زوجه صديق زوجها كى يستمتعوا بوقت اكبر بصحبه بعضهم 

ولم تكن تعلم صفا بماضى شريف ولكن بعد زواج شريف من شمس ندم كثيرا سليم انه كان من ضمن الاسباب لجمعهم لأنه يرى أن شمس تستحق الافضل وتستحق من يحبها لنفسها ظن انها تستطيع ان تجعل صديقه يحبها لكن للأسف هى التى انظلمت 

Back 

قامت شمس فورا ونادي عليها شريف 

انتى فصيله ليه كده ايه ده ايه المشكلة يعنى لو غلطت في اسمك وترجعى تقولى مش عارفه تخلينى احبك ليه سبينى افتكرك هي ايه المشكلة 

جلست شمس تبكى داخل المرحاض 

وتنظر الى المرأة 

شمس :هو ازاى كده ازاى بيقدر يجرحنى كده ليه انا عملتله ايه وهو كمان اللى زعلان يارب مبقتش قادره على الوجه ده اتوضت ودخلت صلت وفضلت تدعى ربنا يصلحلها الحال 


فى مكان اخر تجلس تلك شاديه وتتحدث مع صديقتها وفاء 

وفاء: يعنى شريف رجع يكلمك تانى 

شاديه: اه وانا عارفه انه من زمان متابع صفحتى عشان كده سايباها مفتوحه وبتعمد كل شويه انزل ليه صور شكل 

وفاء: وانتى ناويه على ايه ده اتجوز يا شاديه ماتخربيش بيت حد 

شاديه: هو الراجل لو اتجوز على مراته حرام لأ طبعا بالعكس بقى دى هى اللى هتشيل ذنبه انها تمنعوا انه يتجوزنى

وفاء : طيب اهلك اللى رفضوا قبل كده هيرجعوا يوافقوا عليه 

شاديه: أولا انا اللى رفضته مش اهلى بس جبتها من ناحية اهلى ثانيا اه طبعا دول ماهيصدقوا عشان يخلصوا منى وخصوصاً لو مش هيدفعوا فلوس 

ثالثا بقى انا مش هشيل مسئولية بيت ولا غيره واطلق بسبب شغل البيت والقرف ده لا مراته بقى تعمل وانا ابقى هانم والشركة بتاعته دى الراجل بتاعها ده غنى أوى اوى وبيدى مرتبات عاليه أوى 

وفاء: وايه مضمنك انه هيوافق يتجوزك مايمكن بيسلى نفسه 

شاديه: طيب نتراهن دلوقتي انى اول ماكلمه تانى يوم يجيى يتجوزنى 

وفاء: انتى واخده قلم جامد فى نفسك 

شاديه: طيب هوريكى 

قامت شاديه بالاتصال على شريف فى ذلك الوقت كان شريف يدخن داخل الشرفه 

وجد هاتفه يرن باسم شاديه فتح فورا دون انتظار 

شريف: ألو شاديه 

شاديه كانت فاتحه اسبيكر عشان تسمع وفاء ازاى شريف خاتم فى صبعها 

شاديه: اه انا يا شريف اللى اتجوزت ونستها 

شريف: لأ طبعا يا شاديه عمرى مانساكى انا بحبك وانتى عارفه كده 

خرجت شمس واستمعت لباقى المكالمه 

شاديه: وانا كمان لسه بحبك ومقدرتش اعيش مع جوزى بسبب انى دايما بفكر فيك 

شريف: بجد يا شاديه 

شاديه بمسكنه : أه طبعا بس خلاص للاسف مش هقدر اكلمك تانى انت واحد متجوز واكيد بتحب مراتك صح وهى طبعا هترفض اننا نتجوز

شريف : لأ طبعا انا من بكره اجى تانى واتقدملك واتجوزك وافقى انتى بس وهتشوفى 

شاديه: ومراتك 

شريف : مالها 

شاديه: هتوافق 

شريف: أه طبعا هى بتحبنى ولو قولتلها مش هتعارض ولو معجبهاش هطلقها واتجوزك 

خلاص يا شريف تعالى انت وهى بكره بعد المغرب واتقدمولى وانا هكلم اهلى وهضغط عليهم عشان يوافقوا 

شريف: بجد يا شاديه ده احلى يوم في حياتي هستنى بكره بفارغ الصبر يا روحى واجيلكم واى حاجه اهلك يطلبوها انا هجبهالهم فورا اهم حاجه انتى 

دخلت شمس غرفتها تبكى بقهر من زوجها لهذه الدرجة يعشق غيرها وهى ماذا تنتظر لماذا لا تنفصل عنه 

شمس لنفسها: يمكن لما يتجوزها وياخد اللى عايزة حبها يقل من جواه ويحس بيا والانبهار بيها يروح ويمكن يقارن بينا ويلاقينى ست بيت شاطره فيحبنى انا ويسبها ممكن ده يحصل او حتى مايسبهاش بس يحبنى انا مش عايزه ارجع اعيش وحيده تانى او اعيش مع اخويا ومراته وعياله واتقل عليه خلاص انا هعمل اخر محاولة معاه 

( للاسف فى جزء كبير من الروايه واقعى من البطله نفسها فرجاء بلاش نغلط في البطله ونصبر مانستعجلش فى الحكم طبعا انا ضفت بعض الشخصيات الوهمية بس شخصية شمس ووالده نوح مقتبسين من الواقع) 


دخل شريف على شمس الغرفة وجلس امامها 

شريف: شمس كنت عايز اكلمك فى موضوع 

شمس : خير يا شريف 

شريف: انا قررت اتجوز 

شمس: مين 

شريف: شاديه وعايزك تيجى معايا نخطبها انتى عارفه انى بحبها وده لا بايدى ولا بايدها وانت عارف انك اصيله وبتدورى ازاى اكون مبسوط

شمس: طيب وانا 

شريف: هتفضلى زى ما انتي بالعكس وقتها غلاوتك عندى هتزيد عشان ساعدتينى انى اتجوز اللى بحبها ها ايه رايك 

شمس: حاضر يا شريف هنروح امته 

شريف: بكره 

شمس: انت مستعجل اوى كده 

شريف: ولزمتها ايه نستنى ها قولتى ايه 

شمس: اللى تشوفه عن اذنك بقى هنام عشان الشغل بكره 

فى اليوم التالى صباحا ذهبت شمس للشركه ولكن اليوم كان مختلف كان الجميع في حالة من التوتر غير مسبوقة ذهبت شمس الى مكتبها وسالت صفا عما يحدث 

صفا : اسكتى نوح بيه فرم المدير المالى بتاع الشركه ومش بس كده ده رفده هو ومدير الفرع واخد منهم كل الفلوس اللي سرقوها وعلاوه على كل ده منع أى شركة تانيه تشغلهم 

شمس: معقول ده بالسرعه دى 

صفا: واحد زى نوح بيه ده بيشاور بس بصباعه والكل ينفذ أوامره ماشوفتيش انتى المدير المالى وهو واقف بيترعش بس عارفه كمان مين اللى كان مشاركهم ومسلطهم ومجمد قلبهم 

شمس: مين 

صفا : هيثم ابن مرات ابوه بس شكله المره دى هيطلع عليه القديم والجديد هو واقفله على غلطه وبصراحه الواد التانى ده غتت ويستاهل إنسان فاشل

شمس: اه فاكره لما كان ماسك الفرع هنا فى بداية شغلنا 

صفا: ودى حاجة تتنسى 

اثناء حديثهم رن هاتف المكتب كانت السكرتيرة الخاصه بنوح تتصل بها 

ذهبت شمس لمكتب نوح ووجدته ينتظرها دخلت بخوف شديد منه فهو ضخم ذات جسم رياضي ملامحه حادة للغاية يرهب من ينظر له من بعيد فماذا عن الحديث معه 

شمس : السكرتيرة قالتلى إن حضرتك عايزنى 

نوح : اه بصى يا مدام شمس انا اتاكدت من كل البيانات اللى ادتهانى والغريب ان الحسابات كانت ملعوبه بطريقة صعب جدا كشفها ورغم كده انتى قدرتى تكشفيها وده معناه أولا انك حد شاطر ومركز فى شغله وأمين كان ممكن تساوميهم وتاخديلك قرشين لكن انتى خاطرتى وجيتيلى 

عشان كده انتى هتمسكى المدير المالى الجديد وهسيبلك اختيار انك تختارى مساعده ليكى فى الشغل وكل اسبوع هاجى هنا وهستنى تراجعى معايا حسابات الشركة والمعارض بتاعت الاسبوع ده اتفقنا 

شمس: دى ثقه كبيره جدا من حضرتك واتمنى اكون قدها 

نوح : هتكونى قدها بإذن الله 

شمس: طيب صفا زميلتى فى المكتب هختارها المساعدة بتاعتى وعلى فكره هى اللى قالتلى فكره انى اقف قدام العربيه بتاعتك لانى مكنتش عارفه اوصلك ازاى 

نوح : تمام مافيش مشكله تقدروا تستلنوا شغلكم من انهارده وهتلاقى موظف من ال hr هيساعدكوا وهتمضى عقد جديد بمرتب جديد انتى وزميلتك

شمس: ده كده كتير اوى المرتب القديم كان كبير 

نوح: مبحبش اقول الكلمه مرتين اتفضلى يلا 

خرجت شمس وهى فرحانه وسعيدة جدا وراحت لصفا وقالتلها الخبر وهما الاتنين فرحوا سوا 

انتهى يوم العمل وذهب نوح للقصر ودخل بوجه غاضب وجد أمامه ابيه وزوجته 

نوح : فين هيثم 

إلهام: حصل حاجه ولا ايه 

نوح : بعلو الصوت هيثم 

إلهام: فى ايه مالك ومال ابنى 

نوح : مالى ماهو مالى فعلاً يا شويه حرميه 

الرفاعي: فى ايه يا نوح وازاى تتكلم كده

نوح : هتخلوا النط*ع اللى فوق ده ينزل  يكلمنى ولا اطلعله انا ولو انا اللى طلعت فدى هيكون ليها حساب تانى 

نزل هيثم بخوف من منظر نوح وكلامه شافه نوح تقدم منه ومسكه من قميصه من الخلف وحدفه للحرس 

نوح : الواد ده يتحط فى المخزن ٣ ايام من غير اكل وشرب الامل والشرب يدخلوله مره واحده فى نص اليوم ويتحطله نص رغيف فول فاهمين 

هاجت إلهام وجريت مسكت ابنها 

انت اتجننت انت بتعمل ايه 

نوح : اخرصى خالص اى كلمه هتقوليها هحبسك معاه حذارى اسمع صوت حد 

هيثم برعب : انت بتعمل كده ليه انا عملتلك ايه هو افترى وخلاص 

نوح : اوعى تكون فاكر يلا ان الحسابات الهبله اللى حاولتوا تكروتوها عدت عليا لا يا روح امك انا قفشتها وهما اعترفوا عليك هما خلاص خدوا جزائهم انما انت بقى هاخد حقى منك على الهادى وهتدفه ال ١٠ مليون اللى سرقتها يا حرامى 

هيثم : دول كدابين 

نوح: انت اللى كداب هو انا تايهه عنك 

هيثم : اه قول كدهةبقى بتاخد حقك منى عشان ابوك طردك زمان وفضلنى عليك وكان كاتبلى الفرع الرئيسي للشركة 

نوح بضحك : تصدق يالا هزتنى وعشان الهزه الكبيرة دى شاور للحراس روقوا بقى عليه عشان بعد كده يعرف يتكلم ازاى 

ومتنساش يا حيلتها ان الشركه والمصانع وكل حاجه باسمى حتى اللى بتقول عليه ده بكل اللى عمله معاك دلوقتي مافيش ملكه اى حاجه وانا اللى بصرف عليكوا كلكم اى حد مش عاجبه كلامى يطلع بره البيت ده 

الرفاعي: عيب يا نوح تتكلم عنى كده 

نوح : مش انت اللى هتعرفنى العيب انا امى معرفهونى كويس اوى وعشان هى معرفهونى انا سايبك لحد دلوقتي قاعد هنا مع الشياطين بتوعك 

سابهم وطلع وسط صراخ هيثم وإلهام 


عند شمس دخلت فرحانه لقت شريف بيلبس 

شمس : شريف باركلى مش انا اترقيت 

شريف بتجاهل لكلامها 

البسى بس دلوقتي يا شمس ونتكلم بعدين يلا عشان احنا متأخرين

شمس : طيب مش هتقولى مبروك او اترقيت ازاى 

شريف: بعدين بعدين 

نظرت شمس لفرحه شريف وعينه اللى بتلمع نظره عمرها ما شفتها فى حياتها معاها 

شمس : 

ياترى شمس هتفضل سلبيه كده لحد امته 

ياترى فى اسرار تانيه فى حياه نوح 

البارت الرابع 

شمس : شريف طيب اسمعنى وقولى مبروك 

شريف: مبروك يا ستى ويلا بقى عشان منتاخرش 

شمس مسكت شريف من ايده وبصتله فى عينه 

طيب راعى مشاعرى وكلمنى حتى باهتمام دى اقل حاجه تقدمهالى متنساش انى مراتك وهاجى على نفسى واروح معاك تتجوز اللى بتحبها

شريف: يا شمس انتى اللى جاية تكلمينى فى وقت غلط سبينى بقى وشد نفسه منها 

دخلت شمس لبست وكانت جميله كالعادة 

نزلوا وركبوا عربيه شريف ووصلوا لبيت شاديه وجدوا أهل شاديه فى انتظارهم 

دخل شريف وجلس وبجانبه شمس ومن الجهه الاخرى شاديه وبدأ شريف فى الحديث 

شريف : أنا جاى يا عمى طالب ايد بنت حضرتك شاديه 

والد شاديه: انا شاديه كلمتنى وحكتلى ظروفك كلها وبصراحه انا مش هكون مطمن عليها 

شريف: ليه مش هتكون مطمن انا بحبها وهجبلها كل اللى نفسها فيه 

والد شاديه: وانا عشان اطمن على بنتى وانك فى يوم ماتتخلاش عنها وتكتفى بمراتك القديمه لازم تامنهالى 

شريف: ايه المطلوب وأنا اعمله طيب

والد شاديه: تكتبلها الشقه اللى انتوا قاعدين فيها دى باسمها ها قولت ايه 

نظر شريف لشاديه وهى هزتله دماغها بمعنى وافق 

وافق شريف على طلباتهم جميعا وكانت شمس تنظر لما يحدث بزهول كانها فى حلم لم تستطع أن تفوق منه أهذا زوجها حبيبها من كانت تترجاه ليقول لها كلمه طيبه الان تراه يفصح عن مشاعره امام الجميع لكن لغيرها 

كيف لى أن اتحمل ذلك ملعون هذا القلب الذى احب شخص كهذا 


طلب شريف من والد شاديه ان يجلس هو وشاديه بمفردهم ووافق والدها على طلبه 

شريف : أخيرا اخيرا يا حبيبتي هتنورى بيتى كلها اسبوع ونتجوز 

شاديه: استنى الاول هو احنا هنبتديها كده 

شريف : فى ايه بس 

شاديه : هى ايه اللى مراتك لابساه ده هى جايه وعايزه تغطى عليا 

شريف: مالها هى لابسه ايه بس 

شاديه: انت مش شايف الفستان اللى هى لابساه عامل ازاى انت لازم تاخد موقف منها يا شريف ليه هى بتنكد عليا فى يوم زى ده قدام اهلى جايه ولابسه كده عايزه تعرفهم يعنى انها احلى منى 

شريف: مسك ايديها وباسها ماتزعليش نفسك يا حبيبتي انا هتصرف معاها انا عايزك تنبسطى وبس 

شاديه : ماشى يا شريف لما نشوف وانا عايزه اوضه نوم جديده وتحطها في الاوضه الكبيرة ماترمنيش فى الاوضه الصغيرة 

شريف: حاضر يا قلب شريف طلباتك اوامر 

زاد غرور شاديه بكلام شريف لها وتنفيذه لجميع رغباتها وظنت نفسها ملكه حقا وأن الجميع فى خدمتها 

انتهى اليوم وذهب شريف وزوجته للمنزل مره اخرى وعندما دخل المنزل 

شريف: ايه اللى انتى لابساه ده انتى رايحه وعايزه تبينى للناس انك اشيك منها 

شمس : لأ طبعا انا مفكرتش كده انا حبيت البس حلو عشان اشرفك ويعرفوا انك إنسان محترم 

شريف: ماشى يا شمس هعديها بس بعد كده خدى بالك واه من بكره هتنقلى الاوضه بتاعتك الاوضه التانيه عشان هجيب غرفه نوم جديده 

شمس : اى اوامر تانيه يا شريف 

شريف : لأ شكرا 

دلفت شمس غرفتها وابدلت ملابسها وذهب للفراش ونامت نوم عميق 

فى اليوم التالى نهضت شمس وابدلت ملابسها وذهبت لعملها مباشره دون تحضير الطعام لزوجها اكتفت بايقاظه وابلاغه انها سوف تذهب لعملها باكراً 

وصلت شمس الشركه ووجدت سيارات فارهه تقف خارج المبنى دلاله على وجود زائرين مهمين داخل الشركة 

ذهبت شمس لمكتبها مباشره وجدت صديقتها صفا بانتظارها 

شمس : صباح الخير يا رويتر ها ايه الأخبار 

صفا : نوح بيه مضى صفقه كبيرة جدا مع شركه سيارات كوريه هياخد توكيل تصنيعها هنا فى مصر 

شمس : بجد ده خبر حلو أوى واضح ان نوح بيه ده طموح جدا 

صفا: وكمان حقانى 

شمس : دى حقيقة 

صفا: هو دلوقتي في اجتماع مجلس إدارة وبعد كده هيفرجهم على الشركه وخط سير العنل بيكون عامل ازاى 

جوزك جه صحيح 

شمس : لا سبته نايم 

صفا : بتهزرى فى يوم زى ده الغياب فيه بيكون ب ١٠؛

شمس : وش العروسه الجديدة 

صفا : عروسه ايه 

شمس : هحكيلك كل حاجه يا صفا عشان انا خلاص بنهار مش عارفه اعمل ايه 

حكت شمس لصفا كل حاجه حصلت معاها من بداية جوازهم 

صفا : وليه تستحملى كل ده يا شمس ليه 

شمس : فى انى ست فاشله مقدرتش اخلى راجل يحبنى تخيلى تبقى عايشه مع واحد ليل نهار فى البيت وبتعملى اى حاجه عشان ترضيه وهو مش شافك أصلا تخيلى ممكن بقى حد غريب يحبنى إذا كان القريب محبنيش 

صفا: غلط يا شمس اوعى تقولى الكلام ده تانى جوزك اللى مريض مش انتى صدقيني انتى أى حد يتمناكى زمايلنا فى الجامعة كانوا بيخافوا يكلموكى عشان شايفينك كتيره عليهم اوعى مره تانيه اسمعك تقولى كده 

المشكلة شريف عايش فى الماضى سبيه يشبع بيها واطلقى منه 

شمس : ولو أطلقت هروح فين هبقى لواحدى حتى لو رحت عشت مع اخويا ومراته تفتكرى هبقى مبسوطه وانا حاسه انى متقله عليهم حتى لو مقالوش بس هحسها فى تصرفاتهم 

صفا: وانتى ناويه على ايه 

شمس : هسيبه يعمل اللى هو عايزه وهكتفى بدور المتفرجه فقط 

صفا: وليه تاذى نفسك كده يا شمس انتى اعلى من كده 

شمس : انتى عشان بتحبينى بس بتقولى كده انا الفتره الجايه هركز فى الشغل فقط هى دى الحاجه الوحيده اللى انا ناجحه فيها


بصتلها صفا بذهول من تفكيرها وازاى ثقتها فى نفسها مهزوزه كده هى لو مكانها مش هتستحمل ربع اللى هى استحملته ازاى هى قادره تستحمل ده شمس دى قويه أوى بس محتاجه تفوق انا بدأت اشك انك بتحبى شريف يا شمس انتى لو حبتيه مش هتستحملى تشوفيه مع غيرك 

ربنا يدلك على الطريق الصح يا شمس انتى تستاهلى كل خير 

ده كان كلام صفا بينها وبين نفسها 

انتهى نوح من الاجتماع وبالفعل اخذ الضيوف وقام باخذهم بجوله داخل الشركه وانبهروا جدا باداره نوح للشركه والمصنع فهو لا يقل عن اى مصنع سيارات عالمى وتاكدوا انهم قاموا بالصفقه مع الشخص المناسب 

وتم إتفاق على عمل حفل الاسبوع القادم حيث يتم دعوه الاعلاميين من مصر وكوريا وحدث ضخم كهذا يجب عمل ترويج ضخم له 

انتهى نوح من الجوله وقام بايصالهم لخارج الشركه وذهب إلى والدته واتصل على اخته كى تقابله عند والدته 

وصل نوح وانتظر وصول أميره كى يتحدث معهم في أمر هام 

وصلت اميره لمنزل والدتها ووجدتهم بانتظارها

اميره : خير يا نوح قلقتنى  

نوح : خير يا اميره بصى يا ماما انا انهارده مضيت اكبر ثفقه في حياتى انا مش بس استوليت على السوق المصرى والعربى لا وكمان ضميت اكبر شركه لتصنيع السيارات في كوريا كمان 

مرفت : بجد يا نوح ألف ألف مبروك يا حبيبى ايوه كده ده ابنى اللى مشرفنى دايما بيه 

نوح : ماما انا ليه طلب عندك ولو رفضتى صدقيني انا 

مرفت: من غير ماتكمل يا نوح فى يوم زى ده لازم انا واختك نكون في الحفله ونكون جمبك وفى ضهرك 

نوح مسك ايديها وباسها : لازم العالم كله يعرف الست العظيمه اللى كانت ورا نجاحى وساعدتنى لحد ماوصلت للى انا فيه 

مرفت: لولا دماغك وافكارك مكنش حصل أى حاجة من دى الفضل كله يرجع ليك يا نوح 

اميره: بجد يا نوح انا دايما بعتبرك انت بابا اللى بفتخر بيه 

مرفت : بس فى طلب صغير يا نوح خلى ظهورى مفاجأة محدش يعرف حاجه 

نوح : أكيد طبعاً الملكه لازم يكون ليها ظهور خاص 

مرفت: يا واد يا بكاش 

أميره : بقولك ايه سبلى انا  بقى ماما وشوف هعمل ايه بس افتحلى انت الميزانية بس وسبلى الطلعه دى 

نوح : حاضر يا لمضه مع ان امك ظهورها بس من غير أى حاجة كفيل انه يغطى على الكل بس الغيبه دى لازملها رجعه قويه يا نوفا 

انتهى اليوم وذهب نوح وأميرة للقصر ووجدوا إلهام تنتظرهم 

إلهام: سيب ابنى يا نوح وهديك اللى انت عايزه 

نوح : اسمى نوح بيه يا إلهام نوح بيه ولو فكرتى مره تانيه تقولى نوح حاف كده هتقدى جمب ابنك بس اسبوع مش ٣ ايام 

الهام : طيب يا نوح بيه عايز كام وتسيبه 

نوح : وانا هعوز ليه ما كل فلوس ابنك اللى سرقها منى رجعت تانى واخر حبه كانوا معاه رجعهملى امبارح تانى عشان بس ارحمه من اللى هو فيه  

إلهام: طيب ماتسيبه بقى 

نوح : لما يجيلى مزاجى وانا دلوقتي معنديش مزاج وسابها ومشى وفضلت واقفه مع أميره 

إلهام: لحد امته لحد امته هتفضلوا كده 

أميره: زى مانوح قالك لحد مايجيلنا مزاجنا ووقتها هنطردكم كلكم بره 

إلهام : وجودى حارقكم اوى عشان بيفكركم بالماضى 

أميره: الماضي اللى بتتكلمى عنه ده مش هيغير الحقيقة كون انك ااقل كتير مننا انتى وعيالك وانك طول عمرك بتغيرى من ماما ولحد دلوقتي بتغيرى منها

إلهام: بس ابوكى بيحبنى انا وفضلنى عليها وقال كده قدامكم كلكم وقدامها هى كمان نسيتى لما ضربها قدام الناس عشان بس ردت عليا 

اميره: منستش ومحدش نسى بس كمان منستش إنه فضل يدور عليها ولحد دلوقتي بيدور عليها 

إلهام: انتى كدابه امك أصلا هو نسيها من زمان بدليل انه طردك انتى واخوكى من البيت نسيتى 

اميره: انتى غبيه اوى أوى أوى أوى أوى 

ومش هريحك برضو بااااى وسابتها تاكل فى نفسها ومشيت 

كلام إلهام زمان كان اه بيضايقهم لكن دلوقتي لأ ولا بياثر فيهم 


مر اسبوع على ابطالنا وكل منهم مشغول شمس كانت مشغوله فى ميزانية الحفله وكانت تعمل فى المنزل والشركه وكان هذا يروق لها لانه يجعلها لا تشعر بالحزن من زوجها الذى اصبح لا يأتى الى المنزل سوا للنوم فقط تبقى يوم واحد لزواجه ودخول امرأة جديده حياتها فلتدخل إذن كى ترا ماذا كانت تفعل تلك المرأة ليقع زوجها فى حبها بهذا الشكل

اليوم فرح زوجها  

لم تستطع شمس الذهاب للفرح وظلت فى المنزل تعمل فقط باقى على الحفل يومان فقط ويجب ان تجهز نفسها أيضا بخلاف الميزانية التى ستقدمها غدا 

كانت شمس تجلس على السفره وتتابع عملها الذى ستسلمه واثناء عملها سمعت صوت ضحك   عالى علمت أن زوجها قد وصل قام بطرق الباب وقامت هى لتفتح الباب وجدت زوجها يدخل وهو يحمل زوجته الجديدة شاديه 

نظرت له شمس فى زهول من فرحته كأنه طفل صغير وحصل على علامات نهائيه فى الامتحان ووالده وفى بوعده وجلب له الدراجه التى يحلم بها 

دلف شريف المنزل وهو مازال حامل زوجته في يده 

شاديه بدلع كى تغيظ شمس : خلاص كده يا شيرى انت شايلنى من تحت نزلنى بقى لتتعب 

شريف : تعبك راحه يا حبيبتي وبص لشمس 

شمس لو سمحت احنا جايين جعانين اوى حضرلنا ناكل بقى هدخل شاديه الاوضه نغير انا وهى تكونى حضرتى العشا 

شمس بذهول : انت عايزينى انا اخدمكم يعنى 

شاديه: وايه المشكله يعنى انتى شيفانى عروسه عايزانى ادخل بفستان الفرح يعنى اعمل اكل ايه ده يا شريف 

شريف : خلاص يا حبيبتي ماتضيقيش شمس هتعملنا اكل انا عارفها طيبه ومش هيهون عليها تنيمنا جعانين صح يا شمس يلا بقى خشى حضرى العشا لينا وخبطى وانا هاخده منك 

شمس : يا ترا شمس هتفضل كده في سلبيتها ولا فى حاجة هى ناويه عليها 

مرفت ظهورها مره تانيه هل هيكون ليه دور في حياه الكل ولا على حياه نوح واميره فقط ورد فعل الهام والرفاعى ايه من ظهورها 

تابعونى لان الأحداث هتزيد إثاره الفترة الجايه 

وبلاش استعجال ونقد عشان كل شخصيه تاخد حقها الناس اللى بتابعنى من زمان عرفين انى عمرى ما ظلمت بطله

الخامس


شمس : شريف مش معنى انى وافقت على اللى انت عامله تفتكر انى هشتغلكم خدامه 

شاديه: انتى موافقتيش بمزاجك يا حلوه انتى عارفه ان موافقتك دى زيها زى قلتها مالهاش لازمه 

شمس : انا بعمل كده عشان عايزه ابسطه 

شريف : طيب يا شمس كملى جميلك وهاتى اى حاجه ناكلها يلا يا شمس إحنا جعانين 

نظرت له شمس مطولا 

شمس : حاضر ادخل يا شريف ادخل و انا  هجبلك اكل 

دخلت شمس جابت طبق جبنه ومربى يكفوا شخص واحد ودخلته ليهم الأوضه 

شريف : ايه ده 

شمس : ايه الاكل اللى انت شاريه بفلوسك جبتلكم منوا تتعشوا عن اذنك بقى انا بكره ورايا مشاوير كتير 

شريف: انتى بتهزرى يا شمس مافى جوه لحمه وفراخ وحمام واكل حلو معملتيش منه ليه

شمس: اولا الأكل ده انا جايباه بفلوسى عشان أكل ثانيا المفروض العروسه هى اللى بتعمل العشا بتاع الفرح ثالثا انا مش ملزمه انى اطبخلكم وغير كده الاكل ده بفلوسى هتاكلها منه ايه تحب اول يوم تأكل ضرتى وحبيبت عمرك  من فلوسى وانا اللى اصرف عليكوا انا عملت باصلى اهو وجبتلك تاكل يلا باى وسابته ومشيت 

دخل شريف لشاديه بالاكل 

شاديه: إيه ده فين العشا انا جعانه 

شريف: مافيش غير ده 

شاديه: يعنى ايه الكلام ده يا شريف انا عايزه اكل اتصرف 

شريف : مهى دخلت تنام وقالتلى انها مش عامله حسابها عشان العشا بيكون على العروسه 

شاديه: خلاص انا هاكل وانت روح شوفلك حاجه تاكلها فى المطبخ 

اخدت شاديه الاكل واكلته كله وشريف بيبصلها بحب انهم اخيرا تحت سقف بيت واحد وفى اوضه واحده 

قررت شاديه بداخلها ان ترد هذا الموقف لشمس وتزيد من كيدها لها 

فاصبحت تضحك بصوت عالى على مغازله شريف لها وتتجول فى المنزل بحريه ولكن شمس اغلقت الباب جيدا وخلدت للنوم سريعا بسبب اجهادها في العمل 

فى اليوم التالى نهضت شمس باكرا وذهبت للعمل لأن اليوم الاجتماع مع نوح بيه وسوف تسلمه الميزانية الخاصة بالحفل 

نوح : ممتاز يا شمس انتى تقريبا مسجله كل حاجه حتى المراضيات للعمال 

شمس: اكيد طبعا طالما مصروفات لازم تتسجل وحضرتك تكون على علم بيها 

نوح : اتفضلى دى دعوه ليكى كل الموظفين هياخدوا دعوات لفردين 

شمس : تمام شكرا لحضرتك 

خرجت شمس من عند نوح واخذت نفس عميق واخرجته فوجودها معه يزيد من ضربات قلبها ويقلل من تنفسها 

ذهبت شمس لمكتب صفا واتفقوا انهم بعد العمل سيذهبوا لشراء ملابس تناسب الحفل 

انتهى اليوم وشعرت شمس بجوع شديد 

صفا: مالك يا شمس 

شمس : انت جعانه اوى تعالى ناكل

صفا : معقول هتاكلى بره البيت اول مره تعمليها ومش هتاكلى مع شريف 

شمس: غالبا لازم اتعود اصل العروسه الجديدة جت جه بيها امبارح شايلها وفرحان بيها لا وكان عايزنى احضرلهم عشا العرايس كمان 

صفا: أوعى تكون حضرتى 

شمس: لا دخلتلهم جبنه ومربى 

صفا: كنتى نفضتيلهم 

شمس: هو جوزى لسه وانا حضرت على اده بس 

صفا: وهى بقت مراته تشيل شيلته بقى 

شمس: انا هعمل كده هركز فى شغلى ونفسي بس لحد ما اشوف اخرتها معاه ايه 

تناولت  صفا وشمس الغداء وذهبت شمس للمنزل وكانت تحمل شنطه كبيرة بها فستان الحفل ووجدت المنزل فى حالة من الفوضى وصوت ضحك قادم من غرفة الجلوس 

ذهبت لغرفة الجلوس وجدت زوجها يجلس ويشاهد التليفزيون ويجلس شاديه على قدميه ويطعمها بنفسه احست شمس بوجع في قلبها لم تشعر به من قبل لهذه الدرجة هى كانت مهمشه فى حياته انه لا يراني زوجه على الاطلاق نظر لها شريف

شاديه : ايه ده شمس انتى هنا معلش بقى لما اتاخرتى طلبنا اكل على ادنا واتغدينا اصل ملقناش حد يعملنا اكل اتصرفى انتى بقى او هتلاقى جبنه ومربى فى التلاجه كليهم 

تجاهلت شمس جميع كلمات شاديه ونظرت لشريف 

شريف: ايه ده شمس انتى جيتى اتاخرتى ليه 

شمس: كنت بحضر لحلفت الشركه بكره وحدفتله الدعوه بتاعته 

دى دعوتك بعتوهالك معايا هتكون فى فندق. قالتله الكلام ده ودخلت غرفتها حتى لم يسالها اذا تناولت طعامها ام لا ..

شاديه: الله بقولك يا شيرى انا لازم اروح الحفلة دى تعالى بقى ننزل نجيب فستاه عشان نروحها 

شريف: انا فلوسى تمشينا لاخر الشهر بالعافيه يا شاديه انا صرفت كل فلوسى على شبكه وفرح وغيرت اوضه النوم غير الهدايا والفساتين 

شاديه: يعنى يرضيك مراتك تروح بفستان جديد وانا لأ قول انك ابتديت تحنلها من اول يوم 

شريف: لا يا حبيبتي طبعا بس هى جايباه بفلوسها وغير كده انتى فساتينك حلوه ولسه ماتلبستش أصلا 

شاديه: بقى كده يا شريف اوعى سبنى بقى 

شريف : اهدى بس عايزانى اعمل ايه غير انى اشترى فستان جديد 

شاديه: متخلهاش تحضر 

شريف: ماينفعش طبعا شغلها ده أساسى ليها وهى بتصرف منه على البيت معايا 

شاديه: عندك حق خلاص لقتها روح هاتلى الفستان اللى هى اشترته ده انا البسه وهى اكيد عندها غيره او وقتها هتضطر تروح تشترى غيره اكيد معاها فلوس 

شاديه: ماشى يا حبيبتي حاضر 

قام شريف واتجه لغرفه شمس وجد الباب مغلق من الداخل 

فتحت شمس الباب 

شمس: نعم 

شريف: ليه معملتيش حساب شاديه فى فستان زيك

شمس: متجبلها انت وانا مالى هى مراتى 

شريف: لأ مراتى انا اعتبريها زى اختك واديها الفستان الجديد ده تلبسه والبسى انتى واحد تانى او انزلى اشتريلك واحد تانى 

كل ده تحت انظار شاديه 

هنا ضحكت شمس بعلو صوتها 

شمس: ايه ده هو انت جايبلى الجعانه دى عشان اصرف عليكوا ماتلم نفسك يا شريف.

شريف بزهول : ايه طريقتك دى احترمى نفسك وعشان قلت ادبك دى بقى هاخد الفستان غصب عنك وهديهولها وانتى مش هتروحى 

شمس : زقته واضح انك ماتعرفش يا شريف انا بقى وضعى ايه فى الشركه وعلاقاتى وصلت لفين اصلك يا غلبان نسيت تسال انا اترقيت وبقيت ايه بس خلى الناس هى اللى تقولك انما انا بحذرك كلمه كمان اقسم برحمه اهلى لاخليهم يرفدوك من الشركه واخلى نوح يعمل كده بنفسه وانت عارف لما حد نوح بيطرده بيحصل بعدها ايه استحاله اى شركة تانيه تقبله فلم نفسك بقى يا شريف وخد الجعانه دى من منها وسبنى عشان عايزه انام 

شريف: بقى كده يا شمس ماشى 

مشى شريف وراح غرفته هو وشاديه ودمه محروق 

شاديه: انت هتسبها كده 

شريف: عايزانى اعملها ايه 

شاديه: كنت ضربتها قلمين على الكلام اللى قالته ده 

شريف: عشان تنفذ تهديدها صح 

شاديه: اديك قولت تهديد ومش هتعرف تعمل حاجه 

شريف: انتى ماتعرفيش شمس مابتهددش بتنفذ على طول واول مره تكلمنى بالطريقة 

شاديه: طيب هنعمل ايه 

شريف: اتصرفى وانا هعوضك لما اقبص


بعد ما اغلقت شمس غرفتها حست براحه انها استطاعت ان تقف أمامه دون ضعف هى من اليوم لا تعتبره زوج مره اخرى هى من ضحت لأجله ودائما ما تسأله عن مايسعده لكى تفعله له 

هو يفعل ما كانت تفعله هى لكن لغيرها تزكرت يوم فرحههم كم كان صامت بارد المشاعر لم يطعمها ولو مره او يسألها ماذا تريد خمنت ان هذا طبعه لكن الذى أمامها شخص اخر غير زوجها 


عند نوح فى القصر كانوا يتناولون الغداء 

إلهام: نوح بيه لو سمحت كفايه كده على هيثم وخرجه انت قلت ٣ ايام عدى اكتر من اسبوع 

نوح : مهو التلات ايام عقابه للسرقة وباقى الايام دى عقابه على انه رفع صوتى عليه 

شذى : لو سمحت يا نوح انا اول مره اطلب منك طلب سيبه خلاص هو أكيد اتعلم من غلطه 

نوح : هسيبه انهارده وهيطلع بليل 

الرفاعي: بكره الحفله كل حاجه جاهزه ولا فى حاجة ناقصه 

نوح : مش أنا اللى اتسال سؤال زى ده 

الرفاعي: كلمنى عدل يا نوح متنساش انى ابوك واللى انت فيه ده بسببى 

نوح : لأ بسبب خالى اخو امى هو اللى اخدنى في بيته بعد مانت طردتنى انا واختى فاكر هو اللى لمنا وصرف علينا 

الرفاعي: منا رحتلك واخدتك بنفسى ورضيتك 

نوح : بعد ايه ها بعد ايه بعد ماكسرت جوانا حاجز كبير وخلتنا اليوم ده منعتبركش ابونا وعشان تكيدنا رحت كتبت الفرع الرئيسي باسم عيل مالوش لازمه وقع الشركه لولا الديون اللى سببت ان الشركه كانت هتتباع فى مزاد علنى وانا اشترتها كان زمان اسمك فى الأرض 

اوعى تكون فاكر انى عملت كده عشانك لا انا عملت كده عشان نفسى عشان مبقاش اكبر رجل اعمال وشركه ابوه بتقع هتبقى عيبه فى حقى 

الرفاعي: ورجعتهالك باسمك 

نوح : دى فلوسى انت ماجبتش عليا 

الرفاعي: والفلوس دى جبتها منين 

نوح : مش هريحك

الرفاعي: انت عرفت مكان امك صح

نوح : برضو مش هقولك وياريت تطلقها بقى وتسيبها 

الرفاعي بعد سماع كلمة الطلاق اصبح فى حالة غضب غير مبرره 

انت مالك اطلقها ولا لأ هى مراتى وهتفضل مراتى وهلاقيها يا نوح 

نوح: ابقى ورينى بقى وسابه وقام من على السفره وطلع غرفته وهو بيصفر 

تاني يوم كان يوم الحفل 

شريف وشاديه لبسوا وخبط شريف على شمس عشان يروحوا الحفله طلبت منه شمس يروح هو لواحده وهى هتحصله عشان هتتاخر شويه 


عند اميره كانت تجلس مع مرفت وقاموا بتجهيز نفسهم فمن يراهم يقسم انهم اخوات ليس أم وبنتها 

دخل نوح واتفاجئ من امته وجمالها واخته سواء في لبس او ميكب 

نوح : انتوا عايزينى اتخانق انهارده صح ايه الجمال ده طب لو حد بصلكوا كده ولا كده اعمل انا أيه 

اميره: الناس عارفه احنا مين ونخص مين واستحالة حد يبصلنا 

نوح : طيب يلا بينا 

ذهب نوح الحفل برفقة امه واخته 

وذهبت شمس بمفردها 

ورفاعى مع شاديه وابنته 

ياترا ايه اللى هيتم فى الحفله

تابعووووني


تكملة الرواية من هنا


🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹

ادخلوا بسرعه حملوه وخلوه علي موبيلاتكم من هنا 👇👇👇

من غير ماتدورو ولاتحتارو جبتلكم أحدث الروايات حملوا تطبيق النجم المتوهج للروايات الكامله والحصريه مجاناً من هنا


وكمان اروع الروايات هنا 👇

روايات كامله وحصريه من هنا


انضموا معنا على تليجرام ليصلكم اشعار بالروايات فور نزولها من هنااااااااا


🌹🌹🌹🌹🌹🌹🌹🌹🌹🌹🌹🌹🌹🌹🌹🌺🌺🌺🌺🌺🌺🌺🌺🌺🌺🌺🌺🌺🌺🌺

تعليقات

CLOSE ADS
CLOSE ADS
close