القائمة الرئيسية

الصفحات

آخر الأخبار

رواية ذنب بعد الخمسين بقلم الكاتب الكبير محمد مالك الفصل السادس والسابع والثامن والتاسع والعاشر حصريه وجديده

 رواية ذنب بعد الخمسين بقلم الكاتب الكبير محمد مالك الفصل السادس والسابع والثامن والتاسع والعاشر حصريه وجديده 

رواية ذنب بعد الخمسين بقلم الكاتب الكبير محمد مالك الفصل السادس والسابع والثامن والتاسع والعاشر حصريه وجديده 

السادس

نوال .. والله ليكي واحشة يا اعتدال !! ازيك يا نهي يا بنتي ؟

نهي .. الحمد لله ياطنط

نوال .. مبسوطة مع خطيبك ؟

نهي .. اوي اوي

نوال .. ربنا يسعدكم ببعض يا حبيبتي

نهي .. يارب يا طنط ادعيلنا والنبي ربنا يتمملنا علي خير

نوال .. ان شاء الله يتمملك علي خير يا قمر انتي

نهي .. هو فين سي حماده عشان نسلم عليه

نوال .. اهوه في اوضته .. تعالوا اتفضلوا

وتتبع اعتدال ونهي نوال الي غرفة حمادة

نوال .. يا حمادة .. طنطك اعتداك ونهي جايين يسلموا عليك

حمادة يبدوا عليه الحزن العميق شعر ذقنه طويل وساقة اليسري في الجبس حتي ركبته

نهي .. لا مش معقول !! حمادة في الجبس يا جدعان !! ايه يابني مالك ؟! ازاي دا حصل ؟!!

حمادة .. ازيك يا نهي

ثم ينظر الي اعتدال التي تحاول الا تنظر في عينيه فتنظر الي اسفل .. حمادة يلاحظ ذلك


حمادة .. ازيك يا طنط ؟

اعتدال .. ازيك انت يا حمادة .. الف سلامه عليك

حمادة .. الله يسلمك

نهي .. قلي بقي ازاي دا حصل ؟!

حمادة .. كنت ماشي بالموتوسيكل فجأة لقيتني مش قادر اتحكم فيه فرحت لابس في عربيه نقل .. بعدها محستش غير وانا في المستشفي

نهي .. اكيد كنت ماشي بسرعة !! ما انت مجنون سواقة انا عرفاك

حمادة .. والله ما فاكر اذا كنت ماشي بسرعة ولا انا ازحلقت ولا أيه اللي حصل بالظبط !!

نهي .. احمد ربنا انها جت علي اد كدا .. ما يقع الا الشاطر يا حمادة

حمادة بسخرية .. شاطر !! ومين قالك اني انا شاطر ؟!! انا انسان فاشل .. فاشل جدا كمان

نهي .. ليه بتقول كدا ؟!!

حماده .. اهوه بقول كدا وخلاص

نوال .. اهوه علي الحال ده بقاله كام يوم زي ما يكون واحد خسر اللي وراه واللي قدامه !!

نهي .. انت في حاجة مضايقاك ؟؟!

حمادة ينظر الي اعتدال التي تحاول ان تتجنب النظر الي عينيه بكل وسيلة

حمادة .. لا .. مفيش حاجة مضايقاني

وفجأة يرن جرس الباب حيث حضر سيد والد حمادة وطليق نوال للأطمئنان علي ابنه وتذهب نوال لتفتح الباب .. سيد يدخل الي غرفة حماده ملهوفا علي ابنه

سيد .. حماده حبيبي .. بعد الشر عليك مالك يابني .. حصلك ايه ؟!!

ثم يضم حمادة الي صدره

حمادة .. مفيش يابابا .. جت سليمة الحمد لله

سيد .. رجليك جري لها ايه ؟!


حمادة .. كسر مضاعف

سيد .. طيب تعالي اوديك عند احسن دكتور عظام في البلد

حمادة .. مش مستاهله يابابا المستشفي اللي كنت فيها عملت اللازم وزيادة

سيد .. طب وهتقعد في الجبس دا اد ايه ؟!!

حمادة .. الدكتور قال شهرين ونعمل اشعة ونشوف

سيد .. ياه شهرين متجبس في الحرارة دي !! الف لا بأس عليك يابني

ثم يلمح اعتدال وابنتها

سيد .. مدام اعتدال !! هو حضرتك هنا ؟!! معلش لهفتي علي ابني ما خلتنيش اخد بالي منكم

اعتدال .. لا ولا يهمك

سيد يقف ويسلم علي اعتدال باليد

سيد .. ازيك يا مدام اعتدال ؟

اعتدال .. ازيك يا استاذ سيد

سيد .. ازيك يا دكتوره ؟

نهي .. ازيك يا عمو

سيد .. والله زمان يا جماعة .. فاكرين لما كنا عيلة واحدة ومفيش مناسبة الا لما كنا فيها متجمعين مع بعض .. فاكره يا نهي لما كنتي تشعلقي علي كتفي وانتي صغيره وتخليني الف بيكي الشارع اللي قدام العماره رايح جاي ؟! هههه .. ياما عملتيها عليا وانتي صغيره !!

نهي مكسوفه .. عمو .. يوه بقي !!

سيد .. ههههه .. فاكرة يا مدام اعتدال لما نوال جت تولد حمادة وساعتها انا كنت في سفر وملحقتش توصل المستشفي قمتي انتي ولدتيها في البيت ؟!!

اعتدال .. ايام بقي

سيد .. واهو حماده كبر ونهي كبرت وانا كبرت ونوال كمان كبرت اهه .. بس انتي زي ما انتي يا مدام اعتدال لسة محتفظة بشبابك وحيويتك !!سبحان الله


اعتدال .. الله يخليك .. وشكرا علي المجاملة الرقيقة دي !!

سيد .. دي مش مجاملة علي فكرة .. دي حقيقة

اعتدال .. طيب احنا نستأذن بقي

نوال .. ليه خليكي يا اعتدال لسة بدري

اعتدال .. معلش .. هنبقي نيجي تاني .. والف سلامه عليك يا حمادة

نوال .. طب ما كنتي قلتي ل سيد علي المشكلة اللي عندك يمكن يحلها

سيد .. مشكلة ايه ؟؟

نوال .. جايبين علي الورشة بتاعة جوزها ضرايب جامدة اوي مع ان الورشة مقفولة ومش شغالة

سيد .. بسيطة جدا تعاليلي بكره المصلحة ونشوف ايه الموضوع

اعتدال .. انا مش عاوزة اتعبك معايا

سيد .. تعبك راحة يا ست الكل .. في انتظارك بكرا ان شاء الله

اعتدال .. ان شاء الله .. سلاموا عليكم

نوال .. وعليكم السلام .. انستي وشرفتي ياختي

وبعد انصراف اعتدال ونهي تعود نوال الي غرفة حمادة ويبدوا عليها الغضب الشديد

نوال .. ايه يا عم سيد .. عمال تتغزل في الست واحنا واقفين

سيد .. ايه اتغزل فيها دي ؟!!

نوال .. امال ايه اصل انتي محتفظة بشبابك وحيويتك واصل انا كبرت ونوال كبرت !! انت ناسي اني انا واعتدال من سن بعض ؟!!

سيد .. انتي من سنها اه .. بس في فرق بينك وبينها .. دي ست زي حتة البسكوت

نوال .. وانا زي ايه ان شاء الله ؟!! ما تفوق لنفسك يا راجل انت !!

سيد .. والله ما بحب اجي هنا عشان لسانك دا !! وبعدين انتي مالك اتغزل فيها ولا ما اتغزلش فيها !! انتي مين عشان تحاسبيني ؟!! انتي ناسية انك طلقيتي


نوال .. لا مش ناسية ياخويا واهي عندك اشبع بيها .. طول عمرك عنيك فارغة وزي القرع تمد لبره

سيد .. تصدقي يا شيخة .. الحسنه الوحيدة اللي عملتها في حياتي اني طلقتك .. انا ماشي يا حمادة ولو عزت حاجة ابقي كلمني في التليفون .. اوعي من وشي يا ست انتي

نوال .. شفت ابوك بيعمل ايه ؟!!

وفي المساء تخلو اعتدال مع نفسها في غرفتها تتذكر كلام سيد لها انها ما زالت محتفظة بشبابها وحيويتها تمسك بمرآة موجودة علي الكوميدينو بجوارها .. تنظر الي وجهها ثم تبتسم .. وفجأة يرن التليفون المحمول والرقم مجهول واعتدال تتعجب

اعتدال .. مين دا يا تري .. الو

تكتشف ان المتصل سيد والد حماده

سيد .. الو .. سلاموا عليكم يا مدام اعتدال .. انا سيد الصعيدي  ابو حمادة

اعتدال .. اهلا يا استاذ سيد

سيد .. طب كويس انك مغيرتيش النمره !! كنت خايف تكوني غيرتيها

اعتدال .. ليه في حاجة ؟!!

سيد .. لا متقلقيش .. انا بس كنت عاوز اعرف هي الضرايب المقدره علي ورشة المرحوم جوزك كام ؟


سيد .. لا متقلقيش .. انا بس كنت عاوز اعرف هي الضرايب المقدره علي ورشة المرحوم جوزك كام ؟

اعتدال .. حوالي ١٨ الف جنيه

سيد .. لا مبلغ كبير فعلا وحضرتك بتقولي الورشة مقفولة

اعتدال .. اه مقفولة من سنة واكتر

سيد .. طب ليه مش فاتحاها خساره دي احسن ورشة سمكره ودوكو في البلد !!

اعتدال .. كانت زمان لكن كل الصنايعيه القدام اللي كانوا فيها سابوها وفتحوا ورش مع نفسهم ومبقاش فيها غير الصنايعية الجداد ودول طبعا لا خبره ولا مهاره

سيد .. طب ليه مأجرتهاش او حتي بعيها واستفادي بتمنها في اي مشروع تاني .. افتحي اتيلية مثلا

اعتدال .. انا بفكر ابيعها فعلا

سيد .. بصي انا معاكي ومش هسيبك .. بس نخلص الاول الضرايب اللي عليها وشوفي بعد ناوية علي ايه

اعتدال .. ان شاء الله .. هتعبك معايا

سيد .. ابدا .. انتي تعبك راحه .. انا سعيد جدا انهارده اني قابلتك وسمعت صوتك في التليفون كمان .. انهارده يوم تاربخي بالنسبة لي

اعتدال .. انا متشكره جدا

سيد .. يعلم ربنا انتي غاليه عندي جدا وعلي ما انا حزين علي الحادثة اللي عملها حماده .. علي ما انا فرحان انها كانت سبب عشان اشوفك واقابلك تاني

اعتدال .. طيب اشوفك بكره تصبح علي خير

سيد .. في انتظارك .. وانتي من اهله

وفي الصباح وعندما تذهب اعتدال الي سيد تفاجأ بطلب صادم ؟؟؟!!!

#ذنب_بعد_الخمسين

#السابع

وفي الصباح تذهب اعتدال الي سيد والذي يعمل مديرا لمصلحة الضرائب

سيد .. اهلا اهلا اهلا ست الكل .. اتفضلي اقعدي .. تشربي ايه ؟؟

اعتدال .. لا مالوش لزوم ازاي ؟!! دا احنا هنجيب فطار كمان

ثم يضغط علي الجرس فيدخل الفراش

الفراش .. اوامرك يا ريس

سيد .. تشربي ايه حضرتك ؟؟

اعتدال .. شاي لو ممكن

سيد .. ممكن اوي طبعا .. هات اتنين شاي مظبوط وكيك يا محمد

محمد  .. حاضر ياريس

سيد .. احنا زارنا النبي انهارده

اعتدال .. الله يعزك

سيد .. فين الورق اللي جالك من عندنا

اعتدال .. اهوه ..

سيد يقرأ الورق ويقول .. لا دا كتير اوي وسيادتك بتقولي الورشة مقفولة

ثم يمسك القلم ويؤشر علي الخطاب وهو يقرأ

سيد .. يتم تخفيض المبلغ الي الف جنيه فقط لا غير

ويوقع علي الخطاب

سيد .. اي خدمه يا ست الكل

ثم يدخل محمد بالشاي والكيك

سيد .. خد يا محمد ادي الورق لأستاذ محسن وقله استاذ بيقلك يخلص حالا


محمد .. حاضر يا ريس

اعتدال .. انا متشكره جدا يا استاذ سيد

سيد .. عيب يا ام حماده انتي متعرفيش معزتك عندي اد ايه

اعتدال .. عرفة

سيد .. طب ما دام عرفة بقي .. كنت عاوز افاتح حضرتك في موضوع كدا


اعتدال .. اتفضل

سيد .. بصراحة انا معجب بيكي من زمان من ايام ماكنت ساكن مع نوال في نفس الشقة من قبل ما اطلقها .. واكيد حضرتك عرفة اني انا طلقتها بسبب طولة لسانها وقلة ادبها بأستمرار .. المهم من اول يوم دخلتي فيه شقتنا وانا عنيا هتطلع عليكي .. ومشيت وعدت السنين وبرضوا لسا مفتون بيكي !!

اعتدال .. انا مش فاهمه حضرتك عاوز ايه ؟!!

سيد .. بصراحة يا مدام اعتدال انا عاوز اتجوزك علي سنة الله ورسوله ومستعد لكل طلباتك

اعتدال .. انت بتقول ايه ؟!! لا طبعا

سيد .. لا طبعا ليه ؟!! هو انا طلبت منك تعملي حاجة حرام لا سمح الله ؟!! انا عايز اتجوزك علي سنة الله ورسوله ومستعد اعملك فرح كمان لو حبيتي

اعتدال .. ايه الكلام دا يا استاذ سيد ؟!! احنا خلاص كبرنا علي الامور دي !!

سيد .. تقصدي الجواز ولا الفرح ؟!

اعتدال .. الاتنين

سيد .. بالعكس هو دا الوقت المناسب اننا نشوف حياتنا ونفكر في نفسنا شوية بعد ما العيال خلاص كبرت .. احنا من حقنا نعيش ونعمل اللي نفسنا فيه ما دمنا مش بنغضب ربنا

اعتدال .. لكن ....

سيد يقاطعها .. مش عاوز اسمع رد دلوقتي خالص .. خدي وقتك وفكري براحتك وان كان علي نهي واخواتك الرجالة سيبيهم عليا انا اكلمهم وهقدر اقنعهم بأمر الله .. بس اهم شئ عندي موافقتك انتي

اعتدال في غاية الدهشة !!

وتعود اعتدال الي المنزل حيث نهي تقوم بأعداد طعام الغداء في المطبخ

نهي .. انتي جيتي يا ماما ؟

اعتدال .. ايوا يا نهي

نهي .. عملتي ايه ؟

اعتدال .. خفضلي المبلغ وخلاه الف جنية

نهي .. ياااه  .. بجد ؟؟ ! يشكر والله .. مالك يا ماما حاساكي مش مبسوطة ؟!!

اعتدال .. اصله طلب مني طلب غريب !!

نهي .. طلب ايه منك

اعتدال .. طلب مني الجواز!

#ذنب_بعد_الخمسين

#الثامن

نهي .. ايه اللي بتقوليه دا يا ماما ؟! بقي عم سيد عاوز يتجوزك انتي ؟!!

اعتدال .. ايوا فجأني بالطلب دا انهارده وانا عنده

نهي .. وازاي يطلب منك حاجة زي دي اصلا ؟!! دا باين عليه كبر وخرف !

اعتدال .. يابنتي ما يطلب زي ما هو عايز .. انتي شفتيني وافقت اصلا ؟!

نهي .. ولو انتي وافقتي انا مش هوافق ابدا

اعتدال .. وانا لو حبيت افكر في عرضه .. موافقتك من عدم موافقتك مش هتكون في حسباني !!

نهي .. يعني ايه يا ماما ؟!!

اعتدال .. يعني انتي مش ولية امري عشان انتظر موافقتك يا نهي واول مره احس انك بتفكري في نفسك وبس

نهي .. وانتي عاوزة تتجوزي وانتي في سنك دا؟!

اعتدال .. الموضوع اصلا مش في دماغي .. بس لو فعلا وحصل وفكرت  في حاجة زي دي واتقدملي عريس مناسب ايه اللي يمنع ؟!! هو انا هعمل حاجة عيب ولا حرام ؟!


نهي .. لا مش هتعملي حاجة حرام .. بس انتي عرفة ان دا ضد مبادئ المجتمع اللي احنا عايشين فيه .. والناس ما بتصدق تمسك سيرة حد !!


اعتدال .. طظ في المبادئ والعادات والتقاليد اللي دمرت حياتي وخلتني مش عرفة اذا كنت عايشة ولا ميته !! اذا كان اللي بين ضلوعي دا قلب عايش ولا قلب ميت !! اسكتي انتي مش حاسة باللي جوايا .. انتي لقيتي اللي يحبك وتحبيه ومحدش فرض عليكي رأيه لكن انا اتجوزت من ابوكي وانا عندي ١٤ سنه وابوكي وقتها كان ضعف عمري !! انتي لما بتتكلمي معايا وبتقليلي بحب عصام وعصام بيحبني مببقاش فاهمه انتي تقصدي ايه !! لأني احساسك عمري ما حسيته ابدا .. فاهمه ؟!!

نهي .. ايه الحكاية يا ماما !! كل دا عشان اعترضت علي طلب اونكل سيد ؟!! ع العموم انتي حره ..تتجوزي او متتجوزيش .. بس علي ما اظن انك لو فكرتي تعملي حاجة زي دي في يوم من الايام .. اونكل حسن واونكل حسين مش هيوافقوا ..  بعد ازنك

ثم تتركها وتنصرف ورد فعل علي وجه اعتدال

وفي المساء يتصل بها حمادة حيث تجلس اعتدال في غرفتها حزينة مهمومه تفكر فيما يحدث حولها

اعتدال .. الو .. ازيك يا حمادة

حمادة .. ازيك انتي عاملة ايه ؟؟

اعتدال .. الحمد لله

حمادة .. اللي سمعته دا صحيح ؟!!


اعتدال .. سمعت ايه ؟؟!

حمادة .. سمعت ان بابا طلبك للجواز !!

اعتدال .. ايوا هو لحق يقلك ؟!

حمادة .. ايوا كلمني من شوية عشان يطمن عليا وقالي انه طلب ايدك للجواز وانك هتفكري

اعتدال .. انا مقلتلوش هفكر !! انا مجاوبتوش اصلا !!

حمادة .. مجاوبتيش يعني العرض محل تفكير ؟!!

اعتدال .. لا .. انا مجاوبتش عشان هو ما ادانيش فرصة اجاوب

حمادة .. طب ورأيك ايه ؟!

اعتدال .. رأيي اني انا مش بفكر في الجواز اصلا يعني لا هو ولا غيره .. وبعدين بفرض اني بفكر في موضوع الجواز ودا من رابع المستحيلات .. عمري ما هوافق علي ابوك ابدا .. لأنه في يوم من الايام كان جوز صحبتي

حمادة .. طيب طمنتيني .. مش هتيجي تسلمي عليا

اعتدال .. ما انا كنت عندكم امبارح !!

حمادة .. بس مقعدناش مع بعض .. ممكن تيجي دلوقتي ؟!!

اعتدال .. مش هينفع

حمادة .. ليه ؟؟!

اعتدال .. تعبانه وعايزة انام

حمادة .. ولو قلتلك عشان خاطري تيجي تقعدي معايا شوية

اعتدال .. اسفة

حمادة .. طب ايه رأيك لو ماجيتيش .. هجيلك انا وانا بحالتي دي وانتي عرفة اني مجنون واعملها

اعتدال .. يا وقعتك السودا يا اعتدال الواد وابوه عليا !! جاية يا حمادة لما اشوف اخرتها ..

حمادة بفرح شديد .. مستنيكي ياقمر .. سلام

اعتدال تذهب الي شقة حمادة ليحدث شئ صادم .. 

#ذنب_بعد_الخمسين

#التاسع

وتذهب اعتدال الي شقة نوال بناء علي رغبة حمادة ويبدوا ان نوال في قمة الغضب من اعتدال

اعتدال .. ايه يا نوال مفيش اتفضلي ؟؟!

نوال .. اتفضلي ياختي .. بيتك ومطرحك

اعتدال .. مالك في ايه ؟!!

نوال .. مفيش بس اتاريني علي نياتي وانا مش حاسة !!

اعتدال .. قصدك ايه يا وليه ؟!

نوال .. قصدي انتي عرفاه يا اعتدال !!

اعتدال .. اها .. حماده حكالك !! 

بس الموضوع مش زي ما انتي فاكره ؟!!

نوال .. طب قليلي ايه هي الفكره الصح !!

اعتدال .. سيد عرض عليا الجواز فعلا .. 

بس انا مقلتش اه

نوال .. ومقلتيش لا !!

اعتدال .. هو ما ادانيش فرصة اصلا انطق واقول رأيي .. كل اللي قاله خدي وقتك براحتك وفكري في الموضوع

نوال .. ويا تري فكرتي ولا لسة ؟!!

اعتدال .. وانتي مين قالك اني هفكر من اصله !! اساسا الفكرة مرفوضة بالنسبة لي .. وبعدين تعالي هنا .. انتي زعلانه ليه انتوا مش مطلقين بقالكم فتره ؟!!

نوال .. انا مش زعلانه منه هو .. هو براحته لأنه معادش يفرق معايا .. انا اللي يفرق معايا انتي يا اعتدال .. متجيش من صاحبتي عشرة عمري !!

اعتدال .. واديني يا ستي وضحتلك الصورة عشان ترتاحي .. اه اتفضل ولا امشي ؟؟!


نوال .. طبعا تتفضلي ونص .. وهنزل كمان اجيبلك حاجة ساقعة من تحت


اعتدال .. لا مالوش لزوم

نوال .. لا والله ادخلي سلمي علي حماده وانا دقيقتين وطالعة علطول

اعتدال .. ايوا بس ...

نوال .. يا ولية ادخلي هو انتي غريبة !!

وتذهب نوال لأحضار زجاجة مياه غازية لأعتدال واعتدال تدخل الي غرفة حمادة رغم ترددها في فعل ذلك

حمادة .. ايه مالك مكسوفة تدخلي عندي ؟!!

اعتدال .. وانا هتكسف من ايه !!

حمادة .. طب تعالي اقعدي

اعتدال .. حاضر .. انت ايه اخبارك ؟؟

حمادة .. زفت !!

اعتدال .. ليه بس ؟!!

حمادة .. انتي عرفة ليه يا اعتدال

اعتدال .. يابني اسمي طنط اعتدال !!

حمادة .. مش لما تبقي بالنسبة لي طنط !! انا شايفك بطريقة تانية خالص .. شايفك بنت صغيرة بضفاير كلها حيوية ونشاط وحب للحياه

اعتدال .. بس انا في الحقيقة مش كدا .. انا ست كبيره وشعري ابيض حتي بص

ثم تكشف عن شعرها

حمادة .. وماله ياما شباب صغيرين وشعرهم ابيض !! وبعدين الشعر الابيض دا عنوان الوقار والشباب شباب القلب .. علي فكره شعرك طويل وناعم

ثم يمسح يده علي شعرها

اعتدال .. وبعدين معاك يابني انت .. اطلع من دماغي ارجوك

حمادة .. طب اطلعي انتي من قلبي الاول !! انا بحبك يا اعتدال .. افهمي بقي

اعتدال .. طب ابعد عني

حمادة .. لا .. انا مش هسيبك تهربي مني زي المره اللي فاتت

اعتدال .. يابني اعقل

حمادة .. طب ما تتجنني انتي زيي ؟!!

ثم يقترب منها اكثر حتي يقترب من عينها وتدخل نوال

نوال .. معقول اللي انا شايفاه بعيني دا ؟؟!! اعتدال وابني.....  !! يا لهوي يا ولاد

اعتدال ترتبك .. لا يا نوال انتي فاهمه غلط .. دا دا ..

نوال .. دا ايه بس ؟!! اخص عليكي وليه مش تمام  .. اكمنك سيد مش فارق معاكي ولا في بالك حتي !! عشان الهانم جارتنا المحترمه معلقة ابنه !!

#ذنب_بعد_الخمسين

#العاشر

نوال .. عنيها يا واد المطروفه برضوا ولا شفايفها ؟! اخص عليكي نزلتي من نظري ملقتيش غير ابني وتلفي عليه ؟! دا حتي اختشي علي دمك دا من دور بنتك !!

اعتدال لا تتحمل تلك الاهانات تكتفي بالدموع وتنصرف من المنزل

حمادة .. انتي ايه اللي عملتيه دا ؟! كدا تجرحيها بالكلام ؟!!

نوال .. خايف علي مشاعرها اوي يا روح امك ؟! دي تستاهل ضرب النار .. اخص عليها وليه واطية

حمادة .. كلمة تاني زيادة مش هقعدلك ثانية في البيت

نوال .. عايز تسيب البيت وتحرق قلبي عليك يا حمادة عشان خاطر واحدة ملهاش امان خانت العيش والملح وعشرة السنين ؟! حاضر يا حمادة انا خرصت اهوه

نوال تنصرف من الغرفة وحمادة في قمة الغضب من تصرف امه ..وفي مساء اليوم التالي اعتدال في غرفتها تغلق علي نفسها الباب حائرة متوترة في قمة الخجل مما حدث قلقة مما سيحدث بعد ذلك ونهي تطرق باب الغرفة علي امها


نهي .. ماما .. افتحي من فضلك

اعتدال .. عايزة ايه يا نهي ؟!

نهي .. افتحي الباب عايزة اتكلم معاكي من فضلك

اعتدال تذهب لتفتح الباب

نهي .. ايه الحكاية يا ماما ؟! اول مره تقعدي في اوضتك اليوم كله وتقفلي علي نفسك كمان  بالمفتاح !!

اعتدال .. عايزة ايه با نهي خلصيني ؟ 

نهي .. انتي زعلانه من الطريقة اللي اتكلمت معاكي بيها .. صح ؟! يا ستي انا اسفة حقك عليا متزعليش .. تعالي بقي عشان نتعشي مع بعض

اعتدال .. مش عاوز اكل روحي اتعشي انتي

نهي .. يا ماما انتي ما اتغدتيش خالص انهارده وكمان مش عايزة تتعشي ؟! هو انتي زعلانه مني اوي كدا ؟!!

اعتدال .. يا بنتي انا لا زعلانه منك ولا حاجة .. سيبيني في حالي بقي

نهي .. طب اعرف مالك ؟!! فيه ايه ؟!!

اعتدال .. مفيش حاجة

محمول اعتدال يرن عدة مرات والهاتف علي وضع الهزاز ونهي تلاحظ ان المحمول الخاص بأمها يرن وامها لا تجيب

نهي .. تليفونك بيرن !

اعتدال .. سيبيه يرن

نهي .. طب شوفي مين لا يكون حد من خلاني عاوزك في حاجة !

اعتدال .. يا ستي تليفوني وانا حرة فيه مش هرد علي حد .. انتي مالك ؟!

نهي .. خلاص ارد انا

اعتدال .. اوعي سيبي التليفون بتاعي مالكيش دعوه بيه

نهي تلاحظ ان المتصل حمادة فتتعجب

نهي .. دا حمادة ابن طنط نوال !!

اعتدال ترتبك .. حماده !!.. ماشي خلاص

نهي .. ايه مش هتردي عليه ؟!

اعتدال .. هاتي التليفون ده ..

ثم ترميه علي الارض بقوة

اعتدال .. ارتحتي بقي ؟!!

نهي .. لا انتي مش طبيعية انهارده !!

ثم تتركها وتنصرف واعتدال في قمة القلق والحيرة والغضب الشديد تنزل الارض وتجمع محتويات التليفون التي تفرقت علي الارض بعد القاءه وتمر دقيقتين وتدخل نهي الي غرفة امها مره اخري  ويبدوا علي وجهها الدهشة والغضب وتنظر لأمها في صمت

اعتدال .. مالك في ايه ؟!! بتبصيلي كدا ليه ؟!

نهي .. طنط نوال لسة قافلة معايا حالا

اعتدال تُصعق من تلك الجملة .. ايه ؟!!

الاحداث تتصاعد حدتها واللي جاي في قمة الاثارة .



تكملة الرواية من هنا



بداية الروايه من هنا







تعليقات

CLOSE ADS
CLOSE ADS
close