الغرفــ666ــة الحلقه الثانيه بقلم الكاتب سيد مصطفى حصريه وجديده على مدونة النجم المتوهج
الغرفــ666ــة الحلقه الثانيه بقلم الكاتب سيد مصطفى حصريه وجديده على مدونة النجم المتوهج
خلصنا شغلنا في الفندق بعد ما خدت أقوال كل الموجودين والعاملين في الفندق من شيفات وعمال النظافة وعمال بوفيه وفي وسط ده كله مالفتش نظري غير حاجة واحدة بس، خدتها وبعتها للمعمل للجنائي واتحركت للقسم …لما وصلت القسم طلبت حضور أم البنت اللي ماتت في المستشفى والويتر للتحقيق، وعلى الساعة ٦صباحًا، بدأنا بـ أم البنت اللي كان باين على هيئتها ولبسها إنها مرتاحة ماديًا ، دخلت عليا المكتب وهي مبتسمة ابتسامة غريبة، وابتسامتها دي خالتني أسألها …..
-هو انتي مبسوطة اوي كده؟
-مبسوطة عشان ربنا خد حق بنتي؟
-ربنا خد حق بنتك، آه… بس انتي هددني الدكتورة انك هتنتقمي منها وهتقـ ـتليها بايدك.
-أيوة ، بس قدر ربنا كان اسرع مني، انا مش هنكر تهديدي ليها، وانا كنت بخطط لده فعلًا لأنها تستاهل الدبح ، دي إنسانة موازين الرحمة عندها مًختلة، إزاي تبقى رحيمة بالشكل ده مع حيوان زي الكلب، ومعدومة الرحمة مع البني أدم.. انت عارف يا حضرة الظابط دي ماكانتش عايزة تسلمي جثمان بنتي الميت غير لما ادفع حساب المستشفى وتمن العملية اللي كانت السبب في موتها ، تبقى ايديها لسه غرقانة بدم بنتي وعايزة تقبض التمن. شوفت حجود بالشكل ده.
-لا إله إلا الله .. طيب ممكن تقوليلي كنتي فين النهاردة الساعة ١٢ بعد نص الليل؟؟
-كُنت.. كُنت في بيتي هكون فين في التوقيت ده يعني.
-في البيت! ..تمام ، هنتاكد من أقولك وهنقفل التحقيق لحد هنا، ولو احتاجنالك هنستدعيكي تاني.
-مفيش مشكلة ..تحت أمرك.
خرجت أم البنت ووقتها جالي تليفون من الأمين يحيي بأن الاستاذ "أمير"حضر وموجود في القسم، طلبت دخوله الأول وبعدها يدخل الويتر.. دخل "أمير" ببشرته السمرة اللي بتقول إنه من دولة أفريقية …جسمه كان طول بعرض حاجة ضرفه كده.. بس كان في حاجة ملامحه مش مريحة، عينه.. عينه كانت مخيفة شوية، قرب من مكتبي وقبل ما يقعد قدامي قالي….
-ممكن حضرتك تعرفني ايه سبب وجودي هنا.. انا عندي شغل ومش فاضي.
-وانا مش هعطلك، اتفضل اقعد.. حضرتك كنت نزيل في فندق على طريق اسكندرية الصحراوي وتحديدًا في غرفة رقم 666 ؟؟
-مظبوط.. وإيه المشكلة!!
-المشكلة إن حصلت جـ ريمة قـ ـتل في الغرفة دي، واكتشفوا الجريـ ـمة بعد ما إنت سيبت الفندق مباشرًة.
-جريمـ ـة قتـ ـل!؟
-آه جريمـ ـة قتـ ـل ،وفي كتاب غريب موجود مع الجثـ ـث، بص كده معايا على الصور دي، هل شوفت الكتاب قبل كده؟.
مديت ايدي ناحيته بالموبايل، وأنا مركز معاه ،خدهُ مني ، وبص على الصور باشمئزاز قالي …
-تؤتؤ.. ايه المنظر ده؟؟ لا لا، مشوفتش الكتاب قبل كده، ماعرفوش .
رجعلي الموبايل تاني, وفي الوقت ده جاتلي مكالمة من الدكتور "سليم" ، استاذنت من " أمير"، وخرجت بره المكتب وفتحت المكالمة ….
-إيه الاخبار يا دكتور.. فيه جديد؟
-اكيد فيه جديد، عايز اقولك أن بعد فحص الجثـث وتشريحها، اكتشفنا أن الراجل الخمسيني واللي اسمه" فهمي "هو اللي
اتـ ـقتل الأول، مش الدكتورة.. درجة تيبس وتصلب جثـ ـة الراجل بتقول كده، وفي كمان آثار لمقاومة على جسمه في منطقة الصدر والضهر ولقينا آثر لضربة بآلة حادة على راسه أفقدته الوعي وبعدها تم دبحـ ـه، بعكس الدكتورة اللي كانت مستسلمة تمامًا ، واللي عينة الدم بتاعتها أثبتت إنها كانت واخده كمية كبيرة من مخدر، وده خلى عملية قتلـ ـهـا بدون مقاومة منها.
-تمام.. تمام يا دكتور.
قفلت مع الدكتور سليم وكلمت عماد بسرعة..
-ايه الأخبار يا عماد؟؟
-تمام ..القاتل ده صايع اوي يا حسين، ده ماسبش وراه أي بصمات، مفيش بصمات على الجثتين نهائيًا، كل البصمات الموجودة طبيعية يعني مثلاً موجود بصمات أستاذ أمير اللي كان نازل في الأوضة وده طبيعي تكون بصماته موجودة هناك وبصمات عاملات النضافة، بس أنا رفعت بصمة وراثية لرذاز فم عند جثة الراجل الخمسيني ممكن تغير مجرى القضية.. لما تطلع النتيجة هبلغك بيها.
-اول ما تطلع بلغني على طول يا عماد.
-متقلقش هبلغك على طول.
-تمام.
قفلت مع عماد وانا بحاول أربط الخيوط ببعضها، بس الموضوع معقد بجد، دخلت على أمير، واللي كان باين عليه الضيق بشكل كبير وعشان كده على طول سألته وقولت….
-في نزلاء في الفندق اشتكوا من روايح غريبة بتطلع من اوضتك.. ايه سبب الروايح دي؟؟
-ده بخور افريقي، ومش معنى أن حد ماعجبتوش ريحته يبقى وحش، عايز اقولك ان في ناس تانية كتير بتحب ريحته، لولا اختلاف الاذواق لبارت السلع يا حضرة الظابط.
-الناس دول زينا كده ولا حاجة تانية؟؟
بصلي بنظرة جامدة وقالي …
-ايوة ..ناس زينا.
قفلت معه التحقيق على كده لحد ما يظهر أي جديد، وبعدها دخلت الويتر.. كان شاب في العشرينات، باين من هيئته إنه متعلم تعليم عالي يعني ابن ناس، وكان باين اوي على ملامحه التوتر…
-اتفضل اقعد يا كريم، مش اسمك كريم برضه.
-ايوة.. ايوة يا فندم اسمي كريم.
-طيب وانت متوتر كده ليه؟؟.. انا لسه ماقولتش حاجة، أهدى كده وجاوبني على اسئلتي واوعدك إنك هتروح على طول.
-تمام.
-انت كنت شغال في فندق على طريق مصر اسكندرية الصحراوي من حوالي شهر تقريبًا، واترفدت منه بسبب مشكلة حصلت مع نزيلة هناك اسمها الدكتور إيمان، مظبوط كده؟.
-مظبوط، وكل ده بسبب الكلب الملعون بتاعها، شايف يا حضرة الظابط.. بص، بص كده.. ده عضني في رجلي، كان المفروض يعني اتعض وانا حاطط جزمة في بوقي، من غير حتى ما أدي أي ردة فعل، لا وكمان عايزة تشتمني وماردلهاش الشتيمة.. لان الناس مقامات، وطبعاً انا مقامي مش عالي زي الدكتورة.
-اممم.. تمام يا كريم، بس بعد الواقعة دي بكام يوم، رجعت للفندق وقعدت تزعق وتتهم الدكتورة إيمان إنها السبب في
مـ وت امك ووعدتها انك هتنتقم منها.
-حصل وانا مش هنكر لان بسبب نفوذها، أجبرت المدير إنه يرفدني وكمان ما خدتش جنيه من مرتبي بعد شقى شهر كامل.. واللي حصل ده خلاني ماعرفتش أجيب الدوا لأمي.. والأودية بقت غالية.
قولت بصوت واطي …
(اه والله يابني، ده دوا الضغط تمنه بس يجيب الضغط)
-كمل يا كريم
-انا بقى كنت اعمل ايه؟؟ بعد ما أمي راحت مني.. رجعت هددتها وانا عارف اني مش هقدر اعملها حاجة. بس كان جوايا نار ماكونتش عارف اطفيها.
-عمومًا هي دلوقت عند العدل ، اللي مش هيفرق معاه نفوذ ولا فلوس
-ايه ده ؟؟ هي مـ ـاتت !!
- اتقـ.تلت وانت الصادق هي والكلب بتاعها. انت مكانتش تعرف ولا ايه !؟
-لا يا فندم ماكنتش اعرف .. وده أسعد خبر سمعته من يوم وفاة أمي، يمهل ولا يهمل، دي عدالة ربنا.
-طيب يا كريم هنكتفى بأقوالك لحد هنا، ولو احتاجنالك هنستدعيك تاني.
-ماشي يا فندم.
كريم قام وقف وراح ناحية الباب بس انا لما بصيت على الترابيزة اللي كان قاعد قدامها.. لقيته عليها الموبايل بتاعه، مارضتش انادي عليه ، قومت من على كرسي المكتب بتاعي، مسكت الموبايل وناديت عليه…
-يا كريم ..انت نسيت تليفونك .
رجع كريم. مد ايد ناحيتي وخد الموبايل، لما ركزت مع ايده اللي خد بيها الموبايل، لقيتها ايده الشمال، كريم أشول !!
خرج كريم من هنا ودارت حرب جوة دماغي .. ايه ده !! كريم هو القاتل ولا ايه؟؟، ما أصل الدكتور سليم أكدلي إن القاتل استخدم ايده الشمال في الدبـ ـح! وكمان مفتاح ( الماستر كي ) ضاع في اليوم اللي كريم ساب فيه الفندق..، بس ليه قتل الراجل اللي اسمه "فهمي" ؟ فين الدافع ؟؟، وايه علاقة الراجل ده بالدكتورة؟؟ في حلقة ناقصة انا لازم افهمها …ومن هنا بدأت اجمع معلومات عن "فهمي" ده وعرفت إنه شخص مقطوع من شجرة ومرتاح ماديًا وملوش عدوات مع حد.. وفي نفس الوقت ده كلمني عماد وبلغني بنتيجة البصمة الوراثية وبعد ما عرفت النتيجة اتصدمت، بعدها اتحركت عشان أدور على شوية معلومات ولقيتها ولقيت كمان شوية حاجات تانية أثناء بحثي، وبعد اللي لاقيته ده كله بدأت كل حاجة توضح والخيوط كلها تتربط ببعضها وعرفت الجاني الحقيقي وحبيت ابلغ البشمهندس "حسام " باللي وصلت له فطلبته يجي على مكتبي ولما وصل قولتله.....
لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم
جميع الروايات كامله من هنا 👇 ❤️ 👇
❤️🌹💙🌺❤️🌹💙🌺❤️🌹💙🌺❤️🌹💙🌺❤️🌹💙🌺❤️🌹
تعليقات
إرسال تعليق