رواية نقطه وثلاث فواصل الفصل السادس والأخير بقلم الكاتبه أمل أحمد سلوم حصريه وجديده على مدونة النجم المتوهج
رواية نقطه وثلاث فواصل الفصل السادس والأخير بقلم الكاتبه أمل أحمد سلوم حصريه وجديده على مدونة النجم المتوهج
كنت أحاول البقاء بجانبك بأي طريقه ، و لكنك لم تفهم ذلك بالشكل الصحيح ، كنت أقاتل من أجلك ، حتى وجدت أني من قتل 💔
رجعت عالبيت بس ما رجعت اجر خيبتي واحلامي وجروحي… كنت اقوى من عمتي جهينه ودفنتهم بعقر دار فهد وكملت طريقي وكأن شيئا لم يكن… .. كنت شايفه ابتسامه عالقه بثغر امي وماعرفت السبب… . يلي بعرفه اني بعشق ابتسامتها على وجهها الجليل
جواهر : شفتي خديجه ماكانت كتير حلوه
روان : عنجد ماتوقعت فهد يتزوج وحده هو احلا منها
جواهر : يمكن لانها غنيه وطمعان بفلوسها
روان : اللي بيسمعك بيحكي فهد بحاجه !! لك ابو فهد تركله ثروه كبيره غير البيوت والبساتين… . شكلك نسيتي انه العز اللي احنا فيه من ورثة حنان ؟؟
جواهر : لا مانسيت بس في ناس طماعه مابيشبعوا
روان : لا لا فهد مو من هالنوع… فهد متعلم ومتحضر… . ولا شو رأيك ياقوت
ياقوت : رأيي انكم تقوموا تغيرو تيابكم ودعوا الخلق للخالق
جواهر : اي شو حكينا اختي عم نتساير
ياقوت : تسايرو بشي تاني غير لحمة الناس
روان : معك حق اختي… انا رايحه شوف امي
نطت جواهر وقعدت قبالي عالتخت
جواهر : شو صار معك حكيتي مع ابي
ياقوت : اي وناطره منه رد
جواهر : المفروض انك تطلبي رأي حنان المال مالها
اطلعت بحنان يلي كانت قاعده عطرف تختها وعم تطلع فينا… . ياترى فاهمه شو عم نحكي… ياترى حالتها الها علاج ؟؟
ياقوت : حنان رح تكون معنا لاتنسي انها بتعرف تخيط وتشتغل عالماكينه و بالنسبه لابي متأكده رح يوافق
جواهر : الحمد لله اللي ردلك بصرك… . مو مصدقه انك شايفيتني وتحولتي من دميه كنا نحركها لشابه كلها طاقه وامل
هزيت راسي وحمدت الله ملئ الحمد وملئ الشكر وقمت من مكاني شلحت ثوبي الاصفر وعلقته مكانه ودخلت عالحمام ونزلت تحت المي البارده… ماكان ينقصني وقتها الا ايدين عمتي جهينه وتعذيبها بكل حمام
*╚══════ღღ══════╝
حبيبه : وبهيك دفنتي حب سنين !!
ياقوت : قلتلكم الحب مابيموت بس بوقتها كنت قدام تحدي مع ذاتي
حسام : فعلا قمة التحدي تحدي الذات … اكون او لا اكون
ياقوت : وهاد بالتحديد يلي كنت اسعى لاثبته لابي ولفهد ولكل العالم ومن قبلهم نفسي
امنيه : كان مشغل الخياطه كبير وكل خالاتي بيشتغلوا فيه
حبيبه : بس انتو يلي بالمشغل
ياقوت : بالبدايه كنت انا وخواتي مع امي والعمه جهينه وكان لاخواني محمد ومحمود دور كبير بتوصيل الطلبيات للمصانع اللي بالمدينة حتى ابي اشتغل معنا وكان المسؤول عن التعامل مع التجار رغم انه بيكره تجار الحرير
حبيبه : وبهيك صار عندكم دخل منيح
ياقوت : كله كان بفضل اللہ اولا وجهودنا الجماعية ثانيا واصراري اني كون شي مهم واثبت كياني واطلع من دائرة الظلام والتهميش…
امنيه : فعلا كنتي مثالي الاعلى
حبيبه : ومافكرتي بالزواج ؟؟؟؟؟؟
ياقوت : بعد عرس فهد اجاني خطاب وهاد كان سبب الابتسامه على وجه امي بس انا رفضت واللي تزوجت اختي جواهر وبعدها روان وفرطت مسبحة خواتي وكل وحده التهت ببيتها وزوجها وولادها
حسام : والمشغل ؟؟
ياقوت : كان المشغل بهالوقت بقمة انجازاته وبقيت معي امك وخالتك حنان وامي وعمه جهينه وبعد خمس سنوات من الشغل والثبات والانجازات… صار مشغلنا من اهم المشاغل واكبرها بالمنطقه… . وسرت شغل معي اكثر الخياطات كفائه
حبيبه : وبقيتو بالقريه ؟
ياقوت : لا انتقلنا للمدينه وهناك اسست مشغلي الخاص من حر مالي
حسام : والمشغل القديم
ياقوت : صار مستودع
حبيبه : وبهيك اثبتي نفسك
نزلت ياقوت راسها ونزلت منها دمعه : فعلا اثبت نفسي لكن بعد خمس سنوات تانيه من الشغل والكفاح حنت للقريه واصرت ترجع لبيتنا القديم وياريت ما رجعت 😔
حبيبه : ليش شو صار ؟؟؟
*╚══════ღღ══════╝
عـــــــوده للماضـــــــــي
وقتها كان عمري 30 سنه… كان غبار الزمن عم يتجمع على وجه امي وابي وحتى العمه جهينه ومرضت امي كتير ورقدت بالفراش حاولت معها اخدها عالمشفى للتعالج رفضت ماكان ع السانها الا كلمه وحده
سعاد : بدي اموت ببيتي القديم
ياقوت : بعيد الشر عنك امي رح تتعالجي وتخفي وترجعي متل الاول
سعاد : استوى العدس يا امي
ياقوت : اي عدس ؟؟؟
ماكنت فاهمه وقتها انها بتقصد انه عمرها خلص واجلها دنى وبقيت الح عليها تروح عالمشفى وهي ترفض وتطلب ترجع للبيت القديم… . يمكن لحتى تموت بالمكان اللي خلق فيه حبها لابي
وبعد صراع مضني مع المرض ماتت امي وحل السواد من جديد بحياتي كان اقسى شعور بحس فيه هو فقدانها واني مارح بوس ايدها كل صبح ولا شم ريحة الحنا بكفها… ..ماتت وكان امنيتها ترجع للبيت القديم ليحضن جسدها الهزيل…ماتت وهي خايفه عليي من بطش الزمن ولأن قطار الزواج فاتني وهي ماطمنت عليي اني ببيت زوجي متل ماعملت مع خواتي
وتاني يوم كان لازم نواري امي لمثواها الاخير لكن ابي حب يروح معها ولقيته ميت بفراشه… معقول لهدرجه كان يحبها معقول ماتحمل بعدها معقول اخسر امي وابي بين ليله وضحاها
استجمعت اللي باقيلي من قوه وبعد غسل ابي طلبت من اخواني يكون دفنهم بحوش بيتنا القديم البيت اللي جمعنا سوا سنين طويلة
ورجعت عالقريه حامله خيبه وكسره وحسره وقدامي جثمان امي وابي ومابقيلي شي من ذكراهم الا حنان وامنيه والعمه جهينه
محمد : قومي يا اختي صرلك شهر على هالحال مابتطلعي ومابتشوفي حدا
ياقوت : حاسه ضهري انكسر ياخيي
محمد : سلامة ضهرك خيتي ادعيلهم بالرحمه
غمضت عيوني ونزلت مني دمعة حاره يمكن حرقت خدي من حرارتها ودعيت لامي وابي بالرحمه
محمد : خليني ارجعك عالمدينه
ياقوت : رح ابقى هون
محمد : والمشغل اللي تعبتي عليه طول هالسنين… بتفكري ابي وخاله سعاد رح يرضيهم هالحال
ياقوت : 😔
محمد : ازا مو كرمالك كرمال امنيه وحنان وعمه جهينه… لاتنسي انتي عصاهم وعكازهم
انا عصاهم ؟؟ انا كنت اتوكئ على عصاي لاستدل طريقي كيف سرت انا العصا ؟؟
شعور غريب حسيته… كيف اكون مسؤوله عن اشخاص كانو بيوم هنه العون الي وهنه يدلوني على عتبات البيت
قررت ارجع عالمدينه واكمل علاج حنان قررت كون الايد اللي بتنمد لكل محتاج وكل صاحب اعاقه… .
لملمت نفسي من جديد وودعت امي وابي ومقبرة احلامي ورجعت عالمدينه حامله جواتي اصرار جديد وقوه كبيره واسست اول جمعيه لرعاية المكفوفين واصحاب الحالات الخاصه متل حالة اختي حنان
وشوي شوي هالجمعيه الصغيره صارت مؤسسه وبعد سنوات كفاح وشغل تحولت لاكبر دار للمكفوفين والحالات الخاصه بالبلد
ماكنت انتظر اي مردود مادي… كانت هالدار هبه لوجه اللہ وصدقه جاريه لروح امي وابي
كنت شوف حنان عم تتحسن قدام عيوني وهالشي كان يحفزني لاستمر واثابر اكتر كنت شوف طريقي من خلال ابتسامتها العفويه وسكوتها المستمر....
ماعادت حنان هديك البنت المنطويه على نفسها صارت تقدر تعتني بنفسها وتساعد غيرها… اخيرا ضويت الشمعه المطفيه جواتها اخيرا انولدت حنان
كنت بتابع كل الحالات بنفسي ووليت مهمة المشغل لامنيه لانها كانت ايدي اليمين وعيني اللي يشوف فيها
وبيوم كنت قاعده ورا مكتبي قدامي فنجان قهوه وبعض الاوراق عم راجعها وابتسم وانا شايفه تحسن بحالات المرضى ماقطع شرودي الا صوت الموظف
ـــ ياقوت خانوم وصلت لعنا حاله لشخص انبترت اجريه بحادث
ياقوت : لا حول ولا قوة إلا بالله… . وعملتو اللازم اله
الموظف : للاسف رفض اي مساعده ياخانوم وطالب يشوفك شخصيا
ياقوت : يشوفني انا ؟؟؟ مين هالشخص ؟؟؟
قمت من ورى مكتبي وتوجهت لقسم الاستقبال كنت حاسه برعشه بقلبي وانفاسي عم تطبق عليي .. وحتى خطواتي كانت ثقيله متل كأني مربوطه بسلاسل وعم جر حالي جر
واخيرا وصلت ليوقع نظري على رجال بعمر 45 سنه قاعد على كرسي متحرك ومنزل عيونه بالارض شعرو الاسود الكثيف الممزوج باللون الابيض كان مغطي وجهه… . حسيت بنار عم تلفحني وقت شفت منظرو وتزكرت المأسآه يلي عشتها بسبب حادث مشابه
ياقوت : حكولي انك طالب تشوفي
الشخص : 😔
ياقوت : طيب ليش رافض انهم يقدمولك المساعده
الشخص : 😔
قربت منه بعد ماحسيت انه رافض يحكي وقعدت عالكرسي اللي قباله لاحكي معه بهدوء وازرع الامل بداخله
ياقوت : ليش حزين ومكتأب… اطلع حواليك شوف كم كفيف وكفيفه فقدو نعمة البصر ورغم هيك ما استسلموا
الشخص : 😔
ياقوت : حالتك الها علاج ممكن تركب ارجل صناعيه وتواصل حياتك… في غيرك بيتمنى ربع حظك ليستمر بالحياه
الشخص : 😔
حسيت برفضه التام للكلام او التجاوب قمت من مكاني لارجع ع مكتبي بعد ماوصي الموظفين يعتنوا فيه… . لكن قبل ما افتح تمي وصل لمسامعي اكتر صوت محفور بقلبي
الشخص : ليش ماقبلتي تحكيلي انك فتحتي
حسيت ب اطرافي تجمدت وتيار كهربا مشا بكل جسمي التفتت عليه ونطقت من بين شفايف مرتجفه : فففهد ؟؟؟؟؟
فهد : اي فهد… شفتي كيف الزمن دوار
ياقوت : شو صار ؟ ليش ؟ كيف ؟
فهد : يمكن هي عدالة السماء لاني بيوم نعتك بالعميا
ياقوت : بس انا بعمري ماحقدت عليك ولادعيت
فهد : بعرف هالشي… . لكن ربك يمهل ولا يهمل
ياقوت : شو يلي صار معك كيف وصلت لهون ؟؟
فهد : بعد زواجي من خديجة اللہ سبحانه وتعالى ماكرمنا بالخلفه… وبقيت اروح فيها من دكتور لدكتور ومن مشفى لمشفى… . وقبل سنه كنا راجعين من المدينه وصار معنا حادث… ماتت خديجه بمكانها وانا خسرت جزء مني 😔 حكولي الناس انه في دار بيعالج الحالات الخاصه اللي متل حالتي ووقت وصلت لهون وشفت اسم الدار (دار عفيفه للمكفوفين ) عرفت انك صاحبة الدار واصريت اشوفك
كنت واقفه عم اتأمله… معقول هاد نفس الصبي اللي بيوم بنالي قصر من الطين معقول ماعاد يقدر يركض ويمشي معقول كان حظي احسن من حظه… احتفظت بغصتي داخلي ولفيت ورى الكرسي بكل هدوء ودفعته لجوا
فهد : ياقوت وقفي انا مو جاي اتعالج
ياقوت : لكن ليش جاي
فهد : اخر مره شفتك فيها ببيتكم حكيتلك ياريت ماكنتي، عميا وانتي كنتي وقتها مفتحه وجاوبتي انك عميا البصر وانا اعمى البصيره… .. مافهمت بوقتها كلامك ياقوت ولاحسيت بحبك الصادق الا يوم عرسي… لما شفت دمعتك الح اره على خدك بعرف كلامي ما منه فايده وانا ماجيت لتعطفي عليي وافتح صفحه يمكن انتي شقيتيها وقت خذلتك
ياقوت :……… ..
فهد : انا جيت لتشمي فيي لحتى تشوفي بعيونك انه الله اخذلك بحقك مني 😔
ياقوت : متصور اني ممكن اشمت فيك ؟؟
نزلت من عينه دمعه بللت لحيته المهذبه : سامحيني ياقوت 😔
ياقوت : 💔😔
فهد : انا كنت اناني وظلمتك… وانتي كنتي احسن مني بطيبتك وحنية قلبك… صدقيني مايستاهل حبك
ياقوت : انا دفنت الماضي من سنين يافهد
فهد : لو دفنتيه من سنين كنتي تزوجتي… انتي كنتي اجمل بنت بالحي ورغم هيك ماقبلتي تتزوجي
ياقوت بقلب مرتجف : قلتلك دفتنت الماضي،
فهد : صح دفنتي الماضي ودفنتي معه ياقوت
تركته ورحت اركض لمكتبي…… كنت حاسه ب انهيار رغم انها فرصتي لانتقم منه لنفسي وقلبي وشبابي يلي ضاع
ادركت وقتها اني كنت اكبر كزابه وقت اقنعت نفسي اني نسيته ودفنت حبه…… انا بعدني بحبه بعدو شاخص بقلبي متل ماكنا صغار بعدها ايديه السمره عم تبني معي كل حجر بنيته بعدو شعرو الاسود الناعم عم يخطف حالي مني بعدهم عيونو الشهل عم يسرقوا قلبي ويستوطنوا داخلي… .. اي انا كزابه انا بحجم كل الحب وكل الابجديات وكل قصص العشاق بحبه 💔
سأراك 💔
سأراك في وهمي حبيبا فرقتنا الأمنياات 💔
*╚══════ღღ══════╝
🍃 ماذا لو كان ب استطاعتنا ان نسأل الطريق عن نهايته عن عمر مسيرته عن الاوجاع التي تكومت على ارصفته عن الاحلام التي شهقت عند آخر منعطف منه
عن الوجوه التي تخافه والقلوب التي تؤمن به 🍃
حسام : وراح فهد ؟
ياقوت : اي راح ورفض يعمل العمليه وكأنه عم يعاقب نفسه
حبيبه : شو بشع هالشعور
ياقوت : احساسه بالذنب خلاني اتوه عن البوصله اللي رسمتها لحياتي وماصحاني منها الا وجود عريس طالب مني ايد امنيه
حسام : قصدك ابي
ياقوت : اي ابوك خالد يوسف المحمد…
امنيه : لليوم بتزكر وجه العمه جهينه الله يرحمها وقت شافت خالد
ياقوت : احيانا الملامح بيتوارثوها الابناء وخالد كان بيحمل نفس تقاسيم وجه ابوه لكن ببشره فاتحه
حسام : ليش شو علاقة ملامح ابي ب تيته جهينه
ياقوت : ابوك بيكون ابن يوسف
حسام وحبيبه بصدمه : معقوووول 😲
ياقوت : شايفين هالدنيا شو صغيره
حبيبه : طيب وقت راح فهد شو عملتي ياتيته
ياقوت : كان نفسي اعمل شي وما قدرت… . لكن الضاهر رح اعمله هلأ
امنيه : شو هالشي امي
ياقوت : ناوليني هالمسجله
حسام : اكيد خربانه ياتيته شو بدك تعملي فيها
ياقوت : رح اسجل رساله لفهد… لتكون اخر رساله بسجلها وبهديها لنفسي وحتى لو المسجله خربانه زاكرتي رح تحتفظ بهالرساله لحتى موت
#الـــــى #فـــــــــهد
🌿 على سطر فارغ اكتب اسمك دون مقدمه واختمه بنقطه .
النقطة التي تدل على النهايه
لا افكر ابدا بسطر جديد فلقد كتبتك تسع سنوات دون نقطه تفصلني عنك ليأتي القدر ويفصلني عنك ويضعها شهقة ودمعا وحكاية لاتحتمل جزءٱ آخر… .
اتمنى ان تكون بخير بعد ان غزا الشيب شعرك الاسود
شكرا لانك علمتني ان الاحلام تبقى اجمل لو بقيت كما هي احلاما
شكرا ل اللحظه التي جعلتني الوذ فيها بحزني وخيبتي الى الله والهمتني بدعاءا اردده بكل سجود
( اللهم لا تعلق قلبي بما ليس لي واجعل لي فيما احب نصيب )
انا هي تلك الانثى التي كانت تقف امامك مباشرة بعين مبصره
انا التي رأيتك بقلبي لا بعيني
انا التي هربت منك اليك ووقفت حائره بين كفيك
انا التي دفنت ماضيك وقصرك بالرمال
انا التي لاتزال بقلب طفلة تحبكــــــ♡
لن اختم حكياتي بنقطه . لا اريد لها ان تموت او تشيخ… ربما فرقتنا الاقدار ربما خانتنا الايام لكنك كنت وستبقى اميري الاسمر الذي بنى لي اول قصرا بالرمال
اعترف الان اني كنت مثل عمتي جهينه الا ان الفرق بيننا انها دفنت خيبتها بقطفة ريحان وانا جعلت من خيبتي تحديا لاثبت اني امتلك كيانا لايحتمل التهميش ولا القسمه على اثنان
احببتك بقلب طفله والاطفال لايكذبون لذلك لن اضع لحكايتي نقطة النهايه س استبدلها بثلاث فواصل ليبقى الامل حاضرا لكتابة سطرا جديد يوما ما .،،،
هذه حكايتي وهذه قصتي مع الايام والعما وفهد وكثيرا من الامور التي لا استطيع شرحها بالكلام
ياقـــــــوت .،،،
*╚══════ღღ══════╝
النـــــــــهايــــــه
هي القصه اقتباس من رواية انا قبل كل شيئ لكن طبعا ب احداث ونهايه معاكسه تماما
انا استوحيت الفكره لاكتب قصه محايده تماما
احترامي
لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم
جميع الروايات كامله من هنا 👇 ❤️ 👇
اعلموا متابعه لصفحتي عليها الروايات الجديده كامله بدون روابط ولينكات من هنا 👇 ❤️ 👇
❤️🌺💙🌹❤️🌺💙🌹❤️🌺💙🌹❤️🌺🌹❤️🌺🌹🌹❤️🌺💙
تعليقات
إرسال تعليق