انتقام شيطاني بقلم هنا عادل الفصل الاول حتي الفصل الحادي عشر والاخير كامله على مدونة النجم المتوهج للروايات

انتقام شيطاني

بقلم هنا عادل 

الفصل الاول حتي الفصل الحادي عشر والاخير 

كامله على مدونة النجم المتوهج للروايات 

الامراض النفسية والاكتئاب في احيان كتير بتكون سبب فى وصول اصحابها لمراحل متأخرة جدا قد تصل الى الانتحار 

ولتكن المرحلة التى تسبق الانتحار هى الهلاوس والتهيؤات 

وفي تلك القصة التى تخرج عن لسان طبيب نفسي معالج لحالات بطرق علاجية جديدة سنتعرف على احدى الحالات التى اصابته هو شخصيا بالأكتئاب مما جعله يعتزل مهنته ويتفرغ فقط لدراسة الظواهر الغامضة وقرر ان يروي لنا احداث تجربته مع جمال وهو اهم واخر حالة تعامل معها 

الفصل الاول 

انتقام شيطانى 

صاحب حكايتنا النهاردة 

هو جو او يوسف هو اللى هيحكيها 

وهيكلمنا عن حالة خاصة جدا

جو 

مصري بريطاني 

من اب مصرى وام بريطانية 

كان بيعيش بين مصر وبريطانيا 

من بداية ولادته لحد ما توفى والده 

رجع مع امه لموطنها الاصلى 

ودراسته كلها كانت هناك 

كان من الطلبة المتفوقين من بداية دراسته 

كبر جو وكان متطلع جدا وعنده فضول دايما لكل جديد وغريب 

كان بيحب الدراسات الصعبة المعقدة

وده كان اهم الاسباب اللى تخليه ياخد قرار دراسته للطب النفسى 

وهنا هيبداء جو يعرفنا عن نفسه.اسمى يوسف سراج 

ابويا من اصل مصرى 

والدتى اسمها ماري من اصل بريطانى 

مسلم الديانة 

كنت بروح مصر زيارات لكن حياتى كلها كانت فى بريطانيا 

تفوقت جدا فى دراستى 

ولأنى كنت بحب كل حاجة غامضة 

لما وصلت للدراسة الجامعية 

اخدت قرار انى ادرس الطب النفسى 

واحاول الاقى طرق مختلفة للعلاج 

وخاصة الحالات المعقدة 

لأن دى كانت اكتر حاجة بتستفزنى 

انى اوصل لحلول الحاجات والحالات الصعبة 

فى وقت من الاوقات كنت بفكر كتير اشتغل محقق 

لكن حسيت ان المرض النفسى اهم بكتير بالنسبالى عن انى احقق فى جريمة واوصل لسببها 

فى كل الاحوال

هتكون خلاص الجريمة حصلت

لكن الطب النفسى 

وفضولى هيكون سبب فى انى اقدر اساعد اشخاص 

لسه موصلوش للمرحلة اللى يخسروا فيها حياتهم 

وده بالنسبالى كان اسمى واهم بكتير 

وفعلا دخلت كلية الطب 

واتخصصت فى الطب النفسى 

درست كل جوانب المنهج 

وابتديت اشتغل على طرق علاجية جديدة غير المعروفة والمقررة واللى بيتشهر بيها اى طبيب نفسي 

كنت مش مجرد دكتور بيقعد على كرسى ورا مكتب ونايم على الشيزلونج قدامى المريض بتاعى وبيحكيلى حكايته واسمعه للأخر وابداء اكتب له المهدئات والادوية 

وتبقى هى دى طريقة علاجى له 

لكن كنت بحاول دايما اطور من طرق العلاج

لكن ده ميمنعش انى كل المواد اللى كانت مقررة عليا كنت بجتازها بكل تفوق 

واخيرا خلصت دراستى فى الجامعة 

وابتديت اشتغل فى مراكز معروفة 

لكن كانوا بيطبقوا الطريقة المعروفة عن مجالنا 

وكان صعب حد يثق فى طالب جديد لسه متخرج علشان يطبق دراسة جديدة فى المجال 

وكان كل الردود انى لسه معنديش القدرة على تجربة افكارى على المرضى اللى وارد جدا اكون سبب فى ضرر اكبر ليهم بدل م اكون سبب لتحسن حالتهم 

المهم انى قررت لفترة اشتغل الاول 

واقدر اثبت نفسى فى المجال بتاعى 

واكسب ثقة المديرين بتوعى والمرضى كمان 

علاقتى بأمي كانت مش قوية 

انا عايش فى بيت  خاص بيا 

ظروفى المادية مستواها كويس 

وده طبعا لأن امي كانت من اسرة ميسورة 

كانت هى عايشة فى بيت جدى وجدتى 

اللى اتوفيت بعد ما دخلت الكلية بشهور بسيطة 

وبعد ما كانت امى بتعيش معايا شوية وفى بيت جدى شوية 

بعد وفاة جدتى بقيت هى مقيمة مع جدى علطول 

وانا بروحلهم زيارات كل اسبوع 

وتقدروا تقولوا العاطفة بينا مكانتش قوية اوى يعنى 

الحياة كانت عملية اكتر 

الاجواء عموما فيها برود شوية عن مصر والعلاقات الاجتماعية فيها 

دايما لأن وقتى كان لشغلى علاقاتى كانت قليلة 

اخلص شغلي فى المركز مع حالاتى 

اللى تقريبا كل امراضهم او حالاتهم النفسية 

بتكون اسبابها معروف 

انتهاء علاقة عاطفية

او فقدان شخص غالى سواء بالموت او بالسفر او اى نوع من انواع الفقد

فشل دراسى او عملى

تنمر 

ودى كانت حالات كتير 

اخلص كل ده 

وارجع على البيت علطول 

ابداء افتح اللاب توب بتاعى 

واشتغل على الابحاث اللى بحاول اطور بيها المجال بتاعى 

فعلا فى فترة مش طويلة اوى لكن مش اقل من سنتين 

قدرت اكسب ثقة ناس كتير جدا

وكان فى المركز بقى ليا كيان واى حد بيواجه مشكلة كان بيلجألى علشان احاول اساعده فى تجاوزها 

واخيرا وبعد ما وصلت للمرحلة دى 

اللى مكسبتش فيها بس اللى ذكرته ده 

لاء انا كمان كنت استفادت ماديا جدا

الاستفادة اللى مع مستوايا تخلينى اقدر ابدأ مشروعى الخاص وافتح المركز الخاص بيا 

لكن انا محبيتش اعمل ده 

غير لما اثبت لأى شخص فى البداية قلق من انه يثق فيا 

انه كان غلطان

علشان كده قررت ان افكارى تنجح فى المركز اللى بشتغل فيه 

واخيرا قررت انى اطبق البحث بتاعى 

وهو كيفية علاج الامراض النفسية 

بالخوف 

طبعا اول ما طرحت فكرتى 

اتهاجمت 

ازاى اعالج اشخاص بتعانى من امراض الاكتئاب او الفوبيا 

اللى هى الخوف المرضى 

او اى نوع من انواع الامراض النفسية 

بأنى ارعبهم واخوفهم 

وازود طاقتهم السلبية 

لكن انا حاولت بكل جهدى انى اعرض عليهم كل افكار بخصوص الفكرة بتاعتى 

لحد م اخيرا قرروا انهم يخلونى اخد فرصتى 

بعد مهاترات ومناقشات كتير جدا 

وده خلانى فى قمة حماسى 

وكنت بفكر فى طريقة مختلفة اعالج بيها مجموعة مرضى 

كل شخص منهم بيعانى من حالة مختلفة عن التانى 

واشوف اثر الخوف عليهم 

وكنت واثق ان فيه اشخاص ممكن الموضوع يعالجهم فعلا 

واشخاص تانية ممكن يأثر عليهم تأثير سلبى 

لكن فى كل الاحوال 

كنت عارف ومحدد ازاى هنقذ الموقف 

واخيرا 

انفردت مع المدير المباشر ليا وعرضت عليه قرارى 

جو.مستر جاك 

انا قررت اكون مسؤل عن مجموعة من المرضى اللى بيعانوا من حالات نفسية مختلفة 

لكن هطبق عليهم تجربتى 

فى مكان غير المركز

جاك.يعنى ايه مكان غير المركز يا جو 

هتطبق تجربتك فين لو مش فى المركز

جو.هجمعهم فى مكان يكون مهيأ ان الاجواء العامة بتاعته تسمح ببث الخوف فى نفوسهم وجواهم 

علشان اقدر اشوف تأثير ده على كل شخص فيهم 

ومش بس كده 

ده هيحصل على مدار اسبوع 

مش يوم او جلسات 

لكن لازم هجتمع معاهم فى نفس المكان اسبوع متواصل 

ومن خلاله 

هقدر اكتشف ايجابيات وسلبيات الحالات بتاعتى 

وده هيخلينى اكمل فى الطريقة دى او انى هقول فشلت فيها 

جاك.طيب وده فين بالظبط المكان اللى انت ناوى تعمل فيه اللى انت بتقوله ده 

ومين هى الحالات اللى انت قررت تاخدها معاك 

جو.بالنسبة للحالات 

انا مش هاخد شخصيات محددة 

ولا هاخد شخصيات من اللى انا بالطبع بعالجهم 

لكن انا هعمل اعلان فى الجريدة 

عن تجربة جديدة لعلاج اضرابات النوم 

جاك.وليه اختارت اضرابات النوم بالذات

جو.لأن معظم المرضى النفسيين مش كلهم بيكون عندهم اضرابات فى النوم 

لكن مش كل الاسباب عندهم واحدة 

كل شخص منهم مريض ووصل لمرحلة اضطرابات النوم لأسباب مختلفة 

وده هيخلى الحالات اللى تحاول تعيش التجربة دى تكون حالاتهم مش كلها زى بعض 

جاك بتفكير.طيب موافق على المبداء 

بس بالنسبة للمكان 

هيكون فين 

جو.انا بفكر فى مكان معين 

قصر ميجيرنى.فى اسكتلندا

جاك.غريبة اشمعنى القصر ده 

جو.لأن القصر ده بالأخص مكان مناسب جدا لتجربتنا 

لأكتر من سبب 

اولا حجم المبنى ووجوده فى منطقة هادية وبعيدة عن التجمعات والمدينة 

هيكون سبب فى ان الاجواء تناسب اللى انا ناوى عليه 

ثانيا بقى وده الاهم 

ان المكان ده مشهور بجريمة مخيفة جدا

جاك.جريمة مخيفة 

جريمة ايه 

جو.قرأت انه فيه شبح بيظهر وصاحبته هى مرات صاحب القصر 

والجريمة دى بترجع للقرن ال17

جاك.شبح 

هو انت يادكتور بتقتنع بالمعتقدات المتخلفة دى 

جو.لاء طبعا 

لكن الكلام اللى اشتهر بيه المكان نفسه هيساعدنى فى القدرة على تخويفهم بطريقة غير مباشرة 

بحيث ان التجارب اللى هتتم هناك تكون مش مبتذلة ولا مبالغ فيها 

وبالنسبالهم اى حاجة مختلفة تحصل هيرجحوا ان سببها ذكرى القصر مش اى حاجة تانية 

واتمنى انك تثق فيا 

وتقبل الفكرة بتاعتى 

جاك بتفكير.مش عارف الحقيقة يا جو 

حاسس ان اللى هيحصل ده مخاطرة 

والمركز وسمعته هتكون تحت تهديد فكرة زى دى 

خاصة لو حد من المرضى بيعتقد فعلا فى وجود الاشباح وعنده فكرة عن تاريخ القصر 

جو.متقلقش يا دكتور انا اللى هكون مسؤول مسؤولية كاملة فى حالة وجود اى مشكلة 

لكن انا واثق جدا فى كل حرف ناقشته مع حضرتك 

مش عايز اكتر من فرصة وبس 

جاك.طيب وانت قدرت توصل لطريقة تدخل بيها القصر ده 

جو.ايوة 

القصر من فترات طويلة جدا مفيش اى حد بيتردد عليه 

وحاليا هو تحت حماية الدولة 

وانا عندى ناس هتقدر تجيبلى تصريح بأنى اقدر اتواجد فيه لمدة اسبوع 

ومعايا الحالات بتاعتى 

ومفيش حد مقيم فى القصر 

غير الحارس الخاص بيه وزوجته 

اللى بيكونوا موجودين فى فترة النهار وبس 

لكن قبل الليل بيكونوا رجعوا بيتهم مرة تانية اللى بعيد عن القصر بسبب وجوده فى المدينة 

جاك.يعنى القصر بليل بيكون فاضى 

مفيش حد خالص عايش فيه 

جو.الناس مقتنعة بفكرة الشبح اللى فى القصر

وده بيخليهم يخافوا يتواجدوا فيه بليل 

لأن اللى معروف ان شبح الزوجة بيظهر بليل بس 

وده طبعا بالنسبالهم حاجة مرعبة 

جاك.طيب وانت تعتقد ايه سبب اقتناعهم بوجود شبح فى المكان ده بليل بالذات برغم انهم معندهمش مانع يتواجدوا فى المكان بالنهار 

جو.يافندم الاسطورة قديمة جدا 

ولأنها متوارثة 

الناس معاصرتش الجريمة اللى بيتكلموا عنها 

لكن كعادة الشعوب 

الحكاية دى عبارة عن ورث بالنسبالهم 

تراث 

البيت ده مسكون 

يبقى هيفضل طول العمر بالنسبالهم وبالنسبة للأجيال اللى جاية مسكون 

والحدوتة بتاعته هتتوارث لجيل بعد جيل 

جاك.طيب يا جو 

عموما ابداء انت نفذ الخطوات 

وبلغنى اول بأول 

لكن اللى هطلبه منك 

انى مش عايز اى حالة تتعرض للأذى 

اتفقنا 

جو.اتفقنا طبعا 

جاك.تمام انت كده معاك كل الصلاحيات

بيكمل جو كلامه بعد ما ساب جاك وهو متحمس جدا

جو.طبعا اول ما خدت الموافقة النهائية من مديري 

ابتديت فى اتصالاتى 

اللى هتوصلنى انى اجيب التصريح بالتواجد فى القصر 

وبمجرد ما الشخص المقرب لوالدتى اكدلى انى اعتبر التصريح فى جيبى 

قررت انى انزل الاعلان فى الجريدة 

وطبعا كان لازم تكون جريدة مش صغيرة بحيث انها تكون منتشرة وعدد القراء بتوعها كبير 

علشان اقدر اوصل لأكبر عدد من الحالات

واخيرا كل حاجة مشيت زى م انا عايز 

وابتديت الاتصالات تيجي وتزيد على تليفونى 

ووصلنا اخيرا لخمس حالات 

وكل شخص فيهم كان له ظروف مختلفة عن التانى 

لكن جمال ده كانت له حدوتة غريبة جدا 

وهى دى اللى انا جاى مخصوص هنا علشان احكيها لأنها لازم تتعرف لكل الناس 

حتى لو انا مش موجود 

لازم حكايته تتسجل 

فى اكتر الحالات الغامضة والمخيفة اللى ممكن حد يواجهها 

يمكن كتير مش هيصدقها 

زى ناس كتير حواليا 

واقلية هيصدقوها 

زى اللى عاشوا معايا الحالة 

وشافوا معايا اللى شوفته بعنيا 

وكان بعيد عن ان حد يستوعبه او يقتنع بيه 

وسامحونى لو هطول عليكم شوية 

يتبع 

رأيكم بقى فى البداية 

علشان اعرف اكمل ولا لاء

الفصل الثاني 

انتقام شيطاني

كل حاجة تمت بسرعة جدا عن طريق التليفون 

وكل حالة اتعمل لها ملف خاص 

بالسن والحالة الاجتماعية 

ومكان السكن 

ومدى استعداده للتجربة 

لكن تفاصيل الحالات المرضية ايه 

لسه معنديش عنها اى فكرة لأنى لسه مقابلتش اى حالة منهم 

وصلت عند بوابة القصر 

وكان معايا روزالين و مايكل المساعدين بتوعى 

استقبلنا ديفيد حارس القصر 

شخص عابث 

كلامه قليل جدا 

مش اكتر من انه فتح البوابة 

وقفل البوابة بعد دخولنا 

واول ما حبيت اسأله عن تفاصيل المكان 

شاورلى بأيديه من غير ما يتكلم على بوابة القصر الداخلية 

وفهمت من المشاورة دى انه مش هيفيدنى بأى معلومة 

وفعلا دخلت انا وروزالين ومايكل 

للبوابة المباشرة للقصر 

المكان وهم 

مبنى ضخم جدا 

ويدل على ان صاحبه كان ثري جداااااااااااااااااا

طول البوابة بس كان بمقدار دور علوي 

ومدخل واسع جدا 

خبطنا بالمقبض اللى على البوابة 

فتحت دميانة مرات ديفيد 

وهى متختلفش عنه كتير نفس الوجه العابث 

جو.صباح الخير 

انا دكتور يوسف سراج 

واكيد عندك فكرة عن انى....

دميانة مقاطعة لكلامى.اه يا دكتور عندى فكرة 

اهلا وسهلا 

فى كل الاحوال محدش بيقدر ييجى هنا غير بقرار من الدولة 

وعلشان كده احنا عندنا خبر بوصول حضرتك والمجموعة بتاعتك 

جو.احب اعرفك على روزالين ومايكل المساعدين بتوعي 

دميانة.اهلا 

عندى فكرة ان عدد الاشخاص اكبر من كده

انا بالظبط ساعتين وهكون مش موجودة 

وعموما لو وصلوا بعد ما اخرج

كل الاوض فى الدور الاول جاهزة على العدد اللى اتبلغت بيه 

بلاش حد يفتح اى اوضة مقفولة وتقدروا تلتزموا بالاوض بتاعتكم وبس 

كل اوضة فيها الحمام الخاص بيها 

يعنى مش هتحتاج بليل انك تخرج من الاوضة وده يكون افضل لحضرتك ولكل الموجودين فى البيت 

جو.ليه افضل

وهل هو شرط انى مخرجش من اوضتى بليل 

دميانة بأقتضاب.المطبخ كل حاجة هتكون جاهزة فيه 

الغدا هحضره لحضراتكم قبل م امشى 

وياريت اول الليل ما يدخل تكونوا مش محتاجين اى حاجة من برة المكان 

جو.هو حضرتك ليه متعمدة تتجاهلى كلامي 

من اول ما وصلنا بتقاطعينى 

والكلام اللى بتوجهيه لينا كأنه اوامر مطلون انها تتنفذ بدون نقاش 

ومش سايبة فرصة لنفسك انك تسمعينى 

دميانة.دكتور يوسف اعتقد ان حضرتك جاى هنا وانت عارف كويس المكان تاريخه ايه 

فمعنى انى بقول لحضرتك على حاجة معينة 

يبقى سببها المفروض يكون واضح مش محتاج نتناقش فيه 

جو.هو انتى عايزة تقنعينى ان المكان فعلا فيه عفاريت 

ازاى بعد التطور العلمي اللى وصلناله ولسه فيه ناس بتصدق التخاريف دى 

قطع كلام جو المرة دى صوت الخبط على البوابة مش دميانة 

اتجهت دميانة للبوابة وفتحت 

وكان على الباب الحالات اللى جو فى انتظارها 

وكانوا جمال وجيجي 

وكيرو ونايا 

وليان

استقبلتهم دميانة وقرب جو من البوابة وهو مبتسم 

وبيرحب بالمجموعة 

جو.اهلا وسهلا 

انا بروفيسور يوسف سراج 

تقدروا تقولولى جو 

اتمنى تكون رحلتكم مستغرقتش وقت طويل 

جيجي بمرح.لاء خالص 

كانت رحلة ممتعة جدا 

برغم ان المكان بعيد خالص 

لكن بالنسبالى استمتعت 

كيرو.اهلا جو 

عجبتنى جدا فكرة التجربة 

جو.طيب اتفضلوا اعرفكم على روزالين ومايكل هيكونوا معانا الاسبوع اللى هنقضيه سوا 

ونقعد براحتنا ونتعرف على بعض 

دميانة اتحركت بثقة وهدوء دخلت المطبخ تجهز الغدا 

وجو اتحرك هو والمجموعة فى اتجاه مساعدينه 

ابتسموا كلهم ورحبوا ببعض 

وقعدوا فى ريسيبشن كبير جدا 

وبرغم اثرية القصر 

الا انه محتفظ برونقه وثرائه 

كانت المجموعة ومعاهم روزالين ومايكل كمان عنيهم فى كل مكان حواليهم 

معجبين جدا بدقة التصاميم 

وروعة التفاصيل اللى شافوها بس فى الجزء اللى اتحركوا فيه 

لكن لسه مفيش اى حد منهم طلع الاوضة بتاعته 

جو قعد وجنبه ليان و روزالين 

وحواليهم باقى المجموعة 

جو.اولا احب اعرفكم على فكرة تجربتنا 

احنا هنا علشان نساعد بعض فى حل بعض المشاكل اللى بتخلينا نعاني من اضطرابات النوم 

اكيد كل واحد مننا عنده اسباب مختلفة 

ولأن اضرابات النوم ابتديت تسبب لأشخاص كتير جدا ازمات حياتية ضخمة وبقى لها تأثير سلبي واضح 

احنا بنحاول نكتشف طريقة جديدة لعلاجها 

عن طريق وجودنا مع بعض فى مكان جديد علينا ووجودنا مع اشخاص متربطناش بيهم اى علاقة 

هنعرف من بعض كل شخص فينا ايه الاسباب اللى بتتسبب له فى الارق ده 

ونبداء نشوف تأثير الجو العام المحيط بينا على كل شخص هيكون ايه 

فى اللى ممكن الهدوء يساعده على التغيير

فيه اللى تغيير المكان هو اللى هيساعده 

فيه اللى ممكن يتغير بسبب وجوده بين اشخاص جديدة فى حياته

وفيه اللى ممكن يتغير بسبب وجوده فى وسط ناس اصلا ايا كان هما مين لكن وحدته سبب فى اضرابات النوم عنده 

ودلوقتى تقدروا بقى تعرفونى على نفسكم 

ليان.اسمى ليان عندى 25 سنة 

بقالى فترة عندى ارق مستمر وصلت لمرحلة انى بقيت مش بعرف انام بشكل متواصل اكتر من يومين 

جو.طيب وايه السبب يا ليان؟

ليان.كنت فى علاقة وانتهت قريب 

ومش عارفة اتأقلم على ان العلاقة دى خلصت 

ومش عارفة اقاوم احساسى بأفتقاد الشخص ده 

والتفكير مش بيسيبنى 

جو.اه طبعا التفكير الكتير له تأثير قوى جدا على اضطرابات النوم 

كيرو.بصراحة انا معنديش مشكلة اوى مع الموضوع ده 

لكن عجبتنى التجربة وحبيت اجى اعيش حاجة جديدة مع ناس جديدة 

ده لو بالنسبة لحضرتك مفيش مشكلة 

جو.هو انا معنديش مشكلة 

بس كان ممكن تقول ده من البداية لأن كان فيه اشخاص تانية كتير بتحاول تدور على حل للمشكلة اللى عندها لكن احنا اخدنا الاولوية 

يعنى كان ممكن حد مكانك استفاد من التجربة 

لكن عموما اهلا بيك يا كيرو

جيجي.اسمى جيجي 

وصلت هنا من فترة قريبة 

كنت جاية على اساس انى هشتغل وناس هى اللى عرضت عليا الفكرة 

وساعدتنى علشان اقدر اجى 

لكن من وقت ما جيت وكل حاجة فى حياتى ماشية بطريقة غلط

الشغل اللى اشتغلته بمقابل مادى ضعيف جدا 

والسكن اللى عايشة فيه بياخد كل المبلغ تقريبا 

ومش عارفة ارجع بلدى 

ولا عارفة اغطى احتياجاتى 

وفى نفس الوقت مش قادرة اتواصل مع اهلى لأنهم على امل انى اكون انا سبب فى تحسين مستواهم المادى 

ومش عايزة اكون سبب فى احباطهم 

وده اكبر سبب بيخلينى بعانى من قلة النوم 

نايا بحزن.انا السبب اللى مأثر عليا الفترة دى انفصال الاسرة بتاعتى 

كل واحد بدأ حياته مع شخص جديد وسابونى لواحدى 

وكأنى مش بنتهم او كان ليا وجود فى حياتهم 

سواء ماما او بابا 

نسوا خالص انى موجودة واكتفوا بأنهم يدوروا على سعادتهم بعيد عني 

انا معنديش مانع انهم ينفصلوا 

او انهم يبدأوا من جديد مع اشخاص تانية 

لكن فكرة انهم خرجونى اصلا من حياتهم 

دى اللى مصعبة عليا الموضوع جدا 

ومش قادرة اتقبل الوضع 

جو.هو انتى معندكيش اخوات يا ليان 

ليان.لاء انا عندى اخ واحد ومهاجر من فترة طويلة 

وتقدر تقول مفيش بينا تواصل 

دخلت دميانة وقاطعت الكلام.الغدا جاهز على السفرة 

انا مضطرة انى امشى دلوقتى 

كل حاجة ممكن تحتاجوها جاهزة 

بكرة الصبح هكون موجودة 

قبل الصبح حاولوا تكتفوا بأى حاجة موجودة ومحدش يحاول يكون له متطلبات غير من جوة البيت 

كيرو.ليه يعنى 

احنا محبوسين هنا 

دميانة بتبص لكيرو بأستنكار 

جو بيلطف الجو.هى قصدها ان المكان جديد علينا واحنا بعيد عن المدينة والمكان بليل بيكون مش امان 

كيرو بأقتناع.اه فهمت 

دميانة.بعد اذنكم 

جو.اتفضلى 

خرجت دميانة من بوابة القصر 

وهى سايبة جو مع مجموعته 

ومش مرتاحة لوجودهم فى المكان 

جو.طيب اتفضلوا على السفرة 

وبعد الاكل نكمل تعارف 

فعلا اتحركوا كلهم وهما مبتسمين ومتحمسين جدا للتجربة 

لكن جمال كان وضعه مختلف 

علطول سرحان 

وعابث جدا 

كأنه فى عالم تانى 

حتى الجو العام لسه مش عارف يتفاعل معاه ولا مع الناس اللى حواليه 

وده لفت انتباه جو جدا 

لكن كان منتظرهم يخلصوا الغدا بتاعهم ويكملوا كلام 

فعلا اتجمعوا على السفرة 

وابتدوا ياكلوا 

وكيرو مرح جدا ابتدا يهزر معاهم 

وتفاعل معاه جو وروزالين ومايكل وليان 

لكن جيجي ونايا كان تفاعلهم مع التهريج والمرح ده ضعيف شوية 

وبالنسبة لجمال كان تقريبا مش متقبل الجو اللى حواليه 

خلص الاكل 

وكل واحد ساب الشوكة او المعلقة بتاعته 

وهو معجب بالأكل 

جو.دميانة برغم تكشيرتها الا ان اكلها حلو جدا

كيرو.اه دى التكشيرة بتاعتها لواحدها قادرة تكون سبب فى انى اعانى من اضطرابات النوم اللى مش موجودة عندى اصلا 

ابتسم الجميع

روزالين.هى فعلا صعبة جدا 

مايكل.اكيد عندها اسباب تخليها بالوضع ده 

وممكن ده يكون تأثير البيت 

ليان.ليه ماله البيت وتأثيره 

جو.اعتقد ان مفيش داعى للكلام فى التخاريف دى يا مايكل 

كيرو بأستفهام.هو فى حاجة احنا منعرفهاش ولا ايه 

مايكل.لاء مش حاجة مهمة 

مجرد حواديت بتتقال عن البيت ده 

لكن كلها خرافات 

جيجي بتوتر.يعنى ايه تخاريف 

اعتقد من حقنا نعرفها 

روزالين.كده يا مايكل انت قلقتهم 

احنا هنا لأسباب محددة اعتقد كان مفيش داعي ان انت تفتح كلام زى ده 

خاصة انه مالهوش اساس

جيجى.ممكن نعرف ايه هى الخرافات دى 

على الاقل يكون عندنا فكرة عن اللى بيحصل 

قبل ما حد يتكلم سكتوا كلهم 

وركزوا فى الصوت اللى سمعوه فى الريسيبشن اللى كانوا قاعدين فيه 

علشان يتحركوا كلهم فى نفس الوقت ويقوموا من على السفرة 

ويروحوا يشوفوا مصدر الصوت 

لكن الصدمة خليتهم كلهم واقفين يبصوا لبعض ومش لاقيين كلام يقولوه 

خاصة لما شافوا كراسى الصالون اللى كانوا قاعدين عليها 

مقلوبة على الارض

مايكل.شوفت يا بروفيسور 

اهو ده اللى كنت لسه عايز اقوله

كيرو بأنزعاج.احنا لازم نفهم فى ايه بالظبط

لكن كملت صدمتهم اول م ابتديت تظهر على الارض قدام عنيهم 

اثار دم فى الارض وكأن حد ماشى وبيتحرك فى المكان لكن مش ظاهرلهم غير اثر الخطوات 

ومنظر الدم على الارض 

يتبع 

الف شكرررررررررررررر على ارائكم فى الفصل الاول

الفصل الثالث 

انتقام شيطانى 

الموقف بالنسبالهم كلهم كان مريب ومخيف كمان 

كلهم بلا استثناء واقفين مذهولين 

ايه اللى بيحصل قدامهم ده 

ومعناه ايه 

جيجي برعب.ايه ده 

المكان ده فيه حاجة غريبة 

جو بيسمع وبيبص لجيجى وساكت 

كيرو.فسرلنا يا بروفيسور

ايه معنى اللى احنا شايفينه ده 

مش انت اللى مختار المكان ده 

واكيد عارف تاريخه ايه 

روزالين.اهدوا بس يا جماعة 

احنا لازم علشان نفهم نكون اهدا من كده 

نايا.هو ايه اللى نهدا 

ده دم على الارض 

خطوات بنى ادم 

مش باين قدامنا 

وتقولى نهدا 

جو بيتفرج وساكت 

مايكل.انا عارف من البداية ان المكان ده مش هييجى منه غير اللعنات

ليان.احنا هنمشى من هنا حالا 

مش هينفع نقعد فى المكان ده ولا ساعة تانية 

جمال اللى اتكلم لأول مرة بمنتهى الهدوء.على فكرة يا جماعة 

للأسف احنا لو فكرنا نخرج من هنا 

يمكن اللى نقابله برة اسواء من اللى هنقابله هنا فى القصر ده 

صعب جدا نلاقى حاجة توصلنا لحد المدينة 

غير ان مفيش اى حاجة قريبة مننا 

نقدر نستعين بيها علشان نبعد عن المكان ده 

الحل الوحيد لينا اننا نفضل مع بعض 

ونحاول نهدا 

ونشوف اللى حصل ده معناه ايه 

متنسوش ان المكان ده مقفول من سنين 

ووارد تكون دى مجرد طاقة سلبية فى المكان 

كان جو وفريقه 

والحالات واقفين مركزين جدا فى كلام جمال اللى قدر يخطفهم من اللى حصل 

وجو مستغرب جدا العقلانية والثبات اللى بيتكلم بيهم وعدم تأثره بالموقف اللى حصل 

برغم ان جو شخصيا القلق دخل لقلبه من الموقف 

لكن كلام جمال 

كان مقنع لكل الموجودين 

كيرو.يعنى انت عايزنا نقضى الليلة هنا مع الرعب ده 

جو بهدوء.اعتقد ان كلام جمال مقنع جدا 

احنا فعلا مفيش قدامنا اى حل تانى غير ده 

صعب نخرج فى الوقت ده من المنطقة المقطوعة اللى احنا فيها 

جيجي.صح احنا كتير مع بعض 

مينفعش الخوف هو اللى يسيطر علينا 

خلينا نقضى الليلة 

ونشوف فيه حاجة تانية هتحصل 

ولا هى فعلا مجرد طاقة فى المكان 

لأنه مهجور من سنين 

روزالين.طيب تعالوا نكمل بقى برة المكان هنا 

ونفهم من دميانة لما توصل الصبح 

خرجوا كلهم ورا بعض 

وجو وقف لحظات يبص للمنظر الغريب 

والخطوات اللى على الارض 

ومنظر الدم 

لكن خرج وراهم علشان ميقلقهمش زيادة 

اتجمعوا كلهم وقعدوا مع بعض على السفرة مرة تانية 

كيرو.مايكل ممكن تحكيلنا بقى ايه تاريخ البيت ده 

جو.اعتقد اننا الاول محتاجين نتعرف على جمال وايه سبب اضطرابات النوم عنده 

نايا.اعتقد يا بروفيسور 

اننا بعد اللى حصل ده الاهم مع اعتذارى لجمال 

اننا نعرف ايه هو تاريخ القصر ده 

جمال بهدوء.فعلا نايا و كيرو عندهم حق يا بروفيسور 

تاريخ القصر اهم من تاريخي وحكايتى 

على الاقل يمكن نلاقى تفسير للى حصل دلوقتى 

جيجي.صح يا جمال 

اتفضل يا مايكل لو سمحت فهمنا اللى احنا مش فاهمينه 

مايكل بيبص لجو اللى شاور برأسه بمعنى الموافقة ع لى انه يبدأ يحكي 

مايكل.القصر ده ياجماعة موجود من القرن ال17 

كان بيعيش فيه رئيس عشيرة مينزى الاسكتلندية

ومعاه فى القصر مراته طبعا 

وعرف رئيس العشيرة ان مراته بتعمل علاقات غرامية كتير 

وده كان سبب فى انه قتلها بطريقة وحشية 

بأنه قسم جسمها نصفين 

وحسب الخرافات اللى بتتقال 

ان النص الاسفل من جسمها بيظهر فى الدور الارضى من القصر 

اما نص جسمها اللى فوق 

بيظهر فى الدور العلوى من القصر بحيث انها كانت بتفضل انها تمر دايما فى المكان اللى فيه اوض الضيوف 

ولو فيه واحد من ضيوفها هى على علاقة بيه 

كانت بتقضى الليلة فى الاوضة بتاعته 

وبعد ما اتقتلت بقى النص اللى فوق من جسمها بيعمل نفس اللى كانت بتعمله وهى على قيد الحياة 

كانت تدخل الاوض فى الليل وتبوس اى راجل موجود فى اى اوضة من الاوض وهو نايم 

ولأن ده اتكرر كتير 

وضيوف كتير من اللى حصل معاهم او بيزعموا ان ده حصل معاهم فعلا خرجوا من القصر وذكروا الكلام ده 

البلد كلها بقيت تتكلم فى نفس القصة 

وكل شخص كان بيعرف يضيف اى جملة تزود الاثارة والتشويق على الموضوع كان مش بيتاخر انه يعمل ده 

ومن وقت م انتشرت الاشاعات دى 

وابتديت الناس تتجنب انها تيجي جنب القصر ده 

ومع مرور الوقت بقيت القصة دى هى تاريخ للقصر 

اللى بقى مهجور بعد موت رئيس العشيرة فيه بطريقة غامضة 

ويقال ان روح زوجته هى اللى كانت ورا موته 

خاصة انه كان مش مريض وكانت صحته كويسة جدا 

ومن وقتها والقصر ده بقى قصر الاشباح 

كلهم كانوا بيسمعوا وهما مركزين جدا 

حتى جو اللى كان هو مختار المكان ده 

بقى بيسمع بتركيز 

وعنيه على كل حالة من حالاته بحيث انه يشوف اثر القصة عليه 

وردود الافعال

جيجي برعب.ايه الجنان ده 

انتم ازاى تجيبونا لمكان زى ده 

معنى اللى بيتقال ده 

ان اللى احنا شوفناه دلوقتى ده ممكن يكون حقيقى مش مجرد تهيؤات او طاقات سلبية 

وممكن تكون دى الست اللى اتقتلت هنا 

وده شبحها 

وصح هو اللى يعتبر ظهر قدامنا 

الجزء اللى تحت من جسمها 

ودليل على كده ان اللى ظهر خطوات رجليها وبس 

نايا.لالالالا الكلام ده مستحيل يكون حقيقى 

مفيش حاجة زى دى بتحصل بجد

دى تخاريف 

ليان.هو ايه اللى تخاريف 

اومال انتى تفسري اللى حصل دلوقتى ده بأيه 

الدم اللى على الارض 

والحاجة اللى مقلوبة جوة دى 

والخطوات اللى كانت بتظهر قدام عنينا يعنى احنا مدخلناش لقيناها علشان نقول وارد يكون فيه اى حاجة وقعت على الارض 

لاء دى ظهرت قدام عنينا 

جمال.بصراحة ان مواضيع الاشباح والحاجات الغريبة دى مش بقتنع بيها من وجهة نظرى بس يعنى اكيد مش بفرض ده عليكم 

لكن اللى انا شايفه 

ان القصر ده الدولة كانت عايزاه يكون مكان اثرى خاصة لتصميماته المختلفة جدا واللى كانت متطورة فى العصر اللى اتبنى فيه 

وعلشان محدش ابدا يفكر يستفيد بيه فى عصر كانوا عندهم قناعات بوجود الارواح والاشباح 

طلعت القصة دى كنوع من انواع الترهيب 

وبالفعل نجحوا جدا انهم يخلوا القصر ده اسطورة 

هو يعتبر تحفة فنية 

لكن اللى يعرف تاريخه 

يشوف انه قصر ملعون 

وده يخوف اى حد انه يفكر يستغل المكان ده او يستفيد بيه 

اعتقد مع التطور الحالى فى العلم 

ان ده انسب حل 

لكن اشباح وخرافات 

معتقدش ان لها وجود

كيرو.بس يعنى انت شايف ان الدولة لو كانت محتاجة تعمل اللى انت بتقول عليه ده 

هتطلع قصة واهية زى دى 

وتتحكى على مر عصور 

جمال.برغم انها كانت بتتحكى على مر العصور 

الا ان احنا كلنا جينا هنا واحنا منعرفش تاريخ المكان 

ومسمعناش عنه غير دلوقتى حالا من مايكل 

اذا القصة دى ممكن يكون مش متداول الكلام فيها حاليا الا لو ظهر حد محتاج يستغل المكان 

وبرضه دى وجهة نظرى الشخصية 

جو بأعجاب من تفكير جمال.اعتقد بقى انى محتاج اتعرف عليك يا جمال 

مش متخيل انا ازاى فخور بطريقة تفكيرك 

لأن انا من الناس اللى مقتنعة تمام الاقتناع 

ان مفيش حاجة اسمها اشباح 

ولا كائنات خفية 

وتحليلك العملى ده عجبنى جدا للمرة التانية 

ممكن بقى تحكيلنا انت ايه مشكلتك 

جمال بثقة.معنديش مشاكل يا بروفيسور 

لكن انا وحيد جدا فى البلد دى 

ماليش فيها حد

كنت هنا فى منحة دراسية 

وخلصت المنحة وجالى عرض شغل مناسب جدا 

وده خلانى مرجعش بلدى 

واستقريت هنا 

بقالى سنين عايش هنا منزلتش مصر ولا مرة من وقت ما جيت البلد دى 

امي وابويا ماتوا وانا موجود هنا 

حياتى روتينية جدا 

وده سبب فى انى ابدأ احس ببوادر اكتئاب وعلشان كده حسيت ان التجربة بتاعتك 

هتخلينى اخرج من الجو اللى انا فيه 

خاصة لما اغير المحيط اللى بعيش فيه يوميا 

اخدت اجازة لمدة اسبوع من شغلى 

وقررت انى استغل الاسبوع ده فى التجديد مع ناس جديدة عليا 

جو.فرصة سعيدة يا جمال 

اتشرفت بمعرفتك 

ابتسم جمال وهو بيهز رأسه لجو بمعنى انه يشكره 

كيرو.طيب دلوقتى يا جماعة المفروض نعمل ايه بقى 

نتعامل مع المكان بتفكير البروفيسور 

وجمال 

ولا نتعامل باللى احنا شوفناه وكلام مايكل يعنى 

روزالين.اعتقد اننا فى كل الاحوال مضطرين نقبل الاراء العقلانية علشان مندخلش جوانا الخوف 

ولو لحد النهار محصلش حاجة تانية تقلق 

يبقى كلام البروفيسور وجمال هو الاصح 

جيجي.يعنى انتى قصدك نطلع ننام فى الدور اللى بيطلع فيه الشبح

جو.يا جيجي مش قولنا بقى مفيش حاجة اسمها اشباح

جيجي.لاء طبعا حضرتك تقول براحتك

لكن اللى انا شوفته بعنيا ده 

يخلينى اصدق ان فيه اشباح 

جو.طيب معلش هى ليلة واحدة هنجرب المكان فيها 

لو حصل اى حاجة تانية 

هنمشى اول النهار ما يطلع 

ايه رأيكم 

جمال.موافق

باقى المجموعة بيبصوا لبعض 

وجو بيبص لجمال 

اللى مستغربه جدا

واضح ان جمال مش بيعاني من اى مشكلة 

بالعكس ده باين عليه انه شخص عملى وعقلانى جدا وكل حاجة بيقولها عنده لها اسباب كتير 

حتى اتأقلم على التجمع ومش واضح انه بقاله فترة عايش لواحده لأن الشخص اللى بيكون وحيد لفترة طويلة 

بيلاقى صعوبة فى التواصل بسهولة مع الناس 

لكن هو قدر يتكلم بمنتهى الثقة 

وده دليل على انه اجتماعى 

روزالين.اعتقد اننا لازم فعلا نبات هنا الليلة 

كيرو.خلاص يا بروفيسور موافقين 

نايا.بس لازم نفضل قريبين من بعض 

جو.لو حابين ان انتم تباتوا فى نفس الاوضة 

انا معنديش مشكلة 

لكن لو ده حصل الليلة واطمنا اننا هنكمل الاسبوع بتاعنا 

يبقى كل واحد يبقى فى اوضة منفردة علشان نقدر نعالج مشكلاتنا 

ايه رأيكم 

جيجي.لاء انا مش بعرف انام مع حد 

ليان.اه انا موافقة على فكرة البروفيسور 

نايا.خلاص يا ليان نشوف اوضة تكون كبيرة ننام فيها انا وانتى 

كيرو بتهريج.طيب ما تاخدونى انام معاكم انا كمان قلقان انام لواحدى 

مايكل بيضحك.لاء انت نام لواحدك علشان الشبح لو طلع يلاقيك لواحدك تبوسك 

كيرو.لا انا مش عايزة البوسة اللى هتيجي من عفريت 

حد ينام معايا بقى فى اوضتى 

مايكل.خلاص انا ابات معاك 

كيرو.لا طبعا 

يعنى معانا اربع بنات زى القمر وانت اللى تنام معايا 

جو.انا شايف يا كيرو انك فعلا محتاج الاشباح تطلع تعوض الفراغ العاطفى اللى عندك 

كيرو.لالا خلاص هنام لواحدى بقى 

مش عايز حاجة منكم 

جو.وانت يا جمال عندك اى مشاكل فى انك تقضى الليلة فى اوضة لواحدك

جمال.لاء خالص 

مفيش مشاكل 

جو.تمام 

خلاص ممكن نطلع دلوقتى نرتاح شوية 

اعتقد اليوم كان متعب لينا كلنا 

ونتقابل الصبح 

فعلا نايا وليان طلعوا سوا لأوضة كبيرة جدا من الاوض وهما اصلا كل الاوض كانت واسعة جدا 

دخلوا الاوضة وهما مبهورين بيها 

وبكل التصميمات الاثرية اللى فيها 

المميزة جدا

نايا.معقول مكان بالروعة دى يكون مسكون 

ليان.هو تفتكرى فعلا فى حاجة اسمها كده 

انا بصراحة مجربتش ابدا اى حاجة تدل على ان الكلام ده موجود

مفيش مرة صادفت فى اى ظواهر غريبة 

نايا.هنعرف 

يلا انا خلينى ادخل اخد شاور 

جسمي مرهق جدا 

ليان.طيب وانا هرتب الحاجة بتاعتى فى الدولاب 

فعلا دخلت نايا تاخد شاور

وراحت ليان ترتب حاجتها 

وكل فرد من افراد المجموعة دخل اوضته 

وكلهم تقريبا انبهروا بالمكان 

حتى جو 

لكن جمال كان مالهوش اى ردود افعال 

واتعامل مع المكان كأنه حاجة عادية ومفيش فيه اى اختلاف 

روزالين ومايكل كل واحد منهم راح اوضته 

وجو اخيرا قعد على السرير 

طلع تليفونه 

اللى كانت الاشارة فيه شرطة واحدة بس 

وده يدل على ان الاشارة فى المكان ضعيفة جدا

وبعت رسالة 

لرقم 

مكتوب فيها 

اشكرك جدا على الخدعة الاولى 

اعتقد ان تأثيرها مميز جدا 

يتبع

تفتكروا ايه السر اللى ورا جمال؟؟

الفصل الرابع

انتقام شيطانى 

ساب جو التليفون بتاعه 

ومركزش الرسالة وصلت او لاء

لكن قام من على السرير 

دخل اخد دش 

وخرج رمى نفسه على السرير ونااااام علطول 

كانت جيجي نايمة فى اوضتها لواحدها 

وروزالين وجمال وكيرو ومايكل كمان كل واحد فى اوضة لواحده 

راحوا كلهم فى النوم بسرعة 

حتى اللى بيعانوا من الارق 

لكن جمال هو الوحيد اللى كان صاحى 

مفتح عنيه وباصص فى السقف وبيفكر 

لكن محدش عارف هو بيفكر فى ايه 

وايه اللى جابه تجربة زى دى 

وهو مش بيعاني من مشاكل 

بعد شوية وقت 

استسلم جمال للنوم وهو على ملامحه ابتسامة 

غريبة 

وبالنسبة لأى حد من المجموعة لو شافها مش هيلاقى لها اى مبرر

انا شوفت الابتسامة دى على وشه اكتر من مرة 

وقاللى بلسانه 

يابروفيسور

الابتسامة دى هى اللى بتساعدنى انى انام 

الابتسامة دى بالنسبالى تصالح مع اى حاجة ممكن عبثى فى وجودها يسبب ليا امراض كتير من اللى انت بتعالجها 

وصدقنى مش هتعرف تعالجها 

هوضحلكم المقصود من الكلام ده بس لما ييجى وقته 

نمنا الليلة دى 

ومفيش حاجة حصلت 

وده كان اتفاقى مع مصمم الخدع 

اللى كان عالمي بالنسبالى 

بلغته بهدفى وقررت اسيبه هو يخرج موهبته فى كل انحاء القصر

وده خلانى محاولش اناقش معاه اى فكرة مرعبة ممكن يعملها 

لكن طبيعى انى كان لازم بعد اول خدعة 

اسيبهم يرتاحوا علشان ميقرروش انهم يمشوا من المكان من تانى يوم 

الاجواء هادية جدا

والليل فات بطئ جدا 

مش عارف ايه السبب 

بس برغم انى عارف ان فيه حاجات كتير هتحصل خلال الاسبوع 

لكن كنت حاسس انى مش مرتاح او قلبي مقبوض من الليل فى المكان ده 

لكن استسلمت للنوم 

كنت فعلا محتاج جدا ارتاح 

طلع النهار من غير اى مشاكل 

صحيت غيرت هدومى ونزلت تحت 

لقيتهم كلهم متجمعين 

جمال ماسك كتاب بيقرأ فيه 

وكيرو ومايكل قاعدين مع روزالين وليان ونايا 

وكانت جيجي مع دميانة فى المطبخ 

جيجي.ممكن اسألك سؤال 

دميانة بأقتضاب.اتفضلى 

جيجي.هو الكلام اللى بيتقال عن القصر ده حقيقى 

دميانة.كلام ايه اللى بيتقال عن القصر 

جيجي.ان بيطلع فيه اشباح

دميانة موجودة فى المكان ده بناء عن قرار الدولة 

وده يخليها مينفعش تتكلم فى حاجة زى دى مع نزلاء القصر 

دميانة.انتى منين جيبتى الكلام ده؟

جيجي.مساعد البروفيسور هو اللى قال كده بليل 

انا نمت بالعافية 

كنت مرعوبة 

واى صوت بحس انى لو فتحت عنيا 

هلاقى الست اللى اتقتلت دى قدام عنيا 

دميانة.طيب ولما المساعد عارف قصة زى دى 

ليه مبلغش المدير بتاعه

وليه جه معاكم لحد هنا 

برغم انه عارف ان هنا بيكون فيه اشباح 

اعتقد انه قال كده علشان يخوفكم مش اكتر 

كان عايز يتسلى 

لكن انا موجودة هنا بقالى كتير جدا

وكمان ديفيد 

حارس للمكان من فترة

مفيش مرة صادفنا فى حاجة من اللى بتقوليها دى

جيجي.ماهو قال ان اللى بيحصل ده بيكون بليل 

امبارح شوفنا اثار دم على الارض 

هو واحد من المجموعة قال البيت فيه طاقة سلبية 

انا مش عارفة ده ممكن يكون حقيقى ولا لاء

بس الموضوع كان مرعب جدا

دميانة.ممكن يكون كلامه صح

انا بالنسبالى واثقة ان مفيش حاجة من اللى بيتقال عليها دى 

جيجي.طيب كويس طمنتينى 

برة فى الريسيبشن 

جو.صباح الخير يا شباب

المجموعة.صباح الخير 

جو.طمنونى ايه الاخبار 

حد كان قلقان امبارح 

كيرو.انا بالنسبالى نمت محستش 

ليان-نايا.اعتقد احنا كمان محسناش نمنا ازاى 

نايا.مع ان ده مش الطبيعى بتاعى ابدا

جو.طيب هايل 

تفتكرى السبب فى المكان الجديد

ولا فى المجموعة اللى معاكي 

ولا فى انك نمتى مع ليان 

(قررت مجيبش سيرة الموقف اللى حصل)

نايا.مش عارفة الحقيقة 

لكن المهم انى نمت وانا مرتاحة جدا

جو.طيب عظيم 

وانتى يا روزالين 

روز.لاء تمام جدا انا صحيت اخرواحدة فيهم تقريبا 

مايكل.متسألنيش حضرتك عارف انا بنام وانا واقف اصلا 

كلهم ضحكوا على الجملة 

كيرو.وانا كمان نمت متقلقش عليا 

جو بيبص لجمال اللى مركز فى الكتاب.وانت يا جمال 

مقولتش نمت مرتاح ولا فيه حاجة قلقتك 

جمال بثقة.لاء ابدا 

انا ليا طقوس معينة بعملها بتخلينى انام وانا مرتاح جدا 

جو.طقوس 

هايل

طيب ممكن تفيدنا بطقوسك دى 

علشان نقدر نستفيد 

جمال.اكيد يا بروفيسور 

لازم طبعا 

انا مش بحتكر اى معلومة ابدا 

بس اعتقد مش وقته 

جو.ليه احنا بندردش 

جمال.انت نسيت ان لسه جيجي مطمنتش اذا كانت نامت كويس ولا فيه حاجة قلقتها 

جو بص لجمال اللى فاكر الحالات اللى المفروض هو يكون مركز معاها 

وحس ان جمال قدر يحرجه 

جو بمزاح.صح هى فين جيجي 

لسه نايمة ولا ايه 

جمال بأبتسامة مستفزة.لاء مع دميانة 

جو.طيب كويس 

بعد اذنكم هقوم اطمن عليها 

جمال بص فى كتابه وهو مبتسم 

والباقى رد على جو.اتفضل 

دخل جو المطبخ.صباح الخير 

دميانة وجيجي.صباح الخير

جو.اهلا دميانة 

شكرا على الاكل بتاع امبارح 

كان حلو جدا

دميانة.شكرا ليك 

جو.ايه يا جيجي طمنينى 

نمتى بليل كويس 

جيجى.اه نمت 

بس ميمنعش انى كنت متوترة شوية 

وحاسة انى بسمع اصوات 

لكن روحت فى النوم فى الاخر 

ومحستش بحاجة 

جو.طيب كويس ده 

دميانة.طيب اتفضلوا ارتاحوا برة وانا هحضرلكم الفطار دقايق ويكون على السفرة 

جيجي.مش محتاجة مني اى مساعدة 

دميانة.لاء شكرا 

خرجت جيجي وجو من المطبخ 

وراحوا قعدوا مع باقى المجموعة 

اللى كانوا بيتكلموا فى هواياتهم 

واشترك جو وجيجي معاهم فى الكلام 

خرجت دميانة من المطبخ 

وهى بتحضر الاطباق على السفرة 

واتجمعوا كلهم وقعدوا يفطروا 

جمال.صدقتوا ياجماعة ان اللى حصل امبارح ده كان مجرد طاقة فى المكان 

على فكرة انا قريت كتير عن الاماكن اللى بتكون فاضية لأوقات طويلة 

وبتتجمع فيها الطاقات السلبية 

اللى بتظهر بمجرد المكان المهجور ده ما حالته تتغير 

كيرو.طاقة سلبية ايه بس

ده انا اعصابى سابت امبارح 

وكنت مرعوب ان حاجة تطلعلى بليل 

جو.طيب يعنى خلاص اتفقنا اننا هنكمل الاسبوع مع بعض 

المجموعة.اه تمام 

معاك احنا 

دميانة.من فضلك يابروفيسور 

اعتقد ان انتم مجموعة كبيرة ممكن تكونوا مش محتاجين لوجودى 

ودى الصراحة فرصة ليا انى اخد اجازة 

لأنى مسافرة كام يوم 

وطول م القصر فاضى 

انا مش بعرف اخد اجازة 

جو بص لدميانة وبص للمجموعة.ايه يا جماعة عندكم مشكلة اننا نساعد بعض فى الاكل مكان دميانة 

علشان تقدر هى تاخد الاجازة بتاعتها 

جيجي.مفيش مشكلة 

انا بحب المطبخ 

ليان.وانا كمان معنديش مشكلة 

روز.طيب خلاص يا دميانة انتى تقدرى تاخدى اجازتك براحتك 

احنا مكانك لحد ما ترجعى 

دميانة.شكرا 

بس على فكرة 

ديفيد كمان هيكون معايا 

يعنى القصر يعتبر مسؤليتكم الكاملة 

ولا تسمحوا لحد يدخل ولا حتى على سبيل الزيارة 

جو.متقلقيش يا دميانة 

مش هنحتاج نخرج ولا ندخل 

اعتقد ان القصر فيه كل حاجة ممكن نحتاجها 

حتى الجنينة برة 

كفاية جدا كوسيلة ترفيه 

دميانة.اتمنى 

بعد اذنكم 

عموما انا هخلص الغدا 

وامشى 

واتمنى ارجع الاقيكم بخير 

جمال بأبتسامة.متقلقيش 

كل حاجة هتكون بخير 

خرجت دميانة 

وكملوا فطارهم 

وجو بيشوف كل تعبيرات وشهم 

اللى باين عليها الاندماج مع المحيط 

والتفاعل مع الجو العام 

ونسوا خالص الموقف اللى حصل

لكن الغريب ان كان جمال مركز مع نظرات جو 

كل جو ما يبص لحد وعنيه تلمح جمال 

يلاقى جمال باصص عليه 

جو.صح يا جمال 

مش ناوى تحكي عن طقوسك 

جمال.خلص فطارك اكيد محتاج انا وانت نتكلم مع بعض شوية 

جو ابتسم.بتثير فضولى 

كانت المجموعة مشغولة بالكلام مع بعض 

لكن جيجي مركزة بس فى الاكل بتاعها 

وجمال وجو بيتكلموا مع بعض

وكل واحد فيهم حابب انه يفهم التانى 

خلص جمال وجو الاكل 

وقاموا من على السفرة 

جو.لو ممكن بس تبلغوا دميانة تعملنا اتنين قهوة سادة فى الجنينة 

جيجي.حاضر هقولها انا واجيبهالكم 

الباقى مشغولين فى كلامهم مع بعض 

خرج جو وجمال للجنينة 

وقعدوا فى جنينة محاطة بزهور خاصة بالجنائز والتعازى 

اللى كانت معظمها من الاقحوان 

جو.مش غريب ان كل الزهور تقريبا اقحوان 

وكأن المكان كان محاط بالجنائز بس

جمال.وارد جدا 

بس انا لقيت حاجة غريبة جدا يا دكتور 

جو بأستغراب.دكتور 

جمال.هو مش حضرتك طبيب نفسى 

على فكرة انا عارفك كويس 

انت برضه من الناس اللى لها اسمها 

وانا زى ما قولتلك بقرأ كتير 

يعنى صادفت فى اسمك قبل كده

لكن حابب طريقة تفكيرك 

وخاصة انك بتدور على التطور

جو.ايه الغريب اللى انت لقيته يا جمال 

انا خايف اخر يوم فى التجربة دى اقولك انت يا بروفيسور 

جمال بيبتسم طلع ورقة من جيبه 

ومد ايديه بيها لجو 

مد ايديه جو لجمال وبياخد الورقة وهو بيسأله.ايه الورقة دى 

جمال.افتحها وهتعرف 

فتح جو الورقة 

واستغرب من اللى مكتوب جواها 

كان الكلام بخط اسود عريض جدا 

مفتوح قوسين مكتوب بينهم

(وصولكم للقصر معناه وصولكم لبوابة الموت)

جو فتح عنيه على اخرها ورفع وشه من الورقة يبص لجمال اللى لقاه مش موجود قدامه

يتبع

الفصل الخامس

انتقام شيطانى 

استغرب جو الرسالة اللى رجع بص فيها تانى ورفع وشه مرة تانية يشوف جمال اللى اختفى من قدامه 

ابتدا يلتفت يمين وشمال 

كان جمال واقف عند نافورة فى جانب جنينة القصر 

اتجه ناحيته جو 

وقف جنب جمال اللى كان مبتسم وهو باصص فى المياه الراكدة فى ارضية النافورة 

وتحتها زهور الاقحوان فى كل ارضية النافورة 

جو.انا مش فاهمك 

هو ايه الورقة دى 

وانت ايه حكايتك بالظبط

جمال وهو على نفس الوضع.انا ماليش حكاية 

انت اللى عارف ان القصر ده له حكاية 

وكدبتها 

وقررت تستغل ناس متعرفش اى حاجة عن المكان 

علشان تنفذ عليهم تجاربك الفاشلة 

لكن لعنة القصر مش هتسيب حد عايش 

جو.ايوة يعنى الورقة دى انت اللى كتبتها 

وبعدين انت مين قالك انى تجاربى فاشلة 

وغير كده ليه متأكد ان اللى حصل فى القصر ده حقيقى 

هو مش انت برضه اللى قولت ان دى مجرد طاقة سلبية 

جمال.اكيد انا مكتبتش الورقة وخليك واثق ومتأكد من ده

ثانيا بقى لما تجمع اشخاص وثقوا فى تجربتك 

علشان تبث فى ارواحهم ونفوسهم الرعب ف اه دى تجربة فاشلة 

الرعب عمره ما كان علاج

ثالثا بقى قولت دى طاقة سلبية 

علشان تحاول تخلصهم من المشكلة دى بنفسك لأن بمجرد دخولهم للمكان ده 

انسى انهم هيخرجوا منه 

واى محاولة منهم كانت للخروج كانت نتيجتها مش هتكون منتظرة ابدا 

والمفروض ان محدش يتحمل النتائج دى غيرك انت 

جو.انت ايه علاقتك بالمكان ده 

جمال.وليه متصور ان ليا علاقة بالمكان؟

جو.كلامك 

مفيش حرف بيخرج من لسانك غير وبيأكد انك عارف كل حاجة تخص البيت ده 

وهدوئك  وثباتك طول الوقت وانت عارف التفاصيل اللى بتقول عليها مرعبة 

يدل كمان على ان فيه حاجة مش طبيعية

جمال بأبتسامة.تفتكر هيكون فى ايه بينى وبين المكان هنا 

انا اول مرة ادخل القصر ده 

وعموما الورقة انا لقيتها فى الممر بتاع السلم 

على الارض تحت المراية الكبيرة

جو.مراية؟

مراية ايه؟

جمال.انت مخدتش بالك من المراية الكبيرة اللى موجودة فى منتصف الممر بتاع السلم 

معقول

ده حتى فى اول دور 

ازاى مخدتش بالك 

جو بأستغراب.انا فعلا مخدتش بالى خالص ان فيه مراية 

للدرجة دى مش واضحة؟

جمال.بالعكس 

دى من اول السقف لحد الارض 

بس يمكن علشان هى التراب كاسيها ده اللى خلاك متاخدش بالك منها 

شوفت بقى يا دكتور 

اى مكان تتواجد فيه لازم تركز فى كل حاجة تخصه 

جو.هو ازاى يعنى لو كان حد قرر يخرج كانت هتبقى النتايج مش تمام

جمال.لأن القصر مستني من سنين الارواح اللى هتيجي تخلصه 

جو بأستغراب.ايه اللى بتقوله ده 

ارواح ايه 

وقصر ايه اللى مستني

وتخلصه من ايه ؟

جيجي بتقرب منهم وهى ماسكة صنية عليها القهوة ومبتسمة 

جمال وهو باصص فى المياه.بلاش نكمل كلام دلوقتى 

مفيش داعي نقلقهم 

جو باصص لجيجي اللى بتقرب وهى مبتسمة 

جو.شكرا يا جيجى تعبناكي 

جيجي.لاء ابدا انا معملتش حاجة 

دميانة هتخرج دلوقتى 

قالتلى ابلغك 

جو.مفيش مشكلة 

انا جاى معاكي احنا مش متجمعين هنا علشان كل واحد يقعد لواحده 

جيجي لمحت بعنيها الزهور اللى مالية حوض النافورة

جيجي بأستغراب.ايه الورود دى 

منظرها تحت المياه مقبض جدا

ياترى اشمعنى الازهار دى اللى مرمية كده 

جو اخد الصنية من ايد جيجي وحطها على سور النافورة متجاهل جمال 

ومسك كوباية القهوة بتاعته 

وشاور بأيديه لجيجي بمعنى اتفضلى امشى

وهو بيقولها.هقولك اشمعنى واحنا راجعين للشباب

مشيت جيجي وجنبها جو اللى التفت بص على جمال وشافه واقف بنفس الحالة 

جو.الازهار دى خاصة بالمناسبات الحزينة 

وواضح ان كان فيه ذكرى حزينة هى السبب فى انهم يملوا الجنينة وكل مكان فيها بالزهور دى 

جيجي.بس الازهار دى مش باين عليها قديمة 

جو.اكيد ديفيد بيكون مسؤول عن تجديدها 

جيجي.غريبة يعنى 

بس عادى هو فى ايه مش غريب 

وصل جو وجيجي للقصر واول ما دخل 

بص بعنيه على فوق عند ممر السلم 

لمح برواز ضخم خدا هو مش عارف ازاى مخدش باله منه 

لكن مش باين منه غير اطار 

لكن سواء كان برواز او مراية مش قادر يحدد

لكن غريبة ازاى كم التراب ده لدرجة انه يغطيها كده 

برغم ان دميانة بأستمرار موجودة 

وبتشتغل على نضافة المكان 

كانت المجموعة بيتكلموا ويهزروا بصوت عالى 

وبيضحكوا ومبسوطين مع بعض 

قرب منهم جو وجيجي

جو.واضح انكم قدرتوا تتعودوا على بعض بسرعة 

نايا.الروح الحلوة 

والناس اللى بتكون تعبت من الوحدة يا بروفيسور بتفرح جدا لما تلاقى حواليها ناس بيحاولوا يقربوا منها 

وبصراحة التيم كله بيحاول يقرب من بعض 

بس هى جيجي وجمال اللى منطويين 

جيجي بأبتسامة.لاء ابدا 

ممكن انا بس بتكسف شوية 

كيرو بمرح.بتتكسفى 

لاء بقى كده مينفعش 

احنا تيم واحد مفيش بينا اللى يدعوا لأى كسوف 

مايكل.تعالى اقعدي بس معانا هنا 

مش هتبطلى ضحك 

وهتنسى خالص موضوع الكسوف ده 

جو ابتسم.طيب انا هطلع اوضتى اخلص شوية حاجات على اللاب توب وارجعلكم تانى 

مايكل.براحتك طبعا 

جيجي ابتسمت ودخلت تقعد معاهم 

وطلع جو على اوضته

مايكل بأعجاب.انتى مرتبطة يا جيجي 

فيه حد فى حياتك يعنى 

فيه تجربة حب فاشلة مريتي بيها 

كيرو كعادته بمرح.بقى ده سؤال تسأله لواحدة مكسوفة 

ولا عجبتك 

جيجي وشها احمر 

مايكل حس بأنه احرجها.لاء خالص مش قصدى حاجة 

انا بس شايفها متحفظة جدا ومنطوية 

قولت ممكن مش بتحب تتجمع مع شباب بسبب تجربة فاشلة او حاجة 

روزالين.بلاش انت تخمن حاجة تانية 

جيجي من اول م اتقابلنا قالت على مشكلتها اللى بتتعبها 

مجابتش سيرة علاقة فاشلة فى حياتها 

جيجي.خلاص محصلش حاجة 

بس انا بطبعى كده للأسف مش بعرف اتأقلم على التجمعات بسرعة 

لكن اكيد انا حابة اكون بينكم 

ابتسم مايكل وهو بيبص لجيجي بأعجاب

ليان.فاضل بقى نعرف جمال الغامض ده مش بيتكلم معانا ليه 

نايا.لاء بيتكلم 

بس لما بيكون فيه حاجة محتاجة تحليل علمي بحت 

تلاقيه ابتدا يتكلم 

كيرو.دلوقتى لما ييجى من برة نخليه ييجى يقعد معانا زى جيجي كده 

قعدوا اتكلموا مع بعض وشاركوا جيجي فى كلامهم 

جو فى اوضته ماسك تليفونه وبيحاول يتصل بمصمم الخدع اللى متفق معاه 

عايز يعرف هى ايه الخطوات اللى واخدها علشان يقدر يعمل مواقف مرعبة 

لأنه ابتدا يشك ان جمال ده له علاقة بالخدع دى 

لكن التليفون مفيش فيه اى اشارة 

فتح اللاب توب 

علشان يبعت رسالة 

لكن مفيش اتصال بشبكة النت 

تفكيره العلمى 

بيبعد عنه ان فيه حاجة مخيفة فى البيت 

لكن اللى حصل انه سمع صوت صراخ عالى جدا

خرج من الاوضة بتاعته 

ووصل للممر وبمجرد ما كان بينزل اول سلمة 

مايكل بخوف.المراية الحق المراية يادكتور

وقف جو والتفت وراه على المراية اللى مش باين منها غير الاطار وباقى اللوحة مغطاة بالتراب 

بس للأسف التراب ده 

بقى مالهوش وجود

اتحول لدم 

اتفاجئ جو 

هو متوقع انها خدعة 

لكن منظر الدم كان مخيف 

وبيبص للتيم بتاعه 

وهما واقفين والصدمة على ملامحهم 

ويرجع مرة تانية يبص للمراية 

كيرو برعب.احنا لازم نخرج 

جو.انا موافق 

اللى حابب يخرج من هنا يتفضل 

جيجي.اه فعلا احنا لازم نخرج من المكان الغريب ده 

حتى لو الموضوع مالهوش علاقة بالاشباح ولا اللى حصل فى القصر بس اكيد اللى بيحصل ده انا مش هقدر اتحمله 

انا مش بحب شكل الدم 

مايكل.اهدي بس يا جيجي 

دلوقتى نفهم ايه اللى بيحصل 

بس احنا لازم نتصل بالبوليس 

جو بص لمايكل نظرة يطمنه منها ان اللى بيحصل ده من البرنامج بتاعهم 

مايكل فهم بس طلع تليفونه من جيبه.انا هتصل بالبوليس 

بص فى تليفونه يطلب الرقم 

لكن مفيش اى اشارة 

مايكل.مفيش اشارة 

جو واقف يبص على المراية

وقرب منها 

فى الوقت اللى كلهم تحت بيجربوا يتصلوا من تليفوناتهم 

لكن كلها مفيش فيها اى اشارة 

فى اللحظة اللى وقف جو قصاد المراية 

دخل جمال من الباب 

وشافهم وهما متجمعين تحت وعنيهم على فوق 

بص على فوق وشاف جو وهو بيمد ايديه 

على المراية 

جمال.خلاص مبقاش فيه حلول

ولا فيه هروب 

اخيرا هيتحرر 

واخيرا هينهي العهد

سمع جو الصوت 

وايديه لمست المراية 

وهو بيبص على مصدر الصوت 

وشاف جمال 

لكن فى نفس الوقت 

شاف التيم كله وهو فاتح عنيه على اخرها 

وباصص على المراية 

لف جو وشه على المراية 

ولمح كلام بيتكتب بالدم اللى ماليها 

الحروف كانت بتتكتب وكأن فيه شخص ماسك فرشاة وبيرسم بيها على اللوحة

فتح جو عنيه على اخرها 

والشباب تحت كمان نفس الكلام 

واخيرا اتجمعت الجملة 

اللى ثبتت جيجي مكانها 

وجمال واقف مالهوش اى رد فعل 

وباقى التيم طلع يجرى يتأكد من اللى مكتوب

تلك هى مقبرتكم الجماعية 

انتم مصدر تحريرنا.

عندما لا يكون هناك مكان فى الجحيم.

سيسيرون الموتى على الارض

انتم اموات 

جيجي.الاولى.

يتبع

ارائكم 

افضى بس واطول البارت وانزل اكتر من جزء كمان 

الف شكر لتفهمكم

الفصل السادس

انتقام شيطانى

دى تانى صدمة تحصلهم فى البيت ده 

لكن جيجي دايما متوترة فى العادى 

وده طبعا دمر اعصابها زيادة 

كان التيم كله واقف جنب جو بيبص على الكلام اللى ظهر على المرايا اللى مش ظاهر منها اى انعكاس لأى حد منهم 

وده كان غريب جدا كمان 

لكن جيجي اللى واقفة تحت ووراها واقف جمال ثابت جدا

كانت دموعها نازلة 

وحاسة ان دقات قلبها مسموعة للتيم كله 

وبرغم انها واقفة على بعد من المرايا 

الا ان الحروف والكلمات كانت كبيرة وواضحة لدرجة انها ظاهرة لها برغم المسافة 

جو قرر ينزل علشان يساعد جيجي على انها تهدا شوية 

وفعلا اتحرك ونزل على السلم 

وباقى التيم واقفين يبصوا للمرايا ويبصوا على جيجي 

مايكل كان اول واحد ينزل بعد جو

وتابعه روزالين ونايا وليان وكيرو

قرب جو من جيجي وعنيه على جمال اللى واقف من غير اى رد فعل ولا اى تعبيرات على ملامحه حتى 

جو بيمسك جيجي من اكتافها.جيجي 

اطمنى 

اللى بيحصل ده مش حقيقى 

صدقينى 

جيجي بدموع.لاء ده حقيقى 

مش هتضحكوا عليا مرة تانية 

كفايا امبارح

انا غلطانة كان لازم امشى من اول ما حصل اللى حصل 

انا اصلا تعبانة 

مش مستحملة اى حاجة تانية تأثر عليا وعلى نفسيتى 

كنت فاكرة انى هاجى اعيش فترة ترجعنى لطبيعتى 

معرفش انها تجربة هترجعنى اسواء من ما كنت 

جو.اهدي بس 

صدقينى مش حقيقى 

يا جيجي دى خدع 

كلها خدع بصرية زى اللى بتحصل فى السنيما 

وناس متخصصة هى اللى مسؤولة عنها 

انا اسف 

جيجي بتبص لجو بتركيز وساكتة

نايا من ورا جو.يعنى ايه خدع 

ويعنى ايه ناس متخصصة مسؤولة عنها 

قصدك ان اللى بيحصل ده 

انت عارف سببه 

جو بتوتر.الحقيقة ايوة 

انا عارف سببه 

انا جمعتكم هنا 

علشان بشتغل على تجربة نوع جديد من انواع العلاج النفسى 

والخدع البصرية المخيفة دى جزء من التجربة ومن طريقة العلاج

كان المفروض انى متكلمش دلوقتى ولا اقول اى حاجة 

لكن انا مش عايز يكون التأثير سلبى على حالة اى حد منكم 

كيرو.ايه الجنان ده

انت شخص مريض

ازاى تعمل حاجة زى دى فى ناس انت متعرفش نتيجة اللى هتعمله عليهم هيكون ايه 

هو انت متخيل ان فيه ناس ممكن تموت من الخوف 

او حاجة زى دى ممكن تسببلهم صدمة تضيع حياتهم او عقلهم 

انت بتجرب فينا ازاى

مين عطالك الحق ده 

وكان لازم تبلغنا الاول 

وتسوف عندنا القدرة على تجربة زى دى ولا لاء 

وتسيب حرية القرار لينا احنا 

مش ليك انت 

مايكل لاحظ وضع جو الصعب وسط المجموعة.اهدوا شوية يا جماعة 

المفروض التجربة تستمر لمدة اسبوع 

والدكتور بمجرد ما شاف جيجي حالتها متحملتش الوضع 

اتكلم وصارحكم 

وطبعا ليكم حرية الرأى 

اذا كنتم تحبوا تكملوا او لاء 

لكن من غير هجوم 

هو كان هدفه المساعدة بطرق مختلفة 

بعيد عن الادوية 

نايا.كان المفروض يبلغنا الاول يا مايكل 

مش يستنى لما حد فينا ينهار 

جو.انا فعلا كنت عارف ان هتحصل حاجات مخيفة 

وده علشان اقدر اعالج كل حاجة بناءعلى رد فعلها 

لكن حقيقى انا كان معنديش اى علم 

بالحاجات اللى هتحصل 

انا اتفقت مع المسؤول عن الخدع دى انى عايز مواقف مرعبة وبس 

لكن مكنتش اعرف انها ممكن تكون مرعبة للدرجة دى 

صدقونى ياجماعة 

انا حتى حاولت اتواصل معاه 

بس انتم شايفين 

التليفونات كلها مقفولة 

مفيش اى اشارة 

وحتى شبكة الانترنت

مش شغالة ابدا 

سامحونى ياجماعة 

صدقونى متخيلتش ابدا ان الموضوع يكون اوفر كده 

او ان الخدع تكون مخيفة للدرجة دى 

جيجي.انا لازم اخرج من هنا 

مش هينفع اكمل يوم تانى 

جمال.مش هينفع 

كله التفت لجمال 

اللى دى كانت اول جملة تتقال من وقت اللى حصل تقريبا 

كيرو.ليه مش هينفع؟

جمال بهدوء.لسبب بسيط جدا

ان الست دميانة 

وديفيد سابوا القصر ده فى مسؤليتنا 

يعنى لو اى حد مشى من المكان ده 

قبل ما يستلموه مننا 

وارد اننا كلنا نقع فى مشكلة 

لو قرروا انهم يتهمونا بأى شكل من الاشكال ان احنا اتسببنا فى اى تلفيات 

او ممكن يتهمونا بأى حاجة ناقصة من القصر 

احنا مش عارفين دميانة وديفيد ايه طبيعتهم 

ولا ايه اللى ممكن يعملوه 

يمكن ناس تكون مش امينة 

ويستغلوا عدم وجودنا 

ويسرقوا اى حاجة من القصر 

ونبقى احنا المتهمين فيها 

نايا.طيب واحنا مالنا 

يقعد جو هنا لحد ما ترجع دميانة وديفيد

ويسلمهم القصر 

جمال.واحنا نضمن منين بعد اللى عمله معانا دكتور جو 

انه ميتصرفش اى تصرف مش مظبوط

ويتهمنا احنا بيه خاصة اننا هنكون مشينا ومش هيبقى فيه حد يدافع عننا او ينفى اى تهمة ممكن يوجهها لينا 

جو فاتح عنيه على اخرها وباصص لجمال

جمال.اعذرنى يادكتور

لكن انت خدعتنا واستغلتنا مرة 

ليه تكون بعيد عن انك تستغلنا مرة تانية 

انت من البداية كنت مش صريح وواضح معانا 

وده يخلينا نشك فيك 

وكمان يمكن هدفك انك تدخل القصر ده 

مش علشان تعالج اى حالات زى مابتقول 

بس يمكن علشان تقدر توصل لكل الحاجات النادرة والاثرية اللى موجودة فيه 

جو مصدوم.ايه اللى بتقوله ده 

انت مجنون بجد

استغل ايه 

انا لو عايز استغلكم 

كنت موقفتش دلوقتى صارحتكم بكل حاجة 

وبراحتكم اللى عايز يمشى يتفضل 

جمال.يبقى هو ده فعلا اللى انت عايز توصله

اننا نخرج من هنا 

يبقى هدفك كان القصر مش احنا يا دكتور

كيرو.لاء يبقى ايه اللى يخرجنا 

احنا موجودين هنا 

لحد الفترة ما تخلص 

وييجوا اللى مسؤولين عن القصر ويستلموه بنفسهم

جيجى بأنهيار.لاء انا عايزة امشى من هنا 

خرجونى من هنا ارجوكم 

جمال بيقرب من جيجى.اهدى يا جيجي 

متقلقيش 

كله طلع خدع 

كله طلع تمثيل 

الدكتور كان بيمثل علينا 

يعنى اللى حصل ده مش حقيقى 

لازم نفضل موجودين علشان مش عارفين ايه تانى ممكن يستغلنا فيه 

كيرو.صح 

انا معنديش ثقة فيه بعد اللى حصل ده 

مش هقدر اخرج من هنا لمجرد شوية تخاريف قرر يوقعنا فيها 

والاقى نفسى برة باب القصر ده متهم بأى جريمة انا مرتكبتهاش 

نايا.صح عندك حق 

جو.اللى يريحكم 

بس خليكم عارفين ان وارد تحصل اى مواقف مرعبة مرة تانية 

وده لأنى مش عارف اتواصل مع الشخص اللى اتفقت معاه 

ولحد م اقدر اتواصل معاه 

اكيد مش هكون عارف ايه هى الخطط اللى هو مقرر ينفذها

وللمرة الاخيرة

اللى عايز يخرج من هنا 

انا مش همانع اى حد 

نايا.لاء احنا هنفضل موجودين 

وانت لازم تحاول توصل للشخص ده 

وتفهمه ان مفيش داعى لباقى الفيلم الهابط اللى هو عمله ده 

جو.تمام 

ليان.جيجى تعالى اطلعى الاوضة اهدي شوية 

واحنا معاكي مش هنسيبك 

جيجى لسه الموقف مأثر عليها 

اتحركت مع نايا وليان وروز وطلعوا سوا على السلم 

وعنيهم تانى جت على المرايا 

اللى الكلام لسه مكتوب عليها بمنتهى الوضوح

كيرو بأنفعال.هو انتم ازاى تفكروا بالطريقة دى 

يعنى انا بالنسبالى كشخص مش بيعانى من اى مشاكل نفسية 

باللى انت عملته ده 

وترتنى وتعبت اعصابي 

تخيل 

يعنى انت بتصرفك ده كان ممكن تتسبب فى مرض شخص سليم 

مابالك بقى بشخص مريض من الاساس 

جمال.خلاص الكلام ده مش هيغير حاجة 

خلينا بس نكون مستعدين لأى خدعة تانية ممكن تحصل فى المكان ده 

لأن حجة الدكتور الوحيدة 

انه مش عارف يوصل للشخص اللى متفق معاه 

جو انفعل.بقولك ايه يابنى ادم انت 

انا من البداية مش مرتاحلك 

فهمنى انت عايز توصل لأيه باللى بتعمله ده كله 

انت ايه حكايتك 

خليك واضح واتكلم قول اللى عندك

كيرو بأنفعال.انت كمان عايز تطلع عقدك وجنانك علينا احنا 

وبدل ما تعتذر عن اللى انت اتسببت فيه 

بتشكك فينا كمان 

لاء انت بجد مش طبيعي

انت اللى محتاج علاج

جمال بهدوء.معلش يا كيرو

سيبه يقول اللى هو عايزه 

اكيد من الموقف اللى هو فيه قدامنا 

بيحاول يخرج منه بالتشكيك فينا 

متخيل اننا فعلا مرضى نفسيين 

خلينا نسيبه براحته 

ونطلع نطمن على جيجي

كيرو وجمال اتحركوا وسابوا جو واقف مصدوم من جمال 

وقدرته على اقناعهم بالشكل ده 

طلع كيرو وجمال يطمنوا على جيجي

وجو واقف مع مايكل 

جو.مايكل 

انا مش مرتاح ابدا لجمال ده 

من وقت ما وصل 

وهو غريب 

ومش عايز حد يخرج من هنا 

وده مش طبيعي ابدا 

مايكل.ليه بس يا دكتور 

ده كويس جدا انه بدل المرة اتنين قدر يقنعهم انهم يفضلوا موجودين هنا 

لأن فعلا مش هينفع حد يمشى ويسيب حد تانى موجود فى المكان ده 

على فكرة انا كمان ابتديت اقلق بصراحة 

معقول يكون فنان ومتمكن للدرجة دى بتاع الخدع ده 

انا صدقت انها حقيقة 

جو.حقيقة ايه انت كمان يا مايكل

انت هتتجنن دى تخاريف 

ومش اكتر من انها تخاريف 

لكن انا مش قلقان من الخدع دى زى ما انا قلقان من جمال اللى مش مفهوم بالنسبالى ده 

ومحتاج جدا اعرف ايه حكايته 

مايكل.طيب وازاى هنعرف حكايته ايه

جو.مش عارف يا مايكل 

بس انا لو اقدر اخرج من هنا 

يمكن اعرف اروح اجيب تفاصيل حياته 

مايكل.بس يا دكتور خروجك من هنا ممكن يسبب مشاكل 

خاصة ان انت السبب الرئيسى فى وجودهم 

لما تسيبهم هنا وتمشى 

مش عارفين ساعتها هيفسروا ده بأيه 

خلينا نحاول مع الشبكات فى كل مكان فى القصر 

ونتواصل مع حد من التيم بتاعنا برة 

يعرفلنا ايه حكايته

جو.ياريت 

انا بتمنى فعلا انى اوصل لأى حد خاصة علشان الخدع اللى بتحصل دى متزيدش عن كده 

انا قولتله عايز خدع تساعدنى على علاج حالات

مش تدمير حالات

بس انا غلطت انى متفقتش معاه على الخدع اللى هتتعمل 

مايكل.خلاص يا دكتور اللى حصل حصل 

انا هطلع الف فى الجنينة 

يمكن الاقى مكان فيه شبكة 

وانت كمان حاول توصل بتليفونك حتى لو شرطة واحدة 

تساعدنا نبعت رسالة

جو.خلاص تمام 

خرج مايكل من باب القصر 

وكتب رسالة على تليفونه 

لشخص قريب منه 

وبعتله عنوان جمال واسمه اللى فى الملف 

وبقى بيلف فى كل مكان فى الجنينة 

ويحاول يعمل ارسال للرقم 

يمكن توصل الرسالة 

او يجمع التليفون اى اشارة 

اما جو طلع يلف فى القصر كله 

وهو مضايق جدا 

ومتوتر من اللى حصل 

طلع الدور اللى فيه الاوض بتاعتهم 

وسمع الاصوات اللى خارجة من اوضة جيجي

وكانوا كلهم متجمعين معاها بيحاولوا يطمنوها 

طلع للدور الثانى ودى كانت اول مرة يطلع فوق 

ابواب الاوض بيكسيها التراب 

ابتدا يبص فى التليفون مع كل خطوة بيمشيها ومستنى اى اشارة تجمع 

وعنيه على ابواب الاوض 

لكن وقف فجأة لما سمع صوت جاى من اوضة فى اخر الممر 

مشى جو فى اتجاه الاوضة وهو متردد 

وبرضه عنيه على تليفونه 

وقف قصاد الباب 

وهو سامع همسات 

واصوات كلام مش مفهوم بصوت واطى 

متردد جو فى انه يفتح الباب

لكن فضوله كان اقوى من تردده 

غير انه فى كل الاحوال مقتنع ان وارد يكون الصوت اللى جوة ده خدعة من الخدع 

حط ايديه على مقبض الباب 

وابتدا يفتح الباب 

استغرب جدا جو من اللى شافه 

كان شخص غريب نايم على سرير كبير جدا 

بلحية طويلة 

وجنبه قاعدة على طرف السرير ست دافنة راسها فى رقبة الشخص اللى نايم ده 

ولابسة فستان اسود طويل وصوت عياطها مسموع 

جو.مساء الخير 

مفيش اى رد 

غير صوت العياط 

جو.اسف انى دخلت من غير استئذان

مفيش اى رد

جو بتوتر.طيب فى اى مساعدة اقدر اقدمهالك

هنا حصل اللى صدم جو 

لما شاف الست اللى قاعدة قامت وقفت 

لكن المفاجأة كانت انها مجرد جسم 

من غير رأس 

وفى نفس اللحظة 

اللى هى قامت وقفت فيها 

لاحظ جو بطرف عنيه اللى كانت زايغة فى كل مكان حواليه 

ان دقن الشخص اللى نايم على السرير 

بتطول فجأة لوحدها 

اتسمر جو فى مكانه 

وهو فاتح عنيه على اخرها 

ومش قادر يتقدم خطوة ولا حتى يرجع يخرج من باب الاوضة مرة تانية 

يتبع

الفصل السابع

انتقام شيطانى 

جو من الصدمة مش قادر ياخد اى رد فعل 

برغم انه من جواه واثق ان اللى بيحصل ده مش حقيقى 

لكن المنظر مخيف جدا

لكن اللى قطع خوفه 

الصوت اللى خرج من جسم الست اللى من غير راس 

وهى بتقرب من جو 

اللى ثبت فى مكانه 

ورجليه مش مساعداه انه يبعد او يتحرك خطوة من الاوضة دى 

بصوت مبحوح مش معروف خارج ازاى من الجسم ده 

سمع جو اسواء صوت ممكن انسان يسمعه فى حياته 

وكأن للنار صوت بيدخل ودنه وبيحس بأشتعالها وسخونتها 

لكن مش قادر يتألم 

ابتدى الكلام يوضح لجو.اللى انت شايفه حقيقى 

وكل تهديد هيتنفذ 

انتم فى عداد الاموات 

انتم اللى هتحرروا ارواحنا 

من السجن 

مع وضوح كل كلمة فى ودن جو 

لكن هو كان حاسس بالالم فيهم 

لدرجة انه بقى بيعمض عنيه من شدة الالم 

وقلة حيلته فى انه ياخد اى رد فعل 

فاتت دقايق 

وهو مغمض عنيه بيتألم 

لكن ابتدا الالم يختفى بالتدريج

وابتدا جو يفتح عنيه بتوتر وقلق 

لكن اتفاجئ لما شاف الاوضة حواليه فاضية

مش بس مفيش فيها حد 

لاء دى كمان كانت مفيش فيها اى اثاث 

ارتبك جو 

وقرر انه يخرج بسرعة رهيبة من البيت الاوضة المرعبة دى 

وبمجرد ما خرج للممر بتاع الاوض 

وبيحاول يتمالك اعصابه وبياخد نفسه 

لمح فى نص الممر قدامه

هيئة لشخص ماشى على بعد خطوات منه 

متجه لنهاية الممر 

كان مش باين منه اى ملامح غير انه لابس اسود 

وخطواته بطيئة وكأنه منتظر من جو انه يقرب منه 

لكن جو فضل واقف مكانه مش مصدق اللى شايفه ده 

ومع خطوات الشخص 

وصل لنهاية الممر 

وكان مستنى جو فى اللحظة دى 

ان الشخص ده هيلف ويرجع تانى 

لكن هو مرجعش 

هو اختفى فى جدران نهاية الممر 

جو بصدمة وصوت مسموع.لاء مستحيل كل ده خدع 

فيه حاجة غلط اكيد فيه حاجة غلط

وقبل ما يقرر يتحرك

حس جو بأيد بتمسكه من اكتافه من الخلف 

وقبل ما يلتفت يشوف مين 

كان واقع على الارض على ضهره 

وبيتجر فى ممر الاوض كله 

الغريب انه لما رفع وشه علشان يشوف مين اللى بيعمل فيه كده 

مشافش اى حد 

وابتدا جو يستغيث بالمجموعة اللى معاه 

وهو حاسس ان الرعب اتملك منه ومن اعصابه 

والشخص اللى كان مش مقتنع بوجود الجن 

والعوالم الخفية 

بقى متيقن ان البيت ده فعلا فيه اشباح 

وان الحادثة اللى حصلت فيه كانت حقيقية 

كان جو بيتسحل على الارض لأكتر من عشر دقايق 

وفى نفس الوقت ده هو مستمر فى الاستغاثة بالمجموعة اللى معاه 

لكن محدش حس بيه 

وكان كل ما بيحاول يقاوم ويقوم من على الارض 

كانت حاجة بتدفعه بقوة فى جوانب الممر 

لدرجة انه كان بيتخبط فى ابواب الاوض 

والجدران بتاعت الجوانب 

وبعد استغاثة عشر دقايق 

جمال.هو حد سامع صوت ياجماعة؟

كيرو.صوت ايه 

جمال.تحس فيه صوت صراخ 

كلهم ركزوا 

واتوتروا

لكن فعلا سمعوا صوت 

خرجوا كلهم يشوفوا مصدر الصوت 

لكن جيجي كانت مش قادرة تخرج من اوضتها 

طلعت نايا وليان وروز 

وكيرو

يشوفوا مصدر الصوت منين 

وسمعوا الصوت جاى من الدور التانى 

اتوجهوا له بسرعه 

وبعد دقيقة وقبل ما يلاحظوا 

كان جمال معاهم 

وقفوا كلهم مستغربين 

جو قاعد على الارض 

وعمال يستغيث بصوت عالى 

برغم انهم وصلوا ووقفوا قدامه

الا انه مستمر فى الاستغاثة 

كيرو بأستهزاء.خدعة جديدة يا دكتور 

جو فاتح عنيه على اخرها ومش بيتكلم 

نايا.انت عايز تعمل ايه تانى اكتر من اللى انت عملته 

مش مكفيك الحالة اللى جيجي فيها 

روز بتقرب من جو.دكتور مالك فى ايه 

جو ساكت

بيبصوا حواليهم 

كل حاجة طبيعية 

حاول كيرو يجرب يفتح باب الاوض اللى فى الممر 

لكن ولا اوضة اتفتحت معاه 

حتى الاوضة اللى كان فيها جو 

مقفولة وكأنها بقالها سنين محدش مد ايديه على المقبض بتاعها 

نايا.يلا ننزل

دور على حيلة تانية يا دكتور تلعب بيها علينا 

ابتسم جمال 

ونزلوا كلهم على تحت لكن روز فضلت واقفة مع جو اللى لسه فى حالة صدمة 

مش مفهومة 

ونسوا جيجي فى اوضتها 

او قرروا يسيبوها تهدا 

علشان محدش يحكيلها اللى حصل 

وتتوتر اكتر 

اتجمعوا كلهم على ترابيزة السفرة 

كيرو.وبعدين 

انا اعصابى فعلا ابتديت تتوتر من الجو اللى فى المكان ده

بعد ما كنت متحمس جدا

احبطت 

ومش بس كده 

ابتديت احس باكتئاب 

جمال.بصراحة جو ده فعلا مش مريح بالمرة 

وحاسس انه كان له هدف مش سليم 

هو السبب فى انه يجمعنا هنا 

نايا.طيب تفتكر ايه هو الهدف ده 

جمال.الحقيقة مش عارف 

بس فيه حاجة مش طبيعية 

مريب كده 

انت جيبتنا امبارح 

وخدعتنا 

والنهاردة كررت الخدعة 

ولما اضطريت تكشف نفسك بالسرعة دى مع انهيار اول حالة 

طلبت مننا نمشى 

فيه حاجة مش مقنعة 

اصل طبيعى جدا واحد مقرر انه يعالج مرضاه بالخوف 

انه يكون عامل حسابه على انهيار حالة من الحالات دى على الاقل 

واكيد كمان مجهز طريقة سريعة علشان يساعد الحالة على تجاوز الانهيار 

غير انه يتخلى بالسرعة دى عن تجربته 

كيرو.انت كل كلامك بيكون منطقى 

هو انت فيه ايه فى دماغك دى 

عندك تحليل لكل تصرف 

جمال.مش عارف اذا كان ده تحليل حقيقى او لاء 

فى اللحظة دى قطع كلامهم مايكل 

اللى كان لسه فى الجنينة بيحاول يبعت الرسالة 

وفعلا اتأكد ان رسالته اتبعتت 

مايكل.فى ايه متجمعين هنا ليه 

جيجي عاملة ايه دلوقتى 

كيرو.كويسة 

بتحاول تهدا 

مايكل.روز معاها فوق 

نايا.لاء روز مع الدكتور بتاعكم 

قعد يصرخ ويستغيث وفى الاخر طلعت خدعة جديدة بيخوفنا بيها 

مايكل بأستغراب.بيصرخ 

غريبة يعنى 

وايه اللى هيخليه يصرخ علشان يخدعكم 

هو المفروض انه مالهوش علاقة شخصية بالخدع اللى كانت هتحصل هنا 

ليان.تقدر تطلع تسأله بنفسك 

ماهو انت المساعد بتاعه 

واكيد عارف هو ناوى ومخطط لأيه 

مايكل.ياجماعة حاولوا تفهموا

صدقونى 

الدكتور مش ده ابدا اللى كان عايز يوصله 

انا حتى مش عارف سبب استسلامه بالسرعة دى 

المفروض انه دارس جميع جوانب التجربة 

جمال.تقدر تطلع تسأله 

هو فوق فى الدور التانى 

وجيجي فى اوضتها 

لو عايز تطمن عليها 

مايكل.اه فعلا هطلع اطمن على جيجي 

وبعدين اشوف الدكتور 

سابهم مايكل وراح ناحية السلم 

بس لفت انتباهه حاجة غريبة 

الكتابة اللى على المرايا مالهاش اثر 

استغرب مايكل 

وقرب من المرايا 

اللى كانت مش بتظهر اى انعكاس لأى حد واقف قدامها 

لاحظ ان طيفه او خياله ظهر فى المرايا 

لكن مش واضح

والكلام كله مش موجود وكأن حد غسل المرايا مش بس مسحها 

مايكل لف وبص وراه على التيم ا للى قاعد على السفرة ومش مركزين مع مايكل

مايكل بصوت مسموع.لو سمحتم يا جماعة 

التفتوا كلهم لصوت مايكل

مايكل.هو حد مسح المرايا واللى كان مكتوب عليها 

استغربوا كلهم لأنهم مركزوش خالص معاها وهما نازلين 

نايا.محدش جه جنبها 

ولا بصينالها اصلا 

كيرو بأستغراب.ازاى يعنى حد مسحه 

مايكل.الكلام اللى كان عليها مالهوش اثر 

تعالوا شوفوا كده بنفسكم 

طلعوا كلهم ورا بعض 

ووقفوا قصاد المرايا 

ولاحظوا فعلا نفس اللى لاحظه مايكل 

واستغربوا 

ليان.تلاقى الدكتور بتاعك هو اللى عمل كده 

ولا دى تكملة للخدع بتاعت صاحبكم 

مايكل.جايز

بس انتم مش ملاحظين ان الانعكاس بتاعنا ظاهر فى المرايا مشوش

برغم انه وقت اللى حصل 

كان مش باين اى انعكاسات 

نايا بتركيز.اه تصدق صح 

طيب ما احنا ممكن نسأل جو 

نشوف هو اللى مسحها 

ولا لاء 

مايكل.طيب هروح اطمن على جيجي الاول 

جمال ابتسم 

ومشى مايكل ناحية باب اوضة جيجي 

وباقى التيم قرروا يطلعوا لجو اللى لسه قاعد على الارض 

لكن قبل ما يوصولوا لجو 

وقبل ما يوصل مايكل لجيجي 

روز.دكتور 

فى ايه 

انت متوتر اكتر من الحالات نفسها 

جو بذهول.احنا لازم نخرج من المكان ده بأسرع ما يمكن يا روز 

روز.طيب نخرج

بس فى ايه 

انت ليه قاعد بالشكل ده 

وليه كنت بتستغيث بالطريقة الغريبة دى 

برغم ان مفيش اى حاجة غريبة هنا 

جو.بالعكس يا روز

فيه حاجات كتير غريبة 

انا بس اللى كنت مش مقتنع بوجودها 

كان جو بيتكلم مع روز 

وعنيه على اخر الممر 

لكن روز مركزة معاه هو مش مكان ما هو باصص

لكن فجأة سكت جو 

وكانت روز بتتكلم لكن هو مش سامع هى بتقول ايه 

لأنه ظهر قدامه شخص غير اللى كان ماشى بالاسود 

ده كان شخص لابس لبس عصري 

وواقف بعيد ملامحه كانت مش واضحة لجو 

لكن اللى كان واضح له الحركة بتاعت الشخص اللى واقف على مسافة منه 

ومبتسم بطريقة غريبة 

ظهرت اسنانه الصفرا الملتوية بشكل مخيف 

وابتدا الشخص ده يرفع ايديه ببطء 

علشان يلاحظ جو 

الدم اللى نازل من قبضة ايديه اللى قافلها بأحكام

وقبل ما يلفت انتباه روز للشخص ده سمعوا صوت جاى من الدور اللى تحت 

ونفس الصوت اللى سمعته روز وجو 

سمعه التيم قبل ما يوصل للممر اللى فيه جو 

وبمجرد ما التفت جو لمصدر الصوت 

ورجع تانى بص مكان الشخص اللى كان واقف 

لقاه اختفى 

ومالهوش اثر

حتى الدم اللى كان نازل من ايديه 

مالهوش اثر على الارض 

روز.دكتور خلينا ننزل نشوف الصراخ ده جاى منين 

وايه سببه 

قام جو بأرهاق

وروز ساعدته يمشى معاها 

والتيم نزل بسرعة بعد ما كان قرب يوصل لجو 

وكلهم اتوجهوا لمصدر الصوت

اللى كان خارج من اوضة جيجي 

وصلوا على باب الاوضة 

وكان واقف مايكل وشه لسرير جيجي

وضهره للباب 

وده خلاهم مش مركزين فى اللى شايفه مايكل

نايا بقلق.فى ايه 

مايكل شاور بأيديه على سرير جيجي

فى نفس اللحظة دخل جو وروز

وكلهم عنيهم على السرير 

وبيقربوا منه ببطء

وشايفين اثر الدم اللى على الارض 

وبمجرد ما وصلوا للسرير واتأكدوا من اللى شايفينه 

صرخت البنات وابتدوا يعيطوا بصوت عالى 

واتصدم جو 

وكيرو فاتح عنيه على اخرها وواقف ساكت مش عارف يعمل اى رد فعل من صدمة المنظر 

ومايكل مكانه على باب الاوضة 

اما جمال واقف ثابت 

وكأنه عارف ان ده اللى هيحصل 

منظر الدم اللى كان مغرق السرير 

والارض 

كان الاصعب منه 

مكان قلب جيجي 

اللى مغروز فيه سكينة 

وحواليه فراغ 

بيدل على ان المكان ده اتمدت فيه ايد او جهاز

سحب قلبها اللى مالهوش اى اثر

غير مكان جرح صعب ان حد يتحمل يشوفه

وفعلا كانت جيجي الضحية الاولى

يتبع

اراااااائكم 😔😔😭

الفصل الثامن 

انتقام شيطاني 

دى كانت مش اول ولا اخر صدمة تحصل فى المكان ده 

ولا اول واخر مرة يقفوا مذهولين 

كانوا كلهم بلا استثناء دموعهم نازلة 

وساكتين 

مش لاقيين كلام يعبروا بيه عن احساسهم فى اللحظة دى 

ولا حتى قادرين يعبروا عن صدمتهم ورد فعلهم على المنظر اللى شايفينه قدامهم 

مايكل كان معجب بجيجي 

يمكن ملحقش يقولها 

وملحقش يحبها 

كان مجرد اعجاب مش اكتر 

لكن اتصدم كأنه يعرفها من سنين 

واقف مصدوم وعنيه على جو 

وعلى جيجي 

اللى غرقانة فى الدم 

ومحدش قادر يعمل اى حاجة بيها يغير اللى حصل 

جمال بتمثيل.هى وصلت بيك للدرجة دى 

انت اتجننت 

انت مريض ياجو مش طبيعي

جو اصلا مصدوم من اللى حصل معاه فوق 

ومنظر جيجي كمل صدمته 

كيرو بذهول بيبص لجو.معقول 

معقول تكون انت اللى ورا اللى احنا شايفينه ده 

لاء مستحيل 

اكيد مستحيل 

مفيش بني ادم فى الدنيا مهما كانت دوافعه يوصل بيه الهوس للمرحلة دى 

كانت نايا وليان وروز مصدومين وبيعيطوا فى سكوت 

وجو عنيه بتلف بين جمال وكيرو 

ومايكل اللى واقف ساكت ومالهوش اى رد فعل 

كيرو.رد وقول ان اللى احنا شايفينه ده خدعة 

ومش حقيقي 

قول انه تمثيل طيب 

قول انها هتقوم دلوقتى 

جو وهو فى صدمته.لازم نخرج من هنا 

جمال.انت بتقول كده بعد ايه 

انت فاهم انك قتلت 

عارف ان في شخص دلوقتى خسر حياته بسبب فشلك 

مايكل بيبص لجو وعنيه مدمعة.هى دى خدعة يادكتور؟

جو.اللى بيحصل هنا مش خدع يا مايكل 

انا متأكد ان القصر ده فيه لعنة 

مايكل.انت جاى دلوقتى تقول الكلام ده 

هو مش انت اللى كنت بتقول ده تخاريف ومفيش حاجة اسمها كده 

جو.صدقونى انا لحد من وقت قليل اوى 

كنت فاهم انها تخاريف 

كنت متخيل ان اللى بيحصل هنا مجرد خدع انا كنت متفق عليها 

لكن مستحيل هتصدقوا اللى حصل معايا 

لكن اقسم لكم 

ان المكان ده ملعون 

نايا بأنفعال هستيري.انت اللى ملعون انت اللى جيبتنا هنا 

انت السبب فى اللى بيحصل ده كله 

انت اللى قتلتها 

ولازم تتحاسب 

جو بخوف واضح.موافق نخرج من هنا 

ومستعد لأى نوع من انواع العقاب

صدقونى 

انا فعلا عايزكم تخرجوا من هنا ومكنتش اتمنى ابدا ان اى شخص من اللى موجودين يحصل معاه اى حاجة تضره 

مش قادر اقول سامحوني 

لكن انا حكمت عقلي اكتر 

وكنت بشتغل بطرق علمية عقلانية 

مالهاش علاقة بأى غيبيات 

جمال حس ان كلام جو فى الوقت ده وبالطريقة دى 

وارد يكون له تأثير على باقى التيم 

وجمال مش عايز حد يخرج من البيت 

لهدف هو الوحيد اللى عارفه 

مايكل.طيب احنا لازم نخرج من هنا علشان نبلغ 

مش هنسيبها مرمية كده 

لازم السلطات يكون عندها علم 

دى جريمة قتل وتمثيل بجثة 

كيرو.صح 

نخرج من هنا 

وبعد ما نخلص اجراءات دفن جيجي 

هنشوف يا دكتور جو ايه اللى المفروض يحصل معاك

جو.موافق

ابتدوا يستعدوا للخروج من الاوضة 

واحد ورا التانى 

وبمجرد ما خرجوا كلهم من الاوضة 

الباب اتقفل بسرعة رهيبة 

وكأن حد هبد دفع الباب بقوة من وراهم 

وخلاه اتقفل لدرجة ان صوته كأنه هز جدران القصر 

كلهم وقفوا يبصوا لبعض ويبصوا للباب 

وهما برضه مقتنعين ان جو سبب فى اللى بيحصل 

اما جو مقتنع تماما ان القصر فعلا فيه لعنة غريبة 

وعارف ان جمال ووجوده وسطهم فيه من وراه هدف 

بس للاسف هو مش عارف يوصل للهدف ده 

مايكل بخوف باصص على الارض.بصوا في ايه على الارض 

كلهم بصوا 

كانت اثار دم على الارض خارجة من باب اوضة جيجي

ومكملة لحد اول ممر الاوض 

فضلوا متتبعين اثار الدم 

متخيلين ان ده القاتل

ودى اثاره 

لحد ما وصلوا لنهاية الاثر ده

وكانت نهايته عند المرايا الكبيرة 

اللى الوضوع فيها ابتدا يزيد اكتر 

والانعكاس ابتدا يوضح بشكل اكبر

الدم انتهى تحت المرايا بالظبط

وظهرت مرة تانية الكتابات اللى ظهرت قبل كده على المرايا 

لكن المرة دى كانت الجملة مختلفة 

وبمنتهى الوضوح 

وكأن شخص واقف بيكتب على لوحة 

قلوبكم سر للعودة 

هنا هو مقركم 

هنا هى مقبرتكم 

لا تحاولوا 

لا مفر لكم من قبضتى 

وفجأة الاضأة اللى فى القصر كلها انطفيت 

لكن فيه اضأة خافتة جدا عكساها المرايا 

مش معروف مصدرها 

القصر كله ضلمة وبس 

مصدر الانعكاس ده منين بالظبط

كان من الواضح انه خارج من المرايا نفسها 

لأن مفيش اى مصدر تانى 

وهنا ابتديت تظهر حاجة غريبة جدا فى المرايا وتحت الكلام اللى اتكتب 

فى البداية بيقول جو 

تخيلنا اننا بيتهيألنا 

او بنتوهم 

لكن كان حقيقي 

ظهرت انعكاسات غريبة لخيالات مش موجودة بينا 

خيالات مش واضحه 

مالهاش اى ملامح

خيالات كتير 

بالنسبالى قدرت احدد ان واحد من الخيالات دى كانت صاحبة الجسم اللى من غير رأس 

 والخيال الثانى كان صاحبه الراجل اللى لابس اسود 

وعرفت انه ممكن يكون هو لأنه واقف وضهره لينا كلنا 

هى نفس الهيئة اللى شوفتها ماشية قدامى فى ممر الاوض 

وابتديت الخيالات تزيد 

كلنا فاتحين عنينا 

بنحاول نقنع نفسنا ان اللى فى المرايا ممكن نكون احنا 

لكن لاء 

احنا كل عددنا كان بجيجي 

8

اللى ظهر فى المرايا 

كان 6 خيالات بس

وفجأة زاد الانعكاس 

وظهر خيال سابع 

لكن الخيال السابع كانت ملامحه بتوضح بسرعة 

وعرفنا فى اللحظة دى ان صاحبة الخيال السابع هى جيجي 

اه هى 

وشها 

وجسمها 

ونفس الجرح اللى فى مكان قلبها 

موجهة عنيها على شخص معين 

لكن فى الضلمة احنا مقدرناش نحدد هى بتبص لمين بالظبط

وليه هى بالذات اللى ملامحها وضحت 

طيب هو لو الخيالات اللى فى المرايا لينا احنا 

كده ناقص حد مننا 

ليه 7 خيالات بس واحنا اصلا 8

فجأة ابتديت ابتسامة جيجي تظهر اسنانها اللى كانت عبارة عن مخالب 

مرعبة 

صفرا 

لكن كانت واضحة 

المنظر كان مخيف جدا 

ومرعب 

انا مش فاكر حاجة غير انى سامع صوت عياط عالى 

مش قادر اقرر اذا كانت دى نايا ولا ليان  ولا روز 

لكن كان فيه صوت مسموع 

انا عارف انه خارج برعب وخوف مقدره كويس جدا

لأن انا كمان حاسس بيه 

لكن فى اللحظة دى اخفى عن عنينا كل الخيالات والانعاكاسات دى 

اول ما رن تليفون مايكل 

برنة مكملتش لأخرها 

كان مايكل كمان خايف ومرعوب 

وده خلاه ملاحظش ان تليفونه بيرن غير بعد ما اختفيت الخيالات والاضاءة رجعت 

سمع صوت رنة تليفونه لكن بمجرد ما طلع التليفون من جيبه 

كانت الرنة فصلت 

وشاف رقم صاحبه اللى بعتله الرسالة بتفاصيل جمال 

حاول مايكل يرجع يرن عليه مرة تانيه 

ولسه على ملامحه تعبيرات الصدمة والرعب 

لكن على امل انه يسمع اى حاجة تخليه يفهم سبب اى حاجة بتحصل 

لكن للأسف الشبكة راحت مرة تانية 

لكن فى نفس اللحظة رن تليفوني 

بصوت رسالة 

طلعت تليفونى بصيت فيه 

وكلهم حواليا مستنيين يعرفوا او يشوفوا رد فعلى 

على امل ان اللى حاصل ده يكون فيلم بيشوفوه

لكن الرسالة صدمتنى 

لدرجة انى مديت ايدي بتليفونى لكيرو يقرالهم الرساله بنفسه

لأنى خلاص بقيت مش قادر اقول اى حاجة 

مسك كير التليفون 

وبيبص على الرسالة اللى جاية من ايميل نائل 

وكانت رد لرسالة جو لما كان بيشكره على اول خدعة 

والرد كان صادم 

نائل.جو بحاول اتصل بيك تليفونك مش بيجمع ابدا 

بس خدع ايه 

اتصل بيا السكرتير الخاص بيك قبل انتقالك للقصر بيوم 

وبلغنى ان التجربة اتأجلت وبالتالى انا اجلت الشغل بتاعى 

وحاليا انا سافرت عندى شغل 

وهرجع بعد شهر 

لو قررت تختار حد تانى غيري بلغنى وانا هساعدك توصل لشخص بروفيشينال فى نفس المجال 

بتاع الخدع البصرية 

طبعا كيرو بيقرأ الرسالة 

ومايكل حاليا بقى موضع اتهام 

لأن هو المساعد الخاص ب جو 

لكن جو مش بيفكر فى مايكل على انه متهم 

مايكل بهستيريا وهما لسه قدام المرايا الملعونة 

هو ايه الجنان ده 

مساعد مين اللى اتصل بيه علشان يأجل ميعاد الشغل 

الكلام ده محصلش 

اوعى تصدقه 

انت عارف يا جو ان انا مش معايا اى تفاصيل عن الشخص اللى انت متفق معاه 

انت اللى بتتواصل معاه وانت اللى مرتب كل حاجة 

جو بهدوء.مايكل 

اهدا 

انا اكيد مش شاكك فيك 

انا واثق ان كل اللى بيحصل ده مدبر 

بس مين اللى بيدبر كل ده 

معنى انه حصل قبل ما نيجي المكان ده 

يبقى دى مش مجرد لعنة للمكان 

لاء ده حد كان عنده نية مسبقة للى بيحصل ده 

كيرو.ايوة بس مين 

ومين اللى فى المرايا دول مع جيجي

وايه اللى هيحصل 

احنا كل اللى بيحصل معانا بيقول اننا مش هنخرج من هنا 

وفى لحظة واحدة قطع النور مرة تانية 

وبمجرد ما طفى النور 

سمعوا صوت صرخة عالية جدا

وحاجة اتهبدت بقوة فى الارض 

ومع نهاية الصرخة رجعت الاضاءة علشان يواجهوا المصيبة الجديدة 

وهى ان اللى وقعت من ممر السلم 

روز

اللى نزلت على الارض وهى ميتة 

ومن عدم قدرتهم على استيعاب كل اللى بيحصل نزلوا يجروا على الريسيبشن 

على امل ان روز لسه مماتتش 

لكن برغم ان مفاتش لحظات على وقوعها بالشكل ده 

لكن شافوا نفس اللى حصل فى جيجي 

روز مفرغ مكان قلبها 

ومش موجود 

جو بصدمة.جمال انت السبب 

انت اللى ورا اللى بيحصل ده كله 

قدامنا كلنا لازم نعرف انت مين 

يتبع 

شكراااااااااااااااا لكل الناس اللى دعيتلى انا وابنى

الفصل التاسع 

انتقام شيطانى 

كلهم نظرهم اتوجه لجمال 

لأن من وجهة نظرهم محصلش منه 

اللى يوصل جو انه يهاجمه بالشكل ده 

جمال بمنتهى الهدوء.لاء مش معقول يا دكتور 

هو انت الصدمة اثرت على قواك العقلية للدرجة دى 

بتدور على حد تحمله نتيجة اخطائك 

جو بأنفعال.انا مش مجنون يا جمال 

وانت عارف ومتأكد انى مش مجنون 

ولا بتجنى على حد علشان احمله اى مسؤلية 

بالعكس 

انا قولت انى على اتم استعداد لأى مسألة واى عقاب 

لكن انت اللى رافض تخلينا نخرج من هنا 

انت اللى ورا كل اللى بيحصل 

انا متأكد 

معرفتك الغريبة بالمكان ده 

بتأكدلى احساسى 

جمال بنفس الهدوء.هو انت شايف ان المنظر اللى قدامنا ده

يتحمل كل اللى انت بتقوله 

واحدة مقتولة فوق فى اوضة 

والتانية مقتولة ومرمية تحت رجلينا 

ومحدش عارف الدور الجاى على مين