رواية علي حافة الثأر الحلقة الرابعة بقلم الكاتبه زينب ماجد حصريه وجديده
فيان احس عليهم وهم، وهم ديسحبوني ويعدلوني ع الجرباية، جسمي كله مشلول واحس مالي طاقة افتح عيني ولا احجي معقود الساني وفد شعور كلش ثگيل
اسمع الحارس وهو يكولها لأم غيث : جا شلون راضية تضل ويا كتال اختها ؟
- لو راضية ما توكف عمرها كل هالسنين بس بعد الله يعلم بظروف الناس ، بس ساعدني نعدلها .
تقرب عليه وسحبني للمخدة ..
وطلعوا من عندي .. كمت اون اريد احجي ما دا اكدر .. مرت ساعة يمكن طب الحارس ووياه احد، ما اعرف اذا دكتور .. بس منطقه مو مال دكاترة ابداً
كاله : هي شبيها مخبلة ؟
- لا يمعود يا مخبلة .. مديرة دائرة تخبل الوادم وما تتخبل
- شصاير وياها ؟
- اتخربطت عادي ونقلوها مستشفى صحت وعلى اساس نطلع شو رجعت بالليل لكيتها لا تحجي ولا تسمع وهاي حالتها ما حاسة ع الدنيا .. الصدك خفت كاعد ينطوها شي واتطيح براسي .. ابوها حاطها بمسؤليتي ولاهي بمشاغله
- لا عباس ترا هاي الظاهر منطينها ادوية مال مجانين ومو اي مجانين مجانين من النوع الاول اللي ميتسيطر عليهم .. بحيث يموتها سريريا تبقى بس ع النفس
 |
- المستشفى يعني !
- انتم اخذتوها مصحة ؟
- لا مستشفى اهلي عادي
- لا مستحيل ماكو مستشفى ينطي هيج ادوية .
- هسه خوية كلي الحل شنو
- صارلها شكد على حالتها هاي
- من البارحة بالليل اني لكيتها هيج
- حاولوا تكعدونها وتخلونها تنتبه وتاخذ هاي الادوية تروح تجيبهن من الدكتور
- زين شلون نكعدها ؟
- بالمي صحيها غسللها وهاي ادوية تاخذهن هسه تصير توب
- اكلك حميد خوما يصير بيها شي واتصخم عليك العباس ؟
- شني السالفة خوية بس خل تصحى وتاكل وتشرب ذني حشاك تصير حصان ، ولو الغزال ما يصير حصان
- ها حميد ، عينك عنها لا افگسها
- ابن السطل هسه هي اختك بت عمك
- غير البت اني مسؤل عليها تحط عينك النكسة ، دولي
- لا بروح اهلك شكاعد تشتغل هنا ذولة شكلهم توب شنو شغلك
- اختصاص اكل نعل حشاك ، دكوم يا خوية كوم ، هسه بس هاي اجيبها البالورقة ؟
- اي بس صحوها ، واذا انت تصحيها الأمور توب
-حميد شبيك هسه اذا طلعت تحس غير انفصل يا خوية دستر على اخيك .
- شتحس هاي مسطلة هسه لو تسوي البكلبك ما تدري شبيك .. هاك
لزم طرف ايدي وشالها .. وضل يعت بيها
كمت اااان واحاول امد جسمي واتحرك
كاله : دوخر ايدك شبيك متكلي هو اني هم صوجي جبتك عود صاحبي وتفتهم
- هسه دجيبلها العلاج لصاحبتك وفضنا نشوفها تنفكك
- مو صاحبتي بويه مرة كاعد اخرسها
- هاي تاليتك يعبيس حارس تشتغل عد مرة
- طالع على باب الله شغلي .. ما مجدي ولا مسوي شي عيب امشي امشي .. خل اجيب العلاج
- كبل لا تجيب العلاج لازم تكعدونها اذا تضل هيج ترا يأثر عليها .. حطوها جوا الدوش
هو يحجي وضربني ابرة بأيدي وعباس يكوله: زين ، يلا خل اوصلك .
طلعوا كمت احاول افتح عيوني
جسمي كلش ديأذيني .. عقلي مشوش مدا اكدر الزم فكرة براسي .. مثل الدوامة داخل عقلي ..
شوية ورجع الحارس ، كام يصيح : ام غيث ، وينج
فتح الباب وبقى واكف برا .. ما دخل
لحد ما سمع ام غيث صعدتله واجته وهي تكوله : رحت دا اجيب حاجة بسرعة
- اي جان كلتيلي
- انت غير جنت ويا الدكتور
- دصحيها فدوة اروحلج اني خابرت ابوها يدزلي رسالة بالفصحى ( انا في اجتماع الأن ، سنتواصل لاحقاً )
- معناها ما موجود
دخلت ام غيث وهي تفتح الغطا مني شافت عيوني مفتحة .. كامت تحجي وياي : كاعدة ، تكدرين تكومين
كمت ااان .. ساعدتني حتى اكوم ، اجا هو دنك ورفعني على جتفه وحجه : فتحي باب الحمام
دخلني وكعدني على قاعدة التواليت الغربية وتجاني ، انفتحت الباب فاتت امي وهي تكول : هاي شنو شصاير وياها
كام هو يحاجيها وام غيث تغسل اديه ورجليه وتفرج بأدية ، تقربتلي ماما كالتلي : فيان ماما ، كومي روحي ويايا لبيتي اذا بقيتي هنا محيخلوج ابوج وخطيبج اكبر جبناء وانذال امشي ويايا ماما
عباس : يكون افضل من هنا اذا تروح .
ام غيث : روحي خالة اقلها هناك امج تداريج واذ اتبقين ما عندي مانع ابقى يمج اشيلج بعيوني .
عباس طلع وامي تجاوبها : لا عيني .. اخذها ويايا .. ما ابقيها اداريها عندي .. متبقى عد دلشاد وعصابته الله يلعنه هو وشاكلته هي صوجها كله صوجها شكد كلتلها لج ماما عوفي لابوج عوفي هالبشر مينعاش وياه ..
تحجي امي وام غيث تفرك بأديه ورجليه
اجا صوت شوان وهو يكول : وينها فيان
عرضتله امي : شتريد منها بعد وتعوفها بحالها مدا تشوف شديصير بيها
- بلا زحمة مالي حجي وياج انت امرأة غريبة منو هذا الدكتور اللي جان هنا ام غيث ؟
- جابه عباس الله ينطي على عينه فتحت شوية
- هاي فتحت البنية مثل الميت تكوليلي فتحت شلون يجيب احد بكيفه ؟ سهلة .
عافنا وطلع ..
بقيت بالغرفة ماما وام غيث ساعدوني .. ابدل
شوية وصارت هوسة جوا .. نزلت ماما كامت تتصايح ويا شوان ..
صعدتلي باوعتلها وهي تكولي : لحظة متبقين هنا، افتهمتي .. كومي يلا .. اخذج عندي ويحلمون يشوفون طرف من ظلج .
كمت اصيح : ااااخ راسي ديذبحني
اخذتني هي وام غيث وصعدتني ماما بسيارته واخذتلي جنطة .. عباس ماكو .. مدا افتهم شديصير حواليا ..
غفيت بالسيارة
ماما اخذتني لعيادة دكتورة صديقتها
دخلتني فحص .. نصحت امي تعرضني على دكتور نفسي دا تكولها : بنتج عندها مرض نفسي .. اذا تفاقم هالشي ممكن يأذيها ويأذي الحواليها .
انطتها اسم دكتور نفسي وكتبتلي لستة علاج
طول الطريق نمت ما كعدت غير وهم دينزلوني لبيت ماما .. نوموني بغرفة ..
ما اعرف شكد بقيت نايمة ساعات ولا ايام ..
بس اللي حسيت عليه كعدت الفجر .. حلكي ناشف اريد مي .. كوة احرك بجسمي احسه متكسر ومشلول .. كمت احرك برجلية وشلت ظهري.. كوة ساعدت نفسي وكمل لحيلي وتجيت ع الحايط .
مشيت من الغرفة طلعت شربت مي ..
كانولا بايدي .. كمت اسوي حركات بأيدي وبرجلي امط بيهم بس اريد استرجع حيلي واخلص من شعور الشلل والتنميل ..
تجيت ومشيت للصالة ..
كعدت ع التخم رجعت راسي كمت اباوع بالسكف .. احس الكاع والداير مدايري كله يدور حواليا ..
غمضت واني احاول ارتب افكاري ..
عقلي مشوش .. احس فكرة اعيش اكثر راح تأذيني
ماكو فايدة من حياتي .. يوم يشبه يوم وحياتي متوقفة من يوم مماتت
مكدرت اتأقلم ولا انسى ولا أسامح
الحقد مثل الحمر ديسعر ويوم يوم يحرك كل حلو بداخلي ويحولني من انسان قلبه ابيض الى بشر سوداوي افكاره اجرامية ..
جنت جوعانة حيل ..
بس ما اعرف ليش دا استمع واني اعذب نفسي وما انطيها اللي تريده .. اتمنى اموت بأي طريقة وانتقل من هالعالم .
رحت لسريري اصارع الجوع واني صافنة ..
كعدت الصبح امي ، نزلت مبدلة .. واجتي للغرفة دا تطمئن عليه : واخيرا كعدتي ماماتي
دا تحسين شي مأذيج ؟
-صص
- يعني شلونج اليوم ان شاءالله احسن ؟
هزيت راسي بدون جواب
- راح اسويلج ريوكج واروح .. شتحبين البيض بيش اسوي ؟
-ممشتهية
-مماكلة يا امي بس ع المغذيات اكليلج شي يلزم گلبج
مجاوبتها ، مشت ايدها على راسي وهي تكولي: اوكي مامي .. لما تصيرين زينة افتحي الثلاجة وسوي اللي يعجبج اني لازم اروح للدوام .. ما اطول كم ساعة وارجعلج بس اوقع كم شغلة مهمة
هزيت راسي واني ابعده منه ..
مشت من عندي .. ضليت اباوع وراها ..
كمت من مكاني ..
اخذت تليفوني من الجنطة مبي شحن ..
فتحت الشحن ..
وصلتني كومة مسجات .. واتصالات
بابا شوان عباس هوشيار ..
اتصلت ببابا ..
رد : اهلا بهالصباح اللي يبلش بيج باباتي شلونج
- زينة
- كالوا البارحة بايتة يم امج
- الرجال مات لو بعده ؟
حجه ويا زوجته ؛ لا لا كافي شكراً حبيبتي ، اي شلونج ؟
اخذت نفس : اكرر ، زينة
- الظاهر بعدج تعبانة ..
حجه ويا زوجته : اي اي هسه نطلع
بابا اذا تحبين اخذي راحتج هالفترة واتركي الشغل واني رجعت عينتلج حارس اخو ريبر اي شي تحتاجي كوليله
- ليش واللي اسمه عباس
- انهينا جهوده، وصرفناه لعدم التزامه بتعاليم العمل
بعدني اريد احجي حجه ويا زوجته: تمام حبيبتي جاي .. يلا بابا ديري بالج على نفسج وهوشيار راح بدزلج رقم الحارس اي شي تحتاجي .. اتصلي بيه وراح يحضر عندج وحاولي لتطلعين هالفترة تعرفين الوضع حرج ، باي
التزمت السكوت مجاوبت لحد ما نهى اتصاله ..
اخذت نفس .. اتصلت بهوشيار .. رد
كتله : شنو الوضع ؟
- اهلا ست الحمدلله على سلامتج
كلشي بخير مادامج انت بخير وصحة
-ليش طردوا الحارس
-عباس قصدج
ست هذا الانسان لعرب وصاحب مشاكل وما يلتزم بالتعليمات وغير مهذب عليه .. عقوبة ووفصل انهاء خدمة
- شسوا
- ست اتسبب بحالتج اللي انت بيها
بعد التحاليل اتبين انت تتعاطين مخدرات وهالشي مو صحيح واكيد هذا مدفوع ع السيد الوالد وديورطج بهالملف .
-قصدك اني اتعاطى مخدرات !
-حشى ست بس هذا اللي طلع بالتحليل وبعد البحث اتبين هو جايب واحد يعرفه ومنطيج ابر وادوية ممنوعة .
عقدت حاجبي ..
مثل الحلم مر عليه واني اتذكر عباس وصاحبة .. صح اجوي وانطوني ابرة .. ووصاه ينطيني علاج
- هسه هو وين ؟
- رفعوا بيه مجلس تحقيقي ست وهسه هو بالسجن .
- ها .. اوكي
- ست
- نعم
- زوجة السيد مدير العام البارحة جانت بغرفة الادارة الخاصة بيج
اخذت نفس ..
اني شكد غبت حتى صايرة كل هالاحداث وشصار ويايا .. مدا اكدر افسر شصاير
اني من البداية ما امنت لهذا العربي وطلع مثل متوقعت .. انسان مدفوع واستغلالي وكذاب .
بس احس اكو فجوة
اني مدا اعرف اربط وافسر اللي مريت بيه ..
امشي واكو ثقل بجسمي ..
ووضعي ما اعرف شلونه مدا اعرف شنو اريد وليش دا اعاند ويا نفسي واجوعها ..
شعور بداخلي يكولي انهي حياتي واموت
بس شعور ثاني يكول اموت اني واختي ويعيشون اللي كتلونا!
ما راح اكدر اموت قبل ما اشوفهم ميتين كلهم
دخلت الحمام بقيت بالحمام بالنص ساعة واني احاول اجمع افكاري .. طلعت بدلت من الجنطة وصعدت حاولت احط مكياج من ماما بس الفاونديشن اللي تستخدمه ميناسبني .. فاستخدمت الحمرة اللي بجنطتي وايلاينر .. واخذت تكسي وطلعت للدائرة
صف التكسي نزلت .. تلكاني الحارس من الباب : اهلا وسهلا ست الحمدلله ع السلامة
تعديته ومشيت ، وهو نادى بالجهاز وانطى خبر بجيتي .. طلعلي هوشيار وهو ينزل ع الدرج : ست جان ارتاحيتي ليش تعبتي نفسج وانت مريضة
اتعديته ودخلت لغرفة المكتب مالتي ..
لكيت بيداء زوجة ابويه كاعدة ع المكتب وشوان واكف يم الشباك ويسولف منطلق وياها .. بس شافوني قطعوا حديثهم وبقوا يباوعون بوجهي ..
كامتلي بيداء : حبيبتي الحمدلله ع السلامة
بوستني منا ومنا واني اباوع لشوان ..
تقرب مني : واخيرا حبيبتي الجميلة صارت بخير
يا عمري متعرفين شكد مشتاقلج
اجا فاتح اديه حتى يحضني ، انداريت وانطيته ظهري ، وباوعت لبيداء واكفة بطريق مكتبي .. بقت واكفة باوعت بوجهه : كالوا مريضة ليش دا اتعبين نفسج
فتت رغم هي واكفة طخيتها واتعديتها ، حجت : هاي شبيها صدك لو كالوا اتخبلت .. ترا دا نتحمدلج بالسلامة شبيج شايفة روحج فوك اللي سويتي هذا كله معاجبج شي .
شوان : بيداء بيداء ، فيان حاليا تعبانة وميصير نحجي وياها هشكل خليها تهدأ
سحبت التليفون الارضي ودست صفر : سليمان تعال عندي .
سديته ، واني اتحقق من الاوراق اللي كدامي من اول نظرة شفتهم مو الي ومو توقيعي مو.. اخذتهم
وشوان يكولي : شلون صرتي اليوم ان شاءالله احسن
وبيداء تمد ايدها وتكولي : انطينياهم
شكيتهم وسويتهم اربعة اجزاء وبالكعب مالتي دست على طرف الحاوية انفتحت شمرتهم ، حجت : هاي شبيج ترا ابوج اللي وكلني اسد مكانج وشوان ديساعدني وهاي اوراق مهمة
شوان : فيان هالتصرف مو صحيح
- العفو استاذ شوان تكدر تشوف شغلك
واشرتله بأتجاه الباب ..
اخذ نفس وباوع لهوشيار وبيداء وكاللهم : اتركونا وحدنا بيداء روحي لغرفة السيد المدير العام .
طلعوا .. وهو اتقربلي ويكلي : اسمعي اذا ما امشيج على الصراط المستقيم واخليج تبطلين اسلوبج السز هذا واكسره لخشمج اللي رافعته ما ارتاح .. عشر سنين اتحملتج ولعبت نفسي منج وراح تندمين
اندكت الباب وهو مدنك عليه ورافع ايده بوجهي ويهدد، صحت : ادخل
شال ظهره ووكف عدل .. فات سليمان وهو شايل بيده صينية الكهوة والمي .. حطها كبالي، اوميت براسي كـ تعبير للشكر .. طلع
اخذت الكهوة وكتله : صاروا ١١
عقد حاجبه : شنو ؟
دست على جهاز النداء .. دخل هوشيار كتله : جيبلي قائمة باعمال الاسبوع كله .. بشرح مفصل
شوان: هوشيار اترك الشغل هسه واقفل الباب وراك اذا تطلع بلا زحمة عندي كلام
هوشيار استجاب الاوامر شوان .. واتجاهل اوامري وطلع فوراً .. واني كاعدة على كرسي المكت لزم طرفه ودارني بأتجاهه : شنو قصدج بالأدعش ؟
-على تهديدك
-قصدج صارلي ١١ سنة اهدد وما منفذ
ضليت اباوع بعيونه ، ابتسم : غبية
عقدت حاجبي .. وكمل كلامه وهو مبتسم : بس راح اتركج بغبائج .
فكيت وعدلت وجهي واتظاهرت بعدم الملامح .. لحد ما طلع وانسد الباب .. اخذت نفس وشبكت ادية وانتجيت ع المكتب : شيقصد !
بقيت صافنة بافكاري احاول افسر كلامه .. مفتهمت .. دخل هوشيار راد يحجي تحركت من مكاني وكتله : اطلع برا لتشوفني خلقتك حاليا
حجيتها وكمت من مكاني .. مشيت بطريق غرفة المدير العام .. شفت سليمان راجع وهو شايل الصينية : المدير العام موجود
-لا ست بس الست بيداء والأستاذ شوان
-طيب
دخلت وهو كاعد على كرسي ابويه ..
وهي كاعدة ع القنفة الجانبية وديسولف وياها .. حجيت : العفو من حضراتكم اكدر اعرف بأمر من منو كاعدين بغرفة المدير العام !؟
بيداء : دلشاد سامحلي عادي
- بصفتي مديرة ادارة ممكن اطلع علك تاب عدم ممانعة
- فيان شبيج اني زوجته !
- الكتاب ست اذا مموجود اتركي العلاقات العائلية خارج الدائرة وهذا الكلام متوجهلك استاذ شوان
- اني معاون مدير عام ويح....
اتجاهلته واني اصيح : هووووووشيار مفاتيح غرفة المدر العام تتسلم خلال عشر دقايق .. نفذ
بيداء : هذه اتخبلت رسمي ، هسه اخابره لدلشاد واخليه يوكفها عند حدها
شوان : لتحاولين
مسمعت كلام واتصلت بدلشاد ، رد وهو مستعجل : نعم
- دلشاد اني ما اتحمل هذا الوضع ابد اذا متجي تحط حد لفيان مراح ابقى هنا دقيقة وحدة
- اني حاليا طالع بعمل مهم من ارجع نحجي
- دلشاد ما اتحمل دا اكولك اذا متحطلها حد و الله هسه اهج
- شنو صاير
- دا تطردني من غرفتك اني وشوان وتعاملنا كأنما موظفين مو حالنا حالها منك
- فيان بالدائرة
- وهذا كل اللي هامك اكولك دا تهيني وانت تكول داومت
- سايريها ونفذي اللي تريده فورا واني احجي وياها من ارجع .
- يعني تقبل تهيني
- بيداء مو وقت مشاكل اني برا حالياً .
سده بوجهه
شوان : اذا راح تبقين ورا راسج مراح تفلحين واللي سويتي غلط .. لتتوقعين بكم ساعة حلوة قضاها وياج يفضلج عليها .. فيان مو هشكل تنهيها ، بوقت الاني دا ارفعج واخليج بمكانها انت دا تخربين كلشي وتشتكين عليها وتقلبين الموضوع كله ضدج .
- مشفتها شلون دا تعاملني تكول عدوتها
- كلنا بنظر فيان اعداء .. هذه انسانة مريضة .
دخل سليمان ، فيان مدنكة وشعرها نازل كدامها وهي منتجية على اديها وراسها يأذيها : ست تريدين اجيبلج شي ؟
- لا ..
- بس اندهلي مخلد
- تأمرين
كمت افرك براسي .. دخل مخلد : نعم ست كالولي طالبتني
بقيت احجي وياه بخصوص قسم المتابعة والتدقيق .. ومشاكلهم .. بس راسي كلش اذاني .. كوة كملت الكلام .. واخذت اجراء بيهم .. وكتبت بيهم كتاب كتله : ارسله للطباعة وعرضه باللوحة .. وكولهم يحضرولي السيارة حتى اطلع
- تأمرين ست
اخذت كلاص المي شربت .. واني افرك براسي
الصبح جنت احسن مدري شصارلي ..
اخذت جنطتي وكمت من مكاني .. ومشيت عرض كدامي هوشيار كتله : ممنوع لاحد يدخل غرفة المدير العام وغرفة الادارة بدون علمي ولو تكرر راح اضطر اقدم كتاب فصلك .
حجيتها ومشيت كدامه وهو وسليمان وراي ومخلد يحجيلي وضع الاقسام ..
صفت السيارة واني البس النظارة الشمسية ، وهوشيار فتحلي الباب ويأشر لسردار .. صعدت بالسيارة وهو يكوله : مو كتلك ابعدها منا بعدها واكفة
- ما رضت صارلها ساعة تتوسل
الحارس راد يرفع جامات السيارة مظللة .. شفت مرة جبيرة لابسة عباية وكاعدة بباب الدائرة .. وهوشيار توجهلها ، حجيت للحارس : عندك ..
دست ونزلت الجام ونزعت النظارة .
وهي تكله : خايب يمه فدوة اغديلك بس احاجيها شويونه
- حجية كتلج وفهمتج الحجي صدكيني لو بيدي ما اقصر بس هذه الأجرائات شنسوي ابنج متورط
فتحت باب السيارة ونزلت .. اندارلي هوشيار واجاني بسرعة : نعم ست
- منو الحجية اللي كاعدة اباب الدائرة
- مجدية ست .. اشر لسردار
اتعديته ومشيتلها وكتلها : كولي حجية اذا محتاجة شي اساعدج
- يمه انا رايدة احجي ويا المديرة فدوة اغديلج لو تخليني احاجيها شوية لو هي مرة وتصبي لشعوري
باوعت لهوشيار ، وباوعتلها ..
وصلتي امري حجية
-انت المديرة ؟
-شنو محتاجة ؟
-يمه ابني اعبيس بري والعباس بري ابني ومربيته واعرفه عدل ونشمي ما يعمل الشينة
- ابنج شنو اسمه
- اعبيس اااااه عباس عباس والله ييمه بري وصالي يومين كلبي موجر يكولون مسجون وارد اعرف شنهي سالفته ما جاي اعرف شنهي تهمته.
حجه سردار : الحجية ام الحارس اللي اشتغل كم يوم ست .
- اليوم ابنج يرجع للبيت .. كُري عينج وبردي گلبج وابشري .
- يمممممه احبن ايدج .. اروحلج فدوة ابني وينه ..
دنكت تريد تبوس ايدي سحبت نفسي : العفو امي محشومة ، سردار اتكفل بتوصيل الحجية لبيتهم معززة مكرمة واني شخصيا راح اتكفل بموضوع طلعة ابنها .
- ءءءءء يمن كون ناخية هو العباس الطلبته منه اليوفقج ويفتح ابوابه بوجهج ويسترج ويحميج يبعد حيلي يا يمة يعني صدك ابني يرجعلي اليوووم والله ما اريدن الشغل يمه بس خل يردلي
- اليوم يرجع حجية.
حجيت وانداريت : وين عباس ؟
- ست مسجون بمركز ****
مشيت للسيارة وصعدت واتصلت ، والسيارة اتحركت .. اتصلت بمدير امن بوزارة الداخلية .. كال : اهلا منو
انطيت معرفي .. كال اهلا وسهلا بيج ست امريني
انطيت اسم عباس وكتله : حارس من ضمن حراسنا غلط ويانا وعفينا عنا وياريت تدلي بخروجه اليوم ..
: تأمريني امر لحضات اتصل واحل موضوعه وميصير خاطرج الا طيب وسلامي للوالد العزيز
- شكراً جزيلا لحضرتك .
شمرت التليفون من ايدي وحجيت ويا الحارس : صف عند اقرب مطعم
- تأمرين ست
وصلت المطعم ..
نزلت والحارس نزل وكعد بالطاولة الوراي .. طلبت اكل وعصير برتقال .. جابولي العصير واني لازمة تليفوني خابرت على ندى .. دك ردت
-الو
-الو هلو ندى
-هلا فيان
- شلونج
-يهمج شلون لوني ؟
- ما اعرف شتكولين
-لو يهمج فعلا جان خابرتي اطمنتي عليه صار مصار بيه كطعت روحي حتى اخابرج وتشهديلي مرديتي وما استبعد اذا مو انت الفاتنة علية
- مو بالاول تعرفين الصار
- شصار مثلا عفتيني بامس الحاجة شيفيد اعرف الباقي
- زوجج كالج منو اللي صوبه ؟
- شنو منو صوبه تعرض لحادث
- كالج تعرضت لحادث !
- هيج اهله كالوا
- هه طيب ..
- ليش شصار
- اني اللي صوبته مو حادث
- لا عليج النبي
دا تحجي دك تليفوني اتصال ثاني كتلها : اتصل بيج بعدين عندي اتصال مهم من رخصتج
نهيت الاتصال وجاوبت مدير الامن ، جاوبني : الوو
- اهلا أستاذ
- اهلا بيج اختي الأسم اللي كلتي عليه ما مسجون بالمركز الذكرتي خاف غلطانة لا كررت عليهم يعيدون التدقيق وماكو مموجود الأسم !
- متأكد ؟
- اكيد مموجود
- شكراً جزيلا لحضرتك ..
كمت من مكاني وكلت للحارس .. انطيني السويج : واخذ الاكل سفري للبيت بسرعة
- ست
- بلا كلام انطيني
قدملي السويج اخذته وطلعت واني اخذ العصير ..
شربت من عنده وتركته وسقت السيارة وخابرت على ابويه ، رد كتله : بابا ممكن تدزلي مكان المسجون بيه الحارس عباس
- غير بالمركز
- اتصلت بمدير الامن استاذ خالد واكدلي مموجود بالمركز والحارس ممسجون
- خاف غلطان
- واحتمال كبير احنا اللي غلطانين واستاذ شوان لاعبنا ، بابا اني وعدت امه اليوم يطلع فاريد الحارس من تحت سابع ارض يطلع .. واي عذر ممقبول واذا الحارس غلطان فبحقي واني اللي اريد احاسبه ممكن ؟
- هسه اشوفلج مكانه
قفله .. واني افتريت ورجعت للدائرة ، كبل لا اوصل اتصل بابا كالي : بلغتهم راح يطلعوه ويوصلوه لبيته ، بس ليش تاركه الحارس بالمطعم انت مريضة وللمرة الالف اكرر بابا احنا بوضع خطر لازم تاخذين حذرج .. وللاسف كلامي غير مسموع .
- تمام بابا راح ارجع للبيت .. بس اللي اطلبه منك بيداء متدخل الدائرة مرة لخ
- بابا بيداء موضوعها ميأثر عليج واني نبهت عليها متتقربلج ولا تتعارض وياج
- بابا اني كلت ما اريدها واذا هلكد مصر بيدا تبقى فاكدر اسلمها مسؤلية مديرة الادارة واطلع اذا هالشي يرضيك.
- تمام نحل هذا الموضوع .. ارجعي واخذي علاجج ولا اتعبين نفسج خلينا نخلص من المشاكل السابقة محتاجج الفترة الجاية بموضوع الأنتخابات .
.. افتريت ورجعت للبيت
محد موجود غير الحارس الشخصي
بس شافني كال : العفو ست وين اخلي الاكل
باوعت واشرتله على باب المطبخ واتعديته ودخلت .. صعدت بدلت ونزلت للمطبخ .. الاكل كله ع الطاولة .. فتحت الثلاجة وطلعت عصير وفتحت الاكل ... اخذت خاشوكتين ومشتهيت بعد .. لأن وحدي
اخذت كيكة وصبيت عصير ورحت للصالة فتحت اللاب وكعدت اكمل شغلي مال الدائرة ..
حسيت راسي مشوش ومدا اكدر اركض
رغم دا اضغط على نفسي واحاول اكوم ليوم بس احس طاقتني نافذة .. ومالي حيل لشي ابد.
ما اعرف شديصير ويايا هالفترة بس احس روحي مو ملكي عقلي ما واضح .. افكار تختلط وتمتزج وما اعرف بشنو اركز
طرى على بالي عباس ..
خابرت .. كالولي راح لاهله .. ووصل لأمه
كمت لحيلي .. صعدت لبست دريس بينصل وعليه جاكيت شتوي .. وبوت قصير ..
متمكيجت ولا عدل شعري بس رفعته بكتر
اخذت جنطتي وطلعت من البيت ، ركض الحارس كدامي، كتله : انطيني وابقى بالبيت لبين ما ارجع .
اخذت مفاتيح السيارة بدون ما اسمع اعتراضه
وصعدت.. حركت السيارة واتصلت .. واني اربط حزام الأمان .. رد سردار : اهلا ست
- سردار تعرف بيت عباس الحارس وين صاير
- اي ست اعرفه
- دزلي عنوانه وخلي الموضوع بيناتنا محد غيرك يعرف ولو طلع
- استغفر الله ست احسبي الموضوع منتهي
-تمام دزه
دزها برسالة باوعت واصفلي المنطقة ..
فتت بمنطقة الحرية .. شارع ضيك .. احتاريت شلون اكدر افوت .. صفيت السيارة على صفحة وشفت حجي كتله : العفو حجي وين اكدر الكى بيت عباس
- هلا بيج بوية، يا عباس
-ما اعرف بس اسمه الكامل
انطيته كال ها ابن بيت ابو محمد .. ذاك وينك
انت تكربيلهم ؟
-شكراً الك حجي .
ردت ارجع للسيارة ادخل بيها للفرع بس كلت اذا ادخل بالسيارة الفرع يقفل .. تركتها وانداريت حتى ادخل الفرع .. شباب براس الفرع ديباوعون ، منطقة شعبية ومزدحمة وكلهم عرب ، حسيت بشي من الخوف .
تعديت الفرع .. مرة دا تغسل ببابها لابسة حجاب .. رغم اخاف بس حسيت المنطقة بيها روح مو مثل مناطقنا لو يصير انفجار محد ميطلع من بيته ويسأل شكو ..
وصلت البيت .. ودكيت الباب
طلعتلي مرة يطلع عمرها بالـ ٣٠ بس متعوبة ومحجبة .. كلتلها : العفو هذا بيت عباس
- اي حبيبتي هذا بيت عباس منو انت ؟
- ولا احد، بس ردت اعرف اذا رجع او لا .
- رجع او لا.. انت تعرفي
- بلي اعرفه .. بس حبيت اسأل عنه .
- لحظة بس شوية واجيج
طبت وهي تصيح : يممممه يمممه
شوية وطلعت الحجية اللي شفتها الصبح ، كالت : يا خالة واكفة ع الباب صدك جذب فوتي فوتي هلا وكل الهلا
- اهلا بيج اشكرج بس حبيت اطمن اذا عباس رجع للبيت سالم .
- اي اي هذا اعبيس مشكورة يبعد عيني وكلبها .. من اروحلج فدوة لطولج .. طبي عليج الله
- لا شكراً اني بس حبيت اعرف انو قر عينج برجعة ابنج .. الله يحفظكم ممنونة
- حرام ما تمشين الا نضيفج ، يا خالة من الباب وترحين صدك جذب .
ابتسمت ما اعرف ليش شعور دفعني ادخل بيتهم عندي فضول ادخل ..
كالتلي :طبي للدوانية
عقدت حاجبي ومفهمت هي شدا تكول ..
الاعرف الديوانية محافظة عراقية ! بس فتت للمكان الاشتراي عليه والظاهر أستقبال .. مبيها تخم قنفات بس سجاد مفروش ومخدات ..
وعباس نايم بالاستقبال .. وصوبة نفطية حمرة متوسطة الإستقبال .. والحجية تصيح : يا ولج عليا ودي اعلى كيك
ابتسمت : ميحتاج خالة اني بس اجيت دا اطمن عليج لما شفت وضعج بالباب مقبلته ابد واحيت اطمن انو اللي ردتي نلتي
- يا يمن ناخية الحسين الشهيد يخالة اليسترج ويحميج ويحفظج ما قصريتي ريديتلي وليدي بسع بسع .. والله ييمه ما معلمتهم المايلة تربيتهم عدلة وخوش زلم عشاج بس تنخيهم بس الدنيا طاكتهم ..
اجتي البنية اللي كبل شوية طلعتلي وهي شايلة دولكة مي وكلاص كزاز .. صبتلي .. عباس رفع راسه ، اخذت رغم ما اشرب من دولكة ما استنظف بس اخذت من عدها وشربت شوية حتى ما اقلل منها وهي دا تضيفني .
باوعلي عباس مستغرب
وكعد : مكافي الاجاني من وراج لاحكتني بمصايبج ليجاي ؟
عقدت حاجبي : العفو ويايا ؟
فزت امه : يا فلك طرك ولك فوكاها .. هي الخلصتك من اديهم يمفلوك اسكت
- ارتاحيتي ؟ اتعايرتي على كيفج ؟
- هالكلام عيب واني مجاية عليك، جاية لخاطر والدتك
- انت تعرفين العيب ، التكتل زلمة وتخلي دمة بطوله وتكعد تتعاير تعرف العييييب ، ولج اني صارلي يومين ضكت المر من وراج تالتني اطلع اني المرضج لو عايفج بالمستشفى لشوان وجلابه ياكلوج وينهشون بلحمج وانت مثل الفطيسة متدرين شكو
كمت من مكان .. وكلت الها : اعتذر منج حجية اني اجيت دا اطمن عليه اترخص
كام وراي وهو يكلي : اتسجنيني وتلعبين بيه جولة وتسوين عليه فضل لان طلعتنيييييي اذا اكو احد متفضل فهو اني مو غيري لولاي .. جان هسه انت بعدج ميتة بالمستشفى ..
كايمة دا اريد اطلع وهو كام بحيله يصيح ويتقرب مني وامه اتجره ، حجيت : ارجوك للتهجم عليه بهشكل صوتك ديأذيني ..
- يا يمه ادخيلك ربي اعبيس يمه اتصيح على مرة
- صدووووك لا و ألله .. اتأذيتي من صوووووتي
انزويت ويا الحايط وهو يحجي، رجع يصيح :
لج اني شفت المووووووت من وراج ومن وراه خطيبج النكسسسسس وانت تكليلي صودتك ديأذينيييي .
- العفو ابتعد اذا ممكن
حجيتها ودمعت عيوني مجان لازم اجي لهنا
دفعته امه مني وهي تكله : كوم ابن الاوادم جا غير البت كاعدة ابيتنا اتصيح على المرة وهي خطارنا طايح الحظ
ابتعد وهو يفرك بوجهه ولابس بجامة وفانيلة .. ردت اطلع وامه كمشتني : اكعدي خالة عليج العباس
- لا لا لازم اروح ..
- لا وعلي ما اخليج تروحين لا ما تتعشين ويانا
- ما اكدر والله، اني مريضة ، وهو ديتهمني .. اني صارلي ايام ما ادري اليوم يلا وعيت ويا دوب دا اوكف على حيلي .. اني والله مريضة بس حبيت اطمن عليج لا اكثر
- عوينة ابو اعله خالة اطردنه والله فوتي ، امشي ولك اطلع برا .. كوم اعبيس امش
صدك كامت وطردته من البيت وهو ينفخ وطلع من البيت : اشكرج خالة بس والله لازم اروح .
- ما تروحين والله اليوم اذا اطيب خاطرج واردلج فضلج ما اتطلعين جا خطارنا وتطبين وكت عشا وتطلعين ما متعشية مو عيب مثل ابنيتي انت يمه ..
-
فوتي ترى وعلي طكطوكي كلشي ما يسوي كلبه خالي عمت عيني عليه اعذري بداعتي عليج ترا مأذينه بالسجن هالمنقهر منج .
رجعت كعدتني غصب واستحي اتجاهلها واطلع مرة جبيرة عيب اقلل احترامها وامشي بدون رضاها .
اجتي البنية هم تحجي ويايه بس اني خفت، اتمنيت لو يقبلون اطلع واستحي اضطريت اكعد ويجيبولي كيك وعصير واخته تكلي : سويتلج كباب عروك علي العباس تاكلين اصابيع وراهن لو كليتيهن
ما اعرف ابتسم اضوج اكوم ابقى ..
زين شكو دا يكعدوني ويعشوني لا اعرفهم ولا يعرفوني اني اجيت بس حتى اسأل معبالي هيج حيلزموني .
رجع دخل عباس ..
مباوعتله بس ماخذة حذرني بخوف مدايرتله
حجه : بس السيارة طابكتها غلط ..
- من رخصتج خالة اني اروح والله السيارة مبقيتها براس الشارع
- اي هو يطبكليجاه عدل عشاج اليوم يمنا .. والله حرام ما اخليج اتطلعين .
سحبت السويج من الجنطة وانطيته للحجية
دنك هو خذاه من ايدي .. رفعت راسي اباوعله اندار وهو عاقد حواجبه .. انتبهت اثر تعذيب على ايده .
سكتت ..
دا اخاف واتوتر اكثر .. ممتعودة على هيج جو ومستغربته جان لازم ما اطلع وحدي واخلي الحارس يوصلني حتى ما اتعرض لهيج موقف .
بقت امه تحجي ويايا دخت منهم حيل وراسي صار ديأذيني كلش .. طلعتلي كبسول من جيبها وتكولي تكولي : اخذيها هاي حباية وجع راس هذا تاخذينها تصرين حديد
وجان اتطلع الحباية بأيدها .. وتحطها بيدي
زين شلون اشربها .. جابلي الطفل كلاص مي شربتها من المستحى .
رجع عباس حط السويج على الميز مال التلفزيون
اباوع بيتهم .. اثاث الاستقبال عبارة عن ميز مال تلفزيون وعليه بلازمة حجم ٣٢ .. والميز ملون اسود وبنفسجي وابيض .. وصبغ الغرفة لون ذهبي .. بس قسم من الصبغ مكرفع .
الحجية مكابلة الصوبة واحفادها داير مدايرها .. اجتي .. اخته حطت صينية بيها كباب عروك وبتيتة اصابع وطاوة طماطة تكلاة وكلاصات جاي والقوري حطته ع الصوبة وجابة جدر حطته يمه الحجية وكامت تطلع من عنده خبز وتحط ع الصوبة .
لوهلة ارتاحيت بينهم جوهم دافي اكثر من بيتي رغم جبير كلش وبيه اجهزة تدفئة وملد خصوصي بالباب بس احس البيت بارد وبلا روح .
انطتني الحجية خبز .. ابتسمت الها هي تسولف هواية بس مو مل الكلام افهمه لو اركز بيه فاكول اي واني ممفتهمه شي .. لهجتها عربية بس غير العربي ياللي اعرفه .
بس مسألتني انت منين وعلى يا دين كعدت وسولفت وضيفتني ومسألتني اني شنو ومنو .. فحبيتهم حسيتهم ناس طيبين .. رغم فقراء بس روح الضيافة عدهم حلوة حسيتها شوية وتكتلتي لو مقابلة اتعشى وياهم.
صبت البنية جاي وحطته كدامي ابتسمت وكلتلها : شكراً
اني مو اجتماعية وما اعرف افتح مواضيع ..
ناجحة بس بادارة الاعمال والشغل .. اجتماعيا وعائليا وعاطفيا ... صفر .
رغم دا امد ايدي واحاول اكل
بس الحجية كصتلي نص كرصة حطتلي بيها كباب و بتيتة وغمستها وتكلي : اكلي عليج العباس شني خالة تستحين
-لا هههه
ابتسمت بحرج واكلت يمكن الذ وجبة ماكلتها بحياتي وانطتني وياها جاي صرت اكل على واهسهم وهي دا تسولفلي على ايام كبل لما حانت غيرة هم اصلهم من الكوت وانتقلوا لبغداد على مود شغل زوجها لان الفلاحة ساء وضعها وما عادت تسد حاجة اطفالها فانتقلوا لبغداد حتى يشتغلون ويعيشون .
وبقت تسولفلي اخذتني السوالف واني استمعلها ..لحد ما حسيت الوقت تأخر .. كمت من مكاني .. بسرعة
بس بمجرد ما كمت بسرعة كأنما الكاع افترت بيه ورجعت .. لزمت بالحايط دا الزم وكعت ومحسيت غير ع الحجية وهي تصحي بيه
وتصيح : ادخيلك ربي شفة البت غدة بيضة احضرها يعلي بس لا صار بيها شي ولج خالة .. احبيبة .
فتحت عيني وعباس فات صايحلة ابن اخته وهي تكله : ولك يمه الحكلي البت وكفت الحيلها ونعلها اتخ واطيح بنصنا .. امش يمه امش شوفلها مضمد
— بس صحيها يمه صحيها
تقرب وهو يضرب على خدي .. فتحت عيوني بس راسي ادور بيه الدنيا ..
وخرته : هي شني تمد ايدك ع البت شمالك يمه جا ما عرف اطكنها راشدي دميل ..
حجه : تكدرين تكومين ويايا للمضمد
- يا دشوف البخا يحاجيها انت ما تشوف وجهه غده كراط حجار دمشي جيبه يا يمه امشي
ركض شوية واجا جايب المضمد نفسه اللي جابة كبل مرة .. فحصني كاله : ضغطها زين بس احتمال عدها فقر دم .. بس البنية مو صاحية
عباس : شلون يعني
- عباس كتلك البنية هاي كاعد تتعاطى واذا تروح تحلل يطلع عدها مبين على وضعها لو تروح دكتور نفسي لو تدخل مصحة تتعالج .
- زين هسه شلون
- خليها ترتاح وراح اضربها ابرة وانطيها بس هذا الدوة ... كتبله
وهم ديحجون غوشت بينهم .. ورجعت ما بين الغافية والصاحية اسمع حجي بس ما استوعبه ..
حسيت على امه واخته ديساعدني ويشيلني بفراش
كمت اون واكلهم : لا لا ..
-يمه وتبات عدنا
-جا تروح بهالليل وهذا حالها شبيك يمه ، لحيلها ما كدرت تكف .. تسوق سيارة وتروح
-يمه ترا هالبنية بالوة وانت راح تجيبيلنا بلوة بالحسين
-دمشي امشي اجيبله بلوة لو ما هي جا هسه انت خايس بالحبوس
- واني شحبسني غيرها .
- بالمصايب البت هالفزعتلك واجتك ليجاي تطمن عليك وانت نافخ روحك عمت عينك على فكرك وشايف روحك هم زين الله ما حط بديك اطحين جا شسويت بينا
- يمه الحجي هاذ كله لان كتلج خل تروح
- خايب ليش تخليني اسبنك وابيك خوش ادمي تروح وين غير البت طايحة ؟
- هسه خوش خوش بقيها بس مالي غرض لو صارت مصيبة وعلي لا أكلهم امي الخطفتها
- دكلهم يلا
- هاهية
كوة حجيت : اني اريد اروح
-شوفي هاج وبعدين تصيح خطفوني ومخلوني اروح وناكل خ .. باثنين ادينا
-بعدة واكف ولك يمه بت حمرة خضرة امددة وانت واكف لا حيا ولا مستحى شمالك ييمه شو استخفيت
-انوووب
-امشي ولي امشي
ارتاحي بتي وكت ما تصيرين زينة وتكدرين توكفين على حيلج روحي ومودعة بالله .
غطتني وبقت تهود عليه كأنما طفل
عجيب امه بيها من الحنية شي جبير .. اتمنيت لو ماما هشكل تهودلي وتحتضني بلا ما تحاول تحرضني وتبعدني من ابوية
على كمية الحنية والدفو اللي لمسته بأرجاء هذا البيت التعبان والبسيط ما الكاها ولا بافضل بيوتنا واحدثها.
مفتحت عيني الا والغرفة ظلمة
شلت راسي ديأذيني ، باوعت بس الحجية نايمة ويايا بالاستقبال .. كمت لحيلي اريد حمام ..
ردت افوت للصالة .. بس شفت عباس واخته وجهالها سادين الطريق كله وهم مفرشين ونايمين بالصالة .. رغم الصالة غيرة كلش تتوسط بنص البيت .. على صفحة مطبخ ووراها حمام ، بس ما اكدر افوت
زين هم شلون كادرين يعيشون كلهم بهالمساحة !
البيت كله اعتقد تطلع مساحته بكد غرفتي .. بس ياريت لو غرفتي هيج دافية وحنينة مثل هالبيت شلون ملتفين واحد بصف اللاخ من البرد
بينما احنا فاخويا بايطاليا
وتبويه متزوج وكاعد ابيت
وماما متزوجة وكاعدة ببيت
واني عايشة ابيت وتجي باجي مرات تكعد ويايا ومرات تروح لبيت عمو وابقى وحدي .
لزمت نفسي هسه شلون حفوت للحمام ؟
اتذكرت شفت حمام برا .. انداريت وطلعت من باب الاستقبال استخدمته بس جمدت من البرد ..
طلعت دا اغسل ايدي ع المغسلة ..
حسيت صوت وراي ..الكراج مطفي الضوا دنيا ليل بس ضوا الحمام ضارب وصاير اجواء فلم رعب .. انداريت وما احس الا عباس واكف
كمزت من كل حيلي وانداريت
ابتعد .. ارجوك لتقترب
تقرب مني ، كتلك لتقترب .. ابتعددددد
حاولت الزم الباب مال الشارع لزمني : انت شبيج لاكفة .. انت هيج عايشة خيط وخيط ؟
-لتلزمني
-اي ماشي شبيج ما راح الزمج بس اهدي
-انطيني سويج سيارتي دا اروح وغراضي هماتين
- انت خايفة مني ؟
-لتقترب حذرتك لتقترب
اتقرب مني .. انسطلت ويا الباب حجه : مو اني اللازم تخافين منه ، اذا اكو وحوش حقيقية المفروض تخافين منها فهم الحواليج
رفعت وجهي باوعت بعيونه
همس : ثقي بالله لو ما اني مجان وكفتي على حيلج هيج ولا كدرتي تباوعيلي هيج اني لان خلصتج من سمومهم .. سواوا بيه اللي سووه ؟
حجاها وجر ورفع راسه وهو يأشرلي ع اثار التعذيب اللي بجسمه .... يتبع
لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم
❤️💙🌺🌹💙🌺🌹💙❤️💙🌺🌹❤️💙🌺🌹❤️💙🌺🌹❤️💙🌺🌹
أدخلوا واعملوا متابعة لصفحتي عليها كل الروايات بدون لينكات بمنتهي السهوله من هنا 👇 ❤️ 👇
❤️🌹🌺💙❤️🌹🌺💙❤️🌹🌺💙❤️🌹🌺💙❤️🌹
تعليقات
إرسال تعليق