الغرفــ666ــة الفصل الثالث والاخير بقلم الكاتب سيد مصطفى حصريه وجديده على مدونة النجم المتوهج
الغرفــ666ــة الفصل الثالث والاخير بقلم الكاتب سيد مصطفى حصريه وجديده على مدونة النجم المتوهج
خرج كريم من هنا ودارت حرب جوة دماغي .. ايه ده !! كريم هو القاتل ولا ايه؟؟، ما أصل القاتل استخدم ايده الشمال في الدبـ ـح! ومفتاح ( الماستر كي ) ضاع في اليوم اللي كريم ساب فيه الفندق..، بس ليه قتل الراجل اللي اسمه "فهمي" ؟ فين الدافع ؟؟، وايه علاقة الراجل ده بالدكتورة؟؟ في حلقة ناقصة انا لازم افهمها …ومن هنا بدأت اجمع معلومات عن "فهمي" ده وعرفت إنه شخص مقطوع من شجرة ومرتاح ماديًا وملوش عدوات مع حد.. وفي نفس الوقت ده كلمني عماد وبلغني بنتيجة البصمة الوراثية وبعد ما عرفت النتيجة اتصدمت، وبعدها اتحركت عشان أدور على شوية معلومات ولقيتها ولقيت كمان شوية حاجات تانية أثناء بحثي، وبعد اللي لاقيته ده كله بدأت كل حاجة توضح والخيوط كلها تتربط ببعضها وعرفت الجاني الحقيقي وحبيت ابلغ البشمهندس "حسام " باللي وصلت له فطلبته يجي على مكتبي ولما وصل قولتله …
-قدرنا نوصل للقاتل يا بشمهندس، مش انا وعدتك قبل كده ان العدالة هتتحقق.
-برافو يا حضرة الظابط.
-ده انت هتقولي برافو كتير يا بشمهندس،اتقل بس، قولي بقى انت علاقتك بالمرحومة كانت عاملة ازاي؟؟
-مش فاهم !! علاقة راجل بمراته هتبقى عاملة ازاي يعني!.
-طيب تمام …بص كده .. ده عقب سيجارة محشية، ماتبصلوش باستغراب اوي كده، العقب ده كان لسيجارة محشية حشيش، اصل صاحب العقب ده كان راجل صاحب مزاج وبيحب يبسط نفسه..ما هو أصل أنا لما كنت في الفندق دورت في المخلفات اللي بتخرج من الغرف، والقدر لعب لعبته، العربية اللي بتاخد المخلفات إتاخرت وماخدتش الزبالة خلال الأسبوع ده ، فانا دورت لحد ما لقيت شوية حاجات واللي من ضمنها العقب ده وكمان لقيت الظرف ده.. ظرف عليه ختم شركة، الشركة دي تبقي شركتك ، وعايز اقولك حاجة تانية الدكتور سليم أكدلي إن الجريمة مستحيل تكون اتنفذت من شخص واحد، وإنها اتنفذت من شخصين على الأقل، وأكدلي كمان أن توقيت الجريمة كان وقت تعطيل الكاميرات والحاجة اللي ماكُنتش واخد بالي منها انك مهندس كمبيوتر، يعني الهاكر لعبتك، ههههه، صايع انت يا بشمهندس، قدرت تجند عامل البوفيه عن طريق مدير الفندق وتنفذوا الجريمـ ـة بمنتهى الاحترافية.
-جريمـ ـة ايه !! ومدير فندق ايه؟؟ وعامل بوفية مين!! انت بتقول ايه ؟!
-واحدة واحدة هفهمك كل حاجة، لما عملت تحريات عن كل المحيطين بالجريمة واللي انت واحد منهم يا بشمهندس، قدرت اعرف ان مدير الفندق كان صديق قديم ليك ولا زال، بس هو كان صديق ترابيزة .. ترابيزة القمار اللي بسببها قربت تشهر افلاسك اكيد انت عارفها… وفي الفترة اللي كانت فيها شركتك بتخسر وماكنتش لاقي فلوس.. بدأت ترمي بالاك على مراتك الدكتورة إيمان، فضلت تاخد منها فلوس وتلعب وتخسر.. تلعب وتخسر، بس هي بعد فترة رفضت تديك فلوس تاني لان فاض بيها الكيل وكانت وصلت معاك لطريق مسدود ويئست من انك تتعدل وتبطل قمار، وهنا هي قررت بينها وبين نفسها تعمل وصية بإن فلوسها كلها تروح لجمعية الرفق بالحيوان بدون علمك، لان حضرتك هضيعها كلها، وفي يوم وانت بتدور على فلوس كعادتك في البيت لقيت الوصية، الدم ضرب في نفوخك وقررت تقتلها قبل ما تودي الوصية للجمعية، وفعلا بدأت تنفذ خطتك.. اتفقت مع صديقك اللي هو مدير الفندق بعد ما وعدته بمبلغ كبير وحجزت في الفندق ده، ايوة اصل انت اللي حجزت في الفندق مش الدكتورة زي ما انت قولت قبل كده ، المهم.. المدير رشحلك عامل البوفيه لان سكته مفتوحة و هيوافق لو انت زغللت عينه بالفلوس .. وفعلا بعتله جواب فيه مبلغ محترم بعد ما اتفقت معاه.. بس انت ماخدتش بالك أن بصمة لسانك اللي مشيت على طرف الظرف عشان تقفله، دي بصمة وراثية يا بشمهندس..تتمسك عليك ….….آه هو المدير عملك كل التسيهلات اللي تخليك تعمل الجريمـ ـة بدون أي أخطاء بس حصلت حاجة أثناء التنفيذ ماكنتش متوقعة.. خليني اقولك ايه اللي حصل، في عز ما كل نزلاء الفندق مشغولين في الاحتفال برأس السنة وسايبن غرافهم فاضية ، انتوا استغليتوا الفرصة ونقلتوا جسم الدكتورة بعد ما انت خدرتها للغرفة 666، بس وانتوا بتدخلوا بيها الراجل اللي اسمه "فهمي" حس بيكم وخرج من اوضته وشافكم، هنا انتوا ارتبكتوا، ومكانش قدامكوا حل غير انكوا تخلصوا منه، عشان هو لو فضل عايش هيفضحكوا، اشتبكتوا معاه، وعامل البوفيه ضربه بحاجة حادة على راسه ففقد الوعي، وبعدها دبحـ ـتوه ورسمتوا الكلام الغريب على الحيطان وحطيتوا جنبه الكتاب وكررتوا نفس الموضوع مع الدكتورة عشان الجريمـ ـة تبان إن هدفها تقديم قرابين للشيطان والكلام ده. بس في حاجة لاإرادية حصلت منك وانتوا بتقتلوا الراجل.. البرد اللي كان مبهدلك اجبرك انك تعطس.. فـ الرذاذ اللي خرج منك اتبعتر في الاوضة ..اه انت مسحت الأرضية كويس، بس فضل شوية بقايا متشعبطين في هدوم الراجل، وده كان أول خيط .. والخيط ده خلانى أدور وراك وورا علاقتك بمراتك, وبعد بحث، اتأكدت من كل المقربين منكم ان العلاقة بينك وبين المدام مش كويسة بسبب إدمانك للقمار، وكمان كان في مفاجأة تانية وهي أن المحامي بتاع دكتورة إيمان جه وقدم نسخة تانية من الوصية وأكدلنا على نيتها في التبرع بكل فلوسها وانت مكانتش تعرف بوجود النسخة دي، شوفت الكلام خدنا ونسيت اقولك أن عقب السيجارة اللي قولتك عليه ده كان في باسكت الاوضة بتاعة عامل البوفيه وكان عليه بصماتك….. انا مش هنكر انك خططت كويس واستغلت كل الاحداث اللي حصلت حواليك لصالحك، أم البنت اللي ماتت ،بالاضافة للويتر والخناقة اللي حصلت بينه وبين مدام إيمان واللي كنت شاكك فيه في البداية بس طلع مظلوم ، وغرفة 666 والشخص الغامض اللي نازل فيها ورسمك للرسومات ووجود الكتاب مكان الجريمـ ـة، كل ده كان تخطيط هدفه تضللنا، بس هي غلطة واحدة.. غلطة واحدة مسكتنا خيط، مشينا وراه وجمعنا منه كل الخيوط اللي هتلف حوالين رقبتك….. ياريت بقى ماتحاولش تنكر لان عامل البوفيه اعترف بكل حاجة وهو اللي قالي كل التفاصيل اللي حكيتهالك دي ، ف الانكار مش هيفيدك.
" حسام " كان بيسمع كلامي ده وهو مصدوم ومبرق ..بس بعد ما انا خلصت كلامي بصلي بعصبية وقال…
-كان هيحصل ايه يعني لو كانت إدتني الفلوس اللي أنا عايزها، أكيد كان هيجي عليا وقت واكسب وأعوض كل خسارتي، إيمان هي السبب في اللي احنا وصلنا ليه ده !..دي اتجننت ودماغها راحت منها.. كانت عايز تتبرع بالفلوس كلها للكلاب والقطط وتسيبلي انا البلاط ألحسه، انت متخيل .. ده من كتر جنانها وهوسها خلت حياتنا كلها بدور حوالين الكلب الملعون اللي اسمه اوسكار.. طول ما هو كويس هي كويسة، الكلب يتعب حياتنا تتشقلب .. بقولك اتجننت ..مابقتش تهتم بحد غير بيه هو بس..انا بقى اتحرق …أكل ، ماكلش مش مهم. المهم اوسكار بيه يبقى مبسوط، لحد ما جنانها وصل بيها لحكاية الوصية دي ..وهنا أنا ما قدرت استحمل كان لازم اقتلها ..دي كانت هتضيع كل حاجة.
-هي اتجننت فعلًا..انت عندك حق، و باللي انت عملته ده حافظت على كل حاجة… اكتب يا بني وقد اعترف المدعو "حسام علوي " بأنه خطط ونفذ جريمتي القتل مع سبق الإصرار والترصد بمعاونة عامل البوفيه المدعو "جلال"ومع تسهيل التنفيذ من خلال مدير الفندق المدعو "أمجد "
واقفل يا بني التحقيق على كده.
*************
(((القهــوة)))
-كش ملك يا عمممدة… يا ضايع.
-انت ايه يا عم شيطان، ده تالت دور تكسبه ؟
-تلعب تاني ولا طيبة على كده.
-لا طيبة ايه ؟…هلعب تاني انا لازم عوض خسارتي .
-لازم تعوض خسارتك.. هاهاها، فكرتني بالباشمهندس حسام كان برضه عايز يعوض خسارته.. بس ماعرفش.
-انا بقى هعرف وهتشوف ..إلعب
-ألعب يا خويا، انا مابتهددش.
-ألا قولي صحيح يا حسين، هو انت ازاى عرفت تاخد اعتراف كامل من عامل البوفيه، ده انا حتى كنت معاك وانت بتحقق معاه ..والولد فضل يلف ويدور وانت ماعرفتش تاخد منه كلمة واحدة تدينه.
-ومين قالك انه اعترف، أنا قولت كده عشان اهز ثقة الباشمهندس في نفسه، هو كان محتاج زقه صغيرة ويقع وده اللي انا عملته ،معظم اللي حكيتهولو كان عبارة سيناريو من خيالي لأحداث الجريمة، شوية الدلايل والخيوط اللي قدرنا نوصلها رسمت في عقلي ترتيت الأحداث، واختصارًا للوقت والفرهدة.. حكيتهاله الحكاية بالترتيب المقنع لحدوثها وهو صدقها لأنها حصلت فعلاً.
-يا ابن الصايعة يا حسين.
-انا أمي صايعة .. طب وعهد الله لاحبسك يا عماد .
-يا عم ارحمني..هو أنا كل ما اقولك حاجة تقولي هحبسك.. هحبسك
-مستهتر بكلامي انت ...طيب انا هاوريك ….وعهد الله لأوريك.
-نفسي تنسى البدلة الميري شوية.. وتفتكر إننا ولاد خاله، أمك تبقى خالتي يا حسين.
-خالتي وخالتك على القهوة.. إنما هنا…
-إنما هنا ايه!….ما احنا على القهوة يا جدع، انت فيه ايه ؟؟
-لا برضه.
-رحمتك يا رب.
وبس كده …دي كانت حكاية من حكاياتي الرائد "حسين حكم" وفريق الأدلة الجنائية
تمت
لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم
جميع الروايات كامله من هنا 👇 ❤️ 👇
❤️🌹💙🌺❤️🌹💙🌺❤️🌹💙🌺❤️🌹💙🌺❤️🌹💙🌺❤️🌹
تعليقات
إرسال تعليق