رواية الاتهام الفصل الأول بقلم سلمي خالد حصريه وجديده على مدونة النجم المتوهج
رواية الاتهام الفصل الأول بقلم سلمي خالد حصريه وجديده
اتسمرت مكاني الكلمة وقعت عليا تقيلة زي كأنها طوبة وقعت من مكان عالي على دماغي، بس هو عاد كلامه تاني بنبرة فيها حدة اكتر:
_ فين الفلوس اللي كانت هنا يا دينا؟!
بصّيت للإدراج، وبعدين بصّيتله، وبعدين بصّيت على إيدي اللي لسه مبلولة من المية والصابون.
مش مصدقة، فين الفلوس اعرف منين؟ وبعدين أنا؟ أسرق؟
أنا اللي عمري ما مدّيت إيدي على حاجة مش بتاعتي!
أنا اللي سايبة المدرسة علشان لقمة العيش!
بس رديت عليه وانا كلي خوف و جسمي بيرتعش:
_والله يا أستاذ… والله ما لمست حاجة، والله ما اعرف حتى الفلوس دي كانت فين، أنا...أنا كنت بمسح بس.
ضحك ضحكة مستفزة، ضحكة حد متعود يتهم الناس تقريبا ومش فارق معاه الحقيقة، وقالي بسخرية:
_يعني الفلوس طارت؟ ولا الدرج اتفتح لوحده ورماها منه؟
قلبي كان بيدق لدرجة وداني واصلها صوت دقات، وصعبت عليا نفسي اوي حاسّة إني صغيرة قوي، أضعف من إني أدافع عن نفسي، أضعف من إني اتحط في موقف زي دا، فين ماما؟
المحل فجأة بقى ضيق، وحيطانه حستها زي ما يكون بتقرب مني و هتفسني في النص .
_ ردي يا بنتي، هتفضلي واقفة متستمرة كتير؟ ردي فين الفلوس؟
قالي وهو بيقفل الدرج بعصبية، أنا بلعت ريقي وقولتله وانا بعيط ومقدرتش امسك نفسي:
_أنا.... أنا والله ما خدت حاجة يا استاذ والله ما اعرف الفلوس راحت فين، حاضر طيب هدورلك عليها تكون واقعة هنا ولا هنا.
ضحك ضحكة عالية مليانة سخرية وقالي:
_ اسمعي يا شاطرة أنا مش بسيب حقي، والفلوس دي كانت مبلغ كبير وانتي المسؤولة قدامي
قرب مني خطوة، غصب عني رجعت خطوة لورا وكمل كلامه وهو بيبص لي بنظرات مرعبة:
_ماهو اسمعي بقى… يا إما الفلوس تطلع دلوقتي، يا إما هتصل بالبوليس .
كلمة البوليس دي كسرت ضهري اكتر ماهو مكسور من وجع الشغل والبهدلة
أمي؟ إخواتي؟
الفضيحة؟
الشارع اللي كله يعرف بعضه؟
دموعي نزلت اكتر وبدأت اقول وانا بتشحتف من العياط بترجاه:
_ حرام عليك، ارجوك بلاش بوليس ارجوك انا ماخدتش حاجة، أنا.... أنا أنا بس نزلت علشان محتاجة الشغل، علشان خاطر أمي و اخواتي طيب سبني اروح بس والله، أنا ماخدتش حاجة... دول اخواتي أطفال صغيرين وانا المسؤولة في البيت
سكت لحظة، وبصلي من فوق لتحت، وبعدين قال بنبرة أخطر من الاتهام:
_ عايزاني اسامحك؟
_ ابوس ايدك
_ماشي... يبقى نحل الموضوع بهدوووء…
وقتها فهمت إن الفلوس مش المشكلة.
وإن الشغل ده من أوله ما كانش نعمة كان امتحان قاسي.
وساعتها اتمنيت أكون لسه جنب أمي فقيرة.
لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم
جميع الروايات كامله من هنا 👇 ❤️ 👇
اعلموا متابعه لصفحتي عليها الروايات الجديده كامله بدون روابط ولينكات من هنا 👇 ❤️ 👇
❤️🌺💙🌹❤️🌺💙🌹❤️🌺💙🌹❤️🌺🌹❤️🌺🌹🌹❤️🌺💙
إرسال تعليق