رواية ذنب بعد الخمسين الفصل الاول والتاني والتالت والرابع والخامس بقلم الكاتب محمد مالك حصريه وجديده
 |
رواية ذنب بعد الخمسين الفصل الاول والتاني والتالت والرابع والخامس بقلم الكاتب محمد مالك حصريه وجديده
الاول
انا اعتدال الشربيني عمري ٥١ سنه بنت علي ولدين وانا الكبيرة .. اتجوزت وانا صغيرة جدا كان عمري وقتها ١٤ سنه ..
كنت لسة عيلة صغيرة بضفيرتين في شعري كنت لسة في اعدادي ..
بابا كان عنده ورشة ميكانيكا سيارات كان جمب الورشة دي ورشة تانيه لسمكرة العربيات صاحبها راجل عجوز مزواج .. اتجوز ست مرات بحجة الخلفة !!
راجل جاهل ميعرفش ان الخلفة دي رزق من عند ربنا واللي مكتوبلة هيخلف هيخلف بإذن الله ..
انا لما كنت برجع من المدرسة كانت ماما بتقلي روحي ودي الغدا لأبوكي في الورشة ..
كنت كل يوم لازم اوديله الغدا ..
وفي مره شافني الحاج حسين صاحب ورشة السمكرة .. اعجب بيا جدا وقالي والله كبرتي يا اعتدال وبقيتي عروسة ؟!!
مكنتش اعرف انه كان بيلمح علي انه عاوز يتجوزني !!
ايوا راجل عجوز عمره خمسين سنه عاوز يتجوز بنت سنها ١٤ سنه !!
لا ومتجوز قبلها ست مرات !!
المهم مره ورا مره لقيته نادي علي بابا واخده علي جمب وفضلوا يتكلموا مع بعض ..
انا مكنتش سامعاهم بيقولوا ايه بس كنت شايفه الحاج حسين وبابا كانوا بيبصولي وكأنهم كانوا بيتكلموا عليا انا !! بعدها بابا لما رجع البيت بالليل لقيتوا بيقول ل ماما الحاج حسين طلب ايد اعتدال للجواز وانا وافقت والفرح كمان اسبوعين !! طبعا عشان بابا كان زي سي السيد في البيت بس طبعا !! وماما كانت قصاده ضعيفة جدا وملهاش رأي مقدرتش تتناقش معاه وتقله اللي انت ناوي اعمله دا اسمه جنان !!
بس دا برضوا ممانعهاش ان دموع الحزن والاسي تنزل من عنيها لأنها بجد كانت حزينة عليا !!
المهم اتجوزت الحج حسين وقعدت معاه ١٠ سنين بدون حمل وفجأة ربنا اراد وحملت وفي اليوم اللي اتولدت فيه نهي بنتي هو اليوم اللي مات فيه حسين بسكته قلبيه مفاجأة !!
كان عمري وقتها ٢٤ سنه .. بقيت ارمله وانا اللي في سني لسة بيقولوا يا جواز !!
الحمد لله علي كل حال دا نصيبي وانا رضيت بيه ..
قررت اني اعيش حياتي لبنتي واربيها احسن تربية لحد ما كبرت واتخرجت من كلية الطب وبقت دكتورة اد الدنيا وانهارده خطوبتها علي زميل ليها معيد في الكلية اسمه عصام ..
وقفت قدام المرايا ..
يااااه اول مره اقف قدام المرايا من ٢٥ سنه !!
شيلت الاشارب من علي راسي وفردت شعري ..
ياااه دا بقي فيه شعر ابيض كتير ..
بس لسة زي ما هو طويل وناعم ..
فضلت ابص لنفسي واقول بقي دي البنت اللي كانت بضفيرتين زمان وكانت ضحكتها اجمل حاجة فيها ؟!
🌺🌹🌺🌹🌺🌹🌺🌹🌺🌹🌺🌹🌺🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺
الصفحه الرئيسيه للروايات الكامله
🌺🌹🌺🌹🌺🌹🌹🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹
جربت ارسم علي وشي نفس الضحكة بتاعة زمان معرفتش !! فضلت اسأل نفسي ..
يا تري انا عايشة ولا ميته ؟!!
بنتي دايما كانت دايما تحكيلي وتقلي انا بحب عصام يا ماما بموت فيه ..
بس مكنتش فاهمه كلامها ولا واصلني احساسها لأني معرفش يعني ايه حب !!
فضلت ادور في الميكاب بتاع بنتي علي حاجة اخفي بيها التجاعيد اللي في وشي والله ما عرفت !!
عمري ما حطيت مايكاب علي وشي ..
٢٥ سنه وانا لابسة الاسود وحزينة بالاجبار علي واحد اتحسب عليا انه كان في يوم من الايام جوزي !!
الله يسامحك يابابا ويرحمك انت السبب !!
فجأة لقيت تليفوني بيرن وكان اللي بيتصل هو حمادة جارنا في العماره اللي قصادي فتحت وقلت ..
اعتدال .. الو
حمادة .. صباح الفل يا ست الكل
اعتدال .. صباح النور يا حمادة ..
عامل ايه ؟؟
ومامتك عاملة ايه ؟؟
حمادة .. انا كويس طول ما بسمع صوتك
اعتدال .. احم .. احم .. ايه عاوز حاجة ؟
حمادة .. لا بس عاوز اقلك ان شعرك جميل اوي
اعتدال .. ايه ده !!
وانت شفت شعري ازاي ؟!!
حمادة .. من الشباك اللي قصادك يا جميل ..
انتي نسيتي انك فاتحة الشباك بتاعك ؟
اعتدال تنظر فتجد حمادة يبتسم ويشاور لها من الشباك المقابل .. اعتدال تشعر بالخجل فتسرع ناحية الشباك وتغلقة
حمادة مندهش .. قفلتي ليه الشباك ؟!!
اعتدال .. مش عيب تتجسس عليا وانا واقفة قدام المرايا ؟!!
حمادة .. انا ما اتجسستش عليكي ولا حاجة انا كنت واقف في الشباك بالصدفة وبصيت لقيتك قدام المرايا ..عجبني شعرك الطويل الناعم ..
وبعدين ايه المانع اني ابدي اعجابي بيكي ؟!
اعتدال .. طيب قول لماما اني مستنياها انهارده ..
خطوبة نهي اوعي تنسي انا عرفاها
حمادة .. وانا اجي ولا لا ؟!!
اعتدال .. براحتك
حمادة .. يعني عاوزاني اقول لماما عشان متنساش تيجي وانا براحتي اجي او لا مش فارقة يعني ؟!!
اعتدال .. وبعدين معاك .. يلا انا مش فاضية
حمادة .. طب هتلبسي فستان لونه ايه انهاردة ؟
اعتدال .. هلبس فستان لونه ايه ؟!!
انت ناسي اني ارمله يعني اللون المسموح بيه هو الاسود فقط !!
حمادة .. هو انتي اتجننتي ؟!!
اعتدال .. ولد !!
حمادة .. اسف .. بس حاجة تغيظ بجد .. هتلبسي يوم خطوبة بنتك الاسود برضوا !!
دا انا فكرت انك جايبة فستان سوارية احمر لليلة دي ؟!!
اعتدال .. فستان سوارية واحمر كمان !!
انت قلبك ابيض
حمادة .. طب ايه رأيك هبعتلك دلوقتي حالا فستان سواريه ولازم تلبسيه
اعتدال .. انت اتجننت يابني ؟!!
حمادة .. ايوا اتجننت وياريت تتجنني زيي ولو مره واحدة في حياتك .. اخلعي بقي توب الحزن دا . لأنه بجد مبقاش لايق عليكي
اعتدال .. اعقل يا حمادة
حمادة .. ما انا قلتلك اتجنني زيي وشوفي الفرق بنفسك .. هبعتلك الفستان ووالله لو ما لبستيه لأزعل منك ومش هقل ماما تيجي الخطوبة .. سلام
قفلت الخط وزي ما يكون قلبي دق مره واحدة .. كلام حمادة رفع معناوياتي جامد وحسسني بحاجات انا فكرت انها خلاص عمري ما هحس بيها ابدا .. وقفت قدام المرايا وفردت شعري ومسكت المشط وقعدت اسرح فيه وانا فرحانه اوي ....
وفي المساء حدثت كارثة ..
#ذنب_بعد_الخمسين
#الثاني
وفي المساء خطوبة نهي داخل شقتها .. زينة واغاني صاخبة تعلن الفرحة وعائلة العريس والعروسة مجتمعين تغمرهم الفرحة العارمة الي جانب الحضور من الاصدقاء والجيران والمعارف اخوة اعتدال وهم حسن وحسين يقومان بالترحاب بالضيوف وفي انتظار خروج اختهم ام العروس من غرفتها
حسن .. ايه اختك فين ؟!!
حسين .. بتغير هدومها وحالا تخرج
حسن .. كل دا بتغير هدومها !! هي العروسة ولا أيه ؟!!
وفجأة تخرج اعتدال في ابهي زينتها ترتدي فستان سواريه احمر
حسن .. اهي خرجت اهه
حسين ينظر الي اعتدال فلا يعرفها فيتعجب
حسين .. معقول دي اختك اعتدال ؟!!
حسن .. والله انا اخدتها بالشبه .. بس هي اكيد اعتدال
حسين .. وايه اللي عملاه في نفسها دا ؟؟!!
ثم يتوجه نحوها ويقول
حسين .. اعتدال ثواني عاوزك ..
ثم يدخلا الي غرفة النوم
اعتدال .. نعم يا حسين
حسين .. ايه اللي انتي عملاه في نفسك دا ؟؟!!
اعتدال .. عاملة ايه ؟؟!!
حسين .. المسخرة اللي انتي عملاها دي !!
اعتدال .. مسخرة ايه !! احترم نفسك وانت بتكلمني ومتنساش اني اختك الكبيرة !!
حسين .. طب كويس انك لسة فاكرة انك اختي الكبيرة !! طب يا اختي الكبيرة من اذنلك تقلعي الاسود ؟!! وتلخبطي وشك بويا بالشكل دا ؟!
اعتدال .. وانا مكتوب عليا اني اعيش طول عمري لابسة اسود ولا أيه ؟!!
حسين .. ايوا .. زي ما امك لحد الان ما قلعتش الاسود علي ابوكي ولا خالتك ليلي لابسة الاسود لحد الان واسم جوزها مات من خمسين سنه .. انت عارفة عادتنا وتقاليدنا كويس!!
اعتدال .. ايوا بس انا انهاردة خطوبة بنتي الوحيدة ومن حقي احس بالفرحة اللي طول عمري ما حستش بيها .. ايه كمان عاوزين تحرموني افرح ببنتي ؟! وبعدين انا محجبة اهوه قدامك !!
حسين .. هو انتي كمان كنتي عاوز تقلعي طرحتك ؟!! ما هو دا اللي ناقص يا ست اعتدال
اعتدال .. صدقني فكرت اعملها بس للأسف ملحقتش اصبغ شعري
حسين .. لا انتي كبرتي وخرفتي بقي ما تلبسي بدلة رقص احسن واطلعي هزيلك هزتين بالمرّه !!
اعتدال .. قلتلك احترم نفسك يا حسين
حسين .. تغيري لبسك دا حالا
اعتدال .. مش هغير حاجة وبدال ما بتحكم عليا .. روح احكم علي مراتك احسن بلبسها المحزق والملزق ولا انت مش شاطر غير علي اختك الكبيرة بس ؟! اوعي من وشي
ثم تفتح باب الغرفة وتخرج الي الصالة .. حمادة يلمح اعتدال فيعجب بها بشدة يتوجه نحوها
حمادة .. ايه يا عم الجمال دا !! هتخليني كدا اتلخبط مين فيكم العروسة انتي ولا بنتك !
اعتدال .. يابني بطل بكش بقي
حمادة .. بس والله قمر .. عرفة لو مكنتيش لبستي الفستان كنت هزعل اوي
اعتدال .. ادينه لبسته يا عم
حمادة .. كدا انا عرفت انا غالي عندك اد ايه
اعتدال .. طبعا يابني انت بتقول ايه ؟!! معزتك من معزة بنتي نهي بالظبط
حمادة .. لا ارجوكي بلاش تجمعيني انا ونهي في كفة واحدة .. انا عاوز يبقي ليا معاملة خاصة
اعتدال .. ازاي مش فاهمه ؟!!
حمادة .. يعني سيبك من حكاية اني زي ابنك وكدا
اعتدال .. ما انت فعلا زي ابني !!
حمادة .. يا ستي انا مش ابنك ولا عايز اكون زي ابنك
اعتدال .. امال عايز ايه ؟؟!!
حمادة .. عايز اكون حبيبك
اعتدال ترتبك ووجهها يحمر فجأة .. احم .. انا هروح اشوف المعازيم بعد ازنك
حمادة مندهش من معاملة اعتدال له وتتم الخطوبة وتنصرف المعازيم وتذهب نهي وخطيبها الي احد المطاعم احتفالا بالخطوبة وتبقي اعتدال لوحدها في المنزل وفجأة يرن التليفون المحمول والمتصل حمادة واعتدال تتردد في ان تجيب ثم تقرر ان ترد علي التليفون
اعتدال بحدة .. نعم
حمادة .. ايه مكنتيش عاوزة تردي عليا ولا أيه ؟؟!!
اعتدال .. لا .. اصل التليفون بعيد عني
حمادة .. اها .. طيب مردتيش عليا يعني ؟!
اعتدال .. ارد عليك في ايه ؟!
حمادة .. في طلبي اللي انا قولتهولك
اعتدال .. اللي هو ؟!
حمادة .. اني ابقي حبيبك
اعتدال .. انت يابني واعي للي بتقوله دا ؟!! انت عارف معني الكلمة دي ايه ؟!!
حمادة .. ايوا عارف طبعا .. انك تحبيني وكدا
اعتدال .. وانت عاوزني احبك ازاي يعني ؟؟!!
حمادة .. زي ما بنتك بتحب خطيبها
اعتدال .. يابني انت مجنون ؟!! انت مش عارف اني ارملة وعندي بنت في سنك دا غير فرق العمر اللي بيني وبينك
حمادة .. كل دا ميهمنيش
اعتدال .. بس بهمني انا .. روح حب بنت في سنك
حمادة .. انا بحبك انتي
اعتدال .. مينفعش
حمادة .. وايه قلة نفعه يا اعتدال
اعتدال .. اعتدال !! من غير طنط ؟!!
حمادة .. انتي مش كبيرة اوي كدا عشان اقلك يا طنط
اعتدال .. مش كبيرة !! انا اد عمرك مرتين !!
حمادة .. ميهمنيش برضوا
اعتدال .. ولا .. اطلع من دماغي انا مش فاضية للمراهقة بتاعتك دي
حمادة .. انا مش مراهق يا اعتدال!!
اعتدال .. تاني اعتدال ؟!! وبعدين كفاية اللي حصلي من تحت راسك عملت مشكلة مع اخواتي بسبب الفستان اللي جيبتهولي
حمادة .. ليه يعني؟!!
اعتدال .. مش عايزني اغير الاسود ولا احط مايكاب
حمادة .. يبقي عاوزينك تفضلي طول عمرك حزينة علي جوازة غلط من البداية
اعتدال .. حمادة انا ما اسمحلكش تتكلم في اموري الخاصة .. يلا بقي سلام
ثم تغلق الخط وحمادة يحاول الاتصال اكثر من مرة ولكن اعتدال لا تجيب مما يضطره الي الذهاب الي شقتها وهناك حدث كارثة ؟؟؟؟!!!!
#ذنب_بعد_الخمسين
🌺🌹🌺🌹🌺🌹🌺🌹🌺🌹🌺🌹🌺🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺
الصفحه الرئيسيه للروايات الكامله
🌺🌹🌺🌹🌺🌹🌹🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹
#الثالث
ويذهب حمادة الي شقة اعتدال والساعة اصبحت الواحدة بعد منتصف الليل ويضرب جرس الباب وتذهب اعتدال لتفتح منزعجة
اعتدال .. حمادة !!
انت اللي جابك دلوقتي ؟!!
حمادة .. انتي قفلتي ليه السكة في وشي ؟!!
ورنيت عليكي بعدها كتير ومش عايزة تردي ؟!!
اعتدال .. انت عايز ايه يا حمادة ؟!!
حمادة .. هنتكلم علي الباب كدا ؟!!
اعتدال .. انت عارل الساعة دلوقتي ؟!!
الساعة واحدة بعد نص الليل !!
حمادة .. وماله الدنيا صيف والناس سهرانه
اعتدال .. انت اكيد مش طبيعي !! اوعي تكون بتبلبع حاجة من اللي بيشربوها الشباب دي ؟!!
حمادة .. ايوا ببلبع .. ببلع مهدئات عشان ابطل افكر فيكي ومش نافعة .. بالعكس بتخليني افكر فيكي زيادة!! .. انا بحبك يا اعتدال .. بحبك
اعتدال .. وطي صوتك الجيران يسمعوك !!
حمادة .. طب هتدخليني ولا لا ؟!!
اعتدال .. تدخل ازاي ؟!!
بقلك الساعة بقت واحدة بعد نص الليل وبنتي اصلا مش هنا
حمادة .. عارف مع خطيبها بره ولسة مجاتش ..
هتدخليني ولا ابيتلك هنا قدام الباب
اعتدال .. ادخل وخلصني .. قلي بقي حكايتك ايه ؟!!
شكلك مش عايز تجيبها لبر !!
حمادة .. انتي البر وانتي الشط وانتي المرسي
اعتدال .. يابني انت دماغك دي ايه ؟!!
اللي بتعمله دا غلط صدقني
حمادة .. طب قليلي انتي ايه هو الصح وانا اعمله ؟! نتجوز ؟!! انا موافق .. يلا بينا علي المأذون
اعتدال .. مأذون ايه يابني انت فوق !!
انا نفسي اعرف انت ازاي سمحت لنفسك تفكر فيا من أصلة ؟!! انا في مقام امك
حمادة .. من شوية تقلي انت زي بنتي ودلوقتي تقلي انا في مقام امك ! يا ستي انتي مش امي وانا مش ابنك !!
اعتدال .. طب اهدي كدا وقلي .. انت ليه فكرت فيا بالطريقة دي ؟!! ايه اللي شدك ليا ؟!! ما هو اصل انا مش البنت الفرفورة المايعة اللي لابسة ضيق وحاطة مايكاب اوفر وماشية تتمختر يمين وشمال!!
حمادة .. وانتي مين قالك الصنف دا يعجبني ؟؟!
انا يعجبني الصنف الرزين الحكيم الهادي المحترم
اعتدال .. ما هو في بنات في سنك وهتلاقيها في نفس المواصفات اللي انت عاوزها
حمادة .. طب انا قلبي عاوزك انتي .. وانا قلبي ماليش حكم عليه واللي عاوزه بيعمله
اعتدال .. غلط .. غلط .. غلط
حمادة .. ايه هو بس اللي غلط
ثم يقترب منها ويمسك كلتا يديها
حمادة .. والعذاب اللي انا فيه دا مش غلط برضوا
اعتدال .. انت اللي معذب نفسك ع الفاضي
حمادة .. انتي ليه مش عاوزة تفهمي ان الحب دا محدش فينا يقدر يتحكم فيه .. ضيف رزل بيدخل القلب من غير استئذان وفي اي وقت ويلخبط كيانه ويبدل حاله تماما
اعتدال .. صدقني عمري ما حبيت عشان اعرف الحب بيعمل ايه في صاحبه ؟!!
حمادة .. لأنك اتجوزتي صغيره جدا وواحد اد ابوكي ومن غير حب .. يبقي هتعرفي الحب منين ؟!!
اعتدال .. واخرتها ايه يا حمادة ؟!!
حمادة .. اخرتها انك تحبيني زي ما بحبك ..قلبك يدق زي قلبي بالظبط .. حتي حطي ايدك كدا وشوفي بيدق ازاي
حمادة يضع كف يد اعتدال علي قلبه
حمادة .. شفتي بيدق بسرعة ازاي .. وكل دقه فيه بتقول بحبك يا اعتدال .. بحبك يا اعتدال
حمادة يقترب جدا من اعتدال ويحاول تقبيلها ولكن اعتدال تبتعد عنه في آخر لحظة
حمادة .. انتي ليه بعدتي عني ؟!!
اعتدال .. اللي انت كنت هتعمله حالا غلط وانا لا يمكن اطاوعك علي كدا ..
حمادة .. يعني ايه ؟!!
اعتدال .. يعني اعقل يا حمادة .. انا لا انفعك ولا انت تنفعني فيه بينا مسافات وحواجز كتير اوي
حمادة .. انا عشان خاطرك اطوي المسافات واهد كل الحواجز .. وقولي انتي عايزة ايه وانا تحت امرك
اعتدال .. عايزاك تمشي من هنا حالا لأن نهي لو جت وشافتك هنا في ساعة زي دي منظري مش هيبقي كويس
حمادة .. دا آخر كلام عندك ؟!!
اعتدال .. ايوا
حمادة يغضب ويتوجه نحو باب الشقة لكي ينصرف وعندما يفتح الباب يجد نهي خلفه ؟؟؟؟!!
#ذنب_بعد_الخمسين
#الرابع
نهي متعجبة من وجود حمادة في هذه الساعة المتأخرة من الليل
نهي .. حمادة !!
اعتدال مرتبكة .. دا دا .. دااا.. دا جاي يقلي ان ماما تعبانه اوي وعاوزة تكلمك .. اصل انا موبيلي كان فاصل شحن
نهي .. الف سلامه ..
مالها مامتك يا حمادة ؟؟!
حمادة ينظر الي اعتدال في غيظ وغضب ولا يرد ثم ينصرف
نهي .. ماله مبيردش ليه ؟!
حمادة .. اصلة مضايق علي مامته شوية ..
انا شحنت التليفون وكلمتها .. حاجة بسيطة شكلها واخدة برد في معدتها من التكييف وكدا .. قليلي بس انتي عملتي ايه ؟ اتفسحتي مع خطيبك ؟
نهي .. الا اتفسحت !! انا انهارده مبسوطة بطريقة متتوصفش .. شوفي الدبلة حلوة ازاي في ايدي يا ماما !!
اعتدال .. عقبال ما تروح في ايدك الشمال يا حبيبتي .. ربنا يسعدكم ويهنيكم يا بنتي
نهي .. يارب يا ماما
وفي الصباح تستيقظ اعتدال لتنظر في المحمول لتعرف الوقت فتتعجب عندما تجد ١٠٠ مكالمة لم يتم الرد عليها وذلك لأن التليفون كان علي الوضع الصامت
اعتدال .. ١٠٠ مكالمة لم يرد عليها ؟؟!!
تفتح سجل المكالمات فتفاجأ بأن المتصل كان حمادة
اعتدال .. حمادة رانن عليا ١٠٠ مره !! لا دا اكيد مجنون .. دا في رسايل كمان !!
اعتدال تجد ٢ رسالة في صندوق البريد الوارد .. تفتح الرسائل وتقرأها بصوت مسموع
اعتدال .. رسالتين !! ردي عليا من فضلك .. والرساله التانية .. لو انتحرت ذنبي في رقبتك .. وبعدين بقي مع المجنون دا ؟!!
فجأة يرن حمادة واعتدال تجيب
اعتدال .. وبعدين يابني معاك ؟!! الليل كله شغال رن عليا وباعتلي مسجات كمان .. هو انت نمت امتي مع الرن دا كله ؟!!
حمادة .. انا منمتش خالص .. طول الليل وانا سهران عمال ارن عليكي
اعتدال .. وبترن عليا ليه تاني ؟!!
حمادة .. عاوز اتكلم معاكي .. نفسي اسمع صوتك
اعتدال .. علي فكره دي تصرفات مش طبيعيه ابدا !! انت لا مراعي زمان ولا مكان ولا أي حاجة خالص
حمادة .. اعمل ايه عقلي مبقاش فيا وقلبي مش معايا
اعتدال .. وانا مالي بدا كله ؟!!
حمادة .. مالك ازاي ؟!! مش انتي السبب ؟!!
اعتدال .. وانا السبب في ايه ان شاء الله ؟!!
حمادة .. اني اتعلق بيكي
اعتدال .. وانا كنت قلتلك اتعلق بيا ؟؟!! ولا كانت تصرفاتي معاك شاذة فجذبتك ناحيتي ؟!! طول عمري بتعامل معاك بطريقة طبيعية جدا وفي حدود
حمادة .. اهوه اتعلقت بيكي وخلاص وبعدين انا قلتلك امبارح ان الحب دا ضيف رزل بيدخل القلب من غير استئذان ويلخبط كيانه وحالة .. وانا حالي بقي يصعب علي الكافر !!
اعتدال .. مش ذنبي .. مشكلتك وحلها مع نفسك
وفجأة تدخل نهي
نهي .. صباح الخير يا ماما .. بتكلمي مين علي الصبح كدا ؟؟!!
اعتدال ترتبك .. صباح النور يا حبيبتي .. دي .. دي طنطك رجاء ام حمادة قلت اتصل اطمن عليها
نهي .. بجد .. طب اديني اكلمها واسلم عليها
اعتدال .. لا ما هي قفلت معايا خلاص .. وبعدين بقت زي الفل خلاص
نهي .. طيب الحمد لله .. انا رايحة الكلية عاوزة حاجة ؟
اعتدال .. طب اقوم احضرلك الفطار
نهي .. لا هفطر مع عصام .. يلا باي
اعتدال .. باي يا حبيبتي
وبعد انصراف نهي اعتدال تحادث نفسها قائلة
اعتدال .. وبعدين في الواد المجنون دا ؟!! هيوديني في داهية والله !!
#الخامس
#ذنب_بعد_الخمسين
وبعد مرور يومين تتصل نوال والدة حمادة ب اعتدال لتطمئن عليها
نوال .. ايوا يا اعتدال وحشاني اخبارك ايه ؟!!
اعتدال .. انا كويسة الحمد لله .. انتي عاملة ايه ؟؟
نوال .. الحمد لله علي كل حال .. بنتك وخطيبها عاملين ايه ؟
اعتدال .. كويسين الحمد لله
نوال ..ربنا يتمملهم علي خير ان شاء الله .. ايه مالك .. بقالك يومين لا بتتصلي ولا حتي بتعدي عليا ؟!!
اعتدال .. مشغولة صدقيني
نوال .. الله يكون في عونك .. معرفتيش اللي حصل ل حمادة؟
اعتدال .. ماله حمادة ؟!!
نوال .. عمل حادثة بالموتوسيكل امبارح ورجليه اتكسرت
اعتدال .. يا ساتر يارب .. طب وهو كويس دلوقتي ؟!!
نوال .. اهوه الدكتور قال هيقعد شهرين في الجبس
اعتدال .. لا الف سلامة عليه مش يخلي باله طيب ؟!
نوال .. لا الواد اليومين دول حاله مشقلب !! علطول سرحان وربي دقنه زي ما يكون بيحب !!
اعتدال ترتبك .. احم .. شاب بقي وانت عرفة شباب اليومين دول طايشين ع الاخر !!
نوال .. المشكلة ان امتحانات الكلية بتاعته هتبدأ بكرا ودي اخر سنه ليه في كلية التجارة
اعتدال .. متهيئلي بيكتب طلب في الكلية وبيقَوموا لجنة بتروح تمتحنه في البيت
نوال .. دا مش لما يكون مذاكر ومستعد !! السنه دي راحت عليه خلاص .. لا الواد اتلخبط جامد ولما اسأله في ايه مبيردش عليا ولو الحيت عليه في السؤال بيتعصب عليا خالص!!
اعتدال .. ربنا يهديه .. ان شاء الله انهارده اعدي عليكم ازوره انا ونهي
نوال .. تشرفي ياختي .. يلا اسيبك انا واروح اعمله لقمة ياكلها
اعتدال .. روحي يا نوال .. مع السلامة
اعتدال تغلق الخط ورد فعل علي وجهها
وتأتي نهي من الكلية
اعتدال .. احضرلك الغدا يا حبيبتي ؟
نهي .. لا يا ماما اتغديت مع عصام
اعتدال .. يعني فطرتي مع عصام واتغديتي كمان مع عصام !! وماما ان شالله ما كلت ؟
نهي .. برضوا دا كلام يا ست الكل ؟!! اما انتي الخير والبركة
اعتدال .. صدقيني مفطرتش من الصبح ومستنياكي نتغدي سوا
نهي .. وماله ولا تزعلي يا ست الكل .. نتغدي سوا .. بس كدا !! ثم تقبلها في رأسها
اعتدال .. ربنا يهنيكي ويفرحك يا حبيبتي .. اعملي حسابك هتيجي معايا بالليل عشان نزور طنط نوال عشان نسلم علي ابنها حمادة
نهي .. ماله حمادة ؟!!
اعتدال .. بتقول عمل حادثة بالموتوسيكل ورجليه اتكسرت
نهي متأثرة .. مسكين يا حرام .. ربنا يشفيه
وفي المساء تذهب اعتدال ونهي لزيارة نوال وهناك تحدث مفاجأة ..
🌺🌹🌺🌹🌺🌹🌺🌹🌺🌹🌺🌹🌺🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺
الصفحه الرئيسيه للروايات الكامله
🌺🌹🌺🌹🌺🌹🌹🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹
ادخلوا بسرعه من هنا 👇👇👇
وكمان اروع الروايات هنا 👇
