رواية صرخه من القلب الفصل الاول والثاني والثالث والرابع والخامس والاخير بقلم سيد احمد الشاذلي
الجزء الاول
زينهم راجع من شغله اول مادخل
زينهم /_انتى ياست هانم
دينا /_عايز ايه بتزعق ليه كده
زينهم /_أنا ازعق براحتى انتى مش شايفه اللى ابنك موقعه ده ولاتعميتى
دينا /_اه وقع وخلاص هيتلم ياريت تاخد الامور ببساطه شويه
زينهم /_ايوه مانتى مش خاسس عليكى حاجه مانتى بتاكلى فى اته محلوله
دينا/_ باكل في ايه ليه مانا شايفه الويل والسواد معاك وصابره وراضيه
زينهم /_وايه اللى مصبرك كده ومخليكى مستحمله ولانتى داهيه مصدق اهلك خلصوا منك
دينا /_أنا داهيه يازينهم تصدق ان أنا غلطانه انى مستحمله واحد زيك
زينهم /_مستحمله ايه وزفت ايه دانا شايل بلوه ومافيش حد حاسس بيه
دينا /_احنا بلوى ملعون ابو دى عيشه عيشه تقصف العمر
زينهم /_اعملي حسابك أنا هتجوز عليكى
دينا /_وليه تنجوز عليه أنا سايب لك البيت وماشيه همشى علشان تعبت
زينهم /_الف سلامه بس اعملى حسابك انك لوخرجتى من هنا مش هترجعى تانى
دينا /_أنا مش راجعه خلاص يازينهم كفايه انى استحملتك كل الوقت ده استحملتك وشوفت المر وجيت على نفسى علشان خاطر عيالى اوعى تفتكر إن عينتك دى فيه واحده تعيش معاه وتستحمل
زينهم /_زي مانتى استحملتينى وعشت معايا ١٢ سنه فيه غيرك هيتمنى يعيش معايا
دينا /_تبقى اهبل وعبيط لولقيت واحده تستحملك وماتجوزتهاش روح هاتها وأنا هتنازلك عن كل حاجه ومش عايزه منك حاجه خالص اعمل حسابك اي ست فينا اللي كسرها عيالها مستحملين زل واهانه وقلة قيمه علشان عيالنا مش حبا فيكم ولا حاجه
بس بجد ملعون الجواز لابو اللى عايزينه
زينهم /_سيبى الاولاد
دينا /_لا يازينهم مش هسيبهم وهخدهم معايا
زينهم /_دول ولادى حته منى
دينا /_فعلاً ولادك بس عمرك ماكنت ليهم اب روح ربنا يسامحك ويسهلك
دينا اخدت بعضها وسابت الشقه لزينهم ومشيت واخدت عيالها معاها
ومارحتش بيت اهلها راحت عند واحده جارتها اسمها ام محسن وطلبت منها انها تشوف لها شقه ايجار
ام محسن /_اقعدي بس يابنتى واستهدى بالله
دينا /_ونعم بالله تعبت والله ومافيش حد حاسس بيه
ام محسن /_يابنتى الرجاله كلها كده قليل قوى لولقيتى واحد بيتقى ربنا فى نفسه وفى زوجته
دينا /_بس احنا تعبنا قوى نفسى اصرخ من قلبى واسال كل راجل فين المعروف اللى ربنا امركم انكم تعاملونا بيه
ام محسن /_يابنتى جوزك ممكن يكون مضغوط من الشغل والعيشه
دينا /_اللى مضغوط من الشغل والعيشه مش هيفكر يتجوز على مراته مش هيفكر يخونها مش هيفكر فى نفسه هو وبس داحنا بشر من دم ولحم برضوا
أم محسن /_وهو بيتعب علشان مين يابنتى ويجرى ويطلع عنيه علشان مين روقى كده؟
دينا /_بيتعب واحنا مانتعبش داحنا بنبقى بنموت وبنعمل وبنيجى على نفسنا
ام محسن /_بنعمل علشان لوماعملناش يابنتى هيتقال علينا قلالة الاصل ولومابنعملش علشان خاطر الرجاله بتاعتنا هنعمل علشان خاطر ولادنا
دينا /_واحنا فين من كل ده
أم محسن /_يابنتى احنا لينا ربنا
دينا /_ونعم بالله بس والله لو واحده تانيه مهاتستحمل العيشه اللى أنا فيها
أم محسن /_بصى يابنتى أنا مش خسرانه حاجه لو انتى اتطلقتى اوكملتى حياتك بس يابنتى أنا وجوزى كنا فى مشاكل على طول بس ربنا كان بيكرمنا وكنا بنحلها مافيش واحده ست فى الدنيا مرتاحه فى حياتها ولافيه راجل مرتاح فى حياته
دينا /_طيب يعني أنا معذوره
ام محسن /_معذوره يابنتى بس الدنيا شويه شد وشويه جذب لاحياتنا هتبقى حلوه على طول ولاوحشه على طول
دينا /_عارفه بس كل شيء بيزيد عن حده بيتقلب ضده ومشاكلى أنا وجوزى مابتنتهيش
أم محسن /_يابنتى انتى لسه ياما هتشوفى مشاكل في حياتك بس الست الشاطره اللى تتعلم من الاخطاء اللى بتعملها المشاكل ومتكررهاش
دينا /&حاولت والله وحاولت اسكت بس لوسكت جوزى مابيسكتش ابدا
أم محسن /_بس الست الشاطره تسيب جوزها يطلع الغضب اللى جواه وبعد مايهدى تقرب منه وتحاول تراضيه
دينا /&يعني يبقى غلطان وانا اللى ابداء كمان اراضيه
ام محسن /_مش عيب ياهبله انك تراضيه رضى الست لجوزها مش ضعف ولاعيب يابت ياعبيطه الرجل زي العيل الصغير ممكن بكلمه ترضيه وساعة ماتخديه فى حضنك بيبقى فى اسعد لحظات حياته
دينا /_انتى ماتزعليش منى يمكن انتى ماتعرفيش جوزى فى طباعه ده بيوصل للضرب والشتيمه
ام محسن /_مش هقولك الكلام إن كل واحد بيضرب مراته والكلام ده بس الست العاقله المفروض ماتعصبش جوزها وتخليه يوصل لكده
دينا /_بيبقى غصب عنى
أم محسن /_مافيش حاجه اسمها غصب عنى فيها حاجه اسمها ست بتخاف ربنا فى نفسها وفى جوزها وفيه ست بتقف ادام جوزها زي الديك الشركسى وبتعامله الند بالند وكانها لوماخدتش طارها منه هتموت ناقصه عمر يابنتى
دينا /_بس انا مابعملش كده
ام محسن /_يابنتى انتى ست وانا ست وفاهمين طبع بعض هقولك حكايه حصلت لى مع جوزى من كام سنه قبل مايتوفى وربنا يفتكره
ايه الحكايه استنوا الجزء الثاني
نورهان محمد جويرية ياسمين للخياطة والطرز
صرخه من القلب
الجزء الثاني
أم محسن /_بصى يادينا هحكيلك حكايه حصلت لى مع ابومحسن الكلام ده كان من ١٧ سنه يابنتى كنت عامله زيك كده ومتعصبه قوى واتخانقنا سواء أنا وهو كانت مشكله تافهه بس بعنادنا يابنتى انا وهو قصاد بعض كبرت المشكله وطلبت منه الطلاق وصممت على كده
وساعتها الكل كان بيحايل فيه انى ارجع عن قرارى ده لان الموضوع مش مستاهل انه يوصلنا اننا نهد حياتنا ونشرد ولادنا كان عندى محسن وراويه بنتى وفعلا طلقنى
كنت فاكره انى كده ارتاحت يابنتى وبقيت اكابر واعاند وانتصرت على ابومحسن
بس بعد اسبوعين يابنتى بداءت احس بانى غلطانه وماكانش ينفع اعمل كده والموضوع كله ماكانش يستاهل طيب اعمل ايه بعد مابيتى اتخرب بسبب عنادى وكبرياءى طيب وعيالى هعمل فيهم هروح اشتغل واتمرمط ولاقف قصاد ابوعيالى فى المحاكم ونبهدل بعض بعد العشره اللى كانت بينا بقيت افكر فى اي طريقه ارجع بيها لجوزى بعد ماطلقنى
ومر شهرين عليه وانا لوحدي لقيت نفسي بكلمه وبتصل بيه
وطلبت منه انى اقابله وروحت فعلا قابلته وطلبت منه انه يرجعنى وكتبنا كتابنا من جديد الكل قال عليه مافى الخمر بس ساعتها يابنتى مابصيتش لحد ورجعت لجوزى رجعت مش علشان حاجه رجعت علشان كنت محتاجه عيالى يتربوا بينا اخواتى ساعتها لامونى وقاطعونى علشان عملت كده وساعتها قلت لهم دى حياتى وعشت معاه ومن يومها لما الاقيها زعلان اوغضبان كنت احاول امتص غضبه بأي طريقه عارفه فيه مثل بيقول اللى اتلسع من الشوربه ينفخ فى الزبادى كنت بعمل كده
دينا /'وقبلتى على نفسك ترجعى ليه وتطبطبى وتدادى
ام محسن /_قبلت اطبطب وادادى وادلع كمان
دينا /_بس رجالة النهارده مش عايزين كده عايزين الست تكون اسد ادامهم
ام محسن /_وايه هيفيد وقوف الاسد قصاد الاسد هينتهى بان الاتنين يطلعوا من المعركه خسرانين ده مجروح وجرحه بينزف والثاني ياميت يامش قادر يكمل
دينا /_بس ناس زمان غير ناس دلوقتي
ام محسن /_الناس هي الناس بابنتى بس الدنيا اللي كل حاجه فيها اتغيرت
دينا /_الدنيا ماتغيرتش احنا اللى اتغيرنا
ام محسن /_اتغيرنا عمر الناس مهاتتغير عايزه اسالك سؤال واحد وتجاوبينى عليه بصراحه
دينا /_اسالى
ام محسن /_بتحبى جوزك ولا لا
دينا /_بصراحه مش عارفه اذا كنت بحبه ولا لا
ام محسن /_انتى بتحبى جوزك قوى قوى كمان
دينا /_ايه خلاكى متاكده كده ؟
أم محسن /_الست يابنتى لما بتكون زعلانه بتخرج كل حاجه جواها والحقيقه بتتقال من غير ماتدرى ولاتحس بيها لوكنتى قلتى بكرهه كنت صدقتك لانك قولتى الحقيقه اللى جواكى انما مشاعرك المتلخبطه دى هي بسبب المشاكل اللي بينكم مش اكتر
دينا /_انتى ايه بالظبط عايزه اعرف انتى ست زينا كنتي عايشه ومتجوزه راجل زي ماحنا متجوزين دلوقتي ولاكنتى متجوزه ملاك هو اللى خلاكى كده
ام محسن /_ أنا كنت متجوزه راجل زيه زي جوزك راجل بيتعصب وبيشخط وممكن يوصل لقلة الادب كمان
دينا /يعني راجل ماينبكيش عليه
ام محسن /_لا ينبكى عليه وينبكى عليه بدل الدموع دم كمان
دينا /_أنا مستغربه منين كان عصبى ومنين كان بيشخط وبيقل ادبه ومنين ينبكى عليه بدل الدموع دم
أم محسن /_هقولك
الراجل الصح اللى ينبكى عليه اللى بيحاول يبص لعيشته اللى بيشتغل وبيصرف على بيته واللى بيحاول يوفر لقمه حلال لعياله الراجل الجدع اللى مايحوجش اهل بيته لحد ده ينبكى عليه
دينا /_حتى لومش اسلوبه كويس
ام محسن /_قلنا الاسلوب يرجع للست بقى فى التعامل
دينا /_ومين ماينبكيش عليه
ام محسن /_الراجل اللي ماينبكيش عليه يابنتى اللى بيشرب والعواطلى وبتاع النسوان اللى مهما لف الدنيا كلها عمره مها يرضى بمراته ابدا
دينا /_عارفه بجد كلامك غريب مريح جدا
وكانك مش عايشه معانا فى الدنيا اللى احنا عايشينها
ام محسن /_يعني انا جايه من كوكب اخر
دينا /_بس انتى شايفه الدنيا حواليكى
ام محسن /_شايفه الدنيا بس بنظره تانيه غير اللي انتى شايفاها
دينا /_شيفاها ازاي
ام محسن /_عايزه تشوفى الدنيا صح ماتبصيش لجيرانك روحي المحاكم وشوفى محاكم الاسره وانتي تشوفى دنيا تانيه خالص عالم كله بيقطع فى بعضه يابنتى اللى ضارب مراته وعامل ليها عاهه واللى بيمسك لمراته سكينه واللى بيهدد اهل مراته واللى واللى بلاوى كتير
نفسى بقى تقوليلى انتى مشكلتك تيجي ايه جنب دول
علشان تعرفوا مشكلة دينا
استنوا الجزء الثالث
نورهان محمد ياسمين للخياطة والطرز
صرخه من القلب
الجزء الثالث
ام محسن /_قوليلى بقى يادينا ايه مشكلتك جنب الناس دى كلها
دينا /_مشكلتى يمكن مايحسش بيها راجل زي جوزى مشكلتى انى ام واب لولادى ولادى اللى مايعرفونيش غير وقت جوعهم ومرضهم وبس
مشكلتى مع جوزى اللى عمره ماشافنى ست زي بقية الستات وكانه فاكر انى شيطان والستات اللى بره ملايكه
مشكلتى انى لما بشتكى من ابنى ولابنتى وهو موجود مابيبقاش عايز ينطق وبيطلع الكلمه بالعافيه ولايقول لده عيب اوكده غلط
مشكلتى لو فى نفسى فى حاجه مابقدرش اجيبها
ببقى نفسى اعيش زي الناس والبس واخرج مع جوزى ويهتم بيه زي مانا مهتمه بيه
نفسى يعتبرنى زي بنته ويخاف عليه زي مابيخاف عليها ياخد ويدى معايا فى الكلام
ام محسن /_بس دى مش مشكلتك لوحدك يابنتى دى مشكلة ناس كتيره قوى
دينا /_طيب ليه كده؟
ليه مشاكلنا عماله تكتر وتكبر وفى ايدينا نصلح من نفسنا وحياتنا بحاجات بسيطه
ام محسن /_علشان مافيش حد بيتعلم من اخطاءه يابنتى
عارفه لو الانسان بيتعلم من اخطاءه يابنتى كان انصلح حالنا
دينا /&اقولك حاجه جوزى مجاش فى عيد وراح حابلى عبايه اعيد فيها وبرغم انه كل عيد بيروح يجيب لعياله وباجى على نفسى وبسكت وبقول معذور يمكن مامعهوش فلوس وعايز يستر عياله ويفرحهم
ام محسن /_فكرتينى عارفه كنت أنا وابومحسن رايحين نجيب هدوم للاولاد وروحنا اختارنا الهدوم وبعد ماخلصنا بيبص فى جيبه لقى حوالى ١٢٠ جنيه
كان ساعتها اشيك عبايه ٨٠ جنيه قالى اختارى ليكى عبايه قلت له فيه واحده جارتنا هتبيع لى عبايه وعجبانى قوى هروح اجيبها منها
ورجعنا البيت ادانى الفلوس عشان اجيب العبايه من جارتنا وتانى يوم اخدت بعضى وروحت جبت له بيهم اطقم داخليه لانه ماكانش عنده غير طاقمين بس بيغير فيهم عارفه بقولك الكلام ده ليه
الراجل يابنتى لومعاه فلوس هيجيب لمراته وممكن ينسى نفسه بس الدنيا يابنتى هي اللى بقت غاليه ومقرفه
دينا /_يعني غاليه عليا أنا لوحدي وبس مالناس كلها بتلبس وعايشه اشمعنا أنا
ام محسن /_ماتبصيش يابنتى للمظهر الخارجى بس ياما ناس كتير لابسه نضيف من بره وهدومها من جوه متقطعه
دينا /_بس لابسين ومتهنيين وعايشين
ام محسن /_مين قالك الكلام ده يابنتى النااس جواها وجع كبير وماحدش حاسس بيه غير ربنا انزلى اسالى اي ست ماشيه فى الشارع وقوليلها انتى سعيده فى حياتك
دينا /&بس بنشوف على وشوشهم الابتسامه
ام محسن /_يامه الابتسامه على الوش بتدارى وراءها بلاوى يابنتى مش كل اللى بيضحك سعيد ومبسوط ياما ناس بتضحك وجواها هموم فى القلب
دينا /_نفسي اضحك زي الناس واعيش زيهم
ام محسن /_تعالى يادينا هاتى عيالك وتعالى نقعد جوه الاوضه
ودخلت دينا وام محسن قعدوا فى الاوضه
ام محسن /_بصى يابنتى أنا مش هغرم حاجه لو قلتلك روحى اطلقى بس انا مجربه قبل منك وعلشان كده بنصحك لله مش طالبه منك حاجه ولاهشيل حزنك مكانك زي مافيش حد النهارده بيشيل حد الكل بقى حمله تقيل قوى يابنتى
دينا /_فعلاً الكل حمله تقيل وربنا يعين كل واحد على حاله
ام محسن /_هقولك حاجه اخيره وبعدين ليكى القرار والصبح ردى عليه
دينا /_حاجة ايه ؟
ام محسن /_نار جوزك ولاجنة اهلك والمجتمع
دينا /_يعنى ايه مش فاهمه ؟
ام محسن /_جوزك ممكن يتعصب عليكى شويه وبعدين تتراضوا اما المجتمع يابنتى هيبقى الكل طمعان فيكى اما اهلك لو عيالك عاشوا معاكى هيستخسروا فيهم الحاجه لوهما محتاجينها لنفسهم ولو ولادك عاشوا مع ابوهم ممكن يجيب ليهم مرات اب ياعالم هتعمل فيهم ايه اوتعاملهم ازاي
وخلى بالك مشكلة الراجل يابنتى لما بيتجوز المره التانيه بعد طلاقه بيخاف يخسرها وبيبقى دلدول مراته وبييجى على عياله علشان خاطرها ويحاول يرضيها بكل الطرق واللى بيدفع التمن هما الولاد
نورهان محمد جويرية
ايه اللى حصل استنوا الجزء الرابع
صرخه من القلب
الجزء الرابع
فى اليوم التالي
ام محسن /_ايه يادينا يابنتى قولتى ايه هترجعى لجوزك ولا اكلم السمسار يشوفلك شقه ؟
دينا /_مش عارفه واالله محتاره وخايفه خايفه احرم عيالى من ابوهم لما اتطلق وخايفه ارجع لجوزى ومشاكلنا ماتنتهيش
ام محسن /_استعيذى بالله يابنتى وفكرى
دينا /_مش عارفه افكر
ام محسن /_طيب انتى زي بنتي ايه رايك ماتقرريش دلوقتي إلا لما اقعد مع زينهم واتكلم معاه
دينا /_تتكلمي مع زينهم
ام محسن /_ايوه يابنتى فيها ايه دى؟
دينا /_لا مافيهاش حاجه بس بلاش عشان خاطري لان زينهم اسلوبه ممكن يستفزك ويخليكي تتعصبى ده بيخلينى اشد فى شعرى من كلامه
ام محسن /_هههه لا ماتخافيش انا بقى مابشدش فى شعرى
دينا /_خلاص براحتك انتى حره
ام محسن /_روح ياناصر نادى لبابا
ناصر /&حاضر ياطنط
راح ناصر نادى على بابا زينهم وزينهم جه معاه
زينهم /_خير ياست الكل
ام محسن /_طيب قول سلام عليكم الاول
زينهم /_معلش يام محسن
ام محسن /_عادي يابنى ممكن تقعد ندردش شويه ؟
زينهم /_اتفضلى تحت امرك
ام محسن /_تسلم يابنى أنت زي محسن ابنى وكنت عايزه اتكلم معاك بخصوص مراتك دينا
زينهم /_مراتى دانا متجوز ولاكنى متجوز يام محسن
ام محسن /ليه يابنى بتقول كده
زينهم /_اقول ايه ولايه ياست الكل دانا جوايا كتير ومعبى بس هي مابتحسش بيه اهم حاجه عندها هات هات وعايزه وعايزه وبس مابترحمش
ام محسن /_وفيها ايه يابنى امال لوماكانتش تطلب منك هتطلب من مين
الست يابنى اللى ماتطلبش من جوزها وبيرجع يلاقى بيته كل حاجه فيه متوفره ياما بتاخد مساعده من حد ودى عيبه فى حقك انت ياما ست مشيها بطال وبرضوا عيبه فى حقك
زينهم /_يعني اسرق واجيب ليهم
ام محسن /_ماحدش طلب منك تسرق يابنى ولاحد بيحملك فوق حملك وطاقتك بس ربنا يابنى اللى بيرزق ويبعت الرزق مش احنا وجريك على عيالك وسعيك عليهم ده بتاخد عليه حسنات واجر من ربنا
زينهم /_اسلوبها مش كويس معايا وطريقتها مش كويسه مش نضيفه فى نفسها حقوقى مش باخدها
ام محسن /_هههه عارف نفس اسلوب جوزى الله يرحمه لما كان يقلب عليه برغم انه بيكون معايا قبلها بيوم اواتنين الله يرحمه
عارف يازينهم لوبصيت لحياتك كده عمرك مهاتعرف تعيش ولاهتتعامل يابنى مع اي ست حتى لو اتجوزت الاربعه اللى ربنا محللهم ليك
عارف ليه لان عمرك مافكرت تحل كل مشكله لوحدها وبتحاول ترمى اللوم على زوجتك
الزوج يابنى هو اللى بيجبر مراته على إن اسلوبها معاه يكون كده لان الرجل اللى مايحسش بمراته ميبقاش راجل
نضافتها فى نفسها يابنى دى عيب انك تتكلم فيها لان المفروض كرامة مراتك من كرامتها ونضافتك من نضافتها ولو هي مش نضيفه فى نغسها عمرك ماكنت هتلبس لبسك بالطريقه دى بس احيانا يابنى الست بتكون تعبانه مابتقدرش تغسل وتغير وتستنى جوزها قبل مايرجع من شغله
وبالنسبه لحقوقك الشرعيه أنا بقى عايزه اسالك سؤال وتجاوبنى عليه بس بمايرضى الله
لو مراتك محتاجه منك حقها الشرعى وطلبتها منك وانت تعبان هتستجيب ليها وتديها حقها ولاهتستنى انك لما تخف من وجعك وتعبك وينتهى عذرك ؟
زينهم /_اكيد هستنى طبعا
ام محسن /_ليه هتستنى ؟
زينهم /_اكيد علشان تعبان ومعايا عذرى
ام محسن /_وليه يابنى مابتعذرش مراتك لماتكون تعبانه يابنى الحاجه دى بتكون مشتركه مابينكم مش لشخص واحد بس من الزوجين الست يابنى عمرها مابترفض جوزها الا لسبب
مافيش ست بتتمنى انها تكون بعيده عن حضن جوزها والرجل الغشيم اللى يشتكى إن مابيخدش حقوقه الشرعيه من زوجته الست يابنى ممكن جوزها يهون عليها تعب اليوم بكلمه واحده
الست مهما كان كبرياءها بتضعف ادام الكلمه الحلوه من جوزها قلب الست عامل زي الغصن بيميل للكلمه الطيبه والبسمه الحلوه عمرك قلت لها كلمه حلوه غير وقت احتياجك ليها
علشان يابنى تعرف تكمل حياتك مع زوجتك لازم تسمع لها ك ام وتتكلم معاها ك اب وتعاملها ك اخت
وتعاشرها بالمعروف ك حبيبه
ماتزعلش يابنى من كلامى انتم زي ولادى وبنصحكم لله مش مستنيه منكم حاجه كل اللى بطلبه منكم تفكروا بعقلكم حتى لو مش علشان خاطركم عند بعض وعلشان خاطر العشره اللى بينكم يبقى علشان خاطر الطفلين دول
بس ايه كان قرار دينا وزينهم استنوا الجزء الخامس
نورهان محمد دعاء حبيب
الجزء الخامس
صرخه من القلب
ام محسن /_قولت ايه يازينهم يابنى
زينهم /_مش عارف اقول ايه يام محسن بس مافيش بعد كلامك انتى كلام يتقال وعلشان خاطرك خلاص
ام محسن /_لا يابنى مش علشان خاطري لوماكانش علشان خاطر مراتك وولادك تبقى مش عيشه خاطر مراتك الاهم يابنى
زينهم /_حاضر
ام محسن /_بتتادى على دينا
دينا /_ايوه يام محسن
أم محسن /_تعالى يابنتى جوزك خلاص مافيش جواه حاجه من ناحيتك ايه رايك ترجعى لبيتك وعيالك
دينا /_ونرجع تانى كل يومين فى مشاكل
زينهم /_هو مين بيجيب المشاكل ياست هانم
دينا /_أنا اللى بجيبها يازينهم لانى مضغوطه وانت مش حاسس بيا تعبانه من جوايا قوى وكانى فى نظرك مش بشر كانى اله بتشتغل ليل ونهار
زينهم /_وأنا مابقعدش مانا شغال وطالع عينى علشان خاطركم
دينا /_وأنا ماقولتش انك قاعد يازينهم أنا بقدر تعبك انت بقى مابتقدرش تعبى مابتشوفش أنا بعمل ايه علشان احاول اسعدك واعيش السعاده فى بيتى بس انا بشر من دم ولحم
زينهم /_خلاص حقك عليا
دينا /_خلاص مافيش حاجه جوايا
أم محسن /_الكلام ليكم بقى انتم الاتنين يمكن ربنا بعتنى ليكم المره دي علشان حياتكم تستمر مع بعض وترجعوا لبعض تانى بس صدقونى فيه مثل بيقول
مش كل مره تسلم الجره
بلاش عنادكم مع بعض ووقوفكم قصاد بعض لان وقوفكم مش هيحل مشكله زعقيكم مش هيغير حاجه بالعكس المشكله هتكبر وولادكم هيتعقدوا وهيدعوا عليكم لما يكبروا
التفاهم مابينكم ومابين بعض هو الحل اسمعوا بعض حسوا ببعض بلاش كبرياء لان مافيش كبرياء بين الراجل وزوجته لان الاتنين شخص واحد
عارفين فى يوم ابومحسن قالى أنا هروح اتجوز عليكى أنا قرفت منك ومن عيشتك عارفين كان ردى عليه ايه
وماله يابو محسن انا اتمنى اشوفك سعيد فى حياتك ولو سعادتك هتلاقيها لو اتجوزت واحده تانيه اتجوز وأنا اجى معاك اخطبهالك ساعتها رد عليه وقالى
طيب ليه مالقاش السعاده دى معاكى انتى واتكلمنا مع بعض والموضوع اتقلب ضحك وهزار وحاولت انى اسعده بكل الطرق بس مش الطرق اللى أنا شيفاها من وجهة نظرى أنا
لكن السعاده من نظره هو
لان كلنا مختلفين واحيانا عقولنا بتخونا فيه ست بتشوف أنها لما تعمل اكل حلو لجوزها بتبقي كده بتسعده وفيه ست تانيه شايفه انها لو لبست قميص نوم كل يوم كده بتسعده وفيه ست تانيه بتبقى شايفه السعاده انها ماتقولش لجوزها حاجه تنكد عليه
والراجل كمان ممكن عقله يخونه مفكر إن السعاده كلها مابتجيش غير مع زوجته وهو فى السرير وبس
والسعاده عمرها ماكانت بكده لان لو السعاده بالحاجه دى كان اللى متجوز اتنين وتلاته عاش سعيد فى حياته
بس ياترى فيه ست حاولت تشوف ايه اللى يسعد جوزها وعملته ؟
فيه راجل فى الدنيا حاول يشوف الست ايه اللى يسعدها ويعمله؟
علشان تعيشوا السعاده مع بعض لازم تعرفوا انتم محتاجين ايه علشان تعيشوا سعداء
السعاده فى حاجات بسيطه جدا بس احنا اللى مكبرينا دماغنا وراضيين بعيشتنا زي ماهي مابنحاولش نغير من نفسنا أبداً عاجبنا نفسنا زي ماحنا
اتغيروا وانتم مع بعض احسن مماتتمنوا انكم كنتم اتغيرتم وانتم سايبين بعض
قربوا من بعض لان وجع الفراق صعب قوى وماحدش بيحس بيه غير لما يجربوا
ام محسن عينيها دمعت ساعتها لانها افتكرت جوزها الله يرحمه
زينهم /_خلاص ياست الكل أنا والله هخد بكلامك ومش هزعلها تانى
دينا مسكت ايديها وباستها أنا عمري ماتمنيت حاجه فى الدنيا الا وربنا بعتهالى وانتى احسن ام فى الدنيا كلها ربنا عوضنى بيكى عن امى الله يرحمها
ام محسن /_وأنا طول مانا على وش الدنيا يابنتى انتم ولادى ولواحتجتم حاجه أنا موجوده
زينهم ودينا اخدوا بعضهم ورجعوا لحياتهم بس ياترى زينهم ودينا هيعملوا بكلام ام محسن
القصه انتهت
اخت محترمه وعزيزه عليه جدا من متابعين الصفحه
بتقول كل بيت بقى محتاج واحده زي ام محسن
فعلا احنا محتاجينها ومحتاجين نصيحتها لينا محتاجين نعمل بنصيحتها لعلى وعسى نجد السعاده التى نبحث عنها
تحياتى لكم جميعا
تعليقات
إرسال تعليق