رواية عيون البارت الثاني والثالث والرابع والخامس
 |
البارت الثاني
حنين تستيقظ في الصباح لترا جاسم يقف بجوارها وهو مبتسم
حنين بصدمه _ بحلم... انا بحلم
جاسم بإبتسامه _ Good morning
حنين بذهول _ دخلت هنا ازاي
جاسم _ من الشباك
حنين تنهض بسرعه وتقف علي سريرها _ يانهار الي خلفوك اغبر، مامااااا
جاسم يمد ايده بإبتسامة _ تعالى معايا
حنين ببكاء_ يا ماماااا يا ماماا
جاسم _ محدش موجود غيري
حنين تقفز من علي السرير وتمسك بحذائها وتنظر له مره أخرى ولا تجده
حنين _ يانهااار اسود يا نهار اسود اه يا صايع يابن الصيع، هروح اسيح دمك.
تخرج بالبجامه وبفردة حذاء واحدة وتذهب إليه وهى ممسكه بفردة الحذاء الاخرى وتقرع بابه بغضب
حنين _ اطلع يا صايع
جاسم يفتح وهو ناعس _ في ايه
حنين _ اي جابك اوضتي انطق
جاسم _ انا جيت اوضتك نتي
حنين _ ايوووه انطق قول اي دخلك عندي
جاسم _ طيب اجري اتغطي
حنين بغيظ_ هضربك يلاااا، انطق قول اية جابك عندى
جاسم ببرود _ انتي جايه ترمي بلاكي عليه يابت انتي
حنين _ وربنا لا انا فضحاك في العماره كلها واقول انك حرامي بتخطي علي البيوت
جاسم بإبتسامة _ مالك يا انسه حنين،
حنين بغيظ_ يابرودك
جاسم _ تعالي اشربي شاي
حنين بلخبطه _ انت بتتحول ليه، مش طافحه حآجه وقولي اي جابك عندي
جاسم بإبتسامة _ جيت اشوفك
حنين بلخبطه _ يخربيتك ابوك.. لو اتكررت تاني قسمآ عظمآ لا ارتكب فيك جريمة، غور
جاسم بإبتسامة _ تعالى اشربي شاي
حنين تمسك حجر صغير وتضربه في رأسه وتركض
جاسم يفيق و يضع يده علي رأسه ويراها تركض _ اااه ايه ده،، مالها دي بتجري ليه... باينها مجنونه طيب علي الله اشوفها تاني هنا هحبسها في الحمام، قال انا روحتلها اوضتها قال
حنين تدلف الي المنزل وهو تقرقض في اظافرها
عبدالمنصف_ مالك يابت
حنين بتوتر شديد _ مفيش
عبدالمنصف _ كنتى فين ع الصبح كده
حنين _ عيل قليل الادب رما الكوره و جت عندي وروحت رميتها في وشه
عبدالمنصف _ طيب وطالعه بالبيجامه ليه
حنين تنظر لملابسها وتشهق بصدمه _ انا طلعت كده لاااا برستجيييي
فردوس _ مالك بتجعري ليه
حنين بنرفزه _ عندنا طفح ايه نطفحه
فردوس _ ايدك تحل البركة روحي جهزي
حنين _ ايه العيله دي فين الاحتواء المفروض تروحي تجهزيلي وتراعي حالتي وانا بقرقض في ضوافري لكن اقول ايه الشكوه لغير الله مزله
عمار _ حنييين اعمليلي قهوه مظبوطه
حنين بغيظ_ ولاااا اخفا من وشي يلااا.... ايه ده عمااار انت فين
فردوس _ اعوذ بالله الواد راح فين
عبدالمنصف _ الواد كان لسه هنا راح فين
فرودس تركض للغرفه وتجده نائم علي السرير
فردوس _ واااد يا عمار يامصيبتي جيت هنا امتي يا ولاااا
عمار _ اقفلي وخليني انام
فردوس _ مش هتبطل حركاتك دي يابن الهبله
عمار _ اقفلي الباب يا هبله طيب
فردوس تمسك الحذاء وترميه عليه بغضب.._ هبله عشان خلفتك
حنين تدلف الي غرفتها وتقف امام مرأتها وهي تقرقض اظافرها بتوتر _ انسان مترباش شافني بشكل ده، لا وبيتحول مره ميطقنيش ومره يتسهوك، اتمنى يجي تانى بس وانا اعلقه في المروحة
جاسم من الخلف _ حنين
حنين تستدير بفزع_ اااه، انت ايه
جاسم بإبتسامة وهو يقترب منها _ تشربي شاي
حنين بارتجاف _ مش هطفح جاي تاني ليه
جاسم _ جاي اخدك معايا
حنين _ تاخدني فين
جاسم _ بيت العيله
حنين _ اهبب ايه في بيت العيلة،
جاسم _ عشان تكوني واحده مننا
حنين _ اعمل ايه بردو
جاسم _ نتجوز
حنين بذهول _ انت عاوز مني ايه ياعم انت، برا لا اصوت والم عليك الخلق
جاسم _ لو عاوزني امشي غمضي عينيكي واتمني اني امشي
حنين بغيظ _ مصباح علاء الدين حضرتك، ما تغور لا اشوقك
جاسم بنظره غريبه_ نفذي
حنين تغمض عينيها وتقرقض في اصابعها _ اتمنا انك تتزفت تمشي من هنا، ثم تفتح عينيها وتجده مازال موجود
حنين _ ياعم مغورتش ليه
جاسم _ قوليها وانتي هاديه
حنين بنفاذ صبر_ انت هتعملي فيها دكتور نفساني، هتغور ولا اصوت
جاسم يقترب منها اكثر وينظر له نظرات غريبه
حنين بخوف _ في ايه
جاسم _ اطلبي اللي عاوزاه انتي ومغمضه وهاديه
حنين تغمض عينيها وتاخذ نفس _ عاوزاك تغور من هنا، ثم تفتح عينيها ولا تجده
حنين بذهول _ نهاااار اسود وربنا ما بني ادم مامااااا
فردوس تفتح الباب _ مالك يابت
حنين بخوف _ عف عف عفريت
فردوس _ هو فين يابت
حنين _ فوق السطوح
فردوس _ العفاريت فوق السطوح وانتي شيفاه من هنا
حنين _ زي ما بقولك صدقيني والله كان هنا مرتين واختفا
فردوس بسخريه _ وياترا عفريت بقرون ولا من غير
حنين بتوتر_ شبه احمد عز وطويل ولابس قميص ابيض مفتوح عند الصدر وبدقن وعنيه زيتوني ودقنه خفيف وشعره بني ناعم
فردوس _ ههههههههههههههه ينيلك يابت هو في عفاريت حلوة كده، طبيعي العفريت بيكون شكله وحش ويقرف... شيء خفي يغلق لها فمها
حنين _ والله ما بكدب....
فردوس _ اممممم
حنين _ مالك يا ماما
فردوس تركض في الشقه _ اممممم
حنين _ يامصيبتي يامصيبتي، ماما مالك
عبدالمنصف _ مالك يا وليه
حنين _ مالها يا بابا
عبدالمنصف ينظر لها وهي تضم شفاها وتأن _ باين دعوتي استجابت ابت احنين، انا طول عمري بدعي انها تخرس
حنين _ مش دعوتك انت ده عفريت
عبدالمنصف _ طيب اسكوتي ودي يقدر عليها غير ربنا ، دا العفريت يخاف منها
حنين _ ماما في ايه يا مامااا
فرودس _ امممم
حنين تتذكر كلام جاسم وتغلق عينيها وتتمنا ان تتحدث فردوس..
فردوس تاخذ نفسها بصعوبه _ ااه كنت هموت ياعبمنصف
عبدالمنصف _ انتي رجعتي تتكلمي تاااني
فردوس بغيظ_ طلقني يا عبمنصف
حنين تخرج من المنزل قاصده السطوح، وتقف خلف درابزين السلم وتراقب جاسم وهو يلعب الرياضة
جاسم _ شوفتك
حنين بخوف _ انا مش هنا
جاسم _ تعالي عاوزك
حنين بخوف _ لسه عاوز تجوزني
جاسم بقرف_ اعمل اييه انااا اتجوزك انتي
حنين بخوف _ انت مين،.. طيب انت انسان زينا عادى كده
جاسم _ بت انتي عارف عينتك. كويس كل يوم اقابل واحده زيك، تترمي عليه علشان ابصلها بس ده بعينك
حنين بغيظ _ انا اللي بترما عليك ولا انت اللي بتدخل اوضتي وتختفي زي العفريت، وزي ليه ما انت اكيد عفريت
جاسم _ وحيات امك،.. انا شوفت زيك كتير بس اول مره اشوف طريقتك في التقرب ليه
حنين تغمض عينيها وتتمنا ان يتحول الا قرد ثم تفتح عينيها وتجده مثل ماهو_ متسخطتش قرد ليه
جاسم بسخريه _ كفايه قرد واحد، امشي يابت ومتجيش هنا تاني
حنين بغيظ _ وانت لو جيت عندي تاني هلم عليك الناس يا صايع
جاسم بإبتسامة _ حنين
حنين بلخبطه _ هو شِفت الواد المسهوك حضر
جاسم وهو يقترب منها _ تعالي معايا
حنين بخوف _ اجي معاك فين ياعم
جاسم بنظره مريبه_ عيلتي عاوزة تتعرف عليكي
حنين _ وانا مش عوزه اتعرف على حد
جاسم _ انا معجب بيكي وعاوزك
حنين بذهول _ يامصيبتي، أنت بتقول ايه يا جدع انت
جاسم ببطئ _ عاوزك ياحنين
حنين بخوف _ وربنا ما بني ادم
جاسم يفيق_ انتي لسه هنا يابت
حنين بفزع_ مشيت اهو مشيت يا منفصم الشخصيه يا مجنون
جاسم _ لو لمحتك هنا تاني هنفوخك
حنين بخوف _ مش هاجي وربنا ما جايه . ثم تتركه وتركض لمنزلها وتدلف الي غرفتها وتستلقي علي السرير وتسحب الغطاء عليها وهي ترتجف وبعد دقائق تزيل الغطاء عن وجهها بخوف لتجده امامها
جاسم_ تشربي شاي
فوق السطوح، جاسم يتحدث بالهاتف
جاسم _ يا جماعه انتو مالكم بيه انا مرتاح هنا
سعاد _ ياحبيبي انت سايب بيتك وشغلك وحياتك وبتلف في اماكن غريبه، مره تروح الصعيد ومره في منطقه عشوائية ومره في البدو ودلوقتي ساكن فوق سطوح، مستفاد ايه من ده كلو
جاسم بحيرة _ معرفش يا ماما، اهو انا بلاقي نفسي رايح الاماكن دي وخلاص
سعاد_ قولتلك تروح عند دكتور نفساني وتتعالج انت مبتسمعش
جاسم _ هو انا مجنون علشان اتعالج عند دكتور نفسانيّ
سعاد _ لا انت زين العاقلين بس مش ملاحظ انك كل ما تروح مكان توقع في مشكله وانت متعرفش سببها اصلا
جاسم يتذكر كلمة حنين ( منفصم الشخصية)
جاسم _ يا ماما انا مش مجنون والله، كل الحكاية اني بلاقي راحتي في الأماكن دي لكن انا عارف انا مين وعارف صحابي وشغلي واهلي، لو مجنون اكيد هنساهم
سعاد _ جرب بس مش هتخسر حآجه
جاسم _ حاضر يا ماما هحاول
سعاد _ هتيجي امتي طيب
جاسم _ مش دلوقتي
سعاد _ وراك ايه يعطلك تيجي تشوف امك
جاسم _ ولا حآجه بس مش هقدر اجي دلوقتي
سعاد _ اجيلك انا ابعت العنوان
جاسم _ حاضر
بعد ساعات
حنين تخرج من المنزل وتنزل علي السلم بسرعه وترتطم بسعاد
حنين _ اااسفه يا مدام،
سعاد _ فتحي يابنتي كنتي هتوقعيني
حنين _ اصلي مستعجله، حضرتك طالعه لمين
سعاد _ طالعه لابني فوق
حنين باستغراب _ فوق فين
سعاد _ فوق السطوح
حنين بخوف _ اعوذ بالله ابعدي يا وليه انا من الاول قولت الشعر الاحمر ده مش شعر بني ادمين وسعي وتتركها وهي تركض لاسفل
سعاد _ بنت قليلة الادب، وسوقيه.. شيء خفي يضربها علي فمها لتركض بسرعه البرق لاعلي وترتطم بجاسم
جاسم _ ماما بتجري ليه
سعاد برجفه_ ايه البيت ده يابني
جاسم _ مالو البيت مش زي بيتنا بس حلو
سعاد بخوف _ حاجه ضربتني علي بوقي. وكمان في بنت قليلة الادب غلطت فيه
جاسم_ بنننت غلطت فيكي ف ام جاسم علام.. هي فين وريهاني
سعاد _ طلعت تجري.. ثم تقترب من الزوايه وتراها تركض في الشارع
سعاد _ اهي هي دي يا جاسم
جاسم يراها ثم يضم قبضته _ هي البنت دي عاوزة مننا ايه طيب والله لا اربيها
عيون p3👻
ظلت تنظر للغرفه الصغيرة التي يسكن بها جاسم
سعاد_ انت عايش ازاي هنا يابني، دي اوضة يعيش فيها بني ادمين
جاسم _ انا مرتاح فيها
سعاد _ كل مكان كنت تروحه بتقولي مرتاح وبتحسسني انك عمرك ما هتسيبه
جاسم _ معرفش ايه السبب بس ده بيكون احساسي تجاه الاماكن اللي بروحلها
سعاد _ طيب ومترتحشي في بيتك ليه،.. هنا احسن ولا في الفيلا الكبيره واوضتك اللي تطلع تلاته من الاوضه دي
جاسم _ معرفش يا ماما انا مرتاح كده وخلاص... تشربي ايه
سعاد _ مش هشرب انا ماشيه احسن هتخنق في المكان ده لو قعدت اكتر منك كده
حنين تدلف لداخل المبني، ثم ترا سعاد وجاسم قادمون من الأعلي لتركض مسرعه وتختبئ اسفل الدرج وتغمض عينيها بخوف وتتنسط اصوات اقدامهم وحديثهم
سعاد _ فكر ياجاسم العماره دي متليقش بيك ولا بأسمك، دي كفاية سكانها وبذات البنت السوقيه اللي خبطتني
جاسم_ هجيبلك حقك منها، وهسخطهالك بس اشوفها
حنين تحدث نفسها بخوف _ يارب هيسخطني،، اعوذ بالله احمينا يارب.. ثم تفتح عينيها لتراه امامها وهو مبتسم
جاسم_ تشربي شاي
حنين تنظر له برعب وتجلس علي الارض وتخبئ راسها وترتجف
جاسم بغيظ_ انتى هنا
حنين بخوف_ الله يخليك ابعد عني، الله لا إله الا هو الحي القيوم
جاسم بانيهار_ اخرسي
حنين بخوف _ لا تأخذه سنة ولا نوم
جاسم برجفه_ بس لو سمحتي،، قومي مش هعملك حآجه
حنين تنظر له بخوف _ انت ايه طيب
جاسم _ انا جاسم، ممكن اعرف بتضايقني ليه كل شويه
حنين ببكاء _ انت عفريت
جاسم _ عفريت وهكلمك عادي كده
حنين ببكاء _ امال جيت اوضتي ازاي والشباك مقفول
جاسم بزهق _ انتي مصدقه نفسك اوي،،.. ماشي ياستي نجحتي في لفت انتباهي بس ممكن تبطلي بقا
حنين بغيظ _ انت هتجنني، بقولك دخلت اوضتي وبتظهر وتختفي، فجأه، انت عاوز مني ايه
جاسم بزهق _ يااااااربي، قولتلك نجحتي في لفت انتباهي، ممكن تبطلي حركاتك معايا علشان بدأت اتخنق
حنين _ اعوذ بالله من
جاسم بغضب _ اخررسي
حنين بخوف _ شوفت انت مش حامل تسمع القرآن اهو
جاسم _ مش حامل صوتك، صوتك وحش
حنين تمسك هاتفها وتفتح اذاعة القران ليمسك بالهاتف بغضب ويغلق الاذاعه
جاسم بغضب_ متضايقينيش انا انسان، هاتي ايدك
حنين بخوف_ لا
جاسم يمسك يدها رغمآ عنها _ اهو شوفتي انسان ازاي، مش هتقدري تلمسي العفريت في حياتك انتي
حنين تتحسس يده ثم تتركه _ طيب جيت اوضتي ازاي طالما مش عفريت
جاسم بزهق _ انتي تاااني ، انا هعمل ايه في اوضتك يعني
حنين _ كل شويه تيجي وتقولي تشربي شاي و تجوزيني
جاسم _ بعيد عن اني من صغري ماشربتش الشاي عشان اعزمك عليه بس اااانا اتجوزك انتي ... انتي يا صعلوقه يا بقايا الجوافه العفنه.. انا اتجوزك انتي
حنين بغيظ _ انا جوافه عفنه،، فوق ياحبيبي ليكون فاكر اني ابصلك، ولاااا انت نشاذ يلاا
جاسم بسخريه _ امال لما انا نشاذ بتتنططي حوليه وعاوزه تلفتي انتباهي ليه
حنين تضربه على قدمه بغضب_ بقولك بتيجي اوضتي يا متحرش يا صايع، ولااا اخفا من وشي
جاسم بألم _ انتي بنت مش متربيه، ولو انتي راجل زي زيك كنت عرفتك مقامك
حنين بغيظ _ وريني اللي عندك
جاسم بإبتسامة _ تجوزيني
حنين تحدث نفسها بذهول _ اعوذ بالله الواد ده باين عليه مجنون وعنده انفصام او ملبوس،
تنظر له وتفتح الاذاعه مره اخره، ثم تنظر حولها لتجد نفسها في مكان غريب ... عبارة عن ڤيلا فخمه وابوابها مدهبه وبها ثرايات( نجف) كبيره مرصعه بالماس بألوان واحجام مختلفه وقطع اساس ملكيه مدهبه وهناك رجل يظهر عليه الثراء، وبجواره رجل يلبس عمامه ومسبحه كبيره حول عنقه، وجلباب طويل ويملؤه الوسخ وكأنه دجال وبيده اناء خاص بالتبخير، ويلفه بيده وهي تشاهد وكأنها شيء خفي لم يروها الرجلين الموجودين
الرجل _ هتعرف تعالجها يا شيخ ولا اسفرها بره احسن
الدجال_ مراتك مش مريضه، مراتك مُتملكه،، حد منهم متملكها مفيش دكتور هيقدر يعالجها منه
الراجل _ طيب اتصرف مراتي لازم تخف من اللي هي فيه، مهما كان التمن
الدجال _ التمن ، هو اللي هيحدده
الراجل _ ممكن يكون كام يعني
الدجال _ الشياطين هتعمل ايه بالفلوس، هما عاوزين يتملوك الارض لان هما شايفين انها بتاعتهم وهما اولا بيها مننا، ف التمن هيكون حآجه تانيه غير الفلوس
الراجل _ اي حآجه عاوزها ياخدها بس يحل عنها
الدجال بنظرة خبث _ زي ما تحب انا هتواصل معاه وابلغك بنتيجه
حنين تفيق لتجد نفسها في غرفة جاسم
حنين _ يا نهار اللي خلفوك اسود انت جايبني هنا ليه
جاسم بزهق _ اغما عليكي وانا جبتك بس غلطان كنت سبتك
حنين بغيظ _ ومدخلتنيش بيتنا ليه طالما راجل كده
جاسم بغضب _ بت انتي انا متحملك بالعافية، متتماديش فيها ها
حنين بغيظ _ انا كنت فكراك مجنون او ملبوس، طلعت واطي وهي دي نتيك، جبتني هنا علشان تاخد غرضك مني
جاسم بقرف _ اخد غرضي من مين ياحبيبتي،.. يابنتي انتي نكره مبصلكش، يلا اتكلي شوفي رايحه فين
حنين بغيظ _ مااااشي وربنا بس اشوفك عندي وانا هوريك مقامك
جاسم _ مااشي، اتفضلي بقا
حنين تذهب عند الباب ليستوقفها صوته
جاسم بإبتسامة غريبه _ في النهاية هتكوني ليه،
حنين تشعر ان لكلامه معني اخر
حنين _ قصدك ايه
جاسم _ تشربي شاي
حنين تهمس بالقرأن ليهز رأسه بأختناق
جاسم بغضب _ انت لسه هنا
حنين بخوف _ يااانهااار اسوود انت مين يخربيتك
جاسم بغضب _ اطلعي بره احسنلك
حنين _ ولا انت ملبوس يلااا
جاسم _ انتي هتمشي ولا اضربك
حنين _ اسمعني والله ما بكدب انت ملبوس
جاسم يمسكها من شعرها بغيظ ويرميها خارج الغرفه ليتحول مره اخرى وينظر لها بإبتسامة غريبه
جاسم _ انتي اللي اتحدتيني
حنين بخوف _ اعوذ بالله من الشيطان الرجيم
جاسم يفيق بغضب _ لسه موجوده غوري
حنين بخوف _ غورت
تذهب حنين الي المنزل ليخرج عمار من الا شئ ويصرخ في وجهها
عمار _ كنتتتتي بتعملي ايه فوق... ماماااا الحقي
حنين بفزع_ يخربيتك، مالك يا ولااا
عمار _ بتعملي ايه فوووق يابنت فردوس، الشرف ياعبمنصف
حنين _ ولاااا اخفا من وشي يلااا، شرف ايه اللي بتتكلم عنه
فردوس _ بتزعقو علي السلم ليه ما تيجي تضربو بعض بالشباشب في البيت
عمار _ بنتتتك شايفها جايه من فوق من عند الساكن الجديد
حنين باستغراب _ انت مش قولتلي انه صاحبك، بتتكلم عنه كده ليه
عمار بغضب _ انا معرفهوش وحتي لو صاحبي ايه بيطلعك عنده فوق
حنين بصدمه_ ياعمار انت قولتلي انه صاحبك
عمار _ وحتي لو صاحبي ايه يوديكي عنده
حنين تغلق عينيها وتحدث نفسها _ عاوزة اطلع من الورطه دي.. ثم تفتح عينيها
عمار _ حنين انا قولتلك تكويلي القميص مكوتيهوش ليه
حنين بخوف _ ياااماماااا
فردوس _ مالك يابت
حنين _ مفيييش وسعوووو
تذهب مسرعه لغرفتها وتتطلع للمرأة بخوف وتحدثها
حنين تتحدث وترد علي نفسها _ البيت في عفريت، الساكن الجديد هو العفريت .. لا مش هو.. دا انسان ... انسان ازاي ده شيطان... بس انا لمسته يعني انسان حقيقي،.. وليه ميكونش عنده انفصام شخصية وبيتحول.... لا ده عمار كمان قالي انه صاحبه وبعدين قالي مقالش... وانا لما بتمنا حاجه بتحصل الاجابة هي العجل في بطن امه
جاسم من الخلف _ تشربي شاي
حنين تستدير بخوف وترتجف بقوه _ انت انت مين وعاوز منى ايه
جاسم بإبتسامة _ عاوز اتجوزك
حنين بخوف _ انت انسان ولا شيطان
جاسم _ دااسم
حنين _ جاسم
جاسم _ داسم
حنين بخوف_ ليك اسمين
جاسم_ داسم
حنين تغمض عينيها بخوف _ اعوذ بكلمات الله التامات من شر ماخلق ثم تفتح عينيها ولا تجده ثم تخرج مسرعه من المنزل وتذهب لسطوح وتطرق الباب بقوه ليفتح لها جاسم
جاسم بزهق _ جااايه تاني ليه
حنين بخوف _ انت اسمك ايه
جاسم _ جايه علشان تسأليني على اسمي الي قولتهولك قبل كده
حنين بغضب _ اسمك ايه انطق
جاسم بزهق _ اسمي زفت.. جاسم
حنين بخوف _ يعنى مش داسم
جاسم بسخريه_ داسم ده اسم شيطان اللى هيخبطك ان شاءلله
حنين بخوف _ هيخبطني انا ليه
جاسم بزهق _ علشان بتدخلي في اللي ميخصكش
حنين بخوف _ انت اسمك ايه دلوقتي طيب
جاسم _ قولنا زفت جاسم
حنين بدموع _ انا لسه شيفاك عندي وبتقولي اسمي داسم
جاسم بسخريه _ عندك فين بقا
حنين _ في اوضتي
جاسم _ تلاقيكي بتفكري فيه وبتتمني اجيلك اوضتك، يابنتي انا مليش في الصحوبيه متتعبيش نفسك، عمرنا ما هنتجمع في نفس الاوضه
حنين بانفعال _ انت غبي بقولك كنت عندي دلوقتي، انتاااا ملبوس
جاسم بزهق _ وانتي بقا شيخه عرفتي لوحدك اني ملبوس
حنين _ طيب استنا
جاسم _ هتعملي ايه
حنين _ هشغل قرأن
جاسم _ بت انتي انا عارف حركاتك كويس امشي احسنلك لو جيتي هنا هفضحك في العماره
حنين بغيظ _انت ملبوس يابن الملبوووسه
جاسم بإبتسامة _ تشرب شاي
حنين بخوف _ انت مين
جاسم بنظره مريبه يشيب لها الشعر _ داسم
حنين تنظر له بفزع وتفقد الوعي
جاسم يفيق ليجدها ملقاه على الأرض
جاسم بزهق _ الله يخربيتك.... هي ايه الحكاية هو انا كل ما اروح مكان الاقي واحده كده، ... تعالي اتنيلي جوه اما نشوف حكايتك
عيون p4 👻
حنين في نفس المكان الفخم.. تتجول في ارجأه الا ان تصل غرفه اشبه بغرف الملوك، واثاثها مدهب بلون الذهب، وهناك طفل ف العاشرة من عمره يلعب بجانب امه النائمه علي سريرها وبيده زجاجة منكير، ويقترب من المرأة ويكتب شيء لا تستطيع ان تراه...
ثم تفتح عينيها لتجد نفسها في غرفة جاسم
جاسم بزهق _ فوقتي
حنين بدوخه _ انا فين
جاسم _ عندي في اوضتي
حنين بفزع _ انا جيت هنا ازاي تاني
جاسم _ اتلككي.. انتي اللي جيتي لغيت عندي
حنين ببكاء _ الله يقطع اليوم الي شوفنا وشك فيه ايه اللي جابك عندنا بعفاريتك
جاسم بغيظ_ انتي اللي مجنونه وتصرفاتك اجن، حلي عن دماغي بقا
حنين _ مش مصدقني
جاسم بزهق _ ولا هصدقك
حنين بحده _ طيب نفسك تاكول ايه دلوقتي
جاسم بغضب _ هو انا بكلم جرسون، وانتي مالك
حنين _ قول بس
جاسم بغضب _ مش هقول وهو بعد شوفتك يكونلي نفس اكول
حنين _ خلينا في الجبنه تمام
جاسم بنفاذ صبر _ وبعدين طيب يعني اروح انده السكان عشان يشوفوكي عندي
حنين بغيظ_ اسمع انا هثبتلك وانت تخرس . ثم تغلق عينيها وتحدث نفسها _ عاوزة جبنه ثم تفتح عينيها لتجده قريب منها بشكل كبير
حنين بخوف _ انت مين
جاسم بغضب _ بت انتي انا عارف حركاتك دي كويس اوي
حنين _ هضربك يلا... انا عاشقه جمال عينيك يعني ولا انت جايبلي عفاريتك وجاي
جاسم _ بردو هتقولي عفاريت
حنين _ طيب هسالك سؤال وترد عليه
جاسم بزهق _ ارغي
حنين _ مين قالك ان داسم اسم شيطان
جاسم يشرد ثم يرد _ مش فاكر
حنين _ انت مهتم انك تعرف حآجه عن العالم ده طيب
جاسم _ لا خالص مبصدقش في الحاجات دي
حنين _ طيب ممكن تصدقني عشان والله كل شويه تدخل اوضتي وتختفي ، ده غير ان بصتك اتغيرت عشان كده اغمي عليه من الخوف
جاسم بزهق _ فلنفترض اني صدقتك هتعملي ايه يعني
حنين _ معرفش بس انت مش مأذي لوحدك انا كمان مأذيه معاك
جاسم بغيظ _ دي مصدقه نفسها
حنين _ ولازم انت تصدقني كمان
جاسم بزهق _ والمطلوب
حنين _ تشغّل قران طول ما انا بكلمك
جاسم بغضب _ واشغل قرأن ليه انا
حنين _ عشان ملبوس
جاسم _ يلبسك قطر ويخلصني منك، انا سايب المكان ده خلاص
حنين _ طيب ياريت
جاسم _ انتي بتطرديني من اوضتي
حنين _ اه بطردك خدك هدمتينك واتكل انا مش نقصاك...
جاسم بغضب _ كانت اوضة اللي خلفوكي هي
حنين بغيظ _ ولااا انت لو ممشتش من هنا هروح اقولهم انك خطفتني وجبتني هنا
جاسم _ وليه تكدبي لما ممكن اكتفك دلوقتي ومخرجكش أبداً
حنين _ دا عندها يلا وسع لا اخفيك
تدفعه وتخرج
جاسم _ يارب يكون في دم ومتجيش هنا تاني
حنين بقرف _ طيب لم عفاريتك من ساعة ما جيت ما نمتش ساعه علي بعضها
جاسم _ بنت مستفزه
حنين _ يا راجل يا ملبوس
تغادر المكان وهو يدخل ويغلق الباب ثم يرا طبق جبن علي الطاولة لينظر له بذهول
جاسم _ وتقولي انا اللي ملبوس، لبسك شيطان يابعيده.... ايه حكايتها البنت دي وايه عرفها بداسم ده
تعود حنين لمنزلها وتدلف الي غرفتها لتغّير ملابسها بداخل الدولاب وتغلقه على نفسها لكي لا يراها عندما يعود، ثم تسمع صوت طرق على باب الدولاب
حنين بخوف _ ممممين...... ماما انتي هنا
جاسم داخل الدولاب _ تشربي شاي
حنين تدفع باب الدولاب وتركض بهلع لتقع بجانب المرأه وتفقد الوعي لتجد نفسها في نفس المكان وقريبه من المرأة النائمه وبجانبها ذلك الدجال بثيابه القذره ومعه مصحف عليه دم وريش اسود كبير ويكتب بالريشه على الورق كلمات غريبه.. مزجل مزجل.. برهتيه برهتيه.. بشكيلخ بشكيلخ... برشان برشان.. خوطير خوطير.. ترقب ترقب... شمخاهير شمخاهير... بكهطهونيه بكهطهونيه.... ومثل هذه الكلمات الغريبة اللي نهاية الورقه ثم يضع معها عدد سبع فولات، ويضعها تحت رأسها، ثم يرفع رأسها ويسقيها ماده سائله بلون الاحمر.. لتستيقظ تلك المرأة ولكن قبل الاستيقاظ بثواني يخرج منها شيء مخيف ينتزع القلب من مكانه من شدة سؤ شكله
تستيقظ حنين لتجد نفسها علي سريرها ومغطاه وجاسم يقف جانبها وينظر لها بغضب
جاسم بغيظ _ الجبنه دي جت ازاي انا مكنش عندي جبنه
حنين بخوف _ انت مين الله يخليك سيبني في حالي
جاسم _ انا زفّت ودخلت من الشباك، انطقي جبتي الجبنه ازاي وايه اللي راماكي علي الارض
حنين ببكاء _ ياعم ما تغور داخل من الشباك ازاي افرض حد دخل
جاسم _ استنيتك تيجي عشان اسألك مجتيش
حنين _ وانت عرفت توصل هنا ازاي ايه عرفك ان دي اوضتي أصلا
جاسم بحيرة _ وصلت معرفش ازاي.. بس ده مش موضوعنا
حنين ترفع الغطاء وتدخل رأسها بداخله لترا نفسها بملابس قليلة جداً لتغطي الباقي منها وتظهر رأسها وتصرخ _ انت انت شوفتني كده
جاسم بارتباك _ انا جيت لقيتك كده، بس انا مغطيكي اهو
حنين _ ياحقير يا زبالة، عفريتك كان معايا في الدولاب وانت جاى تكمل هفضحك
جاسم _ كان بيعمل ايه معاكي في الدولاب العفريت
حنين ببكاء _ كان بيعزمني علي شاي، انا مش عارفه اي حبه في الشاي
عمار من الخارج _ بترغي مع مين يابت
حنين بصدمه_ في التليفون يا عمار
عمار يفتح الباب فجاه ليراه داخل الغرفه
حنين بخوف _ الله يخربيتك اتكشفنا
جاسم _ اتكشفنا ايه انا معرفكش
عمار بغضب _ بتعملو ايه، قوميلي. ثم يسحب الغطاء من عليها لتشده مره اخره
حنين _ والله انت فاهم غلط، دا عفريت
عمار يمسكه من ثيابه بغضب_ عفررريت ما انا ماسكوه اهو.. بتعمل ايه هنا يلاا
جاسم بزهق _ جاي ارجع الجبنه بتاعت اختك
حنين _ جبنة ايه الله يخربيتك
عمار _ جايلها اوضة النوم وهي قالعه عشان ترجعلها الجبنه هصفي دمك يلا... ثم يتركه ويذهب للمطبخ ليحضر السكين
حنين _ يا مصيبتي، اجري اجري
جاسم _ مش قبل ما اعرف الجبنه دي جت ازاي
حنين ببكاء _ مضيقاك الجبنه .. هاتها انا هاكول بيها
جاسم _ اهي ثم يرميها على الأرض
حنين _ انت غبي دي جبنه رومي عارف الكيلو بكام منها
جاسم _ مش موضوعنا
حنين _ هو عمار اتاخر ليه مش كان هيقتلك
جاسم _ لا هو ولا عشره زيه
حنين تغمض عينيها وتتمنا ان تخرج من ذلك المأزق وتفتح عينيها لتجد ان الباب اغلق ولا صوت لعمار الذي كان ينهق مثل الحمير منذ قليل
جاسم باستغراب _ هو ايه اللي قفل الباب
حنين _ مش عارفه، اهي اتسترت ممكن تمشي بقا
جاسم_ اتسترت ازاي واخوكي
حنين_ مش هيعمل حآجه هو نسي اصلا
جاسم_ ليه عنده زهايمر
حنين_ اه زهايمر اسمه جاسم او داسم... ايه ده فين المراية يا حرامي
جاسم_ مراية ايه
حنين بغيظ_ مرايتي يا حرامي يا نصاب، اطلع بالمرايه ياض
جاسم_ قد ايه المراية دي
حنين_ طولك كده، طلع ياض
جاسم بقرف_ ايوه يعني مخبيها في جيبي مثلا وهطلعهالك
حنين _ تصدق صح، يمكن الواطي التاني خدها بس تغور وانا هروح انفخه
جاسم_ مين الواطي الأول
حنين_ انت ويلا اتكل علشان البس
جاسم بإبتسامة_ الشباك مقفول تشربي شاي
حنين بخوف_ مين معايا دلوقتي
جاسم بصوت مريب _ دااسم
حنين تغلق عينيها بخوف وتردد ايات قرأنيه ثم تفتح عينيها لتجده ملقي على الأرض
حنين بخوف_ اعوذ بالله ايه ده في ايه
ثم تنهض من سريرها وتركض نحو الدولاب وتحضر ملابسها وترتديهم سريعآ وكعادتها التي لا تستطيع التخلي عنها مهما كانت الظروف، ذهبت مسرعه نحو المرأة لترا اذا كانت الملابس تليق بها ام لا، وبعد الانتهاء من ذلك تجلس علي ركبتيها بجانب جاسم
حنين_ قووم يخربيتك هتجبلي شبهه
جاسم بدوخ_ ااه انا فين
حنين بغيظ_ في اوضتي، قوم هتفضحنا
جاسم ينهض بتعب_ انتي عايزة مني ايه،
حنين _ انا اللي اسألك السؤال ده، مين داسم ده وعاوز مني ايه
جاسم_ عاوزة تفهميني ان في حد اسمه داسم بيظهرلك وانتي عايشه عادى كده
حنين باستغراب_ يعني ايه عايشه عادى كده،
جاسم_ يعني داسم ده لو ظهرلك كنتي لأما موتي بسكته قلبيه او اتجننتي
حنين_ ليه يعنى
جاسم_ شكله مخيف جداً
حنين_ وانت شوفته قبل كده
جاسم بتنهيده_ ايوه مره واحده
حنين بصدمه_ شوفته ازاي
جاسم _ مش مهم
حنين_ لا مهم بقولك بيطلعلي
جاسم_ دي هتقولي بيطلعلي، يابنتي لو شوفتيه هتموتي فاهمه يعني ايه هتموتي
حنين_ ماهو انا بشوفه بهيئتك انت،، انت بتتحول وتقولي انك هو.. وبعدين ما انت شوفته مموتش ليه
جاسم بحيرة_ معرفش انا لما شوفته اغمي عليه وبعدين فوقوني وبعدها مشوفتهوش تانى
حنين _ كان بيعمل ايه يعني.. ايه الموقف اللي جمعكم
جاسم بزهق_ انا مبحبش افتكر الموقف ده، اسكوتي، وقوليلي ايه جاب الجبنه عندي
حنين_ من وقت ما انت جيت عندنا وانا كل ما اتمنا حآجه تحصل
جاسم_ يااااسلام اصدق انا
حنين_ اه صدق انت فاكر ان عمار سابنا عادي كده،
جاسم _ بت انتي انا مش اهبل اوي كده علشان تضحكي عليا بكلمتين واصدقك
حنين _ مش الباب مقفول اهو
جاسم بزهق_ ايوة
حنين تغلق عينيها وتتمنا ان يفتح الباب واهل البيت يغفون في نوم عميق ثم تفتح عينيها لتجد ان الباب فتح
جاسم بذهول_ مين فتح الباب
حنين _ حآجه تبع الأمنيات اللي اتمنيتها واتحققت
جاسم_ بت انتي،، انتي عفريته صح قولي متخافيش
حنين بقرف_ وانت هتقدر تلمس العفريته، مانت شيلتني من شويه
جاسم باستغراب_ امال لبستي هدومك ازاي افهم
حنين_ لما كنت مرمي على الأرض
يقطعها حديثها تذكرها للمرأه لتستدير ببطئ من شدة الخوف وتنظر لها ولا تجدها
جاسم_ مالك في ايه
حنين بخوف _ المرايا كانت هنا وانت مرمي على الأرض ودلوقتي اختفت
جاسم_ مكنش فيه مرايات
حنين بخوف_ كان فيه مراية انا بصتلها بعد ما غيرت... انت مين دلوقتي
جاسم بزهق_ زفت الطين جاسم
حنين ببكاء_ استغفر الله العظيم، هو في أيه
جاسم_ متبكيش بضايق
حنين ببكاء_ ما تولع، ويلا امشي قبل ما يصحو
جاسم_ واخوكي اللي رايح يجيب السكينة
حنين_ نايم
جاسم باستغراب_ نايم
حنين_ ولااا متخنقنيش بقولك لما اتمنا حآجه بتحصل
جاسم يشرد بعض الوقت ويعود لتحدث معها_ انتي عارفه ان ممكن يكون كلامك صح انا وصغير كنت لما اتمنا حآجه بتحصل، بس الكلام ده قبل ما اشوف داسم،
حنين_ وبعد كده
جاسم_ وبعد كده مبقتش حآجه تتحقق
حنين_ يعني ممكن يكون تحقيق الأمنيات دي تمن بيدفع لحاجه
جاسم بحيرة_ يعني إيه
حنين_ يعني كانت امنياتك بتتحقق وبعدين شوفته وبعد كده مفيش امنيات اتحققتلك..
جاسم_ ايوه بس انا مدفعتش حآجه قصاد الأمنيات دي، وبعدين دي كانت امنيات اطفال، لبس بطل خارق والعاب وشيكولاته وكده
حنين_ مين قال انك مدفعتش،
جاسم_ دفعت ايه بقا
حنين_ جاسم افهم الداسم ده عايش معاك
جاسم بزهق_ اوووف تاني
حنين_ بقولك عايش معاك، انت مش اول مره تيجي، وحتي مش عارف وصلت هنا ازاي، ف احسبها انت بقا
جاسم بسخريه_ جيت من الشباك، اكيد يعنى مجيتش عبر الزمن
حنين_ جيت من الشباك ازاي، انت عارف انك لازم تنزل تحت وتتسلق مواسير الميه اللي مفهاش حواجز تسند عليها، دا غير اننا بنهار واكيد كان مليون واحد شافك وطلعو يكلوك علقه سخنه
جاسم بحيرة_ لا انا تسلقت عليهم عادي من غير خواجز
حنين_ ودي حآجه طبيعيه في رأيك
جاسم _ لأ
حنين بغيظ _ تبقا ملبوس ولا مش ملبوس
جاسم بغيظ_ ايه ملبوس دي شيفاني قميص قدامك
حنين بقرف _ معجبتكش ملبوس نخليها عفريت راكبك.. انت هتشلني
جاسم _ ما تحترمي نفسك ايه راكبك دي
حنين _ مانت مش عاحبك البس وسايب المشكلة وماسك في الديل
جاسم _ انااا ماشي ويارب داسم يجي يلبسك
حنين بتمتمه _ ربنا ياخدك انت وهو
جاسم _ سمعتك يا انثي حيوان الشمبانزي
حنين _ طيب غور بقا متودناش في داهيه
عيون p5 👻
جاسم يعود لبيته الصغير ويتذكر شكل حنين وطريقتها ليحدث نفسه بإبتسامة _ بنت هبله ومجنونه وخيالها واسع.... خيال ايه انت كمان ، انا طلعت ازاي عندها اصلا.. اكيد في حآجه بتحصل معاها بس ليه متكونش هي اللي ملبوسه مش انا، اه ليه انا مش هي.. دي بتتمنا الحاجه وتحصل يبقا هي اللي ملبوسه اكيييد. بس تيجي وانا هعالجها
في منزل حنين
حنين _ عمااار قوم
عمار يستيقظ بتعب _ ايه
حنين _ ايه منومك في المطبخ
عمار ينظر حوله بأستغراب _ انا ايه جابني هنا
حنين _ يمكن كنت جعان وجيت تاكول
عمار _ يمكن.. خلاص اعمليلي اكل انا جعان فعلا
حنين _ ما تعمل لنفسك ولا انت شالل
عمار_ انا الراجل هنا وانتي البت.. اخلصي جهزي
حنين تغلق عينيها وتتمنا ان يتحول انثي يوم كامل. ثم تفتح عينيها
عمار بصوت انثوي_ رايح اخد دوش واجي الاقيكي مجهزه
حنين بضحك_ روح
عمار _ بتضحكي ليه
حنين بضحك_ مفيش، روح استحما وتعاله يكون جهزت
عمار بعصبيه_ انتي بنت بارده
يخرج من المطبخ ليقابل فردوس وعبدالمنصف
فردوس باستغراب _ انتى مين ياحبيبتي
عبدالمنصف_ ازيك يابنتي انتي جايه لحنين
عمار بزهق _ عرفنا انكم مخلفتوش رجاله مش هنبتدي الموشح،، استحما وارجعلكم نكمل
فردوس باستغراب _ انتي صحبة حنين؟
عمار يشوح بيده ويذهب إلى الحمام بدون رد
عبدالمنصف _ دي داخله الحمام افرضي كان عمار جوه
فردوس _ بنات محدش رباها اذا كانت لابسه هدوم الواد، هتتكسف تدخل الحمام وفي البيت رجاله
عبدالمنصف _ بت يا حنين
حنين بضحك_ نعم يا بابا
عبدالمنصف _ مين البت دي
حنين _ بت مين
فردوس _ البنت اللي في الحمام دي مش صحبتك
حنين_ مانتي عارفه يا ماما مليش صحاب يجولي البيت
فردوس _ امال مين البنت دي
حنين _ يمكن ابنك جايبها، ماهو صايع
عمار يخرج من الحمام وهو يضع يده علي صدره بذهول _ جم منين .. جمممم منين.
حنين بضحك _ انتي مين يابت
عمار بذهول _ جم منين حد يفهمني.. الحقني يا بااااابااا في حآجه راحت وحاجات جت
عبدالمنصف باستغراب _ هو ايه اللي راح وايه اللي جه، انتي مين يابنتي
عمار _ انا ابنك اااقصد بنتك يختااااي عمار رمز الرجولة اللي كان صوته يرج المكان لم يكوح،، بقا عماره عمااااره يامه
فردوس بذهول _ انتى بتقولي ايه يابت المعتوهه انتي
عبدالمنصف بذهول _ عمار مين انتي مجنونه
حنين بذهول مصتنع_ يعنى اتحول زي اسماعيل يس في الانسه حنفي
عمار بغيظ_ اتصرفووووو
فردوس _ يامصيبي يامصيبي يامه قالو جه ولد شد ضهري وتسند يمصيييبتي
عمار بصراخ_ اتصرفوووو انا مش هطلب منكم تتصرفو تانى الاهتمام مبيطلبش
حنين بضحك _ ماهما لو مهتمين كانو اتصرفو لوحدهم، ونبي لا تيجي عندي تشكيله ملابسه هيظبطو عليك
عمار يركض خلفها بغيظ _ شمتانه فيه يا جزززمه
حنين تركض خارج المنزل قاصده السطوح وهي تضحك وهو خلفها
حنين _ ههههه خلاص يا عماااره
عمار بصوت انثوي _ هقتلك يا حقيره
حنين تقف خلف جاسم وتضحك _ بس عيب البت لازم تكون لطيفه
عمار _ متقوليش بت انا راجل وستين راجل
جاسم يمسك به _ اهدي يا انسه في ايه، مالها دي
عمار بغضب _ متقولش انسه
حنين تهمس في اذن جاسم بضحك _ ده عمار بعد التحويل
جاسم بضحك _ اهدي حضرتك بس وكله هيتصلح
عمار بغضب _ وسع انت كمان وربنا لااوريكي
حنين بضحك _وانا مالي هو انا حولتك
عمار بغضب _ ماشي ماااشي
ثم يذهب وهو غاضب
جاسم _ انتي عملتي ايه ف اخوكي
حنين بضحك _ اصله بيقولي انا الراجل وانتي البت ف حولته
جاسم بإبتسامة _ مجنونه انتي
حنين بضحك _ يستاهل
جاسم _ طيب وهيفضل كده لامتي
حنين _ لبكره
جاسم _ لا حرام عليكي رجعيه دلوقتي الواد هيجنن رغم انه شكله موزه اوي ههههه
حنين بضحك _ لو مش احلي مني كنت سبته كده بس اخاف يخطف عرساني اللي مبيجوش
جاسم _ مجالكش عرسان خالص خالص
حنين _ لا تصدق الرجاله عميو
جاسم بإبتسامة _ عندك حق معندهمش نظر
حنين _ امم طيب هروح اضحك عليه شويه
جاسم _ لا استني عاوزك في حآجه
حنين _حآجه ايه
جاسم _ تعالي معايا
حنين _ في ايه
جاسم _ تعااالي وهفهمك
حنين _ طيب
ياخذها لداخل ويغلق الباب
حنين بقلق _ في ايه مين اللي معايا دلوقتي
جاسم بهدوء _ جاسم، اتفضلي اقعدي على الكرسي
حنين تجلس _ قعدت في ايه بقا
جاسم يمسك حبل ويبداء بربطها
حنين بخوف _ انت بتعمل ايه
جاسم _ متخافيش
حنين _ لا اخاف، الله يخليك بلاش
جاسم بتركيز _ خليكي واثقه فيه
حنين _ اثق فيك انت وبتكتفني انت مجنون
جاسم ينتهي من ربطها ويجلس امامها _ ايوة
حنين _ طيب وبعدين يعنى هتعمل ايه
جاسم _ هطلع العفريت من عليكي
حنين بغيظ _ انت اللي ملبوس مش انا
جاسم يضربها كف بقوه _ اطلع اقسم عليك بالله ان تخرج منها
حنين بصراااخ _ اااه يا حيوان يخرج من مين فكني لا اقتلك.. ث يخرسها بكف اخر
جاسم بتحدي_ ماهو انت هتخرج يعنى هتخرج،
حنين بدوخه_ اه هموت يخربيتك
جاسم يضربها كف اخر لتفقد الوعي _ اخرج بقولك... هوووف شكله خرج... حنين قومي... حنين خلاص خرج
منزل حنين
عمار ينظر للمرأة بذهول _ يامصيبتي وربنا بنت، عمااار اتقلب بنت
فردوس _ يالهوي يالهوي نقول ايه لناس ياعبمنصف
عبدالمنصف _ اسكوتي سيبيني افكر
عمار بعصبيه _ بيع البيت خليني اعمل عملية تحويل مش هقدر اعيش كده
عبدالمنصف _وتقعد فين انت وامك
عمار _ وانا مااالي اتصرفو لحسن اهرب واجبلكم العار
عبدالمنصف _ فكره حلوه ماهو محدش يعرف انك اتحولت انت اطفش ونقول عمار سافر
عمار بعصبيه _ مش خايف حد يعاكس او يتعدا علي بننننتك في الشاااارع
عبدالمنصف _ الله يكسفك،
فردوس _ خساره التسع شهور ياتعبك اللي راح يا فردوس
عمار _ وبعدين طيب
عبدالمنصف _ ولا قابلين هعتبر ان معايا بنتييين مش بنت واحده.. من دلوقتي متخرجيش من البيت غير لضروره انتي فاهمة
فردوس بغيظ _ في كام ماعون عاوزين يتغسلو ومتنسيش تدي فومين للهدوم انتي الكبيرة دلوقتي
عمار _ يانهار اسود يا نهار اسود
عبدالمنصف _ هنسميه ايه
فردوس _ انا نفسي في اسم ملك من زمان
عبدالمنصف _ مها احلي
فردوس _ هي ملك
عبدالمنصف _ انا الراجل وانا الي اسمي بنتي
عمار _ انتوووو بتقولو اييه
فردوس _ غوري على المطبخ
عمار بصراخ _ ارميلكم نفسي من فوق السفره دلوقتي علشان ترتاحو
في غرفة جاسم
حنين بألم _ ربنا ياخدك
جاسم _ انا كنت بطرده منك
حنين _ يخربيتك خراب ما يعمر
جاسم _ انا غلطان انى بساعدك
حنين _ غلطان وقليل الأدب، عاجبك شكلي طلعلي كور في وشي
جاسم _ المهم انه طلع وسابك
حنين _ يا متخلف دا لابسك انت
جاسم بزهق _ اوووف ياربي هو مين فينا اللي بيشوف عفريت بهيئتي
حنين _ انا
جاسم _ومين لما بيتمنا حآجه بتتحقق
حنين _ انا
جاسم _ ومين كل شويه يغما عليها
حنين _ انا
جاسم _ يبقا مين ملبوس انا ولا انتي
حنين _ انت
جاسم _ لا انتي
حنين بغيظ _ يعني ايه انا اللي ملبوسه انت كل شويه تظهر وتختفي وتقولي انا اللي ملبوسه انت اهبل
جاسم _ انا عمري ما حسيت ان في حآجه غير زمان ومره واحده كمان انما انتي بتشوفي
حنين _ وانا مشوفتش غير لما جيت وانت بشكلك ده بتكلمني بشخصية داسم
جاسم _ يعني ايه،، بكلمك وانا مش حاسس بنفسي مثلا؟
حنين _ اه.. حد متلبسك بيكلمني
جاسم _ طيب هخليني معاكي للاخر.. بقولك ايه لما اتحول
حنين _ بتقولي تشربي شاي ومره قولتلي في نهاية القصه هاخدك معايا ومره قولتلي تجوزيني ده غير ان النهارده لقيتك معايا جوه الدولاب وجريت واغمي عليه ولما صحيت لقيتك جمبي
جاسم _ حنين انا مبشربش الشاي، هي مره واحده شربتها وبعدها شوفت جاسم ده ومن وقتها بخاف اشربه
حنين بخوف _ ازاي يعني
جاسم _ مبحبش افتكر الموقف ده
حنين _ افتكره مره خليني افهم علاقة الشاي بالزفت ده
جاسم بإبتسامة _ تشربي شاي
حنين بخوف _ انت عاوز منى ايه
جاسم بنظره مريبه _ عاوزك
حنين بخوف _ تعمل بيه ايه واشمعنا انا
جاسم _ محدش يقولنا ليه، في النهايه هتكوني معانا
حنين بدموع _ اكون معاكم فين
جاسم يفيق ليجدها تبكي
جاسم _ مالك
حنين ببكاء _ انت مين
جاسم يضع يده على كتفها باهتمام _ هو انتي شوفتي حآجه تاني
حنين ببكاء _ اه كان لسه بيكلمني وبيقولي عاوزك وهتكوني معانا، اكون معاهم فين ومالهم بيه
جاسم _ طيب اهدي مفيش حآجه اكيد انتي بيتهيالك
حنين بانفعال _ متقوليش بيتهيالك، هو بيكلمني زي مانت بتكلمني كده
جاسم _ طيب وبعدين يعني
حنين ببكاء _ معرفش
جاسم بتنهيده _ عارفه كان في واحد زمان بيعالج ماما من جن متلبسها بس اكيد مات دلوقتي لانه كان عجوز يمكن كان قدر يساعدك
حنين بصدمه_ امك كان جن متلبسها؟
جاسم _ الراجل ده كان بيقول كده وهي اخر فتره دخلت غيبوبه لغيت ما الراجل ده ظهر وساعدها لغيت ما فاقت
حنين _ يعني حالة امك انها كانت داخله في غيبوبه بس ولا كانت بتعمل حآجه
جاسم _ كانت عادية خالص بس كانت حاجات غريبه بتحصل زي نار بتولع فجأه، مشاكل في البيت وكان عندنا واحده بتخدم كانت كل شويه تصحا تصرخ وتقول حد بيحاول يتعدا عليها لغيت ما انتحرت قدامنا كلنا بطريقة بشعه
حنين _ انتحرت ازاي
جاسم بتنهيده _ دبحـ.ت نفسها ،، مسكت السكـ.ين ومشته علي رقبتها من غير اي تعابير خوف علي وشها
حنين ببكاء ورجفه _ ايوة يعني ده مصيري انا،
جاسم _ لا طبعاً اكيد ده مش هيحصل، ... ثم يصمت ويتذكر شيء ليقف وهو مصدوم
حنين _ مالك
جاسم يسافر بذاكرته للاماكن التي سكن بها من قبل،،، كانت في. كل. مره فتاه تموت بطريقة غريبه
حنين بخوف _ مالك في ايه
جاسم بصدمه _ مش عارف بس انا لازم امشي من هنا دلوقتي حالا
حنين _ في ايه ما تتكلم
جاسم _ انا كل ما بروح مكان بيحصل نفس الحاجه
حنين بدموع _ اللي هي ايه الحاجه دي
جاسم _ بنت بتموت بطريقة غريبه
حنين ببكاء _ ايوه يعني انا هموت بنفس الطريقه
جاسم _ اكيد لو مشيت مش هيحصل،
حنين ببكاء _ طيب امشي يلا امششي
جاسم بتوتر_ انا بجد معرفش ده بيحصل ازاي ومخدتش بالي غير وانا بكلمك في الموضوع
حنين ببكاء _ طيب امشي انا مش عايزة اموت الله يخليك امشي
جاسم _ ماشي دلوقتي .. بس اطمن عليكي ازاي
حنين ببكاء _ متطمنش طول مانت بعيد انا تمام
جاسم بإبتسامة _ تشربي شاي
تعليقات
إرسال تعليق