رواية أم العيون السود الحلقه الاولى بقلم الكاتب محمد منصور حصريه وجديده على مدونة النجم المتوهج للروايات والمعلومات
رواية أم العيون السود الحلقه الاولى بقلم الكاتب محمد منصور حصريه وجديده على مدونة النجم المتوهج للروايات والمعلومات
لعشاق الرومانسية والدراما.
وحكاية لاغرب قصة حب ممكن تسمعوا عنها.
انا ادم السني. وحكايتي حكاية. لاني رسمتها وانا ماعرفهاش لانها صورة من خيالي لحبيبتي والصورة وصلت لها رغم ان بيني وبينها بلاد وبلاد. وقدرت توصلي وبدات بيني وبينها قصة حب اغرب من الخيال. وبسبب الحب دة. كنت هموت موت ونسيت اني بحبها مرة. عايزين تعرفو حكاياتي. تابعوني
من تاليفي، ،
محمد منصور. ** منص **
وقبل ما نبدأ الحلقة نوحد الله ونصلي علي خير خلق الله سيدنا محمد. وعلي بركة الله نبدأ
بسم الله توكلت علي الله. وهو رب العرش العظيم
أنا ادم السني شاب عندة 27 سنه شغال طيار دليفري في مطعم كبير من مطاعم القاهرة وعايش علي قد حالي مع امي الست فريدة. واهو مرتبي مع معاش المرحوم مكفينا وعايشين في شقه ملك امي ورثتها عن ابوها ومساحه الشقه حوالي 120 م. ومعانا اختي هاله اللي في رابعه كليه طب ومعروف عني من زمان اني بحب الرسم جدا. وكتير رسمت لوحات وكل اللي يشوف لوحه ليا تعجبه وياكد لي اني موهوب. واتجوزت بنت جارتنا اللي اسمها سناء واللي كانت حلوة جدا من برة لكن وحشه قوي من جوة. وخلفت منها عيلين ولد وبنت تؤام وعيشتي مع سناء كانت عيشه ماتسرش وكنت مستحملها عشان خاطر العيلين وبس. وديما اقول ذنبهم ايه يتربو بعيد عن ابوهم والله يسامحها امي بقي هي السبب في الجوازة دي قال ايه نفسها تفرح بيا واهو الحمد لله من ساعه ما اتجوزت سناء وانا بعيط من كتر الفرحه.
وعدت الايام وكل مرة سناء تزن عايزا شقه ليها لوحديها وانا مش عايز اعزل واسيب امي واختي يقعدو لوحديهم في الشقه لغايه ما جه يوم وكنت قاعد مع امي في البالكونه بتاعت الشقة وقالت لي
تعرف يا ادم انا نفسي في ايه
ادم
نفسك في أيه يا غاليه
فريدة
نفسي اعمل عمرة
ادم
بس كدة من عينيه
فريدة ضاحكا
يا سلام. وهاتجيب فلوس منين يا فالح
ادم
هاعمل جمعيه واقبضها الاول واديهالك تروحي بيها العمرة
فريدة فرحا
بجد يا ادم
فيبوس ادم ايد امه فريدة وهو يقول
الا بجد. هو انا عندي اغلي منك يا ست الحبايب. بس وحياة امك وانتي هناك ادعي لي ربنا يفك سجني
فتضحك فريدة وتقول
سجنك
ادم
اة. اللي اسمه سناء
فتضحك فريدة اكتر واكتر وتقول
انا لو اعرف انها نكديه كدة ولسانها متبري منها ما كنتش جوزتهالك ، ،،،،،
وبعديها بساعه من داخل حجرة ادم الخاصه بالرسم وفيها كل ادواته واثناء ما كان ادم يمسك الريشه الخاصه به ويرسم منظر طبيعي لارض خضراء ويضع سماعات في اذنه ويسمع اغنيه رومانسيه من الاغاني اللي بيعشقها لعمرو دياب. تدخل عليه سناء وتجلس امامه وهي مكشرة وشكلها مخيف وشعرها واقف شبه قرون الجاموسه فينظر لها وينظر للارض الخضراء ويقول لنفسه
انا كل مأرسم ارض خضراء الجاموسه دي تخش. شكلها جعانه وعايزا تاكل
فتقول له سناء
ادم.
فيعمل ادم نفسه مش سامعها فتقول مرة اخري
ادم انت سامعني وهاترد عليه
فيخلع ادم السماعات من اذنه وينظر لها ويقول بزهق
انا كام مرة اقول لك لما اكون برسم مابحبش اتكلم مع حد
سناء
ما انت بقالك ساعه قاعد هنا ومش عايز تيجي اوضتنا. وانا عايزه اتكلم معاك. وبعدان النجيله اللي انت بترسمها دي اهم مني
ادم
نجيله. طيب. انا بقي مش عايز. ادخل اوضتنا دلوقتي يالا بقي اخرجي وخليني اخلص اللوحه
سناء وهي بتزق اللوحه بعيد عن ادم وتقول
لوحه ايه وزفت ايه بقول لك عايزاك
ادم بغضب
انا كام مرة اقول لك ايدك ماتلمسش اللوح بتاعتي
سناء
يعني انا لمست الالماظ
ادم
بالنسبه لي اغلي من الالماظ وطول ما انتي مش فاهمه ولا هاتفهمي قد ايه اللوح دي غاليه عندي يبقي حسك عينك تقربي من لوحه منهم
سناء بعصبيه
يا اخي بدل ما انت نصبت لي المحكمه كدة عشان خاطر الشخبطه بتاعتك واللي انت فاكرها حاجه ليها قيمه قوم اشتغل الساعه دي وهات لنا فلوس وكفي بيتك بدل ما انا مابشوفش اللحمه من ساعه ما اتجوزتك الا بالصدفه
ادم
انا شغال 12 س. اعمل لك ايه تاني
سناء
انا ماليش دعوه انت شغال كام ساعه انا اللي أعرفه ان امك هي اللي بتصرف علينا. انا ماعرفش ازاي انت راجل وتقبل علي نفسك ان امك هي اللي تصرف علينا عشان كدة مش عايز تخرج من هنا وتفضل قاعد في حضنها
ادم بنظرة غضب
والله انا عمري ما مديت ايدي علي واحدة ست اشحال بقي انك انتي مراتي اللي المفروض تكوني الحضن اللي اسكن في والسند ليا. لكن اللي زيك ماتستاهلش الا كدة
ويضربها ادم بالقلم. فتتوجع سناء وتمسك خدها ويكمل ادم قائلا
وبصي بقي هي دي عيشتي وحياتي ووافقتي عليا من الاول وانتي عارفه ظروفي وعارفه اني مش هاسيب امي واختي يعيشوا لوحديهم في الشقه. وكلمه تاني مش عايز اسمع
سناء وهي لاتزال تضع يدها علي خدها
يبقي خلاص مدام كلامي ضيقك اوي كدة يبقي زي ما هاتعمل لي امك جمعيه عشان تطلعها عمرة تعمل لي جمعيه انا كمان وتجيب لي شقه
ادم بلغه استهزاء
اة. مش هاتبطلي تتصنتي عليه انا وامي
سناء
انا ما كنتش بتصنت انتو اللي صوتكم عالي وسمعتك وانت بتقول عليه سجن وامك بتقول عليه نكديه
ادم
طيب وايه اللي زعلك ماهي دي الحقيقه. وكلام تاني مش عايز
وسابها ادم وخرج من الاوضه بتاعته وسناء بتغل وبتقول
كدة يا ادم ماشي، ،،،،،،
وبعديها بشهرين ومن أمام المطعم الذي يعمل في ادم يجلس ادم علي الموتوسيكل الخاص به في وقت راحته وأثناء ما كان يتناول شندوتش شاورما ينضم له صديقه حمص ومعه صديقه التاني ماندو. ويقول حمص وهو يقف امامه
انت هنا والدنيا مقلوبه علي الفيس
ادم ضاحكا
لا والنبي مقلوبه مالها يا خويا
حمص وهو يخرج الموبيل بتاعه ويفتح النت علي اعلان لمسابقه للمواهب الشابه وخصوصا في فن الرسم وهذة المسابقه تحت اشراف الرسام العربي المشهور طولان بن حمد واللوحه اللي هاتنزل المسابقه وتاخد اعلي نسبه تصويت هايكسب صاحبها 10 الف دولار فينظر ادم للرقم وللمسابقه ويقول بلهفه
هو ده الكلام ودي اشترك فيها ازاي يا حمص
حمص
أنا اشتركت لك خلاص يا فنان انت ناسي أن حساب الفيس بتاعك وكلمه السر انا اللي عامله ليك. بس اتجدعن بقي انت وارسم حاجه تجنن طولان بن حمد
ماندو
أعمل زيي وارسم زي ما انا رسمت
حمص بضيق
انت بتعرف ترسم يا ابن الهجاصه
ماندو
اة. انا رسمت قبل كدة كيس شيبسي وجوة منه بطاطس صوابع مش اي حد فكر في الموضوع دة
ادم
يخرب بيت خيال اهلك كيس شيبسي جوة منه بطاطس.
ماندو
اومال ايه. فن تكعيبي
ادم ضاحكا هو وحمص
والله هاتوحشني لما تموت
ماندو
ليه
ادم
هو ايه اللي ليه
حمص لي أدم
سيبك من ماندو مش هايكلنا عيش. وركز يافنان ولازم خلال شهر بالكتير ترفع لوحتك علي الموقع بتاع المسابقه.
أدم
شهر قليل قوي
حمص
هو ده الميعاد المحدد للمسابقه وبعد الشهر ما يخلص هايبدا التصويت واللوحه صاحبه اعلي نسبه تصويت صاحبها هايكسب ال. 10000 دولار
أدم
يارب اكون انا واطلع امي تعمل حجه بدل العمرة اللي كان نفسها فيها
حمص
طيب وناوي بقي ترسم أيه
ادم
هارسم صورة لحبيبتي اللي كان نفسي اشوفها و عمري ما شوفتها
حمص
ادم. فزورة دي
ادم
لا خالص. أنا ياما حلمت بأم العيون السود اللي تخطف قلبي وتطير بي لبعيد. وتكون مراتي وحبيبتي ونور عيوني. وعشان كدة هارسمها. بس هارسمها بقلبي زي ما حلمت بيها واتخيلتها وهاسمي اللوحه أم العيون السود وطالما اللوحه رسمتها بقلبي هاتوصل لقلب كل واحد يشوفها، ،،،،،
وفي نفس الليله ومن الاردن وبالتحديد من داخل حجرة نوم حلا ياسين بنت الاردن اللي ليها أصول فلسطينيه واللي شعرها أسود طويل كسواد الليل وينكتب في شعر وعيونها السود جمالهم يخطف اي قلب من حلاوتهم وزاد من جمال عيونها لما أتكحلت بالكحل العربي. وكانت حلا تقف قدام مرايتها وتنظر لنفسها وهي ترقص وتغني مع اغنيه رومانسيه لهاني شاكر فيفتح باب حجرتها وتدخل اختها الصغيرة وردة وهي رسامه شابه ولم تشعر بيها حلا اللي كانت طايرة مع الاغنيه لي ابعد سما فوقفت وردة قدامها وقالت
يا سيدي علي الانسجام
بصيت لها حلا واتخضت وقالت
انتي دخلتي امتي
وردة
لسه داخله حالا. وفرحت لما شوفتك فرحانه كدة.
حلا وهي تلتقط انفاسها بالعافيه بسبب الرقص وتقول
ومش عايزاني افرح. طول ما جعفر جوزي مسافر وبعيد عني ببقي في اسعد لحظات حياتي
وردة
انتي غريبه يا حلا. مش انتي اللي اختارتي وياما بابا كان بيحذرك منه
حلا بنبرة حزن وهي تخرج سيجارة من علبتها وتشعلها تقول
اهو بقي اتخدعت في واخترت غلط وكنت صغيرة مش فاهمه الدنيا. والايام معه بينته علي حقيقته لما سرق فلوسي وراح اتجوز بيهم عليا وهو دلوقتي في لبنان بيقضي أيام جميله مع مراته الجديدة وبيضحك عليه وبيقول لي انه مسافر تبع الشغل فاكرني غبيه لسه ماعرفتش حقيقته وعرفت انه متجوز عليا
وردة وهي تحاول ان تاخذ السيجارة من فمها تقول
طيب اطفي السيجارة دي. أنتي عندك القلب والدكتور محرج عليكي وقايل لك الا التدخين
حلا وهي تبعد ايد وردة عنها وتمنعها من اخذ السيجارة منها تقول
يارب اموت عشان ارتاح
وهربت من حلا دمعه من عيونها فمسحتها وضحكت وقالت لوردة
ملعون أبوة و ابوة سيرته
وردة
طيب ما تطلقي يا حلا منه
حلا
واولادي التلاته اسيبهم لمين. وليه يتربو بعيد عني ويتحرموا مني مالهمش ذنب دي غلطتي ولازم استحملها
وردة
خلاص قولي لبابا علي اللي بيعمله معاكي
حلا
بابا شارط عليه اني ما جيش في يوم واشتكي منه مهما حصل لان جعفر اختياري وانا لازم اتحمله. وعشان ولادي هاتحمل
واتنهدت حلا وقالت
دخلتي ليه بقي وقطعتي عليه اغنيه هاني
وردة
عايزا افرحك. انا قدمت في مسابقه طولان للمواهب الشابه وهارفع اول لوحه ليا والناس كلها هاتشوفها.
حلا
عن جد برافو عليكي قد ايه انا فرحانه ليكي وخصوصا ان طولان من الفنانين اللي لي جمهور رهيب في الوطن العربي كله ولوحاته تحفه
وردة
عشان كدة انا هارفع اللوحه فالموقع عندة. بس تفتكري اللوحه بتاعتي هاتعجب الناس
حلا
أرسميها بقلبك وهاتوصل للقلب بسهوله.،،،،،
وعدي الشهر وخلص ادم لوحه أم العيون السود ورفعها علي النت وكسرت الدنيا لانه كان رسمها باحساس عالي جدا وشافت وردة اللوحه علي النت من خلال التاب بتاعها وبصيت للوحه باستغراب شديد ودهشه ما بعدها دهشه وخدت التاب وراحت بيها لحلا بسرعه رهيبه وقالت لها
حلا بصي للوحه دي كويس
بصيت حلا للوحه وهنا كانت المفاجاة اللوحه اللي رسمها ادم لوحه فيها حلا بكل تفاصيلها من شعرها لعيونها لي شفافيها لي ضحكتها وكانه يعرف حلا من زمان مع انه عمرة ما شافها واتصدمت حلا من جمال الصورة ومن ملامحها اللي مرسومه باحساس عالي قوي وسالت وردة
مين دة اللي رسمني بالظبط كدة ويعرفني منين عشان يرسمني بالجمال دة
وردة
دة واحد مصري اسمه أدم السني
حلا
ادم السني. مين ادم السني ده، ،،،،،،،
أيه دة بقي ازاي ادم رسم حلا. وهو عمرة ماشافها. ولا ادم شاف حلا قبل كدة. ولو مشفهاش قبل كدة ممكن حد يتخيل حد و يرسمه بالجمال دة.
كل ده هاتعرفو باذن الله. تابعوني في اللي جاي
لو عجبتكم الحلقه ياريت لايك وكومنت في رايك.
عشان رايك يهمني.
لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم
جميع الروايات كامله من هنا 👇 ❤️ 👇
❤️🌹💙🌺❤️🌹💙🌺❤️🌹💙🌺❤️🌹💙🌺❤️🌹💙🌺❤️🌹
تعليقات
إرسال تعليق