القائمة الرئيسية

الصفحات

آخر الأخبار

رواية ذنب بعد الخمسين بقلم الكاتب الكبير محمد مالك الفصل الحادي عشر والثاني عشر والثالث عشر والرابع عشر والخامس عشر حصريه وجديده

رواية ذنب بعد الخمسين بقلم الكاتب الكبير محمد مالك الفصل الحادي عشر والثاني عشر والثالث عشر والرابع عشر والخامس عشر حصريه وجديده

رواية ذنب بعد الخمسين بقلم الكاتب الكبير محمد مالك الفصل الحادي عشر والثاني عشر والثالث عشر والرابع عشر والخامس عشر حصريه وجديده

الحادي_عشر

اعتدال مرتبكة .. وكانت عايزة منك ايه ؟!!

نهي.. بتقول انها بترن عليكي وتليفونك مقفول .. وبتقول ان حمادة سابلها البيت عشان ترتاحي !!

اعتدال .. حمادة ساب البيت؟ !!

نهي .. ايوا .. وتقصد ايه طنط نوال بكلمة عشان ترتاحي ؟!!

اعتدال .. معرفش اهي بقت تخرف بالكلام !!

نهي .. في ايه يا ماما .. هو انتي وطنط زعلانين مع بعض ؟!

اعتدال .. ولا زعلانين ولا حاجة .. قالتلك حاجة تانيه غير الكلمتين دول ؟

نهي .. لا مقالتش حاجة تانية غير اللي قلتهولك .. طب وحمادة ليه يسيب البيت وهو في الحالة دي ! دا حتي لسة الكسر بتاعه ملمش !

اعتدال .. اكيد حصلت حاجة ضايقته وخلتوا يسيب البيت

نهي .. وحضرتك مش عارفة ايه هي الحاجة دي ؟!!


اعتدال .. وانا اعرف منين !!

نهي .. بس كلام طنط نوال كان فيه تلميح انك عارفة السبب

اعتدال .. ما انا قلتلك ان نوال بقت تخرف بالكلام وسيبيني بقي يا نهي

نهي .. حاضر يا ماما

نهي تترك الغرفة وتنصرف واعتدال تفتح هاتفها المحمول وتتصل علي حمادة

اعتدال .. ايه رحت فين ؟!!

حمادة .. سيبت البيت ومشيت

اعتدال .. ايوا رحت فين يعني ؟!

حمادة .. انا عند واحد صحبي

اعتدال .. امك اتصلت علي نهي وفضلت تلقح بالكلام وتقلها قولي لأمك حمادة ساب البيت عشان ترتاحي !! ارجع البيت يا حمادة انا مش ناقصة فضايح ارجوك .. امك لسانها طويل وممكن تفضحني في كل حته

حمادة .. لا مش هرجع .. انا مش مستحمل منها ولا كلمة

اعتدال .. وبعدين طيب ؟!!

حمادة .. ولا حاجة سيبك منها

اعتدال .. اسيبني منها ازاي ؟!! بقلك دي ممكن تهلفط بالكلام وتفضحني مع طوب الارض دي امك وانت عرفها اكتر مني

حمادة .. ولا يهمك .. لو جدعه تثبت

اعتدال .. يا مصيبتي السودا وانا لسة هقول تثبت ولا متثبتش دا العيار اللي ميصيبش يدوش !! منك لله انت السبب

حمادة .. انا بحبك يا اعتدال

اعتدال .. انت لسة هتقول الكلمة دي تاني ؟! طب انا بكرهك يا حمادة ومش طايقة اشوفك ولا اسمع صوتك حتي ويلا اقفل السكة

ثم تغلق الخط وتحادث نفسها قائله

اعتدال .. وبعدين ياربي ؟!! استر يارب

ونعود الي نهي حيث اتصلت بها نوال مره اخري

نهي .. ايوا يا طنط ازيك

نوال .. قلتي لأمك يا نهي علي اللي قلتهولك ؟

نهي .. قلتلها يا طنط

نوال .. وعملت ايه ؟!

نهي .. معرفش .. انا سيبتها ومشيت

نوال .. قولي لأمك تكلم حمادة وتخليه يرجع البيت انا عرفة انه هيرد عليها

نهي .. طب ما تكلميه حضرتك علطول

نوال .. برن عليه ومش عايز يرد عليا !! لكن انا متأكده انه هيرد علي امك

نهي .. اشمعني ماما يعني ؟!

نوال .. اسألي امك لو تقدر تجاوبك يا حبيبتي !

نهي .. هو في ايه يا طنط ؟!! وايه علاقة ماما بإن حماده ساب البيت ؟!!

نوال .. اسأليها برضوا وهي اللي تجاوبك .. وديني وما اعبد يا نهي ابني لو مرجعش ينام في حضني تاني لأجيب عاليها واطيها وهتصل بخيلانك .. وهي حره .. سلام

نوال تغلق الخط ورد فعل علي وجه نهي

نهي تحادث نفسها وهي في غاية الدهشة

نهي .. هي ايه الحكاية بالظبط ؟ مالهم بيتكملوا بالالغاز كدا ليه ؟؟!!

#ذنب_بعد_الخمسين

#الثاني_عشر

اعتدال في حيره شديد وخوف دائم من المجهول ونهي تجلس مع عصام خطيبها داخل كافيتريا كلية الطب

عصام .. مالك يا نهي في ايه ؟!!

نهي .. مش عرفة يا عصام .. حاسة ان في مشكلة مع ماما ومش عايزة تقول !!

عصام .. ليه خير .. مالها ماما ؟!!

نهي .. مش عارفة حالها ملخبط اليومين دول وقلقانه بأستمرار ومش بتخرج من اوضتها خالص !!

عصام .. مسألتهاش مالها ؟!!

نهي .. سألتها كتير ومش بتجاوب

عصام .. يمكن يكون في حاجة معاها ومش عاوزة تشغلك بيها

نهي .. مش عرفة .. بس انا حاسة ان المشكله بينها وبين طنط نوال

عصام .. طنط نوال دي جارتكم اللي في العماره اللي قصادكم ؟

نهي .. ايوا هي

عصام .. طب وايه اللي وصلك الاحساس دا ؟!!


نهي .. طنط نوال كلمتني في التليفون من يومين وقالتلي خلي امك تكلم حماده عشان يرجع البيت تاني لأحسن هتجيب عاليها واطيها وتقول لخيلاني علي كل حاجة !!

عصام .. وهتقول لخيلانك علي ايه بالظبط ؟!

نهي .. سألتها وقالتلي اسألي امك وهي تجاوبك دا اذا كان عندها الجرأة انها تجاوبك

عصام .. ايه الالغاز دي ؟!! واضح فعلا ان مشكلة بين مامتك وطنطك نوال

نهي .. ايوا انا متأكدة انهم زعلانين مع بعض عشان طنط نوال قبل ما تكلمني كانت بترن علي ماما وماما مش عاوزة ترد عليها !! بس ايه هي المشكلة اللي ببنهم ؟!! وايه علاقة مشيان حمادة من البيت ب ماما ؟!! هو دا السؤال اللي بدورله علي اجابه دلوقتي

عصام .. متشغليش بالك بيهم مهما كان بينهم دول عشرة عمر طويلة واكيد في يوم هيتصالحوا

نهي .. دول عمرهم ما زعلوا من بعض ابدا !!

عصام .. سيبك بقي من الموضوع دا وقليلي هنحدد فرحنا امتي ؟!!

نهي .. ايه .. مستعجل اوي ؟!!

عصام .. الا مستعجل اوي !! نفسي طبعا يجمعني بيكي سقف واحد واذا كان ع الدراسة كملي واحنا مع بعض .. ولا انتي مش نفسك نبقي مع بعض علطول؟!!

نهي .. اكيد نفسي يا عصام وبحلم باليوم دا كمان

عصام .. خلاص .. خير البر عاجله .. خلينا نفرح بقي يا حبيبتي


ونذهب الي اعتدال حيث يتصل بها سيد والد حمادة

اعتدال.. الوو


سيد .. ازيك يا ست الكل .. اخبارك ايه ؟؟!

اعتدال .. كويسة الحمد لله

سيد .. ايه مردتيش عليا في الموضوع اللي كلمتك فيه ؟!!

اعتدال .. موضوع ايه ؟

سيد .. موضوع ايه ؟!! لا كدا انا ازعل بجد وانا اللي كنت مفكر ان الوقت دا كله عشان بتفكري في الموضوع فقلت سيبها براحتها  ؟؟!

اعتدال .. اها .. قصدك موضوع الجواز ؟!!

سيد .. ايوا

اعتدال .. لا ما انا مفكرتش اصلا في الموضوع

سيد .. مفكرتيش ليه ؟!!

اعتدال .. لأن بصراحة مش في دماغي دلوقتي خالص قصة الجواز وكدا

سيد .. وانا فيا حاجة تتعيب لا سمح الله ؟!

اعتدال .. انا مقلتش كدا يا استاذ سيد .. انا بقول لحضرتك ان فكرة الجواز اصلا مش في دماغي .. لكن انت انسان محترم واي ست تتمناك

سيد .. بس انا قلتلك اني مستعد لكل طلباتك اللي تطلبيها

اعتدال .. برضوا مش فاهمني

سيد .. لا فاهمك كويس يا مدام اعتدال.. ع العموم شكرا وانا خدامك في اي وقت .. سلاموا عليكم

ثم يغلق الخط واعتدال تقول لنفسها

اعتدال .. ناقصاك انت كمان !

ثم يرن جرس الباب واعتدال تفتح الباب فتفاجأ ب حمادة

اعتدال .. حمادة !

حمادة .. وحشتيني .. ليه مش عاوزة تردي عليا ؟!!


#ذنب_بعد_الخمسين

#الثالث_عشر

اعتدال .. انت ايه اللي جابك هنا ؟!!

حمادة .. اعمل ايه مش راضية تردي علي تليفوناتي ؟!!

اعتدال .. ومش هرد عليك ابدا بعد كدا .. امشي بقي

حمادة .. برضوا دي مقابلة تقابليني بيها ؟!! دا انا حتي جايلك بعرج علي رجلي المكسوره

اعتدال .. محدش قالك تيجي يا اخي .. كفاية اللي حصل من تحت راسك !! انت ايه مش هتهدي غير لما تطربقها علي دماغي خالص ؟!!

حمادة .. طب ممكن ادخل ونتفاهم

اعتدال .. مفيش بينا حاجة اصلا عشان نتفاهم فيها

حمادة .. ما هو مش هينفع اتكلم ع الباب كدا الناس طالعة ونازلة !! وبعدين لازم نتكلم مع بعض .. ارجوكي

اعتدال .. ادخل وخلصني

حماده .. ايه مالك بتعامليني ليه كدا ؟!!

اعتدال .. مش عارف بعاملك ليه كدا ؟!! مش انت السبب في اللي حصل دا ؟!! خليت امك تتصل ببنتي وتفضل تلقح بالكلام تخلي عقل البنت عمال يودي ويجيب وتسألني كل شوية ايه الحكاية بالظبط ؟!! لا وكمان الست هانم عايزه تتصل بأخواتي وتحكيلهم اللي حصل ؟!!


حماده .. ما قلتلك سيبك منها

اعتدال .. اسيبني منها ازاي وهي عاوزه تشوهني قدام بنتي واخواتي .. دي عريس بنتي ممكن يسبها لو عرف بحاجة زي دي !!

حماده .. طب ما تيجي نتجوز ونخرص الالسنة دي كلها

اعتدال .. لا .. انت فعلا عاوز تطربقها علي دماغي !! نتجوز ازاي ؟!! انت اتجننت ؟!!

حماده .. يا اعتدال انا بحبك وعاوزك في الحلال .. افهمي بقي .. طب اقلك تعالي نتجوز ونسيب الدنيا كلها ونهرب .. انا معايا فلوس كتير اوي نبدأ حياه جديدة في اي مكان لاحد يعرفنا ولا نعرف حد

اعتدال .. يابني بطل مراهقة ارجوك

حمادة .. انا مش مراهق من فضلك .. واذا كان في حد مراهق فعلا يبقي سيد ابويا .. اللي عاوز يحب ويتجوز وهو عدي ٦٠ سنه !!


اعتدال .. علي الاقل ابوك مناسب ليا اكتر منك انت

حماده .. اها .. قولي كدا بقي .. انتي بتصديني عشان بتفكري في ابويا !! شكلك ناويه تتجوزيه بقي ؟!!

اعتدال .. انا لا بفكر فيك ولا في ابوك ولا هتجوز ابدا .. انت وابوك كرهتوني في الجواز اكتر ما انا كارهاه

حماده .. يا اعتدال قدري مشاعري من فضلك

اعتدال .. مشاعرك دي متوجهه غلط .. رايحه لمكان مش صح !! والمفروض عليك تصلح الغلط ده وتوجه مشاعرك في الطريق السليم لواحده من جيلك ومناسبه لسنك


حماده .. يا ستي انا عاجبني حالي كدا هو انا مش راجل في نظرك زي اي راجل ؟؟!!

اعتدال .. راجل يا حماده .. بس انا اكبر منك وفي مقام امك

حماده .. وانا قلتلك انتي مش امي !! امي هناك في البيت

وفجأة تطرق نوال باب شقة اعتدال بطريقة همجية وهي تقول

نوال .. افتحي الباب يا اعتدال .. افتحي الباب بقلك

حماده .. ياريتك ما جيبتي سيرتها !! اهي جاتلك

اعتدال .. اعمل ايه بس دلوقتي يا اخواتي منك لله يا حماده

حماده .. افتحي الباب بسرعة لا تعملك فضيحة

اعتدال تفتح الباب ونوال تدخل الي قلب الشقة وتري حماده

نوال .. انا شايفاك وانت داخل هنا !! ليك اسبوع سايب البيت واول ما تفكر تيجي .. تيجي عندها بدال ما تيجي لأمك اللي هتموت نفسها عليك ؟!! لا وجايلها كمان وانت في حالتك دي !! ايه عاملالك سحر ؟!!

اعتدال .. وطي صوتك يا نوال من فضلك

نوال .. ايه خايفة من الفضايح يا ختي ؟!! طب ما انتي عرفة اللي بتعمليه دا عيب وميصحش ولو اتعرف هيعملك جرس وفضايح .. بتعمليه ليه يا اعتدال ؟!!

اعتدال .. انا معملتش حاجة .. ابنك قدامك اهوه ومطلبتش منه يجي هنا .. انا اصلا مش برد حتي علي تليفوناته

نوال .. الخبث واللئم باينين في عنيكي !! بتتقلي ع الواد عشان تعلقيه بيكي اكتر ؟!! لفيتي علي الواد وابوه يا اعتدال ؟! ضربتي عصفورين بحجر !! دا ايه الفُجر دا ؟!

اعتدال .. اخرصي قطع لسانك .. انا لا اعرف الف ولا ادور وانتي عرفة اخلاقي كويس !! وابنك عندك اهوه وطليقك كمان عندك .. اخرجوا من حياتي بقي حرام عليكم

نوال .. اتمسكني اكتر  يا وليه اتمسكني !!

ثم تدخل نهي وقد سمعت صوت شجارهم العالي من اخر الشارع

نهي في دهشة شديدة .. في ايه يا جماعة ؟! صوتكم جايب اخر الشارع !!

الاحداث اخذت طريق اخر وصارت اكثر حده .. 

ولسه اللي جاي تقيل ..

#ذنب_بعد_الخمسين

#الرابع_عشر

نوال ..انا مكنتش عايزه اتكلم .. لكن الموضوع زاد عنده ولازم وقفه !!

نهي .. في ايه يا طنط اتكلمي من فضلك

نوال .. حوشي امك عن ابني يا نهي !!

حمادة .. ماما .. انتي بتقولي ايه ؟!!

نهي .. مش فاهمه يا طنط ؟!! تقصدي ايه حضرتك ؟!!

نوال .. اقصد ابعدي امك عن ابني .. ملهاش دعوة بيه خالص

نهي .. طب ماما مالها ومال حمادة ؟!!

نوال .. امك بتلف ع الواد وقوته عليا وخلته ساب البيت

حمادة .. بقلك اسكتي يا ماما .. كفاية كدا!!

نهي.. بتلف عليه ازاي يا طنط ؟!!

نوال .. يعني خلت بال الواد مشغول بيها .. امك عنيها من ابني اللي م دورك يا نهي!!

اعتدال .. اخرصي يا ست انتي

نوال .. انتي اللي لمي نفسك عن ابني

اعتدال .. انتي كدابة .. متصدقهاش يا نهي

نوال .. انا مش كدابة .. انا شفتكم بعنيا دول وانتوا شفايفكم لازقة في بعض !!

نهي.. ايه !! معقول الكلام اللي بسمعه دا ؟!!

حمادة .. ارتحتي دلوقتي لما خربتيها يا ماما ؟!!

نوال .. احسن خلي كل واحد يلزم حدوده

نهي .. مش معقول .. مش معقول

ثم تنصرف خارج المنزل

اعتدال .. نهي .. نهي

نهي تركت المنزل واعتدال في قمة الحزن والصدمة تنظر الي نوال وابنها بكل آسي

اعتدال .. منكم لله .. ربنا ينتقم منكم .. امشوا اطلعوا بره .. بره

نوال تنظر ل اعتدال في سخريه وقد شفت غليلها ثم تنصرف .. حماده مصدوم من هذا الموقف وحزين جدا يريد ان يتحدث الي اعتدال واعتدال تنهره

حماده .. اعتدال انا ......

اعتدال .. امشي اطلع بره .. كفايه بقي ابوس ايدك ثم تبكي بشدة

حماده ينصرف مخزيا وحزينا

نهي تجلس في كوفي شوب تبكي وتفكر في امر ما تمسح عيناها وتمسك المحمول وتتصل علي خالها حسين ..

نهي .. ايوا يا خالي .. انت فين ؟!!

حسين .. في الشركة يا نهي .. خير مالك صوتك مش طبيعي ؟!!

نهي .. انا عايزه اقابلك دلوقتي حالا .. في موضوع مهم عايزه اتكلم معاك فيه

حسين .. خير يا نهي ؟!!

نهي .. مش هينفع التليفون يا خالو لازم اشوفك دلوقتي حالا

حسين .. طيب تجيلي الشركة ؟

نهي.. لا الموضوع حساس جدا .. نتكلم بره احسن ممكن تجيلي الكوفي شوب اللي انا بقعد فيه دايما ؟

حسين .. انتي فين دلوقتي ؟

نهي .. انا قاعدة هناك دلوقتي

حسين .. خلاص مسافة السكة واكون عندك

نهي .. مستنياك .. سلام

نهي تغلق الخط ورد فعل علي وجه نهي ..

#ذنب_بعد_الخمسين

#الخامس_عشر

ويذهب حسين مسرعا الي نهي لمقابلتها بعد ان اتصلت به

حسين .. في ايه يا نهي؟!! جايباني ليه علي ملي وشي ؟!!

نهي .. عاوزاك في موضوع مهم جدا

حسين .. قولي يا نهي مستنيه ايه قلقتيني

نهي .. اصل بصراحة .. اصل الحكاية ....

حسين .. يابنتي اتكلمي بدون مقدمات !!

نهي .. اصل انا وعصام اتفقنا اننا نعمل فرحنا بعد ما اخلص امتحانات علطول

حسين .. هو دا الموضوع المستعجل اللي مينفعش تقوليه في التليفون ولا حتي في الشركة؟!!

نهي .. وفي اهم من موضوع جوازي يا خالوا ؟!!

حسين .. ايوا يا حبيبتي بس ميستدعيش انك تقلقيني بالشكل دا !! ع العموم وماله مفيش مانع .. ايه المشكلة بقي ؟!!

نهي .. ما هو اصل ماما احتمال متوافقش

حسين .. وماما مش هتوافق ليه ؟!!

نهي .. ماما عاوزاني اخلص الكلية خالص وبعدين اتجوز

حسين .. وايه المشكلة انك تتجوزي وتكملي الكلية بتاعتك وانتي في بيت جوزك ؟!!

نهي .. يعني مفيهاش حاجة يا خالوا ؟!!

حسين .. عادي يا بنتي ياما بنات عملت كدا

نهي ..اهم شئ انت موافق يا خالوا؟

حسين .. موافق جدا كمان علي الاقل لما تتجوزي تعرفي تركزي في دراستك عشان اللي شاغل بالك خلاص بقي وياكي وبعدين عصام معيد في الكلية كمان يعني هيبقي في مساحة انه يساعدك اكتر

نهي .. طمنت قلبي الله يطمن قلبك .. خلاص مادام حضرتك موافق يبقي ماما اكيد هتوافق انت عارف انها بتسمع كلامك جدا

حسين .. متقلقيش انا هكلمهالك

نهي .. لا مش دلوقتي يا خالوا .. لما اكلمها انا الاول ولو عصلجت معايا هخليك تكلمها انت

حسين .. وهو كذلك يا نهي

وتعود نهي الي المنزل تنادي علي امها فلا تجيب

نهي.. ماما.. ماما .. انتي فين ؟!!

نهي تبحث عن امها في كل مكان فلا تجدها في المطبخ في غرفة النوم واخيرا في الحمام ونهي تتعجب

نهي .. غريبة !! امال راحت فين ؟!

نهي تلمح بطرف عينيها ضلفة الدولاب مفتوحة تتوجه مسرعة نحو الدولاب فلا تجد ملابس امها

نهي مصدومة .. دي اخدت هدومها ومشيت ؟!!



تكملة الرواية من هنا



بداية الروايه من هنا






تعليقات

CLOSE ADS
CLOSE ADS
close