رواية أرملة رجل حي الحلقه الاولى بقلم الكاتب محمد منصور حصريه وجديده على مدونة النجم المتوهج
رواية أرملة رجل حي الحلقه الاولى بقلم الكاتب محمد منصور حصريه وجديده على مدونة النجم المتوهج
صرخت في ودعيت باعلي صوتي وقولت
يارب تموت وارتاح منك انا خلاص ما بقتش قادرة
خرج بعدها يقعد علي القهوة ما رجعش وناس قالو لي انهم شافو وهو بيرمي نفسه من فوق كوبري قصر النيل. ومن هنا بدات الحكاية وبقيت
ارملة رجل حي
من تاليفي
محمد منصور
**منص**
وقبل ما نبدأ نوحد الله ونصلي علي خير خلق الله سيدنا محمد.
اللهم صل وسلم علي محمد صلاة تحل بيها العقد وتفك بيها الكرب
من جوة شقة بسيطة في بيت قديم كانت بتعيش كريمة. من المنصورة وجمالها جمال اوربي عيون زرقاء شعر اصفر ست مش شكل ستات كتير في مصر لكن ظروفها شبه ظروف ستات كتير. و نصيبها خلاها تتجوز راجل ما خدش اي حاجة من الرجوله الا كلمة ذكر اللي في البطاقة يعني خلينا نقول انه ذكر مش راجل والذكر دة اسمه بسيوني. بسيوني دة اتجوز كريمة من 20 سنه وكان عندها وقتها 16 سنه وخلف منها بنتين وولد. هنبدا بالكبيرة ودي تبقي عفاف في اولي كلية تربيه دلوقتي واللي بعدها علي طول صباح ودي في تانية ثانوي والاخير حامد. لولا كريمة وشغلها في مستشفي عين شمس ممرضة كان زمان الثلاثة دول متبهدلين في الشارع لكن كريمة اعتبرت نفسها ارمله وبتجري علي يتامي علشان تعرف تربيهم.
وهنبدا الحكاية قبل ما بسيوني ما يرمي نفسه من فوق كوبري قصر النيل. بكام يوم. ودة يوم ما بسيوني طلق في كريمة الطلقة الثالثة وطردتها من البيت وراحت ل بيت اختها نحمده اللي كان في نفس الشارع وهي بتعيط وبتقول
يغور هو في ستين داهية انا اللي فارق معايا دلوقتي عيالي اسيبهم ل دة ازاي دة كدة مستقبلهم هيضيع
نحمده
لما يجي جوزي طارق هخلي يروح له ويقعد مع
لطمت كريمة وقالت
يا نحمده دي الطلقة الثالثة ما هو طلقني مرتين ورجعت له علشان عيالي ما يتبهدلوش لكن دي الثالثة يعني لازم اتجوز واحد غيره علشان اعرف ارجع له
نحمده
يا نهار ابوه اسود وازاي يطلقك وهو عارف ان دي الطلقة الثالثة
كريمة
هو دريان بنفسه المخدرات والبرشام لحسو دماغو وخلاص ما بقاش عارف هو بيعمل اية ولا بيقول اية
نحمده
طيب يا كريمة انا مرة سمعت في التيلفزيون الشيخ بيقول ان علشان الطلاق يقع لازم الزوج يكون في وعيه مش تحت تاثير المخدرات
كريمة فرحت وقالت
بجد يا نحمده يعني هو الدين بتاعنا في كدة
نحمده
تعالي ننزل ونسال الشيخ خليل اللي علي اول الشارع،،
وفعلا راحو للشيخ خليل وحكيت كريمة كل اللي حصل بينها وبين جوزها وقال الشيخ
والله يا بنتي المساله دي محل خلاف بين العلماء يعني في اللي بيقول الطلاق لا يقع وفي اللي بيقول ان يقع ودة يرجع في الاول والاخر للزوج وحالته وقت ما قال اليمين
كريمة
هو كان بيتكلم معايا وواعي لكل كلمة بيقولها
خليل
يعني كان في وعيه
كريمة احتارات وقالت
خايفة اقول اة. اشيل ذنب وخايفة اقول لا. يعتبر الطلاق ما وقعش وارجع له واكون لي في الحرام. بصراحة مش عارفة
خليل
بص يا بنتي الافضل ليكي وفي حالتك دي الرجوع
ل مشيخة الازهر وهما يقدرو يفصلو في حكايتك بحكم بين وقاطع،،،،،،،
ويتغير المشهد ونشوف كريمة واختها خارجين من مشيخة الازهر ونحمده بتقول
اهو الحمد لله الشيخ قال لك جوة ان طلاق السكران ما يقعش
كريمة
الحمد لله انها خلصت علي كدة، ،،،،،
ويتغير المشهد. ونشوف بسيوني وهو بيضربها في نص الشقة وكان بيقول
لا ما خلصتش وانا طلقتك ياللي ما عندكيش دم هو اية يا مراة العيشة هتكون معايا بالعافية
كريمة وهي بتزقه بعيد عنها باللي فاضل من عافيتها قالت
هو انت فاكر اني راجعه اترمي تحت رجلك حبا فيك انا راجعه علشان ولادي اللي هيضيعو من بعدي.
بسيوني
مالكيش عيال هنا ويلا بقي غوري
ومسكها من ذراعها وخرجها برة الشقة بالعافية وهي بتحاول تقاومة وعماله تقول
طيب سيبني اخدهم معايا
بسيوني لسة بيجر فيها وبيقول
غوري بقي دة انتي مراة معشرتك تقصر العمر
وقدر يطلعها برة الشقة وقفل الباب وهي فضلت تخبط وعيالها مربوطين في رجول السراير بتاعتهم من ايديهم ورجليهم علشان ما حدش يقدر يحوش عنها وكانو بيعيطو وبينادو علي امهم لكن دة ما كانش فارق مع بسيوني اللي مسك موبيله واتصل برقم واستني للحظات وبعدها قال
الو يا عمنا انا وفيت بوعدي وطلقتها وفي انت كمان بوعدك وقبضني
اللي علي الخط التاني كان طارق جوز نحمده اللي قال
الحج بركات مش هيدفع
ولا جنية الا لما كريمة تكون مراته
بسيوني
هتتجوزه علشان لازم محلل علشان ترجع ل عيالها وهو يتجوزها من هنا وما يطلقهاش وانا حلال عليه
الفلوس اللي اتفقنا عليها
طارق
بعد ما تخلص شهور العدة نتكلم
بسيوني
واحنا لسة هنستني شهور العدة.
طارق
تقصد اية
بسيوني
حقنه بنج تخليها تنام وتصحي ونقولها انتي كنت في غيبوبه بقالك 3 شهور
طارق
انت مجنون يا بسيوني وافرض حامل منك
بسيوني
وقتها الحج بركات يدفع لي الفرق ويبقي خد مراة حامل ويوفر مجهوده للشغل
طارق
انت اية يا بسيوني. فاجر
لكن هنا الحج بركات خد الموبيل من طارق وقال
خلصها يا بسيوني وليك مني 10 بواكي
بسيوني
الا انت معانا يا حج
بركات
وسمعت كل اللي اتقال وعجبني الكلام
بسيوني
بس انا كدة هحتاج فلوس علشان احبكها
بركات
رقمك عليه محفظة مش كدة
بسيوني
انستا يا حج
بركات
عرفت الانستا. ما يزعلش هبعت لك 3 بواكي
بسيوني
ما اتحرمش منك يا عمنا وجهز نفسك للدخلة علي مراتي بعد بكرة،،،،،،،،،
تفتكرو المخطط دة هيتم ولا هيبقي فيها كلام تاني قولولي حاسين باية. ونكمل بكرة
ومع السلامو عليكم
لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم
جميع الروايات كامله من هنا 👇 ❤️ 👇
اعلموا متابعه لصفحتي عليها الروايات الجديده كامله بدون روابط ولينكات من هنا 👇 ❤️ 👇
❤️🌺💙🌹❤️🌺💙🌹❤️🌺💙🌹❤️🌺💙🌹❤️🌺💙🌹❤️🌺
تعليقات
إرسال تعليق