رواية علي حافة الثأر بقلم زينب ماجد الحلقه الثالثه حصريه وجديده
حطيت ايدي على گلبي ووكفت اباوع واترقب من بعيد ، بلشت اسمع صوت عباس وهو ديحجي وياه بصياح ، رجعت الباب وركضت سحبت الروب الصوف ولبسه وكمت الفه على جسمي واتستر بيه .. واشد على خصري .. طلعت ليبرا ، عباس ديكوله : روح منا توكل
وذاك يصارخ ويكله : ما راح اتحرك منا لا ما تطلعلي المصونة الراحت ويااااها طلعهااااا
فتحت الباب وبملامح حادة وصوت واضح حجيت : عباس شديصير هنا ؟
اندارلي : ست هذا الرجل ديتهمج انت الج ايد بمشاكله ويا زوجته
-اني ما كاعد اتهمها اني رايد اسئلها
- ومنو سمحلك تسوي كل هذه الشوشرة والضوضاء بالباب وامام الناس من اجل سؤال ؟
-اني خابرت وانت ما تجاوبين
- ولما ما جاوبت اجيت لبيتي ، العفو هذا يتسمى اقتحام واني مضطرة ابلغ الشرطة اذا ابتعدت
- خوية اني رايد اسألج بس شرطة وضوضاء وضلمتيها انت الج ايد بسوايات ندى احلفج بكل غالي وعزيز على گلبج .
باوعت لعباس : مو من المنطقي يتكلم بهالصوت العالي برا تكدر تتدخله بالحديقه
 |
فتحله عباس الباب ووكف على يساري واني سويت مجال ديفوت ، حجيت : اكدر افتهم شصاير ؟
- وين وديتي ندى لما اجيتي عليها
-العفو انت دا تحقق ويايه !؟
- اني رايد اعرف انت ويييين خذيتيها
انهد عليه عباس وكاله : نصي صوتك واحجي باحترام لا اخفت صوتك افتهمت
حجيت : لحظة ، اني وصلتها لاهلها وطلعت باجتماع قريب وقبل نص ساعة وصلت البيت ، شنو المطلوب واكدر افهم الصاير !؟
-انت تعرفين ندى جاي تخوني !؟
- واني شيخصني بينك وبينها جاي على بابي وعامل شوشرة بنص المنطقة ، عباس اتصرف واصرفه واقفل الباب ، بالعجل .
-اسمعي اني مرتي واعرفها خوش مرة بس من رافكتج ولليوم اخلاقها تغيرت ، لو جان الج ايد بمشاكل زوجتي وانت الجارتها الهاطريق والله لا ادفعج الثمن غالي واندمج ع اليوم الصرتي بيه خوش لو لا .
- غيرت رأيي ، لتصرفه وشمر اديك .
عباس سبقها ولزمه من ياخته وجابله البوكسي بنص وجهه ، سلاح عباس بظهره بسرعة سحبته كاعد يندارلها من اخذت سلاحه .. الولد ضرب عباس ووكعه للكاع .
دنكت تريد تسحب اقسم السلاح قوي اقوى من ايدها، بالكوة جرت اقسام وهي حاطته بين رجليها.. وهو يتلاوى ويا عباس رفعت السلاح صار كدامها
داست ع الزناد وغمضت عيونها ، لما السلاح ثارت منه طلقة وطلع صوت كلش قوي شمرت المسدس من ايدها وحطت اديها على اذاناتها
فتحت عيونها الطلقة جاية بضلعه
وعباس مفتح عيونه حيل : هاي شسويتييييي
تباوعه بكل خوف وهي تضوفه كام يلزم بظهره ويلوب بالكاع ويصيح .. تفرك بوجهه وتتراجع وتكله : شيله اشمره بره ، طلعه بسرعة .
- شسويتيي لخااااااطر الله كتلتييييي انت شنو من بشر انت تخووووووفين
تركته وركضت للبيت ،كامت تتعثر بطريقها رغم ماكو شي كدامها ، ترجف من فوك ليجوا اخذت تليفونها تحاولت تضغط وتدور رقم ابوها مكاعد توازن نفسها من التوتر والخوف الصابها .. داست اتصال رن رن .. رد ابوها : الو
: قتلته بابا اني قتلته
صرخ : قتلتي منو فياااان انت وين
- اني قتلته بابا ، من وراه اختي ماتت اني قتلته قتلته .
شمرت التليفون وانزوت بحافة القنفة و لمت نفسها وحطت اديها على اذاناتها وكامت ترجف.
بالأثناء عباس كاعد يشيل الولد على ظهره يريد يسعفه للمستشفى دك تليفونه .. وهو يحطه بالسيارة ، سحب تليفونه .. رد ،اجا صوت بصياح وهو يكله : فيان وينها شديصييير وياها .. وين انتم .
- فيان صوبت واحد بالسلاح سحبته من ظهري واني اتلاوى وياه والولد هذا كدامي دمه يجريييييي
- دير بالك تاخذه مستشفى دخله البيت فورا
- راح يمووووت
- ميموت دخله البيت ونفذ الاوامر بدووون نقاش راح يجي دكتور فورا ، واياك وبالك احد يدري بالموضوع ، احركك انت وسابع جد من اصلك لو طلعت كلمة وحدة احملك القضية كاملة واضيع عمرك كله وووووالله
سد الخط بوجهه عباس كام يصيح ويكفر ويدفر بالسيارة ، رجع شال الرجال على جتفه ودخل بيه للبيت ، هي منزوية وترجف .
كام يصرخ عباس ويكللها : انت مريضة نفسية انت مكانج بالشماعية مو بين الناس ... انت دماااار على البشرييييية ، كتلتي بشر عنده عائلة واطفااااال ولج هجمتي بيته وما كفااااج كتلتي انت شنوووو
كامت تصرخ وتبجي وهي تحط اديها على اذانها
وهو يكللها : ما جان لازم اسعفج من وكعتي ع الكبر لو عايفج تتجمدين وتموتين جان خلصت البشريييية من سمج ...
كام يفتر ويصيح بالبيت وهي ترجف ..
انسحب الباب مال البيت طلع عباس الهم بسرعة ، صرخ ابوها : فيان وين
حجاها ودفعه وفات .. فات شوان واخوه ودكتور شايل جنطة طبية بأيده ..
ركض شوان للرجال .. ودلشاد لبنته ..
هي تبجي ومنزوية .. كومها وكاله : شوان اخذها بسرعة انت ساعد سيروان ونقلوا الولد للغرفة ووفروا للدكتور اللي يحتاجه.
بمجرد ما كومها دلشاد حتى يمشيها لاحظت سيروان طب .. انتفضت من ادين ابوها وكامت تصرخ : دورك وراه .. راح اقتلك بيدي افتهمتتتت حق جيهاااااان راح اخذه من عيووووونك يا حقيييير
وكامت تذب بروحها تريد تكتله وابوها يجر بيها .. صاحله : شوان شيلها لغرفتها وحاول تهديها ، بسرررعة
كام شوان يحاول يسحبها وهي تصرخ : اشررررب دمك يا كلب اديك ملوثة بدم اختي ... دمها باقي بركبتك مراح ارتاح لا ما اشووووفك مييييت .
جرها شوان وصعدها غصبا ما عليها .. اول ما دخلها الغرفة سطرها راشدي وسحبها من شعرها : منو اليهدد اخوية انت ، لسانج هذا اكصه وركبتج هذه احزها لو فكرتي مجرد تفكير تمسين اخويه بسووووء افتهمتيي
دفعته منها وهي تكله : اطلع برا اطلع منييييي
سطرها الراشدي الثاني .. شالت التحفية اللي ع الميز وصوبتها باتجاها وخر بسرعة منها اجت بالباب واطشر الكزاز بكل الغرفة ..
بعدها تريد تجر التحفية الثانية
دفعها ع السرير وحط ايده على حلكها .. خنكها كامت ترافس برجليها ..
فات ابوها للغرفة جره من عنده : انت شدااااا تسوي ... ابتعدددددد
دفعه منها فزت وهي تكح بقوة ..
وهو يكله : دا تشوف بنتك شدا تسوي لو ما موخر راسي جان صوبت الاكزاز برااااسي هذه صار لازم نشمرها بمستشفى المجانييين مو صاحية مو صااااحية.
كامت من السرير تريد تهد عليه لزمها ابوها وهي تكوله : اتركني اذبحه ... اتركنييي
دلشاد : اطلع من كدامها شوان
- فيان دا تقتل بشر وانت دا تدافعلها وتكلي اطلع منهااااا
- شوااااان كتلك اطلعععععع
- انت دا تشجعها على افعاااالها .
- دا احجييييي وياك شوووووان
كام يخزر بيها وطلع وهو ينتر .. سحبها دلشاد وهو يكللها : اهدي احاجيييج اهدي
- اريد اقتلهم كلهم اني اريد امووووت .. اقتلني بابا اني لو ما متت مراح اكدر اعيش وهالوجوه اللي قتلوا اختي موجودين اقتلني .
- اهدي ، اهدي دا اكولج
- اني اريد امووت ، اقتلني الله يخليك بابا اني اشتاقيتلها اشتاقيت لصوتها اقتلوني وريحوا العالم مني وريحوني بابا الله يخليك
- محد مراح يتقرب منج او يلمس شعره منج واني بالحياة .. اهدي بابا اهدي .
حضنها وهي ترجف بين اديه ، كعدها وطلعه ، اخذ تليفونه وخابر على امها ، ردت : الو
- انت وين
- شرايد بعد !؟ حجيت ويا فيان ومترد انت وبنتك تصافوا لتدخلني بمشاكلكم
يان قتلت شخص ودخلت بحالة انهيار وين ما جنتي اتركي من ايدج وتعالي .
- شلون يعني قتلت شخص منو هذا الشخص ؟
- تكول اللي قتل اختها ما كاعد افتهم عليها .. بسرعة تعالي ، بس ما اريد احد يعرف خصوصا الديوث زوجج
- احترم نفسك ولتتجاوز افتهمت
- معناها احترمي نفسج انت وتعالي شوفي دورج كأم وياها .
سد الخط بوجهه
شوان نزل بعجلة .. فتح باب الغرفة اللي ادكتور دا يجري العملية بيها واشر لعباس ، اجاه عباس : نعم
- امشي وياي هنا
مشى وياه للصالة .. كاله : سولفلي بالتفصيل شصار.
- أستاذ هذه الإنسانة مريضة ومكانها المصحة مو هنا
- لتلغي زايد لك واحجي ..
عنتر عباس وعقد حاجبه من شافه يتأمر عليه ويشمر ، حجه : اذا عندي حجي احجي فللسيد المدير العام مو لأي أحد .
لزمه من ياخته : اسمع لك ، احطك جرا قندرتي واسحكك بيها افتهمتتتت
دفعه عباس منه وهو يكله : احترم نفسك ولا تجاوز اني كاعد اشتغل مو خادم عندك ولا عند غيرك افتهمتتتت ولو راتبي اخذه منك احطلكياه ع القندره
فتح عيونه شوان من شافه يحجي وياه بهالصلافة : اتلازم وياه وعباس تلاوى
نزل دلشاد وهو يكلهم : وكتكم انتم؟ العالم وين وانتم وين شوان اجرك من فوك تعلك هنا
صرخ شوان : اطلع من برا ... ولا ما ندمتك ما اطلع اني .
دلشاد : مو وقت يطلع ، شنو اسمك انت ؟
- عباس ، استاذ الراتب بعده بجيبي وما صارف منه ربع الله يخليك اخذه واعفيني من هالشغل او تخليني ويا غير بنتك .
- انت هنا تنفذ الاوامر وبس مالك كلام .. امشي كدامي .
- دخيلك يا علي على هالورطة ، هسه اني لو ماعد ابيتي وكاتلني الفكر مو اخيرلي من هالطيحان حظ هذا ؟
يحجي ويمتمت ويا روحه .. ودلشاد يمشي كدامه ، اخذه للحديقه كاله : احجيلي بالتفصيل شصار وياكم .
- استاذ صدكني ثق بالله العظيم من باب الحرص راح احجيلك مو الفتنة عليها بس الست يحتاجلها معالج نفساني خابرت صديقتها وطلعتها من بيتها كدام زوجها بحجة طالعات ودتها لبيت صاحبها ورجعت دزت رسالة من رقمي لزوج صديقتها تبلغه بخيانة مرته وتنطي العنوان ورا ساعات هجم ع البيت واني حاولت ابعده وهي دخلته للبيت تحجي وياه صح كام يصيح ويهدد بس اني ردت اتصرف .. ما احس الا من وراي سحبت السلاح وصوبته !
خليك مني ورطتني ودزت من رقمي
استاذ اللي دا تسوي الست هجمان بيوت !
- شنو اسمه هذا الولد ؟
- ما اعرفه
- روح اتفقد محفظته واذا بيها جنسيته جيبها بسرعة .
- تأمر أستاذ .
راح عباس لكى شوان سابقه وساحب المحفظة ومفتش اولوياته .. ابتعد عباس وبلغ دلشاد بانو المعلومات يم شوان .
مشى دلشاد واخذ المستمسكات
خلص الدكتور كاله : استاذ اني اجريت العملية ببنج موضعي وطلعت الطلقة من مكان الاصابة ونظفت الجرح وخيطته وراح اكتب هذا الدوا ولازم ممرض يجي يراقب حالته .. واي تطور بالحالة يتواصل وياي
- مشكور استاذ .. اتعبتك ، شوان انطي الدكتور حقه ورافقه .
سلم عليه وطلع ..
ودلشاد صاح على عباس كاله : اتواصل ويا هوشيار يدبر ممرض شاطر بأسرع وقت .
- تأمر أستاذ
كاعد يطلع الدكتور صفت الأم سيارتها وهي تسأل شوان : فيان ويييين شصاير وياهاااااا
- فوك بغرفتها
دخلت تركض ، عرض الها دلشاد وهو يكللها لا تتركيها وحدها فيان جنت رسمي .
شمرت جنطتها وراحت تركض ..
صعدت لكت فيان متخربطة بالكاع ، كامت تصرخ وتضرب على وجهه وتصيح : وينكمممممم البنية حتموووووت الحكوووو
اتراكضوا سيروان و ودلشاد وهم يتلازمون الدرج ويصعدون ، والاناية تصيح وتحاول تشيل بيها وتصحي
فتحوا الباب ركض شوان وهو ينزل الها ويمد اديه ياخذها من حضن امها واشلها وكام ركض بيها ، وهو يصيح : افتح طريق حضر السيارة بسررررعة
كلهم ركضوا وراه وكدامه ، فتحوا السيارة وحطوها ورا وامها صعدت يمها .. فتحت عيونها وامها تكوللها : بنتي حبيبتي .. احجي ويايا فياااان .
يحاولن يحجوها يصحوها بس فاتحة عيونها ..
نقلوها للمستشفى اهلي قريب ، واتراكضوا لأسعافها ..
عباس بالبيت راح يجيب العلاج اللي كتبه الدكتور وديرجع راسه اذاه والنعاس والتعب سيطر عليه من البارحة .
وصل كاله ابوها اخذ السيارة واتبعهم للمستشفى بسرعة وابقى وياهم .. اخذ السيارة وداس بيها للمستشفى ، سأل بالاستعلامات دلوه مكانها
منوميها بغرفة ومنطيها مغذي وامها كاعدة يمها ولازمة ايدها وشوان واكف وعاقد حواجبه ، باوع لعباس ، تقرب منه وكاله : شتريد
-الأستاذ طلب مني الحككم
-اعتبر نفسك مفصول ، امشي منا
ضل يباوع بوجهه ، اندار عنه وسأل فيان اللي بين مغمضة بس كاعدة : ست اذا ما محتاجين مني ست يعني
اندارتله امها : منو انت
-سايق من يومين اشتغلت وخلوني ويا الست فيان
-جنت موجود لما صار الحادث
شوان : اطلع منا كلت لك ولا تشوفني وجهك
فتحت فيان عيونها وهي تحجي : اذا اكو احد لازم يطلع منا ومينشاف وجهه فهو انت
-انت تنلصمين وصوت مينسمعلج افتهمتيييي بعد اللي سويتي تتكسر رجليج وتكعدين بالبيت الباب متوصلي مريضة نفسية انت مرييييضة
كامتله امها : شو تعال هنا انت منو وشلون دا تتجاوز على بنتي ومنو سمحلك وانطاك الصلاحية تحجي وياها هشكل
نسيت نفسك انت لو شنو
-ولأن ما ناسي نفسي صار الوقت اللي احط بيه حد لبنتج الفلتانة
سطرته راشدي واندارت لعباس : اطرده منا ، يلا
كاعد تحجي وما تحس الا شوان تهجم عليهم ولزمها من راسها ورجعها للحايط يريد يخنكها سحبه عباس وكام يصيح تلازم وياه شوان .. وام فيان وكعتله صياح وتضرب بيه صارت هوسة بالغرفة استعلامات المستشفى والموجودين كلهم تراكضوا ع الصوت
سحبوا شوان وهو يصيح ويهدد يفعل ما يفعل بفيان .. وامها لزمت تليفونها تتصل وتبلغ دلشاد باللي سواه شوان .
بنص هالهوسة عباس باوع لفيان متمددة تباوع وتغفي .. محركت اي ساكن بنص الهوسة .. تنهد وهو يحاول يتجرع الوضع ويصبر .
اقل الساعة وامها كالتله : مراح اطول ساعة وارجع لازم اروح فورا
حجتها ومشت بسرعة : هالعائلة كلها تحجي بالفورا .. اللي يجفيني شر هيج عائلة مخربطة .
وكف كدام فيان ، نايمة وشعرها مطشر ع المخدة وداخلة بنوم عميق محاسة على شي ..
اتصل ابوها طلع وجاوبه كاله : الست الوالدة راحت واني حالياً وحدي كاله : لا تخليها تفارك عينك ابدا لازم تبقى تحت مراقبتك بالكامل اي استغفال عنها احملك المسؤلية كاملة .
تنهد وكاله : تأمر استاذ .
شهالبلوة ياربي ..
باوعلها بنظرة كلها كره واشمئزاز وهو يحجي ويتمتم ويا نفسه
- لو بيدي املص راسها والله
كل البلاوي من تحت راسها كعدت تتفرج وتتحمى ع المصايب ، ومن كملت نامت بلا شعور ، حياة البشر ارخص شي عدهم
اجا المضمد شاف المغذي مالتها واني واكف .. لزم ايدها حست ، دك تليفوني ، طلعت برا هستوني كاعد ارد .. طلع المضمد اجاني صوت اختي علياء : اعبيس وينك جيت وجه الصبح ومشيت
-يمعودة دمي يفور بعلي بودي الزمها من شعرها هيج وامسح الكاع بيها والعباس
-ها خوية خير شصاير
-يا خير يجي من وحدة عيارة خابصة الجو وشاعلتنا شعل خب اباوعلهم ماكو زلم تملص راسها وتردها ضالة على حل شعرها
وبدل ما يكعدون يحتارون بالولد اللي صوبته
حايرين بيها شاديلها مغذي انهارت اعصابها خطية ليش انهارت لان الولد الكتلته ممات .. شلون يعيش غير يموت حتى ترضى
عزا العزاها ياهي هاي
- اهو علياء شتردين خوية والله قهري لراسي كولي
- خوية عود ردت قراءة لحسوني اخوه ما ادري وين ودى قراءته وعده امتحانات وكاعد ناخذ الواجب من صديقه وبيتهم بعيد بلكت تكدر تجيبلا مدرسته يكولون ما عدنا ما رضوا يطون.
- الله كريم عود امرن على مكتبة واشوفله
- امي بالها يمك عود خابرلها
-ان شاءالله
سديت الخط .. طبيت لكيتها تباوع على ناحية الباب من شافتني دارت وجهه مني ، دخيلك يا علي بس لا سمعت حجيي عليها .. شلون يا الله تخلص شلون .. هاي اولها شلون تاليها .
وكفت بالباب دقايق وصاحتلي : رتب امر طلعتنا
-الوالدة كالت راح تجي
- نفذ بلا لغوا
ضليت اباوع عليها : هاي كاعد تتجاوزين علي لو عليمن !
-بعدك واكف ؟
ضليت اباوع عليها وكوة لازم اعصابي ما هاد عليها ودايس بخوانيكها ، طلعت منها .. مشيت ليغاد .. طلعت جكارة وادخن بحركة واريد اروح اجيب السيارة ..
مر من كدامي شوان .. باوعلي ،رد وكف كدامي : لو شفتك تمر حوالين فيان لو واكف بصفها .. راح احسب الله ما خلقك افتهمت .
ذبيت الجكارة : اني لا ميت على شوفتك ولا شوفتها هنا اكضي شغلي وافارك مفتك ، فاذا الك حجي وشليف روحك روح املي اوامرك عليها وعلى ابوها ومن ما تكدرلهم لا ترجع علي ، افتهمت حباب .
- بسيطة
طلع تليفونه ومشى ..
واني انداريت امشي .. دقايق اتصل عليّ هوشيار كالي : انسحب من مراقبة السيدة فيان راح انرصي غيرك يلتزم حراستها .
كلت خفةً، وراحة مشيت، حطيت مفاتيح السيارة بالاستعلامات ووصيت يوصلونه للست وطلعت من المستشفى خذيت تكسي، ورجعت للبيت دنيا الليل.
تلكتني اختي : ها بشّر شني ؟
- والله يا خوية فد وضعية ***
-يا ليش
-سولفت وامي كاعدة ، كالت : يمه بطل نعلت امهم لابو ابوهم يروحون يوطونك بسالفة لو شوف شتسوي بحالك وين نطي وجهنا .. بطل يمه بطل .
-بس استلمت راتبي منها اليوم .
-شكثر استلمته
-مليون و١٠٠ يمكن خل احسبه
حسبته مليون ومية وكسور
شو هاي امي شافت الفلوس وعيونها اتلامعن : صدك عود يعني ذني مليون
- خ... بيهن ارجعهن باجر واعوف الشغل
- ترجعهن شلون ما يصير يمه
- وشلي بيهن شغلهم يخوف يمه
- وانت ياهو مالتك بشغلهم سوي العليك ودير وشك وتعال
- يمه توج تكولين بطل وعوفهم وجفينا شرهم
- اي حسبالي فلوسهم ما تسوى بس ذولة يمه ما يفكرون بفلوس الصبح نطتك فلوس وما درت عنهن نستهن عدك وهسه اطكت مليون ومية .. لا يمه ضل ما تلاكي هيج شغل لو تثبتت وياهم تكوم تلعب بالفلوس لعب
علياء : ادخيل بختج يمه .. ولو صارله شي
- اني ادعيله جا اني اعرفنه عيب والله ليل مع نهار ادعيله، شو بالله جيبهن اضمهن عدي لا تضيعهن انت .
- دهاج يمه هاج ، هو اجت من الله شوان خطيبها ما يجرعني وهوشيار طلب من انسحب ما انطيهم فلس من راتبي يريدون يحطوني بمكان ثاني .. مو بكيفهم يبطلوني .
-
شمرت الفلوس على امي وانداريت جريت المخدة وحطيت راسي وصحت : علياء جهالج بروح الحسين بس اناملي ساعة ميت والقران
- اي هسه اسحبهم صدك جذب
سحبتهم من الدوانية وامي طفت الضوا وغطتني وكاعدة يم راسي والصوبة مقابيلها
واني نايم جانت احلامي كلها كوابيس
ما ارتاحيت بنومتي ابد .. خلصت الحلم كله اركض ويا الست فيان وهي تشمر بروحها من فوك واني اركض وراها بس كوابيس واحلام متعبة ..
فزيت عركان حيل وتعبان الهث
حجت امي : اسم الله الرحمن وليدي شمالك
- يمه احلامي مو زينة .. خلصت الحلم اريد اصيح ما اكدر بس اطيني مي
جرت الدولكة من كترها وصبتلي خذيته شربت وكلت : السلام عليك يا ابا عبد الله وهي تكلي
: هاي جيف جان يومك متعب وشلعان كلب صارن باحلامك .
عفت الكلاص واني اباوع : ما مرتاح ما ادري ، حيل تعبت بالحلم
باوعت لامي كاعد تحمي خبز ع الصوبة وحاطة ماعون دبس وراشي، كالتلي : اتكوم تاكلك الكيمة يمه ؟
- لا ...
سحبت تليفوني صامت
لكيت اكثر من مكالمة من ابوها فزيت
اخذت التليفون واتصلت ، رد : اهلا استاذ
، كالي : ها شلونها فيان
- الست فيان ويا الاستاذ شوان
- شوان كبل شوية يمي ما كال هي وياي
- شلون هو اجا للمستشفى احتمال رجعها للبيت
- اني بالبيت ، فيان ما رجعت للبيت !
- استاذ شوان هو اللي طلب مني وهددني لو وصلت يمها
- انت حيواااااااان ؟ اني موصيك عليها لو لا كتلك ما تفاوكها لو شما يصير لو الله اسمع لو صار شي عليها اقسم بالله ادفنك افتهمتتتتتتت .
جاي احجي اريد ابرر ..
قفل الخط بوجهي ، كمت من مكاني كالت امي : وين
- خل اروح للست نعلان .. طكت روحي والعباس
- الساعة ب١ يمه شتروحً
- دخل اروح واسلم بجلدي يا يمة ورطة تورطت وي ذول والعباس
بدلت بسرعة وكتلها : اطيني فلوس يمه
اطتني ٧٥ الف ، حطيتهن بجيبي وطلعت للشارع اريدلي تكسي ماكو ابن جيرانه موجود انتخيته ، خذاني بسيارته وصلاني للمستشفى وراح .
دخلت وكفوني الاستعلامات
كلت الهم : الست فيان دلشاد
- موجودة
دخلت جوا رحت للغرفة الهي بيها ، نايمة ..
غميتها : واني راح گلبي كلت سوالها شي لو كتلها طلعت الشرنفص نايمة
كعدت ع التخم واباوع عليها ، ما حست علي اني اجيت .. ضليت صافن بحيرة شلون اخلص منهم ذولة شلون ورطة تورطت بيهم .
كمت للتلفزيون البالغرفة شغلته وكمت ادور ع الريموت لكيته .. كمت احاول ابحث بيه وادور واصفط قنوات واطلع .. خليته على قناة رياضية اتابع بيها اخبار .
اندمجت بالاخبار وعليت الصوت وبقيت مركز ويا المقدم .. فات ابو الاستعلامات كال : العفو بس اذا تكدر تنصي صوت التلفزيون كلش عالي واكو مرضى
-اااه العفو
نصيت .. كالي : شكراً وراح
حسيت بروحي جوعان كمت من مكاني
حتى اشوفلي اكو شي ينوكل بهيج وكت
دورت بالثلاجة فارغة ما بيها ولا شي
رجعت باوعت ع الست ..
نايمة ، معقولة لهسه لا اتغدت لا تعشت لا جابوها شي ، خاف دينطوها بالمغذي لهالسبب ما كلت
ردت اطلع وفكرت اذا طلعت وما لكتني خاف تكعد
وانتبهت لشغلة .. عليت الصوت وابو الاستعلامات حس واجا ، وهي ما حست ولا حتى تكلبت !
خاف الدوه قوي
مشيت للاستعلامات كتله : اكو واحد قريب يبيع اكل حيل جعت
-اكو واحد بعد شارع يبقى مفتح مشويات للصبح
- ها، رحم الله والديك حط عينك يم الست ما اطول .. اروح واجي
- على راحتك
طلعت للشارع العام جبت مشويات ومقبلات ولبن ورجعت شايل العلاليك ، حطيتهن وهي بنفس نومتها ، عقدت حاجبي واتقربت منها : ست ، ست
مترد ، حجيت : يبلوة الله
هم متجاوب
استغربت
مشيت للاستعلامات كتله : ما كاعد تكعد عادي لو قوة علاج لو شنو موضوعها
- جايز العلاج قوي بيه نسبة منوم فخلاها تنام بهالطريقة .
- ها زين
رجعت للغرفة، على نومتها
شلت الاكل واخذت العلاكة فرشتها وكمت اصفط بيهن .. وخليت المواعين كدامي وانداريت صفح وكسرت رجلي وثنيت كصيت نص كرصة خليت شيش كباب .. ولية وطماطة شوي وبصل وطرشي ولفيتها وكليت تلث ارباعها بلكمة وحدة .. يا يابه يابوية صارلي شكثر ما ماكلي هيج اكل صدك لو كالوا الراتب نعمة
باوعتلها نايمة : هم زين طلعلي شي زين منج
ورجعت حطيت اللفة كلها بحلكي وكسرت بطل البن اشرب .. عرضلي اخوي الجبير محمد .. كون هسه مكابلني على هالصينية الطيبة .
لزمت تليفوني رمشتلا خاف نايم .. رد خابرني
جاوبته : ها ابو جاسم شلونك
- ها عباس خير امي بيها شي
- لا يا خوي كلشي ما بيها مكابلة الصوبة وتعلس خبز
- خرب بليسك راحت روحي والله كلت الا امي صايرلها شي هالمخابرني ب٣
- لا بس كدامي شلون صينية مشاوي كباب وتكة ومعلاك وعلي جاي اكل وصرت بعيني
- لا يا جلب جاي تحرنصني بهالليل واني ميت جوع
- موش كباب خايب يذوب بالحلك
- بالعافية ، صدك شني اشتغلت
- اي الحمدلله لكيتلي شغل ..
- شلون راتبة زين
- اي زين
- شكثر راتبه
- زين بس يا خوية تعب فد مصايب ما تنحجي من اشوفك نحجي
- عليك العباس حط اسمي وياك بلكت الله اخلص من هالعمالة الكسرت ظهري
- الله كريم ، ما محتاج شي
- الله يسلمك ، بس من تستلم عود ناوشني محتاج بروح ابوي
- سهلة سهلة ، ان شاءالله اخذ راحتك .
سديت الخط منه وكمت الاكل عود جان ابالي اضم للست بس كثر ما جوعان كليته كله بلا ما احس لو اذكرها ..
لميت الهوسة وشمرتهن بالزبالة ورحت غسلت ادية رجعت لكيته ، نايمة صفح ومتغطية بس الغطا ملتف وياها وهي لابسة بيجامة وتيشيرت .. ظهرها طالع .
اتقربت منها وجريت البطانية وعدلتها
هسه امها من راحت وكالتلي شوية واجي شكالت لروحها من راحت بلا رجعة ، يوم الشفتها خبطت الدنيا وبتي ويا بتي كلت راح تموت بصفها .. شلون كدرت تنام الليل وهي ما تدري عن بتها
شو عوائل مدري شلونها
هسه مأمنيها وياي وهي بنية شعرفوا عني ؟
يمكن مو زين يمكن اتحارش بيها اسويلها شي لو اصورها بوضع مو زين وهي فاقدة واكعد ابتزها .. من باب خبصوا الدنيا عليها ومن باب شمروخا بالمستشفى وكلهم ببيوتهم نايمين !
فتحت كنتور صغير وطلعت منه بطانية و تمددت ولزمت الريموت .. غفيت بمكاني واني اباوع .. لحد ما صار الصبح .. اجا ممرض عمره جبير .. كاعد ينطيها علاجها ..
شلت الغطا من جسمي وكعدت اطكطك بعظام ركبتي تشنجت من النومة ع القنفة .. كتله : اخوي هو طبيعي تضل هيج ما تكعد ؟
- طبيعي .. تحت المراقبة ما عليها شي .
- مشكور
راح كمت للحمام غسلت وجهي واجيت مقابيلها .. ما كاعد تحس على شي ابداً ..
شوية اجا الدكتور ، فحص نبضها عاين حالتها ، حجه : اخذت علاج غير اللي كتبناه الها !؟
- اجا الممرض انطاها العلاج
- انطاها العلاج ! يا ممرض انطاها علاج اني بعدني ما كاتبه !
- ما اعرف قبل شوية اجا
طبك سجله وطلع تبعته .. حجه ويا الاستعلامات عن اسم الممرض اللي بالاستعلامات صفصف وكاله : الدكتور نادر هو المسؤل عن حالتها
- المريضة البارحة جابوها وكتبت الها مغذي ومقوي ومهدأ .. ما جان بيها شي غير نوبة عصبية
باوعلي اللي بالاستعلامات وكاله : تمام دكتور اتفضل وياي وهسه نشوف الدكتور ونحلها .
سويت حركة بوجهي بمعنى ما افتهمت شي ورجعت للغرفة .. هي نايمة .. خابرني ابوها كتلة : استاذ بس نايمة .
- اذا كعدت بلغني، الولد صحى واتفقنا وياه وحلينا الموضوع بمبلغ من المال وراح ندخله مستشفى ونتكفل علاجه كامل. .. خلينا نخلص من هالموضوع تعبتي واني شغلي لراسي وعندي انتخابات ما فارغ لهالامور بيك ما بيك تسيطر على فيان لا تخليها تطلع عن سيطرتك ابداً .
- ان شاءالله استاذ
سديت الخط .. هي ست شرنفص يتسيطر عليها حتى اسيطر .. الله يساعد التصير عده .. تشيب راسه وعلي .
رجعت كابلتها وكعدت ما رجع الدكتور ابد ..
طلعت الظهر شفته كال : اخي الحالة مو يمي
- يم منو
- ما اعرف .. مو شغلي
حسيته كاعد يتهرب من الجواب ويبعدني ، تركته طلعت حتى اجيبلي شي لان هي ما حاسة على شي .. شفت شوان ركب سيارته ومشى ..
اجا لهنا وما مر بيها، لعد شعده هنا ؟!!
جبت لفة وقوطية ورجعت .. شفتهم كاعد يحاولون ينقلونها : لحظة لحظة وين ؟
- لازم ننقلها للعناية الخاصة تكون تحت المراقبة .
- لعد شكو منوميها بالمستشفى اذا مو تحت العناية الخاصة !؟
-هذا شغلنا اخي ابتعد رجاءا
- اعتذر ابوها طلب تكون تحت مراقبتي مو مراقبتكم ممنوع .
- اخي هي بامان بس حالتها صعبة ولازم ننقلها عناية مركزة
-عناية مركزة مرة وحدة شبيها ضاربتها طلقة لو سيارة ؟ اتخربطت وكعدت عادي وما ادري شنطيتوها وكاعد تنام ما تكعد.
- ابتعد بلا زحمة خلي نكمل شغلنا
-اذا ما راح تبقوها هنا ، مضطر اخذها منا
-تاخذها بكيفك هاي مسؤلية واحنا نوكع بيها
- خوية خصم الحجي ممنوع تتحرك منا اني مكلف بيه وبمسؤليتي انت تخاف على رزقك وكاعد تسوي شغلك واني كذلك تعارضوي اخذها واطلع
ضل يتحاجى وياي عرضت ما خليتهم ينقلوها
كامو يتخابرون ويتحاجون وهوسة وبلبلة .. خابرني شوان كالي : اني مو كتلك ممنوع اشوفك حواليها انت ما رايد روحك ؟
- اذا عندك شي قدمه للاستاذ دلشاد هو اللي دزلي الاوامر واني نفذت
- اسحك راسك لك ، محد اله كلمة فوك كلمتي افتهمت تطلع منا فورا ولو اجيت ولكيتك حوالياها .. اندمك والله .
قفل الخط بوجهي ..
خابرت ع الاستاذ دلشاد جاوبني بس مشغول حجيتلا الكاله شوان : كالي مالك علاقة باي احد انت مسؤل عن حالتها وسوي اللي تشوف لازم .
رحت اجرت تكسي وكتله انتظر هنا
ورجعت ع الغرفة .. اصحي بيها وما تصحى .. كمت اجرت كرسي متحرك وجبته .. شلتها وكعدتها ع الكرسي شفت تليفونها صاير جواها خذته حطيته بجيبي ومشيت بيها ..
فز ابو الاستعلامات غير الجان كاعد بالليل ، كال : وين وين اخي
- لازم نطلع صار شي ضروري ولازم نروح
-بس لازم ابلغ الادارة
-روح بلغ اليعجبك .
مشيت بالكرسي رادت توكع ..لزمتها وضليت ايد ادفع وايد لازمها بيها صعدتها بالتكسي.. خابرني شوان ما جاوبته ..
شوي ورج تليفونها
باوعت مكتوب بالكردي ..
رديت .. طلعت امها .. : الو مو اخابر من البارحة ليش محد يجاوب
-ست هستوني جاي اطلعها واخذها للبيت
-ليش هي مطلعت خابرتها البارحة الظهر كالتلي راح ارجع للبيت وما بيه شي !
- ما ادري شوكت خابرتج
-ورا ما طلعت منكم بساعتين ردت ارجعلها وكالتلي ماكو داعي راح اطلع بس تخلص المغذي
-المغذي خلصته ورا مطلعتي باقل الساعة وشالوا منها
- هسه هي وين
-طلعتها من المستشفى
- هسه يلا طلعت من المستشفى
-محاسة على شي تحسيها فاقدة !
-شنو القصة شصاير وياها
- ما اعرف اني هسه بوجهي للبيت
-طيب اني ساعة واجيكم .
خذيتها ومشيت بيها للبيت
فتحت باب البيت وسحبته .. جانت المساعدة ما البيت موجودة كاعد تنظف بالبيت ..
شلتها وساعدتني نوصلها لغرفتها .. شمرتها وهي ما حاسة على شي .. كلتلي : متخربطة هي لو شنو
- لا بس نايمة
-وشنو من نوم هذا اللي مكاعد تحس بيه ؟
- ما اعرف والله يا خوية
-زين متعرف شنو سبب الدم البالكراج شصاير
-الست كتلت واحد ما اعرف شنو السبب بس طراطيش فهمت هذا الرجال اله ايد بكتلة اختها
- كتلت سيروان !
عقدت حاحبي : سيروان منو ؟
- اخو الاستاذ شوان
- اخو شوان هو اللي كتل اخت الست فيااااان !!!
يتبع
لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم
❤️💙🌺🌹💙🌺🌹💙❤️💙🌺🌹❤️💙🌺🌹❤️💙🌺🌹❤️💙🌺🌹
أدخلوا واعملوا متابعة لصفحتي عليها كل الروايات بدون لينكات بمنتهي السهوله من هنا 👇 ❤️ 👇
❤️🌹🌺💙❤️🌹🌺💙❤️🌹🌺💙❤️🌹🌺💙❤️🌹
تعليقات
إرسال تعليق