رواية ومازلنا نبحث عن الحياه الفصل الاول والثاني والثالث والرابع والخامس والسادس والسابع والاخير بقلم سيد احمد الشاذلي
 |
رواية ومازلنا نبحث عن الحياه الفصل الاول والثاني والثالث والرابع والخامس والسادس والسابع والاخير بقلم سيد احمد الشاذلي
الحكايه دى حكاية ناس بسيطه مافيش حد اتكلم عنهم فى روايه اوجاب سيرتهم فى قصه
الروايه طويله بس أنا حاولت اختصر فيها على اد ماقدر بس برغم مافيها حبيتها جدا وانا بكتبها حبيت فيها روح سمر وضحكتها ودنيا كمان علشان قبل ماتكون لابتسام اخت كانت ليها صاحبتها
عجبتنى شخصية ابتسام وبساطتها لانها انسان عمرها ماتبرت من اصلها الروايه فيها حاجات كتير قوى حكاية اسره كامله فيها عذاب ووجع فيها رضا بالمكتوب تابعوا الروايه للنهايه
ومازلنا نبحث عن الحياه
الجزء الاول
ابتسام
ابوها كان راجل على اد حاله بسيط غلبان بيشتغل فى الروبابيكيا طول النهار بيلف وبييجى اخر الليل حيله مهدود
والام كانت ست بيت شاطره واللى ربنا بيكرم جوزها بيه كانت بتمشى على اده
ابتسام شافها واحد اسمه رامى من ولاد الذوات واعجب بيها وحب يخطبها
رامى /_اذيك ياستاذه ابتسام
ابتسام /_اهلا بيك تحت امرك
رامى /_أنا معجب بيكى وكنت عايز اعترفلك بكده من زمان
ابتسام /_معجب بيا ازاي يعنى مش فاهمه؟
رامى /_عايز اتجوزك
ابتسام /_لوعايز تتجوزنى ماكانش المفروض توقفنى كده اوتنادى عليه كان ممكن بطريقتك تعرف بيت اهلى وتروح لهم
رامى /_بس مش اعرف انتى موافقه ولا لا ؟
ابتسام /_رايي اقوله ادام اهلى وابويا
رامى /&انتى انسانه حاده جدا
ابتسام /_أنا اتربيت على كده اللى شارينى بجد بيت ابويا مفتوح
رامى /_ممكن العنوان
ابتسام /_اتفضل ده العنوان بعد اذنك ممكن امشى
رامى /&ممكن اوصلك
ابتسام /_لا متشكره لحضرتك
ابتسام سابت رامى ومشيت ورجعت البيت
سمر /_ايه ياواد مالك فيه ايه مالك حلو كده ليه؟
ابتسام/_أنا طول عمرى حلوه ياحبيبتي
سمر /_واضح بس شغل العسكر اللى بتعمليه مع الناس بره ده مالوش لزوم عايزه اخلص منك علشان اتجوز بقى
ابتسام /_شغل العسكر اللى مش عاجبك ده لازم اتعامل بيه مع الناس لانى لوماعملتش كده هيفتكرونا لقمه طريه
سمر /_بس يابت كده عمرك مهاتتزفتى وتتجوزى وانا مش هتجوز خالص خلينى ارتاح بقى
ابتسام /_مين قالك كده ياهبله أنا فيه عريس اتقدملى النهارده واديته العنوان
سمر /_العنوان بتاعنا هنا
ابتسام/_لاعنوان الجيران ياخفيفه
سمر /_يبقى اول مها ييجى ويشوف حالنا هيطفش
ابتسام /_هيطفش ليه ؟
سمر /_يعني انتى مش شايفه حالنا وعيشتنا مين هيرضى يقعد معانا هنا وسط الروبابيكيا والقرف ده
ابتسام /_الروبابيكيا والقرف ده دول ربونا وكبرونا وخلونا احسن بنات فى الدنيا كلها
سمر /&بلا احسن بلازفت امته بيجى اليوم واغور من هنا
ابتسام /_بلاش تبصى لفوق كده علشان هتقعى على جدور رقبتك
سمر /_امال ابص فين ؟
ابتسام /_بصى للى اقل منك علشان تحبى عيشتك انتى الاوده اللى انتى عايشه فيها دى غيرك مش لاقيها فيه ناس بتفرش حتة كرتونه فى الشارع على الارض ويناموا ويمكن مابيلقوش حتة الكرتونه
باب الاوضه بيتفتح وبتدخل دنيا
ابتسام بتاخدها فى حضنها وحشتيني ياحبيبتي
دنيا /&وانتى كمان ياروحي
سمر ازيك يادندن وحشتيني يابت. فين الواد وسام حبيب خالتو
دنيا /_مع ابوه ياحبيبتي
سمر /_ليه كده ماجيبتهوش معاكى ليه؟
دنيا /_ابوه اخده منى وانا ماشيه
ابتسام /_ليه كده ياحبيبتي ؟
دنيا /_زعق معايا شويه
سمر /_ليه ياغبيه كده حد يسيب العز اللى انتى فيه وييجى الخرابه دى
دنيا /_عارفه الخرابه اللى مش عاجبك دى اتمنى اعيش فيها باقى عمرى كله ومارجعش تانى للعز اللى انتى بتتكلمي عليه ده
سمر /_اصلك وش فقر
ابتسام /_اسكتى ياسمر
سمر /&اسكت ليه مش دى الحقيقه اللى بنضحك بيها على نفسنا
دنيا /_عارفه ياسمر فيه حاجات لقيتها فى الخرابه دى وماشفتهاش فى العز اللى بتتكلمي عليه
سمر /_لقيتى ايه يافقريه
دنيا /_لقيت لمتنا وخوفنا على بعض كفايه اخر اليوم لما ابويا وامى يلمونا ونقعد معاهم كفايه لو واحده فينا جرى لها حاجه كلنا بنكون جنب
سمر /بلاش كلام الشعارات والهبل ده انتم اصلا وش فقر انا هروح اشوفلى دهيه اتخمد فيها
دنيا /_تعالى ياحبيبتي انتى هتتامى مكانك
سمر /_وانتى هتنامى فين ان شاءلله
دنيا /_هنام جنب ابتسام لانها وحشتنى قوى وحشنى قعدتها وكلامها
سمر /_ايوه اتلم تنتن على تنتون واحد غبى والتانى مجنون
دنيا /_هههه يخربيت دماغك
ابتسام /_تعالى سيبك من البت دي تعالى ياحبيبتي
دنيا /_ايه ياحبيبتي مافيش عريس ابن حلال كده
ابتسام /_فيه ياحبيبتي
دنيا /_بجد قوليلي شكله ايه ؟
ابتسام /&بصراحة هو ماكلمنيش غير مره واحده بس وقالى انه معجب بيا
دنيا /_وانتى قولتيله ايه؟
ابتسام /_اديته عنوان ابويا
دنيا /_وهييجى يتقدملك امته ؟
ابتسام /_يجى وقت ماييجى ياستى المهم سيبك منى انتى زعلانه ليه مع جوزك
دنيا /_حاجات كتيره قوى ياحبيبتي معايره وقلة قيمه وضرب وشتيمه انتى مش تايهه عن لسان جوزى
ابتسام /_معلش ياست الكل استحملى علشان خاطر وسام
دنيا /_كل حاجه فى حياتى مستحملاها علشان خاطر وسام وجايه على نفسى علشان خاطر وسام بنضرب واتهان وارجع علشان خاطر وسام بس ياترى وسام ابنى لما يكبر هيعرف كل ده
ابتسام /_ياحبيبتي هونى على نفسك كده وروقى اقوم بقى اعمل شوية شاي ونفضل نرغى للصبح انا وانتى
وقامت ابتسام عملت الشاي ورجعت شافت دموع دنيا فى عينيها
ابتسام /_ايه لزمتها دموعك دى دلوقتي ؟
دنيا /_وسام وحشنى اول يوم ينام بعيد عن حضنى
ابتسام /_وأنا مش مكفياكى ولاحضنك بقى مايسعش غير وسام بس
دنيا /_وسام ضنايا يابتسام وانتى بنت قلبى
سمر وهي مستغطيه ونايمه
سمر /_يالهوى على المحن وأنا يابله دنيا ابقى ايه؟
ابتسام /_انتى البلوى اللى ربنا بلانا بيها هههه
دنيا /_عارفه برغم لسانك اللى متبرى منك ياسمر بس بحبك
سمر /_المهم وسام ضناكى والبت دى بنت قلبك أنا بقى بنت ايه؟
دنيا /_بنت ابوكى ومامتك هههه هههه
واتقلبت القعده ضحك بين الاخوات وفضلوا يهزروا سواء
دنيا /_عارفه ياسمر أنا كنت جايه كارهه حياتى ونفسى بس لما قعدت معاكم ضحكت من قلبى وراحت خنقتى
سمر /_بجد طيب ايه رأيك بقى تعيشى هنا وانا اروح اتجوز جوزك واربي وسام
دنيا /_روحى خديه واشبعى بيه وأنا هربى ليكم وسام
سمر /_ومين قالك اننا هنجيب وسام هنا دانتى مش هخليكى تشوفيه ولاتشوفينى هنا
دنيا /_اوعى تفتكرى انك لما تتجوزى هترتاحى وتعيشى حياه سعيده الدنيا مش مريحه حد واحنا كلنا
بندور على الحياه واحنا عايشين فيها مش عارفين العيب فينا ولافى الحياه نفسها
وبعد الليله ماعدت
ومازلنا نبحث عن الحياه
الجزء الثاني
سلمى قامت راحت دراستها وابتسام راحت شغلها ودنيا فضلت قاعده مع امها فى البيت
والاب راح يشوف شغله ويسعى على رزقه
ورجعت سلمى الساعه ١٢ وابتسام رجعت على الساعه اتنين
ابتسام دخلت غيرت لبسها وفضلت تروق فى البيت
الاب جه الساعه ٣ ونص راكب عربيه كارو ومعاه رزقه اللى ربنا قسمه ليه
ابتسام خرجت هي ودنيا لابوهم عم حسن
ابتسام عماله تنقى من على العربيه وتفرز الشغل وتعبيه فى شكاير
دنيا شافت عربيه ملاكى داخله الشارع
دنيا /_هو شارعنا بيدخله عربيات حلوه كده يابتسام
ابتسام /_اول مره اشوف عربيه
دنيا وابتسام سمعوا عيل صغير
بيقول ياعم حسن الناس اللى فى العربيه دول بيسالوا عليك
عم حسن راح وقف أدام العربيه
خير ياباشا فيه حاجه ؟
رامى /_كنا عايزين نعرف بيت الاستاذه ابتسام
عم حسن /_ابتسام دى بنتى خير فيه حاجه يابنى؟
رامى بص لعم حسن من فوق لتحت ويبص لهدومه المقطعه
رامى نزل من العربيه ابتسام بصت وشافته
ابتسام راحت ناحية العربيه
اتفضل ياستاذ رامى
رامى /_معلش مره ثانيه ياستاذه ابتسام
ابتسام شافت نظرة رامى وهو بيبص لها باستحقار سابته وراحت تكمل مع دنيا اختها
دنيا /_مين ده ياابتسام
ابتسام /_ده العريس اللى كان جاي يخطبنى
دنيا /_واضح انه ماعجبوش الحال
ابتسام /_ان شاءلله ماعجبه ياحبيبتي
دنيا /_على رايك
عم حسن /_مين ده يابنتي وكان عايز ايه؟
دنيا /_كان جاي يخطبها يابا
عم حسن /_يخطبها طيب ليه ماقلتيش ياابتسام حتى يابنتى كنا عملنا له واجب ولاي حاجه
ابتسام /_انت يابا صاحب واجب طول عمرك بس هو واضح انه مش عايز ينزل
عم حسن حس بالاحراج وساب بناته ودخل
ابتسام سابت دنيا ودخلت وراء ابوها
ابتسام /_ايه ياحاج سيبتنا ودخلت ليه ؟
عم حسن /&معلش يابنتى تعبان شويه
ابتسام /&من امته يابا تعبك بيحوشك عن الشغل
عم حسن والدموع فى عينيه كان نفسى يابنتى يشوفونا فى منظر احسن من كده
ابتسام /_ليه هنتبراء من اصلنا
عم حسن /_لا يابنتى مش قصدى
ابتسام /_انا اعيش تحت رجلك خدامه يابا ولاشوفش الدمعه دى فى عينيك يروح ده وييجى غيره أنا عايزه واحد من توبى يابا مش واحد يتعالى عليه قوم بقى المغرب هياذن خليك تسلم الشغل ونتغدى سواء
عم حسن /_ربنا يكملك بعقلك يابنتى حاضر ياحبيبتي
وقام عم حسن
سلم الشغل اللي ربنا رزقه بيه ورجع قعد فى وسط ولاده يتغدوا
ابتسام /_فاكر يابا لما كنت بتاخدنى معاك وانت رايح الشغل واقلدك وانت بتنادى
عم حسن /_انتى لسه فاكره يابتسام
ابتسام /_ايوه فاكره يابا وانت كنت كل شويه تضحك عليه
ابتسام حاولت تخفف عن ابوها حزنه وفضلوا يضحكوا ويهزروا
عم حسن /_قومى ياسمر اعملى شوية شاي
سمر /_يابا فيه اتنين اكبر منى المفروض هما اللي يعملوا الكلام ده وانا اقعد لانى انا الصغيره
ابتسام /_أنا اللى هقوم اعملك كوباية شاي يابا خليكى زي مانتي ياسمر
وقامت سمر عملت الشاي لابوها عم حسن وخرجت
تليفونها كان بيرن
ابتسام /_الو ايوه مين
رامى /_مش كنتى تعرفينى ظروفك علشان ماجبش اهلى معايا واتحرج من اللى شوفته
ابتسام /_انت جبت رقمي منين
رامى /_هو ده المهم عندك مش مهم انك احرجتينى وكويس انى ماخليتهمش ينزلوا
ابتسام /_ ياستاذ رامى اللى ينزل فوق دماغنا واللى ماينزلش ده شىء يرجعله
رامى /_كنت اتمنى اشوفك احسن من كده
ابتسام /_ليه هو حضرتك شوفتنى بعمل حاجه غلط
رامى /&انتى ماشوفتيش منظركم وانتم شكل الزبالين
ابتسام /_بعد اذنك مضطره اقفل
رامى /_ليه علشان قولتلك على حقيقتك اللى يشوف معاملتك معانا في الشغل يقول بنت وزير لكن انتي ولا حاجه
ابتسام قفلت السكه في وشه وقعدت مكانها
دنيا /_مالك فيكي ايه ياحبيبتي
ابتسام /_مافيش حاجه
دنيا /_قولى ياحبيبتي فيكى ايه مين اللي كان بيكلمك ده
ابتسام /_رامى
دنيا /_واضح انه قالك حاجه زعلتك
ابتسام /_هيزعلنى ليه ياحبيبتي كان من بقية اهلى
دنيا /_عليه أنا بردوه يابتسام
ابتسام /_ده مش من توبى ولاحبيته علشان ابكى عليه بس كلامه زعلنى
دنيا /&الكلام مابيلزقش ياحبيبتي مالناس طول عمرها شايفه اللى بيشتغلوا شغلانه زي بتاعتنا بيقولوا عليهم غجر
ابتسام /يقولوا اللى يقولوه المهم اننا نكون عايشين وراضيين باللى ربنا كتبه لنا مافيش حد بيختار حياته ولابيعيش حياته زي ماهو رايد
دنيا/$سيبك من كلام رامى ولازيه ماهم دول مولودين فى بوقهم معلقه دهب
ابتسام/_دهب ولافضه كلنا فى الاول والاخر ولاد تسعه
ومازلنا نبحث عن الحياه
الجزء الثالث
اليوم التانى ابتسام راحت شغلها
رامى الساعه ١١ دخل عليها
رامى /_اذيك عامله ايه ؟
ابتسام ماردتش عليه
رامى /_ايه يابنت حسن بتاع الروبابيكيا مش بكلمك
ابتسام /_حضرتك تكلمنى ليه وبصفتك ايه اصلا
رامى /_بلاش الفشخه الكدابه بتاعتك دى وبصى لاصلك
ابتسام /_أنا عارفه اصلى كويس وراضيه بيه
رامى /&امال عامله فيها بنت ناس ليه ومتكبره على الكل
ابتسام /_لا انا مش بنت ناس ياستاذ رامى انا بنت زبالين ومش هستعر من مهنة ابويا اللي ربانى وكبرنى
رامى /_ايوه كده اعترفى باصلك
ابتسام /_أنا معترفه بيه ازازة الزيت الفاضيه اللى بتترمى فى زبالتك انت واللى زي حضرتك هما دول اللي أنا باكل منهم أنا واخواتى عايزه ايه تانى
الهدوم اللى أنا لبساها دى واحده جارتى مشحتاه لى بس انا معترفه بكل ده انت بقى ليه بتتكبر على خلق الله وشايفهم حصاله بالنسبالك ؟
رامى /_لانى عرفت حقيقتهم اللى الكل لازم يعرفها يابنت الزبال
ابتسام سابت رامى ومشيت وقعدت جنب زميله ليها رامى راح يستفزها بكلامه
رامى /_اتخضيتى لما شفتك وانتى ماسكه الشيكاره وايديكى متوسخه
نوال /_ايه ياستاذ رامى الكلام ده
رامى /_اسكتى يانوال
نوال /_لا مش هسكت واذا كنت فاكر ان رزقنا عليك انت ووالدك تبقى غلطان أنا هشتكى لباباك وابلغه باللى بيحصل ده
رامى /_ياريت تبلغيه بالمره إن ابتسام بتمسك القاذورات بايديها
والد رامى كان المدير وداخل سمع كلام ابنه
الاب /_تعالى يارامى على مكتبى اتفضلى ياستاذه نوال انتى وابتسام
التلاته راحوا المكتب
المدير /_ايه اللى حصل وليه صوتكم كان عالى
رامى /_حصل
المدير /_ياريت ماسمعش صوتك اتكلمى ياستاذه نوال
نوال /_مالوش لزمه الكلام ياستاذ جاسر أنا خلاص همشى من الشغل أنا وابتسام
المدير /_ممكن اعرف ايه اللي حصل الأول
نوال /_الأستاذ رامى عمال يهين فى ابتسام ويقولها كلام مايصحش
المدير /_قال لحضرتك ايه ياستاذه ابتسام
ابتسام /_بيعايرنى بشغلة ابويا
المدير /_باباكى شغال حرامى ولا قتال قتله
ابتسام /_لا ياستاذ جاسر
المدير /_طالما مابيعملش حاجه عيب اوحرام ماتبقاش معايره ده يابنتى شرف الراجل اللى يربى ويكبر انسانه زيك وفى احترامها وادبها المفروض تفتخر بابوها وماتقولش ان حد بيعايرها والدك شغال ايه ؟
ابتسام /&بيلف يلم روبابيكيا
المدير /_تفتكرى إن حاجه تضايقك دى
ابتسام /&أنا عمرى ماضايقت من شغلة ابويا بالعكس دانا بساعده فى شغله
المدير /_بتلفى معاه وبتقولى روبابيكيا
ابتسام /_لا ياستاذ جاسر
المدير /_يابنتى انتى انسانه محترمه جدا قومى اعتذر ليها يارامى
رامى /_أنا آسف
المدير /_احنا هنا كلنا اخوات ومافيش فرق بين حد فينا واللى يغلط يعتذر ارفعى راسك يا ابتسام لفوق اوعى توطيها لان مهنة والدك مهنه شريفه أنا أسف بالنيابه عن ابنى تقدروا تتفضلوا
خرجت ابتسام ونوال
المدير/_انت هنا شغال زيك زي اي حد موجود اوعى تفتكر انى هسمحلك انك تغلط فى اي حد وهسكت انا غلطان اني ماعرفتش اربيك
رامى /_انتى بتزعقلى علشان واحده زي دي يابابا
المدير /_بابا فى البيت مش هنا اللي انت بتتكلم عليها دى من احسن الناس لوكان ربنا رايد انى اخلف بنت كنت اتمنى انها تكون فى ادبها واحترامها اتفضل على شغلك وياريت تفتكر اصل جدك قبل ماتعاير بنات الناس باصلهم جدك كان كلاف يعنى بيشيل قرف البهايم علشان يربينا ويكبرنى واخلف واحد زيك
رامى /_أنا أسف يابابا
المدير /_اللى يتبرى من اصله يابنى بيبقى قليل الاصل طول عمره
رامى /_عن اذنك
المدير/_ اتفضل
رامى خرج وقعد مكان شغله ومضايق من الكلام اللى باباه قالوا ليه وحس انه نصر ابتسام وقلل من كرامته ادامها
وجه ميعاد خروجهم من الشغل
خرجت ابتسام ونوال مع بعض
رامى /_ابتسام تسمحيلى اوصلك
ابتسام /_اسفه ياستاذ رامى أنا ابويا ممكن يكون بيلف بعربية الروبابيكيا يشوفنى وهو ماربنيش على كده
رامى /_انتى بتتريقى عليه
ابتسام /&ليه بتحسبها كده أنا اتربيت إنى ماركبش مع اي حد بعد اذنك
ومشيت ابتسام ونوال مع بعض ورجعت ابتسام البيت
دنيا /_ايه ياعسل حمدالله على السلامة
ابتسام /_الله يسلمك ياحبيبتي
ابتسام سمعت صوت وسام ابن اختها طلعت جري واخدته بالحضن
دنيا /_ايه ياوسام ده كله خالتك شكلها مبسوطه النهارده قوى ايه كلمتى رامى
ابتسام حكت لدنيا اللى حصل من رامى ومن والده
دنيا ياخبر ابيض لو كنت انا كنت قلعت اللى فى رجلى واديته بيه
ابتسام /_ليه هنستعر من حقيقتنا ولايه يادنيا
دنيا/_ لا بس اكيد كان بيقولها بطريقه غريبه علشان كده زعلتك
ابتسام /_بطريقه غريبه بطريقه عاديه مش فارقه
دنيا /_طيب ايه رايك تخليه ييجى ويقابل ابوكي عند خالك
ابتسام /&يادنيا اللى عايزنى ييجي ياخدنى من هنا ويشوف عيشتى على الطبيعه لاننا مابنعملش حاجه حرام ولاعيب احنا ناس عايشين زي اللى عايشين يمكن ظروفنا على اد حالنا بس الحمدلله احنا احسن من غيرنا بكتير
دنيا /_يابنتى مانا لما جيت اتخطب روحت عند خالك
ابتسام /_ماتزعليش منى ياحبيبتي أنا مش هعمل نفس عملتك وانتى عارفه السبب وانتى اقرب واحده ليه لاقدر اجرحك ولاقدر اهينك
دنيا /_عارفه ياحبيبتي ومعاكى حق فى كل اللي بتقوليه
ابتسام /_يلا بينا بقى زمان ابويا جاي علشان نجهز الاكل
ايه بقى اللى حصل وايه اللى هيتغير فى حياة ابتسام
ومازلنا نبحث عن الحياه
الجزء الرابع فضلت ابتسام ودنيا على هذا الحال يساعدوا ابوهم لمايبجى من شغله
ويقعدوا ويتجمعوا مع بعض وقعدة العيله مع بعضها ماتتقدر بمال
سلمى كانت مكبره دماغها اصلها صغيره وكل ساعه بحال
وفى يوم
ابتسام رايحه خرجت من بيتها ورايحه شغلها شافها واحد اسمه جمال وبداء الكلام بينهم وده كان اول سؤال
جمال /_لوسمحتى ياستاذه ممكن اعرف بيت محمود حامد فين
ابتسام /_الشارع التانى اللى ورانا ده
جمال /_متشكر يانسه
ابتسام /_تحت امرك
ومشيت ابتسام ومشى جمال وابتسام بتبص له وهو بيبص لها
ابتسام بتمد ايديها فى شنطتها نسيت الفلوس فى البيت رجعت تاني تاخدها لقيت جمال واقف ادام البيت
ابتسام /_هو حضرتك عايز حاجه
جمال /_ايوه عايز مرات محمود هو ده بيت ابوها
ابتسام /_ايوه خير فيه حاجه
جمال /_هو حضرتك مراته ؟
ابتسام /&لا انا اختها
جمال /_ممكن تنادى عليها لوسمحتى
ابتسام /_حاضر
ابتسام دخلت تنادى على دنيا تكلم جمال
دنيا /_نعم خير فيه حاجه ؟
جمال /_أنا جمال وجاي لاهل محمود جوز حضرتك اولمراته
دنيا /_محمود موجود فى البيت ممكن تروح له
جمال /_ياستى محمود عامل حادثه وموجود فى المستشفى من امبارح ولما شفت بطاقته جيت ابلغكم روحت البيت الجيران بلغونى بالعنوان هنا
دنيا /_الحقينى يابتسام محمود عمل حادثه
ابتسام طلعت جري مع دنيا وراحوا مع جمال
محمود كان بين الحياه والموت وكل جسمه كسور
دنيا /_فيه ايه طمنى يادكتور؟
الدكتور /_الامل فى ربنا كبير ياست الكل
دنيا /_وهي بتعيط اتصلى باخواته ياابتسام خليهم ييجوا يشوفوه
جمال /_هونى على نفسك وادعيله ان ربنا يريحه من اللى هو فيه احنا من امبارح واحنا هنا وهو مش دارى بحاجه
ابتسام اتصلت باخو محمود ونص ساعه والدنيا اتقلبت بس كان محمود فارق الدنيا
وساب دنيا وحيده مالهاش بعد ربنا غير ابنها وسام
وبعد الإجراءات اندفن محمود
دنيا مابقيتش مصدقه نفسها
جمال جه يعزى محمود واهله وعزى عم حسن وهو مايعرفوش وشاف ابتسام للمره التالته
جمال بقى كل امله وامنيته يعرف عنها كل حاجه
ابتسام امتلكت عقله وقلبه
وفضلت ابتسام هي امله الوحيد انه يرتبط بيها لحد ماجه اليوم اللى راح فيه جمال عند بيت ابتسام
جمال شاف عم حسن داخل بالعربيه الكارو
عم حسن /_اتفضل يابنى تعالى خير فيه حاجه؟
جمال /_بصراحه كنت عايز اعرف حاجه ومش هلاقى غيرك ياراجل ياطيب يعرفنى اللى انا عايزه
عم حسن /_تعالى يابنى تحت امرك
جمال /&الامر لله
عم حسن نادى على سمر
هاتى يابنتى فرشه واعملى كوبايتين شاي
سمر /_حاضر
ابتسام ماسكه الشيكاره فى ايديها وخارجه شافت جمال قاعد مع ابوها
جمال بص لها ومبقاش مصدق
عم حسن /_خير يابنى
جمال /_كل خير ياراجل ياطيب دى بنتك
عم حسن /_ايوه بنتى ليه فيه حاجه يابنى ؟
جمال /_لا ماعملتش حاجه بس انا كنت جاي اسأل عليها علشان اعرف هي مخطوبه ولا لا
عم حسن /_ليه عندك عريس ليها
جمال /&يعني افهم من كلامك انها مش مخطوبه
عم حسن /_انت ايه حكايتك يابنى
جمال /_اجيب اهلى واجى امته ياعم حسن
عم حسن /_ليه يابنى
جمال /_علشان اجى اخطب بنتك
عم حسن /&تشرف فى اي وقت يابنى
جمال شرب الشاي مع عم حسن وبقى طاير من الفرح واستاذن ومشى
ابتسام /_كان عايز ايه يابا؟
عم حسن/_كان جاي يسال عليكى يابتسام
ابتسام /_يسال عليه ليه
سمر /_جاي يخطبك ياحلوه وسنتك سنه فل ههه
ابتسام /_يخطبنى
سمر /_خليه يخطبنى أنا يابا
عم حسن /_انتى هتفضلى نايمه فى الخط ومافيش حد هيتجوزك
سمر /_ههه لا يابا بس ابتسام تتجوز وهتشوف العرسان بس ابتسام وقف فى السكه ههه
عم حسن /_وسعى يابتسام شويه علشان العرسان تعدى
سمر /_بتضحك عليا يابا دانا القمر اللي فيهم
ابتسام /_فى دى عندك حق هههه
سمر /_اي نعم
جمال لما يروح يخطب ابتسام ايه هتكون نقطة الخلاف
مازلنا نبحث عن الحياه
الجزء الخامس
جه الميعاد اللي جمال رايح يخطب فيه ابتسام
جمال راح لوحده
خبط على الباب سمر فتحت له
سمر /_اتفضل ياستاذ جمال
جمال /_شكرا امال عمى حسن فين؟
سمر /_ابويا فى الشغل وزمانه راجع
جمال وهو قاعد عمال يبص للبيت قوى ويتحقق فيه
ابتسام خرجت من اوضتها
ابتسام /_ازيك ياستاذ
جمال /_ازيك ياستاذه عامله ايه؟
ابتسام /_الحمدلله
جمال /_أنا كنت جاي اخد ميعاد من عمى حسن علشان اجيب اهلى واجى اخطبك
ابتسام /_تنورنا ياستاذ جمال
جمال /_بس ليه سؤال اهلى هيكونوا كتير هتقابلوهم فين
ابتسام /_واضح انك جاي تجرح مش جاي تخطب ياستاذ جمال
جمال /_والله ماقصد حاجه أنا شاريكى وشارى تراب رجلك انتى وعمى حسن
ابتسام /_لوشارى بجد مش هتدور على حاجه زي دي ولاهتسال
جمال /_أنا آسف بس اعذرينى أنا عايزك تكونى كبيره فى نظر اهلى
ابتسام / بجد هو مش هكون كبيره غير ببيت واسع وكبير واضح إن حضرتك بتبص على المظاهر ياستاذ جمال
جمال /_والله ماقصد حاجه خالص
ابتسام /_لوشارينى زي مابتقول هو ده المكان اللي عشت فيه حياتى وهو ده البيت اللي هطلع منه وياريت بلاش الكلام ده ادام ابويا علشان بيزعل اوى
جمال /_حاضر ياستاذه ابتسام
دنيا /_سلام عليكم
جمال /_وعليكم السلام ورحمة الله وبركاته
ابتسام /_اقعدى مع الاستاذ جمال على ماشوف الاكل اللي على النار علشان ابوكى زمانه جاي
دنيا /_خليكي ياحبيبتي وانا هشوفه
ابتسام وهي بتتكلم مع جمال سمعت صوت ابوها
ابتسام /_عن اذنك ياستاذ جمال هطلع لابويا
وخرجت ابتسام لابوها
وعم حسن دخل
عم حسن /_اذيك ياستاذ جمال
جمال /_اذيك ياعم حسن أنا آسف انى جيت من غير معاد
عم حسن /تنور يابنى
جمال /_امته الوقت اللي يناسبك علشان اجيب الاهل واجى اخطب الاستاذه ابتسام
عم حسن /_ماتزعلش منى يابني عايز اسألك سؤال انت شوفت حالنا وظروفنا إناحنا ناس على قدنا لسه عايز بنتى
جمال /_أنا شارى ياعم حسن
عم حسن /_يوم الجمعه هستناك يابنى
جمال خرج وبقى مبسوط وسعيد قوى
دنيا /_تعالى يابا الشقه عندى واتفقوا على كل حاجه يوم الجمعه
عم حسن /_ليه يادنيا
دنيا /&علشان المكان واسع يابا والناس اللي هتيجي
ابتسام /_انتى بتقولى ايه يادنيا
دنيا /_يابنتى لوجاب اهله هتقعدوا فين ؟
ابتسام /_هنقعد هنا واللى شارى ياحبيبتي مابيدورش هو مش هيتجوزنى هنا ده ساعه وهيمشوا
عم حسن /_يابنتى أنا ماينفعش انى اتحرك من مكانى وعمرى مهاوفق ابدا على ان بنتى تتخطب فى بيت حد تانى واللى مش عايز يقعد يابنتى يمشى على راي اختك اللى شارى مابيدورش
دنيا /_بس ممكن اهله يتكلموا لو هو ماتكلمش
ابتسام /_يكلموا لكلامهم هيزيدنا ولاهينقصنا
دنيا /_مشكلتك إن دماغك ناشفه
ابتسام /_لا مش دماغى ناشفه أنا اتربيت على كده اتربيت إن البيت اللى ساترنى ولامم لحمى وعرضى من كلاب السكك حتى ولو اوده واحده يبقى جنه بالنسبالي
عم حسن /_هقوم اسلم الشغل وارجع
دنيا /_خلاص يابتسام باذن الله هنروق البيت يوم الخميس سواء ونجهز كل حاجه ياحبيبتي
ابتسام /_ربنا يخليكي ليه
سمر /_احلى حاجه بقى انى ورايا دروس يوم الخميس وعلى مارجع الاقى البيت يبرق سمعتى انتى وهي ولا لا
دنيا /_سمعنا ياستاذه سمر هههه
سمر /_ايه ياابتسام ماسمعتش صوتك يعنى ولاهتعملى فيها عروسه من دلوقتي. هههه
ابتسام /_لا عروسة مين مش ام نشوف لما ييجوا ايه اللي يتم
سمر /_كل خير يافقر هقوله خدها معاك وانت ماشى هههه
ومرت الايام
وجه يوم الجمعه والعصر اهل جمال جم واتفقوا على كل حاجه والزغاريد ملت البيت
ومازلنا نبحث عن الحياه
الجزء السادس
بعد مابتسام اتخطبت لجمال وحددوا موعد الجواز بعد سنه بداء الاب عم حسن يحط القرش على القرش ويجهز بنته
ابتسام كان كل اللى ربنا بيقدرها عليه كانت بتعمله
وفى يوم عم حسن راح كتب على نفسه وصلات امانه علشان يستر بنته وسط الناس ويجهزها
ومرت الايام وعم حسن سارح بعربيته وطالع يجيب رزق عياله البلديه قابلته اخدت منه العربيه الكارو بتاعته مارحمهوش ولارحموا سنه
ورجع عم حسن بيته العربيه اللى كان بياكل عليها عيش اتخدت منه مبقاش عارف يعمل ايه
هيسدد الاقساط اللى عليه منين
عم حسن الراجل الكبير اللي عنده ٥١ سنه تانى يوم شال شيكاره على كتفه وطلع يلف على رزقه علشان يسدد اقساط جهاز بنته
ابتسام شافت ابوها بيتعب يوم عن التاني
ابتسام /_كفايه بقى يابا انت تعبت ارتاح بقى
عم حسن /_وهجيب منين الاقساط يابنتى وهتاكلى منين انتى واخواتك ؟
ابتسام /_اللى خلقنا مش هينسانا يابا
عم حسن /_ماينفعش يابنتى نقعد فى بيوتنا ونقول اللى خلقنا مش هينسانا لازم نسعى ونتعب علشان نلاقى اللقمه الحلال
ابتسام /_عايزه اقولك على حاجه يابا وياريت تسمعنى
عم حسن /&قولى يابنتى
ابتسام /&أنا هكلم جمال وناجل كمان سنه ولا حاجه علشان مش هنلحق نجهز نفسنا قبل الميعاد
عم حسن /_يابنتى جمال مستعجل وده اتفاق ماينفعش نرجع فيه
ابتسام /_يعني تيجي على نفسك وصحتك علشان خاطر هو مستعجل
عم حسن /_سبيها لله يابنتى
دنيا /&بقولك ايه يابا أنا عندى حل كويس
عم حسن /_قولى يادنيا
دنيا /&انت عارف ان حموده هيموت وياخد الحته بتاعنا علشان يضمها لبيته ايه رايك نبيعها له وتيجوا تقعدوا معايا اونجيب شقه على الاد والقرش الباقي نسدد بيه الاقساط
عم حسن /_بس يابنتى
سمر /_والله يابا دنيا بتفكر صح
عم حسن /_يابنتى هو انتم فاكرين ان حموده هياخدها بما يرضى الله حموده هيموت فيها علشان عارف انه هو الوحيد اللي هياخدها
سمر /_هنجرب مش هنخسر حاجه ونشوف الدنيا هتمشى ازاي
عم حسن /_نقول يارب أنا داخل ارتاح شويه
عم حسن دخل يرتاح وفعلا ارتاح من كل حاجه ارتاح من الدنيا واللى فيها ارتاح بعد تعب وشقى سنين وسنين الله يرحمه
ابتسام حست انها السبب فى موت ابوها بسبب التفكير وفضلت فتره كبيره مش مصدقه انها خلاص مابقيتش هتشوفه كانت اكتر واحده قريبه منه
بس بنفقد ناس غاليين علينا وبيفارقونا والحياه عمرها ماوقفت
ابتسام كان لازم تكمل وتتحمل وتقاوم
ابتسام ودنيا فكروا فى بيع البيت وعرضوا على حموده انه يشتريه بس حموده كان لعبى شويه
ماكانش عايز البيت بس كان عايز معاه دنيا كمان
ابتسام /_احنا هنشوف مشترى تانى
حموده /_مافيش حد هيشتريها غيرى
دنيا /_يبقى تشتريها بما يرضي الله
حموده /_هدفع حق اخواتك فى البيت وحقك انتى هيفضل زي ماهو واكتبلك باقى البيت ونتجوز
دنيا /&نتجوز ازاي
حموده /_مش عارفه الجواز ازاي
دنيا /_لا عارفه بس مراتك هتروح فين ؟
حموده /_ده مش شغلك
دنيا /_مش شغلى ازاي انت عارف يعنى ايه جارتى واتجوز جوزها
حموده /_ده شرطى علشان اشترى البيت
ابتسام /_قوم ياستاذ حموده امشى
حموده /_مافيش حد هيشترى البيت غيري علشان نكون على نور واللى هيدخل هجيب رقبته على بابه فهمتوا ياولاد حسن الزبال
دنيا كلام حموده استفزها وقررت انها توريه العين الحمراء
دنيا وابتسام مسكوا فى خناق حموده والدنيا كبرت ووصل الموضوع لقسم الشرطه
وحموده عمل محضر وهما عمل محضر والدنيا مبقاش حد عارف يلمها والجيران كل يوم والتانى يتخانقوا مع بعض
جمال لما عرف
زعق لابتسام
جمال /_عملين بلطجيه يابتسام
ابتسام /_يعنى يغلط فى ابويا ونسكت يتهجم علينا ونحط جزمه فى بوقنا
جمال /_ليه ماعرفتنيش
ابتسام /_اعرفك هو انت لما عرفت جيت وقفت جمبنا انت جاي تتهمنا بالبلطجه
جمال /_ماقصدش
ابتسام /&ولاتقصد
جمال خلاص بقى حقك عليا
دنيا وابتسام مرات حموده كان معاها قرشين من ورث ابوها اشترت البيت من دنيا وابتسام وخلت حموده يتنازل عن المحضر اللى عمله
وابتسام جهزت نفسها وسدوا الاقساط اللى عليهم
وجه ميعاد الفرح
ولماراح العزال اهل جمال فضلوا يتكلموا وماعجبهمش الحال
اهل جمال علشان ابتسام كانت جايبه جهاز على اد الحال فضلوا يتكلموا ومش عاجبهم الجهاز اللى هي جايباه
وابتسام اتجوزت جمال
ودخلت شقتها بس بعد شهر العسل بدات اخت جمال تعمل مشاكل مع ابتسام بس جمال ماكانش بيحل ولابيربط
ولمابتسام كانت بتتكلم كان اهل جمال ييجوا عليها
ابتسام تعبت وزهقت من كل حاجه
دنيا كانت يوم جايلها زياره
دنيا /_ازيك عامله ايه ياحبيبتي؟
ابتسام /_هعمل ايه يعني أنا حياتى متلخبطه وجوزى لابيحل ولابيربط
دنيا /_حاولى تتكلمي مره ثانيه وتالته ولو ماجابش حقك عرفينى
ابتسام /&لو لقيت نفسي هتعب فى حياتى هطلب الطلاق
نورا اخت جمال داخله سمعتها
نورا /_طلاق ايه اللي انتى بتتكلمي فيه
دنيا /_طلاقها من اخوكى يانورا
نورا /_وماله اخويا ياست الكل ده راجل وسيد الرجاله هي كانت تطول انها تتجوز واحد زيه
دنيا /_اهى طالت واتجوزت اخوك ياحبيبتي
ابتسام /_كفايه يادنيا كفايه يانورا
نورا /_اما يبجى اللى انيكى في بيته اختك جايه تسلطك انك تطلقى منه ليه يابنت الزبال هو احنا واكلين اكلك ولابنخليكى تخدمى حد فينا
ابتسام /_كفايه علشان خاطري أنا تعبت
نورا /_تعبتى ليه ياختى دانتى متهنيه ومستته
دنيا /_لمى نفسك يانورا واسكتى احسن لك
نورا /& انتى بتهددينى طيب انا هعرفك
ومسكت نورا فى خناق دنيا وابتسام حاولت تحوش
نورا ضربتها فى بطنها
ابتسام نزفت
الجزء السابع
ومازلنا نبحث عن الحياه
نورا ودنيا مسكوا فى خناق بعض ابتسام حاولت تحوش نورا ضربتها فى بطنها
ابتسام نزفت
ابتسام الحقيني يادنيا الحقينى
دنيا اخدت اختها وجري على المستشفى بس على مابتسام راحت
كان اللى فى بطنها بيسقط
دنيا اتصلت بجمال
دنيا /_وحياة رحمة ابويا ياجمال لواختى جرى لها حاجه مهايكفينى انت ولاعيلتك كلها
جمال /اعلى مافى خيلك اركبيه
دنيا /_ماشى ياجمال مانت لو راجل كنت عرفت تحمى مراتك انما انت مر ه
قفلت دنيا السكه في وشه
ابتسام دخلت تعمل عملية تنضيف
سمر جات جري لما عرفت اللى حصل علشان تقف جنب اختها
جمال وامه جايين يشوفوا ابتسام
الام بتزعق لدنيا سمر اتهورت عليها وزعقت معاها
جمال بيتكلم دنيا مسكت فى خناقه وصفت له عينه امن المستشفى جه عمل محضر والشرطه جات اخدت دنيا وسمر وام جمال والدنيا اتقلبت
وابتسام اترمت فى المستشفى مبقاش فيه حد جنبها غير ربنا
ابتسام بعد مافاقت اتصلت بصاحبتها نوال علشان تجيلها نوال لما عرفت جات جري
دنيا وسمر وام جمال اتعرضوا على النيابه
وبالكشف المبدئى على جمال عينه اليمين اتصفت
وكانت الاصابه خطيره و اتوجه لدنيا تهمة احداث عاهه مستديمه واتحبست اربع ايام على زمة التحقيق
سمر بقت محتاره تعمل ايه تروح تقعد جنب ابتسام فى المستشفى ولاتجرى وراء دنيا من القسم للنيابه
ابتسام ربنا كرمها وخرجت من المستشفى
وجمال بعد ماتم علاجه خرج هو كمان
ابتسام راحت بيت اهلها وجمال راح بيت اهله واتفرقوا عن بعض
دنيا بعد الإجراءات القانونيه اتحالت القضيه للمحكمه
وجه يوم الجلسه واتحكم على دنيا ب٣ سنين
ابتسام بعدها طلبت الطلاق من جمال
جمال /اتنازلى عن كل حاجه
ابتسام /_هتنازل ياجمال عن كل حاجه لانى مش عايزه
منك حاجه
واتنازلت عن كل حاجه وخسرت كل حاجه واتطلقت
وبقى ابتسام على دماغها حمل كبير
مطلوب منها ترعى وسام ابن اختها وتشتغل وتصرف على اختها سمر اللي خلاص قربت تخلص تعليم مطلوب منها زيارات لاختها دنيا فى السجن
ورغم إن كل ده على دماغها بس كانت صابره وراضيه
ابتسام عملت محل صغير ووقفت تبيع فيه وكان وسام يروح مدرسته وييجى عليها
ابتسام كان فيه كوم زباله قريب منها ماكانتش تنكسف انها تلم البلاستيك والكارتين اللي بتترمى عليه
وتحطهم جنب الكشك الصغير وتبيعهم
واستمر الحال على كده حاولى سنه وشهور
وفى يوم وسام ابن اختها تعب شويه
اخدته وراحت على الدكتور
الدكتور كتب له علاج وفضل وسام ماشى على العلاج فتره بس مافيش تحسن ووسام كل يوم حاله بيسوء اكتر من اليوم اللي قبله
وكشفت له عند دكتور تانى ووسام عمال كل يوم يعانى
ابتسام رفعت ايديها للسماء وقالت يارب الراحه من عندك وكائن باب السماء كان مفتوح ساعتها وبعد يومين مات وسام
ابتسام مابقيتش مصدقه ودنيا لما عرفت إن ابنها مات وهي فى السجن انهارت وتعبت قوى
ابتسام مابقيتش عارفه تلاقيها منين ولامنين وكائن الدنيا معاندها والحظ معاكسها فى كل حاجه
سمر كانت بتيجي من دراستها وتقف فى الكشك مكان اختها ابتسام
وابتسام جابت عربيه كارو صغيره على قدها تاخدها تطلع عليها وتنقى رزقها واللى ربنا يسهلها بيه كانت بتبيعه وتصرف على اخواتها ونفسها
دنيا بعد ماخرجت من السجن كانت من ناحية ابتسام متغيره وتقولها لوكنت بره السجن ماكانش جرى لابنى اللى جرى وابتسام تحاول تفهمها انها ماكانتش مقصره بس دنيا كانت من الصدمه مش مصدقه
دنيا اختارت حياتها لنفسها وبعدت عن اختها واتقدم لها واحد واتجوزته وعاشت حياتها
وسمر اتقدم ليها عريس
وابتسام كانت بتجهزها وكانت اللى سمر تطلبه مجاب لافارق معاها ابتسام تجيب منين ولافارق معاها اي حاجه
وابتسام كل ماسمر تطلب منها حاجه
ابتسام /_براحه عليه شويه وهجيبلك كل اللى انتى عايزاه
سمر /_هتجيبى امته بعد مادخل بيتى جوزى
ابتسام /_عيشى عيشة اهلك ياسمر
سمر /_انهى عيشه اللى انتى عايزانى اعيشها دى
ابتسام /_عيشتنا اللى اتربينا عليها
سمر /_وهي دى عيشه روحي شوفى الناس عايشه ازاي وابقى اتكلمى على العيشه والزفت
ابتسام /_اوعى تفتكرى الناس اللى عايشه فوق دول مرتاحين مافيش حد مرتاح فى الدنيا كلها وربنا مابيديش للانسان كل حاجه
سمر /_بس بياكلوا وبيشربوا وبيلبسوا احلى لبس
ابتسام /_ايوه بياكلوا وبيشربوا وبيلبسوا بس الهدوم بتدارى بلاوى والجدران بتدارى وجع ومافيش حد يعرف ظروف حد
سمر /_سيبك من الكلام ده سيبك من الشعارات الكدابه اللى احنا بنضحك بيها على نفسنا دى شوفى نفسك عامله ازاي ومتبهدله لوكان ابوكي وامك دول كانوا مبسوطين فى حياتهم تفتكرى ده كان هيبقى حالك ولاده كان هيبقى حالى
ابتسام /_ربنا بيختار للانسان الحياه اللى تناسبه
سمر /_يعنى انتى يناسبك انك تلمى وتاكلى من الزباله والقرف
ابتسام /_الاكل من الزباله افضل ماكون مش لاقيه وامد ايدى للكل
سمر /_اعملى حسابك انى مش هدخل وأنا ناقصنى حاجه فهمتى
ابتسام /_حاضر
وراحت ابتسام اشترت ليها كل اللى ناقصها
واتجوزت سمر وراحت بيت جوزها
وابتسام بقت لوحدها مافيش حد يسال عنها
فى يوم تعبت اتصلت بدنيا اختها
ابتسام /_أنا تعبانه يادنيا
دنيا اخدت بعضها وراحت لها كشفت لاختها وطلعت ابتسام عندها
الجزء الثامن
ومازلنا نبحث عن الحياه
ابتسام لما تعبت مالقيتش حد تستنجد بيه غير اختها دنيا اتصلت ب دنيا
ابتسام /_الحقينى يادنيا انا تعبانه قوى
دنيا جريت وراحت لاختها اخدتها تكشّف لها
كشفت لها ورجعت
دنيا /_لازم ترتاحى يابتسام
ابتسام /&ومن امته اللى زي حالتنا مكتوب عليه الراحه يادنيا؟
دنيا /_انتى يابتسام اللى بتقولى كده دانتى طول عمرك قويه وبتستحملى
ابتسام /_فعلا كنت قويه بيكم وبابويا الله يرحمه
دنيا /_ماحنا كلنا جنبك
ابتسام /_فعلا جنبي اختك من يوم ماتجوزت مسالتش عليه الا اذا لوانا سالت عليها وانتى يادنيا اكتر انسانه فى الدنيا كلها بحبها ومع ذالك ظلمتينى وقاطعتينى
دنيا /_الضنا غالى يابتسام وأنا غصب عنى
ابتسام /_وأنا عمرى ماقصرت فى اي حاجه
دنيا /_عارفه ياحبيبتي خلاص بقى بلاش نقلب فى اللى فات
ابتسام /&لوماقلبناش فى اللى فات وصفينا لبعض عمرنا مهانصفى وهنفضل شايلين جوانا
دنيا /&خلاص ياحبيبتي بقى علشان خاطري
ابتسام /_سامحينى يادنيا لو زعلتك فى يوم من الأيام اولو جيت عليكى
دنيا /_انتى اللى المفروض تسامحينا لاننا جينا عليكى زياده عن اللزوم
ابتسام /_انتم مهما تعملوا احنا اخوات وأنا عمرى مازعلت من واحده فيكم
دنيا /_قومى بقى خدى دش وتعالى على ماجهزلك الاكل
ابتسام /_محتاجه دش يشيل معاه الوجع والالم كله
دنيا /_ايه رأيك بقى فيه عريس لقطه
ابتسام /_لا عريس ولاتنين أنا راضيه باللى ربنا قاسمه ليه وبحمد ربنا على كده واعيش اللى باقى من حياتى ليكم ولنفسى وبس
دنيا /_وهتدفنى شبابك كده
ابتسام /_ياما التراب بيدارى شباب كتير وكفايه انى عايشه على وش الدنيا
دنيا /_يعنى ماحنتيش للجواز
ابتسام /_تفتكرى واحده زيي عليها اقساط وبقية جهاز اختك هتفكر فى الجواز أنا بدعى ربنا يسد ماعليه قبل مايجرى لى حاجه
دنيا /_ربنا يسد ماعلينا كلنا
فضلوا ابتسام ودنيا الاتنين يتكلموا مع بعض واتعشوا سواء
ودنيا رجعت بيتها
وبعد كام يوم
سمر جات زعلانه
ابتسام /_ مالك فيكي ايه؟
سمر /_زهقت وقرفت من تحكماته وقرفه
ابتسام /_ليه ياسمر
سمر /_ماتلبسيش ده ماتعمليش ده ماتكلميش ده
ابتسام /_ودى حاجه تزهق ولاتقرف هو الراجل اللى بيخاف على عرضه يبقى مقرف
سمر /_والنبي يابتسام سبينى أنا عايزه اعيش حياتى براحتي وبمزاجى
ابتسام /_مزاجك ده كان فى بيت ابوكي وانتى وسط اهلك انما لماتروحى بيت جوزك كل حاجه هتتغير
سمر /_ياريتنى ماتزفت واتجوزت مانتى اهو عايشه حياتك ولافارق معاكى اي حاجه
ابتسام /_ايوه عايشه وحامده ربنا لان ربنا اختارلى العيشه دى ورضيت بيها ولو كل واحد رضى بعيشته هتبقى كل اموره خير
سمر /_وايه اللى يجبرنا على العيشه واحنا رافضينها
ابتسام /&مافيش حد بيجبر حد على حاجه بس ارضى بعيشتك وزي ماقلتلك بيت ابوكى غير بيت جوزك وطبع ابوكى غير طبع جوزك ابوكى لوغلطتى ممكن يعدى ويسامح علشان انتى بنته اما جوزك لوغلطتى هيزهق منك وهيحاول ينهى علاقته بيكى ويدور على سعادته مع غيرك
سمر /_نفسى اعيش مرتاحه
ابتسام /_مش هتلاقى الراحه غير فى الرضا
سمر /_الرضا مين اللى راضى بعيشته النهارده فى الزمن ده
ابتسام /_فيه ناس كتيرر راضيه وعايشه وفيه ناس مرغمه انها تعيش وبيدوروا على حياتهم وبيحاولوا يحسنوها للاحسن وفيه ناس ثابته مكانها ومش عايزه تتغير اوتغير لازم نغير من نفسنا علشان نعيش الحياه
سمر /_تفتكرى لواحنا اتغيرنا غيرنا هيتغير
ابتسام /_حتى لوهما ماتغيروش نبداء بنفسنا الاول
سمر /_انتى طيبه قوى واللى زيك فى الزمن ده بيقولوا عليها هبله
ابتسام /_كلام الناس مايفرقش ياحبيبتي يقولوا عنى اللى يقولوه لاننا مهما نعمل الناس هتتكلم سواء كنا وحشين اوحلوين
سمر /& رغم انك اختى بس اوقات كتيرر بستغربك انتى ليه كده
ابتسام /_أنا زي مانا ابويا الله يرحمه عودنى وفهمنى كده علمنى انى اتعامل الناس بطبيعتى وقبل ماكون بتعامل مع الناس فيه رب مطلع على قلوبنا وعلى اللى جواها
وانتهى الكلام بين سمر وابتسام
وبرغم إن الدنيا دايما كانت بتيجي على ابتسام كانت صابره وراضيه وحامده ربنا على كل شيء
سمر رجعت لجوزها بعدها وبرضو كانت زيها زي كتير من الستات تعبت وزهقت من تحكمات جوزها وماقدرتش تتاقلم مع عيشتها اتطلقت وبقى عندها ابن اسمه ياسين
وفضلت ابتسام مصدر رزقها الوحيد من الزباله وماقصرتش مع اخواتها ومافكرتش فى يوم انها تتجوز
دى قصة ناس مهمشه من حياتنا
اتولدوا لقوا نفسهم كده مصدر رزقهم الوحيد هي الشغلانه دى لاهي عيب ولاحرام
بس للاسف فيه ناس كتير قوى بتعاملهم معامله مش كويسه ايه ذنبهم فى الدنيا انهم طلعوا لقوا نفسهم كده دول بشر زينا من دم ولحم
ناس راضيه وعايشه وبرغم إن عيشتهم مش عيشه زي باقى البشر بس راضيين بكل اللى ربنا كتبه ليهم
أنا عارف إن القصه فيها وجع والم بس فى حياتنا وواقعنا فيه الاغرب من كده ونحن جميعا نبحث عن الحياه وسنظل لنهاية العمر نبحث عنها
تخذلنا الحياة ويساندنا لطف الله
فلا تتركوا مكاناً لليأس في
قلوبكم
رزقكم الله طمأنينة القلب وسعادة الروح
تحياتى لكم جميعا
تعليقات
إرسال تعليق