المغرورة الفصل الاول حتي الفصل السابع والاخير بقلم هنا عادل كامله على مدونة النجم المتوهج للروايات

المغرورة

الفصل الاول حتي الفصل السابع والاخير 

بقلم هنا عادل

كامله على مدونة النجم المتوهج للروايات 

اسمي داليا عندى 49 سنة 

موظفة فى هيئة حكومية مرموقة 

بيقولوا عليا جميلة 

طويلة وجسمي برغم السن متناسق 

عنيا واسعة وسودة

وشعرى طويل

مش محجبة

وبهتم بنفسى جدا وتقريبا انا اهم حاجة بالنسبالى 

حكايتى يمكن شبه حكايات لستات زيي كتير 

بس لما لقيت نفسى مش لاقية حد اتكلم معاه 

قررت احكيها حتى لو على الورق

هو ده بقى الحاجة الوحيدة اللى بقدر اهرب بيها من وحدتي المملة 

خاصة بعد ساعات شغلى ما بتخلص 

من سنين كتير 

كنت بعيش بين اسرة من اللى بيتقال عنهم اغنيا 

امى كانت مديرة مدرسة وكان ابويا دكتور قلب معروف 

وده كان حال كل العائلة 

مهندسين 

دكاترة 

الوقت اللى كان ممكن تقول ان ده اقل مستوى فى العائلة 

ممكن مثلا يكون محاسب فى بنك 

اسرتنا برغم ان الوقت كان موصلش لمراحل التطور اللى بنعيشها دلوقتى 

الا انهم كانوا متفتحين جدا

ولأنى كنت البنت الوحيدة عند ماما وبابا 

مش عايزة طبعا اوصفلكم كم الدلع اللى كنت بعيشه 

خاصة ان بابا بشوفه فى المناسبات بسبب انشغاله بشكل مستمر 

وماما كانت الصبح فى المدرسة 

بعد الضهر نايمة شوية 

تصحى تتغدا معايا 

وتسيبنى للنانى بلغة العصر الحالى 

او الدادة زى ماكنا بنقول فى الوقت ده 

وتنزل تقابل صحباتها بقى 

يقعدوا سوا فى النادى 

يحضروا عرض مسرحي 

او حتى حفلة فى بيت واحدة من صحباتها تحت مسمى عيد الميلاد

او الاحتفال بمولود

او بنجاح

او حتى طلاق

المهم يلاقوا سبب يعملوا بيه شو قدام باقى اصحابهم 

وكل واحدة منهم تدور على اغلى هدية واشيك فستان 

علشان تظهر للباقى هى اد ايه مميزة 

كل ده عمره ما اثر عليا 

مش عارفة ايه السبب 

مع انى كنت طفلة لواحدى 

يعنى اكيد بحتاج احس بحب ووجود امى وابويا 

لكن تقريبا طلعت عملية جدا من طفولتى 

زيهم 

كنت من التلميذات اللى بيتقال عليهم ممتازات 

كنت شاطرة جدا

كانت دايما مدرستى لما توقفنى فى الفصل وتخلينى اشرح لزمايلى الدرس اللى المفروض هى تشرحه 

تشجعنى بأنبهار وتقولى 

يا داليا انتى هتكونى بنت مميزة جدا 

انت من الاقلية اللى هيطلقوا عليهم مسمى النوابغ 

كنت احس انى مفيش على الارض غيري 

وبرغم سني الصغير 

الا انى بتعامل مع الناس على انى فعلا مميزة 

وانى من عالم مختلف عنهم 

انا نابغة انا اذكى منكم كلكم 

مش اى حد ينفع يكون صاحبى او صاحبتى 

كبرت على الغرور 

لأنى معرفتش الفرق بين الثقة فى النفس والتعالى والغرور 

اختلطوا عليا للأسف 

وحبي لنفسي وفخرى بذكائي خلانى اتغر 

لدرجة انى حسيت ان انا اللى ببعد عن الناس 

وعن الاطفال اللى المفروض يكونوا اصحابي 

لكن اكتشفت متأخر انه لاء هما اللى كانوا بيبعدوا عني 

بسبب انى دايما كنت بحاول اظهرلهم انهم اقل مني 

ولأن امى وابويا كان معندهمش وقت كافى ليا 

كانوا مش عارفين عني غير انى طالبة متفوقة 

وده بالنسبالهم الاهم 

كل مرحلة اتخطاها 

بنجح فيها اكتر بتفوق 

فى البداية كانت الدادة بتاعتى بتقعد تساعدنى فى واجباتى 

اكيد بابا وماما لما قرروا يجيبوا حد يكون مسؤول عني فى البيت 

دوروا على اللى تعرف تتابعنى فى دراستى 

اه امى مديرة مدرسة لكن مش هتفضى انها تتابعنى بنفسها 

بس مع الوقت 

وكل لما بكبر 

بقيت بعتمد على نفسى 

بعتمد على الكتب بتاعتى وعلى القرأة عموما 

كنت دايما اطلب من ماما الكتب وهى الحقيقة كانت مش بتتاخر ابدا عليا فى اى طلب 

كان عندى دايما حب استطلاع 

وكنت دايما اسمع من المشرفة بتاعت المكتبة فى المدرسة 

ان القرأة غذاء العقل 

وده ساعدنى فى انى اتطور اكتر واسرع 

علشان كده عمرى ما حسيت انى فاضية علشان اشغل بالى بوجود اصحاب 

او حتى ام او اب 

واخيرااا 

وصلت لمرحلة الثانوية 

عمرى ما اخدت درس خاص 

مفتكرش ابدا ان امى او ابويا فى مرة من مراحل دراستى 

قعدوا معايا حاولوا يذاكرولى او يعرفوا مستوايا ايه 

امى كانت بتكتفى ان مديرة مدرستى صديقة ليها 

وعن طريقها بتوصلها اخبارى 

وطبعا ده بالنسبالها كان مصدر فخر اكبر بين اصحابها 

طبعا هما ميعرفوش ان الست المديرة بتشوف بنتها بالصدفة 

لاء اكيد 

هما عارفين انها ست مثالية 

متكاملة 

شغلها 

واهتمامها بجوزها الدكتور المعروف 

وبنتها المتفوقة 

غير اهتمامها بنفسها 

غير تواجدها بأستمرار بتألق بين اصحابها 

لكن طبيعة العلاقة بيت ماما وبابا وبينى وبين البيت 

محدش كان يعرف عنها حاجة غيري انا والدادة بتاعتى 

اللى كانت برغم بساطتها 

وهدؤها 

الا انى ياما اتمنيت ان الست دى تكون هى امى اللى بجد

يمكن كانت متقدرش انها توصلنى لكل اللى وصلتله دلوقتى 

لكن اهتمامها بيا وبتفاصيلي بحب مش لمجرد انها تأدى مهمتها والسلام 

كان بيعرفنى انها هى معنى كلمة امومة 

المهم 

انى خلصت الثانوية العامة 

بمجموع كبير ومشرف زى بابا ما قاللى فى اليوم ده 

وهو بيبتسم ويطبطب على كتفى 

سمعت منه بنبرة هادية جدا.برافو ياداليا 

مجموعك مشرف 

يخليكي تختارى الكلية اللى تعجبك 

ماما.ايوة يا دكتور 

اكيد هتختار طب او هندسة طبعا 

مش هيناسبنا حاجة اقل من كده 

داليا ببرود.لاء انا مش هختار حاجة منهم 

مين قال انى عايزة اكون مهندسة او دكتورة 

ماما بصدمة.نعم 

اومال ايه بقى اللى هتختاريه 

اوعى تفكرى انى هقبل تكوني فاكرة انى ممكن اسيبك تدخلى كلية تجارة ولا حقوق مثلا 

انسى 

انتى بنتنا الوحيدة 

ولازم يكون مستواكي العلمي مميز وسط العائلة وسط كل معارفنا 

بابا.استنى بس يا استاذة راجية 

خلينا نسمعها 

هى اكيد داليا عندها هدف يليق بيها وبمستواها ومستوانا كمان 

(ايوة ماما وبابا كانوا بيتكلموا مع بعض بالألقاب)

ماما.اتفضلى سمعينا ايه اللى انتى مقررة انك تدرسيه 

داليا.ماما انا مش عايزة اتعلم هنا اصلا 

انا عايزة اسافر 

وحتى لما اسافر مش هدرس طب او هندسة 

ماما.نعم 

تسافرى ازاى يعنى تسافرى 

داليا.ايه ياماما مالك 

اسافر 

اكمل دراستى فى اى بلد اجنبية 

ماما.لاء طبعا مستحيل 

مينفعش تسافرى لواحدك 

اقول ايه للناس 

سيبت بنتى تسافر تعيش فى بلد اجنبية لواحدها 

طبعا بابا بيتفرج وساكت 

وانا عارفة هقنع امى ازاى 

علشان كده بمنتهى الهدوء 

داليا.ياماما هتقولى ايه للناس يعنى 

بنتى مميزة 

جابت مجموع عالى 

وسافرت تاخد شهادتها الكبيرة من امريكا 

وهرجعلك حاجة تفتخرى بيها اكتر واكتر بين صحباتك وبين كل العيلة بتاعتنا 

اللى مش هيبقى فيهم اى بنت جابت شهادتها من اوروبا غيري 

شوفى بقى فى الوقت ده 

الناس هتبصلنا ازاى 

بابا بأبتسامة هادية بتستفزنى.طبيعيى تجيبى مجموع كبير 

فعلا ذكية 

شوفتى يا استاذة ازاى داليا 

قدرت تدخل من الباب اللى عارفة انه بيفرق معاكي

ماما بتفكير.بصراحة يادكتور عندك حق 

هى لفتت انتباهى بذكاء 

هتبقى البنت الوحيدة فى معارفنا واصحابنا اللى سافرت تدرس برة 

بس برضه انا معرفتش انتى قررتى تدرسى ايه 

داليا.بصراحة ياماما 

انا عايزة اختار ما بين سياسة واقتصاد

او علوم 

بس كنت مستنية رأيكم اكيد 

(انا مقررة طبعا انها سياسة واقتصاد)

بابا.ايه اللى هيكون مميز فى كلية العلوم 

انا من وجهة نظرى انك لو بتقارنى بين علوم وطب 

يبقى الطب افضل 

ولو علوم وسياسة 

يبقى ااكيد السياسة والاقتصاد افضل بكتير

ماما.اه طبعا 

تخيلى توصلى تبقى سفيرة مثلا 

حاجة تشرف جدا 

بابا.ويعنى هى لو دكتورة مش هتشرف 

ماما بفخر.لاء طبعا يا دكتور مش قصدى 

بس انا مفكرتش فى سياسة واقتصاد دى خالص 

يمكن علشان فى دايرة معارفنا مفيش بنت دخلت الكلية دى 

علشان كده محطيتهاش فى اختياراتى 

برافو عليكي يا داليا 

اختيار ممتاز الحقيقة 

بس المهم تكونى على قدر المسؤلية اللى احنا هنسيبهالك

انتى هتروحى بلد غريبة عننا 

لهم عاداتهم وتقاليدهم المختلفة 

مش عايزة منك حاجة هناك 

غير انك تخلى بالك من نفسك 

ومن دراستك 

وزى ما كنتى متفوقة كل سنين حياتك اللى فاتت 

الاقى ده منك كمان فى دراستك الجامعية 

انا مش هبقى جنبك علشان اقدر اتابعك

داليا ببرود.ياماما متقلقيش عليا 

وبعدين يعنى هو حضرتك كنتى متابعة هنا حاجة تخصني 

متقلقيش 

انا عارفة ايه اللى هيبسطك مني وهعمله 

الغريبة ان ماما مهتمتش بالجملة 

ولا حتى بابا 

بابا.خلاص يا سيادة السفيرة 

هعمل اتصالاتى كده 

واشوف ايه اللى المفروض يتم 

وابداء علطول فى الاجراءات 

ماما بسعادة.حلو اوى لقب سيادة السفيرة 

خلاص انا مش هقولك غير كده من دلوقتى 

داليا.بس انتم خلاص قررتوا انها سياسة 

مع انى كنت بختار بينها وبين العلوم كمان 

بابا.لاء يا داليا 

احنا وافقنا انك تسافرى زى ما انتى طلبتى 

وتنازلنا عن رغبتنا فى انك تكونى مهندسة او دكتورة 

واختارنا كلية من اللى انتى مختاراهم بنفسك 

لو عايزة علوم 

يبقى مفيش داعي لسفرك 

لكن لو موافقة على السياسة والاقتصاد 

تمام 

من بكرة هشوف الاجراءات

ماما.عايزين نعمل حفلة كبيرة بقى يا دكتور 

بس مش عارفة تبقى هنا ولا فى النادى 

بابا وهو بيقوم يقف من على الكرسى.شوفى اللى يناسبك يا دكتورة وبلغينى قبلها علشان احاول اكون موجود

ماما.تمام 

فى الغالب هتكون فى النادى 

علشان البيت ميتبهدلش 

هناك هما هيكونوا مسؤولين عن كل التحضيرات 

بابا.طيب انا خارج بقى 

عندى عملية كمان ساعتين 

ماما.ربنا معاك

انا كمان خارجة 

هقابل ناس اصحابى 

وهروح اشوف فستان للحفلة 

بابا.خلاص تمام 

مبروك يا دودو

داليا.الله يبارك فيك يابابا

سابنا بابا وخرج 

وماما دخلت اوضتها 

وسابونى فى الريسيبشن لواحدى 

محدش منهم اخدنى فى حضنه 

محدش منهم حسسنى انى فعلا فرحتهم 

كل اللى كان فارق معاهم 

شكلهم قدام الناس 

لكن انا حتى محدش منهم مد ايديه سلم عليا مش بس حضنى 

قعدت مكانى 

مستنية ماما تخرج تقولى اجهز علشان انزل معاها 

علشان ننزل سوا نجيب حاجة احضر بيها الحفلة 

انا عندى هدوم كتير 

بس اكيد بقى دى حفلة نجاحى 

يعنى عايزة حاجة جديدة 

واقل حاجة انها تاخدنى تخرجني معاها 

انا مش بخرج مع ماما غير فى حفلة عيد ميلادى او عيد ميلادها او عيد ميلاد بابا 

لأنها بتكون عاملاه فى النادى 

غير كده انا وهى مش بنخرج مع بعض ابدا 

وانا قاعدة لقيت الدادة بتاعتى خارجة من الطرقة اللى فيها اوضتى 

وشايلة صنيه عليها شربات 

وجاية عليا وضحكتها الجميلة على وشها 

حطيت الصنية على ترابيزة الصالون 

ومديت ايديها مسكت ايدي وقومتنى من على الكرسى 

واخدتنى فى حضنها 

بمنتهى الحنية اللى ممكن تتوصف

الدادة.يابنت قلبى 

مبروك يا حبيبتى 

عقبال الشهادة الكبيرة 

وعقبال ما اعيش واشوفك عروسة والبسك طرحة فستان فرحك بأيديا 

لقيت نفسى بحضنها اوى 

وكأنى بقنع نفسى ان اللى فى حضنى دى الاستاذة راجية

الدادة وهى بتبعدنى عن حضنها ومسكانى من دراعاتى الاتنين وبتبص فى عنيا 

وعنيها بتلمع من الفرحة.كنت ماسكة قلبى بأيدي يا داليا 

ده انا يوم شهادة ابنى مكنتش خايفة كده 

داليا.ربنا يخليكي ليا يا دادة 

وبعدين انا مالى بأبنك ابو دم تقيل ده 

هتقارني الغلس ده ببنتك القمر ام دم خفيف دى 

الدادة.ياحبيبتى 

والله يا داليا انا لو عندى بنت مكنتش هحبها اكتر ما بحبك

ربنا العالم فرحتى بيكي النهاردة عاملة ازاى 

داليا بسعادة.حضنك ده يا دادة عندى بالدنيا 

وتسلم ايديكي على الشربات 

الدادة.لاء ده انا لسه هوزع شربات على كل الناس اللى فى الشارع 

هو ده اى نجاح ولا ايه 

ده انتى جايبة مجموع يفرح القلب

برغم ان كلامها كان عفوى 

لكن عرفت توصلنى فرحتها اللى خارجة من قلبها 

وحبها 

وحتى حنيتها 

اللى حسستنى اخيرا انى فعلا نجحت وعملت انجاز

داليا.لاء يا دادة بلاش موضوع التوزيع ده 

انتى عارفة الدكتور والاستاذة وبرستيجهم اللى ميسمحش بالنقطة دى 

يوم الحفلة ابقى اعملى اللى انتى عايزاه 

الدادة.اه على رأيك 

دى الاستاذة تبهدل الدنيا صحيح 

بس هى فين خرجت قبل ما تشرب الشربات

داليا.لاء دخلت تجهز علشان نروح نشترى فساتين لحفلة النجاح

الدادة.طيب وانتى هتخرجى بالهدوم دى 

ادخلى غيرى هدومك يلا 

داليا.ليه يا دادة 

ما انا لبسى حلو اهو 

الدادة.لاء انتى روحتى جيبتى نتيجتك بنفس اللبس 

ودلوقتى انتى خارجة مع مامتك 

طلعى احلى حاجة عندك يلا انتى عروسة النهاردة 

داليا وعلى وشها احلى ضحكة.تصدقى عندك حق 

تعالى معايا نختار سوا 

يتبع

قصة قصيرة

مؤقتا 

وموضوعها بالنسبالي جديد

استحملووونى بقى

الفصل الثاني 

المغرورة

دخلت اوضتى انا والدادة 

وبقينا ندور على اشيك حاجة 

انا نازلة مع حضرة المديرة 

الشياكة والمنظرة كلها بقى 

فى الوقت ده كانت موضة التاييرات

طلعت تايير بجيب اسود على الركبة وفاتحة صغيرة من ورا 

وعليه بلوزة حرير باللون الاخضر 

وعليه الجاكيت او البليزر بلغة العصر 

باللون الاسود

غيرت هدومى بسرعة 

وطلعت الشوز الفيرنيه السودة اللى بكعب صغير 

وعملت شعرى ديل حصان مرفوع 

وكنت جاهزة فى اقل من ربع ساعة 

دادة.بسم الله ما شاء الله 

عروسة يا داليا 

عروسة يا حبيبتى 

شبه الملايكة 

لا محتاجة احمر ولا اخضر 

جمالك ربانى

داليا.ايه رأيك يادادة 

قمر صح

دادة بتضحك.قمر ايه 

قولى قمرين تلاتة 

ده انتى قمر 14

بس بلاش الكلام ده يخليكي تتغري اكتر 

داليا.لاء يادادة انا مغرورة من غير حاجة 

دى ثقة فى نفسى

دادة.ايوة ياحبيبتى 

بس افتكرى 

ان من تواضع لله رفعه 

مش عايزة ثقتك فى نفسك دى يا داليا 

تخليكي تتعالي وتتكبري على الناس 

داليا بأبتسامة ثقة.وانا محتاجة الناس فى ايه بس يا دادة 

صداع وخلاص 

انا مش بحب الناس 

كفايا عليا نفسى وبس

دادة.بقولك ايه بلاش الكلام بتاعك ده اللى بيحرق دمي 

يلا نلحق مامتك علشان متعطلهاش 

خرجت داليا من اوضتها هى والدادة 

وراحت على باب مامتها اللى مقفول لسه من وقت ما دخلت 

داليا.هخبط عليها اعرفها انى مستنياها 

لأنى مقولتلهاش انى هجهز

دادة.طيب يا حبيبتى 

ربنا يخليهالك ويخليكي ليها

روحت خبطت على الباب 

بس ماما مرديتش عليا 

خبطت اكتر من مرة 

وبعد كده قلقت عليها 

فتحت الباب بالراحة علشان لو نامت ولا حاجة 

لكن اللى فاجئني وزعلنى 

ان انا لقيت الاوضة فاضية 

الهدوم اللى ماما كانت لابساها مرمية على السرير 

وهى مش موجودة 

طلعت اجرى من الاوضة ابص من البلكونة 

اشوف عربيتها راكنة تحت البيت ولا لاء 

لقيتها بتتحرك 

ناديت عليها اكتر من مرة 

وبرغم اننا فى منطقة هادية 

وفى الدور التانى يعنى مش دور عالى لدرجة انها متسمعنيش 

لكن هى مرديتش عليا 

ومشيت 

دى كانت اخر حاجة احس انها وجعتنى خلاص 

من بعد اليوم ده محسيتش انى بتأثر بأى حاجة 

لأن تجاهل امى ليا 

وفرحتى بأنى كنت نازلة معاها 

وفرحتى انى رايحة اجهز لحفلة نجاحى

كانت اكبر بكتير من انى اوصفها 

دادة دخلتلى البلكونة 

وانا واقفة ببص للطريق اللى اختفيت فيه عربية حضرة المديرة

دادة.ايه ياحبيبتى منزلتيش ليه 

داليا بأحباط.ملحقتش يا دادة 

ماما نزلت واحنا فى اوضتى 

بصى تجاهلتنى لأى درجة يا دادة 

دى حتى مقالتليش انها نازلة 

مسألتنيش لو هحتاج حاجة 

مدخلتش حضنتنى 

هو انا للدرجة دى تقيله عليها يادادة 

هو انا فيا حاجة غلط تخليها متبقاش عايزة تمشى بيا فى كل مكان بتروحه 

دخلت  اجرى على كونسول صغير فى الصالون وفيه مرايا

ووقفت قدامها 

داليا.بصى يادادة انا حلوة 

انا جميلة اوى 

وشيك كمان 

ليه هى مش بتخرج معايا 

طيب ما هى عارفة انى معنديش اصحاب 

ليه بتنسى انى موجودة دايما 

دادة فى الوقت ده معملتش اى حاجة غير انها مسكتنى من كتفى ولفتنى ليها وخدتنى فى حضنها 

فى اللحظة دى عنيا دمعت لأخر مرة 

ودموعى دى كانت اغلى حاجة بالنسبالى 

علشان كده كانت مش بتنزل بسهولة 

ولأنى بطلت احس 

فمنزلتش مرة تانية من بعد اليوم ده 

دادة.حبيبتى يا دودي 

ماما متعرفش انك نازلة معاها 

وهى معندهاش علم بأنك داخلة تجهزى 

كان المفروض نعرفها 

تلاقيها فكرتك نمتى 

داليا بتصطنع ابتسامة.وهو ده سبب يا دادة يخليها حتى ما تدخلش تبص عليا لو نمت 

تبوسنى من خدى قبل ما تنزل

عادى حتى لو مش هنزل معاها 

بس تدخل اوضتى تشوفنى بعمل ايه 

طبطب دادة على ضهرى بطيبة 

طلعت من حضنها 

ومسحت دموعى 

وابتسمت

داليا.خلاص عموما انا كده كده مسافرة 

زعلى من عدمه مش هيفرق حاجة 

دادة بصدمة.هتسافرى 

هتسيبينى

داليا.يادادة لازم اتعلم كويس 

وانا هنا لواحدى وهناك هكون لواحدى 

بس المميزات هناك اكتر 

هنا هروح الكلية وهدرس فيها زيي زي اى حد 

وهرجع اكل واذاكر وانام 

وعلى كده كل يوم 

وفى الاخر هستنى التعيين بواسطة من ماما او بابا 

وخلاص

لكن هناك 

هتعود على انى مزعلش منهم ودى اهم حاجة بالنسبالى 

انى اقنع نفسى بعدم وجودهم فى حياتى تماما

غير ان الدراسة ورجوعى بشهادة عليا من دولة اجنبية للبلد هنا 

هيبقى ليه اعتبارات مختلفة 

وهتوظف لتميزى مش للواسطة اللى مش عايزة احتاجلها فى حياتى مرة تانية 

انتى عارفة يا دادة 

تقريبا مفيش بنت من البلد خرجت علشان تتعلم فى دولة اجنبية 

يعنى هكون مميزة جدا فى حاجة زى دي

دادة بدموع.طيب وانا يا داليا 

هتسيبينى كده هنا 

داليا.طيب ايه رأيك اخدك معايا 

دادة.تاخدينى فين ياحبيبتى 

اسافر 

على عينى انى اقولك لاء 

بس مش هقدر 

ماهو انا برضه فيه ناس فى رقبتى يا داليا 

لا اقدر ابعد عنهم ولا اقدر ابعد عنك

داليا.خلاص يا دادة عايزاكى بس تصبري نفسك فترة دراستى 

بأنى هرجع ليا مكانة كبيرة اوى 

مش انتى بتقولى بتتباهي بيا 

تخيلى بقى لما ابقى سفيرة لمصر 

هتتباهي بيا ازاى 

دادة بدموع.ياحبيبتى انا بتباهى بيكي من وانتى لسه فى اللفة 

بس هقول ايه 

مصلحتك اهم من اى حاجة 

بس علشان خاطرى يا داليا 

اوعى تنسينى 

ابعتيلى علطول 

متحسسنيش انك بعدتي عني 

ماشى 

داليا بأبتسامة.عنيا يادادة 

تخيلي الدكتور وحضرة المديرة مقالوش الكلمتين دول

يلا مش مهم 

انا هغير هدومي بقى 

واعملي عصير ليا وليكي وتعالى نتفرج على التليفزيون

دادة.عنيا يا حبيبتى حاضر

بس عصير ولا شربات 

داليا.اه حلو الشربات وكترى فيه الموز بقى 

طعمه عجبنى اوى 

راحت دادة تعمل العصير 

وانا دخلت اوضتى 

قلبى مكسور 

بس حاولت انسى 

ومهتمش 

وقفت بصيت تانى لنفسى فى المرايا 

وابتسمت 

وروحت طلعت بيجامة وغيرت هدومى 

وقعدت على السرير مستنية دادة 

اللى جابت الشربات 

وقعدنا نتفرج على التليفزيون 

فات اليوم 

لحد ما نمت 

مفيش اى حاجة جديدة حصلت 

ولا ماما رجعت 

ولا بابا 

ودادة نامت وهى قاعدة 

لحد ما صحيتها خليتها تروح تنام فى سريرها 

وانا نمت 

بس انا كنت دايما بحس انى غريبة 

حتى لما بنام مش بحلم 

بصحى الصبح مش فاكرة ابدا انى حلمت بأى حاجة 

ولا حلوة ولا وحشة 

ولا حتى زى الناس اللى بتقول بنحلم اننا بنقع من على السرير

مش عارفة ده كان ايه سببه 

بس عادى يعنى هتيجي على الاحلام 

صحيت الصبح 

على صوت ماما صوتها عالى فى البيت 

قلقت 

وخرجت من الاوضة بجري 

عايزة اشوف فى ايه 

تخيلت ان ماما وبابا بيتخانقوا 

مع ان ده مش بيحصل 

بس اتصدمت لما لقيت دادة واقفة تعيط وعنيها فى الارض 

وامى عماله توبخها وتعلى صوتها عليها 

ماما.انتى مالك تخرج معايا ولا متخرجش 

انتى نسيتى طبيعة شغلك هنا باين عليكي 

دادة بدموع وانكسار.يا مدام انا مش قصدى حاجة 

بس البنت كانت فرحانة بنجاحها 

وكانت فاكرة حضرتك هتاخديها معاكى تشتريلها فستان للحفلة 

فرحتها انكسرت لما لقيتك مشيتى 

ونايمة وهى زعلانة 

وبتكلم من زعلى علشانها 

مش هيحصل حاجة لما حضرتك تطيبى خاطرها 

ماما بانفعال.تانى هتعيد نفس الكلام 

انتى مش بتفهمى ياست انتى 

انتى هنا خدامة

مش اكتر من انك خدامة 

بلاش عقلك الخرفان ده يصورلك انى ممكن اسمحلك تتدخلى فى اى حاجة تخص علاقتنا وحياتنا 

انتى تعملى شغلك وتاخدى اجرتك

وتخرسى 

والا بالسلامة هى كده كده ماشية وانتى مالكيش لازمة هنا 

لقيت نفسى مش قادرة استحمل الاسلوب اللى امى بتتكلم بيه مع الدادة 

بعيد عن انها هى اللى مربيانى 

وعن انى بحبها بجد

دى كمان اكبر من امي فى السن 

يعنى اسلوب امى معاها فيه اهانة ليها كبني ادمة 

وكمان كست كبيرة 

داليا.فى ايه يا ماما 

حضرتك بتكلمى دادة كده ليه 

دادة.مفيش حاجة يا داليا يابنتى 

دى ماما بتقولى على حاجات علشان الحفلة 

ماما بأنفعال.بنت مين يا مجنونة انتى 

وبعدين مش عيب عليكي ست كبيرة وكدابة 

اتفضلي يا ست داليا 

مش باقى غير الخدامة كمان تدخل نفسها فى خصوصياتنا 

داليا.ايه ياماما اللى بتقوليه ده 

هى مين اللى خدامة 

وبعدين ميصحش حضرتك تكلميها كده 

دادة دى امى التانية 

مع احترامى لحضرتك طبعا 

ماما بأنفعال.امك التانيه 

انتى اتجننتى 

انتى بتعملى مقام الشغالة بتاعتك من مقام امك 

لاء انتى الست دى اثرت عليكي خالص يا داليا 

مبقاش فيه داعي لوجودها هنا اكتر من كده 

داليا.ماما هو فى ايه 

متقوليش عليها شغالة من فضلك 

وبعدين معلش يعنى انا كل السنين اللى فاتت دى كان مين اللى مسؤول عن حياتى غيرها 

انا اسفة فى اللى هقوله 

بس هو حضرتك اللى خليتى دادة بديل لوجودك

وانا ده مش مضايقنى 

بالعكس 

دادة بالنسبالى اهم حد فى البيت ده 

فمن فضلك بلاش تزعليها 

ماما بتبص بقرف ليا ولدادة 

وتسيبنا وتدخل اوضتها وتهبد الباب وراها فى وشنا 

من غير ما ترد على كلامي 

دادة.ليه يا داليا تدخلى نفسك فى الكلام 

كده زعلتى ماما منك 

مكانش يصح اللى عملتيه 

داليا.بقولك ايه يادادة 

انتى اللى كان مينفعش تتكلمى مع ماما فى اللى قولتيه 

انتى مش هتحنني قلبها عليا 

طول عمرها كده 

وبعدين مين قالك انى زعلانة 

والله انا مش شاغلة بالى خلاص 

واحتفالى معاكى كان احلى من مليون احتفال ومليون خروجة كمان 

وحتى لو هى كانت سمعت كلامك وانا عرفت انها قررت تراضينى بسبب كلامك معاها 

كنت هزعل بجد

لانها محستش من نفسها 

لكن انتى ضيعتى فرحتى بانك سمحتى لماما تزعلك 

شوفتى بقى مين اللى كسر فرحتى 

دادة بدموع.يقطعني يا نني عيني 

حقك عليا 

بس والله صعب عليا زعلك 

فكرتها هتفهم كلامي صح 

معرفش انها هتفكرني بوجهها 

داليا.متشغليش بالك بقى 

وبلاش تزعلى نفسك 

بقولك ايه 

سيبك من كل ده 

قوليلى متعرفيش ايه اخبار الحفلة اللى هتعملها 

دادة بتبتسم.اه منك انتى 

اروبة 

اه عرفت 

قبل ما تتخانق معايا 

قالتلى ابلغك ان الحفلة هتكون بكرة فى النادى الساعة 7 

هى حجزت وجهزت كل حاجة 

داليا بثقة.طيب يلا بقى نفطر سوا وبعدين انزل انا وانتى نختار فستان محصلش علشان احضر بيه الحفلة بكرة 

ونشوف حاجة حلوة ليكي يا حلو انت ياحلو 

دادة.ايه ده انا كمان هجيب هدوم جديدة 

ربنا ميحرمنيش من حنيتك عليا 

داليا.طبعا اومال ايه 

لازم تبقى قمر

بس اكيد مش هتبقى احلى مني 

يلا بقى 

هحضر هدومي 

وانتى حضرى الفطار 

واتنين لمون علشان اعصابك تروق كده ومتنزليش معايا وانتى متنكدة 

دادة.من عنيا 

وبعدين نكد ايه 

هو بعد كلامك السكر ده 

فيه حاجة تخلينى ازعل

دخلت اوضتى وانا متعصبة جدا 

وحاسة من جوايا انى بغلي 

هو للدرجة دى امى معندهاش احساس

ولا بيا ولا بأى حد

طيب ليه خلفتنى مدام هى مش هتتحمل مسؤليتى 

بس خلاص فات الوقت على السؤال ده للأسف 

واهلى وانا بقينا مفروضين على بعض 

وياريت كان ليا حق الاختيار 

يتبع

كل عيد حب وانتم طيبين

المغرورة

الفصل الثالث

حاولت اتمالك اعصبى واكتم زعلى جوايا 

وده اللى بقى طبيعي فيما بعد ان 

اى حاجة تضايقنى 

مبينش اهميتها بالنسبالى قدام اى حد

لكن كنت بستنى لما ابقى لواحدى 

قدام المرايا 

واخرج كل طاقتى وكأنى بتخانق مع الشخص اللى ضايقنى 

فطرت انا ودادة سوا 

وغيرت هدومها 

وانا غيرت هدومى 

وقررت ادخل لأمى علشان اخد منها فلوس 

طلعت من اوضتى وانا بحاول ارسم ابتسامة سمجة 

علشان متعندش معايا وترفض تخلينى انزل 

بس قبل ما اروح اخبط على باب اوضتها 

طلعت بصيت من البلكونة على عربيتها 

مش عارفة ليه كنت حاسة انى لو لقيتها خرجت هتضايق 

بس كانت عربيتها موجودة 

طلعت من البلكونة وانا بفرك ايدي فى بعض وبدعى من جوايا 

انى احافظ على هدوئي 

خبطت على باب اوضتها اكتر من مرة 

مش بترد 

فكرتها نايمة 

ندهى عليها.ماما انا داليا 

انتى نمتى

ورجعت خبطت تانى

لكن بعد خمس مرات 

سمحت انى ادخل

كانت واقفة قصاد المرايا 

انا كنت متخيلة انها مش بتفتحلى علشان نايمة 

طيب مرديتش عليا ليه 

عقاب مثلا 

بس عموما هقول ايه يعنى اكيد مش هلومها 

حافظت على الابتسامة الرخمة اللى كانت تقيلة جدا على شفايفي 

داليا.ماما حبيبتى 

انا هنزل اشترى حاجة احضر بيها الحفلة 

ماما.انتى مش مكفيكي الهدوم اللى فى دولابك

دى فيها حاجات لسه بالتيكيت بتاعها متلبستش 

داليا.ياماما دى حفلة نجاحى 

وانا زى ما بتقولى هدومي علشان مش بخرج فيها حاجات تنفع للحفلة 

بس طلعت حاجات اجدد منها 

عايزة الناس تقول يه طيب 

بنت استاذة راجية 

معندهاش ذوق

مش ماشية مع الموضة 

يفكرونى متخلفة يعنى 

يرضيكي

ماما.لاء ويقولوا ليه بنت الاستاذة راجية 

انتى بنت الشغالة اللى فى بيت استاذة راجية 

مش ده كلامك يا انسة داليا 

داليا بأبتسامة بتقرب من مامتها اللى قعدت على الكرسى بتاعها قدام المرايا 

وبترسم عنيها بالكحل

داليا.ماما حبيبتى 

كان لازم اقولك كده قدامها

انا خلاص مسافرة قريب

وهى اكيد هتمشى وتسيب البيت 

يبقى  مفيش داعى تمشى قبل سفرى حضرتك عارفة هى بتنفعنى ازاى 

مفيش حاجة مش بتساعدني فيها 

حضرتك مشغولياتك كتير 

ومفيش وقت ندور على حد جديد 

مش هنبقى عارفين الجديدة هتبقى امينة ولا لاء 

يبقى خلينا في دى الفترة البسيطة اللى باقية 

ونحاول نفوت

وبعدين انا اتكلمت معاها 

وفهمتها انها كان مينفعش تتكلم فى اللى قالته لحضرتك 

الام.دى غبية 

دى بتلوم عليا انى خرجت 

انتى فاهمة سمحت لنفسها بأيه 

داليا.لاء طبعا مش ده قصدها 

هى فكرت انى خارجة مع حضرتك 

لأنى طلعت طقم قيسته 

علشان اشوفه ينفع احضر بيه الحفلة ولا لاء 

وكنت جاية اوريه لحضرتك 

بس كنتى خرجتى 

هى بقى فكرت انى غيرت هدومى على الفاضى وانى كنت ناوية اخرج 

ف اتكلمت علشان فهمت غلط وزعلت على انى اتعشمت انى هاجى مع حضرتك 

ومحصلش كده 

اتكلمت بحسن نية مش اكتر 

وانا فهمتها انها غلطت 

راجية بترسم شفايفها بالروج.دى غبية 

ربنا يقصر الفترة الجاية بقى 

علشان تمشى من هنا 

ده انا هستنى انك تمشى بأسرع وقت علشان هى تمشى من البيت 

كفايا عليها كده 

(اخر جملة دى وجعتنى اوى فكرة انها تستنى انى امشى قطعت قلبى)

داليا.هانت يا ماما حضرتك بس استعجلى بابا فى الاجراءات

الام.اول ما ييجى هشوف عمل ايه 

لو هو مش هيعرف يخلص الموضوع ده بسرعة انا هكلم ناس اعرفهم يستعجلوا اكتر 

كنت من جوايا مش عايزة افهم انها عايزة تخلص من وجودى 

انا بنتها الوحيدة 

كان المفروض علاقتنا تكون مختلفة عن كده 

بس للأسف بقى 

داليا.طيب معلش بقى ممكن حضرتك تدينى فلوس انزل اشترى حاجة للحفلة 

ولا حضرتك خارجة ننزل سوا نشترى مع بعض 

وارجع انا على البيت 

ماما.لالا مش هينفع ننزل سوا 

انا خارجة مع سهير صاحبتى 

عايزة اجيب هدية لأبن طنطك احلام 

نجح كمان فى الثانوية 

ولازم اجيبله هدية تليق بينا 

داليا.طيب مبروك 

خلاص انا هنزل اشترى وارجع علطول 

ماما.طيب استذوقى ها 

يعنى الحاجة اللى تجيبيها تكون راقية وشيك 

ذوق

وتخلصى وترجعى على البيت علطول 

داليا.حاضر ياماما

طلعت ماما فلوس من شنطتها 

وحطيتهالى على التسريحة من غير ما تبصلي  

لأنها كانت بتسرح شعرها وبتستعد للنزول 

كان ممكن تاخدنا على طريقها بالعربية 

بس احسن انا كده كده مش عايزاها هى واداة يتواجهوا مع بعض 

اخدت الفلوس وخرجت لدادة 

ونزلنا سوا 

وكانت تقريبا الخروجة دى هى خروجة الاحتفال 

دادة.بقولك ايه بقى يا دودو 

انا هعملك مفاجأة كده على اد ظروفى 

مش عايزاكى تتريقى عليا 

بس يارب تعجبك

داليا بفرحة.مفاجأة ليا انا يا دادة 

ايه ابهريني 

دادة.قوليلىى بس الاول نروح نشترى الطقم بتاع الحفلة الاول 

ولا نخلي المفاجأة الاول

داليا.لاء طبعا المفاجأة الاول هو الطقم هيروح فين 

ماهو فى المحل مستنيني

دادة.طيب بقى 

على بركة الله 

يلا بينا 

مش عايزة اقولكم دادة اليوم ده قدرت تبسطنى ازاى 

وبرغم ان اليوم كان بأقل التكاليف 

الا انى فعلا اتبسطت 

عزمتنى على حمص الشام 

واكلتنى درة 

لاء دى كمان جابتلى وردة من الناس اللى بتبيع ورد على الكورنيش 

وقعدنا على الرصيف نتفرج على البحر 

ونهزر ونتفرج على الناس بقى 

وتحكيلى عن جوزها الله يرحمه لما كان بيخرجها الخروجة اللى زى دى واد هى كانت بتتبسط 

وانا بقيت بتكلم فى اى تفاهة وخلاص اصل انا معنديش مواضيع 

ومعنديش حاجة بتحصل هى متعرفهاش 

علشان كده كنت بحكى اللى بيحصل من المدرسين فى المدرسة 

وبقلدهم 

وبقلد زمايلى لما بيغلسوا عليا 

وانا بستهيفهم ومبهتمش كعادتى 

وصوت ضحكنا كان مسمع البحر كله تقريبا 

لكن احنا كنا شاغلين بالنا بالوقت بتاعنا وبس 

دادة.بقولك ايه بقى يلا بينا نقوم نخلص مشوارنا

مامتك لو رجعت البيت وانتى لسه مرجعتيش هتعمل مشكلة 

داليا.ليه يا دادة القاعدة حلوة 

وحمص الشام ده طلع حلو اوى 

ايه رأيك اعزمك انا بقى على واحد تانى 

دادة.لاء والله ما يحصل 

العزومة دى بتاعتى انا 

انتى عايزة ترديهالى ولا ايه 

وبعدين يلا علشان كتر الحاجات اللى فيها شطة كتير بتتعب المعدة 

تعالى بقى اعزمك على كوباية عصير قصب 

هتعجبك اوى 

بس دى خليها بعد ما نشترى اللى احنا نازلين علشانه 

داليا.كمان عصير 

لاء ده انتى ورثتي بقى يا دادة

دادة.والله يا داليا ده انا مكسوفة اوى 

كان نفسى اجيبلك حاجة تليق بيكي 

بس معلش على اد ظروفى بقى 

حاجة بسيطة 

داليا بسعادة.والله يا دادة انا مبسوطة جدا 

انا اصلا اول مرة اكل حمص الشام واقعد على الرصيف بتاع البحر كده 

انتى فعلا فاجئتينى 

دادة.ربنا يجبر بخاطرك يا حبيبتى 

يلا بقى نلحق مشوارنا 

فعلا نزلنا وسط البلد 

وروحنا المحلات كلها اتفرجنا فيها 

ولقيت اخيرا الفستان اللى انا عايزة زيه 

انا بحب اوى الفساتين القصيرة 

وجيبتله جيبونة كمان علشان يبقى منفوش 

حاجة كده زى نادية لطفى ولا سعاد حسني 

كان نص كم 

ولونه احمر غامق 

وفيه وردة من على الصدر 

لونها اسود 

كان شكله حلو اوى 

وعليا كمان كان جميل جدا

اشتريت عقد اسود صغير يليق مع الفستان 

ودادة كانت مبهورة بيا وهى عمالة 

تسمي الله من عين اللى هيشوفونى 

وخايفة عليا من الحسد 

كنت عايزة اقولها ياريت يحسدونى يمكن الحاجات اللى انا مش لقياها ولا حساها من حسدهم 

الاقيها 

 بس اعجاب دادة المبالغ فيه بيا 

كان بيخلى الغرور جوايا وثقتى تزيد اكتر مما المفروض تكون 

خلص مشوارنا 

وفعلا شربنا عصير قصب واحنا راجعين 

وركبنا تاكسى وروحنا على البيت 

وكالعادة ولا ماما ولا بابا موجودين 

دخلنا اوضتى 

جهزت الحاجة اللى هحضر بيها الحفلة 

وكأن تانى يوم ده عيد 

فستانى على كرسى التسريحة وانا ببصله باعجاب ومستنية اشوف نظرات الناس وانبهارهم بيا 

الشنطة والشوز اللى هلبسهم على الفستان حطيتهم على التسريحة 

حتى العقد 

واقف قصاد المرايا واتخيل نفسي فيهم 

واشوف انا هكون جميلة ازاى 

نمت وانا مبسوطة اوى ومستنية الحفلة 

مش مستنية ماما وبابا لاء 

انا بطلت استناهم خلاص 

 فاتت الليلة وانا مبسوطة بسبب الوقت اللى قضيته مع دادة 

وبسبب انى مستنية حفلة نجاحى 

طلع النهار 

فتحت عنيا وانا بتمنى ان الوقت بتاع الحفلة يكون قرب 

بس للاسف ده لسه بدرى جدا

قومت من مكانى دخلت الحمام وغيرت بيجامتى 

وطلعت اشوف هفطر مع دادة ولا ماما وبابا موجودين وهفطر معاهم 

انا جعانة اوى 

اول ما خرجت 

لقيت بابا قاعد فى الريسيبشن 

ماسك الجورنال 

داليا.صباح الخير يا دكتور 

بابا بأبتسامة.اهلا يا صباح النور يا سيادة السفيرة 

تعالى عايزك 

قربت منه وانا مبتسمة كان نفسى احضنه 

بس انا بتكسف منه هما مفيش مرة واحدة عطونى احساس انى ممكن اعمل حركة زى دى 

كل تعاملاتنا من بعيد كده 

كأننا موظفين وبنتعامل رسمى 

بابا.تعالى عندى ليكي حاجة هتبسطك اوى 

داليا بسعادة.بجد

ايه هى يا بابا 

بابا.اسبوع وكل اجراءات سفرك هتكون جاهزة 

حتى جواز السفر والتأشيرة هيخلصوا فى اقل من اسبوع 

وهناك كل حاجة بمجرد ما توصلى هتكون اترتبت 

وعندى صديق هناك 

هيتابع موضوع الجامعه 

لحد ما تبداء الدراسة 

ويتأكد انك بتحضرى اول محاضرة كمان 

ابتسمت كنت فاكراه جايبلى هدية 

بس مش مهم 

ده كمان خبر مش وحش 

داليا.شكرا جدا يا بابا 

هى دى فايدة الواسطة 

تخلص كل الاجراءات وانت قاعد مكانك فى البيت 

يابختى والله 

بابا.ايوة طبعا يا بختك

انتى فاكرة ابوكى حاجة سهلة ولا ايه 

لاء ده انتى تتغري براحتك 

وتقعدى تحطى رجل على رجل كده 

وتستنى اللى تشاورى عليه ييجى لحد عندك

داليا بتبتسم.شكرا يا بابا 

متقلقش عليا 

انا هشرفك

بابا.لاء انا مش قلقان 

انا عارف بنتى ممتازة ازاى 

وواثق فى قدراتك

كان نفسى يحسسنى بالكدب انه قلقان 

بس محصلش 

داليا.هتحضر الحفلة طبعا 

بابا.اه طبعا 

ده انا لو محضرتش مامتك تقيم عليا الحد 

انتى عايزة الناس تقول ايه

حفلة نجاح بنته الوحيدة ومحضرهاش 

اتفضلى بقى اسمعى التوقعات بتاعت شلة النادى 

اه دول متخانقين 

اه دول على مشارف الطلاق 

اه مش بيحبوا يظهروا مع بعض فى الاماكن العامة 

وممكن يخلونى خونتها ولا خانتنى او اتجوزت عليها 

وانا اصلا بعمل عملية لمريض فى المستشفى 

يبقى ليه 

احضر واريح دماغى من الزن اللى هسمعه بعد كل الاشاعات دى 

داليا.اه صح يابابا عندك حق 

معلش مضطر بقى 

خرجت ماما من اوضتها وهى جاهزة للخروج 

بابا.صباح الخير يا استاذة 

انتى خارجة ولا ايه 

ماما.صباح الخير

اه خارجة 

لازم اروح النادى اتأكد من السيرفيس والاصناف كلها اللى طلبتها موجودة ولا لاء 

مش عايزة اتفاجئ بأى حاجة على اخر وقت 

وبعد كده هخلص النادى 

واطلع على الكوافير اعمل شعرى 

واجى علطول

داليا.طيب يا ماما ما تفطرى معانا 

ماما.متعطلنيش بقى يا داليا 

هو يعنى اللى بعمله ده علشان مين ماهو علشانك انتى 

افطرى انتى مع بابا 

بابا.لاء استني بقى يا دكتورة خدينى على طريقك انا عربيتى عند الميكانيكي من بليل 

هروح العيادة اخلص حجز كام حالة كده 

علشان بدلت مواعيدهم الصبح بسبب الحفلة 

ماما.طيب انت جاهز ولا لسه 

بابا.دقيقة بس اجيب شنطتى 

والبس الجاكيت واكون جاهز

فعلا ابتسمولى 

وخرجوا سوا 

وانا كأنى فى البيت تابلوه مش اكتر 

ولأن دادة كانت فطرت بدرى لأنها صاحية من الفجر 

فطرت لواحدى 

ولأنى كنت حاسة انى معنديش طاقة اليوم ده انى امثل طول اليوم

قررت اكتفى بأنى امثل واراضى الناس بليل بس 

وده خلانى انعزل فى اوضتى 

واقول لدادة انى عايزة اقعد لواحدى شوية 

كنت حاسة انى محتاجة طاقة كبيرة اوى علشان اقدر امثل ازاى انا وماما وبابا اسرة مترابطة جدا قدام الناس 

بقيت واقفة قدام المرايا 

امثل الابتسامة اللى هبتسمها 

حتى طريقة سلامى على الضيوف 

الردود اللى المفروض ارد بيها 

حتى كلمات الثناء اللى هذكر بيها سيادة المديرة 

كنت بحاول احضرها 

ما ماما لازم طبعا قدام الناس 

انا او بابا نفضل نقول فيها قصائد شعر 

واد ايه هى متفانية فى راحتنا وبتتعب علشان تساعدنا ننجح 

ونبقى بالصورة المشرفة دى 

ياااه كان موضوع متعب اوى 

وتمثيل صعب جدا

لكن ده ميمنعش انى مستنية الحفلة 

قعدت فى سريرى وقت طويل 

لواحدى 

كنت بفكر هيكون فيه ضيوف شباب فى الحفلة ولا لاء 

طيب هيكون فيه بنات احلى مني 

طيب هكون انا النجمة اللى فى الحفلة وانا اللى هخطف نظرات الناس

ولا ماما 

ولا حد غيرنا 

حسيت بغيرة من جوايا 

لمجرد فكرة ان فيه حد ممكن يكون احلى مني فى الحفلة 

مش عارفة ليه حسيت بكده 

لكن لقيت نفسى بتغاظ من جوايا من غير اى مبرر 

قومت خرجت من اوضتى على المطبخ 

دادة كانت بتقرأ فى المصحف 

صدقت وقفلت المصحف وسألتنى.عايزة حاجة يا داليا 

داليا.لاء يا دادة 

انا بس رايحة اشوف فيه خيار وزبادى فى التلاجة 

عايزة وشى يبقى بينور 

دادة.طيب استنى هاجى اجيبلك

داليا.لاء كملى انتى اللى بتعمليه 

انا لو احتاجت حاجة هقولك

ارتاحى بس 

دخلت فعلا طلعت الزبادى 

وطلعت الخيار وقطعته 

وروحت على اوضتى 

وحطيتهم على وشى 

حاجة ورا التانية 

وابص لنفسى فى المرايا 

واركز فى ملامحي

طيب تحت عنيا غامق 

طيب اسنانى مصفرة شوية 

طيب شعرى كان محتاج يتعمل 

لالا انتى زى القمر يا داليا 

انتى مش محتاجة حاجة 

وهتكونى احلى بنت فى الحفلة 

لاء احلى بنت ايه 

انا عايزة اكون احلى من اى بنت واى ست موجودة 

بصيت لفستانى 

وقررت اخرج لأوضة ماما 

اجيب منها حاجات من اللى بتحطها فى وشها 

ملقيتش حاجة اعرفها غير الكحل والروج 

اخدتهم ودخلت اوضتى 

قعدت قدام المرايا بعد ما غسلت وشى 

ورسمت عنيا الواسعه بالكحل 

وحطيت الروج اللى حسيته مش حلو عليا 

وقررت امسحه 

عجبنى الكحل فى عنيا 

وقررت اكتفى بيه 

خرجت من اوضتى 

كانت ماما لسه داخلة من باب البيت

جريت عليها قبل ما اروح اسأل دادة عن رأيها 

داليا. ماما حمدالله على السلامة

قوليلى ايه رأى حضرتك كده

ماما.ايه رأيي فى ايه 

بيجامتك يعنى 

داليا.لاء يا ماما 

هو مش باين ولا ايه 

بصى كويس فى عينى 

ماما بصيت فى عنيا.فى ايه يا داليا انا مش فاضية لدلعك ده 

مالها عنيكي 

مش وقت تعب اوعى تقوليلي عينك وجعاكي 

الحفلة كمان ساعتين 

(حسيت بالزعل هى للدرجة دى ماما مش واخدة بالها من ملامحى)

داليا.ياماما الكحل اللى فى عينى 

هو مش باين ولا ايه 

ماما.اااه انتى حاطة كحل يعنى 

طيب خليه 

هو كده كده مش باين 

يلا انا هدخل اخد دش واجهز 

لازم نبقى هناك الساعه 6 

انتى كمان ادخلى جهزى نفسك 

داليا.طيب مش حضرتك تشوفى الفستان وتقوليلي رأيك فيه 

ماما.ويعنى لو معجبنيش يا داليا 

هننزل نشترى غيره دلوقتى 

وعموما اجهزى وهشوفه قبل ما ننزل لو فيه حاجة هقولك 

داليا بأحباط.حاضر 

دخلت اوضتى وانا بنادى على دادة 

اللى جت بسرعة 

دادة.ايه يا حبيبتى عايزة حاجة 

داليا.اه يا دادة 

انا هجهز باقى 

انتى كمان اجهزى احنا هننزل الساعة 6 

دادة.مالك النهاردة يا داليا 

طول اليوم قاعدة لواحدك 

انتى زعلانة من حاجة يا حبيبى 

انا مرضتيش اضايقك بس 

قولت اسيبك براحتك

داليا.لاء ابدا يا دادة 

بس انا كنت حاسة بكسل كده 

وكنت محتاجة علشان اقدر الاقى طاقة اتعامل بيها مع كريمة المجتمع

دادة بتركيز.ايه ده يا داليا 

انتى راسمة عينك بالكحل 

ياختى بسم الله ماشاء الله عليكي

هى عنيكي ناقصة حلاوة علشان تحليها اكتر 

هتاخدى عين يابنتى وهتتحسدى 

الكلمتين بتوع دادة دول حولولى طاقتى السلبية 

فرحت اوى غير انها اخدت بالها 

لاء اعجابها بيا ده لواحده بيفرحني 

داليا.يا دادة يا ام لسان سكر انتى 

والله انتى اللى عنيكي حلوة 

يلا بقى انا هدخل اخد حمام 

واجهز

بلاش تتاخرى علشان مش عايزين حضرة المديرة تسمعنا كلمتين قبل ما ننزل 

عايزين نتبسط بس 

دادة بتضحك.حاضر يا عيون دادة بس كده 

لو عايزة تروحى تلاقينى مستنياكى هناك 

انا جاهزة اهو 

داليا.لاء هنروح سوا 

يلا بقى روحى البسى الحتة الجديدة 

عايزاكى عروسة يا عروسة 

دادة.اه منك انتى 

اروبة 

يلا مش هعطلك 

لو عوزتى حاجة نادي عليا 

داليا.حاضر

خرجت دادة من اوضتى 

وانا جهزت حاجتى 

ودخلت اخد حمام 

اما شعرى طبعا انا لفاه دوامة بقى من بدرى علشان مش هينفع انزل بيه مبلول 

وبعدين مش بعرف انشفه بالسيشوار

خرجت من الحمام 

وابتديت اجهز 

البس فستانى الجديد 

الشوز ام كعب 3 سم 

العقد الجديد 

شعرى اللى كان مزود جمال الفستان 

بقيت واقفة فى المرايا ببتسم.مين ممكن يكون احلى منك النهاردة 

خسارتك يا دودو فى الناس اللى حواليكي دول 

انتى اجنبية الحلاوة دى مش من هنا ابدا 

اكيد انا لغبطونى فى المستشفى وامى وابويا كانوا اجانب 

مش عارفة ليه كنت ببالغ اوى فى اعجابى بنفسي 

يمكن علشان كنت مفتقدة ده من الناس اللى المفروض يحسسونى بيه 

يمكن 

بس عرفت متأخر اوى ان اعجابى المبالغ فيه ده لنفسى كان حاجة مش صح 

المهم خرجت 

روحت بسرعة على اوضة ماما 

خبطت على الباب 

بابا رد عليا 

انا محسيتش بيه لما رجع 

سمحلى بالدخول 

فتحت الباب 

ودخلت الاوضة وانا بكامل اناقتى 

وقفت قدامهم

داليا.ايه رأيكم بقى 

بابا.برافو خلصتى قبل ماما 

ماما.لاء خلاص انا جاهزة 

تعالى انت بس اقفل الكوليه من  ورا 

بابا.شايفة ياستى لو مش موجود دلوقتى كان مين قفل الكوليه 

ماما بتبتسم.كنت هنادى على داليا تقفله 

انتى خلصتى يا داليا 

داليا بضيق.ايوة يا ماما 

مش باين عليا ولا ايه 

ايه رأيكم فى الفستان 

بابا.حلو الفستان 

ماما بصيتلى بسرعة علشان تقدر تخلص اللى بتعمله فى المرايا 

ماما.مش بطال يا داليا 

بس مكبرك شوية 

كنتى محتاجة حاجة بناتى تناسب سنك شوية 

داليا.ياماما ده جميل ده شبه بتاع سعاد حسني 

ماما.خلاص كده كده مفيش وقت 

حلو اهو يقضى الغرض 

يلا حصلينا على تحت 

واحنا هنيجى وراكي 

اقعدى فى العربية لحد ما ننزل

داليا بأحباط.ماما دادة معايا 

معلش لو سمحتى 

بلاش تزعليها النهاردة 

ومتقلقيش هى جابت هدوم جديدة تليق بالحفلة 

ماما.طيب يلا حصلينا على تحت 

خرجت من الاوضة

ودى كانت اخر مرة فى حياتى كلها 

استنى انهم يقولوا رأيهم فى حاجة خاصة بيا 

نزلت انا ودادة 

قعدنا ف العربية 

ونزل الدكتور والمديرة 

بمنتهى الثقة 

ركبوا العربية 

وطول الطريق محدش فيهم نطق بحرف واحد 

صمت تام 

مش عارفة ليه كده 

وصلنا النادى 

وبرغم اننا واصلين قبل ميعاد الضيوف 

الا ان كان فيه ناس وصلت ومنتظرين 

دادة راحت قعدت على الترابيزة بتاعتنا اللى بابا شاورلها عليها 

وانا بقيت مع ماما وبابا بنسلم على الضيوف 

اللى كانوا مبهورين بجمالى 

غير طبعا ثنائهم على مجموعى العالى وعلى فكرة انى هسافر اكمل تعليمي برة

بابا كان بيكتفى بالردود الدبلوماسية 

لكن ماما مش بتفوت فرصة علشان تتكلم عن انجازاتها العظيمة فى ترتيب حياتى 

واد ايه انا اللى ليا الاولوية فى حياتها كلها 

جاتلى هدايا كتير جدا

لكن بالنسبالى اعجاب الناس بيا 

حتى نظرات الشباب او الرجالة اللى كانوا فى الحفلة 

او حتى الطقم بتاع السيرفيس فى النادى 

كانت بالنسبالى احسن من الف هدية 

فكرة انى كنت ملفتة 

وكأن مفيش بنات فى الحفلة غيرى 

دى كانت مخليانى مبسوطة جدا

خاصة انى موقفتش مع ولا حد من سني 

غير بس علشان اسلم عليهم لأنهم جايين مع ضيوف ماما وبابا 

منهم اللى معايا فى المدرسة 

لكن طبيعي انى مش بتعامل معاهم 

كنت بلمح البنات وهما بتوشوشوا ويبصولى 

وشايفة الشباب ونظرات الاعجاب 

وانا ماشية كأن رجليا مش على الارض 

ورا ماما فى كل مكان 

برحب بالناس معاها 

وبمثل كل التفاصيل اللى دربت نفسى عليها 

كانت ليلة طووووووووووويلة اوى 

تقريبا بعد ما خلصت 

انا قابلت ماما وبابا مرتين تلاتة بالصدفة فى البيت 

لحد يوم السفر 

يتبع

معلش اتأخرت عليكم 

بس هخلصها بكرة

المغرورة

الفصل الرابع 

طبعا مش هحكيلكم تفاصيل يوم السفر 

هى كان مفيش فيها اى تفاصيل غير متوقعة 

برود فى المشاعر متوقع اكيد كل اللى فات يثبت ان مفيش اى حاجة هتكون مختلفة 

طبيعي دادة كانت منهارة 

وبرغم انى كنت زعلانة انى هبعد عنها 

لكن انا كمان كان عندى برود غريب فى مشاعرى 

مش حاسة انى زعلانة علشان همشى من بيتى 

مش زعلانة انى هبقى لواحدى تماما

اه انا لواحدى فى بيتنا وفى مدرستى 

لكن يمكن وجود دادة كان بينسينى وحدتى دى شوية 

لكن انا رايحة مكان معرفش ولا هعرف حد فيه 

وده قرار مش محتاج تفكير بالنسبالى 

ولا ليا اصحاب 

ولا عمرى هيكون ليا اصحاب 

توصيات رهيبة على انى كل ما اشوف حاجة جديدة ومختلفة 

متأخرش فى انى اجيبها لماما طبعا 

اما بابا وتوصياته كلها كانت تخص اجتهادى فى دراستى 

عايز يبقى مفيش بنت فى بلدى وصلت للى انا هوصله 

علشان انا بنته 

دخولى من باب المطار 

سيبت وراه بيتنا 

وقلبى 

واى احساس جوايا 

سافرت 

كان فى استقبالى صديق لبابا 

انكل خيري 

راجل قمة فى المرح 

متجوز وعنده بنت وولد 

كريم وكريمان 

الولد فى المرحلة الابتدائية والبنت بتدرس الحقوق لكن فى مصر 

وبييجوا يزوروا باباهم مع مامتهم فى الاجازات نفس الفترة اللى انا وصلت فيها دى 

ويرجعوا مصر قبل الدراسة بأسبوع 

مراته طنط هدى لذيذة جدا من الشخصيات الحبوبة اللى بتعرف تدخل القلب علطول 

وكانت فى انتظارى مع انكل خيرى 

خيرى.اهلا اهلا بالغالية بنت الغالى 

نورتى الولايات المتحدة كلها 

داليا.اهلا بحضرتك يا انكل 

شكرا جدا واسفة انى تعبتكم معايا 

خيرى.عيب يا دودى اوعى تقولى كده 

احنا هنا بدل ماما وبابا فى مصر 

مش هنسيبك لواحدك ابدا 

ابتسمت من الود الزيادة ده 

هما ميعرفوش طبيعة شخصيتى

طنط هدى. حمدالله على السلامة يا قمرنا 

مبروك يا داليا 

انتى مش متخيلة احنا فخورين بتفكيرك ازاى

داليا بأبتسامة باردة.شكرا يا طنط 

الله يبارك فى حضرتك 

خيرى.طيب يلا بقى على البيت وهناك نكمل كلامنا 

الاولاد مستنيين يتعرفوا عليكي بفارغ الصبر 

وخاصة كاريمان 

من وقت ما عرفت انى عندى بنت صديقى هتدرس فى هارفارد

من افضل جامعات العالم فى دراسة السياسة 

وهى مبهورة بيكي 

انتى عارفة بقى مجتمعنا مش بيسمح لاى بنت بسهولة تدرس برة 

داليا بأبتسامة.لاء يا انكل مش مجتمعنا ولا حاجة 

هى بس معتقدات وتفكير غلط مش اكتر 

اى بنت من حقها تدرس فى المكان اللى تحس انه مناسب لها 

هدى.طيب يلا بينا بقى على البيت 

نكمل هناك 

ركبت معاهم العربية 

واتحركنا من قدام المطار 

على البيت بتاعهم 

بيت هادى جدا برغم انه شيك 

وكل حاجة فيه باين عليها انها غالية 

لكن كان ذوقه هادى جدا

خيرى.اتفضلى يا داليا 

اعتبريه بيتك 

هدى.كاريمان 

تعالى داليا وصلت 

خرجت كاريمان 

بنت عادية 

ملامحها هادية لو مش على درجة عالية من الجمال 

لكن ابتسامتها جميلة 

كاريمان.اهلا اهلا بصاحبة الافكار المختلفة 

داليا بأبتسامة.اهلا بيكي يا كاريمان 

كاريمان بتسلم عليا بود وبتحضنى وكأنها تعرفنى 

وطبيعى هحاول اعمل زيها 

كاريمان.تعالى ادخلى بقى انا مش هسيبك غير لما اعرف ازاى قدرتى تقنعى 

باباكى ومامتك بالفكرة دى 

دخلت مع كاريمان للريسيبشن

وطنط هدى كانت لسه واقفة بقرب باب البيت وجنبها انكل خيرى 

هدى.كاريمان بالراحة على البنت 

دى لسه واصلة من السفر

كاريمان.سيبك منهم بس ياداليا 

هما خايفين انى اقرر انقل دراستى لهنا 

اصل انا من وقت ما عرفت ان انتى جاية تدرسى هنا 

وبابا وماما مبهورين بأن انتى خدتى قرار زى ده 

وانا بفكر اكمل دراستى هنا 

واقعد مع بابا 

داليا.طيب وايه المانع 

ليه اصلا انتم بين هنا وهناك 

وازاى يكون باباكى عايش هنا 

ومتستقروش هنا 

كاريمان.لاء ماهو انتى مش فاهمة صح 

اقعدى بس 

مش هتفضلى واقفة كده 

قعدت على الكرسى 

وقعدت هى على الترابيزة بتاعت الصالون قدامى 

وبتتكلم بمنتهى الحماس 

برغم انى اول مرة اقابلها ونتكلم سوا 

كان اوقات زمان فى الحفلات نتقابل لكن كنا صغيرين 

وزى ما انتم عارفين انى مش بتعامل بعشم مع حد 

علشان كده كنت معرفهاش 

كاريمان.شوفى بقى يا ست داليا 

بابا مش قاعد هنا علطول 

هو كل سنة بييجى يقعد هنا 8 شهور وينزل مصر 4 شهور 

ومش دايما بتكون الفترات متواصلة 

يعنى بيكون سنة هنا وممكن سنة تانية يقضيها كلها فى مصر 

فاهمانى 

علشان كده مش هنعرف نكون مستقرين هنا 

لأن بابا مش حابب الاستقرار بعيد عن مصر وعن قرايبنا واصحابنا 

فبنضطر انه لما بيكون هنا 

وتيجي الاجازة 

نيجي احنا نقعد معاه فترة الاجازة من باب تغيير الجو

لكن مش الاستقرار 

واوقات الاجازة بتاعتنا بتيجى وهو فى مصر 

وبالتالى مش بنيجي هنا بقى 

فهمتينى 

فمعنى انى اقولهم ادرس هنا 

هبقى مضطرة ان بابا موجود هنا او لاء انا عايشة هنا 

وده طبعا هما مستحيل يوافقوا عليه 

ماما بتقولى الاقى مين فى البيت يوجعلى دماغي 

تخيلي

انا فى البيت بس علشان اوجع دماغها 

لقيت نفسى مش لاقية رد على كل الكلام الكتير اللى هى قالته ده 

ابتسمت وانا تقريبا نسيت هى ابتديت الكلام بأيه 

داليا.انا صدعتك باين عليا 

واضح كده ان ماما عندها حق

خيرى.ايه يا دودى 

كوكى صدعتك ولا لسه 

داليا.لا ابدا يا انكل 

انا مبسوطة انى اتعرفت عليها 

خيرى.حبيبتى انتى نورتينا 

شوفى بقى لو تحبى تقعدى مع كوكى فى اوضتها 

هى سعيدة جدا بده 

لو عايزة اوضة لواحدك 

هتكون جاهزة بكرة 

داليا بصدمة.لاء طبعا يا انكل 

انا اكيد مبسوطة جدا بوجودى هنا

لكن سامحونى والله 

انا هبقى محتاجة اكون لواحدى 

ليا طقوس كده 

محدش هيستحملها 

ف استأذن حضرتك لو تساعدنى اشوف بيت مناسب

كوكي.ليه بس يا داليا 

والله انا مش هزعجك على فكرة 

سيبك من انى مسكت دماغك اول ما دخلتى 

انا بس كنت متحمسة اقابلك 

داليا.لاء والله خالص 

مين قالك ان انتى ضايقتينى 

انا بس حتى فى البيت عندنا متعودة ابقى لواحدى طول الوقت 

لكن احنا اكيد هنتقابل بأستمرار لما تكونى موجودة هنا 

خيرى.خلاص يا ستى 

على راحتك طبعا 

بس انا هشوفلك بيت قريب مننا هنا 

علشان يبقى سهل نطمن عليكي

داليا بأبتسامة.خلاص اتفقنا مفيش مشكلة 

هدى.يلا انا جهزت السفرة 

يلا يا داليا يا حبيبتى انا مش عايزة كسوف بقى 

ده بيتك 

داليا.شكرا يا طنط 

بس انا ماليش نفس

هدى بجدية.لاء والله ما يحصل 

ازعل منك 

معنديش انا ماليش نفس والكلام ده 

كوكى.اهى دى بقى اللى مش هتعرفى تهربي منها 

داليا ابتسمت 

خيرى.يلا بقى يا داليا عيب متكسفيش طنط هدى 

دى عاملة اكل مخصوص علشانك 

مش بتعملهولنا غير فى المناسبات 

ضحكت وخرجت معاهم وقعدنا على السفرة 

واكلت كم اكل تقريبا اول مرة اكل بالكم ده 

بس مش علشان كنت جعانه 

لاء علشان انا حسيت بدفا فى بيتهم 

وحب كده 

انا معيشتهوش 

علاقتهم ببعض حلوة جدا 

وطبيعية 

انا مشوفتش كريم لأنه فى التمرين 

لكن علاقتهم مع كوكى 

كانت علاقة صداقة 

هزارهم وضحكهم وحتى مناقشاتهم مع بعض مرحة جدا

اليوم ده انا نمت معاهم فى البيت لكن كوكي نامت مع كريم علشان تسيبنى براحتى 

يوم ما وصلت 

وبعد الغدا 

هدى.بقولك ايه يا دودو انتى بقى تقومى تاخدى دش

وترتاحى شوية 

واصحيكي على العشا 

داليا.لاء يا طنط عشا ايه 

انا مش بتعشى 

انا فعلا محتاجة اناااام 

هدى.خلاص يا حبيبتى على راحتك 

وانتى يا كوكى ادخلى نامى النهاردة مع كريم 

علشان داليا تبقى براحتها 

كوكى.بس كده سيادة السفيرة تؤمر دى هتكون الواجهة المشرفة بتاعتنا

داليا بأبتسامة.سفيرة مرة واحدة 

لسه بدرى 

كوكي.لاء اكيد هتكونى سفيرة انا واثقة 

خيرى.خلاص يا كوكى قومى طلعى لداليا هدوم من عندك تنام بيها 

علشان لسه البواب مطلعش الشنط بتاعتها 

وانا يا داليا بكرة هكون مخلصلك موضوع الشقة 

المهم لحد ما ده يحصل 

تعتبرى نفسك فى بيتك 

اكيد طبعا احنا مش ماما وبابا 

بس اعتبرينا مكانهم 

داليا.اكيد يا انكل طبعا

(كان نفسى اقوله انهم فعلا مستحيل يكونوا زى ماما وبابا)

دخلت اخدت دش دافى 

وغيرت هدومى لأول مرة البس هدوم مش بتاعتى 

ونمت 

وكأنى بقالى سنة منمتش 

محسيتش بنفسى ولا بأى صوت فى البيت 

مش عارفة هما كانوا هاديين 

ولا انا اللى روحت فى النوم لدرجة انى محسش بحاجة 

فاتت اول ليلة 

وصحيت الصبح 

اول ما فتحت عينى 

استغربت المكان 

ببص حواليا 

وانا شايفة مكان جديد غير اوضتى 

قومت قعدت على السرير 

بحاول افوق نفسى 

وافتكرت انى مش فى بيتى ولا فى مصر كلها 

وانى ضيفة من امبارح على بيت اصحاب بابا 

قومت من على السرير 

سرحت شعرى ودخلت غسلت وشى 

وخرجت للريسيبشن 

كانت طنط هدى قاعدة 

وكاريمان جنبها بيتكلموا 

وقاعد على الارض كريم 

طفل زى القمر 

داليا.صباح الخير 

هدى.ياصباح الورد والفل 

كوكى.ناموسيتك بمبى

هدى.ايه يابنت السوقية دى 

كوكي.لسه يا ماما مبقيتش سفيرة هى 

وبعدين معتقدش ان داليا يعنى من الناس الرخمة دى 

بتاعت السوقيين والاتيكيت 

داليا.خليها براحتها ياطنط

هدى.كريم تعالى حبيبى سلم على ابلة داليا 

كوكى.ابله داليا 

ايه ده بقى يا ست ماما 

انا اكبر منها وبتسمعيه يقولى يا هانم ويا بنتى 

ومش بتقوليله يقولى يا ابلة

هدى بتضحك.معلش ما انا قررت اربيه بقى من دلوقتى 

داليا.لاء يا طنط مش لدرجة ابلة 

ده انا كل اللى عندى 17 سنة 

كريم قام من قدام التليفزيون.ازيك يا سفيرة 

داليا.هههه سفيرة 

انت عرفت منين الكلمة دى 

كريم.ماما وبابا قالوا احنا جاي عندنا ضيفة هتبقى سفيرة 

داليا بتضحك.لسه بدرى والله 

انا بقى يا استاذ كريم 

اسمى داليا 

يعنى ولا ابلة 

ولا سفيرة 

اتفقنا 

كريم بأبتسامة بريئة.خلاص اتفقنا 

بس مش هقولك يا هانم بقى زى ما بقول لكوكى 

علشان انا مؤدب 

كوكى.وماله يا سى كريم 

مش هكسفك قدام الضيفة 

هدى.ابنى حبيبى مؤدب مالكيش دعوة انتى 

داليا.وانت بقى فى سنة كام يا كيمو

كريم.انا بقى فى سنة اولى ابتدائى يا داليا 

داليا.ياااه ده انت صغنن خالص 

خلاص نبقى نذاكر سوا بقى 

كريم.لاء انا باجى هنا فى الاجازة بس 

مش بيكون فيه مذاكرة 

داليا.ايه ده ياكريم 

هو انت بتذاكر ايام المدرسة بس

كريم.لاء انا بذاكر ايام الامتحان بس 

هدى.هههه

شايفة المستقبل 

يلا بقى انا هقوم احضرلك الفطار 

داليا.هو انكل خيرى فين بدرى كده 

كوكى.بابا راح يشوفلك الشقة

تقريبا البواب قاله ان فيه شقة فى العمارة اللى بعدنا 

راح يبص عليها 

داليا.طيب كويس اوى 

فعلا فات شوية وقت 

وطنط هدى حضرتلى الفطار 

فطرت لواحدى لانهم صاحيين من قبلى 

ورجع انكل خيرى 

وبلغنى انه شاف شقة مناسبة ليا 

وقريبة منهم 

وروحت معاه انا وكوكى شوفناها 

وفعلا كانت جميلة جدا

لكن اصروا انى اتغدا معاهم الاول 

وبعدين اروح استلم الشقة 

خلص انكل خيرى كل حاجة تخص ايجار البيت 

وتقريبا ساعدنى فى كل حاجة تخص الكلية 

لحد ما بقيت اخيرا طالبة فى جامعة من اهم الجامعات 

احيانا كانت طنط هدى تبعتلى الاكل بتاعى فى الشقة 

واحيانا كانوا بيصمموا انى اروح اقعد معاهم شوية 

واوقات كانت كوكى تيجي تقعد معايا 

وتتكلم وتحكيلى وكأنها تعرفنى من سنين 

كنت بسمعها وبتجاوب معاها 

لكن فى نفس الوقت مش عارفة اشوفها صاحبتى 

كان اوقات كريم ييجى معاها 

واوقات تيجي لواحدها 

فترة الاجازة كانت مش طويلة 

لكن محسيتش بأى اشتياق لمصر ولا لبيتى ولا لماما وبابا 

ولا حتى دادة 

خلاص سافرت طنط هدى وكوكي وكيمو 

وانا ابتديت دراستى 

اللى من بدايتها كانت محتاجة تركيز وجدية 

واهتمام 

بابا كان علطول بيبعتلى مصاريفى مع انكل خيرى 

وبصراحة كان مش بيبخل عليا ابدا

وكمان انكل خيرى لأنه كان متعود يطلب اكل لنفسه او اوقات يعمل بأيديه لما بيكون مش مضغوط فى الشغل 

يبعتلى مع البواب 

واوقات كان بييجى بنفسه 

ونتغدا سوا 

ويطمن على الدراسة وظروفى فى الكلية 

اللى كان اهتمامى بيها اكبر من اهتمامى بأى حاجة تانية فى الدنيا 

وده  خلانى مميزة كعادتى فى دراستى 

يتبع

توقعاتكم

وهخلصها النهاردة زى ما اتفقت معاكم

المغرورة

الفصل الخامس

فكرة ان انا اول حاجة ماما تسألنى عليها الهدايا 

خلتنى فى نفس اللحظة اخد قرار محسوم مش محتاج نقاش 

انا مش هنزل مرة تانية فى الاجازة 

داليا بأبتسامة كدابة.متقلقيش يا ماما 

كل حاجة حضرتك كنتى بتطلبيها جايباها 

ماما.لالا تعالى بس نفتح الشنط نتفرج 

بابا.طيب استنى يا استاذة 

خلى البنت ترتاح شوية 

ماما.ترتاح من ايه بس 

هى جاية مشى يا دكتور 

دى قاعدة مرتاحة فى الطيارة 

ومن باب المطار لهنا فى العربية 

متشغلش انت بس بالك بينا 

لو مش عايز تتفرج 

خلاص خليك 

يلا بقى يا دودو 

كان نفسى حتى تسألنى اذا كنت عايزة انام 

او جعانة 

او تعبانة 

حتى لو مخدتنيش فى حضنها 

بس اى سؤال من اللى طنط هدى سألتهملى او اخدت بالها منهم من اول مرة قابلتنى فيهم 

داليا.طيب يا ماما 

بصى الشنطة البنى اللى جنب الباب دى هى اللى فيها كل الحاجة اللى حضرتك طلبتيها 

بس معلش بقى انا مش هقدر اتفرج معاكى 

لأنى محتاجة انام جدا

ماما.خلاص يا حبيبتى ادخلى انتى نامى براحتك 

انا كده كده خارجة كمان شوية 

واكيد بابا كمان رايح العيادة 

يعنى مش هنزعجك

داليا بأحباط.طيب ماشى 

دخلت اوضتى 

اللى بالظبط زى ما سيبتها 

متغيرش فيها اى حاجة 

هادية ومملة كعادتها 

مفيش فيها روح 

كئيبة زيي 

وزى بيتنا كله 

اخدت شنطة من الشنط بتاعتى 

وكانت اصغر شنطة 

طلعت منها بيجامتى 

ودخلت اخدت دش 

وخرجت على النوم 

وبرغم انى كنت جعانة وانا فى الطريق 

الا انى لقيت ان النوم احلى بكتير من انى اكل بعد الفترة دى كلها فى بيتنا لواحدى 

نمت لحد تانى يوم 

نمت كتير جدا 

وصحيت ملقيتش حد فى البيت 

دخلت حضرت لنفسى اكل 

وقعدت فى اوضتى اكلت لواحدى 

وبعد ما خلصت اكل وطلعت الصنية ورجعت اوضتى تانى 

سمعت صوت الباب بيتفتح 

وطبيعى ماما او بابا اللى رجعوا 

لكن انا قررت انى اعمل نايمة 

قفلت منهم للدرجة اللى تخلينى مش عايزة اشوفهم 

او حتى اسمع صوتهم 

وكلامهم اللى بيستفزنى 

حرفيا اجازتى خلصت بالشكل ده 

طول ما هما فى البيت انا نايمة او عاملة نايمة 

هما برة البيت انا باكل وبتفرج على التليفزيون 

وبقعد اقرأ شوية 

بسلي نفسى 

الغريب ان فات اسبوع من اجازتى 

محاولوش يطمنوا عليا 

او يصحونى يتكلموا معايا فى اى حاجة 

لاء خالص 

ماما او بابا يرجعوا ممكن يقفوا على باب اوضتى وينادوا عليا 

اول ما برد عليهم ويتأكدوا انى مش مغم عليا 

اسمع ردهم 

خليكي نايمة يا حبيبتى انا بطمن عليكي بس

طيب اطمنوا ازاى بالشكل ده 

مش يمكن اكون تعبانة او فيه حاجة وجعانى او مش قادرة اقوم من على السرير 

هو انا لازم يكون مغم عليا علشان اكون عيانة بجد

لكن عموما عادى يعنى 

مش فارق 

لكن بمجرد ما فات اسبوع 

من اجازتى بنفس الشكل ده 

انا خدت قرار 

وهو انى هسافر تانى 

مش بس كده انا مش هسيب اليوم يفوت غير لما اكون حاجزة تذكرة العودة 

وفعلا ده اللى حصل 

صحيت من النوم 

غيرت هدومى ونزلت علطول على شركة الطيران 

وحجزت على طيارة تانى يوم 

رجعت البيت الحاجة اللى طلعتها من شنطتى الصغيرة رجعتها مكانها تانى 

والطقم اللى دخلت بيتنا بيه 

هو نفسه اللى سافرت بيه علشان مضطرش انى افتح شنطة تانية من شنطي 

الموضوع كان مش مستاهل 

جهزت كل حاجة هحتاجها بمنتهى السهولة لأن حاجتى اللى جيت بيها زى ما هى 

وقررت انى ابلغهم بأنى مسافرة 

لكن اليوم ده لحد ما نمت كانوا مرجعوش 

محسيتش بيهم لما وصلوا 

ومعرفش سبب تأخيرهم 

حتى لما صحيت الصبح 

كانوا مش موجودين 

اه احنا فى اجازة لكن ماما كل يوم لازم تروح النادى 

تجرى شوية مع صحباتها 

علشان تحافظ على رشاقتها طبعا 

لحد قبل ميعاد طيارتى كنت مستنية حد منهم يرجع 

لكن محدش جه 

وعلشان كده قررت اكتبلهم جواب 

داليا.بابا/ماما

معلش اضطريت انى اسافر 

كلمونى من الجامعة 

وعرضوا عليا وظيفة كويسة 

كنوع من انواع التدريب 

ودى مش بتحصل كتير خاصة مع العرب 

لكن انا حصلت على الفرصة دى بسبب تفوقى 

كان نفسى اقضى معاكم الاجازة كلها 

بس معلش بقى 

اكيد حاجة زى دى هتفرحكم زى ما فرحتنى 

وياريت يا بابا تبقى تبعتلى فلوس زيادة لأنى هخرج كل يوم واكيد هحتاج مصاريف 

شغلى هيكون بمثابة التدريب 

يعنى مفيش مقابل منه 

اشوفكم على خير 

ودى كانت اخر مرة اشوف بيتنا لمدة 7 سنين 

رجعت تانى 

وكملت اجازتى مع طنط هدى وكريم وككى وانكل خيرى 

اللى كانوا ميعرفوش عني تفاصيل كتير 

غير ان العلاقة فيها ود واحترام للخصوصيات

اتعودت عليهم 

لكن مش عارفة اذا كنت حبيتهم ولا لاء 

كنت بحب اسمع حكاياتهم 

لكن مش بتكلم عن نفسى

وكانوا محترمين ده فيا 

الا احيانا كنت ممكن احكى على مواقف حصلت معايا فى الكلية 

او انى اتناقش فى اى مواضيع سياسية 

كوكى كانت شاطرة جدا فى دراستها 

انا كريم على قد ما انا مش بحب الاطفال 

الا انه كان بالنسبالى طفل ظريف 

كانت بتفوت الايام

وتخلص الاجازات 

وترجع الدراسة 

احيانا كان بيسافر انكل خيرى 

وبقضى الاجازة لواحدى 

بس انا كنت علطول حتى فى الاجازات مشغولة بدراستى 

بنجح بتقديرات وببدأ فى دراسة مناهج الترم التانى من وقت الاجازة 

بابا مبطلش يبعتلى مصاريفي 

وماما مبطلتش تطلب الحاجات اللى بالنسبالها مميزة خاصة انها جاية من امريكا 

فاتت سنين الدراسة بسرعة 

ولأنى كنت حابة الدراسة 

محستش ان الفترة طويلة 

خلال الدراسة كلها 

مصاحبتش اى حد 

ولا كان ليا اى علاقة بأى حد 

وطبعا الاجانب مميزين جدا 

مش بيفرضوا نفسهم على حد 

كل سنة كانت عائلة انكل خيري بيتغير فيها حاجة 

يا اما مش بييجوا لوجود انكل فى مصر 

او كوكى بتعمل الدراسات العليا بتاعتها 

او بييجوا من غير كوكى لأنها استلمت شغل كويس 

واخيرا كوكى اتخطبت واتجوزت 

خلصت دراستى واشتغلت فى الجامعة 

7 سنين دراسة وشغل 

بابا وماما مش بيشوفونى 

بينى وبينهم جوابات تقليدية 

مش عارفة ازاى مش وحشاهم 

فى جواب من الجوابات بلغنى بابا انه عرف ان دادة اتوفيت 

زعلت عليها وافتكرت مواقفها الحلوة معايا 

لكن خلاص الزعل كان بمجرد ما مر قدام عينى مواقفي معاها 

وده مخدش ساعة زمن 

والعقد الخاص بشغلي خلص

واخيرا 

نزلت مصر تانى 

بعد 7 سنين 

عندى 24 سنة 

واللى كان فى استقبالى المرة دى فى المطار 

كوكى اللى كانت حامل فى اول طفل ليها 

وكريم اللى بقى عنده 13 سنة 

وطنط هدى 

اصل بابا وماما كانوا ميعرفوش انى راجعة 

مش علشان افاجئهم لاء خالص 

بس بصراحة مش حابة اندم على رجوعى من على باب المطار 

اصرت طنط هدى اننا نتغدا سوا 

وقعدت معاهم واتكلمنا عن شغلى 

كوكى.ناوية على ايه بقى يا داليا 

داليا.اكيد هشتغل طبعا هكون ناوية على ايه 

كوكى.ايوة يعنى لسه هتقدمى ولا انكل عنده ناس تقدر تساعدك 

ولا تحبى اشوفلك انا 

داليا بثقة,لالا متقلقيش يا كوكى 

انا معايا جواب تعيين من الجامعة 

فى سفارتهم هنا 

يعنى مش هحتاج انى ادور لسه 

طنط هدى.برافو يا داليا 

بصراحة انتى عملتى اللى فيه رجالة معرفوش يعملوه 

واكيد هيكون ليكي مستقبل فى شغلك لا يستها به 

بس المهم بقى عايزين نفرح بيكي

كريم.تفرحوا ايه تانى يا ماما 

ما هى خلصت الجامعة 

واشتغلت كمان هناك 

وجاية تشتغل هنا فى سفارة اجنبية 

هو مش كل دى حاجات تفرح ولا انا غلطان؟

هدى.لاء طبعا حاجات تفرح جدا

بس هى لسه ناقصها حاجة مهمة 

داليا بأستغراب.حاجة ايه يا طنط 

هدى.تتجوزى يا داليا 

مش هتفضلى دراسة وشغل طول عمرك 

انتى داخلة على ال25 سنة 

داليا.لاء يا طنط 

ده موضوع حاليا مش فى بالى خالص 

انا عندى حاجات اهم من كده بكتير 

انا مخلصتش دراستى والماجستير والدكتوراه فى اقصر فترة ممكن يكون حد خلص فيها دراساته العليا 

علشان فى الاخر اروح اتجوز واحد معاه بكالوريوس هندسة 

ولا لسه متخرج من كلية الطب وهيشتغل بواسطة باباه ولا مامته 

كوكى.بلاش بس تخلى الوقت يسرقك يا داليا 

لما تجيبى اطفال وانتى لسه صغيرة 

احسن ما تكبرى فى السن 

مش هتكون عندك الطاقة اللى موجودة عندك فى السن اللى انتي فيه حاليا 

داليا.بقولك ايه يا ست كوكي 

خليكي انتى بس فى بطنك دى 

وجوزك 

وسيبينى انا بقى لشغلى الجاى

كريم.شاطرة يا داليا 

صح ان انتى تعيشى حياتك بدل ما تعملى زى كوكي كده 

وتبقى مش عارفة تشتغل ولا ترتاح فى البيت لانها تعبانة 

هدى.ولد يا كريم انت ايه اللى دخلك فى كلام زى ده 

انت راجل عيب تدخل فى كلام البنات 

كريمزمش بتدخل يا ماما انا بس بقول رأيي من خلال اللى انا شايفه 

داليا.متقلقش يا كيمو 

انا على مبدائي 

المهم بقى 

انا خلاص موجودة هنا علطول 

وقت ما تحتاج مني اى حاجة هتلاقينى 

اعتقد هنا فيه دراسة 

مش اجازات بس زى هناك 

يعنى انا مستعدة اذاكرلك اى وقت 

كيمو.اه طبعا اكيد 

وبعدين يعنى انا اطول ان سيادة السفيرة هى اللى تذاكرلى 

داليا بأبتسامة.ياااه برضه سفيرة 

لاء لسه بقى يا كيمو 

واضح انى مش هبقى سفيرة غير بعد ما انت تخلص دراستك 

انا كده كده مش مستعجلة 

بس دلوقتى بقى مستعجلة انى امشى 

لأنى عايزة اناااااااام

هدى.اه معلش بقى اخدناكي من بابا وماما 

وعطلناكي 

بس انتى كنتى وحشانا 

وعايزين نشوفك 

وقولنا فرصة قبل ما تنشغلي

كيمو.لاء انا ماليش دعوة بقى بأنك هتنشغلى انتى اتفقتى هتذاكريلي

داليا.اكيد طبعا يا كيمو 

وبعدين يا طنط متقلقيش 

ماما وبابا انا بعرف اديلهم حقهم كويس بوجودى معاهم 

يعنى مش هخليهم يضايقوا

هدى.خلاص بقى يبقى احنا كل ما تكونى فاضية 

لازم نتقابل ونقضى شوية وقت مع بعض 

احنا اتعودنا عليكي

داليا.وانا كمان والله 

على فكرة انا كل السنين دى 

وماليش علاقة بأى حد من بعد بابا وماما غير بيكم بس 

انا مش بحب اختلط بالناس 

كوكي.اه اخدنا بالنا من زمان 

علشان كده مش بنحب نغلس عليكي 

ونسألك كتير عن حياتك 

لكن احنا بنحب نقعد معاكي 

داليا.وانا ده بحبه جدا 

فكرة احترام الخصوصية دى مش اى حد بيقدرها 

وبعدين اكيد احنا نثبت يوم نتقابل فيه 

بس اظبط مواعيد شغلى الاول 

واعرف دنيتى هتمىشى ازاى 

ومعاكم بعد كده وقت ما تقرروا 

خلصنا مقابلتنا 

ورجعت على البيت 

وكانت مقابلة اول مرة تكون فيها حرارة 

اه طبيعي 7 سنين مش فترة بسيطة ابدا 

وكانت هتبقى صعب انها تكون بنفس برود اول اجازة

برغم انهم كان عندهم القدرة على انهم ييجوا يزورونى 

لكن كسلوا 

مش مهم 

ماما وبابا قابلونى بأشتياق نوعا ما 

وقعدنا مع بعض شوية 

وسألونى على كل حاجة تخص الشغل سواء فى الجامعة او شغلى اللى هستلمه فى مصر 

وبعد ما خلصنا كلام 

دخلت استسلمت للنوم 

وصحيت تانى يوم نزلت السفارة بورق التعيين 

وخلال اسبوع كنت على مكتبى 

طبعا تقدير واهمية للكوادر حاجة فعلا قليل اوى لما بتحصل فى مؤسسات مصرية 

لكن الاجانب بيقدروا الشغل بمعنى الكلمة 

نجحت فى شغلى 

وتقدروا تقولوا ان الناس اللى كانت بتشوفنى بتقول انى كل ما بكبر كل ما بحلو 

وانا عارفة ده فعلا 

انا اهتمامى بنفسى و فخرى بأنى وصلت للمراحل دى فى الفترة البسيطة دى 

بالنسبة لمجالى 

خلتنى بهتم بمظهرى وشكلى بشكل اكبر بكتير من زمان 

وبطبيعة الحال بقى 

كل يوم والتانى بقى ييجى عريس 

مش عارفة اعد هما كانوا كام 

لكن اعتقد ان مفيش بنت رفضت كم العرسان اللى انا رفضتهم 

احيانا فى الاسبوع كان ممكن يزورنا اكتر من 3 اسر بأولادهم 

مناصب تشرف زى ما ماما وطنط هدى كانوا بيقولوا 

لكن طبيعي الجواز مش هيتم غير بموافقتى 

وانا لسه مش حاسة ان اللى انا ممكن اقبله حد من اللى اتقدمولى 

علاقتى بطنط هدى وكوكى اللى خلفت طفل واتنين 

كويسة زى ماهى 

علاقتى كريم اللى بيكبر 

كل يوم وعقله بيكبر فى اليوم سنة 

كانت تقريبا صحوبية 

اه كنت بذاكرله 

وبرغم فرق السن 

الا انه كان تفكيره اكبر بكتير من سنه 

كان متفوق فى دراسته 

وفات فى لمح البصر 

6 سنين 

كوكى تفرغت لبيتها 

كيمو فى كلية طب 

شاب رياضى 

19 سنة 

بنتقابل كتير

طنط هدى قليل لما بشوفها بسبب انها تعبت صحيا 

اما ماما بقى طلعت على المعاش 

وبقيت فاضية علطول 

وده خلانى تقريبا بشوفها صدفة لما بروح النادى 

بقيت تقعد فيه اكتر من الاول 

وبابا كعادته مهتم بشغله 

وانا وصلت لل30

يعنى السن ده بالنسبة لأى عريس من اللى كانوا مناسبين زمان 

بقى صعب 

اصبحت فئة العرسان اللى بتتقدم 

ارمل ومعاه اطفال 

او اكبر مني بكتير فى السن 

او حتى وظيفته او مؤهله الدراسى مختلف عني تماما 

وكالعادة انا كتير على اى حد منهم

بابا وماما حاولوا كتير يقنعونى بأنى لازم اوصل لأنى اكون اسرة 

لكن اللى عيشته وسط اسرتى 

كان سبب كفيل انه يكرهنى فى الفكرة 

لكن الغريب بقى 

كان كريم 

اللى بقى اوسم شاب ممكن تتوقعوا ان انتم تشوفوه 

شرقى بتفكير اوروبى متحضر 

وفى نفس الوقت فيه عادات بيحافظ عليها 

مجتهد 

متفوق 

وصديق مناسب جدا

بعد ما كل حد انغمس فى مشاغله 

بقى كريم هو الشخص الوحيد اللى بنتكلم وبنتقابل انا وهو 

وصلت لمرحلة ان خلاص مفيش عرسان بتتقدم 

وده كان مش شاغلنى 

اه انا دخلت فى مرحلة ال30 سنة 

لكن ملامحى ومظهرى مختلفش للحظة 

كريم.بقولك ايه يا داليا 

عايز اتكلم معاكى فى موضوع 

داليا.ايه يا كريم 

قلقتنى 

فى ايه 

كريم.بصى ا نا عارف ان انتى هتستهترى بكلامى 

لكن اللى هقوله ده 

انا مقتنع بيه جدا 

وواثق منه كمان 

انا بحبك 

يتبع

هكملها لو اتأخرت فى الكتابة هينزل اخر جزء الصبح

تسلموووولى ياحلوين

المغرورة

الفصل السادس

مش هكدب عليكم 

وبرغم ان انتم توقعتم ان ده يحصل 

لأن سنى بيكبر وفرصى بتقل 

زى ماما ما قالتلى 

لكن انا مكنتش متوقعة خالص ان كريم يقول حاجة زى دى 

ازاى اتوقع 

ده الطفل اللى يوم ما قابلته اول مرة وانا رايحة اولى جامعه 

كان هو لسه فى سنة اولى ابتدائى 

وعلشان كده كلمته حرفيا صدمتنى 

داليا بذهول.بتقول ايه يا كيمو 

كريم بجدية.بصى يا داليا 

لو شايفة ان انتى هتقولى كيمو بقى والكلام اللى بتوضحيلى فيه انى صغير 

او عايزة تورينى انتى بتتعاملى معايا على اى اساس 

ف انتى مش محتاجة ده 

داليا.اومال ايه بقى اللى انا محتاجاه

ايه يا كريم 

انت شوفت نفسك طولت شوية 

وصوتك تخن 

فقررت ان اول التجارب اللى تقرر تعيشها تبقى انا 

انا بقولك كيمو 

علشان اوضحلك انى شايفاك الطفل اللى انا شوفته من وهو لسه رايح المدرسة 

فى الوقت اللى لو كنت قررت اتجوز فيه 

كان زمان اولادى سنهم مش بعيد عن سنك 

انت فاهم 

كريم.لالا 

الكلام ده مش بتاعى وانتى عارفانى كويس يا داليا 

انا لا من النوع اللى بجرى ورا البنات 

ولا بدور على علاقات 

وانتى اكتر واحدة عارفة طريقة تفكيرى 

لو على البنات 

ماهما كتير جدا

سواء فى الكلية او فى النادى او فى اى مكان ممكن اكون فيه 

لو مجرد تجربة عايز اعيشها 

اكيد مش هتكونى انتى 

داليا.كريم 

حبيبى 

اللى بتفكر ده مستحيل يحصل 

كريم.علشان فرق السن يعنى 

داليا.مش بس علشان السن يا كريم 

انا مش هعرف اشوفك زى ما انت شايفنى او واهم نفسك بأنك شايفنى بصورة معينة 

انت تلميذى 

اخويا الصغير 

اى حاجة غير انك تكون راجل فى حياتى بينى وبينه علاقة 

كريم.بصى يا داليا 

انا مش تلميذ 

ولا انا اخوكى صغير او كبير 

بس انا بحبك 

وخليكى واثقة ان ده احساسى 

ومش مراهقة ولا مجرد انى اتعلقت بيكي بسبب ان انا الشخص الوحيد اللى انتى سايباه فى حياتك 

او قبلتى دخوله لحياتك 

وبراحتك بس بلاش ترفضى احساسى او بلاش تخرجينى 

داليا.خلاص يا كريم 

اللى هقوله علشان انا مش حابة اطلعك من حياتى 

هو ان انت اوعى تفكر تتكلم معايا فى الموضوع ده مرة تانيه 

واحساسك ده 

تحتفظ بيه لنفسك 

وتنساه بالتدريج 

علشان مستحيل علاقتنا تختلف عن الشكل اللى هى فيه 

مفهوم 

وبلاش تضطرنى لتصرفات ممكن تبقى مش لطيفة 

كريم بثقة.طيب يا داليا 

اوك 

مفيش مشكلة 

بس انا مش هيأس

خلصت مقابلتى مع كريم اليوم ده 

وانا مستهيفاه جدا 

بقى معقول ده كريم 

الولد اللى انا بيعجبنى تفكيره وذكائه 

معقول مراهق للدرجة دى

لقيت نفسى بقول من جوايا

اه طبعا مراهق 

ليه لاء 

هو ده السن اللى مشاعره فيه بتكون مش مستقرة 

طيب ليه انتى ياداليا لغيتي المرحلة دى من حياتك

ليه مجربتيش وانتى فى السن ده تسمحى لمشاعرك انها تحركك

ايه الغباء ده 

انتى هتخرفى ولا ايه 

مشاعر ايه 

وانتى منين تعرفى معنى المشاعر اصلا 

دخلت اوضتى 

وقفت قدام المرايا 

وشوفت نفسى 

واحدة ست 

مش بنت زى اللى كنت بشوفها من كام سنة 

اه انا جميلة وسنى مش باين عليا 

لكن ده ميمنعش ان روح سن الشباب اللى جوايا ابتديت تختفى 

اه انا طول عمرى عاقلة 

ومش متهورة 

لكن كمان كانت نظرتى لنفسى زمان 

فيها تفاؤل وتخطيط للى جاى 

اول مرة ابص فى المرايا 

واحس انى وصلت للى انا عايزاه بسرعة اوى 

يمكن فى السن ده كان المفروض ابقى لسه موصلتش للمرحلة دى 

ولسة قدامى شوية وقت علشان احقق نجاحى اللى تقريبا وصلت لأقصاه

فى حياتى المهنية 

معقول انا اعيش قصة حب 

لاء طبعا 

مستحيل 

حب ايه 

هو فيه حد بيحب حد بجد اصلا 

وبعدين انا عايزة حد يحبنى بطريقتى انا 

حد يعيش ليا لواحدى 

مينفعش يشوف غيري ولا عنيه تلمح ست تانية فى وجودى او بعدي 

لالا يا داليا فوقى لنفسك 

انتى عايزة تحبى وتعيشى مع راجل وتتجوزيه 

وفى الاخر تبقى علاقتك بيه شبه المديرة والدكتور 

واجيب اطفال مملة 

واسيبهم لدادة تربيهم لاء مستحيل 

بعدت التفكير فى الموضوع ده عن بالى خالص 

وحاولت انسى كلام كريم 

علشان اقدر اكمل علاقتى بيه 

بقيت اعيش ايامى بطبيعتها 

بس مش عارفة ليه بقيت اهتم بنفسى اكتر 

ماما.داليا انتى صاحية 

داليا.اه يا ماما اتفضلى 

دخلت ماما اوضتى ودى من المرات القليلة 

اللى اكيد وراها حاجة 

ماما.عايزاكى فى موضوع 

داليا.ماما انسى موضوع الجواز ده 

انا مش هقابل حد تانى 

ماما.لاء يا داليا 

انتى مش صغيرة خلاص

دى حياتك وانتى حرة فيها 

انا مفرضتش عليكي حاجة زمان علشان افرض عليكي حاجة دلوقتى 

بس انا جاية ابلغك بموضوع مهم 

داليا.فى ايه يا ماما 

غريبة يعنى 

ماما.انا وبابا قررنا ننفصل يا داليا 

داليا بصدمة.نعم 

تنفصلوا يعنى ايه 

تطلقوا يعنى 

ماما.اه يا داليا هى مالهاش معنى تانى 

داليا.ليه يا ماما 

انتم طول عمركم بتحترموا بعض 

ومفيش بينكم مشاكل 

ماما.وانا خلاص يا داليا زهقت من الملل ده 

وعايزة احس انى مكبرتش 

داليا بصدمة.نعم 

يعنى ايه مش فاهماكى 

ماما.ايوة يعنى انا فى المرحلة دى من عمرى 

حسيت انى خلاص ماليش لازمة 

عجزت 

وانا مش حابة الاحساس ده 

وباباكى من زمان وهو مش محسسنى بوجودى من اصله 

لكن كنت بقول ماشى 

شغلى وكل حاجة فى حياتى شغلانى عن وجوده معايا 

لكن انا فى الوقت اللى انا فيه ده 

عايزة احس بوجود راجل فى حياتى 

داليا.راجل ايه يا ماما 

انتى بتقولى ايه 

انتى عارفة انتى عندك كام سنة 

ياماما انتى فى سن الاجداد

يمكن لو قولتى ده زمان 

كان ممكن يبقى فيه مبرر 

لكن دلوقتى ازاى يعنى 

وهنا ماما رديت عليا الرد اللى خلانى اتمنى ان الست دى متكونش امي 

ماما.بصى يا داليا 

انا وبابا خلاص اتفقنا على الانفصال 

لأن انا مسافرة 

وهو موافق بأحترام 

خاصة ان الموضوع هيتم بهدوء علشان الشوشرة والكلام 

داليا.انتم كمان متفقين 

وعايزة تسافرى 

ليه وفين 

وامتى كل القرارات دى وانا فين منها 

ماما.بصى يا داليا 

انا اتعرفت على شخص فى النادى 

لكن هو شغله كله فى ايطاليا 

ووجودنا مش هينفع هنا 

علشان الشكل الاجتماعى ليا ولباباكى وليكى انتى كمان 

داليا وعنيها على اخرها مفتوحة من الصدمة.شخص

ووجودك معاه 

وشكل اجتماعى 

لاء يا ماما 

اللى بتقوليه ده اسمه تخريف

ماما.داليا حافظى على اسلوبك معايا فى الكلام 

انا مفرضتش عليكي تتجوزى او لاء 

وسايباكى عايشة بمنتهى الحرية 

مش هتيجى انتى دلوقتى تحجرى عليا