رواية عيون البارت الاول
 |
عيون. P 1
فردوس _ حنين انتي يابت مسدوحه فين... يابت رد عليه صوتي اتنبح وانا بندهلك من الصبح.... سلام قول من رب رحيم، انت مين، اشتاتآ اشتوت.. وربنا ما تقربلي لاحرقك بذكر الله
حنين_ مالك
فردوس تداري وشها وترتجف _ لا تأذينا ولا نأذيك... قول اعوذ برب الناس ملك الناس
حنين تحضنها محاوله لأطمئنانها _ انا جنبك متخافيش
فردوس بصراخ _ لاااا الحقوووني، ياعبمنصف الحقننني
عبدالمنصف بيجي جري هو وعمار،_ اعوذ بالله، انت انس ولا جان
حنين تسيب فردوس وتقرب ل عبدالمنصف _ انتو مالكم النهارده، شايفين حآجه انا مش شيفاها؟
فردوس برجفه _ صوت حنين هو والله هو
عمار _ يخربيتك ايه اللي حصلك
حنين باستغراب_ في ايه مالكم
عمار _ غووري بصي للمرايا قطعتي خلفنا
حنين تروح للمرايا وتبص وتضحك ببلاهه _ دا ماسك الطمي عليه حلبه مطحونه وخميره، وزبادي وعصير لمون ايه المريب في.منظري عاوزة افهم
فرودس تقلع الشبشب وتحدفها بيه _ قطعتي خلفي يخربيتك
عمار_ خلف ايه يا ماما انتي عديتي الستين،المشكله في خلفي انا دلوقتي
فردوس بغيظ_ شوف ابنك اللي معرفتش تربيه، دا انا ابان أصغر منكم انتو كلكم
حنين _ ممكن تسيبكم من مشاكلكم الهايفه دي وتدوني فلوس اشتري مرايا بدال اللي بطلعني وحشه دي
عمار _ هاهاها هي اللي بطلعك وحشه بردو. يااااابت
حنين _ اختصرني يا عمار.. بابا هات 300 جنيه
عبدالمنصف _ نعم ياروح امك. مراية ايه اللي ب 300 دا انا اتجوزت امك بعشره جنيه
فردوس _ وهو ابوكي لو حيتله 300 كان قعد كده، دا كان اتجوز عليه من زمان
عبدالمنصف _ جرا ايه ياوليه ما انا بقبض المعاش وادهولك اول بأول انتي ليه ناكرة الجميل، وانا لو هتجوز هدهملك يعنى
فردوس بإبتسامة _ بجد ياعبمنصف
عبدالمنصف _ بجد ياروح عبمنصف
حنين _ انا بقول نسيبهم ياخدو راحتهم في اوضتي، جرا ايه ياحج. ما تحترمنا شويه، خاف على اخلاق ولادك لا تفسدوهم، يلا يا وليه شوفي الطبيخ
فردوس تقلع الفرده التانيه وتضربها بيها _ يا جزمه يا جزمه، بدل ما تقولي اطبخلك انا وتريحيني
حنين _طيب ايدك على 300 جنيه وانا هطبلخك اسبوع كامل
فردوس _ هما 70 جنيه محلتيش غيرهم، ويارب الاقيكي جايبه مرايه كبيره هكسرها علي دماغك
حنين _ يا ماما بكون عاوزة اظبط هدومي عليها الصغيرة دي يدوب بتبين وشي وبفضل الف حولين نفسي علشان اشوف المنحنيات والمرتفعات اللي عندي
عمار _ لعلمك انا سمعت ان كتر الفرجه علي نفسك في المرايا بتعمل جن عاشق واحنا مش ناقصينك
فردوس _ اهو يكون في حآجه بتعشقها بدال ماهي كملت العشرين ومحدش خبط بابها، يا بايره
حنين ببكاء _ وربنا لو عاوزة اتجوز لا اجبلكم العرسان طوبير بس انا عاوزة اخلص دراستي الاول، ياعيله محبطه... هاتي ال 70 خلينا اغور اجيب المرايا
تخرج حنين من منزلها قاصده بائع الموبليات
حنين _ لو سمحت اقل مراية تسريحه هنا تساوي كام
البائع _ 400 جنيه
حنين تبتلع لعابها _ خساااره مفيش تسريحه هنا ناديتني، انا مبشتريش غير الحاجات اللي تناديني......
صوت خفي _ حنييين
حنين تلتفت خلفها ولا تجد احد
البائع بضحك _ حضرتك مكسوفه تقولي مفلسه، لكن طلبك عندي
حنين باحراج _ ما شاءلله نبيه،
البائع _ وصلتنا النهارده تسريحه خاصه بالملك فاروق، مش بتاعته هو لكن بتاعت احدي افراد العائله الملكيّة ومش هتصدقي بكام
حنين بذهول_ 5000 مثلا
البائع _ تؤ تؤ 100 جنيه فقط لا غير
حنين _ تسريحة ملكيه تتباع بالسعر ده ليه
البائع _ احنا دلوقتي بنواكب العصر يافندم الناس بتدور علي الحاجات الجديده مفيش عريس هيشتري لعروسته تسريحه عمرها فوق ال 100 سنه ولا ايه
حنين _ صح سبب منطقي فعلاً بس انا بصراحه محلتيش غير سبعين جنيه كان نفسي ابص في نفس المرايا اللي بصت فيها الملكه نظلي الحقيقة، بس مفيش نصيب بقا
الصوت الخفي _ حنين
حنين تلتفت حولها مره اخرى
البائع _ في حآجه يافندم
حنين _ زي مايكون سمعت حد بيندهلي
البائع _ ولا يهم حضرتك، نرجع لموضوعنا هدهالك ب 70 جنيه ولا تزعلي
حنين بفرحه وذهول_ بتهزرررر
البائع _ احنا في خدمة حضرتك، انا بكسب زبون يافندم
حنين بفرحه _ متشكره جدااا جدااا والله انا حبيت حضرتك ، اتفضل ادي ال 70 جنيه فين المرايا بقا
البائع _ ورا حضرتك
حنين تستدير وتنظر للمرأة بانبهار، لفخامتها ونقوشها المطليه بلون الذهب وكبر حجمها، ثم تقترب منها وتنظر لنفسها لتجد انها تبدو اجمل بكثير في تلك المرأة عن مرأتها الصغيره الغبية
حنين باعجاب _ اتاريني قمر والبلاوي اللي كنت بشوفها مكنتش بثور وحبوب وهالات في خلقتي دي كانت في المرايا، اوووف اي الجسم ده موزه وحشتني ياغالي مكونتش اقدر اشوفك في الغبية اللي في البيت
البائع من الخلف _ من الواضح ان المرايا دي نادتك يافندم
حنين بإبتسامة _ دي نادتني وخدتني بالحضن كمان ونبي لا ابوسك، وتقترب منها وتقبلها ثم تشعر بنفس قريب منها
حنين تنظر للبائع بقرف _ مش تغسلو سنانكم..
في المنزل
عمار بذهول _ الحقي يا ماما بنتك جابت تسريحة شجرة الدر
حنين بفرحه _ اشتريتها وب 70 جنيه بس، ضحكت على الراجل والغبي بعهالي بسعر ده ههههه
فردوس بذهول _ يالهوي ياعبمنصف، فزمتك مش هتكون احلى في اوضتنا
عبدالمنصف _ تسريحة ملوكي تليق بملكة قلبي، خديها اوضتنا
حنين _ ايييه ايييه اللي هيقربلها هشيلو، ابقا جاملها بمجايبك محدش هياخد المرايا مني انتو فاهمين
فردوس _ ياخسارة تربيتي فيكى مكنش العشم تبخلي على امك بحتت مرايا مطلية بماء الدهب،
حنين بقرف_ ماااما انا عرفاكي، متحاوليش ياحبيبتي علشان مش هدهالك
عبدالمنصف _ خدي 140 وهاتيلنا اتنين كمان واحده لينا و واحده لاخوكي،
فرودس _ اديها 210 خليها تجبلنا تلاته عاوزة اجيب هديه ل صفاء اختي، دي هتفرح بيها اوي
حنين بقرف_ وانت يا عمار مش عاوز تهادي حد بمرايا زي دي... مااالكم هو انا هقدر الاقي زيها تاني عادي كده،، احمدو ربنا علي المرايات اللي عندكم غيركم مش ليقها، يلا يامرايتي ياحبيبتي علي اوضتنا
الصوت الخفي_ يلااا
حنين _ انا مبكلمش انت انا بكلم المرايا
عمار _ وانا نطقت
حنين بقرف_ اه نطقت، مشوفش وش حد فيكم بيبصلها غيري انتو فاهمين
عبدالمنصف _ انتي هتتلمي ولا اكسرها فوق دماغك... شيء خفي بيضربه علي قفاه
عبدالمنصف بغضب_ فرودس هطلقك لو كررتيها
فرودس _ يووه مالك ياراجل وانا كلمتك
عبدالمنصف _ ماشي مش هنتعاتب قدام العيال
حنين تدلف اللي غرفتها وتضع المرأة فوق التسريحة وتنظر لها بفرحه وتبداء التحدث معاها
حنين _ انتي عارفه ان عشقي المرايات وخصوصا الكبيرة منها، وانتي مش. كبيرة بس، دانتي كبيره ومدهبه وايامنا اللي جايه زي الفل،،... ونبي قمر ابت حنين وكبرتي، بقالي قد ايه مشوفتش العصعوصه من ورا، انا هجيب كل الفساتين اللي مخبياها واشوفهم عليييه
تحضر حقيبه كبيرة بداخلها بعض الفساتين ثم تمسك احدهم وترتديه وتركض نحو المرأة بفرحه
حنين بذهول _ اااه قمر يابنت فردوس، اه لو الزمن يسمح يا جميل كنت لبستكم في الشارع، بس لو الحرب تاخد بقيت الرجاله اللي في الشوارع او يجيلهم مكوك من الفضاء يفطسهم وانا البس الفساتين دي براحتي
كانت تنظر لنفسها باعجاب وتدور وتتفحص جسدها المنشوق الانثوي بفرحه، وهناك. من ينظر لها باعجاب ايضاً ويريد ان يقترب منها ولكنه يتمهل ويتابع بعيون تشع بالون الأحمر ولون بشره بلون الاخضر القاتم وقرون حمراء طويله وثياب ممزقه بلون الرمادي، وانياب كبيره، و وجه يشبه لشكل اليقطين كبير من الاعلي صغير من الاسفل منقسم بعض الشيء عند الذقن، واذن كبيره تشبه اذان الحمار ( دا شكل العفريت متخافوش يعني)
حنين تنتهي من ارتداء الفساتين ثم تذهب إلى المطبخ وتجد عمار يقف بجانب البوتوجاز ويعد شيء ما
حنين _ بتعمل ايه يا واد
عمار بدون الالتفات اليها _ بعمل اكل
حنين _ اكل ايه وانت بتعرف تشرب نفسك ميه لما هتعمل اكل، وسع كده ل تولع فينا
عمار _ تاكلي معايا
حنين _ نطفح بتطبخ ايه بس فهمني
عمار _ اكله هتحبيها اوي
حنين _ ربنا يستر
عمار يستدير وبيده ملعقه بها شيء مما يطبخ ويقدمه لها بإبتسامة _ اتفضلي
حنين بذهول _ مامااااا، الحقي عمار عيان، مالك ياحبيبي انت كويس اجبلك دكتور
عمار بإبتسامه غريبه _ اتفضلي
حنين باستغراب _ اتفضلي تاني استر ياللي بتستر وريني
تاخذ منه الملعقه وتتذوق الطعام
حنين بذهول _ عملتها ازاي دي ينيلك، دي تحففه، انطق قول مصاحب مين علمك تعمل الاكل ده،
عمار _ عجبك الاكل
حنين _ ده تحفه يا واد خربيتك، انت من النهارده هتطبخ احنا نركن علي جمب.. وسع خليني اغرف لماما شويه تشوف ابنها راجل بيت شاطر ازاي
عمار _ لأ متوديش لحد، دول ليه انا وداسم
حنين_ داسم مين يا أخرس انت
عمار _ داسم جارنا الجديد اللي فوق السطوح مشفتهوش
حنين_ لا امتي جه ده
عمار _ النهارده
حنين بهمس _ عنده كام سنه
عمار _ 29
حنين_ شكله حلو كده
عمار _ يمتلك.من الوسامه ما لا يمتلكه البرتو ديكابيو
حنين_ ههههههههههه وسعت منك دي
عمار _ تحبي تشوفيه
حنين _ قولي الاول، هو.متجوز
عمار _ اعذب
حنين _ بيفكر يتجوز.طيب
عمار _ بيدور علي عروسه حلوه ومطيعه
حنين تمثل البرائه _ وايه كمان
عمار _ معاه فلوس كتير
حنين _ والي معاه فلوس كتير هيسكن فوق السطوح ليه
عمار _ بيريح باله بعيد عن الزحمه وبعدين هيرجع لما يلاقي العروسه
حنين _ امال ياواد بيقولو عليك فاشل ومبتعرفش ناس عدله ليه،، انا هروح اتربصله من بعيد واشوف شكله عامل ازاي وانت راقبلي السكه
عمار بإبتسامه غريبه_ روحي
حنين باستغراب_ فين قرونك يا عمار
عمار بخيبه_ انتي شوفتيهم ازاي وانا مخفي
حنين_ يختفي اسمك.من الوجود، اختك بتقولك هتروح تتربص بواحد وانت موافق عادي كده
عمار _ اااه، وفيها ايه انا عاوز افرح بيكي، روحي يلا قبل ما يمشي
حنين بإبتسامه_ ونبي انت اخ جميل امال انا.مكنتش بطيقك ليه، يلا هروح وانت ظبطلي الدنيا
تخرج حنين من المنزل قاصده السطوح. وتقف هناك بعض الوقت في انتظار خروج داسم من الغرفه، وبعد ان فقدت الامل في خروجه قررت العوده ولكن استوقفها صوت فتح الباب ليخرج منه شاب وسيم، به كل المقاومات التي تصلح ان يصبح نجم سينمائي،
حنين بذهول _ خربوتك انت ايه
جاسم_ افندم
حنين _ انت ايه، الواد قالي اني هلاقي البرتو، طلعت احمد عز ما شاءلله
جاسم _ انتي مجنونه صح
حنين_ لا يا كحيل العين، مش معنا انك حلو وطويل وليك دقن خفيف من اللي انا بحبه وعيونك.. لون عيونك ايه صحيح وريني،... اه وعيونك خضره زيتوني،... تقل ادبك عليه
جاسم بقرف _ انتي بتعاكسي صح، انا سايب حياتي وجاي هنا عشان ابعد عن البنات اللي زيك اقوم الاقيكي هنا، امشي يابت
حنين بقرف_ همشي، يا داسم، في ناس عقلين اسمهم داسم بردو
جاسم _ ب الجيم مش بدال يا حيلتها، اسمي جاسم، داسم ده اسم جن اللي هيخبطك ان شاءلله
حنين بقرف_ والله صحيح الشكل مش كل حآجه طالما مفيش ادب ولا احترام
جاسم يضم قبضته ويتقدم نحوها بغضب، وهي تتراجع للخلف وتخبئ وجهها منه وهو يقف مكانه وكأن شئ حدث له
جاسم_ انتي خايفه ليه
حنين باستغراب_ يمكن عشان عاوز تضربني
جاسم بإبتسامة ساحره_ اضربك؟، مستحيل اضرب بنت في جمالك
حنين بذهول_ ده بينه مجنون.. ابعد ياعم
جاسم بإبتسامة _ تعالي نشرب شاي
حنين _ لااا ياحبيبي انت حلو وموز اه بس مش انا اللي تشرب شاي.. جك القرف صحيح الجمال مش كل حآجه
تذهب حنين وهو يقف مكانه وينظر حوله بحيرة
جاسم _ انا ايه جابني هنا،، و كان في بنت رغايه هنا اختفت فين فجاه
في المنزل
عمار _ كنتي بتتسحبي زي الحرامية ورايحه فين
حنين بهمس_ كنت فوق عند صاحبك
عمار بغضب_ صاحب مين ياروح امك روحتي تعملي ايه هناك
حنين بهمس_ روحت اوقعه مش قولتلك باماره لما قولتلي شبه البرتو، بس. مطلعش البرتو، طلعت احمد عز ايام سنه اولي نصب، موز ياض ولا عنيه يالهوي
عمار يمسكها من شعرها _ وحيات امك، ياعبمنصف الحق بنتك مصاحبة واحد
حنين بغيظ _ مش انت قولتلي يامعفن يابو قرون، وسع ياض لا اضربك،
عمار _ انا قولتلك يابت،
حنين _ اه قولتلي وابعد دلوقتى لا اقول لبابا
فرودس _ مالك باختك يا واد
عمار _ الهاااانم راحت فوق تقابل الساكن الجديد وقال ايه بتقول انا قولتلها
فرودس _ يخربيتك يا حنين، كده يابنت الجزمه يا واطيه تطلعي لوحدك كنتي قولتيلي كنت خليته يجي هنا باي حجه
عمار بغيظ _ ايه اللي بتقوليه دا يا مامااا، بوظتي اخلاق البنت بنصايحك الغريبة، ورغم كده والله ما حد هيبصلها غير لو كان معفن زيها
شيء خفي يضربه علي راسه ليفقد الوعي
حنين _ ماات.. يلا في داهيه
تعليقات
إرسال تعليق