الحلقة الحادية عشر والثانية عشرة والثالثة والرابعة والخامسة عشرة رواية_رشيد_وكارمن بقلم الكاتبة_ملك_إبراهيم
فيه لحظة واحدة.. ممكن تقلب كل حياتك.رشيد كان فاكر إنه عارف كارمن.. كان فاكر إنه عارف قلبها البرئ الطيب.. لحد ما سمع الجملة اللي كسرته
انا مش عارف اقولك ايه يا رشيد.. بس الواضح ان كلام سعد بشار صح.
انتفض جسمه وبقى قلبه على وشك التوقف، انقطعت أنفاسه فجأة وكأن روحه بتنسحب منه وبتسيبه يعيش اللحظة دي من غير قلب ومن غير روح عشان ميشعروش قلبه وروحه بالألم اللي بيعيشه دلوقتي.
قرب منه خالد وطبطب على ضهره بدعم وقال بحزن رشيد انت لازم تكون قوي وتستقبل الصدمة دي بعقل عشان نقدر نثبت برائتك ونخرجك من هنا.
سأله رشيد بصوت مبحوح وهو بيبص قدامه بصدمة عرفت كانت بتعمل ايه هنا؟
هز راسه بالموافقة وقال بحزن كانت بتزور سعد بشار.
غمض رشيد عينيه بصدمة وبعدين ضرب بقبضة ايديه فوق الطرابيزة قدامه بقوة وهو بيصرخ بصدمة مش مصدق اللي عملته فيه بعد حبه الكبير ليها وعشقه ليها اللي تخطى حدود العشق، ازاي اتعاونت مع المجرم ده! ازاي قدرت تعملها فيه! هل دي حبيبته البريئة النقية اللي خطفت قلبه! فين راحت برائتها؟ هل قدرت تخدعه زي ما عملت والدتها مع والده قبل كده؟ هل كان جده عنده حق لما حذره منها وقال ليه انها زي والدتها؟ هل ده جزائه بعد كل اللي عمله معاها!
قرب منه خالد ومسك بايديه وقال ليه بقوة رشيد انت لازم تهدى عشان نقدر نفكر ونلاقي حل، ومتنساش انها مراتك، يعني حتى لو اتهمناها يبقى هنضر اسمك وسمعتك.
اتبدلت نظرات عينيه لنظرات نارية قاسية، أراد يواجهها بخيانتها وينتقم منها بقسوة، نيران مشتعلة في قلبه مش هيحس بيها حد غيره، أفكار كتيرة بالانتقام استرسل ليه عقله بيها عشان تهدى النيران المشتعلة جواه.
بص ليه خالد بقلق وحس بالصراع الداير جواه. قال ليه رشيد بصوت ذو نبرة قاسية انا لازم اشوفها يا خالد.. اعمل اي حاجة وهتهالي هنا.
حدق بيه خالد بقلق، حس بنيته في الانتقام منها، عارف ان ده مش الوقت المناسب لمناقشته في حاجة، هز ليه راسه بالموافقة عشان يهديه شوية حاضر يا رشيد.. اللي انت عايزه هيتنفذ.
مشي خالد وهو بيفكر ازاي يحميه من غضبه وأفكاره المتهورة في الانتقام، ملقاش قدامه غير الذهاب لجد رشيد.
راح للواء المتقاعد نور الدين الجبالي جد رشيد. وقال ليه كل حاجة.
متفاجئش جد رشيد كتير لما قال ليه خالد ان مرات رشيد هي اللي اتعاونت مع سعد بشار ضده، ده اللي كان مستنيه انه يحصل من بنت ليها أم زي سهير سالم، بيحط كل الغلط على حفيده؛ هو اللي راح ليها وحط اسمه وحياته بين ايديها، أتأخر جده بمساعدته لحد دلوقتي عشان يديله الوقت الكافي عشان يصحى من العشق ده اللي عمى عينيه وخلاه أسير للبنت دي اللي حذره منها قبل كده، عايزه يعرف الحقيقة ويندم لإنه مسمعش لكلام جده وراح اتجوزها رغم عن الكل.
كان جد رشيد مستني انتهاء التحقيقات مع حفيده وهو على يقين ان التحقيقات هتثبت براءته، لكن مش ممكن يستنى بعد كده، عليه يعمل كل حاجة لاثبات براءة حفيده بنفسه وإخراج البنت دي من حياته للأبد.
راح جد رشيد لصاحبه اللواء طلعت. استقبله اللواء طلعت بترحاب شديد. قعد جد رشيد وقاله وبعدين يا طلعت! .. التحقيق مع رشيد طول اوي وكل ده ملوش لازمة!
جاوبه اللواء طلعت باحترام حضرتك عارف الإجراءات.. بس انا عايز اطمن حضرتك ان كل التحقيقات الجديدة بتاعتنا في صالح رشيد رغم أقوال مراته اللي مكانتش في صالحه ابدا!!
غضب جد رشيد وكمل بعصبية انسى موضوع مراته ده يا طلعت لانها السبب في كل اللي حصل.. خلينا في المهم وطمني وصلتوا لأيه؟
جاوبه اللواء طلعت مفيش اثبات واحد ظهر يثبت ان رشيد له علاقة بالمخد.. رات، ومفيش اي بصمات له على شنطة المخد.. رات اللي اتمسكت في أوضة نومه، وثبتت بصمات كتير مختلفة على الشنطة والأكياس اللي جواها وده بيأكد ان الشنطة دي اتحطت في بيته عن طريق ناس رتبوا لكل ده.
هز جد رشيد راسه مؤكد انا عرفت مين اللي رتب كل ده يا طلعت.
حدق بيه اللواء طلعت بفضول، قال جد رشيد مرة تانية وجاوب فضوله سعد بشار اللي رشيد قبض عليه في قضية اخت.. طاف أتوبيس البنات.
بص ليه اللواء طلعت بصدمة وقال باستغراب وحضرتك عرفت ازاي الموضوع ده؟!
جاوبه جد رشيد هو راح بنفسه واعترف ل رشيد وكان هدفه من الاعتراف ده انه يعرف رشيد انه انتصر عليه وانتقم منه.
سمع ليه اللواء طلعت باهتمام وقال يبقى احنا لازم نخليه يعترف.
قال جد رشيد ببساطة مش محتاجين نضغط عليه عشان يعترف.. كفايه انكم تقبضوا على رجالته اللي برا وتعملوا تطابق للبصمات وانا متأكد ان هتطلع بصامتهم هي اللي موجودة على الشنطة والمخد.. رات.
هز اللواء طلعت راسه بالموافقة وهو بيسمع خطة اللواء المتقاعد نور الدين الجبالي.
بعد اسبوع..
قدروا يقبضوا على عدد من رجال سعد بشار بخطة مرتبة من اللواء نور الدين الجبالي وتم التأكد من تطابق البصمات الموجودة على أكياس المخد.. رات مع بصماتهم وبدأ التحقيق معاهم ومع سعد بشار.
اللواء طلعت بلغ جد رشيد ان بإمكانهم إطلاق سراح رشيد دلوقتي لكن مش ممكن يرجع لشغله لحد ما تخلص التحقيقات مع سعد بشار ورجالته واثبات براءته بالكامل وخصوصًا بعد ذكر اسم مرات رشيد في اعترافات رجال سعد بشار.
خلال الاسبوع ده. كان رشيد في أسوء حالاته النفسية، خالد امتنع عن زيارته من يوم كلامه الأخير معاه لما طلب منه يجيب كارمن لحد هنا.
دخل ليه واحد من الضباط وبلغ رشيد ان هيتم إطلاق سراحه دلوقتي بعد إثبات براءته.
خرج رشيد وكل اللي بيشغل أفكاره هو الذهاب لكارمن ومواجهتها باللي عملته والانتقام منها. مفكرش ايه اللي حصل في القضية وازاي تم اثبات براءته، كل اللي بيفكر فيه دلوقتي هو المواجهة والانتقام. لكن جده مدالوش الفرصة.
كان جده في استقباله ومعاه خالد وكان معاهم مأذون شرعي. أراد منه جده انه يطلق مراته قبل خروجه من المبنى ده عشان يطوي صفحتها من حياته ويبدأ حياته من جديد من غيرها، لكن رشيد رفض يطلقها قبل ما يواجهها ويعرف منها ليه عملت فيه اللي عملته ده؟
مقدرش جده يقنعه بالطلاق، استسلم جده لرغبته وسابه يروح ليها ويواجهها في بيت والدتها لكنه اشترط ذهاب خالد معاه عشان يوقفه عن أي فعل متهور بيفكر فيه.
راح رشيد مع خالد بعربيته، كانت أسئلة كتيرة بتتزاحم براسه، مش مصدق لحد دلوقتي اللي عملته فيه.
وقفت العربية قدام بيت والدتها، نزل من العربية وهو بيجري لبيتها بجنون، عايزها تجاوب على أسئلته، عايزها تقوله ان اللي عملته ده مش حقيقي.
وقف يخبط على باب بيتها بقوة، جري عليه خالد وحاول يهديه، فضل رشيد يخبط على الباب بقوة ومجاش ليه رد من جوه، دخل في حالة هستيرية وهو بيخبط على الباب بقوة لحد ما كاد انه يحطم الباب. حاول خالد يسيطر عليه ويهديه بصعوبة، لكن رشيد كان بيصرخ وبينادي اسمها بطريقة جنونية. محدش حس بالنيران المشتعلة في قلبه.
بدأ الجيران يتجمعوا حواليهم وقال ليهم حارس العقار انها سابت البيت هي ووالدتها ومشيوا ومحدش يعرف راحوا فين!
وقف رشيد بينادي اسمها بجنون، اتجمع حواليهم عدد من جيران البيت ووقفوا بيتابعوا انهياره وهو بيركل الباب بقوة وبينادي اسم كارمن بصراخ، تابع خالد نظرات الجيران لرشيد بين الدهشة والشفقة، بدأوا يتهامسوا ويطلقوا عليه مجنون متحملش خالد رؤيته بالحالة دي. أخده خالد بقوة وجذبه للعربية، كان بينادي اسمها بصراخ وبيبص لبيتها مستني خروجها منه، أخده خالد بصعوبة لجوه العربية، قعد رشيد جوه العربية وهو بيردد اسمها بجنون وموقفش عن نطق اسمها، حس خالد بالقلق عليه، أخد تليفونه وكلم جد رشيد وقاله بحالة رشيد السيئة، وقال له انه هياخده للمستشفى وطلب منه سرعة الذهاب ليهم للمستشفى.
رواية رشيد وكارمن بقلمي ملك إبراهيم.
بعد مرور اسبوعين وهو جوه المستشفى متمدد فوق السرير، باين عليه الضعف الشديد ووشه بقى شاحب وجسمه بقى نحيف بعد امتناعه عن تناول الأكل. مش حاسس بالرغبة في أي حاجة، امتنع عن الكلام لحد ما اعتقد الكل انه فقد النطق، لكنه كان بينطق كلمتين اتنين بس عند حضور صاحبه خالد ليه، كان بيسأله عن كارمن وملقاش جواب من خالد غير الصمت والنظرات الحزينة على حالته.
كان جده بيتابع حالته مع الدكتور المعالج ليه، أكد ليه الدكتور ان رشيد محتاج للعلاج النفسي واذا اتأخر العلاج ده ممكن يقوده الحالة دي لليأس وبعدين التفكير في الانت.. حار.
بص ليه جده بحزن، مش ممكن يستنى أكتر وهو شايف حفيده بيفقد حياته ببطء، ومش ممكن يجازف بمستقبله لما ينتشر خبر خضوعه للعلاج النفسي بين زمايله وصحابه، فكر في ارساله لبره البلاد، عشان يتعالج نفسيًا في واحدة من المستشفيات بسرية ومحدش يعرف بحاجة ويرجع زي الأول.
بعد كام يوم..
بدأ اللواء نور الدين الجبالي في إجراءات سفر حفيده لإحدى الدول الأجنبية لتلقي العلاج النفسي بسرية تامة في واحدة من أكبر المستشفيات، كانت بتزيد حالة رشيد سوء وبيشتد عليه الشعور بالمرض الجسدي والنفسي، مسابتش كارمن أفكاره لحظة واحدة، حاول خالد يساعده في البحث عنها، لكن البحث عنها جه بالفشل ومقدرش خالد يوصل ليها لحد ما اعتقد انها سابت البلد وسافرت مع والدتها للخارج.
استنى جده لحد ما جه معاد السفر وقاله قبل ساعات من معاد إقلاع الطيارة. بقى رشيد في حالة سيئة ومش بتسمح ليه بالاعتراض على السفر، بدأ يتسلل ليه الشعور باليأس وعدم الرغبة في الحياة، بقى هو كمان عايز العلاج النفسي عشان يرجع لنفسه من جديد.
وقفه جده في المطار قبل إقلاع الطيارة، وقف قدامه وقال ليه بقوة اسمعني كويس يا رشيد قبل ما تسافر.. انت هتخرج من البلد دي عشان تتعالج وترجعلنا رشيد حفيدي القوي، وتنسى كل اللي فات وتبدأ حياتك من جديد.
بص رشيد لجده بضعف، محدش حاسس بالألم اللي بيحس بيه جواه، اشتاق ليها كتير رغم قسوتها عليه، عايز يطمن عليها ويعرف هي راحت فين؟ نفسه يسألها هو عمل ايه معاها عشان تفكر في خيانته!
موقفش عقله عن التفكير فيها وموقفش قلبه عن عشقه ليها والخوف عليها، اعتقد ان بسفره دلوقتي ممكن يهرب من أفكاره وذكرياته معاها وبإمكانه نسيانها بالكامل.
بص ليه جده بقوة وكمل وقبل ما تخرج من هنا لازم تطلق البنت دي وتخرجها من حياتك للابد.
بص ليه رشيد بصدمة، خفق قلبه بقوة، مقدرش ياخد القرار ده وهو بالحالة دي، في شعور قوي جواه بيقوله ان في حاجة ميعرفهاش، مازال مش مصدق اللي عملته فيه! اتوتر خالد وهو واقف جنبهم وبيتابع رد فعل رشيد. قال رشيد لجده بتعب بلاش نتكلم في الموضوع ده دلوقتي يا جدي.. انا حقيقي تعبان ومحتاج ابعد عن هنا.
قال ليه جده بقوة انت هتفضل تعبان طول ما البنت دي شايله اسمك بعد اللي عملته فيك!
بص رشيد قدامه بتفكير، طبطب جده فوق كتفه بدعم وقال انا عارف انه قرار صعب بس لازم تاخد القرار ده يا رشيد قبل ما تسافر، لانك مستحيل هتقدر تنساها وهي شايله اسمك.
هز راسه بالموافقة وقال وهو شارد بأفكار كتيرة عندك حق يا جدي.. انا فعلاً لازم اخد القرار ده، بس انا محتاج اكون أقوى من كده عشان اقدر اخده.
بص جده لخالد وتبادلت النظرات بينهم، هز خالد راسه للجد مطالبًا منه انه ميضغطش عليه أكتر. تفهم الجد اللي بيمر بيه وقال وانا واثق فيك يا رشيد ومتأكد انك هتاخد القرار ده وتنفذه اول ما تخرج من البلد هنا، وهستنا منك مكالمة تقولي فيها انك طلقتها خلاص.
راح رشيد وهو بيفكر في كلام جده. كل ما قرب من الطيارة كان بيعتقد ان المسافات البعيدة بينه وبينها تقدر تساعده على النسيان، أقلعت الطيارة وأخدته لبره البلاد.
بلد جديدة وناس جدد وحياة جديدة مختلفة، عدت سنه من عمره جوه المستشفى بيتلقى العلاج النفسي، وسنة كمان بره المستشفى مع متابعة العلاج النفسي مع الدكتور المعالج، وعامين قدر فيهم ينشئ شغل خاص بيه بعد الانفصال عن شغله في الشرطة بعد قضيته الأخيرة ومرضه وسفره للخارج، عام تلو الآخر وهو بيحاول يتعايش من غيرها والتأقلم مع حياته الجديدة وتحقيق نجاح في شغله الجديد في مجال إدارة الأعمال عمل كل اللي في وسعه عشان يرجع زي ما كان قبل كده قبل وجودها في حياته.
مقدرش ياخد قرار الطلاق رغم سفره وإقامته بالخارج أربع سنين، مقدرش يرجع قبل ما يتعافى من عشقه ليها واثبات نفسه في الشغل من جديد، كان دايمًا على تواصل مع خالد وكان خالد بيدور عليها في كل مكان. كان الجد دايمًا بيتواصل مع رشيد وبيطالبه بتنفيذ قرار الطلاق، لحد ما في مرة.. رشيد قاله انه خلاص طلقها . في اللحظة دي اطمن جده وحس بالراحة ومتكلمش معاه في الموضوع ده مرة تانية.
بعد مرور أربع سنين بين العلاج النفسي ومحاولاته الكتيرة لنسيانها ونجاحه في شغله الجديد. جت ليه مكالمة من خالد بيأكد ليه انه شاف كارمن بتشتغل في واحد من المطاعم وباين عليها الفقر الشديد، مقدرش يقعد بالخارج بعد معرفته بوجودها في مصر، قرر يرجع عشان ينهي علاقته بيها بعد ما يتأكد من خيانتها ليه بجد. اتبدل العشق جواه للكراهية، ده اللي اعتقده لحد ما اتقابل معاها في الحفلة! مشاعره اتجاهها بتغضبه، مازال قلبه بيخفق بقوة عند رؤيتها! مازال بيشتاق ليها اكتر من الأول . مش مصدق انها مازالت في قلبه رغم قسوتها وخيانتها ليه! عشقه ليها بيرهق قلبه، عايز يعرف سبب واحد يدفعها لكده! يمكن يقدر ينتزع عشقها من قلبه بعد معرفة السبب اللي دفعها لخيانته.
رشيد رجع من ذكرياته المؤلمة دي وهو لسه في المكتب مع خالد
فاق من ذكرياته على صوت خالد وهو بيتكلم معاه بهدوء رشيد.. انت لازم تتكلم معاها وتنهي الموضوع ده بقى! انا ساعدتك توصلها وتعرف مكانها عشان تعرف منها السبب اللي خلاها تعمل فيك كده وترتاح.
بص ليه رشيد بتفكير، هز خالد راسه مؤكد ايوه يا رشيد انت لازم تاخد القرار النهائي عشان تكمل باقي حياتك.. يا اما تطلقها وتكمل حياتك مع واحدة تانيه، يا اما تسامحها وترجعها حياتك تاني وتاخدها وتسافروا بعيد عن هنا.
حدق بيه رشيد بصدمة مردد اسامحها!! اسامحها ازاي بعد ما دمرت حياتي! انا خسرت شغلي بسببها وخسرت اهلي وعشت في الغربه اربع سنين اتعالج عشان اقدر بس انساها!
قال ليه خالد بثقة ورغم كل ده مقدرتش تنساها.
بص له رشيد بصدمة، هز خالد راسه بالايجاب وقام من مكانه وهو بيضيف انا هخرج وابعتهالك.. يمكن لما تتكلم معاها تلاقي اللي انت عايزه وترتاح.
خرج خالد من الأوضة ومستناش رده عليه، قعد رشيد في مكانه بيفكر بصدمة! مش عارف بجد هو عايز ايه! هل ممكن ينهي علاقته بيها رسميًا ويسيبها ويتجوز من غيرها؟ ولا ممكن يسامحها على اللي عملته فيه ويرجع ليها مرة تانية؟ لكنه مش بالضعف ده عشان يرجع ليها بعد اللي عملته! عايز بس يعرف سبب اللي عملته، عايز يسمع صوتها وهي بتقوله ليه عملت فيه كده !
صوت خطواتها خرجه من أفكاره، وقفت بتوتر عند الباب، خفق قلبها بقوة لما شافته قدامها. بص ليها واتأملها بقوة، لسه قادر يحس بيها وباللي بتحس بيه، كان شايف خوفها وتوترها بوضوح، كان بيسمع صوت خفقات قلبها السريعة.
اتقدمت
---
ليه بخطوات مرتبكة. كان جسمها بيرتعش بقوة. عجز لسانه عن الكلام عند رؤيتها، أراد بس يحضنها عشان يحسسها بالأمان ويختفي خوفها.
وقف من مكانه وهو بيتأملها بنظرات كلها لهفة، قد ايه اشتاق ليها! أغضبته مشاعره اتجاهها اللي مازالت بتحيا في قلبه، هو عايز ايه أكتر عشان تتبدل المشاعر دي جواه وتبقى باردة، والأفضل لو تختفي وميخفقش ليها قلبه مرة تانية.
وقفت قدامه وجسمها بيرتعش بخوف، قالت ليه بتوتر رشيد انا بعمل ايه هنا؟ ليه قبضوا عليا وخدوني من البيت بالطريقه دي؟!
أغضبته برائتها اللي بتخدعه دايمًا، نظراته القاسية مع نبرة صوته الحادة وهو بيجاوب عليها من أربع سنين انا كمان خدوني من البيت وقبضوا عليا بنفس الطريقه دي وانا مكنتش عارف ليه!
اشتدت نبرة صوته بقسوة وهو بيقرب منها أكتر ويمسك بدراعاتها ويضغط عليها بقوة وغضب انتي وقتها كنتي تعرفي قبضوا عليا ليه؟
لمعت عينيها بالدموع وهي بتتألم من قبضة ايديه القاسية، انسابت دموعها وهي بتجاوب عليه بخوف انا اسفه.
حدق بيها بقسوة مردد بذهول اسفه!! اترعش جسمها بخوف. تلقت صفعة قوية من ايديه على وجنتها وهو بيصرخ فيها اسفه بعد ما دمرتي حياتي؟!... بقلمي ملك إبراهيم.
وبعدين معاكي بقى يا كارمن يابنتي اعترفي وقوليلنا عملتي كده ليه جننتي الراجل وجننتينا معاه
بس تحسوا برضه ان في حاجة غلط وكارمن متعملش كدا انتوا رأيكم ايه
الحلقة_ال
رواية_رشيد_وكارمن
الكاتبة_ملك_إبراهيم
في كتير حاولوا يفرقوا بينهم.. وهما حاولوا كتير يفضلوا مع بعض.. بس كل مرة كان فيه حاجة أكبر منهم بتقف في النص
اسفه بعد ما دمرتي حياتي؟!
حطت ايديها فوق وجنتها بصدمة وهي بتبكي بخوف. جذب ايديها بعيد عن وشها وهو بيصر.. خ فيها بجنون قوليلي اسفه على ايه بالظبط؟ ردي عليا.. انطقي.. قولي ليه عملتي فيا كده؟!
بكت أكتر وهي بتبص ليه بخو.. ف ومقدرتش ترد عليه، اتجنن أكتر وص فعها مرة تانية بقوة وهو بيصر.. خ بجنون وبيردد انطقي.. قولي اسفه علي ايه؟
دخل خالد لأوضة المكتب بسرعة وجري عليهم وحاول ياخد رشيد بعيد عنها، كان رشيد بيصر.. خ وبيطلب إجابتها عليه وهي بتبكي وبتحط ايديها على وجنتيها بخو.. ف وجسمها بيرتعش بشدة.
قال ليه خالد بقوة وهو بياخده بعيد عنها اهدى يا رشيد انت كده هتمو... تها في ايدك!
انفعل رشيد أكتر بغضب ياريت كنت اقدر امو... تها وارتاح.
رفعت وشها وهي بتبكي وبتجاوب على كلامه بصر.. اخ ياريت امو... ت بجد عشان ارتاح منك.
بص لها بصدمة وقال ليها بغضب ترتاحي مني! انتي كمان اللي عايزة ترتاحي مني!
جاوبته بصر.. اخ وهي بتبكي وبتحط ايديها فوق وجنتيها الملتهبة من ضربه ايوه عشان انت ضر..بتني جامد وانا معملتلكش حاجة!
وقف شوية يبص لها بصدمة، بص ليها صاحبه خالد هو كمان بذهول! ازاي معملتلوش حاجة! بص رشيد لخالد وقال ليه بصدمة بتقولك معملتليش حاجة!!
وبعدين بص ليها وقال بغضب انتي فعلاً معملتيش حاجة! انتي دمرتي حياتي بس! خسرتيني شغلي واهلي وكل حاجة.
قالت وهي بتبكي ما انا قولتلك اسفه.
بصلها بصدمة وذهول، كتم خالد ضحكته وهو بيسمع ردها البسيط، كانت زي الطفلة الصغيرة وكأنها بتتكلم مع والدها. قرب منها رشيد ووقف قدامها وقال ليها بغضب وانفعال وهو بيشاور ليها بايديه اسفه دي تقوليها لما اكون رجعت البيت وملقتكيش مجهزه الغدا.. وقتها ممكن تقولي اسفه وانا اسامحك!
جاوبته بعناد ما انت كنت على طول بترجع البيت ومش بتلاقيني مجهزه الغدا ومكنتش بتزعل ومكنتش بقولك اسفه!
رشيد بغضب والله ده شئ يتحسبلي اني كنت زوج كويس معاكي وبستحمل دلعك وأكلك اللي ميتكلش اصلا.
بصت ليه بحزن وقالت بصدمة يعني انا اكلي كان وحش؟
حس بحزنها وصدمتها، عارف انه اتجوزها بنت مدللة، كانت بتعتمد عليه في كل حاجة، وده اللي اتعودت عليه . عينيها اللامعة بالدموع وجعت قلبه، مش عايز يجرحها. تراجع عن كلامه وجاوبها بهدوء لا هو كان بيبقى حلو شوية.
ابتسمت وسألته برقة بجد؟
هز راسه بالايجاب وهو بيبص ليها بعشق واشتياق.
تابعهم خالد بصدمة، قال خالد بصوت قوي وخرجهم من حالة العشق اللي جمعتهم من جديد أكل ايه اللي حلو ووحش.. انتوا بتتكلموا في ايه!
فاق رشيد على صوته وتراجع لورا بعيد عنها وهو بيحاول يسيطر على مشاعره اتجاهها. اتكسفت كارمن ووطت وشها للأرض، سمعت صوت رشيد وهو بيتكلم مع خالد بصوت غاضب هي دي بقى كارمن.. بتحول اي كلام لصالحها!
رفعت وشها وردت عليه بغيظ شوفت.. وهو ده بقى رشيد، كل حاجة بيجيبها فيا وانا معملتش حاجة!
رد عليها رشيد بغضب اه فعلا انتي مبتعمليش حاجة ابدا.. انتي ملااك! انا اللي بخرب كل حاجة!
جاوبته بتحدي فعلا انا ملاك.. وانت اللي بتخرب كل حاجة.. ولا نسيت الشقه اللي كسرتها وبهدلتها وانا اللي نضفتها ورتبتها.. انت اصلا دايماً كده.. انت تخرب كل حاجة وانا ارتبها تاني.
قال ليها بغضب والله!! ونسيتي لما كنت برجع من شغلي واساعدك في كل حاجة! نسيتي لما كنت بنضف معاكي الشقه وارتبها معاكي!
جاوبته بثقة على فكرة كل الرجالة المتجوزين بيعملوا كده واكتر كمان.
صدح صوت خالد عالي وهو بيقف بينهم وبيسمع كلامهم بس خلااااص..
بص ليهم بصدمة وكمل مسح وتنضيف ايه! وترتيب شقة ايه اللي انتوا بتتكلموا فيه!
بعد رشيد عنها وشاور عليها بغضب وقال هي دايمًا كده مفيش فايدة فيها!
قالت بصراخ انت بتجيب كل حاجة عليا انا ليه!
صرخ خالد بينهم خلااااص انا اللي غلطان.
وبعدين قال لرشيد خلينا نقفل المحضر ده يا رشيد عشان كارمن تروح.
بصت ليه كارمن بصدمة وقالت بفضول محضر ايه؟!
بص ليها خالد بتوتر وبعدين بص لرشيد. جاوبها رشيد ببرود محضر وخلاص.
قرب رشيد من خالد ومضى على محضر التنازل، وقفت كارمن بتبص ليهم بدهشة، طلب خالد توقيعها وبعدين قال ليها بهدوء دلوقتي تقدري ترجعي البيت يا كارمن.. وانا بعتذر على كل اللي حصل.
بصت ليهم بدهشة، وطى رشيد وشه وهو بيتعمد انشغاله بتليفونه، وقفت بتتطلع ليهم باستغراب وبعدين مشيت من غير ما تضيف اي كلام.
رفع رشيد عينيه بعيد عن تليفونه بعد خروجها، بص للباب وزفر بتعب. قرب منه خالد وقال ليه بثقة في حاجة غلط يا رشيد!
بص ليه رشيد بفضول، هز خالد راسه بالايجاب مؤكد واحدة بشخصية كارمن اللي انا شوفتها قدامي دلوقتي دي.. مستحيل تخونك وتشارك مجرم زي سعد بشار في خطته!
هز رشيد راسه بتأكيد وقال ليه هو ده بقى يا خالد اللي تاعبني.. انت شوفتها واتعاملت معاها كام ساعه بس ومش مصدق انها تعمل كده.. انا بقى المفروض اعمل ايه وهي مراتي وعشت معاها تحت سقف واحد وبقيت اعرفها اكتر ما هي تعرف نفسها!
اتنهد خالد بتفكير وحيرة، بص رشيد قدامه بشرود وكمل عقلي مش قادر يستوعب لحد دلوقتي ان كارمن ممكن تعمل فيا كده! وانا اكيد مش غبي لدرجة اني اتخدع في شخصيتها.. يعني رغم السنين اللي عدت علينا وكارمن هي هي متغيرتش! لسه رقيقه وبتبكي من اقل حاجة زي الاطفال!
ابتسم خالد وهو بيسمعه وبعدين قال ليه بهدوء هي فعلاً غريبة اوي.. واكتر حاجة استغربتها انها بتتحول لطفلة فعلا في وجودك.. بحس انها بتتعامل معاك وكأنك باباها!
ابتسم رشيد وهو بيفتكر حياتهم مع بعض وجاوب انا دايما كنت بحس اني مسؤول عنها.. كارمن اتحرمت من باباها وهي طفلة ومامتها كانت طول الوقت بعيدة عنها.. كارمن كانت دايما محتاجة للحنان والاحتواء، وده اللي كنت بحاول اعوضها عنه.
قال خالد بثقة يبقى اكيد في سبب قوي اجبرها تعمل كده! او يمكن احنا فهمنا غلط..
سكت خالد شوية بيفكر بحيرة وبعدين كمل بس هنكون فهمنا غلط ازاي وانا شوفتها بنفسي لما كانت خارجة من السجن ولما سألت عن اسمها عرفت انها كانت بتزور سعد بشار!
زفر رشيد بتعب وقال هو كمان بحيرة وكل حاجة عملتها في الفترة اللي اتقبض عليا فيها كانت بتثبت انها عملت كده فعلا! ايه اللي منعها تزورني ولو مرة واحدة؟ ليه اختفت هي ووالدتها ومظهروش غير بعد اربع سنين؟ دا غير حالة الفقر اللي وصلوا لها؟! في الف سؤال ومش لاقي اجابة تريح قلبي! نفسي اتأكد هي خاينه ولا مظلومة؟ نفسي اقدر اخد قرار.. ابعد عنها وانساها، ولا اسامحها واكمل معاها.
بص ليه خالد بحزن وجاوبه بحيرة بصراحة الله يكون في عونك يا رشيد.. انا مش عارف انا لو مكانك كنت هتصرف ازاي!
بص ليه رشيد وقال انا في لحظة خسرت كل حاجه يا خالد ومبقاش في حاجة اخسرها.. الاربع سنين اللي عشتهم بعيد عنها حاولت كتير اخرجها من حياتي، لكن قلبي طول الوقت كان بيأكد انها مظلومه وده اكتر شئ بيعذبني.
قال خالد بتأكيد يبقى الحل الوحيد انك لازم تعرف ايه اللي حصل بالظبط.
جاوبه رشيد هو ده فعلا اللي لازم اعرفه.
قال خالد وطبعا هنستبعد فكرة انك تسأل كارمن لان اي كلام بينكم بيتحول لموضوع تاني خالص.
ضحك رشيد وقال بتعب انا و كارمن دايما كده.
قال خالد بحيرة والحل ايه دلوقتي؟.. خلي بالك ان جدك ممكن يعرف في اي وقت ان كارمن لسه مراتك.
هز رشيد راسه انا عارف يا خالد.. بس كل ده ميهمنيش.. اللي يهمني اني اعرف الحقيقه واكون متأكد منها قبل ما اخد اي قرار.
قال خالد وانا معاك يا رشيد في اي قرار هتاخده واي وقت هتحتاجني هتلاقيني جنبك.
ابتسم رشيد بامتنان وهو بيبص ليه، فهو صاحبه المخلص اللي مسابوش ابدا من يوم ما بدأت صداقتهم في كلية الشرطة، كان دايمًا وابدا داعمًا ليه.
رواية رشيد وكارمن بقلمي ملك إبراهيم.
رجعت كارمن للبيت في الأوضة اللي بتقيم فيها مع والدتها. استغربت جلوس والدتها فوق السرير بتتناول السجاير وبتقلب في التليفون غير مبالية باللي حصل مع بنتها!
قربت منها كارمن وقالت ليها بذهول هو انا للدرجة دي مش فارقه معاكي! معقول متحركتيش من مكانك من وقت ما الشرطة جم خدوني؟!
رفعت والدتها عينيها عن التليفون وجاوبتها ببرود اللي تخلف بنت خايبه زيك متخفش عليها من الشرطة! هيكونوا خدوكي ليه يعني! ايه الخارج عن القانون اللي ممكن تعمليه عشان يخدوكي! كنت متأكده ان هيكون في غلط وهترجعي.. واهو تفكيري طلع صح!
حدقت بوالدتها بصدمة انا مش قادرة افهم انتي بتفكري ازاي.. نفسي تحسسيني اني بنتك ولو مرة واحدة!
بصت لها والدتها بغضب ورمت التليفون من ايديها بعنف وجاوبتها انا اللي نفسي احس انك بنتي...
وقفت من فوق السرير وكملت بصراخ وهي بتبص للأوضة اللي بتقيم بيها بأثاثها المتهالك بقى دي عيشه نعيش فيها وانتي تقدري تخلينا نعيش في قصور! معقول دي تبقى اخرة سهير سالم اللي كل الرجالة كانوا هيموتوا عليها والفلوس والقصور كانت بتترمي تحت رجليها!
رمقتها كارمن بغضب مكتوم ومجاوبتش عليها، غضبت والدتها أكتر وكملت بحدة نفسي اعرف انتي مستنيه ايه! مستنيه مين؟ عمرك هيضيع وجمالك هيروح مع الزمن من غير ما نستفاد منه.
تلألأت عين كارمن بالدموع وجاوبتها انا مش هكون نسخه منك.. انا مستحيل ابيع نفسي وجسمي للي يدفع.
قربت منها والدتها بغضب وقامت بصفعها بقوة. صرخت كارمن وهي بتتلقى الصفعة بذهول. ارتفع صوت والدتها بصراخ انا عمري ما بعت نفسي ولا جسمي لحد! انا كنت بتجوز على سنة الله ورسوله، كان بيبقى جواز حلال وبشرع ربنا.
قالت كارمن ببكاء وهي بتحط ايديها فوق وجنتها كنتي بتستخدمي شرع ربنا في النصب على الرجالة! وشوفي كان اخرة كل ده ايه؟ خسرتي كل حاجة ودمرتي حياتك وحياتي.
حدقت بيها والدتها بنظرات ساخرة انتي اللي دمرتي حياتك يا كارمن وانتي اللي اختارتي تعملي كده! واظن انتي فاكرة كويس انتي عملتي كده ليه!
بكت كارمن وحطت ايديها فوق وشها بندم. بصت ليها والدتها بغيظ وكملت العياط مش هيفيدنا دلوقتي.. انتي لازم تفوقي لنفسك وترفعينا من القرف اللي احنا عايشين فيه ده!
رفعت عينيها وبصت لوالدتها بحزن وبعدين جريت لبره الأوضة وهي بتبكي.
وقفت والدتها بتتابع خروجها من الأوضة ببرود، وبعدين همست لنفسها بتأكيد انا مش هستنا لحد ما اموت هنا بسببك! انا لازم اعمل اي حاجة عشان ارجع اعيش تاني في نفس المستوى اللي طول عمري كنت عايشه فيه.
رمقت الأوضة من حواليها باشمئزاز وكملت بإصرار هعمل اي حاجة عشان اخرج من هنا.
رواية رشيد وكارمن بقلمي ملك إبراهيم.
صباح اليوم التالي.
راحت كارمن لشغلها في الروضة وبعد انتهاء الدوام راحت لشغلها التاني في المطعم وهي بتفكر ازاي تعتذر للمدير عن عدم حضورها للشغل امبارح.
دخلت لمحل شغلها ولاحظت نظرات زمايلها الغير مرضية وهم بيبصوا ليها باشمئزاز. اتطلعت لهدومها ومظهرها بشك.
قربت من صاحبتها مودة وقالت ليها بدهشة ايه الحكاية يا مودة؟ كلهم بيبصولي كده ليه!
بصت ليها مودة بتوتر. مداهاش مدير المطعم فرصة للرد وجاوب هو على فضول كارمن وهو بيقرب منهم انتي ايه اللي رجعك هنا تاني يا كارمن؟
بصت ليه كارمن بتوتر وجاوبت بتلعثم رجعت شغلي.. انا اسفة مقدرتش اجي امبارح لان حصلت عندي ظروف طارئة ومنعتني اجي.
جاوب عليها بقوة وانا عارف ايه الظروف دي.. لان قبل ما يجو يخدوكي جم هنا.
بصت له بصدمة، تابع كلامه بصرامة وكمل اخر حاجة كنت اتوقعها انك تكوني كده.. انتي مش بس ضريتي سمعتك! انتي ضريتي سمعة المكان كمان.
وطت وشها للأرض وهي بتعتقد انه بيتكلم عن خيانتها ل رشيد، لكنه كمل بقوة وقال ليها السبب اللي يعلمه ازاي تمدي ايدك وتسرقي شقة عميل! انتي عارفه تصرفك ده خسرني عملا قد ايه؟
شهقت بصدمة وبصت ليه بذهول وقالت نعم.. شقة عميل مين اللي انا سرقتها؟! انا مش فاهمه حاجة؟
جاوب عليها بصرامة انتي فاهمه كويس وعارفه عملتي ايه.. ومن اللحظة دي ملكيش شغل معانا.. وانا هحاول اتواصل مع استاذ رشيد واعتذرله يمكن اقدر احافظ على سمعة المطعم.
شهقت بذهول وهي بتحاول تستوعب اللي بيقوله ليها رشيد!! هو رشيد....
قاطعها بصرامة ايوه اللي انتي سرقتي شقته.. اتفضلي امشي من هنا بهدوء ومش عايز اشوفك هنا تاني.
سابها وراح لمكتبه ورجعوا كل زمايلها لشغلهم، وقفت بتفكر بصدمة وبتربط الأحداث، فهمت سبب القبض عليها وسبب وجود رشيد في قسم الشرطة والمحضر اللي اتنازل عنه. همست بغضب وهي ماشية من المطعم بقى انا حراميه يا رشيد!!!
رواية رشيد وكارمن بقلمي ملك إبراهيم.
صحي على صوت طرقات قوية مزعجة فوق باب شقته، راح يشوف مين المزعج ده اللي جاله دلوقتي! وازاي بيخبط الباب بالطريقة العنيفة دي.
فتح الباب بغضب ولقاها هي اللي واقفة قدامه، بتبص ليه بعين مشتعلة من الغضب، صرخت في وشه أول لما فتح الباب بقى انا حرامية يا رشييييد....... بقلمي ملك إبراهيم.
نستأذن احنا
تفتكروا كارمن هتعمل إيه لما تعرف انها لسه مرات رشيد وعلى ذمته
الحلقة_ال
رواية_رشيد_وكارمن
الكاتبة_ملك_إبراهيم
أصعب حاجة في الحب..لما الاتنين يكونوا بيحبوا بعض.. بس كل واحد فيهم عايش في حكاية غير التاني خالص.
استعدوا.. لأن اللي جاي أقوى من كل اللي فات
بقى انا حرا مية يا رشييييد.
بص ليها ببرود وسابها واقفة قدام الباب ودخل جوه من غير ما يرد، دخلت وراه وقفلت الباب بعنف، لف ليها بغضب وقال ايه الازعاج اللي انتي عملاه على الصبح ده!
جاوبته بصر.. اخ لا حضرتك احنا بقينا الضهر مش الصبح.. رد عليا وقولي دلوقتي حالا.. انا سرقت منك ايه عشان تتهمني بحاجة زي كده؟!
اتأملها بعمق وبعدين جاوب عليها انتي عارفه انتي سر قتي ايه مني.
اتوترت جدا وبصت ليه بخوف، سابها ودخل أوضة النوم ومش مهتم بكلامها. وقفت شوية بتفكر هو يقصد ايه، وبعدين دخلت وراه وهي بتتكلم بغضب سرقت منك ايه يا رشيد عشان تتهمني بتهمة زي دي؟! انت عارف انت عملت ايه؟.. انت خلتني اخسر شغلي بسببك.
ضحك بسخرية وهو متمدد
---
على السرير ومش مهتم بيها. قربت منه أكتر وهي متغاظة من بروده، شالت الغطا من عليه وهي بتصرخ قوم رد عليا يا رشيد.. انا بكلمك.
شدها من ايديها بقوة ف وقعت فوق صدره، صر.. خت من الصدمة، وحاوطها بدراعاته ومسكها جامد، حاولت تبعد عنه وهو بيقربها ليه، اتكسفت ووشها احمر وجسمها اترعش، وسمع دقات قلبها السريعة. بص ليها عن قرب وهي موطية وشها بعيد عنه. همست بصوت مبحوح رشيد.. سبني لو سمحت.
قال ليها بصوت هامس وهو بيتأملها باشتياق انتي اللي جيتي هنا!
جسمها اترعش وحاولت تتكلم انااا....
قاطعها بقبله سريعه، حبيبته دلوقتي بين ايديه بعد فراق أربع سنين. هي كمان كانت مشتاقه له، اتجمد جسمها بين ايديه، استسلمت ليه للحظات قليلة بس وبعدين انتفض جسمها بين ايديه بخوف، دفعته بعيد عنها وجريت بعيد عن السرير، وقفت في واحدة من زوايا الأوضة وهي بتبكي بخوف وجسمها بيرتعش بقوة. كانت بتردد بصوتها الباكي مش هينفع.. حرام..
بص ليها بصدمة، مش مصدق انه فقد السيطرة على مشاعره قدامها. وطى وشه بغضب من تسرعه وكشف مشاعره بالاشتياق ليها، عليه يخفي المشاعر دي لحد ما يتأكد من خيانتها او براءتها.
بكائها وكلمة حرام اللي رددتها بخوف عند اقترابه منها، اترددت الكلمة على سمعه وهو بيوطي وشه وبيحاول يسيطر على مشاعره اتجاهها، استغرب تردد الكلمة وهي بتبكي في واحدة من زوايا الأوضة، رفع وشه وبص ليها باستغراب وقال ليها هو ايه اللي مش هينفع وحرام؟!
خبت وشها بين ايديها وهي بتبكي وجاوبته بصوت مبحوح انت طلقتني وحرام تلمسني او تقرب مني!
اتأملها باستغراب، مين قال ليها انه طلقها! وانتي عرفتي منين اني طلقتك؟
جاوبته وهي بتبكي عرفت لما طلقتني قبل ما تسافر.
استغرب من كلامها وقال ليها بغموض جالك ورقة طلاق؟
جاوبته بحزن وقتها انا كنت مغيره عنواني واكيد ورق الطلاق راح للعنوان القديم.
هز راسه وبعدين شرد شوية بيفكر؛ مين قال ليها انه طلقها قبل سفره؟ بص ليها بتفكير وقال مين قالك اني طلقتك قبل ما اسافر؟!
اتربكت كتير وجاوبت عليه بتلعثم ونبرة حادة عرفت وخلاص.
اتغاظ من عنادها وهز راسه وهو عارف ان الكلام معاها مش هيفيد. سكت شوية بيفكر ومحبش يقول ليها انها مازالت مراته، عايزها على ظنها لحد ما يعرف الحقيقة. حاول يرسم البرود على ملامحه وقال ليها ولما انتي عارفه انك مبقتيش مراتي.. ازاي تيجي لحد بيتي هنا وتدخلي أوضة نومي كمان؟!
اترعش جسمها بقوة وجاوبته بتوتر مكنتش اعرف انك لوحدك.. كنت فاكرة مراتك عايشة معاك هنا!
افتكر ساعتها انه كان قال ليها قبل كده انه اتجوز وليه ابن من مراته، وحاول يخفي ارتباكه وجاوب عليها بهدوء ايوه.. بس مراتي مش هنا دلوقتي.
وطت وشها بحزن وقالت وهي بتخرج من الأوضة انا لازم امشي حالا قبل ما مراتك ترجع لانها ممكن تفهمنا غلط.
خرجت من الأوضة بسرعة لحد ما خرجت من الشقة كلها، حاول يلحقها لكنها كانت أسرع، وقفت قدام باب الشقة من بره وسندت عليه وهي بتبكي بانهيار، مش مصدقة ان في ست تانية في حياته وخدت مكانها في قلبه، بقت دلوقتي غريبة عنه، بتهرب من بيته عشان مراته متشوفهاش! متحملتش اللي بتمر بيه، جريت وهي بتبكي وبتتمنى لو تنقطع أنفاسها، ويتوقف نبض قلبها وتسيب الحياة دي بسلام. قعد رشيد بيبص قدامه بتفكير، عليه يدور في اللي حصل مع كارمن قبل أربع سنين، لازم يعرف السبب الحقيقي اللي خلاها تقوم بمساعدة سعد بشار.
رواية رشيد وكارمن بقلمي ملك إبراهيم.
بعد كام يوم..
كارمن كانت قاعدة في الأوضة اللي عايشة فيها مع والدتها، بتدور على شغل من تليفونها بعد ما اتطردت من المطعم اللي كانت شغالة فيه.
زفرت والدتها بملل وقالت ليها بغضب واخرتها ايه؟.. احنا كده هنموت من الجوع.
قفلت التليفون وبصت لوالدتها بقلة حيلة هعمل ايه يعني يا ماما! انا بدور على شغل اهو.
رمقتها والدتها بغضب وقالت بعصبية شغل ايه اللي بتدوري عليه! انتي مش عايزة تعقلي بقى.
قالت لوالدتها بعصبية لو سمحتي يا ماما انا تعبت ومش مستحمله كلامك ده!
وقفت والدتها بعصبية وصرخت في وشها انا اللي تعبت مش انتي! الفقر بيموتني بالبطيء وانتي واقفه تتفرجي عليا وتقوليلي مش مستحمله!.. ولا انا كمان مستحمله العيشة دي..
وبعدين بصت حواليها بحسرة وكملت ده مش مكاني! مش سهير سالم اللي تقضي اللي باقي من عمرها في أوضه فوق سطح!
تابعت كارمن تحركات والدتها في الأوضة بصمت، اتجهت سهير لخزانة الهدوم الصغيرة وأخدت هدومها القديمة ورمتها في الأرض وهي بتصرخ بانفعال كل دول عايزين يترموا واشتري جديد..
بصت كارمن للهدوم اللي رمتها والدتها في الأرض، ركلت سهير الهدوم برجلها وهي بتصرخ بجنون انا من حقي اعيش في بيت نضيف مش اعيش هنا! ومن حقي يكون عندي عربيه وكاريدت كارد مفتوحه اصرف منها براحتي زي زمان..
وطت كارمن وشها بحزن وغمضت عينيها بتبكي بقلة حيلة. موقفتش والدتها عن الصراخ وهي بتضيف شوفي شكلي بقا عامل ازاي، شعري بيقع بسبب المنتجات الرخيصه اللي بستعملها، ووشي بدأ يكرمش.. انا بموت هنا بالبطيء وانتي قاعدة تتفرجي عليا وتقوليلي بدور علي شغل! شغل ايه اللي هيوفرلنا كل احتياجاتنا؟!
بصت كارمن لوالدتها وجاوبت عليها وهي بتبكي بقلة حيلة كل اللي بتطلبيه ده مش ضروري عشان نعيش يا ماما! شعرك اللي بيقع ووشك اللي بيكرمش ده مش سببه الفقر! انتي كبرتي وده طبيعي يحصل مع اي ست في سنك!
قربت منها سهير وهي بترمقها بنظرات نارية ومسكتها من دراعاتها وصرخت بيها بقوة انا مكبرتش.. انتي اللي عملتي فيا كده بالفقر اللي عيشتيني فيه! انا سهير سالم.. سمعاني.. انا سهير سالم اللي كل الرجالة بيتمنوا مني نظرة وبيدفعوا دم قلبهم عشان بس ابصلهم.
بكت كارمن بانهيار وهي واقفة قدام والدتها عاجزة عن الرد، دفعتها والدتها بعيد عنها وكملت بصراخ بس انا مش هسمحلك تعملي فيا كده.. سمعاني يا كارمن.. مش هسمحلك تضيعي اللي باقي من عمري بسبب غباءك.
اتخبط جسم كارمن في الحيطة من أثر دفعة والدتها ليها بقوة، مهتمتش سهير بيها واتجهت للهدوم اللي رمتها في الأرض وجذبت واحدة من الهدوم وقامت بارتدائه وهي بتردد بإصرار انا لازم الاقي حل بسرعة.. مش هستنا اموت هنا بسببك.
حطت كارمن ايديها فوق راسها وهي بتتألم من دفعة والدتها ليها، خلصت سهير من ارتداء هدومها وهي بتردد بإصرار لازم الاقي حل
جذبت شنطة ايديها عشان تخرج من الأوضة، وقفها صوت كارمن وهي بتتكلم ليها بقلق هتروحي فين يا ماما؟!
وقفت سهير ولفت ليها تجاوب عليها بإصرار هروح للمحامي بتاعي يشوفلي اي حل.. انا مش هسمحلك تموتيني جنبك هنا!
قالت كارمن بقلق وهي بتبكي والمحامي هيعملك ايه! انتي خلاص خسرتي كل فلوسك من زمان ومبقتيش تملكي اي حاجة؟!
اتجهت سهير لباب الأوضة وفتحته بإصرار وهي بتجاوب عليها هروحله يشوفلي اي حل.. اعمل قرض او يشوف حد يكون ممول لأي مشروع اعمله واعيش منه.
حدقت بيها كارمن بدهشة، مستنتش والدتها ردها وسبتها ومشيت وقفلت باب الأوضة وراها بقوة. وقفت كارمن بتبص للفراغ بحزن؛ بتحس بالضعف وقلة الحيلة، عارفة تعلق والدتها بالحياة الثرية وعشقها الكبير للمال، وعارفة كمان اللي هيحصل ليها بعد رجوعها من مكتب المحامي الخاص بيها؛ بعد ما يأكد ليها عدم وجود مخرج من الفقر ده اللي أحاط بيهم بعد ما خسرت كل اللي بتملكه على ايد آخر راجل اتجوزته، لما انقلب السحر على الساحر وهو اللي استغلها وقدر ياخد كل اللي بتملكه.
حطت راسها بين ايديها وهي بتفكر هي عليها تعمل ايه!.
رواية رشيد وكارمن بقلمي ملك إبراهيم.
في بيت عيلة رشيد.
رهف أخت رشيد قربت من جدها ووالدتها ووالدها وهم بيتكلموا عن رشيد. قالت والدة رشيد بحزن وهي بتبص لجوزها بلوم، مغفرتش ليه جوازه عليها لحد دلوقتي انا مش هسيب ابني يضيع نفسه وحياته اكتر من كده.. من يوم ما البنت دي هي ومامتها دخلوا حياتنا وهما دمروا كل حاجة حلوة فيها.
وطى جوزها وشه للأرض بصمت، تابعت كلامها بإصرار وهي بتبص لوالد جوزها اكيد حضرتك رأيك من رأيي يا عمي؟
بص ليها والد جوزها بتفكير وبعدين بص لابنه اللي بقى لا أهمية لوجوده بينهم بعد ما ساب كل حاجة واهتم بشغله بس، سايب وراه مراته وولاده من رأيي نسأل باباه رأيه ايه؟
ظهرت ضحكة ساخرة على وشها وهي بتبص لجوزها، عارفة عدم اكتراثه لأمرهم، سمعت رده وهي بتأكد جواها ان حياتهم مع بعض بقت مستحيلة انا مليش رأي يا بابا.. رشيد مش صغير، رشيد راجل وقد المسؤوليه واكيد هو عارف مصلحته كويس.
أثار غيظها رده الهادي، انفعلت وقالت ليه بحدة وابنك لو عارف مصلحته كان راح اتجوز بنت زي دي!
رمقها بغضب وجاوب اكيد شاف فيها اللي انتي مقدرتيش تشوفيه، مهو مش كلنا بنملك نفس العيون عشان نشوف بنفس النظرة.
زفرت بغضب وانتفضت من مكانها وهي بتتكلم بانفعال هو ده اللي احنا بناخده منك.. خليك كده عايش في عالم موازي لوحدك! سيب ابنك يخسر حياته بعد ما خسر شغله ومستقبله!
سبتهم وطلعت لأوضتها فوق بخطوات غاضبة سريعة، لحقت بيها بنتها رهف وهي بتجري وراها، بص اللواء نور الدين الجبالي لابنه وقال ليه بغضب مكتوم شايف انت وصلتنا لايه! عمرك ما كنت قد مسؤولية بيت وعيلة!
هز وجيه راسه بالموافقة وقال بحزن حضرتك عندك حق.. انا مش قد المسؤوليه فعلا!
رمقه والده بغضب، وقف وجيه من مكانه وهو بيبص لوالده وكمل في حاجة بس عايز اقولها لحضرتك قبل ما امشي..
تابعه والده باهتمام، وقف وجيه بيفكر للحظات قليلة وبعدين كمل بثقة اللي رشيد عمله وبيعمله دلوقتي هو ده الصح..
اتفاجأ والده من كلامه واتعدل في قعدته وهو بيسمع باقي كلامه رشيد مخسرش شغله ولا حاجة، رشيد اصلا مكنش حلمه انه يكون ظابط شرطة! ده كان حلم حضرتك انت مش هو! عملت المستحيل عشان رشيد يكون نسخه منك..
رمقه والده بنظرات نارية، ظهرت ابتسامه ساخرة على وش وجيه وهو بيضيف بس هو مطلعش نسخه منك ابدا يا سيادة اللوا، وده شئ يسعدني انه مطلعش نسخه منك.
حدق بيه والده بصدمة، طالت النظرات بينهم لحد ما اتحرك وجيه من قدام والده عشان يمشي، لكن صوت والده وقفه بيستمع ليه بس يسعدك انه طلع نسخه منك انت! يسعدك ان اللي قدرت تضحك عليك وتخرب بيتك، قدرت بنتها تضحك عليه وتضيع مستقبله!
رجع وجيه ولف مرة تانية لوالده وجاوب بثقة بس سهير مضحكتش عليا! لاني كنت عارف حقيقتها من الاول..
بص له والده بصدمة، هز وجيه راسه وكمل ومش هي برضه اللي خربت بيتي! بيتي اتخرب من اول ما بقى رأيي فيه ملوش قيمة جنب رأي حضرتك وقراراتك! وابني اتجوز البنت اللي حبها، ومستقبله مش معتمد على شغله في الشرطة وبس! المستقبل مفتوح قدامه ويقدر ينجح في اي مجال تاني هو يحبه.
غضب والده من كلامه ورمقه بغضب، هز راسه بتفهم غضب والده وانسحب من قدامه بهدوء، سايب البيت عشان يلتقط أنفاسه بره بعيد عن أحكام والده اللي بتضيق صدره.
رواية رشيد وكارمن بقلمي ملك إبراهيم.
جوه مكتب واحد من كبار المحامين.
سهير قاعدة بتحرك رجليها بعصبية وبتشرب سيجارة وبتتكلم للمحامي انت لازم تشوفلي حل وبسرعه.. انا مش هعيش اللي باقي من حياتي في الفقر ده!
زفر المحامي بضيق وقال ليها بهدوء مصطنع يا مدام سهير حضرتك عارفه ان مفيش حل في ايدي.. انتي خسرتي كل فلوسك وممتلكاتك بشكل قانوني.
زفرت سهير بعصبية وجسمها بيرتعش من شدة الغضب اعمل اي حاجة.. انت لازم تساعدني.. انت المحامي بتاعي.. فكر في اي حل.. ساعدني اعمل قرض او شوفلي حد يمول اي مشروع انا اعمله.. انا محتاجة فلوس بأي طريقه.
بص ليها بتفكير شوية وبعدين قال بهدوء انا معرفش حد يكون ممول لمشروع.. بس ممكن اساعدك تاخدي قرض من اي بنك..
بصت ليه بترقب وقالت بلهفة حقيقي ممكن تساعدني اخد قرض؟
هز راسه وقال بثقة اه طبعا بس البنك هيحتاج ضمان.
بهتت ملامحها بحزن وبعدين قالت بغضب وانا هجيب ضمان منين للبنك.. انت عارف اني خسرت كل حاجة!
بص قدامه بتفكير شوية وبعدين قال بهدوء احنا ممكن نقدم ارض المرحوم صادق ضمان للبنك والارض كبيرة وتعمل ملاين دلوقتي واكيد البنك هيوافق علي القرض بسهوله.
حدقت بيه بصدمة وقالت بذهول ارض المرحوم صادق مين؟ قصدك صادق جوزي؟!
جاوب عليها المحامي بثقة ايوه المرحوم صادق جوزك الاولاني وابو بنتك الوحيدة.
مازالت بتحدق بيه بصدمة وقالت ارض ايه انا مش فاهمة حاجة؟ هو صادق كان عنده ارض؟!
جاوب عليها المحامي بثقة اه طبعا.. ازاي حضرتك متعرفيش ان المرحوم صادق عنده ارض كبيره في الصعيد وكان حصل مشاكل بينه وبين عيلته وعمه حكم عليه انه يسيب البلد وخد الأرض منه بالقوة والمرحوم صادق ساب الأرض لعمه عشان ميحصلش بينهم مشاكل اكتر، بس طبعا الأرض لحد النهارده بالقانون بأسم المرحوم صادق يعني انتي ليكي ورث فيها انتي وبنته كارمن.
شهقت بصدمة ووقفت من مكانها بتبص ليه بصدمة انت متأكد من الكلام ده؟!
جاوب المحامي بثقة طبعا متأكد.. حضرتك ناسيه اني كنت المحامي الخاص للمرحوم صادق.
ابتسمت بسعادة وقالت بلهفة يعني انا اقدر اخد الأرض دي وابيعها؟
قال المحامي بثقة حضرتك لكي فيها الورث الشرعي اللي من حق الزوجة وكارمن لها الورث الشرعي للابنه.. وبتقديري كده هيكون مبلغ كبير جدا واظن انك مش هتحتاجي تعملي قرض ولا حاجة... بس..
سكت ومكملش كلامه، بصت ليه بقلق بس ايه؟!
جاوب عليها بتوتر بس معتقدش ان حضرتك هتقدري تاخدي حقك او حق بنتك في الارض دي لان زي ما قولت لحضرتك ان عم المرحوم صادق اخد منه الأرض بالقوة والمرحوم صادق بنفسه رفض يفتح موضوع الارض ده وهو في عز ازمته الماليه قبل ما يموت وانا اقترحت عليه موضوع الارض اكتر من مرة وهو كانت رافض انه يطلبها من عمه او يفتح موضوع الارض ده نهائي.
اتنهدت سهير بعمق وهي بتبص قدامها بإصرار صادق الله يرحمه مات ومسبش ليا ولا لبنته اي حاجة، يعني الأرض دي دلوقتي حقي انا وبنتي..
بص ليها المحامي باهتمام وهي بتضيف بإصرار وانا مستحيل اسيب حقي.. هاتلي اسم عم صادق وعنوانه في الصعيد..... بقلمي ملك إبراهيم.
ناويه على اييييه يا سهير
لتكون هتبيع كارمن لعمها في الصعيد
الحلقة_ال
رواية_رشيد_وكارمن
الكاتبة_ملك_إبراهيم
كارمن كانت فاكرة إن حياتها خلاص وقفت.. بس القدر كان مخبي ليها مفاجأة كبيرة.. في بلد بعيدة.. وفي عيلة كبيرة.. وفي أرض بتساوي ملايين
المحامي دور في ملف صادق الهواري وجاب منه كل المعلومات عن عيلة صادق وقال ليها بثقة ده العنوان بالتفصيل وكل المعلومات عن عيلة المرحوم صادق.
أخدت من ايديه الورقة بحماس وقالت انت متأكد ان الارض دي كبيرة وتستاهل؟!
ابتسم وجاوب عليها بثقة عيلة المرحوم صادق من أغنى واكبر العيلات في الصعيد، ونص الارض اللي تحت ايديهم ارض المرحوم صادق يعني ارض بالملايين..
ابتسمت بطمع ولمعت عينيها وهي بتسمعه وهو بيضيف القانون معاكم وتقدروا تطلبوا حقكم في الارض.
هزت راسها وهي بتبص للعنوان المدون على الورقة في ايديها وقالت بطمع يبقى انا وكارمن لازم نسافر النهارده واخد منهم الارض وابيعها بأعلى سعر.
تابعها المحامي بصدمة وقال تبيعي ايه؟! دول ممكن يقتلوكي انتي وبنتك لو فكرتي تبيعي الارض لأي حد.. هناك الارض شرفهم ومستحيل حد غريب ياخدها!
بصت ليه باستغراب يعني ايه الكلام ده! مش انت لسه بتقول ان الارض قانونا من حقي انا وبنتي؟!
جاوب عليها بثقة فعلا الارض قانونا من حقكم انتي وبنتك.. لكن الارض دلوقتي تحت ايديهم هما
---
ومحدش يقدر ياخد الارض من تحت ايديهم غير بالتفاوض معاهم والحل الوحيد انك تعرضي عليهم انهم ياخدوا الارض منكم بشكل قانوني وانتم تاخدوا منهم حق الارض وترجعوا.
بصت قدامها بتفكر بشرود وبعدين بصت ليه وقالت خلاص سيب الموضوع ده عليا وانا هعرف اتفاوض معاهم.
بص ليها بقلق ولو احتاجتي مني اي استشارة قانونيه تقدري تكلميني في اي وقت.
هزت راسها بالموافقة وشكرته ومشيت بحماس وهي بتفكر في ضرورة السفر للصعيد النهارده قبل بكرة.
رواية رشيد وكارمن بقلمي ملك إبراهيم.
كارمن كانت قاعدة في الأوضة مستنية رجوع والدتها بقلق، عارفة ان اليوم ده مش هيعدي بسلام بعد ما ترجع والدتها محبطة من مكتب المحامي.
حصل عكس توقعها وسمعت صوت والدتها الحماسي جاي من بعيد، عقدت ما بين حواجبها وهي بتسمع صوت والدتها بتناديها بحماس وسعادة وهي بتطلع السلم لحد ما وصلت لأوضتهم في الدور الأخير، وقفت قدام باب الأوضة بتلتقط أنفاسها من طلوع السلم، وقفت كارمن بقلق وفتحت ليها الباب وبصت ليها بقلق ماما انتي كويسه؟!
دفعتها والدتها بحماس وهي بتبتسم بسعادة واتقدمت لجوه الأوضة انا مش كويسه بس.. دا انا في اسعد واجمل لحظات حياتي.
بصت ليها كارمن باستغراب، اتقدمت والدتها من شنطتها الفاضية قدام خزانة الهدوم وقالت لبنتها يلا بسرعه لمي هدومك عشان نلحق القطر.
بصت ليها بصدمة قطر ايه ؟!
لفت تبص ليها وجاوبتها وهي بترتب هدومها جوه الشنطة هنسافر الصعيد عند اهل باباكي.. المحامي قالي ان باباكي له ارض كبيرة اوي هناك وكان سايبها لعمه!
قربت من والدتها بذهول ارض ايه انا مش فاهمه حاجة؟!
رمت والدتها الهدوم جوه الشنطة بعصبية وجاوبتها ايه اللي انتي مش فهماه! باباكي له ارض ورث في الصعيد وكان متنازل عنها لعمه بس من غير ورق ولا اي إثبات انه متنازل لهم عنها! انا مكنتش اعرف اي حاجة عن الأرض دي بس المحامي عرفني وفهمني كل حاجة وقالي ان من حقي اطالبهم بالارض او تمنها واكيد دلوقتي تمن الارض دي هيبقى كتير اوي.
هزت راسها برفض غير متقبله كلام والدتها بس حضرتك بتقولي ان محامي بابا قالك ان بابا كان متنازل عنها لعمه! ازاي هنطلب منهم الارض؟
جاوبتها والدتها بثقة انا مقولتش انه اتنازل عنها بمزاجه.. المحامي قالي ان عمه اخد منه الارض بالقوة وباباكي ساب الارض ومشي.. يعني الارض تحت ايديهم لكن العقود والقانون معانا احنا ونقدر بسهوله ناخد حقنا منهم.
وقفت كارمن بتبص لوالدتها بتفكير، مش متقبلة اللي بتقوله والدتها، لفت والدتها وبصت ليها وهي واقفة شاردة بحيرة، قربت منها وقالت ليها بصرامة انتي لسه هتقفي تفكري! جهزي نفسك بسرعه عشان نسافر.
جاوبت على والدتها بحيرة هنروح نقولهم ايه بس يا ماما! يعني لو بابا كان له حق في الارض دي اكيد مكنش هيسيبها لما كان في عز ازمته!
لمعت عين والدتها طمعًا وقالت بقوة باباكي الله يرحمه كان غبي.. اومال انتي طالعه لمين! لما كان عايش كانت الارض دي حقه وهو اللي ساب حقه،، لكن انا مش هسيب حقي.
بصت لوالدتها بصدمة وقلق، عارفة ان والدتها مش هتتنازل عن الارض دي، ومش هتقبل تعيش في الأوضة دي بعد كده، ومش هتفضل هنا لحظة واحدة، وهي مش ممكن تسيب والدتها تروح لوحدها! مش عارفة ايه اللي مستنيها هناك.
أخدت شنطتها وحطت بيها هدومها هي كمان، موقفتش والدتها عن الكلام وهي بتحط قايمة لكل اللي هتعوضه بعد حصولها على تمن الارض، البيت الجديد والعربية والهدوم وكل حاجة افتقدتها خلال السنين اللي فاتت.
كانت كارمن بتسمع كلامها بقلق، بتخشى ان تتبخر أحلام والدتها في الهوا، مش عارفة من فين جت ليهم الارض دي!
أخدت شنطتها وخرجت والدتها من الأوضة بسعادة وهي بتودع الفقر وبتفتح دراعاتها لاستقبال الثراء من جديد.
رواية رشيد وكارمن بقلمي ملك إبراهيم.
قعد رشيد فوق الكنبة قدام التليفزيون جوه شقته اللي بتجمع ذكرياته الجميلة معاها، كان بيفتكرها وهي قاعدة جوه حضنه على الكنبة دي وبيتبادلوا الكلام مع بعض، قد ايه اشتاق ليها واتمنى لو يرجع بيهم الزمن وترجع لجوه حضنه مرة تانية. بص لواحد من الملفات قدامه، كان بيدقق النظر في التحريات اللي بعتها ليه خالد وبيها بعض المعلومات عن الحي اللي بتسكن فيه كارمن وامتى راحت للحي ده.
صوت جرس الباب خرجه من ذكرياته، بص للباب واتمنى من قلبه لو يلاقيها هي اللي جت ليه، راح وفتح الباب على أمل رؤيتها. بهتت ملامحه بحزن؛ لما لقى مايا البنت دي اللي كانت في الحفلة لما راح مع صاحبه وكانت كارمن بتشتغل هناك. جت ليه برفقة صاحبه عادل، بص ليهم باستغراب وقال خير يا عادل في حاجة ولا ايه؟!
اتأملته مايا بنظرات كلها إعجاب وجاوبت على سؤاله بدلال ايه المقابله دي يا رشيد! معقول تكون دي مقابلتك لينا واحنا اول مرة نزورك في شقتك!
بص لعادل بدهشة، هز عادل راسه بقلة حيلة وشاور براسه ناحية مايا مؤكدًا ليه انه جه بيها هنا برغبتها الملحة عليه، شاور ليهم بايديه مرحبًا بيهم لجوه.
اتقدمت مايا لجوه الشقة وهي بتبص حواليها بإعجاب وقالت شقتك حلوة اوي يا رشيد.. وذوقك فيها يجنن.
بص لعادل بتوعد وجاوب عليها بهدوء ده مش ذوقي.. ده ذوق مراتي، هي اللي اختارت كل حاجة هنا في الشقة وفرشتها على ذوقها.
انتفضت من مكانها قبل ما تقعد وبصت ليه بصدمة وبعدين لعادل بذهول وقالت بصوت مبحوح هو انت متجوز؟!
قعد براحة وجاوبها بتأكيد اه.. انتي مكنتيش تعرفي ولا ايه؟
بصت ليه بصدمة وقالت بذهول لا طبعاً مكنتش اعرف.. انت اتجوزت امتى وازاي؟!
جاوبها بهدوء وهو عارف اللي بتحمله في قلبها اتجاهه اتجوزت من حوالي اربع سنين.
بصت ليه بصدمة وبعدين بصت لعادل بتوعد على عدم اخبارها بجواز رشيد، بصت حواليها بتوتر وقالت بارتباك ممكن اتعرف على مراتك؟
جاوبها بهدوء للاسف هي مش موجودة دلوقتي.. لو كنتوا عرفتوني قبل ما تيجوا اكيد كانت هتبقى في استقبالكم معايا.
حست بالحرج واستعدت للذهاب متجهة للباب وقالت بتوتر احنا كنا جاين نطمن عليك.. بس مش مهم.. ابقى خلينا نشوفك انت والمدام عشان حابه اتعرف عليها.
هز ليها راسه بالموافقة، خرجت من بيته وهي حاسة بالحرج الشديد، صدمتها بمعرفة جوازه كانت زي الصاعقة. خرج عادل وراها وهو بيبص لرشيد باعتذار وبيبادله رشيد النظرات بتوعد.
أسرعت مايا في خطواتها لحد ما وقفت قدام عربيتها بتلتقط أنفاسها بصعوبة، وقف عادل وراها وقال ليها بقلق مايا انتي كويسه؟
لفت تبص ليه بغضب وقالت ليه بحدة انت ازاي متقوليش ان رشيد متجوز! هو اتجوز امتى وازاي اصلا؟ انا اعرف رشيد من زمان لحد ما سافر ورجع.. معقول اتعرف عليها وهو مسافر واتجوزها هناك!
جاوبها عادل بتوتر اهدي بس يا مايا واسمعيني.. رشيد قبل ما يسافر اتجوز فعلا.. بس كان في مشاكل مع اهله واهل البنت اللي حبها وكلهم كانوا رافضين الجواز وهو اتحداهم واتجوزها واعلن جوازه منها، بس الخبر منتشرش اوي لان بعد فترة قليلة من جوازهم رشيد حصله مشكله في شغله وتعب جامد وتقريبا طلق مراته وسافر بعدها.
وقفت تبص ليه باستغراب وقالت بفضول يعني هو طلقها قبل ما يسافر؟
جاوبها بتردد ده اللي انا عرفته.
بصت قدامها بتفكير وبعدين قالت انت تعرف مراته دي او شوفتها قبل كده؟
جاوبها بصدق انا معرفهاش ولا عمري شوفتها.. اصلا الفترة اللي رشيد كان متجوزها فيها مكناش بنشوفه كتير وعرفنا بالصدفه انه اتجوز!
هزت راسها بتفهم وفكرت شوية بحيرة بس لو هو طلقها ليه قال انه متجوز! ولو هو مطلقهاش.. هي فين؟ ليه مظهرتش معاه ولا مرة؟! وكمان مش موجودة في بيته في وقت زي ده؟!
جاوبها عادل بثقة اللي انا اعرفه انه طلقها قبل ما يسافر وكمان هو عايش في الشقة لوحده بعد ما رجع من السفر.
ابتسمت بمكر وهزت راسها وهي بتهمس جواها يبقى في سر رشيد بيحاول يخفيه.. بس انا لازم اعرفه.
بص ليها عادل بتوتر وهمس جواه ربنا يستر انا مش مطمن.
رواية رشيد وكارمن بقلمي ملك إبراهيم.
في الصباح من اليوم التالي..
وصل القطر لمحافظة قنا في الصعيد.
نزلت منه كارمن مع والدتها، كانت حاسة بالخوف الشديد وبتتمسك بشنطتها بايد بترتعش من شدة القلق والتوتر. موقفتش والدتها لحظة واحدة من يوم ما نزلت من القطر، كانت ماشية بخطوات سريعة لبره محطة القطر وكأن حياة الثراء بتناديها وعايزاها تسرع ليها، كانت كارمن بتحاول تلحق بيها بخطوات مهرولة.
شاورت والدتها لواحدة من عربيات الأجرة وادته العنوان اللي عايزة تروح ليه. استغربت كارمن من وجود العنوان مع والدتها وسرعتها في الوصول لكل المعلومات اللي بتساعدها للوصول للارض.
ركبت جوه العربية جنب والدتها وموقفتش والدتها لحظة واحدة عن الكلام عن الثراء المنتظر ليها.
بعد مرور ساعة من الوقت جوه عربية الأجرة، وقفت العربية في قرية ريفية وقال ليها السواق ان دي هي القرية اللي ذكرت اسمها بالعنوان اللي ادته ليه.
نزلت من العربية وهي بتبص حواليها باشمئزاز، عكس نظرات كارمن اللي بصت للطبيعة من حواليها براحة وإعجاب، قالت والدة كارمن وهي بتبص لحذائها اللي اتخلط بالأرض الترابية ايه ده مش معقول! ازاي سيبين الارض مش نضيفه كده!
استنشقت كارمن الهوا النقي وقالت براحة بس الجو هنا حلو اوي يا ماما وهدوء وراحة.
انتوا مين يا هوانم؟
جالهم الصوت الأجش ده من وراهم. لفوا يبصوا لصاحب الصوت بفزع، قالت ليه والدة كارمن بحدة انت اللي مين؟
بص ليها من فوق لتحت وقال شكلكم مش من اهل البلد! انتوا جاين لمين هنا؟!
بصت كارمن لوالدتها بقلق وتراجعت لورا بخوف وهي بتتطلع لهيئته بجلبابه الفضفاض وجسمه الضخم وشاربه الكبير. جاوبته والدتها ببرود احنا جاين لكبير عيلة الهواري.. تعرفه؟
اترعش جسمه شوية وجاوبها بقلق ومين ميعرفش عبد الرازق بيه كبير عيلة الهواري! دول كبار البلد.
حست بالرضا بعد ما لاحظت ارتباكه عند ذكرها اسم عيلة جوزها. بصت لبنتها وقالت بفخر احنا من عيلة الهواري وكنا عايزين نروح لكبير العيلة.
هز راسه باحترام وقال بترحاب شديد يا اهلا يا اهلا.. نورتوا البلد يا هوانم.. انا هوصلكم بنفسي للسرايا الكبيرة عند عبد الرازق بيه.
حست والدة كارمن بالغرور اللي افتقدته من سنين بعد خسارتها كل اللي بتملكه. على عكس كارمن اللي حست برهبة كبيرة من مقابلة المدعو عبد الرازق اللي تساءلت كتير جواها ازاي هيكون رد فعله بعد معرفة سبب مجيئهم هنا!.
أخدهم للبيت الكبير لعيلة الهواري.
كان البيت كبير وبيشبه القصور القديمة، كان بيحاوط البيت من بره، عدد كبير من الرجالة لابسين الجلباب الصعيدي وشايلين الأسلحة المرخصة لحماية البيت.
قرب الراجل اللي اصطحب كارمن ووالدتها لبيت عيلة الهواري من واحد من الرجالة الواقفين قدام بوابة الدخول الرئيسية، قال ليه انهم عايزين يقابلوا كبير عيلة الهواري. بص ليهم اللي بيقوم بحراسة البوابة وسألهم باحترام عايزين مين يا هوانم؟
بصت سهير للبيت الكبير بعين لامعة بالطمع والجشع وجاوبته بكبرياء احنا قرايب عبد الرازق بيه.. جاين من القاهرة.
بصت كارمن لوالدتها بتوتر وهمست ليها بخوف ماما خلينا نرجع انا خايفه.
همست ليها والدتها بغضب نرجع فين ونسيب كل ده لمين..
وبعدين شاورت براسها ناحية البيت الكبير وكملت بهمس انتي مش شايفه هما عايشين في قصر عامل ازاي!
هز الراجل راسه باحترام ورحب بيهم للدخول وهو بيفتح البوابة الحديدية الكبيرة، تراجعت كارمن لورا بخوف وهي بتبص للبيت الكبير برهبة، مش عارفة ايه اللي مستنيها جوه البيت ده، لكن قلبها كان بيخفق بقوة. أخدهم الراجل لمبنى صغير منفصل عن البيت وقال ليهم باحترام اتفضلوا يا هوانم هنا في المضيفه وانا هروح ابلغ عبد الرازق بيه.
دخلت سهير وهي بتتطلع حواليها بانبهار، وراها كارمن بتبص حواليها بخوف. قالت سهير بطمع عيلة ابوكي طلعوا مش قليلين ابدا.. مش قادرة افهم كان مقاطعهم ليه طول السنين دي!
قالت كارمن بتوتر انا خايفه من الناس دول يا ماما.. خلينا نرجع.
لفت ليها والدتها وقالت بصرامة وصوت مرتفع نرجع فين انتي اتجننتي! انا مش هرجع للفقر تاني حتى لو هموت هنا.
انتفضت كارمن من صوت والدتها المرتفع وتراجعت لورا بخطوات مرتبكة، اصطدمت بجسم صلب وقف وراها فجأة، انتفضت بهلع ولفت تبص وراها بخوف. كان شاب طويل القامة ذو بشرة سمرا وعيون سودا حادة، بعدت كارمن عنه بهلع وجريت لجنب والدتها. بص ليها بعمق وقال بنبرة حادة اهلا بيكم.. قالولي انكم بتسألوا عن جدي الحاج عبد الرازق!
اتوترت سهير شوية من حدة صوته وحاولت ترسم القوة قدامه وجاوبته بهدوء مصطنع ااحنا.. انا.. انا ابقى مرات المهندس صادق الهواري الله يرحمه.. ودي كارمن الهواري بنتي.
بص ليهم باهتمام وعقد بين حواجبه بدهشة. اتوترت سهير من نظراته الحادة وكملت بتلعثم احنا كنا عايزين نقابل الحاج عبد الرازق.. هو بيكون عم جوزي الله يرحمه، وفي موضوع مهم لازم نتكلم فيه معاه.
هز راسه بالموافقة وقال جدي وابويا الله يرحمه كانوا حكولي كتير عن عمي صادق. واللي اعرفه عنه انه عاش عمره كله في مصر وقطع علاقته بالبلد واهله من سنين!
قالت سهير بمكر بس اللي انا عرفته انه مقطعش علاقته بالكامل بالبلد.. لسه له حق في البلد.
رمقها بنظرات غامضة وهو بيسمع كلامها الماكر، وبعدين بص لبنتها اللي واقفة وراها بخوف وتوتر، وبعدين هز راسه وجاوب عليها بثقة الله يرحمه.. خلينا نأجل اي كلام لحد ما تاخدوا واجبكم.. انتوا اول مرة تزوروا بيت الهواري.
قالت كارمن بسرعة بتلعثم لا احنا هنرجع القاهرة دلوقتي.
رمقتها والدتها بغضب وهمست ليها بحدة انتي اتجننتي! نرجع فين؟!
انتفض جسم كارمن وهي بتبص لوالدتها بتوتر، بص ليها الشاب باهتمام وقال ليها بلطف اهدي يا انسه.. انتي وسط عيلتك دلوقتي، يعني متخافيش من اي حاجة.... بقلمي ملك إبراهيم.
انت فين يا رشيد تعالى الحق مراااتك
الحلقة_ال
رواية_رشيد_وكارمن
الكاتبة_ملك_إبراهيم
سهير كانت فاكرة إنها رايحة تاخد حقها..
بس هي في الحقيقة رايحة تفتح باب.. مقفول من سنين..
باب فيه أرض.. وعيلة.. وتار قديم.. وحب قديم مات من زمان
اهدي يا انسه.. انتي وسط عيلتك دلوقتي، يعني متخافيش من اي حاجة.
بصت ليه كارمن بتوتر. تابعت سهير نظراته لبنتها باهتمام؛ كان الشاب بيبص لكارمن بإعجاب مقدرش يخفيه. قال وهو بيتطلع لكارمن بعمق انا لسه معرفتكوش بنفسي.. انا فراج الهواري.. والدي الله يرحمه يبقى ابن عم المهندس صادق.
هزت سهير راسها بثقة وهي بتتابع نظراته لبنتها وبتفكر جواها؛ ايه لو قعدت هنا شوية وقدرت توقع الشاب ده في الجواز من بنتها. بصت حواليها وهمست جواها اكيد عندهم ارض وفلوس كتير اوي.. دول كبار البلد، يعني لو اتجوز كارمن يبقى هيفتح ليا بير فلوس ملوش اخر.
ابتسمت بجشع وهي بترتب أفكارها. كانت كارمن بتوطي وشها بتوتر والشاب بيتطلع ليها بإعجاب ومقدرش يوطي بصره عنها. ابتسمت سهير وقالت ليه بمكر احنا تعبنا اوي من الطريق والسفر.. في مكان هنا نقدر نرتاح فيه شويه؟
جاوب بثقة السرايا كلها تحت امركم.. هتيجوا معايا بس تتعرفوا على جدي الحاج عبد الرازق على ما الغرف بتاع الضيوف تجهز.
ابتسمت سهير بثقة واتقدمت منه وقالت واحنا جاهزين نتعرف على عمي الحاج عبد الرازق.
بصت كارمن لوالدتها بقلق، كان قلبها بيخفق بقوة ومش عارفة ايه اللي مستنيها في البيت ده!
رواية رشيد وكارمن بقلمي ملك إبراهيم.
صحي رشيد من نومه تعبان، مقدرش ينام براحة، عقله موقفش تفكير فيها، بيدور على الحقيقة ومفيش حاجة لحد دلوقتي تثبت براءتها. يبدو ان في حد خفى اي دليل يقربه من الحقيقة. قام راح المطبخ يعمل فنجان قهوة عشان يخفف وجع راسه. قلبه دق لما سمع جرس الباب؛ كل ما يسمعه بيتمنى تكون هي!
راح يشوف مين جاله بدري كده. اتفاجئ ب والده،
---
ابتسم ليه والده قال صباح الخير..
رحب بيه رشيد لجوه بابتسامة وقال اهلا يا بابا صباح الخير.. اتفضل.
دخل والده وهو بيبص للبيت بحزن حاول يخفيه، كان البيت حزين وكأنه بيطالب بعودة اللي كانت بتصنع فيه السعادة. قرب رشيد من والده وسأله بقلق بابا حضرتك كويس؟
ابتسم والده وقعد وهو بيجاوب عليه بنبرة مرحة ايه يا رشيد انت مش عايزني ازورك في بيتك ولا ايه!
جاوب عليه رشيد بترحاب انت نورت البيت يا بابا.. بس دي اول مرة تزورني في البيت من بعد ما رجعت من السفر وعشان كده انا استغربت!
قال والده بهدوء جيت اطمن عليك.
ابتسم رشيد وجاوبه بلطف انا الحمدلله بخير يا بابا اطمن.
هز والده راسه بالنفي وقال بثقة لا يا رشيد انت مش بخير ابدا.. انت فاكر اني مش شايف الحزن والحيرة اللي جواك.. انا عارف ومتأكد ان الاربع سنين اللي سافرت فيهم مقدروش يرجعوك بخير.
اتنهد بحزن وهو بيبص لوالده وبعدين جاوب عليه بصدق انا فعلا يا بابا مش قادر ارجع زي الاول..
هز والده راسه بتفهم، كمل رشيد بحزن وهو بيبص قدامه انا حياتي كلها فجأة اتدمرت! انا كنت ممكن اتقبل اي خسارة الا خسارتها هي.. خدت وقت طويل عشان اقدر اصدق او استوعب انها خانتني بعد كل الحب اللي حبتهولها! في حاجات كتير جوايا اتكسرت! بس رغم كل ده.. في جوايا شعور قوي ان مش هي دي الحقيقه! قلبي طول الوقت بيأكد ان مستحيل كارمن تعمل فيا كده!
هز والده راسه مؤكدًا بثقة وانا كمان مش مصدق ان كارمن ممكن تعمل فيك كده!
بص لوالده بصدمة، هز والده راسه مؤكدًا انا غلطت في حقك يا رشيد لما موقفتش جنبك السنين اللي فاتت، انا عارف انك كنت محتاجني جنبك، انا غلطت لما اتخليت عنك ووافقت ان جدك يكون هو المتحكم الوحيد في حياتك! انا كنت عارف انك مش حابب تدخل كلية الشرطة وجدك اصر انك تمشي في نفس الطريق اللي هو مشي فيه وتحققله حلمه اللي انا مقدرتش احققهوله! حتى لما انت اتجوزت البنت اللي حبتها، انا كنت مقتنع ان ده من حقك، رغم انك حرمت عليا الحق ده بمساعدة جدك!
كان بيبص ليه بصدمة وذهول. وطى والده وشه بحزن وكمل انا هقولك كلام اول مرة تسمعه مني..
سكت شوية وبعدين كمل بحزن انت عارف انا ليه مدخلتش كلية الشرطة زي ما جدك كان بيتمني؟
بص ليه رشيد بفضول. كمل والده بحزن لان انا كرهت حياة جدك العسكرية.. شدته وأوامره اللي لازم تتنفذ وكأننا مذنبين زي اللي بيتعامل معاهم في شغله.. حياة انا عشت طول عمري اكرهها وعمري ما اتمنيت اعيش الحياة دي. وكان عقاب جدك ليا لما رفضت واصريت اني مدخلش كلية الشرطة؛ هو انه يجوزني واحدة انا مبحبهاش! رفض جوازي من البنت الوحيدة اللي انا حبتها! قالي انت رفضت تحققلي حلمي.. وانا كمان هرفض احققلك حلمك اصر يجوزني والدتك رغم اني عمري ما حبتها.. وانا بكل ضعف مقدرتش ارفض.. كنت شايف نفسي مذنب لاني محققتش حلم جدك زي ما كان دايمًا بيلومني.. واتجدد حلم جدك لما انت جيت للدنيا، حط كل احلامه عليك وكان دايما بيبعدني عنك عشان خايف انك تطلع نسخه مني وتكرر اللي انا عملته ومتحققش حلمه اللي عاش يتمناه.. حلمه الوحيد ان اسم عيلة الجبالي يفضل مسمع في وزارة الداخلية.. يفضل الاسم محتفظ بهيبته.
اتفاجئ رشيد من كلام والده وكان بيسمعه بصدمة، كمل والده وهو بيبص ليه بحزن انا لما اتجوزت سهير سالم كنت عارف اهدافها وعارف هي اتجوزتني ليه.. سهير كانت بتفكرني بالبنت الوحيدة اللي انا حبتها في حياتي ومقدرتش احقق حلمي واتجوزها.. لما اتجوزتها كنت بدور على السعادة اللي كان نفسي اعيشها مع البنت اللي حبتها زمان.. كنت دايما بدور عليها في كل ست بشوفها.. جدك كان فاكر ان السنين هتنسيني! بس السنين عمرها ما بتنسي، بالعكس.. مع مرور السنين اللهفة والاشتياق كان بيزيد جوايا اكتر من زمان!
اتعاطف كتير مع والده، حس بكسر قلبه، مش مصدق انه مشافش الحزن ده بعين والده من قبل! سكت والده شوية في محاولة لتهدئة النيران اللي اشتعلت في قلبه مع تذكره للماضي، وبعدين كمل بحزن لما والدتك عرفت بخبر جوازي وشوفت في عينيك انت واختك نظرة اللوم اللي شوفتها يومها، مقدرتش اقف قصاد جدك وارفض اطلق سهير، وجدك عشان يضغط عليا خدك في صفه وقتها وخلاك شريك له في انهاء علاقتي بسهير.
حس رشيد بالندم ووطى وشه بحزن، ابتسم والده ساخرًا من القدر وكمل جدك كان فاكر انه هيفضل مسيطر علي حياتك وهيقدر يخليك نسخه منه.. بس انت صدمته وطلعت نسخه مني انا..
رفع رشيد وشه وبص لوالده باستغراب، ابتسم ليه والده وكمل بنبرة مرحة انت وقفت في صف جدك وساعدته انه ينهي علاقتي ب سهير وفي نفس الوقت روحت انت وحبيت بنتها.
وطى رشيد وشه بحزن وهو حاسس بكسرة قلب والده اللي بيحاول يخفيها، سكت والده وشرد شوية وبعدين كمل تعرف لما زورتك هنا اول مرة بعد ما عرفت خبر جوازك.. انا كنت جاي عشان احاسبك على جوازك من بنت الست اللي انت حسبتني لما انا اتجوزتها.. بس اول لما شوفت مراتك اتصدمت.. مقدرتش اتكلم.. وقتها فهمت انت ليه اتجوزتها..
بص ليه رشيد باستغراب وقال ليه اتصدمت لما شوفتها؟!
ضحك والده من قلبه وجاوب عليه بصدق لان مراتك طلعت نسخه من البنت اللي انا حبتها زمان، في شبه كبير بينهم.. ووقتها عرفت انك طلعت نسخه مني انا مش من جدك !
ضحك رشيد وقال بنبرة مرحة يعني طلع ذوقنا واحد!
جاوب والده وهو بيبتسم وقتها فرحت انك حققت اللي انا مقدرتش احققه واتجوزت البنت اللي حبتها.
ابتسم رشيد وبعدين شرد شوية وقال بحزن بس في النهايه احنا الاتنين خسرنا.
قال ليه والده بثقة اي خسارة ممكن تتعوض الا خسارة انسان انت بتحبه من قلبك بجد.. هي دي الخسارة اللي مستحيل تتعوض.
بص ليه رشيد باهتمام، كمل والده بتأكيد انا عارف انك خسرت شغلك وخسرت حاجات كتير مهمه في حياتك.. بس انت ممكن تبدأ شغل جديد تكون بتحبه، وانا متأكد انك هتنجح فيه.. وكمان هتقدر ترجع كل حاجة خسرتها.. بس الاهم انك تاخد خطوة ايجابيه مع قلبك وعقلك.. لازم قلبك يقنع عقلك باللي هو مصدقه.. او عقلك يقنع قلبك باللي هو شافه وسمعه!
بص رشيد لوالده باهتمام وبعدين شرد شوية؛ كلمات والده كانت بتتردد على سمعه، براءة كارمن وطيبة قلبها وحبها الكبير ليه، كلام سعد بشار عنها وتأكيد خالد رؤيته ليها لما جت لزيارة سعد بشار، عشقه الكبير ليها وقلبه اللي بيأكد براءتها، اصرار جده على الطلاق! مشاعر وأفكار كتيرة بتتضارب في راسه، هز راسه مؤكدًا على كلام والده حضرتك معاك حق.. كفايه الوقت اللي انا ضيعته.. لازم اتأكد من الحقيقه واحسم الجدل اللي بين قلبي وعقلي.
هز والده راسه بالموافقة وطبطب على ايديه بدعم وقال وانا معاك وفي ضهرك في اي قرار هتاخده.
رواية رشيد وكارمن بقلمي ملك إبراهيم.
جوه البيت الكبير لعيلة الهواري.
دخلت كارمن ورا والدتها اللي ماشية قدامها بثقة. أخدهم فراج لقاعة القعدة، وبعدين وقف قدام جده اللي كان قاعد فوق مقعد ضخم وبيستند بايديه فوق عصاه اللي اتعمل مخصوص ليه! كان لابس جلباب صعيدي قيم وباين عليه الهيبة والوقار.
قال ليه فراج باحترام بنت عمي المهندس صادق الهواري الله يرحمه يا جدي والست والدتها جم يزورنا ويسلموا عليك.
ابتسم جده مرحبًا بيهم وقال بترحاب يا اهلا بالغالين اللي من ريحة الغالي.
قالت سهير بتوتر اهلا بحضرتك.
بص الجد للبنت وقال لحفيده اسمها ايه بنت عمك يا فراج؟
جاوبه فراج حفيده بهدوء اسمها كارمن يا جدي.
بص الحاج عبد الرازق لسهير بغموض وبعدين بص لكارمن وشاور ليها بايديه وقال تعالي قربي مني يا بنت صادق.
اترعش جسم كارمن بخوف وبصت ليه بهلع وبعدين بصت لوالدتها اللي شاورت ليها براسها انها تتقدم منه. اتقدمت كارمن من الجد بخطوات مرتبكة وهي بتبص ليه بخوف وقلق. كان فراج بيتابعها بنظرات إعجاب مقدرش يخفيها.
وقفت قدام الجد بتوتر واستنت هو عايز ايه! ابتسم الجد وهو بيلاحظ خوفها وتوترها وقال ليها بغموض واخده شكل امك.. بس واخده قلب ابوكي.
مفهمتش كلامه وبصت ليه باستغراب. بص الجد لحفيده وكمل بتأكيد وصلهم اوض الضيافه يرتاحوا يا فراج.
بص فراج لكارمن وبص ليها بقوة وشاور بعينيه لايد جده، كان بيطالبها بعينيه انها تقرب أكتر من الجد وتبوس ايديه باحترام زي ما بيعملوا أحفاده. استغربت كارمن من إشارة فراج ليها ومفهمتش هو عايز تعمل ايه، ظهرت ابتسامه ساخرة على وش الجد وهتف بصوته القوي لحفيده متتعبش نفسك يا فراج.. بنت صادق مش هتفهم انت عايز تقولها ايه!
قالت سهير لبنتها بصرامة بوسي ايد جدك يا كارمن.
بصت كارمن لوالدتها باستغراب ومفهمتش حاجة، شاور الجد لحفيده بأمر انه ياخدهم من قدامه. هز فراج راسه باحترام واتقدم من كارمن ووالدتها وأخدهم لأوض الضيافة عشان يرتاحوا شوية.
تابع الجد ذهابهم بنظرات غامضة، رجع فراج لجده بعد دقايق قليلة بعد ما أخدهم لأوضتهم، وقف فراج قدام جده وقال باحترام امرك يا جدي؟..
بص ليه الجد بتفكير وقال البت ميتخفش منها زي ابوها.. بس ليها ام عقربه.
هز فراج راسه مؤكدًا على كلام جده ده حقيقي يا جدي.. بس هما لسه مقالوش هما جاين ليه!
جاوبه جده بثقة من قبل ما يقولوا يا فراج انا عارف هما جاين ليه.
رواية رشيد وكارمن بقلمي ملك إبراهيم.
جوه الأوضة اللي جمعت كارمن مع والدتها في بيت الهواري.
قعدت سهير فوق السرير وهي بتبص حواليها برضا وبتفكر وبترتب أفكارها الماكرة في الحصول على جزء كبير من الثراء ده.
وقفت كارمن بتبص حواليها بتوتر وقالت بعصبية انا مش فاهمة احنا هنا بنعمل ايه دلوقتي! ليه متكلمتيش معاهم في موضوع الارض ورجعنا القاهرة على طول، انا خوفت منهم اوي وشكلهم مش مريح.
ابتسمت والدتها وقالت ليها بمكر طبعا لازم شكلهم يبقى مش مريح.. احنا جاين ناخد منهم ارض بملايين!
قالت كارمن بخوف بس انا مش عايزة حاجة.
انتفضت سهير من مكانها بصدمة واندفعت ناحية كارمن بعصبية وقامت بمسك دراعها والضغط عليه بعنف وقالت ليها بتحذير لو سمعتك قولتي كده قدامهم.. هقتلك.
اترعش جسمها بصدمة قدام والدتها، عينين والدتها كانت بتشع قسوة وغضب، لأول مرة تشوفها كارمن بالقسوة دي، جف حلقها وهي بتتطلع لوالدتها بصدمة وذهول، رددت كلام والدتها بصدمة تقتليني!!
جاوبتها والدتها بقوة انا مش هرجع للفقر تاني يا كارمن.. انا مستعده ادوس على اي حد..
اتعمقت بالنظر في عينين بنتها وكملت من غير تردد حتى لو كان الحد ده انتي.
كلماتها اخترقت قلب كارمن وحطمته بقسوة، وقفت بتبص لعينين والدتها بصدمة، بعدت عنها والدتها وكملت بإصرار انا مش هموت في الفقر اللي انتي عايزة تعيشيني فيه ده عشان خاطرك!
لمعت الدموع في عين كارمن بحزن وقالت بصوت مبحوح انتي عمرك ما عملتي حاجة عشان خاطري! انتي دايما بتدوسي عليا عشان مصلحتك!
لفت والدتها وبصت ليها ببرود وجاوبت عليها بإصرار انا مش هتنازل عن الارض وانتي هتطلبي حقك منهم قبل مني.
بصت ليها كارمن بعين بتذرف الدموع بقهرة، دموعها مهزتش قلب سهير على بنتها، بل زادت قسوتها في اعتقادها انها تقدر تسيطر على بنتها من خلال قسوتها وحدتها معاها، مباليتش لدموع بنتها وسبتها واتجهت للسرير عشان ترتاح شوية وترتب أفكارها قبل مواجهة الحاج عبد الرازق ومطالبتها بحقهم في الارض.
بره الأوضة كانت واقفة ازهار مرات فراج وبنت عمته، كانت بتسترق السمع بره الأوضة عشان تشبع فضولها بعد ما قالت ليها واحدة من الستات اللي بيشتغلوا في البيت ان في بنت جميلة جت مع والدتها واصطحبهم فراج لأوض الضيوف. سمعت ازهار الكلام بين كارمن ووالدتها. مفهمتش عن أي ارض بيتكلموا! راحت لأوضة والدتها وداد الهواري اللي بتقيم مع والدها الحاج عبد الرازق في نفس البيت بعد وفاة جوزها من سنين.
دخلت ازهار أوضة والدتها وقالت ليها بصوت واطي عرفتي مين عندنا يا امي؟!
بصت ليها والدتها باستغراب وقالت بفضول مين يا ازهار؟
جاوبتها ازهار واحدة وبنتها.. معرفش هما مين بس سمعتهم بيتكلموا علي ارض!
اعتدلت والدتها وسمعت ليها باهتمام ارض ايه؟!
جاوبت ازهار انا مفهمتش منهم حاجة.. بس سمعتهم بيتكلموا على ارض جاين ياخدوها!
بصت وداد قدامها بتفكير شوية وبعدين انتفضت من مكانها بتهمس بذهول لا مش معقول هما..
سابت بنتها واقفة في الأوضة وخرجت بخطوات مهرولة مندفعة للأسفل وهي بتردد بصدمة اكيد مش هي...
جريت وراها ازهار باستغراب وهي بتناديها بصوت واطي وبتطالبها انها تقول ليها ايه اللي بيحصل!
نزلت وداد للأسفل وقربت من القاعة اللي بيقعد فيها والدها وقالت ليه بفضول مين عندنا يا ابوي؟!
بص ليها الحاج عبد الرازق بدهشة وبعدين بص لحفيده فراج اللي بيقعد جنبه، قربت منهم ازهار ووقفت جنب والدتها مستنية إجابة جدها عشان تشبع فضولها اللي زاد جوعًا بعد ردة فعل والدتها الغريبة!
رمق فراج مراته ازهار بغضب بعد ما لحقت والدتها ليهم، عرف دلوقتي مين اللي قال لعمته بوجود ضيوف في البيت! ده اللي اتعود عليه من مراته؛ دايمًا بتلحق كل حاجة بتحصل في البيت وبتقول بيها للكل.
قال الحاج عبد الرازق بصوته القوي وقال لبنته بنت المرحوم صادق ابن عمك وامها.
شهقت وداد بصدمة بعد ما اتأكدت من شكوكها، صدح صوتها الغاضب بانفعال وايه اللي جاب العقربه دي هنا؟! وأرض ايه اللي جاين ياخدوها!
بص ليها الحاج عبد الرازق بفضول، اتوترت ازهار وتراجعت لورا بخطوات مرتبكة، بص فراج لعمته بصدمة وقال ارض ايه يا عمتي اللي جاين ياخدوها؟.. انتي جبتي الكلام ده منين؟!
بصت لبنتها بصمت، زاد توتر ازهار وهي بتتلقى النظرات الغاضبة من جدها وجوزها على سرقتها للسمع اللي اتعودت انها تعملها، موقفتش عن فعل ده مهما حذرها جدها وعاقبها جوزها!
قال الحاج عبد الرازق لحفيدته ازهار بفضول سمعتي ايه يا ازهار؟
جف حلقها من الصدمة وتراجعت لورا بخوف. ارتفع صوت جدها بصرامة بيأمرها انها تقول ليه اللي سمعته. بصت لجوزها بارتباك وهو بيرمقها بنظرات غاضبة، بلت ريقها بتوتر وجاوبت انا مكنتش اعرف ان في حد في اوض الضيوف يا جدي.. وكنت ماشيه في الدار وسمعت صوت جاي من هناك.. ولما روحت اشوف في ايه سمعتهم وهما بيتكلموا.
فقد فراج سيطرته على غضبه وهتف بيها غاضبًا قولي يا ازهار سمعتي ايه؟!
اتوترت أكتر واترعش جسمها بخوف، قال ليها جدها بصرامة اتكلمي يا بنت وداد بدل ما انتي عارفه.
قالت بسرعة بخوف سمعتهم بيتكلموا علي ارض يا جدي.. وبيقولوا انهم لازم ياخدوا ارضهم!
بص فراج لجده بصدمة وقال بغضب ارض ايه يا جدي اللي جاين ياخدوها؟!
وطى جده وشه للأرض وهو بيفكر في الارض اللي أخدها من صادق ابن اخوه بالقوة لما رفض صادق الجواز من بنت عمه وداد وساب القرية كلها ومشي سايب وراه كل حاجة.
ارتفع صوت وداد بغضب على جثتي يا ابويا لو طالت شوية تراب من الارض..... بقلمي ملك إبراهيم.
... يتبع
ياعيني عليكي يا كارمن دخلتي حرب ملكيش دعوة بيها
تفتكروا رشيد هيروح ل كارمن في الصعيد
حبايبي متنسوش التفاعل بعد القراءة

تعليقات
إرسال تعليق